رواية جذبني فمك البني الفصل الخامس عشر 15 بقلم عبير إدريس

كملنه كلام وكمت ردت افوت تذكرت ردت احجي ويه ايمن قبل ليشوف الفلوس ، دخلت جوه اتصلت عليه خجلت اصعد فوك جاوبني...

ايمن : ها ناسيه شي بالسيارة..

سيلين : لا

ايمن : ماروح اجيب اي شي خاف عبالج اطلع تره ميت تعب..

سيلين : هم لا..

ايمن : اذا ادهم يريدني كليله مات نام اي شي المهم ما اجي.

سيلين : ههههههه شبيك انت منين تطفى انطيني صبر احجي..

ايمن : مو شيطلع منج غير الصخر وروح وتعال انتي وعمج هريتوني هري...

سيلين : تعال انزل متريد عشا.

ايمن : هو شنو ماريد غير ميت جوع تره اني مماكل شي مماكل..

سيلين : ههههه ادري والمفروض تعشينه برة بس انت غلست..

ايمن : وين اعشيج وكومه شايل غراض ..

سيلين : هسه راح اسوي شبيك اخذتني حاصل فاصل ..

ايمن : اذا كبه انزل اذا بتيته ما اجي.

سيلين : شوف شوف يايوم معشيتكم بتيته هو هذا هم حضي.

ايمن : من الاخير عشا دسم يسوه اعوف فراشي وانزل..

سيلين : اي واكو شغله اريد اكلك عليها مو مال تليفون..

ايمن : اذا هيج نازل ..

سيلين : ههههه ديلا تعال بس باوع عمو ادهم كاعد بالحديقة مو تسد الباب عليه...

ايمن : شعجب بعده منايم اول تالي يسهر الدكتور..

سيلين : هسه شمدريني تعال يلا..

ايمن : جيت ايفين شكالت على الموبايل..

سيلين : مشفتها بعد طبت بغرفتها تحتفل اليوم شينيمها..

ايمن : وانتي ؟

سيلين : شبيه؟

ايمن : مفرحانه..

سيلين : كبرنه على هيج سوالف ماعاد شي يفرح الهموم كبرت ويانه وصارت ثكيله..

ايمن : بعدج شابه يمعوده كولي ياالله..

سيلين : دتعال انزل رصيدي خلص..

ايمن: اليوم انزلج برامج واتصلي ع النت عليمن تخسرين رصيد..

سيلين : عندي بس اضوج اتصل منهن كلشي ما افهم يلا تعال عاد..

ايمن : يلا جيت..

سديته وبلشت بالعشا اكلي..اجه فات جر الكرسي وكعد..

ايمن : يلا سولفي شكو...

التفتت عليه وضحكت..

سيلين : هسه اسولفلك بس انصي النار انتظر..

نصيت الطباخ ورحت كعدت كباله ..

سيلين : شفت فلوسك بالمجر؟

عقج حاجبه مستغرب ..

ايمن : يافلوس ؟

سيلين : احنه مو ضلينه كم يوم بيتك..

ايمن : اي .

سيلين : ايفين استعملت كنتورك سفطت ملابسها بيه..

ايمن: زين

سيلين : ومن جمعتهن ورجعنه لغرفتنه خلتهن كبل بالكنتور وره كم يوم جيت اسفط الملابس ولكيت بيهن فلوس سألت ايفين كالت خاف مال ايمن ورجعناهن ..

ضحك ودنك راسه..

سيلين : شبيك تضحك..

ايمن : منيلج الفلم الهندي هذا..

سيلين : يااا هاي شبيك.

ايمن : اي والله احجيلج شغله واحد يقتنع بيها تره مو طفل كدامج..

صعدت الحماوة براسي وجهي صار احمر دم..

ايمن : انه مو قصدي اخجلج او احرجج انه عرفت السالفه كلها وغلست عليها على شنو اجيتي فتحتي الموضوع ويايه ..

ضليت ساكته شحجي بعدين سألته..

سيلين : منو كلك.

ايمن : شفتها..

سيلين : المن شفت..

ايمن : ايفين من صعدت لبيتي وطلعت بحجه اشتري لبن ، من رجعت شفتج تصعدين وراها والارتباك على وجهج يقره الف ، بعدها صعدت لكيت فلوس بالمجر ..

سيلين : اي كتلك لكيناها بالملابس..

خله ايده على الميز وقرب وجها عليه ..

ايمن : تره ضامهن ضمه الجني الازرك ميلكاهن كولي لعمج ينطيكم عذر اذكى من هيج لان مو كلشي يعبر على ايمن..

سكتت بعد ماعرف شحجي ولا اعرف شنو اكول شنو انتو منين مخلوقين راح يخبلوني هو حس بيه ضجت غير موضوع..

ايمن : باجر من الصبح ارجع لبيتنه علمود اكمل سالفه النقل..

كمت رجعت للطباخ اكلي والدمعه بعيني.

ايمن : بلكت احصل نقل ولو سمعت يراد هواي فلوس خوش راح انقط قطه..

سيلين : مممم.

ايمن : شكد بعد ويخلص العشا تره نعسان..

سيلين : راح يخلص كملت..

خليت المواعين على الميز وحميت الصمون ردت اطلع من المطبخ صاح..

ايمن : وين ؟

سيلين : انام نعست.

ايمن : زعلتي؟

سيلين : لا

ايمن : بس ممجبورة تكذبين وتغطيلها والشي الثاني انه ماضايج منج ولا ردت اغثج بس الجذبه استفزتني لهذا حجيت..

سيلين : حقك..

درت وجهي ردت اروح كال..

ايمن : لتكليلها انه عرفت امانه..

هزيت راسي بدون ما التفت ورحت للغرفه لكيتها متمدده وتكلب بالموبايل شافتني ضحكت..

ايفين : اكلج هذا يريد ايميل مدري شنو شو ميفتح..

سيلين : لازم حساب عوفيه باجر انطيه للولد يسووه

ايفين : شيصبرني لباجر..

سيلين : تلحكين تملين منه كومي طفي الضوه دانام.

كامت كعدت عدل جرت ردنها وغطت كف ايدها بيه وكالت..

ايفين : اريد انزل فيس..

سيلين : ممنوع

ايفين : هو شنو ممنوع معليه اريد فيس لعد شنزل..

سيلين: تكتفين باليوتيوب لو ينسحب منج وتعرفين بيه اسويها..

ايفين : هففففففف..

سيلين : كومي طفي الضوه كتلج مو بزعت..

حجيتها وبجيت هيه تخبلت اجتي كعدت يمي وفاتحه كل عينها..

ايفين : شبيج ليش تبجين اذا على الفيس ماريده ملازم ..

سيلين : كومي اريد انام راسي راح ينفجر مابيه حيل احجي ولا الي خلك.

ايفين : براحتح بس لتصيحين..

كامت طفت الضوه واني للصبح ابجي حسيت بلاعيمي طبكت مكدرت اغفى لحظه وحده شسويلها كلب

ي يفور عليها اضربها خاف تتخربط بيدي مابيها كفخه اشد عليها بالشغل توكع عليه مثل ما مرت عمي جبرتها تشتغل وتالي وكعت اسبوع بالفراش وحرت بيها صحتها على كدها شسوي مادري ...

صار الصبح واني منايمه كعدت باوعت للساعه سته ونص كمت طلعت على كيفي وسديت الباب علمود ايفين متحس ..

رحت للحمام غسلت وجهي وفرشت اسناني ورحت للمطبخ..

هاي شنو منو كاعد مسوي جاي ومحضر ريوك بيض مكلين واجبان ..

صارت فرحه بكلبي تخيلت عمه ياسه صارت زينه وكامت هيه سوتلنه ريوك ، بسرعه طفت ابتسامتي من شفت عمو ادهم دخل وبيده علاكه صمون فات للمطبخ باوعلي وخله الصمون على الميز..

ادهم : صباح الخير اليوم كاعده من وكت؟

سيلين : منمت اصلا..

ادهم : مممم انغثيتي من ايمن؟

رفعت عيني باوعتله ..

سيلين : شمدريك..

ادهم : هو حجالي متندم.

سيلين : فاجئني..

ادهم : علمود تبطلين تخلقين اعذار للشخص اليخطأ وخليه هو يتحمل خطئة ليش تشيلين ذنب سرقه تره مو شي هين ولا حلوة بحقج لو انه مصدك..

راح للثلاجه طلع حليب وطلع دله مال كهوه دار بيها حليب وخلاها على النار يحميه ..اني صافنه على حركاته الرزنه من يشتغل حتى صوت ميطلع..

ادهم : تتريكين ويانه.

سيلين : عمه كاعده..

ادهم : لا قبل ساعه نامت..

جر نفس قوي وزفره

سيلين : ليش مكاعد تكدر تنام..

ادهم : تتألم

سيلين : اذا تتعب من السهر انت نام واني اسهر وياها نتناوب عليها..

ادهم : لا كافي عليج بالنهار..

سيلين : عمو شكو بيها تره ما اتعب مو جنت قبل كله وحدي..

ادهم : اي وهذا الموتني قهر ومجاي اكدر انام بسببه لان تركتها وحدها تعاني وحدها تصارع مرضها وحدها تتألم وتنام ودمعتها على خدها لو من تروح للمستشفى عينها تستدير عسى ولعل تلكاني بوجه من الوجوه التشوفها ..

سيلين : ليش تحمل نفسك ذنب انت لو جنت تدري اكيد راح ترجع..

ادهم : جنت حاس بيها شي وانانيه مني مرجعت ..

سيلين : ليش هيج تكول قابل رايح تتونس غير دراسه..

ادهم : مو بس دراسه ردت اخذ الجنسيه واسحبهم هناك عبالي اريحهم تالي القدر غلبني جان اقوه مني ومن مخططاتي اخذت الجنسيه وماكدر اخذهم بعد..

سكتت ماعرف شحجي هو يحجي بحركه واحسه يريد ينفجر ..

سيلين : اصب الجاي..

ادهم: صبي على ما اكعدها ..

سيلين : ماشي..

راح يمشي بخطوات ثكيله احسه كبر عشر سنوات فوك عمره من اجه لحد الان شكد تعب جوة عيونه صاير حفره من السهر ولباب الشارع مطلع و عافها بس اذا نحتاج شي ضروري وايمن مموجود يروح يجيب ويجي..

بصفنتي واصب بالجاي فات ايمن يمشي سريع.

ايمن : صباح الخير ..

سيلين : صباح النور..

اخذ زيتونه من الماعون ..

ايمن : جاي وياج فدوة اريد اروح مستعجل..

سيلين : اكعد واصبلك..

ايمن : مو مال كعده اريد اروح تأخرت ورايه طريق..

سيلين : تلحك عاد تكمل شغلاتك اليوم.

ايمن : لا شلحك اليوم يطير بالطريق باجر من الصبح اركض بيها ادعيلي سيلي ولو انتي وين لاصلاه ولا عباده هههه..

سيلين : اي صدك يلا اليوم احاول اصلي بلكت ..

بحجايتي هاي فات ادهم باوعلي والتفت على ايمن...

ادهم : وين رايح ؟

حجاها مضيق عينه.

ايمن : مو كتلك البارحه شنو نسيت.

ادهم : اي صح الله يسهل من توصل خابرني.

ايمن : تمام ..

ادهم : سيلين طلعي ريوك ايمن علمود ناخذ الباقي يم عمتج كعدت..

ايمن : ماريد شبعت تعاي شيليه..

اللكمه بحلكه ويحجي شال الاستكان ومشى.

سيلين : شكلت تعال كمل..

ايمن : ما اشتهي من الصبح هاي علمود الجاي خاف راسي يوجعني..

ردت احجي ادهم كال..

ادهم : عوفيه تره مو صغير هو ويلا امشي اتريكي ويانه ..

حجاها ومشي كدامي ..

اخذت الصينيه ورحت وراه خليتها على الطبله وعمه كوه كاعده ..

سيلين : صباح الخير حبيبتي..

ياسة: صباح النور البارحه تونستو..

سيلين : اي الحمدلله..

كعدنه ناكل هو يسويلها لكم صغار وهيه تاكل وشايل كلاص الحليب بيده منتضرها تكمل علمود يشربها..

حجت بتعب..

ياسة : اكل انت تره ما اكل.

غمض عينه وتنفس.

ادهم : كل يوم نفس الكلام نعيده اكلي وانه بعدين..

سكتت مناقشته كملنه ريوك انتبهت عليه شرب بس جاي وكام راح غسل ايده ورجع جاب الكرسي المتحرك شالهه وخلاها عليه واخذهة للحمام غسللها ورجعها للغرفه جنت قبل اني اسبحهة واغسل الها وكلشي اسوي هسه هو ميخليني كله هو يداريها حتى العلاج بيده ينطياها هيج حنيه مشايفه بحياتي كلها خصص وقته كله الها ويتمنى تطلب منه شي يروح ركض يسويه بدون تذمر ولا ملل..

اخذت الصينيه ورحت للمطبخ غسلت المواعين وطلعت اللحم خليته بالمي علمود يموع واشوف شنو اطبخ طلعت للطرمه غسلتها ونشفتها لفيت الصونده خليتها بالبوري انضرب اصبع ايدي طلع دم ، غسلته بالمغسله بس اوخره من المي ينزل بعد ، سديته بصبعي ورحت للمطبخ اخذت معقم عقمته ولفيته بالبلاستر ورجعت اشتغل نظفت الهول ورحت لغرفه مريم كعدتها غسلت الها ورحت لغرفتنه كعدت ايفين .

سيلين : يلا كومي تريكي ويه مريم وكليها وياج ..

ايفين : صباح الخير.

سيلين : صباح النور..

حجيتها وفتحت

البرده مال غرفتنه.

سيلين : باجر اشيل الزوالي صارت حاره.

ايفين : اساعدج..

سيلين : شتساعديني حبيبتي كعدي وستري عليه

ايفين : الى متى اضل ماسوي شي تره مليت .

سيلين : خليني اني اشتغل واتعب ولا تتخربطين عليه..

ايفين : فرضي تزوجت هم تجين تشتغلين بدالي.

سيلين : عود ذاك الوكت يحلها الف حلال مادام هسه انتي يمي ما اتعبج..

ايفين : سلوله .

سيلين : همم

ايفين : احبج بس نزليلي فيس..

سيلين : انتي ليش تستغلين المواقف كتلج لا يعني لا..

ايفين : حبابه والله ماسوي شي والله..

سيلين : لتحلفين الف مره كايلتلج الحلف صدك كذب ماحبه.

ايفين : نزلي الفيس وما احلف بعد..

سيلين : الله كريم عود بعدين كومي تريكي وريكي البنيه ماتت جوع ساعه ١١ ونص.

ايفين : وينها مريم.

سيلين : راحت يم عمه

ايفين : اسوي ريوك لو اكو..

سيلين : حمي الجاي واكو اجبان انتو تحبوها.

ايفين : ماشي.

راحت واني كملت ترتيب الغرفه ضلت بس غرفه عمه وغرفه المكتب ، غرفه عمه ماكدر انضفها تختنك لازم نطلعها منها لهذا رحت لغرفه المكتب دكيت الباب ماكو احد فتت وبيدي الوصله وادوات التنظيف خليتهن بالكاع ورحت فتحت البردات اجاني صوته.

ادهم : راح تنظفين..

نزلت ايدي من البرده والتفتت عليه.

سيلين : اي ليش عندك شغل اطلع..

ادهم : لا ماعندي بس اريد اصلي..

سيلين : ماشي من تكمل صيحني اجي انظف..

وصلت للباب كال.

ادهم : وانتي شوكت تبدين تصلين..

التفتت ودنكت راسي..

سيلين : ماعرف بعدني ..

ادهم : طلعي بموبايلج وتعلمي.

سيلين : ماشي.

ادهم : واي شي يستوقفج تعاي سأليني.

سيلين : تمام..

فرش السجاده وكبر اني سدت الباب وطلعت رحت كعدت بالهول انتظره يكمل ، مددت كلت اريح ضهري على ما يصيحني توني اريد اغفه هاي النومه الحلوة التجي غفل ، سمعته يصيح سيلين ..كمت ورجلي رخت بعد مابيه اكوم وامشي تمنيت ماعندي شي واحضن مخدتي وانام ، رحت للغرفه لكيته كاعد وره المكتب على الحاسبه..

فتت رفع عينه ورجع دنك يشتغل.

ادهم : باجر عندج شي؟

سيلين : الصبح.

ادهم : اي

سيلين : هههه حديقه ماكو افرغ مني.

ابتسم بس ضمها..

ادهم : بيج حيل تجين ويايه ناخذ ياسه للمستشفى علمود اخليج يمها وانه اكمل باقي الشغلات..

سيلين : اجي ماعندي شي..

ادهم : موبايلج حلو عجبج.

سيلين : تصدك بعده بكارتونته..

عكد حاجبه وعينه بالحاسبه ..

ادهم : ليش.

يحجي واصابعه تلعب برهاوه على دكم الكيبورد احجي وعيني على اصابعه.

سيلين : ماعندي واهس بيه تلفوني القديم شامرته.

ادهم : تره يرادله حساب يلا يفتح..

سيلين : اي كالت ايفين ومعرفنه نسويه ..

ادهم : جيبيهن اسويهن الكم..

سيلين : خاف نتعبك ..

ادهم : ماكو تعب سيلين عوفي الرسميات ماحبها..

سيلين : تمام ..

طلعت من الغرفه وافكر مرات احسه قريب مني حيل وما اخجل من احجي وياه وماخذه راحتي ومرات احسه بعيد ابعد من النجوم عن الارض واخجل واطب بنص هدومي من نضره وحده منه ، شنو هالتناقض بالاحاسيس عجيب ، رحت جبتهن ورجعت خليتهن على الميز كدامه ، ..

ادهم : كعدي فتحي واحد واحد وخليه على الميز.

عينه بالحاسبه ويحجي ..

سيلين : تمام ..

فتحتهن وخليتهن كدامه.

ادهم : سويت حساب جديد وراح اخليه الكم ثنينكم ..

سيلين : يصير..

ادهم : وليش ميصير.

سيلين : ماعرف فكرت ميصير.

ادهم : لا عادي..

سيلين : زين ليش مسويت لكل وحده حساب مو احسن.

شال اللزكه عن الشاشه وكال.

ادهم : اكيد احسن بس الي غايه بيها من هيج سويت.

سيلين : شنيه

ادهم : اختج شنو تبحث باليوتيوب راح يطلع عندج واي برناج تنزله ينزل يمج ..

سيلين : هاي شلون ؟

ادهم : عوفج من الشلون مابيه اشرح بس المهم تعرفين شنو تريد تسوي.

سيلين : عمو تريد تنزل فيس واني متأكده اذا منعتها راح تنزل بدون ماعرف ..

ادهم : خل تنزل قابل طفله هيه..

سيلين : شنو نسيت شصار ذاك اليوم وخلتني اسحب الموبايل منها..

ادهم : وشنو جانت رده فعلها من سحبتي الموبايل منها؟

حجاها ورفع تك حاجب ..

سيلين : صح من ورايه مدت ايدها..

ادهم : لهذا خليها تسوي الشي كدام عينج افضل من ما تسويه بدون علمج ، هاج هاي ورقه وقلم كتبي الحساب وضميه يمج..

اخذت الورقه والقلم وكعدت اكتب الحساب الكتبه بالموبايل..

ادهم : انه هم مثلج اعسر..

رفعت راسي وهمست..

سيلين : نعم .

اشر براسه وعينه على ايدي..

ادهم : تكتبين بيدج اليسرى..

ابتسمت ..

سيلين : اي متعوده شكد بابا راد يعلمني اكتب باليمنى مكدرت..

ادهم : هذا الغلط الاهالي يعتبروه فدشي غير محبب ويجبرون الطفل يكتب باليمنى همه ميدرون الدماغ هو المسؤول عن الحركه مو بيده الطفل يعني من يكتب باليسرى هذا دماغه الايمن هو مسؤول عن قدرته الكتابيه اهله شيسوون ينهروه ومرات يضربوه وحتى الطفل يتعقد لهذا اغلب الاطفال بسبب الخوف يكونون اكثر عرضه للحالات النفسيه.

سيلين : شلون يعني ؟

ادهم : كثر الضرب والتوبيخ يخليه يتعرض للاضطرابات الكلاميه يكوم (يتأتأ) بالكلام او يتعرض للتبول اللاار

ادي،او فوبيا الخوف الشديد همه ميعرفون شكد عنده ممزيات هذا الطفل ويكدرون ينموها اله..

سيلين : مثل شنو مميزات ؟

ادهم : يكون حاد الذكاء خجول يميل للهدوء ميحب الصخب والهوسه واحلا شي يفسر الامور العاطفيه باليعجبج ..

سيلين : ههههه لعد اليمناوي مظلوم خطيه..

ادهم : لا بالعكس ، عدهم صفات حلوة كلش ، يكون صاحب تحليل منطقي صاحب ترتيب ومخطط جيد..

سيلين : مممم بس احنه اذكى منهم .

ادهم : صح احنه نفوقهم بالذكاء لهذا اغلب العلماء همه من مستخدمي اليد اليسرى..

سيلين : منو منهم ؟

ادهم : نيوتن أعظم عالم من علماء القرن الثامن عشر في الرياضيات والفيزياء وانشتاين عالم في الفيزياء النظرية...

عندج مايكل انغلو «شاعر إيطالي ومهندس ورسام ونحات هم يسراوي..

بيل كلينتون الرئيس الأميركي الثاني والأربعون...

سيلين : شكد حلووو حبيت ههههه..

ادهم : انه وانتي نتشارك بهاي الصفه ويه ١٠ بالميه من سكان الكره الارضيه..

سيلين : حلو يعني احنه مميزين.

ادهم : لا موحلو هواي سيئات بيها..

سيلين : شلون ؟

ادهم : كتلج ضغط الاهل وربما بالمدرسه ضغط من المعلمه اله تكتب باليمنى عبالها راح تعلمه لان تجهل هذا العلم ، وغيرها عندج معاناتنه من ندخل جامعه الكراسي اللي نكتب عليها كلها مصمميها لمستخدمين اليد اليمنى عكس بالخارج مخصصين النه مقاعد خاصه وحتى السجين و المكص كلها يمنه شكد دورت ردت ادوات خاصه بينه ملكيت..

سيلين : شكد حلو بره بكلشي يفكرون هسه يصممون حتى الادوات ..

ادهم : مو بس هيج ويحترمون الاعسر عكس هنا التنمر تقريه بعيونهم..

سيلين : شلون يعني؟

ادهم: احجيلج موقف صار ويايه ، مره حجزت غرفه بفندق احتاجيت ادون ملاحظه تخص دراستي خفت انساها ، وكفت اكتب الموظفه انتبهت عليه ابتسمت وخلت ايدها على صدرها وانحنت احترام الي انه هم حنيت راسي من باب الادب يعني ، فسألتها بالانكليزي كتلها ليش هيج انحنيتي كالت عدنه معتقد انو الاعسر ذكي جدا وعنده قدرات خارقه لهذا يحترموه احنه هنا يباوعولنه بنضره احنه ملعونين او اشرار ههههه استغفر الله لو جدي الله يحفظه يكلي ياكل الشيطان وياك من تاكل باليسره..

سيلين : عقليتهم هيج شنسوي ، اكو بعد مساوء لو بس الذكرتها..

ادهم :اكو طبعا واتعسها نكون اكثر عرضه للأصابه بمرض الشقيقة والأرق وعمج ثنينهن حاويهن والله ليشوفج اذا لزمتني متشوفين مرات من تسأليني ماكدر اجاوبج عرفي كاعد امر بنوبه ..

سيلين : الله يساعدك زين ليش ؟

ادهم : لان اكثر شي نستخدم الجانب الايمن من عقلنا والضغط يكون عليه وحتى اسكت احسن...

حجاها وضحك..

سيلين : حتى شنو الله عليك احجي.

ادهم : ضروري تعرفين يعني...

سيلين : لعد غير اعرف حتى اذا واحد يسألني اعرف اجاوب.

ادهم : اذا استخدمنا الجانب الايمن من عقلنا نكون اكثر عرضه للأدمان على الكحول وغيرها بثلاث مرات عن الانسان اللي يستعمل الفص الايسر من العقل ..

سيلين : عمو دوختني شلون يعني عفيه.

ادهم : هذا موضوع بيه شرح هووواي واذا دخلنا بيه منخلص.

سيلين : الله عليك احجيلي شويه لتصير بخيل.

ادهم : انه بخيل ههه.

سيلين : اي والله تحجي الحجايه على النص وتسكت..

ادهم : مو الباقي يضوجج بس اكو كم صفه حلوة

سيلين : نبدي من الحلو .

ادهم : الحلو كلته الج الذكاء وغيرها بس المحلو نعيش بمتوسط عمر اقل ب تسع سنوات من سكان الارض اليستخدمون اليد اليمنى..

سيلين : زين ليش ؟؟؟؟

ادهم : ليش لان ارتباط أوعية دموية متصلة بالقلب واليد اليسرى في الإنسان، وأوضحت الدراسات أن كثرة استخدام اليد اليسرى تقصّر العمر بسبب الأمراض التي يمكن أن تحدث نتيجة لهذا الشي..

سيلين : يلا احسن نموت من وكت..

ادهم : التشائم العندج يقصر العمر..

سيلين : ههههه نرجع لايفين ..

ادهم : شبيها ؟؟؟

سيلين : شلون اعرف اذا دخلت بكروبات لو حجه واحد غريب وياها وقشمرها..

ادهم : احنه راح نسوي الحساب ونزله بموبايلها ونفسه نفتحه بموبايلج وشنو تسوي راح تعرفين.

سيلين : وعليمن هالتعب ما اخليها تسوي وخلص بكيفها قابل اموتها والله..

ذب الموبايل من ايده وباوعلي..

ادهم : هذا العمر مو مال تمنعيها من شي بالقوه لان ما راح تستقبل منج ومو بعيده تعاديج ..

سيلين : لعد شسويلها.

ادهم : صادقيها خليها تفتح كلبها وتحجيلج افضل من ما تسوي شي بالخفاء وبالتالي توكع بمصايب وتوكعج وياها..

سيلين : هسه عرفت ليش اشتريتلها موبايل..

هز راسه بالايجاب..

ادهم : كثر الضغط يولد انفجار وبهذا العمر تنبني بيه الشخصيه اذا شافت انتي عندج موبايل وهيه لا راح تحقد عليج واذا طلعت وشافت البنات البعمرها عدهم وهيه لا تكوم تحقد عليهم وتضعف شخصيتها ، احنه شنسوي نوفر الها هذا الشي مع المراقبه منعوفها ..

سيلين : هم صح والله عمو انت عندك افكار شكد حلوة وهم تريح الواحد..

ابستم ورجع يشتغل ..

ادهم : انه اريد اعيد برمجتها من جديد..

ضحكت وخليت ايدي على حلكي هو هم ضحك..

ادهم : ليش ضحكتي..

سيلين : شلون تعيد برمجتها شنو جهاز هيه.

اد

هم : انه اشوفها جهاز واكدر اغير كل دواخلها افرمتها وارجعها جديده وابرمجها باليعجبني.

سيلين : حتى اني بديت تبرمجني هههه...

رفع عينه باوعلي ونصه.

ادهم : انتي يرادلج اقوي شخصيتج وبس ميحتاج شي ثاني.

جريت حسره وسكتت بعدين سألته.

سيلين : حسب رأييك هيه ليش هيج تتصرف..

ادهم : ماعدها شي تلتهي بيه لا دراسه لا صديقات بيش تلتهي تريد تثبت نفسها بأي طريقه اجه ابن عمج حسسها هيه مرغوبه وتنحب انجرفت وره احاسيسها ..

سيلين : هم صح بس مع هذا ما انطيهة الحق اني مو وياها شو مسويت هيج.

ادهم : الناس مو سواسيه كلمن يتصرف حسب هواه..

سيلين : صح..

ادهم : هاج كملتهن وكليلها نزلتلج فيس وكلشي تمام وانه خفيته الج بجهازج هنا تلكيه.

كمت وكفت يمه دنكت اباوع وياه نزل شعري على شاشه الموبايل هو بحركه سريعه خلاه على الميز وكام وكف حك انفه وكال..

ادهم : راح تكملين لو تنامين ترتاحين.

سيلين : لا اكمل.

ادهم : يلا اخذي راحتج..

طلع يمشى بخطوات رزنه حتى خطواته متناسقه ..

انسان بكلشي مرتب ومنظم ب اوقاته بشغلات بيته ب افكاره بكلشي..

رحت وديتلها الموبايل جانت تبدل بالغرفه.

سيلين : هاج هاي البرامج كلها بيه بس استخدميه صح ولتخونين الثقه ..

ايفين : حتى فيس؟

سيلين: حتى فيس.

ايفين : جذب .

اخذته وتكلب بيه تضحك فرحانه..

ايفين : منو سواه ..

سيلين : عمو ادهم..

ايفين : لو يصير ابوسه والله.

ادهم : اكيد ميصير هههه..

التفتت عليه وهيه رفعت راسها ورجعت ختلت ورايه ، جان واكف بالباب والباب مفتوح ابتسم وطلع كبل..

كفختها على كيفي وضحكت.

سيلين : ههههه ثول .

ايفين : يلا ميخالف راحت ههههه...

ضلت تكلب بيه فرحانه واني رحت سويت غده..

كمل اليوم طبيعي مثل كل يوم ، نمت من وقت لان ثاني يوم نروح للمستشفى ، وقتت الموبايل ساعه اربعه ونص لان كال نطلع بالخمسه ...

دك المنبه كعدت عبالك توني نايمه كمت رحت للحمام سمعت صوت حركه بالغرفه عرفت كاعدين رحت غسلت ورجعت بدلت وكعدت انتظر ، صارت الخمسه دك الباب كمت فتحته.

ادهم : كملتي ؟

سيلين : اي كملت..

وجها تعبان وعاقج حاجبه حتى مابيه حيل يحجي مشى كدامي ويدفع عمه بالكرسي التفتلي..

ادهم : وصيتي ايفين على مريم..

سيلين : لا نسيت.

ادهم : شوصيتج البارحه واكدت عليج مرتين.

سيلين : هسه اكعدها اخليها تنام يمها..

ادهم : يلا وانه منتظرج بره.

سيلين : ماشي..

طبيت كعدتها كوه كعدت اخذت مخدتها والجرجف وراحت يم مريم مدت فراش بالكاع ونامت طفيت الضوه وسديت الباب وطلعت باب الشارع مفتوح وهو واكف ويباوع صفح على الشارع بيده جكاره من الصبح يشرب جكاير ،

لابس بدي نيلي وبنطرون كابوي لونه رصاصي كاحت ، ولفاف صيفي هيج خاله على ركبته شكل، اناقته كلش تعجبني صدك اللبس يترجم الشخصيه..

طلعت سديت الباب انتبه من صفنته على صوت الباب ضيق عينه اخذ نفس اخير من الجكاره شمرها بالكاع وداسها برجله نفخ الدخان ليفوك وصعد ..

اني هم صعدت بالكرسي الوراه لان الكرسي الوره عمه ماكدر اكعد بيه مرجع كرسيها صاير مثل السرير ونايمه متدري بالدنيا شكو ماكو..

وصلنه للمستشفى طبك السياره ونزل الكرسي وداه يم الباب مالتها شالها بيده وخلاها على الكرسي المتحرك وشدها بالحزام كأنما لعابه بيده ، اباوع عيونه حمر دم شفته الجوة ترجف تعب وقهر مشى بيها واني مشيت وراه وكفنه اندار عليه كال.

ادهم : دتشوفين ذاك السره الطويل..

باوعت وين اشرلي..

سيلين : شبيه ؟

ادهم : ذوله عوائلهم كلها مصابه بهذا المرض اللعين واكفين سره علمود يحصلون على العلاج وتدرين اغلب الاحيان اطلع اشتريه من بره لان يخلص..

سيلين : لا اله الا الله ...

جر نفس قوي ودخلنه كعدني بمكان وهو راح حسبتله ساعتين ضبط يلا اجه ..

ادهم : يلا امشي..

مشينه طبينه بغرفه نيموها على السديه واحنه واكفين ، نطوها الجرعه واني ردت اتخبل من صوت الانين اللي اسمعه اباوع اطفال ، نساء وبغرف ثانيه اكو رجال ، هذا المرض ما راحم احد ، سديت اذني ودموعي تجري طلعت اركض وكفت بالممر ماريد اسمع ماريد احس صارت بيه حاله نفسيه ، طلع عمو واجه يمي وكف..

ادهم : بيج شي؟

سيلين : مداتحمل اسمع صوتهم ماكدر الله يساعدهم لعد شكد ديتألمون.

ادهم : متشوفين الدنيا طالعه من عيني اسف جبتج بس مضطر ايمن جان ويايه هو يلزم سره وانه اضل يمها..

سيلين : لا على شنو تتأسف بس اني ممتعوده اشوف هيج شي..

ادهم : من اجي هنا احمدالله على كل نعمه بحياتي واغلب الناس تتبطر تكلج احنه شنو شايفين لو رب العالمين شنو منطينه ، اتمنى يجون بس يشوفون الوضعيه هنا شنو حتى يحمدون الله ويشكروه على النعم اللي همه بيها واولها الصحه..

سيلين : فعلا والله..

جاوبته وامسح بدموعي ، طلع الدكتور اجه يم عمو حجه وياه بالانكليزي بعض المصطلحات وشغلات قليله عربي لهذا مربطت ومعرفت السالفه شنو ، بس عمو وكفه مكدر يوكف بسرعه خله ايده على الحايط وسند نفسه الدكتور يحجي وهو مدنك راسه يهزه متفهم ، اخر شي رفع راسه وصارت عينه بعي

ني باوعلي متوسل يعني شلون بيه شسوي ، اني بس ابجي عرفت الموضوع يخص عمه وخطير ،نزلت دموعه ومسحهن بقوه بكف ايده ومشى فات يمها جر كرسي وكعد تقربت اباوع ..

اخذ ايدها بيده وبعدين خلاها على خده وباس بطن ايدها دنك يمها يهمس يم اذنها متحملت رحت امشي سريع ماعرف وين اروح بس مبتعدت خاف يحتاجني خلص الوقت واني كوه لازمه اعصابي رجعنه و وجوهنا متبشر بخير ابد ...

دخلها للغرفه وصاحني..

ادهم : سيلين ..

سيلين : نعم عمو..

ادهم : توضي وتعاي اقري عليها اللي راح اكوله الج بلكت الله يباوع لحالنه وتصحى..

سيلين : اي هسه اتوضه تعلمت ..

ادهم : عاشت ايدج ..

رحت توضيت واجيت يمه نطاني سبحه مديت ايدي اخذها صفن على ايدي ورفع راسه باوعلي..

سيلين : هاا شنو؟

ادهم : هيج توضيتي؟

سيلين : اي..

ادهم : وضوئج باطل.

سلين : ليش ؟

ادهم : غير تمسحين الصبغ اول..

سيلين : ها عبالي عادي هسه امسحه واجي..

رحت للغرفه مسحته ورجعت توضيت ورحت..

سيلين : هسه شنو شكول..

ادهم : كولي كلمه( البر ) ٦٩٩ مره ..

سيلين : ليش ؟ وشنو معناه..

ادهم : هذا اسم من اسماء الله الحسنى مافديوم طلبت حاجه من ربي وسويت هذا الذكر وما انقضت حاجتي رهيب ..

سيلين : يارب يارب..

ادهم : انتي سويه وانه اسويه تمام..

سيلين : تمام ..

ضلينه نسوي تسبيحات اني وياه ، وعمه تصحى وترجع تنام كامت حتى متعرفنه ولا تحجي بس تباوع مرت الايام وتعبنه كلش هم اني وهم هو ، ايمن تأخرت معاملته طول اسبوعين ضبط وضليت اني اروح للمستشفى وياهم وبيوم جنت نايمه ذبيت روحي من التعب شهيده..

اجاني للغرفه ساعه ٣ الفجر هو بالعاده ابد ميوصل غرفتنه واذا راد شي ولو هو ممسويها ابد بس اذا عمه احتاجتنه يدز مريم علينه ، بهذا اليوم فتح الباب والضوه ودخل..

همس بصوت يرجف..

ادهم : سيلين سيلين كعدي حبابه...

اسمعه بس عبالي كاعد احلم هلكد ما جان يوم متعب وايام اني مساهره ومنايمه زين ذبيت روحي لهذا مد ايده ونغني..

ادهم : كعدي الله يخليج راح اتخبل تعاي شوفي عمتج شبيها ..

من كال هيج فزيت لكيته فوك راسي واكف ومدنك عليه..ودموعه تجري عبالك طفل..

سيلين : شنو شبيهة عمه..

رفع كتفه وايده ليفوك كال.

ادهم : مدري ..

كمت ركضت عليها كلبتها متتحرك شلت ايدها توكع خليت راسي على صدرها ردت اسمع دكات كلبها هدوء كلشي ماكو رفعت عيني عليه لكيته واكف بالباب ويباوعلي وجها احمر دم ودمرات راسه كلها بارزه هو عرفها ماتت بس ميريد يصدك..

سيلين : عمو عمه راحت..

حجيتها وعطتتتت

الفصل السادس عشر من هنا 

شكرا لزيارتكم عالم روايات سكيرهوم