رواية بنات الحجي السعيد الفصل الثاني عشر بقلم شمس العراقية
ليال ـ متجهزين نروح الحنه وأمي ولقاء من الصبح راحوا على عصماء باسل وداهن ورجع وبالحنه لقاء وبالعرس أني ، واكفين ننتظر الباقين وكل بنات عمي متحضرات وياقوت وغدير واكفات يحجن وهدير اجتي يمي .
هدير ـ شعجب ما رايحه وياهن بس أنتِ باقيه .
ليال ـ باجر أروح ، ما عرفتي عمتي نجلاء شوكت تجي ترى يله نلحك نوصل ولازم نرجع من وگت .
هدير ـ يمعوده خابرتها أمي تكول شعدكم مستعجلين وقحط عاد وين رايحين هو لبيت خرايب عاد جديتي كبت بيها وگالت هسه نكمل وكالت خل نائل يجي يأخذنا .
ليال ـ خير أن شاء الله وشويه ونزل نائل مستعجل ويحجي على أمه
نائل ـ سايق أني سايق يا سالفه ما تخلص أني اضل اجيب فلانه وعلانه .
ليال ـ راح جابهن وأجه وأشتغلت الموسيقى وصوت الأغاني بصوت عالي ودخلت هي وبناتها وتهلهل عود فرحانه ضحكت على حركاتها وركصها فلا صاحيه وتكابلت هي وعمتي أنسام واسمهان وانكلبت الصاله دك وركص والبنات كذلك ضليت واكفه على صفحه ودخل ليث باوع وأشر لأخته وراحتله ، شويه وأجتي حتى ياقوت هم متغيره مو مثل قبل عليمن تطلع أخوهـا منو ...
كاعده يم عمتي نجاح أعدل بشالها طلعتي تخبلين
نجاح ـ فدوه لوجهج مو بجمالج ، هم خابرتي عليهن خلصن بعدهن
ليال ـ هسه أخابرهن موبايلي بالجنطه اروح اجيبه ورحت الغرفه عمتي أريد أخابر لقاء وأستوقفني الكلام .
غدير ـ وأني أكول ليث هذاك اليوم واكف وياها وست أيناس صايره حيل قريبه منج أثاري أهنا الحجي عمي .
ياقوت ـ أي هي كلش حبابه .
ـ من شوگت علاقتهم
ـ صارلهم كم شهر .
هدير ـ عن منــو تحجون؟
غدير ـ هدير تعاي سمعي أذا أكولج ما تصدكين
هدير ـ شگو كولي .
غدير ـ ليث ست ايناس مره حجيتلج عنها أكو بينهم علاقه حب
ياقوت ـ يمعوده صوتج أنتِ ما ينحجي الج حجايه بعد الا يصير شيء رسمي وأن شاء الله عن قريب بس هسه سكتي .
هدير ـ ها بيها الخير أي شگو بيها .
ليال ـ دخلت وسگتن وهدير باوعتلي بحزن مشيت سريع أخذت جنطتي وارجف وكعت مني وتطشرت أغراضي وانخبصت واجتي هدير ساعدتني
هدير ـ على شنو ادورين اني اساعدج
ليال ـ على موبايلي ما أعرف وينه أكلب بالاغراض وافرك بوجهي وجمعتهن عالسريع وطلعت شافتني عمتي نجاح وسألتني وأني أريد أنفرد بروحي سويتها وكسرتلي گلبي لو متعمد گلت لأختك تحجي وتريد تستفزني وتختبرني !
نجاح ـ ها خابرتي أختج
ليال ـ هسه أخابر ، طلعت من البيت وكفت بالطرمه مختنگه وباسل أتصل عليه ها باسل .
باسل ـ ليال تعاي البيت عصماء ما اعرف شتريد گلبت الكنتور ماكو أتصلي عليها وافهمي منها .
ليال ـ ماشي أتصلت عليها وفهمت منها طلعت وشعري نازل على ظهري بس الشال مرمي بأهمال وصلت بيتنا وفتحت الباب وصعدت لغرفة باسل وصلت وشفت ليث يم الدرج يگلب بموبايله شافني رفع رأسه وصفنت عليه أيبـاه شگد جنت عزيز ، مشيت وگال
ليث ـ وين رايحه كلهم موجودين
ليال ـ تجاهلته وگفت يم الباب صحت باسل شويه وطلعلي
باسل ـ ها ليال أوكفي خل اطلعهم ودخلي دوري غراضها
ليال ـ باوعت لباسل گالب الغرفه هوسه وسجاد وفارس موجودين وطلعوا دخلت أخذت أغراضها وطلعت هما دخلوا هو ضل واكف نزلت الدرج وهو نزل وراي عبرني ومشه وحجيت ليث گبل أندار وباوع فوك .
ليث ـ ها
ليال ـ وين تريد توصل بهاي تصرفاتك .
ـ عن شــنو تحجين .
ـ أختك ياقوت اللي موصيها تحجي وعود خل ليال تسمع على علاقتكم أنت والأستاذه أيناس لو هاي كذبه أخترعتها علمود تستفززني بيها ، تقرب عليه وحجه
ـ ليش أنتِ موجوده بالحياة علمود أستفززج ،أنتِ منو حيا الله بنت عمي .
ـ أني منو
ـ أي ما الج مكان وما شايفج أصلاً ، لا تتأملين بعد أنتهيتي من زمان .
ـ ماشي هذا هو باوعت بعيونه ونزلن دموعي مشيت سريع وصادفني نائل أنضربت بي وعبرته رجعت البيت گبل دخلت الحمام ضليت لحدما صاحوا راح نمشي تالي طلعت وأخذت شغلات عصماء وياي .
جنات ـ وين جنتي باسل يسأل عليج .
ليال ـ هياتني أجيت، مشينا وصعدت ويه باسل وجنات راحت ويه نائل وجواهر وأنفتح الباب وصعد بالصدر!! .
ردت أنزل وأجه باسل .
باسل ـ يله هذا هو نمشي .
ليث ـ توكل ترى يله تلحك .
باسل ـ يمعود غير سوالف النسوان والصالونات العروس ما طولت بالصالون بكدهن .
ليال ـ ومشينا طول الطريق هو يدخن ويضرب بأصابعه على رجله تجاهلته مو مال بعد أباوعله ما يستاهل وجع گلبي ، يحجي ويه باسل وتردد موجات صوته غصب تدخل برأسي المفروض نازله لو رايحه ويه البنات ولا باقيه بالسياره ويجمعنا نفس النفس وريحة الجكاير هي ريحته
وصلنا ونزلنا بعدها ما باوعت وراي ولا بعد أباوعله لو روحي تصير بي ، وصلت لطريق ما بعد بي رجعه عود گلت يريد يستفززني أمداني شحس من سألته شگد غبيه غبيه .
ودخلنا البيت وشفت أمي لو ردتلي روحي كأنما حست بيه گبل حضتني أشتاقيتلج يمه .
هيفاء ـ وأني هم وبالي يمجن شبيج منو وياج
ليال ـ لا ما بيه شيء تعبت من الطريق نفسي تلعب أي لقاء وين خل أشوفها ، شدت على أيدي
ـ حجيتي وياه مو
ـ لا
ـ أحجيلي ماما ، أمشي بالغرفه
ـ بعدين ماما من نرجع البيت
ـ ماشي حبيبتي لاتضوجين هو الخسران .
ـ أي ورحت شفت لقاء طالعه تخبل وحست بيه
لقاء ـ رجاءً بدون حزن اليوم فرح ممكن تأجلين حزنج
ليال ـ لا يمعوده على شنو الحزن
ـ أي عفيه يله تعاي نهوس أني أصيح وانتن رددن وراي .
ليال ـ تمام خرب تحمست
جنات ـ مو بنصهن تنسيهن وتفشلينا .
لقاء ـ أني انسى مو بالحيف يله وراي وين طبول
ليال ـ هاج شلنا طبول وكفت بالنص وأحنه نردد وياها .
لقاء ـ وعيون الغزال عيون جنتنا صلوا على النبي الصيده صيدتنه وأخوي أسمر ويخبل وكل القوط تلوك عليه وعروسته فصوص روبه يا كفاها وين دورهه ولگاها وعين الحاره الحمزه يطفيها وعين البارده كل الهلا بيها ..
ليال ـ وجبناها بهلاهل ثلاثتنا ووتكابلنا وركصنا وذبيت قهري ودعت الحزن وعشت الفرح بعرس أخوي وسحبنا أمي وركصناها ويانا .
لقاء ـ وعلى عناد عماته يركصن أمه وأخواته .
ليال ـ وضحكنا وباسل ضحك علينا ويباوع على لقاء وهي خبلت عماتي وكلبت الجو وكلهن كامن يركصن
لقاء ـ أخونا خوش أخوه يستاهل الهوسه ..
ليال ـ وأستمرينا وأخذنا صور وخلصت الحنه وتحهزنا نروح البيت وصعدنا بسيارة باسل همزين ما أجه وما حسيت غير وگف يم السياره وسأل لقاء .
ليث ـ باسل وين
لقاء ـ جوه بعده هسه يجي .
ليال ـ وگف يم سياره نائل مقابيلنا وفتحت الباب ونزلت وباوع عليه ورحت صعدت من الصفحه الثانيه ولقاء كعدت بمكاني .
لقاء ـ هيج أريدج بس ليش فتحتي الباب جان تزحزحتي لو الا تشوفينه طولج هو بدون شيء مستوي .
ليال ـ خرب بيومج ، شغلي أغاني .
لقاء ـ صدك جذب جوي وأجوائي وهاج .
ليال ـ شغلت أغاني وحرگنا الجو وأجتي أمي والكل
واجه باسل وراه عصماء سلمت علينا باي حبيبي .
عصماء ـ الله وياكم طريق بالسلامه يارب .
ليال ـ وشغل وطلعنا والاغاني مشتغله بعلو الصوت وثلاثتنا نصفك ونضحك وأمي بالصدر وعبرنا من يمه صاعد ويه فارس وصلنا البيت وطبگت سيارتهم بالفرع ونزلنا لبيتنا غيرنا ملابسنا وتمددنا نرتاح ولقاء سلمتها تراب گبل نامت وأمي أجتي كاشخه
هيفاء ـ كشخن وأمشن لبيت جدج أهناك العشه والحنه مالت أخوج ولد عمج مسويله حفله ..
ليال ـ ماشي يمه كعدت لقاء وجنات وكشخنا بأحلى ملابس وطلعنا لبيت جدي وكل ولد عمامي موجودين وجوارينه كلهم ولد شباب همزين لابسين عبابات
دخلنا البيت وصبوا العشه وهوسه والزلم بالحديقه واكفه اني ولقاء نساعد عماتي ودخلوا أخذوا وهو من بينهم وخلصوا وكعدنا تعشينا وبلشت الهوسه الاصليه همزين شغلوا اغاني وكلنا تشاركنا بالتنظيف انظف ونركص ولقاء لازمه ماسحه وتركص مثل المصريات وهدير مكابلتها وذبينا لحم حتى عماتي هم ركصن
وكعدنا نرتاح ونشرب عصير وناكل كيك وعمتي نجلاء گالت .
نجلاء ـ حرامات لو مسوين الحنه بقاعه شنو بالبيت منو ضال يسوي الحنه بالبيت كلها بقاعات وبيتهم جنه خرابه
هيفاء ـ شنو هالحجي مو عيب ما أسمحلج تحجين على العالم وكلمن على كد حاله وليش خرابه بيت جبير وبيت ناس حموله والجماعه ما قصروا
نجلاء ـ وغصباً عليهم ما يقصرون وين يصح الهم هيج نسابه بيت الصايغ بس الأسم كافي عليهم .
هيفاء ـ وأذا بيت الصايغ شنو يعني رئيس دوله ولو احنه لو بس نبطل تفخخ جان بخير اليسمعج يكول مالكه نص العراق .
حليمه ـ نجلاء كافي ما تجوزين من سوالفج .
نجلاء ـ سگتنا حسره ما واحد يحجي تكبين بي .
ليال ـ جديتي كامت تحجي عليها يله سگتت ولقاء كرصتني شگو
لقاء ـ شفتي تماضر شلون تهز بخصرها أني أخته ما هزيت هالهز حتى أستحي وبالأخص من نائل صعد لغرفته يابه أنكرصت لزمتها الرعصه
ليال ـ شفت عيني شفت
لقاء ـ گومي نكمل
ليال ـ كمنا .
جنات ـ أكولجن تعبت ما بيه
لقاء ـ جذب لاتجذبين أركصي لا أركص على عظامج
يله بنات سمعني هسه نركص جوبيه والتميل رجلها ما تركص عدل خل تنسحب من هسه مو بس تمطن بخصرجن لزكتن بيها ، أيد جوبي معدل وين الله وباسل يجي ويكابلني .
ليال ـ يله ولقاء القائد مالتننا واني بصفها وبصفي جنات وهدير وتهاني وتماضر وغدير وياقوت وفيروز وزمرد وبلشنا والجوبي يخبل وصارت بيهن خوفه من لقاء حتى الما تعرف تعلمت ...
حليمه ـ ولج لقاء جده عين النبي تحرسج على كيفج ويه رويحتج ...
لقاء ـ جده اليوم حنة أخوي أذا اني ما أركصله منو يركصله .
ليال ـ واستمرينا ودخلوا باسل ونائل يردون جاي ولقاء سحبت باسل
لقاء ـ عليك العباس تعال ويانا هذن ما بيهن وحده تبرد گلبي .
باسل ـ ولج الزلم بالحديقه يردون جاي بعدين بعدين
لقاء ـ وين بعدين غير لو نشوفك بعد هسه تخلص وتروح تستلمك عصماء امانه تعال ويانا .
هيفاء ـ أركص وياهن خطيه يمه خياتك .
باسل ـ يله ميخالف
نائل ـ وأني هم ضلت عليه
ليال ـ وصاروا واحد بصف الثاني واني بصفهم وأخواتي بصفي وبنات عمي ويانا وركصنا ونائل توسط ويركص عليه حركات وجوبي تخبل وتماضر راحت بعالم ثاني ولقاء همست بأذاني
لقاء ـ باعي النظرات الخطيره .
ليال ـ الله وأعلم .
باسل ـ يله كافي أمشي ، وهسه نريد جاي .
لقاء ـ تدللوا .
ليال ـ وحضرنا الجاي وعمتي نجلاء رجلها دز عليها وتحجي بعصبيه أبداً ما تعرف تتفاهم ويه الكل تعارك
الحجيه حليمه ـ روحي والصبح رجعي لو الا تسوين مشكله .
نجلاء ـ حسره ما اجيت تعالي ماكو بس نجلاء عود فرحت اليوم أخواتي مجموعات وعرس واجيت .
ليال ـ مشت عصبيه ما تريد تروح وجمعت الكلاصات ورحت المطبخ وأسمع عمتي نجلاء تحجي ويه تماضر وتوصي بيها .
نجلاء ـ أبقي كاعده يم بنات خوالج وبنات عمتج وباتي يمهم الصبح أدز أخوج فهد يجي ياخذج ونروح الصالون .
تماضر ـ وين أبقى وبنات خوالي يمكن يرحون بيتهم .
نجلاء ـ لا ما يرحون بيتهم يبقن وثوبج غيري لبسي الأخذته الج الجديد وأشتغلي ونظفي لاتضلين بارده عاله گلبي بفهاوتج شبيج صيري مثلهن وحدتهن تأكل الكاع .
ـ وإذا جديتي سألتني
ـ ما تسأل وأذا سألت گوليلها بقيت يم بنات خالي مجموعات وعود تحركي كدامهم وليث هم
ـ وليث شكو يمه شبيج
ـ وجعة أبو أمي سوي الگتلج عليه ، هاي ليال بنت خالج الزلم مهايل عليها ، بس حظي ما يباعون بوجهجن الله ياخذجن باردات
ـ يعني أضل
ـ لعد شجاي أحجي أجنبي أي ضلي لعد اني رايحه أبوج خبصني واني عبالي اضل ، وأنتِ أمشي يم البنات وأذا راحن نظفي وراهن وغسلي البيت لاتكعدين .
ـ أي فهمت
ليال ـ طلعت وشافتني وعوجت حلگها وراحت وضلت تماضر راحت غيرت ثوبها وطلع يجنن عليها وحاصره جسمها هاي عمتي غيره ما عدها شلون تشتري الها هيج ثوب ضيك وكاشخه وريحة عطرها دمار لقاء غمزتلي!
وأنجمعنا بغرفة عماتي وكرزات وحبشكلات وكعدنا وعمتي فرشتلنا ودخل علينا نائل .
نائل ـ ياقوت فيروز ليث أجه عليجن
ياقوت ـ وين مو گلنا لأمي نضل نبات اهنا .
نائل ـ ما أدري گالي صيحهن .
ليال ـ كامن وبعد ما رجعن وأمي هي وباسل راحت البيت وعرفت أبويه هم رايح لان وجه جواهر أنكلبت خلقته وتغسل المواعين وتسوي صوت وتحجي بقهر
جواهر ـ ما صدگت أخذته ومشت وعافت عليه بناتها الله يأخذج أنتِ وبناتج شگد احبج عاد احب بناتج ، هيفاء لنوم وجواهر غسل وطبخ ونفخ ساعة السوده اي والله يمتى أخلص يمتى
لقاء ـ هدوني عليها أروح اكسر حلكها
ليال ـ وين يمعوده ستري علينا لا أطگ
ـ كامت تموت عوذه خوما بس رجلج .
ـ من يوم يومها هيج تريدينها تتغير هاي الضره مره
ـ أكولج تعاي أنتِ هم ملاحظة هالوكت ماكو افلام رعب وسحوره والجن مالتها مختفي علينا يمكن زعلان وياها لان ما جاي نشوف شيء .
ليال ـ أعوذ بالله من الشيطان الرجيم
ـ لان والله ملاحظه ماكو گلشي شعجب مبطله سوالفها والله هالهدوء هذا منها ما مرتاحتله!
ـ الله فكنا منها ومن سحرها سدي موضوعها امشي يم البنات ودخلنا يم البنات وگلمن بفراشها واني ضليت كاعده ويه هدير نسولف ولقاء نامت والكل نام والوقت تأخر وأني ما يجيني النوم فتحت موبايلي لكيته فاتح أنترنت عفته وگمت غسلت وتذكرت كلامه أختنكت وضليت بالحمام ورجعت وفراش تماضر فارغ!
وين راحت طلعت وعثرت بجنات باوعت بالصاله ماگو رجعت واجاني صوتها من فوك تبجي ...
تماضر ـ نائل أشسويت بيه أشسويت شگول لأمي والله تذبحني ليش هيج سويت بيه ما عبالي تصخم وجهي
نائل ـ شصخم وجهج ولج أنتِ أجيتني واني نايم بغرفتي وشعندج بقيتي ما جان تروحين مو هذيج مره نبهت عليج وكتلج بالبيت بعد ما تباتين تلحكين أمج واختج ليش بقيتي .
ـ نائل لاهيج تحجي وأنتَ تعرف أني أحبك وبقيت علمودك .
ـ بس اني ما كتلج ابقي أمشي غسلي وأعوذ بالله من هالساعه الكشره الصعدت بيها غرفتي لو سامع كلام أبويه وراح نايم يم باسل مو اشرفلي ، گالي لاتنام بالبيت البيت مليان بنات عمامك وعماتك بس أني طايح حظ أجيت .
ـ واني شسوي نائل تصخم وجهي والله أمي تذبحني
ليال ـ صخام الوجه هذا شمسويلها وسمعت صوت حركه ركضت بالحمام ختلت وصوت عالدرج يمكن نزلوا وأسمع صوتهم بس گوه ينسمع وأنوب الحمام اظلم أنصرعت دخيلك ربي ، هسه جني من جناني جواهر يتلبسني وأطلع مفرعه يا فضيحتج يا ليال على هالليله الكشره مليانه رعب وأكشن .
جواهر ـ أصعد لغرفتك وما عليك
نائل ـ شصعد يمه كسرتها .
ـ أنت ما كسرتها! هاي هي معيوبه وعمتك تريد تذب بلاها عليك ، ليش ما اعرف بسوالف عماتك تعلمني بيهن كل البلاوي السود عدهن
ـ يمه شبيج البنيه اني كسرتها تردين تكلبينها بينا
ـ أمشي أصعد لغرفتك وما عليك وأنتِ تعاي
جواهر ـ أمشي غيري ثوبج وانكبري يم عماتج شعندج باقيه لو هاي سوالف أمج تريد تكربسج براس أبني
تماضر ـ فدوه رحتلج عمه ساعديني والله ما عندي سوالف وگلشي صار نائل يعرف بي
ـ شساعدج أنتِ ما حافظتي على نفسج وأبني نايم بفراشه ما داز عليج خط مصخم تصعديله والدنيا ليل والشيطان شاطر شسويلج يصلي وياج ما جان تضلين نايمه بفراشج حالج حال أختج وبنات عمتج أنسام مو وياج شو ما الهن صوت بس هاي دروب أمج
ـ يمه الله يخليج أبوس أيدج ساعديني
ـ أمشي وخل سوالف امج تفيدج موت الكرفها اني عندي بنيه واعوفها وأمشي
ـ عمه فدوه أروحلج بس أسمعيني .
ـ شوفي أذا جبتي أسم أبني أشهرج شهيره أنتِ وأمج
يله امشي غسلي وغيري ثوبج ونامي والصبح خابري أمج تجي تاخذج وتلكيلج حل .
ليال ـ أختفى الصوت وسمعت صوت حركة عالدرج وشويه وأنفتح الباب وأثنينا فزينا
تماضر ـ ليال شتسوين .
ليال ـ وگعتي گلبي شسوي قابل أجيت الحمام .
ـ عبالي ماكو أحد لان الاضويه طافيه يله أخذي راحتج
ـ لا دخلي ، طلعت ودخلت وفتحت الأضويه ولاحظت ثوبها من ورى بي دم! يعني صُدك كسرها ليا نذل يا نائل ويه بنت عمتك عرضك ولو أمك جواهر شتطلع صخام الصخكم على هالسالفه الحرام صار عدكم شيء عادي أستغفرالله .
"رجعت الغرفه قبل لا تنزل جواهر وتشوفني حرام گبل تذبحني ودخلت فراشي نمت والبنات مثل الموتى من كثر ما ركصن تعبن الا اني بعيوني ملح من ورى ليث وقهره ولا يجيني نوم .
ضليت كاعده وغرفه مشتغل بيها تيبلم أصفر ضوء خفيف ودخلت تماضر سابحه وشعرها يذب ماي خلت ملابسها بالجنطه وكعدت أختها تهاني باوعتلها وگالت .
تهاني ـ تماضر وين جنتي شنــو سابحه! .
تماضر ـ نامي ما ناقصتج .
ـ شگو شبيج
ـ صوتج وسم اليسمج نامي شكعدج .
ليال ـ لفت رأسها ونامت وأسمعها تشهك وتهاني كعدت حاولت وياها وتماضر أدفر بيها تالي رجعت نامت
على اللي سمعته سنه كامله ما يجيني نوم على ساعات الليل المتأخره والفضايح الله يسترنا ...
للصبح مأخذتني النومه كعدت على صوت لقاء متعاركه هي وجنات فتحت عيني شگو شبيجن .
هدير ـ مثل الضراير من كعدنا لحد الأن متعاركات
هاي هيج دائماً .
ليال ـ أي والله وجنات عناد .
جنات ـ أني رايحه البيت أخلص منج
لقاء ـ أنتِ روحي لوحدج وأني أعلمج الا أخليج عرجه والله أكسر رجليج بس تروحين
ليال ـ جنات طلعت ولقاء لحگتها وباوعت فراش تماضر وتهاني فارغ لعد وينهن .
هدير ـ كعدت ما لكيتهن سألت غدير گالت أخوهن أجه من الصبح أخذهن بس شعدهن غباشات واليوم عرس
ليال ـ بگلبي خوش عرس عليهن نائل جاوبتها والله ما أدري سوالف عمتي نجلاء ما تعرفينها يله خل نكوم
هدير ـ يله بس أحنا نايمين أمي وعماتي وجديتي من الصلاة كاعدات ومحضرات اللحم والطباخ جاي أطلعي بالحوش وشوفي الهوسه وولد عمي موجودين ...
ليال ـ يله نكوم كعدنا والبيت نظيف واجتي لقاء ها جنات وينها
لقاء ـ بالمطبخ جاي تتزقنب ، خل ادخل اغير ملابسي لان ورانا شغل وكالوا يطبخون بيت عمي كريم .
ليال ـ ماشي وكعدنا تريگنا وأستلمت المطبخ ما طلعت من عنده وهدير وعمتي نجاح وياي وسوينا الهم ريوك وحضرنا كلشي وأجو يأخذونا وهو أول واحد دخل وتقدم أخذ الجاي من أيد هدير أني كبل أنطيته ظهري
خلصت الهوسه والبيت غسلنا وگملنا وأجه باسل
باسل ـ يله أمشي تروحين ويه أمي .
ليال ـ ماشي أكو مجال أفوت
باسل ـ لبسي عبايتج وتعاي .
ليال ـ لبستها وأخذت جنطتي وشفت نائل صعد لغرفته
ولاحظت عمتي نجلاء ما أجتي لحد الأن حتى جديتي تسأل عنها .
ً ـ ليال وين صرتي .
ـ أجيت وطلعنا وهوسه وطلعنا من باب الصغير منصبين خيمه بالفرع وصلنا بيتنا لكيت أمي جاهزه تحجي ويه عصماء عالموبايل دخلت لبست وأخذت أغراضي ومكياجي تأكدت منه وطلعنا وعمتي سلوى أجتي
هيفاء ـ ها يمه باسل وين صرت ورانا طريق
باسل ـ يمه ديالى بصفنا أنطيني صبر خل أشوف أبويه
ـ شبيك مخبوص أبني وولد عمامك موجودين ما يقصرون .
ـ غير رجلج يگولي لاتروح أبقى العالم تجي تبارك الك
ـ أهوو لعد شلون يا أمي نضل واكفين
ـ خل أشوف واحد من الولد بس أصبري عليه لاتثوليني مثل أبويه منصب العگال برأسه وبس يصيح علينا .
سلوى ـ روح أبني لاتخبص نفسك بعد وگت ومريتك حجاب شعدها بس المكياج
ليال ـ راح وضلينا واكفين بالحوش وشويه وسمعنا هورن هاي مو سيارة باسل! طلعن كدامي وشفته ليث
خرب بحظي أي والله هم هو! مال أبطل وأدز لقاء بمكاني صعدن أني بصف أمي وعمتي ليكدام وشغل
وطلعنا طول الطريق يحجن أمي وعمتي سلوى وهو قليل يحجي ساكت مثلي .
سلوى ـ ليال عمه ما تتصلين على ياقوت نسيت موبايلي .
ليال ـ بگلبي يا عمه أبنج بصفج طلبي منه ، أي عمه أتصلت عليها وأنطيته الها وهو سحبه مني گبل سحبت أيدي وأمي باوعتلي
سلوى ـ هذا ما يسمع .
ليث ـ شو جيبي .
ليال ـ سحبه وفتح سماعه وأنقطع الأتصال ورجع أتصل ولازم موبايلي عادي أريد أعيط بي وأنطاه لأمه وحجت وياها وأني مقهوره شلون يلزم موبايلي .
سلوى ـ ياقوت أكوي قمصان أخوانج نسيتهن قميص ليث على المنشر وفواز على جربايتي مو تنسيهن يله عود خابريني على ليال أي ويانا يله سدي
ليال ـ أخذه وهو قطع الأتصال وخلاه يمه!! شنو هاي موبايلي عيني وگمت أموت هاي شيسمونها شحجي هسه وأمي تسبح بالها مو يمي ، باوعلي وحس بيه صايره فحم على موبايلي مدلي أيده وسحبته ولامس أصبعي وسحبت أيدي وكع الموبايل شيخلص هاليوم الأكشر .
وصلنا ديالى وباوع علينا وگال
ليث ـ عمه للبيت لو لصالون لان باسل گال تأخذهن من البيت عصماء وأختها وأمها .
هيفاء ـ ها أذا تمرلهن السياره ما تكفينا نزلنا يم الصالون وروح جيبهن .
ليث ـ ماشي
ليال ـ وصلنا الصالون ونزلنا وعمتي سلوى گالت .
سلوى ـ روحي وياه خطيه يستحن .
ليال ـ ليش يستحن مو أمهن وياهن
سلوى ـ خاف ما تجي لو أهلهن ما يرضون روحي وياه عيب من الجماعه ما يصير يكولون دازين بس الرجال ما وياه مره ، يله روحي يله هيفاء تعاي .
ليال ـ يمه أنتِ روحي أمي رادت تحجي عمتي سحبتها
أني حظي المزفت مشن وعافني وهو واكف يدخن جكاير ، صعدت ليورا هسه قحط الأ أنت توصلنا ليش مو فارس أو نائل كومة ولد عمام عندي بس أنت ابو البطولات .
شغل ومشينا وأيدي على گلبي والله خفت منه باوعلي بالمرايا وگال
ليث ـ شدعوه هلگد خايفه مني لو عبالج راح أخطفج
ليال ـ فز گلبي ما جاوبته .
ـ لاتخافين مو نفس الأول يفز گلبي من أشوفج حالج حال ياقوت والأخ ما يضر أخته مو صح .
ـ أي صح ونعم الأخ گلتها وسرع سرعته كون نسوي حادث وأثنينا نموت ولا هالعذاب الجاي نعيشه يا ليث
وصلنا ونزلت ونسيت جنطتي ولكيتهن جاهزات بس عصماء وبيداء أمهن ما تروح وطلعنا وصعدن .
بيداء ـ صعدي بالصدر فارغ .
ليال ـ باوعلي وصعدت وأخذت جنطتي ولزمتني رجفه بگلبي ريحة عطره الترست خشمي وريحة دخان الجكاير الأتنفسها حركة أيده من يسوق أخطف نظرات وأرجع أتدارك نفسي الى أن وصلنا والتهيت وياهن ونزلنا الأغراض وصاح وراي بأسمي .
ليث ـ ليال
ليال ـ أوف بگلبي شتريد من ليال جاوبته بعصبيه ها
ليث ـ جنطتج نسيتها .
ليال ـ فتحت الباب وأخذتها وباوعتله وصد وجهه عني وگتها من صدك أنقهرت منه شايف كدامك عدو ما تباوعلي مشيت وعفته ودخلنا وبلشت أم الصالون
وأني ضلت بس الحمره أخلي من مالتي فتحت الجنطه أدور عليها ماكو وين راحت يربي من طلعت خليتها متأكده گلبت جنطتي يربي وينها .
هيفاء ـ شنو هي شدورين
ليال ـ قلم حمرتي دائماً أخلي منه ماكو
هيفاء ـ يجوز وحده من أخواتج أخذتها
ليال ـ لا رجعناها يربي وينها .
سلوى ـ خلي منا كومة حمر يا عمه الا هي
هيفاء ـ هي ما تخلي بس من هالحمره وبس يخلص توصي منه وأخواتها محاربتها عليه ويلوك الها أكثر منهن .
ليال ـ ما لكيته وخليت لون ثاني وراسلت لقاء
لقاء ـ لا مو يمنا مو جانت يمج خليتها بالجنطه .
ـ أي ومن رحت البيت خليت مكياج وخليت أغراضي وملابسي متأكده بالجنطه .
ـ أكولج خاف هو أخذها!
ـ لا ما أتصور
ـ أنتِ هم عفتي جنطتج بالسياره
ـ أي من وصلنا عصماء نسيتها .
ـ هاي هي لعد ليث أخذها .
ـ لا يمعوده شيسوي بيها أني وحده من أخواته
ـ أيباه من شوگت شگد يجذب
ـ من زمان بس تدرين ضحكني صرتي حالج حال ياقوت
ـ دتطير أنت وياقوت والله جاي يقهرج ولج شبيج لبسي خل يموت من قهره هذا اليلعب بالنعمه يخسرها وأحنه بنات سعيد ما نتعوض خاف عباله أمنا فقيره ونسگت لا حبيبي أحنه أبونا سعيد الوكح .
ـ هو هيج ، أكولج هو رجع مو
ـ أي موجود ونائل راح يجيكم
ـ نائل وراه سالفه كبرى أرجع وأحجيلج
ـ خرب تعاي أحجيلي هسه
ـ لا مو هسه بعدين
ـ تعاي هسه عليج العباس
ـ لاتلحين
ـ أهوو تحجين السالفه وتكطمينها عوذه
ـ بعدين باي ورجعت وساعدت عصماء بالبدله ولبست حجاب طلعت تخبل وخلصنا وأجه نائل وصعدناها السياره وأختها جابت أغراضها وصلنا وأمي وعمتي يرجع الهن
وخطيه بس دخلت البيت شافت أمها كامت تبجي وحاضنه أمها وتبجي هي وياها بالكوه سگتت وجديتها تبوس بيها وأبوها وعمها وجدها هم أجو عليها أنقهرت عليهم خطيه واجني أمي وعمتي ونائل ضل مًا راح دخل المضيف يمهم ...
" وسمعنا صوت الهورنات قويه والأغاني ودخلت بيداء
بيداء ـ وصلوا وصلوا
عصماء ـ يمه گلبي
ليال ـ أباوعلها تريد تبجي وأمها لازمه أيدها وفتحوا الباب ودخل بسيارته لوحده وتقدم باس أمي ولقاء وراه أطش جگليت وتهلهل والمصور كدامه وهو يمشي بكل أنضباط وصلها وهي صارت سعفه من الرجفه والخوف دخل سلم وكعد بصفها ودخلن خالاتي توسطن ويهوسن ويهلهلن ولقاء هي وأمي وياهن ...
وصار الوقت نطلع تقدمت أمها وباسل باسها من رأسها وتحجي وتوصي بي وعصماء كامت تبجي ودعتهم كلهم وطلعنا والزفه بس النسوان والبنات دخلن الشباب والزلم ضلوا برى ...
وطلعوا اهلها وسلموا على باسل وجدها يحجي وياه وامي راحت ويه خالاتي واحنه ويه نائل .
وطلعنا وبالطريق نصفك ونهلهل وجواهر كل شوي عايطه بينا وجهه مدخن وعصبيه الظاهر ضايجه من ليلة أمبارح!
وصلنا القاعه وضعت بنصهن ما أريد أشوفه وبلشت مراسيم الحفله ورگصوا كلهم بس هو ما ركص كاعد ويباوعلهم أدري بي ما يحب هاي السوالف عود عاقل
وأخذنا صور عائليه ولاحظت أختفى وأني راجعه من يمهم شفته واكف يحجي على الموبايل ويضحك يعني
وياها! أي لعد ويامن طلع فعلاً مرتبط بيها ، ماشي
كاعدين والبنات يتصورن ويتشرن ستوريات ولاحظت تماضر ما موجوده! الله يكون بعونها ما عرفت تحافظ على نفسها وإذا حجت هي الخسرانه لان نائل رجال وأمه جواهر ما ينعاب ومحد يكدر يطعن بي ويجيب طاريه غير أمه تحرك البيت على الكل ...
باوعت وشفته عالطاولته عينه بموبايله شگله يراسل ومبتسم صديت وجهي عنه وأختنگت من المكان ومن وجوده يربي شگد حقدت عليه وخلصت الحفله وطلعنا وصلناهم الفندق ورجعنا البيت جدي وعافن علينا الهوسه والله العريس أخونا ومن مشن ياقوت گالت الهن
ياقوت ـ يله عن قريب تنجمهن بيتنا بعرس أخويه ليث
هدير ـ ما عرفنا منو العروس؟
ياقوت ـ عن قريب تعرفونها .
لقاء ـ لا مبين أموركم دسمه وتحبون أجواء الغموض بالخير عليكم حبيبتي وأن شاء الله نجي ونذب لحم بعرسه صدك جذب أبن عمنا هذا
ليال ـ عفتهن ورحت المطبخ أغسل وأشتغل لما گملنا ورجعنا البيتنا وقررت قرار نهائي ما التفت عليه للموت
دام وصلت حقارته يحرك گلبي بأيده هاي هي وأنعل أبو اليحب بعد وباب گلبي قفلته ...
________________________
عصماء ـ يوم صعب بس أحلى يوم بحياتي من تدخل حياة ثانيه مع شخص متأمل بي السعاده ونفس الوقت بسرعه لكيت القبول والرضا كأنما حابته من عمر وجان هاليوم ختامها مسك أني وياه بالسياره بفستان العرس ومسكة الورد ..
ويسوق وأني صافنه عليه سبحان من زرع قبولك بقلبي ..
وصلنا الفندق وأحس روحي تريد تغيب وصلت النهايه وسيطر عليه الخوف نزل قبلي وفتحلي الباب وأرتبكت رجليه ما عاد يحملني باوعتله وهو ضحك وحس بيه .
باسل ـ أبويه ليش خايفه والله ما أخوف
عصماء ـ باسل خل نرجع
ـ عفواً وين نرجع
ـ ما أدري
ـ لا ماكو رجعه ، خلص أحنه كبار وعقال ودخلنا عش الزوجيه وتفهميني وأفهمج بس بالأول نتمم زواجنا
ـ مدلي أيده بحنيه
ـ أنطيني أيدج ولاتخافين
ـ لزم أيدي بحنيه دافيه وساعدني بدلتي ونزلت وقفل السياره ودخلنا الفندق وگفت أني وبدلتي وهو باوعلي
ـ يابه شلون عيون نعسانه مال نوم
ـ راد يروح لزمت أيده
ًـ هسه أرجعلج ما رايح .
ـ وگف وياهم يحجي وشويه وأجه ها
ً ـ نمشي لغرفتنا يله تعاي
ـ حضني من أيدي يعززني بالأمان وصلنا المصعد وأني أكرهه أموت منه باسل خل نروح عالدرج .
ـ ليش عيني .
ـ ما أحبه أخاف يعطل مره بالمستشفى صعدت ويه أبويه تخربطت من الخوف منا .
ـ لا ما يخوف تعاي
ـ باسل سحبني وصعدنا وباوعتله بس والله أخاف منه
ـ غمضي أخاف دوخين يمكن تخافين من المرتفعات
ً ـ وأشتغل وعطت باسـل باســل گبل حضني بقوه ضميت رأسي بصدره ولزمت قميصه بأيديه أثنين باسل خل نطلع باسل
ـ خبلتي باسل بحركاتج ، لاتخافين راح نوصل وصلنا شو رفعي راسج واخذي نفس أخكتنتي .
ـ رفعت رأسي وهو مبتسم وطلعنا وهو ساعدني بدلتي وفتح باب الغرفه ودخلنا جانت تخبل قفل الباب لو گمت أموت تخشبت بمكاني وشويه وأندك الباب وطلع جابوا الجنط مالت ملابسنا دخلهن وأجه نزع سترته وأني أفرك بإيديه بتوتر وخوف وتقرب عليه رفع رأسي
ـ باوعيلي خل أشوف هالحسن
ـ رفعت رأسي وصفن بوجهي يربي عن قرب شگد حلو
بلعت ريگ الا صوت بعلومي ينسمع وضحك وگال
ـ نرجع المصعد علمود الخوف يروح منج
ـ لا يمه والله ما أرجع
ـ لا علمود ترجعين تحضنيني وتأمنين بيه
ـ أبتسمت وجاوبته من خوفي من المصعد .
ـ لاتخافين ماكو شيء يخوف وگلشي يصير براحتج أني مو وحش ولا همجي ، وهذا يوم مهم بحياتنا ولازم يكون حلو مو مخيف وأني ما أريد أخوفج مني تمام
ـ تمام
ـ تتوضين علمود نصلي .
ـ عندي وضوء .
ـ خل أتوضئ وأجيج .
ـ دخل الحمام وأجه وفرش السجاده وصلينا أني وياه والحمدلله شوي أرتاحيت وگمت وتقرب عليه .
ـ أخذي راحتج
ـ مشيت الحمام أني وبدلتي وعالمرايا حاولت أفتح البدلة ما نفتحت وتالي طلعت لكيته يفتح دكم قميصه باسل .
ـ گولي
ـ بس البدله ما كدرت
ـ أي تعاي أساعدج بيها .
ـ تقربت وفتحها ودارني عليه ونزعني الحجاب
ـ أريد أشوف الشعر المصفط هذاك اليوم ما خليتني أشوفه زين .
ـ يفتح الدنابيس ويشمر عالميز وحسيته توتر واني گلبي يريد يوكف ونزل شعري على كتفي وتلمسه وتقرب بهدوء رفع خصل شمها وباسني من خدي وضل مستمر لانحاء رقبتي وهنا أني فقدت التوازن والسيطره على نفسي وهو ثبت سيطرته وحضني من خصري وكعت البدله وسحبني اله ...
" واكفه عالمرايا أمشط شعري وهو بالحمام گملت وخليت مكياج بسيط ورشيت عطر وعفت شعري مفتوح وگمت عدلت الجرجف وتذكرت خاله هيفاء من گالتلي .
هيفاء ـ بياضج ضمي ديري بالج عليه لا يناخذ منج ويسون الج بي سحر لان بنتي أحنه عدنا أعداء وما يخافن الله .
عصماء ـ ضميته بالجنطه وطلعت ملابسه وعطوراته
ورتبت الغرفه من الهوسه والقاط مالته هم ضميته بالجنطه بس بدلتي مهوسه لفيتها خليتها عالصفحه
وطلع ينشف وجهه وكف عالمرايا ولاف منشفه على جسمه تقربت أنطيته ملابسه وباسني من خدي
باسل ـ مبروك علينا .
عصماء ـ الله يبارك بعمرك .
ـ جوعانه
ـ لا عادي
ـ أني جوعان ما تغديت والريوك هم عالسريع خل أشوف العشه وين صار .
ـ طلب الأكل وشويه ووصل وكعدنا نأكل أني وياه وأخذت راحتي وگام يغسل شلت الأكل وصلت الحمام وصار بوجهي .
ـ غسلي وتعاي .
ـ دخلت غسلت وفرشت أسناني وغسول فم وطلعت لكيته مطفي الأضويه وهدوء مشيت وتقرب أخذني لحضنه .
الثاني يوم العصر كعدنا على أتصال وأني بحضنه باسل موبايلك .
باسل ـ منو .
عصماء ـ ما أعرف شوفه وجاوب طلع ليث .
باسل ـ خبيث مو بأيدك ، ماشي هسه نجي يله أدعبل
عصماء ـ قطع الأتصال وحضني ها نروح .
ـ أي بيت جدي مسويلنا عشه بس شويه خل أنام مطفي .
ـ عيب خاف نتأخر عليهم
ـ العيب بالجيب شسويلهم .
ـ رجعنا نمنا ورجع موبايله أتصل وصاح بي
ـ يابه شگد مزعج ، يله گومي
ـ كمت سبحت ولبست وتجهزت وطلع باوعلي وصفن
ـ أخذت گلبي أم العبايه
ـ شكراً .
ـ العفو يابه ، طلعتيلي ملابسي
ـ أي عيوني ولبس وطلعنا للبيت وصلنا بيت جده وأستقبلونا بهلاهل خاله هيفاء والبنات وطشن جگليت وسلمت عالكل وتقدمت على جده وجديته وكل عماته
وهو يضحك ويه ولد عمامه ومن بينهم باوعلي يربي نظراته اليه تشل عقلي أتبنج بالتفكير والذهول بعيونه
كعدنا ومباركات وخاله هيفاء بصفي فرحانه بينا
هيفاء ـ بياضج وين حبيبتي .
عصماء ـ بالجنطة خاله
ً ـ أي عفيه عبالي بجنطة الملابس لان أهنا ماكو أمان
لاتعوفين جنطتج .
ـ أن شاء الله خاله وصار وقت العشه والبنات صبوا العشه وأني جديده عليهم وعلى الجو مستحيه والزلم بالاستقبال وأحنه وحد وتعشينا وگعدنا أني بقيت يم خاله ولكيت بيداء مراسلتني وأمي متصله عليه حجيت وياهم لليل اجن نسوان عمامهم سلوى وأسمهان على مباركات وسوالف وصار الوقت نروح بيتنا وطلعنا سوه
وصلنا البيت فتحت جنطتي خاله تردين تشوفينه
هيفاء ـ لا عيون خالتج ما يحتاج بس أخاف عليه وصيتج
عصماء ـ ماشي عيوني خاله
ـ تسلم عيونج يله اني رايحه أنام وأنتوا صعدوا غرفتكم وتصبحون على خير .
باسل ـ وأنتِ بالف خير يمه ، يله عروستي لغرفتنا
عصماء ـ لزم أيدي وصعدنا وأني أمشي بخطوات بطيئه وهو يضحك تعال على شنو تضحك
باسل ـ تذكرت المصعد
ـ لاتذكرني
ـ بس جان حلو
ـ غمزلي ودخلنا غرفتنا وأني ما شايفتها ولا هو دزلي ألها أي صوره ، وأكتفيت بالجمال والترتيب .
ـ عجبتج
ـ أكيد عاشت أيدك ، تقرب وتلمس خدي بحنيه
ـ هالوجه البريء والحلو يستاهل الدلال
ـ عساني ما أنحرم من منك ،تقرب باسني وأنغرمت بحنيته وسحبت نفسي وفلتت من حضنه وضحك وراي
ً ـ مغرم بالخجلان .
ـ خجلني دخلت الحمام غيرت ملابسي ورتبت نفسي وطلعت لكيته مطفي الاضويه وأناره خفيفه والصوبه مشتغله وهدوء ومجهز الكرزات والشاميه والحبشكلات وترتيبات وكذا صفنت على الجمال مثل الأفلام ، مدلي أيده وكعدني بحضنه وباسني من شعري وشغل أيباد .
ـ شتحبين نباوع
ـ بكيفك صفن بوجهي وباسني أحسه يحب أحد يدلله ما يدري أني مغرمه بي .
ـ نباوع أفلام خل ندور فيلم حلو
ـ لا خل نباوع أفلام كارتون قديم كلش أحب أباوعهن
ً ـ ها
ـ أي والله عندي گومه
ـ تمام
ـ بحثنا وطلعنا أفلام كارتون وضلينا نباوع واحد ورى الثاني ومندمجين .
ـ أگولج نعست
ـ وأني هم گوم لما أجمع هالهوسه .
ـ عوفي گلشي وتعاي يمي .
ـ سحبني لحضنه ونمنا وبلشت حياتنا الزوجيه بهل الغرفه يارب يجعل أيامنا كلها فرح وسعادة .
وثاني يوم طلعنا نتعشى وكعدنا بطاوله منعزله وكعد كدامي ضليت أباوع على حركاته يتلفت حواليه ويقدم الكرسي گبالي ورجع باوعلي .
باسل ـ شتحبين تأكلين
عصماء ـ بكيفك وطلب على ذوقه وبعدما أفترينا هواي ونمشي ونسولف جانت لحظات حلوه عشتها بكل تفاصيلها تمنيت أعيشها بكل يوم!
رجعنا البيت لكيت خاله والبنات كاعدين ويباعون مسلسل وگملنا السهره وياهم وهو مندمج ويه أمه وأخواته ولاحظت علاقته حيل قويه وياهم عبالك صديق وبالأخص لقاء .
هيفاء ـ ليال باجر كعدي من وگت ماما نسوي دولمه وأبوج يتغده يمنا
عصماء ـ ليش باجر تردون تسون دولمه
ليال ـ أي كل جمعه لو دولمه لو سمك بس أكثر شيء الدولمه لأن أبويه يحبها .
عصماء ـ خاله خلي أني أطبخها أو أساعدكم بيها
هيفاء ـ بعدج عروس ماما من هسه نلزمج المطبخ
عصماء ـ لا خاله
باسل ـ خلص لعد باجر الدولمه من أيدج
عصماء ـ من عيوني أبتسملي وخلصت التعلوله وصعدنا الغرفتنا وهو يغير ملابسه يباوعلي شبيك
ـ أشتاگيتلج .
ـ حنيته هي الأمان كله ونمنا والصبح كعدت من وگت وعفته نايم ونزلت البيت فارغ باوعت غرفة خاله ماكو وغرفه البنات بس لقاء وجنات نايمات شوي وسمعت صوت ودخلوا شايلين أكياس وين جنتوا .
ليال ـ رحنا تسوگنا هاي كل جمعه هيج .
عصماء ـ رتبت المسواك وبلشت بالدولمه وطبختها ولظهر كعدته وسبح ونزل ونظفت غرفتي وعمي أجه وأنجمعنا وتغدينا ويمدحون من دولمتي وباسل يباوعلي ، عليك الله طيبه .
باسل ـ أنتِ طيبه أكيد طبخج طيب
عصماء ـ الف عافيه وگملنا وصبيتلهم الجاي وكاعدين هو وعمي يحجون على الشغل وأقدملهم الجاي وعمي يباوعلنا ويضحك لان هو نظراته فاضحته امشي ويباوعلي غرگت بهدومي من الخجل وعشت أحلى أيام عمري وحبيتهم وحبيت أبنهم المأخذ عقلي ...
_____________________
بيداء ـ من بعد أخر رساله وصلتني من حساب مجهول تجاهلتها ومالي خلك أكيد سوالف مالك لو واحد تعبان
ونفس الوقت مهيب جان بحاجتي ونفسيته تعبانه وما عفته ضليت طول الوقت وياه .
مهيب ـ وجودج هو المصبرني على گلشي
بيداء ـ أني يمك وما أعوفك
ـ أعوفك گلشي بس لأ أنتِ تعوفيني
ـ يحجي وصوته تعبان ومثل الطفل المتعلق بأمه مهيب هسه على شنو أتفقتوا أنت وزوجتك
ـ أطلگها وهي ما تريد طلاك معانده
ـ ليش مو ما متفاهمين
ـ أي بس هي ما تريد طلاك .
ـ ها وشقررت
ـ بعدني دايخ ، راح أشتري بيت وأنتِ وحدج وهي وحدها ما الج شغل بيها كلمن گبلها .
ـ لاتعب نفسك حبيبي ما أقبل
ـ لعد شلون بيداء
ـ ما أدري أنت گلت ما متفاهمين وننفصل
ـ أي وهسه وبعد أكول وحياتنا بس مشاكل بس سهله وغلات عيونج الأحبهن تنحل
ـ أن شاء الله وين أنت
ـ بالسياره كاعد
ـ ها
ـ أذا وحدج راح أتصل فيديو مشتاق اشوفج
ـ أي وحدي أتصل وجاوبته وحجينا وهو صافن عليه شبيك حبيبي
ـ مشتاقلج وبعدج عليه دمرني
ـ حلك مشاكلك بالأول
ـ عوفي مشاكلي وباوعيلي
ـ شنو حبيبي
ـ أحبج
ـ وأني هم والله وبقينا نحجي فيديو وكلمه على كلمه ولكيت نفسي ورجعت لنقطة الصفر وأنجرفت مره ثانيه لمنحدر الضياع ، يله مهيب لازم أروح خاف أمي تجي .
ـ شكراً حبيبتي .
ـ روح گله منك دخت بسوالفك
ـ غير أحبج
ـ فصلت الأتصال وطول هالأيام أني بضياعي عايشه ومهيب صار عنده كلشي مباح وأنكسرت الحدود وضعت وياه وبالأخص بعد ما تزوجت عصماء وحتى من أروح المعهد مستمره بالصور والمحادثات وضياع ما اله نهايه ...
وبيوم سبعة عصماء تجهزنا أني وأمي وعمتي وجوارينه كم مره وخالاتي هم أجني ورحنالهم وأنصدمت بالرقي وجمال بيوتهم والترتيب والعز والدلال العايشته عصماء وغرفتها تجنن وگعدنا بيت عيالها وسولفنا وبعدها الغده كان بيت جدهم الثاني وهذا بعد أرقى وأستقبلونا
وكعدنا وعصماء بصفي باوعت لابسه گلاده بإسمها بالعافيه عليج تخبل شوكت سويتها
عصماء ـ هديه من باسل
ـ تستاهلين ، تعاي أكولج
ـ گولي .
ـ أخذيني يمج
ـ وين أخذج
ـ عمي أنتِ عايشه فوك النجم
ـ بيداء بطلي سوالفج
ـ سگتنا وتغدينا وطلعت أغسل وگملت واجه واحد من ناحية المطبخ نفسه اللي سلم عليه بيوم الحنه أبتسم
نائل ـ السلام عليكم .
بيداء ـ وعليكم السلام .
ـ شلونج
ـ الحمدلله تمام وأجتي عصماء گبل أبتعد وصعد فوك
ـ تعاي وين رحتي
ـ أجيت خوما صغيره ملاحكتني ، عفتها ورحت كعدت يم أمي وصلتني رساله فتحتها نفس الحساب
نائل ـ الف عافيه .
بيداء ـ أستغربت معقوله هو وعفته ما جاوبته .
نائل ـ ترى بس سلمنا .
بيداء ـ أبتسمت عفت الموبايل وضلينا كاعدين وعماته يباوعلي وحده منهن أكلتني بعيونها هاي شبيها شگلها مو راحه أجتي عصماء ونغزتها منو هاي .
عصماء ـ عمتهم نجلاء ليش شبيها
ـ شلون تباوع فصلتني تفصال .
ـ هي هيج نظراتها ، وهسه نگوم لبيتنا هناك نأخذ راحتنا ونسولف وأحجيلي عن حياتج شگو ماگو
ـ ماكو شيء حسيتها تريد تحجي وياي وگمنا لبيتهم
وللعصر رجعنا لبيتهم بالطريق هم وصلتني رساله منه
نائل ـ ثكيل .
بيداء ـ ما جاوبته وصلنا للبيت ومهيب أتصل رفضته لأن أمي موجوده دخلت الغرفه وأمي هي وعمتي شهلاء يحجون على عيال عصماء ويمدحون عفتهم ورجعت بيتنا وجاوبته شبيك تتصل من دون ما أكولك .
مهيب ـ أشتاقيتلج وين أنتِ .
بيداء ـ بيت أهلي وين أكون مو گتلك طالعين لو أمي لاكفتني ، هاي أخر مره تتصل بدون ما أكولك فاهم
ـ وليش معصبه على كيفج
ـ من سوالفك
ـ ليش شبيهن سوالفي ، بعدين أحاسبج عليها
ـ لا حاسب هسه شمنتظر شبيك بس تتزعل
ـ هو منو ملطوم على حلگه وزعلان بس ما حبيتها منج مال سوالفك
ـ وشبيك عيني تحسست
ـ مو حجايتج تخلي الشيطان تربع برأسي شتردين أجاوبج
ـ أي من گتلي مشتاقلج عبالي
ـ شعبالج لو نيتج ما تفسرلج بس غير شيء وگلشي بوكته حلو شايفتني حيوان بس أتصلت لان صدك مشتاق لصوتج وأنتِ من رحتي بيت أختج أختفيتي رساله ما دزيتي .
ـ مو گتلك من أرجع ترى فد مره صاير
ـ أني فدمره صاير
ـ ما جاوبته
ـ سهله بيداء خل تخلص هالسنه على خير وأخذح يمي هذا رأسج اذا ما كسرته أني مو مهيب بس أصبريلي الا أخليج تحلمين تشوفين الشمس .
ـ لا والله واثق من نفسك وليش يابه تكسر رأسي وتتحكم بيه
ـ خل أخلص شغلي وأتفرغلج وجسارة اللسان أني دواها
ـ مهيب شبيك وياي عبالك هواي بالغت
ـ هو أني شبيه لو أنتِ ، الصبح حاجيتج مثل الورد هسه احاجي وحده ثانيه مو بيداء وگبل گمتي تفسرين على كيفج
ـ مو أفسر بس تعبت من الوضع
ـ وعلى أساس أني عاجبني ، بس أصبري عليه ما گافي المره على رأسي وأنوب أنت شصير أني متگوليلي .
ـ تمام أخليك براحتك خلص لاتزعل مني
ـ الله يصبرني على خبالج المحد متحمله غيري .
ـ ضحگت أي فديتك
ـ يله بعدين أحاجيج
ـ الله وياك وراح وضلينا نتواصل ورحت المعهد وبيوم النزلت ثاني يوم أمي مخبوصه وتنظف يمه منو يجينا
غنيه ـ أختج وعيالها عزمناهم أذا ما عندج شيء تعاي ساعديني .
بيداء ـ ما بيه يمه تعبانه من الدوام
غنيه ـ يا يوم گتلج وساعدتيني الله يرضى عليها أختج جانت ما تخليني أشتغل روحي ما أريد منج بس طلعي من المعهد وتتعيين گافي .
بيداء ـ الله كريم ، يمه المحل ليش ما تعزلينه
ـ وبيش نعيش وأنتِ ومصاريفج ودراستج منين أجيبلج وهسه شغله واكف جانت عصماء هي لازمه الشغل تعرف هسه وين حتى مسواك ما بي بلكي باجر أروح أتسوكله .
ـ عافتني وطلعت تغسل الحوش ودخلت غرفتي لكيت نائل مراسلني هذا بطران اني مهيب مشيب گلبي
نائل ـ صباح الخير يابه
بيداء ـ جاوبته صباح النور
ـ شلونج
ـ أعرفك تعرفني تسأل عليه
ـ ها هم صح
ـ هو صوجي جاوبتك
ـ أوكفي على كيفج ، أني أعرفج
ـ ومنين تعرفني بله
ـ أني نائل شبيج معقوله ما عرفتيني
ـ يا نائل
ـ أخو باسل زوج أختج
ـ أها أهلاً وسهلاً
ـ أهلا بيج يابه ، على كيفج علينا
ـ أعتذر ما عبالي أنت
ـ لا عادي ولا يهمج ، أي شلونج
ـ الحمدلله تمام وأنت
ـ بخير الله ، بالمعهد بالبيت
ـ لا بالبيت نزلت البارحه
ـ ها خير أن شاء الله قسمج خوش قسم نفس بنت عمتي
ـ منو بنت عمتك
ـ هدير بس هذيج تعينت حالياً أدوام بالمستشفى
ـ ها أي
ـ بالتوفيق ويوم الج
ـ شكراً .
ـ العفو يابه
ـ ما جان الي واهس أحجي وياه عفته ومهيب مأخذ كل أفكاري دايخه وياه ودخلت أمي كامت تحجي عليه وعصبيه ما تتفاهم .
غنيه ـ هسه تعبانه ما بيج تنظفين مكانج تشيلين ملابسج كبل عصماء تنظف وراج هسه منو ينظفلج أني يا دوب الحك المم شغلات بيت
بيداء ـ أهووو عاد ما نخلص عصماء وعصماء ماطول هيج شگو زوجتيها وشمرت عليه المخده
ـ لا ترديني أبقيها خدامه الج ما كافي عافت دراستها علمود توصلج وغزر بيج تعبها كظيتها دياحه بسوالفج ويه مالك أدبسزز خلف على المعهد ستر عليج لو باقيه اهنا جان صخمتي وجهي وحصره ما أكولج على شغله تعيطين بيه الله ياخذج كل فايده ما منج .
ـ لا تأكلين رأسي بهل الدراسه وصلتوني خلف الله عليكم بس طلعتوا هالدراسه من عيني كلمه والثانيه وصلناج وصلناج ترى هذا واجبج عليه وأنتِ أمي لعد منو يدرسني هاي مو كل البنات اهاليتهن دروسهن لو بس حظي .
ـ سگتي غضب على يومج أنهديتي بيه لاتنظفين عمي ابقي بخيستج .
ـ شالت عبايتها ومشت وين رايحه
ـ لسوك أجيب كم شغله لأختج
ـ وشتسوي بي تراها عايشه بعز ودلال بحاليش .
ـ حاطه عينج عليها عوذه منج والاجيبهن تفريحه وتتباهى بيهن كدام عيالها .
ـ أي لعد دورحي وجيبيلي وياج هم
ـ ميخالف يله رايحه وخاف تجي أختج خابريني بلكي ما اطول واجي گبلهم
ـ ماشي .
ـ نظفي غرفتج عود
ـ أي راحت وگمت سديت وراها باب المطبخ ولكيت مهيب مراسلني ها حبي
مهيب ـ وينج
ـ أجيت يله أتصل عليه
ـ ليش أهلج وين
ـ أمي طلعت هسه وأبويه بالبستان
ـ تمام
ـ أي أتصل وجاوبته شلونك
ـ بخير ، وأمج وين طلعت
ـ راحت السوك ليش تسأل
ـ لا هيج سألت يعني هسه وحدج بالبيت
ـ أي وحدي ليش
ـ كثرانه الليش مالتج شنو ما اسأل
ـ شبيك تصيح
ـ مو أنتِ حجايتج مدري شلونهن كلما اسألج ليش وليش
ـ مو ادري بيك ليش تسأل
ـ ليش بله
ـ الأحسن ما أحجي
ـ لا أحجي
ـ ما أحجي
ـ لا أشو الأ تحجين لان أدري عقلج الوسخ شيفكرلج
ـ شيفكر بله
ـ مو اني مو نفس تفكيرج الوسخ
ـ لا بالله شو أحسك تعايرني
ـ منو معايرج
ـ گول لنفسج هالحجي كلما احجي وياك كلامك كله تبسمر وكلمه والثانيه وتفكيرج الوسخ وعلى أساس أنت ماكو هيج تفكيرك نظيف بيه ولو صدك تفكيرك نظيف ما سألت على أمي ولا اذا وحدي بالبيت أو لا الا اذا جانت ابالك نيه! تعلمني بيك كلكم نفس القذاره تركضون ورة شهواتكم وگت الحجي تطلعون أنتوا شرفاء واني التفكيري الوسخ وتعيرني .
ـ باع وين راحت باع بابا أنتِ شبيج عقلج هذا شبي طاك بي فيوز خبال يحتاجلج مصح قسم بالله العظيم ماكو هيج قابليه واكفتلي على شعره شحجي تفسيرين على كيفج واللي صار اني مسوؤل عنه ولو اريد جان من ساعتها كتلج روحي ما تفيدني مو بقيت وراج بس أنتِ وحده نكاره ومصلحجيه .
ـ أي احجي طلعن ليش ضالات يكرظن بكلبك أني هيج مهيب أني .
ـ أنتِ جبرتيني أقسي بالكلام وبسرعه اخذتي على نفسج وتعايرني منو معايرج شايفه واحد يعايرج ويشتريلج بيت شايفه واحد معارك الدنيا كلها علمودج شايفه لو لا ولج اني من وراج جهالي ما شايفهم واني كلما أجي احاجيج تثكبين بوجهي واني أهل أهلي محتركين بالبيت من ورى المشاكل العايشها بسببج .
ـ مهيب وأسمع باب المطبخ يدك خرب أمي اجتي باي
ـ أنهزمي من احجي تنهزمين هذا الفالحه بي
ـ باي قطعت الخط وطلعت أفتح الباب وعصماء! فتحته گبل دفعتني من الباب وصاحت بوجهي .
عصماء ـ وين موليه أنتِ ساعه ندك بالباب أيديه تكسرن شجنتي تسوين اكيد مخليه السماعات والمهجوم مشتغل وما تسمعين الباب يدك .
بيداء ـ شمدريني عبالي ما تجون هسه مشت الغرفه وكفت وباوعتلها وصفنت وجرت السماعات كطعتها ليش هيج سويتي .
ـ أنتِ وين عقلج الباب كسرنا وما فتحتي وعيالي وياي شكد عيب منهم همزين عمي على صوت الباب طلعلنا ودخل عيالي بيتهم وأجي والأفنديه رايحه بعالم ثاني والغرفه خايسه شهل الوسخ سلابتج ليش بالكاع الكنتور ليش مفتوح الزقنبوت المأكلته ليش ما شايلته فراشج ليش ما ناضدته .
ـ عاد هم رجعت تحاسب شعليج أنتِ وسخ مو وسخ ما الج دخل ، تزوجتي التهي برجلج وعيالج والباب ما سمعته شصار كفر جنت نايمه .
ـ هـا جنتي نايمه ولج عليمن تعبرين سوالفج وكدامي باسل اتصل عليج ويطلعله مشغول وأمي مغلق بالله أمي عادي أنتِ ويامن مشغول! رجعتي لصخامج وجنتي تحجين وفاقده مو
ـ اهووو عاد كبل جرتني من شعري وسحبت موبايلي جيبي موبايلي عصماء لاتصيرين مكروهه
ـ موبايل جديد! منو جابلج
ـ أمي
ـ وأمي تأخذلج أخر اصدار وأيفون أحجي بدون جذب
ـ جاي أكولج أمي ومستعمل
ـ ولج جذب لاتجذبين عاجنتج وخابزتج عليمن تعبريهن فتحيلي الموبايل فتحيلي لا انصب عزاج هسه والقران والفرقان هسه اسويها مذابح .
ـ عصماء لاتصيرين حقيره
ـ فتحيلي
ـ فتحته وأخذته وتگلب وتقرأ المحادثات وعاكده الحواجب وسمعنا صوت
باسل ـ عصماء
عصماء ـ أجه صخام بوجهي اجه باسل لمي وسخ الغرفه شيكول علينا عايشين بخيسه وامي ويـــن
بيداء ـ راحت لسوك هسه على جيه ، عافتني وطلعت
وأخذت الموبايل وراها وسديت باب الغرفه وجريت شيله امي وطلعت عليهم واكف بالطرمه ويحجي وياها السلام عليكم شلونك باسل
باسل ـ هلا بيداء الحمدلله بخير شلونكم شنو جنتي نايمه .
بيداء ـ أي والله البارحه نزلت وتعبانه راحت عليه نومه وما سمعت صوت الباب
باسل ـ لا عادي ما صار شيء ، لعد موبايل عمتي وين أتصلت عليها مغلق .
عصماء ـ أعتقد مخلص شحن هي ما تشحنه اني جنت اشحنه ألها ، تدخل الأستقبال لو نروح بيت جدي .
باسل ـ لا نروح بيت جدج عيب كلهم كاعدين بس أجيت اشوفج رحتي بعد ما رجعتي وضل بالي خفت صاير شيء .
ـ لا عيني ماكو شيء
بيداء ـ وأنفتح الباب ودخل علينا أبويه بملابس الفلاحه وتقدم باسل سلم عليه .
أسكندر ـ يا هلا بيكم وليدي بس أفوت اغسل واجيكم
بيداء بابا حضريلي ملابسي .
بيداء ـ قبل لا امشي عصماء كدامي حضرتهن وحضرتله الحمام وشغلته الصوبه ركض ركض ودخل سبح وشالت قندرته الجوبلس غسلتها وخلت القوري عالنار وحضرتله ماي يشرب وباسل واكف باب المطبخ يباوعلها .
عصماء ـ بيداء جيبي الصوبه اشغلها
بيداء ـ شغلتها وطلع أبويه تحمى وجابتله دهن دهن ايديه لان عنده أكزمه بأصابعه مفطرات وكمل وكام
أسكندر ـ لعد شوكت أجيتوا .
باسل ـ قبلك بشويه اجينا .
بيداء ـ وطلعوا اثنينهم ورجعتلي عصماء سدت الباب وجرتني من شعري على كيفج شعري شعري .
عصماء ـ بعدج تحجين وياه مو عرفتي بي متزوج ولج شنو من نفس نفسج ليش ولج ليش صخام براسج متزوج من عمى العماج .
ـ وأذا متزوج أحبه
ـ حبتج حيه ولج متزوج هو نكس ليش تصيرين نكسه مثله ومن عمى العماج على هيج حب بيش عايشه بيا وهم على هيج حب تبنين سعادتج على خراب غيرج
ـ ما متفاهمين وهو يحبني اني حاولت وياه ما يفيد هو يركض وراي ويريدني ويريد يتقدملي شسويله
ـ وأنتِ شعليج ما متفاهمين بينهم تصيىرين مصلح أجمتاعي حضرتج لو واضح هواي يجي يتقدملج من سوالفج وياه كلها سخافه اوكفي خل اكمل ما كملت .
ـ عصماء عوفي موبايلي حاولت وياها ما فاد بيها كملت قراءه وباوعتلي بغضب وضربتني راجدي قوي
ـ سوالف أدبسززيه عالموبايل هم رجعتي لنفس سوالفج السافله نفسهن ويه مالك رجعتي بيهن ويه مهيب ولج ليش ما توبين ليش ما تصيرلج عبره ووين ماخذه عمرج ولج كل عقلج يجي يتقدملج ومصدكه الخرابيط اليحجيها عليج ويأكل براسج حلاوه ولج أرعنه جان مالك تقدملج وينه وينه مو هذاك هو راح تزوج وركعج بقندره وباعج بكطف جگاره .
ـ لا مهيب يختلف مو مثل مالك مهيب يحبني .
ـ أنت ياهو يحجي وياج كلمتين حلوات گلتي يحبني قبل مالك هم جنتي تگوليلي بس مالك يحبني وهسه وينه والله أنتِ أضمن عليج حتى لو رجلي يحجي وياج حجايتين تكولين يحبني .
ـ أنجبي عاد
ـ ولج أكسر راسج على هذا لسانج الوسخ تردين تصخمين وجوهنا قبل الله سترنا من سوالفج ويه مالك هسه اذا أنفضحتني ويه مهيب شلون منو يسترج
ـ لا مهيب ما يسويها لو يريد جان من ساعتها عافني مو يشتريلي بيت ويريد يتقدملي
ـ والله أنتِ شيطان وجاي تلعبين عليهم لا زواج ولا بطيخ لان لو صدك نيتج زواج وساتره نفسج جان شحده واحد منهم يعبر حدوده وياج بس أنت عاجبج الوضع وهما لكوج على الجاهز للعب ونسه بلاش ويضحكون عليج بكلمة أتزوجج وأشتريلج بيت وهاج موبايل ورصيد وأنتِ متونسه على الوضعيه المنلفته .
ولج كل عقلج متزوج يعوف زوجته مرته ام جهاله ويجي ورى وحده انطت نفسها بالرخص جان العندي أخذها وكدامج صار الحجي ومهيب أنكس من مالك خاف هذاك صم حلگه وبلعها هذا الله يدري شوراه وتاليتج تكسرين ركبتنا وحتى اني تهجمين بيتي .
ـ عصماء
ـ وجعة جدي تشلع گلبج وتخلصني منج ومن سوالفج شوفي ولج أني وصلت حدها ما بيها مجال لهنا وبس وحتى معهد بعد ما تشوفينه بعينج كافي دلال والحبل راخي ، خل يرحون عيالي ويفرغ الجو وكلهن اخليهن بأيد ابويه وخل هو يشوفلج حل يا يحفرلج گبر ويطم عارج يا يزوجج لواحد ويكسر ركبته بيج
ـ عصماء دخيلج عليج العباس أروحلج فدوه أبوس ايديج ورجليج ستري عليه هالمره والله بس هالمره والله التوبة وأوعدج أعوفه وأتنبه لدراستي بس لاتكولين لأهلي عصماء أحفلج بكل عزيز بگلبج
غنيه ـ عصماء بيداء وينجن
بيداء ـ أمي أجتي فدوه اروحلج أستري عليه عصماء أمانه لاتكسرين بيه ستري عليه ودخلت امي باوعتلنا وعصماء سلمت عليها .
عصماء ـ هلا يمه شلونج
غنيه ـ هلا بيج الحمدلله شو واكفات شگو شبيجن خوما تعاركتن
عصماء ـ اي تعارگنا دخلت والغرفه وسخه وهوسه ما تترتب ولا تتعلم تضل مخربطه
غنيه ـ مو وصيتج وگتلج عزليها ونظفيها يله هسه گومي نظفي .
بيداء ـ أي هسه انظفها
غنيه ـ أجيت من السوك وعمتج شهلاء صاحتني كالت يمنا ودخلت سلمت عليهم وسألت عليج كالوا بالبيت
عصماء ـ أي أجينا ومحد فتحلنا عاد عمي دخلهم بالبيت الافنديه بنتج جانت نايمه
غنيه ـ وينج وين النوم هسه مو گتلج اختج تجي تضلين ارعنه ، يله هسه امشي غداكم يم بيت جدج ذبحوا هسه تعاي عمتج كاعده عيب منها وأنتِ كملي ولحكينا .
بيداء ـ اي يمه مشن وتتوعدلي والموبايل خلتها بجنطتها أوووف ، كملت شغلي ولحكتها لكيتها بالمطبخ ويه عمتي شهلاء تنظف الباجه وواكفه يم الطباخ تشعوطها وكفت يمها معصومه ما تحجين
عصماء ـ وخري من يمي لا أهفج بالكراع
ـ حبابه لاتكولين لأهلي والله وعد بعد ما أعيدها
ـ بعدين نحجي
ـ وموبايلي
ـ شتسوين بي
ـ أريده
ـ بعدين خل يرحون عيالي وأكول لباسل أبات يمكم ونتفاهم على كلشي لو اكول لاهلي لو النا حجي ثاني!
ـ عفتها ورحت كعدت يم عمتي شهلاء وهي تباوعلي وأني أباوعلها بحزن وضليت خايفه منها لاتحجي وصار وقت الغده وصبوا وتغدوا واني ما أكلت وكلما ما أروحلها تطردني ما تتفاهم قافله عليه والعصر كالوا يرحون وهي وكفت ويه باسل تحجي وياه علمود تبقى وشكله ما قبل تبات وعمها وعمتها وافقوا بس باسل يبات والصبح يرجعون وراحوا عيالها وضل باسل وياها وأني منتظره مصيري على أيدها تگول لو ما تگول ..
شكرا لزيارتكم عالم روايات سكيرهوم
