رواية بنات الحجي السعيد الفصل الثالث عشر بقلم شمس العراقية
عصماء ـ صفنات تجيبني وتوديني وهوسه برأسي وسوالف صعبه أحجيها وأحد يفهمها وما أعرف أتخذ قرار أخاف أسامح وأخاف أفضح ، دايخه بسالفة بيداء وخايفه من الجاي وگلبي ما مرتاح على الرغم سعيده وحياتي مستقره بس التايهات من يجني غفل يخربطن أحوالك
باسل ـ أحنه مو بالبيت أتفقنا ما تباتين ليش أهنا غيرتي رأيج وكسرتي الأتفاق شـنو معناها تردين تبقين منين طلعتيلي بيها .
عصماء ـ ما شفت أمي خطيه وهي متعلقه بيه بس يوم واحد .
ـ لو نص يوم ، من أحجي حجايه هاي هي بعد مو هناك نحجي شكل وهنا قرارتج شكل ثاني .
ـ يله هذا هو هسه نرجع
ـ هسه نرجع بعد وگت عالرجعه ، أجيتني فجأه أريد أبقى وبالبيت گتلج نروح نتغدا ونرجع عود غير مره أوديج باتي لا الا اليوم تباتين .
ـ هسه ما صار شيء ، وأنت باقي وياي وباجر نرجع ليش معصب
ـ هالتصرف ما عجبني
ـ حقك عليه بس شفت أمي وأنقهرت عليها گلت أبات
ما جاوبني بعدك ضايج مني
ـ لا
ـ عافني ودخل المضيف يم أهلي رجعت يمهن وأمي سألتني
غنيه ـ شبي رجلج
عصماء ـ ها لا ما بي شيء
ـ ليش بقيتي لان حسيته ما رضى وخابروا عالموبايل يمكن عنده شغل .
ـ منو خابره
ـ والله يمه ما ادري بس سمعته يگول أجي ونطلع
ـ أحتمال ولد عمه
ـ أي يمكن وأنتِ ديري بالج عليه وهو هسه صار أهلج والدايم الج وعزوتج وابو بيتج وجهالج أن شاء الله .
ـ لا يمه لايضل بالج ماكو شيء والله سگتت ما تدري أني برأسي سالفه تراد الها عقل وفكر صافي واني من ساعه عرفت بسالفة بيداء الدنيا أسودت بعيني وأتذكر المحادثات وسوالفهم وحقارته هو ويه مرته وجهاله بيداء مدمره بيت كامل بحجة ما متفاهمين كلمة أخترعها مهيب علمود يضحك على عقلها ويكسب أستعطاف ويعيش دور المظلوم برأس زوجته المسكينه
حسبي الله على كل ظالم يدمر بيته علمود نزواته .
رجعنا البيت وهي ساكته ما ألها صوت وأني منا باسل من أولها كسرت كلمته وكدام أهله لازم أصلح موقفي
راسلته حبيبي تجي لبيتنا گبل فتحها ودزلي
باسل ـ!
ـ من شــنو متعجب
ـ شديد الأعجاب .
ـ مو بگدي ، تعال أشتاقيتلك
ـ زعلان منج
ـ فدوه لزعلان
ـ خفي عليه أهلج كاعدين وين أنطي وجهي هسه
ـ راح أسويلك عصرونيه
ـ راح أجي
ـ أنتظرك
ـ تعاي خوما عيب من أهلج لحك مرته
ـ لا ليش
ـ العيب بالجيب ، جايج
ـ أبتسمت وأجتي بيداء
ـ ها فكرتي
ـ بيداء روحي من وجهي بعدين نحجي
ـ يعني ما تحجين مو ، فدوه لوجهج طمنيني .
ـ أمشي هسه باسل راح يجي ، دخلي شوفي الأستقبال نظيف .
ـ اي نظيف محد كاعد بي بس راح أشعل بي عود بخور
ـ يله راحت وخليت القوري عالنار وطلعت بيض ودهن حر وأمي جابت الطحين كامت تعجن وأباوع من الشباك عيني عالباب وشفت رجلينه أجه دك الباب صحتله بس جر السيم
غنيه ـ روحي فتحيله شمعرفه بالسيم
ـ ليش شمعرفه ، فتح الباب ودخل وأجه للمطبخ هلأ
ـ هلا بيج ، أكولج عمي راح يأخذني وياه لكاع
ـ ها هو گلك
ـ أي والعصرونيه شون
غنيه ـ اي تعصره وروح وعمك شعنده مستعجل أتفضل أبني بالاستقبال .
باسل ـ لا عمه هيج مرتاح ، ها أشسويتي .
عصماء ـ بس الجاي
ـ بس
ـ أنطيني مجال ، وگف يباوعلي وأمي شالت العجين وطلعت وخليت الدهن وطگيت البيض والدهن حمى وتقرب
ـ وخري لا دهن يطفر عليج شو أنطيني
ـ أخذها من ايدي وطگها عيون وقبغها وأنجوى وي أخذت ايده جوه البوري
ـ ما توجع
ـ حتى لو وأنفخ عليها وشفايفي قريبات على أصبعه
وهو صافن شگله نعس
ـ اني شلون بحركاتج
ـ تقرب يريد يبوسني وعطت البيض طفيت النار وصبيت الجاي وهو يساعدني يخلي دهن حر ودبس وخليت زبد وجبت الخبز وگملت الصينيه وين نأكل .
ـ أهنا بالمطبخ .
ـ خليتها وكعدنا اني وياه ناگل وهو صافن عليه ويضحك
أصبعك خوما يوجعك
ـ لا طاب بلمسة شفايفج
ـ غمزلي خجلني ابن الاوادم گملت قبله وهو خلص جاي مالته وأخذ مالتي يشرب أصبلك
ـ لا الحمدلله الله يديمها
ـ عافيات عيوني كرصني من خدي
ـ يعافيج حبي
ـ أول مره أسمعها منه لدرجه صفنت بوجهه وما تحمل تقرب باسني من شفايفي وكال .
ـ لاتكثرين صفنات ترى أدوخ ستري علينا منا لباجر .
ـ طلع يغسل وباوعت ماكو خاولي ركضت بيداء خاولي جديد بسرعه
ـ دوري يمج أنتِ تضميهن شمدريني بيهن
ـ كلبت الكنتور وطلعتله واحد جديد وطلعت لكيته بعده يغسل وكفت يمه كمل ونشف وغسلت وراه ها تروح
ـ وين
ـ ويه أبويه
ـ شو بس تردين تخلصين مني
ـ أني بالعكس والله فرحانه بيك بيتنا عادي أجي وياك
ـ لا شعندج رايجه ماكو بس أني
ـ ليش شكو بيها نفتر أني وياك بالكاع
ـ لا ممنوع ماكو طلعه
ـ هذا هو عيني وكف يباوع لحديقتنا وصل المحل مالتنا
ـ شنو هذا
ـ المحل الجنت أشتغل بي
ـ ها وشتبعين
ـ گلشي أبيع
ـ مثل شنو
ـ أوكف أفتحه وشوفه
ـ طلعتي أم محل يعني تعرفين بيع وشراء أذا أخذج يمي بالمحل تساعديني .
ـ أي أعرف جبت المفتاح وفتحته ودخل يباوع ويگلب بيهن وأني صافنه عليه
ً ـ حلو ومرتب كلش وواضح ترتيبج حتى ألعاب أطفال عندج
ـ أي احب البنات وأشتري الهن أنطيهن مجاني
ـ معدله زين ماكو شغلات لزلم
ـ لا أكو ساعات وملابس داخليه
ـ شنو ملابس داخليه!
ـ أي شبيك خوما زلم يشترون نسوان ياخذن لرجالهن
ـ ها هيج الحجي عبالي هما يجون يشترون منج
ـ لا شسالفه .
ـ وهسه منو يكعد بي
ـ أمي بس حالياً معزلته لما تتسوك اله لان مو هلكد بي مسواك .
ـ الله يشد حيلها ، هاي يوميه جنتي تفتحينه
ـ أي وأحلى شيء العصريات أرش كدام المحل والجهال يلعبون طوبه گبالي .
َـ حلووو .
أسكندر ـ غنيه وين باسل
باسل ـ أجه أبوج هسه يكول حاصر بنتي بالمحل
عصماء ـ ضحكت يبوه .
باسل ـ هسه شلون اطلع والله عيب
عصماء ـ شويه ودخلت علينا أمي هو مستحي وابويه باوعلنا وعاد طلعنا رغم ما مسوين شيء بس هو يستحي منهم
باسل ـ شفت المحل مالتكم حلو والله عاشت أيدج عمه وأي شيء تحتاجين اني بالخدمة .
غنيه ـ فدوه لطولك وليدي ما محتاجه غير سلامتكم
أسكندر ـ عصماء يابه اكو جاي .
عصماء ـ أي يابه رحت صبيت الهم وكاعدين بالطرمه ويسولف وياهم وبعده طلع هو وأبوي وباوعلي كال
باسل ـ عود موبايلي نسيته بيت جدج .
عصماء ـ ماشي راحوا هو وأبويه ومن ورى الحايط صحت عمتي وأنطتنياه والخلفيه صورته ورجعت غسلت المواعين ونظفت البيت گله وأمي تغسل ملابس حسيتها تعبانه وبيداء نايمه كالعاده كل فايده ما بيها
وأمي ذبحت ديج وطبخته وعمتي شهلاء جابتلنا معلاك ولحم جهزته أشوي بالتنور ورة ما نخبز .
ولبست ثوب أمي مال الخبز وتلثمت وطلعت خليت حطب التنور وشفت طوله من بعيد اجه هو وأبويه صحت بيداء وين صرتي جداحه من يمج
بيداء ـ هاج أمي تكول باسل اجه خل تعوف التنور هي تخبز .
عصماء ـ لا أني أخبز وأنت روحي ثرمي سلطه وحضري الطرشي ونظفي الخضروات
بيداء ـ ماشي راحت وهو وصل وأبويه دخل وهو اجه يمي ها تونست .
باسل ـ أي والله ، تردين تخبزين
عصماء ـ أي مديت رأسي اشعل التنور وصاح بيه
ـ وين مخليه راسج بالتنور شو وخري وانطيني .
ـ عادي متعلمه ما يخوف اخذها مني وهو شعل النار
ـ كل خبزكم على التنور الطين
ـ أي جان عدنا ستيل بس مو هلكد ابويه يحب الخبز مالته .
ـ أبوج مدلل شيريد بعد وهاي شوكت تخبزين وليش التنور مو بداخل بيت ليش برى .
ـ هو مكانه هنا
ـ والرايح والجاي يشوفج تخبزين
ـ كلنا ناس تعرف ناس ماكو غريب بينا يله ندخل البيت
دخلنا البيت وشنكت العجين وأمي كاعده تنظف الخضروات وهو غسل واجه كعد ويباوعلي وشلت الصينيه وگمت وگفت أخبز وأجاني .
ـ شلون تخلين أيدج باعي الجمر يلهب .
ـ عادي متعلمه هسه يهفت وبلشت خبز وهو يمي انثولت بنظراته وطلعت اول كرصه راد يأكل أمي صاحت بي
غنيه ـ لاتاكل منها
باسل ـ ليش عمه
ـ اسم الله يكولون مرته تموت يأكل اول كرصة خبز
ـ لا اذا هيج ما أكل
ـ عصماء يمه عوفي اني أكمل عنج
ـ لا يمه بلشت بعد خليني
ـ خليها عمه بنتج سباعيه
ـ أخبز واكف ويباوع على القريه مالتنا ورجعلي
ـ عندج نفس هذا الثوب لابسته
ـ أي هذا ثوب أمي
ـ كلش لايك الج طالعه تخبلين بي ، نزعي لثامج عاد اشوف وجهج شكو تستحين مني
ـ لا وجهي يحترك أخاف عليه
ـ أها لعد بقي
ـ كملت خبز وجبت المشاوي خليته السيابه وهو اجه ساعدني خلاهن وثبتهن .
ـ هسه تمام أويلي الا بشده وين ليث وأدزله صوره
ـ كملن شوي وهو يصور وجر لثام من وجهي وطگلي صوره وگملنا وسبحت وطلعت هو كاعد .
ـ شعرج نشفي زين تعاي يم الصوبه .
ـ تقربت يم الصوبه وأنشف بشعري واجه ابويه گبل كمزت للغرفه نشفت شعري ورتبت نفسي عالسريع
وكعدنا نتعشى وهو ويانا وحسيته حب الأجواء وعبالك معاشرنا عمر وبعدها شربنا الجاي وگمت سألت امي يمه باسل خطيه تضايق من ملابسه وما جايب وياه لان ما عبالنا نبات .
غنيه ـ أخذيله من دشاديش أبوج .
عصماء ـ ها ديله لعد أخذتله وكاعد بالأستقبال لوحده عيني تغير ملابسك علمود ترتاح جبتلك من دشاديش أبويه .
ـ أي والله سدي الباب من يمج خل أبدل .
ـ سديت الباب وتقربت فتحت دگم القميص وهو يباوعلي ونزعه ولبسته دشداشه ساعدته بيها انطيني ملابسك اغسلهن واكوي القميص .
ـ وين تعاي يمي قبل لاتروحين
ـ انداريت عليه ها عيني .
ـ أشتاگيتلج .
ـ خاف أبويه يجي ما كدرت اتفلت منه سحبني اله ويبوس بيه وروحي صارت بيه ولا بيه افاركهه ولا هو
ـ روحي منا قبل لا يجي أبوج ، دمرتيني .
ـ باوعتله الدشداشه اجتي عليك وطالع بيها تخبل كلش لايگتلتك .
ـ أي شعبالج لعد .
ـ يله أني اروح أغسل ملابسك
ـ روحي بس رجعيلي
ـ تمام رحت غسلت ملابسه وگويت قميصه وهو بعده كاعد وابويه يصلي باسل قميصك راح اعلكه ورة الباب
ـ هذا هو عاشت أيدج
ـ تريد رمز الشبكه
ـ لا شسوي بي وعيب من أبوج لازم الموبايل اليوم أستراحه .
ـ تمام طلعت من يمه وأمي أجتي بأيدها صينيه كرزات وفواكهه
ً ـ تعاي وين رحتي
ـ هسه أجي روحي أنتِ ، عفتهم ودخلت على بيداء گبل فزت بخوف ، هسه صار لازم نحجي .
بيداء ـ تحجين الهم
عصماء ـ لا وباسل شلون أعم على روحي أذا حجيت بس أكدر أكول لأمي ومن نروح هي تگول لأبويه .
ـ لا عصماء عليج الله لاتسوينها وتكسريني كدام أهلي والله وعد هاي أخر مره وشتردين اني حاضره بس لاتكولين .
ـ على أساس راح أتوبين جان تبتي من أول مره وينج رجعتي صرتي أنكس
ـ غلطت وطالبه السماح بس هالمره أمانه
ـ والله بيداء صرت ما أمن بيج وخايفه منج .
ـ خلص هاي هي گولي .
ـ وأذا رجعتي غلطتي
ـ والله ما أغلط بعد .
ـ خل باسل ينام ونتفاهم
ـ خلي هسه
ـ لا خاف باسل يسأل عليه
ـ الله يخلي الج مبين عليه متعلق بيج
ـ وأني هم تعلقت بي ، يله خل أشوفهم وأنتِ تعاي
ـ لا خليني كاعده روحي أنتِ
ـ عفتها ورجعتلهم ولكيته يكسر الهم جوز ويسولفون رفع راسه وباوعلي وكعدت بصف أمي وقدملي جوز وامي صبت جاي وهو يكسر وينطيني وضلينا كاعدين
لما تأخر الوقت
أسكندر ـ غنيه كوم نشوف الهايشه خاف ولدت .
غنيه ـ يله كايمه عصماء يمه فرشلي لزلمتج
عصماء ـ اي يمه راحوا وشلت الهوسه وهو كاعد كملت وجبتله فراش تنام هسه لو تبقى كاعد
باسل ـ لا كاعد وأنتِ تنامين هسه
ـ لا ابقى كاعده ويه أختي .
ـ تعاي يمي هسه لما يجون أهلج .
ـ خل اشوف أمي وأجيك رحت على أمي ها يمه ولدت
ـ لا مطوله روحي يم رجلج ليش جايه يمي
ـ هو أريد ابقى يمه بس هو يستحي وأني هم
ـ روحي بعدكم عرسان وأبوج يمي .
ـ تمام رجعتله لكيته متمدد سديت الباب شويه وأروح
ـ تعاي هسه عود الله كريم .
ـ سحبني لحضنه وعبر عن أشتياقه يبوس بيه بلهفه لا أن سمعت صوت أبويه يكح
ـ كومي كومي اجه ابوج
ـ طفرت وهو خربان ضحك وأباوعله من الباب سوه روحه نايم عفته ورجعت يم بيداء ودزلي رساله
ـ عدت سلامات يله حبي راح أنام الصبح بثمانيه هيج نطلع لكراج أوصلج لبيت وأروح لسوك .
ـ تمام حبيبي عفت الموبايل وباوعتلها وهسه بيداء شسويلج يعني والله أنتِ مو صغيره وما تعرفين نفسج جاي تغلطين وهالغلط مصيره دمار يا أختي والله خليتني بين نارين .
ـ أعوفه وأني عودتج مستحيل أتراجع عن وعدي
ـ شنو اليضمن
ـ بس هالمره ثقي بيه والله اني هم دايخه بحياتي وهو المدوخني ويحبني وملاحگني .
ـ أنتِ خليتي يتعلق بيج هذا مو حب هذا تعلق ولازم تنهينه وهسه كدامي وتغيرين گلشي وتبدين صفحه جديده نهائي ما تبقين شيء من الماضي من مالك وحطي أيدج حتى صديقات من المنطقه ما تضيفين فاهمه .
ـ أي والله بس أنطيني وقت لأن أذا تهربت هيج بسرعه يتخبل ومهما يكون هو زين وياي .
ـ نعلة الله عليه وعلى زينه أنتِ شبيج ليكون علمود فلوسه ودلاله باقيه وياه ولج أنتِ شنو من بشر أحنه قصرنا وياج بشيء علمود تروحين على هذا وهذاك ينطيج وياخذ منج أعز ما عندج هيج نفسج رخيصة عندج .
ولج أنتِ أمانه نفسج وجهج جسمج أيدج صوتج مشيتج ضحكتج شرفج گلشي بيج أمانه عندج صونيها وحافظي عليها ترى لا كلام الحلو وكلمة أحبج ولا الهديا ولا خرابيط يسطرهن عليج يفيدجن جان فاد مرته .
ـ هذا هو ولله
ـ گمت طلعت موبايلها وفتحته ولكيته گومه مراسلها ومتصل عليها هاج أنهي گلشي وحذفي كل المواقع
ـ عصماء والله أعوفه بس أنطيني مجال أمهدله هيج أضر نفسي .
ـ شعندج يمه وخايفه منه!
ـ صوري
ـ لطمت على وجهي يا صخامج ليش ما توبين
ً ـ عصماء الله يخليج أفهميني مو وگت ملامه وعد أبلغج بگلشي أصلاً أني أريد ابدي صفحه جديده بحياتي
ً ـ يريي الصبر راح تجلطيني خلص هاي هي الحك الجذاب لباب البيت وأشوفج وين توصلين بس تبقين على تواصل وياي ، بيداء فدوه أروحلج فكري بنفسج وبينا خيتي گافي وين مأخذه عمرج تردين تموتين
ـ والله راح أعوفه وأبلغج بگلشي
ـ تمام هسه عوفي ونامي وأن شاء الله ما تغدرين بيه
عافت موبايلها ونامت وأني گمت توضيت وصليت وباوعت عليه نايم ومجرد دخلت على كيف غطيته وصفنت عليه وتالي رجعت نمت .
الصبح كعدنا تجهزنا وامي مجهزه الريوك تريگنا وأمي محضره أغراض ليش كلفتي على نفسج .
غنيه ـ لا يمه شمأخذتلج قابل ، هاي شيشه دهن لعمتج هيفاء وهاي للحجيه وهاي الشيشه لأم ليث وهذا الديج لعمج وسلميلي على الكل .
عصماء ـ يوصل أن شاء الله وعدتهم وحضنت بيداء ديري بالج على نفسج وبلغيني لاتخليني أتندم
بيداء ـ أن شاء الله خيتي لايضل بالج .
عصماء ـ وطلعنا وباسل صعد الأغراض بالصندوق والسايق صالح أبويه مخابره ودعناهم وتوگلنا ...
وصلنا البيت وأني قفلت من التعب .
باسل ـ نزلي أني أنزل الأغراض عوفيهن ودخلي البيت
عصماء ـ نزلت وهو نزلهن ولكيت خاله هيفاء كاعده هب وعمتي سلوى سلمت عليهن وانطيتهت الدهن وفرحت
سلوى ـ أي والله عاشت أيدها كريم وليث يدورون وراها
عصماء ـ الف عافيه من رخصتكم وصعدت غرفتي گبل دخلت سبحت وأنتظرته ماكو معقوله راح راسلته وينك
باسل ـ رحت السوك
عصماء ـ تمام
ـ أسف حبي بس ليث مر عليه وأخذني
ـ لا عادي
ـ الظهر أرجع
ـ براحتك .
ـ مشتاگلج بس أخ ليث الخبيث
ـ ضحكت لا عادي ولا يهمك ، يله نازله أطبخ الغده
ـ ماشي حبي .
ـ نزلت والبيت نظيف بس لقاء موجوده جنات وليال بالدوام
لقاء ـ شلونج أهلج شلونهم
عصماء ـ الحمدلله بخير يسلمون
ـ الله يسلمهم .
ـ وگفت وشفت العلب الدهن والحليب من أهلي
ـ هاي منين
ـ من أهلي .
ـ أني من عشاق هالسوالف كلها طبيعيه ، الله زبد اليوم أنعل والديه لدايت ماما تعاي شوفي .
هيفاء ـ شبسرعه قصفتي عوفي الزبده لأبوج
لقاء ـ شنو بس لأبوي الجنه جنتنا ساكنه يمنا خيراتها النا هو ساكن يم جواهر وأنتِ ادللين بي ، خل نخلي زبد ودبس وخبز وسلام على الدايت .
عصماء ـ كعدت تأكل وخاله رتبت الأغراض وأني طبخت الغده وأجني البنات وأتصل عليه ولقاء صاحت
لقاء ـ الحبيب يتصل عيني عادي أجاوبه
عصماء ـ عادي .
لقاء ـ هلاو بالشاف أهل مرته ونسى أمه وأخواته
باسل ـ ها طركاعتي شلونج
ـ بذات ما سألت علينا .
ـ عبالي رحتي شمدريني
ـ لا باقيه على گلبك .
ـ خير أن شاء الله ، عصماء يمج
ـ أي أتفضل .
ـ أخذته منها ها عيني
ـ ها حبي شلونج
ـ بخير الحمدلله
ـ شطابخه
ـ باميه وتمن
ـ عصماء
ـ ها عيني
ـ ما راح أجي الجو حلو والسوك مليان وأبويه ما قبل نعزل على المغرب يله أجي .
ـ براحتك
ـ عوفيلي حصتي من طبخج
ـ تمام .
ـ من تكملين تعاي نحجي
ـ تمام عيوني وأنتهى الاتصال وضجت على الرغم البنات وكعدتهم وسوالفهم هما وخالتي وتغدينا وليال غسلت المواعين ولقاء غسلت الصاله وأني صعدت غرفتي اتصلت عليه ويمه زبائن وعاف الخط مفتوح .
ـ لاتسدين الخط أبقي تمام
ـ تمام وبقيت أنتظره وماخذتني النومه وفزيت على أتصال جاوبته ها باسل
ـ كعدتج من النوم بس عبالي بيج شيء فجأه الخط فصل .
ـ لا غفيت
ـ يله رجعي نامي
ـ تمام حبيبي وكملت نومتي العصر كعدت دازلي رساله
ـ عشانا بيت جدي حضري نفسج .
ـ تمام وگمت جهزت نفسي وحضرت ملابسه وأجاني صوته
ـ عصماء نزلي .
ـ أجيت ونزلت ويريد يأكلني بعيونه تقرب عدل عبايتي
ًـ شيخلص اليوم .
ـ حضني من أيدي وصلي أشتياقه ولهفته ورحنا بيت جده وعمامه ولد عمامه موجودين وبس شافوا صاحوا
ـ عريسسنا ما نشوفك عمي .
ـ روحي گبل .
ـ مشيت بصف خالتي ودخلنا وعماته موجودات كعدنا وسمعت طاري خطبه وأسم ليال! بس ما عرفت المن
وصار وقت العشه وتعشينا وكعدنا وراسلني
ـ وين كاعده ما شفتج وينج
ـ يم الحجيه
ـ طلعيلي أريد أشوفج ما أريد أدخل
ـ تمام وطلعت لكيته ينتظرني ها عيني
ـ أشتاگيت أشوفج .
ـ وأني هم گلتها بخجل .
ـ شو باوعيلي زين
ـ رفعت رأسي باوعلي ودخل نائل صاح عليه
نائل ـ باسل أبويه يصيحك .
باسل ـ جاي ، يله روحي .
عصماء ـ مشه عليهم ورجعت يمهن وليال صاحتني ورحت وياها المطبخ تحضر ضيافه لزلم وأني لنسوان
ليال ـ ولا مره كعدت ما كومني خو جواهر عدها عقد وياي هي تشوفني كاعده تهزلي برأسها أني صوجي لو اصير مثل لقاء ويخافن منها .
جنات ـ لعد منو يگوم خطيه عماتي هم يتعبن والبيت شگده شگبره گله عليهن .
ليال ـ وأني ما جايبه طاري عماتي ولا متعاجزه من الشغل لا تكومين أدافعين أشتغلي وأنتِ ساكته
عصماء ـ وأجه نائل باوع لأخواته
نائل ـ ليال أمشي وياي أبويه يصيحلج .
عصماء ـ أخذت نفس ومشت ورة أخوها ورتبت الفواكهه والكرزات وأجتي عمتهم انسام تساعدني
انسام ـ شلونج وهيفاء وبناتها
ـ الحمدلله بخير زينه
ـ ترى بس بالبدايه أنصحج نصيحه ديري بالج منهن لاتنطين نفسج زايد وتعمقين وياهن ترى يأكلنج وبعدين يعيرنج بفقرج هنا حتى يتنكسن ما يأكلن من أيد احد بالعزايم هيفاء تضل بس تتصفن ما تأكل لاتتنكس وبناتها نفس الشيء هاي لقاء لو بيدها حتى الماي تغسله يله تشربه بس تشمشم مثل البزون وخوفج منها هاي أوكح وحده بيهن .
ـ لا ماكو هيج شيءبالعكس كلش حبابات
ـ الله وكيلج كله جذب ومجبورات لان ما عدهن بس هالواحد شيسون وأني أول ما شفتج كلت الله يعينها أخذت وحيد أمه وأخواته بگلشي قصص وروايات عراقية كرار صلاح يتدخلن ويفرضن نفسهن عليج ويغارن هم وشوفي هسه شيجيب الج لازم يجيب لأخواته لان تكب العيطه .
ـ شكو بيها خل يجيب الهن أخواته بالعكس يفرحني هالشيء والحمدلله مستقره حياتي لايضل بالج عمه
ـ والله أني علمودج لان مبين عليج فقيره وگلت أنصحج
ـ تسلمين عمه أبتسمت مجامله ومشيت وصادفتني لقاء باوعت عليها ورجعت باوعتلي .
لقاء ـ شجانت تحجي وياج هالحيه
عصماء ـ تسأل عليه .
ـ أنهجم بيت المحبه تسأل عليج ، لاتختلطين بيهن أمهات سحوره هما ومرت أبويه ومحد كاشفهن غيري
يله أمشي شگو تضيفين عشتوا ما يگومن هنا فوك ما بعدج عروس وأنوب المطبخ امشي كعدي بصف أمي وحالج من حالها أمي أستكان ما تشيل وأنتِ هم ترى أذا أشتغلي محد يگولج عفيه روحي وأني أكمل عنج .
ـ ماشي عيني رحت الأستقبال وشافني ضلن يباعن تجاهلتهن وكعدت بصف خالتي وأبتسمتلي وليال صافنه والحجيه تحجي وياها وشوي ودزوا على ليال للاستقبال وراحت هي وخالتي هيفاء ..
__________________________❤
ليال ـ هالأيام المرت عشت حياتي بدون ما التفت وراي وهالمره جانت الضربه القاتله بحقارته قتل كل ذرة حب
وحتى بالجامعه أبتعدت عن أخته لأن أكتشفتها أنانيه وبقيت علاقاتي بالكل سطحيه يجمعنا فقط السلام
" معزومين بيت جدي وكل ظني عزيمه عاديه مثل كل مره بس من سمعت أطراف كلام عن خطبه وأسمي بس ما عرفت منو الا أبويه دز عليه يريد يحجي وياي رحتله هو وأخواني وباسل باوعلي ومركز عليه كأنما يعرف گلشي بس ما بيده شيء .
سعيد ـ ليال بابا كل بنيه مصيرها تتزوج وتستقر بيت زوجها وأنتِ أجتي قسمتج قبل وما صارت لان أبن عمج نهى عليج وما وافقتي عليه وبعدين رجعت تصافت القلوب وصفحه وطويناها والحياة تمشي وهسه عمج رشيد طلبج مني لأبنه زياد .
ليال ـ ضليت مصدومه وما مخليه على بالي الزواج وما حجيت ورجع حجه .
سعيد ـ أني وأخوانج موافقين وأبن عمج والتعرفه أحسن من ما تعرفه ويخليج تكملين دراستج ما عنده اي مانع وأني شرطت عليه بيتج لوحدج وافقوا وبعد بقت يمج ضلت بس موافقتج ، توافقين هسه أو أخليج على راحتج تفكرين وبعدين نردلهم خبر شتكولين بابا
نائل ـ خلوها على راحتها وعمي شعنده مستعجل الا هسه يسمع موافقتها .
باسل ـ يابه قابل غربه يوم يومين نردلهم خبر
ليال ـ أخذت نفس وجاوبتهم هذا هو بابا التشوفونه مناسب ما عندي مانع .
سعيد ـ يعني موافقه .
ليال ـ هزيت رأسي
سعيد ـ بيها الخير الله يسعدج بابا .
ليال ـ باسني وباسل أبتسملي ومشوا وضليت ساكنه وبعدها رجعت يم أمي ويحجن بينهم وجديتي تحاجيني
الحجيه حليمه ـ الله يسعدج أنتِ وياه وزياد خوش ولد
نجلاء ـ أي شبي ولد مثل الورده الف وحده تتمناها ليكون ما عاجبها وتريد ترفضه .
هيفاء ـ وليش ما يعجبها أبن عمها وبنتي ما سمعنا صوتها علمود بكيفج تفسرين وولد عمه على عيني وراسي بس ياريت محد يتدخل البنت بنتي وأذا الزواج يتم فه يتم بموافقتها مستحيل أجبرها على شيء .
ليال ـ تعارگن الا شويه ودزوا علينا وگمنا أني وأمي
هيفاء ـ ليال ماما أنتِ موافقه أذا ما موافقه گولي هما بس طلبوج هسه عادي فكري لاتستعجلين وابوج وأخوانج أني أحجي وياهم .
ليال ـ لا ماما ما يحتاج أفكر وأنطيتهم موافقتي .
هيفاء ـ متأكده ماما خاف أستعجلتي هذا زواج ماما
ليال ـ لا ماما ما أستعجلت والله يقدم البي خير مشينا وباسل فتح الباب ودخلت أشرلي بابا بس تقربت أبتسملي وكعدني يمه حضني من أيدي وأمي بصفي أبتسمت بوجه بابا .
سعيد ـ بنيتي الغاليه الله يسعدج بابا وهسه جدج وعمج وابن عمج يردون يسمعون موافقتج وجدج دز عليج .
عبد الغني ـ ليال جدي أني دزيت عليج وأبوج وأخوانج كالولي ليال موافقه بس أني أريد اسمعها منج وأذا ما موافقه هذا هو جدي هالزواج مو لازم وأبن عمج خل يزعل بس مهم ما أجبرج شتكولين جدي .
ليال ـ كلام جدي مثل النسمه البارده رفعت رأسي وباوعتله وأبتسمت وصار ليث بصف جدي ويباوعلي جاوبته بكل ثقه جدي بس كلامك كافي ويسعدني وأني موافقه وموافقتي تمت بإرادتي محد جبرني
وبلغت أبويه وأخواني بس دام تحب تسمعها مني
أني موافقه .
عبدالغني ـ الله يسعدكم يا جدي ويحفظج ويكملج بعقلج ونعم منج ومن تربيتج .
ليال ـ أبويه باسني وصارت مباركات بينهم وزياد تقدم باس أيد ابويه وجدي وعمي رشيد باسني وفرحان .
رشيد ـ الله يسعدكم عمي وبالخير عليكم .
ليال ـ خير لجميع عيني عمي حضني وزياد أبتسم لي وكال بصوت ناصي .
زياد ـ مبروك ليال .
ليال ـ الله يبارك بيك ورجعت يم أمي وباسل مدلي أيده
باسل ـ يعز عليه فراكج والله .
نائل ـ أحنه موجودين بظهرج أي غلط منه بس أرمشي
ليال ـ الله يخليكم اليه وبعدها طلعنا ومـا باوعت وراي وداخلي شعور متناقض واجتي لقاء وجنات حضنوني
لقاء ـ يروحي يا أختي يحيلي ، الف الف مبــروك تستاهلين كل الخير وگلشي حلو الله ينطيج على كد نيتج وقلبج الأبيض والنقي .
جنات ـ حبيبتي ليال الف مبروك وأخيراً راح نشوفج عروسه فدوه .
عصماء ـ الف مبروك الله يسعدكم أن شاء الله
ليال ـ الله يبارك بيكم تسلمون أمي تبجي بدموع الفرح حضنتها ماما حبيبتي واجه باسل .
باسل ـ ها شو هيج گلبتوا الفرح حزن وكمتوا تبجون
لقاء ـ دموع الفرح الله يدوم علينا أفراحنا .
باسل ـ أمين يله ما نمشي للبيت .
هيفاء ـ لا بعد هسه خل تدخل على جديتها وعماتها
باسل ـ وشگو داخله .
هيفاء ـ لا ماما ما يصير عيب من جديتك ومرت عمك رشيد واذا على عماتك هنا هيج من يومهن شنسويلهن ، يله ماما دخلي عليهن وأنت أخذ مرتك ورحوا البيت عود أبوك يوصلنا .
باسل ـ ها لا أبقى أنتظركم بس لاتطولون .
هيفاء ـ روح يمه شعليك منا وأنت تعبان من شغلك اخذ مريتك ورحوا وأذا حجوا خل يحجون مـا عليك .
باسل ـ ماشي لعد ، يله عصماء
ليال ـ باسل وعصماء راحوا البيت وأني دخلت ومباركات من عماتي وجديتي وعمتي أسمهان حسيتها ما راضيه كوه باستني حتى مبروك ما گالت وكعدت بصف عمتي نجلاء وصلت عمتي سلوى وعيونها مليانات دموع گامت باستني من وجهي قوي .
سلوى ـ الله يسعدج بنيتي .
ليال ـ تسلمين عيوني عمه وگعدنا وبعدها رحنا البيت أبويه أجه ويانا ، دخلت غرفتي غمضت عيوني يارب توكلت عليك ياحبيبي والماضي صفحه وقلبتها من حياتي وأبتديت بدايه جديده بدون التفاته ولو گلبي يصرخ مستحيل بعد أسمع اله وأجه هالقرار والموافقه بعد أذيتك يا ليث ..
اليوم عقد القران وكدام المرايا ولقاء تخليلي مكياج وجنات تلبس فستانها وكملت ولبست الفستان
هيفاء ـ ها ماما خلصتن تأخرنا الكل وصلوا جنات ركضي على مرت أخوج شوفيها گملت
ليال ـ كملنا وطلعنا وعصماء ويانا كاشخه بس لابسه عبايه وكلشي ما يبين منها وجنات كالت
جنات ـ ترى حفله عائليه ما طالعين مكان شگو لابستها مطلعتج مثل العجايز .
هيفاء ـ جنات أكص لسانج اذا تحجين ويه مرت أخوج من شوكت الستر يتعيب عليه
لقاء ـ ينراد الج تكسير رأس علمود تحجين مثل الأوادم يا حيوان كون باسل سامعج الا يعدمج لو ساكته مو اشرفلج .
ليال ـ سگتت وعصماء ما حجت خطيه وصلنا البيت والزلم بعدهم بالحوش وباسل باوع النا وركز نظره على عصماء ونظراته كلها فخر ومشينا وسمعته همس الها
باسل ـ تجفني هالعبايه .
ليال ـ يمه أسم الله والله باسل واكع وكعه على وجهه الله يسعدهم ودخلنا والكل كاشخات ومن ضمنهم ياقوت! تجاهلتها وگعدنا وعمتي اسمهان تفتر واجه عمي رشيد ما أعرف شگالته وعصب عليها وجديتي كالتلها .
الحجيه حليمه ـ شعندج مورثه ولا جنج أبنج اليكطع مهر وجهج وجه الأرمله ، ما عاجبج هذاك الدرب وين تلكين وحده مثل ليال تثقل بالذهب خاف ما تدرين .
أسمهان ـ على كيفج عمه واني شحجيت أكلتيني حاصل فاصل .
الحجيه حليمه ـ أنتِ ما تحجين بس عيونج التحجي .
ليال ـ سگتت وضلينا كاعدين وكالوا وصل الشيخ واجه باسل وأمي وياي وعدلت شالي ودخلت وياهم كعدوني بصف أبويه ونائل وأمي طلعت وباسل ضل واكف رفعت رأسي ليث گبالي ويگلب بالموبايل!! ورفع عينه گبل نزلت رأسي وصار الكلام وبدأ الشيخ يحجي ودقايق وسمعت صوت زياد
زياد ـ يابه جدي قبل لانعقد شيخ أني ما موافق!! .
ليال ـ وأنصدمت صدمة عمري رفعت رأسي ليث أبتسم بخبث!! وگبت العيطه وأرتفعت الأصوات وباسل ونائل هجموا عليه وصارت مذابح وأني طلعت كلني خيبه
وكلهن يسألن ليش وليش وشصار وجديتي دفرت الباب ودخلت تحجي والشيخ طلع مستعجل وأمي باوعتلي
هيفاء ـ شصار أحجيلي .
ليال ـ ما أدري ماما ما أدري بس زياد ما موافق عالزواج
لقاء ـ ليش مو جان موفق وفرحان شجاه .
ليال ـ واكفين وصوتهم عالي وطلعوا وعمي رشيد عصبي ويحجي على زياد وجان يعيط بيهم .
زياد ـ ما موافق وخلص شنو هي گوه اجباري تريد تزوجني ليال ما اريدها .
باسل ـ والله اليوم اقضي على عمرك والله
نائل ـ ولك هي الما تريدك خاف ما تدري .
ليال ـ وهجموا عليه بالحوش وضربوا وفازعوهم وخلوا دمه ينزل من خشمه وشفته وقميصه الابيض صار كله تراب شال سترته
سعيد ـ شوف ولك عتبة الباب تعثرك ما طولني عايش طولك ما اريد اشوفه يا خسيس يا نذل الله يكسر گلبك مثل ما كسرت گلب بنتي وبناتي بعد تحلمون بيهن لو مو اخويه ما أنطي وحده منهم ويارتني سامع كلام أبويه .
باسل ـ أني صوجي قدرتكم عبالي ولد عم ينشد بيكم الظهر وگلت شكو بيها عمام وابن عمها بس طلعتوا جلاب واريد كواد يدك بابي ويطلب وحده من أخواتي الا اجفص على رأسه ولو تموتون وتجدون بابي أظفر من أظافر اخواتي ما تشوفون وكسرت ليال هاي ثاني مره تصير كون حوبتها ما تتعداكم وتطلع بأخواتكم ، يله أمشن .
ليال ـ عبرناهم ومشينا ورة باسل وصلنا البيت وعفتهم ودخلت الغرفه وقفلت الباب وباسل يحجي ويه أمي بعصبيه ودمه محترك وصوته عالي
" باوعت المرايا وذبيت شالي وبجيت كسروا گلبج ليال
سمعت صوت رساله فتحت موبايلي والرساله من ليث
ليث ـ قسمتج ما تصير لغيري لو تموتين ورفضتيني الأ أبقيج مثل دار الوقف محد يأخذج لاتحلمين بشر يلزمج ويتنعم بتفاصيلج غيري .
ليال ـ لو تموت ما أخذك مدام الشغله صارت عناد أدوس على گلبي وما أصير الك .
ـ أدري بيج ما تصيرين لغيري هذا الشيء منتهين منه بس عادي تصيرين اليه .
ـ مستحيل لو تموت يا ليث لو اضل بس أنتَ .
ـ عاذرج بعدج مقهوره مني والصار مو قليل وكسرتج أني أداويها ووجعج ينام بگلبي .
ـ ما تهمني بعد لا أنتَ ولا كلامك
ـ بس أنتِ تهميني وبعدج بگلبي وأريدج ومستحيل أخلي أحد يأخذج مني أنتِ مالتي .
ـ عيش بأحلامك
ـ خلص سدي الموضوع وأرتاحي هسه الصبح نحجي ونتفاهم وأراضيج وما يحتاج تراضيني أني ما زعلان منج .
ـ نحجي ونتفاهم وتراضيني من شوگت
ـ من اليوم ، وأنتِ تحبيني وأني روحي بيج گافي زعل ومكابره تعبت على غيابج خل نرجع وگبل أخطبج وأعقد عليج ونعرس وأخذج يمي .
ـ جاوبته بقناعه تامه ، تحلم يا ليث أرجعلك وطول عمري أخليك بحسرتي أني مو لعبه عندك ولا ملك من أملاكك .
ـ ليش هيج صايره قاسيه ليال أنتِ حنينه .
ـ أني عندي حنيه وحب محد راح يعوضك بي ونفس الوقت عندي أحتقار أكرهك بالساعة السوده الشفتني بيها وليال أنتهت وحتى خيالي بعد تحلم تشوفه .
وحظرته ومن وصلت الواتساب لگيته دازلي مقطع
لـ أغنيه جلال خورشيد هم تعود .
عفت الموبايل لا ما نعود ولا تعود أيامنا وگلشي أنتهى بينا وأثنينـا أنتهينا ...
ومرت الأيام صح جانت قاسيه وأنكسرت بيها وأهلي أنقهروا عليه بس هذا ما يخليني أوقف حياتي وأضل عايشه بزاويه بالعكس أتخذت من كسرتي وجرحي قوه وساندت بيها نفسي وطلعت وتونست ويه أخواتي وأشتريت ملابس ورجعت ليال القديمه الروحه تضحك والكشختها ينحجي بيها وكلشي بالماضي ما التفته
وأحس شيء بداخلي برد تجاه كل المواقف الصارت وما عاد يغريني ويأثر بيه ولا شيء حتى لو أصادفه شخص عادي وأعبره وأكمل طريقي .
ومرت الأيام طبيعيه وعايشه حياتي اروح واجي الجامعه ملتهيه ويه صديقاتي بتجهيزات حفل التخرج وطلعات ويه أهلي ومتونسه وياهم وگملت فرحتنا من طلعنا وأخذنا عصماء ويانا وباسل جان بالمحل طلعنا لوحدنا
لقاء ـ تحليل مال ُشـــنو
هيفاء ـ مال حمل
ليال ـ دخلت هي وأمي واحنه ضلينا ننتظر وطلعن ها
هيفاء ـ سوينا وبعد لما يطلع يله خل نكمل شغلجن وبعدين من نطلع نمر نأخذه .
ليال ـ يعني ماما تطلع حامل .
هيفاء ـ أي أن شاء الله هي من تزوجت من أجتها يله امشن .
ليال ـ فرحنا بس لاحظنا عليها وجهه حزين حتى هالات تحت عيونها واضحه بس ما سألناها ورحنا الماركت افترينا وأشترينا وعصماء بس تفتر وتباوع ما أشترت شيء أخذيلج شيء
عصماء ـ لا ما محتاجه .
لقاء ـ أخذت هذا الاوفر مال بنات وأن شاء الله تطلعين حامل بنوته .
ليال ـ يمه فدوه يخبل أني هم أريد أخذ وأخذنا يخبلن وعصماء تكلب ويانا وهم أخذت على الرغم ما متأكدين بعدنا بس على أحساسنا وكملنا ومرينا ودخلن هي وأمي وطلعت أمي فرحانه ها ماما بشرينا .
هيفاء ـ اللهم صل على محمد واله محمد أجمعين عصماء حامل .
ليال ـ فدوه مبروك ربي يكومج بالف سلامه وأخيراً راح اصير عمه .
جنات ـ فدوه هسه باسل يطير من الفرحه
لقاء ـ ولج سمعيني من هسه ممنوع تكوليلي عمه وتكبريني تكولين لقاء بس فاهمه هذا تهديد من عمتج ، فدوه حبيبي ربي يكومج بالسلامه .
عصماء ـ الله يسلمكم أشكركم .
ليال ـ ورجعنا البيت وعصماء صعدت الغرفتها واحنه كعدنا نشوف أغراضنا .
جنات ـ يمه عبالك عصماء متزاعله هي وباسل
هيفاء ـ منين تجيبين هالحجي بيش طالبتهم
لقاء ـ ماما أني هم لاحظت عليها
هيفاء ـ يجوز لان حامل هرمونات وخربطه ما الها خلك
لا ما بيهم شيء وباسل ينزل وجه يضحك ما مبين عليه وحتى لو اكو رجال ومرته تصير بينهم هل الأمور لاتتدخلن وتسألنها عيب ماما جنات أدري بيج تلكفين اكص لسانج .
جنات ـ لا شعليه .
ليال ـ ودخل علينا باسل سلم وأمي ما تحملت گامت باسته وهو مثل متفأجى يمكن ما يدري .
هيفاء ـ الف مبروك وليدي والله يگومها بالسلامه
لقاء ـ مبروك ضلع
باسل ـ على شنو
لقاء ـ راح تصير أب عصماء حامل .
باسل ـ حامل
هيفاء ـ أي يمه ياا خربنه المفاجئه يجوز هي تريد تكولك واحنه من فرحتنا ما صبرنا .
باسل ـ لا ما گالتلي وشوگت حللت؟ .
هيفاء ـ من راحت ويانا گالتلي عمه أريد أسوي تحليل حمل ليش ما گالتلك!
باسل ـ ها أي گالتلي! بس ما گالت على النتيجه
الله يبارك بيكم .
ليال ـ صعد الغرفته وأمي حست بيهم وكمنا سوينا العشه وهي نزلت ساعدتنا ونزل والحمدلله وجه يضحك وأمي أبتسمت وأطمئنت ما بيهم شيء وكاعدين نتعشى وأتصل نائل جاوبه وفتح سماعه .
باسل ـ ها نائل
نائل ـ أكول هم تروح
ـ وين
ـ ليش ما بلغوك
ـ بشنو
ـ اليوم خطوبة زياد على ياقوت!
ـ ها هيج الحجي لا ما احضر وأنتوا خوما تحضرون
ـ لا أني ما أحضر بس أهنا كل القوم يرحون
ـ وأبويه
ـ ما أدري خليته واكف ويه عمامي تعرفه گلبه رهيف على أخوانه ما يكدر يزاعلهم .
ـ بكيفه هو وأخوانه ما الي دخل بس بالنسبه اليه ما أحضر ولا أوصل لا بخطوبته ولا بعرسه .
ـ وأني هم عباله ننساها اله أني مالت ليث ما هاضمها مو عاد زياد بس شنسوي ولد عم نتحملهم .
ـ لا ليث ما عندي شيء وياه بس زياد يحلم أسلم عليه
ـ يله خلص وتعال كاعد بالحديقة ومعمر النركيله
ـ هسه أجيك .
ليال ـ لقاء باوعتلي رفعتلي حواجبها وأمي گالت
هيفاء ـ شعجب سلوى ما گالتلي .
باسل ـ يجوز عبالها تزعلين
هيفاء ـ على شنو ازعل ، بس جان حضرنا لخاطر بيت عمك كريم ما عدنا شيء وياهم
باسل ـ عود على العرس روحن يله اني رايح .
ليال ـ طلع وكُلنا أستغربنا الأ أني ما أستغربت لأن زياد ما اله ذنب أكيد الخراب أجه من ليث المهم الله يسعده هو وياقوت .
_________________
لقاء ـ لكل محطة نهاية أخيره الا نهايتي كانت بين شتاتين بين لقاء في الماضي ولقاء في الحاضر .
طلعت ملازم أحتاج أستسنخها جنات گومي طياره أستسنخيلي هاي الملازم وتعاي وجيبلي وياج أقلام
جنات ـ والله ما بيه گومي أنتِ
ـ ما الي خلك كومي أنتِ .
ـ ما
ـ دفرتها وكعت من السرير وخربت معالم وجهه
ـ تنكسر ايدج والله فلا أروح
ليال ـ وتالي تبقن متعاركات وحده منجن تروح المكتبه برأس الشارع على شنو هالعجز .
لقاء ـ ما الي خلك گومي
ليال ـ روحن أثنيجن وفضني جنات گومي لمي كفشتج وروحي وياها روحن على مكتبه عبد السلام جوارينه .
جنات ـ أي اني انسخ بس يم هذا البصفه عينه وسخه
لقاء ـ وشمدريج عينه وسخه لازم متحرش بيج
جنات ـ اي گالي جنات أنتِ تخبلين احلى من أختج لقاء عبالك حصان روسي .
لقاء ـ ركضت وراها وفلتت مني الزمج وين تروحين مني ، وفتحت الكنتور ولبست بنطلون وقميص عريض وعدلت حجابي ، ليال عندج فلوس .
ليال ـ بالجنطه وصدك وياج أقلام رسم
لقاء ـ بلشت الطلبات
ـ اوكفي أكتبهن الج بورقه واني دائماً أخذ منه يعرف بس اذا لكيتي الحجي عبد السلام لاتنطينه الورقه لان مو هلكد بس أمجد لا يعرف شنو أريد .
ـ جيبي ولج جنات سليمه تعاي
جنات ـ أجي وياج بس بشرط
ـ وتتشرط العوجه
ـ تحترميني يابه اذا فلشتي سيرتي الذاتيه كدام الأستاذ مالتي أموتج
ـ يابه شلون بيها عضه هي والأستاذ مالتها دمشي
ليال ـ لقاء خطيه أحترميها
لقاء ـ هي خل تمشي وياي شلون أحترمها أحترام
ـ بس غلطه وحده أرجع والله
ـ فضيني عاد ام السيره الذاتيه مو عدنا حفل تعارف هي مكتبه برأس الشارع ، گملت وطلعنا يمه رايحين مكتبه بلغناج عود خاف ننخطف دوروا بس عليه جنات عادي عساها لا رجعت .
هيفاء ـ اسم الله شنو هالحجي ، يله روحن ولا تطولن
جان گلتن باسل يوصلجن .
لقاء ـ مو راح المحل
هيفاء ـ لا ما نزل خابرت أبوج گال گتله لايجي العصر بس الصبح لان جاي يتعب بالمحل ، صعدي خل يوصلجن لاصدك تنخطفن .
لقاء ـ يمه شبيج بسرعه صدگتي ومنو يخطفنا شيسوي بينا يبتلي على عمره ناقص مصايب بحياته يخطف لقاء وجنات ، يله امشي أم السيره الذاتيه
جنات ـ دكافي عاد .
لقاء ـ ونمشي وهي وكفت شعندج بنجرتي
جنات ـ هذا بيتهم أكولج خاف ما مفتحين خل نشوفهم
ـ تردين تفضحينا بابا جوارين شيگولون علينا بنات الحجي سعيد يدكدكن بيبان لكافتج بطليها لا أملص أذاناج. .
ـ واذا معزلين
ـ اكو غير مكاتب بس مكتبتهم امشي وصلنا المكتبه
مفتحه الحمدلله دخلنا والحجي جان موجود مرحبا عمي
عبد السلام ـ هلا بنيتي .
جنات ـ شلونك عمو
عبدالسلام ـ هلا بابا جنات
لقاء ـ تبين حلوة مو مثل قبل جانت مخربطه باعي هاي السوالف أنتيكا ليال تعشقكم راح أخذهن الها عمي بيش هذول
عبد السلام ـ والله بنتي ما اعرف بيش هذن امجد جابهن جديد هسه يجي واسأله بيش ..
لقاء ـ ماشي عمي وكفت اخذ اقلام وسمعنا صوت
امجد ـ السلام عليكم .
جنات ًـ وعليكم السلام هلا أستاذ
أمجد ـ هلا جنات شلونج شخبارج
َ ـ زينه الحمدلله
ـ ما عاد شفناج بس دخلتي الجامعه أختفيتي بس على كد تعليقاتج على المنشور شدعوه يابه .
ـ والله أستاذ بس طلعت من السادس نسيت الكل وأنت أستاذنا حقك علينا .
ـ لا بابا أتشاقه وياج والله يوفقج .
ـ تسلم استاذ والله جانت أيام حلوه
ـ أي والله ولاتنسين نفسج جنت تخستين وشالعه گلبي يوميه أعيدلج الشرح .
ـ هههه أي والله
لقاء ـ كرصتها شنو هالميانه الزفره والضحك
جنات ـ وجع شبيج هذا أستاذي درسني رياضيات خصوصي .
لقاء ـ أي سدي حلگج ، تقدمت بس العفو هذن بيش .
أمجد ـ أهلاً هذن أنتيكا واصلتني جديد
ـ اي أعرف انتيكا بس بيش
ـ على عشره القطعه بس الكم سهله احنه جوارين
ـ لا ما يصير ، خليهن اليه وهاي أختي دزتها دائماً تأخذ منك .
ـ أي سهله .
ـ وهاي أستسناخ .
ـ تدللي .
ـ وگفت وجنات تفتر على شنو أدورين
ـ شعليج بيه
ـ أني أعلمج ، باوعتله لكيته يباوعلي رجعت باوعت جنات وهو جهزهن شكد الحساب .
ـ خليهن علينا
ـ لا ما أقبل گال الحساب وانطيته يله جنات أمشي
جنات ـ مع سلامه أستاذ
امجد ـ الف هلا نورتوا المكتبه .
لقاء ـ شكراً وطلعنا تعاي احاجيج شُنو هالميانه والسوالف والضحك أكول لـ باسل عليج .
جنات ـ ترى أستاذي حباب كلش والرياضيات شكد صعبه ومكروه هو سهل عليه الماده
ـ والله اليشوفكم ما يگول أستاذج! والتوصيات اللي أكلتي بيها رأسي بالبيت لا افلش الجبهه كدامه ما عرفنا هالأستاذ شــنو!
ـ أهو لقاء يعني وأذا اكو علاقه شگو بيها
ـ والله لما بالشارع جان عرفت شغلي وياج صايره فدمره أدبسزز عينك عينك شنو هالصلافه العندج صايره أنكس من جواهر
ـ بس أريد اعرف شنو مشكلتج أنتِ ولو نفرض گتلج علاقه شتسوين
ـ أعدمج غير علاقه وأستاذج وجوارين ذبحج حلال
ـ لا ماكو شيء مجرد أستاذ درسني وخلاص لايروح بالج بعيد
ـ عبالي بس حتى لو هما جوارين ويأخذون علينا نظره
ـ لا اله الا الله عاد لقاء والسمعه
ـ أكسر راسج هم أمشي يله .
ـ خل نمر الاسواق نشتري جعت
ـ ماكو وأكو زقنبوت بالبيت .
ـ عوذه منج بعد فلا اطلع وياج
ـ وعلى أساس أني اطلع وياج خل أدخل دوره تعليم سياقه اني بعد اخذ احد وياي أطك السويج واطلع
ـ يمه أنت تسوقين سياره
ـ أي شبيه
ـ أخاف السياره بس تشوفج تتنحر وأطكها روحها بأنفجار
ـ لا حبيبتي
ـ شحابه من السياقه يمه كل عقلج تسوقين وتمشين لو يضل عمري يوم واحد ما اسوق سياره
ـ مو السياقه معطله لحلگج ووصلنا البيت ولگيت باسل كاعد ويه أمي يشرب جاي هلاو
باسل ـ هلا شجبتن وياجن
لقاء ـ مثل شنو
باسل ـ عصاير حلويات جبس
جنات ـ والله گتلها ما مرت كظتها عليه عيب وعيب
باسل ـ أي عيب وأختج أفهم منج ، يله اني رايح شتردن أجيب الجن وشوفي ليال هم .
لقاء ـ أني ما اريد گلشي
جنات ـ اني هاي قائمه كتبت بيها والجبس أريده حار
هيفاء ـ وشوف عصماء هم
باسل ـ أني أجيبلها
هيفاء ـ أخاف مشتهيه شيء أصعد شوفها
باسل ـ عود اني أخابرها جنات صعدي جيبيلي محفظتي .
لقاء ـ عفتهم ودخلت على ليال لگيتها ترسم هاج أغراضج وجبتلج لوحات أنتيكا شفتهن وعجبني .
ليال ـ تسلمين حب
لقاء ـ طلعتن وأكلب ماكو وينهن يربي
ـ شگو شبيج
ـ وين راحن ماكو يمكن ما مخليهن
ـ خاف أنتِ نسيتهن
ـ لا هي علاگه أخذتها منه لا الظاهر هو نسه يخليها حرامات شگد فرحت بيهن عود أخذتهن الج
ـ يله ما صار شيء فدوه الج
جنات ـ ها شگو شبيجن
لقاء ـ اللوحات ماكو يمكن نسه يخليهن
جنات ـ عادي هسه هو يجيبهن عود أراسله وأكوله عليهن .
لقاء ـ تراسلينه لزمتها من شعرها شو مستخفه فدمره
ليال ـ اي عاشت أيدج انوب علينا أستاذ أمجد غضب على رأسج
جنات ـ ولج شعري اخ يمه ، خرب بعقلجن بس تفكيرجن بالموزين .
لقاء ـ شوفي ولج أكول لأمي والله أذا عندج شيء وياه گولي لاتفضحينا خرب بعقلج أبن الجوارين
جنات ًـ كبر بصفه كبر على عقلجن هجم .
لقاء ـ عافتنا وطلعت مو عبالك زودانها
ليال ـ يمكن
لقاء ـ لا تستاهل علمود تحسب حساب وتخاف وغيرت ملابسي وللعشه عصماء هي طبخت وتعشينا وأبويه ورى العشه أجه ، رحت كعدت يمه بابا أريد احجي وياك
سعيد ـ أحجي بابا
ـ هو طلب بسيط وقبل طلبته منك ووافقت بس گلتلي بالأول تخرجي وبعدين تدللي
ـ وشـنو الطلب
ـ معقوله بابا نسيت
ـ والله بابا مية الف شغله برأسي شذكر ، باسل وين!
ـ بابا عوفلي باسل هسه خليك وياي
ـ ها بابا شنو طلبج
ـ أتعلم سياقه وتشتريلي سياره
ـ غير تتخرجين بالأول يا بنتي
ـ هواي لما اتخرج ومن أتخرج أدوام بالصيدليه وراها يطلع تعييني أوو سالفه مطوله .
ـ لعد شلون يا بنتي هسه عندج دراسه
ـ بالعطله ادخل دوره واتعلم سياقه واضبطها حبيبي بابا وافق .
ـ منين طلعتيلي بيها يا بابا منو سايق سياره تفتحين علينا باب .
ً ـ وأني شعليه بالعالم ، الله عليك بابا وافق
ـ الله كريم
ـ يعني وافقت
ـ گلت الله كريم ، باسل وينه .
هيفاء ـ طلع قبل العشه على عمامه .
سعيد ـ أني جنت يم عمامه ماكو! لقاء گومي صيحيلي عصماء
هيفاء ـ سعيد عوفه خوما صغير تسأل مرته وين يروح قابل لو يم ولد عمامه لو جماعته .
ـ أي صغير لان أدري بي ما يتوب من سوالفه
ـ يا سوالف سعيد شگو شسامع عليه وهو من تزوج تغيير واذا على صاحبته عايفها
ـ أي تضحكين على نفسج تغيير أبنج أبو دروب فلا يلحك الأوادم والبارحه من المحل طلع وأجيت البيت سألتها گالت دزيته على مسواك وخابرته طالع ويه جماعته لو هو يجذب لو مرته تجذب وراه! .
ـ سعيد لاتتسرع وتظلم أبنك بدال ما تسأل مرته أتصل عليه وشوفه وينه .
لقاء ـ أبويه معصب وأتصل عليه وفتح سماعه هوسه وصوت ناس شگله كاعد بمطعم
سعيد ـ باسل وين أنتَ .
باسل ـ حجي طالع ويه جماعتي
ـ وشوگت ترجع
ـ ليش صاير شيء
ـ لا أبني ما صاير شيء أخذ راحتك
ـ ماشي يابه .
هيفاء ـ ها سعيد مو گتلك لاتظلم الولد
سعيد ـ عصماء وين ليش ما نازله .
هيفاء ـ هسه تعشت وصعدت ترتاح
لقاء ـ أبويه صاير هواي يدقق ويسأل وأكيد شاك بشيء
ضلينا كاعدين وحسيته كاعد ينتظر باسل شوي ودخل باسل شايله علبة بقلاوه وعصائر وكرزات .
باسل ـ ها حجي يمنا اليوم ، يله جبت بقلاوه وتحلي ويانا لقاء گومي جيبي مواعين نوزع بيهن .
لقاء ـ جبت مواعين وزعت وأكلنا وهو يضحك طبيعي ونزلت عصماء .
عصماء ـ مرحبا عمي شلونك
سعيد ـ هلا بابا الحمدلله ، تعاي عمي أكلي بقلاوه
باسل ـ هي متنسيه بقلاوه .
لقاء ـ كعدت تأكل ويانا ما مبين عليهم وخلصنا وكلمن راح الغرفته
ليال ـ أكولج معقوله باسل راجع لـ عُلا .
لقاء ـ ما أدري .
ـ أنتِ مو صديقتها ما تشوفينها من تنشر
ـ صديقة منو عيني ما يشرفني أصادقها من ساعتها راسلتني حظرتها ، أني صح أنقهرت عليهم لان ما تزوجوا وأهلي عارضوا حبهم بس من توصل خيانات تلعب نفسسي وانعل أبو هيج حب .
ـ شعلينا أحنه سدي موضوعها
ـ تردين الصراحه لو بمكان عصماء ما أوافق .
ـ ووافقت البنيه والله يسعدهم وكلنا عدنا ماضي
ـ بس أكو فرق بين ماضي وماضي
ـ شبيج انگلبتي عليه صح غلط بس تاب ومبين عليه متغير ومرتاح بزواجه .
ـ ما ادري أشتعلت بنار من كلام أبويه وشگوگه بـ باسل
وابويه ما يحجي أذا ما متأكد منه .
ـ قصدج راجعلها .
ـ شمدريني ومرته فقيره حتى لو راجعلها ما تحجي .
ـ لا ما أعتقد ما شفتي علاقتهم وشلون يباوعلها ومهتم بيها ، هسه ليش نسبق الحدث يجوز ماكو شيء وأبويه لان من أول مره صارت يضل يشك بي .
ـ يله الله يهديهم ويبعد عنهم عُلا وربع عُلا ، يله تصبحين على خير ، لو تبقين كاعده .
ـ لا أنام
ـ شخبار ليث
ـ ما أعرف أخباره ولا أريد أعرف
ـ بعدج حاظرته
ـ أي بعدني وياقوت عزمتني على حفلة الخطوبه مالتها كتلها الله كريم وأمي تريد تروح تكول عيب من عمتج سلوى بگلشي هي وياي ، شعلينا بزياد احنه مو مثلهم
ـ أنتِ تردين تروحين
ـ أي عادي
ـ أحس ما يهمج بعد
ـ برد گلبي ناحيته هواي أذاني .
ـ هو الخسران وحفلة الخطوبه نروح ونطب بعيونهم
ـ الله كريم .
ـ ونمنا وكل واحد منا عنده قصه بحياته وحاير بزمانه
الا اني أكبر همومي يمتى أخلص دراستي وأشتغل بالصيدليه وأتعيين وأدوام واتعلم سياقه ..
" وطول فترة حياتي ما دخلت بعلاقه حب ولا احد صارحني بإعجاب ولا أني أنعجبت بشخص كلهم أشخاص عاديين ما نجذبت لأحد ، واشوف صديقاتي يحبن ومشاكل وهواي سمعت عن الحب لدرجه ما ضلي شغف وصرت أشوف الحب مو شيء مهم بحياتنا أحسن شيء أنك تهتم بنفسك وتدرس وتحقق أحلامك وطموحك يعني من الأخير هاي حدود تفكيري المنغلق عن الحب وعايشه لحياتي ولنفسسي .
" وقبل لا التحق لجامعتي ، بالليل أبويه وافق بس كلف نائل وباسل هما يعلموني سياقه يا سلام على التعلوم ينراد اليه فد اربع سنين .
نائل ـ لقاء يابه على كيفج
لقاء ـ ومشيت
نائل ـ يا علي
باسل ـ شهداء بإذن الله .
باسل ـ لا كل شوي دايسه بريك يمعوده
نائل ـ لــقــاء ولج على كيفج لاتگلبينا الشارع مو شارع أبوج .
لقاء ـ والله السياقه سهله لو يشيلون البيوت والناس
باسل ـ ميخالف أحجيلج وياهم ما عليج كملي كملي
لقاء ًـ وكملت وباسل عاط شگوو والله أنت وترتني
باسل ـ المن ادكين هورن ، وعلي فضحتنا كل شوي طوط طوط ، الستيرن شگو حاضنته ما يطير رخي أيدج وهيج لزمي لما قبل لاتصعدين علمانج وثول .
لقاء ـ أي أي فهمت كملت سياقه وهم عاطوا شگووو
نائل ـ العامود
لقاء ـ شبي
نائل ـ نزلي سلمي عليه مو كدامج جان دعمتي .
باسل ـ نوب نتغرم ديرينا أبوج تاجر مو هيج أصراف
نائل ـ بالحسين هذا تبذير ماكو هيج .
لقاء ـ أنتوا بس سگتوا خبلتوني والله ، نائل بالصدر وباسل ليورى وكام ومن ورى رأسي جعصني وفر الستيرن وعطت بي باسل لعد شگو جايبتكم وياي غير تعلموني .
باسل ـ يابه سيارتي اذا صارلها شيء والكعبه الشارع ما أخليج تشوفينه بعد ، دتعلمي شبيج شكد بارده
نائل ـ أنت بس عوفها تسوق لعد شلون تتعلم ، يله رجعي كملي اي اي يالله اي عفيه محمد صلولات .
باسل ـ تاتي تواتي
لقاء ـ ومشيت على خط عدل وحسيت جعصت شيء وعاطوا بيه أثنيهم ونائل ضرب كصته قوي شگووو
نائل ـ ولج جلب راح تسحكينه خرب حظي جعصته خرب باعي كدامج زين .
باسل ـ شعندج مألفه جنج أبويه
لقاء ـ لا عفيه لاتكولها وگفوا السياره ونزلوا ها مات
نائل ـ لا ينتظرج تنزلين تسلمين عليه
لقاء ـ أي أحجوا مات لو لا
نائل ـ لا فطس الظاهر هو سكران ويتطوطح ما يدري لقاء محتله الشارع .
باسل ـ يله خل نمشي اذا نضل حتى الشارع تفلشه
لقاء ـ والجلب خطيه
باسل ـ شنسويله أنتِ جعصتي وفطس ذنبه بركبتج
لقاء ـ لا عفيه أنعصر گلبي وصعدوا وهالمره نائل ساعدني خطيه وطول خلگه وياي لما خلصنا ووصلنا البيت ولگينا أبويه موجود
سعيد ـ ها شلونها .
نائل ـ لا زينه تتعلم .
باسل ـ جعصتلها جلب
هيفاء ـ لا يالله ليش ولج خطيه
باسل ـ تحمست يله لازم تصير خساير
سعيد ـ شنو لازم لو تعلمونها لو ماكو سياقه أرواح العالم مو لعبه اليوم جلب باجر تگلب السياره وادري بيكم ضليتوا تضحكون عليها .
نائل ـ لا يابه بعدها بالبدايه تتعلم .
سعيد ـ باجر تروحين مو
لقاء ـ أي بابا ومن أنزل تعلموني .
نائل ـ أن شاء الله .
لقاء ـ تسلم ما قصرت والله
نائل ـ تدللي يله أني أمشي تصبحون على خير .
لقاء ـ وأنت بخير عيني وراح ورجعت سولفت لأخواتي ضلن يضحكن عليه ما عليجن والله أتعلم أني أعلمجن
ومن الصبح تجهزت والتحقت ومن طلعنا من الفرع شفت أستاذ أمجد لابس تراكسود أسود شايل علاگة صمون وتذكرت جنات معقوله يكون أكو بينهم شيء!
____________________
جنات ـ طول فترة علاقتنا لاحظت أشياء وتصرفات وشگوك تربعت برأسي أنه هو متزوج!!
وكلما اسأل يطلعلي الف تبرير وأرجع أصدق وأثق بي بس مع ذلك ما مطمئنه وگلبي نغزني بشيء مخفي عني ولازم أعرفه أني مو غبيه علمود يضحك عليه بهيج موضوع مهم ويعيشني بوهم على حساب مشاعري .
" أختفيت يوم كامل وجنت متعمده وثاني يوم يله فتحت ولكيته مراسلني والأوقات جانت الصبح من هو بالشغل والعصر!!
عِماد ـ وينج مختفيه ، جنات بابا صاير شيء وياج .
جنات وينج أشتاقيتلج جناني حبيبي شو ماكو .
جنات ـ بالليل نحجي هسه طالعه .
ـ وين طالعه عيني وهسه يله تجاوبين وليش الأ بالليل
ـ طالعه وما أكدر أحجي وباليل أرجع
ـ لاترجعين دامج طالعه أني هم أطلع
ـ وين تطلع
ـ شعليج أنتِ
ـ أوك براحتك
ـ شبيج لخاطر الله هاي مال براحتك لادزينها
ـ گتلك من أرجع بالليل أراسلك وعدنا حفلة خطوبه وملتهيه وما راسلتك ليش ما تتفهمني .
ـ يله باجر نحجي
ـ أوك عفته ولليل راسلته ما موجود قافل الأنترنت أو يمكن يطلع مسجل خروج من الحساب تخبلت وأتصلت على رقمه وأنرفضت وضليت أتصل وأجاني صوته
ـ شبيج تتصلين
ـ وشبيك تصيح
ـ كاعد يم أهلي أجاوبج كدامهم
ـ أي جاوبني عادي وهيج تستحي من أبوك حاجيني بصيغة صديقك
ـ وحليتها حضرتج
ـ وأجاني صوت بنيه
ـ حبيبي تعال أتعشى .!
ـ حبيبي هاي منو تصيحك؟
ـ أختي منو قابل يله أتعشى وأخابرج
ً ـ كذاب مو أختك وأختك تگولك حبيبي خلص لاتخابرني بعد وجنت شاگه وهسه تأكدت .
ـ شبيج خبله أنتِ يوميه طابگة خبالاتج عليه يابه دطيري
ـ وقفل الخط بوجهي متزوج والله متزوج وأني الغبيه جنت أكول يرجع تعبان من الشغل وينام من وگت وما نحجي بالليل أثاري متزوج ، تخبلت دخلت على حسابه
وضليت أگلب بالتعليقات وهواي تعليقات ما لكيت شيء! يعني ما تعلق تنطي أعجاب معقوله أكون ظالمته لا لا كم مره أكون ظالمته هاي أكثر من مره أشك بي وهو ينكر والحل جنات ...
رجعت على التعليقات أغلبهم زلم وأكو بنات بس حساباتهم فارغه وما أعرف منو هي لحظه لحظه ليكون حاظرني من حسابها وما يطلعلي تعليقاتها!
گمت جبت موبايل ليال ودخلت على الحساب مالته نزلت بالمنشورات ولكيت تعليق وبحسابي ما لكيته أذن صدك حاظرني ! دخلت على حسابها عام ومتزوجه وضليت أنزل بالمنشورات لما وصلت منشور قديم ودخلت التعليقات وشفته معلق الها بقلوب وهي مجاوبته حبيب گلبي!! هي هي يعني متزوج! حذفت گلشي ورجعت موبايل ليال
وبعد ما صورت حسابها ودزيته اله هذا حساب زوجتك وأسمها بنين! ومرت نص ساعه وفتح الرسائل
عماد ـ منين جبتي هاي أنوب ما نخلص من خبالاتج عوفي بنات العالم
ـ راسلتها
ـ المن راسلتي
ـ زوجتك
ـ جنات گافي خبال گتلج ما متزوج لا ياهي تشوفينها بحسابي تدخلين عليها عيب بابا .
ـ أنتظرها تجاوبني
ـ منو تجاوبج بابا خبله أنتِ عوفي بنات العالم
ـ أي ودزيت الها صورتك وگتلها هذا زوجج وحتى لو مو هي مهم اتأكد وأنوم الشگوك بالرأسي .
ـ تشاقين مو
ـ لا بهيج موضوع أبداً ما أتشاقه
ـ جنات مسحي الصوره عيب يمعوده لأتسويلنا سالفه
ـ ما أمسحها لو خايف تكشفك ، خايف منها وما خايف على مشاعري الجنت تضحك عليه وتگولي ما متزوج .
ـ جنات مسحي الصوره رحمه لأهلج جنات
ـ گرهتك بگدما حبيتك ليش كذبت عليه
ـ هسه أرجعلج
ـ راح وشويه ورجعلي
ـ جاي تلعبين عليه
ـ رحت شفت تلفونها أذا اني دازه صورتك أو لا
ـ منين جبتي حسابها
ـ ليش كذبت عليه ليش عماد
ـ ما كذبت بس جنت منتظر الفرصه والوقت المناسب أحجيلج
ـ شتحجيلي بعد تحجيلي من يجي الليل تختفي عني بحجة تعبان لان هي يمك ما تراسلني وأنت تخونها وياي وتضحك على مشاعري ومشاعرها وكل هذا أني الغبيه ما أعرف بيك متزوج يعني كل اللي عشناه وأحبج وحبيبتي وگلبي گلشي كان كذب
ـ لا وغلاتج مو كذب أني أحبج جنات أعشقج بس أنطيني مجال أفهمج وأشرحلج گلشي.
ـ حسبي الله عليك من رجال
ـ جنات حبيبتي أسمعيني وبعدين حكمي وغلاتج ما ضحگت عليج وأني أحبج وأريدج .
ـ جنات أنساها ومستحيل بعد تسمع صوتها گبل حظرته وبجيت والليل ما نمته من القهر والصبح رحت الجامعه وأني مخليه كومه مكياج أخفي أثار الحزن وليال
بالسياره يله لاحظت سألتني وتجاهلتها وصديقاتي يحجون وياي أني بگلبي كسره وغصه شكبرها سنتين جنت تضحك عليه أعزب وأخواتي وبالأخير تطلع متزوج
وأبتعدت عنه والتهيت بدراستي بس أرجع أصفن وأشبع قهر وكسره وغصه والم بالمعده يموت وما خليت أخواتي يلاحظن عليه بالأخص لقاء اذا وكعت بأيدها أويلي شيخلصني منها .
حتى بيت جدي ما رايحتلهم هالفتره ورجع دخلي من حسابات ثانيه ودزالي جرايد حظر وحذف مستحيل أتنازل عن قراري ...
وكاعدين وأندك الباب بقوه منو هذا الهمجي يدك الباب هيج ، گامت عصماء تفتح ولحظات دخلت علينا ماما جواهر وتقربت علينا بدون سلام گبل گامت تصيح .
جواهر ـ وتالي ما أخلص منج ومن بناتج شنو أنتن متكوليلي يعني ما كفاج رجعتي أخذتي سعيد مني أنوب رجعتي على أبني وحيدي .
هيفاء ـ منو يمج أنتِ شبيج داخله علينا مثل المدرعه
ـ كفي بلاج عني وعن أبني وحيدي ، أنوب طلعتلي بالسياقه وتصعد بناتها سيارات والله يلوك لأم شلوك هاي الضلت البنات تصعد سيارات ومنو بنات هيفاء انهجم بيت هيج بنات وهيج تربيه نعيش ونشوف
وحده معاشك هي وأبن عمها والثانيه تريد تركب سياره
ـ وأنتِ شعليج بنتي تريد تصعد سياره وأبوها موافق وهو يشتريلها شگو مقهوره ، ضاله بنفسج وتريدين تتعلمين خل الولد يعلمونج وصعدي سياره مو جايتني تتهجمين والله لقاء تريد تصعد سياره شهل الغيره والنحس العندج عجيب أمرج .
ـ عشتوا منج ومن بناتج اتنحس وأغار شو هو گلشي اليه ولأبني الجبير وحيد أمه وسبع ابوه مو مثل أبنج أبو النسوان يوميه سيارته طابگه يم باب شيسوي!
ـ وأنتِ شعليج بأبني جاي تحاسبينه والله خوش ما ضلت عليه بس جواهر تحاسب بخلفتي امشي طلعي برى بيتي وخلصيني منج ومن شرج .
ـ الشر الج ولبناتج وعسى بيتج بالهجم ما يهمني بس كفي بنتج عن أبني شغل وعمل ما عنده أنوب يعلمها سياقه العرمه لو صاير شيء عليه اني ادري بيجن تخططن علمود تكلبن السياره وتموتن وليدي والله أحرگجن بانزين وما اسمي عليجن والله اذا نائل يعلم لقاء سياقه ما تشوفن خير مني هذا ابني وحيدي كلكم ترحوله فدوه ونذر وقربان لطوله أنتِ وأبنج وبناتج وقد اعذر من انذر!
جنات ـ تحجي بعصبيه ورافعه أيدها وصايره نار وخلت ومشت وركعت الباب وراها قوي وأمي داخت وكعت من طولها.
هيفاء ـ ليال لحكيلي ما بيه أتنفس .
جنات ـ وركضنا عليها يمه شبيج يمه
ليال ـ بسرعه كلاص ماي يمه باوعيلي
جنات ـ شربت ماي وكعدت نفسها عالي ومثل المختنگه ها يمه نأخذج المستشفى .
هيفاء ـ لا ما يحتاج يمكن ضغطي هسه أرتاح هسه
عصماء ـ عمه خل نأخذج حتى لو ضغطج خل أخابر باسل
هيفاء ـ كعدي لاتخابرينه وتخوفينهم ما بيه شيء أعصابي تلفت من هالمتخاف الله عوفي كعدن لاتخافن
ليال ـ شلون ما نخاف عليج والله متت الف موته من وكعتي من طولج وكوه تتنفسسين ، هسه اجيب تكسي ونوديج ما أنتظر موافقتج .
هيفاء ـ ولج ليال أمي رجعي ما بيه شيء .
جنات ـ لبست عبايتها وطلعت وشويه وأجتي ها ليال
ليال ـ جبت ركضي جيب عبايتها وجنطتي شوفي بيها فلوس يمه هسه نوديج عصماء تجين ويانا
عصماء ـ أي شلون لعد بس البس عبايتي واجي
جنات ـ وراحوا وضليت أني أبجي وميته خوف أمي كوه تمشي عصماء ساندتها وصعدوا تكسي ومشوا واكفه باب الحوش وفزيت على صوت ليث .
ليث ـ وين راحوا شصاير
جنات ـ أمي تخربطت وليال وعصماء أخذنها المستشفى .
ليث ـ وشلون يرحن وحدهن ما جان تخابرون تحجون باسل وين خابرتوا .
جنات ـ هسه بالطريق يخابرونه أصلاً امي تعبت وعالسريع ما لحگنا نخابر وأمي ما قبلت ما
________________
ليث ـ بله هاي سالفه
جنات ـ عفته ورجعت البيت ولكيت باسل يتصل عليه ها باسل واجاني صوته يصيح
باسل ـ أمي شبيها جنات أمي شبيها
جنات ـ ما بيها شيء بس تخربطت وراحت المستشفى .
باسل ـ وليش محد خابرني
ـ أمي ما قبلت وخابر عصماء وافهم منها قطع الخط بوجهي وضليت لليل وحدي وجابوا أمي باسل حاضنها ولازمها من أيديها وليال عيونها مورمه ركضت عليها يمه شلونج شلون صرتي
هيفاء ـ ما بيه شيء لاتخافين ماما .
باسل ـ تعالي لغرفتج أرتاحي .
جنات ـ دخلت الغرفه نامت وباسل نام بصفها وتبوس بأيده وهو حاضنها وليال تبجي ليال امي شبيها
ليال ـ اسم الله ما بيها شيء بس عدها ضيق تنفس خلوها على الاوكسجين ومشكل عدها ضغط حاد الحمدلله من اخذناها المستشفى جان كتلها الله لطف بيها .
هيفاء ـ ما بيه شيء وليدي لاتخاف عليه روح نام يم مريتك
باسل ـ لا انام يمج ومن عمري على عمرج كون ضيق التنفس بيه شيسوي جاي عليج ، ارتاحي ما عليج بيه
جنات ـ واجه أبويه يمكن محد گايله كوه يمشي وتقرب عليها أباوع ايديه يرجفون .
سعيد ـ هيفـــاء شبيج أبويه شيوجعج .
هيفاء ـ لاتخاف سعيد ما بيه شيء والله ضغطي صاعد
سعيد ـ بيه ولا بيج أني ما ادري جنت بالفاتحه وهسه اجيت وليث كالي واجيت على عمى عيوني، باسل بابا شكالك الدكتور شنو تحتاج علاج شيء.
باسل ـ بس ضغطها صاعد وضيق بالتنفس خلوها على الاوكسجين والحمدلله استقر وضعها لا هسه احسن من رحتلها حتى وجهه مگلوب لونه .
سعيد ـ الحمدلله على سلامتج الحمدلله منا وهيج ديري بالج على نفسج هيفاء .
جنات ـ لازم ايديها وخايف وباسل سحب نفسه وأشرلنا وطلعنا من الغرفه ضل بس أبويه يمها .
باسل ـ ليال تبقين كاعده مو
ليال ـ أي كاعده اصعد انت لايضل بالك وعصماء أنتِ هم ارتاحي عيني وحامل تعبتي من الوكفه
عصماء ـ لا عيوني فدوه لخالتي .
جنات ـ صعدوا الغرفتهم وضلينا كاعدين أني وليال وصلتني رساله على الانستغرام باوعت من استاذ أمجد
أمجد ـ خير جنات صاير شيء وياكم .
جنات ـ هلا أستاذ أي والله امي تخربطت وأخذناها المستشفى .
أمجد ـ أي هسه أختي فاطمه جانت يمنا وكالت ألنا لان رجلها المودي الاهل لمستشفى وضل بالي، الحمدلله على سلامة الوالده .
ـ الله يسلمك أستاذ
ـ صدك جنات اكو اغراض لأختج نستهن يمي ويوميه أريد أراسلج وأكولج وأنسى .
ـ أي گالتلي وهي هسه مو أهنا
ـ وين
ـ بتكريت راحت جامعتها من تنزل نمر نأخذهن
ـ على راحتكم يمتى ما تجون الف هلا بيكم
ـ مشكور أستاذ
ـ العفو جنات ،وهاا شيلي الأستاذ منين نزلت عليج هالاحترامات بأيام التدريس تصحيلي أمجد
ـ ضحكت مو صوجك والله
ـ لا خليها بس أمجد الأستاذ بس على كد ما طلعتج من الرياضيات
ـ أي والله الحمدلله بفضلك
ـ الفضل لله يله أخذ راحتج
ـ الله وياك ، طلعت من المحادثه وأتصلت ماما جواهر!
ليال برى جاوبتها بصوت ناصي ها ماما
جواهر ـ هلا حبيبتي جنات أمج شبيها
جنات ـ تخربطت وأخذناها المستشفى
ـ ها وهسه شلونها
ـ لا زينه الحمدلله
ـ زين ، جنات ماما تعاليلي باجر الصبح أريد احجي وياج
ـ خير ماما صاير شيء
ـ عماد أتصل عليه وحجيت وياه
ـ منين جاب رقمج
ـ مو مره حجيتي وياه من موبايلي واليوم أتصل عليه
ـ أي وشيريد
ـ تعالي ونحجي ما ترهم على الموبايل أحجيلج مو ما تجين
ً ـ تمام الصبح أجي
ـ يله أنتظرج .
ـ قطعت الأتصال هذا شيريد متصل على ماما وتالي ما أخلص منك ومن حبك لعنه صرت خوما لعنه أروح باجر وانهي كلشي واحظره من موبايلها ...
كعدت الصبح عفت ليال نايمه ولبست عبايتي طلعت البيت نظيف ومغسول وعصماء واكفه تطبخ الغده صباح الخير أمي هم شفتيها شلونها .
عصماء ـ صباح النور أي نايمه الحمدلله أحسن
ـ أبويه موجود لو راح
ـ لا موجود بس باسل راح السوك
ـ تمام أني رايحه بيت جدي خاف ليال تكعد وتسألج
ـ تمام .
ـ رحت بيت جدي والبيت فارغ عماتي بالمطبخ أسمع صوتهم وشافتني اشرتلي رحت ها ماما .
ـ تعاي بالغرفه نحجي .
ـ دخلنا ها ماما .
ـ احجيلي السالفه كلها
ـ حجيت الها گلشي هاي هي عفته خيولي واحد كذاب
ـ بس الولد يحبج ومتخبل عليج
ـ يحبني صارله شكد يكذب عليه لا خاله متزوج لو روحي بي ما ارجعله
ـ لاترجعين اله والولد خوش ولد ورايدج وين تلكين رجال يحبج ويدور وراج متخبل تعرفين شنو الحب لو ما تعرفين .
ـ أي اعرف بس خاله متزوج شيفيدني الحب
ـ وأذا متزوج شگو بيها قابل بايك بالحلال وبشرع الله وشنو الفايده اخذتي اعزب وشوفج نجوم الظهر وكرهج بالحب وساعته ليش مو هذا يريدج وميت عليج وخابرني يتوسل بيه بس يريد يعرف اخبارج كسر خاطري متلوع عليج .
ـ شتحجين ماما متزوج يعني بحياته مره غيري
ـ وأذا أني مو حبيت ابوج وتزوجنا وهسه يباوع على طولي صح تصير مشاكل بس حبنا أقوى من كل الظروف لا اني اكل امج ولا امج تأكلني كلمن بيتها
ـ ماما
ـ تعوفينه لان متزوج وهو گالي أول اخير يتزوج مو أنتِ غيرج لان ما متفاهمين ومن حقه هالشيء لاحرام ولا عيب ويحبج وأنتِ تحبينه بعد شگو يا أمي .
ـ ماما اني حايره صارلي أيام گلبي يأكل بيه
ـ يأكل بيج لان تحبينه ما تكدرين وهو عايفته متلوع وراج مو خطيه اعرفج أنتِ مو هيج قاسيه .
ـ بس خاله متزوج متزوج
ًـ مرته زعلانه وكالي احتمال يتطلگون شعليج بيهم عليج بحبج اله والحب بي تضحيات من اولها عفتي لان طلعتي ما تحبينه
ـ شلون ما أحبه وهو بعقلي بكل ثانيه افكر بي
ـ خلص لعد رجعيله واني احجي وياه يجي يتقدملج
ـ شلون وأهلي
ـ ما عليج بأهلج أنتِ بنتي واني مسؤوله عنج وهسه رجعيله ولاتعذبين نفسج وتضلين تفكرين بمرته شو محد يفكر بيج وبحبج ونار كلبج
ـ هيج تكولين
ـ اي حبيبتي اخذ نصيحتي واكبر منك بيوم أفهم منك بسنه واني جاريه على گلبي وأعرف الحب وناره وأنتِ عزيزة كلبي ما يهون عليه أشوفج تتعذبين واضل ساكته
ـ فدوه رحتلج ماما اخذتني بحضنها وبجيت الا أرتاحيت وبعدها كمت غسلت وشفت جديتي سلمت عليها وسألتني على أمي كوه خلصت نفسي ورجعت البيت
همزين ليال بعدها نايمه رجعت لفراشي وضليت دايخه وأفكر بكلام ماما وبعماد وزواجه .
________________________
بيداء ـ من بعد اللي صار وكلام عصماء أثر بيه وقتها من صدك قررت أعوفه وأنسحب من هالعلاقه والتفت على دراستي بس جنت شايله هم شلون أفاتحه بالموضوع واكوله ، وضليت احجي وياه وكلما أريد
أكوله يظهرلي حبه وتعلقه بيه .
مهيب ـ البيت أثثته من گلشي وأني وياها أتفقنا
بيداء ـ على شنو أتفقتوا
ـ يا توافق على زواجي منج وتعيش بيتها لوحدها لو ننفصل .
ـ أي
ـ وافقت بيتها لوحدها وطلبت ذهب وملابس يعني تقريبا نحلت مشاكلي ضل شيء قليل أطلب ولد فلوس وأرتب وضعي وأتقدملج .
ـ تمام حبيبي .
ـ شبيج شو ما عجبتيني عبالك ما فرحتي! .
ـ مهيب ما أكدر أستمر وياك
ـ ليش حبيبتي صاير شيء وياج
ـ تذكر من أختي جانت يمنا قبل أيام
ـ أي شبيها
ـ كشفتني وحجت لامي گلشي وكالن لايجي ولا يتعب نفسه محد ينطيج لو تموتين نفسج ما تأخذينه وأذا اجيت ادزني بيت عمتي بغداد .
ـ يمتى صار هالحجي!
ـ من جانت يمنا
ـ وليش هسه يله حجيتي
ـ ما لكيت فرصه وكلبي يوجعني ومقهوره وصعب أحجي وانت وحبك وكلشي يمنعني احجيلك
ـ هاي مو أول مره تضحين بيه وبحبي ولا مره شفت منج تمسك بهل العلاقه والحب على الرغم كل حبي الج وهدمت بيتي وهجرت اطفالي وشتت راحتي وخليت العندي والما عندي وبالاخير تكوليلي هالكلام أهلي ما ينطوني الك لان متزوج .
ـ مو بيدي مهيب
ـ تمام .
ـ مهيب شبيك حبيبي
ـ ضل بيها حبيبي ، جنتي تتونسين على أذيتي كل هالمده وصار شگد من جانت أختج يمكم وأنتِ هسه يله تحجين عدما أشتريت البيت وجهزته وبلغت زوجتي بعلاقتي وحبج والمشاكل الصارت بينا وصلت لأهلي وعشت طيحان حظ ما شايفه وأنتِ شتقدمين الي والله أهلي ما يوافقون .
ـ اني مو مثلك أنت رجال ادبر وضعك اني بنيه شگدر
ـ وهسه
ـ ننفصل
ـ بهل السهوله
ـ ما أكدر أكمل وياك وأصلاً من الأول ما أبالي أتزوج متزوج
ـ لعد ليش بقيتي
ـ مو أنت ما خليتني وحبك منعني أعوفك
ـ وحبي وينه هسه ليش ما يمنعج ما تعوفيني
ـ خلص أرجع لعائلتك والله يسعدك
ـ وأنتِ
ـ شعليك بيه المهم عندي سعادتك
ـ وحبنا بيداء
ـ ما النا قسمه يستمر هالحب
ـ ماشي
ـ دير بالك على نفسك
ـ وأنتِ هم ، بيداء راح أشتاقلج
ـ وأني هم ونهيت كلشي وياه ومرت أيام اني عايشه بوحده تجي ساعات أشتاقله ويدزلي رسائل يسال عني ما اجاوبه لما مل وكام ما يراسل كل ظني مهيب نساني وأبتعد!!
ونفس الروتين دوام وملتهيه وأني اتصفح توصلني اشعارات دخلت الحساب نائل!
نائل ـ حبيت أسلم عليج وهم كالعاده ماكو رد للسلام
بيداء ـ جاوبته وعليكم السلام
ـ هلا يابه ، زين تذكرتينا وفتحي الرساله ورديتي السلام .
ـ أعتذر منك بس ملتهيه بدراستي ما عندي وقت
ـ من حقج والله يوفقج مبين عليج شاطره تحبين دراستج
ـ بگلبي شحجيلك جاوبته اي .
ـ تدرين أنتِ حيل عاجبتني بس لاتفهميني خطأ
ـ غمضت عيوني وجاوبته نائل مالي واهس لهاي السوالف الأعجاب .
ـ أدري ومن يوم راستلج ما أهتميتي وهذا مدوخني بيج .
ـ لا أدوخ أحسن الك
ـ لا دايخ بيج .
ـ عن أذنك عفته وضل بس يدخل يسلم وأجاوبه حيل محترم نفسه والحدود البينا ويسألني عن دوامي أسئله فقط وبيوم كاعده اقرأ ورن موبايلي عصماء جاوبتها هلا والله وأجاني صوتها بعصبيه وتبجي!
عصماء ـ شدعي عليج بس گوليلي شدعي عليح وأنتِ أختي أقرب الناس اليه ، يعني الأخوات وحده تسند الثانيه الأ اني الله انطاني مصيبه مو أخت .
بيداء ـ شگو شبيج شصاير .
عصماء ـ وتسألين شبيه وشصاير هواي مهتمه حضرتج ولج من ورى سوالفج أنهجم بيتي خربتي حياتي مالك دز گلشي لـ باسل سوالفج وقذارتج وصورج دمرتيني روحي يا بيداء الله يأخذج وأخلص منج !! .
شكرا لزيارتكم عالم روايات سكيرهوم
