رواية بنات الملا الفصل السادس عشر بقلم رغد الموالي
عمه شيماء بعد غياب ماشفناها الا اجت
جواهر... عمه شيماء.... مامصدكه... هلا بعمه شيماء هلا تفضلي
شيماء... جواهر شلونج مشتاقتلكم هواي
جواهر... والله احنه اكثر تعالي تفضلي
شيماء... امج وين
جواهر... بالسوك هسه على جيه تعالي هنا كاعدين اني وخواتي
شيماء... الله.... والله اشتاقيت لهاي الگعده واللمه يم شجرة التين
شلونكم يابنات
هلا بعمه شيماء والله مشتاقيلج
وتلكوها يقبلوها ويعانقوها جنه كلش مشتاقين لروح
كعدنه نسولف...
دره... عمه شيماء مو اختي جواهر حتنخطب
شيماء... صدك.... الف الف مبروك ياسعيد الحظ هذا
جواهر... هذا ابو القماش يسموهم بيت حجي داوود
شيماء... بفرحه... صدك... الف مبارك هذوله يازينهم خوش ناس
دره... صايره تحجين مثل عمو جبلان يازينهم علمج ههههه
شيماء... العشره يادره تعلمنه
عمكم جبلان خوش رجال ومخليني اني وروح بين عيونه
بهل اللحضات اجت امي وفرحت هواي من شافتها لعمه شيماء
ياهلا..... وكل الهلا بشيماء صدك جذب كلت رحتي ونسيتينه
شيماء... اني انساكم شلون والله هواي اشتاقيتلكم بس تعرفين جان رمضان وراها عيد وخطار يجونه من محافضات ولازم نقيم بواجبهم
احجيلي سولفيلي شلونه الشيخ وياج
شيماء... هسه جنت احجيلهم للبنات والله ياام جواهر ونعم الرجال الحمد لله الله سبحانه وتعالى جازى صبري
ام جواهر... يعني مدللج شلونه وي روح
شيماء... يموت عليه يطلعه ويا يكعده بدواوين الشيوخ ويكله اريدك تصير رجال معدل مامقصر ويا ابد
ام جواهر... الله يوفقه ويسعدج
شيماء... اشكرج... حتى شوفي صاغلي هاي البتوت الذهب
ام جواهر... تستاهلين كل خير
بعد احجيلي من شافج شكال ماكال
شيماء... اووو لاتخجليني ام جواهر
سكتت للحضات بعدين تكلمت
اول ماشافني صفن عليه جان يكولي ماشاء الله
ولله في خلقه شؤون
انه ماتوقعتج بهل الحسن هذا
شيماء... دنكت خجلت ماعرفت شرد رفع حنكي بطارف اصبعه وتكلم
لاتخجلين مني
انه رجالج وانتي مريتي وام بيتي ومن اليوم اخليج بنص هاي عيوني انتي ووليدج
شيماء... اني اشكرك
جبلان... لاتشكريني انتي تآمرين آمر
يُبه لون ادري هيج تاليتها الكعده حتنتهي بهال المطاف جان من زمان نهيتها
وانه الي طلبت يدج من ابو جواهر مو هو الي كرمج الي بس والله ونعم الكرم الله يقدرني واجازيه
شيماء من اليوم اريدج تمشين على مايي شلون مااكلج ريحيني وانتي هم الي تردي يجرالج
انتي عندج ضراير ثنتين واكيد راح تصير غيرة نساوين بينكم الجبيره هي بنت عمي وهذه مافد يوم غثتني يعني ماتطلع منها العايزه والثانيه هذه معلعله گليبي انه ماودها هواي لجن لجل عيون ولادي متحملها وهي يمكن تعبج بس انتي خلي خلگج واخلاقج مثل جمال هالحسن هذا
لك بوييييييييه والله بس تشوفج لا تموت
انتن صح كل وحده بيتها وحده بس تجمعچن كراج وحديقه جبيره مشتركه
انتي اي شي تردين تعرفينه تسألين مريتي الاولى ام غايب
سميها ام غايب هي ماكدرت تخلف ولهسبب تزوجت عليها هواي ناس عبالهم بس ام محمد مريتي الثانيه هي مريتي لان هاي فقيره ام غايب ماتحجي
شيماء... تددل شيخ انت تآمر
الشيخ جبلان... اروحن فدوه ونذر لليكول شيخ....
ومن يومها هو حباب اني هم مااطلع هواي واكون وي نسوانه ملتهيه انضف بيتي اعلم روح اسوي شي بالبيت
ام جواهر... عفيه بيج شيماء والنعم منج انتي وين اكو مثلج
شيماء... اشكرچ... الا كوليلي بيت حجي داودد والنعم منهم ليش لحد الان مموافقين انتو
ام جواهر... والله ياشيماء ابوها شافها حايره وخايفه كال خل على راحتها مانلح عليها ونطاهها مهله تفكر براحتها
شيماء... والله خوش ناس هم لاتخليها ترفض خل تمشي بنصيبها
ام جواهر... اتمنه توافق حتى اطمن على الاقل من يم وحده
شيماء... ان شاء الله بالچ يرتاح من كلهن
بهل الاثناء ندگت الباب راح روح يفتحها شويه ورجع.... ماما.... ماما... عمي الشيخ اجه
كوله هسه جايه
يلا ياام جواهر اترخص اني
ام جواهر... بعد وكت وين رايحه
شيماء... لا هم يلا تأخرت ان شاء الله ازوركم بأقرب وگت مع السلامه حبيبه
ام جواهر... الله وياچ
بعض الناس معزتهم تبقه بالقلب شما تتغير الضروف
الايام صارت تروح وتجي ورجعنه خبر لبيت حجي داوود بالموافقه.....
كلللللللللللوووووووييييسشششش
والله هاشم اليوم ماتلمه الكاع من الفرحه
الله يهينكم بنيتي
هسه خلونه نتفق على المهر شكد تآمرون
ام جواهر... احنه من ننطي ننطي الرجال مايهمنه المهر ياام هاشم انتو بكيفكم الي يريحكم يرضينه
ام هاشم... هذا الكلام المعدل ومال الناس الخيره واهل اصول
واني مراح اضلمها راح اخليها حالها حال مرت حماها وان شاء الله مااقصر وياها
مشية الزلم بعد باچر شتكلون
ام جواهر... خليها للي بعده بين مانرتب الوضع هنا بالبيت
ام هاشم... اي شكو بيها من حقج عيوني انتي
يلا اترخص اني اروح افرح وليدي
جواهر... شعور جميل لكن مرفق بقلق وتوتر من القادم المجهول جنت اباوع الفرحه تلمع بعيون امي من بعد سنين من القلق والخوف الي عاشته
امي خلال هذه الفتره صارت تعلمني هواي اشياء
بنيتي جواهر ان شاء الله راح تتزوجين وتدخلين بيت وعائله احنه مانعرف شنو اطباعهم يايمه الناس بره بيتها شي وبداخل بيتها شي ثاني لهسبب اريدج ترفعين راس ابوچ
لاتجادلين ولاترفعين صوتج على رجلج او عمتج او عمج او حماج
يمه اريدج تخلين رجلج بين عيونج
الرجال يايمه يحب المره الطايعته والي تگله حاضر ونعم
من يجي رجلج تعبان اتلكاه بكلمه طيبه
بحجايه حلوه تزيل التعب
لاتتلكيه بالمشاكل لو شما يصير لاتحجيله شي يقهر ويغث وهو توه جاي من الشغل
ماتعرفين بره شنو صاير وياه
هاي تشوفيني اني وابوچ ما عدنه مشاكل ليش لان على مايه مثل ميريد امشي وهو هم يحترمني وياخذ برأيي ومخليني براحتي اروح اجي
الرجال يايمه اذا يشوف المره صاحبة عقل ناضج وجبير وهي رزنه وثكيله ينام متطمن مرتاح ويخليها براحتها
الاالبعض من الزلم يايمه يكونون مرضى نفسيا ميشملهم هالكلام
اسأل الله العظيم ان يسعدج بيتج وبحياتج الجديده
جواهر... اشكرچ يمه...
سكتت واني لزمتني خنكه واريد ابچي وبين عليه هالشي
ام جواهر... يمه جواهر شبيج كلامي ضايقج بشي
جواهر... لا يمه بس هيج اني مخنوكه
ام جواهر... ابتسمت بطمئنينه... وربت على كتفي... لاتقلقين ولاتختنكين يابنتي
كل البنات يخافون ويقلقون بس بعدين يصير الامر طبيعي وتتعودين
هزيت براسي نعم لكن الحيره متغلبه عليه
بدينه نرتب بالبيت اكثر واكثر رحت وي امي للسوق اشتريت فستان كان مورد بورد صغير مخصر تعليه كتافيات وياخه حول الرقبه
رجعنه من السوك لكيت عمه شيماء عدنه
ام جواهر... ياهلا بشيماء شنو هالجيه الحلوه
شيماء... ابتسمت صار هواي انتضركم كلت اشوف جواهر ياعمري الف الف مبروك خطوبتج
جواهر... اشكرج عمه
شيماء... تعالي يمي جواهر... فتحت الجنطه وطلعت صندوق صغير فتحته كانت بي مداليه من الذهب وتراچي
اخذيها هذه الج
جواهر... هاي شنو عمه شيماء لا اشكرچ
ام جواهر... هذا مو ذهبج شيماء
شيماء... اي... هذا لمن كنت بنيه ولمن تزوجت طلعت بي من بيت اهلي واله فتره مضموم مالبسه
ومراح تكون عندي اغلى من جواهر حتى انطي الها اخذي جواهر البسي وتفاخري كدام اهل زوجج
ام جواهر... والله هذا هواي يعني
ونظرت للارض متحيره وخجلانه...
شيماء... ام جواهر ليش تحسسيني اني غريبه ازعل تره والله
ام جواهر... اني حيل اشكرج
سمعت صوت هورن بالباب...
شيماء... هاي اجه ابو محمد( الشيخ جبلان)
اني اروح مع السلامه ومتهنيه ان شاء الله ياروحي
ام جواهر... باجر المهر مال جواهر تجين مو ماتجين
شيماء... من الصبح يمكم ههههه مع السلامه
جواهر... امضيت ليله كلها تفكير وتوتر مااعرف شنو هذا التوتر وليش؟
اذن الفجر وكمت فرشت سجادتي ووكفت اصلي طلبت من الله عز وجل ان يلهمني الطمأنينه ويسهل اموري بحياتي الجديده المقبله عليها
نمت بعدها وكعدت على صوت دره
جواهر... جواهر... اكعدي تأخرتي
بيش الساعه
.. 9:00
اليوم ابتدأ بشغل وتحضيرات للعصر كان كلشي جاهز واجو الشيوخ واهله والنسوان
يأدون المهر
ام هاشم جانت كلش فرحانه بيه واني عيني بالكاع من خجلي واعض بشفتي وافرك ايد بإيد امي جانت كاعده يمي نبهتني بركلة ايدها
انتبهت واستعدلت بكعدتي باوعت لكيت ام هاشم تباوعلي تبسمت ابتسامه طفيفه
مر وقت قصير بعدها طلعو الزلم وتبعوهم النسوان ومر اليوم بدون مضايقات
جان عندي فضول عارم بأن اشوف شكل خطيبي رغم شايفته قبل بس نظره اعتياديه كانت من دون امعان او انتباه كانت نظره متلاشيه اعتياديه
مرت الايام وبيوم اجت ام هاشم وياها هاشم للبيت
كانت اول مره يزورنه هاشم بيها توترت لبست قميص وتنوره وربطه وطلعت سلمت عليهم وكعدت يم امي كنت كلش خجلانه وكلما ارفع راسي استمع للحديث الي بين امي وام هاشم اشوفه يرمقني بنظراته
الي احرجتني كلش اول مره شاب يباوعلي هيج
رغم هذه النظرات كانت تحرجني الا انها كانت تخلي گلبي يدك بسرعه واحس بشعور الفرح يدخل لقلبي
سرقت كم نظره خاطفه كانت ملامحه تطغي عليها الجديه والثكل
بعض الناس لما تنظرلهم تكون شخصياتهم مرسومه في وجوههم وسبحان الله احس هاشم شخصيته تشبه شكله
هادىء ورزن من الهيئات الي تكون محبوبه
لحضات وام هاشم كالت لاامي اريد اكلمج بموضوع لوحدنه ممكن نطلع شويه
طلعو ومباشرة اجه كعد يمي هاشم اني حيل توترت وابتعدت بكعدتي
تكلم... لاتخافين ليش رحتي بعيد
جواهر... لا لا مخايفه
هاشم... تدرين اسمچ حلو
جواهر... اشكرك
هاشم... وتدرين اني حيل فرحت من قبلتي تكونين زوجتي
جواهر... هذا من ذوقك
هاشم... ابتسم بحب وكمل كلامه... شكد دعيت بصلاتي الله يجعلج من نصيبي
شكد تمنيت تكونين زوجه الي
جواهر... ليش هيج تمنيت
هاشم... مااعرف بس اول ماشفتج هيج حسيت بشي من يسار صدري طفر وراح يرفرف حولج
جواهر... دنكت بخجل كلامه جريء وجميل
هاشم... اسمچ حلو... الله جواهر يعني جوهره من السماء وصارت عندي
جواهر... تلعثمت مااعرف شنو ارد
كان ردي السكوت
هاشم... احجي شي جواهر... يعني حتبقين هيج ساكته
جواهر... دااسمعك
هاشم... الحمد لله انو بهذاك اليوم رحت للشغل وشفتج تدرين جنت تعبان قبل بيوم جان عدنه حصاد بالبستان وتعبت حيل ثاني يوم كلت خل ارتاح من الشغل اليوم ابويه لح عليه الا اروح ورحت وجنت ضايج بس من شفتج لااااا كل ضوجتي راحت
بقيت اتبعكم انتي وعمتي لما وصلتو للبيت ولمن سألت عليكم بالمنطقه كالو بيت الملا عرفتكم شكد فرحت
كلت عمي عبد المجيب عنده هيج بنيه
رجعت للبيت كتلها لاامي الا تخطبيها الي
... ولك يمه عدل بدل غير يجي ابوك واكله
... ابد خطبيها يمه لااحد يخطبها اموت والله
جواهر... ليش هيج كتلها يعني قابل اعرفك او تعرفني قبل
هاشم... لا بس حسيت اعرفج ومن زمان هم
هسه كليلي شوكت نكدر نزوج اني حيل مستعجل
تره ماانتضر اشهور اريد كلشي افضه بسرعه
جواهر... ليش... خلينه واحد يعرف الثاني اكثر
هاشم... لا... تعرفيني وره الزواج افضل
الخطوبهكلما تطول تصير بيها مشاكل واحتمال عثرات واحد من العشيره يموت تعال انتضر سنه وهم وره السنه تتزوج سكته اني اريد اسوي عرس افرح
جواهر... اتفق وي اهلي اني ماعندي مشكله
هاشم... هاهيه لعد
مر اسبوع واتفقو بنهاية الشهر يتم زواجي
مر شهر واحنه نحضر للعرس
كلشي حضرنه لحد يوم الحنه رحت للصالون ولبست البدله
باوعت لااول مره على نفسي بالمرايا للحضات حسيت اشبه الاميرات مااعرف ليش اجاني هيج شعور
رحنه للبيت وتلكتني امي بهلاهل وخواتي جانو كلش فرحانين بيه
كانت حفله جميله وبسيطه الاهل والاقرباء محلين الحفله
بنات خالاتي وبنات اعمامي باتو بليلتها يمنه فرشنه بالارض وكلنه نمنه احنه البنات وحده يم الثانيه ولليل كله مابطلنه سوالف وضحك عمه شيماء مقارب عمرها لعمرنه لهسبب الليل كله تسولف ويانه وتضحكنه ونسواني عمي كل شويه وحده صايحه من الاستقبال
.... كافي سكتوووو
... شلون طلابه يمعودات ورانه كعده الصبح
واحنه نسمعهم وتزيد ضحكتنه
... ولجن كافي خل ننام
... ياطلابة الطلابه
واحنه كوه نكتم ضحكتنه
شيماء... لا هاهيه بنات نامو عاد اني حكوم
... وين رايحه
... جوعانه اشوف شي اكله
اني هم
واني هم
واني هم والله كلش جوعانه
شيماء... يا يا يا يااااااا كلجن جوعانات هسه شلون حنفضها
دره... اكو اكل زاد مال الحنه هو بارد بس والله طيب نجيبه من الثلاجه ونجي
شيماء... رايحه اجيب واجي اكعدن لاتطلعن حس خطيه خل ينامن تأخر الوقت
احيانا لحضات تمر بحياتنه تبقه محفوره بالبال ماتنسي تترك اثر جميل بالذاكره
اسعدتني هذه اللمه بيومها
نمت كم ساعه وحسيت على صوت امي وخالتي يكعدونه
كومو بنات يلا ماعدنه وقت
مر اليوم حسيته سريع جداً بسرعه مر
لحد اللحضات الي اجو ياخذوني بيها
گلبي صار يدك سريع وتملكني خوف وتوتر وحزن حفارك اهلي ابتداء قصص وروايات عراقية كرار صلاح من اليوم
نزلت دموعي لااراديا وهاشم صار يمسح دموعي ويهمس يم اذني
لاتبجين والله لاأصيرلج اهل لاتبجين
واني مااعرف تزيد دموعي دره اختي مابطلت بجي اني وياها مو بس خوات صديقات وكلشي
شلت همها هواي شلون أحياناً راح تدبر امورها هواي كنت اساعدها ومخففه عليها الي هي بي
تمسح بدموعها دره لكن كانت مثل شلال
قبلت امي وخواتي واخيرا ابويه اجه يمنه وكف
خله ايدي بإيد هاشم وطبطب على ايدينه ثنينهم وتكلم
انطيتك اغلى بناتي سميتها جواهر لان اول وحده الي حسيتها جوهره الله عز وجل اهداها الي من الجنه
اريدك تحافظ على هذه الجوهره وتصونها
جواهر خوش جواهر وتستاهل رجال مثلك يحبها ويحافظ عليها ويتقي الله بيها
وانتي ياجواهر زوجتج لخيرة الرجال
هاشم رجال شهم وابن اصول معدل اريدج تطيعي وتسمعين كلامه وماتغثي
... تأمر يابه
... اسأل الله العظيم ان يمن عليكم بالصحه والبركه والرزق بالمال والاولاد
الله يسعدكم يابنتي
دنكت على ايد ابويه اقبلها لكن سرعان ما اخذها ومسح على راسي وقبل جبيني وقبل هاشم
خله العبايه على راسي واخذني هاشم وصعدنه بالسيارة الزفه
كانت فرحة هاشم جبيره وكأنه يعرفني من زمان او اخذني عن حب
زفونه بيت اهل هاشم ودخلنه لغرفتنه...
دره... دموعي مانشفت من ادركت ان جواهر حتتركنه وتروح تعيش ببيت ثاني هي الاقرب الي من بين خواتي
زفينه اختي واثناء ما الكل تصعد للسيارات اني بقيت لان مااكدر اصعد بسهوله هوسه الناس وازدحام مو مال اتعب ابويه وياي خصوصا هو مراح يجي ويانه بالزفه فراح اتعب بقيت اباوع للزفه والمعازيم هواي اهل المنطقه كلهمفرحانين لعرس جواهر
اثناء هذه الهوسه كلها شفت رائد جيرانه واكف وكان يباوعلي هم مباشرة نزلت عيني خجل وارتبكت باوعت يمنه يسره شفت ابويه عينه على سيارة جواهر حسيتخايف عليها هواي شعرت اني بالطمأنينه لمن شفت ابويه واكف قريب عليه خفت لايجي رائد مااعرف ليش يلفت انتباهي واحس بشعور حلو تجاهه لكن بنفس الوقت اخاف منه
يمكن لان ضابط بالجيش
رفعت عيني عليه مره ثانيه لكيته ميل راسه ويباوعلي متأمل ومتبسم
دنكت مره ثانيه اخجل استحي ابقه اباوعله بس
حسيت بفرحه جبيره بداخلي طرت طرت من الفرحه
بعدين شفت الناس والجيران بدو يصعدون بالكيات تمنيت اصعد وياهم بقيت مكتفيه بالنظر اجت ياقوت... دره ماتجين
دره... لا ماكدر
ياقوت... شلون لعد نروح وحدنه؟
دره... كلوله لاابويه مااعتقد يقبل بعدكم صغار انتو
عبد المجيب... يابه ياقوت ماترحين اختج دره ماتروح
ياقوت... لعد زمرد ليش تروح
عبد المجيب... وي خالتج حتروح انتي كعدي دره ماراح تروح
ياقوت... اريد اروووح ما. ما بابا الله يخليك
اجه رائد وكف يم ابويه... شبيها الصغيره ملا
عبد المجيب... تريد تروح بالعرس
رائد... خلها تروح
عبد المجيب... لا اخاف عليها بعدها صغيره
ياقوت... عمو رائد كله لاابويه يخلي دره تروح حتى اروح وياها
رائد... ملا ليش ماتروح وياها اختها
عبد المجيب... باوع ورد بكبرياء... لا ماتريد تروح
باوعلي وبسمه مرافقته... ليش ماتروحين مو عرس اختج هذا
دره... دنكت ورديت... لا تعبانه من هوسة العرس
ياقوت... لاتكذبين دره انتي مو كلتي ماكدر اصعد بالسياره
رائد... اصعدها عمي بالسياره
عبد المجيب... رد ابويه بفزه... لا لا تسلم
دره بنيتي اخذي اختج وروحو جوه حركت السيارات
فتنه جوه عرفت ابويه ضاج من هيج كال رائد
وره شويه دخل ابويه للبيت وجان الغضب واضح على وجهه
كعدنه يمه وصار يتكلم... بويه دره اريد اسألج سؤال واتمنه ماتكذبين عليه
دره...اسأل يابه
عبد المجيب... رائد حاچي وياج قبل لو هاي اول مره
دره... لا والله يابه هاي اول مره
عبد المجيب... يعني مرات من يلتمون نسوان الطرف بالمنطقه يكعدون بالدربونه ماشايفج مامكلمچ
دره... شايفني يابه بس مامكلمته ابد
عبد المجيب... ياب ديري بالج على نفسج انتي بنيه كامله من كلشي والكمال لله الشباب يابنتي عيونها ماترحم نضرات رائد الچ ماريحتني گلبي ماتطمنلها
احنه عائله الناس تحلف بيها جدج انسان اله سمعته الطيبه بين الناس ولحد الان الناس تترحمله من كثر ماعالج هواي ناس بالطب النبوي واني وله عمامچ ناس هم معروفه بسيرتها الطيبه ديري بالچ يادره تمشين وره عواطفچ
... صار يابه
حسيت البيت فرغ علينه من طلعت جواهر كآبه ووحده حسيت بيها من اليوم الاول
مشت الايام مابين نتشوق لااخبار جواهر ومابين الروتين الاعتيادي كنت التهي بعض الاوقات لمن اساعد امي بالبيت رغم اعاقتي بس ابد مااحس بهذا الشي لان متأقلمه ومتعايشه اشتغل واطبخ واغسل مواعين وانظف وي امي ادرس خواتي امي كانت تنقهر عليه ماتريدني اشتغل وياها هواي
زارتنه جواهر بعد ال7 ايام من عرسها بعد ما سوولها حفلة السبع ايام يسموها السبعه
كانت حفله حلوه اول مره ادخل بيت عيال جواهر اختي ودخلت لغرفتها شفتها
دره... الله هذه غرفتج حلوه بالعافيه جواهر
جواهر... الله يعافيج
ان شاءالله يوم الي نفرح بيج دره
لمن زارتنه جواهر اختي
امي جانت محضرتلهم الغداء واحنه كلش فرحانين بيهم اشتاقيت لااختي ولكعداتنه سويه
بعد الغداء وره ماطلع هاشم كعدت امي تسولف وي جواهر واحنه يمها
ام جواهر... سولفيلي يمه شلونهم عيالج وياج رجلج شلونه
جواهر... زينين يمه هاشم واهله خوش ناس طيبين
ام جواهر... الله يسعدج بنيتي
جواهر... هواي داشتاقلكم يمه مداتعود بدونكم
ام جواهر... تتعودين يمه منا وجاي ماالج غير بيتج ورجلج وباجر عكبه جهالج هاي الحياة لازم تتعودين بعد
دره... كل بنيه تحس بغربه اول ماتتزوج بوقتها ماحسيت بشعور اختي مافهمت شنو تعني
الايام صارت تروح وتجي احيانا احسها تمشي بصعوبه واحيانا احسها بسرعة البرق
بيوم امي طالعه واحنه وحدنه بالبيت
زمرد... عاجبني اشتري جبس او تمر هندي ياقوت روحي اشتريلنه
دره... امي ماموجوده وين تطلع
زمرد... مو بعيد هي من عم خميس من الدكان
دره... لعد خل تروح وياها ماس
زمرد... اي يلا ماس وياقوت روحو اشترولنه وتعالو
راحو يشترولنه مر وقت وقلقت عليهم
دره... زمرد روحي شوفيهم وين صارو ولج لاتجي امي والله تگلب الدنيا علينه
زمرد... اوووف والله بس الزمها لياقوت الا اموتها بسيطه
راحو وره بشويه اجت وياها خواتي
دره... بغضب... وين جنتو ليش تأخرتو
ياقوت... جنت مشتريه وراجعه واكو ولد ضربني بالطوبه وكعت كل الاشياء الي شتريتها والتمر الهند صار عليه تراب
صرت ابچي لان رجلي شوفيها نجرحت وطلعت دم من وكعت عليها
جان اكو واحد ثاني كالي اني اشتريلج بمكانها واخذنه وراح اشترالي حتى شوفي اشترالي اكثر
دره... ولج هاي اكثر من الفلوس الي نطيتها الج
ياقوت... مو هو كال شتردون كتله بس جبس وتمر الهند كلي بعد اشتري اني عندي فلوس وماس بقت دكله اريد مصقول ومصاص وشربت وهو يشتريلها والله كل شويه يجي يكلي ياقوت اشتري واني مااقبل بس هاي ماس المشايفه
دره... ولج ماس اني الج
ومنو هذا الولد
ياقوت... هذا الي جاب اللعبه بالعيد لعبنه هو هواي يحبني اني وماس
دره... منو هذا ولج
ياقوت... مادري شسمه بس هو ابو اللعبه
دره... عزه هسه شحسوي والله ابويه اذا عرف لايگلب الدنيا علينه رجال غريب يشتريلنه عزه شحنسوي زمرد
زمرد... راح اروح وارجعله الي اشتراه شتكلين
دره... اي افضل
زمرد... امشي ياقوت دليني منو هذا الولد
افعالنا العفويه قد تكلفنا الكثير..
شكرا لزيارتكم عالم روايات سكيرهوم
