رواية جذبني فمك البني الفصل السابع عشر 17 بقلم عبير إدريس

أعذريني لم اكن اقصد تقبيلك ِ كنت أحاول

شرب النهر دفعة واحدة ....

_____

ام عبد : يا يمه سودة عليه شصاير بيج خطيه مردتي كلبي عوفج من الحجي وكومي ويايه اغديج شلون باجه سويت تلوك لحلكج ياخاله..

مسحت دموعي وكتلها..

سيلين : بيت العامر خاله صدكيني ما اشتهي ماكدر اضوك العسل نفسيتي تعبانه كلش ..

ام عبد : حقج يمه ومعليج ب ابو عبد املص اذاناته اذا حجه وياج اعتبريني بمقام عمتج المرحومه جان كتلج بمقام امج بس متسوه اشبه روحي بيهة حرامات استكان الجاي القدمته الها وشربته لو ادري هيج مسويه بيج اله اصبه فوك راسها واسمطها سمط..

سيلين : هههه فدوة لعينج خاله ماوصيج بعد بنتج اني واريدج ستر وغطه عليه ..

ام عبد : اي الله شاهد ما تطلع كلمه من حلكي كون ينكص لساني لو حجيت..

سيلين : اسم الله خاله وحشاج بس لازم اوصيج..

ام عبد : حقج والله يلا اروح اني وارجع بيوم كون مرتاحه وتكمليلي قصتج ياحلوه اريد اعرف شصار من رحتي بيت اهلج وشلون وصلتي لهنا..

سيلين : بعيني احجيلج كلشي بس ارتاح..

ام عبد : يلا في امان الله.

سيلين : الله وياج..

راحت وسديت الباب كعدت بالهول ابجي كأنما اليوم ماتت عمه و تجدد الحزن عليه وين حنيت وين راح بالي ، لأدهم لحبيب كلبي ، نبضاتي تسارعت بس ذكرته ، كمت جبت موبايلي وطلعت ارقامه اللي دزلي منهن رسائل عسى ولعل من اتصل الكاهن مفتوحات ..

دكيت على اول رقم مغلق ..

جربت الثاني دك اي والله دك كمت اكمز بنص الهول وبيدي الموبايل ..

كتبتله بسرعه خفت لا يغلقه..

اشتاقيتلك ومحتاجتك بحياتي كلش هواي

مكافي ارجعلي حبيبي..تعبانه والله وانت اكثر واحد تعرف بحالتي النفسيه المفروض تعذرني حتى لو ما استاهل ...

دزيتها وخليت ايدي على كلبي منتظره يطلع تم التسليم ، ماكو دكيت مغلق..

هف شبسرعه غلقته شبسرعه..

غيرت خلفيه الواتساب وخليت صورتي اعرف بيه يتخبل وينجن اذا هيج سويت ..

كتبت بالحالة..

يقتلنا الحنين ليلآ

بعد نهار كامل من الكبرياء...

وانتضرت رده فعله شنو هو برقم من الارقام مفعل الواتسب ، الغريب صرت اشتاقله واشتاق لسوالفه حتى لو جان بقراره نفسه يرجعني للصفر مثل ما بنى شخصيتي وبث بيها روحه ، اني صح اسمي سيلين وشكلي سيلين لكن داخلي عباره عن ادهم افكاره تصرفاته هلكد ما علمني شغلات ب اخر فتره كام ميعرف بيه اكذب لو احجي صدك ، صرت اعرف اذا كذبت عليه شلون اثبت نفسي واي شي ذكره بخصوص الحركات كمت اتجنب اسويها ..

بس يبقى اذكى مني ليش انكر .قطره بحر ما اجي يمه ويم عقله ومو بعيده يكون ماخذني على كد عقلي...

كمت حضرت ملابس وعجبني اطلع اليوم ، دخلت اخذت دوش سريع وطلعت لبست ملابسي وخليت مكياج بسيط حدد ملامح وجهي وبرزها شويه ،

اخذت الجنطه والسويج وطلعت ،

الفرحه وين اليوم مستلمه راتبي واحوالي توب وراح اشتري كم شغله محتاجتها والباقي اقسمه بين الايجار والكهرباء والنت ويضل عندي تفاليس تمشيني لنص الشهر من اكل وبانزين للسيارة..

طلعت لكيت عمو ابو عبد وبعده وجها ثكيل عليه سلمت

ومشيت لسيارتي صعدت وانطلقت افتر بمناطق بغداد وترن بأذني كلمه ادهم ياسة ما لحكت افرج مالحكت اونسج طلعتج بس للمستشفيات ،

وتنزل الدمعه وامسحها بطرف اصبعي ، وصلت للمكان الردت اشتري منه ملابس صفيت السيارة ونزلت ازدحام مو طبيعي شنو السالفه .

الناس كلها طالعه امشي واباوع على المحلات ما احس اله انسحبت الجنطه من ايدي التفتت وعطت بنفس الوكت اخذها وركض ،

ردت ابجي موبايلي بيها والراتب وسويج السياره ومفتاح الشقه ، كمت ابجي والناس التمت عليه قسم من الشباب سألوني شلون شكله شفتيه واني اهز براسي لا ودموعي تنزل.

_ اختي حاولي تتذكرين شلون نعرفه لعد..

سيلين : ما شفت شكله بس كفاه ولابس زيتوني..

_ شنو بيها جنطتج..

سيلين : فلوس وموبايلي وسويج السياره.

_ ان شاءالله ترجعلج مادامها فلوس حلال ترجع..

سيلين : اي والله حلال وبتعب ..

_ ترجع ان شاءالله..

ضلو يحجون ويايه والنسوان وحده جابتلي مي وحده فتحت جزدانها ونطتني فلوس كالت رجعي بيها اضطريت اخذها لان شلون ارجع ماعندي ولا فلس تشكرت منهم هواي وهمه تعذرو مني لان ميكدرون يسوون شي ،

تركتهم ومشيت وامسح بدموعي بعد وبعد شكد راح انقهر واتأذه لان قهرتك واذيتك وظلمتك ..مشيت تقريبا ساعه ماعرف وين اروح وشسوي منين ادفع الايجار منين انطي فلوس المولد حسيت روحي ضخنت ...

اني ومدنكه سمعت صوت ولد يصيح..

_ يابنيه ..

التفتت عليه لكيته واكف مبتسم ..

سيلين : تفضل..

_ انتي سيلين ؟

عكدت حاجبي وباوعتله مستغربه.

سيلين : اي نعم اني سيلين منين عرفت اسمي..

_ هاج جنطتج..

باوعت على ايده وشهكت بفرحه ..

سيلين : اي عفيه جنطتي وين لكيتها.

ضحك.

_ مو اني لكيتها ولد دزها بيدي وكلي انطياج.

سيلين : وينه هذا الولد..

التفتت واشرلي على مكان باوعت ماكو احد..

سيلين : وينه لعد..

_ والله جان واكف هناك واشرلي عليج كال وكعت جنطتها..

سيلين :

ها شكرا جزيلا ..

اخذتها منه فتحتها فلوسي بيها والموبايل داطلع السويج ، لكيت ورقه صغيره صعدت بالسيارة خليت الجنطه على الكشن الامامي علكت ضوه السياره الداخلي وفتحت الورقه مكتوب..

مره ثانيه بطلي فهاوه ولزمي جنطتج زين لان مو كل مره انه موجود ...

بوست الورقه ودموعي تنزل حضنتها على كلبي ورجعتها بالجنطه لكيت فلوس ورقتين ام ال ١٠٠ دولار بجيت شمدريك اني محتاجه هذا الشهر وكاعد امر بضيق لو يمكن حسبهن وشاف راتبي ميكفي ،

ادهم يا ادهم غركتني بحنانك وغركتك بالاذيه ، زين تصرفاته هاي حب لو يريد يأذيني مداعرف مداعرف والله ...

رجعت للبيت مكدرت افتر ولا اشتري اي شي من الهبطه الاكلتها فتحت باب الشقه ودخلت جسمي كله يوجعني ، من اخترع لو يصير ويايه موقف متعب جسمي يكوم يوجعني رحت توضيت وصليت المغرب وكالعاده شنو علمني اكعد اسبح ...

اكثر شغلتين التزمت بيها ..

جان يكلي ذكر الرحيم كل يوم ١٠٠ مره ، رب العالمين يحنن الناس عليج ويخليج تحنين عليهم ، واكثر شي يفيد الفقراء والقلقين من امر معين وكذلك الحائرين ، لهذا التزمت بهذا التسبيح واعتقد هذا الذكر هو اللي حنن كلبه عليه ولحد الان متاركني..

ومن جنت اكله كلبي يأذيني ومرات ما اكدر انام من كثر القهر المتراكم عليه .

جان يكلي قراءه ذكر ( السلام ) كل يوم ١١١ مره حفظ الله قلبج من الامراض..

وفعلا استمريت عليه احس براحه والاهم الاستغفار مجنت اعوفه ابد وهسه رجعتله عسى ولعل تنفك قيودي كلها ..

كملت صلاه وطولت با اخر سجده مثل ما علمني جان يكلي ب اخر سجده تنزال الهموم كلها ..

كمت لميت سجادتي ورحت للمطبخ سويت اكل خفيف واكلت ، اليوم كلش تعبت وراسي وجعني هم حجيت هواي ويه ام عبد وانقهرت وبجيت وهم خرعتي على الجنطه مالتي..

باوعت على العلبه مال فيتامينات ضحكت يعني كل عقله مراح اعرف،، صار عندي فضول قوي عرف او لا خليت العلبه على الميز بصف السراحيه مال مي مثل كل مره من جنت اخذ علاجي ،

يعني اذا فات راح يعرف اني اخذته ونمت وبهيج راح اكون واعيه اذا اجه وراح احجي وياه واخلي النقاط على الحروف...

رحت للحمام فرشت اسناني وطلعت طفيت الضوايات كلها ودخلت لفراشي مجرد غمضت عيني استسلمت للنوم ...

وره ماعرف شكد سمعت طكطكه بالشقه ، فزيت ردت اكوم اشوف شكو مابيه حيل رجعت غمضت وانعادت الحركه ،

كمت فتحت الباب طلعت من الغرفه انطفت الكهرباء ، اكذب اذا اكول مخفت لا بل انرعبت ،

ضغطت على اصابع ايدي الترجف اكثر من مره حتى اهدء الرجفه مالتها بس ماكو فايده انتقلت الرجفه لباقي جسمي اريد امشي ما اكدر ،

سمعت صوت باب الشقه انسد ماعرف دخل او طلع منه اكو اضاءه خافته من جوه الباب مال شقه يعني العماره بيها كهرباء بس اني ماعندي مشيت اريد اوصل للميزانيه مال كهرباء علمود ارفع الجوزه ..

صمت رهيب يحيطني من كل جانب تقدمت بخطوات خايفه تنفست بعصبيه اريد اوصل بسرعه واعلك الكهرباء ، اريد امشي جسمي متصلب ، وصلت لمكان الكهرباء مديت ايد ترجف حتى ارفع الجوزه ،

ايدي لامست ايد بشر سحبت ايدي فازه التفتت وارتطم بجسم ورايه غركت بحضنه هو والله هو نفس الضخامه والطول ،

لحضات خوف على اشتياق على رهبه على امان حسيت بأمان لان هو موجود يمي ،

اجتمع الحر والبرد سويه كمت ابرد واحتر رغم بروده الجو كامت تنزل قطرات عرق من وجهي وتبلل ركبتي وبعدني بحضنه ارجف ،

مد ايده شد جسمي اله قربني منه حيل بحيث رخه جسمي الجان متصلب ،

انفاسي المتسارعه اختلطت ويه نبضات كلبه وهو يقترب مني اكثر نفسه اليطلع من انفه وحلكه يضرب بوجهي اقشعر جسمي وكمت انتفض حب لو عتب لو اشتياق ماعرف ،

بلعت ريكي بغصه مسح خدي براحه ايده دنكت راسي رفعه بصبعه وباس شفتي بشغف بحيث حسيت بتشنج بشفتي رجع حاوط خصري ايده هيه التتحكم بيه كأنما لعابه طعم شفايفه كأنما عسل ويمكن اشهى بعد ،

شكد حلمت وتمنيت ذيج الايام ارتمي بحضنه ، تلقائيآ كمت اتجاوب وياه وهاي اول مره اسويها وابادله ، انفاسه مكتومه ويقابلها انين صوتي المرتجف ،

بعدت نفسي عنه وحسيت بدوار خفيف خليت ايدي على وجهي جان عباره عن قطعه من نار حاولت اسيطر على نفسي واتوازن اريد اهدي روعتي ..

همست بضعف..

سيلين : اشتاقيتلك ..

هيه لحظات وصار رذاذ مي على وجهي مثل العطر شميته وفقدت بعد محسيت بشي غير الصبح كعدت لكيت روحي نايمه بمكاني ولا كأنما شي صاير معقوله هاي اضغاث احلام مو حقيقه تلفتت منا ومنا ماكو شي...

كمت وكفت كبال المرايا جسمي متعرق ملابسي مبلله حراره تسري بداخلي ،

بلشت اصحى واتذكر كلشي ، شميت عطره بملابسي وبجسمي يعني الصار حقيقي مو حلم ، هلوستي البارحه جانت حقيقيه ..

لان حسيت بيه والله جان يمي حضنته استنشقت نفسه و غرك ريتي بيه حتى تعمد يتنفس بقوه علمود احس بيه موجود..

ياربي احفظلي عقلي ..

حسيت بغثيان ولعبان نفس قوي كمت اركض للحمام استفرغت معدتي ، كعدت اريد ارتاح شنو الصار بيه ، بديت اتذكر ماعرف شنو رش على وجهي وفقدت ..

لبست ملابسي وطلعت رحت لاقرب

صيدليه ،مغص ابطني كلش قوي شصار بيه ماعرف دخلت سلمت وسألته.

سيلين : دكتور كعدت الصبح وعندي اعراض صخونه وغثيان واستفرغت يلا ارتاحيت وهسه احس راسي يوجعني و وضعيتي كلها مخربطه..

_ خاف استبراد؟

سيلين : لالا البارحه جنت طالعه بسيارتي وتعرضت لسرقه السارق رش على خشمي مثل العطر مجرد استنشقته نمت ومحسيت بشي بعد ورة ساعات يلا وعيت وحسيت بهاي الاعراض..

صفن بوجهي وكال ..

_ مع الاسف هواي دتصير هيج حالات اغلب السراق كاعد يستعملون البخاخ وحتى سمعت حالات بالتكسي من تصعد الزبونه مجرد يعلك المكيف تحس بالنعاس وتنام بس بالحقيقه هيه منامت وانما تخدرت ويسرقوها او لاغراض اخرى مثل خطف وهيج شي ، والله يكفيج الشر يا اختي العزيزه..

سيلين : شكرا دكتور والله الناس صارت تخوف ، بس شنو اخذ هسه لان عندي دوام وتأخرت مكدرت اروح..

_ راح اكتبلج كبسول اخذيه ٣ مرات باليوم واذا خفت الحاله عندج اخذيه مره وحده بس ، هذا مال غثيان وهذا للحراره اخذيه عند الضروره..

سيلين: شكرا..

نطيته الفلوس واخذت العلاج وطلعت صدك حقدت على ادهم وقررت قرار بيني وبين نفسي ولازم اسويه كافي عاد بس يرادلي فلوس ...

مشيت للسياره ورحت بوجهي للدوام ، دخلت لغرفتي شافتني رشا ..

رشا : ولج شبيج شو وجهج اصفر..

سيلين : مابيه تعبانه ومنايمه زين..

رشا : سلامتج..

سيلين : الله يسلمج..

دنكت اشتغل ورجع لعبان النفس ركضت للحمام استفرغت ، كعدت بالكاع ابجي ليش هيج ديسوي بيه هو مو يريدني ومشتاقلي ليش هيج ليش ...

غطيت وجهي بيدي وبجيت بحركه ، كمت غسلت ارتاحيت شويه وطلعت رحت للكافتريا اخذت شراب ساخن وبسكت كعدت اكلت حسيت توازنت كمت رجعت لشغلي كملته..وفتحت موبايلي مغير الصوره الخالتها بالواتسب ضحكت عرفته ميتحمل ويغار...

صارت ب ١٢ رحت للجامعه اخذت محاضرتين وطلعت راسي يموتني مكدرت اكمل رجعت للشقه ، اول ما دخلت رحت للحمام اخذت دوش سريع وطلعت سويت اكل اكلت وشربت جاي اندكت الباب ردت ابجي بس لا ام عبد وتعاي سولفيلي ...

باوعت من العين السحريه وصدك ام عبد ضربت برجلي بالكاع بتذمر ، اريد انام ياربي ..

رجعت دكت الجرس فتحته ابتسمت ابتسامه كاذبه..

سيلين : هلو خاله شلونج.

ام عبد : ها يمه محتاجه شي رايحه للسوك.

سيلين : همزين جيتي تعاي خاله فوتي انطيج فلوس الايجار انطيها لعمو وفلوس الكهرباء والانترنيت يكدر يوديهن لو زحمه عليه.

ام عبد : ماكو اي زحمه جيبيهن شعنده قابل شو كاعد جوة لا شغله ولا عمله...

ضحكت شلون تحجي عليه..

رحت جبت الفلوس وخليتهن بيدها ..

ام عبد : خاف ماعندج يمه.

سيلين : ربج ميكطع خاله عندي الحمدلله ..

ام عبد : الله يزيدج يمه..

سيلين : شكرا خاله تسلمين..

ام عبد : نامي ارتاحي واجيج من ارجع من السوك نسولف شويه..

سيلين : ان شاءالله بس اناملي ساعه وتدللين..

ام عبد : نوم العافيه متريدين شي من السوك.

سيلين : والله اريد اشياء مو شي واحد بس مابيه حيل اكتبهن هسه عود باجر اوصيج..

ام عبد : براحتج يلا رايحه.

سيلين : الله وياج..

راحت وركضت كبل لغرفتي دخلت بفراشي ونمت ...

كعدت على صوت الجرس ، حالفه ام عبد اليوم تسمع باقي قصتي..

رحت فتحت الباب دخلت تضحك..

ام عبد : صليت المغرب وحضرت الهم العشا وجيت حتى محد يصيحني..

سيلين : هله بيج خاله تفضلي.

كعدت بالهول ورحت سويت جاي صبيت الها والي وكعدنه يم الصوبه..

ام عبد : احجيلي امج من رحتي يمها شسوت ، تدرين للصبح ما نايمه وافكر شصار وياكم من رجعتو يمها ، وعمج شصار بيه وره وفاه زوجته..

سيلين : عمو ادهم كلش تأذه بس انقطعت اخباره عني مده ست اشهر كلشي معرفت عنه..

ام عبد : ياا ليش.

سيلين : احجيلج..

طبعا اني من احجيلها مو كلشي يعني شغلات التخص ادهم ما احجيها بتفاصيلها ..

جريت نفس طويل وزفرته..

سيلين : من دخلنه لبيت امي زوجها جان نايم كالعاده يسهر بليل وينام بالنهار ، دخلنه لغرفتنه واتفقنه اني واختي معلينه بيهم ونعيش يومنه وبس ، دخلت امي وكعدت يمنه..

تمارة : هااا ماتت وجه الفكر اي مو كلت مو وجه نعمه هاي لو عايشه بالفكر جان طال عمرها بس متحملت السعاده شوفي نهايه الاعوج عبن جانت تحرك وضاح عليه شوفي ربج شسوه بيها.

نترت بيها.

سيلين : رب العالمين ارحم الراحمين حرام هيج تحجين هيه لان مؤمنه ابتلت بهيج مرض وبعدين انتي شنو من بشر تتشمتين بالمرض وعمه ماتت من عينج ونفسج الجان حاركها بعيده عنج ومخلصت.

تماره : يلا عاشتلها كم سنه بيت مال اوادم جانت تحلم تكعد هيج كعده بنت الفكر.

سيلين : شبيج فهميني شيوجعج يعني ماتت ومخلصت منج..

تماره : عشتو شلون فاتحه مسويلها ..

سيلين : وانتي شمدريج..

تمارة : ماكو شي ينضم على امج .

جريت نفسج وكتلها..

سيلين : هسه شتريدين ..

تماره : سلامتج بس من باجر طلعي دوري شغل تره اني كعدت منين اصرف عليجن..

سيلين : وين اشتغل بله ؟

تماره : ماعرف نطلع وندور .

سيلين : صدك تحجين.

تماره : لا شقه طبعا صدك رجال غريب يصرف عليجن تقبليها على نفس

ج.

سيلين : لا والله لا اقبل يصرف عليه ولا اريد اكل من فلوس حرام اشتغل بتعبي اذا صدك لكيت شغل واذا يكفي نطلع اني واختي نأجر..

تماره : تأجر هههههه عبالج هنا البيوت رخيصه لو ابيعج هم متكدرين تنطين فلوس شهر..

سيلين : اي بيعي انتي متعلمه.

اجتي تقربت وكعدت يمي وخرت الشعر عن وجهي وابتسمت.

تمارة : صايره تخبلين واذا الله هداج وتشتغلين تجيبين كومه فلوس..

وخرت ايدها من وجهي ونتر بيها.

سيلين : شنو الشغله التجيب كومه فلوس ..

تماره : انتي بس سلميلي نفسج ومعليج ..

سيلين : ما اشتغل وياج لو تموتين..

تمارة : وجه الفكر هو انتي مال واحد ينفعج..

سيلين : ماريد تنفعيني اني اطلع ادور على شغل ميحتاج..

غمتني وطلعت ...

ثاني يوم بلشت المشاكل يلا وشوكت تطلعين تدورين على شغل..مر اسبوع وطكت روحي..

خابرت على زوجه عمي محمود ، همه هم بالشمال بس بغير محافظه كاعدين بيناتنه ساعتين..

روشنا : الو هلو سيلين شلونج..

سيلين : هلو عمه الحمدلله انتي شلونج.

روشنا : زينه على الله اسأل عليج..

سيلين : تسأل عليج العافيه ، عمه اريد اطلب منج طلب فدوة انتي عندج هواي معارف وصديقات بلكت تدبريلي شغل امي اكلت راسي..

روشنا : هههه هو وينه الشغل هذا عمج وكاعد رجال ممدبرها انوب تريدين انتي تشتغلين ..

سيلين : لعد شسوي فهميني دمرتني من جيت لسه مشاكل..

روشنا : باعي طلعي وافتري على الصالونات اكيد يردون عاملات واشتغلي..

سيلين : واني وين اعرف بسوالف الصالون..

روشنا : كلشي باليوتيوب موجود وتعلمي ومن ترحين كليلهم اعرف بس مبتدئه بالبدايه راتب قليل بعدين يزيدوج.

سيلين : ماشي اروح واشوف عاشت ايدج ..

روشنا : وايدج تدللي..

ثاني يوم طلعت ادور بالصالونات ، يا صالون افوت اسأل يكلولي عدنه فائض منكدر نوظف بنات جدد

اخر شي دخلت صالون ، اللي يديره ولد كردي ، من شافني وحجه ويايه اخذ رقمي وكال اني اتصل بيج..

رجعت للبيت وانتضرت اتصال منه مر اسبوع ومتصل وامي يوميه تزن براسي طلعي دوري شغل مو كلتي اني ادور معليج مني واني اسكت عنها واغلس..

مر اسبوعين خابرني ابو الصالون وكال فتحنه دورات تعالي باجر دخلي دورة يلا اشغلج .

رحت ثاني يوم وانصدم الدوره بفلوس حجيت وياه..

سيلين : زين اني ماعندي يصير ادخل دورة وبعدين اشتغل بدون راتب على ما اوفي فلوسها وبعدين حسبولي راتب..

_ ولو احنه ممسويها قبل بس راح اتساهل وياج..

سيلين : شكرا ربي يوفقك شوكت تبلش الدوره .

_ اليوم ساعه ١٢ .

سيلين : تمام شكرا.

_ عفوا..

ضليت كاعده بالصالون وانتظر صارت ساعه ١٢ دخلنه للدوره ، اليوم علمونه على كصات الشعر الطويل ثاني يوم على القصير وثالث يوم كمنه نجرب على باروكات مال لعابات ، ثالث يوم مكياج ،

استمرت الدورة اسبوع كامل كل يوم شكل بس اكثر شي ركزولنه على المكياج ، وزعولنه علب مكياج علمود نتعلم بيهن بالبيت ، من رجعت كمت اجرب على وجه ايفين ملامحها تجنن تسوي واهس وهيه مكيفه تطكطك صور لنفسها..

كصيتلها شعرها اول مره صار مذايل كامت تبجي بعدين عدلته الها..

وكمت اشتغل بالصالون بس كلبي معصور على عمه تطلع اغنيه اتذكرها وابجي يصير موقف اتذكرها ،

الى ان ابو العمل انتبه عليه ونبهني افصل بين الشغل وبين حياتي الخاصه لان شغل الصالون يرادله وجه ضحوك وابتسامه ويه الزبائن الضاهر مشتكين مني يمه..

التهيت بالشغل وبالي يم ادهم وايمن ومريم كلش مشتاقتلهم ، مر شهر وجنه كاعدين اني وايفين بالغرفه كلت اتصل بلكت صار احسن ويكدر يجاوبني ..

اتصل ميجاوب ، اتصلت على ايمن هم ميجاوبني ..

سيلين : ايفين شو اتصلي على ايمن ..

ايفين : ليش ؟

سيلين : اتصل يدك ميجاوب ضل بالي..

ايفين : اتركيه جوز مشغول عود هو يدك من يشوف المكالمه..

سيلين : هم صدك..

ثاني يوم اتصل هم ميردون عليه دزيت رساله لادهم..

شلونك عمو بالي يمكم مشتاقه لمريومه كم مره اتصلت وماكو رد ان شاءالله ماكو شي..

طلع تم التسلم ومجاوبني ..

كلبي كام يفور ليش ميرد عليه ..

ثاني يوم رحت للصالون واخذت ايفين ويايه رادت تجي ضاجت من كعده البيت ...

شافها ابو الشغل وكال..

_ هاي اختج.

سيلين : اي

_ هم تريد تشتغل

سيلين : لا هيج اجتي ويايه.

_ ليش ما تشتغل وياج..

سيلين : مريضه وماحب اتعبها..

_ ننطيها شغل ميتعب وخليها تشتغل.

سيلين : ماعرف اشوفها شتكول وارجعلك خبر.

رحت لكيتها كاعده كعدت يمها وحجيت وياها.

سيلين : تشتغلين هنا ويايه..

ايفين : علواه اخلص من امج يوميه مكابلتني وتسأل بيه مللتني..

سيلين : لعد اشتغلي ويايه ومن تتعبين اني اشيل عنج الشغل.

ايفين : فدوة لاختي وهيج يصير عدنه فلوس ..

سيلين : اني لحد الان كاعد اشتغل بلاش وفهمت امج مصدكت بس شوفتها شهاده الدورة وشافت الوصل ، وتريد نص الراتب..

ايفين : لتكليلها شكد تستلمين.

سيلين : اني هم هيج فكرت علمود نلم كم فلس كلشي يصير تخيلي يجي يوم وترجع تطردنه .

ايفين : هم صدك زين وين نضم الفلوس .

سيلين : يم صاحب الصالون نكله منستلم الر

اتب ناخذ بس اللي نحتاجه وهيج تنجمع رواتبنه يمه ..

ايفين : خوش فكره .

جريت نفس وكتلها..

سيلين : خابرتي ايمن..

ايفين : دزيت مسج ومجاوبني.

سيلين : ليش هيج يسسون برأيج..

ايفين: ماعرف والله جوز عبالهم نريد نرجع يمهم او يساعدونه وكالو نغلس احسن.

سيلين : لا عمو ادهم مو هيج خايفه من شغله وياربي يكون احساسي غلط.

ايفين : شنو؟

سيلين : بلبيت احجيلج كومي هسه نشوف شنو ينطوج شغل.

ايفين : يلا ..

لزمت ايدي تضحك

سيلين : فرحانه افونه.

ايفين : كلش اول مره احس بنفسي افيد بشي..

سيلين : ياعمري بلكت اكدر اخليج تكملين دراسه..

ايفين : وين يمعوده البكدي هسه صف سادس ..

سيلين : ميخالف عادي اني مو وياج هم تأخرت سنتين عن الكليه واذا اريد ارجع شنو يوكفني العمر ، بس وين اني بعد مستحيل ادرس انتي كملي.

ايفين : الله كريم خل نشوف وين تصفه ويه امج وزوجها..

رحنه لصاحب الصالون وسألته.

سيلين : شنو تنطيها شغل..

_ هيه متعرف شي مو ؟

سيلين : لا متعرف.

_ ماشي نخليها تلبس الفوط مال صبغ للزبونات و تغسل فرش الاصباغ ترتب هيج شغلات..

سيلين : بس متنظف..

_ اكيد عدنه منظفات شغلهن وحد.

سيلين : بالنسبه للراتب شلون..

_ اني احدد الها حسب خفيتها بالعمل..

سيلين : ان شاءالله خير.

_ تفضلو لعملكم.

ايفين : شكرا جزيلا.

_ ولو تدللي..

رحنه نشتغل خلوني على كص الشعر وبعدين بلشو يعلموني الاصباغ شلون اصبغ الشعر وشلون اقصره ، واني من النوع بسرعه اتعلم ...

كملنه شغل ونطانه يوميات هاي وحد عن الراتب ، طلعنه اني وياها وافترينه شويه ودخلنه مطعم اكلات سريعه وصينه كل وحده لفه وببسي اكلنه ورجعنه للبيت لكينه الهوسه كدامنه عراك ماما وزوجها ، دخلنه لغرفتنه وهيه عياطها ماخذ الدنيا كتلها ماعرف شسوالها وتعيط..

ايفين : جانت ماراضيه على بابا.

سيلين : هذا دواها شوفي شلون تدور راحته وتخاف تاخذ منه مصرف وبابا خطيه جانت مخاله على حاله حال ..

ايفين : اول تالي امج تضل بنفس الدشداشه شفتيها من جينه لحد الان دشداشتين تغسل وحده وتلبس الثانيه..

سيلين : وبعد وبعد خليها حوبته بابا متتعدها

ايفين : عوفج منها واحجيلي شنو الخايفه منه ..

سيلين : شنو قصدج ؟

ايفين : مو كلتي خايفه لا عمو ادهم سامع شي مدري شنو وسكتي..

سيلين : هاا باعي زاكروز النذل باسني وشافتنه اخت ادهم وهزت ايدها وفاتت يمكن عبالها ب ارادتي هيج سويت..

ايفين : يا عزه شكد نذل.

سيلين : مو جنت اكلج عليهم موخوش اوادم.

ايفين : اي والله صحيح ، وشنو هسه حجتله برأيج..

سيلين : لعد ليش ميجاوبني ..

ايفين : حيره والله..

سيلين : كومي غسلي وبدلي لتضلين بهدومج راح افوت قبلج اسبح واطلع.

ايفين : ماشي..

دخلت اخذت دوش وطلعت دخلت بفراشي ونمت..

ومرت الايام بين الشغل وبين هوسه ماما وزوجها وبين التبسمر مالتها على راتب قليل وانتي تطلعين الصبح يجيبج الليل وتكعد تدور بالجنط مالتنه وبالكنتور عبالها نضم عنها هنا لو تدري وين خاليهن تتخبل ، طلعت اربعين عمه واني اتصل ومحد يجاوبني ادز رسائل وماكو رد..

مرت ست اشهر واني ما اعرف عنهم اي شي..

وبيوم بليل ساعه عشره ..

اتصلت على ادهم مجاوبني دزيتله مسج.

عمو شنو الصار ليش مترد تره ضل بالي واريد احجي ويه مريم مشتاقتلها..

ورة ساعه دزلي..

من تشوفين ما ارد ليش تلحين..

الوصل الجان بينه انقطع انسي مريم

وانسينه والتهي بحياتج ..