رواية بيوت الصفيح الفصل الرابع عشر بقلم زهراء السراي
.
.
"الخوف لا يكسر الروح فقط
بل يجعلنا نعيش نصف حياة ونموت كل يوم بصمت
.
.
مُنى
______
"الخوف ياخذ من عدنا الأمان
ويخلينا ننام وعيونه مفتوحة
على وجع ما نعرف منين يجي
نضحك گدام الناس
وننكسر وية نفسنا
نخاف نحجي وننجرح ويبقى
الخوف مثل الغيم الساكن بالصدر
ما ينزل مطر بس يضل ثگيل
صافنة بوجها وهي تطلعلي الآثار اللي
بصدرها وهي تفتح قميصها
-شوووفي أخاااف أخاف واحد يلمسني هيج لو يحضني بدون ماااحس
وترفع رجل البنطرون مطلعه أثر جرح عميق برجلها
احتضنت كفوفها بقوة وهي تسحبهن وترتجف
ترفع شعرها من ناحية رگبتها من الخلف وتشوفني الأثر خطوط محفورة حفر تاركة
أثر متليف عيونها مابطلت دموع امتدت ايدي
أمسح عيونها سحبتها مگومتها تاركين المطبخ
للغرفة گعدت عالسرير وهي تمددت ساندة راسها
على رجليه احس برجفة جسمها
-آسسسفة والله مو قصدي اضربج
-كافي تعتذرين قمووورة بس اهدي
وفهميني شبيج منووو هذا اللي متعقدة من اللمس بسببه
صفنت للفراغ ونطقت أسم أول مرة أسمعه
- أياد عموووو أياد
-منووو هذا -زوج ماما
ثبتت عيوني عليها وايديه رخت من ايدها
سحبت أديها مغطية عيونها وكأنها خجلانة من
اللي راح تحجي
-أمج متزوجة
-ورة وفاة بابا بسنتين تزوجت صديقة المفضل
جنت ستوني ناجحة للثالث أبتدائي
-يضربج مووو. -لا
- شنو هالآثار
انخفض صوتها وگوة طلعت الحروف من شفافها
-اعتدى عليه
سكن كل شي حواليه صوتها وصوتي أنفاسنا وحتى الهوا
ثواني من الصمت المرعب حاولت بيهةاحجي واسألها حتى تنفي اللي ببالي من تساؤلات
ألقيت الكلمة واني متمنية رغم الأذية أن يكون ضرب مو غير شي
-بالضرب ؟ -جسدياً
حسيت برطوبة دموعها اللي تتساقط بالتتابع
على رجلي وصمت ومواساة بدون أي كلمة لدقائق
بدأ بعدها صوتها الهامس ينطلق بوتيرة وأنفعال
مرة وخوف وعدم تصديق مرة
وبدت كلامها بدموع
- من توفى بابا بقت ماما أربع أشهر العدة
متداوم واني داومت بمدرسة صديقاتها بيها
جانو حنونات وياية لحد ما ماما داومت بالمدرسة
الاعدادية مقابل مدرستي بعد أنتهاء عدتها
جانت من ضمن صديقاتها اخت صديق بابا المفضل
عمو أياد
جانو صديقات حيل وحدة تستضيف الثانية وسرهم
يم بعض تتابعت الأيام ولمدة سنة كاملة اخته
تطب وتطلع علينا وهو يوصلها ودائماً يسأل عني
بالسنة الثانية الكل أستغرب ماما نزعت الأسود
على بابا وبدت تنسى تقريباً ومن واجهتها بيبي
ام بابا گالتلها اني ماناسيته بس اكتأبت بسبب الحزن وتمرضت
الكل لاحظ بس تغيير الملابس الا آني طفلة وحسيت
بماما توجهت مشاعرها لمكان ثاني
كل يوم بالليل تسهر عالتلفون تهمس همس
بالأتصال وأستمر هالشي للسنة البعدها
لنهاية الدوام تفجرت القنبلة بحضور عمو أياد
لبيت بيبي وهو يطلب أيد ماما من خالو أسدواعمام ماما ماانطوهم رد لحد مسألو ماماوجاوبت بالموافقة
صارت كارثة اهل بابا تعاركو ويه ماما والمشكلة
كبرت وگالولها اذا تزوجتي ناخذ البنية يااما تطلعين
من بيت اخونا فهي علمودي اخذت حصتها وحصتي
من البيت وانطتهم الباقي وفعلا تزوجت عمو أياد بييتا
عمو أياد جان منفصل ماعنده اطفال بسببة هو ميصير
عدهم أطفال لذلك أنفصلت زوجته عنه
اول شهرين زواج اني بينها وبين بيت جدو اهل بابا
وبيت خالو أسد رغم احس بفراغ بسبب تشتتي بس اتونس ويا اولاد اعمامي
بعدهة بديت أستقر عادي بالبيت نطلع نتونس
وهو فرحان بيه يگل لماما ربي عوضني بيها
اللي تأشر ايدي علي يجيبه واللي اتمنى ألگا
قبل لا ارمش لحد نهاية أول سنة زواج ماما مأمنة تطلعني وتدزني ويا عمو وين
ماكان لدرجة گالت صيحيله بابا لكن اني رفضت
گالتلة بمرة طلعها لأن گمت أبجي متخليني اروح
لبيت جدو اهل بابا باوعلي مسح دموعي وأشرلها يتشاقه
-هاااااااا تحرگين گلب بنيتي دروحي
طالعين وراح نخليج وحدج
ضحكت ماما وهو شالني من الگاع
-وين تردين ترحين
خليت ايدي على جبيني افكر
-نروووح نروووح نفرفر بالسيارة
-يلا
گالها ورفعني على كتفه يضحك
دخلت السيارة وهو مشغلي أغنية ويهوس
وياية دخلنا أسواق أشترينا وطلعنا هم شالني ذب
علاگة الحلويات بالسيارة وفتح جهة السايق مگعدني بحضنة وهو يسوق
هالحركة جان يسويها بابا وجنت طفلة فرحان
بية ماجنت أعتقد راح تنعاد لكن بقذارة
گام يمشي بطيء بشوارع هادئة
وأيدة ملتفة على بطني حركني بحضنه
مااعرف شلون وضغط على بطني وهمس
-ابقي گاعدة هيج بابا
سكتت واباوع ويا عالطريق ايده
تلعب على بطني من ورة التيشيرت
كتمت انفاسي وهو دغدغني يضحك
-ها تغارين من بطنج
ضحكت ابعد ايده
-ايييي عمو أضوووج
نزل ايدة من بطني على فخذي وثبتها
ومشة راجع بينا للبيت طفلة بعمر السبع
سنوات مستحيل افكر بشي مو زين
وبدت طلعاتنا تكثر والا يگعدني بحضنه
لحد ماتعودت يدغدغني يحضني كله عادي تحت مسمى بابا
بدت ايده تتسلسل لصدري الممسوح
بهيج عمر اساساً جنت أملك جسد نحيف
وبحجة يدغدغ تمر ايده على جسمي
مرة على مرة قست لمسته وبجيت
-شبيييج بابا شبيج
-عمو ليش تگرصني
-ولج ادغدغج مو اگرصج
گالها وباسني من خدي
نزل بيه يشتريلي وينسيني
صعدنا وخلاني بالكشن وحدي
-قمووورة باباتي مو تگولين لماما اني اذيتج
اني آسف امج تزعل مني عبالها كتلتج
بعقل طفولي جاوبته
-لا عمو مااگول
-شطووورة باجر نطلع بعيد تردين
-مكان للحيوانات
-تردين نروح للحيوانات
-ايييي عموووو
قفزت وهو يضحك رجعنا للبيت ونسيت
اللي صار ورة يومين بلشت مباشرة ماما استعداداً للدوام
وهو باقي بالبيت يمي وماما مأمنة
اني نايمة بالغرفة مالتي
حسيت بأدين تندس تحت بجامتي
فزيت خايفة بسرعة سحب ايده
تراجعت للجرباية ليوره
-شبييييج بابا
-انت لزمتني من مكان عيييب
-لا لا جانت دودة على ملابسج وخرتها
بجيت واني أشوفه بس بالشورت
وهاي اول مرة يسويها
فقد صبره واني اعيط
-اررررريد ماما
-شبييييج بابا
-موووو بابا انت مو بابا
اندفع ناحيتي لازمني من تشيرتي قوي وحضني
-تردين أگص راسج مثل أبوج وتموتين
بساعتها ارتجفت واني استرجع ذكرى موت
بابا وصورة راسة بالگونية رجع لراسي من الخوف بللت نفسي باوعلي وزادت حدة
كلامه
-ودمرتي فراشج اليوم امج تموتج
تلكأت بالكلام وهو يسحبني
-گومي غسلي بالحمام
گمت خوف وخجل من وضعي وهو ورايه
يمشي ماتخيلت بلحضة اللي ينغلق الباب
راح أتعرض لأبشع شي ممكن اشوفة كطفلة
قفل الباب واني ارتجف حصرت نفسي
بزاوية الحمام وهو استغل خوفي
فتح المي وصاحني
-تعاي غسلي قبل لتجي ماما
-اططلع عمو اطللع
سحبني بسرعة مجردني ملابسي
طوووول الفترة اللي تعرضلي بيها جسدياً
اني مغمضة وأتمنى افتح عيني ويطلع حلم
بعد ماخلص حركاته حسيت بأدي تغسل
جسمي بالصابون والمي لفني بالمنشفة
واني لازلت اتأمل هذا حلم
شالني وطلع بية للغرفة
-فتحي عيووووونج
گالهة بزمخ
فتحت عيني وهو باوعلي
-اي شي تگولي لماما راح تنذبحين
وهذا راسج ينگطع ويخلو بالگونية
اشرلي على رگبتي وهو يفتح عينه بقووووة
شال فراشي بدلة بثاني وطلع
هاليوم بقيت نايمة بالفراش
وماما تخبلت من سمعتني أتلعثم بكلامي
والـتأتأة واضحة بكلامي بسبب الخوف
لازمتني التأتاة وأستمرت تصرفاته
وزادت حدة جان يتغذى على خوفي
لحد ما مرة صرخت باجية من لگيته
يم رجليه يحاول ينزعني ملابسي
بكل قوته ضربني كف وسحلني من السرير
جوة لزم السجينة خلاها على رگبتي وهو يهمس
-اشمرج بالشارع من اذبحج لو اخليج بگونية
-عمووو عمووو حب…… حبااااب
-تسوين الأگول علي بدون كلام
صعدني بغرفة ماما لبسني ثوب نوم مال كبار وباوعلي وصرخ
-غمضي عيييينج لج
وهو يحجي دگ تلفونه
فتح الخط يجاوب ماما أشر على رگبتي بمعنى
اذبحج اشرلي وفتح سبيكر
-الووو ها عيوني
-ها حبيبتي
-صباح الخير اول شي
وثاني شي قمورة گاعدة
- لا قمر نايمة
-بيت جدها اتصلو يردوها قبل لتداوم
-اذا گعدت اوديها تمام
-لا يمعود لتوديها انت
- ليش بالله مااوديها
-مو اني گلتلهم اني بالمدرسة وهي ويايه
من احل اجيبها الكم بس يدرون مخليتها وحدها
بالبيت يتخبلوووون
-شنووو قصدج ميادة واذا بقت يمي
-ليش تعصبت ياعيوني اني وين الگة احسن
منك بس بعد عقليتهم شنو مخليتهة يم رجلج
-تمام منتظرج
-كعدها تتريك ساعتين وراجعة اني
سد التلفون وباوعلي ورجع عاط
-غمضضضضي
تكررت ذات التصرفات والاذى النفسي مالتهة انحفر بجلدي بعد ميخلص اللي يسوي
گام يخوفني بالنار حتى يخلي الخوف يستأصل بيه
واربط رضا عني بالضرب صرت انصاعله
بسكوت حتى مااتاذى الحرگ اللي برجلي گال
لماما لعبت بالورق حرگته وانجوت
واللي ببطني كوب الجاي حرگها لحد
ماخفت وصرت اسكت وبس دموعي تشرح حالي
گمت أهرب لبيت خالو أسد وبيبي تفرح بية تقريني
وتكتبني يومين ثلاثة واجت ماما تگول اشتاقينالها
طلع هو اللي قاري براس ماما ان لازم ابقى بالبيت
وألتزم الگعدة حتى مااتشتت صرت احسن
من التأتأة بممارسة تكرار الكلام على ايد خالو أسد
واستمر أياد يتعرضلي بمرة لگاني لازمة التلفون اتصل
ببنت عمي واگللها
-اريد اجيكم اتصلو بماما مااريد ابقى يم عمو ………
بعدني ممكملة كلامي وسحب التلفون مني
وماما جانت بالحمام دخل بيه للغرفة بسرعة
خنگني لمرحلة فقدت التنفس
-بس ترحين اخنگج واشمرج بالبانيو بالحمام
راح اخابرلج تگليلها مااجيكم
اتصل بيها وحجيت اللي گاله بسبب اذيته
وبسبب الرعب اللي عايشته
الدوام وساعاته صار راحة اليه ومهرب
من الأذى اللي يسببه اليه وزني قل وجسمي گام
ينهار وعيوني ضعفت أكثر وأكثر واستمر
بتصرفاته بكل مرة نبقى وحدنا وكل مرة
يلگاني بمكان وحدي وعبرت المراحل واني
متميزة شامرة نفسي عالقراية حتى انسى اللي
يصيرلي لحد مگعدت قبل امتحان الاول متوسط
جان بكل مرة يخنگني او يربط ادية و يلمسني
ويسوي اشياء حقيرة بمرة فاض بية لزمت
التلفون اللي جان عالكومدي بصف سريري
رفعتة شگيت بي راسه وانساب الدم علي
بكل عصبية انكفى علية شال جداحته شگ تشيرتي
-انتِ الظاهر يرادلج أعادة تربية
ماسمعت بس طگة الجداحة اللي حرگني بيهة بصدري
أيام وليالي آني ابجي من الألم والخوف
لأن گال كلمة بقت ترن ببالي
-يگعدون الصبح ميلگوج بس اسمع كلام
عن اللي صار وهذاااااااااا غيض من فيض
المرررررة الجاية اش**گج ش*گ
بقيت ايام ابجي بسبب الحرق مكانين ماخذات مساحة من صدري الالم يذبح وملابسي تطخ بيهن لحد مافاض بيه
وركضت نازلة لماما وهي تشتغل وهو گاعد
-ماااااما باوعيلي اريد اگلج شي
التفتت ماما وهو باوعلي ووگف
-عموووو أياد
سبقني وهو يضحك
هي هم ضحكت
-شبي عمج
-شبية عمووو اي قمووورة احجي
كلامة جان يحمل نبرة التهديد والوعيد
بس رغم ذلك ردت احجي حتى لو بعدها أموت
-ماما عموووو ………
-خربتي المفاجأة قمرررر
-ياااا مفاجأة ولكم تتفقون من ورايا
ردت احجي رفعلي حاجبه وبيده سجينةالزلاطة يمسح على كفه
-قمووورة اليوم معزومة وياي
صديقي جايب بنته يعني طلعة بنات وآباء
وخافت گالت خاف ماما متقبل
ضحكت ماما وحضنته من بطنه
-والله افرح من اشوفكم متفقين
-يلة قمورة بدلي ملابسج حتى مانتأخر
اشرلي وعينه جدحت غضب
وماما تصيحلي
-كملي وتعاي اضفر شعرج
صعدت واني ارتجف خوف حسيييت اكو
شي راح يصير ومراح يعديها اليه
اول ماصعدنا السيارة بدة التعنيف
يتلفظ وياية أسوأ الألفاظ ويگرصني لحد البكاء
-هااااااااا گ****ة تردين تگولين لأمج أذب حج والله بس تسويها
احس بالنار تصعد لبلعومي
من الغضب
-اگللها والله لو اگل لخالو أسد اخلي
يشيلك من وجه الأرض
هدأ وصوته تغير وهو يقفل الأبواب
-اليوم نهاااااايتج اليوم يطيح حظج
ولوووو تموتين محد راح يصدگج
فشر وحجة كلام حقير وهو يوعدني
انو راح يقيم وياية علاقة كاملة وراح يحطمني
بكل مااملك من حزن وكسرة
گلب وبشارع سريع مديت ايدي بسرعة
للستيرن فريته بقوووة ضربنا صبة وانگلبت السيارة
بينة ماعرفت بعدها اللي صار غير استيعابي لللي أمر بي بعد غيبوبة يوم كامل رضوض
بكل مكان بجسمي وكسور برجليه الأثنين
الكل حواليه ماما تبجي وبيبي وياها خوالي حواليه وأعمامي والكل مستنفر
تعرفين شي واحد خطر ببالي وسألت عنه
-وين عمو أياد
جنت منتظرة ان يگولون مات
لكن للأسف جان مبي شي ماعدا ايده
انكسرت ورضوض الضربة كلها من جانبي
يومين بالمستشفى نقلوني مرجعيني للبيت
جانت فترة امتحانات الابتدائية
وراهة بأسبوع فاضطرت ماما تداوم
مخليتني تحت رحمة أياد تعرفين شصارررر
گالتها وفزت مرعوبة تباوعلي
لزمتها احضنها كشت واحتضنت نفسهة محاوطة نفسها بأيدها كأنها تواسي نفسهة بنفسهة
-استغل ألمي ووضعي ومارس عليه قذارته
كلها
غصيت بعبرتي واني أشوف دموعهة تنزل
وبالگوة طلعت الكلمة وطرحت سؤالي
-شصار
رفعت راسها وانهمرت دموعها وهي ترجف
قهر واطلقت كلمتها تحت صدمتي
-أغ تصبني
غِنى
_______
احياناً تضطر تكون لين ويا الناس
الدنيا ما تمشي بالحدة
تعلم تتماشى ويا الناس
حتى تعرفهم أن مو كل اختلاف معناه خصامولا كل سكوت معناه ضعف
گاعدة عالمكتب بالصالة الجبيرة اللي بيها
١٢ موظف وياية ٥ شباب و٧ بنات الصالةمال الشركة السياحية جبيرة
وبيها مكاتب مكعبة صغيرة لكل موظف
من أول يوم خطتها رجلي بالمكتب
ويا أتصال أيمن لمدير الفرع أن يديرون
بالهم عليه لاحظت لهجة البنات غريبةوتعاملهم المتعالي ويايه چنت أصغرهم بالعمر
تعلمت عالشغل بسهولة اغلب الشغل حجز وعالحاسبة
واني اغلب شغلي هيج شهر عدة كل يوم اصبح عليهم يردن كم وحدة والباقيات مطابگات
رشا اللي من أول يوم مترد السلام وحسرة أفوت منها او اسوي شي أسمعها تودود علية بهاليوم
جنت مخلصة حجوزاتي كلها ومضبطتهاومشيت لمكتب مدير الفرع يصير داخل الممر
فتت من مكتبها اللي صاير يم الباب اللي يودي
للممر واجاني صوتها وكلامها
-خلصت شغل الحجوزات هسه وقت ونسة المدير
بلعت الكلمة وأحس جبل نار سكن أضلاعي
مااريد أي مشاكل الشغل هنا مناسبني
ومكان محترم ومرتب سكتت بس النار
مستعرة داخل گلبي وقررت بس أسمع
كلمة ثانية أطيح حظها
دخلت للمكتب مستأذنة شاف شغلي
ختم الاوراق موجهني لشغل ثاني
الولد كلش مؤدب ومن الشباب اللي وگفو بعزاء
خالتي طلعت اكمل الشغل فتت منها باوعتلي من
فوگ ليجوه بنظرة أستهزاء ابتسمت بحقارة ومشيتلها
-محتاجة شي حبيبتي
وگفت رافعة حاجبها
-وشحتاج منج مثلاً
-كفاءة بالشغل مثلاً تردين أعلمج
تقربت مني وهمست على كيف
-اممممممم ممكن تعلميني شلون أتودد للمدير
-اممممم ممكن بس اشتغلي زين وتركي عنج المقارنات
ومتابعة الغير
-اووووو تعلميني شلووون اقيم علاقات
داخل المكاتب من غير محد يحس
صفنت بوجها وحان وقت الرد بس
ارتفع صووت طفولي بالمكتب
التفتت حمادة راكض ناحيتنا ويصيح
-شوووشه
فتحت اديه بأنتظاره وهي
ضحكت ومشتله عبالي يجيني
ماحسيت غير شامر نفسه بحضنها
وهي ترفعة للگاع تبوس بي
بهت وجهي ويا دخول أيمن وضحكته
وهو يباوعلهم
-هاااااا ولك مو گتلك شوشة موجودة
تقدم سلم عالشباب ورجع ناحيتي ابتسم بوجهي
وغمز وراح ناحيتها فتحت شفافي مستغربة
وهي تصافحه ويبوسها من راسها
ويسألها
-شلونج شوشة القردة وخالتي شلونها
-منتظرتكم والله حتى تمرضت لأن تأخرتو هالمرة
ومااجيتو
-هاي اجينه وراح نگعد على گلبكم يومين
-العتبة الكم والشارع النا تعااااال حممممود
وهي تحجي وية حمادة انتبهلي وركض
-ننة
ركضلي ابتسمت ونزلت بمستوى
-ها حمااادة اليوم ناسي ننة
اجاني صوتة ووگف فوگ راسنا
-شلون ينسى ننة هي الروووح والرية
رفعتله راسي باوعتله صفح
-اي واضح
راح حمادة راجعلها گعدته عالمكتب يمها
واني توجهت للمكتب مالتي تمشى ورايه وانحنى يسند
نفسة عالميز
-فارغة نطلع
-لا ليش اخذ شوشة بالله منين يعرررفها حمادة
هيج
مااعرف شبية احس حتى صوتي اهتز بالكلام واني اسأله
-انتَ عندك اصدقاء مقربين غيري يعني رشا
صديقتك لدرجة تبات يمهم
ابتسم وعيونه لمعت مسح لحيته بقوة
وهو يحاول يكتم ضحكته
-ولج شبيج
-مابية هيج مجرد سؤال
-أمشي نطلع مادام حمادة يم شووووشة
-خرررررب
ضحك بقوة واعتدل بوگفته مستأذن
دخل لمدير الفرع واني جهزت جنطتي
انتظرته ورة دقايق طلع وگف يمها ضحكو
وسولفو طلعها هي وحمادة بره المكتب
اجرلهم تكسي ونقل حاجات حمادة للتكسي راحو
وهو بره اتصل بية طلعتله
صعدت للسيارة ماادري شبيه شو متوترة وأحس
اريد ارفع جنطتي وأكسره بيها تكسير
-شبيج ولج شتفكرين
-ماافكر غبية اني
سكت شوية ورجع حاجاني
-احد مضوجج بالمكتب
ماعرفت شرد حسيت موقفي كلش غبي يعني
عندة اصدقاء اقرباء اني شنو علاقتي
استعاديت هدوئي ورديت
-لا كلهم مؤدبين ماكو مشاكل
-ومنو يتجرأ أصلا يحاجيج
-هم صح
-مادام اني وراج اكسر رگبته اللي يجيبج بالطاري
-تسلم لساني موجود ميقصر وقت الحاجة
ضرب الستيرن وصاح
-والنعممممم وانا أشهد
من الأخير غنيوة شبيج
-شو من راسلتني ماگلت جاي
-ردت افاجئكم
-شو ضمير جمع افاجئكم تفاجئ منو بعد
-انتِ وشوشة
هنا صدگ أحس أنقهرت وسكتت ماادري
شبية التفت يباوعلي ساكتة ولا انطيت رد
فعل
-غنووووة
-ها
-وجعا شبيج غير افتهم
-مابيه شي والله
-احجيلي اذا احد مضوجج من اول مااجينه وانتِ
متوترة وضايجة
-لا غلطان بس تعبانة
غيرت مجرى الحديث وبديت احجي
واسألة عن رهام
-رهام شلونها شعجب مااجت
-رهاااام اخخخخ منها
-شنو صايرلها شي
-صايرلها بس شي لمصلحتها
-شنووو
-اجوهة خطابة ورافضة وهاي
اخواتي صار شگد يحاولن وياها متقبل
تگول مااترك حمادة
توقف يم كوفي نزلنة قفل السيارة
ودخلنا گعدنه وكمل كلامه
-رافضة الفكرة واني مااريدها تضيع عمرها
بسبيل ابني اريدها تعيش
-تريد احجي وياها
-ياريت والله بس هي حاصرتني
بزاوية توافق بشرط
-شنووو
-تگول تتزوج وحدة ثقة يلا اتزوج اني
صفنت بوجهه وهو صفن بوجهي احسة
يريد يقرأ ملامحي ويشوف مدى تأثري بالخبر
-وانت شتگول
مسح على ملامحه مكمل
-انتِ شتشوفين
-انتَ صاحب الشأن شنو رأيك
سكت جر نفس عدل گعدته وكأنه مستعد يلقي
خبر صادم على مسامعي
-اني أشوف حان الوقت
-جييد يعني النية موجودة
-اكيييد بس العلة بالشخص
-يعني مخلي عينك على وحدة
جنت احجي واحس گلبي معصور نفيت
احساسي وحسيت نفسي انانية لأن هو
موجود دائماً بحياتي وهو مصدر أماني
خفت افقد هالأمان فوجود زوجة بحياته
راح ينهي صداقتنا احتمال
باوعلي بتمعن ونطق بهدوء
-رشا
بلعت ريگي أحاول اهضم الخبر
-رشا الموظفة ويانا
-قصدج رشا خالة حمادة أخت أمه
-خالته
ابتسم يكمل كلامه
-اي خالتة الصغيرة من توفت أعراف هي بعدها
اعدادية وحمادة متعلق بيها اخواتي يشوفن هي
انسب خيار
-جيد أذا انسب خيار توكل
گلتها وشربت الگهوة دفعة وحدة وأستقاميت
واگفة
-نرجع لأن تأخرت عالشغل وانت روح أرتاح
يم بيت نسابتك
درت وجهي وتحركت خطوات اجاني
صوتة
-اوووگفي كلامنا ماانتهى
-ها اكو خبر جديييد يلا نگعد
نسمع اليوم بس اخبار سعيدة
رسمت على وجهي أبتسامة بلهاء واضح
انها مزيفة وگعدت ورجع هو گابلني
-غِنى
-ها يمناي
-تشوفين رشا مناسبة اليه
-انت شتشوف اني مااعرفها غير من شهر ومابينة غير السلام
-يعني كعمر وشكل
-هي مناسبتك حتى شكلياً وبكيفك
اني مااگدر احكم
-جاي اسألج انتِ شخصياً تشوووووفيها تناسبني
ارتفع صوته وهو يسأل
-شبيك أيمن جاي اگلك انتَ صاحب القرار
-لا تكفرييييني
-استغفر الله أستغفرررر الله شتريدني اگلك بس فهمني
خفض صوته وأطلق سؤاله بشكل مباشر
-انتِ موافقة اتزوجها
صفنت بوجهة وحرت شرد علي
-انتِ مواااااافقة أحب غيرج
ألم قوي عصر گلبي وآني أسمع أعترافة الصريح
غمضت على امل اعرف ارتب اجابتي
-تعرفين كلش ززززززين شگد احبج غِنى
انت بالذات ذكييية وتلگفيها وهي طاااااايرة
موووووافقة اتزوجها واني گلبي مليان بيج
-أيمن
-شترررررردين من نعال گولي احجي بصراحة
سكتت مااعرف شريد مااريد اكسر گلبة
مااريد افقده بعدة گلبي مكسور بسبب اللي صارلي
مااااعرف مااااعرف شحس
-تتهنى يارب تزوجها والف مبروك
خله عينه بعيني ونطقها بحرگة
وهمس جملة اول مرة أسمعها
وهو يضرب على رجلة بقوة
-غم گلبي الرچيچ الماعرف يهوى
رجع كمل
-بعدة بگلبج موووو
فتحت عيوني وأحس دموعي اعلنت نفيرها
باوعتلة مستفسرة باوعلي متأسف
-الأستاذ شجاع بعدة متربع بثانايا روحج
ومامستعدة تبدلي حتى لو بأيمن اللي حب
كل ذرة بوجودج
-غلطان شنو الاستاذ
-شوفي هالوجه الأجلح الدنيا مررتني بآلاف
المواقف والناس وخلتني أعرف البشر
حتى من نبرة صوته
صوتج اللي اهتز بيوم المشكلة
بوجودة وكلمتج اللي غصيتي بيها وانتِ تگليله هذا خطيبي
وكلامه عنج من التقينا بالجامعة مرة وگالي انت ماخذ جوووووهرة
كل اعتقاده مخطوبين صدگ
مايدري بأيمن حاول طول هالسنين يزيح شبح حبه من عيونج ولازال يشوف ذكرياته ساكنتج
هو كسرتج الجبيرة اللي حجيتيلي عنهة وگلتي غيرتني موووووو
-غلطااااان
-لا مغلطان تدرين شلون أعرفج وشگد
سحب ايدي بقوة ضاغط على أصابعي
-أعررررفج مثل الخطوط اللي بثانايا كفج
تعرفين أحبج وحاسة بس ………
قطع كلامة شرب مي وشمر البطل عالميز
-يلا أرجعج للمكتب
-أيمن
گلتها ودموعي نزلت
-ليش تبجين
سحب كلينكس خلا بيدي
-گوووووومي
گالهة متعصب وطلعنا
وصلنا السيارة فتحلي الباب صعدت
وهو صعد اشتغلت الجگاير وحدة براس اللخ
واني ساكتة وبس دموعي تنزل
-كافي بجي-كافي دخان
شمر الجگارة
-مشاعرج من حقج اني جنت شايل حمل مشاعري
من سنين هسه قررت ابوح بيها خاف ارتبط
وماحاجي ويكتلني الكتمان بسسسس هذا مو معناه
انتهينا اني ظهرج وسندج اليوم وباجر وللموت فاهمة
هزيت راسي وتغيرت ملامحه يحاول يضحك
-ماادري باليبجي يصير هيج حلووو
ضحكت ودموعي طفرت رجع كمل
- يصير وجه الباجة
-اييييييع
-هو انتِ توصلييين لجمال الباجة
ضحكت بس داخلي عبارة عن دمار
شلون هيج صار حس بيه وانكسر گلبه بسببي باوعلي
-لا تفكرين اني من اتعصب ابقى أمصرن
-شنووو امصرن
-اكل خ***
-شبيييييك ايع حشاك
-فردي هالبوووووز شگد تلعبين الروح
جان يضحك ويضحكني وكل واحد من عدنا
انكسر بداخله شي ماعرفنا شنو هووونزلت للمكتب وهو دخل لصديقه نص ساعة وطلع
سلم عالشباب وحاجاني
-تردين شي رايح للجماعة
اتمنى أگله لا تروح وانت مكسور مني بس مطلع جواب غير
-بوسلي حمادة
طلع تاركني أصارع أفكاري لوحدي
لحد ماانتهى موعد الدوام طلعت للبيت
شمرت نفسي للنوم مااگدر افكر
شصار بينا شنو راح يكون موقفنا من نلتقي مرةثانية
مر هاليوم أحس معدتي تغلي ومامرتاحةابد ماتراسلنا ولا اني اتصلت جنت خايفة أسمع
نبرة حزن بصوته او أختلاف بكلامنا بسبب الموقف
وثاني يوم داومت لا هو اجه ولا رشا داومت
ثالث يوم احس الحزن طبع على ملامحي وماعدت
أگدر اخفي بالليل بس دزلي فيديو لحمادة
يدزلي بوسة ويكركر گدام الكاميرا وهو مخلي فلتر دبدوب الليل كله خلصته سهرانة افكر
للصبح گعدت غيرت ملابسي وتوجهت للمكتب
لگيت الاغلبية موجودين كعدت أشتغل اللي گدامي
وسمعت صوت سيارة طبگت دخلت رشا تضحك
ويا وهو مبتسم يسولف اختفت ملامح الابتسامة عن
وجهه من گامت وحدة من صديقات رشا المفضلات
وحضنتها وهي تباركلها
-مبرررروك ياروحي اشتاقينالج
ابتعدت عن رشا وحاجت أيمن
-مبروك أستاذ بالرفاه والبنين
الشباب اجتمعو عليهم يتسائلون ردت عليهم صديقة رشا
وبدو الشباب يباركون وهو يختطف النظرات لوجهي
يشوف ردة فعلي وگفت عدلت ملامح وجهي
قدر الأمكان ابتسمت تقدمت بست رشا تحت صدمتها
-الف مبروك
باوعتله وجهه جامد وملامحه راخية
-الف مبروك أستاذ
رجعت لمكاني واني أسمع حديث الشباب ويا ومدير
المكتب يسأله
-شبسرعة ابو حمادة شو حتى ماعزمت
التفتلي ورجع يرد
-صارت بسرعة بس عقد شيخ للجمعة الخطوبة اكيد
كلكم معزومين
توجهت رشا للبنات
-بنات كلكم معزومات للحفلة
توجهت لمكتبي
-غِنى انتِ هم معزووومة عالحفلة
-أن شاء الله يكتبلكم السعادة بقادم أيامكم اذا اگدر أجي
تركتني وتوزعو لمكاتبهم هو واگف يم مكتبها
وكل شوية يريد يتحرك وهي تحجي ويا بموضوع
اشرتله يتقربلها تحاجي
سهام النار توجهت لجسمي وحرارتها فعلت
الحزن بداخلي ونفسي تحاجيني
-شعليج غِنى هو صديقج صح
أكيد ماراح يبقى عزابي طول العمر لازم يتزوج قابل الصداقة تربيله أبنه
ماتحملت منظره وهو منحني يسمعلها
طلعت بسرعة مريت من يمهم لأن مكانهم يم
الممر معدتي أذتني وحسيت النار اللي بيها ممكن
تموتني يادوب سديت باب الحمام وطلع القهر على
هيئة نار من جوفي تقيأت لحد الوجع حتى عيوني
اذتني أسمع صوت طرقات خفيفة عالباب
الحمامات بنهاية الممر عاليمين ممر ثاني داخلها
محد يشوف اللي رايح واللي جاي
رجع اندگ الباب واني مااگدر أرد
اجاني صوته
-شبيج غِنى افتحي الباب
گعدت اغسل عدلت وجهي رتبت حجابي
من جديد وطلعت مبتسمة وجهه القلق صار گبالي
-شبيييييج
-تريگت بيض يمكن سممني
-وانتِ من يمتى تتريگين
-أتريگ عادي وغلطت اليوم اكلت بيض وحارة
الدنيا
مشيت للممر لحگني موگفني
-دخلي المكتب احجي وياج
-لا لا زحمة شيگولون عليه
-ميگولون شي امشي
دفع الباب ودخلت
-صايرلج شي انتِ كل وقتج تگولين من اتعب
واضوج معدتي تأذيني
-ايييي صح بس اليوم تسمم قووووي
طلعت للباب
-اخذج للمستشفى
-لا والله عندي علاج بجنطتي
فتحت الباب طالعة بنص الممر باوعت رشا جايه
رفعتلي حاجبها مبتسمة
-أيمن جوه
-مااعرف
طلعت لمكتبي اشتغل بهاليوم أبددد مارفعت
راسي من الحاسبة أسمعه يفتر ويحجي ويا
الموظفين يوجههم وصلي
-غِنى
-نعم أستاذ
-سويلي هالملفات حوليهن للحاسبة
باوعتلهن هوووايه گعدت أشتغل بيهن
لحد وقت طلعتنا من الدوام البنات طلعن واني ممكملة اباوعلة يريد يطلع صاح
-شباب الباقين كملو ملفاتكم يلا تطلعون
اشرلها طلعت ويا واني جمدت بمكاني يمكن للخمسة مااخلص
خلصو الشباب اللي بس همه يبقون للشفت
المسائي واني لازلت انقل للحاسبة ساعة ورجع
بيدة علاگة من الصيدلية وگف يمي
-تركي اللي بيدج واخذي هذا العلاج وامشي
وياي اكو محاليل لازم تعلگيها
رفعت راسي وأيقنت بلحظتها أني خسرته
من حقه أن يخاف على مشاعرها ويداريها
لكن خسارتي راح تكون لا شيء أمام زعلها هي
باوعتلا واني امحي أفكاري المنعكسةعلى ملامحي
-لا والله أحس نفسي أحسن بس اكمل الشغل
أطلع
-اي اني أطلعج
-لا ماكو داعي والله شغلي يطول من أخلصه أطلع
-گتلج اني أطلعج
گالهة متعصب باوعتله
-لا الحجي أبو التكسي راح يجيني ياخذني
صار لازم اخلي خط
ضرب الميز بوسط الهدوء اللي بالمكتب
نزلت راسي منكفية عالملفات لحد ماكملت
هو گاعد عالمكتب گبالي ولا شال عينة مني
اتصلت بالحجي نص ساعة وصار گدامي
هو من سمع صوت تلفوني
-ركبتي راسج وعاندتي
-لا والله أستاذ بس مااگدر اگظيها تكسيات
-أستاذ ……جيد غِنى جيييييد
-عن أذنك
گلتها وطلعت تاركته ورايه واجاني صوتة الهامس
-آني أعلمج
ابتسمت بحزن على تهديده اليه مثل كل مرة
من أعصبه وطلعت للبيت شگد أنبت نفسي ولمتها
على أستعجالي شبيه هيج تصرفت هسه
شيگول هاي غيرانة
وصلت للبيت أحس بتعب رجف ارجاء
جسمي صِبى انتبهتلي ورفضت أن أصعد
للغرفة
-نامي هنا وجهج معاجبني
غطيت وجهي بالمخدة اريد ابعد ملامحي
الحزينة عنها ومااگدر ابوحلها اللي جاي أمر بي
كافي تعبها بالشغل والبيت
تركتني أرتاح وطلعت يم مُنى لحد نوم مُنى
رجعتلي دارت وجهي عليها وشافتني
منتهية من البجي
-شبييييج احجيلي
-انتِ بياحال
-لو أكون بأسوأ حال مستحيل اشوفج
هيج ومااقلق أحجي
بديت احجيلها اللي صار وهي كل
شوية تمسح دموعي
-ليش هيج ردة فعلج قوية
-راح أخسره
-لا مراح تخسري ترديني احجيلج الصراحة
لو تزعلين
-احجيلي
-جان واضح يحبج وانتِ الف بالمية حاسة
ليش مابادلتي ذات المشاعر
-هو مثل …………
-لتكملين مو مثل فرقد ولا أخوج
هو يحبج
-بس آني ……
-انتِ ممتأكدة من مشاعرج واضح هالشي
-هوووو صديقي أحسه جزء مني
والله مااطيق أعيش يوم من دونه رااااح افقده
بسبب رفضي مو
-اذا فقدتي لهالسبب اذا هو جان مخلي صداقتكم
بكفة وموافقتج على مشاعره بكفة وحسب
معرفتي بي هو مو مصلحجي مستحيل يريدج
لمصلحة والأيام راح تثبت كلامي
-أحسة يداري مشاعرها وميحجي
ويايه بعد
-تردين اجاملج واحجي عالبنية
الحقيقة هايه لازم يداري مشاعرها
لأن متدري بعمق علاقتكم وأكيد راح تفهمها غلط
فهمتي عليه واهتمامه بزعلها ورضاها
من حقها لأن راح تكون زوجته
-تشوفيني أنانية بخصوصه
-جداً أنانية اذا انتِ متبادلي ذات
المشاعر ولا تحبي ليش
حتى تردي ميتزوج غِنى اكبحي مشاعرج
ناحيته سواء استوعبتي انج حبيتي بعد فوات
الأوان أو معتبرته صديقج المقرب
كبحي مشاعرج لترخصين مشاعرج حبيبتي
حضنتني وبقت تسولف ويايه
لساعتين تقريبا نمت بيومها يصادف يوم خميس
الصبح دگ تلفوني واني أبدل جانت رهام
-صباااح الخير ياگاطعة هيييج الينخطبن ينسن صديقاتهن
ضحكت وتحاول تعتذر
-والله متتخيلين الضغط النفسي عليه ذيج الأيام
-هذا صوت حمادة يمج
-اي البارحة بالليل وصلت اني
وأختي الجبيرة علمود الخطوبة
-اشوووفج الله عليج
-راح أمرلج اليوم العصر اريد فستان
خطوبة بسيط راح أعقد هنا
-كذااااابة
-والله فرصة لأن أيمن راح يسافر
ياخذله شهرين برة ردت كل شي يتم
بوجوده
سكتت واني افكر وين يسافر وأبد محجالي
-ها وين يسافر
-شعجبببب محجالج
-لا والله
-خاف يرزلني ولج
-رهام احجي شبيج
-طالعلة ورم صغير بالكلى وخايف منة راح
يسافر يشوفه بتركيا
نسيت رهام عالتلفون وسرحت بتفكيري
واخذني الخوف واني أتخيل أفقده
ودعتها وكملت لبسي وطلعت للدوام
الكل موجود حتى رشا صبحت عليهم
سيارته جانت واگفة بالباب يعني
جايين سوية اكيد بمكتب المدير
انتظرت اشوفه ماكو ساعة يلا
طلع بيدة أوراق وتكتات سفر
باوعلي وجهه مغيم وگوه صبح گامت رشا
ناحيته
-ها أيمن هسة ترجع للبيت ترتاح
لو تبقى هنا نطلع العصر للفساتين
-لا باقي هنا بس انتِ رجعي للبيت البنات جايات علمودج
-گلت انت تعبان اجي أساعدك
-لا الكل قايم بواجبه
تردين ارجعج هسه
-اييي يادوب الحگ اجهز شغلاتي
-تمام منتظرج بره
تقدملي ووجهه ميگصه السيف بيده التكتات والاوراق خلاهن گدامي
-خليلي هالشغلات بفايل مرتب
علما أرجع
-تمام أستاذ
انطبگت حواجبه بغضب وهمس يمي
-هييين
طلع وياها واني سويت اللي راده
التكتات جانت بأسمه وأسم واحد من اصدقاءه الموظفين اللي ويانه
بديت اشتغل لحد ساعة رجع بيده صواني
أثنين معجنات فطائر ومناقيش
باوعلهم
-گووومو سوو جاي وتعالو نتريگ
البنات سوون جاي بالغلاية وأجتمعو على
ميز واحد من الولد خلو الأكل وبدو يتريگون
اني مگمت بالي مو يمهم أساساً
نزلت راسي أشتغل حسيت بخياله فوگ
راسي دفع صحن بي قطعتين معجنات بالزعتر
والجبن وهو يعرف هاي مفضلاتي
وخله كوب الجاي بصفهن
رفعت راسي جانت عيونه عليه اكتسى ملامحه
البرود
-شكرا
دار وجهة يريد يروح
-أستاذ خلصت الملف اللي گلت
علي
مديته اله اخذه تمسكت بي
رفعلي حاجبه ماتحملت أبقى ساكتة
-مريض وراح تتركني وتروح وأنت زعلان
جاهدت حتى متنزل دموعي
بس خانتني نفسي الضعيفة وتداركتهن
بسرعة قبل لينزلن
هدأ ووجهة اكتسى الحزن عليه
وهو يگعد عالكرسي گبالي
-وليش دمعتج صايرة رخيصة ياااااغبية
-دمعتي مترخص بس للغالي
ضرب على گلبه وهو مبتسم
-اني طالع نص ساعة بنهاية الشارع واگف تلگيني
وهم عاندي حتى هاي ملامحج اگلبها
هزيت راسي تحرك مسلم عليهم
ورة نص ساعة استأذنت المدير وطلعت
واگف بنهاية الشارع بسيارته
صعدت وعيني علي بملابسه الأنيقة
التشيرت اللاكوست النيلي
والبنطرون البيجي والحذاء البيجي
ابتسملي
-متحرررررشة
ضحكت على كلمته اللي كل مرة يطلقها
من اباوعلة واعجب بلبسه
-طالع أخبووووول مو
-دبسسس وينك ووين التخبووول
-هم تعييييب الصفرة ترحيلي فدوة
-اي سوووده عليه جمالك يشرد البزون من السطح
يمشي ويدگدگ بأيدة عالستيرن ويغني
-هل عندك شك
باوعتلة صفح
-لا هوووو حلو ولا صوته زين ويغننننني
كمل ولا أهتملي
-قولي لي كيف سأنقذ نفسي
من أشواقي وأحزاني
قولي لي ماذا أفعل فيك
أنا في حالة إدمان
قولي لي ما الحلّ
فأشواقي وصلت لحدود الهذيان
كمل ودار وجهه
-شيررررريد أيمن الساهر
-ماعندج ذوق لج بابا أثنين متگدرين تعيبين
عليهم جمااااالي وكاظم الساهر
-يممممممه راااااااح يغمى عليه
خف علينة عيوووني يوزرسيف
-بروح اخوج متگولين شنو هذا الحلو الگاعد بصفي
ابتسمت اباوعله
-دبسسسس بس حلووو
-متحررررشة بووووليييس شررررطة
بقى يداهر بيه الى أن وگف على جهة
يباوعلي
-شبيج خايفة مابية شي
-ليش ماحجيتلي
-لأن أعرف دماغج الغبي راح يصورلج سوالف
وسيناريوهات
-احجيلي شصار
-رهاااام الفتانة الا اطيح حظها
-يعني جنت ناوي تروح وترجع واني ماادري
-اي والله گلت اخليها زعلانة علما أروح
وأرجع
باوعتلة وضربت جبيني
-يعني تخليني زعلانة شهرين سفرك
بدون متصالحني علمود مااعرف مريض
-تقريباً هيج الخطة بس دموعج غلبتني
ابتسمت بوجهة ورفعت ايدي بتهديد
مثل كل مرة
-يممممممة اخاف ارجوج
غمني وكمل كلامه
-والله كل شي ماكو مثل الشامة شحمية عالكلى
ولادية اساساً بس بمرور الوقت كبرت لذلك گالو نشيلها
اني ماعندي ثقة بجماعتنا هنا گلت أسافر هم راحة
وهم علاج
-احلف والله
-والله وعيونج بسيييطة
باوعتلة بنظرة تضحك وسويت نفسي تنفست
بعمق
-الحمد لله همزين سهلة والا بعد منو يضحكني
-بت عااااااااامر الحباب اضحكها مو اني المهرج
مال الخلفج
-هو صح أنت غثة ومزعج وشايب ودبس
بس تضحكني
-خلف الله عليج
مدلي اصبعه الصغير
-نتصالح غنيوة
-اكييييد
نقرت اصبعي بأصبعه ورجعنا نتحرك بهدوء بالسيارة
سألته
-وين الحفلة
-بقاعة ………
-تمام
سكتت وماحجيت شي أحس الموضوع شائك
مااگدر اناقشه بي رجعنا للدوام عصرية مرت عليه
رهام للشركة هو جابها وياها حمادة
افترينا لحد مالگت فستان يناسبها اما آني
فأخذت فستان طلعة بسيط أسود وكعب
رجعني للبيت وراح هو وياهم ثاني يوم من
الظهر بديت أجهز نفسي الفستان سادة عدل
مابي الا حزام جلد نازك لزمتني مُنى بسوالف
المراهقات خلتلي مكياج اني نفسي أنبهرت
بنفسي وأصرت اخلي حمرة حمرة
-ماااخلي انسي أستحي
-شوفي منا خلي بسيط وهناك خلي اللون
الأحمر
-دجيبي خل اخذه
اتصلت بالحجي اجه اخذني للمكان اللي گالو علي
وصلت أتصلت برهام ماكو اتصلت بي هوو
بسرعة فتح خط
-ها غنوة وصلتي
-اي بس ماكو رهام عبالي تطلعلي
-اني جايج
دقايق وصار گبالي ببدلة لونها نيلي
وقميص أبيض وشعر مرتب باوعلي
بأعجاب ورجع لطبيعته بثواني
-طالعة أنثى
-خلف الله عليك قابل شجنت قبل
-جنتي غني ضلعي
-دخلني عيوني عريسنا
اتصل برهام ماردت رجع اتصل بوحدة
من اخواته طلعتلنا سلمت ودخلتني وياها
لگيت رهام مشغولة ويا المنظمة مال الحفلة
بس شافتني اجتني گعدت يمها بدت الناس
تدخل وبدو مراسيم الحفلة جانت رشا حلوة
بفستان سمائي منفوش وترتيب وبين تلبيس
حلقات وهالسوالف رجع هو طلع يم الشباب
والحفلة بقت بس بنات باركتلهم وقبل لتغرب
الدنيا اجيت اطلع اجاني صوت رهام
-ولج اوگفي اخذي عشاج وعشا البنات اخواتج
اختهم الجبيرة مااستلطفتني أباوع لوجها قافل
من حجت رهام
-والله البنات طالعات وبمطعم هسه راح اروحلهن
اتعشى وياهن الف مبروك رهومة أن شاء الله اشوفج
عروووسة
-باجر اعقد تعاي عليج الله
-مااگدر والله عالعرس تلگيني حاضرة
طلعت تاركتهم بالباب اجاني اتصاله
-ها غنوة ترحين
-اي هاي طالعة
-منتظرج
-راح اخذ تكسي وين ماخذني ابقى ويا معازيمك
-انجبي
گالهة وغلق الخط
طلعت لگيته واگف صعدت باوعلي
-حمرة حمررررة بت الخوش رجال وتريد تاخذ
تكسي امشي بابا أمشي انتِ مخبلة
حرك السيارة
-مبروك يمناي بالرفاه والبنين والبنات
-وبعد
-شتريد بعد خشمك شگده
ضحك وهو يلزم خشمه
-ختم الجودة هذا اگلج غنيوة
-گول
-مو عبالج اخطب وأتزوج وراح تخرب
صداقتنا اني باقي مثل مااني خووووش
-خوش
-وبعد لتخلين مكياج طالعة تلعبين النفس
ضحكت علي
-يعني طالعة حلوة
-تشگين المطي
-حتى غزلك معووووق
احجي شي وتسمعني
-اسمعج
-أريدك تخلي ببالك اني ماراح ازعل اذا شوية تغيرت
ظروفك بعد الزواج هالشي من حقك وحق البنية
مهما كنت صديقتك تبقى هي زوجتك وكفتها ترجح
وحفاظك على مشاعرها حتى لو ضدي
مراح يقلل من قيمتك بنظري لكن راح يعليها تمام
-تمام وسم المن هالوصلة البكائية الحزينة
بالله
-طبعا انت ولا اگدرلك
-اي لساني بكته مثلج
هز ايدة وصلني للباب سلم وراح
نزلت تنفست براحة ميخالف لكل شي حدود
وحدود صداقتنا تنتهي ويا زواجه وهالشي من حقه
يومين بعدها خلصو عقد رهام ورجعو
للشمال ومناك طار
أيمن لتركيا كل يوم بالليل يتصل بية
لحد يوم العملية جانت عمليته الصبح
واني گلبي جان يغلي نار لحد ما بالليل
حاجاني وصوته طبيعي
-موووووتتني الحمد لله على سلامتك
-الله يسلمج ضلع
-شلونك بشرني
-والله احمد ربي ماسويت العملية ببغداد
-ليش اكو شي الله عليك قلقتني
-صراحة تطشر العرض
-يمممممممه شنو تطشر العرض شكوووو
-شوفي الواتساب بت عاااااامر لاحگتني حتى بتركيا
مافهمت شي لحد ماودعني وأجاني الفيديو عالواتساب
يهذي بأسمي ويغني ويلقي شعر صديقه
مصورة خليتله رياكت أضحكني عالفيديو
دزلي رسالة
-ضحكي الاتراك والامة العربية كلها عرفت أسمج
-من جمااااالي ودلالي تذكرتني بالبنج
-بحلگي كلمة اذا حجيتها صدگ يتطشر العرض
رووووحي قرررررردة
-الحمد لله على سلامتك يمناي
دزلي رياكت قرد وراح
داومت ورجعت رشا لدوامها وشگد
جانت مكروها صارت الضعف شايفة حالها
ومتتحاجه وهاي صباح الخير متگولها من حقارتها
گامت تتأمر بالشغل عبالك هي المدير
أسمع مرات اتصالها بي احس بشعور
مو حلو بس بعدين عودت نفسي
حقهه وحقه خطيبته
وقبل رجوع أيمن السفر بخمس أيام
گاعد أشتغل حجوزات اجتني بيدهة قائمة
شمرتها شمر عالمكتب
-شغلج كلة خطأ
-وين الخطأ بالله
أشرتلي بخط إحمر عالملفات وخربتها
ولازم اعيد طباعة كل شي
-كل شي مضبوووط ماكو خطأ
أشرتلي عالاوراق
-الشغل شغل لا عبالج كل شي يمشي
بالشفقة والأحسان هناااااا مكتب سفر
مو حي التنك ياحلووووة حتى بكيفج تخربطين
صفنت بوجها وحسيت گلبي صار قطع وتفتت
حاجيلها عني وعن عيشتي
استرجعت نفسي ورديتها
-حي التنك اللي معاجبج سواني مهندسة
تقربت شاورتني
-لا حبي فتات الاكل والفلوس اللي
تصدق بيها عليج أيمن هي الوصلتج
الكلمة حسيتها خنجر دخل جسمي ومزقني
تمزيق رفعت راسي ألها ورديت
-كل شي سوا الأستاذ راح يرجعله أن شاء
الله
-نشوووف بالله وأهم شي تدبرون نفسكم
البيت نريده بيت أختي راح نتزوج بي
تركت الملفات عالميز وطلعت للمدير
دگيت الباب سمحلي بالدخول
-أستاذ حابة أودعكم لگيت شغل
جديد أقرب للبيت تعرف مرات أتأخر للخمسة
يلة اوصل البيت وصار اسبوع مستحية اگلك
-بس انت موظفة كفوءة غِنى منريد نخسرج
-ظرفي ميسمح أستاذ اذا اكو عليه مبلغ
او شي گلي
-لا بالعكس احنه نهاية شهر راتبج لازم تاخذي
طلع فلوس من المجر حسبهن
-هذا راتبج بس أيمن راح يعاتبني وخصوصاً
هو موصيني بيج
-ارجو أنك متبلغه بأستقالتي اكون ممنونتلك
ودعته وطلعت شگد ماايمن غالي بس كرامتي
أغلى شلون حاجيلها كل تفصيلة عني
حتى مساعدته اليه وهو اللي عرضها
جنت اذا اطلب مساعدة فمساعدة معنوية مو اكثر
طلعت للبيت لگيت مُنى تنظف ومتصلة بصديقتها
قمر لزمت التلفون أتصلت بصِبى
-ها غناوي
-ها صِبى راح اجمع ملابسنا واغراضنا نطلع
من البيت
-صاير شي
-يريد يتزوج بي أيمن ويستحي يگول
خطيبته گلتلي
-وين نلگه مكان بهالسرعة
-سألي الأستاذ بلكي يعرف مكان
-روحي واني شوية وأرجعلج
سدت الخط و مُنى واگفة تباوعلي
أحس بعيوني نااااار تطلع باوعتلي مبتسمة
ووگعت دموعي
-كسرو گلبج مو
هزيت راسي وحضنتني باوعتلي
ورة شويه
-اني من أطلع للأسواق شفت بالركن مكتوب مشتمل للأيجار مساحتة ٦٠ متر أكيد سعره مناسب
-كومي نجيب الرقم
تمشينة للركن جبنة الرقم عاللافتة واتصلت
اجاني صوت أنثوي حلو
-الوووو تفضلو
-عيوني عارضين مشتمل للأيجار
-اي حبيبتي
-بيش تردو
-هو حيل صغير غرفة نوم
ومطبخ صغير وهول
-عادي احنه ثلث نفرات
بيش تردو
-ميتين وخمسين
-تمام عادي نشوفه
-شوكت متحبين
-هسه
-هلا بيكم بس دگو الباب مالته تلگوني
رجعت لبست حجابي اني و مُنى ورحنا
طلعتلنا وحدة بالثلاثينات تخبببببل بالمعنى
الحرفي للكلمة حلوة حلوة بشعر كاري مميش بلاتيني
وبياض ناصع وعيون صفر وثوب قصير مدلع
-هلا هلا حبيباتي آني سومة
-اهلا وسهلا اني غِنى وهايه
مُنى
-بوحدكم
-اختنا الجبيرة بالدوام
-ياعيوني وحيدات
-الحمد لله شنسوي
-اني هم وحيدة تعالو تعالو
المشتمل نظيييف وبناءه حديث ومرتب وكافي
النا ودعتها منا لباجر بأمل ان تجي ويانة صِبى
تشوفه
رجعت للبيت تلفوني هناك لگيت
اتصال من أيمن
رديت اتصلت
-ها غنووووة شو غايبة اليوم لا اتصال لا رسالة
-لا والله ماكو شي بس تعبانة
-مارحتي للدوام اخلي واحد من الولد يجيبلج
الراتب خاف محتاجته
-لا لا اخذته يمتى راجع
-باجر لأن حمادة گلب الدنيا يم
بيت جده راح ارجع ابقى يومين أرتاح
واطير للشمال الشغل تراكم
-ترجع بالسلامة يارب
ودعته وأحس هذا گلبي شگد يعزه
بس شايل منه شلون باع سري لرشا
وخلاني علج بلسانها جنت اتغاضى
عن النظرات والضحك والهمسات بينها
وبين صديقاتها طلعت تضحك عليه
اجت صِبى من الدوام وبقت تستفسر مني
الى أن انفجرت باجية حجيتلها كل شي
ابد مناقشتني
-شبينة قابل صغار القاصة اللي جنه نجمع بيها
نفتحها ندفعها لأيمن ماقصر طول هالفترة
والراتب ٦٥٠ كافينا وزيادة ميتين وخمسين
آجار ٣٠ نت و٥٠ سحب والله كافي وزيادة
-اني راح ادور شغل مااگعد
-ارتاحي هالفترة وجهج أصفر شبيج بسرعة
تخربطتي گتلج مدام صارت زوجته يحجيلها او
يفضفضلها عادي بس هو مو قاصد اهانتج هي
تعمدت تستخدم كلامه ضدج حتى تطلعج من حياته
-اني ماعندي مشكلة لو گايلي طلعو من البيت
بس مشكلتي وياها شلون أسلوب متدني
مگدرت اتعارك حتى مااشوه صورتي گدام زملائي
-لتفكرين بس منطلع هسه
يرادلنا عالاقل شهر نشتري غراض
ترة ماعدنا شي غير ملابسنا
-مااااريد ابقى هنا
-شبيج قابل واگفيلنا بالباب هو مو گال
عالسنة الجديدة نتزوج
يعني ٢٠١٩ بعد كووووومه
قنعتني صِبى وبلغت سومة ان راح ننتقل يمها
الشهر الجاي وافقت بعد ماسلمناها ايجار شهرين
مقدم
گعدت من الشغل وأحس روحي مالي أي
فائدة لذلك شمرت نفسي بهاليومين على شغل البيت
وبيوم رجعة أيمن من الصبح واگفة أغسل بالگراج
واندگت الجرس فتحتة صارت بوجهي رشا
وياهة اخت ايمن الجبيرة اللي عايشة ببغداد
يادوب گالت السلام عليكم
يوم جمعة و صِبى موجودة دخلن للگراج
اشرتلهم
-تفضلووو
طلعت صِبى سلمت بدون متعرفهم
-تفضلوو
اختة ردت
-البيت بيتنا ليش منتفضل
صفنت بوجها صِبى ابتسمت اني
-صِبى هاي أخت أستاذ أيمن الجبيرة
وهايه خطيبته
-اي اهلا وسهلا
-عيوني اني مااعرفكم ولا عندي شي
وياكم بس البيت اذا تگدرون تفرغو
ورشا گالت لأختج قبل كم يوم
-اي نعم واحنا جاي نفرغه ضرف اسبوعين ننتقل أن
شاء الله
-لا حبيبتي أسبوعين شنوو
حجت رشا
-أيمن مستعجل عالزواج واني اريد اغير ديكورات
البيت
-أن شاء الله اسبوعين وتستلمو مثل الورد
باوعت رشا لأخت أيمن وحجت بعصبية
-شووووفي حاسبين الملك ملكهم يعني
بالبيت وبالشغل صايرة غِنى هي ام الأنا
وهي تحجي رج تلفوني اللي مخليتة بجيبي
اباوع أيمن
رفضتة رجع اتصل رفضته وهم اتصل ويا ارتفاع صوت
رشا فتحت الخط ارد
-وييينج
-بالشغل
-اني بالشغل شعندج مستقيييييييلة غِنى
اريد ارد ارتفع صوت رشا
-والله ماكو الا يومين البيت يفرررررغ وكافي
جداااااوة مجدايات صار عمر يصرف عليكم
خفت حدة صوت أيمن وهو يستمع
اخته ردت
-اني اعتذر عن كلام رشا بس هو مقصر نقلكم نقلة نوعية
وحان الوقت يرجع البيت حتى يستقر ويتزوج
ردت رشا
-مگايلة شي غلط آني حتى تعتذرين
هوووو أيمن حجالي كل شي من حي التنك
للبيت للوظيفة يعني ممقصر وكافي أستغلال وطمع
ردت صِبى
-كلام خطيبة اخوج راجعلها وهاي اخلاقها هي
كل شي موجود حتى فلوس آجار السنة هاية كاملة
ردت رشا
-افتهمنا طلعو بعد من البيت
-كلامي مو وياج كلامي ويا اخت أبو حمادة
ان شاء الله باجر تلگون البيت فارغ والمفتاح عالحايط
وهسة مشكورين عالموقف هذا الله وياكم
اشرتلهن صِبى اخته جانت خايفة يمكن حست
بغلطها ورشا توزع نظراتها النارية علينا
التلفون بيدي وهو يسمع اسمع صوتة يصيح
-غِنى ردي شووو افتهم
-فلوس ايجار مال السنة تلگاهن بكنتور حمادةمخليهن بقاصة
-شجاي تحجين جايج آني هسه
-لا لتجي مراح تلگاني
-شبييييج غِنى وروح امي مااعرف بيهم جايين
-اني ممتنة الك على كل شي رغم الطعنة اللي وجهتها الية بدون مااحس
قبل ليرد غلقته بسرعة وانهاريت لأول
مرة گدام أخواتي
-حاجيلها كل شي عنة شلون ساعدني
من سنوات كل شي كل شي تعرف شلون
هيج سووووه اذا ناوي يخليني بحلگ الرايح
والجاي
حضنتني صِبى
-ملابسنا الشتائية ملمومة بالجنط
يلة بسرعة ملابسجن الصيفية خلال ربع ساعة
تنجمع والمطبخ مابي غير سيت مواعين وكم جدر
راح اجمعهن بالسلال
ساعة الا شويه كل غراضنا بره صاحت صِبى لأبن
الجوارين عندة تكسي نقلهن كلهن فرغت الثلاجة والمجمدة بعلاليگ كبار واجت وياه الولد بالتكسي
قفلت البيت رغم باقيتلنا بي نواعم
بس اني اعرف صِبى اشترت كرامتي وكسرة
گلبي بهالانتقالة اخذت تلفوني واتصلت بأيمن
فاتحة السبيكر
-غِنى جاي اني والله دخلت الشارع تأخرت جنت منتظرهن حتى أعرف شجابهن الكم
-الو ابو حمادة اني صِبى
-ها خوية شلونج امسحي اللي صار بلحيتي
والله مراح يمر مرور الكرام
-اريد اگلك انك صرت اخ بوقت العوزة وماقصرت
والله البيت فرغ بعد
-خرررررب ببليسكم شنو فرغ يمتى وليششش
-ميخالف بعد اختك البنات عدهن حق البيت بيتكم
بس والله اني و غِنى جمعنا جزء جبير من ايجار بقاصة
موجودة بالكنتور الصغير واعذرنا اذا المبلغ قليل
-صِبى رحمة لموتاج انطنياها
مدتلي التلفون-غِنى تسمعيني
ارتفعت الشهگة لبلعومي وگوه رديت. -ليش
-بس فهميني غِنى اسمعيني
-ليش حاجيلها عني ليش
منطيها سري اللي امنتك علي
-لج لتخبليني مااااحاجي شي
-ليش كل أسرار فقري ولوعتي بحياتي بذيج المنطقة يمها
وگفتلي زوجتك حجت كل شي بالتفصيل وانت سمعتها
بس ميخالف اني سعيدة بأن الأيام بينتلي
أن مشاعري جان لازم تبقى مدفونة
ناحيتك جنت بداخلي أحس بنقص
وخوف وترقب اني بيوم راح اتعير
بوضعي القديم بس متوقعت بهالسرعة
-والله مافاهم شي غِنى ليييييش انتِ دفنتي
مشاعرج بظنج اني اعيرج بالفقر
-لا بس بعت سري وطلع توقعي صح
احنه من عالمين مختلفين وجنت متوقعة بيوم
اتعرض لهيج موقف
-وينج ويييين رحتي
-تعرف شنو أيمن
-والله يا غِنى اذا مارديتي انت وين بس الگاج
حسابج يمي راح يكون عسير
- تعرف أيمن أكتشفت أنك أنتَ كسرتي الجبيرةاللي راح تغيرني
غلقت الخط وغلقت ويا كل
ذكرى حلوة قديمة بينة ناسية
بيهة ان المشاعر المدفونة مثل جمرة
النار تختفي خلف الرماد منتظرة
نسمة هوا عابرة تعيد أشعالها من جديد
شكرا لزيارتكم عالم روايات سكيرهوم
