رواية بنات الملا الفصل الخامس عشر بقلم رغد الموالي
عيناكِ أشبه ببحرٍ قد غرقت فيه جميع سُفني!
الشيخ جبلان... فهـــــــــــد ولك انت منو وتهد على العالم ببيوتها
وانتو ماكو احد بيكم راشد ويهدي ويصلح
وبعدين عليمن العركه هاي شنو سببها
محد رد
انه اسألك يافهد شنو سبب هاي المشكله
سكت لدقائق بعدها كمل انه عرفت سبب العركه
ثكل حسابك يافهد كلش يمي
شيخ انه طلبتها على سنة الله ورسوله يكوم يكرمها الك عبد المجيب
الشيخ جبلان... الحرمه مارايدتك هي اجبار
فهد... هو. هو الي قره براسها وماخلاها تقبل بيه انه جان گلبي حاسسني ان هي تريدني
صرخ بي الشيخ جبلان... اسكت والله ان حجيت كلمه زايده بعد لاهذا لسانك اكطعه انت تعرف على منو تحجي هذه حرمتي صارت
وجلالة رب العالمين الي جبت طاريها بعد لا اخليك تلحك اخوتك
فهد... اني تهددني ياجبلان بلي مسمي روحك شيخ
الشيخ جبلان... غصبا من على شاربك شيخ
فهد... والله شو مااعترف بيك شيخ يلي مسمي روحك شيخ
وصار جدال واسع بينهم ماشفنه الا ياقوت شايله دولكة الماي والكلاص وطالعه داتودي لابويه
اخذه منها ابويه وبقت واكفه يمه وجان الكلام مستمر
الشيخ جبلان... شوف يافهيدان.. يتكلم وهو يأشر بأصابعه الاثنين بتهديد قوي
انه هالمره حعديها مره الثانيه ان هديت على احد وان حجيت وي هالزلمه هذا ماتلوم الا نفسك اشيلك من الديره كلها
وباوع لاابويه ابو جواهر حكك عليه
ابو جواهر... ولايهمك شيخ
الشيخ جبلان... خل هالحليوه تنطينه ماي نشف ريكي
بقيت اباوع من خرم الباب واحد من ولد ذياب ماشال عينه عن اختي تخبلت طفله وهيج يباوعلها دزيت ماس تصيحها وهذيج نوب راحت وكفت يم ابويه بقيت الوب وره الباب وامي تتحلف بيهم
ام جواهر... شكو دزيتي اختج
جواهر... غير تصيح ياقوت نوب هاي راحت صفنت يمهم
ام جواهر... اني اعلمهم عبالهم بعدهم صغار ويبقون براحتهم بسيطه
بعدها بشويه الكل راحت ودخلنه للبيت ابوي كعد منتچي على الحايط ولازم راسه بتوتر وحزن خانته العبره وبچه!
اول مره اشوف ابويه يبچي من بعد وفاة جدي كل مره يبچي على اعزازه لكن هالمره استغربت ليش يبچي
امي اشرتلنه بعيونها ندخل جوه
اخذت خواتي ورحنه جوه
دره... شبي ابويه شنو الاذاه وهيج يبچي
جواهر... ابويه مدايتحمل الي دايصير وكفته اليوم وحده يتصده لبيت حجي عمران دمره هم صايرين مثل الذيابه عليه وهو يكابر ويتصده بس هم صعبه عليه
دره... تدرين مره شسمعته يگلها لأمي
جواهر... اي
دره... يكلها خايف اموت وتبقون وحدكم كوم نسوان وهذوله يستولون عليكم
جواهر... عزه... اسم الله... ابويه هيج دايفكر
دره... اي ياجواهر... ابويه تعب من المشاكل ومن فراك اهله تدمر
جواهر... رغم كل هذا ولمن اشوفه احسه جبل واكف مايهتز مايتأثر
دره... الله يعطيه القوه والصبر
🎥 بعد مرور بضعة شهور.....
رمضان قرب يخلص وعلى ايام عيد رحنه اني وامي للسوك نشتري قماش حتى نخيكه ملابس للعيد دخلنه للمحل وكان ممتلىء بالنسوان وكلها تشتري للعيد
بقيت محتاره شنو اختار شنو اختار
جواهر... يمه كلها حلوات وحده احلى من الثانيه
ام جواهر... اخذيلج هذا النيلي يطلع يخبل عليج
جواهر... لا يمه الصماگي احلى اني مو سمره
ام جواهر... منيلج سمره حنطاويه انتي يمه وتخبلين اني كلت نيلي يبرز لون عيونج الزرك
جواهر... كيفيج يمه
ام جواهر ... لا دام هذا عجبج هاهيه اخذلج الصماكي
صاحت على الولد تعال يمه كصلي من هذا القماش
اجه الولد
... تآمرين خاله
دايكص بالقماش وعينه بالكاع مايباوع علينه
فجأه فلت المكص من ايده ووكع
ببتصرف غير مدروس نزلت اخذ المكص من الكاع وهو هم دنك باوعلي واني مباشرة نزلت عيني للكاع وكفت باوعت لاامي صارت اعصاب عليه بس ماحجت
وهو باوع الي مره ثانيه بعدين انتبه لاامي ورجع يكص ونطاه للقماش
اول ماطلعنه استلمتني امي
ولج فشلتينه شنو هيج نزلتي انتي تنطيه للمكص مو عيب عليج
جواهر... يمه والله ردة فعل من دون قصد
ام جواهر... هسه شيكول علينه ولج فشلتينه عزه بس لايعرفنه
جواهر... بوم الله يخليج لاتكلين لاابويه
ام جواهر... ليش ناقصه قهر لأبوج وأكله انتي ضمي لسانج ولاتحجين
رجعنه للبيت وطول الطريق امي تفور عليه وتحجي واني ساكته واكل بروحي
حسيت بيومها مسويه مصيبه چبيره
رجعت للبيت ضايجه حيل وتلكتني دره
ها شخذتو مااخذتو شوفولي شوفولي
خليت العلاليك بالصاله وفتت جوه لغرفتي جنت حيل ضايجه
اجت دره... ها شبيج شكو
جواهر... سكتي عوفيني
دره... هسه غير افتهم شصاير
جواهر... ولا شي سكتي سكتيييييي
دره... اعوفج احسن الي
بقيت بغرفتي وامي دزتلي زمرد تصيحني مااجيت دزت ياقوت مااجيت اجت هي
شبيج جواهر يعني نبطل منعلمج
جواهر... يمه والله مو قصدي
ام جواهر... اعرف مو قصدج بس الناس ماتفسرها هيج يوم
جواهر... عاد اني شمدريني بالناس وشلون تفكر
ام جواهر... يلا انسي لاتهتمين وتعالي اخذي قراصه وگلاده تلبسيهم بالعيد
جواهر... اتبسمت... يعني ماضايجه مني يوم
ام جواهر... لا يمه ليش اضوج هاهيه انسي
لَيلة عيد...
حصيره تتوسط كراج البيت والبنات كلهم ملتمات وينقشون بالكليچه ( نوع من انواع المعجنات معروفه عند العراقيين)
جواهر... راح اسوي بهذا القالب وانتي دره بهذا القالب وياقوت وماس وزمرد يساعدونه بالتمر
ام جواهر... ها يابنات ماكملتو اول صينيه التنور شِجرْته ( يعني خلت بالتنور الحطب واشتعل. والحطب صار فحم جاهز للخبز)
جواهر يمه بعد شويه حنكملها
هوسة الاطفال بالشارع والدفوف والصفير والاناشيد الي تحسسك بالعيد
.... ماجينا ياماجينا حل الچيس وانطينا
ويفترون على كل اهل المنطقه يدكون الابواب ويقرون هذا النشيد
اجو بالباب امي خلت الفوطه ( الشيله للنساء الكبار) وصاحت جيبي جواهر جيبي فلوس خل انطيهم
رحت اركض لاامي انطيها الفلوس مديت راسي من الباب الجهال رايجه بالمنطقه باوعت اكو شباب ثنين من دققت النظر ولد ذياب وجانو جايبين مثل الميزان لعبه تصير ودايثبتوها بالفرع تبعد عن بيتنه تقريبا بيتين
والجهال يمهم ملتمين ويهوسون وهم على هوستهم يضحكون
فززني صوت امي لما كلمتني ولج وين ماده راسج
ها هههه لا هيج يوم داباوع للفرع
ام جواهر... امسي ساعدي خواتج
رحت كعدت يمهم اشتغل ونطينه اول صينيه لاامي ورجعنه نكمل الثانيه
كملنه الكليجه ورحنه لغرفتنه نحضر ملابس العيد متحمسين هواي
زمرد... باچر حنروح لبيت عمو عبد الودود
جواهر... لا غير هم يجونه
زمرد... لعد ليش نحضر ملابس العيد هاي للطلعه
جواهر... حبيبي زمرد حتى لو مشترين ملابس جديده ومنطلع هذا مو معناها مانلبسهم اول يوم العيد احنه راح يجونه ضيوف ولازم نكون مرتبين
دره... خطيه ابويه اشترالنه لكلنه وكفانه يلا هو اشتره لو ماامي تلح عليه يشتري
جواهر... وبن اكو مثل حنية ابويه علينه
يلا خل ننام تره تأخرنه ولازم نكعد الصبح من وكت
تونه طفينه الضوه دننام اجه ابويه
عبد المجيب... ها يابنات نمتو
جواهر... كول يابه
عبد المجيب... تعالو نتسحر
جواهر... بابا باچر عيد
عبد المجيب... من السنه النبويه ان نتسحر ليلة العيد هذا مستحب عند الله
يلا يابنات تعالو شويت معلاك لبناتي الحلوات
جواهر... ماصحتلنه نساعدك
عبد المجيب... ماردت اتعبكم شفتكم مسوين كليچه. كلت هسه تعبانات وجوعانات
جواهر... اي والله يابه هو احنه جعنه بس مابينه حيل نسوي اكل
ابتسم ابوي وكال تعالو نكعد
كعدنه ناكل التمينه داير مدايره وهو يباوعلنه وفرحان بينه مره يسوي لفه لياقوت مره لماس
ام جواهر... ماتاكل
عبد المجيب... خل ياكلون ياروح ابوهم جوعانين وماكالو
ام جواهر... تعبانين ومابيهم حيل يوكفون على الطباخ
عبد المجيب... باجر على الغده تشريب معدل من ايدج الحلوه ياام جواهر
ام جواهر... تدلل بس تشريب لفيت دولمه هم وباجر ان شاء الله اسويلك تشريب وتمن ومركة طرشانه وباميه وتدلل
ابو جواهر... اي والله عاشت ايدج باچر يجون بيت اخويه
ام جواهر... هلا بيهم
ليلة عيد مرت جميله بلمتنه كلنه كملنه الاكل وشلنه الصينيه وغسلنه المواعين ورحنه لغرفتنه ننام بكل حماس للمصباح العيد مددنه كل وحده على سريرها جانت الغرفه ضلمه وشويه ضوه الفانوس الخارجي داخل للغرفه
دره... جواهر كاعده
جواهر... اي
دره... جواهر اكو سؤال واريد اسأله بس مو تتخبلين عليه مثل كل مره
جواهر... لاتجيبيلي طاري الضابط ومااتخبل
دره... لا ياضابط يمعوده هو وين واني وين
جواهر... لعد شنو
دره... تتوقعين فهد يحب عمه شيماء فعلا لو لا يعني كل هذا الي دايسوي مايسموه حب
جواهر... دره امي لو تسمعج تفكرين بالحب وبهالامور تره متعديها الج على خير سكتي لاتسمعنه
دره... انتي لشوكت تبقين جبانه ومعقده شبيج شداكلج بعني هو فضول
جواهر... برأي لا مايحبها
دره... وشمدريج يمه
جواهر... يعني هو لو يحبها جان اعترفلها
دره... سكتت لثواني بعدين تكلمت... تدرين شغله جواهر
انتي صح اكبر مني بس فطيره وعلى نياتج ماتعرفين
جواهر... شلون يعني
دره... يعني برأيج الواحد الا يعترف يلا يبين يحب
جواهر... لعد؟
دره... لا جواهر مرات نظرات اهتمام كلام يعني هيج
جواهر... وشمدريج ياام الحب
دره... قبل كم يوم شفت فلم لفاتن حمامه
جرت نفس بتأمل... شكد جان حلو كله حب
الحب حلو جواهر امنيتي احد يحبني مثل فاتن حمامه
جواهر... ولج اثگلي شويه شكبرج على هذا الكلام
ويلا نامي لااروح اكلها لاامي واخليها تصير ليله مميزه عليج
دره... گبر
جواهر... شگلتي
دره.. لا هيج
ليلة العيد جميله عند كل المسلمين بكل انحاء العالم وخصوصا عند الاطفال
مصباح العيد كان مشرق بالتكبيرات وهوسة الاطفال بالشارع تحديداً يم اللعبه الي خلوها ولد ذياب آسر و إيهاب جانو يم اللعبه واكفين ويصعدون بالجهال ويلعبوهم هوسه كانت اطفال هوااي ملتمين حتى من غير مناطق جايين
ماس بيومها بقت تتوسل بأمي يرحون وبعد الحاح منها قبلت امي وراحت هي وياقوت
بعد بشويه دزيت زمرد تتبعهم وتخلي بالها عليهم
مر وقت واحنه التهينه نحضر بالغداء بيت عمي عبد الودود كانو بأي لحضه ممكن يجون
نضفنه البيت اني وامي وطبخنه ورحت اسبح واغير ملابسي توني مكمله اجوي بيت عمي عبد الودود ونسوانه وجهالهم والفرحه صارت فرحتين بلمة الاهل والعائله
مر وقت لحد الظهر واجو خواتي جانت ياقوت وماس شابعين تراب من اللعب اول ماشفتهم عصبت عليهم
... ليش هيج شمسويه بروحج
زمرد... وج ميقبلون يطلعون جلبو باللعبه صار ساعه اكلهم نزلو ميقبلون
جواهر... فتحت عيوني بتعجب كل هذا الوقت انتي باللعبه لعد والجهال شلون مالعبو
زمرد... الجهال يصعدون دور واخواتج الافنديات يصعدون دورين
اجت وهمست بحذر تكلمني
آسر الي يصير عمه فهد هو مسويها لهاي اللعبه بالسكله مال الحداده مالتهم وهو دايصعدهم للجهال واول مااجينه كبل صعدهم لخواتي
ضيقت عيني... يعني هو الي دايصعدهم مو هم يردون
زمرد... هم رادو مره وحده يصعدون النوب وهو كل شويه يصعدهم ببلاش هم بس هم
جواهر... ليش مااخذ منهم فلوس
زمرد... مادري يكللها اني اخذها بعدين صعدي
جواهر... شلون يعني حياخذها من ابويه والله ان عرف ابويه هاي اللعبه مال بيت عمران الا يگلب البيت على راسنه شلون هسه
زمرد... مادري شلون
جواهر... روحي انتي هسه ولتحجين شي
زمرد... لا مااحجي
بقيت الوب ومتوتره عزه بس لايكوله
زين هو ليش مااخذ فلوس
ياربي تعدي على خير وميصير شي
صبينه الغداء وتغدينه وشربنه الچاي والكليچه واستمرت السوالف والضحك
الايام صارت تروح وتجي
الدنيا صيف وامي صارت تجفف بالخضروات والفواكه للشتاء
كل يوم ابويه يجيب شغله شكل
جابلنه باذنجان وصرنه نقطعه دوائر وننشره على الشمس لما يجفف
والعنب نسوي زبيب نتركه ايام على الشمس
المشمش نسوي طرشانه
الگوجه هم نجففها
والباميه نسويها گلايد وهواي لان نحبها وننشرها هم تيبس
التين نفس الحاله
جنه كل قصص وروايات عراقية كرار صلاح يوم نكعد بالساعات نشتغل اني واخواتي وامي تعلمنه
هواي علمتنه امي اشياء هواي شغلات عرفناها بالحياة
على هاي گعدتنه ماشفنه الا الباب ندكت
راحت زمرد تفتح الباب ودخلو نسوان اثنين
سلام عليكم هذا مو بيت الملا
ام جواهر... اي وصلتي تفضلي
... اشكرچ
ام جواهر... تعالو هنا بالاستقبال
... لا لا خلينه على هالكعده الحلوه هاي البنات يشتغلون ماشاء الله يحرسهم الرحمن
.ام جواهر... الله يسلمج
... الا ياهي منهم الچبيره
ام جواهر... اشرت على جواهر... هذه جواهر بنتي
... صدقه للحسن والله اول ماوكعت عيني عليها كلت مبينه هاي الجبيره ماشاء الله جوهره اسم على مسمى
اني ابني يشتغل بالقماش يبيع وي ابوه احنه بيت حجي داوود ابو الاقمشه لابد ماسامعه بينه
ام جواهر... والنعم منكم اي اعرفكم واعرف خاله سميره ام وجه اليضحك
... فدوه لعينج
احنه اجينه نريد بنتكم لاابني هاشم
والله وموابني وامدح بي بس صلاة وصوم وشاغول يكعد من ال6 الصبح يفتح المحل ويشتغل وي ابوه وابني هم بعده شاب عمره 27 سنه يدلل بنتكم ويصونها
هااا شكلتي
جواهر... اول ماحجت هيج مباشرة كمت وفتت جوه اركض خجلت من كلامها
... نزول خجلت تعالي عيني هو احنه شحجينه
ام جواهر... باوعتلها وكالت بعدها صغيره وتخجل
.... هسه شكلتي ياام جواهر
... والله اكول لاابوها واشوف رأيها هي ويصير خير
... والله عدنه بساتين احنه بيتنه 500 متر واحنه مو عائله جبيره هو اخوه الاكبر منه متزوج والله مارازقهم بضنه لهسه وهاي هاشم نزوجه ونفرح بي
... الله كريم حبيبه يصير خير ان شاء الله
... باچر اجيكم فدوه اني مااتحمل انتضر
والبنيه تربعت هنا بنص گليبي
... الله كريم ان شاء الله خير
جواهر... بقيت خايفه ومتوتره ومباشرة اجه بالي ابو الاقمشه الي رحناله اخر مره
عزه بس لا هو يربي شلون
اجت امي... ها جواهر عرفتيهم منو
جواهر... بقلق وخوف.. لا منو يعني
ام جواهر... هذه ام هذا الولد الي وكع المگص
جواهر... شنو؟!
ام جواهر... اني عن ناحيتي موافقه الناس اعرفهم بقه رأيج ورأي ابوج
جواهر... لا يمه فدوه اني مااريد اتزوج
ام جواهر... ليش كل البنات الي بعمرج تزوجو ليش انتي متردين تتزوجين
جواهر... يمه الله يخليج ماريد اتزوج
ام جواهر... شوفي بنيتي هذا الشي طبيعي
كل بنيه تخاف وتتوتر بمسألة الزواج
انتي لاترفضين اكعدي بينج وبين نفسج وفكري الزواج استقرار يايمه وانتي لازم تتزوجين
ابوج يسأل على الولد وان صفاته زينه وانتي الولد شايفته يعني الامور جايه من يمنه مو صح
... اي
... لهل السبب اريدج تفكرين وتنطينه رأيج
واني راح افاتح ابوج بالموضوع اول مايجي
بقيت بتفكير مشتت وقلقه كلش شعور وقرار اول مره امر بي اول مره احس انو لازم اتخذ قرار حقيقي بحياتي قرار مامنه رجعه بقيت افكر وافكر راسي راد ينفجر من كثر التفكير بيومها جنت متوتره كلش ومااتحمل كلمه حتى لمن اجه ابويه وامي حجت لاابويه اني ماكانت عندي الطاقه للاستماع للقرار وشنو يكول
لكن لاحضت من خلال ماامي تكلمه ابويه توسطت ابتسامه بوجهه كان مبين عليه الرضا
صاح عليه
جواااهررر
... بلي يابه
... تعالي بويه
اجيت كعدت يمه خجلانه ومدنكه استحي اخلي عيني بعيونه
تكلم وياي بطمئنينه... بويه جواهر انتي شرايج بهذا الولد
... بكيفك يابه
... لا يابه مو بكيفي هذه حياتج انتي بس اني راح اسهلها عليج وتبقه يمج
الولد اعرفه خوش ولد ومحترم بشكل والله يابويه عني اني اكول هنيال الي تتخله بيته
بيت حجي داوود اوادم وناس طيبين
اني عني راضي عنهم وبقت يمج بعد يابويه
بالنهايه انتي لازم تتزوجين لازم تكونين عائله وبيت سنة الحياة هذه
الله عزوجل خلقنا بهذا التكوين
وطبيعي ان تتردين وتخافين ويمكن تختنكين وتحسين انو فجأه انتي وحيده وغريبه لان حتقررين قرار مصيري لكن هذا القرار هسه او بعدين لازم تقررين يبقه الاختيار يابنتي مو كل مره عدنه فرصه نختار
فكري على كيفج ورجعيلي خبر وي امج واي قرار يريحج اني راضي بي
ترك قبله على جبيبني وراح لسريره تمدد
اني رحت تمددت وبقيت لوقت متأخر اباوع للنجوم وافكر الف فكره سيئه اجت ببالي
واحاول اكردها وتتغلبني
اباوع لااهلي كلهم غطو بالنوم باوعت للسماء هدوووووووووء والليل قاتم والنجوم تلمع بالسماء مثل المصابيح هالليله ماكو گمريه
اني كلش أحب ضوه الگمريه اكو صلاة علمها جدي لأمي وهي صلاة ركعتين لوجه الله تعالى ونطلب من رب العالمين مايخلينه محتارين بأمرنه
كمت توضيت ووكفت أصلي وكعدت على السجاده دعيت ونزلت دمعتي من خشوعي وفرط دعائي
ارتفع صوت الاذان يكبر بأسم الله أكبر
كان صوت تقشعر له الابدان
حمحم ابويه بالعاده من يكعد او يمشي يطلع صوت حتى ينبه المقابل بوجوده
كعد واجه يمي
... بويه جواهر كاعده
... هله يابه اي مااجاني نوم
... لاتقلقين بنيتي خليها يم رب كريم
... ان شاء الله راح اصلي
... الله يتقبلها صلي بويه صلي
صليت وكملت وامي كعدت تصلي واني رحت مددت حسيت بأرتياح شديد كدرت اغفى بسهوله
حسيت على صوت الاستكان واشتميت ريحة الچاي فتحت عيني لكيت اهلي كلهم كاعدين فارشين حصيره بالطرمه وكاعدين يتريكون
اول ماكمت ابويه باوعلي وتبسم كمت غسلت وجهي
واجيت
... صباح الخير
... صباح النور
ام جواهر... تعالي يمه كعدي تريكي
... كعدت توني اتريك وسألت امي
ها جواهر شقررتي
ابويه مباشرة رد... خليها على راحتها البنيه هستوها كعدت
بقيت ساكته وابويه كمل كلامه... ان اجت المره كليلها مهلونه اسبوع نسأل على الولد البنيه تقرر شنو ثاني يوم نرد جواب لعب دانلعب احنه
فتحت عيني على ابويه بفرحه كلامه ريحني
جنت حيل مخنوكه شنو بين ليله ويوم لازم اقرر قرار مصيري بحياتي
كملت ريوك وياهم وكمنه نلم بالسفره اني واخواتي
الوقت صار يمر للعصر امي همستلي
روحي بدلي ترتبي ممكن تجي ام الولد
... صار يوم
رحت اسبح وابدل وكفت كدام المرايا امشط اباوع لروحي
تذكرته اتبسمت لا اراديا
معقوله هو الي دز اهله ومو من باب الصدفه اجت امه؟
يمكن هو اكيد هو
صدك هو من شافني اول مره بقه كل شويه يباوعلي وامي بيومها ماتنلام لأن رزلتني
اذا الولد خوش ولد هاهيه اقبل قابل راح اخذ الاحسن
بس ماارد جواب هسه لحد مااقرر نهائي
ضفرت شعري ولبست گلاده صغيره
باوعت لنفسي بالمرايا مرتبه طالعه
مابيها دقائق واجت المره وامي استقبلتها ودخلو بالاستقبال سوالف اني ماطلعت عليهم بقيت جوه ماكلني الخجل
صاحت امي
جووووااااهر
... اجيت بخجل... بلي يمه
... تعالي سلمي وغمزتلي بعيونها وعرفت انو تريد اضيفهم شي دائما تسويها لهاي الحركه من يجينه خطار ونتأخر يلا نضيف
ام هاشم... عيني خجلانه عروسه ومن حقها
الا اكلج فدوه اسبوع شنو والله هاشم ميتحمل حيموت البارحه الليل كله يلوب يكلي يمه من الصبح روحيلهم كتله ولك عيب شيكلون علينه
اول ماحجت وجابت اسم هاشم طلعت من الاستقبال بس بقيت اسمعها وهي تكمل هذا كلامها
ام جواهر... والله ياام جواهر هيج قرار مو مال بين ليلة وضحاها يعني احنه هم لازم نسأل او ننطي مجال للبنيه تفكر
ام هاشم... حقكم عيني حقكم
بس اني والله البنيه كلش حبيتها كتله لهاشم يمه شلون طول شىلون عيون زرك يخبلن وشعر طويل
گالي يمه لاتوصفيها الي حرام خاف ماتكون من نصيبي
ام جواهر... الله يحفضلج وليدج
ام هاشم... فدوه لعمرج شوكت اجيكم اريد ببشاره ها
ام جواهر... ههههههه ان شاء الله خير
ام هاشم... اروح اني لعد واجيكم فد ثلاث ايام خوش وقت
ام جواهر... خليها للجمعه
ام هاشم... للجمعه للجمعه هاهيه
الله يصبر هاشم بس
يلا عيني اني اترخص
ام جواهر... مو بعد وكت
اني سمعتهم دخلت جوه بسرعه
احساس وشعور حلو صرت احس بي لمن تجي هي او يجيبون اسمه ماادري اول مره اعيشه حتى صرت احب اهتم بنفسي عندي طاقه للشغل لهواي اشياء
دره... طلعت ام هاشم اريد اطلع بره امشط شعري
جواهر... اي طلعت
دره... تمام سويلي طريق خل اطلع امشط
طلعت دره بره تمشط واني فتت جوه اشوف خواتي شويه ومااسمع الا امي على صوتها بالطرمه مو عيب عليك مدكول جيران جيبيلي العبايه جواهرر
ودره فاتت كبل
جواهر... ها شكو دره شبيها امي
ماردت دره دخلت كبل رحت نطيت العبابه لاامي وامي لبستها وهي تفور
راحت لبيت رائد جيرانه دكت الباب وطلعت امه
ام جواهر... يصير هيج ياام رائد ابنج رائد على السطوح واحنه ماخذين راحتنه بيتنه
اول ماعرفت شهكت عزه يعني هذا جان يباوع علينه
رحت لدره... دره هذا رائد جان فوك
دره... اي اني ماادري بي والله جنت داامشط ومامنتبها وامي شافته
اجت امي بهل اللحضه وعصبت على دره... وانتي غير تنتبهين غير تباوعين قبل ماتطلعين
دره... واني شمدريني كاعده بيتنه ماخذه راحتي
حجت وهي تباوع لبيتهم... نذل فوكاها مركز ويباوعلها
جواهر... جان يباوع لدره
ام جواهر... ولج اكلها بنضراته ديربالكم منه يمه هذا ضابط بالجيش مابينه حيل لطلايبه وانتي دره بالذات ديربالج منه خلونه عايشين عاد بلا مشاكل مو گلبي خلللللصصصص
كالتها بنفاذ صبر وراحت
وبقينه اني ودره وحده تباوع للثانيه وساكتين....
لربما تخطط الاقدار لشيء ما نحن نستبعده!
شكرا لزيارتكم عالم روايات سكيرهوم
