رواية نعم أحببتك الفصل الثاني عشر 12 بقلم انين الليل

بثينه 

طلعت من الكليه شفت سعد واگف ومنتچي ع السياره وهو مبين من وجه كلش عصبي

كان يدخن من شافني شمر الجكاره وسحگها برجله وهو يخزر بيه صعد وانا فتحت الباب وصعدت

فر السيارة بقوه وشخطها وساقها بسرعه انا ما حچيت وگفها على صفحه باوعلي وبعينه عتاب

سعد//

بثينه ليش هيج مو موتيني ليش انا شنو الي سويته ليش زعلتي علي

انا بدون ما اباوعله —ا تصور انت تعرف شنو سويت

سعد//بثينه حبيبتي كل ما بالأمر ردت اسمع منج الرد

باوعتله وجاوبت بعصبيه —لا لا سعد انت كنت تصطاد بالمي العكر عرفت انو اهلي ما موجودين واجيت

ما خفت علي ولا على سمعتي اجيت وانت تعرف هذا الشي عيب وغلط

سعد//انتي غلطانه انا اجيت لان حبيت اسمع منج كلمة احبك ليش ماتفهمين صدگي جيتي ما الي بيها قصد ولا ردت 

انتقص منج انتي انسانه عزيزه عليه 

انا بقيت مدنگه ما جاوبته رجع حاچاني 

بثينه انا أول ما شفتج حبيتج وردتج الي ومستعد اسوي المستحيل علمود تبقين الي

انتي ما تعرفين انتي شنو بالنسبه الي انتي الهوى الي اتنفسه،

انتي روحي وكلبي وعقلي انتي ،،،،ضم ايده وضرب استيرن السياره

،،اهنا تغيرت نبرة صوته باوعتله شفت عيونه مغوركه يريد يبجي

انا—-سعد هاي شبيك ما صار شي

بثينه احبج واريد أكون صريح وياج كتاب مفتوح تقرينه ما كو شي مخفي ارجوج ساعديني

جاوبته باستفسار —يعني افهم من كلامك انت عندك شي ضامه عني شنو احجي سعد احجي لان انا كلش حدي 

بعد ما اتحمل اي شي 

،،،،،

صدگيني بثينه الي ضامه شي طبيعي وطبيعي جدا بس لازم تعرفي لان ما احب تسمعينه من احد غيري ويتأول الكلام

احجي وياولا عبالك ماخذه بخاطري منه من شفته مهموم نسيت الزعل اريد اعرف شنو الي مضوجه

جاوبته —سعد أسمعك احجي لو ماكو تره انزل

سعد يتكلم بس هالمرة بقلق//

حبيبتي انا ماكو شي اخاف او استحي منه بس لان انا قصدي شريف كان ممكن ما احجي بي لان 

.شي راح وانتهى بس انا اريد أكون كدامج كتاب مفتوح علمود انتي تقررين نستمر او لا

انا بعصبيه —-اكلك شو قلقتني شنو ضام احجي اني اسمعك

اهنا سعد غير نبرة صوته صارت أكثر هدوء 

شوفي حبيبتي انا كان عمري 20 سنه والدي كان مريض كلش وانا ابداية حياتي وحالتنا الماديه الحمد لله مستورة

وانا من النوع الي احب ابويه واحترمه لو يطلب مني روحي ارخصها اله

—اسمعك سعد كمل شلعت كلبي

سعد//ابوي وهو مريض الطبيب گال ما اريده ينقهر حاولو ترضوا واي شي يطلبه منكم نفذوا وانا يمه اداري بي واغسله واوكله واي شي يطلبه منه اگله تامر وصار اتصوري بقيت يمه تركت دراستي وشغلي هو الله يرحمه كان يباوعلي ويدعيلي ويگلي بابا انا راضي عليك الله يرضى عليك لكن ..................

—-ليش سكتت شنو صار 

سعد تحسر وگلي //بثينه الي صار انو ابويه طلب مني أن اتزوج بت عمي هي مو بت عمي لا ابوها وابوي 

اولاد عم ونزولا الرغبته انا تزوجت وانا ما قابل والكل يعرف بيه ما قابل رغم كانت خوش بنيه وفقيره بس 

ما كدرت اكمل وياها بعد 6 أشهر رجعتها البيت اهلها ابوي الله يرحمه ما قبل بس انا فهمته اني ما احبها وما اگدر اعيش وياها 

ابوي گلي انا ما قابل عليك لان ظلمت البنيه حاول وياي گلي رجعها والوكت كفيل يخليك تحبها لكن انا ما وافقت 

لذلك ابوي اتوفى وهو زعلان عليه 

وبعد وفاته اجه اخوي الچبير واتعارك وياي لان ابوي سجل البيت باسمي هذا الشي خلا اخوي ينهي علاقته وياي 

بثينه هذا الشي الي ضامه عليج والي مخليني أتصرف تصرفات مال زعاطيط لأن أخاف افقدج

بعدين جر نفس عميق وكأنما يستذكر أشياء ما كان يحب يتذكرها

باوعلي وبحرية ظل يحجي//

ولأن قررت أن نتزوج ما حبيت يكون فد شي ما تعرفينه عني

لذلك يا بثينه القرار الج بس يكون بمعلومج اني احبج واحارب الدنيا على مودج

بثينه عفيه لا تزعلين علي وقدري الظرف الي كنت أمر بي

،،،،انا مثل الصاعقة نزل عليه هذا الكلام بالبدايه غوشت عيوني بعدين استجمعت شجاعتي وانا ما رديت علي باي كلمه 

فتحت باب السيارة وضليت امشي بدون ما التفت وانا فكري مو وياي أشرت التكسي صعدت وانا احس بكلبي وعقلي فارغ ما بيهن شي ما حسيت إلا دموعي تنزل على خدي بحركه واحجي ويه نفسي -ما عليه بي وما يهمني -

ارجع اخذ نفس (زين إذا ما يهمني ليش ابجي )

ما لگيت جواب السؤالي

وصلت للبيت تلكتني منال //ها سلامات بثينةراجعه على وكت 

جاوتها وانا مقهوره —الأستاذ ما جاي 

هاي شبيج بثينه ليش باچيه 

—ها لا ما بيه شي 

بثينه منو وياج ليش باچيه 

جريت نفس وابتسمت بوجهه —منول ما بيه شي اكلت لفه بيها فلفل والحساسيه گبت عليه 

اكيد بثينه 

—اي منال شنو اچذب عليج صدك يمته تسافرون 

وره الغدا هم زين اجيتي على وكت خلي اشوفج قبل لا نسافر ،

—بس ابدل ع السريع وانزل

،،صعدت للغرفه غيرت ملابسي وطلعت الموبايل لكيته داز رساله على الرقم الجديد

(تردين اتكرهيني اكرهيني بس لا تحرميني اشوفج 

احبج لو شنو يصير ابقى احبج 

الج كل الحق بالزعل بس انا الي كل الحق بأني احبج 

احبج احبج احبج واسوي المستحيل علمود اخذج )

وهواي كلام قريته انا استجمعت شجاعتي ورديت علي بثلاث كلمات //انت ولا تهمني//.

خليت التلفون عه الصامت ونزلت كعدت ويه منال شويه واجه مظفر وبابا

سئلته امي على اياد كال اليوم وضعه احسن وامي صبت غدا على وكت لان منال وزوجها يردون يرحون اتغدينا 

وصبينالهم جاي وسلمو علينه وراحو وانا صعدت الغرفتي حتى ما الي خلك أغسل المواعين

لكيته دازلي رساله

سعد /وج بثينه انتي حياتي والهوا الي اتنفسه ارجوج لا تكرهيني

،!،،،ودزلي مقطع فديو رومانسي وكتب لي

حبي شكد هذا يحب محبوبته بس مو مثلي تدرين انا هسه بالسيارة يا رايح يا راد، مره بالشارع مره يم بيتكم 

بثينه انتي تردين تموتيني تكتبيلي انت ولا تهمني صدگيني اموت 

احبج بثينه احبج ما اتصور حياتي بدونج 

،،،انا ما رديت علي بس احجي ويه نفسي

ولا ارد علي راح أقطع علاقتي بي اي لازم اقطعها 

ولازم ما افكر بي وانتبه النفسي بس انا ليش هلگد ضايجه اذا ما يهمني اي ما يهمني انا بچيت لان نزلت نفسي 

الواحد اي شي ما اعرف عنه بعد هاي هي ما ارد علي واحذف رقمه 

لا حتى لو احذفه يراسلني من رقم ثاني احسن شي ما اجاوبه هو يمل يمل ويبعد ما يصير يدز رسايل

لكن هو بقى يدز بالرسائل بالليل اجتني رساله

ترة انا يم بيتكم أتمشى لا تفهميني غلط بس ما اكدر اروح للبيت وانتي زعلانه انتي

ظلي كاعده بالبيت وهذا الحقير كاتله البردوطبني مرض

اي انتي دفيانه وانا بردان 

تدرين بثينه انا من تركتيني بالسياره لحكتج من ركبتي التكسي او وصلتي للبيت 

وانا مرابط بلكي اشوفج يجوز انتي اكلتي سولفتي ضحكتي بس انا منتجي عه السيارة او واكف أخذ الشارع طول 

وعرض مي خالف كله يهون مي خالف اصبر لو اعرف ابقى طول العمر بهاي وگفتي

ولا جاوبته كنت مقهورة بالليل إجه ابوي وكال اليوم احسن اكو تطور بحالة اياد فرحنه خطيه اتاذى هواي

صعدت للغرفه ولكيت رساله من سعد

،،،،،،ما راح أتحرك من مكاني إلا تردين علي بكلمه وحده حتى لو تسبيني لو ماكو ابقى 

،،،،،،،يجوز الناس تشك بيه حرامي ويجيبولي الشرطه وسين وجيم بثينه الله يخليج كلمه وحده كلمه 

وحده طفي النار الي بگلبي والله كلمه وحده وانا اروح حتى لو تگليلي رووح ذب روحك بالشط اروح وباجر

يلگوني مسيس هم مي خالف بس كافي لا تعاقبيني 

يمكن ما مصدگتني افتحي الشباك وشوفيني وين واگف 

،!،،!انا خفت من سمعت هيج رديت علي بسرعه 

(عفيه سعد روح ما بيه حيل مشاكل)

،،،،،،،،!،،سعد احس بي فرح جاوبني //تامر أمر يا حلو ،

،،،،،،وراح وظليت افكر واحجي ويه نفسي 

—معقوله سعد هلگد يحبني ورغم صارحني وما ظم عليه شي وانا زعلت وهو بقى ما صبر يوم يومين بقى كل شويه وداز مسج يعني يحبني بس لا متزوج صعبه منو يقبل 

شكو بيها واذا كان متزوج مو يكول ما احبها وطلكتها وبعدين السالفة قديمه صار الها زمن

اتمددت وانا اقرا بالمسجات وابتسم ونمت ما حسيت على نفسي اله لمن بهاء دك الباب وندهني وگلي راح الوكت عليج وكعدت مفزوعه حييل شگد نمت بدلت ع السريع ورحت للدوام 

وهناك ما شفت سعد لا بالكليه ولا من طلعت ورجعت للبيت وكل شويه اباوع للنقال وهو ما دزلي رسائل 

بيني وبين نفسي اكو تساؤل شعجب ما دزلي رسائل ولا اجه للكليه شنو صاير 

بقيت افكر بتصرفاته الي ما اعرف الها جواب 

ثاني يوم داومت هم ما شفته وكملنه محاضرات وطلعنه انا والبنات وصلت للبيت لكيت بابا جاي سلمت سئلته

—بابا اشلون صار اياد

،،بابا/ الحمد لله زين يجوز أسبوع الجاي يطلع من المستشفى

—صدوك الحمد لله والشكر

،،،،،،اتغدينا وغسلت المواعين وصعدت وبعدين وصلتني رساله من اياد،،،

،،،،،،اياد:::هلا بثينه اشلونج ليش ما تسألين دزي رساله عالاقل خليني احس انا ابن عمج

جاوبته —هلا اياد الحمد لله انا زينه وجاي اعرف اخبارك من بابا وزين وما اريد ازعجك خاف تتاذى ان شاء الله

ازمه وتعدي وترجع مثل قبل واحسن 

اياد ::لا بثينه انتي ما تزعجيني بالعكس افرح من تسالين عليه 

اتاففت بيني وبين نفسي وگلت —اهوو بعد صار زين هسه لليل ما يفكني خلي اختصرها وياا 

—ياالله اياد شد حيلك واطلع خلي نفرح بيك 

اياد ::اذا طلعتي تفرحج من باچر لا اليوم اطلع 

بيني وبين روحي امداني عميتها ما كحلتها لزك كتبتله —لا لا ابن عمي طيب واتشافى واطلع يارب الشفاء العاجل 

تسلمين بت عمي 

مع السلامه 

الله يسلمج اگول بثينه 

ها اياد رايد شي مشتهي اسويلك اكله 

لا هيج ما كو شي مع السلامه 

الله يسلمك

وتمددت عه الجربايه الساعه اربعه العصر امي اتصلت فصلته

وردت انزل رجعت اتصلت 

،،،،،،،،!انا//هاماما ،

،امي بصوت خافت

،،،،،،،،!،بد لي بسرعه وانزلي عدنا خطار 

،،،،بالله منو جايينه يا بطران ما يدرون بينا تعبانين .واضرب الارض برجليه،.احجي ويه نفسي ،،

بدلت ونزلت ورحت للمطبخ لكيت ماما تنتظرني 

منو عدنا 

،،،،،،،،،،،،ماما//ما أعرفهم سوي كهوه حلوة وتعالي وراي 3 فناجين

،،، راحت امي وانا اكول منو الي جايينه سويت الكهوه ودخلت الغرفة الضيوف سلمت شفت 2 نسوان وحده اكبر مني بشويه والثانيه مرة چبيره تجي بكد امي قدمت الكهوه المرة الكبيرة حاجتني// حبيبتي خلي ابوسج 

انا دنكت عليها وباستني، 

،،البنيه كالت الأمي 

خاله اعذرونا احنه ما نعرف رقم تلفونكم اضطرينا نجي بدون موعد 

،،،،،،،،،،ماما/ما صار شي أهلا وسهلا ،حياكم الله تشرفون 

،،،دارت علي البنيه سئلتني 

،،،،،!،انتي حبيبتي شنو تدرسين

—اح مرحله ثانيه ترجمه 

الله يوفقج

—شكرا الج 

،،،، امي باعتلي وكالت 

روحي ماما اخاف منى تريد شي سويلها شنو تريد تعرفيها تتدلل بطلباتها 

المره الچبيره //خليها تدلل على امها واختها غيير هي الزغيره 

ماما /:لا والله بالسادس اعدادي بس ما نشوفها اله اذا تريد شي تطلبه وترجع الغرفتها وتتدلل كل ساع اريد هيج وما اريد هيج 

الله يخليها ويخليكم الها 

رحت كعدت بالصاله بعدين رحت للمطبخ سويتلي كهوه من طلعو النسوان امي صاحت عليه 

بثينه بثينه تعالي سلمي 

انا سلمت عليهن شفت البنيه شاورت امي وامي ضحكت ،!،سلمو وراحو سئلت امي

منو هذول تعرفيهم 

ماما/لا بس دكو الباب وسائلين على بيتنا 

—وشنو رادن عبالي تعرفيهن من گد ما اهتميتي بيهن 

ماما/،يشوفوج الظاهر يردون الابنهم مرة 

انا هزيت ايدي —-اووووه هذني شكد بطرانات 

ماما /: والله ما بطرانه اله انتي 

—ماما راح تبدي محاضرتج افلت احسنلي 

اگلج شنو انتي عبالج ازغيره وهيج تتصرفين محاضرتج وراح افلت 

—ماما ليش تزعلين عليه انتي تعرفين رايي بالموضوع اني ما افكر بالزواج بالوقت الحاضر

وصعدت الغرفتي بعد ما شلت الصينيه وغسلت الفناجين 

بالليل اجه بابا وزين چانو يم اياد وحطينه العشا خفيف وابوي دى يأكل كيك وحليب وجاي امي كلتله 

حجي اليوم اجن اثنين نسوان البيتنا سائلين جارتنا ام .سمير وهي دلتهن 

بابا//شنو تعرفيهن 

امي //لا منين اعرفهن مو اكلك سائلات جيرانه وهي مدليتهن 

بابا /:خيير وشنو رادن 

ماما//يخطبن بثينه هي مرة چبيره والثانيه شويه اكبر من بثينه الظاهر جنتها 

المره تكول خالت الولد والبنيه اخته وهاي الورقه بيها كل المعلومات وهمه مستعدين الكل شي 

بابا//هم سالتيهن منين يعرفونه 

ماما//حجي شنو قابل انت ما معروف هو الولد شايف البنيه من تروح للكليه ومعجب باخلاقها واكيد سائل خو 

ما جاي عمياوي 

انا—بس ماما انا بالوقت الحاضر ما أفكر بالزواج

ماما تكلمت بجديه // ،،،،،

مو بكيفج بثينه خاتون إذا خوش قسمه لا والله شوتقبلين احنه ما دايميلج

—اسم الله ماما شنو هالحجي عمركم طويل

امي /:اي عيني تمسكني علينه افتهمي يووم انتي كبرتي والناس جاي تخطبج واكيد احنه نعرف مصلحتج 

امي دارت وجهه على ابوي وحجت ويا//

حجي هاي الورقه كل شي بيها عن أصلهم واسم الولد وسكنه وشغله

—اي انتم قرروا براحتكم ولازم تعرفون انا رافضه للفكره من اساسها يا زواج هسه

،،،،ورحت امشي اريد اصعد أول بايه بالدرج وسمعت امي تكله

صدك حجي اتذكرت قبل لا انسى 

بابا//خير شكو

ماما//البنيه من رادت تطلع كالت خاله هو انتو تعرفونه بس ما شايفينه للولد

هو الي نقذ بتكم لمن رادو يبوكون الجنطه مالتها شافها وانعجب بيها

،،،،،طبعا لو ما لازمه بالمحجر جا وكعت احس النفس انقطع يعني سعد الي جاي يخطبني 

سعد لعد شكد يحبني وانا شسويت بي اوووف ما اعرف هلكد تحبني ومتمسك بيه 

احس روحي ما ثابته وانا امشي لان ارجف ما أدري من الفرح ما أدري المفاجئه 

ا وووف منك سعودي كل مفاجئه ما تشبه اختها

الفصل الثالث عشر من هنا 

شكرا لزيارتكم عالم روايات سكيرهوم