رواية نعم أحببتك الفصل التاسع عشر بقلم انين الليل
بثينه
انا عبالي من شفت عمي عباس وشفت يوسف ابن عمي ابو الاياد وزين العابدين
وابوي ومحمد كلت احرجه واكيد ابوي من يشوفني شلون ابجي راح ينسى
كلام اياد عني من كله اريد انهزم ويه سعد وانا اعرف شگد ابوي يحبني ن
من تركنا الفندق وركبنا بالطياره الى ان وصلنه محمد البيت اهلي وانا
اخطط شنو اكول واشلون اتصرف واكيد من يشوفوني ويسمعوني راح
يطلبون منه يتركني ويطلكني
لكن انا ما حسبتها عدل نسيت بلحظه انو اياد ضابط بالشرطة ويوميه تمر علي أشكال وهيج تصرف ما يهزة بالعكس
يخلي يعند بالزايد وهذا الي صار ما انكر غلطت وغلطت هواي لمن استهزئت برجولته
انا ما انسى الي سوا بيه ولا بعد' مية سنه انا انضربت بكل جزء من جسمي كان وحش بمعنى الكلمه
لمن صرت ابين اديه شفت الأسد لمن ينقض على فريسته وشلون ينهش بلحمها
هـالي سوا وياي اياد مثل الي يسوي أسد من يكون جوعان ويصطاد فريسته ويتلذذ وهو ياكلها
بقيت بغرفة اياد مسجونه وانا ما اعرف شنو راح يسوي بيه
عدهم حمام واحد بالطابق الثاني برة لان الطابق الثاني كان تلث غرف وصاله وحمام
اياد يكعدني الصبح اروح للحمام وارجع يقفل علي الباب وينزل يتريك جوة وساعات اسمعه وهو صاعد اينكت ويضحك
خصوصا ويه رياض وصار يجيبلي كوب حليب وجاي وصمونه وانا اكل شويه وما احچي لو اباوع بوجهه
الغدا يجيبلي ماعون بي شويه تمن عبالك حاسبهن وعلي شويه مرك
والعشا صمونه وخياره وشويه جبن انا اكل شويه لأن اساسا ما أشتهي الاكل
بس اكل لان اخاف منه واخاف اذا ما اكلت ياخذه عذر ويموتني من الجوع
ابيت عمي محد صعد يشوفني لا ساهره ولا رغد ولا حتى عمي او امه عرفت هو ما نعهم عني
يوم ثاني بالليل إجه اياد وجابلي ماعون بي صمونه ويمها شويه بتيته وكوب جاي هو خلاهن وطلع غاب عشر
دقايق رجع لكاني ما كله الصمونه وشاربه الجاي وعايفه البتيته اخذ الماعون ورجع دخل للغرفه وغير ملابسه
وفتح التلفزيون وكام يدور بالقنوات ويكلب بالتلفزيون
بوكتها اتذكرت الي سويته بالفندق وانا اعلي بالتلفزيون خفت يجي
يحاسبني ويضربني انا غطيت راسي ودرت وجهي وسويت روحي نايمه
وفعلا ما ادري شلون نمت الصبح تقريبا الساعه ثمانيه شال اياد البطانيه من على وجهي انا حسيت بانفاسه قريبه مني
عبالي يريد يضربني خليت اديه على وجهي وتقوقعت من الخوف
اياد بقى يباوعلي وانا كلبي يدك حاجاني بنترة
::كومي فزي غسلي ولبسي علمود نروح للمحكمة
انا من سمعت كلامه بسرعه گعدت رحت للحمام وغسلت وجهي وبللت شعري واجيت امشط ما كدرت امشطه لان
اعظامي كلها توجعني لفيته لشعري بدون تمشيط
انطاني العبايه الاسلاميه ولبست جواريب وخليت عطر من عطوراته لان انا كل شي ما عندي
اتقرب عليه وهو يخوزر بيه ويبتسم باستهزاء ويباوعلي بغضب كلي
::هاي شنو اشوفج صار بيج حيل شنو عبالج اطلكج هههههه
لا يا حلوة راح نروح نصدق عقد السيد ياحضرة المحترمه حرم سيادة النقيب
حجاها بغضب ممزوج باستهزاء عبالك بس هو ضابط نزلت وانا مهزومة وكوه لازمه روحي ما ابجي باوست
ساهرة ورغد الي بس شافتني هلهلت ودنت الشال عليه وكلتلي //ياالله الزراك بدا يخف من وجهج
ابتسمت بوجهه ورحت سلمت على عمه كريمه ردت علي السلام من وره خشمها طبعا ام محمد كريمه حاولت
تستدرج زوجها وابنها محمد همه كلولها البنيه وكعت من الدرج وجا ماتت بس هي بقت شاكه
كريمه كالت بخبث //شنو هاي مو وكعه عبالك واحد لازمج واموتج من الكتل
بس لا اياد ضاربج وضامه علينه كليلي تره ما اقبل واكسر راسه
انا رغم الالم البيه حاولت استفزها كدام اياد =لا عمه وكعت واذا اياد يضربني على كلبي مثل العسل ما سامعه
ضرب الحبيب مثل اكل الزبيب
كريمه/:اه الله يهنيكم انا شريد غير اشوف ابني مرتاح
جاوبتها = عمه مرتاح كلش هذا ابنج واسالي بس هو سوده عليه لان متصاوب مبين علي التعب
اياد نهى النقاش ::ياالله خلي نروح اذا تبقن تحجن الباجر ما تخلصن وهاج (انطاني نظاره شمسيه )البسيها
(اتقرب شاورني )البسيها ام السان
كريمه /:اي البسيها ضمي الزراك هسه اليشوفج يكول باسطها رجلها
سمعتها وانا القهر كتلني اناواياد طلعنا وركبنا ورة ومحمد يسوق ورياض كاعدبصفه يسولفون ويضحكون وهذا
رياض بس يحشش
انا واياد بقينا ساكتين انا اباوع من الجامه واياد يباوعلي أحسه بعد گلبه ما شفه مني
وبسرعه كملو الإجراءات لان لبس قيافته وعقدنا واجينا
من وصلنه تلكتنا رغد تهلهل وساهره تشمر جكليت لاگاني عمي باسني براسي وانا بست ايده كلي
الله يرضى عليج يابنتي (وشاورني )ولو زعلان عليج لان من حچيتي على ابني كانما حچيتي عليه
باوعتله وحضنته وكتله = اسفه عموسامحني
رحت على عمه كريمه بستها كالت /؛الله يسعدكم طيبي على مود نسويلج حفله شنو اياد وحد لاخطوبه ولا عرس
محمد اتدخل وكلها /:يوم هو اياد استعجل على بو ناهي ومصوب واريد احد يداريني
كريمه لازم تخليلها بصمه /:يا اياد عبالي فقير جا ماخذها البثينه مره لو ممرضه
اياد ::يووم كل شي مره وممرضه وحبيبه
كريمه /:على كيفك ناقص بس تكول وام صدك ابو المثل من كال
محمد يتشاقى /:اي شكال حجية كريمه
باوعت لمحمد وكالت /؛خاب انجب انت اتعس منه
رياض /:بروح ابوج شكال ابو المثل
كريمه /:كال الام صاحت ياعلي والمسعده كالت خلي الي
رياض /:والله صدك جناين هالوكت ما ينحزرن يبوكن الزلم يكلج حتى بالجنسيه يخلن اسمهن ويه اسمه
قطع شقى رياض اتصلو على اياد وراح حجى بغرفة امه وطلع بعدني ما صاعده كال اياد
::ياا جماعه باجر ان شالله أسافر للبصرة عندي شغل واحتمال اتأخر
..باوع علي وكلي ::حضري نفسج ترحين وياي
..محمد /خليها بمنا
..اياد::وين اخليها اكلك يجوز اتأخر
..محمد /وين تسكنون
..اياد ::لا يظل بالك ادبر حالي
،كريمه /:شلون رجل خضره عليها نقلو للبصره
،اياد::يووم مو نقل ماموريه وارجع
،،كريمه /:عود دير بالك
،رجع محمد وكله /:ياخي خليها يمنا اخاف اهناك تبات منو يبقى يمها بعدين انت مو مجاز
،اياد:: محمد انا موظف يمته ما يطلبوني غصبن عليه اقطع اجازتي
محمد// مي خالف خليها يمنا
باوعلي وگال :: لا تروح وياي
محمد سكت لان يعرف اياد إذا أصر على شي يسوي صعدت وجابلي غدا ابد ما حجى وياي ولا كلمه
بالليل انا كمت رتبت الغرفه كان اكو كلنكس اخذت كم وحده ومسحت الكوميدي والمرايه
بالليل إجه اياد جابلي عشا مسووين شوربه وكباب عروك
شربت شويه لأن احس تدفيني وبعدين غسلت ونمت
تدرون انا هاي تلث تيام ما سبحت لان ما عندي ملابس نمت كعدت الصبح شفت اياد طلع من الحمام مشط وبعدين
توضا وصلى الحلو الي بي رغم خباله وعصبيته انو ابد ما نسه صلاته من هو يصلي كمت فتحت كنتوره وطلعت
برمودا وتشيرت نص من ملابسه
ودخلت سبحت ومن لبستهن وطلعت شافني اياد ضحك
بصوت عالي وكلي ::هههههه طالعه عبالك شارلي شابلن عوزج بسطال فرده وفرده وعصا
باوعت الروحي بالمرايه صدك اضحك مشطت بالكوة لان راسي لحد هسه بي اثار ضرب ومن كثر ما ملشني كام
ما يتمشط نزل اياد وصعد ورة شويه كان شايل بايده دشداشه كلي
.البسيها ولبسي عباتج الاسلاميه واتحجبي عدل راد يطلع دار وجهه علي
=لاتنسين الجواريب واستعجلي ورانا سفر
نزلت لكيتهم جوه انا سلمت ع البنات ورحت بست ايد عمي وبسته بخده ما اعرف ليش نزلت دموعي
وباوست عمتي كريمه هي حضنتني هاي أول مرة تحضني يمكن كسرت خاطرها
كريمه //الله وياكم ديرو بالكم على روحكم
هي حجت ويه ابنها بنبره بيها شي من المرح //بت وفيقه خبلتك كبل الزواج وهسه خذتك مني
......رجع اياد على امه كام يتشاقه وياها ::افه عليج كرمه هيج ازغيربنظرج لو الف مثلها ما يأخذني منج
عمه كريمه شعرت بنشوة الانتصار وعيونها كلها شماته وانااباوع الها واحجي ويه روحي
= خايبه دخذي علواه تفكيني منه علوا تخلينه يمج وبعد ما اشوف وجهه نمونه متعجبه بي مسودن يشبهج
بعده الساني طويل عفيه مووتكلون الاياد😁😁😁😁
سلمت عه البنات وراحت ساهره جابت جنطة السفر مالت اياد نفس الجنطه الزغيرة
واشوفها حطت جناط اثنين كباربالسياره
على الساعة بالعشره الصبح حركت السيارة اياد يسوق وانا كاعده يمه ما ادري شنو منتظرني
وره تقريبا ساعه وشويه نزلنه بمطعم لان هو تعب من الجرح الي بجتفه وبطنه كان مبين علي التعب اشوفه من
يسوق مبين علي متالم راح يغسل ورجع وطلب غده بدون ما يسألني هو ما راح لابس القيافه العسكريه
لا راح لابس بنطلون كابوي وتشيرت بيجي
اكلنه وشربنا جاي واحنه ساكتين طلعنه بالسيارة انا أول مرة أسافر للبصرة
رايحه للكوت الاقاربنه بس ما واصله للبصره سمعت اياد اتصل كله ،
،
::ساعه بمشيئة الله ونوصل بس انت حضرلي المكان وجهزة لان زوجتي وياي
ما ادري ليش ارتاحيت من سمعت كلمة زوجتي يمكن حسستني بالأمان
واياد بعد ما يضربني لكن احنا صار ساعه من طلعنه من بيت اهله وهو يكول ساعه ونوصل انا اتوجست اكو شي
دخلنه محافظة واسط مشينا شويه بالسياره ونزل ع الترابي انا اباوع
عرفت اياد ما ماخذني للبصره
///////////////////////:////////::://:::////////////////////://////////////
اياد
قررت اعاقب بثينه وما اسامحها لان الي سوته شي لا يغتفر
كان ممكن مجرد ما اخذتها ابيت اهلها اتركها وما اطلكها ممكن
ثاني يوم اطلكها لكن اشوف بعيون ابوي رجاء انو اسامحها مو لان هي بت اخو بس اكيد الخاطر عمي حسين
من اخذتها البيت اهلي قفلت عليها وصرت اخذ الها اكل قليل ردتها بس تحجي او تكلي ما اتحمل حتى اضربها لان
احس بنفسي انسان محبط لكن هي رغم كل الي سويته ساكته وبالمقابل ما اعتذرت
وانا اسمع من امي يوميه حجايه
،ليس ماتنزل
،ليش امها وخالاتها ما اجن
،انت ليش ماتروح البيت عمك انت وابوك
صرت ما ارد على امي الي هي دووم تسال بابوي ومحمد شنو صاير وقررت اطلع انا وبثينه بحجة عندي ماموريه
هو بالحقيقه عندي ماموريه لكن انا بسبب اصابتي انطوني اجازه وهذا الشي ما خلاني اكل الاهلي سوى انو
اعندي ماموريه ولازم اداوم الوحيد الي خليته يعرف بعدين اخوي محمد كتله رايح انا وبثينه نغير جو ونحاول نبدي
من جديد هو فرح واتمنالي الخير
چان عندي صديق من اهل واسط اسمه تحسين عنده ارض زراعيه يزرع بيها حنطه وشعير وخضروات
بحسب الموسم
مره عزمني ورحت ويا شفت من بعيد بيت طين لكن بصراحه حلو وبي كهرباء واتعرفت ع الفلاح الي كان من
اقارب الولد واتمشينا بالبستان وشفت غرفه زغيره بعيده عن البيت بوقتها سالته شنو هاي
الفلاح كلي هاي بايام السجي (السقي ) خصوصا بالشتا من اشغل الماطور اكعد بيها
هم احرس وهم اتدفى
بعد الي سوته بثينه وياي فكرت انطيها درس جديد وخابرته كتله محتاج الغرفه الزغيره حسبت شهر
تحسين //المن اياد
كتله :: الصراحه انت صاحبي واكيد تضم السر زوجتي اتعدت بالكلام عليه واهلي طلبوا اطلكها وما اريد المشكله
تكبر قررت ابتعد عن اهلي على ما تهدا الامور واجيبها وادبها حتى تعرف غلطها بدون محد يعرف
تحسين //مي خالف جيبها للبيت وانا اخلي ابو شاكر يفضيلك البيت اقلها بي كهرباء وثلاجه
لكن انا ما وافقت وكتله خليني براحتي وفعلا وافق او وصى الفلاح
طلعنا من بغداد بعد ما سلمنا والطريق كله ساكتين ونزلنه اتغدينا قبل لا نوصل وبعدين استانفنا السفره ونزلت ع
الترابي الى ان وصلت المزرعة تحسين وكفت السياره يم غرفه طين وكتلها انزلي
نزلت وهي متفاجئه وتباوع وكوه تبلع ريكها من الخوف وبعيونها اسئله انا جاوبتها وبابتسامه
::مثل ما تعرفين كل اثنين متزوجين والله مقدرهم يسوون شهرعسل وبما انو انا الله مقدرني واوكلج بس فلافل
ارتايت افاجئج بشهر عسل راح تبقين تتذكرينه طول عمرج
فتحت باب الغرفه وكتلها بنبره ما تخلو من الاستهزاء:: اتفضلي يا مليكتي
دخلنا وانا اشوف الذهول معتريها وهي تباوع للكاع عرفت تحسين جايب حصير ودواشك اثنين جددوجراجف
انا كعدت وصرت ادخن بعدبن رحت للسياره رجعت وانا شايل
الجنطه الزغيره فتحتها وطلعت دشداشه بيضه وسروال طويل لبستهن
وحجيت وياها ::عباتج ذبيها وابقي بالدشداشه
هي نزعت العبايه وكعدت على الدوشك الثاني حجيت وياها
::اذا تردين تطلعين عادي بس ديري بالج من الجلاب تره ياكلن خصوصا الغريب يملخنه
شفت الخوف مسيطر عليها اخذت السويج والموبايل وطلعت غبت اكثر من ساعه ورجعت وانا شايل ترمز ماي
وطشت شفتها متمدده على صفحتها خليتهن ورجعت للسياره ونزلت سطل ورجعت جبت كارتون
هي بقت متمدده اتقربت عليها ولكزتها برجلي من يم جتفها وحاجيتها بنتر
:: مره ثانيه من اجي وتبقين هيج متمدده اخلي بيج عاهه طول العمرافتهمتي من اجي تكعدين (ابتسمت وكتلها )
وياالله اكعدي شوفي شنو جبتلج
هي كعدت واعرف بيها ما مستوعبه الي اسوي قربت السطل وطلعت منه قوري وجدر زغير وفتحت الجدر طلعت
كوبين وصحون اثنين مال اكل وخواشيك وطاوه وسجينه وطاسه والكارتون بي جاي وشكر وبطل زيت وصابونه وجلافه كتلها ردت استفزها
::هذني دبري حالج بيهن على ما انزل للولايه اجيب غراض
+
ما جاوبتني وسكتنا ورحت صبيت بالكلاص ماي من الترمز وشربت باوعت الها وحجيت
:: كومي خلي الغراض على صفحه
هي راحت رجعت الاغراض واندك الباب فتحته وشفت ابو شاكر جاي
علينا من طلعت شفته وسلمت علي لكن هالمره جاي وجايب ويا صينيه بيها اكل
كتله:: شنو هالزحمه ابو شاكر والله تغدينا بالطريق
،ماكو كل زحمه تعذرنا ع القصور
::تسلم يابه بس يمكن نحتاج ام شاكر شويه تعلمنا المره
ابو شاكر //تامر امر يمته ما تريدها بس رمش
::مشكور اتفضل
،لا والله سبقتك هذا غداكم واعذرونا واي شي تحتاجونه انا يمكم وبرسم الخدمه
:: رحم الله والديك ياطيب
انطيتها الصينيه ورحت ويه ابو شاكر غبت ربع ساعه ورجعت
كعدت وقربت الصينبه شلت الخبزات الي مغطيات المواعين وبستهن وخليتهن على كصتي وشفت ماعون بي
دجاجه شوي وطماطه وخياروطاسه بيها روبه حاجيتها لان شفتها تباوع
::تعالي اكلي لان الي يزود نشمره للحيوان اهنا ماكو ثلاجه وينظم بيها الاكل الزايد
اتقربت واكلت شويه وانا بقيت اكل واخزر بيها من كملت كتلها
::روحي سويلي جاي اخذي ماي من الترمز
سالتني = وين الطباخ
انا ضحكت حيل ::هههههههه ترديلج طباخ اي موجود وره الغرفه تعالي بس قبلها جيبي الباقي خلي ننطي للچلب
حتى يتعود علينه ويغزر بي الاكل ما ينسى مو مثل البني ادم بس يدور وجهه ينطعن
عرفت الكلام عليها ما ردت انطتني بقايا الاكل وذبيته للجلب ومشيت
كدامها الوره الغرفه وكفت شفت بلوكتين وفوكهن حديده مشبجه كتلها باستهزاء
::هذا الطباخ وهسه سويلي جاي زين مو تحركينه
جاوبتني وهي متفاجئه = اني ما اعرف افتح هيچ طباخ
::ههههههه طباخ اي مي خالف روحي جيبي حطب وانا اعلمج شلون تفتحينه
هي تعجبت من كلامي ردت عليه بتحدي وصوت عالي
=ششنو هاي انوبه اجيب حطب
انا ابرود جاوبتها ::اي عادي صيتي وطلعي صوتج محد يسمعج
(خزرتها ونترت عليها ) اي عيني جيبي حطب واشعلي نار وخدري جاي
هي صارت تستعطفني = اياد انت تعرفني انا ما اعرف اشعل نار واجمع حطب ومنين اجمع !
اتقربت منها وكتلها ::من تحجين وياي لا تجيبين اسمي
لزمتها من ايدها وهي ساكته ومشينا شويه وحاجيتها
::باعي بالكاع مليانه حطب (وشلت عود ضعيف وكسرته)
::جمعي من الكاع وجيبي واشعلي بسرعه يصير جمر وتكدرين كل شي تطبخين علي
هي بتعجب = بهذا العود يحترك منين يصير جمر
رديت عليها باستهزاء
::هههههه ليش عود واحد (زمخت عليها )جمعي حطب بسرعه وخدري جاي بعود تريد تسوي جمر
تركتها ورجعت للغرفه اباوع الها من الرازونه (فتحه صغيره على شكل دائره ) واشوفها تجمع حطب مره عود
ضعيف مره خشبه
مشت شويه لكت غصن جابتهن وهي ما تعرف شلون اتشيلهن بحيث ايدها تزلغت لان كل شويه تخليهن وتظل
تمسح على ايدها وترجع تشيلهن خلتهن بالموقد ودخلت للغرفه انا اتمددت وخليت ايدي على نهاية وجهي
اتقربت مني وكالت
= انا خليت الحطب اشلون اشعله
طلعت الجداحه بصفي ::هاج (شمرتها وججيت) اخذي عود يابس رفيع واشعلي وخلي ع الحطب ودنكي
انفخي حيل على ما يصير نار
اخذت كلاصين ماي من الترمز وصبتهن بالقوري وخلت جاي ابسط
القوري وخلته فوك الحديده وشفتها من شعلت العود وطفى وشعلته
وطفى بعدين دنكت وشعلت الحطب بجداحه هو اشتعل لكن بقى دخان
هي كعدت ودنكت وصارت تنفخ والدخان يجي على عيونها لمن ما
اشتعلت النار واجت وانا اشوف شلون عيونها تدمع طلعت الكوب
واخذت ماي من الترمز وخلت شكر وطلعت سمعت صرختها ركضت
لكيتها لازمه ايدها وتبجي اجيت يمها :: شبيج شكو شصار كليلي شبيج
هي بس تبجي بقت تبجي ولازمه ايدها اجيت يمها واخذت اشوف ايدها طلعت حاركه اصابعها باليده مال القوري
اخذت ايدها وضليت انفخ عليها وخليت الها
ثلجه تبرد عليها وكتلها وانا اضحك ::شنو ما تعرفين تشيلين القوري بردانج
شلته وصبيت الي جاي وهي بقت تفرك بعيونها وانا باوعت الايدها كتلها
::كافي تبجين ما بيها شي جويه بسيطه ياالله صبيلج جاي واشربي
اشرت ع الثلجه الي بالكوب گتلها ::خلي ايدج بيها
صبتلها كوب وانا اخذت كوبي وطلعت اشرب الجاي بره الغرفه جانت الدنيا عصر بقيت ادخن واجر نفس قوي
وانا اباوع للزرع شلون اخضر اجتني بوجهه كلام هزيتلها راسي يعني شتردين هي مدنكه = اريد اروح للحمام
مشيت گدامها وصلنه يم غرفه زغيره مسوينها على شكل حمام هي باوعتلي انا رديت عليها كتلها باستهزاء
:: العفو بس الغربي بعد ما كملو العمال
مشيت قبلها دخلت بالغرفه وانا بقيت بره صار المغرب واتوضيت وصليت كملت صلاتي وركبت سيارتي ورحت
للمنطقه القريبه جبت صمون واتسوكت فواكه وبيض وجبن واكيد ما نسيت ابو شاكر
رجعت لكيتها بنفس مكانها گاعده ع الدوشك مبين عليها الخوف لكن تكابر
خليت المسواك وكتلها :: رايح شويه يم الفلاح انتي خلي العشا
وركبت السياره ونزلت المسواك الابو شاكر الي كلي //عمي سوينالكم عشا ع القاسمه الله
جاوبته ::بالعافيه سبقناكم
ابو شاكر //زين بالعافيه شنو هذا الجايبه قابل بدل
::لا والله انا اتسوكت واشتهيتلكم الفاكهه لاتنسى احنا اهل وبيناتنا خبز وملح
ابو شاكر //اي والله اهل ومشكور الله يكثر خيرك
وراح جاب جكاية لبن بارد انا اخذتها ورجعت لكيتها خاله الاكل بالصينيه وكاعده اتقربت وبديت اكل وهي سوتلها لفه وصارت تاكل بعدين اخذت تفاحه واكلتها انا من كملت اخذت البقى وانطيته للجلب
بقيت واكف اجه عليه ابو شاكر وجاب قوري جاي واستكانين وابنه جاب بساط ومخاد اثنين وسلم عليه وفرشهن وكعدنا
انا وابو شاكر بره نشرب جاي وندخن ونسولف الى ان صارت الساعه قريبه لل 12
استاذن ابو شاكر وانا كتله اذا ما يحتاج الفراش يخلي يمي
هو كلي اخذه بالعافيه
اعرف بثينه الهسه ما نايمه لان هي خايفه من المكان تقريبا الساعه بالثنتين
دخلت للغرفه ونمت على فراشي البعيد عنها وكعدت الصبح الساعه ثمانيه اتقربت يمها شفتها نايمه هزيتها بايدي
هي فتحت عيونها مرعوبه حاجيتها ::اكعدي سوي ريوك شنو هم ننتظر بيت الفلاح يجيبولنه اكل ياالله كومي
خدري جاي وسوي بيض
كامت على حيلها شطفت القوري وخلت بي ماي وجاي وراحت انا طلعت اخذت ماي بالجك وغسلت وجهي اشوفهه
راحت وتدنك تشيل حطب زغار وتجمع بايدها وكل ما تجمع شويه تمسح ايدها بالدشداشه وصلت للموقد وانا انطيتها
الجداحه ودخلت للغرفه هي جابتها الي وعيونها تدمع ما اعرف تبجي ما اعرف من الدخان اخذت الطاوه وخلت
بيها زيت واخذت تلث بيضات نص ساعه جابت الريوك وطلعت الخبز مال البارحه من العلاكه
كعدنا نتريك وانا اباوع الها شلون اخذت لفه خبز وبيض وصبتلها كوب جاي وصارت على صفحه تاكل
من كملت الريوك دخنت جكاره وكتلها ::شيلي الصينيه وروحي جمعي حطب للغدا جمعي هواي مو كل شويه
تجيبيلج هلكد يادوب يخدرن الجاي وبعدين اخذي السطل وجيبي ماي من النهر حتى تستعملينه للغسل والطبخ
هي باوعتلي متفاجئه = بس اني ما اعرف اجيب مي
:: تتعلمين شنو كيميا قابل جايبلج هايشه وكايلج احلبيها لو مسرحج بغنم روحي جمعي حطب وارجعي نكلي ماي
واغسلي ملابسي
انا رحت للسياره فتحت الجنطه طلعت علاكه ورجعت لكيتها تنكت بالفراش
شمرت عليها العلاكه ::هاج ذني جبتهن الج
هي فتحت العلاكه وطلعت بجامه نسائيه وجواريب ثخينه وطلعت شي سالتني شنو ذني
جاوبتها باستهزاء ::اكيد مو اكل هذني يامحفوظة السلامه بجامه تلبسينها جوه دشداشتج وجواريب تلبسينهن برجليج
وترفعيهن فوك البجامه وهاي يسمونها قندره جوبلس
هي تباوعلي مستفهمه ::اي قندره جوبلس تحميج من العظم والحمض والعاكول من تسحكين عليهن يعني ما تخليهن
يدخلن الرجليج لاتنسين اهنا تراب مو تبليط هاي ارض زراعيه
جاوبتني وهي ترجف =لو اموت ما البسها
براحتج لا تلبسيها بسءاذا اجيتي ورجليج يخرن دم مو تبقين تتبجبجين ياالله شوفي شغلج يالنادره
هي جاوبتني بكسره خاطر = انت ليش هيج ات...
رفعت ايدي بوجهه ما خليتها تكمل :: يمكن نسيتي شنو كتلج لا تفكين حلكج واتذكري شنو الي سويته بيج قبل خمس
تيام واتتي ابيت اهلج كان ممكن اكتلج خلاص لكن وكفت عيون عمي الي هو ابوج ما يستاهل الواحد يكسره يكفي بته ام الشرف والعفاف اسمعيني ولج اهنا ادفنج ومحد يدري بيج اصلا محد يطالب بيج وهسه بلالغوه سوي الي كتلج علي
وطلعت وانا اتعمد ابتعد حتى اراقبها واشوفها شلون تشيل الحطب وتودي يم الموقد وترجع تجمع شويه
وبعدين شفتها اخذت السطل وراحت للنهر بقت واكفه ما تعرف شلون تنزل تجيب الماي بسبب وجود الحشائش
ظلت تمشي وهي تحاول تنزل للنهر وفعلا لكت مكان نزلت جابت منه الماي بعد جهد جهيد
بقيت اللحد الظهر مره اشوفها تجي للنهر مره تروح للغرفه
رجعت يمها لكيتها غاسله ملابسي ومحتاره وين تشرهن اباوع الها واضحك وانا اشوفها تجيب ماي وتسبح بالطشت
وترجع تتدمر طين صدك كسرت خاطري تقريبا اسبوع وهي تشتغل وساكته تخاف مني باوعت الها وهي بالليل تبدل
بالدشداشه الثانيه من اطلع من الحجره
شفتها كلت خلي اخوفها لان بصراحه ردتها تجي يمي يمكن اشتاقيت الها هي متمدده خابرت شاكر
::اكلك ابو ثامر ليشءالجلاب تعوي
ها ذيب يمكم يجي ع الغنم خو ما يجي ع البشر
لا ما اخاف راح ابقى كاعد وهذا سلاحي يمي
هي تسمع اتمددت وسمعت عوي الجلاب وما احس اله هي بحضني انا سويت روحي نايم وهي ضمت راسها
بصدري ردت احضنها لكن اتذكرت الي سوته والكلام الي حجته بحقي
ظليت اخذ نفس وهي ملتهيه بخوفها لمن ما هدئت حاجيتها وانا متفاجئ
::هاي شنو شجابج اهنا كومي على فراشج ريحتج دخان خنكتني
هي حست بالفشله كامت كعدت بطرف الدوشك وصارت تبجي وانا بقيت متمدد وجه الصبح ياالله رجعت لفراشها
نامت وظليت يوم اجيب دجاجه بس ذابحها تعاي نظفيها
يوم اكلها اشوي سمج بعد ان تنظفينه
اكثر شي تضوج منه نكل الماي وانا اشوفها شلون صارت سمره بفعل الدخان واديها متزلغه بقينه 13 يوم العصر راحت
تجيب ماي للغسل اجت جايبه سطل الماي وهي واكعه بالطين من فوك ليجوه وتبجي
منظرها يقهر وصلت يمي وكالت
=بعد ما اتحمل تريد تكتلني تموتني تدفني بكيفك انا غلطت بحقكواستاهل الموت وانت ما قصرت واعدتني كتلي اخليج
تتمنين الموت وما تلكينه وهسه انا اكلك موتني الله يخليك انا ما اتحمل وذاك اليوم لمن خفت من الذيب وانت طردتني
ردت اكتل نفسي بالمسدس بس ما كدرت
رديت عليها وانا اخزر بيها ::ليشءما كدرتي
جاوبتني وهي تشهك =النفس السبب الي انت ما قتلتتي ما كدرت اموت نفسي
::قصدج ابوج
هي صارت تشهك من البچي = اي ابوي
::لعد ما فكرتي من ردتي تنهزمين شنو يصير
=كتلك غلطت
::انا طالع انتي غسلي من الطين وبدلي
ركبت بالسياره وطلعت رحت شفت اهلي وبعدين مريت على بيت عمي
الي فرحوا من شافوني وبتفس الوقت فشلانين يسالوني على بتهم
انا كلت العمي :عمؤ بثينه زينه لا يظل بالكم
عمي //لا ما يظل بالنه اعرف يمك وانت تخاف عليها
::تسلم عمي لذلك انا هسه راجع واريد اكلك بعد ما اكدر انزل لان عندي شغل يجوز اتاخر ياالله انزل
عمي كلي /:دير بالك على نفسك
عرفت يريد يوصيني على بثينه ::لا توصي حريص وبثينه بعيوني
انقهرت حييل وانا اشوف خيبة الامل بوجه عمي والدموع بعيون مرته
رجعت والطريق كله وانا افكر بكلامها ودموعها وصلت تقريبا الساعه 11 ونص بقيت بره وفرشت البساط
واتوسدت المخاد وانا اعرف بثينه بدون عشا وحتى انا ما اشتهي بقيت اتكلب مانمت وانا اتذكر كلامها وبجيها
واتذكر ندمها لكن ما اكدر انسى الي سوته بيه وما اكدر اترك شكي بعلاقتها بسعد
طر الفجر وانا كاعد كمت على حيلي واخذت ماي من السياره واتوضيت وصليت ورحت فتحت الباب ما اعرف
اذا نايمه او لا كعدتها بايدي باوعتلي كلت الها ::اكعدي احجي وياج
هي كعدت سالتها ::من يمته عندج علاقه ويه سغد
هي استغربت سؤالي باوعت الها ::جاوبي من يمته
هي بتعب غالب علي النعاس = ما عندي علاقه ويا
::وكلامج ويا بالتلفون مو ردتي تنهزمين
ردت عليه وهي مدنكه= من اجت اخته ثاني يوم اجتني للكليه واخذت رقمي اتفاجات هو حجى وياي
:: هاا وبهاي اليومين كونتي علاقه
=لا لا انا ما اعرفه صدكني بس من دافغ عني صرت اشوفه من اطلع من الكليه
:: لعد ليش ردتي تنهزمين ويا
هي تبجي = ما اعرف لان من حاجاني كان هادئ لو من كلي راح اسفرج الاي دوله تعجبج انا ما اعرف يمكن انجذبت
الكلامه
جريت حسره ::يعني ما بيناتكم علاقه
= انت تعرفني خصوصا قبل لا يخطبون انت جنت متصاوب والناس ماليه البيت واحنا ملتهين بيك
::يعني ما تعرفينه من قبل
=منين اعرفه مو انت اتاكدت هو الشخص الي اتضارب ويه الي رادوا يخطفوني بيش احلف الك ما عندي علاقه
مجرد است..,,
وقطعت كلامها انا وكفت كتلها ::كومي البسي عباتج وحجابج وخلي نروح بسرعه لا تتاخرين
شكرا لزيارتكم عالم روايات سكيرهوم
