رواية نقش بارد الفصل الرابع عشر 14 بقلم فدك فاطمه

مو بيدي الحَزن مَدفون تَحت حشايِّ .

غَنــوة

الموقف المـريت بي لا اگـدر انساه لا اتجاوزة گلبي

من گد ما يدك گلت راح يوگف اعصابي ماتحملت

هو بحال مايكدر حتى يحل الحبل الملفوف على رگبتهة رافعهة ليفوك اديه ترجف مصدوم حيلة باد

گوة گدرت اگوم طلعت برة يم باب الحوش أشر للبيت بروح مسلوبة الجيران يباوعلي بأستغراب 

گوة نطقت گتلهم يدخلون ماكو لحظات صار صوت

نقاشهم مسموع بين المتفاجئ و المامصدك لشافة

طلعو اسراء جثة من البيت دلهم حاضنهة ماينطيهة الهم صعد بالسيارة هي بحضنة حشكت روحي يم الباب كلهة من متجمهرة هنا من بينهم صوت صريخ 

اجت عمتهم من بيتهة توهة سامعة كلهة وجوهة مخطوفة يسألوني ماكدر ارد ماعرف شنو احجي الموقف لچم لساني عيني صارت على رشا كبالي

هي ضلت يمهة گالت عندي امتحان اكعد بالبيت على الهدوء اقرة ، انتبهت علية توسعت عيونهة

تهز راسهة بـ "لا" وجهة صار اصفر كعدت كدامي

حجت برجفة: والله.. والله جانت نايمة اني بيدي غطيتهة و رحت للبيت اجيب مـ..ملازمي البـ..بقية حتى جنـ..نت توني راح ارجع 

رجفت خايفة تباوع لأمهة اللازمة موبايلهة تتصل عدهة أمل بلكي عايشة ما شافت المنظر الي شفناه

صوت سيارات الشرطة وعتنة عن الاحنة بي 

طوقو البيت ماخلونة ندخل حتى يحققون رحنة لبيت عمتهم صوت البجي و السوالف بينهم محد فاهم لصار ، راسي نسطر متت من الوجع اريد اطلع من صدمتي ماكدر جسمي كلة يرجف مثل السعفة 

مشيت للحمام سديت الباب غسلت وجهي مبهوتة ايدي ترجف ماكدر اسيطر على روحي شهگت ابجي

روحي نمردت عليهة ماكدر استوعب لصار

طلعت بفزعة من سمعت صوت الصريخ عمتهة گطعت روحهة مخابرينهم متوفية نخبص البيت خبص متت گلبي نمرد عليهة شنو السوتة بس محد

يستاهل هيج موتة شنو الي حستة و العذاب بوگتهة

كعدت بوحدة من الغرف صوت البجي يخلي الشقيقة تزيد علية العلاج بذاك البيت باقي بي كم حباية تمنيت واحد يجيبهن الي و اشربة ، رجعت راسي على الحايط ابجي كل ما اتذكر صدمتة بيهة

                                            

              

                    

مر اليوم كلة مايقبلون ينطونهم اسراء الة يكمل التحقيق كل الاعرفة من وتين همة يخابرون اقاربهم

لراحو وية دلهم يعرفون لجاي يصير اما هو ماكو عنة

خبر ضل بالي يمة ، خايفة من الراح يسوي أكثر ما خايفة عليه مسودن مايعوف سالفتة 

لحد الصبح بالعشرة يالله مستلمينهة گبل من المستشفى للنجف راحو منا عمتهة و خالة دلهم 

مشن ضلن البنات بالبيت يسون فاتحة هنا الهة

گمت اشوف وتين وين اريد هدوم اسود مالابسة

كل معارفهم يباوعلي بأستغراب مدري يمتة لبسن اسود صحتهة اجتني عيونهة مورمة تبجي ويمهة 

رشا كاعدة الي صايرة صفرة من الخوف هي اخر وحدة جانت بالبيت خلت اسراء نايمة مشت لبيتهم

حجيت من اجت يمي :اريد هدوم سود ماعندي 

وتين:اسفة التهيت ما جبتلج تعاي للغرفة تتلابسن انتي ورشا خل انطيج من ملابسهة

مشيت وياهة طلعتلي تراك و فانيلة نص ردن من لاجارة لبستهن خليت الشال على جتفي طلعت كاعدة بالغرفة ماتحمل حجيهن يتشاورن و صوت ناصي يدخل بالراس يضوجني ادوخ 

لحد الظهر رجعو دخلن النسوان صريخ و بجي من الباب نخبص البيت حتى ملاية جابو طلعت ادور 

بعيوني على البنات اريد وحدة اعرفهة و اسألهة

لزمت رشا بالمطبخ التفت علية مخبوصة بالشغل

غنوة:دلهم وينة ما عرفتو

رشا:لا والله رايح وياهم هسة امي اريد اسألهة ماتنطي مجال ملتمة عليهة النسوان 

غنوة:شلون هسة شصار بعدهم بالبيت 

رشا:مساع باوع مه الباب بعدة الببت مفتوح محد من الولد يرجع ونعرف منة لصار

غنوة:ياربي منين اجت هاي السالفة 

تحسرت بضوجة رجعت للغرفة تعشيت وية وتين بدون نفس اكل أعصر بدية ميتة من القلق وين راح

ماشفتة ولا خبر عنة اذا ما يشمر روحة بمصيبة ما يرتاح هاي حرگتة يطلعهة شو وين 

مسحت وجهي بضوجة تمددت بالغرفة يمي ثنين بنات يسولفن يتشاورن كل وحدة تگول شكل ساعة 

منتحرة ساعة لاگينهة مكتولة وحدة تگول اخوها كاتلهة مادري منين يجيبن هاي السوالف شلون ألفنهة تحركت بس حتى يحسن بية ويبطلن حجي

ماكدرت انام طلعت گلت لوتين تخابر اي واحد يشوف دلهم وين ، مشت لأمهة تعرف منو البرة وياهم و تخابرة انتظرت واكفة يم الباب اهز رجلي 

بقلق مختنگة و گلبي مقبوض من الأفكار لتجيني

اجت وتين لزمت ايدهة خايفة:ها وينة 

وتين: بالنجف باقي هناك ما راجع وياهم 

غنوة:لهسة ما راجع 

وتين:اي ماكو ما أجة

            

              

                    

تنهدت بضوجة كعدت على الدرج ادعي الله يبرد گلبة لصار مو هين شافهة بهيج منظر يرادلة صبر شگدة حتى يتحمل اني بماعرفهة كلش احترك گلبي

رجعت للغرفة بس اريد اهدي روحي مبهوتة من كد ما قلقانة كل ما اغمض عيني يجي شكلهة ابالي ما اكدر انساه ولا اتحمل اتذكرة اخاف من منظرها 

ماتوقع منتحرة لان الدم جان يجري شلون ومنو لسوة هيج گلبي صار يدك بسرعة اجذب أذا اگول مو خايفة فوك الخوف قاطات مرعوبة من الصار

اريدة بس يجي اشوفة اتطمن شوية خايفة هم يعوفني مسحت دموعي متغطة راسي موتني شربت

براسيتول ما فاد غمضت عيوني شادتهن بشالي 

حسيت بنفسي اغيب عن الواقع بين الغافية 

و الصاحية اسمع صوت يصيحلي منظر اسراء كل شوية يصير گبالي يخلي گلبي يجفل بخوف 

شهگت فازة من حسيت احد يصحيني صارت گبالي رشا لحجت تمسح ظهري:اسم الله حبيبتي سودة علية فززتج 

مسحت وجهي مبهوتة من الحلم و الاشياء ليصورهة الي عقلي هزيت راسي بنفي انفض الغطة عني گامت فاتحة الثلاجة الصغيرة طلعت منهة ماي اخذتة شربت شوية أبرد على گلبي ليخفگ ، خليت بيدي ماي ثلج رشگتة على وجهي حتى اصحى 

حجت تاخذ الدولكة:اسفة كعدتج بس دلهم برة يريدج

فزيت بسرعة اتعثر بالغطة:ويينة يمتة اجة

رشا:توة اجة هناك منتظرج بالترك لان الولد بالـ..

مانتظرت تكمل طلعت اتلفتت اجت وراي فتحت الباب مال ترك طلعت شفتة واگف مرتكي على الحايط اديه ثنينهن ورة ظهرة لابس اسود و شماغ

اسود ملفوف على رگبتة مغطي نص من وجهة

حجيت بخنگة :دـ..دلهم 

رفع راسة الي تقربت منة يباوعلي وجهة مابي تعابير

احسة بعدة لهسة مصدوم جوة عيونة اسود شفتة يابسة و بيضة هدومة السود كلهن تراب 

حجة بصوت مبحوح:دفنتهة ،عفتهة و اجيت

شهگت ابجي رفعت ادية دنگ لطولي حضنت رگبتة

مخلي راسة جتفي گلبي نمرد عليه احتاريت شلون اخفف عنة و اواسيه 

ابتعد رفع راسة مسحت على خدة ايدي ترعش وخرني شوية عنة گعد بالگاع سحبني من ايدي وياه

كعدت بصفة تمدد بالتراب خلة راسة على رجلي مغطي وجهة بالشماغ خليت ايدي فوك شعرة امسح عليه اباوعلة مقهورة 

غنوة:تعال جوة للبيت ارتاح شوية نام 

ردت بصوت ناصي: عدي شغل اريد اروح

غنوة:شنو شغلك دلهم لا تسوي مصيبة 

دنگت حتى اشوف وجهة خليت ايدي على خدة اريدة يفتح عيونة حتى يسمعني و اعرف شنو ناوي عليه كل ماريد اسألة شنو لصار الهة اتردد 

غنوة:دلهم كلشي لاتسوي عوف المشاكل شوف وين وصلتك كافي السوالف القديمة لعدك تريد حمل جديد شنو لصار خلي الشرطة هي تتصرف

            

              

                    

گعد متربع مگابلني يأشر بيدة يحجي بحرگة:ترديني اعوفة ولج هذة الگ***" عصام اذا ما اراويه الويل ما ارتاح لججج ميتة منتحرة وجاي راميهة مشوه جثتها ليشش شنو استفاد من فعلتة بس حتى يحرگ گلبي لجج ميتة و راميهة ميتتة

توسعت عيوني بصدمة وية كل كلمة يگولهة احس گلبي يصير حجارة و يثگل صدري من الاسمعة لزمت

ايدة بس حتى اهدي رجفتة و عصبيتة واني مبهوتة

حجيت مامستوعبة:عـ..عصام شلون يسوي هيج

دلهم: مادرري ما تدخل راسي يابة وياه الحگ شما گال محد يلومة انييي غلطان هي غلطانة بس مو هيج يحرك دمييي ممثل بجثتها ،رادهة گالي مرتي اريدهة ما رجعتهة الة خايف عليها منة مادري بي يطب لنص بيتي و يسوي هييج 

يحجي بحرگة اعصاب لساني نشل ماكدر احجي شي من كد ما مصدومة هي منتحرة شكد تمنيت عكس هذة الشي ماردت تموت هيج بس لمسويه عصام مايدخل بالعقل مو فعلة انسان هاي يلگاهة ميتة

يروح يرمي عليهة ليش شلون انطاه گلبة 

حجة يلف الشماغ على وجهة :اشوفة لو لا اذا ما امثل بجثتة معتب 

غنوة:لااا دلهم كافيي فدوة عوف هاي السوالف خلي الشرطة يلزمونة و ينسجن لاتدخل روحكك 

دلهم:شكد ينسجن شكم سنة و يطلع انعل ابوهم لابو قانونهم الزمة گبل لا يطب السجن و يطير من ايدي هذة الگ**" 

راد يگوم لزمتة مرعوبة من تهديدة حجيت اوگفة:بداعة امك اوگف لخاطر اسراء الله عليك دلهم عوفة فدوة كافي نعمان من جهة و اعمامك هم هسة تريد تخلي عصام برگبتك شنو تستفاد ياهو لربح من هاي الثارات حتى انتة تربحح

دلهم:لاتخبلينييي ماكدر اكعد اريد اشوفة عقليي مايستوعبب شلون سوة هيييج لو عايفة يابة لاتسوي شي خليييهة هيجج معلگة مردد گلبي شوفة الرصاصة بيهة كافيي عذاب الضمير و الندم وصلت للموت علگت حبل موتهااا بيدهة وحددها محد يمهة يجي هذة الگ**" يكملهة 

حجاهة گام رايحة گمت اتعثر لزمتة بسرعة سحبتة علية احجي بتوسل :ابوس ايدك عوفة حگك محترك دمك عليهة اذا تريد دورة عاتبة طگة حتى يبرد گلبك بس لاتموتة خلي القانون يحاسبة اذا الكم حگ لو شوية عندة مايضيع عد رب العالمين ، فكر لا تتصرف بعصبية بعدين تتندم انتتتة اعترفت غلطان كاافي تغلط اكثر كلشي تسوي بعصبية يصير وراه مصيبة 

فلت ايدة مني مامقتنع مشة دگيت على رجلي بقهر 

شلون وياه موتني ، الواحد يحتار وية منو يوگف همة غلطانين بس فعلة عصام مايسويهة واحد عاقل 

دخلت جوة افور من القلق حتى ماكدر اگعد ضليت افتر بمكاني مردت اصابعي مرد كل شوية جاية فكرة 

ابالي شكل ، رحت توضيت صليت ادعي بلكي الله يهدي شسوي مابيدي شي لا يسمع مني لا من غيري

ضليت كاعدة لصلاة الصبح فرشت المصلاية برة

بالهول الغرفة متروسة بنات گرايبهم ماكو مكان صليت ضليت كاعدة راسي يوجعني ماكدر ادنك 

على التربة گوة كملت ، صليت لأسراء واني كاعدة

            

              

                    

لفيت العباة علية كعدت لازمة السبحة بيدي بالي مشغول بدلهم خلاني اتگلب من الخوف و القلق

رفعت راسي من حسيت أحد يباوع علية عگدت حاجبي جانت عمة اسراء من ساعة رجعتهة من النجف هي تدعي و تتحسب على دلهم ماخلت شي ما گالتة لا سب لا شتايم ، خفت كلش من دعاويهة

محترگ گلبهة وتدعي بحيلة صدر احتار ادافع عنة لو اصف وياهة كلهم غلطانين ناس ماكو على لسانهم غير الدم و الموت عدهم هذة حل لكل المشاكل

مر اليوم كلة ماشفت دلهم لا رجع سألت خالتة عنة خابرتة ماكو جهازة مغلق ، طلعت برة سألت الولد گالولهة ما شافو من الفجر نخمش گلبي من سمعت

العصر گبل الختمة طلعت وية خالة دلهم للبيت گوة دخلنة كل ما اوصل الباب گلبي ينقبض بجيت اشوف 

الدم بعدة بالگاع رجلية ترجف كوة امشي دخلت للغرفة اخذت العلاج و موبايلي رجعت بسرعة بس اريد اطلع منا احس ريحة الموت و الدم موجودة

امشي ورة خالتة و الموبايل بيدي اتصل عليه مايرد

كررتة هواي لحد ما طلع عندي مغلق تنهدت بضيق

رفعت راسي اباوع بالوجوه بلكي اشوفة هنا راجع

دخلت للبيت جمدت بالباب رجعت ليورة اباوع الهم

گلبي نخمش چني شفت علوان هزيت راسي برفض 

شنو يجيبة هنا صرت اتخيل شبية عصرت عيوني

دخلت جوة هوسة نسوان تجي و تروح البيت خنكة

حارة بس صوت المبردات الكهرباء طافية شغلوهن

على المولد الهوة ثگيل و اصوات للمهامس اعلى من صوت الحجي الطبيعي كل مجموعة تحجي شي

حجت رشا توگفني بالباب :اهلج هنا

باوعتلهة ما فاهمة عبالي سمعت غلط رديت اقرب منها:شنو

رشا:اهلج هنا توهم اجو كعدت النسوان بغرفة امي

رجلية بادن الگاع انهزت جواي شلون اجن منو منين

عرفو بينة هنا حتى يجون عفت العلاج بالگاع مشيت

للغرفة مترددة بطني وجعتني من الخوف

شفت غفران و بصفهة صفية و وياهن مرت عمي عمار ام جسام ، عصرت اصابعي سوة اشد العباة

دخلت لسلني نبلع حتى ما سلمت هنة يگول مو نسوان اخواني چنهن اخواتي تلگني يبوسن بية

و يحضنني ، يعتذرن لان ما اجو اول يوم الفاتحة 

كعدت بصف غفران احس وجهي صار اصفر من الصدمة ايدهة على جتفي يگول حايط طايح علية

عمة اسراء تسولف وياهن من صاحولهة تعذرت وطلعت برة للنسوان الي جايتهة تواجب 

حجيت اندار على غفران:شجابكمم

غفران:اجينة علوان گال نروح يضل الزلمة نسيبنة لازم نواجبة 

غنوة: تضحكون علية شنو شلوون تجون هنا علوان شيريد شكو براسة من مشكلة يريد يسويهة 

صفية:صدك ما يبين بيج هاي فوك ماتفرحين اخوج اجة لرجلج ما عافة حتى يحترمج و تكبرين بعينة

            

              

                    

غنوة:هو من يمتة علوان يعرف دلهم غير كل ما يتشاوفوون يتعاركون بعد شلكم بهاي 

غفران:حتى لو يتعاركون بس بالشدة يبين الصاحب

هيج أيام محد يفكر بالمشاكل الناس توكف سوة

طگيت رجلي بقهر منين اجني ذني شلون عرفو و ندلو البيت عيوني على صفية تباوعلي و تهز بيدهة

توني ياالله انتبهت لعمتي الي لازمة سبحتهة وتسبح

من شكلهة مبين تعبانة لو جاية مجبورة 

لزمت ايد غفران گلبي يدك سريع حجيت اسألهة:منو الي جابكم اجرتو سيارة 

غفران:لا والله منيلنة كروتها الله يسلم جسام جابنة هو گال لعلوان على الفاتحة لو احنة ماندري بيج وين ما وين بالعيد علوان راحلج لذاك البيت و رجلج طردة ما خلاه يشوفج يگول ناكل منج وذرة 

تحجي وبالي مو وياهة جسام هنا و دلهم طالعة الدنيا من عينة اذا شافة شيصير والله يكتلة بمكان عصام ، گمت ادگ عليه مايريد افتر بالغرفة ادعي

على الساعة السودة لساعدني بيهة جسام و تورطت

عوزي خوف كافي علية لشفتة من جهة دلهم راسة وستين سيف يريد يكتل عصام بس يلگاه كلهة بجهة و جسام جاسني للفاتحتهم بجهة وياه علوان نوب

شمرت الموبايل بضوجة مشيت محتارة اروح يم باب المطبخ اتصنت خاف تصير مشكلة لو دلهم يجي ويشوفة ، ساعة ارجع للغرفة خايفة من صفية

تحجي شي گبالهن علية و تشوه سمعتي مثل هناك

تدولبت كل شوية رايحة لمكان اريدهن بس يگومن حتى يرحون و افتك من هذة الخوف لأخذ نص حيلي

اجت الملاية كلهة تجمعت بالهول كلش جبير حتى ما سوو جادر للنسوان 

خلصت الختمة صارت دنيا الغروب عبرت من بين النسوان كعدت بصف عمتي احجي وياهة بلكي شوية اهدئ رغم ابتسامتهة بوجهي بس حجيهة ثگيل چنهة ماتريد تحجي وياي گوة ترد

كلش استحيت ضليت متوترة كعدت شوية گمت لزمتني غفران كعدتني بصفهة جرت ايدي عليهة

حجت بهمس:هذة بيت عيالج لو بيتج

غنوة:يمتة ترحون صارت دنيا الليل 

غفران:نتاني العشة خو مانرجع هيج نريد نقرة الفاتحة على روحهة 

طبگت سنوني بقهر حجيت بهمس:ياعشة الناس بيا حال انتي بطرانة لايسمعونج 

غفران:جا شگلت هسة انة نگلبتي علية

نترت ايدهة گمت افور من العصبية يمتة افتك منهن حتى لهنا لحگني دخلت للمطبخ هوسة راح يصبون 

يحيبون اماعين الاكل من برة البنات يدخلنهن

فتحت سويتلي لفة اكلتهة بسرعة بس علمود الدوة

شربت ماي فتحت العلاگة شربت اهز رجلي متوترة

اريد بس يخلون ماعون يم غفران و تاكلة وتمشي

اباوعلهن من الباب كل ما وحدة تعدل كعدتهة اگول اي راح يرحون ، طكطكت اصابعي اشوف مرت عمي

طلعت موبايلهة تخابر نوب سدتة و حجت وياهن 

            

              

                    

كيفت من گامت راحت تغسل هنة بينت الضوجة عليهن اول وحدة گامت صفية بعدهن يغسلن مركزة وياهن بس اسمع البنات وراي يتشاورن 

التفتت مستغربة واكفات يم باب المطبخ يباوعن برة صوت الزلم عالي مشيت الهن ايدي على گلبي

غنوة:شصاير

التفتت وحدة منهن علية حجت : مادري سمعت متعاركين برة

رشا:هذة خاف رجلهة اجة

وتين: يمعودة دگولي غيرهة والله نهبطت من اصواتهم عود رحت اسحب الصوندة من الحايط لنة الصياح صار بفلس ركبي تخرذلت اجيت ركضت

سمعت صوت غفران حجت:احنة رايحين غنوة حبيبتي 

باوعتلهة بطرف عيني رديت بهمس:الله وياكم

غفران: حبيبتي ديري بالج على روحج اخر الاحزان ان شاء الله 

حضنتني حجيت بهمس كارهة تمثيلهة:شگد تنافقين اخذي صفية ولن منا ماريد اشوف وحدة منجن الله يكفيني شرجن

ابتسمت گرصت جتفي بدون ما يحسن عليهة نترت ايدهة من علية ، اجت صفية تريد تسلم وخرت عنهة

طلعت ورة غفران ضلت مادة ايدهة للهوة 

وصلتهن قريب من الباب هي تسأل مستغربة شكو

طلعن و رجعن هوسة برة عمتي فتحت موبايلهة تدك على جسام مايشيلة 

رديت البردة الداگينهة على الباب اباوع ماشوف العركة بالجهة ثانية بعيدة خفت امد راسي ليبرة

گالت عمتي مستغربة:وين راح هذا الولد گالنة طلعن غير يوگفلنة نطلع وياه ماتدگين على علوان تشوفينة

غفران: ماعندي رصيد حتى ترميشا مابي دكي عليه 

ماعندج رقمة جلجل الليل بعد يمتة نرجع عفت جهال عد اختي هي ماتكدرلهم

ضلت عمتي تدور بالاسماء تريد تتصل ، سمعت صوت دلهم من برة يرعد نهبطت يت ايدي وخرت البردة طلعت راسي اباوعلهم من الباب 

كلهة متجمهرة من بينهم شفت جسام علوان لازمة واحد يدفع بي ليورة صوت دلهم يجي من جهة كدامة بس ما اكدر اشوفة اريد افتهم عليمن هاي 

الطلابة صار ساعة يصيحون دلهم نببح حسة 

صارت عيني بعين جسام لرجع ليورة من للمدافع 

ضل يباوعلي عفت البردة دخلت خايفة لايشوفني

دلهم يطلع كل حرگة دمة بية 

من خفت عركتهم دك جهاز عمتي گالت اطلعن مشن تعاركو يالله ارتاحن و فاخ گلبهن ، رجعت للبيت ساعدت البنات بالتنظيف اشغل عقلي عن التفكير اضل اوهوس ليش تعاركو بس لا جسام حجالة كلمة لو غث دلهم كافي الي صاير هسة مو 

مال واحد يجي يحجي بسوالف ثانية حسيت كل الصار گبل هو تافه كدام لصار بأسراء ماكدر استوعب موتها مقهورة عليهة جا شگد اتندمت لدرجة وصلتهة تنتحر فوگهة اجة عصام سوة هيج 

نشفت ادية من الماي طلعت اسمع صوت دلهم يسولف قريب بس طلعت من الباب هو رفع البردة البرة صرت كدامة اشرلي اضل واكفة يم المطبخ 

            

              

                    

التفتت يسولف وية الولد البرة شوية و اجة حجة بدون يستعجلني :البسي عباتج تعاي 

غنوة:ويين 

دلهم: نروح صيحيلي وحدة من البنات خل تجي 

هزيت راسي مستغربة رحت صحت رشا راحتلة مشيت للغرفة لبست عباتي اخذت الادويةوموبايلي 

  طلعتلة منتظرني يم الباب حجت امشي وياه :شسويت ويامن تعاركت

دلهم:مالي خلگ احجي 

سكتت نزلت عيوني ماريد اضغط عليه طلعنة من البيت مشة للسيارة فتحلي الباب جانت رشا واكفة بيدهة ثنين جنط اخذهن من ايدهة خلاهن بالكشن الورة تشكر منهة صعد 

حجة يشغل السيارة: ماتحمل اطب البيت تعبان اريد ارتاح 

غنوة:اني هم اجيت العصر گوة علية

هز راسة حرك السيارة عيني على الطريق الاضوية تمر الشوارع متروسة ناس و سيارات گبلهة بأيام

رجعنة من هذة الشارع مرتاحين شلون بسرعة صار هيج نگلبت الدنيا فوك جوة وكف السيارة كدام بيت طابقين حجة يلم غراضة لمخليهن بينة 

دلهم:اجرت شقة هنا شكم يوم على ما ابيع البيت 

غنوة: مو سادينة علمود التحقيق 

دلهم: على مايخلصون ادور ليشتري بيش ماجان

هزيت راسي بفهم حقة لو اني منة بعد ما اباوعلة مو اعيش بي ، نزلت اخذ ايدي فتح باب صغير صار كدامنة درج ضيگ صعدنة منة ليفوك مغلف بجينكو ابيض ضلمة بس وصلنة شغل الضوة 

فتح الباب خلة الجنط بالگاع دخل اني وراه ما انتبهت لشكل البيت عيوني عليه اخاف افتح وياه موضوع عصام و يعصب اشوفة هادئ اخاف بالزايد

سد الباب قفلة فتح الجنطة اخذ هدوم مشة لنهاية الهول عرفت الحمام هناك دخل رد الباب دنكت 

شلت الجنط خليتهن على القنفاة الصغار لهناك موجودات كعدت مرتكية على المسند مالتهن

سحبت الشال نزعتة و العباة مددت رجلية يصلن علية يوجعني اعصر بيهن بين اصابعي بلكي يهدن

رفعت راسي من فتح الباب طلع مخلي الفانيلة فوك راسة الماي ينگط نشف بيها لبسهة هي مبللة

دلهم: نازل اشتري ماي محتاجة شي غيرة 

هزيت راسي بنفي كلشي ماريد طلع قفل الباب وراه

گمت للحمام نزعت الهدوم لابستهن مال رشا شكد

عيب منهة لازم اشتري و اوديهن الهة البنية حتى ما أمون عليهة ضليت البس بكيفي

لميت هدوم دلهم غسلتهن خليتهن بالتجفيف البيت كلة مجهز ماعرف اذا هم ألة لو مأجرة صح صغير بس بي أثاث فراشات بالگاع ممدودة 

كملت طلعت الهدوم شريتهن لگيتة جاي ممد مخلي ايدة فوك عيونة اخذت الفانيلة من الگاع نشفت شعري علگتهة على الباب اخذت العباة

رحت كعدت يمة حس بية رفع ايدة عيونة حمر دم 

تمددت شال راسة خلاه على ايدي غطيتة وياي 

لف أديه على خصري ضام وجهة برگبتي ساكت

            

              

                    

بس نفسة يصعد وينزل ضليت امسح على ظهرة مقهورة على الصار بيه ادري الغلط منهم بسبب تسرعهم و اسراء لو ما ماخذة ابنهة جان ما صار هيج

صح هي لأخذتة وياهة بس الحادث ما جان بيدهة 

هي ما رادت تفارگة تالي راح من ايدهة و كدامهة

بس هسة شيفيد اللوم و الـ لو بعد صار لصار لا نكدر نرجع الوكت لا نرجعهم مابيدنة غير الدعاء 

رفعت ايدي خليتهة بشعرة احرك اصابعي بهدوء

حضني قوي گلبي نقبض و رجف من شهگ يبجي

شعر جسمي وكف دموعي ترست عيني بجيت

اشد حضنتي الة ابوس بشعرة 

ضليت سهرانة ماكدرت انام هو غفة من التعب عيني على السگف بس البنكة تفتر شمرت العباة عنة بعيد

كل ما اغمض عيني اتحلم بالشفتة اتضايق

رفعت راسي للموبايل يدك بس صوت هزاز وضوة بنص الظلمة رفعت ايدي اريد اخذة بس وخرتهة فز 

ابتعد عني يمسح بوجهة 

غنوة:الموبايل يدك

رفع ايدة يتلمس الگاع اخذتة نخليتة كدامة رد گبل 

لا اعرف الاسم منو نهض مخليه على أذنة عاگد حواجبة گعدت مستغربة بس مصيبة جديدة مليت

حجة يرد عليه :صلاح شعجب متصل .. حياتك الباقية داگ تعزي لو تتشمت .. وين أجي ... گتلي ولد اليوم جا حجيتهة من خليت حاتم بيد نعمان 

.. لا اليوم ولا امس تحلم ارجع اخلي روحي جوة رحمتكم .. الراحو الله يرحمهم لتريدك ولا توصلني

سداه شمرة بضوجة تقربت مخلية أيدي على رجلة

حجيت خايفة: شكو منو هذة 

رد يمسح وجهة : لاتشغلين بالج محد 

غنوة:احجيلي حتى ما اضل مثل الثولة وراك 

تنهد التفت اخذ ماي من العلاگة شرب خلاه يمة رجع راسة على الحايط متضايق يجر بياخة الفانيلة 

دلهم:صلاح ابن عمي سامعين بالصار لأسراء و يريد يجي يهرمل هواي تصفى النفوس مدري النعل على راسة توة تذكر يصفيهة

غنوة: اي يجوز يريدون يصالحونك 

دلهم: شتحجين بابا هي مال صلح غير صايرة اطلبك و تطلبني ماعرفهم

غنوة:لعد ليش اتصل

دلهم: يريد يغسل مخي بسوالف الگرايب ورة اسراء محد ضل عندي على ساس اجة الوكت حتى استند عليهم و نرجع أهل 

غنوة: ماعندك غيرهم اعمام 

هز راسة بنفي:هو واحد كتلة ابوي 

غنوة:استغفرالله زين ابو اسراء وين 

دلهم:مستشهد ابوهة ماعدهة اخوان منة ما ضال بس عماتهة و اعمامهة علاقتهم مو كلش زينة

غنوة: الله يرحمهم كلهم لاتضوج اني هم ماعندي اهل مثلك 

عصرت ادية متندمة خاف يضوج المن حجيت هيج

مد ايدة نزيت راجعة ليورة وگف بلعت ريگي تقربت يمة وخر شعري خلاه ورة أذني حضن وجهي

خلاه على صدرة بوسني براسي مررت ادية جوة ايدة 

حضنت خصرة غمضت عيوني تمدد هو حاضني ايدة بشعري كل شوية يتنهد مختنگ 

            

              

                    

غنوة:اسألك بس لاتعصب تحجي وياي 

دلهم:گولي

غنوة: شسويت ورة ما رحت اول امس ضل بالي يمك 

دلهم: كملت الاوراق مال المستشفى رحت للمركز صفوان اجاني رحت لبيتة نمت العصر رجعت 

غنوة:يعني ما رحتلة

دلهم:لا مشغول يرادلة خلق حتى ادورة 

غنوة: اذا خليت موتت عصام برگبتك بعد ماتشوفني 

اعوفك و اروح وين ما جان لو شتسوي ما ارجع بعد

رفع راسي حجة بحدة : هي هاي وگفتج وياي

خليت ايدي فوك ايدة احاول اهدي : اني وياك بس مو أيدك تروح تكتل عصام شستفاد ليش عدكم الموضوع سهل ترة حرام اكو قانون يحاسبة 

دلهم:لقانوون لتحجين عنة اذا يكتل روحة سنتين ويطلع عصام مو متهم بقتلهة هو شوه جثة وانتهك حرمة جسد ميت مو يگولون اكرام الميت دفنة ويننن اكووو ميت يطگونة طلقة يا بشر يسويهة 

مسحت على وجهة امنعة يگوم :انتتة گلت ماقتلهة 

اعرف حقك تنقهر والله اني روحي ممرودة عليهة ما الومك غالية عدك و نصدمت بالصار بس دلهم فدوة فكر عدل اذا قتلتة منو يوگف وياك ها تضل شارد من بيت لبيت فكررر بية انييي وين اروح خلي الصار بين عيونك اكعد اصفنلهة والله ماتستفاد اتوكل على رب العالمين يبرد گلبك و يصبرك و عصام ياخذ جزاتة كافيي لصار من تسرعكم ابنهة مات و هي هسة تريد تكتل رجلهة 

دفعني حجة بنتر : تگليلييي انتتتة صفيت العائلة كلهة، لجج ولخلقج ما گتلهة تجيبب ابنهاا هي من ذات نفسها گالت اروح وياك وين ماتروح تهاجر اروح وياك حاولت اقنعهة تضل ما رضت جابت اوراقهة وية اوراقي من وصلتني انصدمت بكرار وياهة يشهد الله ردت ارجعة هي مارضت تعوفة ماكو دقايق احنة نسولف هو يلعب يمنة شلون ركض للشارع مادري مالحگت حتى الزمة گلبي انتهى من التفكير بي وندم

حاولت اخلي اسراء تصحى وراه ماكدرت كلشي اريد اصلحة يصير العكس يروح من ايدي 

غنوة: انييي ماجايي الومك حتى لو الغلط منكم ما الومك انتتة بهذا الوضع بسس اريد تصحى على نفسك لاتتورط بعصام والله مايبرد گلبك والله اخذهة حجاية منييي القتل مو حل 

دلهم:شنو الحل اگعد و اسكت 

غنوة:ضل امشي بالقضية خلي يلزمونة و ينسجن حاسبة انتتتة مو قانون حتى تجي تحاسب لناس انتتة بشر مثلهم 

رد يوخر ايدي :سدي السالفة

غنوة:ما أسد السالفة الة تنطيني كلمة 

رد بعصبية:انطييج كلمة عصاام اذا ماطلعت روحة اني مو خوش زلمة 

غنوة: ليش تخليني اضوجك وانتة تعبان هاا نگول لزمت عصام وراهة شيصير تنسجن لو تضل يومية ماخذني لبيت محبوسة كل شوية تختفي مادري ترجع لو لا شجابرني على هيج عيشة انييي 

دلهم: تشوفين احنة بوضع نتناقش بعفتك و عفتني

غنوة:شنوو الوضع الاحنة بي نخطط شلون تكتل عصام ، ليش ما تقتنع كل ما مشيت بهاي السوالف انتتة تخسر ، خسرت اختك و ابنها و اني شفت الويل هسة راجع هم لنفس السالفة

            

              

                    

دلهم:برأيج انييي متونس بالجاي اسوي هم بنفسي اعيش حالي حال هاي الناس بالي مرتاحح 

غنوة: عيش مثلهم شنو المانعك 

دلهم: لجج لازميني منااا خانگيني يفترون وراي لا اني الگاع اطلع روحي منهم لا لماخذ ثار حاتم لا مريح گلبي و مطفي ناري وين اروح لاحگيني هاي المحافظات كلهة مار عليهة اني ماخليت شي ما سويتة سنين يفترون ورااي لا دراسة لا عيشة بيهة خير تعببت منهمم زهگت گلت ما دام يردون موتي خل اموتهم وياي هي موتة وحدة جبت حياتي كلهة گاع ملغومة وين ما اسحگ تنفجر علية 

غنوة:اشتكي گلهم يهددوني 

دلهم: يابة انتي شتحجين يا نعل يا شكوة همة واحد ثنين تعال جيب دليل تعال اخذ فلان جررجرة ليوم القيامة ماتخلص 

غنوة: من تكتلهم تخلص

دلهم:هي تخلص لو بموتي لو بموتهم 

تنهدت اباوعلة بضوجة :اكو مليون حل بس انتة ما تريدة 

دلهم:اطخ راسي لولد عمي الي بيدهم سلمو حاتم لنعمان ضحكو عليه على ابو الفات مات و الثار راح وية الموتة راح لبيتهم ضحك و سوالف من طلع منهم بعد ما رجع أيام ادور عليه همة وياااي يدوروون على اخووي وياي همة بيدهم نطوه لكتالة

لحد ما ناس خيرة لاگينة مشمور بالشارع ناقلينة للمستشفى لگيتة بثلاجة الموتة لجج حاتم عمرة ما رضى بالصار بيهم شيسون يگول حگهم نطردنة من العشيرة عفنة بيوتنة كلشي عدنة نگول حگهم لا ردنة ثار لا حرب وياهم ابوي كتل عمي و ولدة اخذو ثارهم منة هاي نسددت كل ابالي نسدت السالفة همة لرجعو شايلين سلاحهم علينة 

سكتت من شفت حسة راح من الصياح و حرگة الدم

رگبتة صارت حمرة و شرايين يم عينة نطن من العصبية استغفرت بضوجة گام للحمام غسل رحت 

وراه مرتكية على الباب ، فتح الماي دنك راسة جواه

غنوة:اسفة اذا ضغطت عليك انتة تعبان بس والله خايفة 

حجة هو مدنك جوة الماي :منين خايفة 

غنوة:من كلشي افكر ماكدر انام 

سد الماي رفع راسة رجع شعرة ليورة تشيرتة نترس

ماي طلع حضن جتفي جوة ايدة رجع لمكانة تمدد

دلهم:تعاي نامي ماكو شي تخافين منة تعودي غناوي

غنوة:ماريد اتعود 

دلهم:راح اتعبج وياي 

غنوة: هسة ماريد اناقشك اقدر الوضع الانتة بي فكرت ادخل هدنة صلح واوگف وياك واحترم لصار 

عدل گعدتة تمددت مخلية راسي على رجلة ايدة بشعري يدك براسي غمضت عيوني بگلبي ادعي الله يريح بالة و يصبرة على الصار شنو ما جانت مشاكلي 

وياه ماريد افتحهة هسة كلشي يصير بدون طعم من تشوف بشر يموت كدامك تنتهي قصص وروايات عراقية كرار صلاح حياتة بلحظات ما متوقعهة بيوم لا على البال ولا على الخاطر 

مرت اربع ايام على جيتنة لهذة المشتمل عرفتة مأجرة الناس الي بالطابق الجوة همة اخوال صفوان

لان مرتين اجة هنا يصيح بعلو صوتة من جوة عليه

            

              

                    

دلهم مايطلع على كد المحل يروح يشتري لنحتاجة ويرجع يتصفن بالحياطين شكلة هادئ بس ادري عقلة يشتغل خايفة منة كل ما اسمع صفوان يجي اگول اجت المشاكل اخلي ايدي على گلبي

واكفة بالحمام اغسل بالهدوم ليبللهة كل مايضوج يروح يغرگ راسة بالماي يضل يخر على الهدوم تصير رطبة تطلع ريحة مو طيبة منهة مال عفونية

ندك الباب رحت مستغربة حجيت بهمس :دلهم مو هنا 

كل ابالي صفوان بس خاب ضني من ردت علية بنية حجت بصوت مسموع: حبيبتي اني جاية عليج بيتنة جوة بيتكم امي دزتلكم عشة 

فتحت الباب ابتسمت بوجهة بأحراج شايلة طبلة راكيتهة على خصرها دخلتهة جوة اخذتهة من ايدهة

خليتهة بالگاع 

حجت تلزم الباب : ولو متأخرين بس ماجنة بالبيت امس يالله رجعنة ماما تعبانة اليوم ذكرناكم كل الهلة بيكم هم ترحيبنة متأخر

رديت متوترة: لا عادي معذورين مشكورة تعبانكم

:ولو ماسوينة شي من رخصتج هسة امي منتظرتني

غنوة: اخذي راحتج 

ابتسمت طلعت رافعة فستانهة الوردي حجل برجلهة مبين وصوت واضح شعرها طويل ضافرتة ليورة لا إراديا تلمست شعري ضليت صافنة عليهة

انتبهت لروحي شجاني استغفرالله حتى ما حجيت وياهة عدل ضليت امتمت شكد عيب سديت الباب 

شلت الصينية اخذتهة خليتهة بالمطبخ 

البيت صاير هول جبير و حمام و غرفة و المطبخ مفتوح على الهول بينهم حايط ناصي سيراميك بلون سراميك الگاع هو حلو بس خنگة كلش 

همزين الشبابيك افتحهن مال الغرف و الهول يضل الهوة يداور بالبيت مامتعودة اعيش بهيج مكان اذا مو حوش وحديقة ما ارتاح اضل متقيدة

وخرت الغطة عن الصينية مخلين تمن احمر فوگاه لحم و زلاطة و طرشي ،ماعون كباب بصفهن فواكه 

وخضرة ،همزين اجة بوكتة جوعانة كلش 

خابرت دلهم حتى مايشتري عشة لو يجيب شي وياه اطبخ تعودت يجيب على كد يوم واحد لان ماكو ثلاجة مايريد يشتري الة يبيع ذاك البيت ويستقر يالله مالهة تالي وية رجلي يومية بيت و منطقة شكل

فزيت على صوتة الموبايل على أذني حجيت منتبهة :اگلك اخوال صفوان ودولنة عشة لاتشتري حتى خبز بس ماي مخلص جيب وياك 

دلهم:خوش غيرة محتاجة شي

غنوة:لا بس لاتتأخر تعال 

دلهم:راح اوصل

غنوة: وين رحت 

دلهم: صايرة هواي تلحين بسألتج وين رحت شسويت يمتة تجي

غنوة: والله من تطلع اخلي ايدي على گلبي 

حجة ينهي الاتصال: ماكو شي لاتخافين هاي رجعت

سديتة احجي عليه بگلبي ،رحت كملت شغلي على ما اجة كعدنة نتعشة ثنينة ساكتين بس نحجي تصير عركة لا هو يقتنع بالاگولة ولا اني راضية عن سوالفة

            

              

                    

ثاني يوم خابرتني وتين حتى اجي لسبعة اسراء گتلة ما رضى اروح استغربت منة ما لحيت اني هم ماكدر

راسي يوجعني من الهوسة لهناك صوت اللطم

و الصريخ يدوي بالراس من جهة اتنرفز من النسوان ليحجن بدون مايعرفن شنو السالفة بس المهم غيبة

هنة تلث أيام الفاتحة سمعت بيهن سوالف تصفن 

العصر كلش هم ندك الباب سمعت صوتهة نفسها بنت خال صفوان طلعت صارت بوجهي مبتسمة 

مدت ايدهة شايلة ماعون بي كيكة رفعت بطل العصير گبالي 

حجت خدودهة حمر :سويتهن وتذكرتج هسة تگولين شعدهة كل شوية جايبة ماعون 

غنوة: لا ما اگول هيج شكرا ، تفضلي اذا تردين

حجت تأشر:خاف هذة الولد هنا

غنوة:لا طالع تعاي 

دخلت مخلية اديهة ورة ظهرة تتلفت بالبيت حجت :ماعرفتج اسمي رفا 

خليت الماعون على جهة التفت الهة : عاشت الاسامي اني غنوة

رفا:غنوة شكد حلو كيوت مثلج ، خل اگعد هنا رجلية طاحن من الدرج 

اباوعلهة متوترة هي هم متوترة صارت عيني بعينهة حجت بأرتباك:راح اروح 

غنوة:ليش ضلي اني لوحدي خل اصبلج عصير اوكفي

رفا:لعد شلون هم جبتة الكم هم راح اشربة

غنوة: ميخالف غير صار ببيتنة 

رفا: ايي هم صدك صار عصيركم 

التفت عاضة شفتي اخذت كوبين بس نصب بيهن جاي صغار خليت بيهن شكد فشلة شلتهن وية الكيك ، نزلت هي بالگاع كعدت مرتكية على ايدهة

غنوة: تفضلي اسفة بعدنة مامشترين شي للمطبخ

رفا:ميخالف يمعودة 

كعدنة شوية هي بس تسأل تسولف هواي من حجيت اجاوبهة بعد ما سكتت ماحسيت بالوقت لحد ما أذن سمعنة صوت من جوة واحد يصيح بأسمهة فزت گايمة 

صحت وراهة گبل لاتطلع :هاي مواعينكم غسلتهن ما كدرت اجيبهن

رفا:اي عفية امي ماتفارك ماتفارگ الماعون البي نقشة زرگة تحبة اكثر من جهالهة

اخذتهن فتحتلهة الباب صار بوجهة دلهم وخر عنهة

نزلت بسرعة اسمع صوت صفوان صوتة عالي و خشن حافضتة يصيح على دلهم مبين منتظرة 

حجت هي بهمس سمعناهة كلنة :فزز المنطقة بصوتة ياريت حلو جنة تريوعة

عضيت شفتي دلهم هز ايدة دخل سمعت صفوان حجة بصوت عالي: بت النداف اجي اندف گلبج هسة

رفا:ابووك النداف بابا تاج راسك وراس اهلك

دلهم:سدي الباب المن واكفة

اشرتلة يوگف مديت راسي اريد اسمعهن جراني ما راضي راح فتح الجنطة يطلع ملابس يبدل بسرعة

غنوة:وين رايح

تأفف حجة بضوجة:للمركز نشوف تاليهة وياهم و اكو واحد يريد البيت هم امر اشوفة

غنوة:راح يشتري و غراضنة لهناك

دلهم:اطلعهن جا يضلن 

حجيت مختنگة:شلون يعيش بي 

صفن شوية رجع يمشط شعرة : راح يفلشة يسوي محلات 

غنوة:ها خوش الله يسهل 

رجعت يمة بيدي شوية من الكيك الي جابتة رفعت قطعة الة :تاكل انتة بالغدة نمت ما تغديت

دلهم:ما اشتهي 

غنوة: صار مدة گوة تاكل انتة عدك كومة اشغال تكملهن غير تسند روحك شوية 

دلهم: لايضل بالج من اجوع اكل 

خليت الماعون فوك الحاجز لبين المطبخ و الهول 

لبس حذاءة يم الباب رحت اسدة وراه المفتاح عندي وگف گبالي رفع ايدة لخدي مسح عليه بوسني براسي و طلع قفلت الباب وراه رجعت كاعدة

راسلت وتين من امس وصيتهة تشتريلي هدوم سود

اليوم راحت للسوك گتلهة دلهم راح يروح لذاك البيت شوفي حتى تودينهن وياه ، ضلينة نسولف فترة تذكرت اني ما مصلية گمت توضيت صليت

فرشت بيدي موبايلي اسمع قصايد عيني 

على السگف مطفية كل الگلوبات بس ضوة يجي من الشارع لو من السيارات لتمر يضوي الحياطين 

رفعت راسي على صوت الموبايل يدك جانت وتين رديت عليهة حجت تتأفف:اكلج وينة هذة دلهم من خابرتيني لهسة منتظرتة كل شوية اباوع للشارع

فزيت رديت مستغربة:گال يروح للمركز بعدين للبيت 

وتين:ولج راح تدك الوحدة هو ماكو راح انام كل شوية مادة راسي 

غنوة:خاف اجة ما تدرين بي 

وتين: لا والله ماكو حتى لو يجي جان مر علينة

سديتة منهة ضليت احوس من القلق اتصل عليه مايرد شمرت الموبايل متنرفزة شنو ماعرفة يختفي

خليت راسي بين ادية مقهورة من تصرفاتة

ما نمت لحد الفجر مدري شلون غفيت فزيت على صوت الباب گمت فتحتة اباوعلة بضوجة دخل 

حجة بأستغراب: شبيج 

غنوة:شبية الساعة بيش هسة

فتح موبايلة حجة :بالاربعة

غنوة:بعت البيت

دلهم:لا مارحت الولد اعتذر ماگدر يجي

غنوة: لصار بعصام رحت للمركز

كعد مرجع راسة على ظهر القنفة: هو رحت اشوفة من العصر لزموه واحد خبر عنة

غنوة: ايي شسويت

دلهم: رحتلة ماخلوني اشوفة عدهم سوالف مدري اجراءات 

تقربت احجي خايفة :ايي يعني

خلة عينة بعيني حجة: دورت محامي زين خليتة يستلم القضية 

زفرت انفاسي براحة تقربت خليت ايدي على جتفة :اعرف محترگ دمك من ورا السواه بس صدك هيج احسن و انظف ليش توصخ روحك بدمة

هز راسة هسة لو شيصير مايقتنع بس ما دام سوة هيج سمع مني حسيت اكو أمل بي شوية و يهتم 

گعدت بصفة مدد رجليه خلة راسة على رجلي مسحت على شعرة مرت فترة ساكت ماحجة تشنجت متوترة خاف بعدين يلومني لان سوة هيج

جنت مأيسة يقتنع بلكي مايغير راية يسويلة سالفة

حجة بهمس : الگ***" خاينهة

عگدت حواجبي نزلت راسي الة : شنو 

دلهم:خاينهة و رادت تروح وتاخذ ابنهة حتى تحرك گلبة مثل ماحرگ گلبهة 

درت وجهة علية مصدومة اباوعلة مامصدگة اسراء متعلقة بعصام وتحبة من گالي ردنة نهاجر استغربت منهة شلون تعوفة و تروح خليت ايدي على حلگي گلبي نعصر بوجع من السمعتة 

شكرا لزيارتكم عالم روايات سكيرهوم