رواية جسر الذكريات الفصل السادس عشر بقلم مريم الحيالي
هاي الساحگة برجليها عالجنة ...
بحجيها اتعزب الماينشبع منه...
النگعد يم رجلها انگلها لا تبجين...
خاف تراب رجلج ينگلب حنة...
الما غمضت عين واحنة سهرانين...
الما تاكل حرف لمن اتوكلنة...
وماحسينة طول اعمارنا احنة ايتام...
اكو نسوان حتى الأب يعوضنا...
للشاعرة : شهد الخزاعي
........................................................
ابوس شيباتج يايمة شيبة شيبة
ما شفت مثلج مرة اطباعج عجيبة
انتي بالشدة ابو بضلة انام ... (هيج جانت امي)
ام ابد ماكو مثل طيبتها طيبة
العافية ماريد يمة العافية اتمناها بيج
( والله اتمنينة العافية بيج يا امي كلشي مردنة)
............................................................
مريم: رجعنا من المستشفى امي فد مرة بالگوة تمشي ... الجرعة مال الكيمياوي كلش اثرت عليها
بس انريد نوصل للبيت ... انخاف لتوگع بالشارع
..... وصلنا للبيت امي بدلت وراحت اتمددت عالجرباية ...
هاجر: يوم خلي اسويلج اكل تاكلين واخذي علاج .. ونامي...مماكلة انتي من الصبح
علية: ماريد شي بس غطوني بردانة ..جسمي يوجعني خلي انام
مريم: اباوع على امي الوجه اصفر وضعفانة ... وين امي الي اتخبل وسمينة وميهمها مرض جانت ليل ونهار تركض .... هاجر الدكتور مو كال لتاكل رأسن علمود لتتقيئ خلي اتنام ومن تكعد تاكل
.... غطتها هاجر ... وسدينة باب الغرفة وطلعنا ...
ابراهيم سألنا وجاوبنا شنو الي صار بالمستشفى وشكال الدكتور ... صافي اخوية بالواجب خطية حتى منلحك انشوفة بالموصل ... بس يومية ايخابر
مريم: هاجر علاج امي غالي التقاعد ميكفي ... شلون بينة انتي هم منتبها الهاي الشغلة لو لا
هاجر: ايي بس شسوي اسكتي لتزيديها على امي انوب .. تتدبر واخوج هم ينطي من راتبة ومستحيل خوالج ايعوفوها
مريم: والى متى كوليلي ... انضل كل ما انريد انخابر
هاجر: دافكر اشتغل
مريم: باوعت عليها ... هاي صدك تحجي
سالمين شتشتغلين كل عقلج... ودوامج
هاجر: متأكدة ما انجح مجاوبت زين بالامتحانات ... اللتهينة بأمي اريد اشتغل والراتب بس اخلي العلاج امي
مريم: وعلى اساس راح اتخليج دسكتي احسلج تشتغل .. عوفي هاي السالفة هاجر امي تنقهر اكثر مو زين عليها
هاجر: الله كريم سدي الموضوع خلي تطلع النتائج
وانشوف.. لتحجين كلشي هسه .. هديل العصر تجي هسه خابرتني
مريم: هاي هم يومية رايحة جاية ... والله زين من رجلها ساكت ومتحمل
هاجر: الحمدلله حباب عمر خوش نسيب ... تعالي اتغدي يلا
مريم: يلا جوعانة بس احس نفسي مسدودة ... بقينة انسولف اني وهاجر وكلساع انروح على امي انشوفها نايمة واتون ومصخنة بس الدكتور كال عادي ٣ ايام تبقى اثار الجرعة
.......................
هاجر: امي يوم عن يوم تتعب اكثر ..مريم متعرف كلشي واتخاف وبس تبجي خبلتني ... وهديل رايحة جاية علينه بقيت اني شوية اقوى واعتني بأمي
... بقيت وية امي بكلشي... اخذت ٣جرع وكل ما تاخذلها جرعة تتعب هواي وجسمها يبقى ايون عليها عالمهدئات يلا اتنام ...باجر عندها مراجعة يم الدكتور
هاجر: مريم راح اخابر خالة حسنة اتروح وياية للدكتور على الاقل جبيرة وتعرف مو مال وحدي اروح
مريم: اني وياج انروح على شنو مخابرة خالتي
هاجر: مريم نتأخر مو مال اثنينة نطلع ابقي بالبيت على الاقل اتحضرين اكل اتنظفين وفتحي غسالة مريم عدنا هدوم ... وملابس مصطفى مال العسكرية غسليهن وحدهن
مريم: ماشي بس اسوي تگلا لأن تعرفين ماعرف اطبخ ... ودكي بلا على خالة حسنة خاف متگدر تجي
هاجر: هسه خلي اجيب الموبايل... دکيت على خالتي
وگلتلها باجر امي عندها موعد يم الدكتور ومكالت شي بالعكس ... كالت شلون ما اجي باجر من الصبح يمكم
....كعدنا الصبح .... اتغدينا وامي سبحت وبدلنة ورحنة للحارثية ....
دكتور محمد: هلا بعلية ... لا لا لا ماشاء الله موردة
مبينة زينة
علية: اهلا بيك دكتور والله تعبانة وين زينة والجرعة كلش اتأذيني من اخذها
دكتور محمد: هو هذا المطلوب يعني جسمج ديستجاب للعلاج الحمدلله ان شاء الله مابيج شي
هاجر: بقى الدكتور ايسولف وية امي وطلب من عندنا تحاليل جديدة رحنة سويناها وسوينا سونار العمليتها
دكتور محمد: الحمدلله التحاليل زينة بس هسه اني بعد مالي علاقة مجرد اتابع حالتج من بعيد راح احولج على دكتور بباب معظم هو الي راح يستمر بعلاجج
هاجر: دكتور مو غير انت تعرف حالة امي من البداية وسويتلها العملية ...
دكتور محمد: وهذا الدكتور هم يعرف كلشي واني حاجيلة راح ادزكم عليه بس تاخذون التقارير وياكم
حتى ايشوفهن
هاجر: انطاني رقمة الدكتور وكال نبقى على تواصل ... رجعنا للبيت خالتي بقت يمنا مراحت كالت ناخذها الهذا الدكتور انشوف شيكول يلا ارجع
هاجر: مريم مريم لج دكوومي عود وصيتج اني كعدي خلي نتريك ب٣ موعدنا وية الدكتور
مريم: هاجر متكوليلي شبيج ب٣ الموعد مكعدتني من ال٩ شكو شعندج
هاجر: خالتي اهنا كومي خلي انظف وسوي ريوك امج مالها خلك اليوم
مريم: ليش شبيها ... كمت بسرعة كلشي ولا امي وهاجر متجي اتجيبلي خبر بي حظ ابد
هاجر: بس كلتلها امي مالها خلك كامت تركض...
البيت كله نفسيته صفر بسبب مرض امي
..... رحنة للدكتور الكال عليه دكتور محمد ... انطيتة التقارير والتحاليل وكال تبقى بمستشفى الشعاع النووي .. وراح احددلها الجرع
هاجر: دكتور امي اخذت ٣ جرع كل اسبوع وحدة دتاخذ
الدكتور: كلش زين هي راح احددلها 14 جرعة اخذت 3 بقالها 11 جرعة وان شاء الله بيها الشفاء يارب
علية: دكتور ليش 14 جرعة مو هواي الدكتور كال ماكو شي مجرد شكم وحدة بس اذا اكو شي كول
الدكتور: لا ماكو شي مجرد انحاصر المرض فقط وانتي عمليتج مجانت سهلة لتخافين مريضتنا العزيزة
كمل الدكتور من دنطلع ائشرلي ابقى ... طلعت وياهم گلت الخالتي حسنة ابقي يم امي نسيت الراجيتة خلي ارجع اجيبها ... رجعت للدكتور جان ايكلي
الدكتور: بنتي صح انتي صغيرة بس مضطر اكلج هالكلام لأن مداشوف رجال وياكم وضع المريضة ميصير وحدة بعمرج اتراجع بي... انتي شتصيرين منها ومنو هاي الوياكم
هاجر: ليش دكتور خوفتني امي بيها شي شنو شبيها التحاليل ... اني بنتها وهاي الويانة خالتي
الدكتور: بنتي والدتج بيها مرض خبيث وللاسف مرضها من النوع الاول الكلش خطر يعني ..احنة انسمي الشرس لأن قوي جداً ... والجرع الي حددتهن الها مجرد انبري ذمتنا امام رب العالمين وانكول ان شاء الله اتفيد بس احنة ندري بالنتائج شنو... حتى منكون قصرنا بس هو ميوگف مرضها من النوع الصعب .. راح ينتشر
هاجر: عيوني دمعت وحتى بس اباوع عليه وهو يحجي معرفت شنو اكله عبالك من كلامة ديكول ايسوا ... كتلة ماشي دكتور شكراً الك وطلعت ... امي انتبهت عليه
علية: هااا شراد منج الدكتور حجة وياج موو؟
هاجر:لا لا محجة بس نسيت الراجيتة ورجعت جبتها
علية: اتكذبين علية ولج مو شفتة اشرلج
هاجر: متوهمة ماما شبيج وين اشرلي ... بالگوة سديت الموضوع بس امي ميعبر عليها بس سكتت
عاد طلعنا اخذت الدوة من الصيدلية ورجعنا للبيت
.... لكينة خالة كريمة موجودة جاية دتشوف امي ...
وخالة حسنة راحت ... ومريم راحت وية خالة كريمة كالت يومين واجيبها
بقينة بس اني وامي ... اباوع على امي صافنة
هاجر: ماما شبيج شو صافنة يوجعج شي
علية: الكيمياوي هواي كتبلي وانتي ادري بيج اتكذبين مادري شحجة ويااج ... راح يوكع شعري كلة مثل خالتج انتصار موووو؟
هاجر:گوة لازمة نفسي شكلها .... لا ماما مو شرط خالة انتصار علاجها يختلف عنج وعود انگص شعرج يوم لتفكرين هيج يطلع احلى من قبل ... اقشمر روحي مادري اهدي امي ماعرف
علية: ماما اني مو غافلة ولا ماعرف شنو اضرارة ... المهم باجر موعد الجرعة موو خابري خالتج حسنة خلي تجي
هاجر: مناقشتها بعد لأن هذا المرض مابي اي مبرر .. خابرت على خالتي گالتلي الصبح اني يمكم
.... اجتي خالتي رحنة للمستشفى الدكتورة كالت مراح انطيها الجرعة اليوم سوولي هاي التحاليل يلا .. والدكتور شدعوة كاتبلها هلكد جرع المريضة وضعها ميسمح راح انطيها بس ٦ جرع وراح اتصير كل ١٤ يوم
هاجر: كتبت التقرير والدكتور جان موجود كلتلي روحيلة .. رحتلة شاف الدكتورة شنو كتبت معلق على شي بس وقع وختم الورقة وكال مثل متكول سوو
... رجعنا للبيت.. وكلتلها الامي ماما بعد ما اخابر خالتي ولا اتخابرين على هديل اني وياج انروح ونرجع
علية: متگدرين ماما هو حجي شلون وحدج لازم واحد جبير وياج
هاجر: لتخافين اكدر خوما خالتي اتضل رايحة جاية ... اني وياج انروح بعد ما اخابرها .. سكتت امي محجت
...گلت خلي افتح موضوع الشغل وياها ... اكلج ماما المركز الصيني بالتجاري رايدين موظفة شنو رأيج اذا اشتغل وياهم
علية: ليش ماما متنة من الجوع بعدني مميتة ... والحمدلله والشكر التقاعد وراتب اخوج مكفي ... وعمامج شايلين الايجار .. ومدرستج خاتون مو شفتوني اتمرضت استغليتوا الوضعية
هاجر: لا ماما مو هيج اسم الله عليج ليش هيج تحجين ... بس اني من هسه اكلج راسبة هالسنة لان اللتهينة بعمليتج وملحكنة ندرس ... ومريم مأجلة 4 مواد
علية: هاي هم بعدين اللزمها مأجلتلي مواد على شنو ... وكاعدة اتفرفر اني نسيت وخليتها اتروح وية خالتج احسن متگعد تقرأ خلي تجي اني اعلمها
هاجر: هسة شكلتي ماما .... اشتغل؟؟
علية: عوفي هذا الموضوع هسة خلي تطلع نتائجكم والله كريم
هاجر: امي سدت السالفة ملحيت عليها هي مابيها حيل حتى تحجي ... مرت الأيام وصدك طلعت راسبة بس مريم ناجحة بس تمتحن بالمواد الي مأجلتهن وامي من شافتني مصرة عالشغل قبلت ورحت للمركز الصيني جان مال اثاث منزلية والله واشتغلت بي اسبوعيتي ٧٥ الف
.... الحمدلله امي شوية احسن ورجعت تطبخ واتماشت وية مرضها ... المهم زينة كلشي منريد
مريم كاعد تقرأ مبقى شي على امتحاناتها ..عدها واهس اتكمل دراسة بس للأسف ضروفنا صعبه ومحالفنا الحظ بلكت تنجح
مريم: هاجر سرى اتسلم عليج هي والبنات وكالت تعالو يمي عالغدة ... والله اني ضايجة شتكولين انروح
هاجر: يا سرى ... وشلون انعوف امي وشغلي لليل يلا ارجع .. شوكت العزيمة
مريم: طبعاً منعوف امي وحدها انخابر هديل تجي يمنا .. وكالت السبت واسراء ولبنى هم يجن
هاجر: مادري شوفي امي بلا ... راحت مريم تتلوك لأمي اذا متاخذ الشي التريدة متعوفها .. والله وقنعتها وكالت روحن بس لتتأخرن
................................................
مريم: حجيت ويه علووش وقبلت انروح البيت سرى للعزيمة مال الغدة ... سودة علية امي ذبلانة بس مابيدنا شي على حكم رب العالمين
.... بدلنا ورحنة ... اسراء ابوها كوة اقتنع بس هي العينتين شلون قانعتة
مريم: اتغدينة وكملنة وسرى كالت
سرى: امشوا خلي اشغللكم العرس مال سجى ونتفرج
هاجر:اي صح كل ما اريد اكلج وانسى
مريم : صعدنا فوك الغرفة سرى اني وهاجر واسراء واخت سرى الصغيرة دنتفرج العرس مال سجى .. جان اسراء اتكول
اسراء: اكلكم اسمعوني اني كذبت على ابوية يلا اجيت
سرى: صخاام ولج شكلتيلة الطارق شراح ايخلصنة منة
هاجر: عزززة بعينج وليش اتكذبين مكلتي رايحين نتزقنب ونرجع
مريم: اصبرن خلي نفتهم ... اي خاتونة شكلتيلة
اسراء: مو شسوي ميقبل وامي هم كوومة قنعتها الا كلتلهم الخطوبة مال سرى صديقتي يلا قبلوا
مريم: هي بس كالت الخطوبة .. وسرى ضحكت ضحكتها الشهييرة المفضوحة ... متحملنة اني وهاجر هم ضحكنة
هاجر: گبر على هالكذبة هاااي صدك تحجين
سرى: الللله اليوم خطوبتي العريس وين بسرعة
مريم: ابو اسراء العريس لان حضرتها هي الي اخترعت هالكذبة .. ههههههههههههه عزززة ماتوا ضحك البنات
اسراء: اشتعلوووا ابوية ابوية ابوية
هاجر: ويييييينة ياااا شبيج
مريم: خرب يومج وين ابوج ... اباوع شايلة الموبايل وواكفة اتصيح ابوية
اسراء: ابوية ديخابر ولكم شگله
سرى: كوليلة العريس بعدة مجاي هسه بدت الخطوبة ...ههههههههههههههههاي
هاجر: فضحتنا بنت الاوادم ولج صوتج هيج اليضحك
مريم: كوليله بعدها الخطوبة مخلصانة كملي كذبتج شتسوين لعد
اسراء: هااا بابا اي اي البنات هنا هااا اغاني لا مو اني صعدت فوك حتى اكدر احجي وياك
مريم: اشتعلوا اغاني ولجن شغلن اغاني وعلن الصووت ... نبسبس اني وهاجر وسرى انوب الريمونت ضاع انريد بس انطلع القرص حتى انخلي غيره ماكو ... وشنو ميتين ضحك
اسراء: جااااي وين جاي هااا يلا بكيفك ايي هسه اكلها تطلع ويايه حتى اتسلم عليها
سرى: عليمن ايسلم ولج
اسراء: عليييج ابوية راح يجيني كال خلي تطلع صديقتج اسلم عليها
هاجر: وتطلع بهالخلقة هاي ميكول شنو من عروس لا حفافة لا مكياج .. صخام الصخمج اسراء مكذبتي الا هاي الكذبة
مريم: سرى بسرعة الفستان الي لبستي بعرس سجى وفلي شعرج وخلي كحلة وحمرة اي شي .. فضحتنا بنت الاوادم اسراء اذا مو بالصوندة تنكتلين دصبري
.... سرى شعرها طويل كلش فتحتة ولبست فستانها الي لبستة بعرس اختها وخلت مكياج خفيف بس المشكلة مو اهنا المشكلة شلون راح انزلها من فوك امها شنكللها
هاجر: اكلج وامج شلون شراح انكلها
سرى: معليجن عليه ... امشن طارق وين اسراء خانم .. هذا ابوج اني اعلمة ميصدك بينا موو بسيطة
مريم: امشن أمرنا لله .. نزلنا خالة ام سرى استلمتنا تحقيق بس مكدرنا انكذب بعد سرى سولفتلها كلشي كامت تضحك الحمدلله عدت على خير ..خابر ابو اسراء كلها اني بالباب طلعي
.... رحنا نركض وكفنا ورى الباب واسراء اتباوع علينا اتكول لتضحكن راح ننفضح .. وسرى الفضيحة كوة لازمة نفسها ... هي وفستانها وفاله شعرها يمة ههههههههههههههه
هاجر: سرى عجبتج الوضعيه اضاهر صدكتي نفسج اليوم خطوبتج
سرى: غير هاي العوبة اذا ما كتلتها بس خلي اتعدي سلامات ... اسكتن اجه ابوها
مريم: اني وهاجر واخت سرى واكفات ورى الباب واسراء برة يم ابوها وسرى مطلعه بس راسها ... يمة انريد نسكت منكدر شلون تحجي بهدوء ... والمصيبة من كلها الف مبروك عموو شايفة كل الخير
هاجر: ولكم بطني ماكدر بعد اختنكت هههههههههههههههههههههههههه
مريم: فاتت سرى وكعدنة بالكاع بالطرمة وضحك .. الموقف مينسي عزززة وانوب ابو اسراء مصدك ... والله يا اسراء على هالدكة هاي ... اتونسنا وغيرنا جوو شوية من بعد عملية امي ومرضها ... رجعنا المغرب هديل وهوستها بعدها واساور افندي تسحف وامي متخبلة عليها حييل اتحبها
.... مرت الايام وللاسف طلعت بالفيزياء يعني رسبت بالثاني شبعت بجي بباب المدرسة ورجعت الطريق كلة ابجي... وصلت للبيت عيوني وارمة امي بسرعة عرفت
علية: انتي شلون اتئجلين بدون متكوليلي بس فهميني شلون بيجن هاي اتمرضت هيج طاح حظجن اذا متت شلون شراح ايصير بيجن
مريم: اشهك وابجي ماما وكت هذا الحجي شسوي ملحكت اقرأ هديل افندي بقت بنتها يمنه ومجنت الحك ادرس ونجيج للمستشفى والله كوة قريت
.... سنة كاملة راحت علية مع الأسف... بس مرض امي هواي اثر على حياتنا هوااي
...................................................
هاجر: مريم طلعت راسبة شبعت بجي .. بس شنسوي ضروفنا مسمحتلنا سنة ال٢٠١٠ ابد مجانت خير علينا ... وحتى هسه احنة ب٢٠١١ وهم نفس الوضع
اني بعدني اشتغل .. واروح واجي وية امي للمستشفى .. باجر تاخذ جرعة
..... رحنه الصبح اخذت جرعة امي ورجعنة .. بس تتعب امي واتصخن وصلتها للبيت ونزلت رحت جبتلها معلاك شوي ... بس سودة علية هي تاكل وهي تتقيئ متكدر ... عافت الاكل عالنص وكالت اريد انام
مريم: هاي انتي كل مرة اعيد عليج هالسالفه... يعني اول متجون لتنطيها اكل
هاجر: شسوي غير علمود العلاج ... اباوع على مريم مبينة باجية...وانتي شبيج عاقجة الوجه شكو
مريم: مابية ضايجة على امي... وصارلي هواي منايمة على ايدها كل ماروح اتكولي ماكدر ايدي تخدر مو مثل قبل
هاجر: بلا انتي صغيرة شكبرج اتصيرين عبالي شوف شبيج... شسويتي غدة
مريم: اي صغيرة ... گليت كبة وبتيتة بقيتلج عالطباخ
هاجر : رحت اكلت ... وافكر شوكت امي اتطيب معقولة هيج وترجع نفس قبل ... مريم كلش متعلقة بامي من هي وصغيرة متنام اذا مو على ايدها وهسه امي متكدر تتعب ...
..... مرت الايام وامي فد نوب صارت حتى متكدر تدخل للحمام .... تعبت كلش
.... كعدنة الصبح هديل يمنة دك موبايلها منسمع بس ياااااا شوكت
مريم: صخااام شصار بعد من الصبح
هاجر: اوكفي خلي نفتهم امي اتكلها الهديل شكو ولج ... احجي وهديل كبل بجت وسدت التليفون
هديل: هذا حمادة ايكول امي ماتت اليوم الصبح
مريم: ياااااا خالة انتصااار ماتت
علية: يا يمة نصرة اويلي علييج عييييني
هاجر: خالة انتصار مرت خالي كريم وهي هم بيها ذاك المرض ومن جنت اخذ امي تاخذ جرع جانت هي هم نلكاها اهناك وعلاقتها هي وامي كلش زينة
رحنة البيت جدي الدنيا مگلوبة وولد خالي ايكسرون الگلب ... وخالي يبجي عليها من جابو التابوت
....اووف امي تبجي واتدهورت صحتها ..ومنا عمليتها كامت توجعها .... خلصت القاتحة ورجعنا
امي صافنة واتفكر ... نفسيتها تعبت ...هذا المرض ميرحم احد ابد
صرنة بنهاية السنة ..خابرتني هديل
هديل: هلو شلونج لعد شو انتي جاوبتي امي وين
هاجر: الحمدلله انتي شلونج توري شلونها... متمددة بالهول هسه انطيجياها ... رحت لأمي كلتلها هاج يوم هاي هديل تحجي وياج
علية: هلا ماما شلونج شو ما اجيتي هالاسبوع .... هاا خير ان شاء الله... مبروك يوم ... لا مالي خلك شوية
هاجر: على شنو مبروك اسمع امي .. شنو الشي الحلوو الصار واحنة صارلنة سنة مفرحانين ولا مرتاحين ... بعدين عرفت هديل حامل
..... اني بالدوام وخابرني رقم غريب شلتة وطلعت الدكتورة الي تنطي الجرع الامي من عرفتها كلت يا ستار شعندها مخابرة
الدكتورة: حبيبتي انتي اقارب المريضة علية رحومي
هاجر: اي اني بنتها اتفضلي طلعت التحاليل مال امي؟
الدكتورة: اي حبيبتي خابرتج علمود هذا الشي للأسف الجرع مدتجيب نتيجة وحتى الشعاع النووي الي انطينا الها مفاد ... تعالي اخذي التحاليل وراح اكتبلج حبوب كيمياوي خليها تستمر عليهم .. والله ايشافيها يارب
هاجر: عبالك واحد رگعني على راسي ... محجيت اي شي غير بس كلتلها ان شاء الله شوكت اجي
الدكتورة: بكيفج عزيزتي بس لتتأخرون حتى تاخذ العلاج
هاجر: سديتة منها ... وحتى مكدرت ابقى اخذت اذن من ابو الشغل وطلعت رجعت مشي البيتنا .. شراح اكول الامي بلا شلون راح اقنعها
...... وصلت لكيت مريم نايمة هالسنة مداومت مقبلت مقهورة ... وامي كاعدة بالهول الحمدلله احسن
علية: هلا يوم شو من وكت اليوم جاية
هاجر: ايي ماعدنا شي واني تعبانة طلعت ... اكلج ماما الدكتور وقف الجرع عليج
علية: هاااا ياالله صدك تحجين يعني زينة غير
هاجر: اباوع على امي وميتة قهر ... اي يوم زينة شبيج لعد وكال تبقى تاخذ حبوب وهاهية باجر الصبح اروح اجيب تحاليلج والعلاج ... الحمدلله مسألتني اكثر ولا اني كلتلها حتى متبقى اتفكر
...... مرت الايام وامي تاخذ باليوم ٦ حبايات كل وقت حبايتين عدال جرعة وحدة ... بس انتهت حالتها اتدهورت كلش ... وهديل حامل اتروح وتجي علينة ... بحيث اوكف بالباب مال الهول واصيح يووم ماما يوووم اخاف والله عبالي امي ميتة
علية: هاجر اريد اسبح ماما بس ماكدر خليلي كرسي بالحمام اسبح اني وكاعدة
هاجر: لا ماما اني اسبحج اطلعج ورد اليوم ... حظرت الحمام الامي وفوتتها ... شعر امي يوكع صار شعرها خفيف .. داغسله بالشامبو جان اتكلي
علية: عوفي هو شباقي بي جيبي المگص وگصي كلة
هاجر: لا اراديأ دموعي نزلت كوة حجيت ... ليش اتگصي ماما هو خفيف صاير بس موكع عوفي
علية: اتقشمرين عليه لو على روحج گصي كله .. اول وتالي اصير كرعة هو خلص شبقى بي
هاجر: جبت المگص وسويت مثل مگلتلي وگصيت شعرها كلة .... طلعنا بدلتلها جان اتكول ...
علية: اريد اروح للكاظم اريد ازور ...
هاجر: متكدرين تمشين ماما شوية صيري زينة واخذج ...
علية: بالعربانة ماما من نوصل اجريلي وحدة
هاجر: مكدرت اكلها لا ... اخذتها وخليتها بالعربانة وفتت زورتها امي تدعي وتبجي عفتها ترتاح ... لأن هي دتشوف نفسها مو زينة
..... مرت الاشهر وهديل جابت بشهر الثامن 14/8/2012 جابت ابنية (تقى) صار عندها اثنين بنات اهنا اجتي يمنة بقينة اني ومريم انداري بيها وبأمي ... الحمدلله امي شوية صارت احسن ... بس السكر يصعد وينزل عندها وضعفت حييل ضعفت
مريم: ماما تقى زركة مووو
علية: بلا اساور من اجتي جنتي صغيرة واتغارين وگلنة ميخالف ... هسه كبرتي بعد هاي هم اتغارين منها
مريم: شنو السالفة علووش شجاب الغيرة داسأل والله عبالك سمرة مو مثل توري بيضة
هاجر: انتي اتغنين ترى تقى تشبه امي بالضبط اتخبل
هديل: ايي خالة هنية هم كالت بنتج تشبه علية
مريم: يلا لعد مدام تشبه امي حلووة مو زركة
هاجر: مريم كلش اتعلقت بتقى وشايلتها وكاعدة وحتى اتسويلها ممه احنه متفاجئين معقولة هاي اختي شعجب هي متعرف للجهال
مرت الأشهر ووضع امي من سيئ الى اسوء ... كعدنا الصبح لكينا بيبي وخالة بيداء وخالة ليلى جايات من ديالى امي اشتهت تاكل باجة ... وخالة بيداء كالت والله لأسويلها بس امي المي اذا اتشربة اتقيئ معقولة تاكل باجة
.... وجسمها كله ورم حتى رجلها كوة تمشي ... وبس نضغط على رجلها يطلع مي من جسمها ... والدكتور كال ميفيدها بعد اي علاج كل ما انخابره ميقبل ايكول لتجون لتجيبوها
...... خالتي طبخت الباجة وسوينة غدة كلنا ملمومين امي عالجرباية بالهول مخلين جربايتها علمود اليجينة ... بعدها بس ضاگت السوب قيئت
... خالاتي انقهرن وحتى احنة كوة اتغدينة ... والباجة محد ضاگها ابد لأن امي اشتهتها وسويناها وماكلتها ...
هاجر: صاحتني امي وكالت اخذيني للدكتور ... كلتلها شعندج رايحتله ماما كال لتجي بعد هو تبقى عالعلاج
بس مقبلت عاندت الا اتروحله... اتصلت على دكتور محمد وفهمته وكتله جايين وامي متدري بكلامك واصرت الا تجيك ... كال هلا بيها جيبوها اني هم اريد اشوف مريضتي
ثاني يوم طلعت من الشغل ورحت للبيت ... لكيت خالتي حسنة جاية خابرتها اني كلتلها وابراهيم اخوية هالمرة راح وياية طبعاً صافي وابراهيم ميتين على حالة امي وخصوصاً ابراهيم متعلق بأمي مثل الطفل بس شيسوون مابيدنا شي وصافي بالواجب
هاجر: صاعدين بالتكسي جان امي اتكول
علية: ابراهيم ماما راح احجي وياك وخلي هذا الكلام براسك... خواتك يوم خواتك دير بالك عليهن سمعتني اذا صارلي شي ماعندي امانة غيرهن
خالة حسنة: هااا علية شنو هالحجي خية صلي عالنبي كولي ياالله مابيج شي
هاجر: اني متحملت بجيت ابراهيم دمعت عيونة كوة لازم نفسة ... حتى مجاوبها سكت وصلنة للدكتور نزلنة
دكتور محمد: يا هلا بلولة شلونج كالو رايدة اتشوفيني
علية: هلو بيك دكتور اي اجيتك ولدي وبناتي ميكولولي الصدك ... ردت اشوف وضعي اني ادري بروحي مو زينة وهمه ايكولولي مابيج شي
دكتور محمد: وهذا الصدك مابيج شي ... زين شتريدين انتي هسه كوليلي على اللسانج الي اتريدي اسويلجيا ..
علية:اني احس نفسي مو زينة دكتور اكل ماكدر اكل حتى مشي ماكدر امشي
دكتور محمد: تدللين فوتي مستشفى اليوم خميس باجر اتفوتين مستشفى راح اكتبلج دخولية هسه
هاجر: ثاني يوم مريم راحت وية امي كامت تبجي من سولفتلها على الي كالتة لابراهيم كالت اني انام مستشفى وية امي ... والله وراحت مريم وخالتي حسنة وياها ... وخالاتي هم ايروحن ويجن معافوها
السبت الصبح نايمة اني ودك موبايلي طلعتة مريم دتخابر ... يا ستار
هاجر: الوو
مريم: هااا هاجر باعي تعالو الدكتور كال طلعوها الامي
هاجر: ليش انطلعها ... وخالتي وين لعد ... شبيج ليش تبجين
مريم: مو زينة امي هاجر وكال ماكو داعي تبقى بالمستشفى مشفتيها هسه من ورى وجع جسمها اتكلي طلعيني وحركيني ماتحمل بعد ماما اتكلي حركيني
هاجر: مريم تحجي واني صافنة .. كلتلها يلا هسه نجي اني وابراهيم .... رحنة طلعنة امي للمغرب كالت مشتهية كيكة جوارينة ام ايناس يمنة دتشوفها كالت اني اسويلها ... والله وسوتلها ودزتها ... داوكلها جان اتعيط عليه
علية: يمة خنگتيني هيج اتوكليني
هاجر: اتفاجئت اني بعدني مموكلتها بس شربتها مي ... كلتلها ماما بعدج انتي ماكلتي بس شربتي مي ... جان اتضل اتباوع علية اني وهديل صفنت علينة واحنة ساكتات ... رجعت رادت تاكل مكدرت
علية: ماريد اللكمة متنبلع ماكدر اكل
هاجر: امي صارت صفرة انتهت وهديل بس اتباوع وساكتة ... باوعنة عليها امي رافعه ايدها وتشاهد .. بس نبجي وسكتنة كمت شغلت قرآن يمها وعفتها تتشاهد ... على غفلة اساور بنت هديل عاطت فزينة
علية: ليش هيج يمة شلتن خطيتي ليش خليتنها اتعيط
هاجر: وكعت ماما مندري بيها ... نامي يوم شبيج مابيج شي لتسوين هيج ... بقت اتباوع علية وعلى هديل ... اتذكرت مريم نايمة ودنيا مغرب لأن هي من البارحة وية امي بالمستشفى هديل كلتلي روحي كعديها خلي تقرأ قرأن الامي يا سورة كلتلها عليها ماما عيود
..... رحت كعدت مريم فزت لأن رحتلها ابجي كوة احجي
مريم: هاااااي شبيييج شكو امي بيها شيي ليش تبجين
هاجر: اششششش نصي صوتج كومي امي فد مرة انتهت ... يا سورة كلتلج عليها ماما عيود اقريلهيا
مريم: شبيها ياالله شدتحجين انتي ... سورة النازعات كالت اذا شفتوها كلش مو زينة اقروها
...................................................
مريم: كعدتني هاجر تبجي دنيا مغرب .. كمت غسلت واتوضيت وطلعت القرآن وقريت السورة بس اني اقرأ ودموعي تنزل عالقرآن مو سهله والله مو سهلة من دنشوف امنا اتنازع كدامنه ومنگدر انسوي شي
علية: خابروا على خالاتجن خلي يجن يمجن ..وخابروا مصطفى خلي يجي اريد اشوفة خاف ميلحك علية
هديل: كولي ياالله يمة شبيج ... ماكو شي ومصطفى من العصر خابرنا الآمر ميقبل ينطي اجازة وكال بلكت للفجر انزل
علية: لا خلي يجي هسه .. اريد اشوفة
مريم: خابرنا على خالاتي وخوالي ... وابراهيم خابر مصطفى كلة امي لو اتلحك عليها لو لا كلة هسه طالع اني جاااي
.... امي بس نفس بقت واحنة كاعدين بالهول واتباوع علينة .. كلساع انروح انكعدها وانيمها انخلي وراها مخدات اتكول ليش ممخلين شي وراية
اني وهاجر وهديل صافنات على وضعيتها مدنعرف ليش كامت متحس بالاشياء ومن انكلها خالين مخدات اتصيح علينه اتكول اتجذبن عليه ... لل٢ بليل واختنكت فد مرة فارشين يمها كلنه بالهول ورجل هديل هم يمنا
علية: ودوني للمستشفى ماكدر بعد ..اختنكت وشوفوا مصطفى وين صار اجة لو بعدة اريد اشوفة
مريم: كلساع انخابر ايكول بالطريق هو بالموصل يعني هو والصبح يلا يوصل شيسوي ... هديل كالت العمر خلي انودي امي كمنة لبسناها العباية وجواريب ثخينة غطيناها بالبطانية خليناها على ضهرها باردة ثلج شهر ال١٢
ابراهيم وهديل وعمر .. اخذوها طلعنة وية امي للباب جان تندار علينة اني وهاجر واكفات
علية: لتلبسن اسود دير بالجن سمعتن....
