رواية ساقي الود الفصل التاسع عشر بقلم هاله ال هاشم
أَبقى أَحِبك لو يشتلونَك گِزازة بِـ مَجرى دَمي
_____ ود ____
تايهة مابين عقلي و قلبي ، بصدري عواصف ما تهدأ ، و بيوم الي تمردت مشاعري و گالت كلمتها وكف عقلي حارس يحمل سيف النطق و المنطق ،
حبيتـه ، و أَعرف بحبـه ضيعت نفسي و شگد صرخ عقلي يذكرني الحب وهم ، اسمعه و خايفه يكون صوته هو الحقيقة
امرأة مليانة تناقضات مرة اريده مثل نبضة قلب ومرة ابعده عني مثل نصل سكين و اسحب نفسي للوراء ،
صـافن بوجهي منتظر مني تفسير ، و صافنـه بوجهه ادورلي خلاص منـه ، بينما چنت خايفة من ردة فعلـه و مرعوبة من فكرة ان يفهمني غلط اكو شيء بداخلي يگلي لا ، أَكثر انسان يعرف انتِ شنو هو غياث ،
غيـاث :: أحجي لا تخافين ،، اريد اسمع كل شي من البداية
من ساعة ما سألتي سمره عنه ، و ليش سألتيها ؟
- مسحت وجهي بظهر اديـه ، باوعتلـه واحاول اسيطر على رعشة شفافي :
مممن چنت بكربلاء ، شفته فوك بالحولي ، استغربت من گالي ديسوي واير الانترنت لان فاصل ، كتله النت مبي شي ردت ارجع لغرفتي ، قطع طريقي و گال ...
بچيت مگدرت أكمل ، لزم كتفي يحثني اواصل :
غياث :: احجي لا تخافين ،، شگال هذا الناقص
- گالي من يومـه مچنص ابن البدوية ، ووو رزلته والله ، دخلت لغرفتي بين الخايفة و الما متأكدة گلت خاف اتخيل ، نزلت لسمره اسألها اذا فعلاً چـان موجود و من شفتها استغربت رحت سألت زينب ، حتى اسألها اذا تريد ، والله ،، والله احجي صدك ..
صفن لوجهي ثواني ، لمحت شلون دموعـه تشكلت ، ميلت راسي اناجي عيونه بتوسل حتى يصدكني ، أقترب واخذني بحضنـه ، همس بصوت هادئ :
غيـاث :: اششش ،، عَليش ترجفين ؟ آنه ما سألتچ لأن شاك بيچ اعرف انتِ شنهو، سألتج حتى اعرفن شلون اربيـه ، بعد وجهي بمقدار قليل عنـه ، همس بأصرار :
غياث :: بسّج لا تبچين ، الا ادفعـه الثمن و روح جـابر ، گومي
اصعدي لغرفتچ و لا تهتمين لاي شي تسمعينـه
- غمضت عيوني بتعب بس نيران گلبي مشتعلة ، ترجيته بآخر ذرة تعقل عندي : الله يخليك وديني لاهلي ، ما اتحمل بعد اظل هنا راح اتخبل
نهض و صاح بأنفعال :
غياث :: رَدينـا لنفس السالفة ، شوكت ترضين بقسمتج عاد
- لطمت على وجهي بعنف منهارة و اصيح :
ما اتقّبل ،، ما اكدر ،، اكرهكم كلكم ، طلگني داكولك
نصـه لمستواية و قَيد ايدي بقوه ، يصرخ :
اطلگج يابه ،، بس اهدي راح تموتين
اهز راسي رافضـه اسمعه ، اعرف يچذب عليه و اعرف كل
مستحيل يعتقني بعد ، رفعني و همس :
غَياث :: بس گومي وياي لغرفتچ ، و اوعدج هالمرة احلّها من عرجها
-ما فهمت كلامـه ،، بس من التعب حَسيت محتاجة انام وما اشوف واحد بيهم
غياث :: بيچ حيل تصعدين يو اشيلچ
- اتركني آني اصعد ، مشيت بخطوات مُرهقـة فتحت الباب
و لكيتهن متجمهرات امام الباب انصدمت وجوهن و عيونهن تراقبنا بتساؤل ، يمكن چانن يتوقعن راح تصير معركة طاحنة ما بيني و بينـه ، باوعت لسمره بأسف ما گدرت ابرئ نيتها لمن نقلت سؤالي بهذه السرعـة لغياث ، معقولة تكلمت بشكل عفوي لو مؤامرة من مؤامرات البدوية ،
دخلت لغرفتي ارتميت على فراشي ، راسي مُثقل بالافكار
و جسمي مُرهق من ضربة غياث الاجت بصورة لا اراديـة
وجهي يحركني من الصفعات الي تلقيتها من احلام !
لَميت رجلي لصدري و نمت بهذهِ الوضعية ، دموع يتيمة تتساقط على مخدتي تروِ ندم عارم احسّـه بهذهِ اللحظة سياط الملامـه تجلدني و تگلي شسويتي بروحج ؟
امچ الي ما گدر ياخذ حقها ابوج التاجر اسلحـه و لا خالچ الحزبي المعروف و لا حتى القانون نصفها ، تردين انتِ تنصفيها ؟!
بشنـو تنصفيها ، بعقلچ المريـض لو بأيديج العاريـة ؟
انداريت و عيوني تعلّكت عالسقف ، فكرت بعد ما يفيد اللوم
حان وقت اتخاذ القرارات ، آني لازم اخلّص نفسي من هذا المأزق
بما ان الحرب وياهم ما حققتلي النصر ، صار واجب انسحب
واحافظ على الباقي من نفسي مو هذا جـان كلامـه اليه ؟
توني بديت اغفى وسمعت قرع خفيف على الباب ، و قبل لا اصيح ادخل اندارت يـده الباب و فاتت زينب ، اول ما شفتها
دَمعت ، درت وجهي للصفحة الثانيه احاجيها بعبرة :
- حبـابه روحي هسـه ما اريدچ تشوفيني و آني بهاي الحالة
تقربت وكعدت على طرف السرير ، مدت ايدها طبطبت على زندي و اجـه صوتها حزين بمواساة :
زينب :: شو تنوعيلي خل اشوفن وَجهج من عسى ايدها بالچسر كون
- بچيت وجسمي ظل يهتز ،
كلشي ميصير بيها ، آني الانكسر گلبي و تشوه وجهي
انداريت ، سندت روحي وكعدت بنصف كعده ، نشغت وايدها على حلكها :
زينب :: فلك طَرچ يَ حلّيمـه ، هاي شمسويـة بيچ ؟
وانتِ شمالچ هَيج فكاكة ، يو عاضتها يو مالشـه عطوبها
- بنص احزاني خلّتني اضحك
زينب :: ياااع شوف المسودنه ياربي ، بس حجي بيناتنا چتلني الخوف لمن شفت غياث دخل يتراجف وعيونه بكصته بس الحمدلله عرف انتِ ما بيج صوچ
- آني لـو عندي شي ما اروح اسأل سمره و اسألچ ، شگالوا جـوه شي
تنهدت و گالت :
زينب :: شيگولون خلهم يگولون المهم زلمتچ مصدگ بيج انتِ
- يعني شنو ، ان شاء الله اهله ما مصدگين و عبالهم هيثم المظلوم بالقصـة
زينب :: و داعتچ كلشي يعرفون ، بس اهلنا ما ينطون بولدهم خاطر حرمـة غ ....
- كملي ليش سكتي ، حرمة غريبة !
زينب :: لا تزعلين ،، احترك گلبهم عالزلمة عبن رجلّج ما خلى عظم صاحي بيه ، مساع خابرت هارون ماخذينه يجبرون ايديه انكسرت ويگول وَجهة غادي خريطة
-عساه بالموت طبـه مرض هو وكل متحرش على وجه الكرة الارضية
زينب :: ولچ لا تندعين عالولد ، هالوحَيد لهله
- شالفايده من هيج ولد جايبلهم العـار ، شنو نسيتي مشكلته ببغداد و ليش جابوه هنا و حتى من دوامـه بطلوه ؟
زينب :: ما علينه هسه ، غلط و اكل نصيبـه و آنه هم مساع جوه فهمت غياث كلشي
- ميهمني بعد ، خلّصت طاقتي ، اريد اغمض وافتح الكـه نفسي ببغداد ، اختنگت ، داحس بكتمة موطبيعية ، باوعي لايدي شلون دترجف ، شوفي وجهي شلون ذبل ، صرت اخاف من كل شيء، اخاف حتى هاي گعدتي وياچ هسه ضرب من الخيال ، دتفهميني ؟
امتدت ايديها و جرتني لحضنها ، تطبطب و تواسي
زينب :: ميخالف حبيبتي ،، تهون والله ما تظل هيچ ، انه راح انزل و انتِ ناميلچ سـاعة ارتاحي بيها و اي شي تحتاجينه رمشيلي !
هَزيت راسي بـأي ، ابتسمت وكامت طلعت ، حاولت استجلب النوم لعيني ماكو ، لحظات و دخل هو راساً انداريت للصفحة الثانيـة ، تقرب و شاركني السرير تمدد بصفي ، التقط جسمي
وحضني ، راودتني رغـبـه قويـة انه ابچي بحضنـه و بچيت
انداريت وضميت راسي بصدره ، اشهك بقوة وجان هادئ
مثل الليل ، شكد ما نبچي بي يحتوي ألمنا بصمت عميق
تكلم بصوت مخنوك :
غَياث :: يگولون كل شي مباح بـ الحُب و آنه استباحيت ارادتچ
اناني بعشگج لدرجـة مستعد اچتل و انچتل ولا تروحين مني
گليلي ما حبنك بلچن اهود و اكطع عرج حبچ الخضر بگلبي
- من گال هيچ رأسـاً شلت راسي وحطيت عيني بعينه ، اريد گلبي يطاوعني ، اريد أَتلّون و البس جلد غير جلدي حتى اكول غير الي احس بي بهذهِ اللحظـة و راح لساني بلا شعور مني
- احبك ،، احبك مثل المخبلة بس ما اريدك !
صرخت و دفنت وجهي بصدره ، قيدني حيل مثل الي يريد يشگ گلبه و يخبيني جوه .
غياث :: هلگد تحبيني يمثبورة ، جـا ليش شمالچ ماتريديني والله انه خوش زلمة و استاهل انحَب
- هدوء صوتـه دفو حضنـه ، عطر العود المنبعث من صدره سكنت كل حواسي بهذهِ اللحـظه ، اريد الهوسـه البراسي تنطيني هُدنه ، و ابقى عايشه بهالامان ولو ساعـة
بعدني عنـه بمقدار قليل و صار يباوع بتركيز لوجهي ، تعكدت ملامحـه بأنفعال :
غياث :: ليش خليتها تطكج هيج ، ليش ما دافعتي عن نفسج
يو لسانج ما يطلع بس يمي ؟
- انت گلتها لسانج ، خما اضربها بلساني ، بعمري ما تقاتلت ويه مرية بعدين شمدريني هاديلكم طنطل عليه ، تذكرت الموقف انعصر گلبي و استرسلت :
چـان المفروض تحاسبونها ،، مو خليتوها تفلت من العقاب
صفن على وجهي كاتم ضحكته ،
غياث :: شتردينا نسوي نطكها مثلاً ، ما عدنه زلمة يطكله حرمة
الحرمة هي التاخذ ثارها بأيدها
- دفعتـه بثنين ايدية بعصبية
وخر من يمي اريد انـام
غياث :: حگج عليه يابه ، بس انه حكرتها و راحت لاهلها وذاك الچلب بعد ما خلص حسابه يمي ، الا اخليه يحرم يشيل عينه لمره
درت وجهي للناحيـة الثانية ، صفنت عالشباك و مثل الواحد الي فصل على العالم و جته لحظة نَدم مُتأخرة آني شسويت بروحي آني وين و هاي الناس وين ، سهلة أُتهم بشرفي و سهل كلش انضرب و انهان على ايد مره بس لمجرد هي اقوى مني و مطلوب مني انسى و انزل عادي و امارس نشاطاتي كچنة الهم و لا چن قبل ساعات انسحلت و تطشرت كرامتي ، محسيت الا على صوتـه الاجـه بخشونه يسأل :
غياث :: بالچ يمي لو جاي احاجي روحي ؟
-التفتت و همست بعدم درايه : هاااه ؟
غياث :: لا گلش عگلچ لـكف !
- جاوبته بصوت مخذول :
اشكرك ،، هو فعلاً لـكف بس السبب مو مني من اهمالك
غياث :: آنـه اسف والله ما كصدت
- ممكن تطلع ، اريد ارتاح شويـه
غياث :: صـار يجرالج
طلع و من قهرتي حتى النومـة طلعت من عيني صارن عندي انفصام بالشخصية و سيطرت عليه رغبة مجنونه بأن اكوم اجلف روحي جلف ، رحت اخذت ملابس و دخلت سبحت سبحه زينة ، طلعت كل حركتي بالليفـة نشفت وطلعت نفسيتي اهدء بس سمعت هوسـة جايـة من جوه و اصوات كلها تحجي سوه ، الظاهر عدهم طلابة فكرة رفعت اكتافي بلا مبـالاة مشيت لغرفتي ، تعطرت و بدلت و سرحت شعري مثل العروس و بما انها ايـام شهرية گعدت اصبغ اظافري و كل شوية ارفع عيني لمراية الكنتور و اسب أَحلام عالاثار الخلّتها بوجهي ، بنت المسموطة چف ايدها شگده !
كعدت انفخ اظافيري حتى ينشفن ، و رنّت علية سعاد ، رفعت خط بنبرة ساخرة :
-هلا ،، عاش من سمع صوتج
سعاد :: شبي صوتج مجرح ، شنو جنتي تبچين ؟
-احم ،، لا الظاهر تغير مال جـو
سعاد:: عمومـًا اجيت ابشرج ،، عزيز صحى و صحتـة خير من الله ، كم يوم ويكتبله خروج
-صفنت ، و خلال ثواني مرّ گدامي شريط ذكرياتي وياه ، أنعصـر گلبي حتى ما گدرت اجـاوب
سـعاد :: وينج دادة ،، مو دا احجي وياج ؟
- وياج ،، الحمدلله على سلامتـه بس شلون راح يحل طلابتـه ويا بيت يعقوب ؟
سعاد :: ترى احنـا ما ساكتين كل هاي المُدة و خالج ما خلى جهـة ما اتواصل وياها ، عزيز حالياً ما مدان و بنظر الحكومة بطل قومي الي گدر يكشف عن خليه شكبرها و يتواجـه وياهم بوضح النهار
- و سالفة بنين الله يرحمها، شلون راح تحلّوها و ابوها رافض الديـة ؟
سعاد :: لا يظل ابالج ، سليم دا يتخشخش و ان شاء الله يوصلون لحل يرضي الطرفين
- سكتت افكر بنفسي
سعاد :: ها سكتي ،، سمعيني ود آني ربيتج على اديـه كل هالسنين و من صوتج اعرف شبيج ما بيج و اعرف هسـة انتِ تعبانة و ندمانة على الطريق المشيتي بي ، خليني اكولج بعدنا بالبداية عبري للنهر مادامـه ضيگ ، هاي البيئة ما توالمج
ولا تگدرين تتعايشين وياهم ، حتى لو جبرتي نفسج و قنعتيها ماراح تقاومين ، يجي وقت و توكعين واذا وكعتي محد يمد ايده و يشيلج !
- هـه تحجين و كأنه بيدي شيء اسويـه ، آني مغلوب على امري ، انجبرت ادفع ديـة جريمة ممسويتها
سعاد :: مو گالولج نتاني عزيز يـگعد و ذاك الوقت نبريچ لولا
- اي ،، و شتتخيلين عزيز يشهد لصالحي مو من مصلحته
سعاد :: طول عمرج متخيلته عدو ، ترى ماكو انسان يهتملج بهاي الدنيا بگد عزيز ، احنا خايفين من ردة فعله لو سألنه عنج
- اااي خل يسأل گولوله دفعت ثمن رعونيتك وغبائك !
سعاد:: انتِ بس ظلي ثابتـة على موقفج ، بلكي تفرج هالايـام
- يا موقف ما فهمت ؟
سعاد :: اقصـد مسألة اتمام زواجج
- ااااياج سعاد اييياج تحجين لاحد بهذا الموضوع ، لا تخليني اندم لان حجيتلج
سعاد :: شدعوة عيني المن احجي يعني ، ديله خل اروح هسـة بعد شويـة يجي سليم ياخذني نوديله عشا
- سديت المكالمة وياها ، عقلي ظل يجيب ويودي بكلامها ، على الرغم من دوافعها و الضغينه الي تحملها تجاه غياث واهله بس كلامها منطقي ، آني ما اكدر اقاوم هنا مهما حاولت ومهما احمل مشاعر تجاهه ، هاي المشاعر ما تسعف هذا الزواج و لا السلبيات المترتبـه عليه ، من هذه اللحظة قررت أَغير تفكيري
اكتم صوت قلبي و اوكف عند كل سبب يمنعني اكمل بهاي العلاقة !
انفتح باب الغُرفة و دَخل شايط اول ما عينـة نزلت للتلفون بأيدي ، صاح بطريقة يستجوبني :
غَياث :: أگيد طرشولج الخبر مو ؟
اتظاهرت بعدم الفهم :
- يا خبـر ؟ ما فهمتك
تقرب خطف التلفون مني بحركة مستفزة ، باوع لسجل المكالمات و ابتسم بشّر :
غيـاث :: مـثل ما توقعت !
- جريت التلفون من ايده ، صحت :
وصلت بيك تفتش بتلفوني
غيـاث :: عرفتي بي گعد مو ؟
-صفنت عليه ثواني ، عرفت سبب الهوسـه الجوه ، جاوبت ببرود : الظاهر انتم عرفتوا قبلي
غيـاث :: اسمعيني ود ، اي تواصل بينج وبين هذا الناقص ما اريد ، عندي حسـاب وياه لازم اصفيـه ابعدي عن هاي العايله
احسن لا يلوحج طشارهم
- هذول بيت بيت خالي لونسيت ؟
شلون يعني أبعد عنهم ؟
اقترب وعيونـه لَهبن :
غياث :: هذوله اعدائنا و النـه يمهم ثار ، ما اريد ينجاب طاريهم على لسانچ بعد
- لمن ثارك بعده يمهم ، أگدر اعرف موقعي هنا شنو من الاعراب ؟
غياث :: شني گصدج احجي بوضوح !
-جبتوني هنـا على اساس توكفون بحر الدم ، و تنسد صفحة الثار ، بس دا اشوف العكس بعدك تلاحق ثارك من عزيز
اذن بقائي هنـا ما منه فايده ، الدمار اللحق بيه و نفسيتي الي تحطمت و كرامتي الي استباحت مامنها فايدة ، لييش مبقيني هنـا ؟
غياث :: هاي مالها دخل بهاي ،، بعدين شدعوة هلگد تحرمصتي چي چبت طاري هذا النذل !
مغثوثة لان ابن خـالچ يوو أكو شي عندچ ما اعرفـنه !
- ضحكت بمرارة ،، اعرف عليمن يرمي ، همست :
رجعت تتكلم بنفس الطريقـة اول ما خَذتني و أَحسّ بنبرتك دتلمح لشيء شاغل تفكيرك ، احجي لا تَخلي الشك يفتك بخلايا عقلك !
خطف زندي بقسوة ، يتكلم من تحت اسنانـه:
غياث :: لچ آنه لو اشكن بيچ جـا لحظة وحدة ما خليتج على ذمتي ، بس گليلي تنكرين هوس هذا السافل بيچ ؟
باوعتله بعيون مصدومـة عرفته سامع حديثنا آني وسمره گلبي خفق بقوة ما خُفت على نفسي بگد خوفي على اختـه ، تساءلت مرعوبـة :
- چنت تتسمع علينا آني وسمره ؟!
غَياث :: التصنط مو من شيمة الرجال
- لعد شلون عرفت ؟
غياث :: سدي الموضوع ود ، لان گمت ماشوف
- اندار ديطلع ، صحت وراه : انتظر خليني افهمك !
مارد عليـه ، اختفى ببساطة هيج ، اندعيت يكون ما سامع كل
حديثنا ، خفت على سمرة ، اوف يا سمرة شگد حذرتها تبعد
چـان ما صار الي صار بينا ، ما نزلت الليلة جوه بلا كلشي
هم مغثوثين مني بسبب هيثم و هسه خبر عزيز عزز هاي الضغينة ،
رَمشت لزينب ردت افهم منها السـالفة ، جاوبتني بصوت مرتبك
زينب :: جنها سالفـة چايدة ، غياث شايط للسما
- فهميني شقرروا يسوون ؟
زينب :: والله شگلّج ، الظاهر مخلي ناس تراقب وضع عزيز
اول ما طرشوله الخبر انگلب وَجهه و صاح :
غياث :: هذا النذل صحى و اجـه وكت الحساب
مهران :: هدي يبوي خلينا انتفاهم ، السالفة ترى چايدة
و وراها كص رگاب
غياث :: هو آنه اريدن الدم يصير للرچـاب
- چانت تحجي و آني اتخيل المشهد و وضع غياث بهذا الخبر حقه ما اكدر الومـه ، صعب يتخطى الطريقة الي ماتت بيها بنته ، بيومها للصبح ما نمت من القلق و من بعد هالليلة مَرت الايـام بتوتر شديد ،المضيف لزم انذار ، و الولد ما شفناهم امـا احنا النساء واقفين على قدمٍ وساق داخل المطبخ من الصبح لليل ، و هذا الحال كلما تصير طلابـة بالديرة كيفما چـانت المشكلة تخصهم بشكل مباشر ، الي عرفتـه انه خالي سليم جايب ناس خيرة من غير عشائر ورجال اصحاب مناصب بالحكومة كوسيط لحل قضية عزيز بأقل الخسائر و بكعدة شبه سريـة .
لكن غَيـاث رافض اي طريقـة للصلح و التسوية و قرر يلجأ حتى للقانون لحل مسألته لكن الصدمة چان القانون ويـه عزيز بأعتباره عنصر فعال بالامن و كشف عن خلية كبيرة تتاجر بالمخدرات اما بالنسبة لبنين ما جانت اله نية صريحة بخطفها او مقتلها و حتى صاحب الخط ما شهد ضده و كال هي صعدت وياه برضاته و هاي مو اول مرة تصعد بسيارة عزيز بحكم معرفته المسبقة بغياث و العلاقـة الطيبة الي جمعته بيها
چـانت شهادة ابو الخط صادمة بالنسبة لغياث عرف ساعتها بأن ايد عزيز طويـلة و گدرت توصل لابو الخط وتعقد اتفاق وياه ، الله العالم شلون قنعوه يحجي هيج !
بيومها غياث گوم الدنيا وكعدها وراد يكتل ابو الخط بنص المضيف لولا تدخل عمه و ولد عمـه وطلعوه بره ، وهنا مالكـه احد غيري يطلع حركته بي ، اجـه للمطبخ سحلني گدام النسوان وصعدني فوك و اجـه كلامـه مثل السهم بداخل قلبي :
غياث :: اسمعي لچ ، آنه اعرف جـاي تتواصلين ويـه خالتج البربوك ، گليلي خوالج النغولـه شسووا ويه ابو الخط وقنعوه خاطر يغير كلامـه ؟
- من صدمتي حتى ما عرفت شلون اجـاوبه ردت اهدء من عصبيته : والله ما متواصلـة وياها هذهِ الفترة ، حالي من حال البقية داسمع منكم الي ديصير ، ليش جـاي تتهمني الي
غَيـاث :: لأن انتِ السبب بكلشي صـار ،جيتج و نيتج الكشرة بالانتقام لعبت بينـا فلك ، سلطتي واحد نغل ابن ابوه علينا
وبسبتكم خسرت بنتي
- رجعت تشوفني سبب بموت بنتك رغم اني انظلمت اكثر منها اذا هي ماتت موت الله ، انتم موتوني بالحياة ، كسرتوني وذليتوني لذنب مو ذنبي ، تريد تصفي حسابك براسي مابيها شي بس كون عادل وياي و ارجـع للقصـة من البدايـة منو الي هدم منو بالاول منوالقتل منو ؟
ولا مرة اهتميت من اكلك موتت امي نار مستعرة بگلبي ، بس تريد تحركنا كلنا بنار موت بنتك ، ليش تناقض نفسك بنفسك
عـصر وجهي بچف يده خلى سن يطك بسن :
غياث :: اسكتي لچ ،، ولا چلـمة اسمع منچ ، لچ چَتفتيني خليتني مثل بلاع الموس اريد احرك ابهاتهم بس لزموني من ايدي التوجعني ، شأرد اكولن صعد بنتي وياه خاطر يخطف المرة الصارت حرمتي ، لچ حتى اذا اريد احچي كل الحقيقة راح يكولون جيب شاهدك وياك شنطيهم ، اسلم مرتي شاهد تفتر بالمراكز
- باوعت بعيونـه بترجي يتركني ، حرر وَجهي من قبضته
حسيت خدي نَمل و لساني يريد ينطق ما يگدر ، وبالگوة استجمعت شجاعتي و نطقتها :
اذا هذا الشي يطفي النار الي بداخلك سَويه ، احسن ما تحرگنا كلنا!
غَياث :: كلشي ما اريدن منچ بعد ،، اختفي من وجهي هساع
طلعت من الغرفـة اصرخ بكتمة ، ألم فضيع مجاي احتمله وين اولي بنفسي ، انزل جوه شلون اجابـه نظرات الشماته
والشفقه ، عرفت لا بل أَيقنت طريقي وياه مو بس نهايته مسدودة ، طريقنا مليان عثرات و خطورة ، دخلت للحمام غسلت وجهي أكثر من مرة بماي بارد حتى ازيل آثار اصابيعـه على وجهي ، لكن عبث بقن اثاره على وجهي مثل وصمـة عار !
نزلت ، و بداخلي مشاعر كره و غضب جمـه اله و لاهله وحتى للديرة الي ما نصفتني لا من چنت صغيرة ولا هسـه
لاكتني بنهاية الدرج واكفـة تبتسم بتشفي وعيونها تلمع بأنتصار
البدويـة :: آنه گتلچ لا تگربين صوبنا راح تحتركين و اذا كضتج النار ، ماي الدنيـا كله ما يطفيچ
- عساچ تحتركين بناري ،، وخري عن طريقي لا ارتكب بيچ جريمة !
البدوية :: راح اعديها الچ عبنج طايشة و تهامشين منا ومنا
تدورين وره الچتال وانتِ لابده بحضنـه !
فگيت عيوني على وسعها ، شنو قصدچ صار مرتين تلمحين هيچ تلميحات ؟
ضحكت و لمعـة اسنانها استفزتني :
البدويـة :: فهمچ كفايـة يبت وداد !
دارت وجهها عني ، بخطوة سريـعة قطعت طريقها :
لا تذبين الحجاية و تنهزمين ، احجي شنو قصدج
امتدت ايدها ولامست صدري ، دفعتني بخفـه مخاطبة :
البدوية :: ميلي عن دربي لچ ، و تعلمي من عندج حاجة اطلبيها بأصىول ، يـو ما علّموج الاصول !
- عافتني ومشت ، بقيت متسّمرة بمكاني افكر بكلامها
ليش صار مرتين تعيدها ، شنو الرسـالة الي تريد توصلّها اليـه
نزل هو من فوك حتى ما باوع بخلقتي ، خليت و رجعت للغرفـة
اتصلت بكفاية اول ما فتحت خط عيطت بوجهها :
- تعالوا اخذوني يالماتخافون من الله راح انجن
كفاية :: اسم الله حَبوبه شمالچ هيج تحجين
- شمالنييي راااح اموت يعني شمالني ، شنو بعتوني الهم
و ما ادري مو من حقي ازعل مو من حقي ابتعد عن هذا الجو
اختنگت حمووت .
كفاية :: ترا ما ناسيتج و الحسين ورحت كطعتلج و سويتلچ حرز تاتشيلينه و بقوة الله بعدما تشوفين هاي المرة
-انفجرت بنوبـة ضحك على وضعي البائس
كفاية :: يا شمالچ تضحكين ؟
- اضحك على روحي يوم ظنيتكم أهل و تمسكت بيكم
كفاية :: يايمة شبيدي عليچ ، ما شفتي زلمتج شلون انكلب علينا يوم خذيتچ ، المرة ما تطلع عن شور زلمتها ، بعدين مو كلالج راح يوديچ لبغداد مدة تغيرين جـو ؟
- اااي و شلون وداني ، تونست ونسـة اشتهيتج وياي
كفاية :: شيسوي اذا يوميا طالعلـه فتگ جديدة ، بلچن تفض سالفة عزيزان على خير يكولون مرتب وضعـه لا خذوا منـه حگ ولا باطل !
- اااي و غياث حقد عليـه آني و حملني كافة الذنب
كفاية :: عوينة ابوي انتِ شلّج غرض ؟
- هه آني سچة درب سواني زماني ، حايط نصيص كلها تعبر من فوكاه
كفاية :: لخاطري تحملي و تعالي على نفسج بنيتي نسوانا كلشي حملن، امي الله يرحمها جابها ابوي من غير ديرة غاد من الغربيـة مسيچينة عاشت غريبة بوسط هالعالم حتى كلامها ما يشبه كلامهم ، بس طلعت معّدلة كسبت الصغير گبل الچبير
وحتى من ماتت نسوان و زلم تبچي عليها وجدج ما طول لحكها وره كم شهر .
- ولو أني ما عرف الربط بقصتي و قصة بيبيتي بس ادللي كفاية بعد ما ازعجكم ولا تسمعون شكواي لان لازم اصير معدلة ينجار عليه و اسكت بلكي من اموت تبچون عليه !
سديت الخط وحضرتها ، و مـاعرف ليش حضرتها هي مكسورة حالها من حالي بس ضعفها يدمرني و آني بهاللحظة محتاجة الي يقويني مو يكسر مجاذيفي ، اصبري ، تحملي صيري مثل نسوانا ، ليش مجبورة اتحمل ، مجبورة اصير نسخة مشوهة من غيري ؟
مرنّ يومين اضافيات هلكنا بيهن ، بين طبخ غدا و عشـا و موائد عملاقـة تنمد للناس الجايين ، أخيراً فضّت سالفة عزيز بأقل الخسائر ، طبعاً جانت الحلول العقلانية صادرة من الشيخ
و ماكو كلمة تجي بعد كلمة الشيخ حتى لو چان غَياث نفسه
دخل الشيخ للصالة الداخلية ودز حتى يشوفني على انفراد ، تفاجئت بطلبه ، لكن فضولي چان قاتل اعرف شيريد مني ، تركت كل شيء من ايدي و رحتلـه ، سلمت اول ما دَخلت و رد السلام بوجـه باسم ودود :
يعقوب :: عليكم السلام و رحمة الله و بركاته ، تعالي بنتي كعدي جدامي عندي حجي وياج
- ضرب قلبي بقوة ، مدري ليش من اوكف گدامه اتلبك من هيبته و وقاره ، همست و آني مدنكه راسي : تفضل شيخ
يعقوب :: يزيد فضلّج بنتي ، خليني اكلج من البداية ، طول الكعدة ما خليت احد يجيب طاريچ عبنج بنيتنا و عرضنا رغم هالشي كلفنا نتغاضى عن حكنا ببعض الامور خاطر لا تبينين بالصورة ،
ابن خـالچ حلف عالقرآن و گال ما جانت نيته سوء يوم خذه البنية و صح هذا ما يبري عملته السوده و غلطته الچبيرة بحكنا لچن هاي منيتها بعد و الرجال ابن دولـة وجاب ناس اجاويد طاحت علينا و حنا ما نرد الي يتعنى النـه من بعيد
و حتى لو اشتكينا عليه بالحكومـة ماراح يطلع بيدنا شي
عبن ماكوش دليل ملموس ضده و لا عنده عداوة ويانا و الفرخة موش اول نوبة تصعد وياه ، و ابوها چان يدري مع الاسف
- هو يحجي و آني غاصـة بدموعي ، العن نفسي و الساعة
الاجيت بيها و صرت سبب بموتتها ، مسحت دموعي بظهر كف ايدي ، بلعت غصتي و تكلمت بحرج شديد :
- شيخ آني ،، أأقصد من اجيت اول مرة ...
غمض عينه و قاطعني :
يعقوب :: لا تحجين ،، كلشي اعرف ، اعرفن شوكت اجيتي
و شلون دشيتي لعويلنا و اعرفن ليش هيج سويتي
و آنه فاهم النار الموچرة بگلبج لچن يابنتي الصار بأمج حنا كعايله مالنه صوچ بيه الصوچ صوچ ابوچ الماعرف يتصرف
- ما فهمت ؟!
يعقوب :: يكولون العين بالعين و السن بالسن و البادي اظلم
الغدرة اول هيل جت من ابوچ الماحوى صاحبـه وخويـه
بچيت وصحت :
- انتَ تكول ابوچ الغدر ، لعد ليش امي التحاسبت
يعقوب :: چـا هو منو الياكلها ، غير عزيز اهلـه ، الموت راحـة لسليمان بس چتلة امچ هاي جرح ما يطيب يظل مرافجـه لباجي عمره .
- ليش هلكد قسيتوا علينـا ، ليش ما شفقتوا بحالي ؟
يعقوب :: صارت غصباً علينا بعد لچنها انحلت بوكتها و كلمن خذه جزاته الظالم و المظلوم ، جـابر انظلم و لابد تطلع حوبته .
- ابچي و أَتعثر بغصاتي ، همست :
دزيت عليه حتى تنطيني درس بالعدالـة الالهية ؟
يعقوب :: لا يا بنيتي وَديت عليچ خاطر اكلج شي .
-باوعتلـه بفضول بلا ما انطق
يعقوب :: الزلمـه براچ بويـه و گال الفرخـه مالها ذنب بالصـار
- صُفنت ثواني ، معقولـة عزيز حجـه الحقيقة في حين چان يگدر ينكر حتى يخدم مصالحـه ، اتذكرت وعودهم الي ، اذن خلاصي سهل بعد ،، اغافل گلبي اليلهج بـأسمـه ، اغالط احساسي اليصرخ احَبـه و اتبع صوت المنطق :
أَنعصر گلبي و آني انطقها :
- و هسة اجـه الوقت حتى تنفذ وعدك اليـه وكل شيء يرجع لمكانـه ، لكن اجـه صوتـه خلفي هدم كل موازيني :
غَياث :: الله خلقچ اليـه ، چـم دوب افهمج ما ياخذچ مني غير الموت !
اندرايت شفت وجـه مـو وجهه ، عيون حمرة و ملامح مشدودة
صحت بجزع :
- مو بكفيككك !
توجـهلي بغضب عارم نسى حتى جـده ، شد ذراعي و جرني وراه
غيـاث :: امشي ويـاي اراويچ الموبكيفك شلون !
يعقوب :: غَياث اكف اگلك
- نتر ايدي بقوة و صاح :
غياث :: من رخصتك جدي ، من وانـه طفل ماشيتك و كل عمري اكلك تم ، و آخرها اليوم من ذبحتني ، هسع اسمحلي اكلك لاحد يتدخل بيني و بينها عسما احركها جدامكم
يعقوب :: ذبحتك ،، يا ابني لوما انتَ فاهم هاي الامور ما تنحل بالطگ و المچاتل ، انت الغالي الظليت من ريحـة جابر
غياث :: غَلّيتني و رَخَصت دم بنتي ياريتك چتلتني و خلصت
يعقوب :: بعدك بصوابك ،، لچن يجيلك يـوم تفهم انه ليش هيج عملت
غيـاث :: السموحـة منك جدي ،، كلش مختنك ما اكدر اظلن بعد
امشي ود ..
مشيت وياه ، و أَحس جاي اتشظى لـالف قطعة ، و كأن انعادت مأساة بنين اليوم
صعد و صعدني ويـاه ، كعد على طرف السرير بينما وكفت گدامـه مثل المُتهم :
شال راسـه يباوع بجمود :
غياث :: لازم تعرفين شغلة ،، حتى نقفل هذا الموضوع و ما نسولف بي بعد
- تفضل احجي شنو الي تريد تگوله ؟
غياث :: ما بينا و بين ابوچ أي اتفاق ، آنـه ما خذيتج حل مؤقت
انه خذينج زوجة لابد الدهر ، و ابوچ يدري و موافق
- فريت ايدي و ضحكت بأستهزاء
عـفواً ما فهمت ، ممكن توضح أكثر ؟
استقام و وكف بمواجهتي :
غياث :: يعني لا تتأملين بكعدة عزيز و شهادته راح يخلّصنچ من هذا الزواج ، زواجنـا مستمر و ماكو اي ظرف يبعدج عني
-بس بابا گال اتفق......
قاطعني بوضع سبابته على شفايفي
غياث :: مادري عن ابوچ شتفق وياچ ، زواجي منچ شيء مقدس مو لعب جهال يومين و نفترك !
-انفجرت بالضحك ، لدرجـة عيوني دِمعت
عگد حواجبـه مستغرب رَدة فعلي ، تساءل
غياث :: شمالچ تضحكين ،، حجيتلج نكتة ؟
هزيت راسي بـلا و اعقبت :
لا بس ،، توي أَكتشفت شيء
چتف ايديـه و هتف :
غياث :: اطربينـا بأكتشافج خنسمع .
- طلعت مو بس آني مريضة نفسياً ، أنتَ هم مريض
و اذا آني علّتي النرجسية انت علّتك الانانية و الهوس
أبتسم بمرارة و بخفوت گال :
غَياث :: اووو مهووس كلش ويا طووول خلگي وياج اطول من ليل شعرچ !
- طلع و بقيت واكفـة ، صافنـة بالفراغ عيوني تتنقل داير مداير الغرفة بهذه اللحظـة راودتني رغبة بالفضفضة ، اتصلت بسعاد
و اول ما رفعت السماعـة ، صحت :
- تعبانه سعادة !
سعاد :: اهدئي و احجيلي
-غدروني گلهم حتى كفاية الوثقت بيها و حسيتها العوض والاخت الچبيرة الما حظيت بيها
سعاد :: شنو الي صار غير افتهم ؟
- ماكو اتفاق ما بينهم وبين ابويه و جذب حتى لو برانّي عزيز اني باقية هنا و ما اتطلك
سعاد :: اااي مو هي هيته ، مرة و رجال ما انسجموا يتطلكون عادي خما انتهت البشريـة
- تحجين لمن يكون الزواج يكون طبيعي مو زواجي الاجـه حتى يس سالفة ابن اخوچ
سعاد :: قصدج سالفة ولد عمج التفاگه ، ابن اخوية حل سالفته بذراعـه و ما انتكل على حرمة تحل قضيته
- الظاهر نصيبي ابقى هنـا
سعادة :: نصيبچ !! لااا هذا مو نصيب هذا سجن ، لا والله السجن ارحم انتِ مدفونة بالحياة ، وين وده الاعرفها وين طموحاتج وين حُريتچ ؟!
- مـا ادري وين راحت ود ، يمكن صار الوقت الي اسمع كلامهم
اتغير و ارضى بالموجود .
سعاد :: و ليش تتغيرين حتى ترضين رجال ما يشوف غير نفسه ، تشبعين غريزته و تخلفيله درزن جهال ويصير ابو فلان
اسمعيني ود ، انتِ مو مزهرية و لا شجرة مغروسة بالارض الله انطاج عقل و انطاج رجلين ، تگدرين تمشين و تبدين بداية جديدة
- لامس كلبي رعب خفيف ، همست بتوجس:
قصدج أنهزم ، وين انهزم ، و الناس شيكولون ابويه و عمي ؟
سعاد :: اسم الله شلون أب و شلون عمـام چم سنة هجروج ولا سألوا عنج عايشه لو ميته ، آني دا انصحج فكري بكلامي
وشوفي مصيرج بعد عشر سنين ليكدام ترضين لنفسچ هاي العيشة تحت رحمة البدوية الي بأعتراف لسانها كسرت امچ ؟
- مادري سعاد الموضوع مرعب بعدين شلون اطلع منـا و عدمن اروح ؟
سعاد :: انتِ قرري و معليچ اني وياج و اعرف ناس ممكن تساعدج ، اطلعي من هاي البؤرة ود ، ترى دا اتكطع عليچ
بس ما بيدي شي ..
- شفايفي ارتعشن ، نطقتها برجيف :
غياث شلـون ،، هوسـه بيه يخوف معقولة ما يدورني الناس شتكول ؟
سعاد :: الناس تاخذلها يومين تحجي و تنسى بعدين كلمن حاير بدمـه و غياث مهووس بيج جي ما نطيتي نفسج
وعيونج اول مياخذ حاجته منچ يرميچ وباجر ياخذ 3 نسوان عليج فنّج تفكين حلكج ، تعلميني بيهم الزلمـه عدو لا تأمنيله
امچ امنت بأبوچ شستفادت ماتت و دمها ضاع هدر !
- ماعرف سعاد ،، خليني اروح هسه
سعاد :: روحي بس فكري بكلامي عدل ، ترى ميهمني شي بكد مصلحتج ، مشيتي ورا ابوج و عمتج باعوج برخص الثمن
- الله كريم سعادة ،، لازم اروح
راحت بس كلامها ظل يدور بعقلي مثل الشريط ينعاد كل ساعة لدرجـه حتى من نمت ظليت اكوبس بي ، مرة اشوف غياث شايل سچينة يريد يذبحني ، مرة اشوفـة متزوج و يباوعلي بخبث فَزيت اصرخ مرعوبـة گبل ايده لمتني لحضنه ، باوعتله بجفن نصف مفتوح و كل ظني اتخيل ، همست بوهن :
- هذا أنت لو خَيـال ؟
باس طرف أنفي و همس :
غَياث :: هذا آنه يا واقعي و حلمي الما حصليته و الخيال
ضميت چفوف ايديـه جوه حنچي و غَمضت بأطمئنان ، حسيت بأنامله تداعب رموشي ، يهمس بصوت خدران :
غَياث :: و أنتِ مثـل نهر الفرات ، عذبـة و وافرة بس بحسرة العطشان
ابتسمت وكل ظني صوتـه اجاني بالحلم ، نمت و لاحسيت بشي بعد.
***
دخلنـا بشهر ديسمبر ، الوقت چـان الظهر السما ملبدة بالغيوم
و الهوا بارد يحمل نسمة شتوية باردة ، الزلم كاعدة تنتظر الغدا
بالديوانية ، و احنا النسوان متجمهرين بالمطبخ موزعين المهام بيناتنا ، زينب تراقب جدرها و سمرة تكصكص الخبز للتشريب و بنيات مهران متعاونات على تلكيط الخضره گدام الصوبة النفطية اما اني واكفـة على السنك اغسل اماعين وعيوني شاردة للطارمـة الخارجية اشاهد الارضية شلون مبللة من مطرة الصبح و الاشجار تتمايل بغنج جوه الريح ، قطع شرودي صوت زينب :
زينب :: بسّج ولچ ايديچ كسبن جوه الماي ، نشفي و تعالي دفيهن عالصوبـة
- كملت ،، هسـة جايـه ..
توجهت للصوبة و صحتلها :
و انتِ هم تعالي ، هواي وكفتي بلا كلشي رجليج مورمـة
زينب :: سكتي و خليها اريد اجيبن و اخلص و توبه اذا سويتها نوبة اللخ
سمرة :: خل رجلج يكض روحـه بالاول و عود كولي ما اسويها
زينب :: چبي ولچ البنيات كاعدات لا تحجين هَيج كدامهن تفچين عيونهن
لوت شفايفها يمنى يسرى معاجبها ..
سمرة :: و انتِ عيني ست الحسن ما صار عندج شي؟
خزرتها ورَديت بخبث :
- اهتمي بشؤونج ، تقبلين اسألچ ليش لحد الان ما تزوجتي
و أنتِ اكبر مني ؟
عيونها تجادحت و تسلط لسانها عليه :
- وكحـة ، وين العباس وينزل عليچ ضرة تكسر خشمچ !
قاطعنا صوت خطوات مسرعـة بأتجاه المطبخ ، شلنا راسنه بذهول للشابة الدخلت مفرعـة ، تفحصتها بنظرة سريعـة
صغيرة ما تجاوز الـ18 سنـة و جميلة بشكل ، صاحت زينب بأستغراب :
زينب :: يا خية انتِ منو ؟
- وكفت تفرك بخاصرتها تحاول تلتقط انفاسها بصعوبة وكأنها جانت تركض بمضمار سباق طويل تكلمت بأنفاس لاهثـة :
- ويين شيخ يعگوب ،، آنه دخيلة ،، دخيلة عنده !
و آني خَليتهم و أجيت 🗡️🥀
شكرا لزيارتكم عالم روايات سكيرهوم
