رواية جسر الذكريات الفصل الثالث عشر 13 بقلم مريم الحيالي

هاجر: هاي شبيكم صدك تحجون من الصبح ..شكو شنو هالصياح 

مريم: اختج حامل ... يبووووو هي اتزوجت ولزمنا انذار انوب حامل

علية: انتن صدك متستحن وادبسزيات ... كومن بسرعة حتى نتريك ونظفن البيت .. حتى انروحلها 

مريم: هااااا شكال بهلول ... هاي راح انضل يومية رايحين جايين .... امي شالت النعال واخذتها ركضة للمطبخ ... خليت الجاي عالنار اجتي هاجر

هاجر: راح ايصير عدنا حفييد ...

مريم: سالمين شبيج دروحي غسلي .. وتعالي سوي بيض 

هاجر: والله اتخيلي نونو اصغير... الللللله شعووور حلو ووو 

مريم: انضل انكتل بيها وانعضها وانطيح حظها... هم شعوور حلووو 

هاجر: وانتي شمدريج ابنية ... طاح حضج شكبرج اتصيرين بعد واتغارين ... اروح اغسل احسن الي

مريم: راحت هاجر غسلت وسوينه ريوك ... وامي مستمرة اتسولف وية هديل اتسدة وترجع اتدك ...والله هاي امي هيج جانت

.....كملنا تنظيف وبدلنا ... وانطلقنا الهديل ... ولي العهد قادم 

هديل: يمة ابقوا باتوا اليوم لترجعون 

علية: لا خواتج مجابن ملابس كلت اجي اشوفج وارجع... شوكت اتروحين للدكتورة

هديل: اتفقت ويه خاله ام عمر باجر اروح ... واشوف بيا شهر

....امي اللتهت اتسولف ...نتونس من انروح العيال هديل لأن همه اصلا كرايب امي ابو عمر ايصير ابن عم امي وابن خالتها ... 

فنبقى ضحك وسوالف وتحشيش ...لليل يلا نرجع 

مرت الايام وهديل خابرت على امي كلتلها بيبي بهيجة ماتت ... هاي خالة امي واتصير ام عمو محمود ابو عمر زوج هديل 

راحت امي للفاتحة ...وهديل اللتهت خطار ونزلة وصعدة ...هووسة

علية: كومن كعدن خلي اروح اشوف اختجن واجي

وهاجر سوي غدة ... مطلعة الدجاج عالسنك 

.....راحت امي اتأخرت.. موتتنا متقبل اتجيبلنا تليفون 

لليل يلا رجعت شو امي مقهورة ...ومادري شبيها وتعبانة 

مريم: شنو ماما شبيج ..وشو اتأخرتي مو كلتي ما اتأخر 

علية: بالمستشفى وية اختج ... طرحت

هاجر: يااااا شلوون مو مابيها شي

علية: وصلت البيتهم فتت سنطة ...محد موجود بس حماها ومرت حماها ... شو اجتني مرت حماها اتگلي

رشا: ها خالة شلونج ... شنو طلعوها الهديل جنتي يمها 

علية: شنو طلعوها ليش هي وين؟

رشا: خاله صدك متدرين هديل للصبح نزف من البارحة ... واخذوها عمتي وعمر وهبه الصبح للمستشفى

علية: هاي تحجين صدك وشلون متگلولي ومحد ايخابرني ... طلعت التليفون وخابرت على رجلها 

عمر: خاله احنه بمستشفى الجنين .. تعالي ولازم عملية الطفل مواكع بعدة 

علية: طلعت من بيتهم ورحت للمستشفى... شفتها غادية صفرة وتبجي ... فوتوها سوولها كورداش

.... رجعنا للبيت شفتها اكلت وشوية احسن واجيت ...هاي شنسوي الحمدلله الله ايعوضها 

هاجر: اذا هي كضتها نازلة صاعدة بالفاتحة عبالك تلعب رياضة شلون يبقى

مريم: يلا ماما لتضوجين ميخالف ... الحمدلله مصارلها شي من الليل للصبح نزف غير بسرعة ايودوها... وليش مخابرو وكالوا 

علية: اني ادري مسكتت حجيت عليهم كلهم ... لعبت جولة كلتلهم لو ميتة ... هم محد ايخابرني وايگلي 

مريم: امي انقهرت جانت فرحانة بحمل هديل ...بس حكمة الله شنسوي ....مرت الايام واجتي امي كعدتنا...

علية: عرس حمادة وحاتم الخميس حضرن روحجن انروح ... 

مريم: هلا هلا هلا وشعر وشعر للكاع للكاع .... طبعاً اهنا احنه صرنا ب٢٠٠٨ والسنة مال ابوية طلعت 

الحمدلله عايشين ...

هاجر: يمة گرصتني

مريم: العگربة 

هاجر: يمة گرصتني 

مريم: العگربة ... واحنه بالفراش بعدنا مكايمين هاجر اتغني واني اهز بأيدي ... وامي اتباوع علينا

هاجر: يايمة لو شفتيها سبحان المسويها

علية: يا يا يا انتن ليش خفيفات ولجن ... كومن بسرعة يلا بلا لغوة زايدة

هاجر: ماما عليج الله خلي نشتري ملابس ...ومو اتكضيها علينا خوالجن ميقبلون ولتلبسن ولتسون 

مريم: اي ماما من هسه اگلج اريد فستان قصير ...

علية: شوفن مغثة ماريد خالج جاسم ايضل يحجي.. لبسن لبس عادي وفضنها 

مريم: والله عرفت هي مبينة علوش اتخلينا براحتنا ... مو عييييب ... ماما خصم الحجي ماروح

علية: اتسوين فضل والله اني اروح عصرية ... وارجع

مريم: ماما غير عرس شلون بأخوانج احنه بعدهم عالقديم ... الدنيا اتطورت يعني ماكو شي متدخلوا بي حتى عالحجاب تعالي لبسيهن مادري شلون حجيتي ومقبلتي ... رحمه هاي

هاجر: دسكتييي شكد تلغين ... لا ماما لبس حلوو نشتري بس انخلي مكياج

علية: اي خووووش ... دكومن كومن لا هسه اتعرفن شسوي 

.....والله واجه العرس ورحنه بالحنه الصبح الدنيا مگلوبة اهل امي هواي بس خالاتي ماشاء الله 7 خالات وكلهن جايات هنه وجهالهن وخالتي الجبيرة حتى جناينها جايات وزعاطيطهم وياهم....

بحيث بيت جدي مابي محط رجل ... وانوب ولد خالي كريم اثنينهم ... خالة انتصار مرت خالي خطية مريضة بيها سرطان الثدي ... وبقت تاخذ كيمياوي فترة طويلة ...وهي قررت اتزوجهم كالتلهم تعبت اني واريد اشوف عرسكم ... لأن خالي عندة بس ابنية ومتزوجة ومرت خالي تعبت متكدر بعد 

بدلنا وخلينة بس كحلة بالگوة امي مقبلت من ورى خوالي ايضلون يحجون ... صارت حنه حلووة ودك ورگص وتعب ...بليل واكفين بالمطبخ اني وهاجر وبنت خالتي سميرة بيداء ورويدة بنت خالتي كريمة كلنا دنغسل بالمواعين ... بيداء بنت خالتي كلش شقاوجية سوالفها اتخبل واكفين جان اتكول

بيداء: اكلجن شتگولن منو الاحلى مرت حاتم لو مرت حمادة 

هاجر: هذا سؤال طائفي بيدو ....

مريم: مرت حمادة اني برأيي.. وهادئة 

رويدة: اثنينهن اشتغلن وسكتن 

هاجر: هاي شنو رويدة دتحجي مداعرفج

بيداء: اسمعن الحنه صارت حلووة ... لما دادي كريم ضل يحجي ومخلانة انباوع على حنة الولد

..... عززة هي كالت دادي كريم واحنه متنا من الضحك... هي تتموع بحلگها واحنه منطلقين نضحك ونحجي على خالي جان اتكول 

بيداء: باعوا هاي الاغنية تنطبق على خالي لأن خرب واهسنه ومخلانة انشوف حنة الولد 

هاجر: ولج اسكتي راح يسمعنا ... يا اغنية 

مريم: لزمت الخاشوگة وسوتها سماعة جان اتغني 

بيداء: طفاج القدر يا شمعتي ... خلاني اجر بحسرتي

شل ي ي ي 

هاجر: هااا دكملي شو علستي شبيج 

بيداء: ي ي ي ي ... خاليييييي هلاااا تعال محتاج شي

مريم: هي كالت خالي اندارينة اني وهاجر ورويدة ... وانشوف خالي كريم واكف بباب المطبخ ... عزززة بالكوة لازمين ضحكتنا ... جان ايرزلنا رزالة 

خالو كريم: بلا انتي متستحين كاعدة اتغنين وصوتج شعلوة ... وانتن بس تتمضحكن ... متكولن عيب منا الخطار 

بيداء: خالي غير عرس وفرحانين ... تشرب جاي 

مريم: خالي فر بايدة وطلع ... يمممممة انريد نسكت منگدر وهي اتكول 

بيداء: والله مو صوجكم ... صوجي داغنيلكم 

هاجر: خلي اتفيدج شمعتج... حصلتيلج رزالة 

..... الليل كلة كاعدين ضحك وسوالف لمة اتخبل كلها موجودة ....جان وحدة قريبة على امي كولش .... تخطبني من امي

بس امي كالعادة رفضت ... لأن قبلي خطبت هديل وهم مقبلت تنطي ... المرة زعلت كلتلها ليش كل ما اخطب منج متنطين ... بس همه بمنطقة كاعدين زراعية وعرب امي اتكول مدللات وين ايگدرن ايعيشن اهناك

واجه خالي جاسم على امي وحجه وياها..

خالي جاسم: علية ليش متنطين مريم هو هم شايفها ورايدها اجه حجه ويايه ... وشكو بيها مو غريب 

علية: جاسم كل عقلك شكد عمرها هي مريم حتى انطيها ...مازوج البنات هسه ابد خلي ايكملن ايشوفن 

خلي تجيهن قسمة زينة 

خالي جاسم: شنو اصغيرة حتى لو خطوبة .... زعلانة عليج ومقهورة اجتني اتكول ليش كل ما اخطب منها متنطيني شبيهم ولدي

علية: هذا الشي مابي زعل قابل اشيل واشمر ... سد هذا الموضوع جاسم مانطي اي ابنية هسه 

..... والله وامي سدت الموضوع صار توتر لأن كلنا مجتمعين والموضوع صار علني... بس العائلة كلها تعرف بنات علية مدللات متنطي .. بحيث الي ايريد يخطب بسرعة ايكول لا عيني علية متنطي

وفعلاً امي ياهو الي يجي ترفض ... گبل بدون اي مقدمات 

خلص العرس ورجعنا ... ورى فترة اجتي خاله كريمة علينا خطار بعدها علاقتها بامي نفس ماهي صديقات 

وهمه رجعوا من كركوك استقروا ببغداد 

مريم: هلووو خالتي شلونج ... بوستها

كريمة: هلوو حبيبتي خالة الحمدلله انتي شلونج 

هاجر: شو صارلج فترة ماكو خالة ... عمو ابراهيم شلونة 

كريمة: الحمدلله زين عمج هم الغدة متعبته يوم هيج ويوم هيج

مريم: سوت امي غدة وكعدنة اللتمينة وانسولف .. صار الليل وكلتلهم ...

مريم: خاله خاله سمعي بشرفج شوفي شتذكرت 

كريمة: ههههههه شتذكرتي خالة... سوالفج اعرفها ولج 

مريم: رويدة وهاجر ايباعن ينتظرني احجي ... تتذكرون من وكع ابراهيم وفقد الذاكرة... اني بس كلت هيج هاجر ورويدة طكنها بضحكة 

علية: ليش اتصيرين سخيفة... ماما هو هذا شي ايضحك 

كريمة: ولج ادبسز شذكرج واتضحكين عليه انوب غير راد ايموت

مريم: عززززة يمة بطني ... خالتي عليج الله طلعي ضحكتج ليش اتضحكين دفن بس كلتلها هيج ضحكت ....

هاجر: لا وكولساع ايگلها ... خاله اني منو ... خالة اني شسمي ... وخالتي اتگله يااااا سور سليمان عليك خالة انته ابراهيم ابن اختي 

مريم: اخخخخخخخ يمه حموووت ..... لا لا لا ومن ايگلها ... خالة اني شبيه هذا راسي ليش شادي 

ههههههههههههههههههههه

علية: والكعبة اذا اكوملجن دك بالصوندة ادبسزيات هذا الضحك على شنو

هاجر: ماما عليج الله هو ابنج بلا شي كوة صاحي انوب فقد الذاكرة 

كريمة: ولج الطجه ليسمعج ... سخيفة 

مريم: لا عفية متتت والله لا وابراهيم جلب كولساع يسألها ... خاله اني منو خاله اني شسمي ... وخالتي اتجاوبة 

هاجر: عوفونة من ابراهيم ...خالة تتذكرين من جنه نجيكم بكركوك ونگعد بالطرمة نتريك نلكاج غاسلة الكاشي وفارشة ومخلية صينية الريوك ... اللللله 

احلى ايام

كريمة: اخخخ يا خالة شلون ما اتذكر ... ومن تجي العربية اتجيب الروبة علمود امج اوصيها اتحبها

مريم: وبطالة الببسي الكزاز من اتجيبيلنه واتكولين .. مو اتكسرنهن كملن وودهن للدكان ... خالة اسواق اسمة دكان شنو.. 

كريمة: مو اسواق عيني ... اسمة دكان وبي كل الخير وين هسه الشي من نشتري منحس بي 

مريم: وبقينة نتذكر ومرة ننقهر ومرة نضحك.. هي هاي الدنيا ماكو شي بيها كامل لازم من تنطي شي تاخذ من عندنا شي... خالتي من جانت بكركوك هواي انروح ونبقى اسبوع لو اكثر.. والعطلة الصيفية نصها اهناك انخلصها 

ثاني يوم امي وخالتي وهاجر ورويدة راحو للدكتور خالتي عندها مراجعة مريضة ... اني بقيت نايمة مرحت... ابراهيم عندة بلبل ... نسيته ولا رحت شفته

كعدت من النوم رحت لكيت تمن ابيض بالجدر ومركة بامية خليت مركة فوك التمن واخذت الجدر 

شغلت التلفزيون على مسلسل التركي (ويبقى الحب)

وكعدت عالتخم والجدر بحضني

ومندمجه داباوع لهناك وكلت خلي انطي للبلبل تمن 

محد اكو الولد طالعين وامي وخالتي بعدهم مراجعين ...كمت للقفص شو هذا ماكو 

مريم: ياااااااا طاير البلبل عززززة شيخلصنا من ابراهيم ... افتريت الشقة كلها ادور عليه .. امشي واحجي الشباك مفتوح اكيد طاير وين الكا ... رجعت المكاني والصدمة الي ممتوقعتها

.....والگا البلبل ورة الكوشة الي منتجية عليها اني ... ومييييييت ....

عزززززززززة ..... شلتة وكبل للسنك اخلي مي فوكا اريدة ايعيش ماكو... وبقيت لازمة البلبل بيدي وابجي دموعي تنزل تنزل .... كاعدة وهو بيدي وابجي انفتحت الباب وفاتت هاجر 

هاجر: هاااااااا ولج شبييييييج ليش تبجين

مريم: انداريت عليها وشلته بيدي... اشهك واحجي 

والله والله مادري بي وراية وكعدت وجعصته 

كريمة: يا خالة اسم الله شو جيبي كومي دنيا غروب مو زين هاهيه الحمدلله شتسوين ... ومنو مطلعة من القفص 

علية: ادري انتي ثولة محسيتي شي وراج ... كومي غسلي كاعدة اتلطمين عبالي شوف شصايرلج .. وهذا شراح ايخلصنا من عندة شيسكته بلا 

مريم: اباوع على رويدة وهاجر كوة لازمات نفسهن من الضحكة .... واني اشهك وابجي بصوت وخالتي خطية اتسكت بيه 

كمت غسلت ... واجه ابراهيم بليل رحت كعدت يم امي .... ومكمت 

ابراهيم: هاي شنو ماما البلبل وين بس لا بعدكم محابسي 

علية: وانته ليش اتطلعة ومتحبسة شكم مرة كايلتلك ابقى يمة وحبسة

ابراهيم: نسيتة خابروني الولد عدنة لعبة ونزلت عالسريع ... شنو وينة لتكوليلي طار 

علية: جعصته مريم ...

مريم: هي امي كالت هيج لو احس بطني كامت توجعني .. باوع علية

ابراهيم: جعصتة شنو صدك تحجين مات يعني

علية: اي مات متدري بي ورة التخم وجعصته .. شسويلة الحمدلله

ابراهيم: هو موصوجكم صوجي اني الي اربي بلبل بالبيت ... ثولة غبية متحسين شي وراج شنو ماكو هيج شي ..

مريم: ولا جاوبت بس ابجي وكاعدة بضهر امي .. ضل يحجي وراح بس شنو ميته قهر عبالك كاتلة بشر مو حيوان... والله مادري بي مادري شلون انجعص

..... مرت الايام اجه شهر رمضان كاعدين ورى الفطور دنتفرج على قناة الشرقية برامج كوميدية 

على غفلة منشوف الا الباب انفتح وتدخل عمتي غصون راسها مشدود وشهد شايلة ضحى اختها وتبجي واية وراهن هم عيونها مدمعه

علية: ياااا شبيييج ولج هاي منو هيج مسوي بيج

مريم: كمت اخذت ضحى من شهد واباوع على عمتي والبنات حالتهم حالة

هاجر: عمتي شبيج تعالي كعدي شصاير منو جابكم

اية: علي الحقير ضرب امي وكتلنا ..وطلعنا بالشارع

هاجر: كسر بيدة كووون وانتن شبيجن مطاية مكدرتن وحدة منجن اتكتلة

شهد: شنكتلة كل عقلج ضرب امي بهاي العودة التنتل

هاجر: ابقي انتي مثل البومة بس تبجين

علية: سدي حلكج خلي نفتهم.. شنو غصون على شنو اتعاركتوا شلون بلا ايضل يومية ضاربج ضربة من الضربات اتموتين ترى

غصون: تعبت علية تعبت انعل ابو لابو الجابة .. حاط كورة وية كور البنات موتني ..ب١٠ بليل ايدز اية اتجيبلة جكاير .. والسرسرية تارسة الشارع احجي ويا ميفيد مليت ... كمت اغلط وهو هم يغلط ضربني اخذت البنات واجيت 

علية: وهاي يومية اتضلون صوتكم طالع بالشارع والعالم تتفرج عليكم متستحون شكبركم ... واحد يتجاوز عالثاني هو متصيرلة جارة شكم مرة صار ايعيدها شلون بهيج حالة

مريم: بقت امي اتسولف وتحجي بس هي هاي عمتي من يومها ماعندها حظ .. هذا زوجها الثاني هم طلع اتعس يومية مشاكل وهي موظفة والصرف كله عليها لو باقية بدون زواج احسن الها

هاجر: فاطرين لا.. لو بس مشاكل ملتهين 

اية: الجلب ايخلينة نفتهم استونة دنحط الفطور وهاج مثل الثور

مريم: اللسانج ولج هسه اتطلع حركتها بيج ... كوموا غسلوا يلا خلي انحمي الاكل حتى اتفطرون

....كمنة اني وهاجر حمينة الفطور لأن ما اكلنا هواي خلصناها عصاير ... سوينة صينية جبيرة وكعدنة ناكل ... بس عمتي تقهر والنبي راسها مخيط خطية

هاجر: اكووول عمة يعني انتي نيلز شصغرج مكدرتي اتجيتين علية واتخنگي

مريم: ضحكت اني والبنات هم انريد انغيرلهم جو شوية ... اي والله عمه شبيج هيج اتصيرين دجاجة انتي هم كتلي 

علية: اتمسلتن وتلغن هواي.. ولتدخلن كومن يلا ..صفن المطبخ مو الكا هوسة وسون جاي

مريم: هاي طردة بنزاكة علووش ..

كمنة سوينة جاي وحظرنة الغرفة النة وللبنات الصراحة انكيف من تجي عمتي علاقتنا قوية بيها فمتعلمين عليها دائما تزعل يمنا تبقى ٢٥ يوم مرات شهر وللأسف ترجع بعدين 

هاجر: بعد وكت للسحور ... خلي ناكل حب وموطة ... لل٢ نتسحر وانصلي وانام 

مريم: اي حركي روحج وروحي جيبيهن بالثلاجة 

شهد: اني اجيبهن ... اكعدن 

مريم: بلا انتي كعدي ابوية الله يرحمة جان ايكول 

صغير القوم خادمهم... انداريت على اية وكلتلها 

..... يلا عيوني كومي جيبي الموطة والحب ... اية عدنا اللسان ووكحة 

اية: والله لو هسه اتوذنن ما اكووم اشتغل عدجن شنو

مريم: راح اكوم اني اجيبها بس والله لو اتموتين متاكلين ديلا ... كمت رحت جبتهن وكل عقلي منطيتها ... ما اشوف الا العلاكة تنجر وتركض

اية: متنطيني مووو ... بسيطة 

مريم: احجي على كيف بس متحلفتلها ... ولج اية ايه اموتج جيبي العلاكة تطفر مثل القرد بالغرفة واني اركض وراها ... امي وعمتي نايمات

هاجر: لج اية اذا اكوم امرعدج جيبي دناكل اني انطيج معليج بمريم ..

مريم:الجبانة راحت الهاجر ...فتحت العلاكة هاجر وزعتلنا بقينا نتفرج وانسولف بين ميصير السحور 

عمتي بقت يمنا تقريباً النص رمضان واتصالحت وية زوجها وراحت ... 

مرت الاشهر وصرنا بالشتاء... بسبب روحتنا السوريا تركنا سنة اني وهاجر ومن رجعنا عدناها للسنة 

فكاعد نقرأ بالغرفة اني وياها ونسمع امي تحجي

علية: هلا ماما الحمدلله انتي شلونج ..مرحتي للدكتورة ... اي وشكالتلج 

هاجر: امج كاعدة على اعصابها لأن هديل لحد الان محملت من طرحت والي هسه 

مريم: اي صدوك صارلها هواي تقريباً راح ايصير سنة شو صار عندها بسرعة ومن وكع بعد مصار 

هاجر: شمدريني كومي خلي انشوف امي بلا ... بليل انراجع وانام 

مريم: رحنا يم امي ونسمعها اتسولف شو على غفلة وكالت

علية: ياااا هديل تحجين صدك ... اتأكدتي يعني 

اي صلوات صلوات ... دير بالج تتحركين هالمرة اركدي خلي الطفل يثبت مصدكنا صار عندج

مريم: ها ماما شنو حامل ... ماما حامل هديل ... غير تحجي ماما شبييج 

علية: اوكفييييي دصبري مو كاعدة احجي شبيج اتلبگين اصبري شوية 

هاجر: الا تترزلين اصبري خلي نفتهم ... وبعدين من دتكلها اركدي مبينة اختج حامل

مريم: سدتة امي والله وصدك هديل حامل بعد عناء طويل بالنسبة لأمي تحسبلها يوم يوم

هاجر: مريم حظري الجدول مالتج ..مو الصبح تتذكرين اتحظري 

مريم: حظرتة ..شو الغرفة ثلج اليوم خرب ... كمت شغلت الصوبة الكهربائية وسديت الباب ... عندي من هذا الهتفون الالوان ويا سماعه عالبلوتوث احمل بي اغاني

طلعت اغنية حسام هالايام ... وكعدت اسمع بيها 

هاجر: هالايام هواي انسى 

عمري ضايع ما احسة 

جانت الايام حلوة 

كبل وين ..ووين هسه 

جنة من نضحك سوية 

وبالحزن تبجي علية 

مريم: يمعووووودة اطفي اطفي ... يلا خلي اطفي وانتي غني بدال حسام 

هاجر: گبر شبيج مو مسلطنة ..سماعاتج عالية اني شعلية 

مريم:دنامي حتى الاغنية راح اطفيها بطلت ... خلي انام شيكعدنا الصبح ... اني وهاجر من احنه صغار نتشارك بكلشي حتى بالنومة سوة بنفس الغرفة

وهي تعرف كلشي عني واني اعرف كلشي عليها 

وباالمدرسة هم صديقاتنا مشتركات ... مرت الأشهر 

وامي كامت تتعب على غفلة تتمرض اتروح اتراجع 

ينطوها علاج ميفيد

هاجر: ماما مرحتي الدكتورتج مو عندج مراجعه يمها 

علية: خلي استلم التقاعد مال ابوج واروح ... كومة يراد تحاليل ودوة ونفس الشي ميفيد معدتي توجعني 

مريم: وجهج اصفر هم .. منتبها عليه صارلي يومين 

لأن اتقيئين يمكن

علية:اي ماما من ورى قالوني يوجعني وماكدر اكل

مريم: اجتي هديل خطار يمنة داخلة بشهرها الثامن ... وامي دتجهزلها حتى جرباية للطفل جبيرة ووحدة هزاز كاملة جبناها من سوك البياع ... كلشي اشترتلها ... بيها ابنية هديل 

مرت الأيام عادية ماكو شي بيها جديد بس الجديد هديل خابرت على امي وگلتلها 

هديل: هلو ماما رحت للدكتورة وحددتلي موعد للعملية ..كالت متجيبين طبيعي.......