رواية جذبني فمك البني الفصل الثالث عشر 13 بقلم عبير إدريس

مريم : لا والله بابا كال..

باوعت لعمه ابتسمت بتعب...

ياسة : كومي حبيبتي هسه يجون روحي شمي هوة صارلج هواي مطالعه..

سيلين : ماشي..

كمت دخلت جوة لبست بنطرون وضليت بتيشيرت البيت لبست فوكاه ترواكه خفيفه كلش جان بدايه شهر الثالث بس اني من النوع ابرد ما اتحمل..

طلعت لازمه مريم بيدي اشرتلهم باي وطلعنه اول مافتحت باب البيت باوعلي عمو عقج حاجبه ورجع دار وجها باوع ليكدام رحت فتحت الباب الاماميه صعدت مريم توني اسد الباب حتى اصعد ليورة كال..

ادهم : صعدي يمها وخليها بحضنح..

هزيت راسي ب اي نزلتها صعدت ورجعت كعدتها بحضني مشت السيارة ومريم تسولف وهو يجاوبها عفيه خلك ميفوت سؤال ويجاوب اجوبه احسها تنمي شخصيه الطفل كأنما

ادهم : من يصير عمرج تسع سنوات احجبج..

مريم : بس اني احب شعري طالع حلو البس قراصات..

ادهم : كلشي حلو بحياتنه لازم نحافظ عليه ولان شعرج حلو ضميه لليستاهلج ميصير الناس الغربه تشوف شعرج..

مريم : ي

عني حتى البنات..

رجع جايب كم شغله فتح الجنطه خلاهن بيها واجه صعد..

مريم : بابا تأخرت شوكت تشتريلي لعبه تره مفتنت..

جان يشغل بالسياره باوعلها مصدوم ورجع باوعلي اني غلست سويت روحي ممنتبهة عليهم ضليت اباوع من الجامه وصلنه يم محل يبيع العاب.. صف السياره والتفتلي..

ادهم : تنزلين ويانه..

سيلين : لا مابيه حيل..

ادهم : جبتج حتى تغيرين جو وتنسين الخرعه ..

سيلين : غيرت جو مو اله انزل من السياره.

ادهم : براحتج..

نزل واني فتحت الباب لمريم نزلت واجه اخذها لزمها من ايدها وراحو لمحل الالعاب ، ضليت اباوع شلون ملاعيب حلوة لعبه احلا من الثانيه عيني اجتي على لعابه كلش عجبتني عيوني نطت عليها بسرعه تذكرت اللعابه الجابها بابا جانت نايلون وشكد فرحنه بيها بوقتها يمكن لو جايبلي من هاي جان وكف كلبي ، صوته قطع صفنتي ..

ادهم : ياهو عجبتج هاي لو هاي ..

باوعت عليه شايل لعابتين وحده احلا من الثانيه..

ضحكت وغرغرت عيوني بالدموع..

سيلين : شمدريك عجبتني..

ادهم : معليج شمدريني جاوبني هاي لو هاي ..

اشرت على وحده خلاها بحضني شكبرها والثانيه فتح الباب الوره خلاها على الكشن ورجع للمحل ومريومه بعدها ممختاره..

ماعرف ليش حسيت اتجاها احساس ابوي حسيته والدي حتى خوفه عليه وعلى اختي نصائحه النه رغم مصار هواي من رجع بس ويانه ويانه كاعد يقوم سلوكنه بطريقه حلو ومتجرح بس مشكلتي اني حساسه زياده عن اللزوم ...

اجوي ومريم متبين من الالعاب الشايلتها ..

اخذ منها الالعاب خلاهن ليوره ونطيته اللعابه مالتي هم خلاها يمهن وصعد مريم كعدت بحضني..

رجعنه الطريق كله ساكتين وصلنه صف السياره ونزلنه اني و مريم نتسابق ناخذ العابنه هيه اخذت العابها واني اخذت لعابتي ولعابه ايفين ..اللي يشوفني ميكول عمرها عشرين سنه ..

دخلنه للبيت الحديقه فارغه داخلين جوة يمكن برد الجو لان الدنيا غوربت دخلت كبل لغرفه عمه لكيتها متمدده ويمهة ايفين نطيتها لعابتها اخذتها وضحكت ..

ايفين : هاي الي..

سيلين : اي عمو جابها..

ايفين : صدك يعني الي..

سيلين : شبيج الج الج هههه..

فرحت بيها كلش وفرحتها نستني زعلي منها وبنفس الوقت حسيت عمو راد يفرحها وهاي اللعابه جانت بمثابه تطيب خاطر الها ..

انداريت على عمه ياسه عيونها مدمعه..

سيلين : شفتي عمه بنات اخوج رجعن صغار..

ياسة : الله يجازيها لامج الجانت تصرف بس على نفسها وملذاتها معرفت بيوم تعوف نفسها وتشريلكم لعبه تفرحكم بيها لو ملابس..

جريت نفس..

سيلين : عمه البلكلب بالكلب ماريد اطلعه خليني ساكته..

ياسه : سكتي احسن لان اني هم انقهر لعد وين مريم..

سيلين : هيه وعمو بسطو بنص الهول..

ياسة : صيحيها اريد اشوف شنو جابت..

رحت صحتها عمو ادهم رفع راسه وكال...

ادهم :هسه نجي اخذي راحتج..

سيلين : تمام ...

رحت لغرفتي نيمت لعابتي على الجربايه وبدلت ملابسي ورحت للمطبخ اسوي عشا ..

طلعت لحم مثروم حتى اسوي كباب وطلعت عدس اسوي شوربه بعدني اباوع بالثلاجه شطلع سمعت صوته ورايه..

ادهم : معلاك جبت بالمجمده واكو همبركر هم اذا تحبين سوي..

سيلين : يعني اضم الاكل الطلعته..

ادهم : براحتج سوي اليعجبج بس وياه نشوي معلاك علمود ياسه..

سيلين : ماشي ..

ادهم : اصلي واجي اساعدج..

طبيت بنص هدومي من هيج كال..

سيلين : لا عمو وحدي اسوي شعندي بسرعه اكمل..

مجاوبني فات للحمام توضى وراح يصلي الحمام قريب على المطبخ ...

طلعت المعلاك خليته بطاسه وفتحت البوري عليه علمود يحل وخليت الطاوه على النار وبلشت اكلي ، كملت البورك وكليت الطماطه ، داسوي بالزلاطه اجه..

رفعت راسي شفته مشله ردنه واتجه للسنك اخذ السجينه والتخته وبلش يكصكص بيه..

سيلين : قبل الله..

ادهم : منا ومنكم ..

سيلين : عمو اني اسوي ليش جيت..

ادهم : تره اعرف مو عبالج..

سيلين : بس اني داسوي ليش تعب نفسك وتزفر ايدك..

التفتلي.

ادهم : اربع سنوات عشت وحدي وجنت اخدم نفسي بنفسي يعني عادي اذا سويت اكل لزوجتي مابيها شي..

سيلين : براحتك..

سكتت ورجعت اثرم ، هدوء بس صوت طكه السجاجين بالتخته هم اني اثرم وهم هو....

شوه المعلاك واني حض

رت الصينيه رتبت بيها الاكل كمل شوي فرغ المعلاك من الشياش خلاهن بماعون وجواهن خبز عيني تفتر على خفه ايده شلون يتحرك ويشتغل.

سيلين : مو هواي سويت..

ادهم : سويت للكل لو ناس تاكل وناس تشتم الريحه..

ضحكت ...

ادهم : ضحكه خير ان شاءالله ..

حجاها وملامحه نفسهة لا ضحك لا ابتسم شكله جدي كلش..

سكتت اخذ الصينيه واني اخذت الخبز ورحت وراه خله الاكل على الطبله وكعد بصف عمه واني رحت صحت ايفين وجبت كراسي ثنين الي ولمريم واجتي ايفين جابت كرسي الها كعدنه ناكل تذكرت ايمن..

سيلين : ايمن وين علمود ادزله اكل..

ادهم : يتأخر احتمال يتعشى بره ..

حجاها وسوه لفه لعمه وخلاها بيدها تاكل على كيفها وهو يضل منتظر شوكت تكمل علمود ينطيها الثانيه.

ياسة : اكل انت هم..

ادهم : معليج مني كملي وبعدين اكل..

تعشينه وشلت المواعين رحت غسلتهن ورجعت لغرفتهم لكيتهم سادين الباب رحت لغرفتي علكت التلفزيون وتمددت ..

ضليت متمدده لحد ما نمت ثاني يوم الصبح كعدت على صوت هوسه وحجي هاي شنو منو جاي..

كمت طلعت لاكتني ايفين الوجه احمر وفرحانه ..

سيلين : شكو خير..

ايفين : ولج هذا شنو فهد اله يطك بالكاع..

سيلين : عزة بعينج يافهد هذا..

ايفين : اخو عمو ادهم ولج نسخه مستنخسه منه بس الفرق هذا مبين عصبي من فات لسه مغضب ..

سيلين : ليش شوكت كعدتي حتى من فات لسه.

ايفين : ولج اجوي من السبعه وجانو بره يتريكون وانتي نايمه..

سيلين : وشكعدج من السبعه..

ايفين : كعدت على صوتهم ..

سيلين : واني شلون مكعدت عجيب..

ايفين : شمدريني المهم معلينه هذا فهد يخبل شلون بيه..

سيلين : باعي اذا سويتي شي العب بيج طوووووبه خوش..

ايفين : خوووش خوووش..

عفتها وطلعت تذكرت سالفه الحجاب طبيت يم عمه حتى اخذ منها شال لكيت يمها مره جبيره وبنات ثنين مشافيتهم سلمت ورحت فتحت الكنتور اخذت شال وطلعت رحت للمطبخ غسلت المواعين مال ريوك وحميت الجاي فات واحد للمطبخ كال السلام عليكم..

التفتت باوعت هذا صدك يشبه عمو ادهم بس طبره بحاجبه واضخم بعد..

ارتبكت معرفت حتى اجاوبه..

فهد : شنو انتي خرسه ؟

سيلين : نعم..

فهد : لا الحمد لله طلعتي تحجين ..

بهاي الاثناء دخل عمو ادهم باوعلي ابتسم عرفت على الشال اشرلي بصبعه يعني اوك او عاشت ايدج..

فهد : ذني منين جايبهن متكلي عبالك شاشه hd من الوضوح..

ادهم : بنات وضاح شبيك..

فهد : وضاح اخو ياسه..

ادهم : اي الله يرحمه..

فهد : الف رحمه ونور تنزل على قبره على هالخلفه هاي..

ضربه على كتفه شاوره وطلعو وفهد ضل كاسر ركبته عليه لحد ما اختفو من كدامي..

أصعب الألم.. أن ترسم الضحكة على شفاهك وداخلك ينتحب و أن تجامل من حولك بالفرح والحزن يبني حضاره في صدرك ....

___________

طلعو من المطبخ واني رجعت اكمل غسل مواعين نظفت المطبخ اجتي الحجيه الجانت يم عمه..

ام ادهم : انتي سيلين مو ؟

التفتت عليها ابتسمت ..

سيلين : اي خاله..

ام ادهم : اي ماشاءالله صايرات نسوان ..

ضحكت ..

سيلين : كلكم تفاجأتو من شفتونه ..

ام ادهم : مو تغييير قوي ، امج شلونها وينها ما شفتها..

ضليت اتبلعم شنو ميدرون احنه هنا باقين لو خاف عدهم خبر عمه كايلتلهم ، حرت شنو اجاوب كلت اسكت احسن..

ام ادهم : شنو امج مجايه وياكم..

سيلين : لحظه خاله بس اروح لعمه يمكن صاحتني..

ام ادهم : بس ما سمعتها صاحت.

سيلين: لا صاحت هسه اجي..

رحت اركض لغرفه عمه فتت جفت لكيتها بحضن عمو نايمه ضربت كصتي حيل ردت اطلع صاحني عمو التفتت عليه..

همس ببرود ..

ادهم : محتاجه شي؟

سيلين : بس هذا شسمه ..

ادهم : شنو احجي .

سيلين : ردت اسأل عمه بس لكيتها نايمه.

ادهم : بخصوص؟

سيلين : امك سألتني على ماما واني ماعرف انتو شنو مفهميها لهذا معرفت شجاوبها..

ابتسم وهز راسه

ادهم : الحجيه سألتني وسألت ياسه ورجعت تتأكد منج كليلها احنه باقين هنا لان عمه ياسة محتاجتنه فضت راحت .

سيلين : وعلى ماما شكول؟..

ادهم : كليلها تجينه بين فتره وفتره تشوف عمه وتسأل علينه وتروح..

سيلين : ها شكرا واسفه عمو لان دخلت بدون ما ادك الباب عبالي انت ماموجود..

محجه شي ردت اطلع صاح..

ادهم : سيلين..

التفتت

سيلين : نعم..

ادهم : حلو الحجاب عليج.

سيلين : شكرا..

ابتسمت وطلعت سديت الباب ورحت للمطبخ لكيتها رايحه وين ماعرف تنفست الصعداء ...

باوعت اكو سمج ني على الميز يمكن اليوم يشوون سمج على الغده بس وين بره هنا ، المن اسأل علمود اسويه توني فتحت الثلاجه اريد اشرب مي سمعت صوت واحد يتحمحم ورايه التفتت لكيته فهد هذا اليوم حالف ميعوفني..

سيلين : محتاج شي؟

فهد : لا بس ضوجه وين اروح كلت اجي يمج..

همست..

سيلين : شهالميانه..

فهد : نعم ؟

سيلين : شربت مي وكلت الحمدلله..

فهد : ها بالعافيه.

مجاوبته اخذت وحده من السمجات وخليتها جوة المي غسلتها وخليتها بالمصفي ملحتها واخذت الثانيه وهكذا لحد اخر وحده ، اجه وكف يمي قريب كلش بينه شبرين..اني ابتعدت ليغاد .

فهد : شو باعيلي..

رفعت وجهي مستغربه جرئته..

سيلين : شكو؟

فهد : شنو انتي حولة ؟

من كال هيج اجتني الضحكه شكله يضحك مو مال تصنيف ابد..

ابتسم وكال..

فهد : تدوم تدوم ان شاءالله.

كحيت وسكتت..

فهد: مكتيلي عندج حول ولادي..

رجعت ضحكت..

هو يباوع لوجهي مركز شكد صلف..

سيلين : انت شبيك فايت حامي ساعه خرسه ساعه حوله شسالفه.

فهد : ماعرف والله بس اكو خلل بعيونج ماعرف لان كبار مدري لان السواد جبير لو نعسانه مطفيه شنو منايمه زين تسهرين هواي.

سيلين : شنو انت هم تدرس علم نفس؟

ضحك..

فهد : لا عيني هذا اختصاص عمج الله يبعدنا بس ليش سألتي.

سيلين : مو كاعد تحجي حسب الملامح وبكيفك تستنتج.

فهد : لا بس اكو شي غريب بعينج وصار عندي فضول اسأل..

سيلين : هاي يسموها العيون الناعسه ولان بؤبؤ عيني كبير يبين عندي حول بس اني ماعندي كل ما بالامر السواد اكبر من البياض..

فهد : بس سبحان الله شكد حلو اول مره اشوف هيج شي..

سكتت رجعت اشتغل والصراحه ضجت لان نطيته عين بس هو اسلوبه يضحك..

راح فتح الثلاجه ومدري شطلع اسمعه بس ناطيته ضهري..

لهناك اجه ادهم فات..

ادهم : ها سيلين شو انتي دتشوين..

التفتت عليه لكيته يباوع على فهد وخازره وذاك يضحك..

ادهم : روح لأبوي يدور عليك.

فهد : خوما صاحوني بسماعه الجامع..

ادهم : شو تستهزء انت..

فهد : غير انت تكول ابوك يدورك شنو ضايع ويدورني..

ادهم : يسأل عليك عمي غلطنه ميصير..

فهد : دكتور وتغلط شخليت النه لعد..

ادهم : يلا تيسر ولتضل تحومي على السمج..

فهد : تعرف بيه احب السمج.

ادهم : اي ادري بيك ..

الغاز بينهم بس عرفت يقصدوني..

طلع فهد واجه ادهم يمي..

ادهم : علكتي الفرن..

سيلين : لا ماعرف..

ادهم : لعد شلون جنتو تشوون من جنت مسافر..

سيلين : اصيح ايمن يعلكه لان اخاف منه..

ادهم : ها ماشي انطيني الجداحه..

نطيته الجداحه وراح علكه.

ادهم : علكت الجوه ومن تستوي صيحيني اعلك الفوك.

سيلين : اوك.

ادهم : محتاجه شي وين البنات ليش وحدج تشتغلين..

سيلين : ماعرف مشفتهم اصلا.

سكت وطلع من المطبخ وره شويه رجع..

ادهم : رايحين ويه الوالده للكاظم يزورون ...

سيلين : اي براحتهم..

هز راسه و طلع من المطبخ واني رجعت اشتغل نكعت تمن كلت اسوي تمن احمر وشعريه واشوف شنو بعد ..

اجتي ايفين للمطبخ هيه وتراكسودها والشعر يتطاير..خزرتها..

سيلين : شنو هذا لبسج خرب بيج..

ايفين : شكو اول مره تشوفيني هيج لابسه..

سيلين: تره عدنه خطار مو وحدنه بلبيت وابنهم عيونه زايغه شويه ثكلي لتجيبيلي حجاي

ه اني مناقصه..

ايفين : اني صوجي جيت اساعدج..

سيلين: ماريد تساعدين روحي رجعي لغرفتج وممنوع تطلعين منها.

ايفين : اي اي ..

عوجت حلكها وراحت ميعجبها من احجي وياها ...

جريت نفس ورجعت اشتغل ، كملت كم شغله ورحت لعمه دكيت الباب صاحت تعاي..

سيلين : ها عمه تاكلين ويانه لو اسويلج غير شي..

ياسة : قطعه سمج صغيره وهاهيه..

سيلين : ها خوش.

ياسة : تعاي اكلج..

رحت يمها..

سيلين : ها عمه..

ياسه : عينج على اختج من فهد تره هذا طبعه شلايتي لا مثل ادهم ولا ايمن يختلف ابن سوك وكضه عمره عايش باللواته واحد مينغلب ابد ولا ينعرف بشنو يفكر فديري بالج عليها واني اعرف بيج شنو لهذا ميحتاج اوصيج..

سيلين : اي عمه مبين بدون متحجين..

ياسه : كم يوم ويرحون بهاي الايام شويه راح تتقيدون..

سيلين : عادي عمه بيت ابنهم واذا بقو احنه نلتزم..

ياسة : فدوة لعقلج لو تدرين ادهم شكد يمدح بيج يكول كلش مؤدبه وحبابه..

سيلين : شكرا ههه..

ياسه : هههه قابل اني كلت هو كال..

سيلين : اي عود انتي كليله سيلين تكول شكرا.

ياسه : ماشي..

سيلين : وين مريم اليوم لا ريكتها لا سبحتها.

ياسة : اخذنها عماتها وياهن وراحن يزورن..

سيلين : شلون بيهم حيل جايين من طريق بعيد ويطلعون.

ياسة : قويات مو مثلنه بس شكل نتعب بساع هههه..

سيلين : هم صدك.

ضليت كاعده يمها شويه وكمت طلعت رحت للمطبخ اشوف الاكل اجه ايمن طب للمطبخ باوعتله شايل سله مليانه ملابس..

سيلين : شنو ذني وصخات؟؟

ايمن : لا عيني عمج سفرني..

سيلين : عمو ادهم..

ايمن : اي ..

سيلين : شلون سفرك..

ايمن: كلي طلع كل غراضك وشنو تحتاج وانزل بغرفه البنات وهنه يصعدن بدالك بين ما اهلي يرجعون..

سيلين : هاا يعني هسه احنه نروح بالسويت مالتك

ايمن : عليج نور...

سيلين : وشوكت نروح.

ايمن : هسه .

سيلين : مو كاعد اسوي بالغده..

ايمن : معليه هاي تعاليم عمج كومي يلا طبقيها بحذافيرها..

سيلين : ههههه يلا رايحه..

رحت لغرفتنه لكيت ايفين كاعده..

سيلين : كومي طلعي ملابسج.

ايفين : لش؟

سيلين : بلا ليش بعدين افهمج يلا كومي..

كامت تطلع بالهدوم وتأفأف.

سيلين : افونه حبيبتي ليش تضوجين من احجي وياج..

ايفين: مادري مرات تحجين بنتر

سيلين : والله تعبانه يعني متعرفيني شكد احبج ..

ايفين : العفو خاف ضوجتج..

كمت حضنتها وهيه هم مدت ايدها حاوطتني وحضنتني.

سيلين : عمو يكول كعدو بمكان ايمن بين ميروحون اهله..

ايفين : اي ماشي..

اخذنه ملابسنه وطلعنه لكيت ايمن واكف بره الغرفه..

ايمن : ادري سفره عدكم اخذو كم قطعه مطلعين الكنتور كله شنو..

سيلين : ايمن لتخبلني انت كلت طلعو ملابسكم..

ايمن : اي بس ماكلت كلهن وبعدين تره همه يومين بالزايد رايحين يعني ميحتاج هلكد ملابس اله اذا ناوين تاخذون مكاني للأبد..

سيلين : والله صح كلامك احنه شبينه اخذنه هلكد لحظه ارجعهن واخذ كم قطعه..

ايمن : تعاي تعاي هم اكعد انتظر بعد ايدي راحت.

سيلين : وانت شكو واكف بالباب وشايلهن تعال خليهن هنا واني راح اخلي ملابسنه هيج بعدين اسفطهن ..

ايمن : يلا بسرعه عندي كومه شغل اريد وحده تجي ويايه..

سيلين : وين؟

ايمن: اجيب كم شغله من السوبر ماركت عمج رادهن..

سيلين : نروح اني وياك مثل كل مره نجيب بسرعه ونرجع وهم محتاجه شغلات لعمه ..

ايمن : يلا بسرعه لتتأخرين..

سيلين : ماشي.

اخذت كم قطعه وطلعنه صعدنه فوك للسويت مال ايمن جان الباب مفتوح دخلنه ملابسنه واني بدلت لبست بلوز على البنطرون بس شويه بيه طول يعني يستر ولفيت الشال على راسي ونزلت لكيت ايمن واكف بالطرمه ويمه فهد.

سيلين : كملت..

ايمن : يلا نروح..

فهد : وين رايحين.

ايمن : للسوبر ماركت نجيب كم شغله وصاني ادهم عليها وهيه تجيب لياسة..

فهد : خوش لعد اجي وياكم ضايج..

ايمن : امشي يلا..

طلعنه همه صعدو ليكدام توني اريد اصعد سمعت صوت باب البيت انفتح التفتت ادهم واكف بالباب ومغضب ..

ادهم : ايمن انزل رايدك بشغله وفهد تعال انت هم..

نزلو راحو يمه ماعرف شنو حجه وياهم واجه يمي همس ..

ادهم : صعدي ليكدام ..

رحت صعدت وهو صعد انداريت باوعتهم ثنينهم واكفين بالباب وعينهم علينه ماعرف خجلت حسيت فشلهم او عرفو لان اني وياهم نزلهم ..

مشى بالسيارة ويباوع ليكدام بنضرات شروود حسيته مختنك كوة يجر النفس بس ماعرف السبب ، ابتعدنه عن البيت صف السياره والتفتلي..باوعلي بنظره فسرتها عتب ماعرف بعد جر نفس وزفره غمض عينه وكال..

ادهم : شدتسوين بنفسج؟

سيلين : اني..

ادهم : اي انتي..

حجاها وفتح عينه يباوعلي ضايج..

جنت مبتسمه وتلاشت ابتسامتي كتله .

سيلين : ليش شسويت..

ادهم : انه كوه ابعدكم عن اخوي وانتي برجلج ترحين وياه شسالفة..

سألته بفضول؟

سيلين : شيريد مني يعني اريد اعرف ليش لزكلي من اجه ليهسه يعني اني وايمن على طول نطلع نتسوك ليش راد يجي ويانه .

جاوبني بتعب ومضيق عينه..

ادهم : باعي انه ماحب احجي عن واحد يخصني او فرد من افرد عائلتي بسوء بس اللي اريد ا

وصله الج فهد انسان مو سهل تركيبته صعبه مستحيل تفهميها لهذا اريدج حذره طول الوقت هم انتي وهم اختج وارجع واكول خوفي عليكم من باب الحرص لان انتو بيتي مو غير شي..

سيلين : اعرف عمو اني هم مو سهله من هاي الناحيه يعني اعرف ارده بالوقت المناسب .

ادهم : صح كلامج بس اخوي مو سهل..

سيلين : هسه شنو نضل فوك يعني مننزل بعد ..

ادهم : لا لتنزلون اله انه اصيحلكم بوكت هو ما موجود والاكل انه ادزلكم بيد ايمن .

سيلين : هذا هو متفقين..

هز راسه ورجع شغل السياره ورحنه للسوبر ماركت مقبل انزل هو راح جاب الشغلات لان هو وصه ايمن عليهن يعني حافظهن...

اجه خلاهن بالجنطه مال سياره واجه وكف يم الجامه مالتي دكها فتحتها دنك ونزع النظاره..

خرب انه شكد حلو من قريب دوخر ليغاد استغفر الله

..

ابتعدت اني بالكرسي وحاجيته

سيلين : ها عمو..

ادهم : شنو وصتج ياسة

عددتله وهو عاقج حاجبه ويستمع ماعرف حسيته حس بارتباكي لان احجي ونضرته تحسسني يعني شكو شبيج ماعرف انسان غريب ، راح بلعت ريكي نشف ، بهذل احوالي مو قصه اعجاب وانما القرب وترني بحيث خجلت كلش ...

راح جاب الغراض واجه صعد خلاهن على الكشن ليوره وساق رجعنه للبيت ردت انزل التفت عليه وكال..

ادهم : بس اليوم نفض الغده وباقي الايام البنات يستلمون عنج..

سيلين : هذا هو..

نزلت وفتت للبيت وهو هم نزل صاح ايمن كله نزل الغراض ، رحت للحمام غسلت ايدي ورحت للمطبخ حضرت زلاطه وطلعت طرشي وخضورات وبصل كلبت التمن مستوي طفيته اجه عمو ادهم ..

ادهم : كلشي تمام محتاجه شي..

سيلين : لا كملت راح اصعد فوك وانتو تغدو..

ادهم : عاشت ايدج..

سيلين : عود صب لعمه وتغدو سوه خطيه متشتهي وحدها تاكل..

ادهم : ولا انه المشتهي...

سيلين : ليش هذا اكل خير من الله خاف ميعجبك اسوي شي ثاني.

ادهم: كلشي حاضر وموجود اله الشهيه يعني الخلل مو بالاكل بالنفسيه .

سيلين : براحتك..

سكتت ورحت لبيت ايمن دخلت لكيت ايفين بغرفته فاتحه الكنتور واكفه مدري شدتسوي شافتني انهبطت سدته وكالت..

ايفين : شوكت صعدتي محسيت بيج..

سيلين : ليش فاتحه كنتور الولد

ايفين : ردت اخلي ملابسي بخانه من الخانات بس متروس ملابس..

سيلين : هاا عوفي الكنتور معليج بيه وخلي ملابسج بأي مكان عيب من الولد..

ايفين : اي هسه اخليهن هنا..

سيلين : شبيج مرتبكه..

ايفين : مابيه بس اخترعت لان طبيتي غفل..

سيلين : راح افوت اسبح واذا اجه ايمن جاب الغده اخذيه وانتي ساكته بدون دك سوالف..

ايفين : اي يمعوده..

عفتها ورحت سبحت طلعت لكيت الغده مصعديه كعدنه نتغده وراها نمت وهيه ماعرف وين راحت كعدت جانت دنيا العصر كمت نظفت الهول والغرفه صح نظيفات بس تنظيف شاب يختلف عن البنيه..للمغرب كملت كلشي خابرت على عمه جاوبت..

سيلين : هلو عمه شلونج.

ادهم : هلو سيلين عمتج نايمه..

سيلين : شبيها ليش صايره هواي تنام..

ادهم : ماعرف اريد اخذها للدكتور وضعها ابد ماعاجبني.

سيلين : زين مريم اكلت تحتاج شي..

ادهم: لا عمتها يمها ليضل بالج اذا احتاجيت شي انه اخابر

سيلين : تمام يلا اخذ راحتك..

ادهم : هله بيج..

سديته وكعدت اتفرج على التلفزيون صارت ساعه ثمانيه ونص ، اباوع على الوكت ميمشي طكت روحي..

وره شويه دخلت للحمام طلعت لكيت الهول اظلم ردت اعلك الضوه صاحت ايفين طفيه..

سيلين : ليش اطفيه وانتي وين.

طلعت من وره البرده واجتتي..

ايفين : تعالي سمعي الله عليج..

سيلين : شسمع..

ايفين : باعي هنا فهد وايمن واكفين ديحجون وكلشي ينسمع تعاي شوفي شنو يكولون..

سيلين : وانتي شعليج بيهم شيحجون خل يحجون متجوزين انتي..

ايفين : حتى اذا جان محور الحديث يخصنه هم متسمعين..

سيلين : يخصنه احنه شكو..

ايفين : تعاي واسمعي.

سيلين : وانتي شلون تسمعيهم واحنه فوك وهمه جوه..

ايفين : لج واكفين يم الدرج واني فتحت الشباك وسديت البرده والضوه علمود ما ابين دتعاي راح يرحون وانتي مخليتينه كلشي نسمع..

سيلين : امشي خل اشوف شكو..

وكفت وره البرده وقربت اذني وبديت اسمع..

فهد : شفته اخوك شلون ضمهن لبنات وضاح شنو يخاف من عدنه ..

ايمن : مو انت مشهودتلك اذا خليت وحده ابالك تجيبها تجيبها وذني امانه يم ادهم لهذا يخاف عليهن هواي ..

فهد : ههههه ضحكتني امانه شنو بابا هذا راسم على وحده منهن وكول كال فهد..

ايمن : انجب لك متعرف ادهم شلون يموت على ياسه..

فهد : ياياسة هيه شضال بيها ياسة تأهلت دتلعب على النهائي ..

ايمن : لا يانذل استغفر الله لك حرام عليك خرب بيومك لتضحكني لا الله يبلينه بنفس المرض..

فهد : ادري قابل كفرت لو اليحجي الحق تضوجون منه ..

ايمن : انت ليش مغثوث.

فهد : مو هذا اخوك الارعن حرم عيوني من النضر للوجه الحسن..

ايمن : تموت على الوجه الحسن.

فهد : اي بالله لك ذني يخبلن ..

ايمن : كرديات بعد شلون ميصيرن حلوات..

فهد : لعد هذا صاحبي ليش يكول يكبرن بساع ومحلوات ابن القندره طلع فلا عنده ذوق.

ايمن : ليش محلوات هاي مو ياسه تخبل..

فهد : هم كال يا

سه ولك وين الياس متكلي ضال بس العود مالها..

ايمن : لك حرام تستهزء بالمرض كافي..

فهد : والله كتلتني انت واخوك بالحرام والحلال عود اترحل لجهنم يامحلاها ويه هيفاء وهبي وجماعتها شعندي مكابلك ومكابل ادهم بالجنه واكيد امي وابويه وياكم انه ماعولت اخلص منكم هنا دور الكاكم فوك ...

ايمن : خلف الله عليك وامشي نام تره مينزلن ايس..

فهد : اي عمو ادهم دكلهن طابع بعد شينزلهن لو يجي الخضر مينزلن..

ايمن : استغفر الله لك شبيك بابا..

فهد : ها شكلت كل شويه مستغفر محسسني بليس كاعد يمك..

ايمن : دكوم خل نام تره نعست.

فهد : انه انام بجربايه سيلين.

ايمن: هههههه لك بابا شبيك مشايف نسوان..

فهد : مثلها حوله وحلوه مشايف..

ايمن : ههههههههه ولك منين حوله ..

فهد : شمدريني يسموها ديره حسن مدري حول ماعرف المهم بيها هيج ميزه..

ايمن : والله مابيها انت تشوف بخشمك..

فهد : المهم انه انام بجربايتها..

سيلين : عيع يانذل هذا حينام على جربايتي.

ايفين : انعجب بيج خرب بحضي واني ردت بس يباوع عليه مباوع.

سيلين : جوز شافج شامره روحج عليه كال ابيع ثكل وهيه تزحف من وحدها ليش متعب نفسي.

ايفين : مسويت هيج تره.

سيلين : اي واضح امشي نام واي شي سمعتيه منهم تنسيه لتخلين اي شي ابالج..

ايفين : زين زين..

رحت للغرفه فرشت ونمت بالكاع ماحب انام بمكان واحد وخصوصا اذا جان ولد نفسيتي متتقبل وهذا ضوجني من كال انام بفراشها يعني شيقصد كلش ضجت واختنكت حقهم ادهم وعمه من حذروني منه وعزلونه يعرفوه شنو..

ثاني يوم هم منزلنه والاكل يصعده ايمن وره يومين ضبط راحو ونزلنه جوه ، الوضع جدا عادي وطبيعي ..

مر اسبوع وجنه كلنا كاعدين بغرفه عمه عدا ايمن جان طالع كامت مريم راحت لابوها كلتله.

مريم : بابا احجيلي قصه.

دنك باسها وشالها كعدها على رجله..

ادهم : تدللي احجيلج قصة اذا لبنتي حبيبتي ما احجي المن احجي .

مريم : يلا احجيلي اسمع ..

ادهم : كان يا مكان جان اكو فد يوم بنيه اسمها غاده ، خلصت مدرستها واجتي العطله الصيفيه وراحت ويه امها زياره لبيت جدتها لبست عقد وخاتم وراحو كامت تلعب ويه الجهال ضايقها العقد لهذا نزعته علمود تكدر تلعب براحتها وهم تحافظ عليه مينكطع ..التهت ولعبت هواي وبعد مده من الوقت قررت ترجع تلبسه بس للأسف ملكته بمكانه ركضت غاده لأمها تبجي وتصيح ضيعت العقد والخاتم ، كامت تدور هيه وامها بكل مكان وملكته شافتهم الجده كامت تدور وياهم وتسأل الاطفال الجانو يلعبون خاف واحد بيهم شافهن او اخذهن بدون قصد كلتلهم منو شاف العقد الكل كال جنه نلعب مشفناه بس كم واحد سكت مجاوب،، الجده ذكيه لهذا شكت بالموضوع ليش ذوله محجو سكتو فكرت بحيله علمود تخلي الاطفال يعترفون على نفسهم..

كالت عرفت اللي سرق العقد هاي قطه كبيره دخلت للبيت سرقته وراحت واني هاي القطه ربيتها بيدي واكلت من ماعوني وتالي هيج تسوي يلا كومو دورو بيت القطه راح تلكون العقد وره شويه اجتي وحده من البنات اسمها هبه كالت اني لكيته بجنطتي وما ادري منو خلاه بيها هنا الجده ما رادت تحرجها كلتلها هاي القطه هيه اللي ضمت العقد بجنطتج سوت هيج لان متعرف السرقه عواقبها وخيمه ولازم نحسن من تصرفاتنه ومناخذ اي شي مو من حقنه لان اذا الناس متشوفنه فرب العالمين اكيد يشوفنا ويحاسبنا ...

مريم : بس هاي حرام تبوك هسه تروح للنار..

ادهم : مو بس للنار وعيب من الناس الكاعده عدهم شيكولون على تربيتها وبعد ميأمنون بيها.

مريم : صح..

صفنت على القصه حسيت بيها بسمار النه بس بطريقه غير مباشره...

كمت طلعت بره افور هو ميحجي شي اذا ميقصد شي ثاني مثل سالفه الحجاب مال بنته .

مرت الايام وهو يتجنبنه وحتى ميطلب مني اي شي مجرد سلام وبس. وبيوم راحو للمستشفى علمود العلاج وضلينه اني وايفين بلبيت ...

مرت ساعات طويله يلا رجعو مهدودين من التعب ، نيم عمه بمكانها واني بدلت ملابسها وغسلت الها ضلت تون من الألم لحد ما نامت ...

طلعت من الغرفه ورحت اغسل ملابسها مال مستشفى اجتي مريم كالت بابا يريدج انتي وايفين ..

سيلين : خير ان شاءالله كليله اجتي..

غسلت ايدي ونشفتها بالخاولي المعلك وطلعت رحت لغرفتنه صحت ايفين ورحنه لغرفه المكتب لكيته كاعد وجها ميكصه السيف ..

سيلين : صحتنه؟؟

ضل صافن بوجهي ويباوعلي بعتب..

سيلين : صاير شي؟؟

يباوع عليه ويرجع يباوع على ايفين اخر شي حجه..

ادهم: من فتره صارت ويايه شغلات ماصايره بحياتي لا من جنت بالعراق ولا من سافرت بس من رجعت لهنا تكررت اكثر من مره كلت انت غلطان لا انت متوهم وانطي اعذار واغلس بس من ييجي اخويه ويكلي فلوسي ناقصه كذا مبلغ لا هنا مااكدر اغلس يعني الموضوع حقيقي وكاعد ننباك والحرامي داخل البيت بوقتها كتله ما اكدر احجي لان اهلي جانو موجودين والبيت هوسه والكل مشكوك بأمره ماشكيت بيكم لحظه وحده بس شسويت خليت فلوس بالمجر مال مكتب وحسبتهن كلش زين وطلعنه كلنا ضليتو بس انتو الاثنين رجعت حسبتهن نقص ٢٥٠ الف ، المن الزم وانه مقفل عليكم من

بره وطالع ...

ضليت ابلع واغص من الفشله والقهر وعيوني من وحدها كامت تغمض حسيت راح اوكع من طولي..

ادهم : جبتكم هنا حاجيتكم بهدوء لان ما اريد ياسة تسمع وتتأثر تحجولي كلشي ومن شوكت تاخذون مني فلوس تره موبعيني بس اتخبل من الجساره لو وحده جايتني وكايله محتاجه اغركها فلوس ولا تمد ايدها..

ايفين : والله عمو اني ماماخذه ولا طابه غرفتك اصلا حتى سيلين اسألها وهيه لازمه البيت وتنظف واني اربع وعشرين ساعه كاعده بغرفتي مو سيلين..

التفتت على اختي اللي ذبت التهمه براسي بطريقه غير مباشره باوعت ايدها ترجف وشفتها صارت زركه خفت عليها ومثل كل مره اغطي على سوالفها بسبب خوفي عليها..همست

سيلين : عمو اني احتاجيت واخذت واسفه بعد متتكرر..

حجيتها ونصيت راسي...

شكرا لزيارتكم عالم روايات سكيرهوم