رواية بيوت الصفيح الفصل الثامن عشر 18 بقلم زهراء السراي

أحياناً العجلة تجبرك تاخذ موقف

من شي او شخص فاهمة غلط

وبغرور منك ترفض تفهم القصة كاملة

وتشوف أن منظورك للموضوع هو الصح

فقط وغيرك خطأ

عصرية وماخذه كتبي وهوستي ورايحة يم

سومة بالحديقة گاعدة أقرأ واكتب دروسي

قبل أسبوع من آخر مرة شفت بيها حمزة

ويا المهندسة آية حسيت بأحساس

قهر مااله اي مبرر ولا سبب الا انه اعجاب شديد

وميل مشاعري ناحية حمزة لذلك

اتخذت أقصر الطرق حتى امحي هالشعور وهاي اسبوع مااروح وياهم ألتقي بقمر بباب المدرسة

اما هو فميدز أي شي لا واتساب ولا انستغرام

ومجرد يفتح الستوري يخلي لايك ويختفي

شفت أن هالمشاعر البسيطة ممكن تندفن

بسهولة وممكن اطلع من هالموضوع بأقل خسارة

لروحي وگلبي

بس اللي صار اني اكتب وأسرح واخربط

اقرأ وانسى اتوه بالتفكير وأرجع لنفسي

استغفرت وتركت الكتب گمت سوتلي

سومة كوب گهوة جبير حتى أصحصح

خليتة بصف كتبي عالمرجوحة وصورته

وكتبت علي

(أحياناً يصير عقلي مثل مدينة مزدحمة بلا إشارات أفكار تدخل من كل مكان

تتصادم وتضيع وأني وسطها أدور على مخرج وما ألگه

كل شي بي دوخة وقلق كأني تايهة بطريق ما أعرف وين بدايته ولا نهايته)

نزلت الستوري وگعدت أحاول أنظم افكاري

حتى أقرأ نص ساعة بس واجاني أشعار على

انستغرام فتحت الرسائل

مخلي لايك عالستوري وكاتب جواها

-لازم لگيتي نوع الأندومي اللي تحبينه

مخلص من الأسواق لذلك نفسيتج تعبت

دست لايك على كلامه وطلعت من المحادثة

وگمت أبجي ليش هيج يسخف شعوري

حذفت الستوري وطلعت سويت الغاء تنشيط

للحساب

شلت كتبي وصحت لسومة اللي مبدله تريد

تطلع

-سومة راح أنام يمج بالصالة

-شغلي السبلت وأرتاحي راح اطلع أتسوگ

وأرجع

مشت شوية ورجعتلي

-ليش عيونج حمر باجية

-لا تعبت المواد صعبة وراسي يوجعني

دخلت للصالة وسمعت صوت الباب من سدته

غمضت عيوني وانسابت دموعي مدري شبيه

ليييش ياربي مقهورة وگلبي اللي جان فارغ

أنملى قهر ومشاعر مااعرفها شنو

شوية ودگ تلفوني برسالة عالواتساب

فتحتها رسالة صوتية منه

-حظرتيني من الأنستغرام شگد

مااباوعلج بنظرة واحسبج جبيرة

ترجعين بتصرفاتج الغبية تبينين

مدى ضحالة تفكيرج وتبرهنيلي فعلا

انج زعطوطة

مغص اجتاح بطني بقهر

وفتحت التلفون دگيت مقهورة بسرعة فتح

خط واجاني صوته

-اكييييد متگدرين تسكتين وكلامي صاب غرورج لذلك

متصلة حتى تغلطين وتتجاوزين فوگ غلطج

شهگت وهو يصيح سكت فجأة وآني أحاول

أحجي گوة طلعت مني الكلمة

-أسمع اني ………

غطيت بالبجي ورجعت احجي

-اني محاظرتك اني لغيت الحساب

تمام ومو غبية ومتجاوزت عليك بشي

انتتتتت انت أذيتني هووووا …………

-شبييييييج مُنى

-مابيه آني آسفة

غلقت الخط وارتفع صوتي

واني احاول أسكت وكأني جاي

ازيد النار حطب بكل مرة اغسل وجهي

اباوع بالمرايا ارجع أبجي ليش گلبي

ينكسر من كلامه ليش هيج جاي اتأذى

رجعت لمكاني لگيت رسائل هووايه

منه يحاول يشوف شبيه رجع اتصل

رفضته ورجع أتصل رفضته خمس مرات

لحد ماراحت الغصة من بلعومي فتحت الخط

أجاني صوتة هادئ

-شبيج

-مابيه شي بس جنت تعبانة من القراية

-واليتعب من القراية يبجي

-جنت مشتاقة لأمي

-مُنى

-هممم

-اني زعلتج بشي ليش خرب اتفاقنا

وتعاركنا

-لا مااتعارك بعد

-بس ماصعدتي ويايه مو عيب من صِبى

وهي تعرف بيه اخذج وية قمر شراح

تگول من تعرف بيج ترجعين وحدج

وبعدين طلعتج تصير ويه طلعة أعدادية

الشباب شلون تمشين بهالشارع وحدج

-مأمنة لأن اشوفك تمشي ورايه بالسيارة

-آني آسف اذا جارحج بتصرف وماادري

وآسف هسه لأن غلطت بحقج

-لتعتذر مزعلانة اني

-يعني اجيج اخذج بعد

-لا لا مااريد كافي عليك توصل

هاية ام نص حجاب

سكت شويه وضحك من گلبه

-قصدج آية 

-اي حباااايه

-تمام بعد مااجيبها ويايه ولا اوصلها

-لا لا اني شعليه قابل

-تعرفين البارحة خطوبتها واني شاهد

عالعقد يعني بعد خطيبها يوصلها

ابتسمت وأحس النار الشاعلة بصدري

تحولت لثلج بارد

-اممممم الله يهنيها يعني بعد

متشرفنا بحجابها اللگف بالسيارة

-لا متشرفنا لأن سيارتي مااخذ بيها

بس البطات والأقمار

ضحكت خجلانة وهو انطلق

-اگلج بطة شو صايرة تشربين

گهوة

-صداع عندي

-منين يجيج الصداع

-من أباوع بوجهي بالمرايا اشوف الضوة والجمال

الطالع من وجهي اصددددع

-اوووويلي الغرور

تدرين البارحة جنت احجي بيج

-اممممم ذوقك حلووو بأختيار الموواضيع

-لج شووووو شايفه نفسج شوفة

-ليش مااشوفها قابل ناقصة ايد رجل

-لااااا كاملة والكمال لله

هسة بطة تصالحنا

-اي نسر تصالحنا

-باجر انتظرج اذا مااجيتي انزلج اني

واسحلج للسيارة

-تسحلني اني أسح…………

-هااااااا انتِ شنوووو

-أسحل نفسي من الفراش واروح وياكم

-شااااطرة يلا

روووحي اقري وبعد لتباوعين بالمرايا

حتى خدود البط ماتحمر من البجي بسبب جمالج

الاخاذ

-ثانكيو نسر شكرا لذوقك 

ودعني وهو يضحك سديت الخط وحسيت

براااااحة حلت داخل گلبي بدل القهر مال

ذيج الأيام كملت قرايتي وكتابتي ورحت

للبيت من رجعت سومة گاعدين بالهول

و صِبى بالها سارح ومو يمنه نهائياً كل

يوم تسألني شسويت مسويت بالمدرسة

وتدقق بأبسط تفاصيلي

-صباوووي

-ها حبيبتي

-يردون مجسمات للاحياء

-يمتى

-باجر

باوعت للساعة ب٧ ونص صاحت بغنى اللي

مخلية تلفونها على رجلهة ومتصلة فيديو 

بأيمن وتصبغ بأضافرها

-ترحين ويانه للمكتبات نشتري لمنى مجسمات

-ختيبي شنو رأيك

-رووووحي بس لبسي جواريب فهمتي

لبسنا ورحنا لسومة

طلعنا نتمشى بالمنطقة الشارع العام كل

شي بي دخلنا مكتبة وشفت اللي اريده

شو المجسم بخمسين وبخمسة وعشرين

-ماااريد صِبى غاليات

-اختاري واحد يلا معليج بالفلوس

-لا لا مااريد اشارك بغير شي

-احجي لج تأخرنا

-تمام اخذيلي ارخص واحد

ضغطت على كفي ضاحكة واخذت واحد

من اللي احتاجهن رجعنا نتمشى وصفنت

صِبى فجأة عينها على سيارة ماشية

-شبيج صِبى

-هاااا ماكو شي بس شفت أستاذ أسد

-صباووووي يمكن بعدين تصيرين لبوة

خزرتني وسكتت رجعنا للبيت وكل

وحدة كملت شغلها لوقت النوم

احنة مخلين الغرفة لغِنى الكلبة

خاف تحجي وية أيمن وتستحي

گدامنا ولو هي زايحة المستحى

تمددت بصف صِبى بس غفت

سحبت ايدها مثل كل يوم ونمت عليها

وغطيت راسي بكتفها

حسيت بأيدها تحضني

وغطيت بالنوم مصحيت الا على صوت

غِنى تصيح

-يلا ولج مُنى حتى اقفل الباب گووووومي

بسرعة بسرعة غيرت ملابسي وشلت

جنطتي والمجسم وطلعت هي صعدت

بالخط ويا زملائها واني مشيت للركن

واگف حمزة وقمر وجهه يضحك

-صباح الخيير

-صباح النور

ردو وصعدت عدل مرايته ناحيتي مبتسم

وهو يشوف مجسم القلب بأيدي

-هذا گلبمن من الصبح شالعته وجايبته

-گلب أعدائي

-شررررسة بطة

قمر اول مرة تنتبه لعبتلي حواجبها وغمزت

شغل الراديو فيروز وافتر للمدرسة

من شارع بعيد ماشي بينا لأن بعد وقت

وكفنا ردت أنزل وصاح

-هاج انت وياها

مدت ايدها قمر اخذت الفلوس

-اني عندي مصرف والله

-ميخالف انت وقمر يلا تأخرررت روحن 

اندوووومي ممنوع افتهمتن

باوعلنا دخلنا المدرسة وتحرك

خلت قمر ايدها بأيدي 

-مُنى

-ها قمورة

-شنوووو ما شنووو

-شنوووو

-شو خدودج حمممممر صاير شي

-اييييييي بسبب حرارة الجو

-خاف بسبب حرارة الحب

صفنت بوجها وعيوني بس تريد حجة

حتى تمطر

-هيج مبين عليه الله عليج مو يعني راح اتفشل ويا 

-لجججج شبيج بجيتي

اتشاقه والله بسس

-بس شنوو

-والله حسيت من شفتي آية

حضنت اكتافي ومشينا

-ترة عادي هذا گلب مالنا حكم علي المهم

نتحكم بمشاعرنا وما نخسر نفسنا 

هزيتلها راسي ودخلنا دروسنا 

ورجعنا ويا بالبيت صار حمزة ملازم

اليه اذا شي صعب بالدروس يبسطه

اليه ولقمر

الصبح يدللنا لو مشتري شي

لو يجي من وقت يفرنا شويه ويوصلنا

للمدرسة اما محادثاتنا فما تخلو من المشاجرات

الشقية والضحك اللي ينتهي بأعتذاره حتى لو

مو غلطان

-لج شو اخذج الواهس اعتذرلج وانتِ الغلطانة

-اي غير اني كائن رقيق

-انتِ كائن رقيييق وين بالله

ماشايف

-كل هالرقة وتگلي منير

-لايگلج الأسم منيييير لأن بارزتلي عضلاتج

اربعة وعشرين ساعة

-شسوي

-صيري بطة احلى

-قصدك اصير كيوت

-لا هاي شغلة منتهين منها انتِ كيوت وبطة

من بعيد بس من قريب محد يعرفج غيييري سفاااحة

دزيتلة صورة بطة شايله سجينة

-اييييي هذا الأقصده يلا بط

باجر جمعة أستراحة روحي نامي

-راح اتصفح شويه

وانام

-لا ناممممي هسه يلا

-والله بعد وقت

-نرجع نتعارك ونزعل

-لا رايحة انام

دزلي قلب واختفى وراها دقايق اجاني

فيديو عالانستغرام منة فتحته مقطع

لكاظم الساهر

-أأعد كم أقول كم

فلأعترف مجموعةٌ

وتجمعو في واحدة

هي انتِ

دلعوتي

طيوبتي 

محبوبتي

المتوقدة 

المتفردة

المتجددة

فتصافحت وجناتنا

وتهامست أنفاسنا 

اشهد لنا ياحبنا لا لن نضيع

في الخصام ثواني 

اجنحة رفرفت بداخل گلبي

وهو يكتبلي وراها

-باقي گاعد وياج للوحدة

يلا تصفحي لتضوجين

وهيج أيقنت اني وبكامل قواي

العقلية والقلبية وگعت وبشكل كامل

بغريب الأطوار المختلف كلياً

عن شخصيتي

شهر كامل مر بعد عقد اتفاقنا للصلح

للمرة الثانية كل يوم يرافقني

بكل مفاصل حياتي مرة ينصحني ومرة

يمنعني ومرة ينهرني ومرة يواسيني

الى ان بمرة راجعين للبيت تركتني قمر ونزلت من السيارة

راجعة لأمها اللي صاحتها التفتلي مبتسم

-بطة شو ساكتة اليوم

-نسيت شغلة نسر

-وهي

-جائزتي لأن طول شهر ممتعاركين

تقرب وهي يمد راسه من الكشن الامامي

ناحيتي خله ايده على گلبه ونطقها بهدوء

-گلبي جائزتج يكفيج لو لا

وبهالكلمة انطلقت بعالم ثاني

من المشاعر اعرف بدايتة حبي

البريء اله ومااعرف نهايته

.

.

.

.

.

.

غِنى

_____________________

كم من ليل أرخى ستار الألم فوق قلبي

وكم من حلم شعرت أنه يبتعد كلما اقتربت

سقطتُ كثيرا لا أنكر وتعثرت بأوجاعي

لكنني كنت أزرع في كل عثرة أملاً صغيرا لا يموت

سرتُ في طرق ملأى بالشوك

وكنت أبتسم رغم الدموع

لأنني آمنت أن ما يزرع بصبر

لابد أن يُحصد بفرح ولو بعد حين

فهدأت الروح بعد ضجيج طويل

وبكيت  لا ألما هذه المرة بل امتناناً

.

.

.

خلصت الكتابة وضفت ثلث

صور صورة لكفي بكف أيمن والثانية

كتب المرحلة الرابعة والثالثة اني وأخواتي

بس مغوشتها

نزلتها عالأنستجرام ماكو وره دقايق

اجتني المكالمة منه وقبل كل شي

وقبل ليحجي لازم صوت البوسة يطرش

أذني

-الحبببببببب

-صباح الخير يمناي

-مغبشة عالستوريات بعد روحي

فرحانة بيه اكيييييد نعمة واجتج للحلگ

-اذا سبعة وصدگ انثى اثبتي هيج من اجي

مو ابقى اركض ورررراج بالصالة وتنهزمين

مني عبالك فارة 

-أنت بس تعاااال وشوف منو المايثبت

-واني طاگلي مسافة ٣٦٦ كيلو علمود وجهج

الفاهي وتالي انضرب بوري خليني هناااااا

عاد اسمع كلام حلو

غمزلي وكمل كلامه

-ابتعدي بالله أشوف ملابسج

ابتعدت من التلفون

لابسة بنطرون قماش عريض

وسترة نيلي وقميص وردي جواهن وشال

وردي سادة

-ورررردي بت الكلب

-هاااا ها جوووه النيلي مستوووووور

شووووووف وممبين بس الياخة

-والشال

-مايرهم ويا غير لون

-اقتربي اشوووف وجهج بالله

شلت الكاميرا باوع لوجهي

-لتخلين ملمع لشفتج خرررررب ابوج

-ممخليه هذا الفلتر ملمعها

-بربوگ وااااضح مخليه واساساً هذا البچم

الحقيقي گبالي بدون فلتر جنج عبود صاحبي

مسحي يلا

-بچم وعبوووود وتغلط

-لا مااغلط يلا سبعة

حولت لفلتر مصاص دماء غمني

وكمل كلامة

-جامعية خبلة

مسحت شفتي واني احجي ويا

-هاااااا اها مسحتها بعد أمر خدمة

-اي

-گول يمناي

صفن بوجهي وسكت

-لا سلامتج يلا حب عندي

شغل

تقرب للكاميرا يهمس

-طالعة تشگين المطي

-شلون غززززل فدوه لخشمك

غلقته بعد صوت هورن الخط

وطلعت راكضة للسيارة مر

شهر عالدوام شهر ضبط مشايفة

أيمن بعد الخطوبة بس عالاتصال

الركض بالجامعة مخليني أنسى

حتى الاكل سنة رابعة عبارة عن

ركضة بحوث ومشاريع وصرف

كووومة شگد حاولت ويا ارجع اشتغل

مقبل وحولي مبلغ مناك مصرف شخصي

وللجامعة حتى مااضطر اشتغل

موزعينا مجموعات للعمل وكل

مجموعة متوليها أستاذ ولحسن

الحظ تولى مجموعتنا أستاذ غير

شجاع لأن مااگدر أتعامل ويا وأستحي

أساساً لا يعرف أيمن ويزعل

كل يوم طلعاتنا ويا المجموعة

طلبات ومواد وشغلات مضطرين نسويها

أوقات ابلغ أيمن وأوقات أشتغل من راسي

لأن ماالحگ وهو يشتغل ماادوخه فمر

هاليوم شغل وتعب رجعت شمرت نفسي

للنوم ماصحيت الا المغرب جرة وحدة

بلا اكل صحتني صِبى برزالة

-گوووومي لج هذا نوم الشياطين

دنيا مغرب وباقية بدون اكل وجهج صاير

هالگدوته

-جوووووعانة

-صلي المغرب والاكل جاااهز گومي

يلا

بين ماصليت لگيتها هي و مُنى 

مخليات الأكل بالهول

-گعدي أكلي يلا وشووواربج حفيهن

عيب

-ياشوارب

-لأن شگر ميبنين بس هااا اها من الجانب

كل شعرة شطولها بالله متستحين

من أيمن

عبست وجهي وكملت اكلي

-هووو وينه قبل لننخطب جان كل

شوية ناطلي هسه صار شهر وخمسسس ايام

مشايفته

-عوووذة منج لوما مگابلته بالليل عالكاميرا تلغين تدوخين الراس

-اي بس مووو حقيقة

جرت اذني حيل وكفختني

-شتسوين بالحقيقة لج

-ابوس الحقيقة

-يجي بس اكيد عنده شغل خلصن

اكل ونروح يم سومة شو اني وجهي هم

محتاج ازالة باجر عدنة اجتماع مهم

لعبتلهة حواجبي

-الاجتماع مهم لو ملك الغابة

باوعت صفح وماردت 

خلصت عشا ورحنه لسومة حفتلي

شواربي وناصبة علية دگ التلفون

تركتهن وگمت

-ها حب

-ها حبيبي شو مختفية

-جنت اتعشى وهسة يم سومة

-اخواتج وين

-يم سومة وياي

-دگلي لصبى وتعاليلي بباب بيتكم

-احلف

-وعيونج

غلقتة وركضت لصبى

-أيييييمن بالباب راح اروحله

-شفتي مو گتلج حفي

-جنتي تدررررررين جاي

-اي خابرني يفاجئج وخفت علي صراحة

يخلط بينج وبين محمد ابو الاسواق بسبب شواربج

شمرتلها بوسة بالهوا وصاحت

-جاااااايه وراج اذا تسوفلتي حظج

اطيحه

ركضت بسرعة احمر خدود وكحل

وشويه ملمع شفه مشيت للباب

لگيته بالسيارة راجع

دگيت الجامة شال راسه

من الستيرن عيونة طافية

نزل من السيارة فتحت الباب

مديت كفي لكف أيدة قفل كفه عليه

بس وصلنا باب الهول الداخلي

حظني بسرعة رفعني من الگاع

ساندني على صدره هدوء وبس

صوت نفسه واضح نزلني وعينه مني

-ياااايابه شهرررر صبرت شهالقوة

حضن اكتافي وايده تتحرك

على شعري بهدوء مشيت بي

للقنفة عيونه حمرة من التعب

-ليش جاي وانت تعبان

-ماگدرت أصبر اكثر انعل ابو الشغل اليحرمني

منج

سحبتة من جانبي 

-تمدد نام شويه

-اروح لبيتي البنات مياخذن راحتهن

-راح يبقن يم سومة ناملك شويه

تمدد على رجلي سحب ايدي مغمض عيونه

يهمس بتعب

-بس دقايق يرتاح راسي وگعديني

-نااام

مسحت على عيونه مااستغرق دقايق وغط

بالنوم واني عيني علي أباوع لحد لحيته

للرصعة بفكه لعيونه الوسيعة

كفوف ايدة اللي تغمر ايدي بدفو

رب العالمين شگد يحبني وجابه بطريقي

استغليت الفرصة اخذله صورة

ايدي بشعرة يم لحيته

وجهه من الجانب نومته

طوله الحلو كفي بصف كفه

انملى الجهاز صور وهو صوت أنفاسه

هادئ نص ساعة ونفسه ومستقر أمنت و نزلت راسي بهدوء بست خده

أبتسم

-شويه روحي عاليمين تحصلين أجر

-يمممممممه شگعدك

-دقيقتين بحضنج يعادلن سنة نوم

التفت صار وجهه ببطني 

وباسها

تقصلت معدتي وبسرعة گعد سحبني رفعني

مگعدني بحضنه

غطيت وجهي بأيديه

-هااااا وين السبعة الگالت أثبت 

وخرت ايدي من وجهي باوعتله

-موجودة

مديت ايديه بشعره صفن

بوجهي تقدمت بهدوء وهو

يحضني لصدره

-يابويه عملية اغتصاب

-تحبيني ولج

-لا مااحبك ماخذتك أستغلال

-أستغليني واستحليني آني

قابل ………

مكمل جملته وغاصت أنفاسي بأنفاسه

متلذذ باللي يسوي ذب نفس مرتاح

وهو يعدل بشعري

-ايييي هاي نسميها بوسة

سحبت وجها عضيت خده

-خل نتززززززززززوج هسه

نزلت من رجله گعدت بصفه سانده

نفسي علي وراسي على زنده

-لا أكمل السنة يلا

-أنقلج هناك للجامعة

-خمس أشهر احسسسب يدخلن منا

يطلعن منا

2 

-واني

-شبيك يابعد روحي

-اريدج بت الكلب

-لا تغلط

عضيت زندة حيل وهو ثابت ولا مهتم

-هاي كل قوتج

-اييييييي

رفعت التيشيرت أسناني طابعه بي

ومكان العضة أحمر

سحب أيدي واني غمضت متحضرة للعضة

باسها وحضنها لصدره

-فتحي ياعوبة

باوعتله ارتفعت ايدي تمسح

على اطراف لحيته

وطرف شفافه اللي صارت بيهن لمع ناعم

من حمرتي

-حققت حلمي

-بشنو

-مسحت حمرررررتج اووووويلي يااااابة بنكهة الخووووخ

گالها وجعصني بحضنه حيل

-تجيني لحظات هيج احس أسناني

تزقزق تريدلها شي ومن افكر الگاني

مشتاقلج ومو شوووق عادي لا من

هذا الشوق اليطحن العظام طحنننننن

-المستذئب تريد تاكلني 

-ايييييييي

رجع حضني وگف يخض بيه مثل اللعبة

بين ادي واني اعيط بصوت منخفض

-يبوووووو راح اموووووت ولك كافي

-بوسيني 

تقربت لخده أبوسه وهو يخض بيه

وگعت بوسه ناعمة بمنحره جوه أذنه مصدره

صوت ناعم توقفت أيده من حملي ونزلني على

كيف للگاع باوعلي وكأن نظراته راح تاكلني

نزلت راسي وعيني على اصابعي اللي اتلاعب بيهن من التوتر

-لتباوعلي هيج

-شلون يعني

رفعت راسي نظرته ورمشه اللي ناعس على

ملامحي

-هيييج احس نظرتك تدخل لرووووحي من الداخل تخرررب ثباتي

ذب نفس منزل راسه يهمس

-اني مااريد اخرب ثباتج بس……

هزيت راسي أستفسر 

تقرب همس بأذني كلام سخيف

واني دفعته

-صخاااام بعيني متستحي

تمشى للمطبخ ولا عبالك

-لا مااستحي مررررتي يابه بيش غلطان

-وحدة وحدة حبيبي مو تخربها فد مرة

-هي خررربت من بستيني هسه شيفضها

هالسنة بت الكلبببببببببب

فتح المي غسل وجها

-هاي غسلت لأن بستك لعبت نفسك موووو

-غسلت حتى اصحى على نفسي بدل منخاوي

حمادة هنا

گعد عالكرسي

-سويلي جاي وطلعيلي اجبان اذا اكو

-تتدلل

سويتله الجاي وهو ساند نفسه عالميز

ويدخن

-تعرفين هوووايه احب اللون الأسود

-اني هم سيد الالوان هذا

-اي وخصوصا من يندمج ويا اللون الوردي

الفاتح المشجر بكرز

باوعت لتراكي مابي أسود

بقيت ارتب بالميز ثواني واستوعبت

وركضت للغرفة واني أصيح

-غضضض بصرك يامتحرررررررش

-يااغض بصري هو غير تمنيت عندي من

هاي نظارة الأمريكان اللي تطلع

كل شي عالطبيعة

-اطلع روووووح لبيتك

-واهووون عليج اروح جوعان

رجعت واني لابسه دشداشة جوه الركبة

بنفسجية غامقة

-لبست غامق سدت علينه المي والهوا

خليت زيتونة بحلگه وگعد ياكل

ونسولف

-حمادة شلونه بالثالث

-زين وشاطر بس تندمت لأن خليته بهالمدرسة

جاي يضوجونه الأطفال 

-يتعود علمه يدافع عن نفسه

-انت تعاي علمييييي

-من عيوني

وگف وره ماكمل باس راسي وطلع للگراج 

تجهزي باجر نعقد محكمة

گرصته من زنده

-شرعاً وقانوناً صرت مالتي

-وشرعاً وقانوناً وكل شي وكلااااااشي

-بس تعالي من الجامعة عندي مشروع أسلمه

ومناك نطلع

-تمام

باس جبيني وطلع اريد أسد الباب

رجع مد راسه

-ماالله يهديج ونخاوي حمادة هسه

-راح اعييييييط والم الناس

-شگد نحسة

گالها وهو يطبگ الباب ويضحك

لبست عباتي وانداريت عالبنات گاعدات

وسومة عيونها مغرغرة دموع بس شافتني صاحت

-جايتني بغير هدووووووم ولج شصار

-طبعاً انتِ فاسقة بس غيرت التراك قبل ليشوفني

ايمن جان خفيف شويه

گعدت يمهن و مُنى تندس بيه

-سأليها عن حبيبها عليج الله

-ولج ياحبيب عيب

-زوجها السابق شبيج

فتحت عيوني مستغربة باوعتلي هي

-ها فتنتلج مناوي شبيج مستغربة جنت

متزوجة

-احلفي

-وروح امي

-ووين راح

-موجود عادي واليوم شفته

باوعت لوجها ولملامحها اللي تغيرت

بلمحة حزينة

-وين شفتي

-عادي رحت أشتري لمناوي أقلام جاف الوان رادت

وشفته

-هو صاحب المكتبة

-لا جاي يشتري لأولاده

غمضت عيونها وبس صوت شهگاتها

واضح دقايق حضنتها صِبى واني و مُنى

ملتمين عليها مسحت عيونها ووجها تحول أحمر

ضحكت وصاحت لمنى

-روحي جيبلينا مخدات خل نتمدد ونسولف

السالفة طويلة

ركضت مُنى وهي تصيح

-لتسولفون من دووووووني

رجعت شمرت المخدات عالمفرش سومة

خلت راسها على رجل صِبى 

مُنى قلدتها ونامت على رجلي صبى تلعب

بشعر سومة وهي تسولف

-طبعاً متعرفن اني شگد عمري هسه

-عشرينات

گالتها مُنى وغمزت لسومة

-لا أني اليشوفني يگول ثلاثينات بس اني

داخلة عال ٤١ 

صفنت عليها وشمرت نفسي اعضها

-شنووو هالجينات التخبل متتزوجيني

نخلف جهال يخبلون جيناتهم رهيبة تطلع

-دولي ولي تزوجي أيمن الأزرگ اني بطلت

بعد

كفختني صِبى وسألتها

-كملي سومة معليج بهالغبية

تحشرج صوتها 

-آني وحيدة أمي من بعد أخويه هادي الشهيد الله

يرحمه ولدتني آني وأبويه توفى وهو يشتغل

بمحله ابويه وضعة المادي زين واعمامي

والكل مرتاحين لذلك محد طالب امي بفلس 

گعدت امي علينا اني وأخويه وطورت

من الشغل شكو فلوس جوه أيدها ضامهن

أبويه اشترت بيهن عقارات بفترة الثمانينات

وخلت العقار هو راس مالها غير هذا البيت

عدنا بيتين بمناطق راقية ومحلات ابوية

كلها ايجارات مستفادين منها والحمد لله

عشنة براحة الى أن دخلنا حرب الواحد وتسعين

انقصف المعسكر اللي يداوم بي هادي

واستشهد و أمي تعبت وصار ليلها ونهارها بجي

ودموع وتمرضت شهور هي بالفراش ومحد

واگفلي بس بيت عمي الوسطاني أبنهم الجبير كريم 

جان شاب ستوه ثاني جامعة

قام بواجبنا وكل شي نحتاجه نلگاه موجود

ولگيت نفسي اوگع بحبه لحد مصار عمري

١٨ بذروة الحصار وضعهم المادي تخربط

بسبب الحصار ووظائف ماكو تزوجن

اخواتة الباقيات وخف الحمل عنه

لذلك سافر للأردن يشتغل ومناك وعالبعد اعترفلي بحبه جنت أگعد بالساعات احجي ويا

وبالتلفون طلب ايدي من امي ووافقت ان نتزوج من يرجع وزادت علاقة العائلتين قوة بسبب هالشي

وصارت امه أغلب الوقت يمنا لحد ماامي

گالتلها جيبي غراضج وتعاي يمنا

وبيتج اجري استفادي من أيجاره

ورة خمس سنوات رجع جنت مخلصة

جامعة خريجة ادارة وأقتصاد

رجع مادياً مرتاح وطول ذيج الفترة

من يدز فلوس امه تجمع يمي من رجع

أشترى سيارة ورجع قسم بيتهم نصين

اجر نص ونص رجع بي ويه أمه گعد

خطبني تحت فرحة الأهل والأحباب

وتزوجنا بسنة ٢٠٠٢ فرحانين بأن

وأخيراً انجمعنا وبسبب خوفي على

امي من الوحدة جبتها بالقسم الثاني

من البيت وگوه قبل ياخذ الأيجار مني

من تزوجنا تركت التعامل ويا الساكنين

بعقاراتنا صار هو يروح ويرجع بدالي

يحبني وأحبه بس للأسف وره سنة

من زواجنا راجعت عالحمل تگول

الدكتورة كل شي بيج تمام وهو

جان رافض يروح يشوف نفسه

وهيح مرت سنة لخ وصار الاحتلال

الأمريكي وتحرر العراق ودخلنا

مرحلة جديدة اطباء من الخارج

بدو يجون وتطورت هواي شغلات

رغم الطائفية وهواي شغلات

فطرحت علي فكرة الدكتور

وصارحني ان هو مسوي تحليل

والعيب منه بيومها سكن حضني وليلة

كاملة حتى بجي بجه أواسي رافض

يسمعلي

-والله اني مكتفية بيك ليش هيج

متأثر

-ندمان لأن ماحجيتلج

-اني مسامحتك كافي وجودك حواليه

كافي تقديرك اليه واهتمامك بيه وبأمي

طول ذيج السنين

-وحزنج وعيونج اللي تنطق من تشوفين

طفل 

-نحاووول نسافر

-اخاف أشوف الصدمة بعيونج

-نجرب مخسرانين شي

وصار وسافرنا لأيران ورجعنا ويه

كمية أدوية ومقويات وعلاجات قيامة

حتى تتحسن النسبة وبعد سنة وتحديدا

سنة ٢٠٠٦ سوينة التحاليل وكل شي جان

جاهز للحمل سافرنا وتم التلقيح ٤ أجنة

للأسف سقطو واحد ورة اللخ رجعنا

بعد شهرين تعب من أيران وهو ضايج

واني مكسورة 

بعد ٦ أشهر رجعت الح وأبجي وهالمرة بسوريا

كذلك حقنا وسقطو الأجنة من رجعنا

دخلت حالة اكتئاب خلتني مااگدر حتى اجر

النفس كل يوم من يرجع للبيت نفسيته

تعبانة بسبب حزني يحاول مرات يحتويني

ومرات ينفجر بيه

-مو كافي حزن ماصار شنسوي

-اكيييد مترهي لأن هالمرة السبب مني

مو منك اني اللي مجاي يثبتون ببطني

الأجنة انت رجال صاحي مابيك شي

-صاااااحي صاحي المثلي هسة أبنه

بطوووووووله اوعي لنفسج وكافي تعاقبيني

على شي مو بيدي

بجيت هوووايه بساعتها

-ليييش من جنت أنت الطرف الثاني

جنت آني محتويتك ومقدره تعبك

وحزنك ليييش كريم

ليييش من انعكست الأدوار بسرعة

تعبت مني 

باوعلي بقهر وحظني

-ماتعبت والله بس مااريدج تبقين

عايشة بحزنج تردين ادورلج وظيفة

تلتهين بيها

-ماااااريد مامحتاجة وظيفة محتاجة

طفل

-شسوووي بس فهميني

تركني وطلع وأستمرينا هيج لحد

مدخلنا ٢٠٠٧ بدة يتفهم حزني صار

يطلعني نتونس سافرنا للبنان

ولغيرها ودينه امي وامه عمرة وطلعنا

وياهن

وحسيت ان كافي مدام مصار معناها

بيها خير اليه اكتفيت من صدگ بي

وهو كذلك لحد شهر الخامس من ٢٠٠٧

تمرضت أمي وهالمرة جان المرض ألاخير

توفت بين أيديه وصفيت وحيدة بلا أهل

الأيام البعد وفاتها غلق كريم البيت

اللي بصفنا وووره شهر اجه مؤجر

اخذه عمتي وبسبب حزني تعبت

اعتقد من صوت بكائي وراحت يم

حمايه الصغير سكنت

اني وبسبب اللي صار انجرفت

بالحزن لدرجة فقدت ذاتي

صار الليل سلوتي ابجي

على أمومتي المفقودة

وعلى اهلي اللي راحو كلهم

بديت بعدها ببداية

٢٠٠٨ أفكر جدياً بتجربة الحمل

وأخوضها من جديد

جان بأيامها كريم يسافر هوايه

للبصرة ومدن الجنوب علمود شغلة

اتصلت بي ورد وره ساعة

-ها سومة

-يمتة ترجع

-الليلة جاي صاير شي

-لا عمتي اساساً مااجتني

-يعني باقية وحدج

-لا عادي هو فرق بيتين

-يلة ماباقيلي شي واوصل

صدگ للظهر دخل بعد ماتغده وارتاح فتحت

الموضوع

-كريم مثل متشوف صفينا وحدنا

واني بقيت وحيدة اريدلي طفل

-هم نرجع لنفس الموضوع

ونرجع نتعارك

-لا لا ليش نتعارك عادي جاي

اطرح عليك الموضوع والله انت مراح

تتعب بشي بس تعال وياي علمود

التلقيح

-وهم نرجع للهرمونات والحقن والدموع

والبجي واللطم موووو كافي حزنج بهالسنة

بلعت الغصات بداخلي وسكتت

واني احاول أستوعب

-حزني على أمي تعبك

-مو هيج يا سومة مووو هيج بس

التفتي لحياتنا دائما تبجين ودائما تعبانة

-زين فرحتي بيدك بقت ليش

متخليني احاول

-انسي كافي عليه انتِ

تقرب حضني يبوس بيه

-لج انت كافيتني جنج زعطوطة تبجين

بسرعة وتضحكين بسرعة

اذا اني اشتكيت بيوم علمود

موضوع الطفل عود عاتبيني

سديت الموضوع لحد يوم ١٥/٦/٢٠٠٨

كاعدين نتغده ودگ تلفون عمتي

أباوعلها أنخبصت وتجاوب بسكوت

شويه وصاحتله

-ولك يمة كريم تعال

ركضت وعبالك حدسي وداني

وراهم ماسمعت من الهمس غير

-ولك روحلها

لبس بسرعة اخذ هويته وطلع فلوس هوايه

من الكنتور وطلع

-وين رايح صاير شي

-رايح لأسماء خابرت امي على فلوس

هو طلع واني بنفس الثانية لبست ملابسي

وطلعت ورا بس مالحگت بي

اخذت تكسي لبيت أسماء

لگيتها بالبيت فرحت بجيتي وگعدت تسولف ورة ساعة 

گلتلها اتصلي بكريم اريد اگله طلعت بدون

ماابلغه اتصلت بي من تلفونها غمزتلها تفتح

سبيكر فتحته تتشاقه

-هااااا كرومي شلونك

-شلووووني بنص الخير فيض عسرت ولادتها

واكلت نعل 

بهت وجه أسماء ووكعت دموعي باوعتلي تريد

تغلقه اشرتلها لطمت على خدها وكملت

-وهسه

-هسة دخلوها عمليات بس كون الطفل

مابي شي

سحبتة من ايدها ووگفت

-أن شاء الله فيض تگوم بالسلامة والطفل يتربى بعزك

-سوومة

غلقت التلفون ووكفت ألبس حجابي

-بس اووگفي ولج ترجفين لا تموتين

-لا مااموت من الخبر عرفت أول وتالي

يتزوج مايتحمل مدام تعالج سمية ببيش بعد

بس اليموتني تعرفون يعني فيض بت خالج

المنفصلة اخذها واكيد بمباركة عمتي مو

هزت راسها وبدون مااحاجيها رجعت

للبيت ماانطيت مجال حتى يرجع

بس اخذت ملابس بجنطة وكل اوراقي

وتوكيلي العام اله بأدراة املاكي وطلعت

من البيت وعمتي اسمعها تحجي وية اسماء بلغتها اني عرفت وكفت بباب الغرف تباوعلي محتارة

باوعتلها

-الله يكثر خيرج عمة ويوفقج ويوفق

أبنج ويفرحج بي ويا بنت اخوج اكثر

واكثر بس عمة هيج تجازين سنين

تعبي وياج بسفر كريم تطعنيني بظهري

رادت تحجي اشرتلها تسكت شلت

الجنطة وطلعت وحرت وين اروح

الخوال تتشمت والعمام تتشمت گعدت

بالكاظم وليلة كاملة منايمة تلفوني بالأمانات

مغلق واني مگابلة الضريح ابجي واشكيله

الصبح صبح صليت وطلعت تريگت اخذت جنطتي

وتلفوني فتحته وبنفس اللحظة اجاني اتصاله

-وين رحتتتتي سمية ليلة كاملة

-رحت يم واحد سمعلي وطبطب على گلبي

-اذبحج وعلي اذا غلطتي

-اطمأن سنين انت غايب وبس مكتوبة بأسمك

ماسويتها تريدني هسة اغلط

رحت لموسى ابن جعفر اقسمت على رب

العالمين بشفاعته أن يموت گلبي

منك وينهيك مثل مانهيتني

سديت التلفون واجيت لهذا

البيت جان ستوه مشتري اليه وجديد

بعدة ممأجر ومفتاحه بالصندوگ ويه ذهبي فتحت تلفوني ورجع يتصل

-بس گليلي وينج

-معليك بيه انشغل بأبنك وزوجتك

باجر تشوفلك محامي تطلگنني

-بس استهدي بالله وگولي انت وين

-ليش اگول حتى ترجعني غصب

حتى تضحك عليه بكم كلمة 

-جايج

سديت التلفون ويمكن هو أستوعب اني

مستحيل اگعد يم احد وأشمت اي أحد بيه

وعرف مكاني

گعدت بالحديقة الفارغة غسلت وجهي

وغيرت ملابسي وگعدت هادئة ساعة

واندگت الباب گمت فتحته

سد الباب وتقدملي يحضني

دفعته وصحت بي

-ايييياك تقترب مني حضنك هذا اللي

احتوى ولم غييييري مستحيل اتقبله

بعد

-ماگدرت ابقى بلا ضنى

-جان گلت جان حجيتلي ليييش مو گتلك

نحاوووول

-شنحاوول سمية من اخر مرة گالت

الدكتورة لتحاولون بعد لأن ممكن تفقدين

حتى رحمج

صفنت بوجهه

-هههههههههه هاي حجة جديدة

تريد تبرر خيانتك وزواجك

-والله هذا الواقع هيج گلولي بآخر مرة

-زين من اني صبرت سنين عليك

انت ليش مصبرتلي

-افهميني والله مااگدر أبقى طول عمري بلا

طفل

-وتتزوج وتخوني وتكسر گلبي

واني الوحيدة الباقية من بيت عمك

-والله ماردت أكسر گلبج وأگلج

-ههههههههه يعني ليوين ردت تضم الخبر

ليوين تخليني عمية ومو شايفة انك مشيت

بحياتك واني حياتي توقفت

اني عرررفتك من انعكست الأدوار وصرت

اني اللي مستحيل احمل عررفتك تسويها

بس گلي من تزوجتها مااجيت ببالك اني

وأنتظاري الك ومداراة امك لسنين

وتجميعي الك وتأسيس حياة حتى قبل

ما توصل

-فكررررت بكل شي ولازلت ماانكر فضلج

عطت بي

-لا نكرررررته من التفيت حووواليه

وسويت اللي سويته فأنت نكرتني

بس ليييش كسرت گلبي انت واهلك

هيج اخواتك وامك وانت بعد منو

يعررررف بروح ابوك منو بعد يعرف بزواجك

-عمامي وعوائلهم

-هههههههههه جيد جيد العائلة كلها تعرف

بس سمية المغفلة ماتعرف

-والله التردي اسووووي

تردين نحاووول اخذج لأمريكا هناك ونحاول

-بعديش بعد ماكشفتك صار الموضوع ماصخ

تريد ترضيني بكلمة كلمتين تدري شگد جنت غبية

تبات بره بحجة الشغل وانت يمها مو

-بس تنفسي وارتاحي وافهمج

-مااريد افتهم شگد صارلك متزوج

-بس كاااافي گتلج ارتاحي

-احجيييييي مااريد ارتاح

-سنة ونص

-هههههههههه شگد مغفلة اني شلون ماحسيت

-حشاج والله اني نذل

-لا ليش حشاية مغفلة وغبية وعاقر 

وماانفعك لذلك ياابن عمي يااللي صنت العشرة

والخبز والملح وصلة الرحم طلگني

-بس ارتاحي ونحجي

-طلگننننننننننننننني

صرخت بكل قوتي وبكل ماامتلك من خذلان

وقلة حيلة لطمت وصرخت حاول يحتويني

دفعتة

-والله والله اموووت اذا بقيت على ذمتك

طلگني حتى ارتاح

تركني وطلع للحديقة وبقينا

هالليلة گاعدين ساعة يجيني يريد

يقنعني وساعة يحاورني يحاول

يبرد گلبي لكن هيهات الصبح اتصلو بي

رفع التلفون وباوعلي محتار عرفت فيض

أتصلت بي باوعتله

-روح حقها ستوها والدة روح

وبروحتك هاي راح تنهي كل شي بيناتنا

-الطفل راح يموت

-الله يحفظه روح الله وياك

بنفس اللحظة الطلع بيها من الباب

طلع بيها من گلبي اخذت جنطتي

ورحت لبيت عمي الجبير وهناك انفتحت

جميع الدفاتر والكل فشل بعد ماعرفت

بيهم يعرفون ومحد رحم وحدتي وضعفي

وبلغني وبعد شهرين شد وجذب ومئات

الناس اللي دزها اليه حتى ارجع أصريت

حتى اتطلگ وصار اللي اريده

ضغطو علي اولاد عمي وتطلگت بس كملت

العدة يمهم تشكرت منهم ورجعت لبيتي

بعد مشكلة جبيرة ثاروها بأني

صغيرة وميصير اسكن وحدي بالاخير

صار اللي اريده وتركت الكل ورايه ومعترفت

بيهم 

الوكالة العامة لغيتها والحاضر والغايب

اللي دزهن رجعتهن بلحظتهن بالنهاية

اني اشتريت كرامتي وهو اشترى حياته

ابنة الجبير اليوم شفته ماشاء الله عمرة تقريبا

١١ سنة وبعد ولد وبنية لخ اخواته گطعت وياهن

وعمامي بالمناسبات اشوفهم والصدف

الكل وگف ويا لأنه رجال ولازم يخلف

بس اني الكل ضدي بسبب شي مو بيدي

ذبت حسرة من كملت وطفرت لحضنها مُنى

-هسة موووو عندج اني مااكفي

-كافية وزززززايد

حضنت مُنى ورجعت تسولف

-بااااالجن تدفعن عمرجن ثمن لحياة

رجال ترى ميستاهلون

-طاح حظج رجال طول بعرض تسمينة

أيموني

-اييييي ومرات اصيحله نومي

كفختني وگامت

-مسويه حلاوة شعرية خل اجيب منها

مدام بردت

مشت ورحت وراها واگفة عالكاونتر تخلي

بالصحون حضنت اكتافها

-گلبج بعده يدگله

رفعت راسها وعيونها مطرت حزن

-لا بس تخيلت لو محاولين وجايبين طفل

جان هسة اني ويا بالمكتبة نشتريلهم قرطاسية

دغدغتها وضحكت 

الصبحية غيرت ملابسي لقاط رسمي

أسود وقميص أبيض مكياج بسيط

وتجهزت اللبس مناسب الطلعتين عقد

المحكمة والجامعة اجاني الخط

سلمت المشروع اني وزملائي ساعتين

واتصل بيه

-ها نومي

-اااااااخ عصريني عالتشريب 

لجججج جوووزي من سالفة نومي

جايج ماعندج شي بعد

-لا أبدد خلصت

-يلا نص ساعة واوصل

بقيت اني وزملائي نتناقش

بسوالف التخرج وصاحتلي وحدة

من البنات

-تعاااي غِنى خل نحجي

ويا استاذ شجاع

-شعدنا ويا

-حبابة اني مشروعي يمه

سحبتني من ايدي وطلعنا نمشي

هو واگف ويا مجموعة من الطلاب جوة

مضلة سلمنا اني والبنية

والشباب انسحبو

-شلونكم بنات تفضلو بشنو اخدمكم

حجت هي ويا وگاللها جيبي أوراقج وتعاي اشوف

راحت بسرعة وصارت عينه مني

-شلونج غِنى

-الحمد لله أستاذ

-السنة أخيرة أكيد تعبانة

-مشاريع هوايه ويا البحث احس دماغي

راح ينفجر

بعدنة نحجي ورجعت البنية وبنفس الوقت

اجت لارا بيدها ابنهم حيدر شمر نفسة على ابو

وهي سلمت عليه علاقتي طيبة

بيها سلام واحترام رجع كمل حديثه

وية البنية وويايه دگ تلفوني ايمن

-ها حبيبي

-وينج

-هنا يم الأستاذ اني وزميلتي

-شفتج يلا تعاي ماظل وقت

سد التلفون بدون سلام

اخذت جنطتي ورحتله منتظرني 

واگف

مشى بصفي بدون كلام وغيم وجهه

واكفهرت ملامحه خليته براحته وأدري

بي ضاج وزعل مشى وهو ساكت

-يمناي هسه وين رايحين

-للمهجوم

-المحكمة

-لا للبيت مالي مزاج اعقد اليوم

-تمام عود اني فرحانة راح اتسجل على

أسمك اليوم يلا مو لازم غير وقت نعقد

-اي احسسسن

سكتت وخليته يحرگ جگاير 

مديت ايدي سحبت أيده

مدها الي وهو ضايج وعينه عالطريق

اطگطگ بأصابعه وهو ولا كأنه

وصلني للبيت نزلت

-تنزل تتريگ يمي

-راح انطمر تعبان

-نوم العوافي

خليته راح ونزلت طلعت ريوگ من الثلاجة

غيرت ملابسي خليت كل شي بسلة صغيرة

وتمشيت للبيت اتصلت بي مرتين يلا رد

-صاير شي

-اييييي ايدي احترگت تعالي

سد الخط وسمعت صوت خطواته

المستعجلة فتح الباب صرت

بوجهه باوعلي صفح ودخل

گعد عالميز بالمطبخ يتصفح

خليت الجاي عالنار وطلعت الاجبان

من السلة والصمون 

وخليتهن گدامه

خليت كوب جاي واحد وگعدت بصفه

لزگ يتصفح ويتريگ وهدوء بس صوت

التلفون فيديوات رايحة جايه

سحبته من ايده تركه وگعد يتريگ

يشرب رشفة من الجاي واسحب الكوب

منه اشرب يهز ايده معاجبه

كمل غسل وراح للهول

شلت الصحون ورحت يمه

لزمت تلفوني اتصلت بصبى بس فتحت خط سألتني

-ها غنوة عقدتو

-لا أيمن ماله مزاج اليوم

-يا لييش

-خلي براحته اني هم گلت على السنة الجاية

نعقد محكمة مثل مگلتي هو اهم شي عقد

الشيخ مدام الدين يثبت اني زوجته الباقي مو

مهم

سديته وهو رجلة تتحرك متوتر

سندت راسي على كتفه تشنج وهدأ

-أيمن

………

-يمناي 

………

-زوووجي الأسمراني

………

-حبيبي الأولي

گرصته رجعها بكتفي

تمسكت بذراعه ورفعت نفسي

لخده بسته

-زعلان يا دبس

-وتشوفين وگفتج ويا هذا متزعل

-وزوجته وأبنه وزميلتي هذوله مو بعينك

-لا

-واني وحبي الك

-بنص عيني مو بس بعيني بس ………

-اذا صدگ تحبني اببببد لتحجي شي

يخرب فرحتي بيك تمام

الدنيا وماضيها وناسها كلها تروح فدوة

لتحت اقدامك

جعصت نفسي جوه حضنه وامتدت ايده

الدافية تحضن اكتافي

-احبج بنت الكلب

-ولكم بالمثل

-اذا تحبين خاطري لا تختلطين بي

-واذا تحب خاطري اي شي يضوجك

گوله لتخليني بيوم محتارة واتسائل شمسويه

وانت زعلت

-وعد

وگفت عدلت تشيرتي

-تعال وصلني أناملي ساعة قبل ليجن البنات

وتعال تغده يمنا

-تمام

مشيت خطوتين البس عباتي سحبني

التفتت وارتطمت بصدره

-وين رايحة ياحلووووة

-للبيت

-هووو دخول الحمام زي خروجو 

گالها وهو يرفعني بين ادي

من الگاع

-يمممممه متحررررررش

لعبلي حواجبه

-اليوووووم العب جوووولة

-اذا انت بطل نزلني بالگاع ونتواجه

عضني حيل وقافل علية بحضنه

-هي مو عركة ديوجة حبي هاي

فويسدات لازم طرف يطلع خاااااااسر

-وبما اني تعودت اربح كل معاركي تعال

-تهدددين لج

اشرتله بحواجبي نزل وجهه مستفسر

بست الرصعة اللي بفكه واختل توازنه

وگعت من بين ادي للگاع وعطت

وهو نزل يرفعني ضاحك بكل قووووته

سحبته وگع بصفي اثنينا بصف الكاونتر

گعدت وهو گعد بصفي

حاوطني بين ايدي خلاني گدامه

وساند راسه بنحري

-خل نتزوج هسه

-مااريد اتزوج وابقى بعيدة عنك

اريد نتزوج وابقى كدامك ٢٤ ساعة

باس نحري بدفو خلاني قشعرت

أصابعه تتلاعب على نحري ويسولف

-غنيوة

-همممم

-شو ماسألتي عالذهب

-قابل طاير اول وتالي

اقطك

تحرك شويه ومد كف ايده فاتح علبة

بيهة خاتم بي فص ناعم سمائي

-يجنننن

حجيتها وعبالي أكسسوار

رجع راسة ساند فكه على كتفي

-الألماس السمائي الطلبتي

التفتت علي صافنة

-تتشاقة؟

-وعيونج

-جنت اتشاقه وياك والله

-واني حبيت احقق اللي طلبتي

سحب ايدي لبسه بأصبعي

باس ايدي

-يجننننن

-أحلامج أوامرررر

-بقى بيت المنصور مو تنسى

كفخني وگام

-گوووومي ولي لأهلج وكذبت عليج

هذا خاتم كرستال أبو الالف من بسطيات

الشورجة

فريت الخاتم بأعجاب وباوعتله

-لو فار سليفون باكيت جگايرك العاوية

حوالين أصبعي هم قابلة ومقتنعة

لأن هذااااااا الأهم

نقرت على مكان گلبه وهو مبتسم برضا

-واني هم عندي الأهم هذا

رفع ايدة رفعتله حاجبي

-لتتفوسد لأن هذا مو گلبي

طگها ضحكة ومشى ويايه

-كلاوجية

-تربية ايددددك 

لبست عبايتي وهو جاب السويج ويا

-عليمن بالسيارة تعال نتمشى 

-امشي نجيب غدة مشتهي سمج

-ايييوة كدا دلعني

-متزوووج ازلمة معدل

-جثرلي بصل وطرشي

كفخني بالسويج وطلع بينا

بين مانزل يطلب السمج اني

اتصلت بصبى

-ها غنيوووة ولج دوختيني

-اگلج صِبى رحت لأيمن للبيت سويتله

ريوگ وگلت اگلج

-غلط

-شو اني هم حسيت هيج لذلك بلغتج

بعد مااعيدها

-هو يدخل بيتنا ميخالف الجيران

بعدهم مو هوواية يعرفونا وسومة عرفت

الكل ان هذا خطيبج من يزورنا ببيتنا 

عادي بس وحدج ترحين لبيته الناس

مترحم رغم هو زوجج

-متتكرر بس ردت اگلج احنه طالعين

راح نجيب غدة

-تمام بالعافية

-هو راح ينتظر يتغده ويانه بالبيت

-يشرف وينور

ودعتها وراحت هااااي لو تدري قبل

زواجنا ملتقين مرتين بهالبيت جان كفختني

وطيحت حظي

رجع طلع بيه للبيت وصدگ راح

نام على جية البنات اتصلت بي وتغدينا

ويايه سومة

جاي اسوي جاي صاحلي

-تعاي غنوة خلي تلفوني عالشحن

رحتله گاعد يسولف ويه سومة

وصِبى ويتناقشون

وديت الجهاز ورجعت گعدت يمهم

كعدت بصفه باوعلي صفح وهمس

-اووويلي تزوجت علمود هاللحظات

-ياللحظات

جله صوته وحجه

-غنوة حبي گلاص مي بارد

تقربت منه

-تريدة ينگلب على راسك لو برگبتك من وره

-احم خليلي هيييبة وسطهم بت الكلب گووومي

جبتلة المي ترست الگلاص ملح 

شرب شويه منه كش وجهه

وگف سلم عالبنات

مشيت ويا للباب

-أتمنى يكوووون ملحنا غزررر بيك

حبيبي

-لا ملحكم ميغزر بس البووووس غزر

كممت شفافه بيدي

-ولك انفضحنا

باس اصابعي وطلع للباب

-يلا مررررتي سدي الباب وراي

اااااخ الله يمتى تجين يمي وكل شويه اگومج

علمود شي

-هذا هم حظي الناس تتزوج وتتدلع

واني اخددددددم

دفع الباب ورجع دخل عينه بعيني

مركز

-انتِ بس صيري بحضني والباقي

سهل 

ابتسم ودار وجهه للباب

-منيوووووة ام لسان شافتني واني

حاصرج بالزاوية بس لا تفتن لصِبى

ضحك وهو طالع

-لا سحلية

ودعني وراح بعد متواعدنا ثاني

يوم اغيب ونعقد وبالفعل صبحية

غيرت ملابسي وانتظرته اجاني 

منطلق يغني 

-صغيرة جنت وانت صغيرون

وحبنا بدة بنظرات العيون 

-ياصغيرون حبيبي قصدك

شيبوووون

-غير تموتين على جهرتي

-غير اموت على جمالك ياابو خشم

معنجر

-غنيلي لج

-يالجمالك سووومري

ونظرات عينك بابلية

-اووووويلي هذا اني

بس تدرين جهالنا راح يطلعون يشگون المطي

-ليش بالله

-مكس حليب وككاو

-نوميييي

-ها غني

-مو جاي ادلعك دلعني

-صراحة مااگدر ادلعج هسه

يراد ادلعج مباشر على الهوووواء بعد العرس

-أسخف السخيفين

گضينا الطريق مناگر وبين فحوصات

وتحاليل ومعارف وواسطات عقدنا

ايدة بيدي صورت اصابعنا والعقد

وحفظت الصورة يحجي ويايه

وهو صاعد السيارة انتبه

-لج هويتي بقت جوة گعدي

هنا راح اجيبها وأجي

غمضت عيني واسترخيت

عالهوا البارد من تبريد السيارة

وسمعت تلفونه دگ عدلت گعدتي

وانحنيت سحبت التلفون

باوعت للأسم تحت صدمتي

وگلبي أهتز بقوة وتدفق الدم

توقف بأوصالي واني أشوف الشاشة

.

.

.

.

.

.

صِبى

________________________

وبمرور الوقت اكتشفت

ان كتمان السخط والغضب

أهون من كتمان مشاعر الحب

والوله

المكتب هوووسه والكل يحجي

وفقار والفوضى مالته واستاذ

أسد وعصبيته وصفا وهدوءها

متقابلين وكلهم يحاولون يوصلون

لمرافعة لائقة بالقضية المشتركة

بينهم اني مقدمتلهم اللي يحتاجو

وگاعدة ارتب الملفات وانقل للحاسبة

هدأ صوتهم بعد ما حجت ويايه

صفا

-صِبى

-نعم

-انتِ مو طبعتي الثلث مرافعات بيدج

شنو رأيج بيهن

-تردين اجامل لو احجي الصراحة

-الصراحة

-مرافعة أستاذ ذو الفقار والمحامي

اللي من مكتبكم قانونية بحتة

مابيها أي عنصر ثاني

-قصدج عنصر عاطفي

-اي اما مرافعتج عاطفية بحتة

وهم تحتاج كم فقرة قانونية

ابتسم استاذ أسد وباوعلي

-ومرافعتي

جاوبته واني منزله راسي للحاسبة

-متوازتة بين الأثنين

-واني كم مرة اگلك بالمكتب اني

استاذ

-وانت عمة هم نفس الشي 

-اكيد اسمي ست صفا

الميانة خليها للبيت

وگفت تعدل بأوراقها تقدمتلي

انحنت عالميز ضاحكة

-شلوووون تگدرين تشتغلين ويا ذولة

الاثنين

ابتسمت وهمستلها

-مجبووووورة تحت التهديد

ضحكت واستقامت بوگفتها

-يلة اني بعد اترككم تكملون شغلكم

أسد ليش متدمج الثلث مرافعات بوحدة

وهيج نحصل كل العناصر

-تمام اتفقنا

دارت وجها سلمت وطلعت

ذو الفقار گاعد گبالي باوعلي

-قطاعة الأرزاااااااق

ضرب أسد عالمكتب رفع راسه هو

-خوفتني خالي

-امشي اطلع برة دوختني يلا بدون

مطرود

-افه وهييييج تبيع أبن اختك

شو آنسة صفا الحبببب القديم

متونس على سوالفها

باوعله أسد وعقد حواجبه

-فقااااار يلا لشغلك

فقار حس ان هو تجاوز حده

اعتذر وطلع

بقيت منزله راسي عالشغل فآني

وطول ذيج الفترة ومن شفتها تسلم

علي بحضن حسيت اكو شي

دقايق احس وجهي يريد

ينفجر حرارة صعدت لوجهي من تأكدت

هسه

حسيت بخطواته ناحيتي گعد

عالمكتب يمي وخله اوراق بحجة

الشغل

-صِبى 

-نعم استاذ

-شو رفعي راسج أرتاحي شويه

وبعدين نكمل

-تمام

طبعت آخر كلمة ورفعت راسي

-طبعا فقار صاير خبل زيادة

وكم مرة اگله لتحرجني وتحرج عمتك بهالكلام

-اي كلام أستاذ

بيده قلم يفر بي وعينه بعيني

-اللي گاله قبل شويه دائما يحرج البنية

واحنه كل ماهنالك جان بينا مشروع خطوبة

ولغينا لعدم التوافق 

نبض گلبي نبضة سريعة ورجع

اعتدل يعني اكو بينهم شي سابقاً

بس تعاملهم عادي مابي أي لمحة لمشاعر

او شي

ابتسمت محرجة

-عادي أستاذ فقار هذا طبعه وهي عمته

اكيد تتفهم وانت اكثر شخص تعرف

سوالفه ومزحه بكل شي

-بس اني مااريد شخص يفهم غلط

-محد يفهم غلط أستاذ موضوع عادي

-وانتِ

-آني فاهمة

-حسيتج ممرتاحة

-لا والله بالعكس ست صفا هادئة وخلوقة

وتعاملها يجنن

-مو عالتعامل

-على شنو أستاذ

باوعلي مگدر يحجي وگف عدل سترته

-يلا صِبى اني رايح بعد للمركز

مثل مگتلج قضية هالمرة عجيبة

ويحتاجوني لأن البنية محد اجاها

من الأساس يعني ضروري اكون

موجود

-تمام أستاذ اني راح اكمل كل شي

طلع تاركني ورا تركت كل شي من ايدي

وسندت راسي عالمكتب ذبيت نفس

وكأني جنت گاطعة الهوا بوجوده راح بالي

لذاك اليوم اللي شفتهم بي 

دخلت فاتحة المكتب واگف هو منزل ايده

وبنية مادة ايدها ناحية اكتافه عبالك حاضنته

وباست خده وگعت عينه بعيني

من فتحت الباب ابتعد عنها واني طلعت مبتعدة

خجلانة من تصرفي شلون دخلت عليهم

وبنفس الوقت سلاسل من نار قيدت گلبي

حتى تأدبه ويحترم نفسه ومينبض لشخص

عنده من يحبه

اجاني صوته

-صِبى صِبى تعاي دخلي

بقيت بره مدخلت طلع ووجه متغير خجلان

او متضايق مااعرف

-تعاي صِبى ليش رحتي تفضلي

ورانا شغل

واحنة نحجي فات فقار صبح

ودخل قبلنا

-كملو شغلكم استاذ ومن تحتاجني

اني هنا

-صِبى گتلج دخلي ورانا شغل

دخلت لگيت فقار حاضن البنية من اكتافها وهي تدفع بي استغربت هاي شبيهم وهي شلون توافق

گلت صباح الخير وهي ردت خجلانة دفعته وحجت توضح

-ووووخر لك البنية وجها احمر من الخجل

عبالها اني غريبة

تقدمت ناحيتي

-اني صفا عمة هذا الخبل

اخت ابو

اشرت على فقار ورجعت على أستاذ

أسد

-وأسد الله يصير ابن خالي

يعني احضان وبوسات حلال

ضحكت مكممة شفافها

مديتلها ايدي

-أني صِبى 

-اعرررفج خابصني بيج فقوري

-يارب بالخير

-اي والله بالخير يحجي بشطارتج

ابتسمت وهي راحت گعدت يم أسد

اللي عينه مافارگتني يباوع مااعرف مترقب شي

صاحلي اني وفقار وانطلق يحجي

-شوفو بين مكتبنا والمكتب اللي تشتغل بي صفا

اكو قضية مشتركة لذلك راح نتقابل هنا خلال هالفترة تمام صِبى فقار ملفات قضية

الشاب اللي قتل أخو وزوجته تجي يمي

حتى نفهم

-تمام استاذ

-صِبى كوب جاي ثگيل حالي من أيدج

سويت اكواب الجاي وقدمتلهم وبدو

شرح القضية الموضوع شائك رغم الجريمة

بس الحق كل الحق للقاتل اللي أكتشف خيانة

الأثنين اله بدو يحجون بحيثيات القضية

ويتناقشون وهيج أستمرينا لمدة أسبوع

صفا هادئة مرحة واسلوبها راقي ولا كأنما

نسرين بنت اخوها فرق بالتعامل والاسلوب

كل يوم تجي وياها مجموعة متدربين

وننخبص وياهم وهم يعلموهم 

واني وفقار دايخين بالفوضى

اسبوعين بالضبط يلا ارتاحينا من المتدربين

وبدينا بملفات قضيتهم المشتركة

القاتل شاب ببداية الثلاثين متزوج

اقرباءة شابة صغيرة عمرها 

١٨ سنة حامل وعدهة طفل صغير

يگول من خلال التسجيلات ان هي حبت

تجهض الطفل الثاني واجهضته فعلا

وبقت عالولد اللي عدها عمره سنة

يروي قبل الحادث يگول جانت مدللة

اللي تريدة يجيها وحتى بيت خليت بأسمها واني تزوجتها صغيرة متعمد

گلت تناسبني وتتربى على ايدي 

بس الصار العكس يروي ان جانت تحس

ان علاقتهم اغتصاب وتبجي بأغلب وقت

اقترابه منها هو يعزي هالشي لخيانتها

متناسي انها صغيرة بس الخيانة لا تبرر

ولا تغتفر بحكم صغر عمرها ارتبطت

روحياً بأخو الصغير اللي عمرة ١٩ سنة

يشتريلها يسولف وياها يتعامل وياها تعامل

الأخت والأخو لكن اللي صار طلع أبعد من خيالة

البنية فسرت هالأفعال حب وبدت تقترب

من الولد الى أن تورطو بعلاقة اكتشفها زوجها

فجأة من تغيرت وصارت تتهرب منه

شاف محادثات واتفاقات على الهرب سويه

وبقى صامد الى أن فرغلهم البيت بيوم

ولزمهم بالجرم المشهود وقضى عليهم

بسرير الخيانة

استمع واتخيل موقفه زوجته واخو بنفس

الوقت اگول لو منفصل عنها افضل مما ضيع

حياتهم وحياته الموضوع شائك

جان وعميق اهلها مقومين اكثر من محامي

لهالقضية لذلك مكتب صفا حبو يتعاونون

وية استاذ أسد حتى يگدرون عالاقل يخففون

الحكم عنه

كل يوم نگعد بالساعات اوراق وملفات

وتسجيلات الى هذا اليوم

انفتح الباب دخل فقار

طلعت من صفنتي

-ها صِبى الاستاذ وين

-راح للمركز علمود ولاء

-يا ولاء

- البنية المنهزمة محد

جاي مستلمها لحد الآن 

-تمام

-شبيك

-يمكن تجاوزت حدودي ويه خالي

-لا عادي هو يعرف اسلوبك

-يمكن خجل لأن حجيت بموضوعه القديم

-لا عادي ياما ناس ماصارت خطوبتهم واني اشوف

صفا تتعامل برقي ويا الموضوع

-صح الصححححح خل يولون اثنينهم

ضحكت وهو طلع ضاحك وره ساعة ونص

تقريبا رجع بس وجهه ينفث نار

گمت خليت كوب مي گدامه

-جاي وياج

-ان شاء الله

ربع ساعة هدأ وبدأ يحجي

-يعني مراهقة متتعدى ال١٥ مخططة كل هالتخطيط

-محد استلمها

-لا باجر صِبى نروح سوية للمركز بلكي

بالأسلوب تخليها تعرفنا بمكان هذا اللي نصب عليها

-تمام أستاذ

بين ماكملت شغلي هو وگف 

-هاج شوفي المرافعة دمجت بيها الثلث

مرافعات بالله رأيج بالنتيجة 

بديت اقرأ النص

حضرة القاضي المحترم

السادة أعضاء هيئة المحكمة

أقف اليوم أمامكم لا لأدافع عن جريمة

بل لأشرح إنساناً

لا لأبرّر موتًا بل لأضيء على ما طُمس من حقيقة

موكلي ذلك الشاب الذي ترونه الآن أمامكم

ليس قاتلًا محترفًا ولا مجرما معتادا

بل هو ضحية من نوع آخر

ضحية خيانة مزدوجة 

خيانة كسرت قلبه وكسرت ميزان عقله

وأطفأت لحظة من وعيه كان يمكن أن تغير كل شيء

سيدي الرئيس

إن القانون لا يُفرّق فقط بين القاتل العمد

والمجني عليه بل يعرف جيدًا كيف يقرأ دوافع الإنسان وكيف يحكم على الجريمة بميزان العدالة لا بسطحية الحدث

هل ننسى أن المادة (٤٠٩) من قانون العقوبات العراقي قد نصّت بوضوح على أن من فاجأ زوجته أو إحدى محارمه في حالة تلبس بالزنا فقتلها في الحال أو قتل من يزني بها يُعاقب بالحبس لا أكثر

لماذا

لأن القانون ذاته ذلك الذي نظنه جامدا

يعترف بوجود لحظة لا يعود الإنسان فيها حاكما لعقله بل يصبح أسيرًا لصدمة تمزق كيانه وتزلزل ثقته وتجعله عاجزًا عن التفكير متحركا فقط بردّة الفعل

موكلي لم يكن ذئبا بل عاشقا

لم يكن سفاك دماء بل زوجا آمن  وأخا أحب

لكنه خُدع طُعن في خاصرته لا بسكين بل بخيانة مزدوجة من أقرب الناس

زوجةٌ أقسمت له بالوفاء وأخ كان له الظهر والسند

تصوروا معي

ما الذي يمكن أن يفعله رجل حين يدخل إلى منزله

في ساعة غير متوقعة ليجد سرير كرامته قد استبيح

ما الذي تتركه تلك اللحظة في قلبه سوى الصدمة والانفجار

أي عقل يمكنه أن يحكم نفسه في تلك الثواني المشؤومة

سيدي الرئيس

إن أقصى ما تطلبه العدالة هو الإنصاف

وأقصى ما أطلبه أنا هو أن تُعاملوا موكلي كأنسان لا كقاتل ميت الضمير وشكرا لعدالتكم

رفعت راسي مبتسمة

-كلش حلوة

-اني بالعادة ضد القتل حتى بجرائم

الشرف بس هذا الشاب منهار 

وهو مدرك ان نصف الخطأ يوگع علي

شخصيا لأن تزوج طفلة بالنهاية مگدرت

تتأقلم وتأقلمت عمريا ويه حماها رغم

قذارة فعلتهم بس هالشغلة لازم تكون

دافع حتى تتوقف العوائل عن زواج القاصرين

وتنتظر ان يكبرون اولادهم ويحكمون عقلهم

ويختارون شركاء حياتهم بلا ضغط نفسي

ولا خوف

-زين أستاذ ليش اهلها ترافعو وهم قضيتهم

قضية شرف

-حتى يمحون اثر العار اللي يركبهم

وكل ظنهم ان الزوج مايملك أدلة

اضافة لهالشي العقار اللي بأسمها

تحول من هبة لعقد رسمي

بس بلغت ال١٨ وبما انها انقتلت اوتماتيكيا

يتحول للأبن والشاب رافض حتى أبنه

خوفا من ان يكون نتيجة زنا لذلك

اخذو اجداده اهل الأم وطمعو بالبيت

قانونياً بحجة أن الطفل تحت

وصايتهم قانونياً

-انت شتشوف أستاذ

-اني مااگدر اقرر لحظة الغضب ممكن كل

شي ينتج عنها لذلك مااكدر اكون مكانه

اللي أگدر اسوي فقط ادافع عنه

لأني أشوفه رغم خطأه بالزواج من طفلة

لكن مظلوم فقد عائلته وبيته وابنه

كملنا شغلنا بهاليوم المتعب ورجعت للبيت

واني خايفة رغم اني اللي ربيت مُنى

ورغم اعرفها مستحيل تسوي خطأ

بس قضية البنية المهزومة ارقتني

وخلتني افكر بأن عقل المراهق

مهزوز ضعيف ممكن أي شي يأثر

بي لذلك بالليل وبعد نومها گعدت

ابحث بتلفونها غير مجموعتها الدراسية

ومحادثتها ويا قمر ملگيت بحثت بقوائم

اصدقائهة عالانستجرام

عالواتساب سجل البحث عاليوتيوب

كل هذا خلاني مطمأنة 

ثاني يوم الصبح من المكتب توجهنا

للمركز وهاي المرة الثالثة ادخله ويا أستاذ

أسد علمود قضايا نگعد بمكتب الضابط

اللي أسمه مؤتمن جابولي البنية وطلعو بره

بحجة عدهم شغل سدو المكتب وطلعو

واني گاعدة وهي بجانبي ناعمة سمرة صغيرة

شكلها طبيعي حلوة جانت مرتبكة باوعتلي

-شسمج ياحلوة

-أسمي ولاء انتِ جايبيج حتى تعرفين مكان أهلي

-ولاء حبيبتي لازم نعرف مكان أهلج ضروري

شلون تبقين هنا انتِ تعرفين انج قاصر

وضروري احد يستلمج ويكفلج والا

تبقين بالاحداث

-عادي أبقى

-تعرفين الأحداث شنو

-وعبالج سجن طبيعي

-لعد شنو

-السجن مو بس للصغار مثلج اللي مظلومات

البعض فعلا مذنبات دعارة وقتل ومخدرات

وبلاوي

بهت وجها وتقدمت يمي

-زين شنو اليضمن أهلي ميقتلوني

-حسب انتِ شسويتي 

-اني مسويت شي

-زين ليش قبضو عليج

باوعتلي وبجت

-ضحك عليه والله

-منووووو

-أبن خالي

باوعتلها مصدومة

-وهسة هو وين

-هو بحجة يحبني كال ننهزم جيبي فلوس من اهلج

وتعاي

واني غبية صدگت اول ماوصلنا بغداد

شربت عصير جابليا وفجأة نمت گعدت لگيته

ماكو لا هو ولا الذهب ولگيت نفسي بالبيت

اللي لزموني بي

-انتِ منين أساساً

-من محافظة ……

-ليش هيج سويتي بنفسج

بس احجيلي سوولج شي

بجت مغطية عيونها

-ايييي صارلي ٣ أشهر وياهم

-شغلوج يعني

-اييييي شلون لزمتني الشرطة

غير جانو مطلعيني

حبابة بس گليلي هسه اذا أهلي

عرفو يموتوني

-ابوج عايش

-لا بس اخوتي الكبار وامي

اني بگت ذهب نسوانهم وفلوس شغلهم

وانهزمت

-حافظة رقم الهم

-اي رقم امي

-خاف يأذيني

-اني راح اصيحهم وانتِ احجي ويا

الضابط يفهمج والله المحامي والضابط

شرفاء واصحاب كلمة اخذيها من يمي

طلعت الضابط واگف وية أسد

باوعولي مستفسرين

-مستعدة تحجيلكم

ضحك الضابط مؤتمن وندس أسد

-اگلك الآنسة تفيدنا والله بسوالف

البنات الصغار والاعترافات

اسد وجهه غيم ومارد دخلنا

وبدو وياها سؤال وجواب لحد

مخلصو وگفت يمي باوعتلي

-خالة انتِ واعدتيني

-ان شاء الله ترجعين لأهلج وحقج يرجعلج

طلعنا ومؤتمن صاح لأسد

-أسد شووو تعال

تركني يم باب السيارة وتوجهله

شوية ورجعلي وجهه متغير صعد بالسيارة

وماحجه شي يسوق وبالة سارح

الى أن داس بريك بزونة عابرة راد يسحگها  انضربت اني بالجامة الأمامية 

لزمت جبيني وهو ارتبك وتوقف

-شو اشوف انجرحتي

-لا لا مصار شي بس استاذ انت بخير

صفن بوجهي ذب نفس قوي

-لا لا صِبى اني مو بخير ابددددد مو بخير

-صاير شي أستاذ

-مؤتمن يريد يتقدملج

-آني

-امممم انت

عيونه تتحرك على ملامحي ركز بحركة

عيني بنطق شفافي واني اسأله

-وشگلتله

وهو رجع كمل الكلام اللي رفعني من

سابع أرض طيرني تحت غيم يرش

رذاذ ناعم من السعادة بسابع سماء باوع بعيني

ونطقها بهدوء

-شگله وآني واگع بغرام عيونج

من سنة