رواية بنات الملا الفصل التاسع عشر بقلم رغد الموالي
لااشيء يضاهي هذا الحب لاشيء!
ياقوت... اخذت ماس مشينه وصرنه نتهامس وحده تلوم الثانيه
منين طلعتيلنه بهذه حلااااا النوب
ماسس... وياي بالصف شبيج
ياقوت... وهسه عرفتيها ست
ماس... جانت بغير شعبه مااعرفها
ياقوت... وهذا ابن عمها منين عرف اسمنه
ماس... آسر يحوم حوالينه وتره منتبهه عليه كل مايشوفنه عينه متوكع من عليج ديربالج
ياقوت... سدي حلكج منين تجيبين هالكلام
ماس... ياقوت اني دااحذرج هذا بس يشوفج وحدج فد يوم مايتراجع اذا مايسويله سالفه وانتي سامعه عن عمه فهد وتاريخهم
ياقوت... ولو يدري بيج ابويه تماشين حلا شيسكته
ماس... لا فدوه الله يخليج لاتكليله حلا صديقتي المفضله حاليا واني وياها من الروح وحده لاتكلين لاابويه احنه شعلينه بمشاكل الكبار
ياقوت... والله ان حجيتي على آسر لعد وكتيله لااكله هي توصل اخبارنه لحلا وهذا ملاحكنه خلينه نروح ونجي تره ان عرف يبطلنه وهاي كعدتنه
ماس... لاتكليله ولااكله نسكت وخلص
دره... دوم افكر بي وبكلامه ورسائل الحب الي يدزها الي على طول
الابتسامه على طول بوجهي ودوم يسألوني على سر هذه الابتسامه واكذب انو تذكرت شي معين وضحكت صرت اتابع تلفزيون وافلام واكثر افلامي عن الحب
جنت اشوف فلم لفاتن حمامه و عمر الشريف وشلون كانت عيونهم تتكلم بالحب قبل السنتهم
فجأه ندكت الباب راحت اختي ياقوت تركض فتحتها للباب
... انتو بيت الملا
... اي تفضلي خاله
... دخلو نسوان تلاثه وقبل لايدخلون للاستقبال شافوني سلمو عليه وصارت وخده تباوع للثانيه دخلتهم ياقوت للاستقبال شويه وطلعت عليهم امي
... يااهلا وسهلا
... واهلا بيج عيوني الحقيقه اني ام جاسم وهذه اختي وهذه اخت زوجي
... تشرفنه...
... والله احنه داندورله لاابنه على عروسه وعرفنه عدكم بنات والله والنه الشرف اذا نناسبكم
... اشكركم
... شنو هاي الي على الكرسي هي الجبيره
... لا عدها الاكبر منها متزوجه وعدها اولاد
... وهم معاقين لو مابيهم شي فدوه لعينج
... من سمعت هالكلام احس خنجر ونضربت بي ودموعي مباشرة نزلت باوعت جانت زمرد يمي وباوعتلي بشفقه نقهرت عليه مباشرة حركت الكرسي ودخلت جوه
لغرفتي وقفلت عليه الباب
كعدت ابچي وي روحي ومقهوره شويه ودكتها للباب امي
بسعاد... دره..... دره
دره... كولي يوم
بسعاد... فتحي الباب يوم
نشفتها لدموعي وفتحت الباب
كولي يوم
بسعاد... لاتنقهرين من الي سمعتي ناس متستحي لو يعرفون العيب مايحجون هيج هو انتي شنو بيج حتى يكلون هيج
جهله عبالهم مرض هذا
دره... لا يوم الي مايعرف حقه يخاف لايطلع هالشي وراثه اني ماالومهم
بسعاد... يمه ماعليج منهم يروحولج فدوه
مسحت على راسي وقبلتني
لكن خاطري نكسر وحسيت بكسره بداخلي
للحضات ذكرتني بكل عجزي خصوصا بعد ماراحت جواهر وتزوجت
لما تزوجت جواهر صرت اشوف صعوبه مثلا دخول الحمام او اتنقل من الكرسي للسرير وبالعكس صرت اتولى مسؤوليات بعد. ما كانت جواهر تحمل هذه المسؤوليات
لما كنت طفله صغيره وبديت ادرك الحياة كنت كلما اشوف بنات صغار يلعبون ابقه افرفح مثل الطير اريد العب وياهم
شده ياورد شده من هي الورد شده
او يركضون يلعبون خدغميضه او على جبل العلو
لكن ماكنت اكدر العب وياهم
بالمدرسه كانو يتنمرون عليه البنات الصغار ومايلعبون وياي لكن اختي جواهر كانت هي الصديقه الاقرب الي
والي تهون عليه ووجعي وحزني
اول مابديت اكبر ماكدرت تكون عندي صديقه مقربه غير جواهر
جنت اتمنه اكدر امشي واكون صداقات
كنت اتحسس هواي واتجنب اكعد وافرض نفسي
احيانا كنت ادعي الله ان يأخذ روحي اهون عليه من هالعذاب
كنت اتسائل في نفسي ليش اجيت لهذه الحياة واني اعيش عمري كله معلوله
ابويه كان داىما يكول انو احنا نولدنه حتى نطيع رب العالمين ونعبده مو حتى نجزع ومانصبر
الصبر هو مفتاح لدخول ابن ادم للجنه
الصبر على البلاء الصبر على الفقر الصبر على المرض الصبر على اذية الناس
اذية الناس اما بكلام او بفعل
واليوم لازم اصبر على كلام هذه المرأءه
اول مااجه ابويه امي كلمته بلي صار وعرفت انو جيتهم حتى يخطبون اختي زمرد وابويه وكف على حيله ونقهر
عبد المجيب... وفوكاها بكل وقاحه يحجون هيج شلون تخليهم كاعدين على فراشج ويحجون على بنتج
بسعاد... ولازم اني اطردهم؟
ياعبد المجيب هذه مو اخلاقنا اني هم عرفت ارد عليها كتلها ماعدنا بنات للزوج
عبد المجيب... ودره عرفت بكلام السم هذا
بسعاد... للاسف سمعتهم
عبد المجيب... وينها صيحيلي دره زمرد
اجت زمرد صاحتلي ورحت
كول يابه
عبد المجيب... بويه ماعليج من كلام هالنسوان هذه هذوله ونستهم بالدنيه يجرحون الناس ويأذوها
دره... لا يابه مامقهوره
عبد المجيب ... اجه مسح على راسي وتكلم بهدوء... بويه انتي زينة البنات وان اليوم اجو على اختج باچر عليچ لاتضوجين
دره... وشنو الفرق بيني وبين اختي يابه سعادتي من سعادتها
عبد المجيب... عفيه بويه هيج اريدج وكلكم ارديكم هيج تكون وحده كلبها على الثاني
ياقوت... بيوم جانت امي تخبز فجأه السقيفه الي فوك التنور وكعت عليها وعلى صوت صرخت امي ركضنه عليها كلنه حتى دره خطيه وكعت من الكرسي
يمممممه..... يمممممه
امي جانت مخليه عكس ايدها على عينها ونترست تراب صرنه نشيل بغراض السقيفه ونبعد عن امي لحد ماكدرنه نسندها علينه حتى تمشي لما اجيت الزم ايدها صرخت ااااااخ ايدي ياقووووووووت
ياقوت... يمه شبيج
ام جواهر... ايدي حتركت ياقووووت
رفعت ردن الدشداشه اباوع جلد تمي كله محترك وذايب وحمره صايره ايدها
كلت بخوف عليها... يمه ايدج وخدج يمممممه
امي صارت تون من الوجع وزمرد وماس لازميها حد ماكعدوها بالطرمه شفت دره تباوع لاامي وتبجي وهي على بطنها رحليها حتى متساعدها على الزحف
بجيت لمنظر دره ومنا منظر امي سندتها لدره وكعدتها على الكرسي صارت تضرب على رجلها
موووووتتتتي موتي وخل يكطعوووووج لاتبقين شاله حالي
بسعاد... بوجع وانين يمه دره لاتحجين هيج
دره... روحي ياقوت بسرعه لمحل ابويه كليله على امي
ياقوت.... اي اي رايحه
لبست الربطه وطلعت امشي مستعجله وابچي وامسح بدموعي
وادعي ياربي ماتبقه تتوجع ياربي خفف عنها ألمها يارب
شافتني عمه شروق جانت مطلعه الصونده وتغسل بالباب
شبيج ياقوت
ياقوت... ها... لا عمه مصار شي بس
وترددت بين اكلها بين لا
ممجاوبه بالامتحان ورسبت
شروق... يلا لاتبجين عيني الي يشوفج شيكووول
عفتها ومشيت مالي خلكها واصلا رفضت اكلها اعرفها حتلم جيران المنطقه وتجي لاامي هسه وهي منا روحها لايبه
داامشي جان مااشوف الا آسر على الدراجه وراي دك هورن وصاح عليه
شبيج ياقووووت اوكفي
التفتت اله
آسر... جان يباوعلي بخوف... شبيج تبچين منو وياچ
ياقوت... محد
آسر... احد متحارش بيج احجييييييي
ياقوت... نزلت دمعتي وعفته اكمل مشيتي
نزل من دراجته وركض وراي لزمني من زندي ودارني اله مباشرة ضربته على ايده بتحذير وكلمته ايااااااااك تعيدها مره ثانيه
آسر... بس فهميني شبيج
ياقوت... امي احتركت وكعت عليها السقيفه مال التنور وايدها ووجها احتركت وهسه رايحه لاابويه اكله
آسر... روحي رجعي لبيتكم اني رايح لعمي عبود
بس
آسر... رووووحييييي
وصعد دراجته وبسرعه ساقها
رجعت للبيت
دره... ها وينه ابويه
ياقوت... آسر شافني ابچي وسألني وهو راح لاابويه
شويه واجه ابويه متلهف وخايف على امي
فاتح ذرعانه ثنينهن ويحجي وين امكم شبيها
شافها لاامي واجه يمها كعد شبيج ابويه انتي شنو الصار شلون وكعت السقيفه
ياقوت... يابه جانت تخبز ووكعت عليها
جيبيلها عباتها خل اخذها للدكتور على السريع
رحت بسرعه جبتلها عباتها وسندتها عليه وهو هم ابويه ساندها وتمشت كانت امي تون من الوجع روحها لايبه
مشينه طلعنه بره البيت شفت آسر كاعد على صخره ويخط بالكاع اول مااشافنه وكف ونفض ملابسه كال
ها عمي بيش اساعدكم سلامات عمه ام جواهر ماتشوفين شر
ابو جواهر... تسلم وليدي لاتتعب نفسك ويانه
آسر... لا عمي تعبكم راحه بس كول شمحتاج
ابو جواهر... والله مامحتاج شي هسه نوصل لراس الشارع ناخذ تكسي نوصل ام جواهر للمستشفى
آسر... ابقه بمكانك عمي هسه اجيبلك تكسي ليمك
صعد دراجته وراح جانت امي تلوب واني اصبر عليها وابويه يلوب وي وجعها شويه واجت التكسي وصعدنه مشت السياره لاحضت آسر ورانه بالدراجه وصلنه للمستشفى وبسرعه بده الطبيب يشوف حرگها ضمدها وكتب بالورقه كال هذا العلاج والابر لازم من بره مامتوفر هنا بسرعه مااعرف منين طلع آسر واخذ الورقه
باوع لاابويه... هسه اجيبه خليك يم عمتي
عبد المجيب... هذا منين طلع والله فززني
ياقوت... يمكن موجود بس احنه مانتبهنه
شويه واجه جايب العلاج نطاه للدكتور وضربها لاامي ابره
الدكتور... ضربتها مهدئ مال اوجاع هسه شويه ويخف الالم لاتقلقون
ابو جواهر... مشكور ورحم الله والديك
طلعنه من المستشفى
آسر... عمي تحتاجون شي
ابو جواهر... لا بويه ماقصرت والنعم منك وكفتك هاي ذكرتني بنشامة عمك شهاب الله يرحمه وانت طالع عليه خلقه واخلاق
آسر... بالبيت يصيحولي شهاب ههههه
مشكور عمي ابو حواهر اني اروح تأخرت على المحل
ابو جواهر... الله وياك
صعد على الدراجه والتفت صدك عمي
ابو جواهر... كول
آسر... السقيفه الي وكعت عليه اني اسويلكم وحده زينه وحديد ماتوكع
ابو جواهر... لا بويه مشكور ماتقصر
آسر... حك سلامة عمتي وباوعلي مبتسم ورد باوع لاابويه ام جواهر
ابو جواهر... وليدي رحم الله والديك اني اسويلها وحده غيرها
اسر... مااهتم للكلام وتكلم مع السلامه عمي ودك هورن وراح
صعدنه سياره ورجعنه للبيت
جانت امي حيل تعبانه
مددت وصرنه ننطيها علاج ومسكن ونهتم بيها ثاني يوم بطريقنه للدوام جانت تنتظرنه حلا
حلا... صارلي هواي انتضركم
الماس... بعد وكت
حلا... شسوي ابدل من وكت مااصدك اروح للمدرسه
الماس... اكو وحده تحب المدرسه؟
حلا... اي اني
الماس... ليش
حلا... باوعت وطالت النظر للحضات تكلمت بخنكه قليله لا هيج تنفست بعمق مرات نحب اشياء المقابل يعتبرنه مجانين او بينه شي
الماس... ليش هالكلام
حلا... الماس اني اتمنه لو كنت اختكم واعيش بيتكم
دائما تحجيلي عن اهلج حنية ابوچ عليچ امچ انتو البنات بيناتكم اما احنه ماعدنه هذه الحنيه والمحبه او الاجواء العائليه نادرا مانجتمع على محبه وضحك او سفره ولمة الاهل
ياقوت... عقدت حاجبي بااستغراب وسألتها كلامج بي هواي معاني حلا
حلا... اتمنه احجي افضفض بس
بس شنو
حلا... بس كون الكلام ميطلع
الماس... احجيلنه
حلا... كلام طويل وقربنه نوصل للمدرسه اتمنه نكعد بمكان غير المدرسه ونسولف
الماس... تعالي لبيتنه
حلا... ها متفاجأه وتكلكت بخوف نوعا ما لا لا مااكدر اجي لبيتكم
الماس... لا تخافين اني ادري اهلج ميخلوج بس كليلهم رايحه لبيت صديقتي زهره
حلا... لا خلينه بالمدرسه
اي بالمدرسه اسولفلج
براحتج
رحنه للمدرسه ولحسن الحظ كانت استاذة الماده ماموجوده فبقه الدرس شاغر
حلا... وكأنه اشاره حتى اسولفلج
الماس... اتصور ماعندج حجه
حلا... الجو بارد وحلو امشي نتمشه بالساحه واسولفلج
انتي تعرفين بيه عايشه ببيت جدي بيت جدي چبير وبي غرف هواي وكل عائله ماخذه غرفتين وتلاثه
صحيح كلنه عايشين ببيت واحد لكن هالبيت بي 4 مطابخ يعني ماكو لمه وعائله
مااعرف ليش الكل عايش سويه رغم كلنه احنه الابناء كبرنه بس ابويه قصص وروايات عراقية كرار صلاح يكول
وصية جدي نعمان
ابويه رحاب وامي ماكو تفاهم بينهم على طول مشاكل
اني البنيه الوحيده لااهلي وعندي 4 اخوان
لما فتحت عيني على الدنيا جانت العائله تمر بهذه المشاكل امي سنين لابسه اسود على عمامي
يعني ابويه جبرها هم حتى عمامي جبرو نسوانهم يبقون بالاسود
عمامي بيناتهم تعاون واحد گلبه على الثاني بس امي ونسوان عمي لا
جنت صغيره اشوف امي على طول مشاكل وي ابويه وابويه يضرب امي ضرب مؤذي
جان يضربها لحد ما احيانا تبقه مسلوبة القوى حتى ون من الوجع ماتكدر تون يمكن جانت تتخربط بس واعيه جنت طفله صغيره واخاف لما يضربها اختل وره سلة الملابس واباوع بعين وحده شلون امي تنضرب
رغم امي ماكانت امراءه صعبه
مثلا تتطلب او تعلي صوتها على ابويه او تسوي شغلات من وره ضهره او مهمله بالعكس كانت ولحد هسه نضيفه واطيب طبخ طبخها الخبز الي نخبزه ياالماس كل كرصه ياكبرها مشهوره امي بالخبز مالتها
امي رغم ماابويه كان قاسي وياها بس معافتنه وتخلت عنه جان مرات ابن عمي ينقهر عليها ويكلها تطلكي منه عوف اسر
دكله تريدني اعوفهم مثل ماعافتكم امكم وصفيتو جوه رحمة عمامكم وقساوتهم
الماس... يعني آسر كان يضربوه عمامج
حلا... هزت براسها اي
آسر اكثر واحد بولد عمي ذياب ولع كان فرط حركه وذكي ويشاغب احيانا بسبب فضوله
فيضربوه عمامي لما كان طفل وحتى اخوته هم يضربوهم اخوه الاكبر منه اسمه آزر
هذا شايل قساوه محد شايلها بعمامي
وبصراحه ماالومه
باوعتلي وكانت عيونها تشرح الخيبه والألم الي تعانيها
همست بحزن... ليش
امي سولفتلي عنه
آزر كان اكبر ولد عمي ذياب لما مات ابوه كان طفل صغير بس كان يعني يفتهم ويتذكر ابوه تماماً كان متعلق بأبوه لما مات وصفت امهم بولدها الخمسه اخذتهم وراحت لبيت اهلها تقضي العده وترجع لبيت رجلها
اخذتهم وراحت لكن مابيها اسبوع اهلها دزو ولدها كلهم وكالو ولعين ومانكدرلهم
وبقو الولد بيت جدي ويرحون ويجون على امهم بعد العده امهم مارجعت بقت ببيت اهلها جدي شعبان دزلها خبر ترجع مارجعت وره سنه تزوجت
لكن خلال الفتره الي كانو ولد تمي ببيت جدي وحدهم محد يسأل عليهم بس جدي لكن جدي جان بمصيبته
وره وفاة جدي الولد شويه كبرو وصارو اكثر ولعين جان عمي مُهاب يضرب آزر على طول ودائما يستنقص منه ويقلد عليه وهذاك جان يغضب ويرد عليه
آزر ماكان طفل عادي كان طفل شرس وذكي ويتصرف مثل الكبار لكن الاذيه الي كان يتعرضلها خلته من كبر يكون اقسى حتى من مهاب عمي
الماس... وشلون عرفتي قاسي
حلا... يقسى على اخوته كان اكبرهم وآسر هو الوسط من بعد آزر وأنس لكن آسر هو اكثر واحد مسالم بالبيت ومن بين اخوته تحديدا عصبي هواي بس عصبيته بحق على عكس اخوه ازر
الماس... ولمنو يضرب آزر
حلا... مره ضربني واسر دافعلي وتلاكو ثنينهم وراد واحد يقتل الثاني لو ما عمي مهاب تدخل بوقتها كان الاثنين مقتولين
بيتنه ياالماس مابي هدوء وطمئنينه
الماس... ليش ماامج تلح على ابوچ يطلعكم او انتو تلحون عليه
حلا... مايقبل كومه متوسلين بي مايقبل
الماس... زين ومنو يهتم ب آزر واخوته مثلا اكل شرب ملابس
حلا... يوميه على وحده من نسوان عمي
بس آزر يوميه ياكل من طبخ امي مايعجبه اي طبخ هو زين وي امي ويحبها وينطيها فلوس على طول رغم شكد ماينجرع وي البقيه
الماس... شعجب
حلا... يكللها انتي صرتيلنه ام امي هذيج حقيره ويغلط عليها ويحجي كلام مو حلوه بحقها لان تزوجت
يكره امه مايحبها
الماس... حقه لان يفتهم وواعي لمن عافتهم واعتقد هو هذا السبب الرئيسي الي خلاه هيج متمرد ويضرب ويكون قاسي
حلا... امي هم هيج دكول
ام حلا... اني اتعامل ويا مثل ابن اليه لهسبب آزر وياي غير آزر فقد ابوه من هو وطفل وفقد امه هم رغم بعدها عايشه بأيام بسيطه صارو هو واخوته لااام ولااب وعمامج جانو يضربوهم وبالذات هو
لهسبب تولدت عنده مثل العدوانيه بداخله بس هاي العدوانيه تتروض بكلمه دافيه تلم سنينه المتطشره
حلا... ليش اخوته مو مثله
ام حلا... هو جان الاكبر وهو حس بالمسؤوليه اكثر منهم كلهم
التفتت اليه وباوعتلي وابتسمت تدرين ياالماس شلون يلعب بالحديد رغم هو مو مال رياضه يعني هم شغلهم بالحديد وهو يشيل الشباك شكد ثكيل ويگلب بي بإيده والباب يشيلها ويحولها بسهوله عنده
حتى عنده عضلات من وره الحديد بارزات
بحيث الراشدي منه يفلشه للوجه رغم بوكتها من ضربني كانت اول مره وكان راشدي بس جان قوي وبچيت بوكتها حيل وآسر تخبل
حياتي صعبه ببيت جدي اي مكان للاستقرار ماكو
الماس... زين انتي البنيه الوحيده عدهم
حلا... لا عندي بنات عمي بس منهم متزوجات ومنهم صغار بس اني هيج عمر بنات عمي صغار وتزوجو الوحيده اني الي بهيج عمر ماتزوجت
ماس... ليش
حلا... مااريد اتزوج اكره الزواج بسبب ابويه واجوني وخطبوني بس امي جانت ترفض شكد ابويه قاسي وياها بس وكفت بوجهه علمودي كالتله ماازوجها واخليها ينداس براسها مثل مادايس براسي لو اموت على جثتي تتزوج حلا بهيج عمر
بس ابويه بوكتها عصب عليها وضربها
ابو حلا... تكسرين كلامييييييي بنت ال.... اني الرجال هنا لو انتييييي
ام حلا... مو تظلم لبنيه بهيج زواجه الله يخليك عوفهااااا
ابو حلا... لا مااعوفها وتتزوج حالها حال بنات عمها
مرت الايام وابويه كرمني لآزر
ابو حلا... آزر انت هم ابني وبينك وبين حلا ماكو فرق واني رايد انطيك بنتي حلا
آزر... متفاجأ... شلون عمي بس
ابو حلا... بس شنو
آزر... بس اخوي أنس هو رايد حلا اني مااريدها
ابو حلا... واني كرمتها الك تردها يعني
آزر... عمي كتلك اخوي انس عينها منها اني شلون اخذها
بهذه الاثناء اجه أنس.. وكلمه ابويه
صحيح هالكلام ياانس انت رايد بنتي
باوعلهم متفاجأ... اني؟
باوعله ابويه لآزر بعدم تصديق وآزر وكف متعصب وكلم انس ليش متفاجإ احجيييي مو انت ردت حلا
أنس... دنك وسكت للحضات بعدين تكلم لا عمي ماكو هالكلام هذا من آزر
آزر... تقدم بخطوات وجره من ياخته متعصب... تكذبني ولك
كام ابويه عليهم وجر آزر عن أنس وصرخ
اششششش متحترموني واكف يمكم
آزر... يكذبني لعد
أنس... تتهمني بشي مكايله لعد آزر
آزر... خليك رجال واحجي
أنس... بصوت متعصب... رجال غصبن عليك
ورادت تصير بينهم مشكله لو ماابوي تكلم
آزر اطلع بره
آزر... وليش اطلع
بصوت... كتلك اطلللللللللع
هز راسه متعصب وتحلف ب أنس اني الك
وطلع وطبك الباب بقوه
وانس مباشرة راح لغرفته وقفل عليه الباب
مر اليوم وجان ابويه متذمر حيل سمعتهم يحجون هو وعمي مهاب
ابو حلا... فشلني آزر اني اكرمه مره ويرفضها
مهاب... عوفه اني احجي ويا
ابو حلا ( رحاب)... ولااقبل ينعاد الموضوع بعد خلص هذول ولد ذياب شايلين كبرياء امهم واحدهم خشمه عالي مايطخ الكاع
مهاب... اسكتتتت يمعود تربات ايدينه هذول امهم شنو تجيب طاريها يمنه
ابو حلا... ضرب على رجله متحسف متوقعتها من آزر
مهاب... خليها يمي
لليل وآزر مارجع وقت حيل تأخر وعمامي مااهتمو بليلتها كالو رجال ماعليه شي
لكن رجع الفجر يضحك ويتمايل ولسوء حضه ابويه صار بوجهها
رحاب... وين جنت افندي
آزر... جنت يم الحنينااات ويضحك
رحاب... عقد حاجبه بغضب وكله احجي عدل كلب
آزر... ضحك بقهقها عاليه... بعدك ضايج على بنتك مو كتلك اخوي انس يحبها لبنتك يوميه بالختلات على السطوح يكعدون بالليل وانت نااااااااييييييييييييم روح تأكد من بنتك خاف تسويك جدوووو
فتح عينه بوسعتها وضربه راشدي وصرخ بي آزر انت تضربنيييييي عبالك اني هذاك الزعطوط الي تضرب بي ويخاف منـــــــــــــــك
رحاب... اليوم اكصه لهذا لسانك الي يجيب عرضي بالناقص ياناقص ثاري معرفت اربيييييييك اليوم اقتلك مثل ماقتلت عمتك واغسل عاري مثل مغسلت عاري قبببل انت وهاي الجلبه واخوووووووووووووك
طلعو عمامي يركضون رحاب عوفه رحااااب يحيموووووت
جان ابويه يخنك بآزر وآزر انتهى بين ايديه جان شارب ومامسيطر على روحه وكوه عمي مهاب وعمي إيثار وعمي إلياس وبقية عمامي كومو منه وابويه توجه راكض علينه جانو عمامي يستوقفوه لكن هو كان منهار
واني من خوفي كعدت أنس
وانس نهزم من السطوح واني ختلتني امي بتنور الطين
بقيت بتنور الطين خاتله وادعي وارحف خايفه حسيت رجليه ثلجت من الخوف
ياربي ياربي ساعدني هذا آزر حجه كلام مو صحيح واتهمني وي اخوه ياربي انت تدري ماسويت اي شي حرام ويغضبك
امي كل شويه تجي عليه وتلطم على خدها ولج شمصخمه ولللللج سودتي وجهييييي واني ارجف يمه والقرآن مامسويه شي هذا آزر
آزر يحجي بكيفه
مهاب عمي كال نقتلها اني هم شفتهم مره على السطح ومن سألتهم كالو عمي جنه نضم الدجاج ببيتهم الي حجاه ازر مو كذب
بوكتها ماشفت الا آسر فتح باب التنور وكال امشي حلا وياي
حلا... وين
آسر... ننهزم راح يذبحووووووچ
باوعتله وهو نضرات القلق بعيونه....
البيوت كالصندوق الثمين بأسراره وحان الوقت لفتح صندوق بيت النعمان...
شكرا لزيارتكم عالم روايات سكيرهوم
