رواية جذبني فمك البني الفصل السادس عشر 16 بقلم عبير إدريس

لو كان أحد غيرك ربما لم حزنت بهذا القدر، دائماً تأتيني هواجسي، تأتي لتأَرق منامي، أحس أحياناً أنني مجرد جسد حاولت روحه الخروج لكنه يأبى أن يتركها تفارقه، متشبث بها رغم علمه أنّه لا نفع من ذلك، آمنت بالله الواحد الأحد.

أعلم بأنّكِ لن تكلميني، أعلم أنّك لن تأتيني، لكني أتمنى من كل قلبي أن تعود اللحظات ولو لساعة فقط، لدقائق، لثوانٍ قليلة، لأقول لك أحبك وبعدها فارقيني..

لا أدري بما أعزي به نفسي.

يا ترى إن خرجت من هذا العالم هل سألتقي بكِ؟

يا لهذا العالم، ويا لهذه الدنيا،

لحظات وانقطعت كل صلة لكِ بهذا العالم، أدعو الله أن تكوني مِن أهلِ الجنة ياحبيبتي..

_____________

سيلين : شنو شبيهة عمه..

رفع كتفه وايده ليفوك كال.

ادهم : مدري ..

كمت ركضت عليها كلبتها متتحرك شلت ايدها توكع خليت راسي على صدرها اسمع دكات كلبها هدوء كلشي ماكو رفعت عيني عليه لكيته واكف بالباب ويباوعلي وجها احمر دم ودمرات راسه كلها بارزه ..

سيلين : عمو عمه راحت..

حجيتها وعطتتتت بعلو صوتي..

سيلين : عمه ماتتتتتتتت..ماتتتتت

اجه يمي يركض مد ايده ترجف يريد يسد حلكي ميعرف شيسوي بعد حجه بصوت يرجف ونضرات عينه تفتر عليه وعلى عمه البؤبؤ مالته يتحرك بصوره عشوائيه..

ادهم : اش اش لتفززيها لتفززيها تخاف صوتج عالي تره بعدها نايمه..

هو هيج كال لو فتح جروح بكلبي مدري ابجي على حاله مدري ابجي على عمتي الراحت بعز شبابها لو ابجي على نفسي الضاعت من بعدها اليوم تيتمت مره ثانيه اليوم بابا مات اليوم مو ذاك اليوم ، من مات جان عندي سند عندي ظهر احتمي بيه عندي ام تسمعلي تحتويني تنصحني هسه وينها هياتها كدامي متمدده راحت.مني راحت..

كمت اصفك ايد بيد واصيح...

سيلين : ولج عمممممممه كومي المن عفتينه المن كومي لبنات اخوج ضاعن..

جان نايم على صدرها ويختض بالبجي من سمعني اعيط كام وجها مبلل بدموعه..

نتر

ادهم : مو كتلج سكتي لتصيحين يم راسها شبيج انتي ..

سيلين : انت شبيك تره ماتت هاهيه كوم منها كافي عاد.

ادهم : ما ماتت جذابه ياسة متموت ياسه عايشه بروحي انتي شجاي تخربطين..

عفته وكمت ردت اروح على ايفين اكعدها لكيتها واكفه بالباب وبصفها مريم تفرك بعينهة وتباوع ثنينهن مصدومات بالمنظر الكدامهن..

حضنت اختي وثنينه بجينه..

سيلين : راحت ولج راحت..

ايفين : ضعنه هاهيه ..

سيلين : لج اي ضعنه والله ضعنه.

ابجي بصوت عالي وانحب كام عمو دفعنه وسد الباب ضل بس هو وياها ، لطمت على وجهي وعلى صدري لحد ما كلت بس كعدت بالكاع وارتاجيت على باب غرفتهم سمعته يحجي وياها ..

ادهم : قصرت وياج هواي وميت قهر لا لحكت اعوضج مالحكت حتى افرحج ماسمعتج ما لحكت اتعرف عليج ماعشت وياج اقل السنه ياستي وتالي تعوفيني والله لو يرجع بيه الوكت اعوف الدراسه واعوف مستقبلي طز بيه ،،،

والله ردت أأمن مستقبلكم ردت تعيشون حياه كريمه ، تعبتي ورايه وتحملتي اهلي وتحملتي اشكال الضيم حجالي ايمن حجالي كلشي بس والله مكدرت ابقيج من عرفت خابرته يدورلج بيت بغداد بالمدينه الجان عاجبج تزوريها شكد وعدتج افرج بيها واطلعج يوميه مالحكت ، طلعتج بس للمستشفيات ، كليلي شلون راح انام ليلي شلون راح اربي بنتي وحدي شلووون لتعوفيني عفيه كومي كومي الله يخليج..

اخر شي كام يبجي صوت شهكاته ترن بأذني ويصيح بعلو صوته..

ادهم : ما تهنيتي بيتج ماتهنيتي كلشي مشفتي .

كلت بكلبي عمه كلشي مشافت من الصبر للكبر ...

اخر شي سمعته يحجي بالتيلفون.

ادهم : جيب اخوك وخواتك وامي وتعالو ظهري انكسر .

حجاها وبجه ..

دكيت الباب فتحتها وطبيت شمرت نفسي على عمه وابجي وهو يبجي اجتي مريم كامت تصرخ بصوت عالي ..

مريم : ماما اريد ماما

انتبه ابوها شالها وطلع بيها بره ضليت حاضنتها بارده ثلج مبينه ميته صار هواي مو مال هسه اني عفتهة ساعه عشره جانت نايمه مابيها شي تتنفس..

سيلين : اخ يانار كلبي شيصبرني على فراكج يالحنينه.

من بعد بجي ونحيب فات عمو حجه بصوت بالكوه سمعته..

ادهم : كومو يم مريم داخذ عمتكم اوديها للمستشفى ..

من سمعنه يريد يطلعها من البيت ثنينه جلبنه بيهة اني وايفين ونبجي..

سيلين : متاخذها متطلعها منا هاي عمتي متاخذها..

كمت اردد بهالكلمتين مثل المخبله ..

سحبني من ايدي وصاح..

ادهم : تبعااااان انه تعباااان مو حمل هم جديد كومي عني ..

كمت وامسح بدموعي عاط بعلو صوته بس مبحوح..

ادهم : طلعووووووو بره عاد فضوني..

طلعنه وافتر بالبيت شلون موقف وحدنه هسه لو اكو واحد ويانه سمعت صوت موبايلي يدك رحت لكيته ايمن.جاوبته وعطت.

سيلين : ولك وين رحت وعفتنه وين..

ماكو صوت بس صوت البجي مالته..

سيلين : شكد سألت عليك كالت مشتاقتله ..

مجاوبني زاد البجي مالته وسده ..

كعدت بالكاع والطم على راسي ملخت شعري وحتى ثوبي شكيته كوه لزمتني ايفين و نزعتني ولبستني غير دشداشه..

ماكو نص ساعه مرت اقل وسمعت صوت بره الغرفه فتحت الباب طلعت اركض لكيته واكف

مخبوص ميعرف شيسوي يطب للغرفه ويطلع للهول.

سيلين : شكو ؟؟

ادهم : خابرت الاسعاف واجوي وماريد انطيها شلون..

حجاها وخله ايده على وجها وبجه جسمه كام يهتز..

والجرس احترك كل شويه داكيه ..

اخر شي طلع فتح الباب دخلو ثنين وياه مخلاهم يتقربون منها دخلت للغرفه لكيته مبدل الها حتى حجاب ملبسها ، بجيت بحركه خليت ايدي على حلكي واردد..

سيلين : الله يساعد كلبك شلون تحملت تبدل الها وتعرف وين راح ياخذوها..

موقف بشع مؤلم ، شالها وطلع والرياجيل اهل الاسعاف طلعو وراه وراحو سدينه باب الشارع وطبينه جوه ، كل شويه ابجي والطم ومن اشوف مريم تبجي وخايفه اكوم يمها احضنها واسكت كوه لازمه نفسي علمود الطفله لو بيدي املخ روحي وراها بس شيفيد..

انتضرنه لا ساعه ولا ساعتين للعشره الصبح يلا اندك الباب كمت اركض عبالي عمو ادهم فتحته دخلو عمامي ونسوانهم و ولدهم وبناتهم كلهم اجوي ، حضنونه وبجو كلت بكلبي وينكم من تمرضت اجيتو حالكم حال الغربه مرتين مدري تلاثه ودرتو وجهكم ورحتو ، اجتي زوجه عمي صلاح حضنتني وبجت ..

عرفت تبجي لان راح نرجع وياهم متبجي مقهوره على عمه..

استغربت اهل ادهم شعجب مبينو لحد الان ...

صارت ال ١١ دخلن نسوان جنه كاعدين بالهول ، رفعت عيني ام ادهم وخواته ، ام ادهم افترت على نسوان عمامي اخذت من خاطرهن وصلت الي حضنتني وكامت تنعى ..

اجتي نرمان اخت ادهم الكبيره حضنتني وشاورتني ..

نرمان : ادهم يكول خل تقفل غرفه المكتب وغرفه النوم لان فلوسه بيهن وذهب عمتج هم ...

سيلين : ليش وين شفتو ..

نرمان : جنه بالمستشفى وهسه راحو للمغيسل وراها يرحون يدفنوها...

من هيج كالت هيجت شكو جرح بكلبي كمت ابجي واضرب على وجهي الكل بجه على بجيتي..

تعبت ردت اوكع على وجهي كمت ما اتوازن ماعرف منو لزمني وسندني كعدوني وجابولي مي ، ضليت افر بعيوني على الوجوه وين اروح منو بيكم يتحملني اني واختي شراح تسووون بينه من بعدها ...

اجه عمي صلاح وبلغنه الجادر نصبوه بالباب واعتبروه اليوم اول يوم صارت ساعه اربعه اجتي المله والرياجيل بالباب ..

عزه عمتي مكسور كلها تسولف وعادي بس اني كلبي محروك وحاضنه اختي منا ومريم منا ونبجي عليها الباقين جايين تأديه واجب وبس...

بليل كلش صارت تقريب ساعه ١١ ونص الكل نام لان جايين من طريق طويل الرياجيل فرشنه الهم بالاستقبال والنسوان قسم بالهول وقسم بغرفتنه وغرفه مريم..وغرفه عمه والمكتب قفلتهن ونطيت المفتاح لنرمان..

طفيت ضوه الحديقه و ضوه الكمر يخبل كعدت ابجي بهدوء وعيني على الباب انتظر جيته ..

ماعدنه غيره بالدنيا هو الضال من ريحه عمتي ، هنا احساسي كله عباره عن حب بنت لابوها او اخوها هيج حبيته حتى كمت اشتاقله واحب احجي وياه احب اسولفله همي وينصحني ..

كمت انود بجسمي اروح وارجع بالكرسي ، سمعت صوت باب انسد التفتت على جهة بيت ايمن نزل واحد ممبين منو درت وجهي على باب الشارع وايدي على خدي انتظره ...

حسيت واحد كعد بصفي من التفت فهد باوعتله ودرت وجهي ليكدام.

همس..

فهد : شلونك سيلين ؟ بقيه بحياتج..

محجيت ضليت ساكته ..

فهد : ليش كاعده وحدج هنا كومي نامي باجر يرادلج وكفه من الصبح لان غده راح يسووون ..

مجاوبته .

فهد : مو وياج ؟

التفتت عليه ..

سيلين : شتريد مني عفيه روح نام معليك بيه..

فهد : شبيه صوتج منشولة؟

سيلين : هئ ( لا )..

فهد : ليش كاعده هنا مجاوبتيني..

همست

سيلين : انتظره.

فهد : منو قصدج؟

سيلين : عمو .

فهد : ميرجع اليوم يبات بالنجف..

اختنكت وحسيت الحراره صعدت براسي كلبي انعصر دكاته كامت تخربط هو انتبه عليه وضعي مو طبيعي كال..

فهد : شبيج يمعوده عيونج انكلبت ليفوك سيلين سيلين ..

اخر حروف اسمي سمعتها متقطعه وغبت عن الوعي بعد محسيت لحد ما غركوني بالمي كعدت لكيت نرمان وفهد واكفين فوك راسي..

نرمان: بيج شي حبيبتي شنو تحسين؟

ساكته واباوع بعيونهم..

تخصر فهد وجاوبها.

فهد : تلكيها ما ماكله شي..

نرمان : اسويلج اكل تاكلين ..

هزيت راسي ب لا..

نرمان : شعندج كاعده وحدج كومي نامي تعبتي اليوم..

سيلين : عوفيني عفيه.

فهد : كتلج ميرجع اليوم وجوز باجر هم يضل هناك تنتظريه لباجر...

التفتت عليه اخته وسألته.

نرمان : المن تقصد ؟

فهد : ادهم..

باوعتلي مستغربه حقها جوز فكرت غير تفكير غير اللي اني حاسته..

نرمان : كومي عيني نامي ارتاحي وادعيله الله يصبره خابرنه ايمن يكول نايم على القبر ميقبل يكوم..

فهد: لا هسه اخذه للأمام هناك يباتون.

نرمان : اي احسن الله يساعده اني راح اصعد انام اذا ردت شي صيحني.

فهد : لا ما احتاج شي روحي ..

راحت واجه كعد ..

فهد : شتحسين هسه..

سيلين : مشاعر متلخبطه نفسي مفجوعه ب اعز انسانه على كلبي ، حاسه بضياع من مات بابا محسيته ، حسيت بيتم الام ..

فهد : صدك امج وين انه اتذكرها جانت زينه بحيلها يعني مو مال تموت.

سيلين : لا ماتت.

فهد : ها الى رحمه الله..

سكتت وهو هم سكت طلع ضوه الفجر كام يتثاوب..

فهد : راح انام انتي هم كوم

ي ناميلج فد ساعه وعمج تره ميجي ايسي منه..

كام وراح صعد لبيت ايمن واني ضليت على كعدتي صار صوت داخل البيت كمت من مكاني عرفت بيهم كعدو طبيت وفعلا لكيتهن كاعدات كلهن رحت لغرفه مريم لكيتها نايمه بحضن ايفين سديت الباب رحت للحمام جان مشغول انتضرت يطلعون علمود ادخل ، تجيت راسي على الحايط وعيوني بالكاع واتذكر كلمه كلمه حجتها كل نصيحه وكل شغله علمتني عليها تجي ابالي كل شويه و اتذكر موقف ودموعي تنزل انفتح باب الحمام رفعت راسي زاكروز شافني ارتد ليوره ماعرف انصدم او مجان متوقع يشوفني ...دنك وراح للمغسله غسل ايده ونشفها ردت افوت همس..

زاكروز : بقيه بحياتج ..

سيلين : حياتك الباقيه.

حجيتها وعيني بالكاع ورحت فتت للحمام تقصدت اتأخر علمود يروح وماشوفه بعد ، بس للأسف من طلعت لكيته منتضرني ، غسلت ايدي وعفته وفتت للمطبخ اجه ورايه..

زاكروز : شلونج سيلين..

نترت بيه..

سيلين : بنص الخير ..

زاكروز : ليش عصبيه؟

التفتت عليه وخصرت ايدي.

سيلين : تره عمتك الميته مو بس عمتي.

خزرته ودرت وجهي.

زاكروز : الله يرحمها ارتاحت..

سيلين : اعرف ارتاحت بس تستاهل واحد يحزن عليها..

زاكروز : صح ، ردت احجي وياج بموضوع بس يمكن تحسيه مو وكته.

سيلين : اي عفيه عليك كلش مو وكت مواضيع ولا بيه حيل احجي اصلا..

زاركوز : ماشي براحتج..

عفته وطلعت رحت لغرفتنه لكيت مكاني فارغ مددت بيه .كلهم غربه كلهم ماعندي احد بعد عمه غير بس عمو ادهم ، بس هو راح يحافظ علينه بس ويم الكاه ومنين اجيبه ومنو يكول احنه اباله اصلا..

ضليت ابجي عبالك طفله عمرها خمس سنوات وامها توها ماتت والبنيه ضاعت متعرف راسها من رجليها ، تراكمت الافكار بدماغي وكامت تتلاطم ..

اخر شي تعبت وغفيت دقايق وكعدوني وبلش الشغل ، احنه اهل العزا واحنه نشيل الناس ونخدم وين صايره هاي ..مابيه حيل والله مابيه.

اشتغل وايدي ترجف كل شويه يوكع شي من ايدي اخر شي نرمان جرتني وهمست بأذني .

نرمان : روحي ناميلج ساعه تره توكعين شوفي جسمج كله يرتعش اعصابج تعبانه ليش تعاندين..

هزيت راسي ب اي ورحت لغرفتي جانن بنات ثنين يمكن اخوات ادهم اتذكرهن درت وجهي على الحايط تغطيت ونمت ، ما حسيت اله على صوت المله تنعى كمت من فراشي وركض للهول ، دخلت والطم وابجي بالنص كابلتني ام ادهم وخواته الكبار وزوجه عمي محمود شويه جانت زينه ويانه يعني مسالمه معليها بأحد..

طلعوني من النص وكعدوني على صفحه ، صاحو وين نرمان فهد يريدها ..

كامت طلعت وكفت وره باب الهول ورحت وكفت وراها اريد اعرف شكو ..

نرمان : ها جبتوه ..

فهد : معاند ميقبل يرجع وايمن حار شلون يقنعه وميقبل..

نرمان : عيني خابره الناس من تجي غير تسأل عليه هذا شلون بيه راح يكسر عزة مرته..

سمعت هيج متت قهر على عمه يعني حتى عزاها راح ينكسر رحت لغرفتي وخابرته يدك يدك محد يجاوب اخر شي جاوبني ايمن.

ايمن : ها سيلين ..

سيلين : وين عمو يمك.

ايمن : هياته نايم على الكبر .

سيلين : انطينياه احاجيه.

ايمن : شتحجين وياه فاصل اصلا ..

سيلين: معليك انت افتح سبيكر وخليه يمه..

ايمن: ماشي يلا فتحت احجي..

سيلين : عمو وين رحت واليوم ثاني يوم فاتحة العزيزه تدري وحدي هنا انحب وابجي عليها عزاها مكسور تريد انت هم تكسر عزاها تعرف كلش زين محد يحبها ومحد يبجي عليها غيرنه اني وياك ارجع واوكف بعزاها الناس اكلت وجهنا تسأل عليك.

ايمن : روحي هسه بعدين اخابرج هذا مدري شبيه يمكن تخربط كام يتقيء..

سديته وضليت اروح وارجع بالغرفه .

بليل كلش هم طلعت بره كعدت صارت ساعه وحده انفتح الباب فات ايمن وساند عمو ادهم ، صفت عليه ودموعي تنزل شصاير بيه ملابسه كلها تراب وشعره اشعث ولحيته كلها مغبره وشاد راسه بغتره ومبهذله طالع شعره منها ..

صعده ايمن فوك بالكوه يصعد حيله مهدود ، اسمع صوته فوك يصيح على ايمن بس ماعرف شنو يكول لان بعيد..

ثاني يوم صارت ساعه بالاربعه نزل وطلع كبل بالجادر والدنيا انكلبت بالثالث مدري منين كامو يجون حتى جوارين اجوي نسوان ماعرفهم ، لان طيبه هيج صار الثالث مالتها عكس اول يومين بارد عزاها و بيومها كلش تعبت حتى صوتي اختفى ..

بليل سمعت صوت بالطرمه البنات وام ادهم وابوه يحجون وياه وهو معاند يريد يرجع للنجف ، عاد فهد كللهم اني اخذه واني ارجعه عوفوه براحته ، اخذه وطلعو ..

رابع يوم الكل راح ضلو بس اهل ادهم وبيت عمي صلاح وبيت عمي محمود ...

جنت كاعده بالمطبخ اسوي لفات لمريم واوكلها لان هملتها ب اخر ايام تركتها على ايفين ، قررت لخاطر عمه اخليها بعيني واقوم بواجبها على اتم وجه مثل ما جانت مراعيه الله بينه..

سيلين : اكلي حبيبتي..

مريم : اريد ماما.

سيلين : راحت تضرب ابره وتجي .

مريم : صار هواي ايام ماكو خاف نامت بغرفتهة فتحي الباب اشوفها..

اختنكت بعبرتي بله شجاوبها هسه.

سيلين : حبيبتي والله بابا يمها لتخافين.

اول مره احلف بس اريد اقنعها ..

مريم : ليش ما اخذني يمها.

سيلين : مستشفى تمرض ميصير ياخذون جهال ممنوع.

م

ريم: يضربون ابره.

سيلين : اي .

مريم : خطيه ماما شكد ضربوها ابره.

شكته لكلبي بجيت متحملت اكثر ، فات زاكروز جر كرسي وكعد ضل يسولف ويه مريم لحد مكامت طلعت من المطبخ .

زاركوز : يلا كومي حضري ملابسج..

سيلين : وين ؟

زاكروز : ترجعين ويانه..

سيلين : كل عقلك ؟

زاكروز: لا نص عقلي خاف تردين تبقين هنا ويه رجال غريب..

من كال هيج صحاني على زماني صدك رجال غريب شلون اضل يمه ..

سيلين : نروح بيت عمو محمود منجي يمكم.

راكروز : اذا علمود خطوبتي تره فسخت ..

سيلين : شسويلك يعين واذا فسخت..

زاكروز : علمودج عفتها مكدرت ابلعها.

سيلين : اي عادي عدكم بنات الناس لعبه تخطب وتسوي علاقات وتتونس وياها بأسم العقد الشرعي ومرتي وكذا وبعدين تعوفها ..

زاكروز : كتلج علمودج شبيج متفهمين.

سيلين : يسلم مودك عيني.

عفته وكمت وصلت لباب المطبخ صاح..

زاكروز : سيلين خلي ابالج انتي الي.

سيلين : تراب عمتك بعده اخضر عيب تسولف بسوالف اعراس وافراح وحبجيات ولتنسه انت كاعد ابيتها ..

كام وكف كبالي وسد باب المطبخ وارتاج بظهره عليه.

سيلين : افتح الباب لتسويلي حجايه..

زاكروز : ما افتحها اذا مترديلي جواب هسه.

سيلين : يا جواب شبيك انت داكلك لو يصبوك ذهب ماريدك بعد..

بهاي حجايتي تقرب مني واخذ شفتي باسها بقوه اريد اوخره ما اكدر متشبث بيه بكل قوته دفعته وعطت بيه وماعرف شغلطت رحت للسنك فتحت البوري غسلت حلكي رفعت عيني جان الشباك مفتوح واشوف اخت ادهم الوسطانيه تباوعلي وتهز براسها مراضيه ، مسحت حلكي وجسمي كله يرجف هزت ايدها وفاتت ، التفتت على زاكروز ..

سيلين : ارتاحيت هسه شيكولون عليه العالم عمتها توها ميته وهيه بيتها ...

مكدرت احجيها بس دفعته بكل قوتي وكع نص وكعه على سله البتيته عفته وطلعت لغرفتي نار بكلبي هاي شلون اقنعها هو جبرني ومنو يكول راح تصدك بيه ، زين شلون خاف تحجي لاخوتها لامها شلون قهر ياربي منين تجيني المصايب تركض ورايه من مكان لمكان ...

ثاني يوم اجه عمو صلاح فتح الباب وفات حجه مخنزر..

صلاح : كومي يلا مو بلغج زاكروز..

سيلين : مكالك شنو جوابي ..

صلاح : كال بس متبقين هنا.

سيلين : اروح بيت عمو محمود.

صلاح : ومنين يصرف عليجن محمود خلي يكفي نفسه.

سيلين : هذا العندي لو توديني بيت عمو محمود لو اذبحني لان مستحيل ارجع وياك لذاك البيت.

صلاح : والله وكبرتي بنت تماره وصرتي تلاسنين..

سيلين : اي انت كلتها بعد بت تماره يعني العرك دساس يعني اني صاحبه مشاكل عليها فعوفني احسن ..

فات زاكروز صار بظهر ابوه..

زاكروز: يابه هاي عاجبها تعيش وحدها هنا مثل المسلسلات.

سيلين : احسن ما اجي وياك وتصير لقطات افلام ..

حك لحيته ودنك ممتوقع احجي.

صلاح : شتخربطون ثنينكم فهموني لا راس براس.

سيلين : اسأل ابنك هو يفهمك احسن مني.

زاكروز : سدي حلكج ..

سيلين : انت البلشت ..

صارت مشاده كلاميه بيناتنه نهاها عمو بصوت عالي سكتنه ثنينه.

صلاح : كافي ادبسزيه متحسبون حساب للجبير ولا عدكم احترام اله وانتي يلا فضينه لمي سلاباتج ..

باوعتله ودرت وجهي عاط..

صلاح : عيونج لا افكسها خاف طلعتها المرحومه اني افكسها الج..

سكتت مجاوبته منا اهل ادهم عيب يسمعون فضايحنه..

كمت الم بملابسي واخليهن بالجنطه طلعو من الغرفه وره شويه فاتت ايفين فاحطه..

ايفين : شنو صدك راح نروح بيت عمو.

اخلي الملابس بالجنطه واحجي وياها.

سيلين : لازم فرحتي.

ايفين : اكيد لا

سيلين : متأكده مفرحانه.

ايفين : خاف عبالج على اسامه تره والله نسيت موضوعه واصلا مرتاحه هنا ميعجبني ارجع

سيلين : للأسف راح نرجع وخلي ابالج اي تصرف محلو تسويه انتي تتحمليه لان تعبانه ومالي خلك سوالفج.

ايفين : خلي نبقة هنا ونشتغل ونصرف على نفسنه احنه مو صغار حبابه كليلهم.

سيلين : شلون اقنعهم وهمه مثل الذيابه منتظرينه..

ايفين : منو همه..

سيلين : منو يعني غير عمامج و ولدهم ..

ايفين : اني ماروح لو تنكلب الدنيا.

سيلين : اي روحي تعاركي وياهم ..

طلعت راحتلهم وره شويه كبت العيطه اجتني لازمه وجها وتبجي..

سيلين : هاا شفتيهم بعينج.

ايفين : زاكروز النذل ضربني ..

سيلين : وبعد وبعد اليوم وجه جديد طالعله.

ايفين : والله والله اذا رحت لا اشعل الحرب بيناتهم واخليهم يتذابحون.

سديت الجنطه حيل وكمت رحت يمها عطت بيها..

سيلين : اني شوصيج وانتي بشنو تفكرين ، بابا اصحي احنه ماعدنه غيرهم افهمي ماعدنه لا ام ولا اب ولا عمتج موجوده..

حجيتها وبجيت ، كعدت على الجربايه حيلي مهدود تقربت مني حضنتني وتبوس بيدي و بوجهي..

ايفين : علمودج اني هيج سويت ماريد تعانين من جديد اني معشت بقهر مثلج لان جنتي شايله كلشي عني..

سيلين : مادام تتذكرين الشغلات السويتها الج اريدج تجازيني بيها هسه .

ايفين : ميخالف التكولين عليه اسويه.

سيلين : اول شي تلزمين لسانج حجايه متحجين ولد عمج كلهم ما الج دخل بيهم وزوجه عمج كذلك.

ايفين : هاهيه وعد ماضوجج ..

سيلين : نشوووف. يلا كومي لمي مل

ابسج

ايفين : ومريم شلون راح نعوفها خطيه لا امها ولا ابوها وهلمره احنه نعوفها.

سيلين : بيت جدها موجودين وحنان عليها وابوها هسه يرجع كومي يلا فضيني .

احجي من وره كلبي وبداخلي اتكطع عليها بس شبيدي عليها شريد اسوي ..

بدلنه وشلنه جنطنه وطلعنه سلمنه على اهل ادهم بوست مريم وحضنتها حيل وضليت اوصي بيها هواي..

بجت واني هم هواي بجيت كأنما ردتها حجه اخر شي عمو نتر يلا كمنه طلعنه من البيت و ودعنه كل ذكرى حلوة بيه ودعنه الحنيه والطيبه والهدوء التعلمنه عليه ، ودعت نصائح عمو وثقافته الجان يغذي بيها روحي وعقلي ...

طلعنه صعدنه بسياره عمو صلاح كعدنه ليورة وليكدام هو وزوجته وبالسياره الثانيه زاكروز وبيت عمو محمود طلعت السيارتين متجهات للشمال ..

وبعد وبعد كم مره اروح وارجع بهذا الطريق كم مره ارتب اموري وترجع تتخربط جريت نفس ، ايفين نامت على رجلي كمت امسد بشعرها باوعتلي وهمست.

ايفين : شتكولين اذا رجع عمو ادهم ولكانه ماكو راح يهتم يسأل علينه.

سيلين : ماعرف ..

حجيتها ودرت وجهي على الجامه واباوع على الطريق ..

غلب عيني النعاس ونمت ماعرف شكد يمكن الطريق كله نمته الفززني صوت بعمري مجنت احلم اسمعه ولا اتخيل راح اسمعه مره ثانيه فتحت عيني وانصدم بأمي واكفه وتحجي ويه عمو صلاح تحجي شنو عركه هاي كاعد يتعاركون بنص الشارع ..

ايفين : لج هاي ام هاي بالجذب ما مدت راسها وكالت اشوف بناتي ولج سنتين صارلها مشايفتنه هاي صدك تحجي.

سيلين : سكتي خل اسمع.

بسعاد : بتج تتحارش بزاكروز ومن شافته ما نطاها عين كامت تذب تهم عليه عيني خليهن كبال عينج وحافظي عليهن وحاولي تربيهن من جديد ..

ايفين : هاي شدتحجي.

سيلين : معليج بيها تخربط علمود منروح يمهم.

تمارة : واني عندي رجال غريب وين اخليهن.

صلاح : تمارة خلي الغطه مستور لا احجي كلشي لبناتج واخليهن ياكلنج اكل.

تمارة : الف مره هددت وكتلك ماعندك دليل ضدي..

صلاح : واليروح للشرطه يبلغ وتعرفين بالاقليم شلون يسحلوج سحل .

كامت تأتأت متعرف شتحجي بعد ، نهو الكلام ..واشرلي انزل ، شعور الكره والاشمئزاز ينزل قبلي ويحضن امي ، نزلت ايفين وكفنه يم الجنط مالتنه حتى الجنط منزلهن ميريد يضيع وكت ، صعدو بسيارتهم شخطها وراح..

باوعتلنه هزت ايدها وفاتت ..

ايفين : هاي صدك تحجي راح اتخبل تره احنه بناتها بناتها.

سيلين : اي لان بناتها هيج تسوي ، هاج سحلي هاي الجنطه خل نفوت واني ادخل الباقيات.

دخلنه وريحه السكر تطرد ، بيت مليان قذاره وفساد شلون راح نرجع نعيش بيه بعد ما نظفنه نفسنه من وسخ الماضي.

ومنا بلشت رحلتنه الجديده المتعبه وماعرف شنو مضموم النه من جديد..

شكرا لزيارتكم عالم روايات سكيرهوم