رواية بنات الحجي السعيد الفصل الحادي عشر بقلم شمس العراقية
جنات ـ مسحتها على السريع وفزيت على صوت لقاء وما لحگت أجاوبه گبل سديت الموبايل وهي سحبته مني صحت بيها شگو شبيج
لقاء ـ شجنت تسوين بالمطبخ وكل الناس كاعدين يعني عاجبج عمتي نجلاء تگول جنات وين ولاحظت عليج وذبت كلامها مثل السم أني حيرتي بيج شعندج كل شويه منهزمه .
جنات ـ شعندج قابل أجيت حاجيت صديقتي .
ـ لو طبيعتي أسب جان سبيتج أنتِ وصديقتي أمشي كعدي حالج من حالنا وهذا الصخام المأخذ عقلج ما تشوفينه ونرجع البيت ونتفاهم عليه يله كدامي .
ـ خلت موبايلي بجنطنتها ورجعنا كعدنا وعيون ماما جواهر عليه هزتلي رأسها غمضت عيوني يعني ماكو شيء ، رجعت شاركتهم فرحتهم بس حسينا وضع عصماء مو تمام ولقاء تحجي هي وليال ما فهمت شگو شببجن .
لقاء ـ الحيايا عماتج ذبن سمهن ميتات من قهرهن شلون ما أخذنا من بناتهن وحايرات وطاگات شلون يخربن فرحتنا وفرحة عصماء من شالجن الله وخلصنا منجن هاي نجلاء بيها دوده شلون ما تحجي شلون ضامه سوالف باسل بگلبها وشلون عصماء ما تدري .
ليال ـ گافي سگتي جديتي سگتتهن وعصماء أول تالي تسمع كلام ، والماضي ما ينضم وبالأخص عماتي ما يضمن سالفه يموتن على السوالف والمشاكل والمفروض باسل يگول الها ويسگتنهن ليش ضالات يشمرن گلام ..
أجه باسل سگتن شوفي الواكه يبوسن بي عود فرحانات أني هيج بشريه بوجهين ما شايفه .
جنات ـ أباوع على باسل فرحان طبيعي ولا كأنما بيوم جان يحب عُلا وعارض وصارله سنين محارب أهلي عليها ومشاكل هو وياهم شلون الواحد بسرعه ينسى ويتخطى ويعيش حياته يعني معقوله قرر يفتح صفحه جديده من دون حب عُلا ويا ترى كل الزلم هيج أذا أني وعماد لا سامح الله أفترقنا وما أنجمعنا هم يحب ويتزوج غيري وينساني مثل باسل! ...
خلصت الحفله ،ورجعنا البيت وأول ما دخلنا البيت باسل سأل أمي .
باسل ـ يمه عصماء شبيها .
هيفاء ـ شبيها
ـ أني اسألج شبيها
ـ ما بيها شيء مثل الورد ليش ماما صاير شيء
ـ لا ما صاير شيء ، بس حسيتها ضايجه وتتصنع ضحكتها تجاملني مجامله وأني هيج أمور ما تعبر عليه من نظره أعرف الشخص شبي ما بي
ـ لا يمه بالعكس فرحانه وطاير عقلها بيك منين طلعت بهل السالفه ، أسم الله شگو قابل
ـ يمه عليج الله عصماء خوما أهلها جابرينها عالزواج
ـ لا يمه جابرينها شـــــنو منين تجيب هالحجي شبيك أمي
ـ خير أن شاء الله ، أني أعرف شبيها .
جنات ـ طلع من البيت ولقاء كامت تحجي على أمي .
لقاء ـ ليش ما خليتنا نححيلها بسوالف عمتي نجلاء شلون ذبت كلامها على عصماء هسه يضل يلح على عصماء وتگوله ويرجع علينا ليش ما حجيتلي .
هيفاء ـ لا ماما عصماء مو جاهل مو من هذا النوع البنيه عاقله لو تريد تحجي جان سألتني جان سألت وحده منجن وعمتج حقاره منها حايره شلون تخرب هالزواج .
ليال ـ من حقها تعرف خطيه ليش باسل ما حجالها
هيفاء ـ شيحجي الها ماما ، هو ما صدگنا وافق يتزوج أنوب نرجع نفتح دفاتر ونذكره وهو أختار ووافق بأرادته محد جبره صح ابوجن قسى عليه وعمامج وولد عمج حجوا وياه بس هو أخذ وقته وفكر وشاف الأنسب يتزوج مو مال يضل مشاكل هو وأبوه ويشوف حياته وأذا يريد يحجي لعصماء هو يحجيلها بالوقت المناسب بس دودتج عمتج شيكصرها .
لقاء ـ الله يخلصنا منهن على أهون سبب .
جنات ـ دخلنا الغرفه وعيني على جنطة لقاء أذا أخذ موبايلي بس أخاف منها تعيط بيه ، دخلن سبحن بس أني ضليت وكعدن وباوعلي .
لقاء ـ ما تكومين تسبحين
جنات ـ بارده شعندي سابحه بس أغير ملابسي
لقاء ـ بالجنهم لاتسبحين بس گومي غير ملابسج شعندج كاعده مثل التمثال .
ـ أريد موبايلي
ـ وشسوين بي ، تموتين أذا ما لزمتي يوم أحنه مو وياج بس كد الدراسه وكلنا عدنا صديقات بس مو أربع وعشرين ساعه لوك لوك لو أكو واحد مشكل عالخط .
ـ لا ماكو أذا اكو خايفه منج
ـ لا يبوي ما خايفه ليش تخافين لان صلفه مو بأيدج أستورارث من الماما جواهر .
ـ وهي شعليها .
ـ لا أدافعين الها لا أگوم اشيل رأسج وگومي غيري ملابسج والموبايل ماكو لو تحجين شعندج لو تحلمين تشوفينه بعينج .
ـ أهووو ترى ماكو هيج تدخل بكلشي تتدخلين أني رايحه أكول لـ أمي تشوفلي حل وياج
ـ وين موليه على أمي ناقصتج كافي عليها باسل كعدي وانجبي والموبايل بعدين شگو كمتي تموتين
ليال ـ گافي وأمشي غيري ملابسج .
جنات ـ غيرت ملابسي وهنا يحجن ولقاء فتحت جنطتها وشمرت موبايلي عليه الف الحمدلله باوعتلي وگلبت عيونها عليه ورجعت فتحت موبايلها .
لقاء ـ هاي عُلا مراسلتني
ليال ـ عُلا!! شتريد منج ليش من يمتى تحجين وياها .
لقاء ـ مو من زمان مأخذه حسابي من متابعين باسل وتعرفني اني قريبه منه وأجتي عليه تتقطس أخباره
ليال ـ ها هيج الحجي لعد تعالي أحجيلنا أثاري الأخبار كلها عندج . .
لقاء ـ يا أخبار يمعوده كاعده وتبجي قبل شوي راسلتني وتگول خلص باسل راح يتزوج ويعوفني هاي هي يمكن ما مصدگه لحد الان
ـ ليش ما تتواصل وياه
ـ لا عايفها من صارت المشكله بيت جدي وباسل عاف البيت
ـ حرامات ما حضرنا وشفنا شصار
ـ شتحضرين يمعوده بس قهر ، يعني تصوري أبويه گايله أغضب عليك ليوم الدين وأتبرأ منك أذا تضل هيج مخربط وملاحگها .
ـ والله أهلي وعاداتهم وتقاليدهم ولان أعزب شلون تأخذ مطلقه يحسسوني المطلقه ما أعرف شبيها هما وعقلياتهم المريضه .
ـ والله فد مقهوره على عصماء المسكينه
ـ الله يكون بعونها ، أكلج صُدك باسل شلون وافق
ـ وافق بأرداته
ـ شلون يعني هيج من كيفه وافق! وحبه لعُلا جانت هي وبس شبسرعه هيج نسى ولو أبن عمه منو! .
ـ خيتي الشخص من ينعزل بزاويه والكل ضده وأولهم أهله وصار شگد يحارب وماكو نتيجه وأجاهم بكل الطرق ما كدر يقنعهم أكيد شاف روحه بالأخير هو الخسران والأفضل يرجع لأهله ويعيش حياته .
ـ عليج الله هم حجالج شعوره أحجيلي أنتِ قريبه منه
ـ لا ما احجي هذا الشيء خاص بي وهو مأمن بيه وحجالي وشيفيد أذا حجيت
ـ هسه أحجي وفضينا لا شفتي نفسج شوفه علينا والله صديقته وقريبه عليه .
ـ شوفي مستحيل يگدر ينساها بسهوله بس يحاول يتعايش ويتنساه لان القرار قراره لازم يتحمل ويساعد نفسه والله من حجالي شلون ودعها ومخنوك ومقهور وضايج عليها وهي هواي تحبه ومتعلقه بي يعني تصوري گايلته لاتعوفني والله ما أحجي وياك بس أبقى من بعيد أعرف أخبارك أنت بخير بس هو ما قابل لان يدري بروحه اذا بقاها يحن الها وأذا حن وعصماء بحياته صعبه يكون ظلم نفسه وظلمهن وياه لهذا أبتعد نهائي
ـ يعني هسه مايحجي وياها
ـ شبيج أنتِ أكول الها ثور تگولي احلبي لعد شجاي احجي ، الأعرفه ما جاي يحجي وياها حسب كلامها أخر مره حاجيه ويه من رجعنا من الخطوبه مراسلته مباركتله واجتني تبجي وگالت أنتهينا ما تشوفينيها أجتني وتريد تعرف أخباره مني .
ًـ هسه شدازتلج
جنات ـ أني هم أريد أشوف
لقاء ـ أي مو مسرحيه تشوفين
جنات ـ فتحت رسائلها ودازه بصمات صوت فتحتهن. وتبجي
عُلا ـ لقاء بداعت كل عزيز عندج دزيلي صورته وهو كاشخ بالخطوبه وصورتها هم حابه أشوفها أريد أشوف الأنسانه اللي راح تعيش وياه وتصبح وتمسي على وجهه الأحبه والله جاي أموت فدوه اروحلج دزيلي أصبر گلبي جاي أموت .
لقاء أمانه من تفتحين البصمات جاوبيني لاتجاهليني كافي عليه هو ما أكدر احجي وياه الله يخليج حسي بشعوري
ليال ـ ديري بالج أدزين أي صوره والله يعدمج وهو يمشي ويوصي على الصور ما شفتي اليوم سحب كل الموبايلات ما خله وحده تصور بس أحنه صورنا .
لقاء ـ لا شبيه خبله بس خل أكول الها باسل ما قبل نصور أي صوره بلكي تكطع نفسها
جنات ـ راسلتها ورجعت دزت
عُلا ـ ليش ما يقبل! لازم هواي حلوه ويخاف عليها مو عليج الله لقاء حلوه مو وشنو أسمها؟
لقاء ـ وشيفيد أذا گتلج
ـ يفيد بس ريحي گلبي وگوليلي حبابه والله جاي أموت
ً ـ وشجابرج تموتين نفسج علمود رجال قرر يبتعد ويعيش حياته وفتح صفحه جديده وأنت لا أول ولا أخره وحده حبيبها يعوفها ، نصيحها عوفي أخباره كافي صارله عمر محارب أهله علمودج وضلوا على رفضهم لاخير شطالع بيده أكثر من هيج وحفظي كرامتج وكافي تعذبين نفسج وعيشي حياتج وادعيله الله يوفقه بحياته .
ـ أدعيله يتوفق بحياته ويه غيري شتحجين لقاء
ـ عُلا لاتصيرين أنانيه وأنتِ زين تعرفين ما تنجعمون شتسوين يعني تردين يضل يتواصل وياج وهو على ذمته أنسانه ثانيه لو نفرض أنتِ بمكان خطيبته ترضين غيرج تراسله .
ـ لا أكيد ما أرضى
ـ دام ما ترضين على نفسج لاترضينه على غيرج
ـ الله يصبرني على فراقه
ـ أمين يارب وبعوضج ويوفقج بحياتج
ـ صعب أحد يأخذ مكانه ، عالعموم اسفه أزعجتج بس حبيت أعرف أخباره منج لا أكثر
ـ لا تدللي
ـ تسلمين باي
ـ باي .
ليال ـ أكولجن ما أرتاحيت الها هاي ما تعوفه وگولن ليال ما گالت يعني هو عايفها وجايه تتوسل بيج على صوره
لقاء ـ هي مال تعوفه ما تعوفه ما سمعتي صوتها مطبك منتهيه عالأخير بس بعد المسأله أنتقلت يم عصماء هي وذكائها وشطارتها ولو أشوفها قويه ومن أول يوم سحلته تعجبني هيج نساء ما لاحظتن عليه
جنات ـ اني ما لاحظت
لقاء ـ أنتِ ملاحظاتج بالموبايل .
ليال ـ لا أني لاحظت عليه ومن يراسلها تلگينه مبتسم
لقاء ـ خطيه الله يسعدهم والله لايگين لبعض يخبلون
جنات ـ كلش لايگين
لقاء ـ أي وشعجب مكابلتنا ما مگابله موبايلج
جنات ـ أنتِ تالي وياج
لقاء ـ عيني عليج لما تصيرين أدمي
جنات ـ ليش شمسويه عفيه ليال أحجي وياها .
ليال ـ لقاء خفي عليها وأحنه من نحجي عليج لصالحج ومنا وهيج رايحه راجعه من بيت جدي على هواج ماكو تروحين ويانا وبس حتى نائل ملاحظ عليج رجلج صايره خفيفه!
جنات ـ ماشي
هيفاء ـ ليال لقاء جنات تعالن تعشن أخوجن جاب العشه
ليال ـ أي ماما أجينا
جنات ـ گمنا تعشينا وباسل أجه من بيت جدي وحسينا بي ضايج حتى ما تعشى .
هيفاء ـ شبيك ماما
باسل ـ لا هيج ما بيه شيء .
هيفاء ـ باجر تعقدون محكمه أن شاء الله دام التحليل طلع .
باسل ـ اي الله كريم
جنات ـ گملنا وعفتهن ورحت الغرفه فتحت موبايلي ما مراسلني الحمدلله كبل دزيتله حبيبي وينك
عماد ـ كاعد أنتظرج وين رحتي
ـ أسكت وخليها بيت أهلي عليها حصار ، أي شلونك
ـ زين الحمدلله ، بس تعاي منو هاي البنيه البصفج
ـ وشعليك بيها تسأل عليها
ـ على كيفج ترة سألت منو وشبيج كبتي
ـ مو فوك كاتب منو هاي الحلوه عادي عندك تكول حلوه على غيري .
ـ أي مو أستغربت الصوره وسألت ما عندي بيها شيء لاتفسرين على كيفج
ـ هاي أختي لقاء
ـ الله يستر عليها
ـ وين أنت
ـ بالبيت والله وأنتِ يا بيت
ـ بيت أهلي
ـ ليش مو بيت جدج عبالي اليوم أسهر وياج البيت فارغ الأهل طالعين بس أني وحدي !
ـ ها ليش وين رايحين
ـ أمي أخذت أختي وراحت معزومه يم خالي وهدوء تام
ـ ها حلو
ـ ما الله يهداج وتحليني بصوتج
ـ لا وين أني بيت أهلي
ـ وأني مشتاقلج شلون صبريني لعد
ـ شصبر منك حبيبي ما أكدر
ً ـ دزيلي صور هذن ما شبعت شوف منج أريد بملابس البيت وبكفشتج أحبح على الطبيعه
ـ أوك حبيبي هسه أدزلك ، وگفت وأخذتله وحركات ورسلتهن ها
ـ أووف أشتعلوا اهلج على هالرگبه
ـ ضحكت وأنت هم دزلي أشوفك دزلي صورته محلق وكاشخ يخبل حبيبي وضلينا نحجي الى أن اجتي لقاء وعفته ورجعت اتصفح وضلت كاعده بعيونها ملح ما تنام
عماد ـ أكولج راح أنام تأخرتي
جنات ـ نام حبيبي الصبح أراسلك
عماد ـ اوك حبيبتي .
ـ حذفت المحادثات ونمت والظهر كعدنا متأخرين على أصوات أبويه وباسل شگو يا ساتر .
باسل ـ طلاك ما أطلك لو تضرب رأسها بمية حايط
جنات ـ طلعنا من الغرفه وأبويه ونائل وباسل صاير نار وأمي تهدي بي .
باسل ـ جاي العب أني ، وتمشوني على كيفكم عُلا تعوفها وتمشي ويانا نخطبلك عصماء وسويت اللي تردونه وفتحت صفحه جديده وتقبلت حياتي وهسه جايني تگولي طلگ .
سعيد ـ من أنعل أبوك لابو عُلا وياك محد هجم حياتك غير هالعُلا وأني عرفت هاي تاليتها لان أعرفك ما تصبر اذا تحجيلها وخبلتها عليك وحقها لو طلبت الطلاق لان خطيبها جان يكمز على الحياطين .
نائل ـ يابه شو هيج .
سعيد ـ ولك طايح الحظ اكو رجال برأسه عقل يفكر يتزوج وحده أنطت نفسها بالحرام ويخليها بيته ويأمن ويخلف منها كواد أنت كواد ، ونفرض وافقت وزوجتك خلفتكم شتطلع اذا الأم والأب نفس الزمره بس گولي هذا عقلك شبي محشي تبن .
باسل ـ يابه ترى عفتها وطلعتها من حياتي بس أنتَ جاي تصدمني بيك واكف وياها وتشجعها عالطلاك
سعيد ـ أي وياها ، لعد شتريد أوكف وياك شعرف منك
وهسه تمشي ويانا أني وعمك كريم على أهلها وتطلكها وخل هالعُلا تفيدك ساقط أبو دروب أدبسزز
باسل ـ ما أمشي وطلاك ما أطلك .
جنات ـ أبويه مشه هو وأمي وعافوا شايط ويفرك بوجه وتقرب عليه نائل يطبطب على أكتافه
نائل ـ بابا شبيك بسرعه تصدك كل عقلك أبويه يطلگها بابا أهلها خوش ناس هما ما يقبلون تطلگها شنو لعب جهال هي بالسوالف بس هاي الك كرصة أذن من الحجي وهم يريد يشوفك راضي على البنيه وعايف علا لو لا
باسل ـ وأنت شمدريك
نائل ـ بابا سوالف أبويه كلهن أعرفهن هو واكع جفي على هالنسابه ومن سمع عماتي يحجن وجابن طاري عُلا كب بيهن وحلف عليهن اذا يجيبهن طاريها كدام عصماء ما يدخلن البيت .
باسل ـ يعني عماتي حاجيات الها
نائل ـ دمشي أمشي وعوفلي سوالف النسوان وأذا لحوا عليك شتسوي طلكها .
باسل ـ ما اطلك
نائل ـ لاتطلك بس أمشي .
جنات ـ راحوا ولقاء رفعت أيديها
لقاء ـ كون تريله ما بيها تايرات يا نجلاء تنام عليج وتسويج بيتزا .
ليال ـ مو أمي گالت عصماء عاقله وما تسويها شصار
لقاء ـ هي مال عاقله عاقله بس سوالف أهلج حتى العاقل يصير مخبل ولو اني بمكانها ما أقبل الصراحه بس مرات الشخص يضطر يتقبل لان يشوف المقابل جاي يحاول يصلح من نفسه ويتعايش يمكن تكون سبب بصلاح باسل ولو هذا مو حل بس عسىٰ ولعلىٰ
____________________
عصماء ـ كل فتره تمر بحياتنا تنطينا درس حتى فترة علاقتي أني وعلي نجم أنطتني درس أنه نظره الأهل وكلمتهم مهما كانت مختلفه صحيحه ودعيتله من كل گلبي الله يعوضه ويوفقه بحياته حتى من أبتعد خله ذكراه طيب ما شفت منه أي أذيه هذا الحب التحبه وأنت مطمئن وأسرارك بالحفظ والصون ما ممكن أتخيل علي بيوم من ألايام يأذيني لأن كلني ثقه بي وبأخلاقه وابن اصول ويخاف الله وحبني من گل گلبه يمكن حبني أكثر ما أني حبيته بس الله ما كتب النا نصيب ننجمع والنا حياة ثانيه نعيشها مع أشخاص ثانيين وأقدارنا مختلفه بس يا ترى راح تكون حلوه مثل ما نتمنى ونترك الماضي ونفكر بالمستقبل ..
والماضي يضل ماضي ما ممكن يبني المستقبل أكثر ما يدمره وعلي ما أكدر أكول نسيته بسرعه بس رضيت أشد الرضا والقبول بإختيارات رب العالمين اليه ولا ممكن أعترض عليها وگلشي كاتبه اليه رب العالمين راضيه بي والحمدلله على قسمتي وقدري المكتوب
ويه باسل ..
ولكيت نفسي بسرعه تعاشيت وتأقلمت ونفس الوقت شفت جانب حلو من باسل وحبيته وتعلقت بي والجذبني أكثر وخلاني أتناسى الماضي هي حنيته عباره عن كتله من الحنيه وصرت أحب طول يومي أكون متواجده وياه وقتها تذكرت أيه قرأنيه .
"وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ" .
سبحان من زرع الحب والتعلق والطمأنينه ..
بالصالون أني وبيداء وأمي وخاله هيفاء وليال جابهن ورجع بس من أجه ما لحكت أشوفه وياه أبن عمه ومستعجل وصلهن ورجع كالت عنده شغل حتى ما راسلته ...
گملت وليال هم خلصت طلعت تخبل وخاله هيفاء وامي كاعدات ما خلن شيء بيداء بعد شعرها ، كملت ولكيته گومه متصل ورسائل
باسل ـ وينج مختفيه ترى حلوه ما يحتاج هالكد تغبين وتعوفين موبايلج الو يمعوده أني شغله محيرتني تلفونج ليش تخلينه صامت حظ الكواد ، خلصي عاد
عصماء ـ ها
باسل ـ هلا والله همزين يابه
ـ هسه گملت
ـ ها عالخير ، عاد طلعتي حلوة؟
ـ هو أني حلوه
ـ باوع الثقه الموبايل حمى
ـ شعبالك أصلاً أحلى منك
ـ أثنينا حلوين
ً ـ أي هيج هذا الكلام الحلو
ـ هو أني حلو فه يطلع مني كلام حلو
ـ أي صدقت
ـ خلصتوا لو بعد
ـ بعد ييداء
ً ـ شسوي بيداء أني
ـ شبيك أصبر ووين أنت هسه
ـ بالطريق راح نوصل اني ونائل وليث وأخواتي والأهل والكرايب وصلوا بيت جدج كلهم
ـ أي تمام تعال شويه ونروح البيت عمي يجي يأخذنا
ـ اجي اني شنــو عمج
ـ تتأخر والعالم كلها أهناك أنت تعال للبيت
ـ ماشي جايج
ـ خاله باسل جاي بالطريق
هيفاء ـ اي هلا بي فستانج لبسي لو بالبيت
ليال ـ لا خل تلبسه وتلبس عبايه يمعوده وين تلحك بالبيت هنا وكلهن منتظراتها تكوم تبلس
هيفاء ـ يله لعد ساعديها .
عصماء ـ لبست فستان ذهبي على طوله وتسريحتي مفتوحه ولبست عبايه وشال وأجه عمي وطلعنا البيت وأجوا هو وأخواته عبر الكل وصلني .
باسل ـ شو باوعيلي أشوف
عصماء ـ أنت باوعلي
ـ أي أباوع ليش لا
ـ باوعلي وخجلني بنظراته واحد صافن بعيون الثاني خليته يرمش والمصوره تصور بينا كافي نزل عينك الكل يباوع .
ـ وخل يباعون وشنو يعني
ـ حضني من خصري وخبيث يتلمس بخفه جسمي نمنم من أيده حتى أنفاسي صارت عاليه وهمس بأذني .
ـ شبيج خدرتي بس أيدي لمست خصرج .
ـ باسل
ـ خدران يابه الصوت راح
ـ يضحك وخاله صافنه علينا وفرحانه ونزلت دمعتها وتقرب باسل حضنها ويبوس بيها وشويه وطلع وغمزلي راح ليث نائل لان ما دخلوا الحفله نسائيه فقط وتقربت عمته نجلاء باستني وكالت .
نجلاء ـ مبروك ولو المفروض المبروك أكولها لغيرج كسر كلبها وخلاها المسكينه جان هي بمكانج .
عصماء ـ منو
الحجيه حليمه ـ نجلاء أمشي من يم البنيه
سلوى ـ نجلاء وگته هالحجي
نجلاء ـ شبيكم عليه فوك ما أكول الها احسن ما تعرف بعدين وتنصدم مفروض تحجولها خطيه لو الأ يجيب عليها ضره وهذاك الوكت تشيلون خطيتها .
غنيه ـ خيتي ما نريد مشاكل مو وگته هالحجي
نجلاء ـ يا مشاكل على كيفج فوك ما احجي لبنتج يجوز حتى أنت كالولج وما كالوا الها عن عُلا .
عصماء ـ سحبنها وما فهمت عليها گلشي ويحجن بينهم يمه شگو فهميني ليش ما خلناها تحجي تعرفين شيء وضامته عليه .
غنيه ـ لا ماكو شيء ما عليج منها هي ما تحب هيفاء وخلفتها ومشاكل بينهم .
عصماء ـ ما صدگت وضليت ساكته والكل يباوعلي واجتي وحده عرفت أسمها تماضر وگفت بصفي وقربت تلفونها بي صورة بنيه حلوة وكالت بصوت ناصي وهي تقرب موبايل عود تأخذ صوره وياي
تماضر ـ هاي عُلا حبيبة خطيبج ولحد الان يحبها ..
عصماء ـ أحس عقلي تبنج واجتي لقاء وليال گبل سحبت موبايلها وگفت بصف أمها ودخل باسل وگام يحجي منع التصوير وسحب كل الموبايلات اللي يصورن من بنات عمه وعماته ويحجي بس بالي مو يمه بالي يم السمعته .
باسل ـ ممنوع التصوير ولا صوره جايات تحضرن حفله لو تطكطكن صور رجاءً بدون زعل التصوير ممنوع .
عصماء ـ أنطه الموبايلات لعمته سلوى وتقرب كعد يمي باوعتله وتذكرت شكلها وصفنت معقوله
باسل ـ شبيج خلقتج أنگلبت
ـ بنتر مـا بيه شيء
ـ لاتتنرين بوجهي شبيج
ـ ما بيه شيء
ـ لا بيج شيء شصارلج توني عفتج ما بيج شيء ليش تغيريتي .
ـ ما جاوبته .
ـ خاف تندمتي
ـ يمكن
ـ شنو يمكن صدك تحجين ، ترى كلتها بالشقه
ـ بهيج موضوع ما بي شقه
ـ عالعموم رجعي طبيعية الناس تباوعلنا بعدين أفهم منج شبيج .
ـ گتلك ما بيه شيء
ـ وأني گلت بعدين .
ـ ما جاوبته وكملنا الحفله ولبسني الذهب أحاول أتلطف الأجواء ما أكدر الكلام برأسي وأريد ابجي لبسني الكلاده وأرتبك لان يباوعلي واني وجهي أنكلب أخر شيء صاح بيه
ـ ما تكوليلي شبيج
هيفاء ـ باسل ماما صوتك على كيفك وياها تستحي
باسل ـ أنطيني أيدج
عصماء ـ مديت أيدي ويباوعلي بنص عيني وصار عصبي وأني توقعته هادئ وحنين گمل وكعدنا وفقرة الكيك والعصير والصور الى أن خلصت الحفله طلعوا وأني ما طلعت رحت بغرفة عمي وأجتني عمته نجلاء وگالت .
نجلاء ـ كلهم جذبوا عليج بس محد صدك وياج بس أني صادقه لان أنقهرت عليج وشفتج فقيره وعلى نياتج وما تدرين بالمضموم وبسوالف خطيبج أبو نسوان وسوالفه المكسره هو وحبيبته عُلا ولج حتى ينام وياها ولكفوه أخوانها وصارت مشكله ودگه عشائريه وما عافها ولحد الان يحبها وعلاقة حب صارلهم أربع سنوات
تماضر ـ يله يمه أمشي نائل يصيح راح يمشون يمه اجه باسل أجه أجه .
باسل ـ شعدجن لحد الان واكفات مو كلها صعدت بالسيارات .
تماضر ـ هسه لما أمي تدور عبايتها ضايعه .
عصماء ـ دخل وبيداء جانت واكفه ودخلت مرت عمي شافتني ومشت وضلت بيداء
باسل ـ بيداء ممكن تعوفينا لوحدنا .
عصماء ـ طلعت وباوعلي صديت وجهي عنه واحس معدتي مليانه دم من القهر والكلام والسمعته وصورته الراسمتها بعقلي تشوهت وينام وياها يعني يزني! .
باسل ـ ليش ما طلعتي ويانا شكو ركضتي الغرفه
عصماء ـ شنو هالأسئله وأجيت الغرفه أرتاح تعبانه
ـ كلنا تعبانين بس هذا واجبج وهسه عايفهم واكفين واجيتج وهم نفس الجهره العفتج بيها هم مگلوبه متكوليلي شبيج .
ـ ما بيه شيء گتلك تعبانه وخلص ليش تلح
ـ الح! ماشي .
ـ طلع سريع وأمي دخلت عليه عصبيه .
غنيه ـ أمشي للبيت أمشي .
عصماء ـ طلعنا لبيتنا ودخلت الغرفه كعدت بجيت وأمي طلعت بيداء وكعدت يمي وتحجي وياي وأني قافله
غنيه ـ ما الج حق تحاسبنه لان هذا ماضي وقبلج ومو بوجودج علمود طنگرين وتلبسين وجهج جينگو .
ـ بس يمه نايم وياها
ـ وشعليج أنتِ أمه اخته تحاسبينه عنده أهل هما يحاسبونه لو متزوج ومسوي هالسوايه الج الحق بس مو بالماضي .
ـ يمه زاني تعرفين شــنو حرام
ـ منو گلج وشمدريج أنتِ بكيفج تحجين ما شايفه عينج لاتحجين ، أكيد حاقدات وبطلن عليه
ـ لا يمه عمته سولفتلي گلشي گالت أبو نسوان وعنده سوالف مكسره وينام وياها ولحد الأن مستمر .
ـ أيبــاه وعلى أساس رجلها ولدها ماكو هيج ما معصومين ما تسكتين ولج ماكو رجال ما عنده مكسرات وما يحب النسوان وخربط بعمره وتاليته يصحى على وكته ويصير أدمي بس شلون من يأخذ وحده فهيمه وتفهمه وتعرف شلون تحتوي زلمتها وتلمه بحضنها وهذا عقلها تشغله مو تضل راكضتلي ويه گلبها حب علانه وحب فلانه ، والرجال يا بنتي لو شبع بيته ما يروح يأكل من البرى فاهمه عليه هذا شغلي لاتخلين حجايتين من عمته تخرب الأول والتالي وأنتِ تخسرين شتريدن يطلگج وننفضح .
ـ لعد أتزوج وهو ...
ـ شبي هو كملي شبي ولد مثل الورده محد حب بس هو وأنتِ مو حبيتي علي نجم شو محد حاسبج ، كل واحد منا عنده ماضي بس صام حلگه ومشغل عقله
ـ يمه
ـ وجعة أمي وابوي ، عصماء أنتِ عاقله والولد تعلق بيج ولوما شاف بيج وأنجذب ما وكع على وجهه بهل السرعه حتى أهله ملاحظين عليه وفرحانين لاتخربين فرحتهم وفرحتج .
ـ يعني أنتِ جنتي تدرين
ـ أي أدري وكلنا عدنا سوالف مكسره مو أختج كدامج تاريخها أسود من جعب الجدر مو صامين حلكنا وساكتين وهي بنيه وغلطت شعجباه هو رجال ، هذا شغلي يله خابري شوفي وصل طيبي خاطره بكلمه حلوة طلع وجه ما يكصه سيف ومن وراج بحجايتين أنهزيتي .
ـ عافتني وراحت وضليت كاعده بالغرفه بس مخنوگه وصفنت بكلام أمي وفكرت والف فكره بالي وتالي گبرت عقلي وأتصلت عليه أجاني صوته باسل كاعد .
ـ أي
ـ شلونك
ـ الحمدلله وأنت
ـ زينه
ـ باجر عقد محكمه
ـ ها
ـ أي الصبح أجي من وگت
ـ لعد تريك يمنا
ـ ها شعجب
ـ عازمتك على الريوك من أيدي
ـ ماشي
ـ شتحب على الريوك
ـ أي شيء عادي
ـ تحب دهن الحر
ـ أي ليش عدكم
ـ اي وباجر أسويلك بيض بالدهن الحر وجبن عرب وخاثر
وجاي مالتنا التحبه .
ـ شهيتني من هسه
ـ تعال وتدلل
ـ راحت الطناگير
ـ يا طناگر
ـ ما أدري يمكن غلطان
ـ بشنو غلطان
ـً أقصد جنتي ما مطنگره
ـ لا جنت تعبانه بس
ـ وهي دائماً من تتعبين هيج تصيرين!
ـ لا طبعاً
ً ـ خير أن شاء الله
ـ شبيك عيوني
ً ـ عيديها
ـ شنو هي
ـ عيوني تجرينها جر عيديها
ـ عيوني
ً ـ أبوسهن شكد حلوات
ـ خجلتني
ً ـ الصبح أشوفج الخجل على أصوله
ـ أحم يله روح نام وراك كعدة الصبح
ـ ماشي وراح وسد النت يمكن فعلاً يكون ماضي وأني ظلمتك يمكن تكون جاي تحاول تتخطى واني زودتها عليك وفعلاً كلام أمي كُلنا نحب ونخطأ وعدنا ماضي وقررت أتقبل ماضيه ....
الصبح كعدت من وگت نظفت البيت بكل نشاط وسبحت وكشخت وأبويه طالع وأمي كاعده ودخلت سويت أحلى ريوك وراسلته وين صرت
باسل ـ بالطريق
عصماء ـ هلا بيك عيوني ريوكك جاهز
ـ لاتسوين ما أريد !
ـ باسل شبيك شافها وما جاوبني رجعت أتصلت رفضني أخر شيء غلق الموبايل . هذا شبي!
أنتظرته وسمعت صوت هورن السياره وطلعت أمي فتحتله الباب جنت بالهول ودخل علينا باوع لأمي وگال
باسل ـ خاله قبل لا نعقد محكمه أريد أحجي وياها على إنفراد!!
غنيه ـ خير يمه صاير شيء لاسامح الله
باسل ـ بعدين عمه .
عصماء ـ أمي طلعت بس عيونها عليه وتعض بشفتها باوعلي وصفن بوجهي باسل شبيك .
ـ اليشوف هالوجه هم يگول أكو حب بحياتج!
ـ ضليت ساكته ومتفاجئه
ـ شوفي أني بطبعي ما أحكم على الاشياء الظاهريه إذا ما أطقس وراها وأعرف گلشي عنها ، الا أنتِ سبحان من مشاني بدون قيود بدون رفض بدون كلام بدون ضغط وكأنه ملاك ديمشيني أبداً متوقعتها منج أبداً ولا كنت متصور واني مو بطبعي أحكم على كلام من غير شخص أتمنى أسمع منج حتى لا اظلمج بشيء وهم نفس الوقت أريد اضع حد لهل الشيء السمعته!
ـ عفواً أنت شدتحجي ليش اني شمسويه حتى تظلمني .
ـ ما أدري أني جاي أسألج
ـ شوف باسل لأ تعيش الدور الزايد ترى بعدنا على البر وجايبني أظلمج واحكم عليج على أي أساس بأي منطق وتسألني واجاوبك ما عندي شيءأخاف منه ومن حقك تسأل لأن أحنه بفترة خطوبه فترة تعارف ولو أنتَ كظيتها صفنات!
ـ وشبيج إنفعلتي ووجهج حومر يابه على كيفج طلع عدج لسان هاج أخذي الموبايل وشوفي هاي البنيه راسلتني البارحه وحجتلي هالخريط كله وعقلي وكف
وهسه قريتي الكلام ممكن التوضيح .
ـ أنطاني موبايله وباوعت المحادثات عقلي وگف بعلاقه وبوضع مخل أستغفرالله شـًنو هالحجي .!
ـ شبيج دحجي أكو شيء
ـ يعني لو أكو شيء هل من المعقول أنخطب بهل السرعه واعيش وياك يعني والله ما أعرف شحجي مصدومه من الكلام
ـ زين أحجيلي ليش معظمه الأمر اني أتفهم .
ـ أي أحجيلك ليش لا
ـ يله أحجيلي
ـ شوق باسل هذا الشخص اللي موصلك الكلام عنه صحيح أسمه علي نجم من البصره رجال شهم وابن أصول يصير ابن اخت السايق الي دائماً نروح لسوك بسيارته وعلي مرتين وصلنا بمكان خاله وأنعجب بيه وبإخلاقي وبعدها تقدملي اكثر من مره وأهلي رفضوا لأن المكان بعيد وأهلي من ديالى وهو من البصره ولأن غريب رفضوا هذا كل ما في الأمر بس مال أهلي شايفنه بوضع مخل كذب ماكو هيج شيء .
ـ هــا أي وأنتِ شنــو موقفج منه حبيتي عندج تواصل وياه لــو شــنو .
ـ أرتبكت وادراكت الموقف وفضلت ما أحجيله عن الماضي وهو صافن بوجهي منتظر مني الكلام رجعت جاوبته أي كشخص إنعجبت بي والدليل اجه من باب الحلال وهالشيء عجبني لا أكثر ولا أقل والخيره فيما اختاره الله .
ـ يعني أحلى مني حتى نعجبتي بي؟
ـ لا لا أنت ماكو بجمالك
ـ أيبـاه إعتراف خطير بس والله لسانج من يغرد يسطر .
ــ أعجبك عيوني.
ـ لو بس تبطلين تمطين بحجيج اني بخير .
ـ ليش
ـ هيج وهسه ما علينا يعني علي تقدم ورفضوا أهلج
ـ أي
ـ ماكو شيء ثاني مثل محادثات مكالمات علاقة حب صور يعني هاي الأمور مال علاقات الحب .
ـ أي ماكو .
ـ أكيد
ـ أي باسل شبيك بس منو هاي الراسلتك
ـ ما أعرفها والله دخلتلي على الأنستا ورى ما عفتج راسلتني هي
ـ وأنت ليش أجيت معصب عليه
ـ أحب الصراحه لان علاقتنا بدأت جديده وأريدها تكون خاليه وصافيه فهمتي عليه .
ـ دام هيج أني هم عندي اسأله براسي سمعتهن ممكن أعرفهن جوابهن .
ـ اسألي يابه مدام إنفتحت فقره الصراحه والأسرار .
ـ عُلا شنــو بحياتك وبعدك عندك تواصل وياها .
ـ أيباه أجيتي هالجرح!شوفي أنتِ زوجه بحياتي هاي عشيقه وحبيبه وفد يوم حتكون زوجه بعون الله تعالى أني جنت ناوي هالشيء افتحه وياج بعد الزواج لكن مدام بعدنا خل أفتحه وياج هسه .
ـ يعني شلون زوجه بعون الله تعالى! قصدك تزوج عليه
ـ أي .
ـ غريب وليش هيج متأكد انو راح اوافق عليك وابلش حياتي واني اعرف أنت راح تتزوج باي حق تحكم عليه بموافقه لو شفتني فقيره على كد حالي كلت تسكت وترضى بمصيرها وتضحك عليه بكلمتين لأ أول ولا أخب وحده رجلها يتزوج عليها .
ـ لا مو هيج بس كلت بالتفاهم .
ـ لا بابا اصحى اني مو مغفله ولا ضعيفه شخصيه أخذك لشط وارجعك عطشان ونبي محمد هسه اخربط عليك الاول والتالي وأفسخ .
ـ قابل تأكلج وحبيبة رجلج السابقه شگو بيها!
ـ رفعت أيدي وكلني غضب باسل لأتكعد تخرطلي حجي حبيبه وعشيقه وكلام كلنا نعرفه اذا أنتَ بعد عقلك يمها روح خلي اهلك ياخذوها الك مو جاي تكسر ركبه بنات العالم على حساب مزاجيتك اليوم فرحان هوسه عرس وهلوله وباجر تخلص واني تتركني بالزوايه وتمارس غرامك ويه عشيقتك هواي عايش الدور
أنتَ مو مهند والبنات تركض وراك .
مشيت بكل سرعتي وخليته صافن
باسل ـ عصماء أوكفي خل نحجي عصماء يمعوده .
عصماء ـ هيهات بعد وصلت لأمي وعمه هيفاء كاعدات عمه اني اريد أفسخ الخطوبه وكل واحد يروح بحال سبيله اني ما مجبوره اعيش حياتي على الهامش ويه إنسان متعلق بشخص غيري .
هيفاء ـ ولج بنيتي صلي على نبي شجاكم
عصماء ـ أبنج يريد يتزوجها بعد ما يتزوجني أمي تباوعلي بس هزيت راسي هي إفتهمت الموضوع وما رضت وصارت وياي وعمه هيفاء تبرر لكن كان بالي رأي اخر انو انسحب لغايه بنفس يعقوب يحجون واني انسطرت وبالي اصلا مو يمهم ، وكف بطريقي وعبرته ويريد يفهمني وأني قفلت خلاص .
باسل ـ أوكفي خل نتفاهم
عصماء ـ على شــنو نتفاهم خلص ما ضل كلام ينحجي بي دخلت وقفلت الباب وأسمع أمي هم صارت وياي خليته موقف يسوه حياته
وشويه وأجتي أمي
غنيه ـ ولج خابروا أبوج كالوله تخربطت وراح يرجع هو راح قبلنا هو وعمج للمحكمه سوي نفسج متخربطه تره متعبر عليهم ...
ـ شمرت الشال وطلعت واباوع عليه واكف يم البنيد وامه تحجي وياه وهو مخنزر عليه فتحت شعري ولفيته ودخلت لغرفتي واخير بردت گلبي بيك يا باسل أفندي
غنيه ـ تعاي أحجيلي اني وكفت وياج لأن ادري بيج شكد عاقله بس اليوم ثكبتي بنار شبيج حاجيني
ـ حجيتلها گلشي ولطمت على وجهه
ـ منو مصخمه المراسلته ما عرفتي
ـ هسه عوفج منها ركزي وياي يريد يتزوجها عليه ترضين بنتج تنزل عليها ضره والله لو يضل بس هو ما أوافق على هيج زواج نهايته مشاركه شبيه ضاله بدار لو متعاجزين من لكمتي گوليلي يمه اذا ترضين هسه أمشي وياه .
ـ لا يمه على بختج أني أمج صح البارحه وگفت ضدج بس عبالي صفحه وكفها ما عبالي مخلي برأسه يتزوجها دام هيج أني وياج وحتى أبوج هم أقنعه .
ـ أنتِ بس خابريلي عمو سعيد وبلغي أني رافضه هالزواج وكلشي ينتنهي .
ـ ميخالف أكوله خل اشوفهم خطيه عمتج فشلت وتحجي أروح أشوفها .
ـ طلعت وتزاحمت الأفكار برأسي مثل المطر ضليت بالغرفه ما طلعت ولا سألت عليهم ولفيت رأسي ونمت كعد هو يم رأسي .
ـ صح النوم يأبه
ـ ما جاوبته كمت لملمت الغطا ونزلت ثوبي ولبست شالي باوعت ماكو أحد مشيت وگبل سحبني من أيدي وقيدني عوفني باسل حاولت اتملص منه لكن ماكدرت
ـ عبالي بيج خير وتفسخين الخطوبه أثاريج بس للسان وبوخه وحك محمد كلشي متسوين بس لسان
ـ باسل جوز مني لخاطر محمد لا أريدك ولا اريد هيج خطوبه مبنيه على فشل الحمدلله الله كشفج من أولها
ـ أحلى فشل بحياتي بس أعيش تجربه زواج وياج حتى لو شهر ، أريد أستكشف كلشي بيج يوم عن يوم أنبهاري بيج ديزيد ما أكدر حتى ما أفكر بيج .
ـ وعُلا وين تصفى .
ـ وشعليج بيها
ـ أنت تعجبني من تتمسك بشيء وهالشيء يزيد أعجابي بيك لكن مو لهالدرجه وأني على ذمتك وعُلا عالخط رمانتين بأيد وحده ما يصير .
ـ علا ما عليج بيها عيني وشيء بحياتي ما حصلته وهذا هو قفلته ونهيته من حياتي وحجيت هالحجي وأستفزيتج بي وأنتِ كبرتي الموضوع ما يستاهل يا عيني
ً ـ صفنت عليه يعني ما تتزوجها
ـ لا أتزوجج الج
ـ وأذا بعدين نقضت العهد
ـ طلگيني .
ـ ليش ما أطلكك هسه وأخلص منك قربني أكثر وگلبي بصدره حتى دگاته تنسمع جاوبني بهدوء .
ـ ما تكدرين وأكبر دليل أنت بين أيديه وكلبج ينبض بصدري
ـ بلعت ريك وجاوبته باسل
ـ عيوني
ـ نزلت رأسي مستحيه
ـ أريد اكول مثلج عيوني متطلع ليش
ـ هاي خاصه بإهل ديالى مـا تكدر ، رفع حنجي
ـ على الطبيعه أحلى بهواي
ـ ضاع الكلام يحجي وأني ميته من الخوف والخجل
ـ شو أحس جمالج جمال أهل كربلاء ليش هيج أنغرم بترتبيج حتى شعرج مصفط ليش هيج .
ـ وترني كلامه وماخذ راحته ويحجي واني بالي أصلاً مو وياه أحس روحي راح اغيب أختفي تقرب باسني من حنجي وطول ورجع باوع بعيوني
ـ أقتنعي أني مالتج مو مالت أحد اني مسجل بأسمج لم تكن ولا كانت اللي راح تاخذني منج وهسه أمشي عدلي هالخريط الخربطتي على اهلج وأهلي خليتيهم يفوتون بالحايط .
ـ ليش أهلك أهنا
ـ أي أبويه وأخويه وعمي كاعدين بيت جدج وأني عفتهم وأجيتج
ـ تمام حجيتها برجفه وصفن وحسيته وضعه تخربط طلع سريع وانهزم وأني كعدت أرجف حتى حيل ما بيه أوكف
ودخلت أمي .
غنيه ـ ولج معصومه أشسويتي يمه أهله اجو وما يرضون وابوج هم كام يحجي وعمج وجدج تخبلوا .
ـ يمه ماكو شي لا نفسخ ولا شيء هاي كرصه إذن اله
ـ يا كرصه ولج يكمز مثل الجاهل روحه فايره وانوب ابوه يكله افسخ الخطوبه وهو مجلب يكول تلعبون عليه يوم أخطب يوم افسخ والغرفه والذهب والصخام بعيني ومشاعري واحساسي هاي سهله لا افسخ ولا شيء خل تلطخ راسها بالحايط عاد كالوا اله طب اكعد احجي وياها
واجاج طياره
ـ أي حجينا
ـ مبين كلامه مأثر بيج لا ترعدين لا تثكبين هفتي بردانه عيني هيج باسل كلامه حلو .
ـ خجلت يمه كافي ضحكت وطلعت وخلتني اتغطى بالبطانيه من الخجل حتى ما طلعت أستحيت منهم وجدي زعلان مني ، كمت سبحت وأرتاحيت ولكيته مراسلني
ـ يغارون عيني حقهم يغارون مأخذين نستله نمبر وان
ـ هذا غرورك الا افششه عليك .
ـ أويلي يابه هل من منافس على غرورج .
ـ تروحلي الدنيا واهلها سبع فدوات .
ـ ها
ـ أي عندك مانع
ـ لا أبداً بالعكس تعجبيني عندج ثقه بنفسج واستقلاليه وأحلى من يضع حد لكل شخص مو شخصيه مهزومه .
ـ فديتني .
ـ يصير أحبج بنفس المكان من الحنج
ـ شدوس هسه كتبتله حبك ربك وجعلك بصف نبي الله محمد ، دزلي سمايل فحطان من الضحك وأتصل وجاوبته هلا
ـ هلا يابه شلون بيج
ـ شبيه
ـ خربتي علينا عقد المحكمه وناوي أغديج بمطعم
ـ أي غديني باجر شـنو يعني
ـ تدللي لعد تحضري الصبح نجي
ـ أي هم اتحضر وأسوي ريوك وأخبص روحي وفرحانه وتجيني بسالفه
ـ ما تحملت لو تدرين من راسلتني الليل ما نمته
ـ تذكرتها وصفنت منو هاي المراسلته
ـ وينج
ـ موجوده وهم حجت وياك بعد
ـ لا حظرتها ، يله باجر أجيكم وراح نفلس من وراج
ـ ليش
ـ عزلنا المحل
ـ يا ليش
ـ نائل مو هلكد يعرف وليث جان بالدوام عاد باجر ليث يكعد بمكاني .
ـ غير من وراك
ـ يله ما صار شيء وأصلاً جية ابويه مالها داعي بس طابتله الكعده ويه أبوج وعمج وجدج يحب يكعد وياهم
ـ عمي سعيد ورده
ـ وأني شوگه بنت أسكندر لاتتغزلين بأبويه ما مسموح عنده نسوان أثنين يتغزلن بي شابع غزل ، بس أني بس وحده وردت الثانيه صارت حرب الا شويه .
ـ باسل
ـ لا خلص عمي سگتنا
ـ يله روح عطلتني
ـ ليش شعندج
ـ أخاف أبويه يجي أستحي منه
ـ بس أني حلالج
ـ بعدنا ما عاقدين محكمه
ـ باجر ألزمج وأعقد عليج أصبريلي
ـ ضحكت يله روح
ـ گوليلي عيوني
ـ عيوني
ـ أبوس الخجلان اني والصوته يرجف
ـ سديت الخط يمه فدوه شنو هاي بسرعه أدوخ بكلامه
وراسلتني بيداء وتذكرت البنيه المراسله باسل منو هاي
وأني محد يعرف بيه جنت على علاقه وما عندي عدواه ويه أي وحده أتصلت عليها
بيداء ـ هلا بالعاروس .
عصماء ـ هلا بيج أكول بيداء أنتِ متابعه باسل على الأنستا
ـ أي ليش
ـ شوكت تابعتي
ـ من زمان من أجو حمواتج وأخذت حساباتهم وتابعته
بس ليش تسألين
ـ ها خوش
ـ شگو شبيج
ـ ومنو من صديقاتج يعرف بعلاقتي بعلي
ـ محد
ـ أكيد
ـ ما حاجيه أني يجوز أنتِ حاجيه لرفل ليش
ـ أني أكولج ليش وحده مراسله باسل وحاجيتله بس منو هي ما أعرف
ـ مراسله باسل
ـ أي عرفتيها
ـ لا شمعرفني
ً ـ أذا الج أيدج بيها ما تلومين الا نفسج جان هجمتي حياتي بسوالفج المكسره
ـ أحجيلي شصاير
ـ لازم يهمج شصاير لاتخافين باسل متفهم وحلينا الموضوع وتصافينا
ـ الف الحمدلله طمنتيني
ـ يعني مو أنتِ
ـ شبيج عصماء ليش أني أخرب عليج من كل عقلج تشگين بيه مع الأسف عليج هاي عود أنتِ أختي
ـ هو أني أمن بيج لا والله
ـ مشكوره وخطيبج شگو يجاوب خل يتجاهلهن
ـ ليش ممنوع
ـ مو خاطب ليش يجاوب بنات
ـ ترى هو جاوب من البنيه المراسلته وكومه حاجيه بس ما قاهرني غير گاتبتله اهلها كشفوها بعلاقه ووضع مخل وما وافقوا لعد هاي شگد شايله حقد عليه .
ـ شمدريني
ً ـ هسه ما علينا أنحلت ، أخبارج
ـ ماكو شيء
ً ـ دايره بالج على نفسج
ـ أي لايضل بالج
ـ يله باي
ـ باي .
ـ قطعت الخط وصفنت يربي منو اله مصلحه يخبث حتى بنات عمام ما عندي كلهن صغار وما عندي وجه مكروه والله سالفه تحير من اولها هيج حجيت ويه أمي طلعت دايخه مثلي وشاغله بالها
غنيه ـ اني الليل ما نمته من هاي المراسلته الله يصخم وجهه شتردين من عدنا ، أنت كل نسوان العرب فرحانتلج وتحبين الكل وتحظين بالكل گلبج مثل الثلج
عصماء ـ شمدريني يمه هذا هم حظي يله زين عرف من أولها وتصارحنا صح صارت مشكله بس فضت الحمدلله .
ـ وشلونكم هسه
ـ زينين
ـ ديري بالج عليه ماطول من أولها بين موقفه وتمسكه بيج يعني الولد واكع على وجهه حتى أمه گالت ويمكن شاف روحه لازم يستقر وأذا على هذيج لاتخلينها أبالج كل عقلج يسويها مرته
ـ ليش
ً ـ يمه المره التنطي نفسها بالحرام صعب الرجال يتقبلها بعد ويسويها مرته وأم بيته ويخلف منها الرجال گلبه وسخ يريد مره يأمن ويتأمن يعني من يطلع من بيته رأسه وفكره صافي .
ـ يمه لاتذكرين الحرام تلعب نفسي
ـ مو أول واحد ولا أخر واحد وكلنا نخطأ وهو مبين عليه صادق يكفي لهفته عليج تعاي أحجيلي شسويتله ولج انطيني السر علمود أجيب أبوج لدرب .
ـ ماكو سر مثل ما أحجي وياكم
ـ فدوه لعينج هو أنتِ دره ثمينه .
ـ فدوه لگلبج يمه راحت وگمت رتبت نفسي والصبح تجهزت وأجه هو وخاله هيفاء عمي سعيد مو وياهم
وطلعنا وأبويه سلم عليه وراح ويانا صعد بالصدر وصلنا عقدنا محكمه تمت عالخير واخذنا مطعم كعدنا كلنا وحسيت أبوي هو يحبه ومرتاحله ويسولف وياه وباسل نساني ابويه عزل على الكل ..
وصلنا ونزلوا دخلوا الأستقبال واني رحت من باب المطبخ وصاح وراي
باسل ـ جاي جاي .
عصماء ـ أي تدلل دخلوا وسويتلهم وأنطه السياك لابويه وابويه ما قبل .
أسكندر ـ أنتوا جهزوها البنيه صارت بنيتكم وأني كلت الابوك ليش دزهن
باسل ـ لا عمي ما نقبل ولا ابويه يقبل وهذا حقها
هيفاء ـ منين تحبين تجهزين .
عصماء ـ بكيفكم خاله.
هيفاء ـ ابو سجاد شتكول تجي تجهز من يمنا وهم البنات يساعدنها .
أسكندر ـ هذا هو خيتي التشوفونه .
عصماء ـ جنت صافنه عليه باوعلي وعكد حواجبه عود أبوج كاعد ، ثكيل يابه شلون رجال يعجبني ، شربوا الجاي وكاموا وأني بالأخير وراهم وأبويه طلع أول واحد شو هذا ما حسيته غير باسني من خدي صفنت بوجهه توني كلت عليك ثكيل
باسل ـ أشتاقيت .
عصماء ـ روح أبويه موجود ضحك وطلع وراحوا الله وياهم وهم ضجت وراه وأختنكت بسرعه تعلقت بي .
وبهالفتره تطورت علاقتنا بس بعدنا بالحدود ما عبرناها ورحت يمهم كملت تجهيز بس ما رحت البيت على گد ما گملنا ورجعنا البيت وحددوا موعد العرس بعد أسبوع توقعت نطول شوي لان كلش حابه فترة الخطوبه بيها أحساس وشعور يجنن ..
سويت الحنه بيت جدي وكل أقاربهم حضروا وكالوا بالليل حنته ولد عمامه متحزمين اله يسون اله حفله وخلصت الحنه وأخذنا صور وعشت هواي تفاصيل حلوه تمنيتها ما تخلص نظراته خوفه وحرصه وحنيته وقلقه من أغيب عنه وأحترامه اليه وأهتمامه وتبريره اذا يغيب عني صرت أحس روحي بحلم وفعلاً هذا عوض ربي وجبر خاطري ...
واكفين يم السياره وملبسني سترته لان بارده
باسل ـ باجر عرسنا باجر أخذج يمي .
ـ أي وضل يتمعن بنظراته شلگيت بعيوني
ـ لگيت نفسي أول مره أشوف نفسي بعيون حلوه مثل عيونج .
ـ ضحكت ونزلت رأسي مستحيه
ـ عود جلسه تصوير وكذا خوش نعرف نجذب
ـ هوسه داخل
ـ المعرسين أثنين والمهوسين الفين وشلون أثنين
ـ خجلت وتقرب رفع خصل شعري وباسني من راسي واشر لمصوره واجتي كملنا الصور والحبيته بي بسيط ومتواضع عماته كالن اله تعال أخذوا بالكوشه أرتب هو ما قبل گال لا برة ، وكملنا يله أني أروح
ـ سترتي
ـ تعال أخذها ضحك وتقرب لبسها زين اليه وحضني من خصري ومشينا ودخلني البيت وعمته نجلاء تباوعلنا بحقد تذكرت كلامها أخر مره سبحان الله من أول شفتها ما أرتاحيت الها
تجاهلتها وكعدنا وأخذنا صور عائليه ولاحظت بيداء ماكو هاي وين أختفت قصص وروايات عراقية كرار صلاح باوعت على أمي اشرتلها وفهمتني ودخلت بيداء من برى وجهه يضحك باوعت لأمي الله يستر منها ومن غطاتها والله هالبنيه مخليه أيدي على گلبي من وراها خاف تاليتها تجيبلنا مصيبه! ...
العرس على بارت القادم
___________________
بيداء ـ من بعد اللي سمعته من أمي وكلام مالك صرت ما أثق بأي مخلوق وشوه صورته الجنت راسمتها عود مسويلي روحه الشريف العفيف والخايف عليه أني لو سلمانه منك ما عليه شيء محد طيح حظي غيرك أنت ...
ضليت أيأم عايشه بسجن الا بيوم لكيت فرصه وگبل راسلته مالك أريد أحجي وياك ضليت بالنص ساعه أنتظره وهو فاتح أنترنت بس حقاره ونذاله وين يله جاوبني
مالك ـ صُدك لو گالوا درب الجلب على الكصاب ها رجعتيلي شبع بيج وعافج .
ـ الحجي مو أهنا بس عتبي عليك ما متوقعتها منك تفضحني وأني جنت كلني ثقه بيك مع الأسف على هيج زلم روح البس شيلة أمك أشرفلك .
ـ وگت الساقطات يحجن وياي ولج سكتي تأريخج الاسود عندي ، بيج خير ستري روحج ، صرتي حديث الساعه بين صديقاتج .
ـ ما يهمني واليحجي عليه هو أنكس مني وكلكم عدكم خياس مو عاد وكعت بيدكم صرتوا شرفاء برأسي وأنت اخر الناس يحقلك تحجي لعبت على بنات الخط الا گلت بس واني جنت اخر صيده الك ، مثل اني عندي تأريخ أسود أنت عندك تاريخ نكس مثل خلقتك من رايح على أمي واختي لك تنكسهن من تحجي وياهن .
ـ أني رجال ما أخاف ومحد يكدر يشوه سمعتي بس أنتِ بنيه شتگولين لأهلج ولج حلگج سدي ولا تحاجيني خشن ترى بإشاره أنزلج أنتِ وأهلج للقاع حتى الشمس ما تشوفونها من القذاره الضامه بگلبي وساكت أحتراماً لأيام العشتها وياج بس طلعتي أنكس وحده عرفتها بحياتي ما تستاهلين واحد يستر عليج عود خايفه على أمج وأختج لو خايفه عليهن جان ما هيج جازيتيهن وهذا لسانج الطويل أكصه أكصه اذا ما حللت ذبحج أني مو مالك أبن سليمان .
ـ لأ تقصر
ـ بيمن متسبعه منو وراج يا ظهر ساندج مهيب مو
ـ متسبعه بروحي ما أحتاج ذكر بظهري لا أنت ولا أمثالك أخلي وراي ، وأذا راضع حليب طاهر من أمك افضحني ولاتنسى محد شوه تأريخي غيرك لاتنسى نفسك الغلطت وياه هو أنت مو غيرك لاتتسبع على مره لاتنكسر رگبتك وأني ما أخاف منك .
ـ لأن ضامنتني ما تخافين مني
ـ وأنت گلتها ما أدري أذا فجأه صرت نذل شيطلع منك
ـ صرت نذل بسببج بسبب كلامج وأذيتج اليه .
ـ لكل فعل ردة فعل مع السلامه نهيت المحادثه ولكيت مهيب مراسلني حظرته دام مالك گال عليك متزوج أذن متزوج مالك أخباره ميه على ميه ، عوذه ما بيكم واحد شريف كلكم خونه .
ضليت قافله موبايلي وشويه خف العقاب عليه گدرت أفتحه ولكيت مهيب حارگ الدنيا عليه أتصالات ورسائل بس ما باقي يجيني للبيت جاوبته شبيك متخبل .
مهيب ـ أي صرت خبل من وراج وينج وين أختفيتي
بيداء ـ كشفت كل أكاذيبك وأختفيت
ـ يا أكاذيب عن شُـنو تحجين
ـ ليش گلتلي ما متزوج وأنت عندك اطفال منها وصور العيد ميلاد جانوا أطفالك وأني الغبيه صدگتك
ـ منيلج هالحجي بابا شبيج
ـ مهيب لأتكذب وتصغر بعيني أكثر وأنت متزوج ومره مرتين سمعت صوتها تگولي اختي وأختك شتسوي يمك نص الليل!
ً ـ خفت تعوفيني
ـ وهياتني عرفت وعفتك شنو التغير ليش كذبت
ـ لان أحبج ما ردت أخسرج
ـ تحبني وزوجتك شنو موقعها من الأعراب
ـ مشاكل أني وياها أصلاً هاجرها من زمان مبقيها علمود الجهال
ـ ومبقيها علمود الجهال مخلف منها هلكد أطفال !
ـ ما متفاهمين
ـ على شنو
ـ هواي أمور ما أكدر أحجيها الج بس أكولج أني أحبج وحتى لو متزوج ما أعوفج أنتِ ملكي ملك مهيب
ـ أني مو ملك أحد
ـ لا ملكي خليها أبالج أنتِ الي
ـ وبعدين
ـ شتردين يجرالج ولج أني بس وكاحتج أشتريلها بدم گلبي
ـ مهيب أنت متزوج وعندك حياتك وزوجتك وأطفالك وكل الخلافات تنحل ماكو حال يبقى على حاله لهذا أني أسفه ما أكدر اكمل وياك وأخرب حياتك الأفضل ننفصل وكلمن يمشي بطريق .
ـ ما الج شغله بيها أني أحبج الج وأنتِ تحبيني طلعي زوجتي من عقلج
ـ ما أكدر أعتذر باي
ـ وين وين
ـ مهيب لاتلح
ـ ما أكدر على فراگج حبيبتي ليش تحبين تعذبيني
ـ مشگلتك شگو أنت متزوج وتحب على زوجتك بيك خير روح حبها وشبعها حب وحنان أحسن ما تجي تشمره أهنا وأهنا أني بالنسبه اليه ما أحتاج حبك
ـ أكسر رأسج أحجي وياي عدل منو الما بي خير
ـ كلمة الحق توجع مو
ـ بيداء بله لغوه وغياب عني ما تغيبين وتعاي گوليلي شوگت تبلشين دوام محضرلج أرقى موبايل .
ـ باوع الأغراءات باوع
ـ هذا دلالي الج لاتسمينها غير شغله دلال مهيب
ـ أوك بس أني ما محتاجه لا موبايل ولا دلال مهيب يعني لعبت نفسي من عرفت بيك متزوج خلينا ننهي گلشي
ـ كلمة نهاية ما موجوده بقاموسي وأني وياج نبقى
ـ الى متى
ـ الى أن أتقدملج بس خل أرتب ظروفي
ـ وشبيها ظروفك شعندك .
ـ المره حامل خل تولد واللي تريدنا يصيرلج ويجرالج
ـ صدك تحجي بابا روح على مرتك أهم مني ومن غيري
ـ هم رجعنا على صخام شعليج بيها سدي موضوعها
ـ تمام هسه لازم أروح بعدين نتواصل
ـ أنتظرج حبيبتي .
ـ راح وبالي يم مرته هذول شيحسون يحبون أكثر من وحده يعني أحنه واحد منكم گوه جارعينه ومن مالك كرهت كل الزلم وانوب الأفندي طلع متزوج خربت عليج بيداء أنوب المتزوجين .
" وأبتدى الدوام والحمدلله قسمي خوش قسم ومهيب ما عافني ضل وياي وساندي وأكتشفت هو أكثر شخص يحبني وحبيته وبقيت وياه على الرغم متزوج بس لا هو يكدر ولا أني أكدر تعودت وتعلمت على وجوده وعطاءه بحياتي
مهيب ـ أنتظرج حبيبتي طلعي
بيداء ـ وين تتنظرني حبيبي
ـ جايبلج هديه وفلوس أخذيهن وروحي .
ـ ما أكدر
ـ شوفي أذا ما تجين أني أجي والله واذا أجيت تصيرلج مشكله تعاي أنتِ أفضل
ـ مهيب ما محتاجه شيء ، أخذهن لزوجتك
ـ هسه عوفينها منها تعاي أريد أشوفج ووين وعودج اليه من أدخل الجامعه نتشاوف
ـ من جنت أعرفك ما متزوج مو هسه .
ـ هم رجعت على الكواويد فضيني عندي شغل أريد أولي على شغلي يله حبيبي أنتظرج .
ـ اوك سيارتك يا لون .
ـ سياره سوده بس طلعي أني أشرلج
ـ أوك طلعت وشفته ونزل فتحلي الباب أثاري عن قرب كلش حلو ، مرتك ما تغار عليك
ـ صعدي صعدي
ـ صعدت وشفت السياره مليانه أكياس وهدايا بعلب وأجه وصفن بوجهي شبيك
ـ تدرين شگد أحبج والله أموت عليج أوفف لو الله يهداج وتقبلين هسه أخذج ونتزوج
ـ وأني هم أحبك وسالفه الزواج وأنت متزوج شيلها من راسك
ـ أريد أفهم شغله بيداء أنت تحبيني
ـ مهيب حبنا مو صح وأني ما بالي هيج حب
ـ هسه كل ما نحجي تفتحين هالموضوع
ـ أشبع قهر يعني هسه ترجع البيت وهي تحضنك أكيد
ـ لا
ـ لا واضح
ـ سدي الموضوع خلينا بالأهم أي شلونج
ـ بخير مهيب ما أكدر لازم أرجع كعدتي بالسياره غلط
ـ ماشي
ـ تقرب باسني من خدي ودفعته شتسوي مهيب
ـ بس بوسه
ـ غلط لو احد يشوفنا لزم أيدي وباسها
ـ أحبج
ـ لا دوخني مهيب نزلت وعفته
ـ تعاي بس خل نتفاهم
ـ على شنــو
ـ تمام بس رجعي أخذي الهدايا والموبايل وأعتبري أعتذار بمكان اللي سويته من دون أذنج
ـ ما أريد ما محتاجه
ـ لا تأخذيهن
ـ وهسه نضل واكفين أريد اولي
ـ رجعي أخذيهن لان اذا ما أخذتيهن اذبهن بالحاويه
ـ أوك رجعت اخذتهن وهو صافن عليه شكراً
ـ من تحتاجين شيء خابريني
ـ أوك مشيت وهو صافن عليه أحبك
ـ فديت حبج ، رجعت وصديقاتي شافني گتلهن أقاربي وسگتن وأني مو هلكد متعمقه وياهن من صديقاتي المدرسه وحقارتهن كلت توبه ادخل الصداقه ..
ودخلنا سوه كعدت أشوف الهدايا گومه مأخذلي ملابس كلها ماركات تخبل وأحذيه وموبايل راقي ومكياج وعطورات وحتى أسوار ذهب وفلوس بظرف گمت ضميتهن والموبايل غيرته وراسلته شكراً حبيبي تعبت نفسك
ـ منو غيرج يستاهل أتعب نفسي علموده
ـ حنيتك ما الكه مثلها عساني ما أنحرم منك
ـ ولا أني
ـ أي
ـ تدرين من شفتج عن قرب تولعت بيج أكثر
ـ واني هم
ـ هانت كلها كم شهر وأجي أخطبج
ـ ما أقبل
ـ وليش ما تقبلين
ـ أنت متزوج
ـ راح أطلكها واتزوجج مو ما تريدين أحد يشاركجج بيه هاي هي اطلکها
ـ منو كلك طلگها مهيب شتسوي
ـ مـا بينا تفاهم أحنه قبلج متفقين على الطلاق وسدي الموضوع ، هسه رجعت البيت بعدين نحجي
ـ تمام ، يوم عن يوم أحس بروحي بضياع ما أعرف بنفسي شريد أتمنى واحد يلزمني ويحتويني وضلينا على علاقه مستمره وكل وقتي وياه أشاركه كل يومي
وصارت خطوبه عصماء من أبن الصايغ كلش فرحتلها وتستاهل لان طيبه ويكفي حافظت على نفسها مو مثلي لعبت لعب بأعداد عمري
مهيب ـ ليش متغيره عليه مو مثل قبل حتى صور ما دزيلي أصبر نفسي على شوفتج
بيداء ـ ما مأخذه أي صوره .
ـ بيداء ثقي بالله أحبج وأريدج خليها أبالج تصيرين مرتي
ً ـ شلون أكدر أتقبل هالشيء صعب مهيب
ـ ماكو شيء أثنينا نحب وهاي هي ما يراد الها روحه للقاضي يا حبيبتي .
ـ وأهلي أذا رفضوا
ـ يوافقون ما عليج
ـ ما أعرف دايخه والله دوختني
ـ لا أدوخين خليها عليه أني أحل گلشي بس خلصي أمتحاناتج ويصير خير .
ـ تتقدملي
ـ أي حبيبتي گافي ما بيه أصبر أكثر دايخ بيج
ـ تمام
ـ من أرجع البيت أخابرج
ـ وزجتك وين
ـ يم أهلها يله حبي ديري بالج على نفسج
ـ أوك ، راح وصفنت كلشي أحتاجه متوفر عند مهيب حب دلال فلوس جمال شخصيه حنان أهتمام حتى اني أشتاقله من يغيب عني وتعلقت بي بس أحس بروحي حقيره لان متزوج ...
عفتها على الله وين تصفى خل تصفى وأذا تقدملي أوافق وأستر روحي لان ما أريد اضيع اكثر من هالضياع
وبيوم كاعده أقرا وصلتني رساله من حساب فتحته بنيه ودازه كليشه شطولها ..
ـ هلاو بيداء سبرايز شلون حياة المعهد وياج هم عليج ضغوطات لو مأخذه راحتج أكيد مكبله ويه واحد أثنين
ـ منو أنتِ .
ـ وحده من البنات الجنتي مسويتها مضحكه وأخذتي مني حب حياتي وحده من البنات الجنتي دايسه على رأسها بس سبحان الله من وگعج بإيدي .
ـ ضليت صافنه حاجيني بإسمج
ـ أحاجيج بأفعالي وأنت صفني وتتذكريني زين
ـ ما تذكرج
ـ شعجب
ـ شنو ما عندج أسم
ـ بلي عندي بس أخليج دايخه لان أنتِ عندج هواي أعداء أولهم مالك اللي خلصتي لعبتج وياه وطيرتي وكبلتي ويه غيره ، مالك الرحتي وياه للبيت تذكرين هذاك اليوم ومن عدا باقي الطلعات بالسياره هاي سلطه عندج .
ـ شنو هالحجي بيج خير حاجيني بأسمج مو من ورى الكبيورد مسويه روحج قويه وأنت ما بيج تفله .
ـ مشكلتج بعدج نفس صلافتج وأوسخ لساني اذا حجيت وياج أكثر بس أكولج منتظرج مفأجاه بيت أهلج تخبل
ـ توني ردت أجاوبها حظرتني ضليت دايخه بيها والصراحه گمت أخاف متت خوف معقوله يكون مالك جاي يخبث عليه لان هو بوكتها هددني أني وأهلي بس مالك ما يسويها هاي سالفه بنات متأكده وحده منهن هنا كلهن يكرهني بس ياهي جانت تحب مالك ياهي بيداء
عصرت مخي بس بداخلي خوف شصار حتى ولا أكدر أتصل عليهم وضليت أنتظر مصيري الى أن أتصلت عصماء تحجي عصبيه ودمها فاير وسوتها النذله وهاي المفأجئه المنتظرتي بالبيت خربت على أختي بس منين جابت حساب باسل مو صعبه عليها دخلت على حسابي والمتابعين مالتي أكيد، رحت سويت حسابي خاص ولغيتهن كلهن ما بقيت ولا طالبه من أيام السادس كلهن لغيتهن ..
ضليت عايشه بقلق تالي گلت اراسل مالك معقوله يكون هو وتالي گلت أراسله أحسن دخلت بحثت عليه لكيته مغير صورته صاير شگد حلو وشفت منشورات عن زواجه ، دخلت دزيتله مالك وجاوبني
مالك ـ هلا بيداء .
بيداء ـ مبروك تزوجت
ـ الله يبارك بيج شو اليوم متذكره مرتي راح تولد
ـ ليش حامل
ـ أي الحمدلله
ـ الله يگومها بالسلامه
ـ الله يسلمج شلونج
ـ زينه ، مالك بعدك تكرهني
ـ لا والله ما عندي شيء وياج رغم حجيتي وقسيتي بس گلبي ما يحقد عليج وبيوم من الأيام جنتي ساكنته
ـ أدري بيك گلبك طيب
ـ اليوم شذكرج بيه
ـ أريد احجي وياك بموضوع مهم
ـ گولي
ـ عليك الله ما سويت شيء يهدد سمعتي وسمعة أهلي
ـ لا والله وحجيت من نار گلبي شبيه خبل أحجي عليج
ليش شصاير وياج
ـ أكو وحده تهدد ورايحه على خطيب أختي عصماء أنخطبت قبل فتره بس المشكله ما حاجيه عليه حاجيه على أختي .
ـ وأنتِ شگيتي بيه وجايتني مو
ـ لا بس أنت جنت صندوق أسراري وكلشي احجيلك وگلتلك علي نجم بوگتها مو صح
ـ أي صح بس مو معناها تركنا اطلع أسرارج وأصير نذل
ـ بداعت حُبنا وأيامنا الحلوه أحلفلي مو أنت
ـ جاي أكولج مو أني شبيج أنتِ
ـ لعد منو
ـ شمدريني منو اكعد أدورلج منو الحاجي عليج وأنتِ ماكو واحد ما صاحبتي اكيد حاقد عليج وطلع خياسج
ـ لاتكوم تجفص مو جايتك وجاي احجي وياك بأحترام بس الظاهر أنت ماكو غيرك لان أنت الهددتني بالأول
ـ جايتني وتكولين أنتَ فوك حقارتج القديمه رجعتي هم حقيره ونذله لج شوكت تطهرين وتجرين عدل وشوفي سوالفج وين وصلتج وصلت لاهلج وضرت أختج والله يدري بعد شعندج
ـ أحترم نفسك وصوجي اجيتك
ـ ما عاتب عليج تجيني وعبالي ادمي دخلتي تسلمين عليه واجاوبج بأحترام بس بعدج نفس حقارتج ويله ولي
ـ گبل حظرني والله هو ماكو غيرك أنت حقير ويخوف بيه ورجع خرب على أختي عصماء خرب غيرتك اذا أنت شريف ويحجيلي عود هو خوش أدمي طلع انكس خلق الله ..
ومرت أيام طبيعيه ماكو شيء وباسل فهمته عصماء وتفهم الأمر لان رجال خوما مثل الزلم العرفتهم بحياتي ما بيهم واحد شارب حليب طاهر ورحنا السوك أمي أشترتلي ملابس ما قصرت على الرغم عندي گومه مهيب يدزلي ورجعنا البيت ولكيته مراسلني كومه
مهيب ـ ما أشتاقيتلي .
بيداء ـ أختي راح تتزوج ومشغوله وياها أصلاً ما عندي مجال .
ـ أني هم ملتهي بمشاكلي
ـ شصاير وياك
ـ بعدين أحجيلج
ـ حبيبي لاتخلي بالي يمك شگو
ـ مشاكل بالبيت بعدين نحجي
ـ ما فهمت منه وعفته على راحته بس يضل يدزلي رسائل ويسأل عني مثل الطفل يدور ورة أمه وعفته يحل مشاكله ، وصلتني رساله حساب مجهول حتى بدون صوره
ـ ها شلونج شخبار زواج عصماء
ـ بيج خير تعاي بيتي وواجهيني يا حيوانه گبل حظرتني شكد نذله ما توكعن بمشكله تنكسر ركبتجن أنعل ابوجن لأبو اليصادق ويثق ويفتح كلبه لصديقه ما تدري بيا ساعه يطعنك بسجين ويطعن بشرفك ويشوه سمعتك الجنت حاسبه صديق ودرستوا سوه مثل أخوان
وبيوم حنة عصماء وما شاء الله ما قصروا وكل أقاربهم اجو لبيت جدي ومحد من الزلم دخل بس حفلة نسوان صافنه عليهم وفرحانه الها من كل گلبي وأخذت صور
شهلاء ـ عوفي الصور روحي البيتكم جييلي صينيه نضيف بيها العندي يكفن بسرعه مو تنامين .
بيداء ـ أي عمه طلعت وفتحت باب الحوش سياراتهم طابگه يم الباب وأني أمشي وصار بطريقي أخوه يخابر جنت لابسه فستان وذابه الشال على شعري عبرته وصلت بيتنا أخذت الصياني ورجعت وهو واكف يم السياره وكال
نائل ـ أنتِ أخت عصماء
بيداء ـ أي أني أختها ليش
ـ هيج والله سألت ، شنو أسمج
ـ بيداء
ـ عاشت الاسامي وأني نائل أخو باسل
ـ أهلاً وسهلاً
ـ أهلاً بيج
ـ العفو منك لازم أروح محتاج شيء
ـ لا سلامتج أخذي راحتج .
ـ تمام
ـ فرصه سعيده
ـ هزيت رأسي ودخلت وأمي وعصماء يردن يأكلني أمي كبل كرصتني بكل قوتها شكو شبيج
ـ وين جنتي
ـ وين قابل رحت جبت صياني مو كدامج
ـ لاتضلين خفيفه ناس غربه لاتفضحينا
ـ أهتضمت وما جاوبتها رجعت يمهم الى ان خلصت الحفله ورحوا ورجعت البيت تعبانين وتعشينا وعصماء غركانه بالحب واني لزمت موبايلي لكيت مهيب مراسلني جاوبته وما رد عليه الوقت متأخر يمكن نايم
رجعت أتصفح وما أجاني النوم وعصماء نامت خطيه تعبت اليوم ، ووصلتني رساله من حساب فتحتها
نائل ـ صباح الخير .
شكرا لزيارتكم عالم روايات سكيرهوم
