رواية جسر الذكريات الفصل الخامس عشر بقلم مريم الحيالي
مريم: عززززززة عمو نزااااار ليييش
هاجر: شنو ليش شبيج مات
مريم: امي كامت تبجي وانقهرنا عمو نزار حباب ...وعلاقتة قوية جانت بأبوية الله يرحمة وعينا عالدنيا واحنه انشوف ابوية وعمو نزار سوة
....راحت امي للفاتحة .. وعمو نزار اندفن بصف بابا بالضبط گبر بصف گبر بسبب صداقتهم وعشرتهم الحقيقية عمو نزار جان اقرب حتى من عمامي الأبوية وكاتم اسرارة وشركاء بالحياة... وسبحان الله بالممات هم ... لأن اندفنوا واحد بصف الثاني
...هذا حال الدنيا يومية نفقد عزيز وغالي ... اهنا اني وهاجر صرنة بالمتوسطة ... بس حالة امي يوم عن يوم تدهور ومدنعرف السبب اتروح للدكتور وتاخذ ادوية وماكوا كل فائدة
مريم: ماما ليش متروحين للدكتور مرة لخ وفهمي كوليلة الدوة مديفيد
علية: باجر اروح العصر اليوم اختج هديل تجي بليل وباجر اخذها واروح
هاجر: وليش مكلتيلي اني اروح وياج ليش خابرتيها
علية: هي اتريد تجي اتشوفني وگلتلها انروح اني وياج
مريم: اجتي هديل بليل واني وهاجر نتسابق منو ايشيل اساور اول ... مدبدبة اتخبل واول حفيدة
ركضت شلتها حتى بدون ما اسلم ابوس بيها وهي السخيفة تضحك
علية: لج كافي خدودها ياااا شو جيبيها خلي اشوفها
مريم: اوكفي ماما خلي ابوس حتى ارجع اقرأ... بوستها الحد مبجت اخذتها مني هاجر
علية: ولجن دجيبنها عاد
هاجر: دوكفي ماما خلي انشوفها شنو السالفة
مريم: بقت اساور من ايد الايد رغم كلشي بس احنة ممرتاحين الوضعية امي لأن وجها اصفر وعيونها البياض مالتة على خضار ... كلنا... گلنة امي بيها ابو صفار
..... بس ياريت نفس ما اتوقعنا ياريت
....ثاني يوم رجعنا من المدرسة ب٤ ونص العصر.. دوامنا ضهري جان .... فتنا ماكو احد بس ابراهيم كاعد عالحاسبة
هاجر: امي وين لعد
ابراهيم: راحت هي وهديل للدكتور
مريم: شوكت راحوا شو من وكت
ابراهيم: غير علمود الحجز حتى ايلحكون
مريم: لعد صافي شوكت ينزل شو اتأخر هالمرة ... وامي فوك مرضها قلقانة عليه بس اتفكر بي
ابراهيم: بكيفة هو غير واجب بالموصل شيسوي يعني
مريم: شمدريني... جوعانة اني شتغديتوا
ابراهيم: مرگة سمج وتمن اني متغديت الف مرة اكول الامي لتسويها مناكلها واتسويها
مريم: انت متاكلها احنه ناكلها طيبة احبها ... هاجر بشرفج صبيلنه
هاجر: دكومي احسن الج وشبيج انتي متصبين اشتغل عندج
مريم: ماشي دبقي اروح اصب بس الي والله ... رحت بدلت وغسلت لكيت هاجر اتحمي بالاكل ...خوش تهديد
هاجر: امشي يلا دناكل باجر امتحان ودوام صباحي شراح انلحك...
.... اكلنا اني وهاجر ...وكلتلها راح انام شوية حتى اكعد اقرأ اذا ما انام ما اركز لو الدنيا تنگلب ... نمت للمغرب وگعدت
هاجر: كومي شوكت اتگعدين بعد ...
مريم: شنو امي وهديل بعدهم مجايين مخابرتيهم
هاجر: خابرتهم محولهم على تحاليل ودوبلار .. كالت نص ساعة ونجي
مريم: شنو يا ستار دوبلار ليش ...؟
هاجر: شمدريني ... دكومي يلا
مريم: كمت غسلت بس الخوف بداخلي كلشي ولا امي اني اول ما افوووت گبل اصييييح ماما علووش
واذا ماكو اسألهم واحد واحد امي وين الحد ما امللهم ... رحت للغرفة كعدنة اني وهاجر نقرأ
.... مر وقت وانفتحت الباب اجوي... بعدنا بالغرفة اجتي هديل ... شو عيونها حمر باجية ووجهها ميبشر بخير
هاجر: هاااا ياالله شكو امي وين
هديل: نصي صوتج بالهول .. كومي بدلي الاساور وسويلها ممة ماتت من الجوع
مريم: هاي شبيج وكت اساور احجي شكو ... وشبيج تبجين شكو امي شبيها
هديل: التحاليل مو زينة ... وورم عالبنكرياس عندها والقناة الصفراء مال الكبد مسدودة لازم عملية
مريم: هديل تحجي واني وهاجر مصدومين ... وهديل تبجي
هاجر: ورم شنو صدك تحجين فهمينة يعني بالعملية ايشيلها واتروح غير
هديل: عمليتها صعبة فوق الكبرى وميكدرون هسة الا الابو صفار ينزل ... حولنا على دكتور جراح بالحارثية باجر انروحله وانشوف شيكول
مريم: هديل احجي من الاخير الورم مو زين مووو ..حالتج مو مال بس عملية
هديل: بعد باجر الدكتور ايشوف التحاليل ولازم اتسوي رنين يلا ايشخصوها
مريم: اتعس يوم بحياتنا واتعس سنة علينا من بدايتها متبشر بخير امي هاي امي هي الي لامتنا وتعبانة علينا ابوية مات واحنة صغار وحافظت علينا رغم الضروف الصعبة المرينا بيها وهي بقت متحملة
.... راحت امي للدكتور وهديل وياها معافتها ابد .. واحنه بالبيت كاعدين على نار صافي مكلناله لأن هو بيا وضع بنص الموصل وواجبات كفاية عليه ...
هاجر: هسه غير من ادك عليها اتشيله ... اريد اشوف الموبايل المن سوو
مريم:منو هي شبيج عليمن دتخابرين
هاجر: اختج صار ٣ مرات ادك ومتجاوب
مريم: خاف داخلين للدكتور اصبري ... هي ترجع تتصل... اني احجي بس ميته قهر على حالة امي
وخايفين ليكون الي كالة الدكتور صح...؟
.... لليل واجوي ومع الأسف كل الامور متبشر بخير حالة امي مو زينة والورمة لازم يستأصلوها وايزرعوها ومكانها خطر عالبنكرياس ...والكبد تعبان القناة الصفراء مسدودة وهم لازم عملية
إبراهيم: هااا هديل شكال الدكتور فهمينة
هديل: عملية لازم الورم ايشيلوا وميكدرون هسه ايسوون عملية الا امي اتنام مستشفى الحد مينزلون نسبة الابو صفار
علية: مو بكيفة ماما ما انام مستشفى هو حجي اللسان عبالج سهل خواتج منو الهن .. خلي ايحدد موعد للعملية وهاهية
ابراهيم: شنو يوم هو بكيفج وليش شكو ..مو احنة اهنا وهنه ايروحن ويجن للمدرسة ماعليهن شي وهديل يمنة ...
هاجر: خابرتوا خوالي بيبي يدرون
هديل: بس خالة كريمة كلساع اتخابرني ومگلتلها باجر تجي وافهمها
علية: وشيسوون خوالج ماما ....هي على الله بقت
مريم: صعب والله صعب اباوع على امي مبين عليها المرض تعبانة ... شلون شراح ايصير هسة
هديل: باجر كال انروحلة للمستشفى ايسويلها دخول
..... امي مقبلت اتنام مستشفى.. امي من النوع اتوهس واتخاف بقت اتفكر للبعيد هواية .. خابرنة خالو كريم وگلناله كلشي ... ثاني يوم اجوي خوالي وبيبي وخالتي حسنة
بيبي: هااا علية عيني شلونج يمة شجاج .. ليش متنامين مستشفى هيج احسن اتضلين مو زين عليج
ابو مثنى: شنو القضية علية ميخالف قابل هاي اول عملية مابيج شي يابة اتسويها واتكومين بالسلامة
علية: كريم هي هينة مو زينة تحاليلي متت شلون البنات والولد منو الهم
مريم: امي حجتها وبجت كلنه كمنة نبجي .. شلون ما اسولف ما اوصف شعورنا والي عشنا بوقتها مرض امي اخذ من حيلنا مو هين لا والله مو هين
.... بالگوة قنعوا امي اتنام مستشفى .. اجتي خالتي كريمة وعرفت وبقت تبجي واتون اتموت على امي اتحبها .. ونامت أمي مستشفى وخالاتي كلهن بقن يتناوبن عليها وخوالي وياهم ابد معافوها... وعمامي ونسوانهم ايروحون ويجون للمستشفى عليها
هاجر: مبقى شي للامتحانات اخر السنة ... الثاني متوسط صعب لو اني هيج اشوفة
مريم: لا زين بس احنة ملحكنة كلشي ندرس اللتهينة بأمي .. بس ان شاء الله نكدر اندبرة حتى لو بس درجات نجاح
.... مر على دخول امي للمستشفى اسبوع .. وهديل يمنة واتروح وتجي للمستشفى واحنة نطلع من الدوام بملابس المدرسة انروح يومية لأمي
مريم: هلااااا علوش الوردة .... رحت حضنتها وبستها .... من اتشوفنا ضحكتها تملي وجهها
علية: هلوو حقيرة ولج ليش ما اجيتي البارحه
مريم: ملحكنا دوامنا جان ضهري العصر رجعنا وهديل كالت منكدر بعد
هاجر: شنو ماما شلونج متحسين احسن شوية
علية: الحمدلله عالمغذيات والله كريم ... شلونج يوم دتدرسن موو خوما اكو شي بالمدرسة
هاجر: لا شكو امتحانات مبقالها شي ودنراجع
مريم: كوة علينا متحملين هذا الوضع امي نايمة بالمستشفى وانروحلها زيارة بس المهم هي بخير كلشي منريد ... رجعنا للبيت
...مرت الايام واجتي الامتحانات ...وللأسف مكدرت اقرأ وائجلت ٤ مواد الرياضيات والاحياء والكيمياء والفيزياء
ست فائقة: مريم مريم مريييم
مريم: هاا ست هلو
ست فائقة: ها شلونج ليش ائجلتي الرياضيات جايبتها سهلة وجان ساعدتج بيها ... امج شلون صارت
مريم: ست مترهم هو اني كوة مدبرته مو تدرين وانوب هسه دنمر بوضع صعب ماكدر انجح بي ... بعدها امي بالمستشفى
ست فائقة: لتخافين ان شاء الله اتكوم بالسلامة دائما اسأل البنات عليكم
مريم: تسلمين ست متقصرين... ست فائقة هواي ساعدتني ودائما اتنجحني بالرياضيات تدري بوضعنا وتعرف بأمي مريضة
.... خلصت الامتحانات وامي صارلها ٢٥ يوم بالمستشفى... وأخيراً الدكتور قرر ايسويلها العملية
بس كال شيصير على مسؤليتكم
ابو مثنى: شلون يعني ... انطيني نسبة نجاح للعملية شكد
دكتور محمد: 40٪ للأسف ماكدر انطي اكثر ..والعملية مدتها من 7 ساعات الى اكثر
ابو مثنى: بيد الله اتوكل ان شاء الله ماكو شي
مصطفى: خالي صدك تحجي اوكف شلون اتريد اتوقع على موت امي
ابو مثنى: شلون لعد تبقى هيج وانباوع عليها الحد متموت العملية صعبة ومجرد نسبة خلي اتسويها هي هم تعبت
مريم: مصطفى جان خايف ومقابل بس خوالي كالوا تعبت ومو زين التأخير عليها ... والله لهناك وخالي وقع على العملية مال امي ... لأن ماكو غير حل
هديل: ديرو بالكم على اساور .. مو اتعوفوها تبجي
تخلص العملية وارجع
مريم: يعني خلي انروح شنسوي اهنا بلا صدك تحجون ... اني ما اصبر كوة لازمة نفسي والبارحة ما اخذتينا انشوفها
هاجر: اني اروح معلية
هديل: لتعبني بلا مو دنلعب احنا كعدن وسكتن احير بيجن لو بامي ... اكعدن انتظرن والله كريم شنو فائدة روحتنا
مريم: مقبلوا انروح بس هديل والولد لأن خابروا على صافي وكلوله واجه من الدوام امي رادت اتشوفه.. وخوالي اتلاثتهم اهناك وخالاتي وبيبي بس تبجي وتدعي مكدرت اتروح خطية بس ميتة خوف وقهر على امي
.... اليوم عملية امي ب٨ الصبح كعدنة وراحوا... بقينة بس اني وهاجر وجوهنا تلطم .. كلساع انخابر وايكولون بعد مطالعة
ل12 خابرت على هديل
مريم: شنو هديل كل هاي عملية طلعت لو بعد
هديل: ماكو بعد خوالي اتخبلوا رايحين جايين عالممرضين ميقبلون يحجون
مريم: خاف امي صار بيها شي ولج ...شلون بينة ياالله خلي واحد بيكم ايروح الغرفة العمليات
هديل: مو هو لعب روحوا بعدين اني اخابركم
مريم: سدتة هديل واحنة الخوف والقلق كاتلنة... الانتظار صعب والله صعب الله ليخلي احد بهيج موقف
والحد ال٣ العصر يلا امي طلعت من العمليات... 7 ساعات هي تحت العملية
هاجر: هااا هديل صدك الحمدلله يارب الحمدلله وشلونها زينة .. هديل خلي عمر يجي ياخذنا
مريم: احجي يمعودة شنو شبيها امي
هاجر: ديلا بيباي... طلعت امي ولج مريم مابيها شي
الحمدلله ياربي
مريم: الحمدلله يا اللهي الف الحمدلله... گلبنة خلص بهذيج اللحظة ... للمغرب اجة عمر رجل هديل علينة ورحنة
خالاتي مگابلين امي ويبجن اخواني حالتهم حالة خوالي عيونهم وارمة .. الوجوه ابد متبشر بخير
امي نايمة والصوندات بجسمها ... وبعدها بالبنج
مريم: هاا شلونها امي .... ماما حبيبتي الحمدلله على سلامتج اتسمعيني... ماكو امي مو يمنا ابد وجهها اصفرررر
خالة كريمة: عوفيها يمة شتسمعج طلعت من حلك الموت يمة يا ام هديل خية شلعتي گلوبنا
....شفنا امي وطلعنا مقبلوا نبقى أكثر مو زين عليها
هديل رجعت ويانا علمود بنتها وخالاتي بقوا يم امي
هديل: مشفتوا مصطفى شصار بي
هاجر: شبي ؟
هديل: من صارت ساعة 12 وامي بالعمليات وياهو الي انسألة ميجاوب ... وايروح ويرجع وخالي كريم حالتة اتعس
ابو مثنى: ليش محد ايكول شكو ليش اتأخروا ماتت وميگولولنة
مصطفى: كتلك خالي لتوقع لتوقع مسمعت مني
هديل: حالتنا حالة متنة گلنة صاير شي ومحد ديكوللنة ساكتين ننتظر جان مصطفى ايكول...
مصطفى: ماكدر اضل واكف اهنا اني رايح
ابراهيم: وين رايح شبيك انت.. مو احجي وياك
مصطفى: رايح للأمام الكاظم اكعد بحضرتة ... من تطلع امي خابروني
هديل: عافنة وراح ابراهيم صاح عليه وخوالي وهو ميجاوب
مريم: اي امي هاي امي طبعاً هيج انخاف وندعي ونطلب من كل امام ونبي ... انريدها بس اتطيب منريد شي
هاجر: ومنو خابرة وكلة امي طلعت ؟؟
هديل: حمادة ابن خالي كريم وكام يبجي بالتليفون ...كالة جاي اني بالطريق
مريم: الحمدلله يارب عدت سلامات
مرت الايام واحنة يومية انروح ونجي على امي ... الحمدلله كعدت وكامت تحجي ويانة بس عمليتها مو سهلة ... وننتظر الزرع مال الورم حتى نتأكد من مرض امي
هديل: خالي شوكت كال الدكتور يطلع الزرع
ابو مثنى: 10 ايام كال ويطلع بس هو متأكد من المرض خالي ايكول بس للاحتياط زرعنا
مريم: يعني شنو متأكد غير مطالع الزرع شلون يحجي من كيفة
ابو مثنى: شلون من كيفة خالي مدير مستشفى ويا 5 دكاترة كوترة هي .. بس هو ايكول بالرنين شي ومن فتحت العملية شي ثاني شفت
هديل: شنو شاف..؟ ليش هو كال استأصلت الورمة وشايل المرارة وفاتح القناة الصفراء والبنكرياس هم شايلة
ابو مثنى: لا خالي ايكول لگيت عگد صغار عالانسجة وهاي صعب تنشال وابد منجازف وانشيلها بس مدام اكو انتشار اذاً المرض خبيث
.... خالي يحجي واحنة بحالة صدمة اي والله صدمة واذا اكو شي فوق الصدمة فاحنة جنة هيج... خالو يعني سرطان مووو؟؟
ابو مثنى: اي خالي فايروس الكبد ... هيج سماه الدكتور
هاجر: بعد خلي يطلع الزرع يلا اصدك مو بكيفة هو گبل كال سرطان
مريم: مدنستوعب وانريد بس امل ولو اصغير... حتى ايخلينة انكول امي راح اتعيش مابيها شي
خلصت ال10 ايام وطلع الزرع ... وللأسف نفس ما كاللنا خالي امي بيها (سرطان) ومنتشر عالانسجة ولازم تاخذ كيمياوي حتى مينتشر اكثر
.... ابجي ابجي بالغرفة نبجي بغصة وحركة گلب وهاجر تبجي وهديل حالها اتعس من حالنا ... مدنصدك منريد نستوعب منريد متنا بجي ... خوالي يم امي بالهول وبيبي وخالاتي
بس امي تعرف مو مال ينضم هيج شي عليها ... كامت تبجي تفكيرها كله بينة مو بنفسها شايلة همنا
ايام صعبة ومرة ... ابد ممرت مرور الكرام علينا ابد
كامت امي تاخذ كيمياوي ... حولها الدكتور المستشفى الشعاع النووي الي بالكرادة كل ثلاثاء جرعة
هاجر: باجر اني اروح وية امي ... للمستشفى
مريم: اني هم اروح وياكم ... شعندي ابقى انتظر وايموتني القلق
....ثاني يوم الصبح رحنة امي كوة مصبرة نفسها واتبين مخايفة بس مو حجي وضعها مخربط مبين
وصلنا المستشفى وكال الجرعة اتخصصت روحوا للغرفة وهسه احنةانجيبها ... رحنة واجة الدكتور خله الامي الجرعة .. بس مو هينة امي ربع ساعة ولزمتها الرجفة واحنة اول مرة انعيش هيج شي منعرف هذا المرض ومخلفاته شنو
هاجر: ماما بردانة اغطيج ليش اترجفين
علية: ايي ماما اي بردانة جسمي يرجف ... غطيني
مريم : غطتها هاجر بالبطانية بس امي اسنانها يتطابگن خفت ... هاجر راح اصيح الدكتور خاف الابرة موالمتها ... رحت كلت للدكتور واجة وياية
الدكتور: شي طبيعي هذا لأن اول مرة الجسم ممتعود على هيج علاج قوي هسه نص ساعة واتروح الرجفة ... ميصير هيج اتخافون وتبجون الدعم المعنوي والنفسي هو أساس علاج هذا المرض
مريم: ان شاء الله دكتور.... راح عبالك سهل هو ..اعز انسان النا بالدنيا انباوع عليه اينازع وايصارع المرض
واحنة بس نتفرج ما بيدنا شي
شعوور حقير كلش...
