رواية نقش بارد الفصل الثالث عشر بقلم فدك فاطمه
أحبــوا هوناً و أبغضوا هونـاً
أني اعرف قوماً افرطوا في حُب قوماً
فهـــلكوا.
.
.
غنــوة
حجتهة برجفة و روح مبهوتة تنهد گام هي عينها وراه لزمت زندة تحجي بصوت رايح:ما اروح وياه
هز راسة طلع دخلت للغرفة تعصر بأديه تلوب تروح و ترجع روحهة ممرودة هي لجابتهة الهة مادري انقهر عليهة لو ألومهة
باوعتلهة أسال:هو مايدري؟
هزت راسهة بنفي :يدري گنالة
غنوة:تدرين شصار بي من عفتو صفنة تاخذة و صفنة ترجعة اذا كلش تحبين اخوج و تردين ترحين وياه ما عفتي ابنة اخذتي بيدج للموت
كعدت تعصر برجليهة تلطم عليهن ما تبجي بس تون خوفتني صوتهة مكتوم تنوح تنود تتحرك يمنى و يسرى ، تندمت لان حجيت هيج ضليت خايفة
نبهني من صفنتي صوت دلهم هو يتجادل وية عصام
هاي اسراء مادري شصار بيهة تنوح بدون صوت
طلعت خايفة ادك بباب الاستقبال لحظات فتحة
حجيت برجفة:اسـ..اسراء مادري شبيهة
طلع بعجلة ركضت وياه لگيتهة بالگاع تنتفض عيونهة صايرة بيض كعد يمهة شالهة گوة فتح حلگهة خلة ايدة بين سنونهة يصيح بعلو صوتة على عصام طلعت للغرفة الثانية اسمعة يگلة خل تموت
بين الهوسة و النتر بينهم طلع دلهم شايلهة مشة ضليت وحدي اعض بأدية هسة اني الة احجي ادري هي شبيهة مابيهة نوب تطيح براسي اخخ من لساني
طلعت برة افتر من القلق خايفة يصير بيهة شي نوب شسوي اهز برجلي متوترة مر هواي وقت طلع الفجر
همة ماكو اختنگت اروح للباب و ارجع
لحد ما اجو طلعت روحي تلگيتة خايفة :ها شبيهة وينهة
دلهم: بالمستشفى يمهة عمتها
غنوة:شصار بيهة و بسرعة طاحت
دلهم: من صدمة الموقف صارت تجيهة هيج حالة مثل الصرع تتشنج و تصير عدهة نوبات
غنوة: عصام وين راح
حجة هو يدخل :موجود بالمستشفى
غنوة:شنو يريد منها لو اني بمكانة بعد ما اباوع بوجهة على هاي السالفة لسوتهة
مسح وجهة بضوجة نزع الفانيلة تمدد على الجرباية
صافن بالسگف ضلت عيوني عليه واضح الندم عليهم هو و اسراء بس شيفيد همة خسرو كومة
غنوة: هسة ترجع يمهة
دلهم: الصبح اروح طفي الضوة خل انام
غنوة:نام احسن من كعدتك تخلي ارواح برگبتك
تأفف شمر المخدة بمكانهة تمدد طلعت طفيت الضوة نمت على القنفة البرة بالهول محد گعدني فزيت وحدي على الاصوات لتجي من الشارع
اسمع صوت من المطبخ نزلت رجلية احس برودة الگاع السبلت مشتغل و خرت الغطة مدري منو مغطيني دفعتة بعيد گمت اوخر بشعري عن وجهي
شفت خالة دلهم بالمطبخ و الموبايل بيدهة تخابر وحدة ثانية تحجي وياهة هي تشتغل تسوي غدة
غسلت فتحت الثلاجة ادور شي اكلة التفتت لصوتهة من سدت الموبايل حجت:شجاج خالة نايمة جان سويتي غدة، نطيتي لرجلج ريوگ راح على لحم بطنة
غنوة:هو يسوي ريوك مايعرف صغير
باوعتلي مصدومة مامتوقعة ارد هيج ، تريدني اخدم
دلهم فوك السواه بية لو اشوفة ميت من الجوع ما انطي من نفسي شوية علمودة
شلت القوري خليتة علة النار طلعت خبز خليت بي گيمر سويت لفة منتظرة اهز برجلي بقلة صبر لحد ما طلع بخار منة طفيتة و صبيت عفتهة گالبة وجهة
رحت للغرفة اكلت خليت الكوب هناك على الميز تمددت ماعندي شي اسوي اتگلب طگت روحي رجعت للهول شغلت التلفزيون لهناك و كعدت اتابع
التفتت لصوتهة من حجت:خالة اني رايحة تعرفين تهدرين التمن
هزيت راسي بأي ، خلت عباتهة فوك راسهة و طلعت
ضليت وحدي شوية گمت شفت الغدة لحد ما أذن
طفيتهن رحت توضيت و صليت
بعدني اصلي هو خطف من كدامي رايح للكنتور كملت اخذت التربة مسحت بيهة عيني و الجهة مال راسي ليمهة هسة شوية خفت اليوم ما وجعتني
حجة هو يفوت للحمام :صبي غدة
باوعتلة بطرف عيني هزيت ايدي گمت اخذت الغطة الخفيف رحت للهول تغطيت متمددة على القنفة اتابع بيدي الريمونت اگلب بالقنوات
سمعت صوت باب الحمام انفتح اجة كعد گبالي حجة :سمعتيني
غنوة: سمعتك و غلست
دلهم: امشي صبي غدة اريد ارجع للمستشفى
درت عيوني عنة ساكتة ماريد اردد و يضل يحجي احصل مغثة على الخالي بلاش ، أيس مني حتى ما اكل راح نام گال كعديني بالاربعة ماهتميت الة
مرن يومين حسيت روحي مرتاحة بهذة البيت رغم مشاكل دلهم و اسراء وية عصام الي يريد ياخذ اسراء و يرجع للقادسية و هي رافضة خوف منة
واضح ما يريدها حباً بيهة دلهم يعرف خايف على اختة وهي مو بعقلهة صايرة تگوم و تطيح العذاب
النفسي و الندم كلهة تضغط عليهة منتهية كلش
صادف يوم خميس رادو يسون ثواب لأبن اسراء
و لاخو دلهم حاتم ، هو رفض مايريدها تتعذب اكثر
خالتة و هاي عمتهم الحجي ما يأثر بيهن بس طلع
اجن ثنينهن وياهن ثنين بنات شابات و أطفالهم اعتقد خالة دلهم راحت للسوك اسمعهة تسأل بيهن
شنو تجيب شنو يحتاجون و البقية بدن يحضرن
مبين مو عشة بسيط لان اماعين سفري و گدورة كبار يعني طبخ حتى يوزعون اختنگت من شفتهن الهم واهس وهاي اسراء طاگة فيوزاتهة يسون ثواب لابنهة غير تتخبل بالزايد شكد فايخات ذني
دنكت غصباً علية انظف ورة المنگرش يمشي ويشمر بهاي الهدوم خليتهن بالسلة دفعتهن للحمام
حتى ما اشوفهن و اصير نادرة و اغسلهن كفشت شعري بضوجة سديت الباب لو بس ابطل اشتغل
سمعت وحدة منهن تصيحلي مايعرفن اسمي تگلي "مرت دلهم" هزيت ايدي فتحت الباب جانت وحدة من بنات گرايبة كاعدة كدامهة علاكة و صينية
حجاتهة وحدة من البنات :وتين صاعدة اودي الدوة لأسراء هذة الموبايل اذا دگت ماما ردي عليهة
هزت راسهة التفت الي :تگدرين تقلمين بامية وياية
الرفض على طرف الساني بس تراجعت اجة ابالي صورة الطفل خل اسويهة بثوابة اقرالة سورة الفاتحة الله ينور قبرة طير بالجنة
طلعت اجر بالثوب الگشر الابتر لاهو ولا المشتري بيهم خير كعدت گبالهة اخذت سجينة فتحت العلاگة بلشت اسوي وياهة عقلي يصورلي هواي افكار و سوالف اتخيل حياة غير الاني بيها تعجبني
فزيت على ندستهة باوعتلهة مستغربة:ها
وتين:احجي وياج شنو اسمج
:غنوة
وتين:الله شكد حلو لايگلج منو الي سماج هيج امج لو ابوج
حركت جتفي:مادري ما سألت
وتين:انتي منا من بغداد
غنوة:من القادسية
حجت تقرب علية:جذذذب والله عبالي من بغداد لو الشمال گلت كردية من شكلج
غنوة:لا امي فارسية ورثت منها شكلهة
صوفرت حجت بضحكة:عززة هذة وين دوراج و لگاج ولا عبالي يتزوج الغثيث ..اسفة يجوز ماترضين احجي عليه
غنوة:لا احجي ميخالف هو غثيث
ردت مبين اخذهة الواهس:اي والله ابد ما احبة شايف روحة عبالة الگاع گاع الخلفوه
غنوة:يبيع الحجاية بيع
وتين:وحق الله صح يحسسج متفضل عليج مرة اجانة هناك لبيتنة دك الباب طلعتلة گالي امج وين
گتلة مو هنا إذا تريد تفضل تخيليي صلبني على الباب جوة الشمس مدري شلون يباووعلي اريدة يحجييي يگول شي يفهمنييي ماكو يمة يغث
ابتسمت اهز راسي أأيدهة ضلينة نحجي عليه خلصت البامية ما خلص الحجي كلش فرحت من سمعت واحد من اهلة يحجي هيج ماي بارد نزل على گلبي ردت اضل احجي عليه بس هي بسرعة
تغير الموضوع و تسولف هواي عرفت هي عايشة عد اعمامهة واحد من اعمامهة مربيهة لان ماتصير
عدهم جهال و تجي هنا بالعطلة بيتهم قريب علينة
سولفت على اهلهة رجعت غيرت الموضوع لحد ما صرنة نسولف على الافلام
اني كلشي ماعرف لا طالعة ولا عندي برامج لتحجي عنهن ماعرف غير الافلام لجنت اشوفهن وياه احجيهة عنهن هي كلهن شايفتهن ندمجنة نسولف سوة تنصحني بأفلام اشوفهن بدون ما نحس صرنة
بالمطبخ هي تسوي بالخضرة واني فرغت البامية بسلة اغسل بيهة التفتت عليهة اضحك على سوالفهة دخلت البنية الثانية وياهة حجت بضوجة
:وتتين امي متصلة خمس مرات مو گتلج ردي
وتين:اخذتني السوالف ما انتبهت
حجت تباوعلي:هلوو تعرفتن
وتين:ايي غنوة هاي اختي رشا
هزت راسي ساكتة انتبهت لروحي جنت منطلقة وياهة لو سألتني عن اهلي و حياتي يجوز اسولف بدون ما احس سبحان الله اكو ناس اسلوبهم يخليك
تحجي و تنطلق حتى لو ماتعرفهم
حسيت بضل صار على وجهي يحجب الشمس رفعت
راسي لدلهم من اجة يباوع للحوش ما عاجبة جان واكف بالباب نزع البوتين دخل ما شافني عينة عليهن
دلهم:خالتي وين
سكتن كل وحدة عينهة بشغلتهة التفتت مستغربة وحدة تندس بالثانية منطياتة ظهرهن يتبسبسن
غنوة:راحت لسوگ
التفت على صوتي رفع حاجبة يباوعلي درت وجهي اكمل ما مهتمة حسيت بأيدة على جتفي رفع الردان
هادلة هي ياخة الثوب طالع جتفي حركتة متنرفزة
وكف وراي حجة بهمس:وشمج طالع
عفت البامية غسلت ادية دفعت ايدة مشيت اجة وراي دخلت للغرفة متنرفزة منة ماريد يلمسني
رفعت اصبعي بوجهة ضايجة: اي مكان تلمسة بية احرگة والله العظيم احرگة دير بالك توصلني
دلهم:اصبعج نزلي لا اكسر
غنوة: لاتهددني.
لزم اصبعي لوه جراني من ايدي عطت متوجعة صار جتفي على صدرة ايدي مخليتهة فوك ايدة حتى ما يلوي اصبعي و يوجعني.
دلهم:نطيتج عين احترمي لا ارجع اربيج من جديد صوتج ماترفعينة بوجهي وهاي العرامة تبطلينهة حتى ما اخورسج اخليج حتى حجي ماتحجين
غنوة: الك عين فوگهة تريد تطگني
رخة لزمتة و رد:انتيي تجبريني على هذة الاسلوب
غنوة: ما جابرتك گتلك عوفني ماعفتني تحمل ليجيك لا عبالك يومين تلاثة انسى لصار دلهم لو شما تسوي انتة مقصر بحقي
خليت ايدي بصدرة ادفعة ماتحرك تقرب رجعني ليورة صار نص ظهري على الميز ما المراية التفتت
اتلمسة حذرة رجعت اباوعلة عيوني مغورگة
غنوة:ايدي توجعني لا تسحبهة و وخر
دلهم: حقج تزعلين اني غلطان بس هذة اسلوبج تبطلينة مفهووم نترج و صوتج العالي برة الغرفة ماريد اسمعة
غنوة: برة الغرفة و جوة و بكل مكان ما راح اضم كرهي الك ماكو شي يخوفني بعد لايوم ولا يومين نمت و عضامي ترجف من الخوف تعودت
عاف ايدي حجة يبعد شعري عن وجهي: اوعدج اعيش بحياة ما تخافين بيهة انسيج ذيج الايام ما اعوفج وحدج يمتة ما التفتي تلگيني وراج
غنوة:هي مرة وثقت بيك ما قدرت الثقة لا تتأمل بيوم ارجع اسويهة والله لو تطلگني و ارجع لهلي وانتة تسوي لتريدة وكل واحد يعيش حياتة افضل
حجة ضاغط على فكة عيونة بعيوني:تردينة واضح من عيونج بس اطلگج تتزوجينة ماعندج مانع
عگدت حواجبي ما فاهمة طخت ابالي بعدين عبست بعدة يتهمني اني كارهتهم كلهم ماكدر اتحمل اعيش حياة جديدة وية واحد ثاني واتحمل مشاكل ثانية و حرگة دم و اعصاب
غنوة: والله ياعيني وحدة مثلي لادراسة لا اهل مستقبل ماكو شعدهة غير الزواج ، اروح اتزوج أبن عمي واكعد بين اهلي ولا هذة التجهول يومية ببيت
دلهم:اخخ من صلافتج اشتعلت اهلج على هيج تعلوم
غنوة:لاتشتمني وخر عني
دلهم:اوخر عنج وانتي بين ادية تگليلي اريد ابن عمي و اتزوج وهاي السوالف ال**" مال ال***"
رفعت راسي متأففة شهگت من خلة وجهة برگبتي يشمهة دفعتة بسرعة رفعت ايدي لزمهة دارني لوة ايدي ورة ظهري بدون ما يوجعني
دلهم: شگتلج ذيج المرة بس ترفعينهة اكسرهة
غنوة:اكسرهة اذا بيك خيـ..
عطت بصوت عالي من سحبهة قوي اخذ ايدي الثانية هم لواهن سوة اباوعلة بالمراية يضحك الحقير حركت رجلي اريد اطگة لزمهن برجلي شعوطني ماكدر اتحرك
دلهم: ابوس عقلج على افكارة ابوس ايدج لگصت الشعر خلتني اتعذب برگبتج الطالعة و الگذلة لكل شوية تطيح على وجهج كلج عذاب غناوي
غنوة: ايدي توجعني عوفني و اتغزل براحتك
دلهم:تخرمشين مو أمان
غنوة: اهووو دلهمم
حجة يسند فكة على جتفي : گليبي
غنوة:انعل ابوك لابو گلبك وخررر منااا
عض جتفي يضحك وخر الثوب منة بسنونة يبوس بالوشم و برگبتي كلشي يوصلة من وجهي ، عصبت
من كد ما محترگة اعصابي راسي طراه الوجع طر
عطت مدنگة ابجي دفعتة عافني بسرعة خليت ادية
على راسي كعدت مسطورة سطر ، گعد بصفي يوخر بأدية رفع راسي حجة مستغرب: شبيج
رديت اعصر بعيوني:راسيي راح ينفجر موتتنيي
دلهم: منين يوجعج طگيتي المرايا لو من عيونج
غنوة:عيني احسهة راح تنشلع راسي يوجعني
مسح على عيني اني من الوجع اريد انگز ماتحمل اكعد بمكان واحد مسح فوك حاجبي نكمشت ملامحي من الألم ايدة بشعري يدلك بجهة اليم عيني كلشي مايفيد الوجع وحدة يجي و يروح
دلهم: العصر اخذج للدكتور گومي غسلي و تمددي
بلكي يخف شوية اذا ما تتحركين
گومني بس اتحرك يزيد الوجع طبيت للحمام غسلت
ابعد بأديه عني طلعت وجهي يصب ماي ماكدر ادنك
شال المخاد طلع شوية رجع بيدة مخدة انصة منهن
مددت روحي رايحة من الوجع الگلوب صار بعيني
غنوة:طفيي الضوة سطرني
دلهم:هسة اطفي مددي عدل شبيج مايعة
غنوة:اهوو ماتعوفني شبيك
غطاني ما عاجبة اصيح عليه طفة الضوة رد الباب
اجة كعد بصفي ايدة على شعري يمسح عليه بهدوء
غنوة:وخر ايدك اضوج من تجي يمي و راسي يضل يوجعني اعصابي تعطب
سحب ايدة عدل المخدة ارتكة عليهة نايم مگابلني غمضت عيوني الغرفة باردة و ظلمة مددت مرتاحة
احس بنظراتة عليه افكاري براسي تتضارب غطيت وجهي عنة غمضت كدرت اغفى شوية للعصر كعدني حتى نروح للدكتور گمت منعسة مالي خلق
گمت غسلت غيرت هدومي الم بشعري اريدة يثبت
لبست الشال طلعت بيدي العباة جان كاعد بالهول
من شافني گام ، كاعدات گرايبهم هم و البنات بالمطبخ بعدهن ينظفن بالهوسة مالت الطبخ طلعنة اباوع مستغربة للسيارة صعدت عيوني عليه
باوعلي منتظر اسأل من شفتة بس يريدني احجي وياه درت وجهي للجامة شغل السيارة طول الطريق
عيني للشارع اتأمل الاماكن احفظ شكلهن لگيت روحي بدون وعي اتخيل نفسي امشي وية أهل غير و عايشة بحياة و دنيا غير هاي الاني بيهة
وصلنة طبك السيارة نزل مشيت وراه كل ما يلزم ايدي افلتهة دار وجهة خازرني لفيت ايدي بالعباة
تأفف لزمهة يمشيني لحد ما وصلنة العيادة دخلت
كعدنة فترة منتظرين لحد ما اجة الحجز مالتي دخلت لسعتني برودة الغرفة كعدت گبال للدكتورة
بدت الاسألة شرحتلهة شلون يوجعني و من يمتة
گالت اروح اسوي رنين و ارجعلهة طلعنة امشي وراه
بدون ماعرف احنة وين اخذني سوينة رنين ورجعنا
للعيادة تعبت من الانتظار اريد بس ادخل صار الغروب وسمعت الاذان بهاي الفترة دخلت شافت نتيجة الرنين گالت عندي شقيقة شرحتلي عنها شنو
منعتني من هواي اشياء هو يمي بس يهز راسة اباوعلة بطرف عيني كل البية من وراه هسة جايبني
يعالجني شكد حقدت عليه بلحظتهة
طلعنة انتظرتة اشترة العلاجات اجة حجة يدفعني على كيف من ظهري :تعشين برة
غنوة: رجعني للبيت كوة متحملة شوفتك اريد انام
باوعلي متنرفز فتح باب السيارة صعدت سداه بقوة
گمزت من الصوت صعد حرك السيارة طاير يسوق بسرعة لزمت الباب خايفة شوية شوية خفف
وصلنة للبيت نزلت گبلة بس وكف السيارة فتحت الباب دخلت اسمع صوت سوالفهن و ضحك كاعدين بالهول سلمت و رحت لغرفتي شمرت العباة مختنگة و الشال اخذت هدوم گبل للحمام الماي
بي برودة تنزل على راسي تهدي الصداع و التعب
لبست طلعت شفتة كاعد على طرف الجرباية فانيلة بيدة مستند بعكسة على رجلة و الموبايل على أذنة
يخابر من شافني گام طلع برة يكمل مخابرة فكة ما اريد اسمع اي شي عنة خلي شيسوي خل يسوي
رحت للمطبخ صبيت عشة الي لگيت علب سفري من الطبخ مخلينهن على جهة حميت منهن اخذتة
للغرفة فتحت الماي شربت كاتلني الجوع مامتغدية
من جنة بالعيادة جابلي حلويات بس عندت ماردتهن
فتح الباب شغل ضوة اليم الميز شعرة ينگط ماي مبين سبح برة بيدة خاشوگتة كعد كدامي عينة
على الموبايل ياكل ولا جنة
غنوة:عشاي هذة
دلهم: اي وذا يطير نصج اذا اكلت
غنوة:ماتعرف تجيب عشة لروحك
دلهم:مرتي ماتصبلي
هزيت ايدي اجيت اگوم لزمني كعدنة حجة بضوجة:اني ماشي كملي عشاج عدج علاج
رجع التمن الاخذة بالخاشوگة خلاه بالصينية گام
شكلة جنة واحد فقير اجذب اذا اگول ما ضجت بس دست على روحي غلست كملت عشاي متنرفزة منة
ورة ما غسلت المواعين شربت علاج رحت نمت مرت فترة شفت روحي شوية تحسنت على العلاج ما دام كاعدة و لاصياح ولا ضغط اني زينة مرتاحة حتى دلهم ما يوصل يمي ينام بالهول بس من تجي خالتة
مرات يجن يباتن هنا علمود اسراء الي حاجزة روحها
بالغرفة الفوك لاتنزل ولا تقبل واحد يكعد يمهة كل فترة يجي عصام و دلهم ما يرضى يخلي يشوفهة
اني اشوف كلشي يسويه الحگ وياه همة خربو حياتة
علاقتي صارت شوية اقوة وية وتين اجذب اذا اگول ما انتظرها تجي هنا كلش افرح من اشوفهة هواي تضحك و تسولف عدهة خلگ لكلشي ماتكعد
مرات نطيخ تسوي حلويات طيبة لو نكعد برة نتابع
افلام احب اشوف افلام مال عرك هي تطلع كلة من ذولة ليحبون كل شوية مسيقى و اغاني مو حلوة
جنة كاعدين بغرفتي مرتكين على الحايط نتابع بموبايلهة فزت گايمة من دخل دلهم تأففت بضوجة
طلعت وياهة بيتهم قريب تروح مشي سلمت راحت
رجعت للغرفة شلت الهوسة فرشت فراشي تمددت
غنوة:اريد موبايل
دلهم: بالجرار الموبايل القديم اخذي
رفعت راسي مستغربة:يا جرار هنا
دلهم:اخر واحد يمج
فتحتة بي هواي غراض دورت لگيتة جوة صار شكد طاگني الملل ما يگلي هنا موجود ضغطت الدگمة الي بصفحة ما اشتغل رجعت لمكاني مديتة الة
غنوة:شغلة مدري شبي طافي
مد ايدة لزم جف ايدي كلهة يالله اخذ الموبايل عفتة
يتحرش يريد احجي حتى يلزملة لزمة لو اغلط لو شي
يضل يصيح و يهدد بس الة ما اسوي هيج عناد بي
شغلة رجعاه الي اول شي راحت عيني عليه الشحن لگيتة بي عشرة تأففت عود گلت اتابع احسن من هذة الملل ما الة تالي گمت افتريت الجرباية لحد الجهة الثانية شلعت موبايلة خليت الموبايل كعدت
دلهم: طلعي الشاحنة بالجرار عوفي موبايلي مابي
غنوة:هذة مصفر شحن
دلهم:صايرة عنودية ولا تنحملين
غنوة: محد طگك على ايدك گالك تزوجني انتة صرت بطل مدري مصلحجي و اخذتني
دلهم:بيومهة لو عايفج تموتين
غنوة:اموت بيومها ولا كسرة الخاطر العشتهة
دلهم: سادة كل البيبان بوجهي
غنوة:انتة سديتهن مو اني جنت احبك
رفع راسة متفاجئ درت وجهي ابحث باليوتيوب گوة الگة بي مسلسلات التفتت اريد اگلة ينطيني سماعة
صار وجهة بوجهي قريب علية بعدة مامصدك لحجيتة هو اني اعرف شني احبك سمعتهة بالمسلسل مادري بروحي جنت احبة لو هيج متعودة عليه بس هسة ما اتأثر بأي شي يسوي مو مثل گبل بسرعة أفرح و گلبي يصير يدك حيل اتوتر
مد ايدة يريد يلزم خدي وخرت بضوجة :لاتخليني احرك روحي والله اسويهة ما احلف جذب من هاي الساعة بس تلمسني احرك مكان لمستك
بلع ريگة حجة بهمس: غناوي لاتصيرين حقودة
غنوة:اصير لأريدة معليك
دلهم:ليا وكت تضلين هيج صار شهر وفوك
غنوة:لأخر يوم بحياتي لاعبالك اسوي هيج حتى اقهرك لو اطلع حيفي أبد ماعندي هيج نيةماتهمني
تنهد مايكدر يمد ايدة يلمسني درت وجهي مفتكة
اگلب بالجهاز من تصير الشاشة سودة اشوف انعكاس وجهة وراي قريب كلش شوية و وخر سمعت
صوت الجرار من انفتح حسيت بي رجع وراي قريب
حجة بهمس :غمضي
عگدت حواجبي مستغربة غمضت نزيت من حسيت بشي نرش على رگبتي و علية فتحت عيوني راكي ايدة على الميز لازم عطره نفسة لجنت اخلي منة
هزيت ايدي رجعت اتابع ،ضل شمشم مثل الجلب
ورة مدة عدلت كعدتي مددت لازمة الموبايل نايمة على ظهري هو مل ، خلة مخدتة تغطة نام ضحكت عليه ، سهرت اتابع ما نمت الة وجه الصبح عود دكتورة گالت ممنوع السهر لازم انظم نومي
صدك راسي ردت بس اكمل الحلقة مادري بعد شلون غفيت كعدت على صوت باب الكنتور من نفتح طلعت راسي من جوة البطانية مستغربة شفت
دلهم بيدة جنطة يطلع منهة فلوس يخلي بالجرارات
گعدت مرتكية على عكس ايدي افرك بعيني خاف
اتحلم التفتت على صوت الجرباية رجع يكمل لبيدة
قفل الكنتور شمر الجنطة دفعهة جوة الجرباية
غنوة:شسوي
دلهم: شعجبت حجيتي وياي
غنوة:صدك ماتستاهل تسمع صوتي
دلهم :گعدي اشربي علاجج و تريگي مو عدج علاج گبل الاكل
اشرتلة بأيدي ما اگوم توني نمت راسي يوجعني رجعت تغطيت ضل يلح اسمع صوتة يتحرك بالغرفة ويحجي وياي نرفزني كلش شمرت الغطة و كعدت
طلعت برة شاردة منة رحت غسلت سويت ريوك
اكلت بدون نفس بنص اللگمة تذكرت العلاج التفتت للباب لگيتة واكف بيدة علاگة الادوية شمرهة يمي
دلهم: ماتصبر ام بطن تشوف الاكل تنسى كلشي
غنوة:مانسيتة عمدة ماشريتة طعمة مر
حجة هو رايح:ضلي تونين من راسج
رديت أصيح وراه:أون من وراك
ما رد علية مشة صاعد فوك لأسراء يشوفهة هم عدهة علاجات و ماتاخذهن لو تضل تبجي حالهة كلش من السيء للاسوء صايرة جثة تمشي مو مرة
العصر اجتني وتين صاحتني من الباب رحت مستغربة اشوفهة حجت تلزم ايدي :طالعيين للمول و نتعشى برة تجين ويانة
غنوة:لا راسي يوجعني
وتين:حباببة افرج ببغداد تشوفينهة شكد حلوة
غنوة: والله ماكدر الشقيقة اليوم لازمتني
وتين:حرمات يالله خيرها بغيرها محتاجة شي اجيبة وياي
صفنت شوية عليهة هواي محتاجة هزيت راسي بأي گتلهة تنتظر رجعت للغرفة ادور بالجرارات علة فلوس سمعت صوتهة من برة صاحت
وتين:تعاي غنوة عوفي الفلوس بعدين نتحاسب بس گليلي شنو تردين
هي تحجي واني ادور لحد ما لگيت مفتاح الكناتير
فتحت واحد منهن عضيت شفتي اعصر بصابعي
اخذت منهن بدون حساب خليت الكنتور مفتوح رجعت خليتهن بيدهة غمزتلي عود هواي
غنوة: لاتخلين شي ماتشترينة كلشي ماعندي حتى مشط ماعندي
حجة مترددة : خاف ما يعجبج ذوقي
غنوة:لا كلشي يعجبني معليج حتى اذا تردين هم اشتري لروحج منهن
وتين: عمي حاتم الطائي مايوصلج
ابتسمت بوجهة بوستني طلعت سديت الباب توني اريد ادخل الغرفة سمعت شي طاح صوت قوي من فوك صعدت بسرعة خايفة اباوع بالغرف فتحتهن
لحد ما شفت اسراء طايحة مددة بالگاع
دخلت خايفة لزمت جتفهة :اسراء بيج شي تسمعيني
حركت عيونهة تأشرلي بيهم گاعدة بس ماعدهة قوة تگوم ساعدتهة كعدت صبيت ماي بالكلاص نطيتة الهة دفعتة ماتريد شفتهة بيضة و وجهة باهت صايرة عظم و جلد تمددت غطيتهة طلعت
نزلت جوة سويت عشة لخاطرهة دلهم يتأخر سديت الباب من الحر فتحت الثلاجة اشوف شبيهة بديت
احضر بالعشة لحد ما أذن رحت صليت رجعت صبيت لأسراء صعدت فوك فتحت الباب باوعتلي
كعدت بصفهة مخلية الصينية بينة گوة رضت تاكل
شوية دفعت الماعون ماعرف علاجهة شنو عفتة
نزلت تعشيت ونظفت المطبخ رجعت للغرفة غيرت هدومي غسلت العدي اضطريت اغسل هدومة منظرهن بالحمام يسوي عدي عقدة نفسية
انتظرت وتين على نار متحمسة كاعدة بالهول كل شوية التفت للباب لحد ما اجت لاگيتهة هي تهز بالعلاليگ گبالي مكيفة
حجت بضحكة: حتى ابوالمحل جبتة وياي
غنوة:صدك
ضحكت كعدنة بالمطبخ صدك ماخلية شي ما مشتريتة كل ما تطلع اصفن قصص وروايات عراقية كرار صلاح وية روحي اگول شكد اخذت اني فلوس عصرت ادية خايفة مامتعودة اصرف هيج گمت اباوعلهن برهبة محتارة بيهن
غنوة:هواي ذني
وتين:انتي گلتي من المشط وفوك كلشي ماعندي جبتلج جهاز عروس
غنوة: اول مرة اشتري هلكد
ردت بضحكة:غير جهاز عروس قابل يومية معرسين
ابتسمت بعدني متوترة من بوگة الفلوس راوتني كم شغلة مشت حرانة تريد تبدل و ترتاح شلتهن كومتهن بالكنتور وجهي مخطوف من كد ما خايفة طارت الفرحة كلهة سديت كنتورة هم بكلي ما يرزل
كعدت بالهول بيدي الموبايل هواي مر وقت يالله سمعت صوت السيارة دقايق و دخل صاعد فوك
حجيت بدون ما اباوعلة : اسراء اكلت بس علاج ما نطيتهة ماعرفة
دلهم:زين تسوين هسة اصعدلهة تسلم ايدج
سكتت ما ارد عليه تمنيت يضل هناك للاسف شوية و نزل اخذ ماي رجع يمهة ما تأخر بس شفتة أجة دنگت العب بالموبايل خلة الدولكة الفارغة على الطاولة راح للغرفة لزمتني الخوفة اباوع وراه ماكو لحظات اجة گالب خلقتة
دلهم:فاتحة الكنتور
غنوة:اي
دلهم: المن فتحتي اخذتي من الفلوس
غنوة:اخذت نطيتهن لوتين تشتريلي محتاجة كم شغلة
دلهم:ماتعرفيين تگليلي اخلييلج شلوون تاخذين منهن شكد اخذتي
غنوة:مادري اخذت طلعتهن من تجة
دلهم:گولي شكد خمسة وعشرين لو عشرات حتى اخلي بمكانهن
حركت جتفي ما ادري شعوط كعد يحسب بيهن خابر صفوان يريد يعرف كل شدة شكد بيهة متساويات لو لا ذاك يگلة يمكن هلكد يجوز هلكد لزمتني الضحكة بس ماضحكت خفت منة
راح للغرفة مشيت وراه كعد يحسب بالبقية خلة فلوس من محفظتة يسب بصفوان لماحاسبهن جا ماتگل لروحك ولا يخلي زلة عليه يذبهة براس غيرة
رفع راسة معصب ارتكيت بجتفي على الباب امشك طروف شعري بصابعي عجبتة الحركة ضل صافن
دخلت فتحت الكنتور سحبت العلاليگ گوة تنجر
كعدت اطلع بيهن مكيفة من شفتة ما زعجني بكلمة
گلبتهن اشكال و انواع الثياب و مكياج و اكو بيهن ماعرفتهن شنو بس قواطي كبار بكارتونة نفس لون
رفعت وحدة منهن ندستة بجافة :شنو هذة
ندار عاگد حواجبة رد :مو تعرفين تقرين
غنوة:نسيت الاحروف
دلهم: تردين ارجع اعلمج
سحبت ايدي بسرعة كعدت اتهجة عرفتة مرطب ماتعبت روحي هي الصبح تجي تعلمني عليهن بس فتحت لمرطب خليت لأدية ريحتة تخبل جنهة مدري شنو من الفواكه ابتسمت عاجبني خليتة فوك الميز گمت اخذت من الهدوم دخلت للحمام
اباوعلة بطرف عيني يهز بيدة و عيونة عليهن سديت الباب اضحك مكيفة غيرت بثوب لجابتة لونة وردي فاتح حيل جوة الركبة و نص ردن خفيف ناعم كلش
طلعت اباوعلة بالمراية خليت من المرطب على ايدي ردت اخلي لوجهي خفت لا مايصير لا اصير ملگوفة اتاني وتين تعلمني عليهن سديتة خليتة على الميز طلعت بالهول اخذت الموبايل اراسل بيهة
شكرتهة هواي كل حجيها حلو جنت خايفة لا مثل غفران هم جانت هيج تحبني و تشتريلي بعدين طلعت خبيثة لهسة مصدومة من سواياتهة بية حتى على اللگمة حاربتني خلوني محتارة بين ناريين
ماعرف شسوي اضل وياه واني كارهتة و مكسور خاطري منة لو ارجعلهم و ارجع لنفس للضيم و القهر مو بعيدة اطك واموت اذا رجعت لعلوان هم علية سمعة هم مطلگة يحتاري شيسوي بية
بين افكاري و النعاس فزيت من طاح راسي من طرف القنفة جنت نايمة عليه رگبتي توجعني گمت طفيت التلفزيون و الاضوية السحب كل شوية يعزل هواي
مشتغل وينة ما يطفيهن صعدت الدرج اسمع
صوت همس من فوك و حجي ناصي وكفت قريب
الباب اباوعلة من الطرف مخلي راس اسراء على رجلة يباوعلهة بقهر يمسح على راسهة يريدهة تسولف وياهة هي ساكتة صافنة على الحايط ماترد
عفتهم و نزلت جوة تمددت بمكاني تغطيت ضامة راسي جوة الغطة اگلب باليوتيوب السماعة بأذني
كل شوية تفصل مگطعة الة اللفهة على الموبايل و تنعوج يالله تشتغل شلعت گلبي عدة شكد فلوس ولا يگول هاي الفرخة شتريد شمحتاجة من اخذت منة نگلب طنطل عيونة صارن براسة المنگرش بس هو
مو صوجك صوج اهلي لنطوني الك وين اكو واحد يزوج اختة بسبعين مدري ستين هسة لو بايعني بسوك الجمعة اجيب اكثر من ذني اخخ يانار گلبي
شبيردهة اريد اكتلهم كلهم اوج نار بالقرية و اموتهة
نرفع الغطة مني بعدني ادردم لگيتة فوك راسي مرتكي بيدة يباوعلي يضحك عبست لان سمعني
حجة مستند بحنجة على جتفي : راح ينباگن الفلوس عينج وراهن
رديت بضوجة:بوگت جدي من انباگ
دلهم: منو لباگة
حجيت اباوعلة بطرف عيني:ولد الحرام
ماحس غير منبت سنونة برگبتي عطت متوجعة ادفع بي لزم ادية يبوسني قوي ادفع بجتفة اريدة يس يتحرك شهگ نفس قوي رفع راسة مالحگت احجي
و أصيح اخذ شفتي ببوسة توسعت عيوني من فعلتة
گطع النفس عني معشت شعرة ارفع بي من فوگي
وخر يلهث واني مثلة من الخنگة لزم ادية گبل لا ارفعهن و اطگة خلاهن بيدة وحدة و ثانية على خدي
دلهم:النفس لينشم من رگبتج حرام ينزفر
كزيت سنوني بعصبية حتى فكي صار يوجعني عيوني غورگن ضليت اسحب بأدية ملخني مايعوفهن گمت ابجي بصوت مسموع بس اريد يوخر عافهن گمت ادفع بي جراني من زندي قوي
حجة بتهديد: شتمي ابوي غلطي علية حتى لو ترفعين ايدج عسى ما تهدمين هذة البيت فوك راسي كلشي مسموح تسوين عدا الغلط بحق امي ديري بالج غنوة احذرج امي خط احمر
رديت ابجي :ماغلطت على امك
دلهم:عبالج ماعرف قصدج من باوعتيلي گلتي ابن حرام
غنوة:لان العشرة ماتهون بس على أبن الحـ..
عض شفتي گبل لا اكمل عيوني صارت بهامتي شلت رجلي بركبتي طگيتة بين رجلي وخر ملامح وجهة نعجت متوجع لدرجة دفعتة من الحرباية مالحك
يلزم شي طاح گمت امسح بحلگي اتفل لعبانة روحي كل ما يلمسني اتذكر ذيج الليلة لنطيتة بيهة كل مشاعري و أمنت بي عافني بمصباحهة مكسورة
غنوة:گتلك والله احرك اي مكان تلمسة بية و ذمتي برگبتك لاتگلب السالفة بعد وتطلعني غلطانة انتة الغلط راكبك من راسك لساسك
احجي وامشي للباب اللهث من العصبية جراني من ثوبي هو بي تور طبقات ماسمعت بس صوت الشك
شعوطت لزمني مطيحني للگاع صار فوگي معصب
حجة بنتر:ولخلقج اذا عدي هاي الحركة اجرم بيج اجرام حيوووانة
غنوة:انتتة حيواااان
دلهم:لججج تحترمين لا اطيح حضج
غنوة: والله ما احترممك بعد لوو تموت و تعدل لو تبوس ايدي ما احترمك و اريدك
دلهم:ولج انتي شني شصايرة لاتنگدرين لا تنلزمين يگول قنبلة بس واحد يلزمج تثوريين فوك راسة
غنوة: غنبلة تموتك كون
ضحك بصوت عالي ججة هو يبوس حنجي:قنبلة عيني فنبلة مو غنبلة
غنوة:دوخرر دلهم وخر اووف يانار گلبي وخر رحمة لأمك اختنگت
احجي هو يبوس بية و يشم سحبت ادية ثنينهن لزمت شعرة سحبتة توجع لزم ادية يريد يقربهن على شعرة حتى ما يرفع دنگت بس رگبتة گبالي
من الصفحة يم جتفة طلعت حرگة روحي بعضة حسيت دم طلع عطت موخرة جر شعري بجيت
عافني وخرت عنة انزل بثوبي ابجي حجة خايف:اسف نسيت راسج يوجعج هواي تأذيتي اجيبلج مسكن
غنوة:وخرر عني وخر جنك ثور
دلهم:تعاي بت المحروگ بجهنم خل اشوف شصار بيج
غنوة:ابوك هذة المفحم و محترك بالنار ابن المجرم يامجرم يا أنانيي
دلهم:دگوميي منا گومي مو صوجج
غنوة:گايمة اني اعلمك المنگرش
گمت محترك گلبي رحت للمطبخ اخذت خاشوگة شعلت النار خليتهة حمت بعد حلفت خليتهة على رگبتي لسعتني ماتذكر وين بوسني بالضبط جنة ما شايف نزلتهة لجتفي توني اريد اخليهة على خدي
نسحبت من ايدي شمرهة حجة بنتر:انتييي مخببلة شسووين
غنوة:گتلك ما سمعت منييي
رفع راسي يشوف الحرگ عض اصبعة بحرگة اعصاب دفعني متنرفز طلع راگع باب الحوش وراه
خفة وراحة رجعت للغرفة اشوفهة حاسهة حوس
عدلتهة سويتلي كعدة اتابع مسلسل اسمة خاتون
حلقة تجر حلقة لحد ما غفيت ، گعدت على صوتة
يريدني انام بمكاني احسن من الگاع و المخدة عالية گمت منعسة كلش طافية تمددت و السماعة احسهة بعدها مشكلة بأذني هو يحجي ما افهم شيگول
مرت هاي الفترة ورة تهديدي الة عيشت روحي براحة ما صايرة وياي وتين لتجي بين فترة و فترة
قوت علاقتنة من سوالفهة فتحت عيوني على كومة
سوالف و اشياء مادري جنت عنهة محد مهتم بية گبل ماعندي معرفة بالمكياج و نوع الملابس هاي كلهة ما شايفتهة ولا واحد يخلينة نشرتي حسيت بروحي صدك بنية واني كاعدة يمهة كلش حبيتهة
دلهمما يوصل يمي من بعيد يسولف مرتاحة منة ومستمتعة اشوفة هيج محترم كلمتي ما يجبرني
بنفسي احرك دمة لو احجي عليه بس اني لتأذة كل مرة نتناقش اكتشف هو شكد انسان بارد و اناني
جان عدي مراجعة يم الدكتورة گلت لوتين تروح وياي هو طلع انتفقة يرجع بالأربعة گبل الحجز بساعة حتى ما نبقى هناك كاعدين و ننتظر
العلاج لكتبتة الي صح شوية بخففهة بس اذا اعوفة اموت من الوجع صرت اشرب اشرطة واحد ورة ثاني
طلعنة العصر من رجع وتين وياي اخذنة الطريق كلة نسولف و نضحك هي تسولفلي عن مواقف صايرة وياهة ، دلهم كل شوية يتأفف لو يگول اسكتي علية خلة البنية تستحي سكتت بعد ماحجت شي
وصلنة دخلت لدكتورة حجيتلهة ماحسيت بيهة متفاعلة وياي بس تهز راسهة گالت راح اكتبلج علاج وقائي يقلل نوبات الشقيقة بس ما يوخرهة كرهت
هذة المرض لشكد ما اشربلة علاج مايروح ولا يخف
طلعت ضايجة هو حتى ماكلف نفسة وشتراه شمر الوصفة گال يشوف غير دكتور لان العلاج الي كتبتة الي صرت ما اهدئ الة اشربة يگول مدمنة و دلهم ردة فعل الدكتورة على حجي ماعجبتة گال بعد ما نراجع عدهة يسأل و يدور على دكتور احسن
حجيت اخلي ايدي بيد وتين :اريد عشة
دلهم:عدي شغل ارجعجن و اطلبن من برة
غنوة:جا أني اريد اكعد بمطعم
گلب عيونة صعدنة كل ابالي هاي هي سمعني راح ينزلنة للمطعم داسلهة بانزين طلع گبل للبيت
باوعتلي وتين تضحك تأشرلي تحجي بهمس تگول غثيث هزيت راسي صدك يغث و يخبث
نزلنة هي ترخصت راحت لبيتهم اخذت اوراقي من السيارة نزلت گبلة ذبيت العباة و الشال حرانة دخلت اول ماحطيت رجلي بالصالة الدنيا افترت بية
حسيت روحي بحلم لو كابوس من صدمتي لعشتهة
رجلية نملن جسمي كلة رجف صرت احس بالدم هو يمشي بشرايني لازمة العباة صاكة سنوني سوة اريد احرك رجل لو احجي كلمة اصرخ ماكدر نشليت
أســــراء.
معلگة بحبل نازل من المحجر جسمهة ساكن اديهة بصفهة راخية وجهة ابيض عيونهة متوسعة دم ينبر من گصتهة ينزل على وجهة للگاع ينگط صاير ماي
تارس الگاع ترس كعدت روحي احسهة تطلع من المنظر لگدامي ماحسيت بس بدلهم من عبرني رايح الهة اباوعلة مشدوهة شالهة رافعهة رجلي غطت بالدم يحجي بحرگة گلب وصوت مخنوگ و مفجوع
شكرا لزيارتكم عالم روايات سكيرهوم
