رواية بنات الحجي السعيد الفصل الرابع عشر بقلم شمس العراقية
بيداء ـ عصماء بس فهميني السالفه مالك وين لگه باسل وحجه وياه ومالك مستحيل يسويها .
عصماء ـ والله سألي نفسج هالسؤال أنتِ أعرف بمالك وربع مالك ، تعاي فهمي باسل هالحجي مالك ما يسويها مأمنه حضرتج ، شدعي عليج ولج شدعي عليج .
ـ عصماء فدوه لعينج باسل شگالج تبجي گلشي ما فهمت منها وأجتي أمي على صوتي .
غنيه ـ شگو شبيج هاي عصماء شبيها أختج
بيداء ـ أي عصماء گبل أخذت موبايل مني
غنيه ـ عصماء يمه شبيج
عصماء ـ يمه
ـ يبعد أمج ليش تبجين منو وياج تعاركتوا أنتِ وباسل
ـ بعدين أحاجيج
ـ وين رايحه تعاي حاجيني ليش تبجين صوتج گوه يطلع ولج يمه شبيج وكعتي گلبي باسل ضربج
ـ ماكو شي يمه لايضل بالج عليه هسه لازم اروح
ـ تعاي عصماء والله گلبي حس أكو شيء من البارحه ما خابرتيني وأنتِ يوميه تتصلين عليه .
ـ يله يمه باسل هسه يجي
ـ عصماء بنيتي سدت الخط هاج رجعي خابري عليها شبيها صوتها مطبك سوده بوجهي يمه ما خلت بيه حيل خابريها
ـ أي يمه جاي أخابر مغلق قفلت موبايلها
ـ يا ستار خابري على باسل
ـ يمه عوفيها گالت بعدين أحاجيج
ـ لا شعوف منها أختج غصه بصدرها بله صار عليها شيء أني زوجتها ارتاح لو ينشلع گلبي ولج يمه معصومه منو بجاج ها خابرتي باسل
ـ ما يجاوبني
ً ـ گومي جيبي موبايلي أخابر على عمتها
ـ يمه يجوز مشكله بينهم وهسه تخابرين عمتها وتصعدلها وتعرف عوفيها هي تتصل علينا .
ـ وأني أضل أنتظرها لما تتصل شيصبرني گلبي ثكبت بي نار ومعصومه تبجي واني كاعده مربطه ياربي فدوانتك عينك على بنيتي والله فقيره والبزونه تأكل عشاها ، شجاها جانوا يمي مثل البلابل يباوع على طولها شصاير وياها .
ـ ضلت تفتر وخايفه وأني هم متت من الخوف يربي مالك شلون يراسل باسل أتوقعها من الكل الا مالك منين طلعتلي هالسالفه أسد باب ينفتحلي الف باب
ما اخلص من هالماضي أنوب على أختي .
ضل بالي يمها وكلما نتصل عليها مغلق وأتصلت على باسل ما يتحصل رجعت على الواتساب أشوفه لكيته حاظرني! وعلى الأنستا هم محظوره يعني عرف گلشي عني حسبي الله عليك مالك شگد حقير شوهت صورتي كدامه خرب بحظي وبعقلي أني وين جانتلي هالسالفه ناقصه قهر .
لليل أتصلت عليها حصل وجاوبتني الو عصماء وينج
عصماء ـ لاتتصلين عليه
بيداء ـ بس فهميني بالي يمج وأمي خطيه تسأل عليج .
ـ شفهم منج خلص أنكشف المستور ماكو شيء يضل مضموم عبالج تلعبين بكيفج ما محسبه حساب لأحد تمرلج هيج بارده مبرده
ـ مالك وين لگه باسل أحجيلي السالفه
ـ لاتتصلين بيداء باي
ـ تعاي عصماء على أقل طمني أمي .
ـ بعدين أني أخابرها
ـ قطعت الخط وما فهمت منها گلشي ومرت ساعتين وأتصلت على أمي حجت وياها وأني حاطة أيدي على كلبي لاتحجيلها .
غنيه ـ بس هيج ، جان صبرتي يا يمه على كيفج بالهداوه هو يجيبج والرجال ما يحب المر تعانده ، يله الحمدلله طمنتي گلبي ماشي بنيتي الله وياج .
بيداء ـ ها شگالتلج
غنيه ـ تريد تجي علينا وما قابل ومتعاركه هي وياه وهسه تراضوا همزين عبالي صاير شيء وياها حتى أيدي على الشغله ما تأخذ من ساعة سمعتها تبجي
ـ الحمدلله .
ـ أنتِ هم خابريها وسألي عليها هاي أختج لاتكطعين بيها .
ـ أي أن شاء الله عفتها ورجعت عبالي أحجي وياها وعلى الواتساب هم ما موجوده ضل بالي يمها دزيتلها رساله عصماء بس فهميني حبابه منو مراسل باسل شافتها جاوبيني عاد
عصماء ـ مالك
ـ يعني مو مهيب شافتها وما جاوبتني يا حقير يا مالك ما توقعتها منك ليش يانذل وكل ظني ما تسويها ومأمنه بيك وأكول مالك ما يطعن بيه ويحجي عليه لا اني الغبيه أمنت والمفروض ما أمن وأثق بأي شخص أمداني وأمده گلبي وأكيد أخذ حسابه من متابعيني بس قفلت حسابي خرب بحظي أي والله وحظي السگط
وصلتني رساله من نائل؟
نائل ـ مساء الورد للورد
بيداء ـ جاوبته هلا مساء النور
ـ شبيج
ـ شبيه
ـ شو حسيت بيج ضايجه
ـ هذا منين أجاه الأحساس جاوبته لا ما بيه شيء
ـ لاتشغلين بالي
ـ الله لايشغل بالك على محب ، ما بيه شيء
ـ وأنتِ أول المحبين والله
ـ شكراً
ـ العفو
ـ نائل وين أنت
ـ بالبيت ليش
ـ لا هيج سألت ، لو صاير شيء جان گالي
ـ ما تجين على أختج
ـ ليش شبيها
ـ ما بيها شيء بس گلت ما تجين عليها ونشوفج
ً ـ ها تمام لا والله عندي دوام ما أكدر أجي
ـ براحتج عيني
ـ عفته وما أعرف من أحجي وياه يجيني شعور الأمان والراحه عكس الباقين حتى أحس كل كلمه يگولها هو صادق بيها ومبين عليه واكع بحبي وأني سوالفي گافي عليه بهل أثناء وصلتني رساله من مهيب
مهيب ـ مشتاقلج
بيداء ـ ما جاوبته
ـ ليش ما تجاوبين
ـ مهيب أني وين وأنت وين
ـ ليش شصاير وياج
ً ـ عندي مشاكل أهلي محاربيني بالأخص بعد ما انكشفت حتى من دراستي يردون يبطلوني حياتي عذاب يعني ما ناقصه قهر ، رجاء لاتراسلني .
ـ أكدر اسأعدج
ـ لا ما تگدر .
ـ أسف حبيبتي گله بسسببي
ـ مهيب أحنه أنتهينا رجاء لاتراسلني وحساباتي راح أقفلهن ولاتزعل مني بس شيء أكبر من طاقتي
ـ ماشي مهم تكونين بخير ما أريد شيء ثاني أنتبهي على نفسج
ً ـ باي
ـ الله وياج حبيبتي .
ـ نهيت المحادثه وياه وحذفت كل حساباتي ما بقيت ولا حساب وتذكرت نائل! خل يصفى بالي ويصير خير ومر كم يوم ورجعت سويت حساب جديد ودزيت طلب لنائل وصلتني رساله على رقمي
نائل ـ أني نائل .
بيداء ـ نائل ومنين جبت رقمي
ـ جبته ، ليش حذفتي حسابج وأختفيتي .
ـ أكو خلل بكلمة المرور ما رابطته على الرقم وبزعني كمت حذفته وعندي دوام مالي خلك .
ـ أي أحسن ، أختج عصماء يمكن ما عدها حسابات لان هسه دورت متابعين باسل ما لكيت الها حساب
ـ أي ما عدها بس واتساب هي من يومها ما مسويه أي حسابات حتى من تزوجت ما سوت من النوع ما تحب هاي هالأمور والموبايل تستخدمه بس على گد الأتصال
ـ حلو بس الواحد هم يمل وضوجه على أقل بس يتصفح .
ـ أني لما صديقاتي فلا أسوي بعد
ً ـ وأني
ـ شبيك
ـ ما تسألين عليه
ـ ليش اسأل عليك شبيك
ـ بيداء
ـ ها نائل
ـ أني حيل معجب بيج وطگ گلبي من عدم فهمج
ـ شكراً
ـ عوفيلي الشكراً
ـ تمام
ـ وشيلي الرسميات ما أحبها
ـ شو عبالك صرت عصبي
ـ أي
ـ خلص لاتضوج ما جاوبني وعفته على راحته ما أريد أتعمق وياه وأنصدم بي لليل رجع راسلني
ـ توقعت تتنازلين وتسألين
ـ أنت رحت يعني ضايج مني
ـ منج أضوج ليش يابه
ـ ما أدري
ـ أنتِ ما أضوج منج كافي عقلي مشغول بيج
ـ ها
ـ أي والله وگلبي هذا سالفته سالفه
ـ أبتسمت مبين عليك حباب
ـ هو أني حباب وأنتِ تنحبين وحبيتج
ـ من شوگت حبيتني
ـ من يوم شفتج وحجينا ضليتي أبالي وكلما أشوفج يزيد هالأعجاب ويوم عن يوم روحي أدور وراج وعلى أخبارج وبالعزيمه عفت شغلي وبقيت بالبيت علمود أشوفج .
ـ لهل الدرجه
ـ أي والله
ـ وبقينا نحجي ويوم عن يوم يزيد هالتعلق لما لكيت نفسي واكعه بحبه واللي حبيته بعلاقتنا بيها أمان وثقه أكثر من الحب ويحبني بطريقه ألاحتواء كأنما شيء ثمين ويخاف يضيعه كلش حريص عليه وعلى زعلي وباله يمي وين أروح وين أجي ، حبني حب ما جنت مخليته أبالي بعيد عن سوالف الحب وخرابيطه والتفاهات العشتها وخربت بيها نفسسي .
بيوم جنت بالبيت وأجتي عصماء ومن زمان ما جايتنا دخلت ما باوعت بوجهي وأمي طلعت واكفه ويه باسل بالحوش سلمت عليه وما رد السلام عفته عشتوا لاترد.
رجعت عليها شلونج .
عصماء ـ بخير الحمدلله .
ـ أسفه صارتلج مشاكل بسسببي .
ـ تأسفي على نفسج وصورتج صفر كدام باسل
ـ كلمن عنده صوره على نفسه
ـ أذا قصدج عليه هو رجال بس أنتِ بنيه شتگولين لنفسج ولو صلفه مو بيدج من طلعتي سلمتي عليه
ـ شتردين أسوي هسه واللي صار صار شطالع بيدي
ـ عوفي سوالفج وبلة مهيب عفتي أكيد لا ،لأن أعرفج
ـ لا والله عفته وكل حساباتي حذفتها ما بقيت شيء من الماضي
ـ يعني عفتي الماضي بس كون الماضي يعوفج لان مالك جنتي مأمنه بي وبالأخير أنصدمنا بي من دز كل تاريخج وصورج لباسل حتى أني أنشلمت بهل التاريخ الأسود مثل وجهج الله ياخذج يا عار .
ـ دفعتني قوي وطلعت على رجلها وعفتها ما حجيت وياها خفت ترجع تحجي لأمي وتفتح دفاتر قديمه وأني قفلت گلشي وبديت من جديد .
لليل جانت بيت جدي معزومه على العشه ومن أجتي جنت أكلب بموبايلي گبل هجمت عليه سحبته مني شنو معناها جيبي موبايل عصماء لاتصيرين حقيره
عصماء ـ ويامن تحجين ويه مهيب مو رجعتيله أكيد
بيداء ـ لا والله عفته جيبي موبايلي اخذته وما كدرتلها عصماء عوفي لاتكلبين هاي خصوصيات حرام عليج .
ـ خصوصيات مو! ليش مو فضايح وطيحان حظ
ـ ضلت تگلب وتقرأ وأكيد شافت المحادثات أني ونائل
ـ منو هذا !! نائل .
ـ جيبي موبايلي عوفي گافي عاد جيبي .
ـ أنوب نائل يمصخمه أنوب نائل يعني وتالي وياج شنو من بنيه أنتِ من واحد لواحد ما تكدرين تعيشين حياتج من دون رجال ولج شــنو أنتِ شــنو .
ـ تقربت ضربتني قوي وصحت بيها عوفيني كافي تتدخلين بگلشي بحياتي گافي حقاره كرهت گلشي بسببج .
ـ أتدخل لا والله زحمه ست بيداء ولج حاجيني من شوكت تحجين وياه
ـ وأنتِ شعليج بيه گامت تلطم على وجهه بخبال وترجع تضربني عوفيني لاتضربيني همجيه
ـ ولج ويه نائل تردين تصخمين وجهي تردين تهجمين بيتي على الأخير ما گافي رجلي صار يعرف گلشي أنوب حمايه صخام الصخمج ويه نائل .
لا لا أني هيج ما عاد أسكت وصلت حدها لازم أبلغ أهلي بكل سوالفج دام وصلت بيج تحجين ويه حماي وعادي عندج أذن أنتِ ما خايفه من أحد بس هسه أشوفج الخوف على أصوله .
غنيه ـ شگو شبيجن متعاركات
عصماء ـ تعاي شوفي بنتج عايشه بالدلال شمسويه شمبدعه من مالك لمهيب وهسه أجه لدور لـ نائل منسقه وياه .
غنيه ـ شـنو هالحجي مهيب منو
عصماء ـ أني صوجي ما حجيت عبالي أدمي وأتوب بس طلعت غلطانه الأفنديه بنتج
بيداء ـ حجتلها گلشي من مهيب وأني منزله رأسي وصلت نائل وصلتني ضربتني وجرتني من شعري وتضرب بقوه وتحجي وتغلط
غنيه ـ ولج تردين تصخمين وجهي تردين تنزلين رأس أبوج بالطين وتجيبين العار ولج شيكولون علينا ما عرفنا نربيج أنوب رجعتي على أبن سعيد وتالي وياج بيداء اذبحج وأطم عارج .
عصماء ـ لا هي عاجبها تعيش عيشه الجلاب وتنسحل سحله زينه وگتله تنعنع عظامها علمود تعرف شلون تعيش وتصير مثل هالبنات تفكر بأهلها قبل لاتفكر بنفسها بس لايبوي العدنا ما تفكر حتى بنفسها انطيها بس سوالف أدبسززيه ومن واحد لواحد .
بيداء ـ عطت بيهن غلطت والأسلام غلطت بس ما كفرت وعفت كلشي وتبت وسويت مثل طلبتي بس حماج هو يركض وراي هو أجاني والله ما جان أبالي أحجي وياه وضليت اتجاهله بس هو ما عافني يحبني شسويله يحبني شنو الحب عيب لو حرام وأني هم حبيته ولو شتسوين ما أعوفه أفتهمتي نائل ما أعوفه أعوفكم كلكم وهو ما أعوفه .
غنيه ـ يا مصيبتج يا غنيه .
بيداء ـ لا مصيبه ولا هم يحزنون الولد يحبني ويريدني ومثل ما أنطيتي عصماء لباسل انطيني لنائل .
عصماء ـ شوفي ولج نائل تشيلنه من رأسج لا قسم بالله هسه أروح بيت جدي وأزوع تاريخج المصخم كله وأخليهم يذبحونج هل الدقيقه لان أنتِ وحده قليلة شرف .
ـ روحي گوليلهم أبرگها من ساعه دام أني وحده قليلة شرف هو فعلاً أني هيج بس ما توقعت أتعيير منج وأنتِ أختي ومن حجيتلج مو معناها أني راضيه على نفسي وسوالفي ماكو شخص يغلط ما يتندم وكلشي صار بالماضي بس ليش من قررت أعيش واصلح نفسي تجين أنتِ تحاربيني وتردين ذبحي لان حبيت حماج لو لان تعرفين تاريخي .
ـ لا لان أعرفج تأريخج وما أريده يتورط بوحده مثلج وأخوه يعرف گلشي راح يسكتلج لا طبعاً يغردلج بالعشره .
ـ نزلت دمعتي وضليت مصدومه بيها وأمي باوعتلها وكالت
غنيه ـ ليش عصماء ليش مو أنتِ أختها وبنتي العاقله وعقلج يوزن بلد والفاهمه ليش هيج تحجين على أحتج يعني غلطت ما لازم تعيش وشنو أخوه يعرف گلشي ليكون حاجيتله ولج .
عصماء ـ ما قصدي من نار گلبي تعصبت وأنفعلت
غنيه ـ حاجيني شنو أخوه يعرف گلشي ليش حجيتي لباسل عن سوالف أختج ولج
عصماء ـ لا يمه شجايني احجيله بس أقصد اذا عرف هي عدها علاقه بأخوه نائل ما يسكتلها وعيب من عيالي
غنيه ـ متأكده
عصماء ـ أي يمه شبيج شو عفتيها ورجعتي عليه
غنيه ـ هالموضوع ينسد وما ينفتح وباسل ما تحجيله وأذا حجيتله عن علاقتها بأخوه أغضب عليج ليوم الدين واني احاجيها تعوفه وتنهي كلشي وأول وأخر مره أسمعج تعييرين أختج بماضيها أكص لسانج اذا حجيتي وعيرتها .
عصماء ـ يعني عفتيها ورجعتي عليه فوك أغلاطها وسوالفها ترجعين تحاسبيني وهيج مقهوره عليها ما جان تشوفين الها حل ومن عرفتي بسالفتها ويه مالك ليش سكتي ودزيتها معهد وهي شافت ماكو عقاب لغلطها رجعت أنكس وحبتلها متزوج هم مو أعزب ومن كشفتها وسگتلها عبالي أتوب وتبطل عافتهم رجعت على حمايه ما كافي خراب حياتها تريد تخرب حياتي .
ـ وأنتِ شعليج شجابها عليج وحماج أني أحاجيها وامنعها تحجي وياه واذا هيج يحبها ويريدها خل يتقدملها وتتزوجه شگو بيها أنتِ ليش معارضه
ـ لا هاي هي أني ما الي دخل بعد شتسوي خل تسوي على شنــو أحرك بدمي وبالأخير طلع الغلط گله مني وأني ما معارضه بس ما ردت يعرفون بعلاقتهم وبعدين يصير كلام وأني الاسمعه وعماته اذا عرفن يدگن طبل عالعموم أني اسحب نفسي وأنتِ أمها أعرف بيها وبمصلحتها أني حجيت ونصحت وتسترت بما فيه الكفايه .
بيداء ـ شمرت الموبايل وطلعت وأمي باوعتلي وضربتني راجدي وگامت تحجي عليه
غنيه ـ شوفي ولج أكب عليج نفط واحركج واكول طگ عليها الطباخ وماتت سوالفج سگتنا عليها لان ننفضح نوب رجعتي على أبن سعيد وهسه تعوفينه لا أكص راسج، تعوفينه فاهمه فتحي وطلعي السيم كارت .
بيداء ـ خلص أعوفه والله راح أعوفه وأنعل هيج حياة فتحت الموبايل وحذفت الواتساب وطلعت الشريحه أخذتها وأخذت الموبايل هم وشمرت عليه موبايل عصماء القديم .
غنيه ـ شعندج أنتِ هاج هذا كافي عليج والله شلعتي گلبي شوكت أرتاح منج ومن همج .
بيداء ـ عافتني وطلعت وحيل أنقهرت وبجيت ودخلت عصماء تباوعلي بحقد واكذب اذا أكول ما انقهرت ليش هيج سسويتي ما جاوبتني والله حبيته وأول مره أحس بروحي أحب وعلاقتنا مو نفس ما تتخيلين والله حبنا نظيف وهو يخاف عليه صوره ما طالب مني ليش هيج حقرتي وياي وخليتي أمي تحسب مني الموبايل .
عصماء ـ نائل تشيلنه من رأسج شـنو نسيتي باسل يعرف بگلشي زين أمي ما لاحظت عليه من جفصت لان هو محلفني ما أكول لاحد هو يعرف وهو طلب أقفل الموضوع بس اذا شافج وصلتي أخوه شيء أكيد ما يسگت
ـ خوما يحجي لـ نائل
ـ شمدريني أني گولي لنفسج هالحجي من راسلتي وخليتي يحبج ويتعلق بيج يعني عفتي الزلم كله رحتي على نائل .
ـ ترى هو أجاني هو أعترفلي بحبه مو أني رحتله .
ـ أيبــاه هو اليحبج!
ـ ليش ما يحبني شبيه ترى بعدني بنيه
ـً أستغفر الله منو جايب طاري
ـ لعد ليش گلتي أنتِ وحده قليلة شرف أكيد قصدج أني ما عندي شرف لان سلمت نفسي لمالك ومهيب
ـ ليش الشرف بس أذا سلمتي نفسج ،الشرف گلشي يخصج صورج تفاصيلج صوتج وأذا گلتها فه من قهري منج ومن جذبج عليه من كشفتج أنتِ ومهيب وحلفتي وعدتيني أخر مره وهسه اجي وأنصدم بيج على علاقه ويه حمايه شتردين مني أحجي وياج .
ـ أنتِ ما تتفاهمين گبل گمتي تصيحين وأجتي أمي وحجيتلها وضربتني باعي جسمي مطكع گله بسببج وبالأخير گمتي تعيرين بيه عبالك بس أني حبيت ولاتنسين نفسج أنتِ هم حبيتي علي نجم وماكو وحده بينا ما تغلط ويه حبيبها خاصه بعد ما تثق وتأمن بي بس عيب على الوحده التعيير .
ـ بس ماضي يختلف عن ماضيج لاتشمليني الزمي حدج .
ـ أعرف يختلف بس أني قصدت لو عندج موبايل وحساب جان غلطتي وياه ودزيتي صورج .
ـ لا حبيبتي متوهمه حتى لو عندي ما اغلط مثلج أكو هواي فرق ومو كل وحده لزمت موبايل غلطت مثل اغلاطج اكو أمهات لازمات موبايل يعني هذا مو مقياس لاتعممين وتطلعين روحج ضحيه الموبايل الموبايل ما گالج دزي صورج وعرضي روحج ، أنتِ من الأساس ما رايده ستر لنفسج وعقلج هذا منومته بحجه واقعج وتطلعين أعذار علمود تغفرين لنفسج وحتى التعرفتي عليهم مو هما السبب السبب منج لما شافوج مرخصه نفسج وبايعتها ما تجاوزا حدودهم وياج ، فه لاتخلين نفسج وياي بنفس الخانه حبنا اني وعلي نجم شيء وسوالفج شيء ثاني .
ـ ليش هيج قاسيه حتى أمي أرحم منج عليه لهل الدرجه حاقده عليه واذا على مالك اني ما دزيته على باسل شسويله هو حقير
ـ مالك شجابه علينا نعرفه يعرفنا لما أنتِ انطيتي أسرار العائله وانطيتي نفسج استغفر الله ، خلص سدي الموضوع ونائل عوفي لاتحاولين تتواصلين وياه ديري بالج بيداء لاتسويلنا سالفه ما ناقصه وهاي مرت أبوهم تريد الزله علينا ولج والله عيني ما بيه احطها بعين باسل من سوالفج .
ـ لا خلص هاي هي .
ـ نشوف .
ـ نامت وأني مقهوره منها وحاقده عليها وضليت أفكر بكلامها وتالي نمت ومن الصبح باسل أجه أخذها وأمي كامت تحجي عليها
غنيه ـ شبيج زعلتي وخابرتي رجلج يجي يأخذج يعني الأم ما تحجي ما تعصب بسرعه تتزعلن
عصماء ـ منو زعلان منج والله ما زعلانه هو خابرني گالي حضري روحج بالطريق راح أوصل
غنيه ـ ليش مو گلتي أضل ثلاثة أيام شو بس يوم وكلشي ما فهمت منج من ورة أختج زعلتي ولفيتي رأسج ونمتي وهسه كعدتي شايله جنطتج تمشين اجازتيش هاي .
ـ أمري مو بيدي والله ، هو هسه خابرني حتى ما گالي من الليل فدوه لعينج لاتزعلين مني والله ما خابرته هو اجه .
ـ جذابه أنتِ خابرتي لان حجيت عليج وزعلتي
ـ لا والله ما زعلانه منج وليش أزعل ام ومن حقج تحجين وتكسرين راسي هم وراسج أبوسه بس لاتضوجين ويجي وكوليله اذا اني متصله عليه أصلاً موبايلي عفته
ـ لا ما أكوله هسه يكول دازه أمها تتوسط شسويلج روحي لبيتج وعيالج اني بشنو أفيدج بعد ، اجيتي بس شبعتي قهر من عدنا .
ـ يمه لا هيج تحجين فدوه رحتلج والله هو أجه ويمكن لان حامل وخالتي تسأل عليه .
ـ ليش أنتِ حامل
ـ أي
ـ ليش ما حجيتي ، شو هسه جان بقيتي لما ولدتي
ـ ما صار مجال ولا كعدنا وسولفنا
ـ سوده بوجهي أني حجيت عليج ونمتي زعلانه مني
بيداء ـ حضنتها وأثنينهن يبجن وباوعتلي وتالي ما صبرت أخذتني بحضنها تبوس بيها وتبجي وأمي تباوعلنا .
عصماء ـ والله أحبج ومن خوفي وحرصي عليج احجي لاتزعلين من عندي
بيداء ـ ما زعلانه منج أنتِ أختي والف مبروك ودعتها وأجه باسل حتى ما دخل يم الباب سلم على أمي وأخذها وراحوا
غنيه ـ عبالك مفارگها سنين لما البارحه جانت يمك ما صدك خلاها بالسياره وأخذها أي يامن تعب يامن شگى يا من على الحاضر لگىٰ .
بيداء ـ الله وياها ورجعت باوعت فراشها فارغ وأمي حيل ضاجت وحست بتأنيب الضمير لان حجت عليها كله بسببي اني فعلاً مو أدمي .
وقررت أتغير وأول تغير جان بيتنا گمت اشتغل وأساعد أمي وأغسل ملابسهم وأطبخ وامي لاحظت وحيل تفرح وتخابر عصماء تحجيلها عني وفرحانات بيه بس أني ما فرحانه بنفسي المشكله الصعبه من تلگي روحك عايش بفراغ ومضيع شيء وخطر على بالي نائل وما أكدر أتواصل وياه وممنوع الزم الموبايل ..
__________________
عصماء ـ جنت حاسه سعادتي ما راح تكتمل وهل الأحساس ضل مرافقني بكل للحظات الحلوه العشتها
گملنا عشرين يوم من زواجنا وعشتهن بكل تفاصيلهن أحلى أيام عمري بس هالعشرين يوم عادتهن عمر مو أيام ...
گملت العشه وصعدت غرفتي ، ونظفتها وغسلت ملابسه وواكفه أكوي ورن موبايلي باسل جاوبته هلا حبيبي .
باسل ـ وين أنتِ .
عصماء ـ وين يعني بالبيت ليش
ـ أقصد اذا جوه صعدي للغرفه جايج
ـ والمحل وشغلك خير صاير شيء
ـ أنعل المحل والي يشتغل بي .
ـ ما فهمت منه گلشي وقطع الأتصال بوجهي وخفت طفيت الأوتي وسمعت صوت خطواته سريعه أنفتح الباب وأنسد بقوه باسل شگو .
ـ أني أكولج شگو .
ـ فتح موبايله وجهه الشاشه بوجهي محادثات وصور ضليت أقرا وأني مصدومه بالأول مراسلته بنيه على الأنستغرام .
ـ منو گلك مو علاقه وصدكت الجذب الأنكال الك لا تصدك بيهن نماذج تعبانه وخيسه لجذر وأني أكولك علاقه حب وعلى الموبايل ومحادثات وصور مثلهم مثل أختها أثنيهن نفس الخيسه بس الفرق وحده أنطت نفسها وحده لا وكعت برأسك يله أسترها وها حبها ويه علي نجم دام سنتين وكلما تروح السوك تتواعد هي وياه وهو يرجعهم البيت بسيارة خاله
ـ شتحجين أنتِ
ـ أحجي الأعرفه وعندي دلائل عليهن بس مشگلتك ما تصدك بيه وحجيتلك قبل الزواج وتوقعتك تخلص روحك من هالعائله التعبانه بس بقيت .
ولو هنا معروفات عدهن حظ هاي أختها كل الطالبات يعرفن بيها وبسوالفها بس محد من أهلها كشفها والثانيه تتدعي الدين والستر هي وصاحبها عالموبايل وأذا ما تصدك بيه راح أدزلك رقم صاحب أختها أسمه مالك واسأله وهو يسطرلك تاريخ هل العائله
هذا حسابه وهذا رقم تلفونه راسله واتساب اذا تحب أو أتصال بعد براحتك أذا حاب تعرف بالدليل القاطع راسله وتأكد من تاريخ زوجتك وأختها .
ـ گملت قراءه وصلت لمالك هواي حاجيله بحيث ضليت فاتحه عيوني على وسعهن وأستوقفت لمن گايله
ـ أني حتى خابرت أختها عصماء وحذرتها ووصيتها على أختها وهواي حجيتلها بس هي الظاهر ما سوتلها شيء لان بيداء ضلت مستمره ويه مهيب وأني حجيت العندي وحبيت أخليك بالصوره لان من حقك تعرف .
باسل ـ ليش من سألتج نكرتي ليش گلتي ما عندي شيء وگتلج متأكده گلتي أي وجاوبتيني بنص عيني شنو من صلافه عندج تنكرين وتجذبين عينك عينك وعادي عندج گملتي التمثيليه للأخير ولا كأنما مسويه شيء
ـ لان فعلاً ما مسويه شيء وكل اللي أبالك مو صحيح
ـ أنتِ تعرفين شـنو أبالي لج عقلج ما يتخيلج شنو جنت راسم ابالي عنج ، شفتج قطعة ثمينه ونظيفه حيل گلت هاي مالتي محد شايفها وسامع صوتها غيري ولج حتى ما سألت عنج أكتفيت على أختيار أهلي وعلى نظرتي الج بالمحل .
لدرجه تركت حب حياتي والماضي وگلشي عشته وأني عقلي وگلبي ما يلفظن بس عُلا
عايشه بدماغي تفكيري بس بيها مستقبلي وأحلامي بس هي ، هذن كلهن جبرت نفسي وضربت گلبي ومشيت وخليتها لكمتها ودمعتها وحده وهي ما عدها بس الله وأني كل اللي بحياته كواويد وكل هذا وعفتها وفتحت صفحه جديده وياج قرررت أعيش حياتي ويه أنسانه حتى لو جان أختيار أهلي يكفي النظره الشفتها بيج ما يهمني زواج تقليدي وهاي الأمور والماضي مالتي گله صار عندج ما خفيت شيء عنج
ومن صارت المشكله سألتج وجاوبتي ماكو شيء ليش نكرتي شنو الجان بينكم وخايفه تحجينه اليه!
ـ والله العظيم ما صار شيء بينا لاتفكر غير تفكير فقط مكالمات على الموبايل ورسائل عاديه مو مثل ما عقلك يفسرلك حتى حسابات وهالسوالف ما عندي وموبايلي جان صرصور
ـ بس جذبتي عليه وخدعتيني لو حاجيتلي يمكن جان تفهمت بساعتها كله السبب منج أنتِ بلشتي وأول غدر أجه منج وأني أحارب روحي حتى ما أرجع لعلا وما أكسر گلبج وأنتِ أشسويتي جذبتي وهدمتي الثقه البينا وأني مثل الأعمى بيج وأنتِ جنتي مخابرات ومراسلات أنت وياه كل هذا نكرتي .
ـ ما نكرت
ـ لا نكرتي وغافلتيني وضحكتي على عقلي كل هذا علمود لا أعوفج مو ،لح مثل ما أنتِ عندج ماضي أني عندي ماضي أسود من جعب الجدر وما خجلان منه
ـ أنت رجل ومباح الك أما أني ما راح تتتقبل وخيالك راح يرسملك بعد الموبايل والمخابرات صور وكاميرات وحتى لقاءات وأحتمال حتى تصدك التقينا وبينا علاقه مثل ما صار بينك وبين عُلا
ـ شلون تردين مني أصدك وأثق بيج وسوالف أختج ويه مالك وغير مالك والصور لا أنوب أنتِ حاجيه ويه مالك بعد وبعد لج أني مو بس مصدوم بيج لان نكرتي مصدوم بنفسي لان أنعميت بيج وبگلشي يخصج
ـ أني ما الي ذنب بأغلاط أختي واللي حجه وياك هو نفسه الغلطت وياه لايصير شريف ويطعن بينا وأذا حسبت هالشيء أستغفال عليك هذا هو مثل ما تريد أني أعيش وياك وأنت أرجع لعلا عليش مسوي فضل وتحارب روحك علمودي وعلمود مترجعلها لا ارجعلها وارجع كمل حبك وياها والك مني يمين يا باسل لا عليه بيك ولا أحجي لأحد بس تذكر أنت مو نفس الأول البگلبي .
ـ أي أرجعلها ليش لا والماضي يصير حاضر لان طلعت الوحيده تستاهل الثقه ، ورغم كل اللي صار وكل الحجي الحجو عليها أهلي ما تشوهت صورتها بداخلي لأن عُلا
عدها ثقه بيه حتى من ترگتها أحترمتني وأحترمت قراري لأن صريحه ما عدها وجهين مو مثل بعض ناس من فوك هالله هالله ومن جوه يعلم الله .
ً ـ هذا هو مثل ما تريد ، عفته وكعدت على الجربايه أنطيته ظهري وبداخلي غصه تذبح وسمعت صوت الباب أنفتح باوعت ماكو راح ، كعدت أبجي ليش هيج ليش مو عايشه بأمان الله وحبيته وسعيده ومرتاحه بالأخير
گلشي بلحظة يتدمر وأنزل لصفر خاليه من كلهن
خابرت بيداء وحجيت وبجيت بس ما برد گلبي مقهوره منها ومن نفسي ومن عنده وكلامه مقهوره من الدنيا كلها ، شويه ورجع غير ملابسه وأني رجعت أكوي
وهو يلبس بملابسه گال .
باسل ـ موضوع أختج ينقفل وما أريد أحد يعرف أني أعرف مو تروحين تگولين لأمج باسل يدري .
عصماء ـ تمام ، گمل وگف رش عطر وطلع بقيت حتى على العشه ما نزلت حابه أضل لوحدي وتالي صعدتلي جنات .
جنات ـ أمي تسأل عليج ما نزلتي تعشيتي
عصماء ـ ما جوعانه عندي گوي ملابس باسل أخلصهن شوية أنوب أنزل ما حجت شيء ونزلت باوعت الساعه ما أجه على العشه تالي گمت سبحت لان جسمي نار من القهر صخنت وسبحت گبل لفيت رأسي ونمت .
كعدت الفجر أصلي نايم ومنطيني ظهره گمت صليت وضليت كاعده ما أجاني النوم وصار وقت كعدته ورن المنبه مالته هو ما اباله يكعد يمكن راجع متأخر گمت كعدته باسل أكعد ما ضل وقت عليك .
باسل ـ عوفيني هسه أني أكعد .
عصماء ـ عفته ومر الوقت وهو نايم باسل أكعد
ـ گتلج عوفيني .
ـ عفته ونزلت حضرت الريوك وعيني عالدرج وأنفتح الباب أجه عمي گملت عليك باسل
سعيد ـ صباح الخير عمي
عصماء ـ هلا عمي صباح النور
ـ باسل متحضر
ـ أي عمي هسه جاي يبدل
ـ صعدي كعدي عمي ما ضل وگت
ـ صعدتله وهو نايم ، باسل عمي أجه ويصيح الك
ـ تالي وياج أنتِ وعمج فوك رأسي
ـ كيفك لاتكعد دفر اللحاف وكعد نزلت وعفته وعمي واكف يم الباب دخلت صبيت الجاي وسمعت صوتهم
سعيد ـ تريك والحگني وشعندك تنام متأخر مو عندك كعده الصبح ، رجعنا باسل .
عصماء ـ دخل شرب كلاص ماي ، تتريك ما جاوبني خله وطلع هو اني صوجي والله العظيم مسويه ريوك وخابصه نفسي رجعت خليت الغده عالنار ونظفت كملت شغلي وصعدت غرفتي شفت ملابسه شلتهن ونظفت الغرفه ورجعت گملت نومتي .
مرت عشر أيام وهو عازل نفسه وما يحجي وياي وزعلان ومن أحجي وياه گوه يجاوبني على گد سؤال والجواب وأني شفته هيج صرت مثله ولا اسأل وين رحت وين يجي تجاهلته تماماً على گد ما أسوي شغلي أصعد غرفتي ومن يرجع أني فاتحه الأيباد على اليوتيوب
أباوع مسلسلات ويدخل هو دوريه عنده يضل بس يفتر أريد أعيط بي بس لازمه أعصابي ..
باسل ـ هاي مو كلادتج شكطعها .
عصماء ـ أنكطعت بالحمام من سبحت باوعلي ونظراته مدري شلونها
ـ وشدعوه هيج عنيفه
ـ ما جاوبته
ـ خليها بعلبه أخذها وياي
ـ گمت حضرتها وهو وگف يرش عطر وسبح نفسه بالعطر تجاهلته ونزلت وسمعت صوت الشيشه وكعت وگملت مشيتي ، جنت بالمطبخ من طلع باوعتله من شباك طلع لوحده ما أخذ سيارته! تجاهلته وسويت جاي وكعك وكعدت اني وخالتي واجتي ليال خالتي گالت
هيفاء ـ تحضري نروح نتسوك
ليال ـ عصماء منا وهيج أنتِ أستلمتي المهمه أني اجاني أعفاء عام .
عصماء ـ ماشي خاله صعدت وبالأول گلت ما أكوله بعدين گلت لا الزعل شيء وأحترامه شيء بعدين يأخذ عليه نظره لا عصماء ، راسلته ولاحظت نشط الأن!!
راح أروح ويه خاله الماركت ، كبل شافها جاوب عاد
اخذله صفنه الحلو .
باسل ـ روحي عيني
عصماء ـ عيني ليا ادبسزز صارلك عشرة ايام ما تحجي وياي شوكت صرت عينك ما جاوبته لبست ورحنا تسوكنا وتأخرنا أذن واحنه ما راجعين لان جان إزدحام ورجعنا لكيته بالبيت يحجي ويه أخواته ويضحك والوضع طبيعي عنده بس يم عصماء گالب خلقته .
" عزلت المسواك ويه خالتي وأجاه أتصال وعافنا وطلع حتى بالصاله ما جاوب طلع بالحوش! أستغربت رغم ما مخليه بالي لان واثقه منه ومأمنه ما عنده شيء!
الشيطان نكز برأسي وحتى لقاء لاحظت وعيونها تراقبني ما تحملت شلت الفواكهه وگفت يم السنك أغسل وهو گبالي بعدت البرده وباوعتله وهو يحجي ويضحك ويسولف ومندمج وناسي الدنيا كلها ضليت صافنه عليه معقوله يكون راجعلها ما متوقعه منه يسويها وحجاها بلحظة عصبيه نزلت البرده من باوعلي تجاهلته سويت روحي أغسل وبالي مو يمه ما أريد يلاحظ أني شگيت بي وگلبي وجعني معقوله باسل تسويها وترجعلها .
تعشينا طبيعي ومن رحت أصب الجاي أباوعله من بعيد مندمج بالموبايل وخالتي تحجي وياه بس يهز برأسه بس باله مو يمها گبل سحبت موبايلي ودخلت الواتساب نشط الأن!
قدمتله الجاي أخذ الكوب حتى بدون ما يباوع وگبل طلع من الواتساب ، كعدت وأسولف ويه خالتي ما خليت بالي يمه وتالي صعد الغرفه وشويه ونزل كاشخ .
هيفاء ـ ها يمه وين طالع
باسل ـ بالكوفي ويه ليث وسجاد .
هيفاء ـ لاتتأخر بالرجعه عندك شغل الصبح أبوك كام يحجي .
باسل ـ أن شاء الله .
عصماء ـ راح وضليت كاعده وتأخر تالي صعدت غرفتي وغيرت ملابسي وتمددت وعيني على الساعه صارت بالوحده وهو ماگو تالي غلبني النوم ونمت وحسيت بلمساته وأيديه حاوطت خصري يبوس من رقبتي تملمت بأنزعاج لان نعسانه ودارني عليه وأخذني اله وكل ظني خلص تراضينا بس الصدمني كعدت الصبح سابح وطالع ورجع الظهر هو هو يعني اللي صار بينا باليل مجرد رغبه! أنقهرت بس ما بينت اله حتى ما عاتبته ولا گتله أني وجودي بس علمود رغبتك التزمت الصمت ما حجيت بس بداخلي كومة عتب وأستمر الحال أيام والوضع طبيعي عنده وشافني ساكته ما حجيت أنوب زاد عليه بقساوته وجاي يمارس عقوبته على غلطي وسگوتي عن ماضيي وذنبي صار ذنبين وتحمل عليه بذنب أختي .
طلعت من الحمام وهو مندمج يراسل! هنا تيقنت هو راجع الها باوعت المرايا وأبتسمت بينت العكس حبيبي
باسل ـ هــا .
عصماء ـ أريد أروح لأهلي
ـ شعندج رايحه الهم ما صار فتره من جنا يمهم .
ـ هذا هو براحتك
ـ عود أني أوديج بس مو هسه
ـ ماشي عيني ، عاف الموبايل ودخل الحمام شفته يلمض تقربت باوعت عُلا بالانكليزي يتصل قفلت الشاشه وعفته وأختنكت والغصه بصدري ورجعت
أمشط شعري وطلع وباوع شاشة الموبايل وباوعلي ضل مركز عليه أبتسمت أسويلك ماعون فواكهه .
ـ أي سوي
ـ تمام ، گمت سويتله وأجه كعد قدمتله بأيدي أخذها مني وصفنت بعيونه وبداخلي حجيت ليش كسرتني ما جنت متوقعه منك تسويها حاجيته بنظراتي ولو حاجي حرف تنزل دمعتي بس كابرت وگمت غسلت ونمت وعفته كاعد ، الا أخليك بحسرة عتابي دامك رجعتلها خليك على راحتك يا باسل .
وصار مـا يكعد بالبيت بس يتعشى ويطلع مرات جماعته يجون عليه مرات يروح بسيارته ويتأخر يله يرجع وعمي الوحيد ملاحظ عليه ويسأل خالتي ويضل ينتظره
وبيوم خالتي والبنات من الصبح اتفقوا العصر يطلعون وقبل لايطلع العصر باسل خاله والبنات يطلعون وگالوا تعالي ويانا
باسل ـ أي والمطلوب
عصماء ـ گلت اسألك بالأول توافق ، وباوعلي
ـ أي ما عندي مانع وهذا مصرف أشتري أي شيء تحتاجي .
ـ تمام وطلع وتجهزت وطلعنا سويت تحليل لان غايبتلي وطلعت حامل فرحتي ناقصه بس ما تذمرت بالعكس أشكر رب العالمين على أجمل عطاياهُ ونعمته
ورجعت گبل صعدت غرفتي وأجه وحسيته ضايج!
باسل ـ أني ليش أخر الناس يله أعرف
عصماء ـ بشنو
ـ تسوين روحج ما تدرين، حملج ليش ما گلتي أريد أسوي تحليل وحتى ما گلتي على الحمل وهسه أجيت
سمعت من أمي وتفاجأت
ـ وهسه عرفت من خالتي عادي وين المشكله
ـ شو أنتِ گلشي عندج عادي
ـ باسل شبيك أشسويت أني وترجع عليه وگلت تجي البيت وأكولك
ـ وليش ما گلتي تردين تسوين تحليل
ـ ترى صدفه ما جان أبالي ولاحظت غيابها كم يوم وكلت خل أسوي حتى ما جنت متوقعه بروحي حامل
ـ وشگد الج
ـ بعدني بسم الله هو أحنه ما صارلنا شهرين متزوجين بس خالتي گالت أحتمال الحمل صار من بدايه زواجنا وگالت أنتظري كم شهر وتأخذني دكتوره تشوف نبض الطفل .
ـ ها يعني بعد كم شهر وتروحين
ـ شهر ونص تقريباً
ـ الله كريم .
ـ بمناسبة هالخبر الحلو توديني لأهلي
ـ ماشي الخميس أوديج
ـ تخليني أبات
ـ أي أبقي يومين
ـ تمام ما حجينا وحسيته مهتم بالحمل بس ما بينلي
وبالليل من أنام يضل بس يحجي عليه ويعدل بنومتي
ـ نامي عدل شلون تنامين على بطنج
ـ شعليه قابل ملزوك بشعره
ـ عصماء هذا روح مو لعبه ديري بالج على نفسج
ـ ليش ما أنتَ دير بالك عليه .
ـ داير بالي يله نامي .
ـ انطيته ظهري وعفته وأسمع صوت مقاطع وأغاني حب اكيد جاي يتبادلون مقاطع حب بينهم مراهقين زعاطيط جان استحيت اي والله تالي نمت وعفته كاعد يراسل ست الحسن عُلا!
وأخذني لأهلي ورجعت بس يوم واحد حتى ما سألته لان بالي مشغول بسالفة بيداء ونائل ودايخه بيهم وبالطريق أحنه راجعين گال .
باسل ـ شعجب ما حجيتي ولا گلتي أريد أبقى يم أهلي
عصماء ـ أنت أجيت بعد على شنو باقيه خوما ترجع
ـ أمي تسأل عليج وبالها على الطفل وگلت أجيبج أحسن
ـ كثر الله خيرك وخيرها والطفل ما عليه شيء الله الحافظ ما جاوب ووصلني البيت وراح السوك ودخلت بس خالتي كاعده سلمت عليها وصعدت غرفتي لگيتها هوسه نظفتنها وغسلت ملابسه كلهن وأجه وتغدينا واني صعدت هو ضل كاعد ودخلت الواتساب لكيته ناشر حالة حب وغزل وسمعت خطواته عالدرج گبل عفت الموبايل وسويت روحي نايمه .
العصر كعدت ما لكيته گمت جبت الملابس من المنشر
كعدت أرتب وأصفط بالكنتور وأجه من المحل أبتسمت بوجه اليوم جاي من وگت .
باسل ـ معزوم على العشه ، قميصي الأبيض مگوي
عصماء ـ أي بالكنتور ، دخل سبح وحضرتله ملابسه وطلع يدكم القميص ويباوعلي بالمرايا هم تتأخر
ـ حسب ما أدري ويجوز ما أجي
ـ تمام
ـ ليش تسألين
ـ خاف عمي يسألني عليك علمود أعرف شگوله .
ـ لا ما يسأل .
ـ تمام مشيت خليت ملابسه بالكنتور وگال
ـ عازم عُلا على العشه!
ـ بالعافيه مقدماً
ـ الله يعافيج ، تردين شيء أجيبلج وياي
ـ لا أريد سلامتك يكفيني أنتَ تتونس .
ـ يسلمو .
ـ مشيت من يمه ويريد يخلي عطر تقربت وأيديه يرجفون سحبت العطر من أيده وأني خليتله أتونس أمانه ولاتخليها بنفسك، گملت وعدلت ياخة قميصه وسديت الدكمه ومشه وگبل نزلت دمعتي ورجع گبل صديت وجهي تقرب سحب السويج ومشه .
" نزلت ولكيت ليال تسوي عشه كعدت ساعدتها وتسولف على ياقوت وخطبتها وخاله تريد تروح بس أني بالي مو يمها وتالي كملت راحت الحمام تسبح وأني ضليت بالمطبخ ودخل عمي هلا عمي .
سعيد ـ باسل وين .
عصماء ـ أحتاريت شجاوبه
ـ بنتي مو أحاجيج باسل وين .
ـ ها عمي دزيته على مسواك
ـ شوگت طلع
ـ هسه قبل شوي هز رأسه ومشه وراسلته عمي أجه وسأل عليك .
ـ أي وشگلتيله .
ـ مثل كل مره گتله وصيته على مسواك لان خفت أكوله معزوم يم جماعته ويضل يحجي عليك .
ـ ماشي أني أفهمه .
ـ عفت الموبايل وصفنت على روحي أغطي عليه وهو كاسرلي گلبي ورايح يتعشى وياها ، تعشينا وعمي خابر خالتي يسأل عليه .
هيفاء ـ هو هم صغير يا سعيد هسه يجي وين يروح ماشي من يجي أكوله لايضل بالك
عصماء ـ ضلينا كاعدين وأجه عمي وكعدنا وهو ما أجه والبنات راحن الغرفتهن وعمي وخالتي ضلوا كاعدين .
سعيد ـ هذا كل يوميه يطلع
هيفاء ـ جماعته اجو عليه وأخذوا حاله حال هالشباب
ـ مو تزوج ما يكعد يگابل مرته .
ـ بعده شاب شيكعده ، سعيد خف على أبنك .
عصماء ـ وضليت كاعده وياهم تالي گمت صعدت غرفتي ضليت أنتظره وهو ما أجه ما أعتقد يجي هو كالي يجوز ما أجي يعني وين يروح خوما أستغفر الله
وصلتني منه رساله
باسل ـ عصماء الباب ليش مقفول .
عصماء ـ ليش أجييت
ـ لا بعدني ، طبعاً أجي وين أولي، لعد شلون گتلج باب مقفول شگو قافلينه .
ـ خرب نسيت أگولك عمي بايت أهنا يمكن هو قفله
ـ لا بربج شو هسه يله تحجين
ـ راح عن بالي
ـ وهسه شلون قافل الباب
ـ اوكف هسه أنزل أفتحلك
ـ يله يمعوده قبل لا يكعد ويسويلي سالفه .
ـ كمت نزلت والأضويه طافيه وهدوء باوعت الباب ماكو مفاتيح ، فتحت الشباك باسل
ـ ها عيني دبرتيها
ـ لا والله مأخذ المفاتيح وياه .
ـ روحي دوري على نسخه بمجرات الكاونتر وتعاي بسرعه
ـ رحت دورت وكومة مفاتيح واجيت افتح وماكو وأخيراً انفتح يله ادخل بسرعه .
ـ سحبي المفاتيح من الباب بسرعه
ـ سحبتهن وصعدنا أني وياه نمشي عالدرج على كيف ولزمني من أيدي ويسحب بيه ولا عبالك مسوي جريمه وطالع يتعشى وياها ابو النسوان وسمعنا الباب الغرفه أنفتح وصاح عليه
سعيد ـ باسل هذا أنت
عصماء ـ ركضنا ودخلنا الغرفه على كيف وقفل الباب ليش تأخرت .
باسل ـ العشه جان طيب
ـ گالها بضحك أي عافيات ترة هو عباله من زمان رجعت وقفل الباب .
ـ يله عدت سلامات طفي الأضويه لايباوع ويشوفنا كاعدين .
ـ هسه يطلع شايفنا والصبح ندخل تحقيق أني وياك
ـ هاي العايزه رزاله ناشفه عالريك
ـ يله علمود لاتتأخر مره ثانيه وأضل كاعده أنتظرك
ـ كرصني من خدي وضحك
ـ وين أكو منج أم المواقف الصعبه
ـ يله أني راح أنام نعست
ـ شكراً تعبتج وياي
ـ العفو تصبح على خير
ـ وأنتِ بخير .
ـ عفته ونمت وهو نزع قميصه وشمره ودخل الحمام وطلع وباوعلي
ـ ها ما نمتي
ـ طارت نومتي ونظامي متخربط من وراك
ـ شسوي هذا أبويه
ـ غير يعرفك
ـ شيعرف
ـ ما أدري أنت أعرف بنفسك .
ـ أي صحيح بس صوجه هو ما زوجني ياها وخلاها بنفسي .
ـ أي لعد لاتخليها بنفسك لفيت رأسي ونمت وعفته
ـ شنو تنامين
ـ ما جاوبته والصبح كعدت هو بالحمام وشفت علبة مال هدايا ومغلفه أكيد هاديته هديه طلع وباوعلي وكال .
ـ حلوه
ـ ما أدري ما شفتها
ـ فتحيها وشوفيها هاي أجتي هديه من عُلا .
ـ أي تستاهل
ـ شوفيها .
ـ لا ما يحتاج سحبها وفتحها ساعه ولبسها كدامي ونظراته سهم وصابتني أريد أصرخ بوجهه وأكوله كافي حقاره وقساوه بس عزت عليه نفسي وأنسحبت بكل برود .
ـ ما گلتي حلوة لا .
ـ أي حلوه بالعافيه عليك
ـ الله يعافيج صدك كلادتج جبتها وياي سويتها الج
ـ گلب بنطلونه وطلعها مغير سنسال أي عاشت أيدك
ـ تعاي خل البسها الج
ـ سحبت شعري ولبسنياها وأباوع عليه بالمرايا يشم بشعري الى أن نزل على رقبتي يبوس بيها وگعت الكلاده بالكاع باسل تأخرت .
ـ أبيع المحل وصاحب المحل مقابل ثانيه وحده تجمعني بيج
ـ أريد أكوله وعُلا بس البيه ما يخليني خليته على راحته مخلي رقبتي وحاضني من خصري وأنداريت عليه لكيته نعسان تقربت صفنت عليه وبسته من خده وهبت عليه مشاعري وأستنشقت عطره فديتك وفديتك ريحة عطرك بيك بوسه أشعلك خدك .
ـ بوسيني منو مانعج
ـ خاف أسوي صوت مثل تؤم جيري امحح
ـ انجبي لج ديري بالج صوتج يطلع .
ـ هاا يعني صدك صوتي عالي.
ـ منين جنج فاره تتنعوص اكو وحده عاقله تبوس رجلها من خده .
ـ تعرفني أستحي واخجل وهاي البدايات حبيبي
ـ وأني منغرم بالمستحي والخجلان .
ـ نزلت رأسي مستحيه تقرب باسني من خدي وهمس
ـ مو أجي وتصيرين جنج سلحفاة اخر ايامها وتنامين .
ـ وأنت مو تطلع وتخليني وأضل أنتظرك
ـ لا اليوم بس الج ، يوم الها يوم الج مو هيج أحسن
ـ مو عبالك زودتها وياي .
ـ لا ليش مو احسن من ورى ظهرج
ـ ما جاوبته
ـ يله أني رايح لاتضلين صاعده نازله
ـ تمام كرصني قوي من خشمي لا باسل
ـ علمود يفش شنو حبلانه بخشمج
ـ ونزل يضحك وصفنت على تصرفاته يكسر ويجبر كأنما متزوج عليه يوم الج ويوم الها ويكمل الحب الي ما كمله بسبب أهله على حساب مشاعري ونفس الوقت يعاقبني لان ضميت عنه ماضيي .
والله على هالحال ماكو عاقله وصاحيه تتحمل هل الوضعيه التعبانه يحجي وياها ويطلع مطاعم يتعشى وبينهم هدايا وبعدين يجيني بوس وحضن ولا كأنما مسوي شيء وكل هذا وأني ساكته أجتي برأسي أراسله وأنفجر بي تالي تراجعت ونزلت لكيت بس جنات لعد خاله وليال وين .
جنات ـ راحن المارگت تتسوك وگالت طلعت لحم خلي تسوي عشه منه .
عصماء ـ تمام دخلت المطبخ سويت عشه وسمعت صوت نائل!
نائل ـ منو بالبيت
جنات ـ ماكو بس أني وعصماء ليش
نائل ـ عصماء وين
جنات ـ بالمطبخ جاي تسوي عشه .
عصماء ـ خير أن شاء الله شيريد مني يسأل عني نشفت أيدي وطلعت وباوعلي بغضب هلا نائل شلونك
نائل ـ أحد كايلج أني كواد لو أبن شوراع
ـ لا حشاك بس خير شنو هالحجي
ـ وتسوين روحج غشيمه شنو معناها تسحبين الموبايل من بيداء وتمنعينها تحجي وياي لا فواكاها تضربينها وتحاربينها بعيشتها أنتِ أخت أنتِ .
ـ وأنت شعليك بيداء أختي وأني مسؤوله عنها بصفتك منو واكف تحاسبني على تصرفي تجاه أختي .
ـ بصفتي گلشي وحقارتج ويه أختج وصلتني وما أنساها الج ولا عبالج تخوفينها والله تگولين لاهلج ترة ما يهمني روحي گولي لدنيا كلها وبيداء الي واخذها لو مو تسحبين منها الموبايل .
ـ وأنت شعليك ترة زايده منك عيب هالحجي وعلى صوتنا دخل باسل وخاله هيفاء وليال .
ـ عليه ونص فاهمه وتسحبين نفسج وما تتدخلين .
باسل ـ هيي هيي أنت عليمن تصيح
نائل ـ أصيح على مرتك الحقيره
باسل ـ أحترم نفسك والزمك حدودك لا أطلعك محمل منا وعندك شيء حاجيني مو جاي تصيح عليها
نائل ـ شوفي ولج كلمه زايده ما تحجين وياها وهاي بدال ما توكفين وياها تصيرين ضدها وتضربينها
باسل ـ أنت تخبلت شبيك فهمني شگو وعصماء شدخلها .
نائل ـ خل مرتك تفهمك أني خلص كلت العندي وبلغت أهلي بگلشي ومعارضتج نكعيها وشربي مايها يا حيه .
عصماء ـ گال العنده ومشه وباسل باوعلي هزلي رأسه
هيفاء ـ شيحجي أخوك حرام أذا فهمت شيء عصماء شگو شصاير .
باسل ـ عصماء صعدي الغرفه كدامي .
عصماء ـ صعدت الغرفه واجه وراي وقفل الباب بگلبي عزه العزاج بيداء أشسويتي رجع صاح بيه
باسل ـ نائل شيقصد بكلامه
عصماء ـ علمود أختي بيداء
ـ وشبيها أختج! بس لا
ـ أي حجيتله وكعد مصدوم
ـ يعني عافت الزلم كلها رجعت على أخويه أخر صيده الها
حلو والله ، بيداء ونائل فضيحة الموسم .
ـ حجيت وياها وگلت لأمي وحذرناها وأمي سحبت الموبايل منها بس الظاهر أخوك راحلها المعهد وهي حجتله .
ـ يعني هي حجتله منعج ورفضج لعلاقتهم وهو أجاج يتهدد لعد أختج شكد منحطه وسافله والله لو عندي سلطه عليها أدفنها هي عدله يعني كل سوالفها وفواكاها صلافه تحب عينك عينك لا انوب دازه عليج نائل بحياتي ما شايف هيج بنيه .
ـ والله حجيت وحذرتها بس أخوك هو ملاحگها
ـ أخويه ليش مو أختج خبره بهيج سوالف ونائل فطير بسرعه طبقته ، وأنتِ عيني شو هسه متذكره بعد وگت لو ساكته احسن الج شستفاديتي من حجيتي ولو أنتِ قبل مالك هم سگتتي ومهيب سگتي ونائل هم سگتتي ولما يجي البيت يتهدد عليج أني ما ادري .
ـ شطالع بيدي والله طلع على لساني شعر لدرجه گامت تكرهني من كثرما حجيت ونصحت
ـ ليش من عرفتي بعلاقتهم ما أجيتي كلتيلي ليش هم بقيتي ساكته ليـــش هذا سگوتج راح يخبلني .
ـ ما عبالي هيج توصل الأمور گلت يجوز بدايه علاقتهم وتقطع التواصل وكلشي ينتهي شمدريني أخوك يكبر الموضوع ويحجي لأهلك ويسوي سالفه شگبرها ويرجع عليه .
ـ شوفي عصماء هسه تخابرين أختج وتفهمينها تشيل نائل من رأسها لا قسم بالله ما يصيرلها خير لو أعرف اني وأخويه نتذابح أختج ما تصير لأخويه فاهمه وفهمي أختج السگط هالحجي ، ترى ساكت وملطوم على حلگي لخاطرج لان أي شيء أحجي يرجع عليج وعليه .
ـ أنتَ أحجي ويه أخوك وخلي يسحب نفسه .
ـ منين نقطع رأس الحيه منج لو مني
ـ عرفت قصده وأتصلت عليها واشرلي افتح سماعه وجاوبتني الو بيداء
بيداء ـ ها عصماء .
عصماء ـ مو عيب عليج تحجين لـ نائل گلشي وادزينه عليه كدام عيالي وأحنه أخوات بينا اضربج واحجي عليج أختج اكسر راسج هم وگلشي لصالحج بس ما توقعت منج توصلين كلشي لنائل .
ـ مو گتلج يحبني وما راح يعوفني بس أنتِ عناد وگلتي لأمي وكبرتي الموضوع وسحبت الموبايل مني ونائل أجاني المعهد لح عليه وسألني على موبايلي وحجيتله شگوله يعني .
ـ هيج الحجي ولج أنتِ شنو من بنيه تردين تصخمين وجهي يعني هسه عاجبج الكل عرف بعلاقتكم مـا تخافين يوصل خبر لابويه تردين تموتين .
ـ وليش أصخم وجهج يابه وشعليه أني شصير بحياتج ترجعين عليه وبعدين هو من حجيتله ما تحمل أحد يمد أيده عليه واجاج وگتلج بس أنتِ ما سمعتي مني وبالأخير وصلت عيالج والله كله من أيدج ما تعرفين تتصرفين .
عصماء ـ سحب الموبايل مني وحجه وياها .
باسل ـ سمعي بيداء هذا الحجي كله مو برأسي ومشاكلج بينج وبين أختج ما أتدخل بينكم واليهمني من هالسالفه كلها أخويه ، أحترمي روحج وسحبي نفسج بالطيب وعلاقة حب ما أعرف أيش ما تمشي عندي وأذا على أخويه يوم يومين ينسى بس أنتِ عوفي وما الج شغل .
بيداء ـ أني محترمه نفسي الحمدلله وأخوك هو ملاحكني ، روح احجي ويه أخوك لاتجي عليه .
ـ هو أني أكدر أحجي ويه أخويه بس لان أعرفج زين حاجيتج يعني الأفضل بدون حجي خشن وناس تغث ناس وبعدين توصل السالفه لعمي أسكندر ويتصرف تصرف ما يعجبج .
ـ شتعرف عني ، عيب عليك هالحجي هاي الحجايه جبيره بحقي وبحقك وأنت نسيبنا واختي مرتك وگت زلم صارت تهدد وتعيير .
ـ أحترمي نفسج وحاجيني عدل لاتخليني أغلط عليج وما اريد اتلاسن وياج بس كلام أخير أكوله الج سحبي نفسج من حياة نائل ترى ما يصيرلج خير .
ـ تهددني
ـ ما أهدد بس فهمج كفايه
ـ لا تهدد وعيب عليك لو وحده من أخواتك تحجي هالحجي وياها تقبلها على نفسك ومن تحجي عليه باوع على نفسك ترى كلنا مليانين عيوب وأغلاط .
ـ أنجبي لج شجاب أخواتي السالفه وتروحليهن فدوه وحاجيتج عبالي أدمي بس طلعتي وحده سافله ومنحطه من دزيتي نائل يتهدد على أختج ولو يضل عمري يوم واحد ما تصيرين جنة بيت سعيد
ـ دتروح عود لاتقصر .
عصماء ـ سدت الخط بوجهه وشمر الموبايل وكام يغلط عليها وأني وجهي اسود منه ما حجيت شيء بس منزله رأسي وكلامها شلون حجت وياه وعيرته اني ما اكدر احاجي ورجع كال .
باسل ـ والله دام هيج صارت لو أني لو هي .
عصماء ـ عافني وطلع وضليت بالغرفه ما نزلت الا صعدتلي ليال .
ليال ـ نزلي تعشي وأمي تسأل عليج .
عصماء ـ تعشوا أنتوا ما جوعانه .
ليال ـ أذا على نائل لاتزعلين منه الظاهر أنفعل وأمي خابرت ابويه وحجتله شلون تهجم عليج والله ما رضى گام يحجي ، وهسه نزلي تعشي شنو نسيتي نفسج حامل
ـ بعدين أنزل
ـ تمام براحتج
ـ نزلت وضليت بالغرفه رجعت راسلتها ليش هيج سويتي فضحتينا وفضحتيني كدام عيالي وفشلتيني كدام رجلي غضب على يومج أشسويتي .
بيداء ـ ما سويت شيء مو أنتِ گلتي عوفي وأني عفته وهو ضل يلح عليه وحجيتله السبب شتردين مني احجيله وهو تخبل وكبر الموضوع .
ـ أنتِ گايلتله عصماء گالت لـ أهلي وعرفوا مو
ـ أي
ـ ليش جذبتي وأني ما گلت بس لأمي وين تردين توصلين بهاي سوالفج
ـ شوفي أني ما جانت نيتي توصل الأمور لهل حد ومن گتله عصماء كالت لأهلي عني وضربوني وسحبوا الموبايل عني توقعت منه يعوفني واذا يحبني يتقدملي بس ما عبالي هيج يتصرف ويجي عليج
بس الصراحه هيج أحسن عاشت أيده!
ـ شلون يعني عاشت أيده عاجبج يحجي عليه كدام عيالي .
ـ لأتنسين نفسج شكثر أذيتيني بكل مره تكشفيني تضلين تحجين عليه وتضربيني ولا مره أحد دافعلي بس هالمره هو شاف أثر بأيدي وتخبل أهنا من صدك حسيت نفسي عندي سند وأعوف الدنيا كلها وما أعوفه لو مو أنتِ ورجلج توكفون ضدي لو العالم كله يصير ضدي نائل ما أعوفه .
ـ شلون بيداء وباسل
ـ شبي يريد يحجي خل يحجي أذا هو رجال خلي يحجي عليه لو ما صدك لزم علينا مستمسك ويضل يهدد بينا وشبيه اذا عندي ماضي هو مو عنده ماضي وسخ ويه عُلا وانطيناج اله مثل الورده شو ما حجينا وهددنا بس والله رجلج واحد نذل ونكس وشايف نفسه شوفه وبيت سعيد عبالك بيت الوزير ولج هو أنتِ هواي عليه ، هو أمثاله عُلا وربعها النذل شگد حقدت عليه
ـ صمي حلگج غضب على يومج سگتي شلون هيج تحجين عليه
ـ سليمه التكرفه حقير .
ـ گبل حظرتها وحذفت المحادثه وراسلته ما فاتح أنترنت باوعت ناسي موبايله ، ضليت أنتظره تالي طلعت بالصاله وفتحت باب البلكونه وباوعت ناحية بيت جده وعمامه وشفت مجموعه كاعدين ما ركزت گبل رجعت
وشويه وصعدلي .
باسل ـ تعشيتي .
عصماء ـ لا ما جوعانه وأنت تعشيت
ـ لا ، نزلي سويلنا عشه خل نتعشى أني وياج .
ـ نزلت حميت العشه وصعدت لكيته كاعد ومشغل الأيباد كام اخذ الصينيه مني وكعدنا تعشينا وهو نزل الصينيه ورجع.
ـ نعسان راح أنام تنامين لو تبقين كاعده .
ـ لا أنام ، تمدد وأني بصفه بس كلمن صافن وباله كومة أفكار ، ضليت صافنه عليه تمنيت يسحبني لحضنه بس وين وبينا كومة حواجز الماضي وبيداء وعُلا تالي غفيت بوسط كم هائل من الهواجيس والأفكار .
كعدت الصبح هو رايح السوك گمت وأحس شيء نايم على صدري نفسي مكتوم بالكوه رفعت نفسي من الفراش حتى الغرفه ما عزلتها وللظهر أني ما نازله ما أريد أشوف أحد ورن موبايلي هو جاوبته هلا باسل
باسل ـ ليش ما نازله لحد الأن ، مرتين البنات صاعدات الج أنتِ نايمه شبيج .
عصماء ـ ما بيه شيء وهسه أنزل وأنت شوكت تجي
ـ أجيت هسه أصعدلج .
ـ تمام وقطعت الأتصال ولكيت أمي تتصل عليه جاوبتها هلا يمه ودخل باسل
غنيه ـ لا هلا ولا مرحبا ولج أنتِ هم بنت بطني
ً ـ يمه شبيج شگو باسل سحب موبايلي وفتح السماعه
ـ على أساس ما تدرين شگو ورثتي النار أنتِ ورجلج شتردين أختج تموت تردين أدفنها علمود أنتِ تعيشين مرتاحه علمود لا رجلج يعيرج بسوالف أختج هذا التردينه مو
ـ يمه بس فهميني أني ميخالف بس رجلي شعلي
ً ـ منو غيركم أنتِ ورجلج خابرتوا أسكندر وحجيتوا اله عن نائل وخليتي يجيني عيونه بگصته وراح البغداد هو وعمج جابوها سحل من المعهد صبغ جلدها صبغ وحبسها بالغرفه ولج ليش من خفتي من ربج ولج هاي أخيتج أنتِ وياها نفس الدم أني هيج ربيتجن ، تثردين بدم أختج ولج معصومه ماكو واحد ما عنده ماضي يمه ماكو شجره ما هزها الريح وماكو بنت ما عشگت وحبت ورجلج مو عنده ماضي شو ما حجينا ليش هو يعلج بلحمها وگال لابوها وهسه الف يا علي يله خلصتها من بين أيديه تردين الحكها بأخوج سجاد واضل بس بيج شسوي بيج أذا أختج تموت بسببج لا أنتِ بنتي ولا أني أمج وأنسي عندج أهل .
ـ تحجي وأني أبجي وباسل واكف يسمع كلامها يمه فدوه أروحلج سمعيني والله مو أحنه يمه سمعيني أني ما الي دخل وسدت الخط بوجهي وبجيت وشهكت وحضنت نفسي وأبجي وهو كعد يمي وصاح بيه
ـ گافي على شنو تبجين أنتِ شعليج
ـ رجعوا عليه والله مو اني خابرته ما سمعتها شگالت تگول لا أنتِ بنتي ولا أني امج ، هاي امي باسل امي واشهك واشهك صوتي طبك گبل سحبني لحضنه وابجي وابجي واشهك بصدره وأنفجرت ويسگت بيه ما يفيد
ـ كافي يا عيني كافي
ـ باسل باسل هاي أمي ما متوقعه بيوم من الأيام تكولي هالكلام والله أموت اذا أمي تعوفني أني مو الي غيرها ، حضني بقوه ويمسح بدموعي باسل هاي أمي أمي
ـ أني أحجي وياها وأفهمها بس هسه سگتي گافي ابويه راح تموتين .
ـ أذا ذبحوها وماتت بسببي .
ـ أنتِ ما الج دخل
ـ منو خابر أبويه وكاله
ـ والله ما أدري هسه هي تبين ، يله گومي غسلي وجهج گومي .
ـ گمت دخلت الحمام غسلت وطلعت لكيته يخابر ليث
ً ـ أي وتالي ما عرفتوا منو مخابرهم ما أكدر أجي زوجتي تعبانه ما أكدر أعوفها هسه شوية أنوب أجي .
ـ ها
ـ نائل قافل على أختج وأمج مخابرته ومبلغته بگلشي
ـ أي وتالي .
ـ يرحون يخطبونها بس هالخطوبه ما أتم
ـ شال موبايله وطلع باسل وين تروح .
ـ أخربها ولو يضل يوم واحد أختج ما تصير لأخويه .
ـ وراح ياربي أستر بس لا يحجي يا صخام وجهج يا عصماء طين على رأسج عصماء وأتصلت على أمي
ما تجاوبني ضليت أتصل وأجاني صوت بيداء
بيداء ـ شعندج متصله تتشمتين بيه أنتِ ورجلج النذل الخسيس أرتاح گلبه خل ينام رغد خل يرتاح الله يحرك گلبج عليه مثل ما حركتوا كلبي وتعذبت بسببكم .
ـ على كيفج عيني ورجلي شعليه شنو مصلحته يگول لأبويه ولو يريد جان حجه گلشي ليش بس على نائل
ـ وشيحجي ترى خبصتينا أنتِ ورجلج ولا عبالج سالفة البنيه المراسلته ونوب مالك وحاجيله كلشي وعلى كل صوري دازهن عليمن تعبرون هالفيلم الهندي گولي أنتِ بيج دوده ما صبرتي الا تحجين اله لو حجيتله الماضي مالتج وكعدتي تقارنين نفسج وياي عود ماكو منج وحبج شريف ونظيف هو أنتوا التتدعون المثاليه أنكس البشريه .
غنيه ـ گافي جيبي الموبايل گافي
عصماء ـ أنطيني أمي يمه الو يمه وأنقطع الخط بوجهي رجعت راسلته ها باسل شصار .
باسل ـ ما صار شيء حجيت بس محد أخذي بكلامي
ـ وشحجيت
ـ شحجي خوما عبالج أفضح أختج
ـ لا أعرفك ما تسويها
ـ لا يابه مو لهل الدرجه ، بس حاولت أمنع هالخطبه ماكو كل نتيجه حاسمين الأمر والكل موافق وأولهم جواهر لگت جلبه نفسها تشبها وبالأخص من أولها صارت مشكله ومعارضه من باسل تشتريها بدم گلبها
ـ تمام
ـ خاف أبويه يسألج ليش معارضه لاتحجين شيء هاي هي شنسوي نبلعها ونسکت وحتى أذا حجيت هسه تصير موزينه ويجوز محد يصدكني يكولون يطعن بيها علمود أخوه ما يتزوجها وتصير كعدة عشائر وعمك خالك السالفه تكبر وأنتِ تتأذين ولخاطرج والله سگتت ولخاطر شيبات أبوج المسكين ما يستاهل والله وحرامات هالرجال الأدمي والمتعوب هيج يتجازى من خلفته السگط .
ـ ماشي عيني .
ـ أرتاحي ولاتفكرين
ـ تمام ، شوگت تجي
ـ هسه نجي اني وأبويه
ـ تمام ، گمت لبست حجاب الصلاة وصاحني ونزلت ولكيت عمي كاعد مرحبا عمي
سعيد ـ هلا بنيتي ، أي عمي أني أجيت اريد أعرف منج السالفه كلها وليش أنتِ ورجلج معارضين ورافضين شمعنى والاعرفه المفروض تفرحين لأن أختج راح تجي يمج مو تمنعين هالزواج
ـ عمي أني ما حجيت ولا عارضت ونائل من أجه حجه وياي اني حاجيته موقفي تجاه أختي وكل أخت تتصرف هالتصرف مثلي وأكثر وتمنع أختها من علاقة وموبايل ويمكن أكثر ومنو ما يكون سواء نائل أو غير نائل ومو من حقه يحجي ويحاسبني كأنما هو ولي أمرها وأني غريبه عنها .
جان يكدر يختصر الطريق على نفسه وبدون هالمشاكل الصارت يفاتحكم بالموضوع ويدك الباب مو صح كلامي
ـ صح كلامج يا عمي بس أحنه الوصلنا أنتِ معارضه وكايله حتى لو يخطبج هالزواج ما يتم لا أنتِ ولا باسل تخلونه هذا الوصلنه وأني أجيت أسمع منج لان أعرفج صايمه مصليه وحجايتج موزونه .
ـ باوعت على باسل وغمض عيونه ، لا عمي ما الي دخل لا اني ولا رجلي وأسحب نفسي ودام طلعت اني الغلطانه .
ـ لا عمي عداج الغلط والله يصفي الگلوب ماكو شيء أن شاء الله وأحنه أهل تصير هالامور والخلافات وتنحل
يله أني أترخص
ـ الله وياك عمي ، وراح وباسل طلع وياه والبنات طلعن سألن أخوهن وعفتهم وصعدت غرفتي ونمت تعبانه من گلشي وأجه هو صفن وصفناته تجيب التايه
عفته كاعد ونمت كعدت الصبح ما لكيته وسمعت صوت جواهر عالي گمت لبست حجابي وبعدني يم الدرج واكفه ولقاء كدامها وهي تصيح وتحجي وتشمر يأيديها وشافتني وثگبت .
جواهر ـ وينها الحيه أم رأسين وينها الضامه رأسها جوه عبايتها ، تعاي عيني ليش ما تقبلين أبني ياخذ أختج فوك ما أحنه أندگينا بيكم وهي الما عاجبه وين يصح الكم نسب مثل أبني .
لقاء ـ منو جايب طاري أبنج ترى هو الغلطان بحقها وهي حجت الصدك أختها ومنعتها وسحبت منها الموبايل وضربتها شتسويلها لعد وأني لو بمكانها
أكسر عظامها وازود .
جواهر ـ وهي شعليه تتدخل عدما أبني فتح باب گلبه وحب أختها تطلعله سجينة خاصره وتسويلنا مشكله وتمنع هالزواج .
لقاء ـ أييييي گافي عاد لا تعيشون الدور زايد والله عود أبنج يحبها ودمه محترك عليها والله شنو أختها ضربتها انهجم بيت هيج حب من أوله مشاكل ودزت نائل على أختها الله يستر من تاليه وهيج أنتِ حابتها هذاك الدرب روحيلها شگو هاده علينا لو اجتي لرجليج تموتن على المشاكل تركصن بجفيه .
جواهر ـ أني أدري الحش النش منين من امجن هي تحش براس جنتها عليه وعلى أبني .
لقاء ـ دروحي شغل وعمل ما عدنا بس أنتِ وأبنج
جواهر ـ وأنتِ أم الفتن عبالج تكوشين على گلشي أنتِ ورجلج أبو النسوان وتردين بس الج بأحلامج تحصلين شيء والا أزوجه بيداء واسويها شيخه على الكل وشيخة البيت هاي زوجة أبني وحيدي زوجة نائل حفيد عبدالغني
هيفاء ـ أمشي طلعي من بيتي وبابي يعثرج برى
جواهر ـ أنهجم بيتج على راسج وراس بناتج وأبنج ويجي يومج أنتِ وبناتج وأني مو بنت أبويه وأمي أذا خليتجن تشوفن طعم الراحه وبلشتن بأبني وتردين تحرگن گلبه لان عشگها أني الجن
لقاء ـ طلعي برى الله يأخذج وصواب صابج وخلصنا منج مو مره طركاعه عوذه بيها شعره نكسه قرف .
عصماء ـ طلعت وخالتي باوعتلي ولقاء گالت
لقاء ـ ها أختج أمج داعيلتها تصير جنة جواهر بس الصراحه مصدومه بهل المحبه لان جواهر ما تحب أحد وحبت بيداء! غريب عجيب نعيش ونشوف .
هيفاء ـ لان شافت بلشت عداوه بين الأخوات وأذا شبت نار العداوه بين الأخوات تشب نار العداوه والكره بين الأخوان وهذا الشيء من صالحها وگلشي ولا نائل يتقرب لأخوه أو الجن وفرصه وأجتها شلون تفوتها يمه
لقاء ـ الله يستر ويجفينا شر الكرهه والعداوه .
هيفاء ـ عصماء نزلي ماما أكلي الج لكمه بطنج روح وأنتِ ما الج ذنب هو الله يسلمه يدور مشاكل مثل أمه
لقاء ـ نزلي يمعوده ليش حابسه نفسج باالغرفه أنتِ شعليج .
عصماء ـ نزلت رحت المطبخ لكيت ليال طابخه الغده صبتلي ماعون وكعدت أكل .
ليال ـ يمه الباب يدك
لقاء ـ منو أجانا هسه والله ما بيه أكوم .
عصماء ـ طلعت وشويه ودخل باسل جايب مسواك
وصعد الغرفه وصبينا الغده وأجه عمي تغده يمنا ولقاء حجتله على جواهر .
سعيد ـ هم رجعنا وعصماء شعليها .
باسل ـ ليش شگو شبيها عصماء .
هيفاء ـ ماكو شيء أمي كمل غداك هاي جواهر هدت علينا وحجت وحجت وراحت گلبها محترك على أبنها
باسل ـ وشمسوين لأبنها ، گافي عاد يوميه هادين لو هي لو أبنها
سعيد ـ باسل أبني گافي سد الموضوع وخلص ما نريد مشاكل ونائل أخوكم الجبير وتحضروا باجر نروح نخطبله
عصماء ـ باسل باوعلي وسگتنا وكملنا الغده وصعدنا
باسل ـ تردين تروحين روحي ما أمنعج بس أني ما أروح
أتعذر بسالفه .
ـ لا أني هم ما أروح
ـ تمام .
ـ وبعدها سگت وثاني يوم تحضروا وراحوا كلهم حتى البنات راحن بس أني وياه بقينا وهو طول الوقت ساكت ، ولزمت الموبايل لگيتها مراسلتني من رقمي القديم مسويه بي واتساب لأن اني حظرتها من رقمها
بيداء ـ اليوم خطوبتي والمفروض الأخت أول الحاضرين بس مع الأسف طلعتي مو أخت عدوه وأحقر من رجلج
وكلها حضرت الأ أنتوا الأثنين وزين سويتوا ما حضرتوا
عصماء ـ ما جاوبتها رحعت دزت .
ـ صُدك سويت واتساب برقمج ونشرت حاله وعلي نجم لحد الان حافظ رقمج عنده وأول واحد شاف الحاله وعباله اليوم خطوبتج طلع خطيه ما يدري بيج متزوجه وحامل
ـ توني ردت أحذف الرساله أنسحب الموبايل مني باسل
شكرا لزيارتكم عالم روايات سكيرهوم
