رواية نعم أحببتك الفصل الرابع عشر 14 بقلم انين الليل

على لسان اياد 

ما شوف غيرك اي محب

مجبور بيك وانجبر 

أنت بعيوني ملاك 

أنت مو من البشر

انا محبوبي عشكتك 

وبالعشك كل شي انغفر،،،،،،،أنين الليل،،،،

_______________________________

بثينه 

دخلت للمطبخ بعد ما سلمت على رغد مرت محمد وصرنا نسولف ونضحك واجتي ساهره باوستها ونسفت ارداناتي

 وبديت أغسل المواعين الي بالسنك شويه إجه محمد صاح الرغد شافني سلم علي 

اشلونج بت عمي 

= أهلا محمد شلونك

محمد//الحمد لله رغود كلي للبنات يلبسن حجاباتهن لان اياد تعبان يريد

يروح يرتاح بغرفتج شويه قبل ما تلتم الناس بالعشا

رغد //اي هسه اگللهن 

محمد //اگلج رغد هذا الجيش مال الانثوات المن 

رغد اتخوصرت //شنو انثوات بعدين نتحاسب على كل ذني كوكتيل يعني بنات خوالك على بنات خالاتك على بنات ابن عم 

امك على بنات بنات عم امك 

محمد يضحك //هههههه وليش جايات كلهن 

رغد تباوعلي وتضحك //مو هنه عمتي ام محمد دزت عليهن حتى السلطان سليمان اقصد اياد يختار وحده (ويتزوجها )

گالتها بالفصحى 

محمد //نياله اياد. اشو انا امي ما سوت لي هيج 

رغد اتقربت وبيدها سچينه وتضرب بايدها // احنه بيها هسه روح اختار 

محمد //حبي انا اختار عليج اله ما عندي ذووق 

رغد تخزر //عبالي 

راحت رغد حاجت البنات //عيني ياحلوات البسن حجاباتجن لان اياد يريد يجي يرتاح شويه لان تعبان ما بي يوگف

على حيله 

 رجعت رغد وهي تضحك وتگول //هذني من مل وعقلهن هيج يسوون 

ساهره //اشبيج رغد شمسويات 

رغد //عليج الله ساهره شنو هذا الشي يعني مو حلوه من عمتي تعرض بنات اخوتها واخواتها بربج هسه ذني 

كلهن يردن اياد 

ساهره //وشبي اياد مو بعينج شنو 

رغد //لا بالعكس بس مو هالشكل خصوصا والكل يعرف اياد ما راح يختار ولا وحده 

إجه اياد من باب المطبخ صارت عيني بعينه جان منتجي على محمد ويمشي على كيف والتعب مبين علي انا

 باوعتله جنت خاله خاولي معلك على شعري لان الشال يم امي 

اياد::السلام عليكم 

ردينا /عليكم السلام

انا ابتسمت بوجهه = هلو اياد اشلونك الحمد لله على سلامتك يابطل أجر وعافيه 

اياد :: الله يسلمج بت عمي انتي شلونج 

ساهرة /شبيها بس تسأل عليها 

انا مديت الساني وكتلها = امممممم ليش تغارين لان ما يكلج اشلونج حتى بهاي حاسدتني 

اياد ابتسم ابتسامه باهته اشوف حزن بوجهه وصوته تعبان هوباوعلي

وكلي:: نزلي ارداناتج 

ساهره //اياد فوكها جاي تساعدنا بغسل المواعين 

هو بتعب ::اقصد اخاف أحد من الولد يجي للمطبخ

رغد ضحكت ومحمد غمزلي انا نزلتهن وبقيت صافنه واججي ويه نفسي = هذا شبي

شفته فات ع الصاله سلم واسمع الهلاهل وگفت اباب المطبخ واشوفه سلم على امي الي بوكتها جايبه جكليت طشته 

على رأسه وهلهلت وكلتله 

الحمد لله على سلامتك يمه ايودي ما تشوف شر 

اياد بأس رأس امي ::الله يسلمج ويخليج خاله انتي شلونج 

امي // صدقه العمرك يمه من شفتك سالم روحي ردت الي الله رأف بحال ابوك وأمك 

بعدين اياد سلم على خالاته يعني على كل الموجودات واشوف بنات خاله وبنات خالته بالصاله ويسلمن علي انا رجعت 

للمطبخ وصرت امسح الكاونترات اجه اياد وحجى ويه ساهره 

اياد::اكلج ساهرة انا ما تغديت لان ما أشتهي لحم لو دجاج لعبانه نفسي 

ساهرة /يجوز من البنج مال العمليه تريد اسويلك شي 

اياد::شنو تسويلي 

ساهرة/اكلك ايودي بثينه مسويه قالبين كيك اجيبلك 

هو ما جاوب ساهرة وباوعلي 

اياد::بثينه سويلي كاستر وجيبيلي قطعة كيك 

جاوبته = صار شويه واجيبلك (حجيت ويه نفسي) =اشو هذا يتآمر علي والله يا الله

 كملت الكاستر وصبيته وحطيت قطعتين كيك بماعون وملعقه وشوكه ساهرة راحت ورجعت شلت الصينيه نطيتها 

الها ساهرة كلتلي /: وديهن انتي لابن عمج انا عندي شغل 

جاوبتها =وين اوديهن يمعوده انتي اخذيهن اله 

ساهره //شبيج هو بغرفة محمد ياالله روحي لا يعصب علينه

خليت الصينيه ع الكاونتر ورحت اخذت الشال خليته على شعري ورجعت اخذت الصينيه ورحت الغرفة رغد 

باب الغرفه مسدود نزلت الصينيه دكيت الباب محد جاوبني دكيت مرة ثانيه فتحت الباب وخليته مفتوح ولكيت 

الضوة مسدود فتحته لان كان قريب عه الباب شفت اياد نايم بالگاع على فراش اوجهه للحايط انا كحيت علمود ينتبه

= اح احم اياد اكعد جبتلك الكاستر 

هو دار عليه باوعلي شفت عيونه عبالك كان يبجي راد يكعد ما كدر

خليت الصينيه على ميز ورحت سندته وخليت وراه مخاد بعدين خليت الصينيه كدامه شلت بالشوكه قطعة كيك 

وانطيتها اله اخذها 

وبعدين شلت بالملعقه خليت كاستر وشربته اياد باوعلي حاجاني بتعب ما ادري عتب

اياد ::بثينه سمعت جايين عليج ناس يخطبوج

انا بتردد ومدنكه = اي

اياد::وانتي شنو رايج

= بكيف بابا شنو يكول بكيفه ياالله انت اكل براحتك انا اروح ويه البنات اكمل شغل

طلعت من الغرفه بسرعه علمود بعد ما يسالني

وهو بقى الحد المغرب وبعدين طلع وانوب صبو العشا 

 همه بيت عمي جايبين طباخ ويا يوسف وزين جابو العشا للنسوان انا بقيت بالمطبخ ويه رغد وساهره نسوي جاي 

ونخلي ب الترامز محمد ورياض يجون يأخذون الترامز وهناك يصبون الجاي

ورة العشا بدت الناس تروح انا كفضت المطبخ ويه البنات وتقريبا الكل راح شويه امي دزت علي 

وكالت/: يالله زين دز علينه يكول تحضرن 

ساهره //عمه خلي بثينه تبات يمنا 

رغد //اي عمه فدوه خليها حتى هي ولا اتعشت ولا اكلت اي شي 

امي //بكيفها تريد تبقى خلي تبقى باجر عطله شعدنا 

انا نزيت من مكاني = لا ماما اروح عندي دراسه

بسرعه لبست عباتي وسلمنه وصلت يم عمه كريمه گتلها 

مع السلامه عمه والحمد لله على سلامة اياد 

ساهره //هسه انتي وين رايحه مو باچر عطله ابقي يمنا باتي 

ابتسمت وجاوبتها = لا سهو حبيبتي غير مره اجي وتشبعين مني ياالله مع السلامه 

ساهره //تعبتي اليوم بثينه وحتى ما اتعشيتي 

باوعتلها = ما بيناتنا هذا بيتي 

كريمه //حبوبه تسلمين نتعبلج يوم عرسج 

انا ابتسمت //شكرا عمتو حبيبتي كلج ذووق 

كريمه //ايي سمعنا جايلج خطابه الله يتمملج بخير شدي حيلج واتزوجي 

ما جاوبتها وطلعنه صعد زين وامي وانا وبهاء ومنى صعدنا ورة شفت رياض واياد واكفين اجوي علينه 

رياض //ها عمه رايحين ما بتو

امي //دايم البيت واهله بس تدري عمك ومنى سادس 

رياض هز ايده //هههههي عمتي حطت حجتها منى دكولي ما اكدر افارك الحجي 

امي // هههه والله عليك سوالف ولا تكبر 

اياد تقرب ::ادري عمه البنات يكولن بثينه ما اتعشت اوكف زيوني خلي رياض يجيب عشا البثينه 

انا جاوبت = لا شكرا أساسا بالليل ما احب اكل تمن وهالقضايا 

امي //بعد انت التدري بيها والريجيم الي مسويته 

رياض //اوو لالا عيني امهات الريجيم كله بس على مود تتزوجن 

اياد خزره ::شنو هالحجي ما تكبر انت 

امي بضحك //خلي شتريد منه هي هاي سوالف رياض 

اياد :: شكرا عمه تعبناكم هاي اكثر من عشر تيام وانتم ويانه 

(باوع الزين العابدين )زيوني حبيبي اردها يوم عرسك 

اتقرب وكال ==بثينه شكرا على كل شي 

امي /:شتحجي انت ابنه ما تدري اليوم من شفناك واكف على طولك صار عدنا عيد 

:: تسلمين عمه 

زين سلم عليهم وشغل السياره سالته == بابا ليش ما إجه زيوني

زين //هسه يجي كال يوصله يوسف

وصلنه ونزلنه كلي زين /بثينه سويلي جاي راسي يوجعني

رحت للمطبخ وخدرتله جاي وصبيت وكعدت يم زين وهو يسولف على عزيمة بيت عمي واشكد ناس اجو

واحنه كاعدين اجه ابوي سلم علينه كال

بابا ::زيوني شعجب كاعد مو عوايدك ما رايح ويه اصدقائك

امي /شتريد منه لاحكه على هالطلعه خلي بتونس يلحك على الضيم

بابا /:ياستار وفيقه ياضيم

ماما/اي يلحك على المرة وضيمها جيب هذا أخذني وديني رد هذا ابنك تمرض جهالك يرادلهم ملابس ابوي بالمستشفى 

بابا /ههههه خلي يتزوج وكل هذني مگدور عليهن انا اسويهن اله 

زين //تسلم بابا بس الصدك ما بيه حيل اطلع وهم رايح الوكت 

بابا باوعلي وكأنما اتذكر شي //صدك وفيقه خابري الناس الي اجو على بثينه كليلهم ......

امي /هاحجي خير شكللهم

بابا/دنطيني مجال هاي شبيج مو انتي كل ساع ها حجي شكلت الناس تريد الرد

ماما/اي والله حجي يوميه البنيه تتصل هسه شكللها

بابا /كليلها خلي باجر ان شاء الله الولد يجيني على الساعه بالخمسه العصر وخلي يجيب ويا اثنين من عمامه

ماما/ليش خو ما كو شي

بابا/اريد اشوف الولد وادوزنه واشرط علي كدام عمامه لاتنسي البنيه طالبه وراها مرحلتين ومدل له وانا 

ابن سوك واعرف الزلم اي لازم اكعد واشوف كلامه ويسمعني واسمعه هذا مصير مو لعب

ماما /ونعم الرأي

بابا/بس لا تكلين الاخته ليش اريدهم كليلها يريده الحجي يسولف ويا قبل الكعده مال الخطبه على مود اكو امور

 يتفاهم بيها ويفهمه عليها حتى من يجون يخطبون كل امورنا بالتمام

ماما /تأمر امر حجي هسه اخابرها

راحت ماما تحجي وبابا كلي //حطيلي فواكه وتعاي اكعدي رايدج 

رحت جبت صحن بي فواكه واجيت يم بابا

بابا /بثينه اريد اسمع منج انتي موافقه

انا مدنكه = بكيفك بابا إذا انت موافق انا موافقه

بابا /ماشي يابه الله يقدم البي خير

إجت امي كالت حجيت ويه اخته انا من شفت امي إجت انسحبت الغرفتي رحت كبل عه النقال ما باوعت للاتصالات

 ولا للرسائل كبل اتصلت بسعد لكيته مشغول شويه هو اتصل احس بي فرحان سعد جاوبني 

سعد /وأخيرا ياعمري 

ما جاوبته بس اتنفس قوي 

سعد //اشتعلت عشيرتك سعد راح أبقى كاعد ما أنام إلى أن تصير الساعه بالخمسه العصر 

جاوبته =لا يمعود نام اخاف تجي يم ابويه وهو يحچي وانت غافي ما تدري شنو يگول 

سعد //ههههه صدوك بثينه ما عرفتي عمي ليش رايدني 

=ما اعرف بس سمعته ايگل الامي احنه موافقين بس لازم اگعد ويه الولد 

صار سعد يسولفلي شنو راح يسويلي أوين يسفرني وشلون ايدللني وين يسويلي شهر عسل كل شي يحجي وانا 

طايرة من الفرح واتخيل شنو البس او وين اروح 

صحيح انا البس واتمكيج بس اكثر وكتي بالبيت يعني ما اطلع اله نادرا او ويه امي او واحد من اخواني 

نمت التلفون على أذني كعدت قريب التسعه لكيت امي خطيه مخلصه نص الشغل

كلتلي // روحي رتبي الديوان وبخريها 

بابا اجه على وكت يريد يروح للصلاة كلتله امي 

ماما /حجي من يجون شنو نقدم كيك وعصير شتكول

بابا باوعلي // لا هو تعارف وحجي من يجون ماي وجاي وانا من اجي من الصلاة أجيب وياي عصير

ابوي باوع علي وحاجاني

بابا/انتي بابا من أفتح باب الديوان صيري يم الباب من ادزلج زين يصيحج تعالي جيبي عصير وادخلي 

سلمي علمود الولد يشوفج النظرة الشرعيه وانتي هم تشوفينه هذا مو عيب ولا حرام شرع رب العالمين

دنگت وابوي اتقربلي وهو يگول// المهم يطلع خوش ولد ويصونج 

امي //ان شاالله حجي 

راح ابوي للصلاة وانا رحت انظف الديوان سويتها مرايه ومسحت الاثاث وعطرتها  

بابا اجه من الصلاة جاب كارتون عصير وكال الامي سوي جاي مهيل وخلي بترمز واتغدينا وبسرعه غسلت 

المواعين وعطرت الصاله واريد اصعد أخذ حمام امي كلتلي 

بثينه ألبسي فستان طويل اخاف عمامه يردون يسلمون عليج مو تلبسين بنطلون ضيك 

انا جاوبتها = واذا البس اكيد هو يدري شنو البس وشايفني 

امي //مي خالف بس ناس اول مره وبيتنا وما نعرف طريقتهم فالبسي شي محتشم 

=صار ماما مثل ما تامرين ولو المفروض اروح للصالون 

امي //باالله هاي شتحچين وياها شنو هي خطبه هاي تعارف وبس رياجيل وعلى گولتج اكيد الولد شايفج 

انا صعدت اخذت حمام وطلعت نشفت شعري وجففته ورفعته اليفوك وطلعت فستان وردي طويل وفوكه قطعه ثانيه 

بيضه ولبسته وخليت شكاله كبيره الشعري

ونزلت قسم منه وطلعت كذله وخليت مكياج خفيف

ولبست سواراتي الذهب والسبحه الي جابها سعد ابد ما فاركت ركبتي 

ومحابس اثنين بايدي اليمنه وايدي اليسرى لبست بيها محبس واحد عباره عن تلث حلقات متصلات 

وساعتي الذهب الي اشترتها الي امي ونزلت شافتني امي صارت تقرأ المعوذات وتسور

ماما/ اسمعيني بثينه من يجي الولد ويصيحوج لفي شالج عدل ومن تسلمين على أهله لاتباعين 

خلي عينج بالكاع وسلمي بصوت ناصي 

= ان شاالله ماما

صارت الساعه اربعه اجه عمي عباس وعمي صابر اجوي سلمو علينه

وعمو عباس بأس راسي ويكول //يالله نريد نفرح بيج يا حلوه

انا دنكت وصارت خدودي حمر بس اشوف عمي صابر ضايج وما حجى وياي ولا بارك لي 

وانوب إجت خاله رجاء و تماضر لان انا دزيت عليهن 

خالتي رجاء گالت الامي //هو موحسين يريد يشوف الولد ويحچي ويا 

امي //ايي 

خاله //لعد ليش داز على اخوته 

امي //والله ما اعرف اكيد يريدهم يتعرفون بي 

ابوي وعمامي بالديوانيه الساعه بالخمسه ضبط رن الجرس

انا احس كلبي صار يدك الف بالثانيه وصرت اتنفس قوي شويه إجه زين أخذ بطالة الماي سألته خالتي

زيوني منو اجه 

خاله تلث ر ياجيل واحد بكد ابوي واثنين شباب

بعدين اجه أخذ الجاي طبعا الباب مسدود ما نسمع شنو حجى وانا عيني ع الباب أريده بس ينفتح 

رن جرس الباب رنه قويه وسمعت أصوات بالديوان السلام عليكم 

ما ادري ليش انقبض كلبي وابد ما مرتاحه اجه زين كل التماضر

تماضر صبي تلاثه جاي وهو أخذ ماي

امي سئلته //ماما زيوني منو اجه

زين //اجوي ولد عمي محمد واياد ورياض

 انا من سمعت ما ادري شنو صار بيه احس گلبي صار يدك بخوف وحتى نفسي لعبت

أخذ زين الجاي وبقيت گاعده وانا متوتره واحرك برجلي انفتح باب الديوان عرفتها إشارة من ابوي انا عبالك 

صاروخ ادنيت وكلبي يدك ومخليه العصير على طبله علمود اسمع الإشارة وادخل لكن الي سمعته موتني

سمعت صوت اياد يحجي بعصبيه

اياد بصوت عالي ::يا جماعة الخير شربتو جايكم أهلا وسهلا بيكم بس البنيه بت عمي وانا أولى بيها وانتم منهيين

انا جمدت بمكاني احس رجليه عبالك جبل ما اكدر احركهن سمعت واحد من الجايين گال 

عمي على كيفك ابن عمها وعلى راسنا بس سولفنا ويه الزلم وانطيتونه كلمه 

محمد //صحيح عمي انطاك كلمه بس ما صارت رسمي بس حچي وانتو عشاير تعرفون ابن العم احق ابت عمه 

اذا ما بي شي يتعيب وهذا ابن عمها گدامكم 

رياض //محمد ما ملزم تنطي اعذار هذا هو ابن عمها نهى وهو اولى بيها 

واحنه ابنه ما بي قصور 

اياد ::ابنكم ع العين والراس زلمه سبع ونشمي بس ما اله نصيب 

الرجال باوع الاياد //وانت شنو عمي جنت غايب وهسه جاي تنهى 

اياد ::اي حجي چنت غايب وهسه حضرت شي راجع الي ويخصني واحنه اهل 

الرجل /:بس الاتفاق مو هيج 

 اياد بنتر ::اكلك بت عمي انت منهي ومحد اله غرض يمته ما اريد أنهي 

الرجل //أبو زين العابدين انت شتكول بهذا الحچي

من سال الرجال ابوي اعرف راح ايگله البنيه الكم لان اعرف بابوي ما يتراجع عن كلمه انطاها لكن انا 

انصعقت من ردة فعل ابوي 

بابا /مثل ما سمعتو ا البنيه نهى عليها ابن عمها وانا ما الي بعد اي حچايه خصوصا وهو گدامكم لا متزوج 

وضابط وابن عمها وانتم والنعم منكم بس ما الكم قسمه عدنا اعذروني

الرجال //حجي حسين إذا انت ما تكدر على ولد أخوك وما الك حجايه ليش دزيت علينه 

اهنا اياد جاوب :: لا عمي كلامك مردو عليك انا هسه عرفت جنت بالمستشفى ولو داري من وكت جا حجيت 

وياكم وهسه هم ما صار شي اعذرونا وحقكم علينه 

بابا //خويه انت ابن عشاير وتعرف بالسناين البنيه اذا رادها ابن عمها انتهت وما النه كلمه 

سمعت صوت سعد كال /:هاي السناين والعادات صارت باليه ومحد معترف بيها واحنا اجيناكم من الباب 

حسب الاصول والي عرفته انو البنيه قابله 

اياد جر نفس قوي ::ابو الشباب اذا انت ما تعترف بالعادات والتقاليد احنا معترفين بيها واذا انت عندك باليه هاي 

مشكلتك عندك اعتراض قسمه ما الك يمنا هذا اخر كلام 

دار اياد ع الرجال وگله ::حجي اعذرونا ما الكم مره عدنا 

الرجل //هذا هو ومشكورين ابن عمها اولى بيها 

طلعوا سعد واهله زعلانيين وجوي الكل بالصاله انا بوكفتي وعيوني غركانه من البجي عمي عباس صار يحچي بعصبيه

:شنو لعب جهال دزيتو على الناس وانوب تنهى شنو اياد هسه تذكرت والله عيب فشلتنا كدام الناس 

ايادبغضب:: على شنو فشلتكم انا من زمان أريدها البت عمي وكلكم تدرون بس هي البنيه ما چانت موافقه عه الزواج

وانا ما اكدر اجبرها هسه من وافقت تتزوج انا نهيت عليها 

ولان انا اولى بيها من الغريب ما طول هي لا تعرفه ولا الها علاقه بي

باوعتلهم انااحجي بس ارجف وصوتي كوه يطلع

= انا ما موافقه عليك وما أريدك

خزرني اياد يريد ياكلني عفتهم وصعدت وأسمع اياد يحجي بصوت عالي 

اياد ::اسمعي ولج بثينه اخذج غصبن عليج ابن عمج واكسر راسج

انا صعدت وادردم بصوت مسموع = يكسر راسي خوش رجال

+

زين بعصبيه /: هذا مو حجي اياد إذا جنت تريدها ليش خليتنا ننطي حجايه للناس وتكسر كلمة ابوي 

اياد بنتر ::زين الخاطر الله انا ما سويت شي غلط بت عمي واخذها 

زين //بس هي ما تريدك شنو حرام نجبرها على شي هي ما تريده

اياد بصياح ::اي اجبرها واخذها غصبن على اليرضى والما يرضى

زين //مو بكيفك تاخذها شنو ظالتلك ما وراها احد بكيفك انت شنو شايفنه مو زلم كدامك

تصايح اياد وزين العابدين وعمامي صارو بالنص

امي بحسرة/ليش يمه اياد ليش هيج سويت كسرت خاطر البنيه وفرحتها

اياد جر نفس /هسه كلكم علي يأبه بحضور ابوي وعمي عباس واخوتي انا آسف عمي ابو زين وانت خويه زيوني

 احبيب انا اتشرف اطلب ايد بنتكم المصون واعتبروني ما ناهي البنيه من خطبتها اول مره گالت ما افكر بالزواج 

ما ردت اضغط عليها هسه هذا الولد اتقدم وهي تگول بكيف ابوي وانا حاچيت عمي وهو گلي انت اولى الي انعرفه 

احسن من الي ما نعرفه مو هالشكل عمي لو انا غلطان 

ابوي //لا عمي انت مو غلطان وملامك ذهب

هو باس رأس ابوي وباس ايده وحضن زين وباس رأس امي

بابا باوع الأمي بغضب /وفيقه اصعدي فهمي بتج شنو يعني نهوة اياد (وباوع الاياد )اسمعني عمي اياد البنيه

الك وما تأخذ غيرك 

اياد ::طال عمرك عمي بس انا ما اريد بثينه تنجبر مثل ما قبلت على هذا الولد وهي ما تعرفه اريدها تقبل عليه 

وهي تعرفني 

ابوي ايهز بايده // شنو تلكى احسن منك وفيقه روحي فهمي بتج راح نقرا الفاتحه

انا جنت اتصنط من نهاية الدرج واسمع ابوي شلون يحجي اجت وراي تماضر بس انا كتلها 

= تماضر عوفيني اريد ابقى ابحدي 

نزلت تماضر وانا دخلت للغرفه شمرت روحي ع الجربايه وصرت ابجي إجتني امي

امي وهي تمسد على شعري /بنيتي حبيبتي على كيفج سمي بالرحمن ولا تعاندين ابوج وعمامج

جاوبتها وانا ابجي 

= ماما ليش هيج صار انا أدري كله من هذا الحقير اياد لان رفضته بس إلا أخذ سعد غصبن ما على وعلى امه  

شنو ماما عمامي موافقين وابوي همه جان موفق هو الي غير رايه كله منه هذا الحقير الكلب

امي /وج يمه تعرفين شنو نهوه يعني حتى لو ابوج زفاج بايده السعدوانتي منهي عليج سعد مهدور دمه ودمج 

ودم اليزفج يعني انتي هسه مرت اياد ماكو ابن مرة يتجرأ يفوت عليج إله هو ايفك النهوه

انا ومختنكه من البجي = ماما فدوه سويلي چاره شنو احنه وين عايشين فدوة دبريني اموت روحي ولا أخذ اياد 

والله اموت روحي وابلي ولا أخذه

مسحت امي على رأسي وحضنتني وكامت تحجي وياي

:حبيبتي ماما سعد إذا يحبج ورايدج مثل ما كالت اخته ما راح يسكت راح يدز شيوخ وساده يلينون رأس ابوج ويحجون 

ويه ابن عمج بس الي اريده منج تصطبرين ولا تاخذين كل شي بعصبيه وانتي تعرفي الاياد شكد راسه يابس 

=ماما والله اموت روحي وما اخذه الهذا

امي //لا بثينه تردين تخلينه عار الكريمه وابنها والناس تتقول ما تكول خطبها ابن عمها ورفضته لا تكول اكيد 

بينها وبين سعد شي وخافت تنفضح لا ماما هاي تاليها احنه نستاهل منج هذا الشي 

مسحت دموعي =ماما والله مو قصدي بس صدكي الموت اهون الي وما اخذه الاياد اكرهه ما اطيقه

امي /:/معليج بثينه انتي بس اسكتي وما راح تاخذينه الاياد وراح اخليح تاخذين سعد بس لا تتهورين يالله كومي 

غسلي وجهج وسمي بالرحمن وانا راح اكول قنعتها وهي تريد وكت تفكر وبعدين انا احجي ويه ابوج بهدوواقنعه 

انتي ما عليج خليها وراي بس اهم شي اتسمعين الكلام وما تراددين زين حبيبتي 

هدئت شويه = ماما بس هذا أياد الحقير انتي تعرفينه شگد عنيد وعصبي وخاف من تحجين يعند بالزايد 

امي /:ما عليج يا بتي خليها علي وانا اعرف شلون أتصرف انتي بس لا تحجين اي شي حبيبتي راح انزل واكول  

اني قنعتها وبعدين نحجي انا واخوج ويه ابوج بهداوه ناسيه شكد ابوج يحبج 

من طلعت امي انا شويه جريت نفس بس بعدني ارجف وانا ويه نفسي ما خليت غلطه ما غلطتها على اياد أكرهه 

مو بيدي أحسه مو بشر خصوصا من يعصب عبالك احس بي مغولي من جماعة التتر هيج يتراوالي ضحكت 

على وصفي اله وراها هدئت واتصلت بسعد

////////////:://////////////::://///////////:://///////////:::////////////////

اياد 

من اجه عمي حسين للمستشفى وفاتحني بموضوع خطبة بثينه انا بيني وبين نفسي عبالك واحد وضربني سجين

 بنص كلبي بنفس الوكت ما حاولت ابين ضوجتي وقهري وحتى كدام عمي كتله ::انا راح اسال عن الولد واشوف اخلاقه 

واصله وفصله 

وبيومها عمي گلي //خلي محمد يسأل انت بالمستشفى تسأل منو 

::عمي عندي جماعه ثقه ينبشونه السابع جد ابد لاتدخل اي احد بالموضوع 

 حجيت ويه نفسي كلت ::الزواج قسمه ونصيب وحرام تنجبر على شي هي ما تريده اصلا قليله بحقي 

اهنا عمي گال //اياد تره هو نفس الولد الي ضرب الحرامي الي خمش جنطة بثينه 

الصراحه ما ارتاحيت لذلك طلبت من عمي اسال علي بدون محد يعرف 

اخذت المعلومات الي مسجلهن عمي بورقه اتصلت بولد وياي اسمه عقيل وكتله اريد معلومات وافيه عن هذا الشخص 

وثاني يوم قررت اطلع من المستشفى قبلها اجاني عقيل وجابلي كل السيفي مالته من طلعت واهلي سووى العزيمه

 انا باوعت العمي يعني ابقى هو ما رجع وياهم وانتظرني كعدنى بالحديقه وكتله

:: عمي بثينه انا احق بيها من هذا الشخص 

عمي سالني //شبي 

::كل شي مابي بس انا خطبتها البثينه وانت تگول بثينه تگلك بكيفك بابا مو صحيح 

عمي //ايي صحيح بس تعرف هي تشوفك مثل اخوها 

انا اتنرفزت وحاچيت عمي //مثل اخوها مثل عمها انا اولى بيها من هذا الي خطبها 

عمي //اياد بلا عصبيه وفهمني شعرفت عنه 

نفخت وگتله ::الولد متزوج وهو ما كال هذا الشي اكيد حتى ما ترفضوا والي ايضم هيج شي اكيد يضم شي اكبر 

وما دام بثينه كالتلك بكيفك انا ما راح احرجك وراح اخليهم امام الامر الواقع وانهي عليها وانت عمي ساندني 

عمي سالني /:اياد بس هذا الشي لو بعد اكو 

هزيت راسي :: لا عمي كل شي ماكو لكن مجرد ما ظم علينه زواجه معناتها ظام هواي اشياء 

 لكن عمي بقى يلح عليه فهمته وكتله كلمه وحده ::خصم الحچي بثينه اكتلهاولا تاخذ هذا سعد 

عمي كلي/: ولو اعرف اكو شي انت ما تريدني اعرفه بس انت ابن عمها واولى بيها من الغريب وانت الي اعرف 

بيك راح تحافظ عليها مثل ما تحافظ على نفسك 

جاوبته :: عمي احافظ عليها اكثر من نفسي 

عمي //اياد افهمني بابا انا لازم اعرف كل شي 

::وانا اوعدك اگلك كل شي بس بالوقت الحاضر هذا الي عرفته 

وفهمت عمي يخلي ام زين تخابرهم ويجوون 

وثاني يوم بس اجو الجماعه على بيت عمي هو اتصل بيه وانا اجيت ويه محمد ورياض ونهيت على بثينه لكن 

الشي الي قهرني من شفتها تبجي وتكلي كدام ابوي وعمامي واخوتي = ما اريدك 

كان ابدي الزمها واشبعها ضرب واعرف منها ليش ما تريدني لكن الصدفه خلتني اعرف هواي امور 

الفصل الخامس عشر من هنا