رواية نعم أحببتك الفصل السادس عشر 16 بقلم انين الليل

طبعا احبابي اكثر الاحداث راح تبقى بين بثينه واياد

بثينه 

ركبنا بالطيارة واحنه ساكتين كأنما غربه واحد ما يحجي ويه الثاني 

وصلنا تقريبا قبل الفجر بشويه انا كلش جنت تعبانه وجعت اريد اكل بس أكابر لان حتى اكل الطياره من قدموا ما 

اكلته وما اريد اكله جيبلي اكل ويتشمت ويكول احتاجتني نزلنا من الطيارة هو

 شايل علاكة ملابسي وهو اي شي ما جايب ويا بطرك القميص والبنطلون والقمصله طلعنه من صالة المطار 

وأجر تكسي ورحنا للفندق وصلنه انا ابتعدت عن استعلامات الفندق اشوفه يحجي 

ويه ابو الاستعلامات طلع ورقه والجناسي بعدين إجه عامل الفندق 

وراح كدامنا وفتح النه الغرفه

دخلت للغرفه وانا ارجف ما أدري من البرد والجوع ما ادري من الخوف وانا كوه افتح بعيوني راسي يوجعني من 

البجي والي صار بيه الغرفه جبيرة بيها كنتور بابين للملابس وبيها ثلاجه زغيرة وبيها 

سريرين من شفت السريرين خف توتري لان منفصلات بيناتهن ميز فوكه اباجوره طلع عامل الفندق وكعد اياد

 على الجربايه مقابيلي باوعلي

جر حسره اياد وكلي ::رايده شي اوصيلج يجيبولج شي تاكلينه 

انا بتحدي يمكن لان بالفندق واكو ناس ما خفت = ماريدشي 

هو كعد على الكرسي وكلي ::شوفي بثينه انتي صرتي مرتي وانا لو ما الجرح الي ابطني وبجتفي جا عرفت شلون 

اتصرف لكن هسه اعوفج ترتاحين وبعدين نتفاهم على هوايه امور صارت وفاجاتني

انا ولا رديت لا كانه اكو واحد يحجي حتى ما باوعت بوجهه انا منتجيه على الجربايه

بعدين حطيت راسي ونمت ما ادري شلون عبالك واكعه من جبل

سمعت دك خفيف على الباب كوه فتحت عيوني باوعت عبالي نايمه ابيتنا

رجعت غمضت وسمعت دك الباب اتذكرت أمس والي صار وا تذكرت لمن وصلنه للفندق 

حسيت على عين كانت تراقبني عرفته هذا الغضب هذا البلاء بس شسوي 

كام فتح الباب وگاله شكرا 

ودخل صينيه بيها اكل وعلاكه يمكن بيها ملابس اله خله الصينيه على طبله زغيرة موجوده ويمها كراسي اثنين 

حاجاني وهو داير وجهه عني :: كومي اتريكي 

جاوبته وانا متغطيه = ما اشتهي

ما رد عليه هو كعد على الكرسي وكام يأكل بصراحه انا أكرهه وما اطيقه لكن هو كان يأكل بطريقه حلوة

انا كمت غسلت وجهي ورحت يم الطاوله هو ما باوعلي بقى ياكل 

انا صبيت كوب جاي ورحت عه الجربايه ضليت اشرب شفته خلص من الريوك وطلع جكاره وكام وكف فتح 

شباك الغرفه وأخذ يدخن وانا خلصت كوب الجاي ورجعته للصينيه

ورة شويه إجه عامل الفندق اياد أخذ منه علاكه وانطا الصينيه 

شفت اياد فتح الثلاجه وخله العلاكه بيها ورجع دخن جكاره ثانيه وظل يسحب نفس قوي احس بي متوتر كمل الجكاره

 خلاها بالنفاظه و فتح العلاكه وطلع منها منشف وملابس ودخل للحمام 

سبح وطلع ظل يمشط وهو لابس تراك رصاصي 

ما حجة وياي صار تقريبا الظهر دخل للحمام وطلع وشفته بدل مكان الكرسي وانوب فتح الكوميدي وطلع مصلايه 

وصار يصلي لان الظاهر بسبب جرح بطنه ما يكدر يسجد على الكاع

انا اباوع وانا ساكته خلص صلاته واتمدد ع الجربايه بعدين وكف انا كل ما يتحرك يدك كلبي واخاف منه هو اخذ 

ريمونت وفتح التلفزيون انا هسه انتبهت انو بالغرفه اكو تلفزيون

رجع اتمدد على الجربايه وانا بقيت كاعده بمكاني ما تحركت على الساعه بالثنتين بعد الظهر اياد حاجاني 

:: راح أوصي على غدا شتحبين اطلبج 

انا جاوبته بنتر = ما اريد ما اشتهي

ما جاوبني رفع التلفون وطلب غدا عشر دقايق وجابو الصينيه وخلاها اياد فوك الطاوله ما حجى وياي ولا كلي 

تعالي اكلي

هو اكل و غسل وشعل جكارة وبعدين لبس ملابس من الي بالعلاكه وطلع من الغرفه بعد ما رش عطر ويدندن 

من طلع اياد انا باوعت النفسي انتبهت بعدني بملابس أمس بالفستان الي لبسته من اجه سعد هو واهله صرت 

احچي ويه بنفسي ==اه اه يا سعد هسه شنو جاي تسوي

= بس لو اعرف ليش ابوي فجأه تبدل وما قبل بالخطوبه 

= وليش امي عاملتني ابرود

= اكيد هذا التافه حجالهم انو احنا ردنا ننهزم 

= وانت يا سعد هسه شنو سويت وليش غلقت تلفونك من حاچاك وغلط عليك معقوله خفت منه 

= لا سعد ابد ما يخاف نسيت لمن اتضارب ويه التلاثه الي حاولوا يخطفوني نسيت شسوى بيهم لكن اكيد هو اله اسبابه

هسه انت وين هم جاي تفكر بيه مثل ما انا افكربيك 

انتبهت النفسي وباوعت للغرفه وگلت = أستغفر الله انا شبيه شنو نسيت انا صرت على ذمة رجال ثاني

 صدك اكرهه وأشوف العمى ولا اشوفه بس لا لازم ما أفكر بشئ اهم شي أفكر شلون اخلي يطلكني

 وافتك منه الهذا الحقير ابن عمي من عمه الي يعمي ويعمي امه ويا (رفعت ايدي ادعي ) 

ياربي اثنينهم عميان وكل ساع واحد منهم واگع بسيانه 

ضحكت رغم ضايجه وانا اتخيل المنظر واتخيل اياد شلون اعمى ولابس نظاره لو كريمه وهي واگعه بالسيان 

وبس تغلط وتعيط

نزعت الفستان وشمرته عه الجربايه ودخلت سبحت وطلعت كان وجهي أصفر من التعب والجوع 

مشطت ورجعت كعدت عه الجربايه وانا لابسه تراك ماروني ما سيطرت على نفسي حسيت بجوع 

فضيع رحت فتحت الثلاجه شفت بيها بسكويت وعصير 

اخذت باكيت بسكويت وعصير وصرت اكل من كملت خليت بطل العصير وباكيت البسكويت بالكاع وحسيت أبرد 

صرت ارجف رغم الجو مو هلكد بارد نهاية الشهر الثالث اتلفلفت بالبطانيه واتمددت ورحت ادور بالقنوات

كاعده اباوع عه التلفزيون صار دنيا ليل انفتح باب الغرفه انا ابد حتى ما التفتت 

شفت اياد يباوع للغرفه ويهز بايده دنك على باكيت العصير الفارغ وباكيت البسكويت وذباهم بسلة المهملات 

واجه عامل الفندق انطا الصينيه لان هو خلاها عباله اكل 

ورجع اياد دخل للحمام واتوضا وصلى انا نصيت التلفزيون احتراما للصلاة خلص واجه يم جربايته يريد ينفضها علمود يتمدد لكن مجرد ما رفع ايده شفته صاح بالم

أخ أخ اخ حسيت انو الجرح الي بجتفه أذاه

انا ابد ولا نهضت من مكاني اصلا ما جنه موجود هو رجع اتمدد ع الجربايه بتعب بدون ما يعدل الچرچف او 

البطانيه ونفس الشي ورة شويه جابو العشا

انا هم ما تعشيت هو اكل شي خفيف وراح يم الشباك يدخن 

ورجع ورة ما خلص جكارته ولف رأسه ونام طبعا حسيت باياد مانايم انا حاولت استفزه بلكي يصير عصبي

 ويصير يعيط وبجون اهل الفندق واشتكي علي صرت احچي ويه نفسي 

=ياالله بثينه بس اهم شي لا تضعفين عليت التلفزيون شفته دار وجهه رجعت عليته أكثر واناادور بالقنوات 

شفته خله المخده على وجهه انا عليت التلفزيون والريسيفر سوى 

وابحث بالقنوات صارت مو غرفه عبالك شارع مزدحم

اياد تافف::بلكي تنصين التلفزيون اريد انطمر

انا ولا كانو أحد يحجي وياي بالعكس طلعت القناة على موسيقى صاخبه وكمت اهز برجليه وانا منزلتها من الجربايه 

گعد وصار ينفخ واجه يمي اخذ الريمونت ونصه التلفزيونولزمني حيل من فكي الأسفل عبالك يريد يكسره

اياد وعيونه كلها غضب وكز على اسنانه 

::من اكول نصي التلفزيون تنصينه لا اكسره على راسج 

انا اباوعله واخزره رجع كلي 

::شوفي ولج من احجي وياج نزلي عينج لا اراويج شي ما شفتي كل عمرج يا حقيرة

،انا خليت عيني بعينه وكتله وانا ارجف = لاتغلط

اياد وهو لازم فكي ::اذا ترديني ما اغلط احترمي نفسج لا اعرف شلون اربيج من جد وجديد

انا خزرته وظليت اتنفس قوي وكلبي يدك وهو يخزر بيه ضم كف ايده عبالي يريد يضربني وگلت هاي فرصتي 

اصرخ والم الفندق لكن هو ضرب الحايط ورجع خزرني واتوعدني بعيونه وراح بدل ونزل 

من طلع اياد الساعه تقريبا عشرة باوعت وانا فكي الأسفل يوجعني

رحت الثلاجه وطلعت بسكوت واكلت وفتحت الفريز هيج بس اباوع

لكيته مخلي عصير رمان علمود يجمد هاي عندي عاده أحب أجمد العصائر واكلهن مثل المثلجات 

ما أحب أشرب العصير وجنت أكثر شي أحب عصير الرمان وهو يعرف بهذا الشي لان هو جان يجيبلي العصير 

ويجمده من جنا زغاروشكم مره يحصل رزاله من امه لان عبالها اله ومن تعرف بي اليه تلزمه وتبهذله وحتى تضربه

 لكن هو يرجع يشتريلي ويجمده اليه حتى بالشتا

انا اكلت البسكويت وهل مره عاندت نفسي ما طلعت العصير باوعت للغرفه مبهذله كمت شلت ملابسي وحطيتهن 

بألكنتور وعفت ملابسه خليتهن نفس ما هنه فوك العلاكه ورتبت جربايتي وعفت جربايته 

وشلت باكيت البسكت وكعدت على الجربايه وانا أحچي بصوت مسموع

= يكلي حقيره لا اشو انت اكبر حقير

= هو منو يعتبر نفسه هو والله لو يبقى بس هو بالزلم أعتبره نكره

= على عناده دلوع الماما رتبت جربايتي وملابسي وخلي هو

ما أرتب لا ملابسه ولا جربايته لو يموت 

،ورفعت اديه وانا اكول = ياربي يموت ويخلصني منه ياربي سياره

 بدون أرقام تدعمه وتفكني منه شايف روحه متعجب بعضلاته لزم فكي يريد يكسره 

الحقير واكبر حقيير يطلع مرجلته عليه الله ياخذه

كنت احجي بقهر بحركه بس واحد وكلي دوري شفت اياد واكف انا تسمرت بمكاني بلعت ريكي لان اعرف خلص

راح يموتني من الكتل 

الي صار هو ما حجه اي شي ولا كانه سمع شي بس اعرفه صاير نار لان شفت الشرار طالع من عيونه 

كعد على الجربايه حسيت من كعد اتاذى لزم النقال و اتصل وهو يحچي بالم 

::الو هيثم تعال وياريت تجيبه للطبيب ع السريع كلش متاذي 

ياالله بانتظارك لا تتاخر 

بعدين كتب وخله النقال ع الميز

ربع ساعه واندك الباب اياد بدون ما يباوعلي ::البسي حجابج وصيري على صفحه

وراح فتح الباب بعد ما اتأكد انو انا لبست الحجاب وكمت من مكاني صرت بصف الثلاجه 

دخل واحد سلم على اياد والثاني بيده جنطه عرفته الطبيب 

اياد راح على فراشه فتح القميص الي چان كله دم الظاهر الجرح الي ابطنه جاي ينزف 

اشوف الطبيب عقمه وضربه إبرة وكله الاياد وين علاجك

اياد جاوبه بتعب ::نسيته دكتور ما جبته وياي

الطبيب كتب علاج وانطا للرجال الي وياهم كله 

=هسه تروح تجيبه من الصيدليه الي بالركن 

واياد باوعلي واشرلي بعينه يعني طلعي عصير انا طلعت عصير وقدمت للدكتور آخذة وابتسم بوجهي وشكرني 

واجه الرجال جايب العلاج بسرعه وهم قدمتله بطل عصير بعد ان كتله = مساء الخير

الطبيب حاجاني بهدوء /مدام تعالي شويه من فضلح 

اجيت بارتباك وانا اباوع الاياد وهو ما يباوعلي الطبيب طلع مرهم وطلع حبوب كبسول وقطن وهو يگلي 

شوفي مدام هاي تعقمين الجرح بهذا المطهر وقطنه تخلينه خمس 5 دقائق بعدها ينشف راح تفتحين 

كبسولتين وتخليهن عه الجرح وبعدين تخلين الشاش والبلاستر تمام 

هزيت راسي =ان شالله 

الطبيب // مدام مرتين باليوم مو تنسين افتهمتي 

=اي دكتور 

الطبيب /تعرفين تضربين ابر

،انا بتوتر =. لا لا دكتور كل شي ولا الابراصلا اخاف منها 

،اياد باوع للرجال الي ويه الدكتور /عادي يجي هيثم ينطيني الإبر

الدكتور باوع الهيثم //هسه اني انطيته ابره وراح اروح وانتي مدام بلشي بعملية

 تعقيم الجرح وأي شي تحتاجون رقمي يمكم يالله تصبحون على خير 

هيثم //تصبحون على خير اي شي تحتاج وباي وقت رنه بسيطه 

ايادهز راسه // وانتم من أهل الخير شكرا 

راد يكوم وراهم همه ما قبلو انا رحت قفلت الباب ورجعت

والدكتور طلع كاتبله على حبوب كبسول يشربهن كل ست ساعات وكله لازم تأكل زين 

هو اتمدد ع الجربايه وجان لابس القميص اجيت يمه اتدنيت اباوعله حاط ايده على عيونه رحت طلعت بجامة تراك 

اتقربت وحجيت ويا بهدوء

= اكعد ألبس هاي البجامه البنطلون اياذيك

هو باوعلي أخذ البجامه وكعد ع الجربايه وانا شلت بطل العصير ورحت يم الثلاجه اجيت لكيته متمدد ع الجربايه وهو 

مبدل ظليت انا ما اعرف شنو اسوي بقيت واكفه ومرتبكه وبنفس الوكت خايفه لان اكيد اياد سمعني وانا اغلط وادعي 

علي حچيت ويه نفسي بعصبيه 

= اي واذا سمع شنو يعني خلي يعرف انا ما أحبه واتمناله الموت لان حرمني من اهلي ومن حبيب عمري 

= وج بثينه آنجبي يا حبيب عمرج وينه اشو من سمع بأياد دخل للغرفه ويعيط عليج ومن حجى ويا ما جاوب 

وابوي اتصل غالق التلفون حتى بالجذب ما خلى واحد من اقاربه يخابر لو هو اجه وجاب ناس وسجل موقف 

لا تغالطين نفسج وتخلين سعد حجه بس كولي انتي ما تحبين اياد 

= اي ما أحبه واتمنى اموت ولا ابقى لحظه وحده ويا اكرهه أكره كل شي بي 

اهنا انا ما سيطرت على روحي غلبتني دموعي وصرت ابجي واشهك بالبجي اياد حسيت بي ما نايم بس خال ايده 

مغطي عيونه تمددت وبعدين نمت 

//////////////::////////////////:://////////////////:://////////////////////

اياد 

 بعد ما اجت عمه وفيقه وكالت قنعتها وهي يرادلها وكت لان تحس بيك مثل اخوها انا استاذنت عمي اروح 

واحجي وياها وحتى اتاسف الها واطلب منها تنزل تتعشى 

::عمي من رخصتك اروح اتاسف من بثينه واطلب منها تنزل تتعشى 

: اي بابا روح خليها تنزل وخلي تسمع من عدنا وتشوف راينا اكيد راح تقتنع مو هيج صابر 

ابوي // ايي حسين اكيد هي بتنا واحنا ما نريدها تروح للغريب

چانت نيتي اتقرب منها واحاول احتويها وافهم منها ليش رافضتني يمكن شايفه بيه شي غلط لازم اعرفه واحاول 

اصلحه وهم وراي امي الي لاهي تطيقها ولا بثينه تريدها لذلك قررت اخذ بيت حتى لو زغير واسكن بي انا وبثينه

وما اخلي بثينه تصطدم بامي انا اعرف شلون اتصرف 

صعدت وانا جاي احضر بالكلام وشلون اتاسف الها شفت الباب مردود وسمعت همس ممزوج بدموع عبالي

تبجي لكن الصدمه من اتقربت وانا اسمعها تسبني وتكله

= سعد انا ما اكدر اعيش بدونك وكله من هذا الحقير ابن عمي 

وبعدين تكله = اي اكيد واثقه بيك 

لكن الي خلاني اعيد حساباتي واتصرف بسرعه من اسمعها 

= شلون تريدني انهزم وياك زين الناس اهلي شلون لا سعد مستحييل 

اهنا انا لزمت اعصابي وكلت:: اي بثينه بت عمي سباعيه ما تسويها ما تنزل نفسها وتبيع اهلها على مود ترضي 

رغباتها ورغبات واحد حقير انا اله صار ثاري وياك شخصي

وبقيت اسمع شلون هو جاي يشجعها حتى تنهزم ويا تترك اهلها وكرامتها وتنهزم ويه واحد منحط حقير 

اهنا ما تحملت وانا سمعتها اقتنعت ومستعده تنهزم ويا والي اكدلي هذا الشي من تگله الجواز واجنسيه عد ابوي بالقاصه 

انا صرت مثل العاصفه الي تخرب كل شي كدامها 

باغتتها ودخلت للغرفه ولزمتها من ايدها واخذت النقال ومجرد ما كتله اول كلمه هو الجبان سد التلفون بوجهي 

عرفته اكبر جبان واتوضحت الصوره الي خبلتني اكثر وهي بثينه عدها علاقه ويا وتريد تترك كل شي وراها 

وتنهزم ما انتبهت الاعصابي 

شمرت الجهاز بالكاع واتفلش وصحت على عمي اترددت ما اكله لكن خفت تنفذ رغبة الحقير سولفتله كل شي 

سمعته هو صار يرجف وكال اله اذبحها واطم عارها لكن انا هدئته وطلبت نعقد هسه واخذها وياي وعمي وافق 

ومحمد جاب السيد وعقدنا وسافرنا وانا اشوف بثينه مزيج من خوف وعناد 

بيني وبين نفسي كلت خلي اسايسها حتى اعرف منها علاقتها ويه سعد ليوين واصله ما اخفيكم انا الغيره جاي

تكتلني 

ودي الزمها اجرم بيها واموتها لكن مرغم اسكت اريد اعرف وين واصله بعلاقتها ويه هذا الخسيس 

قررت اسافر الاربيل وفعلا طلعت بسيارتي لكن اخواني ما قبلوا لان ليل والاوضاع متوتره وصلوني للمطار 

وهناك حجزت ومحمد ورياض رجعوا وبالمطار امي سمعت انو انا ناهي على بثينه وعاقد عليها وهي ظلت 

تحچي وتسب وتغلط مو بس على بثينه لا حتى على خاله وفيقه لكن انا ما انطيت بيها وعرفت من خلال كلامها 

انو ابوي واخواني مفهمين امي انو انا نهيت عليها وعقدت 

 وصلنه الاربيل واخذت غرفه بسريرين منفصلات اول يوم نامت بمجرد

ما وصلت المشكله انو هي بقت على عنادها وانا بهاي اليومين اشوفها ذبلت وهي تكابر وتحاول تتصنع القوه 

وعدم اللا مبالاة وانا اعرفها خايفه مني حاولت شكد ما اكدر ابين الها هي ما تهمني بس اخذتها حتى اكسر راسها 

وهي بيها وما تعند اعرفها البثينه من تشوف نفسهامهزومه تصطنع القوه ما تعرف ضعفها فاضحها 

قررت مجرد ما ارجع اخليها يم اهلها واذا تبقى رافضتني اطلكها 

ايي اطلگها حتى لو هذا الشي اياذيني المهم ابعدها من هذا الي راد يدنس عرضنا وقررت اشوف شغلي ويا وما اتركه 

اله وانا اعرف عنه كل شي وادفعه ثمن حقارته غالي 

لكن الي خلاني اقرر ما اتركه السعد هو سؤال يجول بخاطري 

سعد شنو غايته يشجع بثينه حتى تنهزم ويا وليش 

زين ليش هو غلق النقال وما حاول يبرر العمي ما لازم الي 

بديت اشك وهنا اتصلت بولد صديقي ومجرد ما خابرته بس سلمت علي لان ما اكدر احچي اي شي اكيد هي تسمعني 

لذلك بعد ما سلمت گتله راح اكتبلك رساله انت اقراها وعلى ضوئها اتحرك