رواية بنات الملا الفصل السابع عشر بقلم رغد الموالي
إ ن القلب الذي ينبض مره لشخص لايمكن ان ينبض مرة اخرى لأخر!
دره... خواتي طلعو وبعدها بلحضات اجه ابويه اول ماشفته متت خوف مو بعادته يجي بهذا الوقت ياربي
جان بعجله من امره
ابو جواهر... امج مارجعت
دره... لا يابه مارجعت بس ليش
ابو جواهر... يابه دره مالكت امج الحجاب الي كتلها عليه الصبح تدوره
دره... لا مانطتني اي حجاب
ابو جواهر... اوووف وين صار بس لاضاع تعبت عليه هواي
دره... هسه ادوره يابه
ابو جواهر... اي ياب تعالي عاونيني صيحي خواتج
صدك وين خواتج البيت هدوء
دره... ها. ا.... ا... راحو... ه... ه... هسه يشترون ويرجون يابه لاتشيل هم هسه ادوره
ابو جواهر... ااااااخ مو جنت مااجيب اي شي للبيت مخلي شغلي كله بالمحل هسه شجابني وخليته.
صرت اساعد ابويه وومتوتره وخايفه مااعرف ليش هيج خفت رغم ابويه ولا مره معصب علينه او ضاربنه بس لان اول مره اكذب عليه
تأخرو خواتي وابويه مل طلع وبعده على استعجاله
من تجي امج خل تدوره ضروري
مشه خطوتين ورد وكف والتفت... خواتج وين صارو متكليلي
دره... مادري يابه هسه يجون
ابويه راح يشوفهم بقيت بقلق بس لايصير شي
بقيت قلقه لحد ماشفتهم جايات باوعت ابويه مو وياهم.
ابويه وين
زمرد... راح وصلنه وراح للشغل
دره... العلاكه بعدها بيدج ليش مارجعتيها ااحجيلي شصار
زمرد... اخواتج تدرين منو مشتريلهم عيني
دره... اي
زمرد... يصير من بيت حجي عمران يعني عمه يصير فهد
دره... ضربت بكف ايدي على خدي... عزه شنو... شتحجين
زمرد... نطيته العلاكه كتله خذها مانريدها
يكولي اني اشتريتلهم
كتله لااا خذها مانريد
جان يكلي هيييي اني ماجايبها الج
شمرتها يمه ومشينه جان يجي وراي يكلي اخذيها وروحي لبيتكم وبعد اختج لاتبقه تدز بياقوت هنا وهنا
وانت شعليك
... روحي عاد مالي خلگج خل اكمل الطوبه هي راحتي فد الجمعه
ومن رجع يلعب الطوبه خليتها بايسكله ورحت جان دانمشي بالشارع ماشوفه الا وراي بالبايسكل
... من اشتريها الج عود رجعيها
اخذيها ياقوت
دااحذر ياقوت شفت ابويه من بعيد بس الله لطف بيه جان ملتفت على الرجال دايسلم وبسرعه اخذتها منه ومشينه وهو شافه لاابويه يتصرف عادي كمل مشيته بايسكله وسلم على ابويه وابويه ردله والله حتى تفاجأت
... هذا آسر ابن ذياب لعد الوحيد الي ابويه يكول عليه احسنهم ويشبه عمه شهاب
باوعت على ياقوت وماس متحلفه
ااااااااخ منكم شسويلكم هسه اني
بعد متشترون ابدددد
يلا روحو عني
الايام صارت تروح وتجي مرت اشهور وجواهر صارت ماما اجمل ام بالدنيا جابت ولد عيونه نفس عيون جواهر وسمارها
خلال هاي الفتره مرتين شفت رائد وجانت نظرات بس هو هواي يطيل النظر الي رائد لمن صار محط اهتمامي صرت اخجل ان يشوفني على الكرسي تمنيت اكدر امشي مثل بقية البنات
الله سبحانه وتعالى اعطاني خلقه جميله وشعر جدا طويل كان يوصل لنهاية الكرسي لكن ماكتمل الجمال بسبب اعاقتي
كسرة نفس بداخلي جبيره لكن ماكنت اشوف من خلال نظرات رائد الي انو اكو اعاقه بالعكس كانت مليانه تأمل وحب
صرت هواي احبه بداخلي حبنه بده بنظرات فقط
الايام تمشي ماتنتظر احد لازم انت تواكبها
مرت شهور وهالمره رائد طول بالجيش ماشفته ابد مره وحده عرفت من امه انو هم متصلين عليه هناك وعارفين انو هو بخير اي تفاصيل ماعرفت
حسيت قلبي كلش اشتاقله جانت روحي تلوب عليه وينه وليش تأخر لريد بس اشوفه وبس
بعدها بفتره سمعت بي اجه روحي طارت من الفرحه
تمنيت بس اشوفه لكن ماشفته
بليلتها مانمت من التفكير بي شلون اشوفه خاف مااكدر اشوفه ياربييييي
ثاني يوم الصبح بعد ماطلع ابويه للمحل امي خلت الجدر على النار ولبست عباتها
ام جواهر... اني رايحه لبيت ام رائد عينج على الجدر
دره... يوم خل اجي وياج
ام جواهر... لا وين تجين تروح تاخذنه السوالف والجدر يحترك خواتج يجون من المدرسه لاااا ابقي هنا
دره... الله يخليج يووووم
ماردت عليه طلعت وسدت الباب وراها
كلش نقهرت تمنيت اروح
مسحت الاخشاب رتبت شويه بالبيت رحت لغرفتي باوعت بالمرايه شعري يراد اضفره مامرتب زين صرت اسرحه واضفره سمعت صوت شي وكع بره استغربت هاي شنو وكع
طلعت اباوع اتلفت يمنه يسره ماكو شي فريت الكرسي واشوفه واكف ومجتف ايده ليوره ومتبسم
فتحت عيني بوسعها وشهكت همس ششششش
همس اشتاقيتلج
دره... جمدت بمكاني بقيت فاتحه عيوني بوسعها ومتحجره ماعرف شسوي هاي منين اجه شلون دخل
رائد... لاتخافين خليت اخويه الصغير يراقبلي الوضع من يجي احد يصوفر لاتخافين
دره... الله يخليك روح لايجي ابويه
راىد... مو كتلج لاتخافين بس احجي وياج
دره... شتريد مني
رائد... اني احبج دره والله اموت عليج والله گلبي متگطع بس ردت اشوفج
واني عبالي انتي هم مثلي مشتاقتلي
دره... رائد فدوه بس روح والله ابويه يذبحني اذا عرف
رائد... اسمي يخبل بلسانج
خجلت ودنكت
اروح صدقه لليخجل باوعيلي دره شوفي شنو جبتلج وياي
دره... هاي شنو
راىد... مداليه حجر كريم هذا تعاليالبسها الج
دره... لا شكلهم لااهلي
رائد... كليلهم خرزه واني سويتها دبريلهم حجايه من يمج
دتعالي هسه البسها الج قبل مايجون اهلج
دايلبسها الي بعدين تذكرت اني بلا حجاب
كلت بفزه وهو فز على فزتي حجابي اني بلا حجاب
اتبسم وبعدها ضحك بصوت... ولج شبعان شوف من شعرچ
وهمس بس جانت امنيتي المسه فل ضفيرتي واشتمها وتنفس بعمق
ااااااالله.... شكد جنت محتاج هالنفس
لبسني المداليه بسرعه ونهض
راح اروح
باوعلي متأمل كل وجهي
احبج دره
وصعد على الدرج عرفت عبر من السطح
على كد مافرحت بشوفته وجيته على كد ماضجت من الي صار وياي
اني دره بنت ملا عبد المجيب هيج اسوي
نزلت دموعي مباشرة
مااعرف شعور اول مره اعيشه احس كرهت روحي صرت بنيه مو زينه وخانت ثقة اهلها بيها فتت للغرفه ابچي والوم بروحي
عزه... هاي شسويت ... شلون سكتت من اجه ليش ماعطت ليش ماصديته ليش قبلت يلبسني مداليه وطلعت بلا حجاب وشافني شلون قبلتها على روحي شلووووون
هسه يروح يحجي عليه بالمنطقه ويكول بنت ملا عبد المجيب صاحبتي واروحلها للبيت وتطلع عليه حجايه والناس تصير تعاير ابويه بيه واصير عار على ابويه
عززززه
وانهاريت بچي كطعت المداليه من رقبتي دااشمرها بس گلبي احسه فز من فكرت
لميتها بقبصة ايدي وضميت وجهي بالفراش مال سريري ابچي
شويه وسمعت صوت طكة الباب
بسرعه مسحت دمعي
وطلعت شافتني امي عقدت حاجبها
... شبيچ دره شنو چنتي تبچين
... باارتباك... لا لا ابچي شنو يمه
... عيونج ووجهج احمر... شبيج
... مابيه شي بس جنت اثرم بصل وعيني دمعت
.... هااااا باوعتلي حسيتها ماقتنعت واني هم مباشرة فتت للغرفه
للضهر خواتي رجعو من المدرسه وابويه اجه بالعاده خواتي يروحون يركضون يتلكوه واني وياهم يشوفنه ويمسح على راسنه هالمره ماطلعت بقيت بالغرفه مستحيه منه احسه يدري وخجلانه
سمعته كال
وينها دره
ام جواهر... جوه... مادري شبيها هالبنيه اليوم.... دررررره
دره... الله اكبرررر.... سويت نفسي اصلي خليت الحجاب على راسي وتوجهت للقبله اصلي
لكن حسيت انو اني مو زينه وميصير اصلي.
عفت الصلاة وصرت ابچي
ياربي سامحني ياربي معرفت شنو اسوي
ياربي مايحجي عني ياربي مايعرف ابويه
يارب بعد مااعيدها
سامحني يارب
تذكرت جدي عبد المجيب من حجالنه قصة النبي يونس وشلون لمن خطأ والله عاقبه بأن أبتلعه الحوت
... جدو احجيلنه قصة النبي يونس
حجي شعبان... ذا النون اسمه النبي يونس
النبي يونس كان احد انبياء الله هو حفيد احد اخوة نبي الله يوسف عليهم السلام
يُقال انه سبط بنيامين اخ يوسف من امه
بُعث النبي يونس نبيا لااهل نينوى
بعد ما انتشر الشرك بينهم
لكن اهل نينوى كذبوه وماصدگوه
استمر يدعوهم ماشاء الله له من المده بعض الناس تگول استمر يدعوهم 33 سنه وكانو يأذوه ويصبر على الاذيه فما آمن غير بس رجلين كان يكلمهم عن عذاب رب العالمين وماكانو يصدكون الى ان نفذ صبره وعافهم وغادر القريه مقهور منهم وغاضب لكن الله سبحانه وتعالى في ذلك الوقت ما أذن اله ان هو يترك قومه
فوصل للشط شاف بحاره يريدون يبحرون بسفينتهم فطلب منهم ان يروح وياهم وهالبحاره كانو ممن يأمنون بالله وبأنبياءه
لما صارو في وسط البحر هبت رياح قويه وصارت الامواج تتلاطم فگالو اكو بينا رجل صاحب ذنب
فتفقو على ان يسوون قرعه والي يطلع اسمه يذبوه بالبحر
فاقترعو وتوجه السهم على يونس فگالو لااا هو نبي الله فعادو القرعه مره ثانيه وتوجه السهم مره ثانيه على يونس وعادو ثلاث مرات وكل مره يتوحه السهم على يونس
حتى قرر يونس ان يذب نفسه في البحر مؤمنا ان الله سبحانه وتعالى راح ينجيه من البحر والموت
لما صار في البحر التهمه الحوت وصار يونس في بطن الحوت فصار يونس في الضلمات ضلمات البحر وضلمات بطن الحوت وضلمات الليل
يونس ماتأذه من اسنان الحوت او كُسر عظم اله من ضغط عضلات بطن الحوت او يُجرح يونس كان تحت رحمة الله وحفظه من كل أذى لكن كان هذا تأديب الله له
لما سار الحوت في اعماق البحر يونس صار يسمع اصوات مايعرف مصدرها ولا معناها
لكن ألهمه الله تعالى بأن هذه الاصوات هي تسبيح دواب البحر لله تعالى
فصار يونس يُسبح لله تعالى ويستغفر الله واعترف بذنبه
بسم الله الرحمن الرّحيم
"وذا النُّونِ إِذْ ذَهَبَ مُغَاضِبًا فَظَنَّ أَنَّ لَنْ نَقْدِرَ عَلَيْهِ فَنَادَى فِي الظُّلُمَاتِ أَنْ لَا إلَهَ إلَّا أَنْتَ سُبْحَانَكَ إِنِّي كُنْتُ مِنْ الظَّالِمِينَ."
صدق الله العظيم.
فأستجاب الله سبحانه وتعالى ليونس وامر الحوت ان يُلقي بيونس على شاطﮱ البحر
فالقاه الحوت فخرج منها تعبان ومتهالك وضعيف يحتاج للاكل وللاهتمام لان يونس بقي في بطن الحوت ثلاثة ايام والبعض يكول سبعة ايام فكان ضعيف مايتحمل حرارة الشمس العاليه ولا لسعات الحشرات لهسبب أنبت الله عز وجل فوقه شجرة اليقطين ليستظل بها وياكل منها
جواهر... جدي ليش مو نخل مثل السيده مريم مو التمر فاىدته اكثر
شعبان... الله سبحانه وتعالى خلق كل النباتات وكلها بيها فوائد لكن كانت شجرة اليقطين هي الانسب ليونس في ذاك الوقت
اوراگها عريضه تسوي ظِل من حرارة الشمس وهم تطرد الحشرات الذباب مايقترب من اي شيء مغطى بورق اليقطين
والثمره مالتها تؤكل نيه وبگشرها من اول ماتطلع لهسبب كانت وسيله حتى يبقى عايش كل هذا كان لطف الله عز وجل
دره... ورب العالمين ماعاقب قوم يونس
حجي شعبان... بعد ماخرج يونس من القريه ثاني يوم الصبح صارت غيوم سوداء في السماء وصار دخان ونزلت الغيوم للقريه فغطتها لدرجة اسودت سطوحهم فعرفوا
انو العذاب الي وعدهم بي يونس عليه السلام متحقق لهسبب خافو وراحو على يونس لكن ما لكوه لان كان خارج القريه
فصارو يبچون مايعرفون شنو يسوون فبهذا الوقت واحد منهم راح على رجل شيخ جبير بالعمر وسألوه شنو يسوون فكاللهم لازم تتبون الى الله عز وجل فلبسو ملابس من الشعر الغليظ وغطو رؤوسهم بالرماد تواضعا لله واخذو كبارهم وصغارهم وحتى حيواناتهم وطلعو من المدينه وتضرعو لله معلنين توبتهم
الله سبحانه وتعالى قبل توبتهم وكشف عنهم العذاب
بسم الله الرّحمن الرّحيم
"لَوْلاَ كَانَتْ قَرْيَةٌ آمَنَتْ فَنَفَعَهَا إِيمَانُهَا إِلاَّ قَوْمَ يُونُسَ لَمَّا آمَنُواْ كَشَفْنَا عَنْهُمْ عَذَابَ الخِزْيِ فِي الْحَيَاةَ الدُّنْيَا وَمَتَّعْنَاهُمْ إِلَى حِينٍ."
صدق الله العظيم.
دره... قاطع ذكرياتي بهذه القصه من جدي صوت ابويه وهو يصيحلي
دررررره....... دررررره
رديت.... ها يابه
... دخل للغرفه وتبسم شبيج دره ليش كاعده هنا كل هذا تصلين؟
... هاااا.... أ... أ....
... تبسم ومسح على راسي امشي بويه تعالي نتغده
دفعني بالكرسي هو احس سكين وغرزها بگلبي حبه وحنانه علينه يخليني اشعر بأي غلطه اسويها انها جريمه ماتغتفر
لكيت امي وخواتي بالطرمه باوعت سطح بيت رائد كبالنه
تكلمت وكان الارتباك واضح عليه... ماما بعد لاتكعدينه هنا بالطرمه
ام جواهر... ليش يمه
... جيران كبالنه
... تبسمت هههه عبالي صاير شي شبيهم جيرانه احسن الناس تعالي كعدي
... ساعدني ابويه وكعدت بالكاع اكل وكل شويه اباوع للسطح ومتوتره
شويه وتكلم ابويه
... بعد لاتكعدينه هنا ام جواهر بيت ابو رائد سطحهم يشرف على بيتي واني عندي بنات وهم عدهم شباب وابنهم الجبير غرفته فوك بعدين هذا رائد صح لليوم ماشفنه منه شي والولد خوش ولد وملتهي بداومه بس يبقه شاب واني اخاف على بناتي
ام جواهر... صار ابو جواهر تآمر انت
ابو جواهر... الله يرضى عنج
باوعلنه وهو يتكلم مفتخر... من اهم اسباب النجاح بحياتي ببيتي هي امكم واحترامها الي ماكتلها على شي بيوم ماكلتلي صار وتدلل من تشوف اكو شي زاعجني ورافضه ماتناقشني بي لهسبب اني اقدر هذا الشي واحاول اتعامل احسن بعد وياها
لهسبب يابناتي اريدكم باجر من تتزوجون تصيرون مثل امكم شوفو اختكم جواهر شلون رافعه راسي ببيت رجلها وشلون رجلها يحبنه ويحترمنه كلما يشوفني يطير من الفرح
جواهر قريبه على امها وتعلمت كلشي اضافه لهذا الشي جواهر اختكم انسانه واعيه وعقلها چبير
بهذه الاثناء اجت جواهر وفزو خواتي فرحانين لجيتها
واخذو منها ابنها
جواهر... على كيفكم لايوكع
ام جواهر... هلا ببنتي هلا يمه
جواهر... والله مشتاقتلكم شلونج يمه شلونك يابه
دره... باوعت لااختي جواهر اختنكت تمنيت احجيلها وتنصحني اريد احجي احس حنفجر
اجت عليه تكلمني... ها دره شلونج
اول ماحضنتني واني غدرتني دمعتي وبجيت وهي مباشرة فزت شبيج دره ليش بجيتي منو وياج
دره.. بخنكه... مابيه شي جواهر بس
بس مشتاقتلج هواي
ام جواهر... ماادري شبيها اليوم اختج كل شويه تبجي
جواهر... شبيج كولي
دره... مابيه شي بس اشتاقيتلج وهاي اجيتي بعد ماابجي وصرت اضحك رغم دموعي تنزل
ابو حواهر... وكف وكال... يالله اني طالع تردين شي ام جواهر
ام جواهر... لا فدوه لعينك ماتقصر مع السلامه
انتضرته يطلع وبعدين باوعت لحواهر تعالي احجيلنه شلونج شلونها عمتج وياج رجلج سولفيلي
جواهر... اااوووف يمه شحجيلج هواي حجي هواااي
وصارو يسولفون واني اباوعلهم بس عقلي مو وياهم كل شويه اباوع للسطح بس لا صعد
تذكرت من يكلي شايف شعرچ وشبعان منه
معناها هو يصعد على طول يعني حتى خواتي شايفهم امي
اي هذا يباوع لااهلي المفروض انبههم
اكللهم بس شلون شكول
بقيت افكر وافكر كلت ماكو غير جواهر احجيلها وهي تكللهم لااهلي
بس شلون اكللها لجواهر على دخلت رائد للبيت والله ماتسكت والله تذبحني واخسر اختي لعمر كله لا مستحيل
بعدين انتبهت لكلامهم هي وامي
جواهر... يمه شسويلها لمرت حمايه صحيح اكبر مني بس عقلها صغير تخيلي اني البس اليوم تنوره سوده هي راحت لبست البس احمر لبست اخلي زواكه ( ميك اب) هي تخلي نطلع اني وهاشم بهذاك اليوم تتعارك وي محمد على الطلعه لان هو ميطلعهم
هاي غير المشاكل تخلقلي مشاكل بالبيت
ام جواهر... وعيالج يطبكون وياها لو وياج
جواهر... والله مره وياي مره وياها بس هم يعرفوها
عمتي دكلي لاتديريلها بال هي هيج طبعها
ام جواهر... اي لاتهتمين... نسوان الحمه غيرتهم اكثر من الضراير انتي سامعه ابو المثل شيكول
سفينة الضراير مشت وسفينة نسوان الحمه بقت
ماتخلص لما هاشم بطلعج بيت وحدج وتخلصين
جواهر... شوكت والله مدااصدك
عفتهم يسولفون ودخلت جوه للغرفه افكر شلون شكللها لجواهر
واني سارحه بأفكاري دخلت جواهر
احجيلي شبيج مو على بعضچ
دره... مابيه شي
جواهر... عليه دره احجيلي اكلج
دره... اريد احجيلج بس مادري خايفه
جواهر... شكو شصاير
دره... مصاير شي بس
بس شنووو احجييييي
دره... بصراحه جواهر رائد يباوعلنه من السطح ومو مره ومرتين
جواهر... كتيله لاابويه
دره...لا شكله هسه يكلي شمدريج وخاف تصير مشكله
جواهر... لعد نعوفه يسويلنه يباوعلنه
دره... تصير مشكله جواهر الله يخليج ماريد مشكله باوعتلها بترجي واحسها فهمت عليه
جواهر... لعد شلون
دره... مادري
جواهر... كعدت على سريري متحيره تفكر
ماكو غيرها نكللها لاامي
دره... وشتكليلها
جواهر... معليج تعالي
دره... لاتورطينه جواهر
جواهر ... كتلج معليج تعالي
يمه دره شايفه كم مره رائد على السطوح ويباوع علينه
دكت على صدرها بشهكه شنوووووو
وليش مكلتي وللللجججج
دره... يمه خفت لاتصير مشاكل
ام جواهر.... لعد نعوفه يباوع علينه
انتي متأكده من هذا الحچي
دره... اي
والله لاالبس عباتي واروح على امه واحيلها شلون تقبل ابنها يباوعلنه شلكانه
جواهر... يوم لاتكلين لاابويه فدوه
ام جواهر... خل اروحلها ويصير خير
حطت العبايه على راسها وطلعت
بقيت متوتره وقلقه افرك ايد بإيد واحاجي جواهر
لو ماكايلين الها جواهر خاف تصير مشكله
جواهر... سكتي شبيج جبانه
دره... خايفه اني
جواهر لاتخافين
شويه ورجعت امي جواهر سألتها واني فزيت اريد اعرف شنو صار
ام جواهر... والله امه والنعم منها تخبلت من عرفت وصاحت عليه كدامي واجه وحجت عليه كالي ام جواهر هاي مرات عندي شغل على السطح اصعد واني مامباوع عليكم منو هاي كلج اني اباوع عليكم شفتيني بعينج ام جواهر
ام جواهر... اي شفناك لعد اتبله عليك اني ابني ميصير احنه جيران واهل وعشرة عمر تقبلها احد يباوع عليكم
رائد... ام جواهر اني صح اصعد بالسطح بس عليكم مامباوع
بقيت ساكته والله شحجي ويا شكله سكتت
دره... حتكليله لاابويه
ام جواهر... لا خاف تكبر ابوج اذا عرف يجوز حتى يشيلنه منا
تعالو هسه نكعد شويه قبل مايجي رجل جواهر كلشي ماشفنه منها
خليت ابنها بحضني وبدت تاخذنه السوالف
جواهر اختي وجودها يملي المكان دائماً
لما تزوجت حسيت بفراغ جبير بعدها جنت متعوده اسولفلها كلشي ولحد الان لكن هالمره ضميت عنها موضوع رائد ماردتها تحملني ملامه اكثر من الملامه الي عيشت بيها روحي
مرت الايام وصرت مااطلع بالطرمه الا ماندر اخاف لا يشوفني رائد اعرف يصعد السطح
بيوم اجت شيماء وجانت مقهوره اول مافاتت حضنت امي وصارت تبچي باوعنالها جان وجهها بي كدمات مطعونه من خدها ويم عيونها
بسعاد... بخوف... شبيج شصاير
شيماء... والله ماادري الغلط بيه لو بالناس
بسعاد... احجي شكووو
تعالي
تعالي كعدي نفتهم شصاير
شيماء... من يوم الي تزوجت لليوم مرت جبلان الثانيه حاطه راسها من راسي
بسعاد... انتو مو كل وحده بيتها وحد
شيماء... نشترك بكراج واحد وحديقه وحده واكو باب وحده على الشارع انتي مو شفتيها
بسعاد... لعد شنو المشكله
شيماء... اني مااكعد من الصبح اكعد الضحى وابقه ملتهيه بيتي يوم الي عليه الكراج اطلع امسحه وره الظهر وج عيني هاي تتخبل عليه قصص وروايات عراقية كرار صلاح ماتخلي تحير شتحجي
كلت يلا اطلع امسحه من الصبح منا وجاي
والله صرت اكعد الصبح واغسله وافوت جوه لبيتي
غير تسد حلكها عني نوب
هاي تجي امشي سوي الباميه اكعد اكلمها مااحجي
تعالي خبزي نوكف نخبز تلاثتنه بكل مره تچويني بقبغ التنور وتصيح ماادري واسكت
مره لزمت روح موتته كتل يابه ليش تكتلي كالت دفعها لبنتي
بسعاد... وسكتيلها
شيماء... هو من اجه كاله لبو محمد وابو محمد مارضالها كاللها اذا تمدين ايدج عليه مره ثانيه ماتلومين الا نفسج مايصير خير
وهاي كل مايجونه خطار مااحجيلج شيصير
اوكف دااطبخ
لا عيني ابو محمد يعتمد على ام غايب بالطبخ انتي عليج تغسلين مواعين وتنگلين على ادينه
دااحجي باوعتلي ام غايب رادتني اسكت وسكتت
بسعاد... يعني هاي ام غايب ماتحجي شي
شيماء... لا ماتحجي ساكته وهذيج عايفتها مخليتني براسها
هاي مره وره ماتغدو الخطار جانو وياهم نسوان ف ام غايب بقت يم النسوان كاعده عيب ماترهم لازم احد يبقه يم النسوان
وعلساس هي تساعدني بالمطبخ
مطبخ المضيف چبير ويرادله شغل وانترس مواعين ووكفت اغسل هي كالت حروح اوديلهم الچاي وارجع
اني بقيت اشتغل وهي راحت غطت كل شويه اكو هسه تجي وماكو
اغسل واغسل واغسل بحياتي كلها ماغاسله هيج مواعين اني جنت بالليل مانايمه التهينه نطبخ للغده ونحضر للخطار ورتبو الحديقه الفلاح كص الثيل وره ماطلع كنسناها ونضفناها هلكانه تعب نوب المواعين واني اغسلهم مااشوف روحي الا افترت بيه الكاع جنت شايله درزن مواعين دااوديهم للكاونتر واوكع وتتكسر كلها المواعين نوب اريد افتح بعيني اشوف السكف يريد يميل عصرت عيني اريد بس اكو م ماكدر ماشغت الا ام غايب اجت بلهفه
شنو هاي شبيج شيماء شصاير
ماارد اسمعها حنت بس مدااكدر ارد
عزه خل اصيح ابو محمد
راحت شويه واجه ابو محمد
بويه شيماء شبيج
شالني وفوتني من الباب الداخلي الي تطل على الصاله وكبل لغرفة ام غايب مددني
الشيخ جبلان... جيبيلها مخاد تلاثه هاي هبط ضغطها
حابتهن وخلاها جوه رجلي وبعدين التفت لاام غايب
ام غايب فدوه اروحلج سويلها كلاص لبن مالح خل يستعدل ضغطها
وانه اروحن يم الخطار عيب هذول من الرميثه مامطولين كلها جم ساعه ورايحين انتي اعتني بيها
ام غايب... لاتشيل هم
جابتلي اللبن وشربت حسيت شويه ارتاحيت
ام غايب... مو علساس ام محمد وياج وينها لعد
شيماء... مادري
ام غايب... هسه اشوفها وينها
راحت وره شويه اجت طافره روحها وتحجي على ام محمد
شيماء... شكو ليش ضايجه
رحت اشوفها وينها لكيتها الست مدده ومشغله التلفزيون هاااا يابه ليش مجيتي تساعديها لضرتج
دكلي والله المسلسل بده ماكدر اعوفها بله هاي شتحجين وياها وعدنه خطار
شيماء... عوفيها شسويلها
بهل الاثناء اجت فاتت شافتني فرت بإيديها
هي هي شبيها عيني مو هياها كعدت
ام غايب... تخربطت وجبلان شالها وجابها هنا لو مايخلي جوه رجلها مخاديد واسويلها لبن جان الله ليعلم بحالها
ام محمد... هه يمه يمه يمه يمه من عيارة النسوووواااان يمممممممه
تره قبلج سويناها ونعرفها
شيماء.... سوالفج هاي مو سوالفي
ام غايب.... كافي سكتن عدنه خطار يلا ام محمد على شغلج واني رايحه يم الخطار
طلعو وسدوها للباب
بقيت مدده لحد ماحسيت بروحي ارتاحيت توني اكوم من مكاني واجه الشيخ جبلان
... شلون صرتي بويه
... زينه الحمد لله
... خليتي بالي يمج حتى ماصرت اعرف ادبر چلمتين شجاچ ليش هيج
... مااعرف فجأه حسيت الكاع تفتر بيه
... انتبهي لصحتج لايصير بيچ شي
... خوفك عليه واهتمامك بيه چبير عندي ان شاء الله اكدر اسعدك وارضيك شيخي
... مسح على راسي وقبله بلطف وتبسم
محتاجه شي يبعد الشيوخ كلها حليب العصفور اجيبنه لج بس كولي
... ريتك سالم وربي مايحرمني من طلتك عليه
... ولايحرمني من هالعيون الحلوه
التفت باوع لجوه الباب لاح خيال بسرعه كام وفتح الباب وصارت ام محمد بوجهه واكفه ومخليه اذنها يم الباب
... باوعلها وهي مباشرة ارتبكت وصارت تتلعثم وتحچي
ا ا ا ا ش ش ش اااا
الشيخ جبلان... جيبلي ماي دااشرب
ام محمد... صار صار وراحت تركض
باوعلي وطلع مباشرة
عرفت راح عليها رحت مباشرة وراه تبعته وفعلا ضني صحيح وكفت سمعتهم
الشيخ جبلان... ماقبلت اصغرچ وافشلچ كدام ضرتچ بس انتي تجيبها للحجايه لنفسچ من يمتى نسواني وحده تتجسس على الثانيه هااااااا
ام محمد... لا والله اني ماجنت اتجسس بس توني اجيت وانت فتحت الباب
الشيخ جبلان... هالمره حعديها لج بس قسما بالله لو عدتيها مره ثانيه ماتلومين الا نفسچ
واني مباشرة رجعت للغرفه
وهاي اليوم جنت توني مكمله تنضيف الكراج البره
هاي اجت دكت الباب
جنت لابسه دشداشه مخصره وفاله شعري ومصبغه ومخليه مكياج ولابسه ذهبي هاي شفتني تخبلت
ام محمد... اااااااي خدم عندج الغسل مالتج الوسخ امشي عيدي
شيماء... والله ماكو وحده غسلها وصخ غيرج تعالي طلعيلي الوسخ وينه
ام محمد... اتبله عليج عينييييي تغسلي شلون ماجان داتلحكين تتكشخين لجبلان اكول هذا ليش متعربن علينه هالايام
شيماء... يجي واحجي هذا الحجي كدامه دااشوفج
ام محمد.... شوفي لج تحملتچ هوايه لهنااااااااا وكافييي تعالي اكلج ولزمتني جرتني من شعري وصارت تضرب بيه اريد ادافع عن نفسي مااكدر كل ضربه تنطينياها اقوى من الثانيه لو ماصرخت وسمعتني ام غايب جان نهت عليه
ام غايب.... ولج عوفيها ولج حتموتييييهااااا شجااااااج
ام محمد... والله اليوم لاافش گلبي بيها اني انتصاااااار الي وكفت منطقه بحالها على تك رجل تجي هاي الخنفسانه ملطختلها حُمره حَمره مخليه جبلان موكفنه على تك رجل والله لااشوفج النسوان شتسوي
شيماء... لحكيلي ام غايب حتموتني هاي
ام محمد... جرتني من زيك دشداشتي وكفتني سمعي لج هذا شعرج الي مسرحته داتتباهين بي كدامه نفشتلجياه وزواكتج خربطتها
وجان تلزم زيك الدشداشه وشكتها من عليه واني صرحت وام غايب لطمت وجهها
كملت كلامها وهي تنهت روحي بدلي واريد اشوفج شلون تفكين حلكج وتكليله لجبلان حتى اشوفج انتصار منو الي شفتي ذره من الي راح اسوي بيج
راحت واني طبكت الباب وطبيت جوه بدلت وجيت وكفت كدام المرايه وجهي خريطه مثل مداتشوفين كلت والله ماابقه دقيقه لبست عباتي وهاي جيتي لي عدكم
بهل الاثناء ندكت الباب
بسعاد.... روحي ياقوت شوفي منو
ياقوت... منو
... اني عمچ شيخ جبلان...
شكرا لزيارتكم عالم روايات سكيرهوم
