رواية زواج لدقائق معدودة الجزء الثاني الفصل الخامس عشر
هو احنا لو فتحنا الباب واخوكي شافني معاكي هنه هيبقى عاقل كده ويستنى يفهم ولا مقفل كيف نوح
غنوه قالت بطريقه اشبه بالبكا.... لا يا اخويا مقفل كيف نوح وشكلهم هينوحو علينا انهارده منك لله يا بعيد
سند قال بتوتر...وانا عملت ايه يعني ما انا كنت...
بس قاطعتو لما قالت بسرعه.... اتخبى ...اتخبى في اي حته وانا هافتحله واوزعه
سند بصلها بدهشه وقال... اتخبى فين.... واتخبي ليه من اساسه انا هفتح له واتكلم وياه واها كمان اطلب يدك منيه بالمره
و لسه هيمشي غنوه مسكت ايده وقالت بذهول....تفتحلو كيف اتجنيت اياك... عايز تعمل مشاكل وفضايح وتفرج علينا الدار كلو ما تجيبلناش الكلام الله لا يسيئك لو لقاك هنه مهيستناش يفهم حاجه ولو مد يده عليك اخوك مهيسكتش وهتبقى مشكله ملهاش اول من اخر
سند قال بخنقه ....والمطلوب يعني اتخبى كيف الفيران ولا ايه
غنوه قالت بسرعه ....وهيه بس الفيران اللي بتتخبى لاه والله كل الحيوانات بتتخبى عادي
سند اتسعت عنيه بدهشه من جملتها و لسه هيرد
حميد قال من بره.... غنوه مبترديش ليه فيه حاجه
غنوه قالت بتوتر ... ايوه ايوه يا حميده هفتح اها
وبقت تزق سند عند الحيط وقالت ....احب على يدك يا سند اقعد هنه ومتتحركش
سند شدها عليه بقوه وقال بمشاكسه.... وهي اليد بس اللي بتتحب على فكره الشفايف كمان بتتحب... حبي يلا ..يلا يا بت
غنوه دفعته وقالت بغيظ ....لم روحك لاطلعها في يدي ..ومتتحركش من هنه واصل وشدت الستاره قدامه
وحاولت تاخد نفسها وتهدى وراحت فتحت الباب وقالت بتوتر ....ازيك يا اخوي
حميد قال باستغراب..... كل ده يا غنوه على بال ما تفتحي... انا جيت اسلم عليكي قبل ما امشي اصلي كلمت نوح بيه وخلاص اذنلي اروح
غنوه قالت بفرحه....بجد هو سامحك
حميد نزل عيونه في الارض وقال ....لاه مسامحنيش و متضايق مني قوي وقال لي معايزش يشوف خلقتي
شروق ابتسمت بسخريه وقالت ....ملوش حق والله
ودخلت قعدت على السرير وسابتهم سوا
غنوه اتنهدت وقالت ....خلاص يا حميد ....معلش مهو اللي انت عملته مش قليل بردك ...روح انت دلوك وانا هتكلم وياه
حميد قال .....ماشي...على العموم بكره الصبح العمده هيتكلم ويا حسنين انا هبقى اجي عشان نشوف الموضوع هيخلص على ايه واللي عايزه ربنا هيكون
وحضنها ومشي
غنوه دخلت بتوتر وبصت لشروق اللي قعدت على السرير وكانت هتقلع طرحتها وقالت بسرعه..... بتعملي ايه
شروق قالت بخنقه....هقلع طرحتي واغير هدومي عايزه انام نفسي انام نومه طويله قرفت من كل حاجه نبيل ونوح جننوني
غنوه قالت بتوتر ....لا مينفعش متقلعيش
شروق بصتلها باستغراب وقالت.. .. ليه ...هو ايه اللي مينفعش
غنوه قالت بتوتر .....يعني هو...عشان....اصل
بس قلطعها سند لما خرج وقال بابتسامه مستفزه ....عشان انا موجود
شروق انتفضت بخضه ورجعت لورا وهي بتبصلهم بذهول
بقلم...زهرة الربيع
عند نوح كان مستني نجاتي وبيشرب كباية البن بتاعته قبل ما ينام وجه حكم وقال بتوتر..... نوح ..احم عايز اتكلم وياك في موضوع
نوح حط الكبايه على الطاوله و قال بضيق.... خير يا عمي
حكم قال بتوتر.... اصل نبيل كلمني وقال ان اهله هيوصلوا بكره بالليل عشان يطلبوا شروق رسمي... انت قولك ايه
نوح اتنهد وقال.... عارف... عندي خبر
حكم قال.....طب يا ولدي انا كنت اتكلمت معاك قبل كده ..وقولتلك العمر رايح مش جاي خلي البت تشوف حياتها وانا مفاهمش انت ممانع ليه من اساسه.... نبيل شاب زين ومتعلم وميعبهوش حاجه
نوح ابتسم بسخريه وقال ....هو مش بكره هيجيب اهله علشان يطلبوها ...ابقى اسال بتك اذا كانت موافقه عليه انا كمان هوافق
حكم قال بدهشه... ما انا قلت لك وشروق قالت لك انها موافقه
نوح وقف وقال ...اسالها بكره يا عمي لما يطلبوها
حكم ما كانش فاهم اي حاجه ولسه هيساله دخل نجاتي ومعاه الشنط ونوح اخدهم منه بسرعه وقال...... انا هطلع اريح تعبت واصل النهارده تصبح على خير يا عمي
واخد الحاجه وطلع وحكم بص لطيفه باستغراب وهو مش فاهم يقصد ايه بكلامه
عندي شروق اتصدمت بسند وقالت بخوف ...بسم الله الرحمن الرحيم ...انت هنه بتعمل ايه
سند قال ..عادي يا شروق كنت بتكلم مع غنوه في موضوع و لما عرفت اخوها على الباب قلت احسن يفهم غلط ولا حاجه قمت استخبيت
شروق بقت تبص لهم بدهشه وقالت.... كنتو بتتكلموا هنه... ودلوك
غنوه قالت بسرعه .....والله كنا بنتكلم يا شروق
سند قال بسرعه ....طب استاذن انا تصبحو على خير
ومشي بسرعه وغنوه راحت تقفل الباب وراه وهو قال بهمس ... تصبحي جاري قريب باذن الله
غنوه قالت بغيظ منه....امشي من وشي السعادي امشي ودفعته وقفلت الباب ودخلت وهيه متوتره
شروق كتفت اديها ووبصت لها باستفهام وقالت ....هو انت في ايه بينك وبين سند ...لتكوني بتحبي سند ..ده انا كنت فاكراكي بتحبي نوح
شروق ضحكت وقالت.... وانتي لو بتفهمي اصلا يا شروق كان ده بقى حالك
شروق قالت بغيظ .....لا انت اللي بتفهمي واضحه مفهوميتك ..ده حميد لو قبضكم كانت هتبقى ليله مطينه
غنوه ضحكت وقالت .....الحمد لله ربك سترها... يلا تصبحي على خير
وراحت نامت وهي بتفكر في سند وفي كلامه ومرتاحه جدا شروق هزت راسها بيأس منها وبقت تبدل هدومها علشان تنام هيه كمان
في يوم جديد
كانو نوح وحميد وسند مع حسنين بيتكلمو
وغنوه وجنه في الصاله وبيحاولوا يسمعوا كلامهم وحسنين كان صوته عالي وبيقول بغضب.... انا مش عارف انتم مهتمين بالبت دي ليه وكل يومين تقولوا انها بريئه وعايزين تطلعو ولدي الغلطان.... واديني جيت دلوك عشان اعرف ايه معاكم جديد واشوف اخركم.... هقول لكم ايه ما هو لو كان القتيل من بيتكم مكنتوش سميتو على اللي قتلوا
نوح اتنهد بخنقه وقال .....خلصت كلامك هتستنى تسمع ولا هتلت وتعجن تاني
حسنين قال بغيظ....اتفضل يا عمده
هنا نوح بدا بالمختصر المفيد جدا يحكي له اللي حصل من الاول مع غنوه وجنه ويوصلو بوجهة نظره هو قد ايه اللي حصل كان في ظلم ليهم من ابنه حسن
بس كان صعب جدا على حسنين يصدق الكلام ده وصعب على اي اب عموما وقف وقال بغضب..... انت بتقول ايه انتوا ملقيتوش حاجه تعملوها عشان تبرئوها غير انكم تخوضوا في اعراض الميتين وتطلعوهم بهايم كده
نوح اتنهد وقال....انا مقدر وضعك...وعارف ان اللي بيتقال ده مش سهل على اي اب انه يصدقه ... بس علشان نبقى منصفين لو جيت تقارن ولدك بالبهايم تبقى ظلمت البهايم واللي عمله ده لو كنت سمعت بيه في حياته كان هيتمنى الموت ويشوفه راحه على اللي كنت هعمله فيه
حسنين قال بغضب... انا مهسمعش ولا كلمه تاني ....انت مصدق شويه عيال مفيش معاهم اي دليل علشان تضيعو تار ولدي وانا مهسكتش واصل
نوح ابتسم بسخريه وقال...بس انا معايا الدليل ولو الدليل ده منفعش معاك فيه دليل تاني
ونادى على جنه وقال....جنه هاتي مصطفى وتعالي
جنه اترعبت بشده وبقت تبص لغنوه بخوف وغنوه طمنتها وقالت.... روحي يا جنه متخافيش
وشروق قالت بسرعه وثقه.... متقلقيش يا جنه نوح عمره ماهيسيبك لا انتي ولا ولدك يلا روحي
جنه دخلت بخوف وهي شايله الولد ونوح اخذ منها الولد وحطه بين ايدين حسنين وقال..... ده الدليل ولو ما صدقتش ان ده ولد ولدك هطلع وياك على البندر نعمل له تحليل وتتاكد بنفسك
حسنين مسك الولد وقال بغضب.... ممصدقش من غير اي تحليل و
بس اتصدم بشده واتسعت عينيه لما شاف ملامح الولد اللي كانت نسخه من ابنه كان صوره مصغره منه ليه عيون زرق زي حسن وعين منهم زغله وضيقه شويه نفس ملامح ابنه اللي كانت بالنسبه للصعيد مميزه وده لان والدة حسن كانت مش من البلد
نزلت دمعه من عيونه وهو بيبص للولد بصدمه وضمه بقوه ومقدرش يقف على رجله اكتر قعد على الكنبه وراه وهو بيضمه وبيبكي
حميد ابتسم لما شاف ردة فعله دي وقال....كيف ما قال العمده ممكن نعمل له تحليل و
بس قاطعه حسنين وقال بدموع.... الواد ممحتاجش تحليل كأني شايف ولدي قدامي الله يرحمك يا حسن حرقت قلبي عليك
ومسح دموعه وقال بجديه.... بس بردك يا عمده اللي انتم بتقولوه ده صعب ... يعني ممكن البت دي تكون غلطت مع حسن عادي وبرضاها وبت عمها خلصت عليه علشان متفضحهاش
هنا جنه قالت بسرعه .. اتقي ربنا انا كنت متجوزه وجوزي كاتب الولد على اسمه فضيحة ايه اللي هخاف منها
نوح قال بسرعه ....استني انتي يا جنه ....اسمع يا حسنين كلنا في البلد عارفين ان ولدك كان فيه العبر..وانت نفسك عارف انه يعمل كده واكتر كمان بس قلبك حارقك عليه و انا عازرك ...بس كمان احنا بندور على الحق وانت كنت متفق وياي ان لو ولدك طلع غلطان وبادي بالشر يبقى يستاهل اللي جراله ومكنتش مصدق ان ليه ولد ودلوك صدقت بنفسك يبقى لازم تفكر لو البت دي اتظلمت من ولدك كده ايه اللي هيجراله عند ربنا لو مسامحتهوش وايه هيجرالك انت كمان لو ظلمتها كيف ما هو عمل
حسنين هز راسه بالموافقه وقال بحزن....جايز ولدي فيه العبر بس انا عمري ما ظلمت حد وبعد ما شوفت الواد ده مش هأذي حد منهم لحد ما اتاكد بنفسي ... بس لو طلعت البت غلطانه هتسلمهالي بنفسك ولو طلع الكلام الواعر اللي انت قولته على ولدي ده صوح مش بس هسامحهم كمان هعتذر لهم هما الاثنين وحفيدي هيبقى مسؤول مني هو وامه
نوح ابتسم وقال....انا كنت عارف انا بتكلم مع مين ومتاكد انك راجل حقاني... عشان كده انا عندي طريقه تتاكد بيها
حسنين استغرب وقال... طريقة ايه
نوح قال ....غنوه قالت ان ولدك خلاها شافت تسجيلات على تلفونه وهيه مسحتهم ...التسجيلات دي في بيتكم يوم اللي حصل صور جنه وهيه معاه وكانت نايمه ...طبعا هو صور كل اللي حصل بس قص منو المقاطع اللي تخليه يفضح جنه علشان يهدد غنوه بيهم ...وكده يبقى اكيد فيه فيديو اصلي مصور كل اللي حصل يومها وهو قص منه المقاطع دي
حسنين قال باستغراب...وايه عرفك انها مشاهد مقصوصه ما ممكن يكون صور المقاطع دي بس
نوح ضحك بخفه وقال بثقه...مستحيل ..بقولك هو كان معاها في الفيديو مكانش بيصور يعني كان مثبت الكاميرا او التلفون وطبيعي يكون صور كل حاجه اكيد وقتها مهيبقاش فاضي يقوم يقفل الفديو ويرجع يشغله كل شويه ...انا محامي يا حسنين وكفايه تديني طرف الخيط واقولك الموضوع تم ازاي ولدك كان مجهز كل حاجه وناوي يصور غنوه بس اللي راحت جنه ..واكيد فيه فيديو مصور من وقت ما دخلت البيت لحد ما هو قفله بعد كل اللي حصل ...وبعد كده هو قص منو اللي عايزه
حسنين قال بضيق...وفرضا ده حصل مهو اكيد بعدها مسح الحاجات اللي تغلطه
نوح قال بثقه...مليكش صالح بس انت اجمعلي كل الحاجات بتاعتو تلفون لابتوب كمبيوتر اي حاجه تبعو... ولينا قعده تاني عندي ناس تعرف ترجع كل حاجه حتى لو اتمسحت
حسنين قال بحزن.... ماشي يا عمده لينا قعده تاني وان شاء الله ربنا يظهر برائة ولدي
ووقف بحزن شديد وباس الولد وحضنه بشده
ولسه هيمشي جنه قالت بلهفه.... هات الولد
حسنين خد باله وقال.... اه صوح خدي.... هو انا ينفع اشوفه كل كام يوم كده
جنه بصت لنوح بقلق وهو ابتسم لها بيطمنها وقال....وامتى ما تحب كمان ده ولدكم
حسنين مشي بقلة حيله وهو بيدعي يكون ابنه مظلوم ولا يكون ظالم بالشكل ده
نوح اتنهد بارتاح وقال.... من رحمه ربنا عليكي ان ولدك يشبه حسن ولو انها مش حاجه زينه قوي بالنسبالك لكن ربك من لطفه بيجيب المنح من قلب المحن
غنوه دخلت هيه وشروق ونبيل وكانو مبسوطين وسند كمان كان مبسوط وخف قلقه على غنوه شويه
بس جنه كانت متوتره و قالت بدموع ..افرض ملقيناش التسجيل هنعمل ايه
نوح قال ...هنلاقيه متقلقيش ولا تفكري في حاجه غير ولدك وبس وهملي الباقي على الله ثم عليا
جنه قالت بامتنان....ربنا يخليك يا عمده الف شكر
غنوه قالت بسرعه ....الف بس ..قولي مية الف شكر ...مليون شكر ..مية مليون شكر... هو الشكر بندفعله فلوس
نوح ابتسم ابتسامه جانبيه وقال ...انا معايزش شكر من حد.... عايز بس الموضوع ده يخلص و كل واحد يشوف حياته ويهملني لحياتي ...ده هيبقى احسن شكر ليا
قال كده ومشي وغنوه ميلت على سند وقالت.... سمعت كل واحد يشوف حياته دي.... اخوك بيطردنا بالمحسوس
سند ضحك وقال ...طب احمدي ربك انه لسه بيطرد بالمحسوس ده اقل واجب معاكي انتي واخوكي
اما شروق كانت بتبص لطيف نوح بفخر شديد.. كانت متاكده انه هيحلها وكانت مبسوطه جدا علشان جنه وغنوه
حميد ودع غنوه ومشي
وكل واحد طلع على اوضته
عند شروق اول ما طلعت على الاوضه هيه وغنوه اتفاجأو بفستان جميل جدا على السرير بلون ابيض مطرز بخيوط الحرير الدهبيه ومعاه الحجاب والشوز كان طقم يجنن وعليه ورقه مكتوب عليها شروق
غنوه قالت بانبهار...يا جمالو ايه الحلاوه دي كلها والله وطلع زوقه عالي اكيد ناوي على حاجه الليله طالما جابلك الفستان القمر ده
شروق مسكت الفستان وبقت تبصلو باعجاب شديد وقالت ....شكله حلو قوي يا غنوه..معاكي حق اكيد نبيل اللي جايبه علشان البسه لما ياجو اهله
بقلم...زهرة الربيع
غنوه رفعت شفتها بغيظ وقالت..ايه...نبيل.... نبيل اه ...معاكي حق اكيد نبيل اللي جابه هيكون مين تاني يعني....بالاذن
ومشيت بغيظ من غبائها وراحت هيه كمان علشان تجهز
بعد ساعه كان حكم وهويده تحت مستنيين اهل نبيل ومتوترين جدا بسبب نوح لانهم مش فاهمين ناوي على ايه
ونبيل كان رايح جاي بقلق لان اهله اتأخرو وكل شويه يبص للساعه لحد ما سمع صوت العربيه قال بسعاده..اهم وصلو ..عن اذنكم هدخلهم
وجري على الجنينه علشان يستقبلهم ويدخلهم
عند نوح كان في اوضته لبس هو كمان وجهز وكان في كامل اناقته طله كلها هيبه وجمال
خلص لبسه و مسك العلبه اللي فيها الدبله وقال بثقه... انا وعدتك يا شروق اول دبله هتلبسيها هتكون دبلتي
وحط العلبه في جيبه ونزل وهو ناوي ينهي الموضوع ده على الاخر
وهو نازل على السلم كانو شروق وغنوه كمان نازلين وكانو زي القمر
غنوه صفرت لما شافته وقالت بمشاكسه.... يا ورد اعتزل ...ده الباشا نزل
نوح ضحك وهز راسه بياس منها وبقى يبص لشروق اللي كانت زي القمر بالفستان بتاعه كانت انيقه وناعمه جدا مشالش عينه من عليها
شروق حاولت تتحاشى نظراته ونزلت بسرعه وقلبها بيدق بقوه
تحت كان الجميع قاعدين في انتظار اهل العريس ودخل نبيل وقال..... اتفضلي يا ماما اتفضل يا بابا
هويده وحكم اتقدمو عليهم علشان يستقبلوهم بس حصلت حاله صدمه عجزت الكل عن الكلام
هويدا رجعت لورا بصدمه وحكم كان هيقع من طوله
وحليمه ضربت على صدرها بصدمه وقالت...صابحه...يامري
والدة نبيل رفعت عيونها بدموع بين الجميع بتدور عليه شافته واقف عند السلم حالته متتوصفش كأنو اتجمد مكانو او عجز عن الحركه والدموع متعلقه في عيونه اللي اتسعت لابعد حد صدمه شلت كل كيانه
اتقدمت عليه وهيه مش مصدقه انها شيفاه راجل طول بعرض قدامها ابتسمت وسط دموعها وقالت...كيفك يا نوح.... كيفك يا ابن بطني وووووووو
