رواية جذبني فمك البني الفصل الرابع عشر 14 بقلم عبير إدريس

سيلين : عمو اني احتاجيت واخذت واسفه بعد متتكرر..

حجيتها ونصيت راسي..

مرت لحظات وكال..

ادهم : ليش تغطين عليها؟

رفعت راسي وباوعتله بصدمه ..

لكيته صافن بوجهي لو يموتني ولا هيج يباوع يخليني افوت بنص هدومي ودكات كلبي اكوم ما احس بيها هلكد ما تصير بطيئة.

كمت ماعرف شسوي ساعه اخلي ايدي على حلكي لو ارجع شعري وره اذني ، رجعت حكيت انفي ورجعت حكيت ركبتي وهو صافن على حركاتي حسيت الحراره صعدت براسي وعركت ،،

اخر شي بجيت متحملت فركت عيني بيدي شلون الطفل ...

ادهم : يعني ليش مصره على الكذب مو كلشي واضح تره عادي اذا كلتي اختي اخذت ما راح اذبحها ولا احبسها انه مو همجي لكن ردت اوكع على العله واشوف ليش هيج تتصرف..

انفجرت بعد مكدرت اسكت اكثر..

سيلين : لعد اذا تعرفهة هيه ليش دزيت عليه وحققت ويايه..

ادهم : مجنت اعرف هيه ولا متأكد منها بس هسه تصرفاتكم وطريقه كلامكم اثبتت اثنينكم تكذبون واختج الماخذه الفلوس مو انتي .

التفتت على ايفين خزرتها ونترت بيها..

سيلين : وين وديتي الفلوس امشي جيبيهن ..

ايفين : ماعندي انتو شنو متصدكون بيه كوه تبلوني..

سيلين : اذا دورت ولكيتهن اخابر على عمامج واكللهم وهاي مو اول مره تصير ياما وياما اخذتي منهم واني جنت اغطيلج وكتلج لتفشليني هنا..

ايفين : منو كلج تغطين عليه واصلا اني مماخذه..

التفتت على ادهم..

سيلين : عمو هسه ادورهن واجيبهن واخابر على عمامي يجون ياخذونه غصبن عنهم يتحملونه..

هو ساكت محجه ولا علق على كلامنه بس نضراته تتوزع بيني وبين اختي...

طلعت والنار صاعده براسي رحت كلبت الغرفه دورت بكل مكان ملكيتهن لا كنتور لا جربايه ولا جواهن وين ضامتهن مادري تخبلت رجعت للغرفه هجمت عليها ردت اضربها حجه عمو ادهم بهدوء..

ادهم : سيلين ضبطي اعصابج وتعاي كعدي ..

نزلت ايدي ورحت كعدت على الكرسي الكباله بس شنو رجلي ترجف كوه وصلت ...

ادهم : ايفين تعاي انتي هم كعدي هنا ..

اجتي كعدت بس مسيطره مو مثلي ارجف..

جر نفس طويل وكال..

ادهم : اول شغله تشيلون من بالكم تطلعون من هذا البيت .

رفعت راسي باوعتله جانت عيونه بيها ندم او قهر ماعرف..

رجع كمل كلامه..

ادهم : ياسة محتاجتكم بهاي الفتره والغلط الاول مني انه ماجيت سألتكم شمحتاجين شنو عاجبكم تشترون التهيت بمرض زوجتي وطار من راسي كلشي ، لهذا انه اشيل نص الذنب وياكم ..

سيلين : عمو ممحتاجين شي كلشي عدنه وكلشي متوفر اصلا عايشين حياه جنه نحلم بيها اسألها وين جنه نخلي ملابسنه وين جنه نام وشنو جنه ناكل خليها هيه تحجيلك،،،

قبل من جانت تاخذ صدك محتاجه لان تجوع واكل متنطينه زوجه عمي تضمه وبالقطاره تصبلنه منشبع وجنت اغلب الاحيان انطيها غدايه واني اضل على وجبه وحده هسه ليش تمد ايدها وكلشي عدها متوفر.

ادهم : اريد كلشي تحجولي وخصوصا انتي ايفين ليش هيج تصرفاتج ما محسوبه ومنتبه عليج حتى عندج تصرفات عدوانيه ويه اختج ..

نصت راسها محجت.

سيلين : عمو اني احجيلك ...

التفتت عليه جان عاقج حاجبه بس من احجي اني احس عيونه تلمع ماعرف دمعت لو لان اني عيوني مليانه دموع حسيت عيونه هم..

هز راسه موافق وشبك ايده خلاها على الميز همس...

ادهم : اسمع...

سيلين : عمو احنه بنات ربينه نفسنه بنفسه لانعرف الحرام من الحلال ولا بيوم صليت ولا صمت ولا اعرف شلون اتوضه اصلا اشوفهم يصلون بس عبالي عاده بكيف الواحد الحجاب بكيف الواحد ،،

من جنت بالمدرسه ام الاسلاميه تحجي ويانه على بعض شغلات بديت افهم واعرف بس هم ما اطبق لان ماكو ام على راسي تعلمني وتشجعني اذا لبست حجاب راح تكافئني او اذا صليت راح ربي يرضى عليه مثل ما عمه ياسة حجت ويايه قبل كم يوم وبلشت تعلمني ،

اني اللي جان لازمني ضميري وبس مو الحرام جنت اعرف البوك بدون علم بابا هذا الشي غلط بس مجنت افكر حرام عبالي عادي مادام ماما تدري وهيه جانت تقنع اختي تسوي هيج شي عبالي عادي ،

ماما جانت تدزنه ناخذ من جيب بابا فلوس اني مره سويتها ومن اجه بابا وشاف فلوسه ناقصات شفت القهر بعيونه لان جان محتاجهن لهذا كمت اتحمل كتل وضرب منها ومرات تنيمني بدون عشا لان ما اقبل اسوي اللي هيه تريد ،

ايفين اني ليش انقهر عليها واتعاطف وياها لان من عمرها اربع سنوات ماما تدزها تاخذ فلوس من جيب بابا حتى مرات شايلها وتسلت من جيبه الامامي وتعرف شلون تضمهن هو يشوفها ويحجي وياها بس تخاف من ماما وتكرر الموضوع كل ما طلبت منها ،

وهيه اللي جانت تدزها تتسنط على غرف عمامي ونسوانهم وهيج تكب العركات بينهم لان تتسمع وتنقل حجي لماما وثاني يوم تنزل تحجي عليهن شلون هيج يحجن عليها ، وبعد وبعد اذا احجيلك للصبح ما اخلص عمو احنه نشأنه غلط بغلط عدا المضموم بالكلب اذا طلعته اخليك تبجي علينه..

صفن عليه وحنكه تحرك كأنما يريد يبجي هز راسه مستغفر وفرك عينه بصبعه ....

ادهم : ما الومكم لو شماتسووون بعد الكلام السمعته شنو من ام مؤذيه عدكم مع احترامي يعني تلفظت عليها بهيج لفظ

كدامكم لكن احترك دمي تخيلت بنتي مريم هيج يصير وياها وقتها ماعرف رده فعلي شلون تكون بحق امها ،

تره الام هيه السبب الرئيسي بدمار الطفل وخصوصا البنيه الام المؤذيه او الاب المؤذي من المستحيل ينشأ بجانبهم طفل سوي مستقر نفسيا ، لهذا نشوف اغلب الاطفال بالشارع او بالمدارس يعانون من اضطرابات نفسيه تنتج عنها ضرب مبرح للأطفال البعمرهم او قذفهم بكلمات سيئة مرات يسرق لفه صديقه او فلوسه هاي كلها بسبب البيئة العايش بيها الطفل ...

دنكت راسي وامسح بدموعي

سيلين : هاي الشغلات الحجيتها كلها سويناها بالمدرسه عبالك جنت عايش ويانه جنه حاقدين على كل طفل نظيف ومرتب وامه توصله او تبوسه وتودعه نكول احنه ليش مو مثلهم لهذا جنت منطويه على نفسي زياده ولحد الان استحي اختلط ويه بنات البعمري واصلا ماعرف شنو اسولف وياهم ..

ادهم : هذا الشي ناتج من العنف الجسدي والنفسي ، عنف جسدي متمثل بالضرب او الصفع او عنف بالكلام مثل السب او الاهانه او يطلعون لقب للطفل يخلوه يحقد على كل واحد يصيحه بهذا اللقب حتى مرات ينسون اسم الطفل ،

و اكو امهات للأسف حتى تدعي بالسوء على اطفالها ، او تستعمل وياهم العنف الشعوري وهو الاستهانه بمشاعرهم من يجيها ابنها او بنتها يشكيلها من عقده يعاني منها سواء بشكله او بداخله هيه تقابله بالاستهزاء هيه متعرف كاعد تضغط على مواطن الالم النفسي بداخل طفلها واكو امهات من يجيها طفلها فرحان ماخذ درجه كامله تكله وشنو يعني متحفزه بكلمات عفيه بالبطل انت سبع وكذا لا تبث بداخله اليأس وشعوره بالعجز ...

سيلين : صح بس ويامن تحجي ربينه على هيج شي وكبرنه بالغلط وهذا الحجيته كله ماما سوته ويانه..

ادهم : بعدكم صغار وماكو واحد يضل على الغلط مادام تعرفون هذا غلط اذن اكو بذره صالحه بداخلكم ، المهم انه اسف خليتكم بموقف محرج لكن اعصابي جانت تعبانه ومنا صارت سالفه الفلوس ويه ايمن وتكررت ويايه لهذا حجيت وياكم بصوره قاسيه شويه..

سيلين : شنو راح تكول لايمن ؟

باوعتله بعيون متوسله وحجيت..

ادهم : ايفين تروح ترجع الفلوس منين ما جابتهن وهو اكيد من يشوفهن كاملات راح يفكر انو هو متوهم وتنسي السالفه وانه مستغني عن الفلوس اعتبريهن مصروفج .

سيلين : لا ترجعهن كلهن فلس متاخذ..

ادهم : سيلين ؟

حجاها بحزم..

سيلين : عمو رجائا لتحرجنه اكثر من هيج..

ادهم : براحتكم ..

سيلين : راح اروح اشوف عمه اكيد كعدت هسه وافتقدتنه..

جر حسره وكال..

ادهم : اليوم كله راح تنام ..

سيلين : ليش ؟

سألته مستغربه وبنفس الوقت خايفه..

ادهم : علاجها صار مكثف و...

سكت خله ايده على عيونه ودار الكرسي نطانه ضهره بصوت يرجف كال..

ادهم : اخذو راحتكم بنات..

كمت واشرت لايفين تكوم طلعنه من الغرفه سديت الباب جلبت بيدي ..

ايفين : عليج الله بروح بابا لتزعلين مني..

عتيت ايدي منها حيل وخزرتها..

سيلين : ليش هيج سويتي ليش خزيتينه حلوه وكفتنه كدامه عجبتج ..

نصت راسها عفتها ورحت للمطبخ اجتي ورايه..

طلعت الخضره وجبت مصفي وكعدت على الميز الكط بيها وهيه كعدت كدامي..

ايفين : كتلج متتكرر..

هديت الباكه من ايدي ونترت بيها..

سيلين : الف مره تسوين الغلط ومن تشوفيني اتأذه بسببج تجين تبجين وتكولين متتكرر هاي اخر مره اشيل الذنب عنج وروح بابا ماسويها لو اشوفج ميته مو بس مزوركه.

ايفين : زين شسوي وتسامحيني.

سيلين : اول خطوه ترجعين الفلوس وتكليلي ليش بكتيهن واذا كذبتي كومي من وجهي وانسي عندج اخت وحتى غرفنه افصلهن انتقل بغرفه مريم ..

دنكت راسها وكامت تلعب بحبل البلوز مالتها...

ايفين : انتي من اخذتي الموبايل مني وتوسلت بيج علمود تنطينياه وعزيتيه عليه اخذت الفلوس علمود اشتري واحد من نطلع ويه ايمن..

سيلين : واني ليش عزيته عليج من السعاده مالتي لو بسبب تصرفاتج الرعنه وسوالفج ويه اسامه..

ايفين : نيته خطوبه جانت وتوسل بيه اقبل وكال تندمت لان هيج عاملتكم وحتى زاكروز متندم بكد شعر راسه لان عافج..

سيلين : طبهم مرض ذوله نسوان مو زلم ميفيدونه افهمي..

ايفين : منا وجاي شنو تكليلي اسوي وابد ما اخالفج..

سيلين : خل نشوف امشي وره الكذاب..

كامت حضنتني وباستني ..

سيلين : كافي يلا روحي طلعي فلوس عمو ادهم وديهن اله وحتى اذا مقبل ياخذهن خليهم على الميز واعتذري منه وطلعي واني الهي ايمن لو اخذه ونطلع نتسوك وصعدي رجعي فلوسه بنفس المكان..

ايفين : ماشي..

وصلت باب المطبخ وصحتها التفتت عليه.

سيلين : وين جنتي ضامتهن؟

دنكت راسها وهمست.

ايفين : جوة الزوليه..

سيلين : شكد ... روحي روحي..

جريت نفس قوي كملت الخضره و كمت نكعتها ورشيت عليها ملح ورحت لغرفه عمه ياسه دكيت الباب على كيفي ماكو صوت فتحته لكيتها على نومتها تقربت منها باوعتلها صايره جلد على عظم وبس النفس يصعد وينزل كعدت بالكاع وخليت راسي يمها وبجيت بسكوت كمت اعاتبها بصوت ناصي ..

سيلين : اذا انتي رحتي احنه شلون بينه اني واختي راح نضيع وراج منو يتحملنه منو يحمينه من الزمن الاغبر

فهميني شلون بينه شلون ، وبعدين منين اجيب كلب يحمل فراكج يمكن اموت وراج ولو سامعه يكولون محد يموت وره واحد بس اني ما اتحمل والله ...

حسيت بيدها تمسدلي على راسي رفعت راسي باوعتلها مغمضه ودموعها تنزل يعني تسمعني..

مديت ايد ترجف ومسحت دموعهة بهاي الاثناء دخل عمو ادهم وكف بالباب وخال ايده بجيوبه ، باوعتله وكمت وصلت يمه همس..

ادهم : خليج يمها ردت اخذ ملابس واطلع..

سيلين : لا اخذ راحتك اروح اكمل الغده.

ردت اطلع همس سيلين التفتت عليه..

سيلين : نعم

ادهم : ليش تبجين؟

سيلين : على عمه .

هز راسه وراح بأتجاه الكنتور واني طلعت رحت للحمام غسلت وجهي على السريع وطلعت خاف يريد يفوت ويلكاني كدامه وينحرج ، رحت للمطبخ وبلشت بالغده اجتي ايفين ..

ايفين : رجعتهن الفلوس لعمو ادهم..

درت راسي عليها لان جانت واكفه ورايه.

سيلين : وفلوس ايمن؟

ايفين : منتظرتج تلهي علمود ارجعهن.

سيلين : لازم العصر هسه ماكدر اطلع.

ايفين : اي هو العصر.

كملت الغده ورحت مددت بالغرفه اريد انام ميته نعاس بس القلق والخوف على عمه حرم عيوني النوم ..

سيلين : اكلج مريم شفتيها وينها التهينه عنها اليوم..

ايفين : عفتها تلعب بغرفتها ...

سيلين : متأكده؟

ايفين : توني جيت من يمها..

سيلين : خوش.

ايفين : صار الاكل جعت.

سيلين : هسه اشوف عمو يتغده علمود اصب..

ايفين : ديلا حبابه متت جوع.

كمت طلعت من الغرفه ورحت لغرفتهم لكيت الباب مسدود ، عرفت نايمين رجعت لغرفتنه..

سيلين : تعاي اصبلج انتي ومريم تغدو وبعدين اصبلهم لان نايمين..

ايفين : اصب اني عليمن انتي تصبين .

سيلين : لا خاف تمردين الكزون اني اصب.

رحت للمطبخ صبيتلهم واجتي هيه ومريم كعدو يتغدون واني كعدت صفنه تجيبني وصفنه توديني وكل شويه اتذكر الموقف المرينه بيه اليوم وتشب نار بداخلي بعدين من اتذكر لطافته ويانه وشلون تفادى الموقف وخله نص الذنب عليه لان تاركنه بدون مصرف ، نوعا ما ارتاح وبنفس الوقت انقهر على عمه شلون راح تنحرم منه ومن طيبته وصدك راح تجي وحده تاخذه منها على الجاهز ..

ايفين : هييي وين بالج صار ساعه احجي ..

سيلين : منتبهت شكو؟

ايفين : متاكلين شبيج..

سيلين : ما اشتهي اكلو انتو بالعافيه..

مريم : اكلي حبابه نضوج وحدنه..

سيلين : اووف ام لسان لخاطرج راح اكل..

ضحكت ودنكت تاكل واني كمت جبت خاشوكه وكعدت اكلت وياهم كملنه راحن لغرفهن واني غسلت المواعين ، اندك باب الهول الداخلي رحت فتحته ايمن..

ايمن : السلام عليكم..

سيلين : وعليكم السلام وين جنت؟

ايمن : رحت سألت على سالفه النقل اريد انقل لبغداد وهم اكطع الاجازة ادهم ورجع بعد شكو ...

سيلين : الله يساعدك ويسهل امورك تتغده اصبلك..

ايمن : والله جوعان ميت جوع بس ممرود ما اشتهي هسه راح انام ساعه واكعد اتغده..

سيلين : اوك بس باوع اليوم عدنه مسواك العصر..

ايمن : ميخالف عود اخذج ونروح.

سيلين : انتظرك..

راح وسديت الباب رجعت للمطبخ اجه عمو ادهم يحك بشعره عنده هاي عاده دائما يسويها من يكعد من النوم..

ادهم : عمتج كعدت وتريدج .

سيلين : اصبلها اكل خاف جاعت..

ادهم : وين تكدر تاكل منا لليل يلا ..

سيلين : شلون لعد تضل جوعانه..

ادهم : شديتلها مغذي بس اريدج تكعدين يمها لتخليها ترفع ايدها كون دائما مادتها علمود المحلول ياخذ راحته ..

سيلين : ماشي زين اصبلك غده..

ادهم : اذا ردت انه اصب ..

سيلين : براحتك..

عفته ورحت لعمه لكيتها كاعده ، سديت الباب ومددت بصفها..

ياسة : شلونج حبيبتي .

سيلين : زينه عمه ..

ياسه : ليش صوتج بيه قهر تره احس بيج احجيلي..

سيلين : مابيه شي اصلا كلش مرتاحه.

ياسة : متأكده..

سيلين : اي حبيبه كلبي..

ياسة : لو تدرين اليوم شلون متت قهر بالمستشفى..

سيلين : ليش اسم الله..

ياسة : جنت نايمه على السديه واخذت الغضب الجرعه واجتي دكتورة ماعرف ممرضه بس مبينه ممرضه .

سيلين : على كيفج احجي تتعبين..

ياسة : اي هو على كيفي ، اجتي شافت ادهم واكف ليغاد متدري جاي ويايه ضلت تلوب عليه كل شويه وجايه يمه ليش ما اجتي وحده ثانيه وكفت يمها وثنينهن قريبات مني يعني اسمعهن ، تكللها شوفي شلون ثكل وهيبه لج كتلت روحي وبنضره ما عبرني الثانيه تكللها اي لج شفته يخبل ..

سيلين : اي هاي من الزينات مباوعلهن ليش انقهرتي لعد..

ياسة : خايفه يجي يوم وتجي وحده ثانيه تنسي ياسة ..

سيلين : انتي موجوده وان شاءالله تصيرين زينه وتعيشون طول العمر سويه ليش هيج متفاوله على نفسج ..

ياسة: نضحك على نفسنه ياعمه هو شضال بيه بأذني سمعت الدكتور كله لادهم استعدو لوداعها وحتى ادهم رزله كله شلون هيج تحجي يم المريضه ، كله نايمه وين تحس ، جاوبه عمج كله نايمه مو ميته يعني تسمعك واني فعلا سمعته..

سيلين: مع الاسف اكو البعض منهم ميحسبون حساب لمشاعر المريض وحتى لإهله شلون هيج يكله لعمو ميصير.

ياسة : عكس ولد شاب مبين متعين جديد من تشوفيه يرجع الامل بكلبج فد كلام مريح من يحجي وحتى اهتمامه غير شكل ..

سيل

ين : بكل مكان اكو الزين والشين مو بس بالمستشفيات..

ياسة : اي صح..

سيلين : كافي حبيبتي خاف تتعبين..

ياسة : ضايجه اريد اسولف روحي طكت ..

سيلين : يلا نسولف باليعجبج..

ياسة : حبيبتي عينج على مريومه خاف اغمض عيني وبعد ما افتحها..

اختنكت متحملت بجيت رأسن..

سيلين : عمه ليش تأذيني بهذا كلامج صدكي كل حجايه تحجيها كأنما خنجر بكلبي عفيه لتوصين ولا تحجين اي شي ما اتحمل ابد تدخلين بخطيتي تره.

ياسة : هذا هو سكتت بس لتبجين..

كوه راحت الخنكه مني وره شويه اندك باب الغرفه كمت فتحتها ايمن..

ايمن : ها نايمه وكعدتج..

سيلين: لا كاعده كول..

ايمن: ليش عيونج حمر..

ابتسمت وهمست بصوت ناصي بس هو يسمعه..

سيلين : من السعاده اليوم الافراح تهل على راسي ..

ايمن : يردلنه كعده اليوم ونسولف..

سيلين : مابيه حيل لا عبالك اكعد واسولف امشي اصبلك غده..

ايمن : ههههه يلا امشي اليوم عصبيه متتحجين..

التفتت عليه باوعتله ودرت عيني رحت للمطبخ صبيت الغده وكعد ياكل..

سيلين : هسه اجي لحظه.

ايمن : ماشي.

رحت على ايفين للغرفه..

سيلين : كومي ودي الفلوس خاف عمو ادهم ميخلينه نطلع ..

ايفين : وين ايمن..

سيلين : كاعد يتغده بالمطبخ.

ايفين : ماشي ..

راحت واني رجعت للمطبخ ملكيته تخبلت كمت ركضت على ايفين لكيتها رايحه كلت هاهيه راح يشوفها طلعت للطرمه اركض توني اصعد الدرج صاح ..

ايمن : ها هياتني ..

التفتت عليه وخليت ايدي على كلبي..

سيلين : وين رحت عفتك تتغده.

ايمن : جبت لبن واجيت.

سيلين : هاا بالعافيه.

ايمن : الله يعافيج شلون بانيه مسويه تخبل..

سيلين : بالعافيه ..

احجي وياه وعيني على بيته خاف تنزل ايفين ويشوفها..

سيلين : امشي كمل غداك واحجيلك شصار.

ابتسم.

ايمن : يلا امشي وانتي تغدي ويايه.

مشينه دخلنه للهول ..

سيلين : اني تغديت قبل ساعه..

ايمن : ها زين ..

رحنه كعدنه بالمطبخ هو ياكل واني امرد بيدي مرد وعيني على الباب شوكت تفوت طولت..

انتبه عليه.

ايمن : شبيج اليوم متوتره..

سيلين : ها اني.

ايمن : اي ..

سيلين : مادري خايفه على عمه كلش .

جر نفس طويل وكال..

ايمن : الله يعينها ويعينه على الايام الجايه كلش صعبه.

سيلين : اي والله ...

سكتت كمل غده وكام كال .

ايمن : الحمدلله عاشت ايدج والله يخبل عبالك الج سنين تطبخين..

سيلين : هاي عمه خطيه علمتني على كلشي من جان بيها حيل ..

ايمن : الله يشافيها

سيلين : يارب مو بعيده على رب العالمين..

ايمن : ونعم بالله راح اروح عندي شغله اكملها وارجع اخذج نتسوك ماشي..

سيلين : ماشي..

طلع واني غسلت المواعين ، اخذت خاولي صغير امسح الميز اجه ادهم فات ، اخذ مواعين ثنين وصينيه وصب غده ..

سيلين : اسويلك زلاطه..

هز راسه ب اي بدون ميحجي ..

رحت طلعت طمامه وخيار وثرمته رشيت ملح وخليته بالصينيه كعدت ياكل ومدنك راسه على الاكل.

سيلين : اسوي جاي ..

ادهم : انه اسوي روحي ارتاحي ..

سيلين : بالعافيه ...

ادهم : الله يعافيج ..

طلعت رحت للغرفه لكيت ايفين متمدده..

سيلين : وين رحتي نشفتي دمي..

ايفين : قافل الكنتور وضليت حايره وين اخلي الفلوس تالي خليتهن بالمجر مال ميز التواليت.

سيلين : خرب هسه تبين ..

ايفين : اي شسوي وين اوديهن حتى لو رجعتهن بالكنتور هم تبين..

سيلين : اني اشوف شلون احلها..

فكرت ردت حجه مقنعه ملكيت تالي رحت للمطبخ لكيته كاعد بعده..

سيلين : عمو سؤال.

رفع راسه باوعلي ..

سيلين : ايفين رجعت الفلوس لايمن بس خلتهن بالمجر مو بالكنتور شلون اكيد راح يعرف.

غمض عينه بتعب ودار وجها ، ضليت واكفه وهو ساكت ردت اطلع كال..

ادهم : كليله من ضلينه بغرفتك خلينه ملابسنه بالكنتور ومن شلناهن ورجعنه لغرفتنه رتبناهن لكينه فلووس بيهن ردت اكلك ونسيت تالي رجعتهن.

ضحكت على تفكيره شلون بسرعه لكه حل.

سيلين : عمو يراد ابوس عقلك والله لو اضل الف سنه متجي ابالي هيج فكره.

دفع الكرسي ليوره وكام يريد يغسل كال.

ادهم : بدال ما اعلمكم على الصدق كمت اعلمكم شلون تكذبون وشلون تتلافون سيئاتكم..

سيلين : اسفه ..

ادهم : ماكو داعي تتأسفين على شي مو ذنبج بس وصي اختج متجبرني اكذب واتحمل ذنب بسببها..

سيلين : حقك شنو تحجي حقك وصدكني ما ازعل منك..

سكت وراح للحمام واني رجعت للغرفه صار العصر اندك الباب صحت منو ..

ايمن : انه وينج مو متفقين نتسوك لو غيرتي رأييج

كمت فتحت الباب .

سيلين : لا مغيرت رأيي هسه ابدل ونروح..

ايمن: لبسو لبس مال طلعه انتي وايفين..

سيلين : ليش؟

ايمن : بدون ليش مثل ما كتلج..

سيلين : ماشي..

دخلت اخذت ملابس ورحت للحمام سبحت وطلعت رحت لغرفه مريم لكيت ايفين يمها.

سيلين : بدلي انتي ومريم راح نطلع ويه ايمن.

ايفين : صدك ..

سيلين : اي يلا كومي بسرعه وبدلي لمريم وياج حبابه.

ايفين : ماشي ...

كيفن ثنيهن رحت بدلت واجتي ايفين بدلت قبل لا نطلع رحت لغرفه عمه لكيتها نايمه سديت الباب وطلعنه للطرمه وكفنه منتضرين ايمن .

انفتح باب الشار

ع وصاح يلا التفتنه عليه لكيناه واكف بره طلعنه وصعدنه بالسيارة اني صعدت ليكدام وايفين ومريم ليوره..

سيلين : وين نروح اول نتسوك لو شنو..

ايمن : المسواك تأجل عمج كال هو يجيب وراح اخذكم لمكان ثاني...

سيلين : زين فكره منو الطلعه.

ايمن: عمج..

سكتت عرفت ميريدنه نام مقهورين منه ..

مشت السيارة بينه وحجه ايمن.

ايمن : تدرون هسه احنه وين.

سيلين : وين؟

ايمن : شارع الربيعي..

سيلين : شنسوي هنا..

ايمن : هسه ننزل واكلج شنسوي ..

صف السياره بالكراج ونزلنه اغلبها محلات بيها اجهزة موبايل ولابتوبات ..

افترينه ودخلنه لمحل ، اول ما شافنه صاحب المحل كام سلم على ايمن وصافحه مبين يعرفه ..

_ ها ولك زين تذكرت عندك صديق تجي تشوفه.

ايمن : ماجاي عليك رايد منك موبايلات ثنين مواصفات حلوة والوان بناتيه وياك كفرات وملاعيب العيد

_ مو يتدللن خواتي ..

كام يطلع نوعيات ويشوفها لايمن وهو يكله لا هذا ذاكرته قليله لو مواصفاته موشي اخر شي استقر على نوعيه واخذ منه ثنين ، التفت علينه.

ايمن : هذا احسن نوعيه جان خليتكم انتو تختارون بس اعرف بيكم متعرفولهن ، لهذا انه اختاريت وانتو اختارو كفرات للموبايل ..

سيلين : بس مبين غالي ايمن ليش هيج تسوي انت منيلك.

ايمن : مو مني من البنك .

حجاها وغمز ، عرفت من عمو ادهم ..

اختارينه كفرات اني هيج بدون نفس بس ايفين فرحت كلش بودها تركص بنص المحل ، دفع فلوسهن وتشكر من الولد وطلعنه اخذنه لمحلات مال ملابس قبل لا ننزل كال..

ايمن : بنات اني عبد مأمور مثل ميكولون وعليه اوصل رساله وبكيفكم بعد سوو اليعجبكم احنه منجبر واحد على شي ميحبه...

سيلين : كول ايمن لتلف وتدور وبلا مقدمات.

ايمن : ادهم وصاني اشتريلكم ملابس مال حجاب وكال لتجبرهم اذا عجبهم يشترون عجبهم ما عجبهم خليهم براحتهم.

سيلين : لا اني اصلا جنت ناويه اشتري..

التفت على ايفين..

ايمن : وانتي؟

ايفين : مثل سيلين ..

ايمن : الله عليكم من نفس طيبه خوما جبرناكم ..

سيلين : لا والله محد جبرنه اصلا لازم من زمان نخطي هاي الخطوه بس مجان احد معلمنه..

ايمن : يلا لعد توكلو..

نزلنه ودخلنه لمحلات الملابس حرام اذا اعرف اختار حاجه لا اعرف انسق لا اعرف الموديلات صح من اجينه بيت عمه ياسه اشترينه ملابس وكمنه نلبس بس على ذوقها اغلب الشغلات هيه ويانه تطلع من جان بيها حيل ...

سيلين : ايمن ..

التفتلي وكال.

ايمن : ها سيلين.

سيلين : كلشي ماعرف ارهم..

ابتسم وكال.

ايمن : انه هم ماعرف شتلبسون بس امشي نشوف ونختار سوه..

سيلين : يلا علواه..

كمنه نكلب بالملابس واشوفه شغلات يكول لا محلوه وشغلات تعجبه يسوي بصبعه اوك.

اخذنه كم قطعه ودخلت كدرتهن قسم قياسي وقسم صغار انطيهن لايفين تبدلهن ب اكبر والها هم نفس الشي اختارينالها ويه ايمن .

رحنه محل حجابات ابو المحل رهم النه الالوان اخر شي اشترينه ملابس بيت كلها دشاديش قررت اني واختي منلبس تراكات بلبيت ونخليهن بس للنوم اما الحجاب بس بره ابد مفكرت البسه بلبيت لان بعدني ممتعوده عليه واصلا اني معتبرتهم مثل اخوتي ..

رجعنه للبيت دخلنه الغراض لغرفتنه وايمن صعد فوك رحت غسلت ايدي و وجهي ولبست دشداشه جديده وطلعت للطرمه ردت اصعد لايمن علمود اكله على سالفه الفلوس ، لكيت عمو ادهم كاعد على الكراسي بالحديقه رحت كعدت يمه ..همست..

سيلين : شكرا على الملابس والموبايلات..

جان مرجع راسه وعينه على السمه من سمعني رفع راسه وباوعلي...

ادهم : بالعافيه.

سيلين : ليش هيج سويت..

ادهم : قصدج على الشرايه لو شنو؟

سيلين : اي ..

ادهم : المفروض اول ما ارجع اخطي هيج خطوه بس كتلج التهيت عنكم.

سيلين : بس انت ممجبور تصرف علينه..

عقج حاجبه وكال..

ادهم : منو كال مجبور؟

سيلين : القصد يعني ..

قاطعني .

ادهم : من الاخير اختصرها الج انتو حالكم حال مريم تمام..

سيلين : بس احنه مو بناتك على شنو تصرف علينه..

ادهم: منو يصرف عليكم اذا احتاجيتو شي عليمن ترحون ؟؟

دنكت راسي وهمست..

سيلين : انت متعرف من تعاملنه بطيب واحنه غلطانين شلون تأذيني ..

ادهم : أأذيج ؟

حجاها مستغرب ، رفعت راسي وعيوني مليانه دموع..

سيلين : اصعب شي على الانسان من يقابلون اسائته بالاحسان..

ادهم : قصدج عذاب الضمير هنا يشتغل ..

سيلين : صح.

ادهم : بس انتي ما اسأتي الي على شنو يوجعج ضميرج..

سيلين : ماعرف بس احس اذيناك اني واختي.

ادهم : انه ما اعوف زيناتج كلها و وكفاتج ويه بنتي وزوجتي واجي اوكفلج على فعل انتي مو قاصدته ، لتضلين تلومين نفسج على اشياء غيرج مسويها.

سيلين : عمو مرات افكر انت مو بشر على كميه الطيبه الشايلها.

ادهم :ماكو انسان كامل ومابيه سيئات ..

سيلين : اله انت ما اعتقد عندك شي موزين او صفه سيئه..

ابستم بتعب وكال.

ادهم : انه زين ويه الزين اما اليأذيني لو يأذي اهل بيتي انسيه حليب امه كلنا عدنه جانب حسن وجانب سيء يظهر حسب المواقف..

سيلين : مرات يعجبني اعرف عنك شغلات ..

ادهم : مثل شنو؟

سيلين

: ماعرف شخصيتك غريبه وتفكيرك اغرب

ادهم : بالعكس انه واضح ماعندي شي مضموم.

سيلين : سؤال ولو تعبان بس اليوم كله عقلي مشغول وافكر بيه.

ادهم : وهو؟

سيلين : شلون عرفتني اكذب عليك..

ابتسم وكال..

ادهم : ضروري تعرفين.

سيلين : اي والله لان اذا معرفت التفكير ياكل دماغي .

ادهم : لا عليمن ياكل دماغج اسولفلج..

سيلين : اي عفيه.

ادهم : اول ما عرفتي بالموضوع تفاجأتي وبينت علامات الدهشه على وجهج عكس ايفين ماستغربت جانت منتضره هذا الشي هاي اول نقطه. النقطه الثانيه من تحجين متباوعين بعيني وهاي دلاله على الكذب هواي خليتي ايدج على حلكج بدون متحسين بنفسج والفم هو مصدر الكلام الكاذب ، لعبتي بشعرج هواي حكيتي ركبتج احمرار وجهج دلاله على الخوف والتوتر والكذب تعرقتي هواي والاهم مكدرتي تسيطرين على حركه ايدج واكو رجفه بالفم والوجه انتي متنتبيهن عليها بس المقابل ينتبه...

ختم كلامه بأبتسامه..

سيلين : وذني كلهن سويتهن اني..

ادهم : كلهن.

سيلين : اريد تعلمني شلون هيج تعرف بس من يصير عندك وقت كلش احب هاي التفاصيل..

ادهم : ميخالف من افرغ اعلمج صار.

سيلين : زين عرفني عن نفسك لان عندي فضول اعرفك..

رفع تك حاجب وكال..

ادهم : شنو تردين تعرفين عني سألي عمتج تسولفلج..

سيلين : لا اريد اسمع منك مثل ما انت سمعتني..

ادهم : مممم راح احجيلج مختصر تمام.

سيلين : تمام..

ادهم : انه رجل طموح بهيئة شرقية ملامح واضحة ويمكن حادة ، رياضي المظهر بيه سمرة بدوية راسمه تقاسيمي ، مشرف على عهدي الثالث من عمري ، ولدت من اسره ميسورة الحال و ذات نفوذ بسيط ، اجيت للدنيا من بعد حروب مريرة من تجارب طبية وعلاجات مختبريه وووووو دوخه يلا اجيت ،

عشت حياة مترفه من اول يوم اجيت للدنيا ، بس الحلو وين والدي الله يحفظه رباني صح رغم الدلال والعز اللي انه بيه بس جانت متابعته الدائمة الي لكافة اموري الحياتيه ، سواء اجتماعيه او علميه ، هيه اللي وصلتني لهذا الحال ، دخلني ارقى المدارس ودخلت ارقى الجامعات الدولية ، واضافه لهذا شغلي الخاص بيه ، اخذت الاحبها ، خطيت قصة مميزة بحياتي ، وختمتها بولاده بنتي مريم ، ها هسه رضينه فضولج لو بعد تردين تعرفين عني اشياء..

ابتمست وكتله..

سيلين : شنو صفاتك ..

ادهم :ههههه اليوم حالفه عليه انتي ...

سيلين : بس هاي والله واكوم هسه ايمن شكد نسأله ولا يضوج ..

ادهم : خاف اكلج وتكولين مغرور..

سيلين : لا ماكول ..

ادهم : يكولون هااا يكولون يعني مو انه اكول ..

سيلين : اي ههههههه

ادهم : كريم النفس معطاء ، خلوق ، متواضع ، حازم ببعض الامور اللي تستوجب الحزم ، اتجنب المجاملات العقيمة لنيل رضا الاخرين ، ربما عبقري الفكر..

سيلين : حلو ....

ادهم : خلصت الاسئلة.

سيلين : اي خلصت شكرا..

ادهم : عفوا يلا اخذي راحتج..

اشرلي بيده يعني تفضلي ..كمت وكفت وكتله.

سيلين : شكرا جزيلا على كلشي..

ادهم : عفوا.

الفصل الخامس عشر من هنا