رواية بيوت الصفيح الفصل السابع عشر 17 بقلم زهراء السراي

 

 

رواية بيوت الصفيح الفصل السابع عشر بقلم زهراء السراي


وبكل مايحمله الكون من
مشاعر أحببتك
..
.
غِنى
_____________________

"السعادة اللي تجي بعد الحزن الطويل
طعمها يشبه طعم المي البارد بعد عطش طويل
تروي الروح وتعلّمك إن الوجع ميدوم

لازم أيدي وواگف گبال المجمع

-ماااااريد والله

-شوفي غِنى بعدج مشايفه من عصبيتي
شي لذلك دخلي حبيبي يلا وبدون
عناد الناس جاي تباوع لو تردين أشيلج

-لابسة أسووود يعني شسوي بالملابس

-تدخلين لو تردينه نختلف بالرأي گدام الناس وأنگرج
كله

باوعتلة صفح رفعلي حاجبه
وسحبني لداخل المحل يهمس

-بطلي هالحساسية المفرطة صرررت رجلللللج
خيالج

-اي مو اني حصان

ضغط ايدي مبتسم

-لا فررررس جامح

گرصته من اصابعه وهو ولا كأنه يباوع للملابس
كف ايده مرتاح بكف ايدي اباوع لأيده
وكأنها انخلقت حتى تحضن كفوفي ابتسمت هو
رفع راسه وصارت عينه بعيني

-أكيد ممصدگة كل هالكاريزما صار من حظج ونصيبج

-لا بالله اكيد انتَ اللي ممصدگ كل هالجمال والرقة
صارو من نصيبك

-بعد بعد مو هسه اصدگ

-يمتى أن شاء الله

-من …………

باوع لشفافي ولعب حواجبه بخبث

تركت ايده وهو وگف على جهة يحجي ويا العامل
شوية وتمشالي

-تعاي حبيبي الطابق الثاني فساتين
وملابس رسمية

-مااالبس فساتين

-اي ميخالف جربي

صعدنا للطابق الثاني وگعد يفتر براحتة هدوء
دنيا صبح ووقت دوام محد موجود

افتر من جهة واني من جهة والتقينا بالنص اني
بيدي قطعتين عمليات وهو شايل نص المحل

سحبهن من ايدي شمرهن على ستاند

-جربي ذوقي

-أكيد يخبووووول غير اختاريتني

-لا والله اني البس ٤٠ وهذا ٤٢ اصلا اكبر من قياسي بنمرتين
بس مريح

-يلا اللي بعده

فستان أسود بقصة كلوش سادة مابي شي
وفوگة سترة رسمية قصيرة نااازك

-ايييييي هذا اخذي كل الالوان

-شسوي بيهن الاسود احلى شي واخذ وردي يمكن

-اللون الوردي تلغي من حياتج حبيبي

-ليييش والله يخبل

-هو لأن يخبل منريده

بقى يختار واني مقررة اللي اختارهن
كلهن اخذهن أسود نزلهن الوان وحاسب وطلعنا

صعدنا السيارة وطلع بينه للبيت
دگ الباب ومخلاني ادخل للبيت

طلعت صِبى بعباية الصلاة بس شافتنا
ابتسمت ردت ادخل دفعني بصفه وهو يضحك

-الله يساعدج خويه

-ابو حمادة ويساعدك تفضل جوه

-يابة هايه بتكم تنطوها لو اخذها هسه وياي

-ادخل ادخل هي الك

باوعتلها مستنكرة

-لج صبيوة شو بايعتني بلاش

فتحت الباب ودخل هو للحديقة بيده الورد اللي جابه
اليه خلا بحضن صِبى وغمزلي ضاحك رادته صِبى يدخل يرتاح 
مقبل يدخل مستعجل

-اني عن نفسي انطيتك بعد

-واني مموافقة شو بكيفكم قررتو

ولأول مرة صِبى تنطلق وتحجي وتتشاقى

-صِبى راح أموت اني مااعرف شلون يمشي
يومي من دونه خلللليني ساكتة ابووو حمادة
اخذها مني موووافقة

-اييييييه يا خويه ادري بيها واگعة على وجها
بحبي وترى حقها

يحجون عادي صِبى متونسة وتجاوبه

-اكيد حقها لعد شلون

طگها ضحكة وهو يشوفني صافنة عليهم
جله صوته وحجه بجدية

-اني وبكل فخر وممنونية جاي وطالب ايد
غنوة منج واني المحظوظ اني راح اخلي بگلبي
وعيني وبيتي هيج جوهرة

خجلت شو دخلت جوه
واتسمع عليهم

-آني گلتها وأگولها ان اخويه فرقد لو باقي عايش
جان طلع نسخة منك لذلك اني اللي يسعدني ان
تكمل الجزء المثلوم من عائلتنا وسعيدة انك
جنت جزء من حياة غِنى بوقت جانت تتخبط بي
لذلك انطيتك غِنى واني واثقة انك راح تسعدها وتصونها طول العمر

ابتسم وگاللها

-على بركة الله

-تعالي گعدي يمي حبيبتي
أريد أحجي وياج بشي مهم بس قبل لا أحجي أريدج تعرفين شغلة
إنتِ مو بس أختي إنت بنتي وروحي وصديقتي

آني وافقت مو لأن أني مستعجلة 
بس لأن جنت أحلم أشوفج عروسة ببيتج مرتاحة وسعيدة بس القرار إلج اكيد

لزمت ايدها ضاغطة عليها وأيمن مبتسم عينه علينا

-مااعتقد راح اوفي ديونج فد يوم ومااعتقد
احد راح يكون حنون وحريص على مستقبلي بكدج
لذلك اللي تگولي انتِ اني موافقة علي

-واني موافقة على ابو حمادة يكونلج سند وظهر اذا مال الوقت بيج ابو حمادة الله شاهد اخويه انتَ بس اريدك تسمعني للأخير 

أني ما عندي أحد لا أب لا أم لا عم لا خال
بس عندي غِنى و مُنى هنه راس مالي بهالدنيا 
إنتَ أجيت للباب وجبت وياك نيتك الطيبة 
وعيونك اللي تنطق فرح بهالقرار 

بس أريدك تعرف شغلة مهمة 
هاي البنية ما وراها ظهر
وإنت إذا تريدها ما راح تخطبها من أحد
إنت راح تخطبها منك لأن أنت صرت أهلها
أنت راح تكون سندها وإذا بيوم زعلت منك راح تلجأ لحضنك وتشتكيلك منك  
لأن فرقد مو موجود وصعبة تروح تشكيك لقبر لذلك
امنتها بيدك وانت تحافظ عليها كأنها اثمن أشياءك
وتعتبرها أمانتك 

1
اختلط صوت صِبى بحشرجة البكاء بعد ماذكرت فرقد
وكف أيمن وخله ايده على صدره

-أني ما جيت أطلب بس غِنى أني جيت أطلب عائلة وأهل 
أوعدج أخليها ملكة وأعيشها بعز مثل ماعاشت بعز فرقد وماراح تحس بفرق غير اني راح احبها اكثر
كل يوم 

-إذا جان هذا كلامك وافعالك اني اشهدلها
فآني أباركلكم من گلب وروح راضية لأن أختي راحت لأهلها 

عدل تشيرته ونزل راسه خجل يمه ولا عرفته
مسح على لحيته خجلان

-نتوكل وهالأسبوع نعقد

فتحت عيوني متفاجئة و صِبى التفتتلي

-ها شگلتي

-وحزني على خالتي

لزمت ايديه صِبى وحاجتني بهدوء

-خالتي نفسها راح تكون سعيدة
وفرحانة بهالخبر خل نفرح بيكم الحزن
اخذ هواي من حياتنا ها شگلتي

باوعولي اثنينهم هزيت راسي خجلانة
وهو سلم

-لاوالله والنعم

دگ صدره وطلع هو و صِبى للباب بقو يحجون
شوية وراح سدت صِبى ورا الباب والتفتت فتحتلي 
ايديها ركضت حضنتها

-ولج واخيرا عدنا عروس بالبيت

-شتگول الناس

-ياناس شصار بينا من وره الناس
وشحصلنا اسكتي وخل نجهزج للخميس

-شو استحي انزع الأسود

-لا تستحين الحزن بالگلب

-ليش متنزعين الأسود انت

صفنت بوجهي وغرغرت دموعها

-ولا حتى لخاطري

-تطلع سنة خالتي يلا

-ولا حتى تفرحيني بخطوبتي

-الله كريم

كالتها وسحبتني مدخلتني جوه
للعصر قررت تفجر الخبر لمنى وسومة
اللي انطلقن فرحانات وسومة مثل الاخت
الجبيرة وگفت

-بيتجن صغير الخطوبة بصالتي

-فدوة لگلبج

حضنتها صِبى مكملة كلامها

-جنت شايله هم المكان

-تشيلين هم واني يمج الخطوبة ببيتي وحتى
الحنة وشتردن تجهيز السوگ كله اعرفه
شوفن نروح باجر نجهز براحتنا
حتى يبقالنه يومين ترتيب لغنيوة ام كفشة

-عززززة شبيج سومة

-والله وجهج مامار علي خيط

-مااحف بس شواربي وحواجبي

-والمكياج شلون يثبت وانتِ وجهج وجه
الباجة من الشعر

تركتهن يحجن لأن دگ تلفوني 
أيمن يتصل فتحت الخط

-ها يمناي

-ها خطيبتي

-هههههههههههه الشايب وخطب شدو
روسكم ياگرعان

-فتحي نت وفتحي كاميرا شوفي

-دقيقة

اتصلت بي وجهة گبالي

-شهالخشم الحلو

-ترحيلة فدوه شوووفي حبيبي

فر الكاميرا فساتين تجننننن

-يخبلووووون

-شوفي هالثلاثة اللي وجههم عليج اختاري منهم
واحد

كلهم باللون الوردي الفاتح
اختاريت واحد بتعلاگة وحدة يجي بكسرات ناعمة
عالخصر وكرستال منثور يتدرج من الكتف ويتلاشى ويا الخصر

سديت الكاميرا وهو كذلك بقينا عالأتصال

-شتحتاجين ويا

-مااعرف بسوالف المتزوجات

-اني راح اسأل البنات بالمجمع

-مااااااااريد لتسألهن

-تغار غني

-لا اخاف عالبنات منك

طكها ضحكة وودعني 

رحت للبنات بلغتهم عاللون والدزاين واتفقنا
نسوي كوشة بسيطة ورد وردي وصينية مرتبة
حسب اللي سائد هسه

توزعنا كل وحدة تسوي شغلة
لحد وقت النوم صِبى غطت بالنوم بعد تعب
قضية بنين الله يرحمها
و مُنى خطفتها سومة نامت يمها
مسويات سهرة بنات مثل ميگولن
گعدت وأخيرا بالهوى بالحديقة
واتصلت بي رفع الخط وصوت بوسة
قوية طرش اذني

-الحببببب

-مووووو عيب

-اي اسلملج عالعيب عود

-شو مختفي ختيبي

-ختيبج ستوه رجع للبيت جنت بالمكتب
اتصلت بأخواتي راجع باجر لأربيل

-شگالو البنات

-شيگولون اليفرحني يفرحهم اگلج غنوة
منو يمج

-محد بالگراج گاعدة وحدي 

-تمام

سديت الخط ورحت لصِبى گوة ردت
من التعب

رحت للگراج اتصل

-فتحي الباب 

فتحت الباب ودخل بيده كارتونة مغلفة
جبيرة

-شلوووونة غني

-شلونك ختيبي

-تعاي شوفي فستانج

جبتلة كرسي وأجيت

خلة الكارتونة على رجلي وفتحها

الفستان بالحقيقة أحلى ألف مرة 

وگف وفتحه نزل للگاع القماش يتطاير ويه نسمات
الهوا

باوعلي ابتسم

-هاي النظرة الردت أشوفها بعيونج

-يجننننننن

-تستاهلين كل شي حلو

وگف مقابيلي مبتعد شويه مخلي الفستان على طولي

-اجيبلج كعب

-لا عندي لتجيب

-صراحة صراحة

-گول عيوني

-لتلبسين عالي انهوس من أشوف طولج
هذا وفرق الطول المطلعج مثل المدالية معلگة
بجيبي

-يعني ماالبس كعب

-لا خليج هيج بهالنعومة 

خلى الفستان بيدي رتبته ورجعته للكارتونة
باوعت بيها هيد بيس ناعم وردي
وصبغ أظافر نفس اللون

باوعتلة بفرح

-شلون عرفت هالسوالف

-باوعت صور عرايس واختاريت هالشغلات

-انت شجابك اليه

-قدرج الحلوووو وحظج وبختج العااااالي

-ههههههههههه غرور لو أعتداد بالنفس

-الاثنين

-أريدك أنت بس تكون وياي مثل ماكنت طول ذيج
السنين

مدلي ايده امسك اطراف اصابعي

-راح اكونلج أكثرررر بعد
راح اكون أيمن صديقج القديم وعائلتج
واهلج وقت الحاجة وضيفي عليهن شغلة ثانية

-شنوووو

-تفوووسد راح نتوفسد للعظم فوگ كل هالسوالف ضلعي

-گوووووووم گوم روح لبيتك

-بحبحيها شويه قبل لا أروووح

-صخااام بعيني شتريد

-بوووسسسة

-لعد وين راحت اختي واختي وانتِ مثل رهام

قرب كرسيه ردت ارجع بكرسيي هويت ليوره وبسرعة
لزم الكرسي مرجعني سديت شفافي بيدي بسرعة
بسبب قربه

طگها ضحكة من هاي ضحكاته التذوب الروح
وسحبني بالكرسي مقترب لوجهي

-تعرفين من تغيرت مشاعري ناحيتج
ثاني سنة شصار

هزيت راسي بلا

-كل مااشوفج اتمنى احضنج لحد مااسمع
صوت ضلوعج تتكسر تحت أيدي

فتحت عيوني متفاجئة
وكمل ولا همه شكلي المتفاجئ

ترك الكرسي مالتي وأبتعد رافع ايده ورة راسه
مسنود براحة نزلت ايديه من شفافي وعيني منه
غمزلي وگال

-هذا شي بسيط من خيالاتي راح تعيشين
الباقي صوت وصورة 

-اطلع بررره يلا يلا ابو الخيالات

وگف عدل ملابسه

-ماباقي للخميس بس ثلث أيام
بعدها تدق طبووول الحرب 

طلع يمشي واني ورا التفتت بسرعة
رجعت ليوره

-ههههههههههههه شبيج لج اريد احاجيج

-خبيييث خوفتني

-لتخافين بين ايديه أمني

-ياامني وانت تريد تكسر ضلوعي

ضحكت علي وهو يحجي بجدية

-باجر تروح مو

-شوية واطلع

-لا الصبح أطلع احسن

-تخافين عليه لج

-أذا مااخاف عليك على منو أخاف

-بنت الكلب شگد أحبج

-ولكم بالمثل حبيبي

صفن بوجهي

-يعني قصدج ابن الكلب شگد أحبك

ضربت على شفافي

-لا والله مو قصدي هايه

دفعته من الباب ووكف مد ايده لجيبه

-لزمي ترحين تكملين سوالفج كلها

-لا عندييييي فلوس

-لا هالمرة سمعيني هاي شغلات المناسبات
مرت علية اربع مرات بزواج خواتي وانت تخيلي حافظهن
يعني هالشي مو من عندي لا هي حسب الأصول
هيج صالونج وحبشكلاتج وهالسوالف

خله الفلوس بيدي وسحبها باس اطراف اصابعي

-يلا هم انعم الله بستلي مكان بيج

سديت الباب وصوت ضحكته يرن وهو ماشي
بس وصل للبيت دزلي رسالة

-راح انشغل هاليومين مو يظل بالج تمام
وخليتلج مبلغ زيادة اخذي ملابس بعد للدوام
الوووووان بس اي شي وردي ممنوع

-ولي خل انام مكلف نفسي شنووو
مررررتي ياااابه حلالي

دزلي بوسة ونام

گعدت الصبح لگيت رسالة منه
طالع من الفجر للظهر راسلني واصل

واختفى بعدها يومين مجرد سؤال شلونج
وشلونك ويختفي واني وصِبى وسومة و مُنى 
افترينه بغداد فر لحد ماكملنا كل شي
يوم الأربعاء بالليل اتصل بيه هو ورهام
كلهم جايين لبيته

-ها حبيبي

-ها يمناي اجيت

-اني والقرووودة كلهم

اجاني صوت رهام

-مررررت اخووووي

-حبيبتي رهومة

-نطلع العصر نشوفلج صالون مرتب

-تمام انتظرج

-يلة حبيبتي

-ها حبيبي

سكت شويه ورجع سألني

-شلون ماسمعت

-ها حبيبي 

-يااااااااابة سجيييين مو كلمة

-هههههههههههه ليييش

-تنبت بنص الگلب تاركة اثر
شلونج غنوة

-جاي أسمع

-غنوووة

-عيوني

-سالمات اختي الجبيرة جاية ترى لتشوفيها اجت
ويا رشا بالحقيقة وحدة فاهية وتندفع بسهولة
تعاملي وياها كأنج ماسمعتي شي لخاطري تمام

-عيوني الك

-ميفيدني عيونج كلج اليييي

ودعني وراح نام للعصر اجاني هو ورهام
اللي نزلت وخلتني اگعد يمه صعدت ليوره
بيدهة حمادة تباوعلي من المراية وتغمز

-باوع حمادة هاي مرت ابوك الشرررريرة
من هسة نزلتني وكعدت بمكاني

-شتسووون سووو المهم انتِ ويه ابو حمادة
زينة الباقي مو مهم

التفتت مديتلها لساني
ضحكت وتقربت من يمنه

-والله جنت كل مااشوفكم تحجون يتخايلي
شكلكم بالكووووشة 

ترك أيمن الستيرن وطگ أصبع

-العبببببب عائلة كلها تتخيل

التفتت يغمزلي بخبث وطاير يضحك ويسولف
ويغني وحمادة بيناتنا نزلنا لصالون حجزنا نزل بعدها
لمحل بدلات رجالية بقت رهام بالسيارة حمادة
نام ونزلنا اني ويا

لزم ايدي ودخلنا

ركض هاليوم ركض صِبى بقت ويا
سومة و مُنى وقمر يرتبن الضيافة وكل شي
رهام اخذتني للصالون وهاي بعد مالزمتني
سومة غسل وتشحيم وترطيب وازالة للفجر
يلة تركتني أرتاح

دخلنا الصالون وبسبب مقدمة شعري اللي بالجهة اليسار
ماكو شعر بعده قصير قررت اودي شعري
عاليسار وتخليلي الهيد بيس ومكياج وردي بفضي
ناعم وحرفياً بدعت البنية لبست الكاب اغطي المكياج
وطلعنة ب٣ ونص بعد مااتصل بيه صعدت ليوره
وهو كل شويه ملتفت ومااخلي يشوفني

-ايييمن شبيك لتشوفها هسه هذا فال مو زين

-شيصبرررررني

سكتت صرت حبابة
نزلوني لصالة سومة يجنن المكان بااارد
والكوشة مرتبة هلهلت سوووومة بفرح وطشت الجكليت
فجأة اختفت الأبتسامة من وجهها وسألتني

-ولج غِنى منو وليج بالعقد

-شلون يعني

-يعني لازم حضور واحد من اقربائج الرجال
يكون وكيل عنج

باوعتلها وبسرعة نزلت دموعي
مااعرف بهاي الاشياء اجت صِبى من راحتلها
مُنى 

-ليييش ليش تبجين اتصليلي بأيمن أفهمه

اتصلت وهي كعدت تحاجي شويه وانطتني التلفون

-ها حبيبي ليش البجي اني من البارحة رحت
سألت بالكاظمية گالو الشيخ اللي يعقد اذا مأمون
وثقة هو يكون وكيلها بدال الولي

-شفت غياب اخويه شلون اله اثرررر امتد بحياتنا

-اني مووووجود وتبجين افه وووالله يلا رووووحي
خل اسبح لو اگلج لا ترحين خل افتحلج بث من الحمام

ضحكني يلا راح بالأربعة ونص دگ تلفون صِبى 
ولبست حجابها وگالتلي

-لتطلعن للهول بعد فهمتن راح يجي أستاذ اسد

اسمع صوته يحجي وياها دخلت يمنه
وهو يرحب باللي اجو ويا اتصل بيه أيمن

-ها غنوة اتصل بيه أسد گال منتظركم

-اي صِبى طالبة منه يجي يكون من جهة العروس

انكسر صوتي وهو رد عليه حتى ماانقهر

ضحك وسد التلفون نص ساعة وارتفعت الاصوات
اسد بالحديقة وويا الشباب رحبو بأيمن واللي
ويا وكأنه صدگ واحد من اهلي

دخلو وگعدو شويه وبعد كلام واخذ وعطى
صاحوني أصير وره الباب وسألني الشيخ
بما اني ماعندي ولي طلب ان اوكله عن نفسي
علمني الصيغة وبديت احجي

-أنا غنى بنت عامر ساهي ال ………
البكر البالغة الرشيدة أوكلتك أيها الشيخ الفاضل 
أن تزوجني من السيد أيمن محسن ال………
على مهر مقداره عشرون مليون دينار عراقي حال
وخمسة وعشرون مليون دينار عراقي مؤجل فزوجني أياه

كملت وانطلق الشيخ يحجي الصيغة نيابة عني 

-أيها الأخ أيمن محسن لقد وكلتني الآنسة غنى بنت عامر ساهي وهي بالغة رشيدة بكر على تزويجها بك وقد قبلت وكالتها
فزوجتك إياها على مهر قدره عشرون مليون دينار عراقي حال وخمسة وعشرون مليون دينار عراقي مؤجل
فهل قبلت الزواج بها على هذا المهر

رد أيمن عالصيغة 

قبلت الزواج من الآنسة غنى بنت عامر ساهي على المهر المذكور 

وكمل الشيخ صيغة العقد وارتفعت هلاهل اخواته
واقرباءة نسوان كبار بالعمر عماته وخالاته
وبنات مااعرفهن هوايه نص ساعة توزعت الضيافة
للرجال واعلنت رهام عن قدوم فارس أحلامي
فتحوله الباب بين الصالة والهول ودخل
وگعت عيونه بعيوني بفستاني الوردي اللي
طالع منه جزء من كتفي وشعري اللي نازل بنعومة ويا خصري
وگف يمي رفعتله راسي نزل انحنى باس جبيني
وانفاسة الحارة قشعرتني
كعد بصفي هادئ لازم ايدي ويحجي بهدوء

-غنوة

-يمناي

-مبروك بنت الكلب

-خلف الله عليك

-مااكدر أعبر هسه خليها سكتة الزلم منتظريني

بسرعة رهام و صِبى سون اللازم اكلنا وشربنا كصينا الكيك
اخذولنا كم صورة وراح يمهم برة 

-جاااايج

گالهة وغمزلي وطلع

بدت الحفلة الحقيقية اخواته لعبن جولة رغم هدوء
اختة الجبيرة اللي استقبلتها باحترام رغم موقفها
فرحت والكل يصفك اغاني بصوت هادئ وتصوير
لمدة ساعتين اخذو ضيافتهم وطلعو والرياجيل راحو
أسد واخو ونسيبه واصدقائهم واهل أيمن رجعو لبيوتهم
اتصلت بية رهام واني مقبلة على الحمام اريد اروح
ابدل

-ها رهووومة

-مرت اخوووي الحية لتبدلين جاااااايج ابو اليييمن
اليووووم يومك يا بطللللللل

طكتها ضحكة وراحت صحت لسومة و صِبى

-يبنات ايمن جاااي

-امشي امشي داااادة رجلها بعد لا تصيرين قطاعة
ارزاق

سحبتهن وطلعت ويا دخول أيمن وهو يسلم عليهن
ويصيح لسومة

-جاااااا لوووو هيج الاخوووات لو مااااكو

سدت سومة الباب وهي تضحك ودخل هو واني بالصالة واگفة يم الكوشة دخل بقاطه وطوله الحلووو
اباوع شجنت افكر ورب العالمين شجابلي

وصل قريب مني فتح ايدي تقدمت بهدوء شمرت نفسي بين
ادي حاوطني بهدوء وباس راسي حاوطت خصره بأيديه
واشتدت قبضته عليه واحكم ادي دافن راسة بنحري
نفسة العالي وهدوء المكان حضني بما يملك من أشتياق
لدرجة ضاق نفسي تنهيدة فرت من بين شفافي
بعد منقطعت انفاسي خفت لمسة ايده

-اااااااخ يابه شوووغة أربع سنين وعلي
جنت اتمنى بيهن هالحضن

ابتعد يباوعلي منزل راسه ممسك بخصري
بخفة أيده رفعني عن الگاع

-غنوة

-يمناي

-يابعد رووووووووحي

رجع حضني وبقى هادئ للحظات لامست رجليه
الگاع بعد ما نزلني وامتدت ايده تتلاعب على ذراعي
الطالع من جهة

-شنووو هذا

ها

ضرب بأطراف اصابعه على زندي

-اااااي شبيك

-لتغلط

گلتها ورفعت ايدي ضربته على كتفه

-ايييي بالله بعد ضررربي

رجعت ضربته سحبني يباوع بوجهي
يسولف همس وكأن المكان مليان ناس ويخاف يسمعون

-تدرين شگد تخيلت شكلج برااااسي
بس خيالي مايجي رببببع للشفته هسه

ابتسمت وسألته

-ششفت

-مرتي

ابتسمت للكلمة وهو كمل

-شفت حلم سنين تجسد گدامي على
هيئة حووورية وصار واقع
راحتي من بعد تعبي صارت صدگ بين
ايدي

امتدت ايده بخفة ناحية وجهي
تلمس خدي وغابت ايده بنحري من وره
واختفت بين خصلات شعري تتلاعب اصابعة بهدوء سحبت نفسي وهو
يسحبني لحضنه واختفى ايمن الرقيق وتفعل وضع
أيمن السافل وهو يحكم قبضته على خصري
عينه من شفافي يهددنني

-بس تتحركين حظج أطيحه

گالهة وتقرب عليه بسرعة درت وجهي
احس گلبي صار طبل ودگاته صارت
تنسمع وفراشات تطايرت بخفة
ونعومة داخل صدري غمضت خجل واني ملتفتة 

-رجعي لمكانج لجججج

درت وجهي علي والتحمت
أنفاسي بخجل ويا 
لوقت غير معلوم ذابت روحي بروحه
رفع راسه واجت عينه بعيني عدل شعري
وهمس 

-همممم

-بگد نجوم الليل من
تنطر صباح الله يطل

رجع شايلني بين ادي
مترجم شوق سنين بلحظات
ماخذني لعالمة ساحبني لأضلاعه
اللي صارت مسكني 

وانفتحت دروب السعادة 
بعمري
وانزاح الحزن
.
.
مُنى 
__________________________

بهاي الدنيا كون متأكد الحق يرجع
مو لأن الدنيا عادلة بس لأن ربك ما ينام

بعد ماوصلت قمورة يمي وراح
حمزة الخبل استلمتنا سومة مشطت
شعرنا وغركتنا بالزيوت وبعدين
دهنت ايدينا ورجلنا بزيت السعد
بهاليوم قمر جانت عيونها
تنطق فرح عكس باقي أيامها
خلتلنا سومة الزيوت وراحت نامت
وتركتنا نلعب بالمسبح اللي جابتليا وخلته
بالحديقة لخاطري

گاعدين بتراكاتنا نطبش بالمي
وعيني منها تضحك والضحكة نابعة من گلبها

-قمووورة

-ها حبي

-شبيج طايرة عصافيرج

فزيت واگفة مو مصدگة 

-كذاااااابة

-ورووووح بابا

طلعت من المسبح وسحبتها
بره

-امششششي خل نلبس وشووووفيني

دخلنا جوه مخلين ملابس بالمطبخ
دخلنا غيرنا ونشفنا والعلاليگ صامدة براسنا
وريحة الزيوت تجيب التايه

ركضت وهي تسحبني للشاحنة
عليهة تلفونها

فتحت الفيديو ماصدگت كمية القبح
والقذارة اللي هو بيها

-ذاك الأسبوع يوم الخميس ماما
جلبت بيه الا ابات بنات خالة ام فقار مقبلو
يرحن ويايه لأن عدهم طلعة
حرت شسوي بالأخير أستسلمت لزعلها
واخذني خالو حمزة وصلت كالعادة
لواگته وسوالفه مسوي نفسه حنين
جاب الاكل اللي أحبه بين ما ماما
تاخذ بالصحون عالميز بالهول وگف يمي

-شنوووو رأيج بالعشا

-عادي

-لخاطرج جبته

-اي شكرررررررا

ابتعدت ماحسيت الا گرصته بزندي
التفتت متقززة باس أيده وشمرلي البوسة
بالهوا بلحضتها عرفتة مراح يسكت
وراح يحاول مدام شافني لوحدي

گمت تعشيت وياهم شلون ماكان
وجاززززفت بالنوم بالغرفة وقررت
آخذ ولو جزء من حقي من گلتيلي
لو مسجلتله اخذت تلفون ماما بعد
مانامت خليته متهيأ مطلعة رقم
خالو أسد حتى بس يسوي شي اتصل
وتلفوني جهزته وخليت ملابس بزاوية
الجرباية ثبتت بينهن التلفون بحيث ميبين يم راسي وقررت بس اسمع خطواته
افتح التسجيل 

تمددت بالفراش عيني عالسقف ادعيت 
النوم لساعة كاملة سمعت خطواته
وصوته وهو يتسحب فلتت منه كحة
بسرعة فتحت التصوير وفتحت التيبل
لامب علمود الاضاءة وتلفون ماما فتحت
الشاشة وجهزت الاتصال السريع
على رقم خالو أسد
دخل على كيف وگعد يم رجليه
امتدت ايده لفخذي تحملت وسكتت
گرصني وفزيت گاعدة والتلفون تحت
اللحاف بأيدي جاهز بس اتصل

وگف بسرعة فتح تلفونه طلع صورتي القديمة
وخلاها بوجهي

-شووووفي هالصووورة اجه
الوقت أستخدمها

-اييييدك ومتسوي

دفعني عالسرير وخنگني يحاول يبوسني

-انتتتتتت حيوووان ماكفاك تحرشك بيه
واني طفلة

-لا لا واتمنى باقييية طفلة لأن تلعب
نفسي من الكباااار بس يلا بعدج
طررررية تنفعين

امتدت ايده لصدري واني حجيت
اسحب لسانه

-والله اعيط واگعد ماااااااما

-ماما شربتها حبايتين الرمين 
لأن هاجت الحساسية عدها
يعنييييي ياحلوة لعگب باجر زين
اذا گعدت

-انت مخدررر ماما

-شنووووو مخدرها هي شربت علاجها ويلا لج 
كاااافي لغوة 

دفعني يريد ينقض علية بطرف عيني
باوعت للشاشة واتصلت بخالو فتحت سبيكر
من رد 

-ها قمووورة حبيبتي

فز گايم هو واني رديت

-تگدرون تجوني خالو شو ملل ماما نامت
واني وحدييي استحي من عمو أياد

بكل قوة ايده انطاني كف وطلع
واني غلقت الخط وانهاريت بالبجي
مااعرف فرح لأن سجلت
لو حزن على سكوتي حتى رغم الدليل
اجاني خالو وهو طلعله رحت للبيت
باوعي من سبحت

طلعت اديها ورجليها حتى دم طالع
من گد مغاسلتهم

حضنتها وهي تبجي وتضحك

-يمكن بيوم راح اگدر اعترف باللي
صارلي وراح اشفى من عذاباتي

-وشصااااار ولج شلون عرف

-من رجعت للبيت من تلفون
بيبي طلعت رقمه سجلته يمي ودزيتله الفيديو
يدز رسائل تهديد واني اسكرن بسرعة
وهو يحذف من الجهتين حتى ميبقى
دليل باعي شكتبتله اخر شي

فتحت التلفون كاتبتله

-الفيديو مو بس عندي
مخليته عند بنات اثنين ثقة ويعرفنك
بالاسم ويعرفن خوووالي بس
تتصرف اي تصرف بي اذية
اليه راح ينطن الفيديوات لخالو
اسسسد وساعتها ميكفي موووتك

-بعدها حظرته
وهذا الفيديو احتفظي بي عندج بحافظة
مااگدر اشوفة بتلفوني يمكن يوم احتاجه

لازمة كف ايدي تشرحلي اللي تحسه

-تدرين مرات أتمنى اخلي سجين ببطنه
بس محد راح يصدگ حتى بيت جدو اهل
بابا يثقون بي دخل مفاصل حياتي كلها
متغطي بغطاء الورع دائما يتبرع
للفقراء ينظم رحلات علاج للمحتاجين
كسوة للأطفال بالشتاء ووقت دوام
المدارس ماكو من ماما تشوفني تصويره
ويا الأطفال اتمنى اعيييط بكل قوتي
لتبوسو لتگعدووون بحضنه متحررش
جبااااااااان

-انتهى كل شي 

هزت راسها ودموعها انحدرت معلنةنهاية صبرها

-لا ماانتهى كل شيييي
اني سجلته ولزمت علي مستمسك بس هايه مو النهاية

-كافي بعد صدگيني قمر كافي مر عمر
عليج من الخوف بس رغم كل شي انتِ قوية ولازم تتجاوزين لازم تنسين

-شلون أتجاووووز واني لليوم بعدني عايشة بي 
شلون انسى وريحة الغرفة بعدني أشمها
كل ما أغمض عيوني أشوف أيده تمر على جلدي
أسمع صوته أشم ريحة الخوف اللي يملي رئاتي
بسبب أنفاسة القذرة 
أني منسيت ولا أنسى أني توقف عمري بذاك اليوم
بعدني قمر اللي انسلبت براءتها بعمر السبع سنوات 

حاولت اهدأها امسكت ايدها بقوة 

-بس إنتِ هسة مو وحدج أني هنا
وأخوالج موجودين وراح أظل هنا منا لمن تتشافين
من جرح الطفووولة 

ردت بصوت مكسور 

-هو ما أخذ بس طفولتي أخذني منييييي
صرت اخاف اضحك
اخاف اركض اخاف العب اخاف احد يحضني
يلمسني صار مثل الظل المخيف الاظلم بحياتي
وهذا الظل يركض ورايه بكل حلم

-بس اني أشوفج بعدج حية وموجودة 
واذا متگدرين ترجعين مرة وحدة رجعيلنا خطوة خطوة بخطوات صغيرة 

احتضنت كفوفي وابتسمت بدموع
وردت بصوت مهزوز

-يمكن أگدر ارجع 

-اكييييييد راجعة

فزينة اثنينا على صوت سومة

-گوووومن ولجن سبحن لا يحترگ شعرجن
من زيت الثوووم

طلعنا وحدة ورة الثانية سبحنا وطلعنا
بعدها سومة اخذتنا فرتنا شويه
بالليل دگ تلفون قمورة ردت بخفوت ماسمعت شي
اجتني تشاورني

-تعاي خالو يگول خل تطلع وياج

-شيريد الحقنة

كممت شفافها ضاحكة مثل كل مرة

باوعت واگف وبيدة علاگتين عملاقات

اشرلي

-تعااااي لج

-هاي عليه

رفعلي حاجبه وسحب قمر موگفها يمي
شمر علاگة علية وعلاگة عليها

-هاج انتِ وياها بمناسبة السنة الدراسية
الجديدة

قبل لا ارد اخذ قمر وطلع للسيارة
صعدت قمر وهو أشرلي بيده

-دخلي منا الناس

دخلت جوة وفتحت العلاگة بالگراج
بطوووووط اصفر جبييير خدودة حمرة
ولابس تيشرت أسود وفيونكة سودة
وويا قرطاسية كلها بطابيط وكتاكيت
دخلت العلاگة جوة وسألتني صِبى
گلتلهة هدية ام قمر اليه ولقمر 
گلتها واني اعرف غلط اكذب 
بس احساسي گلي صِبى مراح توافق
اذا عرفت من حمزة

دخلت غرفة النوم خليت البطوط بفراشي
تمددت اتصفح وره ساعة اجتني رسالة من رقمه
اللي رفعت الحظر عنه

-ها لج عجبج البطوط

ومخلي ايموجي بطوط يمها

-شكرا بس اني مو طفلة حتى
تجيبلي بطوط ومااسمي لج اسمي مُنى

بعدني اكتب ودزلي

-ادري اسمج مُنى

- الهدية لا ترد يا ذوق وبعدين ليش متحبين البطوط وهو يشبهج وحتى نفس الخدود

فزيت واگفة لزمت خدودي ورحت راكضة للمرايا

اباوع هاي شنووو سووومة سوتني بطة
صدگ خدوودي مصبوغات أحمر 

رن صوت الرسالة أباوع مقطع صوتي
خليت هدفوني وسمعتها

-رحتي للمرايا أكيد لتخافين بكل حالاتج حلوة 

-يمممممة شلون عرفت

-حافظ سوووالف البط

-لتعيب اني مو سمينة

-لا انت متينة

-اذا رجعتي الغلطة اجيج هسه انظف بيج
المنطقة

-لعد احترم ولتغلط

-نعقد صفقة

-شنو هي

-نسوي تحدي لمدة اسبوعين
منتعارك

-والفايز شيحصل

-هدية جبييييرة

-شنووو

-بعدين تعرفين يلا نبدي التحدي

-اييييي متحمسة

-من هاللحظة منتعارك ونحاول نكون
اصدقاء

-هنا هاي المحادثة متنحذف طول الاسبوعين
وتبقى دليل على اللي يخالف

-اوك هسه شنگول

-بكيفج احجي اللي تحبي

-انت شنو درست وليش

-مااعتقد ماحاجيتلج قمر بس اني درست
هندسة ببرطانيا 

-وحالياً

-حالياً مهندس

-شتهندس

-بغض النظر عن التفاهة بس أهندس
بيوت بنايات مكاتب مدارس

-شغلك حلو

-مااعرف حسب نظرة الشخص
شوفي

دزلي فولدر صور وفيدوات اباوع بيوت راقية
وعمارات سكنية وعيادات
لفت نظري بيت كامل مصوره حتى
الديكور يجنن

-هذا البيت اللي مصوره بالاثاث حتى
الاثاث شغلك

-قصدج الديكور

-امممم

-هذا تصميم البناية شغلي واتفقت ويا
مهندسة ديكور اشتغلتلهم عجبج ؟

-ماادري

-شتحبين تصيرين

-جنت احب أصير مثل اللي تصيره
صِبى بس للأسف مكملت

-ليش

-بسبب موت فرقد اخويه

-الله يرحمه 

-تعرف اني حقدت عليك
من جنت طفلة

-منين تعرفيني وانتِ طفلة ؟

-بسبب مشكلة انت مسويها ويه صِبى
وابن جيرانه قبل سنوووووات وطاردهم من المكتب
وبسببها اخويه انسجن سنة لأن أستاذ اسد
مادافع عنه

-هووواي سنين مرت واني قبل فترة
يلا عرفت من اخواتي انك نفس الشخص

-وهسه

-مسامحتك

-ليش

-لأن بوفاة خالتي وگفتلي وگفة أخ

-اعوذ بالله منج

-هاااا

-لا اقصد الحمد لله وتتدللين
وهسه روحي نامي السهر يخرب عيونج

-شكراااا عمو

-شلووون

-تصبح على خير حمزة

گمت سويت ريوگ صورته ودزيت الصورة

-صباح النور من صينية الريوگ

-كوبج بي هوووايه سكر قللي منه

-احبة الجاي حلووو

-يأذي أسنانج وعظامج

شلت منه ورجعت صورته

-هسه شتگول

-عاشت ايدج نلتقي بعد الشغل

دزلي ايموجي بطة وراح
وبين ريوگ وترتيب العصر بحدود
الأربعة دگ تلفوني برسالة

مصور وهو يسوق مشغل اغنية هادئة
انجليزية

-صدفة

-لا خباثة

-لج

-لك

-لتردين كلمة بكلمة

-لعد شلون تحجي عليه وأسكت

-مرات كلام الشخص نابع من محبة ماكو
داعي بكل وقت تكونين هجومية

-اني هجومية؟ 

-انتِ متحسين بنفسج من تتعصبين
تتحولين لشخصية ثانية

-الي أسبابي

-احجيلي بالله يجوز اعذرج

-يجوووز تعذرني؟

-هاااا نبرة تهديد راح تخربين الأتفاق

-انت مولود يمكن وبحلگك ملعقة ذهب
اني أنولدت بمكان يضطر بي الانسان
يدافع حتى عن حقه بالحياة

-مافهمت

-لا فاهم زين منطقتنا جانت سبب
لنص مشاكلي بالمدرسة
وبالحياة عموماً جنت شاااااطرة
اشطر بنية بالصف هاي اذا مو بالمدرسة
كاملة تجي أيام احس جمر يكوي ضلوعي
من اطلع من الصف وأرجع والگاهن كاتبات
ام الزبل حي التنك الفگر وهووووايه كلمات
جنت هادئة بعدها لبست هالشخصية محد
يستحق ادمر نفسيتي لخاطره لذلك الرد
دائما حاضر على لساني

-وشعرفج اني فاهمج واعرف شتقصدين

-تريد احجيلك الصراحة لو اكذب

-الصراحة اكيد

-صِبى اختي عدها دفتر تكتب بي
مذكراتها

-ميييصير لج ميصير تقري هذا شي شخصي

-والله مقريت بس هالجزء بالصدفة

-شقريتي بالله

-صِبى ذاكرتك بصفحة انت متخيل
من گد ممضايقها كاتبة لفرقد عنك

مادز شي رجع دزلي صوتية

-ردي عليه صوت مااگدر اكتب

فتحت التسجيل وحجيتله اللي شفته

-كاتبتله ان صاير موقف وياها وانت محتقرها
وبالمرتين محسسها بالرخص ومرتين
تتمرض من الكلام لأن صعب تترك الشغل واحنه
محتاجين مادياً لهوايه أشياء كاتبة انك جرحتها
وانها بهاليوم دموعها ماتوقفت ورجعتلها
كل ذكرياتها ويه فرقد بسبب موقفك وتجاوزك
وان هي تتمنى ميتة ويا ولا تواجه هالحياة وصعوبتها
متخيل شگد جانت قليلة حيلة بحيث انت جارحها
وهي مضطرة تشتغل بمكان انهانت بي لخاطر
تعيش وتعيشنا

شوية ووصلتني الصوتية مالته

-تعبك ميبررلك تجرحها

-اعتذرتلها لأن فعلاً غلطت بحقها

-گالت لأختي ان انت اعتذرت بس هي
مسامحتك قبلها تگول عمري مراح انسى
موقفه بوفاة خالتي وشلون دار باله على مُنى

-وشلون عرفتي

سجلتلة صوتية واني اضحك

-جنت اتسمع عليها وعلى غِنى

-علمتج قمرررر الغبية

دزها ورجع كمل برسالة صوتية طويلة

-صح انتِ زعطوطة بس لازم ابررلج موقفي
بموضوع اخوج مدام من سنين فأكيد من جنت
مراهق وشايف نفسي شوفة وهالشي مااتذكره
بس هوووايه اعتذر علي
اما مواقفي ويه صِبى فللأسف مرات الشخص
من بعيد تحكم علي احكام مبدئية لكن من تتقرب
منة وتعرفه راح تغير نظرتك صِبى الها مواقف
مشرفة ويا اخويه بشغله وحتى بحياتة الشخصية
حجالي أسد وحتى قمر شلون جاي تكافح حتى
تعيشكم عيشة كريمة وهالشي خلاني انظرلها
من منظور ثاني 

-هاي الشغلة بقت بينك وبين صِبى ويبدو ان انتم
متسامحين بقيت اني

-شبيج انتِ بالله

-جرحت أحاسيسي

-ياساتر ليش

-تصيحلي ست مُنى المتقاعدة وتغلط عليه
وتسميني لج وفوگها تگلي السمينة

-كلهن مسويهن وماادري

-اي

-تشغل فيروز الصبح بالدوام

-وبعد

-ومتمشي سريع

-ليش تخافين من السرعة

-بسبب حادث امي 

-بعد

-كافي قابل هو طمع

-وانتِ هم

-شنو

-اعتذري عن غلطج لج

-اني آسفة بس مرات لساني بوحده يحجي

-شلون بالله

-وهسة خلصنا اعتذارات

-اي

-جيب الصحاب

دزلي كفوف واحد لازم الثاني

-نعقد معاهدة صلح بطة

-ايييييي

ومن بعد هاليوم لمدة اسبوعين صار
ملازمني ليل نهار بكل شي نسولف من
اتخبل يتخبل ويايه ومن اهدأ يهدأ
يمليلي المحادثة بطات ويروح يشتغل
يگلي حسبيهن علما ارجع
لحد قبل خطوبة غِنى بيوم اني مقبلت
انزع الأسود وقمر قررت تلبس ويايه
فستان أسود لذلك اتفقت ويايه واجت
هي وحمزة خلاها يمنه وراح تاخذني سومة اني
وياها نشتري اول مراح اجتني رسالة منه

-اي اكيييد

-اشوفج الخميس

ابتسمت واني اغلق المحادثة عجيب
شلون صار حمزة جزء من يومي بعد
ذيج المشاكل 

طلعنا بيومها اخذت اني فستان طويل
مخصر يم الخصر نازل قطعة شيفون بيها
كرستال ناعم وقمر اخذت نفسه
عبالك توأم

جهزنا نفسنا الخميس وبعد موافقة صِبى
خليت شويه مكياج وسومة جرتلي عيني بالكحل
والايلاينر طلعت مو انييي

وبدو يتوافدون الناس
وقبل ليجون اهل العريس سحبتني
قمر للحديقة بجهة المنور
جنت شامرة شال شيفون على شعري
لأن مسرحته

-وييين ولج

-خالو مدري شيريد مني مااگدر
اطلع وحدي

شوية وصار گبالي حمزة
ابتسمت وهو لا ارادياً ابتسم

افترت قمر گدامه

-هاي فساتينا شووف مستورة

-اممم حلووة

يرد عليها وعينه مني

-شوية خففن مكياج وخصوصاً عيونجن
ويلا گدامي دخلن لا تفوت الزلم

ركضت قمر وهو عينه مني اريد امشي
وهو همس

-كحلاء العين خففي شووويه

اشرتلة على عيوني وضحك

-سالمااات روحي يلا

ركضت من گدامه للبيت
خففنا مكياجنا وبدت الحفلة فرحنا بشكل
من خلصت الحفلة اخذ قمر ويا

بالليل سبحت وجاي انام
وصلتني رسالته

-ليش ماخذات صور گدام الناس

-اني ومنو

-انت وقمر

-لا مااخذنا ويه احد بس اني وقمر
بتلفوني وتلفونها

-شو أشوف

-لا بدون حجاب

-عفيييه بدون حجاب گدام أيمن

-لا لا والله شلون

-عاشت ايدج ومبروك خطوبة اختج

-الله يبارك بيك

- جاهزاااات للدوام يوم
الأحد

-متحمممممسة

-عفية بطة

-حمزة

-ابويه

-لتسميني بطة ضعفت ترى

-البطة هايه مو شكل

-لعد

-صفة هايه
-ههههههههههه اسميك النسر

-حلوووو

-هم صفة هايه

دزلي صورة سكرين للشاشة
كاتب بطة ومخلي ايموجي بصفه

غيرت لقبه من ابو گمزة لنسر واخذتله
سكرين دزيته

شوية وصلتني رسالة صوتية منه

-صورة العين خلفية المحادثة الج

صفنت بالرد

-اي

-دزيها
-لا ليش
-لأن صورة من النت اني شايفها
-لا والله عيوني
-لتحلفين شو اشوف

جانت صورة لغمازتي وعين وحدة وجزء من شفتي
صممتلياها قمر دزيتها وخليتله وياها ايموجي فار حلگه معاجبه

-تمام

طلعت من المحادثة 
زعلانة ومعجبني رده جمعة وسبت محجيت ويا وهو هم بس دز علامة استفهام ومرسل شي بعد ليوم الأحد
انتهى الاتفاق وتمينا اسبوعين
بدون عرك الصبح اتصلت بية قمر متحمسة

-جااااينج بالطريق

-منتظرتكم

سديت التلفون وطلعت بالباب
وگفولة بالركن رحت امشي
صعدت وافترت قمر باستني

-صباح الخير

اثنينهم ردو وهو يعدل مرايته
ناحيتي تلفوني بيدي دزلي رسالة

-فكي العقدة بين حواجبج لج

-لتغلط
-هااااا رجعنا

-لشنو

-للمشاكل يلا فكيها كافي جنت اتشاقه
جيبي الصحاب

غمزلي بالمرايا وضحكت
وصلنا لباب المدرسة نزلت قمر واني جاي البس
جنطتي باوعلي

-لتطلعين وحدج اني ارجعج

-اوك
-بطة
-همممم
-سنة دراسية سعيدة

مدلي ايدة بقلم يجنن فضي محفور علي
أسمي وبي مدالية بطة تتدلى منه

نزلت خجلانة وقمر منتظرتني بيدها
قلمهة اشرتلي يجننن هم اسمها محفور 
والمدالية قمر متدلي

-شفتي الذووووق الاقلام فضة

غلقنا الاجهزة وسلمناها للأدارة
سلمت قمر على امها واني وياها
وتوزعنا عالصفوف واني وياها بنفس
الرحلة نفس الزميلات بس هالسنة طلع
جزء منهن للمعاهد واكو طالبات جدد
يوم دراسي عادي لحد وقت طلعتنا استلمنا
التلفونات فتحناهن وطلعنا

باوعت قمر لسيارة حمزة ماكو
واتصل بيها حجت ويا بسرعة وغلقته

-ها اروح لو جاي

-جاااااي وويا زميلته آية مهندسة الديكور
يگول مستعجل اوصلجن واطلع للموقع

شوية ودگ هورن وگف گبالنا
بنية بحجاب يشبه للحجاب توربان
ومكياج هادئ ووجه دائري حلووة
وشابة تجي اصغر منه او بعمره

بهتت واني أباوع عليها تحجي
ويا مبتسمة وهو عينه وياها ويسولف 
ولا انتبهلنا
سحبتني قمر حتى نصعد تركت ايدها

-اني بعد اروح قمورة

-وييين غير نوصلج

-لا عمو شكرا هنه خطوتين امشيهن ليش اتعبك

-مُننننننى انتِ على طريقي صعدي ابووية يلا

گالها بعصبية التفتت وأحس ألم قووووي
هووايه قوي ونبضات گلبي تضرب أضلاعي
تريد تحطمها واني أشوف زميلته بصفه

-لا عمو طريقنا مختلف

گلتها وحثيت خطواتي واني تاركته ورايه
دخلت دربونة صغيرة وسمعت صوت
سيارته شخطت

بهالكم خطوة اكتشفت
ليش عيوني تريد تنفجر
دموع وحرارة؟ اجتاحت أوصالي ومشاعري اللي هاجت بالحزن
ونبضي اللي اختلف وكأن گلبي مضروب صدمة
وميعرف شلون يرجع ينبض طبيعي
ايقنت ثانيتها ان حمزة تحول من عدو
لحبيب محتمل وان مشاعري الشابة
الوليدة تعلقت بحباله
.
.
صِبى
____________________

روحي حيث أنت

صفحة ٧٣

حبيبي فرقد 
أدري تعبتك برسايلي 
بس اليوم الكلام مو عني ولا عن تعبي
بغيابك اليوم أكتبلك عن فرحة

حبيبي اليوم خطوبة غِنى
غنوة اختنا الصغيرة اللي جنت تسميها قوات الشغب المتنقلة اليوم صارت عروس تملي العين والگلب 
متتخيل شلون جانت حلوة وفرحاااانة بعريسها جانت طايرة فهي بكل لحظة تذكرني وتذكر نفسها انها حبت أيمن لأن يشبه روحك جانت تضحك تعدل فستانها الوردي 
وكل شوية تسألني شلون طالعة واگلها حلوة
كل شي بالخطوبة جان مثالي 
بس بيني وبينك جان ناقص
صوتك ضحكتك نظرتك إلها وهي تجهز 
جنت أتخيلك توگف يم الباب مثل قبل وتصيح 
هاي شلون كبرت وصارت أحلاجن هي جانت فرحانة
ومبتسمة بس شفتك بعيونها 
عيونها گالت كل شي وعبرت عن شوق سنين
لعيونك ووجودك ويانه

_____________________

سديت الدفتر وتمددت بعد تعب يوم الخطوبة
وضيافة الناس بسرعة غطيت بالنوم
وماحسيت الا الصبح على صوت غِنى العالي
وهي تتصل بأيمن وتعيط

-ختييييييبي صباااااح الخيييير

وكفت اعدل بملابسي كفختها وهي عاطت

-ضربتني صِبى تقبلها

-هاااااا صرت قوات تحالف ويا صِبى الخبلة

غميتها ورجعت للمطبخ غسلت وبلشت
ريوگ وترتيبات للبيت وهي تحوس ورايه

-صِبى اريد ابقى بشغل العيادة شلووون اقنع
أيمن

-ليش متسمعين الكلام غِنى گالج انسي الشغل

-لج ميييصير شلون اخلي يصرف عليه
واحنة بس مخطوبين

-حبيبتي انتو متزوووجين ياخطوبة يگدر
هسه يجي ياخذج بهاي دشداشتج اللگف
ويروح ومحد يعترض

-كذااااابة

-والله عقد الشيييخ اهم شي وحالياً يگدر يسحلج
سحل كلش عادي

-انييييي اسحله والله

-نشوف بالله دخابري وفتحي سبيكر گليله اسحلك
خل نسمع شيگول

وهي عربانة بسرعة ركضت جابت التلفون فتحت سبيكر واجانه صوته

-مرررررررررتي يعني غني يعني الضلع
يعني ابووووو المرررراجل فدوة لشواربك حب

-اسمع صِبى تگول حالياً هو زوجج وميصير تشتغلين بدون موافقته وحالياً يگدر
يجي يسحلج واني گلتلها اني أسحله

-اففففففة اني أيمن أنتِ تسحليني

-اي

-ااااخ سحليني يابعد رووووحي شعندي غيرج

صحت

-لا قيمنا والله

ضحك من سمع صوتي ورد بعصبية مفتعله وخشن صوته زيادة

-تسحليني شنووو لج انيييي أبو حمادة تسحلني
مرة

-أيموني

گالتها وهي منعمة صوتها

-يابعد طوووايفه فارغة هسة اجيج تسحليني

طگها ضحكة وصاح

-صِبى هاي خبلة معليج بيها
وهاي گدامج اذا عتبت رجلها باب البيت
لأي شغل اطيح حظها تمام

-تمام ابو حمادة

غمتني ودخلت جوة تحاجي

اتصلت اني بسومة تجي تتريگ
اندارت يمنه وكعدت مُنى وياها
سوالف وضحك اتفقت ويانه نطلع
للكاظمية علمود تحل البركة بزواجة
غِنى 
وغنوة اتصلت بأيمن گاللها اني
اخذكم للعصر اجتمعنا وطلع بينا
للكاظمية نتمشى ونسولف
واني جنت أباوع لغنى وعيونها
تشع فرح وكفها بكف أيمن

ابتسامة رضا اجتاحت
گلبي وآني أسلم وحدة منهن اللي اختارة گلبها
واللي رضت بي شريك لحياتها 
أمانة أمي وفرقد وصلت بوحدة منهن
باقي مُنى اوصلها بدراستها وتلگه اللي
تستحقه

بعد زيارة وسوالف رجعنا للبيت وهيج
مر السبت بروتين الحياة المعتاد
أيمن ودعنا ورجع لأربيل يوم السبت
بعد مااتفق ويا خط لغِنى
و مُنى گالت أن هي تتضايق من الطريق
لأن اعدادية للأولاد على طريقها لذلك
اقترحت قمر تاخذها وياها وهيج
صرنا احنه الثلاثة نطلع للدوام سويه
يوم الأحد رجعت للدوام تصادفنا اني
وأستاذ أسد بباب المصعد

-صباح الخير أستاذ

-صباح النور صِبى اليوم وجهج
يشع فرح

ابتسمت وانفتح الباب دخلنا المصعد
وكملت كلامي

-أحس أديت جزء من واجبي تجاه امي وأخوية
وأمنت على غِنى

-أيمن فعلاً أنسان جيد وأمين وكوني
على ثقة راح تعيش ويا مرتاحة

-أن شاء الله

وصلنة الطابق الثالث ودخلنا
المكتب اول مدخلت أشرلي بيده
يعني جاي

-متريگ أستاذ

-اكيد بس جايج يعدل راسي

سويتله كوب خليته گدامه وگعدت أشتغل
بالأوراق اللي سلمهن اليه
وهو أنشغل بمكالماته ساعة ونص
ووكف عدل جاكيته واجة ناحيتي

-صِبى طالبيني بالمركز رايح اكمل شغل هناك
وأرجع ارتاحي ماعدنا شي

طلع واني گعدت بكرسيه وره المكتب
عيني عالمنظر گدامي حديقة عامة ومكان حلوو
فتحت الشباك يدخل منه الهوا
وراح فكري للبعيد ليوم معرفتي بموعد الخطوبة
داومت محتارة يعني بس اني وسومة ومُنى
موجودات وماكو اي رجال يستقبل الضيوف

يوم الأربعاء 
اشتغل بالمكتب وأفتر گعدت بعد متعبت من التفكير
مرتين ينادي بأسمي أستاذ أسد واني ممنتبهه

تقدم ناحيتي طگطگ بأصابعه عالمكتب
رفعت راسي أبتسم بوجهي

-الماخذ بالج يتهنى بي

ابتسمت بحرج وگعد عالكرسي مقابيلي

-صاير شي صِبى 

باوعتله وصفنت منو أحسن من أستاذ
أسد يكون موجود هاليوم نطقتها خجلانة

-أيمن أبو حمادة

-والنعم

-تعرف أستاذ اني واگفة بطولي بس هم
زحمة استقبل الرياجيل وحدي اذا مبيها
تعب واحراج الك تشرفنا يوم الخميس

-الية الشرف أكيييد جاي وراح
اجيب نسيبي وحمزة وفقار 
وكم واحد من اصدقائي

-اتشرف بيكم أستاذ

-بهاي جنتي حايرة صِبى

-اي والله أستاذ البنية اللي مأجرين
يمها گالت اجيب كم واحد من الجوارين واني
مقبلت محد يعرف ظرفنا شنو وخاف تجينه
حجاية

-ما يأمر عليك عدو أستاذ

-يأمر عليه حبيب اطلبي وتحت أمرج

-متقصر والله وجودك كافي ويانه
اني جهزت كل شي بس منتظرة جيتكم

-من عيني يابه سهلة اذا هذا الشاغل بالج

وگف وراح للمكتب اتصل بحمزة
واصدقاءه ونسيبه بلغهم الموعد

طلعت وبلغته اني مراح اداوم الخميس
وافق واني طلعت وصلت البيت
وأتصل بيه استغربت

-الو أستاذ

-موجودة صِبى

-اي أستاذ موجودة محتاج شي
للشغل

-اهلا وسهلا أستاذ

ركضت لبست حجابي 
وانتظرتهم دقايق وأندگت الباب
فتحتها وطلت قمورة باستني ودخلت
راكضة لمُنى

-مساء الخير صِبى

-مساء النور تفضل أستاذ

-لا مااريد اتعبكم هسة بالطريق
جانو مُنى وقمر يحجون عن الكيك
وكذا وگالت تردين ترحين تحجزين
اني بطريقي حجزت كيكة للعرسان حسب
اوامر قمر

ضحك واستمر يسولف

-وگفت على راس العمال بالمحل گالتلهم
اريدها وردية وعليها مااعرف شنو يلمع

-ليش استاذ والله تكلفة عليكم

-ازعل منج باجر ادزها ويه قمر خاف ترتبون
هالسوالف محتاجة شي بروح الحجية

-لا والله بس وگفتك كافي استاذ

-يلة اني اترخص وگولي لقمر بس
تشتري الفستان يمرلها حمزة ياخذها

-تمام أستاذ

-في أمان الله

رفع ايدة مودعني وراح وعيني سافرت
على طوله وقيافته حتى بملابس البيت
مليان ترتيب ورجولة

سديت الباب ودخلت مُنى متحضرة
وسومة منتظرتهن ببيتها
طلعتهن يشترن فساتين بس اني
نسيت نفسي بالليل دخلن سومة بيدهة
علاگة خلتها بيدي 

-حتى لو حزينة لازم تلبسين شي جديد
تگطعي بالعافية

فتحته فستان محجبات مخصر ببساطة وعدل
وبي حزام كرستال ناعم بالنص وعلى أطراف
الردن كذلك كريستال وويا شال مرتب
مثله

-يجننننن ليش هيج كلفتي نفسج

-ولج والله غنوة ماقبلت ادفع هي دزت بيدي وجبتلي واااحد هم باوعي

جان يجنن باللون الازرق الملكي
يناسبها

سهرنا بهاليوم ترتيب وازالة وتعديل
للصبح بلش الجد اني وسومة رتبنا
الصالة والهول للرياجيل
سوينة كوشة من ورد بسيط ورتبنا صينية
المهر مُنى وقمر اللي جابها حمزة من الصبح وجاب الكيكة ويا 
يفترن ويخلن لمساتهن الشبابية عالصالة وبهيج
خلصنا كل شي بين مااخذو غِنى للصالون 
ورجعوها أتصل بيه أستاذ أسد

ودعني وراح اني لابسه الفستان
و مُنى لفتلي الحجاب لفة تركية مثل متگول
وغصباً عني خليت كحل مسكارا وسحبت ايلاينر رفيع
واحمر خدود بسيط وحمرة بناتية نازكة

دگ جرس البيت وصحتلهم

-الرياجيل اجو بعد لحد يطلع للهول

ركضت للباب فتحتها صار بوجهي
أستاذ أسد مبتسم صار گدامي فتحت الباب
اشرلي اصير ورا دخلو الكل للهول وبقى هو واگف
سديت الباب ومشالي 

-الف مبروك بالموفقية والسعادة دائماً
لغِنى

-شكراً أستاذ ربي يسعدك 

باوع بعيني وبخجل حجه

-لوما الفستان الأسود جان اختلط الأمر
عالناس وعبالهم انت العروس

قبل لا ارد صاحوله تركني
وراح

شنو هالدفو اللي يملي شراييني من كلامة
الرقيق

دخلت وبدت المراسم واللي شهدو
أسد وحمزة بس كمل العقد
دگيت الباب اجاني أيمن

-ها بعد اخوج

-تقدمون الضيافة

-اييييي ياالله اجيج

-لا خليك مرتاح اني اجيبها الك للباب

دخلت للمطبخ سومة تناوشني ولگيت
أسد بالباب استلم مني وبده يرجعلي
الصواني لحد مخلصت
وبعد متضيفو طلع نسيب أسد
واصدقاءه وبقى هو وحمزة ويا
الخطار لحد مدخل أيمن لغِنى
وطلع سلمو علي وراحو

بعدني بالمطبخ واجاني اتصاله

-ها صِبى

-اشكرك أستاذ دينك اللي برگبتي صااار هوايه
ومقصرت

-نعم استاذ

-راحو الزلم

-اي أستاذ

-تمام شوفي اكو علبة كلينكس عالطاولة الجانبية بجهة الباب

-شبيها استاذ

-هدية غِنى ملحگت أشوفها للأسف
عالجايات اباركلها بنفسي

-فوگاهه أستاذ فوگ تعبك هدية 

-روووحي صِبى لا تتعبيني الف
مبروك مرة ثانية

غلق التلفون وبالليل گعدنا
سوية نشوف الصور متونسين
أيمن دزلها صور مشية الزلم

مااعرف شبيه اخذت صورة أستاذ
أسد جانت جانبية وملتفت بيها يجنن
سماره وية ضوة الشمس الذهبي اللي
داخل من الشباك بصفة طالع عبالك لوحة
اخذتها واقتصيته لوحده وحفظتها بجهازي

اليومين البعدها بين زيارة للكاظمية
وبين ترتيب البيت وتحضير البنات للدوام
اجة الأحد داومت مرتاحة وأحس جزء
من گلبي التأم لأن غِنى أرتاحت وأستقرت

وصلت الشركة ومشيت مسرعة للمكتب
أحساس أشتياااااق غريب صار يجتاحني
بأيام العطل وميهدأ گلبي من خفقانه الا لمن
توگع عيني بعينه بيدي مفتاح المكتب
لأن اغلب الوقت اجي قبله وأفتحه
واحضره بين ميجي

فتحت الباب ووگعت عيني بعينه
وهو يدفع بنية جانت محتضنته
ويبعدها عنه

انخبصت ودرت وجهي هاربة من الموقف
واني أسمع صوته يصيح بأسمي
وطلعت سادة ورايه الباب 
وبنفس الوقت سديت الباب اللي فتحته
لمشاعري من جديد وغلقت كل فرصة للحب



شكرا لزيارتكم عالم روايات سكيرهوم
تعليقات



×
insticator.com, 6ed3a427-c6ec-49ed-82fe-d1fadce79a7b, DIRECT, b3511ffcafb23a32 sharethrough.com, Q9IzHdvp, DIRECT, d53b998a7bd4ecd2 pubmatic.com, 95054, DIRECT, 5d62403b186f2ace rubiconproject.com, 17062, RESELLER, 0bfd66d529a55807 risecodes.com, 6124caed9c7adb0001c028d8, DIRECT openx.com, 558230700, RESELLER, 6a698e2ec38604c6 pmc.com, 1242710, DIRECT, 8dd52f825890bb44 rubiconproject.com, 10278, RESELLER, 0bfd66d529a55807 video.unrulymedia.com, 136898039, RESELLER lijit.com, 257618, RESELLER, fafdf38b16bf6b2b appnexus.com, 3695, RESELLER, f5ab79cb980f11d1