رواية أعظم خيانة الفصل الخامس عشر بقلم الزهيريه
وإن كان قربي منكِ محالاً
فأنا والمحال خصامٌ
في معركة الحب
في ساحة الرفض
أحاربُ يامُتيمتي
علني أضفر بقلبكِ
ولــــــــــو بعد حينٍ...!
#رغد_الموالي
.......
ابو جواهر... تفضل شيخنا تفضل
الشيخ جبلان... يالله تفضلو يالربع
فاتو الزلم كلها
ام جواهر... خلي القوري على النار جواهر
الشيخ جبلان... والله يابو جواهر مانعرف وين ننطي وجهنه من فشلتنه منك بعد عملة فهد احنه اجينه اليوم انه وهالوجوه الطيبه نعتذر منك على الي صار واي شي تآمر بي احنه حاضرين
ابو جواهر... جيتكم هاي على العين والراس
اما بالنسبه لفهد هاي مو اول مره يتعده عليه
بعد ماكتلو اخوتي يردون يكتلوني حسبي الله ونعم الوكيل
الشيخ جبلان... والله ماجنت راضي لفهد ولو ماابو الله يرحمه وكف بعيني لاأني اطكه بالبندقيه على عملة هاي
ولد حجي نعمان فشلونه بين الوادم هواي
ابو جواهر... انت مالك ذنب شيخنا هو رجال طول بعرض مايعرف الصح من الغلط
انت ترضاها شيخنا يحجي على مرت اخويه المرحوم يكل للوادم انه عندي علاقه بيها يتهمها بشرفها البنيه الشمس ماشايفه خيالها
وكف على حيله الشيخ جبلان... شنهووو
فهد تطلع منه هالحجايه وسفه
ابو جواهر... أسأل الناس كلها تشهد
الشيخ جبلان... سلووووم
سلوم... آمر شيخنا
الشيخ جبلان... صحلي فهد وخوته كله الشيخ جبلان يتانيكم بيت ابو جواهر
سلوم... صار شيخنا
الشيخ جبلان... استريح ياابو جواهر حگك وحك هالحرمه الي جوه يرد اليوم وعلى راسنه وماكون الشيخ جبلان اذا مخليتك تنام وانت خاطرك طيب
ابو جواهر... يسلم خاطرك شيخ
مر وقت ودخلو ولد حجي ذياب فهد ورحاب واخوته وولد نعمان اباوعهم كلهم ب 16 زلمه منهم
طوال القامه ضخام البنيه الجسديه ماشاء الله
الشيخ جبلان... أنت بأي حق تجيب أعراض الناس بالعايله ولك هيج رباااااك ابوووووك
فهد... أني ماحجيت على أحد على منو حاجي شيخ
الشيخ جبلان... وتنكر فوكاها
سكت لثواني وبعدها اكمل كلامه
إن تنكر اكو شواهيد على كلامك مرت المرحوم اخو ابو جواهر بأي حق تجيب سيرتها على لسانك بأي حق أساساً تحجي عنها
فهد... شيخنه والله أعشكنها وحق الله أحبنها ليش ماتفهومني ياناس ياعالم البنيه رايدها بالحلال على سنة الله ورسوله هو ليش معارض اخوتها وقابلين هو شدخله
ابو جواهر... لان الي داتحجي عنها مرت اخويه
فهد... جانت ابو جواهر جانت مرت اخوك هسه مره أرمله
الشيخ... تكوم تخليها بحلوك الوادم
فهد ... حگكم علينا وهاي راسك ابوسه شيخنا والله مو بوعيي حكك وحك عمي ابو جواهر على راسي بس خل يقبل يزوحها الي
الشيخ... عذرك مامقبول مو بهل للسهوله يافهد
فهد... الي تآمر بي أني حاضر رگبتي هاي سداده
الشيخ... أبو جواهر والي تطلب بي إحنه حاضرين
أبو جواهر... شيخنا مارايد حگي أني
رايد حك البنيه دگله يجوز عنها ولايجيب سيرتها خل البنيه تعيش مكافي بعدها عروس دفنت رجلهاااااا
فهد... شيخنا بكلشي قابل إلا ام روح مااتنازل عنها ورايدها اني
أبو جواهر... هي بالاجباااااااااار البنيه تريد تربي ابنها ماتريد تتزوج
الشيخ جبلان... شكد عمر المحروسه الله يستر عليها
أبو جواهر... نهاية العشرينات شيخنا
الشيخ جبلان... صلي على نبيك ياابو جواهر وصلو يالحاضرين
اللهمَّ صلِّ على محمد وآل محمد
الشيخ جبلان... أنه أكلك البنيه إذا ماتستر عليها بيت رجلها مراح ترتاح لاأنت ولاهي
ابو جواهر... شيخنا حجيتلك أني ليش
الشيخ جبلان... باابو جواهر الولد مو هو الي كاتل والي كتل يم ربك ياخذ جزاته هو شذنبه
رحاب... ياخذ جزاته شنوووو اخوي مااعتده هم الي اعتدو وكتلو شهاب اخوي
الشيخ جبلان... هم ماكتلووه ولا صويحبه الي كتله قدر وصار واختك شاهده واحنه كلنه ندري بالحقيقه
رحاب بإرتباك... بشنو تدري شيخنه بشنو هاااا
الشيخ جبلان... أسكت أنت
ونتر... اسكتتتتت
رحاب... وليش اسكت شيخ شهاب اخوي نكتل وبس اخوه جان وياه اخوي شلون نكتلللل
اني اخوتي صارو جوه التراب بسببهم
الشيخ جبلان... واخوته هم واعتقد ماكو ثار بينكم هسه
رحاب... شذنب ولد نعمان ايتام
الشيخ جبلان... وشذنب ولد اخوته ايتام(وأشر عليه)
ابو جواهر... شيخنا الله يطول بعمرك والله مامن وراه فايده لكلامنا هذا دم وكع من سنين وجروح نفتحت وكوه ضمدناها
فهد... الف رحمه على روح عمي شعبان لعد لمن ثار وراح ليش ماتنطيني ام روح
ضرب على فخده واستغفر من بين اسنانه
الشيخ جبلان... مو قبل ماتدنك وتحب على راسه
ابو جواهر...( بفزه) اني من يمي مسامحه على الي سواه ويايه واذا على سالفة ام روح يومين ونردلكم خبر
وهاي كدام الحاضرين تقبل الرد يكون من بيت اهلها ماتقبل ماتحجي عنها ولاتجيب سيرتها على لسانك
فهد... يومين شيخنا
الشيخ جبلان... وان مارضت حلكك متفكه بعد
فهد... صار شيخنا
طلعو الزلم واباوع بعيون ابوي تربعت حيره ومن عيونه التذبح بوجعها عرفت انو نفتحت كل جروحه
ابو جواهر... عمي. شيماء
شيماء... كول ابو جواهر
ابو جواهر... فهد طالبج واني كتلهم يومين ونرد خبر
شيماء...داتحجي قاطعها مكمل كلامه
قبل لاتحجين اريد اوضحلج شغله وبعدها اتركج تفكرين وتقررين بالنهايه هاي حياتج واني ماارضى بالاذيه
تريدين تقبلين بي من ناحيتي اني ماازعل هذا شي يخصج انتي أما من ناحية ابن اخويه
اني مااقبلها إبن اخويه يربي بنص الي كتلو
ابوه ,
الولد بعده صغير باجر عگبه يكبر يكره نفسه شلون ربه عند الي كتلو ابوه وعاش عمره يتيم
هذا قراري النهائي شيماء واتمنه انج تتفهميني
شيماء... عمي اني مارايده اتزوح وانت تعرف
عبد المجيب... اعرف... بس لازم تعيشين بضل رجال الناس مراح تتركج بحالج وهذا ال ابن ال....توقف عن الكلام بعدها أردف استغفر الله
وهذا ابن حجي ذياب دايحجي بيج هواي هسه حتى اذا غيره يريد يتقدملج هم يتراجع بسببه مابي حيل طلايبهم
شيماء... عمي اني لارايدته ولارايده اعوف ابني اني ان اقبل بي ف بس علمودكم انتو
انتو داتمرون بمشاكل بسببي
عبد المجيب... وحلها ياشيماء
شيماء... الي تقبل بي اني قابله بي
عبد المجيب... اا ي شي شيماء؟
شيماء... عم ابو جواهر الي يريحكم يريحني
عبد المجيب... لعد واني بالي سالفه
شيماء... وهي؟
عبد المجيب... اكرمج للشيخ جبلان
شيماء... بدهشه... شنو
عبد المجيب... الوحيد الي يكدر يحميج من طلايب بيت ذياب
شيماء... بسسس
عبد المجيب... هو مو جبير حيل رجال اله هيبته ومكانته بين الناس وهنيال الي تعيش بيته وتحت صايته
شيماء... متزوج؟
عبد المجيب... أي طبعاً..
شيماء... ومرته شلون
عبد المجيب... احنه هذا مو موضوعنه انتي تردين ترتاحين لو تبقين يوميه ببيت
شيماء... مادري شكلك
عبد المجيب... هذا انسب شخص وبنفس الوقت اني ماعندي مشكله روح يتربى بيته
شيماء... بكيفك عمي
اني اروح واكلم الشيخ جبلان
راح ابويه واباوع لعمه شيماء قلق وخوف تربع بنص عيونها
ام جواهر... شبيج
شيماء... مادري خايفه
ام جواهر... من شنو
شيماء... مااريد اتزوج ام جواهر ابني خاف يتبهذل
ام جواهر... اذا عند الشيخ جبلان ان شاء الله مايتبهذل ادعي ربي يجعله من نصيبج
جواهر... الحياة غريبه تفاجأنه بأشياء ماممكن چنه نتوقعها بيوم من الايام
منو بينه يتوقع يجي اليوم الي ابويه يوافق على زواجة شيماء او هو يسعالها
لليل إجه ابويه والابتسامه تتوسط وجها
ام جواهر... هلا باابو جواهر بشرر
عبد المجيب... وين ام روح
ام جواهر... هسه اصيحها
شيماء..... شيماء
شيماء... كولي ام جواهر
ابو جواهر... كعدي هنا أكلمچ
شيماء... كول عمي
ابو جواهر... الشيخ جبلان باجر يجيب الزلم ويخطبج رسمي
شيماء... بهالسرعه هو حتى ماشافني
ابو جواهر... كال مايحتاج البنيه طالبه الستر وانه عد عيناها خل تخلي المهر الي تآمر بي وانه اخلي جوه رجلها
ام جواهر... بابتسامه ماشاء الله
الله يسعدج ياشيماء وين الله وهيج الدنيا تضحكلچ
شيماء... وكتله على روح؟
عبد المجيب... كال الله يحبني ودزلي هاليتيم يتربه عندي
شيماء... خوش حچي هاهيه عمي الي تشوفه انت
عبد المجيب... الله يسعدج بنتي
اني رحت وكلمت اخوتج وهم موافقين بس كالو شيماء تطلع من بيتنه الزلم باچر تجي ببت اهلچ
شيماء... صار عمي
عبد المجيب... بويه شيماء اني عندي خمس بنات والسادسه انتي ماريدج تگطعين بينه تجين هنا ولاتحرمينا من شوفة روح
شيماء... ولا اني اكدر اعوفكم عمي
ام جواهر... الله يسعدج ياشيماء كون الله يجعلها زواجة الدهر ويكون شيخ جبلان زين وياج ان شاء الله تتهنين وتعيشين مرتاحه
شيماء... اشكرج ام جواهر
وگفتكم وياي هاي ماأنساها طول عمري صدك لو گالو ماتعرف الي يحبك من اليكرهك إلا وكت الضيگ
.....
تغيير جديد بحياة عمه شيماء صار شي كان مو بلحسبان
فرحنالها اني واخواتي كلش بس بنفس الوقت خفنه عليها خاف ماتنسعد وياه جنه اني ودره بكلشي نسولف
دره... الشيخ جبلان مبين صعب وهو اكبر منها يمكن متنسعد وياه
جواهر... اني هم هيج فكرت يعني لو ماصار الي صار فهد هو انسب من شيخ جبلان على الاقل قريب لعمرها
دره... بس فهد يشرب واليشرب تلكي لاصلاة ولاعباده وايده والضرب مثل تحسين جيرانه شايفته شيسوي بمرته كل فتره والثانيه
جواهر... اي والله خطيه مرته وجهاله
دره... يعني هي الوحده متكدر تتزوج زواجه مرتاحه لو جبير لو يشرب وموزين
جواهر... عمي عبد الرحمن جان زين من كلها الله يرحمه وشكد قصص وروايات عراقية كرار صلاح حبها لعمه شيماء
تدرين مره جنت خاتله وسمعت عمو عبد الرحمن شلون يحاجيها لعمه شيماء جانو بالمرجوحه بالليل كاعدين وهم عبالهم كلهم فوك نايمين جنت صغيره ماافتهم الحچي بس هسه عرفت
دره... وشنو سمعتي
جواهر جانو كاعدين بهدوء وعلى ضوه الگمريه...
عبد الرحمن... يگولون الگمر حلو شيماء والله غلطانين هذا الگمر وهاي إنتي منو الأحلى؟
شيماء... بخجل... منو
عبد الرحمن... انتي شيمو انتي
شيماء... عبود لتحجي هيج اخجل والله
عبد الرحمن... اروح فدوه لليخجل أني هسه مو تزوجنه شكو بعد للخجل جنه مخطوبين وجنت اكول حقها هسه شكو
شيماء... زينة الانثى خجلها
عبد الرحمن... تتذكرين لمن شفت شعرج اول مره يابويييييه حريرررر
شيماء... زينه صديقتي كالتلي حرام شلون تخلي يشوف شعرج بعد متزوجتو وبقت تحجي عليه واني نقهرت بوكتها اوف لتذكرني
عبد الرحمن... والله جان بنفسي اشوف شعرج يعني هم حقي شكو بيها
شيماء... بس مو هيج تجبرني وتذبلي الحجاب
عبد الرحمن... شيمو لاتضوجين لعد لو مقبلج شتسوين
شيماء... يااااا عزززه غير اموت روحي
عبد الرحمن... بس اني سألت السيد بالجامع كالي اذا عاقدلكم السيد مهر محمدي عادي
شيماء... لا اصلا مادام مخطوبين ميصير حتى نكعد وحدنه بس غير جنت تجي انت من اخوتي ماموجودين
عبد الرحمن... اي غير ختى اشوفج اسولف وياج اذا اخوتج جانو كاعدين على راسنه كل منجي
شيمو اسألج سؤال
شيماء... كول
عبد الرحمن... اذا متت تتزوجبن وراي
شيماء... شنو هالحچي هذا عبدو مااقبل يلا زعلت منك
عبد الرحمن... مادري ليش يجيني احساس اموت ونفترق
شيماء... تعوذ بالله من الشيطان الرجيم هاي كلها وساوس شيطان
امي جانت دكول الي مايؤمن بالله زين وقليل العباده الشيطان يتمكن منه
عبد الرحمن... بس اني اصلي واصوم وخاتم القران اكثر من ماانتي خاتمته
شيماء... كافي فدوه عبدو راح ابچي
عبد الرحمن... شيمو ناخذ عهد اذا متت اني متتزوجين وراي واذا متي انتي مااتزوج وراج وبالاخره نكون زوجين بالجنه
شيماء... عبود الله يخليك كافي
جواهر... لما كبرت عرفت شنو معنى حبهم واحد للثاني وليش هيج متعلقين ببعضهم
جانو
دره... ليش
جواهر... الحب يادره
الحب اقدس شعور يعيشه الانسان لكن مو كل شخص يحمل هذا الشعور
دره... وشنو الي خلاج تعرفيه
جواهر... كبرنه وعرفنه
دره... بتأمل الحب حلو جوجو كلش حلو
جواهر... ضيقت عينها اليسره...ضامه عليه شي دره
دره ... أحجيلج الصراحه بس ماتحجين لأحد ابد الله عليج
جواهر... شنو
دره ... اني كلما أشوف رائد جيرانه هذا الضابط
هيچ گلبي يگوم يدك قوي
وأتوتر مااعرف اثول نوبات
بس افرح لمن اشوفه جنت مااعرف ليش بعدين عرفت هذا حب
جواهر... وج عزه وهو يدري
دره... لا لا هو مايدري والرسول مايدري بس اني معجبه بداخلي يعني ماحجيت هاي انتي اول وحده تعرفين
جواهر... ديربالج تخلي يعرف واطردي هذا الشعور بداخلج لاتخلي يكبر
دره... لان هاي حالتي مراح يدورني
جواهر... لا لا فهمتيني غلط لا دره والله مو قصدي بس
بس اخاف عليج
هذا ضابط بالجيش يخوف انتي حلوه وصغيره ولو حس انتي معجبه بي راح يفرح بس يفرح مو زواج هذول يخوفون سامعتها لأمي من تحجيلنه دكول اكو شغلات من تتزوجون تعرفوها
والشباب يحبون هاي الشغلات بالحرام قبل الزواج يقشمروها للبنيه
دره... شنو.... عزه... هو شنو هاي
جواهر... مااعرف بس مره عمه شيماء سولفتلي كالت الشباب يحبون بس حبهم مو مثل البنيه نضيف أغلبيتهم يعني مو كلهم
اكو يكللها اني احبچ واموت عليج وراح اتزوجج وهي تصدك وبعدين يصيرون مثل المتزوجين بس هم مو متزوجين وراها يعوفها ويكللها انتي مو خوش بنيه واني مااتزوج هيج وحده ويروح يتزوج غيرها
دره... بدهشه... يعني تعيش ويا بالبيت زين اهلها شلون يقبلون تعيش وي رجال غريب بالبيت
جواهر... دره لاتصيرين غبيه
دره... والله مداافتهم
جواهر... باعي هو اني مره سألت امي كتلها يوم انتي ليش تصيرين حامل واني لا كالت انتي مامتزوجه
كتلها شعليه الزواج
كالت هي هيج المرأءة ماتكدر تصير حامل بدون ماتتزوج
دره... دنجبي جواهر منين تجيبين هالجذب لعد جدو مره حجالنه قصة مريم بنت عمران مو جابت بدون زواج سدي حلكج وبطلي جذب شايفتني اصغر منج يعني مااعرف وكاعده صايرتلي بمكان امي وتنصحين
جواهر... والله لازم تتزوج البنيه وجدو كال هاي معجزه من الله قصة مريم
دره... لا لا مكال معجزه كال الطفل ممكن ينولد من دون اب بس ماينولد من دون ام
جواهر... لعد ليش انتي ماتصيرين حامل ياغبيه
دره... ها.... ا ا ا اوووووو كافي
جواهر... ها هسه عرفتي مدااكذب عليج
دره... بلي مو صحيح كلامج
جواهر... والله صحيح والله..
دره... اوف منج لاتعاندييين
دخلت عمه شيماء.. هاي شبيكم شكو
جواهر... كتلها الوحده الا تتزوج يلا تكدر تنجب اولاد كالتلي لااااا عادي
شيماء... هههههههه يعني صدك تحجين انتي وياها تتعاركون علمود هاي
جواهر... مو تكذبني
شيماء... دره حبيبتي انتي الي دكوله جواهر صحيح
دره... لعد شلون السيده مريم العذراء
شيماء... هذه كانت معجزه ربانيه ماالها علاقه بالبشر العاديين
جواهر... هسه صدكتي ياست دره
دره... ديلا سكتي ماعرف منين تجيبن سوالف
شيماء... اني راح اروح لبيت أهلي
جواهر... عمه شيماء والله تعودنه عليج ولو مو هاي المشاكل فلا اقبل تتزوجين وتطلعين
شيماء... هاهيه شسوي
بلكت يطلع هذا الي حتزوجه زين كون مايأذيلي روح ويضوج منه بعدين
جواهر... عزه ولو ضاج
شيماء... والله اعوفه وماعوف وليدي يمه الا روح حبيب قلبي
جواهر... الله يحفظه الج
شيماء... شكراً... ساعديني جواهر خل احضر غراضي باجر اروح
جواهر... ياعمري عمه شيماء راح نشتاقلج هوايه
شيماء... واني هم حبيباتي
.......
الحياة مليانه مفاجئات منعرف شنو ينتظرنه باجر!
.......
ثاني يوم راحت عمه شيماء لبيتهم
وبعدها الشيخ جبلان طلب عمه شيماء للزواج وهي وافقت وبسرعه تم زواجهم خلال اسبوع عرفنه من ابويه انو الشيخ جبلان سكنها ببيت وحدها
بنفس الفتره عرف فهد ولما عرف اجه هد علينه....
يدك الباب بقوه ويصيح.... افتح الباب جباااااان افتح الباب
ولك اني اجي واجيب شسوخ وعشاير واتوسل بيك وانت تروح تنطيها لغيري
منو انت وتتحكم بيها منووووووو
وصار يصيح ابويه فتح الباب بعصبيه
عبد المجيب... انت منو وجاي تهد على بيتي شحاسب روحك
ماشفنه الا فهد ضرب ابويه بوكس والجيران جرو فهد وصارو يهدون بيهم لكن فهد زاير عليه وانوب زاد لمن اجوي اخوته ولد اخوته
صارت صياحات واحد من ابن نعمان يطلع عمره ب 19 سنه ضرب ابن الجيران الي جان دايحاجز بينهم وهذاك رد عليه وتلازمو وصارت ناس تضرب ناس وعركه بالمنطقه ماعرف شكد مر وقت ماسمعنه الا صوت رصاصه بالجو وصوت الشيخ جبلان وهو شايل الرشاشه وصاح ب فهـــــــــــــــد...
نحن لانعلم خفايا الامور مانضنه شراً يكون خيراً...
شكرا لزيارتكم عالم روايات سكيرهوم
