رواية أعظم خيانة الفصل السادس عشر بقلم الزهيريه
لا تحسدني على هذا الهدوء
فبداخلي حرب لا تعلم شيئاً عنها
ريماس/ مرات تمر بموقف يظل يدگ براسك طول الوقت وشگد تحاول تشغل نفسك حتى تبعد الموقف الصار وياك من راسك ابد ماكو فايده وهذا صار حالي ويه مهند من دى ياخذون مهند ظل مركز نظره عليه بنظرات ما فهمتها ابد في وقتها وبعد ما كلهم طلعوا رحت بدلت ملابسي وطلعنه اني وام رحاب رجعنه لبيتها
وهي بيها طبيعه بعد كل شاب يوگع بيدهم تاخذ موبايلي تحذف كل شي من جهازي رقمه ومحادثات ينظفون موبايلي كله بس هاي المره ما حذفت رقم مهند ومواقعه اخذت السيم كارت وكسرته وحتى الجهاز فلشته رگعته بالگاع خلت طشاره ما اله والي ظليت متعجبه على تصرفها ورجعت انطتني جهاز وبي سيم كارت وبي رقمها ورقم رحاب وگالت
ام رحاب / هاي أوامر اجتني ولازم انفذها وهذا الجهاز ثاني الچ واتعابچ من توصلني اسلمها الچ
ريماس/ وبس هزيت راسي وعفتها وطلعت رجعت لبيتنه ومهند ونظراته براسي سبحت وحتى نمت وحلمت بمهند گعدت مفزوعه وعرگانه وچانت 3 العصر وبالي نظرات مهند شلون عبالك يلومني او كانه عرف حقيقتي وبعدني گاعده وبمكاني دخلت رحاب شافتني گالت
رحاب / شبيچ چنتي بمعركه وضعچ مال وحده چانت تركض
ريماس/ هو احنه هم دى نركض بس ياريت لو نركض على شغله بيها خير
وحچيتلها الصار ويه مهند
رحاب / شوفي انتي تعرفين مهند يحبچ وصادق وياچ لهذا تشعرين بتأنيب الضمير هسه فتره تعدي وتنسي صدگيني
ريماس/ اگلچ رحاب مهند وين اخذوا تعتقدين وشنو سووا بي بالي يمه
رحاب / والله ريماس ما اعرف اني حالي حالچ انفذ كل أوامرهم واني ساكته وممنونه منهم
ريماس/ بصراحه رحاب اني افكر انهزم منهم لمكان ما يعرفون اني وين ما اريد بعد اشتغل وياهم اريد ابدي حياة جديده
رحاب / لا تفكرين مجرد تفكير تنهزمين وربچ كلها ساعات ويرجعوچ وساعتها تدفعين الثمن غالي اني قبلچ انهزمت وتلقيت شر عملي وعاقبوني اخذوا كليتي مني لهذا ساكته وهم اريد طريقه اخلص منهم بس شلون ما اعرف
ريماس/ ادري شلون يعرفون اروح بمكان ما يخطر على بال احد
رحاب / ترى ذوله ما ينلعب وياهم ريماس وربچ حتى ما يقتلوچ يخلون بيج عاهه ولو الخلاص منهم سهل چان خلصت منهم ام رحاب نفسها ترى هي حالها حالنه مجبوره وما تگدر تحچي لهذا شوفيها توصل الهم كل صغيره وچبيره لانه تعرفهم ما يرحمون وانتي بعد بكيفچ
وراحت رحاب وبعدها لليل كذلك هم جابولي واحد لازم أتعرف عليه ومر على حادثه مهند شهر وآني بالبدايه عبالي أصلح البيت بس بعدين عدلت عن رأي وقررت الفلوس كلهن اجمعهن واجيبهن بجنطة الملابس واخذ اخواتي بس وانهزم لانه صفيه إذا بقت شيسوون بيها اكثر من الصار اضافةً انه صفيه إذا اخذتها صير عله عليه بسبب وضعها
بس لازم ارتب وضعي ومن انهزم لازم عندي مكان اروحله حتى ما ارتبك بس مشكلتي ما اعرف وين اروح والمن التجئ والوقت يمر وصار شي ما كان بالحسبان وهو انه صفيه تمرضت بحيث صارت ما تگدر تاكل او تشرب مي تتقيأ ويصاحب التقيأ دم
وبيوم چانت طالعه واگعه بالشارع واجوي ناس دگوا عليه الباب وگالوا وگعت بالشارع بسرعه لبست جبه وشال وطلعت اركض واحد رجال من المنطقه عنده سياره تكسي گال / عمو صعديها بالسياره وانتي وياه خلي أخذكم للمستشفى وهناك يشوفها الدكتور احسن
واني ما گلت لا اخذناها للمستشفى ومن عرف الدكتور بالطوارئ حالتها گال / نسوي الها تحاليل افضل
واكو ممرضه ويا اخذت دم من صفيه وخلوا الها مغذي وبقيت وياها لما طلعت نتيجة التحاليل وطلع بيها سرطان بمعدتها وسالت الدكتور اكو امل انه تشافى گال هي واستجابتها للعلاج وكتب علاج الها وانطاني عنوان عيادته حتى نراجعه بالعياده
واخذت صفيه وطلعنه ورجعنه للبيت وخطيه اخواتي لگيتهن يبچن عليها نوب صرت مقيده بصفيه من انهزم لا اگدر اخذها ويايه واذا عفتها لازم اعوف اخواتي يمها وذني خطيه شيصير بيهن ومنو الهن واستمر الوضع ما يقارب الشهرين وصفيه لا فاد بيها علاج ولا مراجعات اضافةً الدكتور گال چانت تاخذ مهدئات خلت اي مقاومه للمرض ما عدها واني جنت اسوي الي اگدر عليه
وسبحان الله صفيه مثل ابويه آخر أيامهم اني وياهم وسبحان الله المعز المذل هاي صفيه شگد چانت راهبتني هسه ما عدها قوى تگول كلمه
وبيوم صفيه تخربطت وچانت دنيا مغرب بالمستشفى الدكتور گال / ما أظن توصل لصبح واني اختنگت من الردهه لانه صعبه شوف ناس تتألم وحالات اشكال الوان لهذا طلعت اتمشي بالممرات قريب على الردهه وبوقتها صار گدامي ولد شاب يجنن اسمر وشواربه سود وشعره گالبه ليوره طويل جسمه حلو والجذبني بي ساعته وچان لابس اسود قميص وبنطلون وحذاء كله اسود
وبس اني ظليت اباوع عليه وهو كذلك يباوع عليه وهو چان واگف يمه دكتور ويحچي ويا انتقلت على غير ممر اجى ورايه سمعت واحد يصيح يا بنيه التفتت الولد ابو الأسود نفسه وسالني إذا اني اشتغل بالمستشفى
جاوبته/ لا اني عندي مريضه وجايه وياها
ابو الأسود / اسمي بيان واني دكتور ودوامي هنا اذا تحتاجين شي اني موجود
ريماس/ بس ما اشوفك لابس ابيض مثلهم يعني مثل الدكاتره
بيان / اني خلص دوامي وراح ارجع للبيت انطيني رقمچ واني انطيچ رقمي وشوكت ما تحتاجين شي بس اتصلي بيه واني اجي
ريماس/ طلعت موبايلي انطيته رقمي وهو سجله واتصل عليه وظهر رقمه يمي وسلمت عليه ورجعت يم صفيه ومثل ما گال الدكتور صفيه ما وصلت لصبح ساعه ب3 بالليل سلمتها لله واني وحدي ما اعرف شنو اسوي اتصلت على ام رحاب وبلغتها انه صفيه توفت
واجتي هي وهذا ابو شوارب ولد شباب اثنين دائماً أشوفهم ويه ابو شوارب وهمه كله كملوا شهادة الوفاة وخلوا صفيه بتابوت وما قبلوا نروح بيها للبيت وطلعنه بيها للنجف وام رحاب عبالك عرفت بشنو افكر گالت
ام رحاب / لا تخافين إذا على اخواتچ اني گلت لرحاب تروح تبقى يمهن لما نرجع حتى لا يبقن وحدهن خطيه اطفال ذني يتيمات لا اب ولا ام
ريماس/ وارتاحيت من ناحية اخواتي وصلنه للنجف وزوروها الإمام علي عليه السلام وبعدها اخذوها لمأوها الاخير وندفنت صفيه بدون ما تعرف شنو صار بولدها وبعد الدفن تركنه صفيه وهي الها اول يوم بالاخره ورجعت للبيت واكو هواي من نسوان الجوارين اجتي عزتنه ومن ضمنهم ام زهراء
واني صفيت وحدي بهاي الدنيا ويايه اخوات اثنين ولكون ما اريد اخواتي يصير بيهن الي صار بيه لهذا قررت انهزم ويايه اخواتي وبعد ما عندي شي اخاف عليه لانه اخواتي ويايه
واني طول الايام چانت دفنة صفيه وأيام العزاء ما ادري بالموبايل حتى لگيته مخلص شحن وطافي خليته على الشحن وبس نشحن شويه فتحته لگيت هواي اتصالات ورسائل من رقم ما اعرفه جاوبت عليه بس كتبت منو بسرعه اجاني الجواب من الرقم
كتب ( اني الدكتور بيان )
بيان / مرات نسوي اشياء لخاطر اشخاص يكونون عزيزين علينه وما نريد نزعلهم بس هذا شي خطأ لأنه الخساره راح تكون اكبر واني دائماً القريبين عليه همه عمامي مهند ووسام ولكوني ردت خاطر عمي وسام وما اريد أزعله تمادت لميس وبيوم بلغنه عمي وسام بسوته لميس طلب مني اطلگها وابويه ما قبل بس اصرار عمي وسام وهي تبچي وتتوسل بأبوها واجتي عليه ما تريد تطلگ
وظلت لازمه ايدي بس عمي وسام دفعها وبعدها عني وظل مصر انه اطلگها لهذا نطقت كلمة طالك وعمي وسام طلب من لميس وبناته الباقيات يروحن يصعدن بالسياره والأغرب عمي وسام طلگ عمه لقاء وهذا ما چان بالحسبان وعاف عمه لقاء يمنه واخذ بناته وطلع
اما عمه لقاء گعدت بالگاع دگ وتلطم وتگول / يمه انهجم بيتي اني وبنتي طلگنه بنفس الدقيقه
جاوبها عمي مهند / يعني معقوله بنتچ خططت ونفذت وحدها بدون علمچ إذا مو انتي المخطط الرئيسي واني متاكد وسام من طلگچ چان متاكد انتي المخطط والمدبر لبنتچ والا چان ما طلگچ
لقاء / والله على صحتي وعافيتي وماكو اغلى من الصحه والعافيه ما ادري بيها ولا اعرف وليش سوت هيچ ما ادري
بيان / وظل أبويه وبيبي يواسون بيها وانه عمي وسام يهدئ وبعدها يرجع يرجعها وبعد حچي كومه ما اله راس ولا رجلين عمه لقاء طلبت من عمي مهند انه يوصلها لبيت اهلها
اما اني رجعت نفس وضعي وحدي ومر تقريباً شهرين واني من البيت لدوام ومن الدوام للبيت ولميس وميقات يتصلن ويراسلن بس اني مطنشهن اثنينهن قررت اعيش ملك نفسي وبيوم دنيا العصر اجى عمي مهند وچان يريد يحچي ويايه وحدنه طلعنه للمزرعه بده كلامه
مهند / اگلك بيان باچر عندي موعد ويه حبيبتي وقريباً راح صير زوجة عمك اريد سيارتك اروح بيها صار اكثر من مره اروح بسيارتي احب اكشخ گدامها
بيان / ادري شنو هاي لذه من الفگر يعني ليش ما تروح بسيارتك انت تگول راح ازوجها غير تخليها تعرف وضعك المالي إذا شوفك كل مره بسياره هسه عبالها انت طاگ للستار
مهند / انچب لك ليش اني فگر بس اريد اروح بسيارتك عسى سيارتك تكون خير عليه وآهلها يوافقون عليه
بيان / يمعود سيارتي فگر حتى أفكر أبدلها نسوان اثنين تركت الظاهر گرفتها فگر عليه ما انصحك بيها وانت ما شاء الله مزوج ولگيت وحده تحبك اني منفصل وابويه وعمي وسام مطلقين
مهند / عينك ليزر لا تحسدني مخلي عينك عليه ترى ما اخاف من الحسد
بيان / وطلع موبايله ورسلي صورته هو وحبيبته
ويگلي
مهند/ هاك هاي صوره كلش شويه باوع عليها حتى تموت قهر وجهك مثل وجهه زوجة الشهيد واخذ سيارتك وگدام عينك خاوه على شاربك
بيان / متت من الضحك حتى عيوني گامت دمع من الضحك عمي مهند اضحوكي الهوى يضحكه
جاوبته/ افا عليك عمي السياره وراعيها گدامك
مهند / وشكو ماخذ راعي السياره اريد بس السياره
بيان / بقينه نسولف ونشاقى ورجعنه للبيت اتعشينه وهو اخذ سويچ سيارتي واخذ السياره وراح وبقى سيارته يمي حتى استعملها لما يرجعلي سيارتي وعلى ثاني يوم بالدوام حدود الساعه 11 الصبح اجتي لجنه مفتشيه على السجون الي بالمركز لهذا ظليت ويه المفتشين وحتى موبايلي ما ادري بي
وبقت اللجنه لساعه 2 الظهر وحتى جبنه غده الهم من المطعم والى ساعه 3 ونص يله راحوا طلعت موبايلي من الجرار مال مكتبي لگيت عمي وسام وابويه حارگين الموبايل عليه بعدني اريد اتصل بأبويه اتصل عمي وسام واول ما جاوبته گال
وسام / بيان عمك مهند شوكت حچيت ويا
بيان / اليوم نهائياً ما تواصلنه بس البارحه بالليل چان يمنه وأخذ سيارتي واخذت سيارته وبعد ما ادري بي
وسام / عمك مهند من الصبح حدود الساعه 10 موبايله مغلق اتصلت بيه زوجته ساعه 1 الظهر تگول لگت مكالمه منه ساعه 10 وربع وهي تتصل بي موبايله كله مغلق واني رحت لدائره مالته يگولون اليوم أصلاً ما داوم هذا وين راح شلون بي شوكت يعقل حيلي كله راح من ورا وكلام الله بس يرجع إذا ما اوگعله دگ بالقندره على راسه اني مو وسام شلون يسوي بينه هيچ
بيان / انوب افتر راسي هذا وين راح
جاوبته / عمي هسه راح اتبعه عن طريق موبايله اخاف موبايله خلص شحن
وسام / ولك بيان گلبي نسبني واخاف اگول دى افكر بي ما اريد اقدم الشر على الخير بس ان شاءالله خير
بيان / غلقت الخط ويه عمي وسام واتصلت على واحد صاحبي بشركة الاتصالات وطلبت منه ينطيني موقع هذا الرقم آخر اتصال من وين وانطيته رقم عمي مهند
طلب مني انتظر شويه واحس نفسي گاعد على نار وبعدها جاوبني گال اسم منطقه بأطراف بغداد
انه رقمه اجرى منه اتصالين اول اتصال چان ساعه 8 وربع على رقم ما قبل ينطي الي إلا بأمر قاضي والرقم الثاني ساعه 10 وربع وهم ما قبل ينطي الرقم الأتصال الأول ما اعرف منو بس الاتصال الثاني اعرفه وچان على زوجته وبعدها نغلق الموبايل
ورجعت خبر لعمي وسام بهذا الكلام تخبل واني كضابط شرطه ما اگدر اتحرك إلا بعد 48 ساعه بس سويت شغله ثانيه وهي قدمت شكوى انه سيارتي نسرقت وانطيت رقمها واني كضابط وسيارتي نسرقت نادوا بيها بالسيطرات وين ما تتواجد السياره يبلغوني وخصوصاً المنطقه الي ذكرها الي صديقي الي بشركة الاتصالات
وبالفعل السيطرات والشرطه بذيچ المنطقه وبالكاميرات داخله السياره مالتي وبيها عمي مهند وحده ماكو احد ويا وطالع من هاي المنطقه ومن بغداد كلها وين رايح ما اعرف وشيسوي طلع من بغداد وين راح وهو قبل يوم گلي رايح على حبيبتي حچي عمي مهند ويه تصرفاته مو منطقي ابد وإجابة كل الاسئله يم عمي مهند فقط
رجعت للبيت لگيت عمي وسام وذكرت كل الي اتوصلت اله والمشكله ما نگدر نتحرك لانه ماكو شي رسمي وظلينه ذاك الليل كله احنه على جمر موبايل عمي مهند مغلق وهو فص ملح وذاب
وعلى ثاني يوم من الصبح وعن طريق مديري سويت الشكوى على اختفاء عمي مهند واخذتها ورحت للمحكمه بنفسي وختمتها من يم القاضي ورجعت على شركة الاتصالات حتى اطلع الرقم الي متصل عليه الصبح وچانت المفاجأة انه الرقم مسجل بسم شخص أمريكي وكذلك الرقم مغلق يعني شلون كأنه نفتر بدائره مغلقه وما توصلنه لأي شي
بقت بس البنيه الي هو چان رايح عليها وحچيت كل شي لابويه وعمي وسام وهمه بقوا متفاجئين گتلهم / بقت گدامنه بس البنيه واحنه ما نعرفها هي منو اصلاً عدنه صورتها نشتكي عليها ونعمم صورتها على السيطرات ونجيبها
اخرها عمي گال
وسام / انت مخبل بيان ما نگدر نگول البنيه متهمه لانه بتسجيل الكاميرات مهند وحده واذا اشتكينه عليها ودخلت مركز وطلعت ما الها علاقه تدري ساعتها الله ما يخلصك من العشاير أتوقع البنيه ما الها علاقه بس هو شنو صار ويا الله يعلم
بيان / بقينه ايام لا ليلنه ليل ولا نهارنه نهار اسبوع مر وعمي مهند والسياره مالتي فص ملح وذاب وكل خيط انه يوصلنه لشي ماكو
وبعد اسبوع اجانه اتصال يگول المتصل انه استعلامات بمستشفى بأربيل وانه شخص اسمه مهند راقد عدهم صار اسبوع
شكرا لزيارتكم عالم روايات سكير هوم
