رواية بنات الملا الفصل الثامن عشر بقلم رغد الموالي
أم إنكِ قد شغفتي قلبي حبا...
الشيخ جبلان... بويه ياقوت ابوج موجود
ياقوت... لا مموجود
الشيخ جبلان... عجل صيحي ام روح كليلها ابو محمد بالباب
باوعت شيماء وامي وحده للثانيه
شيماء... الله يعلم شحيسوي طلعت وحدي وبدون ميدري بسعاد شلون
بسعاد... ابنج وياج اولا ثانيا على مشكله طالعه
شيماء... مايقبل يكول روح طفل ماعدي مره تمشي بطولها وحدها والمشكله يتخبل ولا مره تطلع زعلانه هو متحلف بينه بهاي السالفه
بسعاد... اسكتيييييي لمن تعرفيه هيج ليش ماانتضرتي بجيييي وتحجيله
همست... زمرد ركضي جيبي عباتي
راحت زمرد بسرعه جابت العبايه ولبستها امي وطلعت عليه
بسعاد... تفضل ابو محمد انت منه وبينه مو غريب
الشيخ جبلان... مايصير ياام جواهر رجال البيت ماموجود
بسعاد... اي والله بالمحل بس عدنه كلمتين قبل ماتروح وياك شيماء
الشيخ جبلان... اروح لعد انطي خبر لبو جواهر واذا كدر خل يجي ويصير الحجي كدامه
بسعاد... براحتك ياابو محمد
التفتت لشيماء... هو هيج طبعه لو بس ويانه
شيماء... لااا لااا هو هيج من الاول يكول عيب مايصير
راح وره تقريبا نصف ساعه اجه هو وابويه
دخل ابويه وكال... يااااالله
بسعاد... تفضل ابو جواهر
لبست امي عباتها وراحت هي وعمه شيماء للاستقبال
وكفنه نسمع شنو حيصير
الشيخ جبلان... شبيچ... وجهج شبي
شيماء... ام محمد
الشيخ جبلان... شنووو انتصار؟!!!!
سكت للحضات ورد تكلم
وانتي ليش ماتانيتيني ارجع وتحجيلي ليش تطلعين من شورچ
شيماء... تحلفت بيه اذا اكلك تنهي عليه
الشيخ جبلان... وفوكاها تهددج بالقتل
امشي وياي
بسرعه ابتعدنه
ومباشرة نفتحت باب الاستقبال وطلع وشيماء وراه
ترخصو من ابويه وسلمو على امي وابويه وطلعو
عبد المجيب... هاي شيماء الضاهر مكتوبلها تبقه طول عمرها مشلوعة قلب
جر نفس قوي وباوع لاامي
بسعاد افرشي دوشك وبطانيه ومخده بالاستقبال
بسعاد... ليش
عبد المجيب... اكو شاب خطيه جابوليا حالته ميؤوس منها ويرادله قراءه هوايه وبأوقات مختلفه من الليل لهسبب لازم يبات عدنه وارقيه
بسعاد... صار ابو جواهر
طلع ابويه وكعدت امي على الكرويته الي جانت بالطرمه
دره... تتوقعين عمو جبلان يطلكها لمرته الثانيه
بسعاد.. ممكن على هذا الي سوته مستحيل حيعديها الها على خير
دره... وشلون حنعرف
بسعاد... كتلها طمنينا عنج كالت اجيكم باجر
دره... الفضول تولد عندي مو طبيعي
اريد اعرف شنو الي صار
لليل جان صوت ولد جيرانه ابو تحسين يهرج بالفرع من يتعاركون المنطقه كلها تدري لدرحة انو تعلمو عليهم وصار عادي
لكن ابوهم رجال فقير مايكدرلهم
ماسمعنه الا صوت سيارة الشرطه بالفرع فتح ابويه الباب وباوع راح الهم وشويه ورجع علينه متبسم ويفر براسه
استغربنه
بسعاد... هاي شكو
عبد المجيب... هاي ابو تحسين جايب الشرطه على ولده حتى يسجنوهم يكوللهم اخذوهم مداخلوني انام والجيران شايلين خطيتهم شنو ذنبهم اخذوهم خل يتعاركون بالسجن
واخذوهم لولده خمستهم للسجن
ام جواهر... بتعجب وهي كوه لازمه ضحكتها... صدك يعني بس والله ماينلام
دره... ضحكنه على حجاية عمو ابو تحسين وتصرفه وي ولده
بيت ابو تحسين جيرانه من سنين عنده خمس ولد واربع بنات ابو تحسين رجال جبير بالعمر عنده مشتل صغير يبيع بي سنادين ورد وزرع للزينه كان رجل قصير القامه سمين ودمه خفيف وكل المنطقه تحبه ماعنده اذيه على احد وحتى من ولده يخاف
ولده اعمارهم متقاربه وكلهم يشتغلون بحرف متعدده
وهاي جنه على طول نسمع عركاتهم بالبيت وهو ياحسرتي مخلي كرويته من عودان السعف بالشارع يكعد عليها لما يخلصون عركه ويدخل للبيت حتى الجيران تعلمو وصارت عادي
اكثر من مره ابويه ورجال المنطقه الكبار تدخلو ومن يجون على اساس المشكله يلكوها علمود اشياء بسيطه لو هذا لابس دشداشة هذا لو هذا مداين من هذا ومناطهيا اشياء طبيعيه فكامو مايتدخلون
ندكت باب البيت وابويه كلمنه
دخلو حوه هاي جابو للولد خطيه
فتنه جوه وسمعنه ابويه يكوللهم تفضلو تفضلو ودخلو للاستقبال
بليلتها بقه ابويه يقراله والولد مره يتقيأ مره يكوم يغلط على ابويه جان ابوه رجال جبير وياه والولد عمره ب 25 سنه
ثاني يوم بعد ماطلعو سمعت ابويه يكلم امي جانت الدنيا صبح بالعاده امي وابويه يكعدون وي شروق الشمس رغم ابويه بهذيج الليله مانايم
عبد المجيب... الشاب حيل متأذي هواي رقيته بس اعوذ بالله مسويله سحر مدمرين الولد بي واني ماكدر افك سحر
بسعاد... خطيه بعده شاب منو حيأذيه هيج
عبد المجيب... بالليل كان يغلط ويتكلم بنبرة بنيه يكلي لازم تتزوجني ادمرك اذا متتزوجني بعدين عرفت من ابوه انو هو جانت عنده معرفه ببنيه وهالبنيه ماراضي ابوه يخطبها كومي انتي دمريه
اعوذ بالله من غضب الله
بسعاد... ادري شنو مخافة رب العالمين ماكو حتى لو مخطبها شلون تمشي بدرب الحرام وتأذي الناس
عبد المجيب... رب العالمين يابسعاد حرم العلاقات بين المره والرجل فوك ماعاصت امر رب العالمين تروح تسوي سحر
وتريد الله يجبر خاطرها وتتزوجه شلون وانتي تعصيه
بسعاد... وشلون ياعبد المجيب
عبد المجيب... يرادله ناس اقوياء بالسحر وفك السحر هذا مسلطين عليه جن قوي مؤذي اعوذ بالله اني اتأذه لو ردت افكه عنها ابويه جان يتخربط من يفك. هيج سحر
بسعاد... استغفر الله ربي
الله يتوب علينا ويبعدنه عن هيج امور وهيج ناس
عبد المجيب... اللهم آمين
للضحى اجت عمه شيماء
هلا بسعاد كلت هسه بالج بقه يمي وتوسلت باابو محمد قبل اجي كتله ساعه ماطول
بسعاد... احجيلي شصار
شيماء... من طلعنه من بيتكم صعدنه بالسياره
الشيخ جبلان... هاي اول واخر مره تطلعين من بيتي بدون علمي
شيماء... والله لو ماتهددني انتصار مااطلع
الشيخ جبلان... لو شمايصير انه مااحب مشاكل بيتي تطلع هاي اخر مره ماتعيديها النوب
شيماء... لعد تقبلها هيج تسوي بيه
الشيخ جبلان... انه اجيبلج حگج على اي اساس تضربج
وصلنه للبيت ونزل من السياره دفع الباب بإيده بقوه نرجت وصرخ بصوت بنص الطرمه (الكراج)
انتصاااااااااااااااااااارررررر
طلعو كلهم من ولدها وام غايب وهي طلعت تركض وترجف
خير ابو محمد شكو
الشيخ جبلان... بأي حق تمدين ايدج على شيماااااااااء
ام محمد... هي ضربتني وكالتلي لو بيج خير مايتزوج عليج
الشيخ جبلان... باوعلي بغضب واني فزيت من كذبتها
تكذب والقرآن تكذب اني ماحجيت هيج
ام محمد... حجيتي لاتنكرين والا ليش حتى اضربج مخبله اني مخبله
شيماء... والله ماحجيت هيج وكتاب الله جيب المصحف احلف اذا اني كايلتلها هيج
او حتى ردت اضربها
الشيخ جبلان... باوعلها وضيق عينه وتكلم بصوت هادئ مخيف
تعرفين اذا داتجذبين عليّ شيصيرررررررر
ام محمد... ماجذبت
الشيخ جبلان... صاااح محمممممدددد
محمد... كول بويه
الشيخ جبلان... جيب كتاب الله
شيماء اباوع لوجه انتصار اصفر صار وصارت تبلع ريكها وتباوعلنه من جوه حاجبها
جاب القرآن محمد
وصاح عليه
تعالي شيماء حلفي انج ماكتيلها
شيماء... خليت ايدي على كتاب الله وحلفت
وباوعلها كال تعالي انتصار احلفي انها كالتلج
تقدمت خطوه رادت تحط ايدها على الكتاب
اني تخبلت حتحلف كذب عزززه اباوع لشبخ جبلان فتح عيونه بوسعتها من رادت تخلي ايدها على القرآن
جان تنزل ايدها وكالت مااحلف
ضيق عينه وسألها
للييييش
ام محمد... منو هي وتحلفني علمودها على كتاب الله
الشيخ جبلان... لعد هي ليش حلفت
ام محمد... هي حلفت اني مااحلف
الشيخ جبلان... معناها انتي جذابه
سكتت ماحجت ضرب بعصاته بقوه ونطاها ضهرها وتكلم
من اليوم مالج مچان هنا
محمد ودي امك لبيت ابوها
وانتي شيماء اخذي ابنج وفوتي لدارج
وعافنه وطلع بره
بسعاد... يعني حيطلكها
شيماء... اي ناوي يطلكها متخبل منها
بسعاد... زين هو ليش تخبل من رادت تحلف شمدري يجوز صادكه
شيماء... سألته جان يكلي اني مادري ياهي منكم الصادكه بس لو حالفه هي جان ثنينكم طلكتكم المره الي تحلف كذب مالها مكان ببيت رجلها هاي كلشي تسوي وراه
بسعاد... ياااااا صعب والله ابو محمد
شيماء... كلمته ماتتثنه بالبيت وبين عشيرته كلها تهابه وتعمله الف حساب
ماتشوفين حتى فهد المستهتر هاف منه وخنس مثل الفاره
بسعاد... هههههه والله عليج سوالف ياشيماء
🌃 بعد مرور عدة سنوات
ماس... ياقوت اني رايحه تأخرتتتت
ياقوت... اجيت اجييييييتتتتتت بس البس ربطتي
لبست الربطه بسرعه والجنطه ورحت اركض
الدنيا صبح بارده ثلج والجو ثلج دوامنه الصبح عندي امتحان ولو مالامتحان مااداوم على هذاك المطر مال ليلة البارحه والطين الي مدمر الافرع
تمشينه متكأين بالحايطين مال البيوت
دائما تكون الي يم الحايط ناشفه والمي متجمع بنص الدربونه
امشي واندعي ياربي مايجي مااشوفه
اباوع حذائي صار كله طين استحي اذا شافني بهذا المنظر
تمشت اباوع يمنه يسره وصلنه من يم بيتهم همست بسرعه
ياقوت... امشي امشي ماس
ماس... باوعتلي بشقاوه ليش
ياقوت... لا هيج امشي فدوه بسرعه
مشيت وكل شويه اتلفت لايطلع
مشينه وشبعنه طين يلا وصلنه المدرسه
رن الجرس والكل اصطفاف رغم مالجو برررددد بس لازم نشاط مدرسي ورفعة العلم ونقره النشيد بأعلى اصواتنه
بعدها دخلنه للصفوف
مر الوقت بسرعه لحد ما صار وكت الرجعه للبيت
طلعنه من المدرسه جنت اباوع للكاع ومبتسمه اسولف وي صديقتي اول مارفعت راسي شفته واكف متكأ على دراجته الناريه
شفته وجانت ابتسامته واضحه يباوعلي بتأمل احس گلبي طلعتله جناحات وطار من شفته عقلي وگلبي مشاعري كلها نخبصت على عكس مايضهر على وجهي اي ردة فعل ماكو جانت لكن بداخلي اعصااااار مشاعر وحب
دنكت وكملت مشيتي اني وماس
مشينه مسافه وهو على وكفته
حتى في وكتها ضجت ليش بقه واكف يعني هم ينتظر وحده تطلع من المدرسه
شويه وصوت دراجته صارت قريبه علينه
جنه نمشي بصعوبه بسبب الطين
آسر... اوصلكم
ماس... لا عيني شكرا
آسر... مترهم اني على الدراجه وانتو تمشون تتعثرون بالطين
ماس... آسر هاي المره سويتها وحاجيتنه بالدرب مره ثانيه اكل لاابويه هو يتصرف وياك شتكول علينه الناس
آسر... خو بس انتي دومج تردين وتحجين من صغرج لسانج شطوله وهذيج الفاهيه مترد مو عليتي گلبي متحجييييين
ماس... امشي ياقوت امشي باوعتله من فوك لجوه بنظره مقرفه وكتله شلون ناس ومشينه اني واختي
ماس... شلون ميستحي مثل فهد عمه. دومهم يتحارشون بالبنات
ياقوت... عفيه عليج رديتي
ماس... انتي شكو بلعتي لسانج اشو بالبيت لسانج شطوله وحسج يلعلع هسه اختفه
ياقوت... سكتي وامشي ولاتكلين لاابويه على اسر والي صار
ماس... الا لااكله حتى يعرف شلون يخليله حد
ياقوت... لا لا الله عليج عوفي
ماس... باوعتلي ورفعت تك حاجب... لييييييش
ياقوت... بتلعثم.... لااااا بس
بس حتصير مشاكل احنه مو كدها
دمشي امشيييييي تأخرنه تلكين امي نار صايره علينه
مشينه حد ما وصلنه للبيت
جواهر... وين صرتووووو
ياقوت... جوااااهرررررر اختييييي هاي انتي عدنه مشتاقتلججج
وين الجهال
جواهر... شلون دولمه سويتلكم اني وامي تموووووووت
اجوي جهال جواهر شمرت الجنطه واحتضنتهم جانو حلوين مثل جواهر
جواهر اختي صارو عدها 3 ولد
وجانو روحنه من الدنيا على طول نكل لهاشم يخليها تجينه هواي او يجيب الجهال يمنه
صبينه الغده وكالت امي روحي صيحي اختج دره
دره... سمعت صوت زمرد تصيحلي
بسرعه ضميت الرسايل مال رائد بالجرار وطلعت
زمرد... وينج صار ساعه اصيح تعالي نتغده
دره... اي اجيت
كعدت يم اهلي وهوسة الغداء وسوالفهم متخلص ياقوت وماس اكثر ثنين دمهم خفيف بالبيت ويضحكونه هواي مثل التؤام اعمارهم متقاربه حيل ونفس العقليه
كانو طول الوكت يحجون ويضحكونه
الايام صارت حلوه على عكس الماضي تماماً
رائد من يوم ماعرفته واني نسيت اعاقتي
كان دائما يدزلي رسائل
اليوم وبعد مارجع من الجيش بعد غياب اسبوعين
جنت انتظره على احر من الجمر
اكتفي بس انو يصعد للسطح ويباوعلي جنه نتكلم بلغة الاشاره من بعيد
مااجه بعد لمن نزل بيتنه غير مره ثانيه وبوقتها كلمته
دره... رائد الله يخليك اهلي اذا عرفو يرحون بيها لاتشوه صورتي بين اهلي
رائد... اشتاقلج دره يعني اريد اشوفج عن قرب
دره... اذا تحبني خليك بعيد صعبه منا الجيران يشوفوك تقبلها اتأذه اني واهلي
رائد... لعد شلون اشوفج شلون احجي وياج
دره... مادري بس لاتعبر لبيتنه
رائد... باوعلي بعتب... متثقين بيه
دره... لاااا مو هيج بس كتلك اني
رائد... بس اني ماسويتلج شي اني هواي اخاف عليج والله دره انتي روحي والله من اروح للجيش فد افكر بيج احس روحي صرت انسان غير من عرفتج
قبل جنت عصبي ومتعصب وي الجنود واحاسب على الصغيره والجبيره واعاقب بس من شغلتي تفكيري صرت لاااا ليل نهار افكر بيج ليل نهار بالي وحبج خلاني هادئ ومرتاح طول الوقت
دره... واني هم احبك وصرت انسانه غير وقت معرفتك حتى قبل جنت اضوج من روحي لان جنت معوقه بس انت الي زرعت بيه امل بهذه الحياة وخليتني احب الحياة من جديد
رائد... اني مااشوفج معاقه نهائياً دره كلشي بيج احبه حتى عوقج الي انتي تضوجين منه
دره انتي حب حياتي
دره... وانت هم رائد كلشي بالنسبه الي
رائد... اول ماشفتج هيج روحي طارت واجت عليج استقرت يمج
اني جانت امنيتي بنيه بمواصفاتج بهل العيون الحلوه والشعر الحلو والنزاكه شريد من الله بعد
دره... لاتخجلنييييي
راىد... اروح فدوه للخجلان اني
دره... رائد روح عاد الله يخليك لا يكعدون اهلي من النوم شكللهم
رائد... لاتخافين اعرف اخفيها لروحي بدقيقه شغلتنه بالجيش هاي
دره... هم تتعب بالجيش شلون تنامون شلون تاكلون
رائد... شحجيلج تعب بتعب واجبات وجنود يشلعون الگلب وحروب بس كلها تهون دوم ما اني ساكن هنا بقلبج وانتي بگلبي
دره... اخاف عليك حيل من تروح ابقه شكد اندعيلك واقرالك قرآن حتى رب العالمين يحفظك
رائد... هيج تخافين عليه
دره... اي هواي
باوعت يمنه يسره وتكلمت بقلق
الله يخليك رائد لايكعدون اهلي الساعه 3 ونص الفجر صارت
راىد... عيوني انتي ليش خايفه احنه وره البيت منو حيشوفنه وعود اذا سمعت صوت هاي اطب بتنور الطين
دره... الله عليك رائد خما تحجي عليه لااحد من اصدقاءك او الجيران
رائد... شنوو انتي تخبلتي شلون اجيبج بالطاري واحجي عنج متوقعتج هيج ظنج بيه اكون خسيس ونذل
دره... لا حشاك مااقصد
راىد... اقترب يمي ولزم الكرسي الي كاعده عليه وتكلم
انتي اجمل ماشافت عيني
وسري الي احتفظ بي
انتي وطني واني جندي الي لازم احارب واحميج انتي حبي الوحيد
دره... همست... كافي اخجل رائد
رائد... هسه اني حروح بس اريد منج شغله قبل مااروح
دره... شنو هي
رائد... اقبّلج
دره... شهكت وخليت ايدي على وجهي خجلا
هو وخر ايدي من وجهي بهدوء وتكلم
لان اخر مره وبعد مااجي عليج
دره... توعدني
رائد... رغم هالشي صعب عليه بس بما انو هالشي يريحج مااسوي وعد يادره اذا قبلتج هسه بعد مااجي
دره... بقيت اباوع عليه ماشفته الا طبع قبله على خدي واخذ ايدي قبلها وتكلم
رائد... ااااااالله جانت امنيتي
حبيبي دره هاي وعدتج وراح اروح بس قبل مااروح فوتي انتي لغرفتج خاف يحسون اهلج وبعدها اني اطلع
دره... هزيت براسي نعم ورحت فتت للغرفه وهو عبر من الحايط وطلع
ابتسمت من تذكرته بقيت كاعده بالطرمه وره ساعه تقريبا شفته صعد وصوفر حتى انتبه لكن لكاني انتظره لوحلي بيده من بعيد واني الابتسامه جانت واضحه جبيره بوجهي لوحتله بيدي بسرعه اشرلي بيده انو بمعنى شكد صار تنتظريني اشرتله اكثر من ساعه طبع قبله على ايده وشمرها بالهواء عليه التفتت يمنه يسره واخذتها
اشرلي بالليل حيدزلي رساله وبقيت انتظره لليل وره ما الكل نامت وهدأت الاصوات طلعت يم شجرة التين جنت انتضره
صعد للسطح شافني اشرلي جايچ
شويه وشمرها للرساله وصعد على الحايط
همست بتحذير روح روح لايشوفوووك
همس احبج اشتاقيتلججج حيييييل
ابتسمت وهو راح اخذت الرساله وفتت جوه فتحتها وبديت اقره...
حبيبتي الجميله يادُرتي المكنونه يأجمل مارأت عيني أشتاق إليكِ بشده الان وأنا في وسط هذه الحرب حيث أن النيران مشتعله لكنها ليست اكثر من نيران شوقي إليكِ
يامن علمتني مامعنى الحب وعلمتني معنى الاشتياق وعلمتني كيف اكون جنديا محارباً يقف بشموخ ليدافع عن بلدٍ انت فيه
احبك وقلبي ينزف دماً لشوقي لك
أنت في حفظ الله وفي قلبي
أحبك يازوجتي الجميله
حبيبك رائد
شفته كاتب رساله ثانيه..
حبيبتي فرحت هواي من لكيتج تنتظريني روحي طارت تدرين اني تصوبت بشضيه برجلي ولحد الان تأذيني بس كل تعبي ووجعي راح من لكيتج تنتظريني هواي احبج دره
ولكيت صورته مخليها بين الرسالتين بالجيس
باوعتها جان لابس بدلته العسكريه واكف مبتسم جان المنظر وراه صحراء مابيها شي
قبلت الصوره وضميتها جوه مخدتي واني فرحانه كلش كلش فرحانه
الحب شيء عظيم الحب يجعل الانسان يولد من جديد ويبتسم من كل قلبه يكون الانسان رفيقا لقلبه ويعتني بيه كما لو كان صغيراً فقط لان ضالته تسكن فيه.
اما عن عمي عبد الودود وعائلته
نعيمه صابتها جلطه وصارت بصعوبه تمشي او تتحرك ويعتنون بيها حليمه وجميله
هذيج السنين الي مرت عليهم وهم على خلاف دائم خلتهم يصيرون حبايب وحده تساعد الثانيه
اولادهم كبرو وصارو يساعدون ابوهم بالعيشه منهم من يشتغل وي ابويه بالعطاره ومنهم وي ابوه
بنات عمي تزوجو وصارو عدهم اولاد والتهو بحياتهم الاعتياديه
نعيمه... عمري كضيته مشلوعة قلب يعني راح ابقه هيج ماكدر امشي واتحرك مثل الناس
حليمه... خلي عينج بعين الله داده واندعي داىما متعرفين شوكت رب العالمين يفرجها عليج
جميله... مو بيديها الله يعينها
خيه نعيمه ابرينه ذمه احنه جنه على طول نتعارك وماكو صفه بيناتنه واني تزوجت رجلج لو ماالجهال وضغط عمي الله يرحمه مااتزوجه
نعيمه... مبريات الذمه اني مره بالنهايه وطبيعي انقهر ونقهرت بوكتها بس بعدين شفت روحي اني ماكدر اعيش عبد الودود مثل ميريد عيشه تهني وتخلي مرتاح
وبوكتها شفتكم انتو مامقصرات بشغل البيت الجهال حنى جهالي تعتنون بيهم شريد بعد
فعلا مثل ماامي كال سفينة الضراير مشت وسفينة نسوان الحمى بقت
ياقوت.. تحضرنه اني واختي ماس للمدرسه
زمرد اختي تركت المدرسه مثل دره وجواهر
وثرنه اني وماس نروح ونرجع يوميه اختي ماس تعرفت على صديقه وياها بالمدرسه رجعنه من المدرسه نتمشى
حلا... اني شايفتكم ترحون سوه بس اني على طول وحدي اروح وانتو على طريقي
ماس... والله ياحلا اول مره ادري بيج انتي بنفس منطقتنه
حلا... جنت اطلع من الباب الثانيه بيت جدي بيتهم ركن وبي بابتين
ماس... انتي اذا تردينه نروح ونجي سوه اطلعي من الباب الي على منطقتنه
حلا... اكيد
تمشينه وجانو ماس وحلا يتمشون ويحجون
ماجنت كلش مركزه وياهم تركيزي صار على بيت آسر صرنه نقترب منه
وجان أشوفه توه ينزل من الدراجه جان وره صديقه على الدراجه ذبه صديقه وراح وهو كان بملابس الشغل كلها دهن وزنجار مال حديد وسواد مال اللحيم وشايل بقبضة ايده وايرات لحيم تصير مثل الاعواد طويله شويه وكوسره مخليها على جتفه ولازمها بيده الثانيه النظارات مال اللحيم كانت على راسه بالعاده يلبسوها الحدادين
جان مامنتبه لجيتنه لحد ما صاحت حلا عليه وتفاجأت منين تعرفه
حلا... آسر
التفتت الها وعقد حاجبه من شافنه سويه فتح الباب برجله وشمر الكوسره وره الباب وايرات اللحيم ورجع باوعلنه
باوع لملابسه وضحك تخوصر وگف
آسر... شكو تصيحين عليه بالشارع ولج
حلا... دكلك لاتقفل الباب حتى اطب وياك
ماس... ركلتها بعكس ايدها... منين تعرفي
حلا... ردت بصوت مسموع.. ولج بيت جدي هذا وهذا آسر ابن عمي
آسر... ها ست ماس ريحتي فضولج هسه
ماس... وانت منين تعرف اسمي
آسر... اسمج واسم ياقوت اختج
ياقوت... مو عيب عليج حلا تكعدين تكليله اسمائنا
حلا... بسم الله الرحمن الرحيم شوكت لحكت احجيله
آسر... انتي بالذات يراد اطلع عقلج اللحمه بهذني وايرات اللحيم الي جنت شايلهن وارجعه لعقلج براسج الضاهر فاصل ميركززززززززز
ياقوت... رغم كلامه مفروض اضوج بس كوه كتمت ضحكتي جنت اعرف شيقصد واني مسويه نفسي مو فاهمه شي
امشي ماس امشي وانتي عيني حلا اذا تردينه نروح سوه مندك الباب انتي تنتظرينه هنا ا
حلا... بيش الساعه تطلعون
ماس... بالثمانيه الا ربع
ركلتها لياقوت بعكس ايدي وخزرتها وهو انتبه وابتسم
لاشيء يضاهي حبي لك
شكرا لزيارتكم عالم روايات سكيرهوم
