رواية بيوت الصفيح الفصل العشرون 20 بقلم زهراء السراي

الكرامة مو شي نتفاهم علي

ولا شي تتفاوض على وجوده او عدمه

وجودة بحياتنا  هي شي مفروض الوجود

هي قرار نعيشه

لأن اللي يرضى ينهان مرة راح يتعود تتبعثر كرامته كل مرة

ليلة رأس السنة بفرحتنا بصبى

وخبر الخطوبة المحتمل قمر جانت

فرحانة بيومها ومستعجلة حتى

ترجع للبيت وره منزلنا بالكوفي بأنتظار

صِبى وأسد يشترون ملابس للحفلة

گعدت اني وسومة بالكوفي بالطابق الثاني

غِنى و أيمن قررو

يفترون شوية ويرجعون طلبنا شي دافي

وگعدنا نشرب اتصلت بقمر

وردت بسرعة

-بس تجين اطيح حظج

-عررررفتوو مووووو

-لج الكلبة تدرين ومحجيتيلي

-والله خالو أسد و صِبى حلفوني

رادو يفاجئوكم 

-تفاجئنا والله

-الله عليج مفرحانة اني خفت تزعلين منها

-طايرة من الفرح والله انتِ متعرفين صِبى 

شتعنيلي صِبى مو بس اختي

صِبى امي اللي تعبت وربتني ويه خالتي 

ياما قصرت على نفسها حتى تدللني ومتحسسني

بنقص شلون ازعل عليها وانكد فرحتها

-هسة انتو وين

-بكوفي بالكرادة

-كذاااابة

-والله وانتِ وين

-هم بالكرادة خالو وفقار طلعوني

راااااح اجيج 

تحجي وياهم اسمع صوتها

-خالووووو وديني لمُنى

-گوووومي

سمعت صوته بعد فترة طويلة

انطيتها اسم الكوفي وسدت التلفون

ربع ساعة واتصلت

-وينننج

-بالطابق الثاني 

سدت التلفون دقيقة وصارت گبالي

تتلفت اشرتلها اجتني ماشية

بسرعة

-سنة سعييييدة

جاي ارد عليها وصار گبالي لابس كوت

أسود وبلوز رگبة رصاصي فاتح ولفاف

ماروني غامق وگعت عينه بعيني

باوعتله من غير أهتمام

قمر سلمت على سومة وهو تقدم سلم

-السلام عليكم

ردت سومة واشرتله

-تفضل تفضل

گعد بالجانب الثاني مني وقمر بالنص 

باوعلي وهو يسترق النظرات

-تطلبون شي

-لا خالة طلبنا متقصر

-بنات طلبن اللي تردنه

قمر فزت بعد مگرصتها

-ببس اني اريد خالو

-و مُنى 

-متريد

-شنو سمعتيها عبر ترددات الصوت بالهواء

مسمعتها ردت

جليت صوتي ورديت

-شكرا مااريد

باوعلي معاجبه الكلام ضجت

من نظراته استأذنت

-قمورة هسه اجيج

گمت للحمام اغسل أو بالأحرى حتى ابعد

نفسي عنه

غسلت وطلعت الحمام على جهة ودرج للطابق

الثالث

لگيته واگف منتظر صار بطريقي

-دقيقة نحجي

-مابينا اي كلام

-لازم تفهمين الوضع شلونه وشگد

صعب

-فهمت والحمد لله تداركت غلطي

وحافظت على مشاعري من فهمت

وعرفت اني راح ابقى بنظرك مُنى

بنت البيئة التعبانة الفقيرة الزعطوطة

الغير مهذبة گالتها امي مرة

گالت تحذري من التعامل ويه

الناس بطبيعتج لأن مو الكل راح

يفهم طبعج وانت للأسف قريتني غلط

-قبل لتاكليني بلسانج افتهمي

انطيتج مجال شهرين حتى تهدين

-غلطان اذا ظنيت ان الوقت راح

ينسيني كلامك

-ليش تجبريني اشيلج واخليج تسمعيني

غصب

-سديت باب مُنى المراااهقة ومابقى

غير مُنى اللي نضجت بمرور الوقت والناس

هيج كلام ماعاد يزلزل كياني البريء عن اذنك

مشيت تاركته ورايه ورجعت يمهم

بس اجع ورايه اخذ قمر وطلع واني

وسومة اجونه غِنى وأيمن طلعنا

الأجواء تجنن ومباقي غير نص

ساعة على السنة الجديدة صِبى

وية أسد بعدهم ممخلصين واتفق

وية ايمن هو يرجعها للبيت

تمشينا بين الناس بعد ماايمن اشترالنا

ذرة حارة ندفي نفسنا تركنا ورجع بيده

نفاخات اثنين على شكل بابا نويل

وياهن العاب نارية صغيرة

باوعلي وخلاهن بيدي

-سنة سعيدة ياحلوة

هالحركة دفت گلبي وعرفت منها

شنو معنى ان تنشئين ببيت بي اخو

حنون

شكرته و گفنا بحديقة هووواي ناس

جاية تحتفل بيها واخيراً بدأ العد

التنازلي للسنة الجديدة بدت الناس

تصرخ بصوت عالي

٩

٨

٧

٦

٥

٤

٣

٢

١

كلها صاحت سنة سعيدة قفزت بفرح

وأيمن يعلگلي الألعاب النارية بجداحته

واطلق نفاخاتي ويا امنياتي بالسماء

رجعنا بعدها للبيت اني يم سومة 

گعدت اعزل وياها البيت 

و غِنى وأيمن ببيتنا گاعدين يتابعون

الاحتفالات صِبى بعدها مراجعة ويه

أسد 

خلصت شغل وگعدت ارتب ستوريات حتى

أنزلها أجتني رسالة بطلبات أنستجرام

فتحتهة صورة واني اطير النفاخات

والثانية واني العب بالالعاب النارية

ووياهن مكتوبة رسالة

-راح أبقى أحبج

من بعيد مو لأن ما أگدر أقترب

بس لأن نظرة عيونج المخذولة بسبب

كلامي خلتني اخليلج مسافة أمان الى أن

تعرفين ان اللي گلته بوقتها جان لمصلحتج

والى أن تسامحيني 

مراح أقترب ويصير صوتي وجع لگلبج

فأفضل أبقى ظل يمر بذاكرتج كل يوم

يحجي وياج بلا صوت ويحضنج بلا لمس 

كل عام وأنت بخير بطة

طلعت من الرسائل بلا ماارد ولا احذفهن

ولا احظره تركت الرسائل معلقة بلا قراءة

تبين يمه بس سحبت الصور

ونزلتهن ستوري واني اخفي وجهي

وكتبت

-سنة سعيدة واني اقووووى

لوحدي بدون اي دعمممم خارجي

كتبتها واني اعرف راح يشوف الستوري

يم قمر

بنفس اللحظات اجت رسالة

عالطلبات فتحتها دازلي ايموجي يضحك

وصورة بطة صفرة منفوشة

ماانطيته وجه ولا حجيت مباشرتاً بلوك

بحدود الوحدة ونص اتصلت بيه

صِبى 

-ها مناووي بعدج يم سومة

-ايييي اختج وختيبها محتلين البيت

واثنينهم واطين خاف اروح واشوف شي

يخرب براءة عيوووني 

-هههههههههه لا لج ايمن راح يروح واني راح اوصل تعاي

-ايييي جايه

سديت التلفون بست سومة وطلعت راكضة

دخلت اتحمحم واكح انطيهم انذار خاف

اقاطع لحظاتهم بس للأسف ذوله

مو رومانسيين دخلت عالصوت العالي

-هددددددد واني أهد

-العرررررمة شعررري يسووواج ويسوى

عشيييرتج هدي

-گووول اني أحلى من أنجلينا جوووولي

-گولي آني احلى من براد بيت

-مااااااااا

-طبج عرج

-اييييي شعرررري لك الازرگ

صرت بنصهم هو بهت وبسرعة هد

شعرها ووگف مستقيم يعدل بشعره

ويجلي صوته

-يلا حبيبتي ورانا طلعة باجر

-حبيبي تصبح على خير

باوعتلهم صفح وهزيت ايدي

-دعدلي كفشتج انجلينا جولي

غمتني ومشت ويا عبالهم مااشوف

هو كفخها بسرعة وهي تگرص بي من ايده

ضحكت عليهم سبحان اللي جمعهم متشابهين

حتى بالجنون شويه ودخلت هي وصِبى

سويه

ركضت لصبى حضنتها

-مبررررررروك ماگدرت احضنج گدام أسد الغابة

كفختها غِنى

-الدنغوزة ليش محجيتيلي

-ردتها مفاجأة ويا رأس السنة الجديدة

حضنتها غِنى واني سحبت منها

العلاگة الجبيرة

-الله

فتحت العلاگة غِنى ساعدتني فستان

بي نفشة بسيطة تول سمائي فاتح

الردن شفافة ويتصاعد بيها كريستال منثور

ناعم فضي والصدر گصة التفاحة ناعم بي كورسيه

يتناثر علي كرسيتال

-يجننننننننن

-هذا ذوق أسد لو ذوقج

-ذوقه هو

-النسسسسسيب ذوقه مكلف وغالي

غِنى باوعت لصبى صفح وكملت خباثتها

-اي مبيين ذوق أسد لو تبقى على صِبى

تجيبة فستان عدل سادة مابي روووح

-ديلا شوفيني قدراتج ورتبيلي صينية

وكوشة ويا

-الكوووشات ايجار يخبلن نأجرلج وحدة

وكل شي مال مهر يجي وياها

-اعتمد عليج انت وسومة تمام

-يمتى الخطوبة بالله

-على يوم الأحد الجاي

-يعني گدامنا اربعاء وخميس وجمعة وسبت

ززززين بيهن شغل 

تركتنا صِبى وراحت نامت غِنى الخبلة

اسمعها تتصل بأيمن وتصيح

-يلا اعتذررررر مني

تركتها ورحت للمطبخ اسوي شي أشربة

بعدني احظر بالغلاية واجاني أتصال

قمر

-هااااا مناوي سنة سعييييدة

-هابي نيو يير حبيبتي

اجاني صوته ورد

-سنة سعيدة بطة

-سنة سعيدة للجميع

ترك التلفون ورجعتلي قمر

-تعااااي احجيلج

-شكوووو شصار

-راح انتقل لمدرستج

-كذابة

-والله ماما راح تاخذ تقاعد مبكر

وتسافر هي والعار يتونسون ويرجعون

-شعجب قبل الخبل تنقلين ويايه

-لأن هالمدرسة اقربلنا

وعلمووود الحب

-انجبي وذاك المووووضوع تدفني ولتحجين

بي

-سكتتتتت ها اهااااا

-عفيه بالبطلة

-يلا رووووووحي بما ان اليوم ثلاثاء راح تلگيني الخميييس منقولة يممممممج

غلقت الأتصال ونمت ومر هاليوم بهدوء

گظيته نوم لأن عطلة الأربعاء داومت

اول موصلت بالخط شفت سيارة حمزة

واگفة وهو بيها عينه عالشارع وگعت

عينه بعيني نزلت وصلت الباب وصاحلي

الولد حيدر ابو الخط

-مُنى شنووو فاقدة الذاكرة نسيتي كتابج

مشيت اخذه منه أبتسمت واني اشكره

-اغانيك الحماسية دوخت راسي ونسيت

حمزة نزل من السيارة وگف بصفي

-امر خدمة

باوعلة حيدر

-انت اللي شمحتاج

-شبيك خفيف 

حيدر دفعه من كتفه

-شبيك لك

حمزة بدون نقاش انقض على حيدر

احاول ادفعه ماكو 

-حمممممزة كاااافي

حييييدر شبيييك كافي

فلتت ايدي حيدر واني أجر حمزة منه

واجة البوكس بخدي عطت واثنينهم أبتعدو

حيدر تقدملي وحمزة دفعه

-اشگگ شگ وعلي ساااااااقط

شمره للگاع ببوكس ورجعلي

-اممممممشي شفتج أنشگت

دفعت ايده حيدر وگف يعدل بفكه

ويسألني

-اوديج لبيتكم

حمزة صار بيني وبينه

-انت زماااااااال اني اخذها للبيت

-جرررررر منا لك جيراني وبأمانتي

-بت عممممممي أنت منووووو

تراجع حيدر وهو يأشرلي براسه

يعني صح كلامه

اشرتله اي وتحرك ماشي

اباوع الطالبات كلهن عينهن مني الداخل

والطالع يباوع شفتي تجري دم

خليت عليها كلينكس

ومشيت بسرعة راجعة للبيت

تحرك ورايه يمشي

-بلا خبال امشي اوصلج للبيت

-شكرا مااريد

-شفتج تنزف ومنظرج يجيب التايه

-بفضلك انت 

-ترجعيييين للبيت مشي

-اخذ تكسي

-تكسسسي بوحدج

راح اتصل بأختج هي تتعامل وياج

-اياك تتصل بيها كافي فضيحتي بباب

المدرسة

-انتظري هنا اجيب السيارة اوصلج

وگفت واني امسح الدم ثواني وطبگ

فتحلي الباب الأمامي سديته وصعدت ليوره

ضرب الستيرن بقبضة أيده ومشه متحرك

-شعنددددج هالگد ميانة ويه هذا القذر

-مو قذررررر

-لا يخبل صدگ جذب 

ليييش تدافعين عنه

-ممدافعة الولد مؤدب وخلوق وابد ممتجاوز حدوده

مثل البعض

-شنوووو قصدج لج

-مموجهتلك الكلام لو اللي بعبه طلي يمعمع

-هاي منو اليمعمع

-الطلي

داس بريك ووگف بنص الشارع العام

-صايرة صلفة

-حتى اخلي حدود للناس

-لا بالله

-اي والله

تحرك ماشي ومعدل المرايا ناحيتي

-ماراح يبرد گلبج

-من شنو

-من اللي صار حتى بعد مااحجيلج السبب

-مابينا شي حتى تشرحلي وتبررلي

-مُننننننننى

گالهة متعصب اني سحبت تلفوني

اتصل بصبى

اول مفتحت الخط حجيت

-الو صِبى

-ها حبيبتي شبييج

- اني رجعت للبيت ولاگاني عمو حمزة

اخو أسد وهو رجعني

-شصار

-انضربت بباب السيارة وتأذيت

وعمو جان جاي ينقل قمر من شافني

رجعني

-تمام بالج على نفسج وروحي

يم سومة لتبقين وحدج

-تمام

غلقت الخط وهو عاض كف ايده

بحرگة

-احترگ ابوووو عمو

ماعرتله اي أهمية التفتت أباوع للشارع

قبل لنوصل وجهلي كلامه

-ترجعين ويايه اوصلج ويه قمر هذا القذر

متصعدين ويا

-هذا اللي تگول علي قذر اخلاقه تسوى

البعض هم ونفختهم الكذابة وغرورهم

واعتدادهم بنفسهم انت مالك اي حكم

عليه واللي تگوله لا شيء عندي

ومن اليوم رجاءاً لتخلي طرقنا تتقاطع

حتى متسمع مني شي ميعجبك

گلت كلامي دفعة وحدة ونزلت واجاني

صوته اللي تحشرج بسبب أعصابه

-هييييييين تاليتج يممممممممي

نزلت واني مجنت مخليه

ببالي ولا بأعتى خيالاتي

أن اللي گاله هو اللي راح يكون

فعلا وان طرقنا راح تتقاطع من

جديد وتجلب وياها مغامرات

جديدة بالقادم من أيامي 

.

.

.

.

.

.

.

.

.

غِنى

_______

ومن أعتى مراحل الحب

هي الصبابة

ماشيين بعد ماركن سيارته متمسك

بكفي مدخلتها بجيبه لأن باردة

نمتشى والناس حوالينا فرحانة

فاتت من يمنا بنات مخليات حمرة

حمرة باوعتلة صفح

-شوووف كلها مخلية حمرة حمرررررة

-انتِ تختلفين 

-ليش بالله عندي خمس حلوووگ

-هوووو واحد وماگادرلج لسانج يرش

ويكنس

-اتحمل حبيبي محد گالك تعال تزوجني

-گلبي الگ***د ماراد غيرج اني صوووجي

ماضربته الف قندرة حتى مايدگ الج 

-لتغير الموضوع

-يعني امشي بيج بين العالم بحمرتج الحمرة

واگللهم شوفو مرتي موووزة

-اووي اني بعيونك حلوة

-اوووهو بسرعة صدگت ترى اني

جاي اجبر خاطرج

گرصته من كف ايده اللي حاضن كفي ومخليهن

بجيبه

-عگرررب مو مرة

-لدغتي والگبر حبي

-جا تعلميني

-هايي الجا تخليني الزگك بوسة

بنص الناس

ضحكت وضغط كف ايدي

وگف يم واحد يبيع ورد اخذلي

وردة حمرة ابتسمت واني اشم ريحتها

الطيبة

-خل اسولفلك شغلة عني للمستقبل

-احجيلي غني

-تريد تراضيني اشتريلي اكل

زعلانة اكل تعبانة اكل مريضة اكل

مناسبة عيد زواج عيد ميلاد اكلللللل

-والورد

-نخلي للفرافير

-ياااااابه قياساتي والله

خل نضرب گص علي لية زيادة

-ايييييي وببسي مكينة

-أزلمة خشششن يابعد شواربي

-اتشاقه  وياك والله انت تعرفني

شلون معدتي متتحمل اكل بالليل

-تطلبين عيوني

-سالمات يمناي

كعدنا على مصطبات بحديقة وعينه

عالشباب والبنات والناس الفرحانة

-من تجين هناك تشوفين الأحتفال بأربيل

غيييير

-ليش متجي انت هنا ويصير الاحتفال ببغداد

غير

-أستقريت هناك بعد وحتى شغلي هناك

اقوى من هنا

-واذا اگلك لخاطري

-أگلج طبج مرض انتِ وخاطرج

-بعد روووحي الحب احلى منطق واحلى

كلام

-غصباً عليج

لف كفوفي بكفوفه يدفيهن

-تعرفين مفكر بس تسوين حفلة

التخرج نتزوج

-والامتحانات

-اخذلج اذن من الجامعة بس وقت الامتحان

تجين

-فدوة مباقي شي

-غِنى والله طالت

-تحملني لخاطري

-امري لله گووووومي هواي سختنه

خل نروح لسمية و مُنى زحمة تركناهم

تمشينة راجعين طلعنا سويه نتمشى

نتفرج عالناس مباقي غير دقايق

على راس السنة ايمن يباوع للكل

بيدهم العاب نارية ونفاخات يطيروها

راح جاب لمُنى بساعتها شفت لمعة

عيونها والفرحة من الشي البسيط

اللي سوا وبدأ العد التنازلي وهيج

بدينة سنة جديدة سوية اني

وأيمن دعيت ان تكون سنة خير وسعادة

وفرح

بعدها رجعنا للبيت سومة و مُنى راحن يعزلن

البيت واني وأيمن رجعنا نكمل الاحتفالات 

غير ملابسه واجة لابس تراك أسود برصاصي

طالع يجنن

گعدت بصفه عالقنفة ونباوع للتلفزيون

مسنودة على كتفه أباوع فجأة لسعني بأطراف

اصابعه على رجلي

-اااااي شبيك تضرب هيج

-ابوس الواوا

-امشي اطلع بررررررة

-هههههههههههه

كفخني وهو يضحك رجع باس راسي وسندني

على كتفه مرة ثانية فجأة 

امتدت أيده ناحية شعري تلمس الخياطات

اللي عالجانب والشعر بيهن طولان وبدة يسد الفراغ

سحبني الة فززني عينه بعيني وايدة تتحرك

على مكان الخياطات

-عمري مااسامح نفسي على هالجرح

امتدت ايدي فوگ ايده نزلتها وامسكت بيها 

حيل

-مو غلطتك اني عاندت وانت تمسكت برأيك

واثنينة تناطحنا بالعناد

-اي مو احنه صخول

-حشاك يمناي أنت بااااندا

ضحك وفتح قمصلته الداخلها فرو

دخلني ويا وجعصني جعص

-مو گتلك باندا دفيت

-طبعاً غير صوووبة اني

-صوبة اربعينية جادة

-بربوگ

-انتَ

-اني بربوگ

-لا حشاك

جعص راسي على صدره يقلدني

-اااااي شبيك تضربني هيج

-سخييييف

-تدرين ان صوتج ينعوص وناعم 

-مووو ينعوص رقيق وانثوي

-انهجم بيت انجلينا جووولي الرقيقة

-ليش انجلينا بيش احلى مني

گعدت عدل رافعتله حاجبي منتظرة

العرررركة تحمى حتى اهجم

-اااااااخ انتِ شايفة طولها تنااااسبني

حييييييل

-اسحب كلامك

-لا بالله خاف تزعلييين

هز ايدة مستهزء وگفت متخصرة

-ديلا شوووف منو يحجي براد بيييت

-شنو هالفاهي هذا مايجي ربع

سمااااري

-بس لوووون عيوووونه وشگاره بعشرررة من الزرگ

وگف وضربني بكتفي

-هاي عليمن لج

-عليييك شنووو وگفت عود شوفيني طويل

وخافي مني

-جا انتِ جبتيها لروحج

گالهة وسحلني من كتفي لزم راسي ضربني

كلة خفيفة

استغليت الفرصة قفزت ولزگت بي ملخت شعره

لزم ضفيرتي حيل تأذيت وحجيت بسرعة

-الأزررررك

-الفااااااهية 

-هددددددد واني أهد

-العرررررمة شعررري يسووواج ويسوى

عشيييرتج هدي

-گووول اني أحلى من أنجلينا جوووولي

-گولي آني احلى من براد بيت

-مااااااااا

-طبج عرج

-ااااااي شعرررري لك الازرگ

بنص العركة أباوع مُنى بنصنا

هو تركني واني تركته وگعدنا

نعدل بشعرنا

رتب گذلتي وحجه بشكل سريع ومحرج

-يلا حبيبتي ورانا طلعة باجر

-حبيبي تصبح على خير

باوعتلي مُنى صفح وهزت ايدها

-دعدلي كفشتج انجلينا جولي

غميتها وركضت وراه

هو كفخني بسرعة

واني اگرص بي وصلنا للباب

باوعلي شعري مكفوش

-شوووو تعاي

سحب راسي عدل شعري دسه

ورة أذني

-انعل ابوووهن شلع كلهن يوگعن تحت

خلخالج فدووووة

-هات بوسة

باسني خطف وطلع بالباب باوعتله

-لو مليون براد بيت تبقى انت

الباندا مالتي

-تردين اگلج مييييو

-لا ذاك بزوني

-ولي بربوگ

نطحني كلة بالشقه وراح

على أمل أن يكمل خطوبة صِبى

ويرجع لأربيل

اليوم البعدها الكل كظاها نوم بسبب السهر

للعصر اندگ الباب وهو اجاني

-شعندج نقوصات للخطوبة تطلعين وياي

نجيبها ولتگلين لصبى شي وتروح تشيل

هم الفلوس فهمتي

وصدگ استأذنت من صِبى وطلعنا

بالطريق اباوعلة الجگارة بيد والستيرن بيد

ورافع البلوز مطلع ذراعه

باوعلي وغمز

-اكيد جاي تگولين على هالعضلات

هذا اذا كفخني راشدي افقد ذاكرتي أسبوع

لمست عضلاته ضاحكة

-بزوني

-ميااااااو يابعد روحي

-ههههههههههههه تصدگ مرات أگول هذا شلون

متحملني

-هو شحببني بيج غير هالسوالف لا تشوفيني

يمج مستخف ترة بالكلفات أعجبج

-ماانسى وگفاتك للموت

-تففف هم جابت طاري الموت

-احجي صدگ والله يمناي ليش تكلف نفسك

-شتردين اخلي صِبى تصرف وانتن كلجن صرتن

تحت وصايتي

-خاب باع الحجيييي

-شوووف الخابببب ناصرية اصلية

-لاتنسى حفلة التخرج بنهاية الشهر

-عيوني الج

علما وصلنا اختاريت توزيعات على قطع

كيك وكملنا كل شي يتناسب ويا الكوشة

اللي اختاريتها اله قررت اخذلي فستان

للحفلة

-ايمن ولو اتعبك بس خل ناجر فستان اليه

-اشتريلج واحد

-لا والله خسارة شسوي بي مال مناسبات

دخلنا محل مرتب أباوع الفساتين القصيرة

تخبل

-شوف هذا

جان نص ردن جوة الركبة 

-لا

البعدة لا والورا لا

اخر واحد بس تعلاگة بلون وردي حلو

وتعاليگ كريستال وستن فوك الركبة

شوفته اله باوعله وتقرب همسلي

-هذا ميأجرون ويا زوج گرون ستيل

ملمعات البسهن وننسق اني وياج

-وررره ميرحون الرياجيل

بحفلة البنات البسه

-لا ممنوع ها ومو بس انتِ حتى

مُنى ممنوع تلبسن حجاب ولبس اعتيادي

كشخة لو لبس مناسبات مال محجبات 

-لا نخليها للحنة الكشخة

-حنة منو

-حنتي

-ايواااا كدة دلعني

ضحك عليه وطلعني من المحل

رجعنا للبيت مرن اليومين

مسرعات لحد يوم الأحد مداومت

لا آني ولا البنات بين تجهيز وترتيب

سومة ويه صِبى بالصالون

واني ومُنى وقمر نرتب ونجهز كل

شي يحتاجو واخيراً وصلت

ومااكذب من أگول اني من شفتها

طلت بفستانها المنفوش ونزاكتها

احس سعادات العالم كلها حطت

بين اديه وهي تفتر حوالين نفسها

بفرح تشوفني نفشة فستانها

أباوعلها واني فخورة

اختي الجميلة ذات ال٢٤ عام

اللي مشافت من السعادة الا

القليل اللي معاشت عمرها وهي تسعى لعيشتنا

اليوم الفرح دگ بابها

بعد الحفلة والعقد والهدوء

والكل مشغول ببعض يسولف

من اقربائهم شفت هوواي عيون

رافضة اختي لكن تعاملت ويه 

الكل بأحترام الى أن طلعت

من الصالة بره بعد مااتصل بيه

أيمن يريد يحاجيني اجتني ألاصوات

النشاز المليانة حقد لأثنين

من اهله وهم يهينون ادميتنا

ويبخون السم بكلامهم وحدة

تعلي عالثانية بالكلام البذيء القذر

-شفتي هاي آخرتها سنين عزوبيته

كلها واحنه ندورله الزين وگعلي

تاليها بهذني التايهات اللي منعرف

گرعة أبوهن منين 

-گالتها بنتي گالت هاي دخلتها

للبيت مو لله عجييب أسد عاف

الألماس وركض عالتراب

ومن سمعتهم عرفت أن الحب أحياناً

مو كافي وأن الناس لازالت

تفكر بالماديات وأن الحكم

بدون معرفة هو السائد

وان رحلة صِبى ويه التعب

لازالت ببدايتها

.

صِبى

_______

روحي حيث أنت 

الصفحة ١٥٠

حبيبي فرقد ……

يبدو أن بعد سنين من الحزن

من فراقك من الدموع اللي تنزل بصمت

إجت السعادة

ما إجت بأندفاع ولا بصوت عالي وضجة

لا إجت بهدوء كأنها مراعية شعور گلبي بعدكل شي مر بي 

إجت مثل حضن دافي بعد فرگة طويلة 

مثل غفوة مريحة بعد سنين من التعب

أجاني شبيهك بالهدوء والرقة والاحساس

المرهف بعد قدومة 

صرت أضحك بدون ما أعرف ليش

صرت أشوف الدنيا بشكل احلى

جنت أظن إنو الفرح خلص

بس لا هوه جان تايه وگدر يرجع گدر يلگاني 

حبيبي فرقد اريد اگلك سر هالمرة 

السعادة إجت وأخيرا اگدر أگول هسه أني بخير مو مجاملة لا من صدگ

________

متقابلين عالمكتب ونشتغل

كل شويه ارفع راسي أشوفه 

يسترق النظر اليه

-عدنا شغل

-مابيها شي اذا نسرق ثواني

نشوف بيها شخالق ربنا من كائنات جميلة

رفع تلفونه ودفعه اليه

-فتحي

فتحتة طلت عليه صورتنا بالمصعد

ابتسمت واني اشوفها محولها للون الأبيض

والأسود ومخليها خلفية لجهازه

باوعت لطوله وطولي بصفه

-طولي نشاز

-بالعكس طولج ساحر 

و دليل على أنج من سلالة الجنيات الساحرة

-قصدك اني سنفورة

-لا قصدي أميرة السنافر

ضحك ووگف يجمع الملفات شلون ماكان

-گومي أوصلج للبيت ماعدنا شي روحي أرتاحي

ورانة هوسة وتجهيز

باوعتله محتارة شلون اطلق سؤالي

-أسد الله

-گولي صِبى

-أهلك

-ليش تبقى عيونج دائماً شايلة قلق وخوف

من كل شي قادم

-زين مراح يسألوك عن اهلي بالله أمي

وأبويه متوفين اعمام اقرباء ميسألوك

ميگلولك ليش ماكو مشية زلم بالبداية

-محد يسأل مدام القرار قراري والحياة حياتي

-خاف ……

-لتخافين وآني أتصلت بأيمن وگال

كل شي راح يكون حسب الأصول اني

انطيتهم علم خطوبة وعقد بنفس اليوم

يعني اطمأني

-والدتك

-مع احترامي الها القرار قراري 

واگدر اسوي كل شي بدون ماانطي

خبر لأحد بس اني مقرر اسوي

هالخطوة وكل شي حسب العادات

حتى يعرفون مدى فخري وقناعتي

بقراري

سحبني من ايدي ودفعني وهو يسحب جنطتي

-ريحي راسج الحلو وكافي تفكير

مشينا نازلين للسيارة

هالحجي يوم الخميس بنص الطريق

توقف يم طفل بالاشارة يبيع ورد

اشترالي وردة خلاها بيدي

-شكرا

-الورد للورد حور

وصلني للبيت وأنطلق 

دخلت البيت هدوء البنات

نايمات اني هم اكلت شي بسيط

سبحت وتمددت بالهول أباوع

للوردة مخليتها ويا الباقة اللي

جابها يوم ليلة رأس السنة قبل

يومين ورجعت ابتسمت على هالذكرى

الحلوة

بعد مابلغت البنات بالسيارة ان

احنة راح ننخطب نزلت بعد مااتصل بيه

أسد سلم على أيمن وراحو لزم كف ايدي

واشرلي ندخل للمجمع

يفتر ويايه وصاب جل اهتمامه ويه

اللي اسوي اطلع بالفساتين

دخت هوايه موديلات وهوايه

ألوان تركت كل شي وگعدت 

حسيت بالأحباط وأباوع لكل

شي حواليه شگد أكو لحظات البنية

تحتاج بيها أمها او أخت اكبر منها

تستشيرها گعد بصفي وبكل اريحية طرح عليه

سؤالة

-شنو اكثر لون تحبي

-السمائي الفاتح

-محتشم لو بناتي

-محتشم اكيد

-تعاي وياي

لزم ايدي ووگف يم ستاند خاص للون السمائي

وتدرجات الازرق طلع مجموعة فساتين مستورة

واشرلي

-هيج اشياء مثلا

-ايييي

ابتسمت وهو يسحب واحد نازك

-آني أشوف هذا يطلع بيرفكت عليج

يبدو انج صدگ راح تطلعين أميرة السنافر

بهالفستان

تمشى حجه  وية العاملات رتبولي كل شي

احتاجه وية الفستان اخذه بيده وطلعنا

خلا بالسيارة وقفلها

-الج مزاج نتمشى لو تردين نفتر بالسيارة

-نتمشى

لزم ايدي مدخلها بذراعة ومنطلق

يسولف

-اسألج سؤال تجاوبيني صادقة

-اسأل

-خطوبتج السابقة شگد أستمرت

-خمس سنوات بسبب سفره

-امممم جيد

-وخطوبتك

صمت وماحجه  اي شي للحظات رجع جاوب

-ماجانت خطوبة من الأساس جان مشروع

خطوبة وانتهى بمجرد مااكتشفنا ان احنة غير متوافقين

-صفا لحد الآن ممخطوبة

-لا تزوجت وأنفصلت قبل فترة

-تمام

-اكو شي ببالج

-لا ماكو شي بس مجرد تساؤلات

-صِبى أي فكرة او سؤال ببالج گولي

ولتستحين مني

-أعتقد الفترة اللي فاتت جانت كافية أن أعرفك

-يمكن اني كتاب مفتوح بسرعة يقراني المقابل

-واني

-غامضة مااعرف اقراج أحياناً

يمكن للمستقبل أگدر

-جائز

ضغط على كف أيدي يضحك

-يعني مصرة عالغموض

-لا بالعكس بس تگدر تگول

ماكو احداث هوايه  بحياتي

سديت الموضوع فاللي صار بحياتي

يمكن أن يملي مجلدات جنت حابة

ابدي بداية جديدة وانسى ماضيي المؤلم

وية أسد 

گعدنا بمنتزه عام گعد بصفي بعد

مانزع الكوت مالته ولفة حول اكتافي

-بردتي نروح نشرب شي دافي

-بردت بس حابه اشوف الناس وهي

فرحانة حواليه

استمرينا بالگعدة لنص ساعة

بعدها لمس ايديه

-ثلجتي گومي

يمشي بصفي

محاوط كتفي من المارة شباب وشابات

وازدحام

ركبنا السيارة مشينا مسافة وأرتفعت الالعاب

النارية باوعت بتلفوني دخلنا ٢٠١٩

-سنة سعيدة صِبى

-سنة خير يارب

بقينة نفتر بدفو السيارة والسوالف

توقف بنص الطريق مشتريلي باقة ورد

هالحركة حركت مشاعري المدفونة

وصلني للبيت الساعة وحدة

نمت بعدها جرة وحدة

لثاني يوم بدينا اني والبنات نخطط

لكل شي بس جان لأيمن رأي آخر

تكفل بكل شي بصفتة اخونا الجبير

وهالكلمة جان وقعها على گلبي دافي

وحنون

يوم السبت بالليل استلمتني

سومة بسوالفها هي و مُنى والماسكات

وهالسوالف لنص الليل كملنا

ونمنا يمها الصبح انطلقت غِنى هي

وأيمن جهزو كل شي من بره گعدة الزلم هالمرة

بالحديقة كراسي وترتيبات بنية اجت رتبت

الكوشة

واني الظهر اخذتني سومة

للصالون شعري سشورته على طوله

وطلبت منها تگصلي گذلة ومتسويلي

تسريحة ضفرته نصة ضفيرة راخية عالموديل

ونزلتها عالجانب ويا كرستال نثرته على شعري

مكياج بسيط بيج ويا كحل ازرق

اجانه أيمن بسيارته رجعنا مشغل

اغاني وعالگ الجو بسوالفه

وسومة خبصت الجو بالهلاهل

وصلت البيت بين مادخلوني ربع ساعة

وارتفع صوت السيارات وأيمن وجماعته بأستقبال

الرياجيل

وسومة والبنات وكم وحدة من الجيران

بأستقبال النساء جنت گاعدة بالكوشة 

ودخلت أم أسد واخته ام فقار واختة ام قمر

وهاي اختة الثالثة الصغيرة أسمها حسب مگلي سناء اول مرة اشوفها

تقدمو وسومة تعرفت عليهم الكل وجهم جان

غريب جامدين ماعدا ام قمر تتصرف عادي

امه سلمت من بعيد واخواته كذلك

نص ساعة بين سلام وكلام بدو

بالعقد ونفس الشي وكلت الشيخ

وبهيج تم العقد والورد تحت رجلي

بنجانة المي ومتغطيه برداء ابيض

للعقد اصابعي بينهم هيل والقران

مفتوح على سورة الفتح

جنت متمنية واحلم أن فرقد يوگف

فوگ راسي مثل كل بنية يوگفلها ابوها

او اخوها بعقدها شويه وسمعت صوته

اني متأكدة وهو يگل لغنى

-غنيوة وخري  هذا مكان الأخ

شنو صايرة زلمة 

هو صوته فرقد اني متأكدة

رفعت راسي من تحت الرداء ووگعت

عيني بعين أيمن أبتسم وهمسلي

-مبروك بعد اخوج

ابتسمت واني اتدارك دمعتي بعد اتمام

العقد ايقنت أن أيمن مااجه بس حتى

يملي حياة غِنى بل حتى يملي مكان تركه 

فرقد فارغ بغيابه

ارتفعت اصوات الهلاهل من ام قمر والبقية

واجه صوت غِنى

-تغطو يابنات العريس جاي

جنت منتظرته بالكوشة دخل

ببدلته السودة وقميصه اللي يناسب

فستاني تقدم مدلي ايده مگومني باس

جبيني وهمس

-أميرة السنافر 

ضحكت وهو يسحبني ويگعدني ويا

الكل متلهف ويباوعلنا صفا جانت گاعدة

مقابيلي على كرسي بصفها نسرين

واخواتها جنت اباوع لردة فعلها جانت

عادية تسولف وتضحك ماكو شي

واضح على ملامحها لا حب ولا زعل

ولا غيرة

تنفست مرتاحة وهو لازم ايدي

قرب نفسه اليه همس

-مراح تشوفين شي على ملامحها

خطوبة ماتمت وانتهى الأمر

ضغطت على اصابعه

-شلون فهمتني

-لتفكرين فكري بفرحتنا سويه

قدمت غِنى بحجابها وترتيبها ووياها

ام قمر بيدها علبتين

-يلا عريسنا لبس الذهب

فتحت العلب سيتين ذهب واحد

نازك مطعم بمينا شذري والثاني

ثگيل وويا اسوارات

مد ايده يلبسني الحلقة لبستها

وطلعتلي غِنى الحلقة الفضة اللي اشتريتها

اله لبسته

لبسني الخاتم والأسوار والگلادة

بعدت شعري ومد ايدة يخليها

حوالين نحري لمست أصابعه الدافية

مسام جلدي وغمضت خجلانة

همس يم اذني

-ياما تخيلت هالمكان

ابتعدت و غِنى تعدل بشعري

بدينا نقدم الضيافة انشغلت الناس

وهو مشغول وياي المصورة

تلتقط لقطات ورمزيات شويه وصاحت

-امهات العرسان

گامت أمه وكفت بصفه باس ايدها

انحرجت ونزلت راسي

شويه وحسيت بأيد سومة وهي ترفع راسي

وتبوسني وكفت بصفي ضاحكة

-هنيالج على هيج ام صاكة

ضحكتني والتقطت البنية الصور

بين فقرات المهر والضيافة رجع هو

يم الرياجيل بره اجت امه گدام الكل باركتلي

-مبروك خالة 

-الله يبارك بيج

كعدت بصفي وتحجي بهدوء بس واضح

الزعل عليها

-اريد احجي وياج ولا تزعلين خالة

اني أسد جبيري ردتله حفلة جبيرة

بقاعة والكل يحضر هاي فرحة العمر بس

هو گال مااريد اضغط على صِبى

-آسفة اذا خاب أملج خالة بس

والله ماطلب مني

-هو ماقبل يگول انتم متعودين الضيافة

على اهل العروس واذا گلتلها قاعة راح

تصر ان متاخذ فلس بس خالة احنه هيج

هيج ندري بوضعكم مو زين ومنقبل اصلا

تصرفون انتم

-لا خالة احنا وضعنا الحمد لله ليش موزين

وهاي شفتي حفلة مرتبة والكل مرتاح

-واضح الترتيب لأسد بس هم مو استحقاقه

-لا خالة مع احتراماتي لأسد هذا ترتيب اخويه

وزوج اختي اسد الله ماخليته يدفع شي

لأن هايه اصول الضيافة بالمهر على

اهل العروس واذا عن الأستحقاق

شنو اللي تشوفينه غلط گوليلي

-لا حشاج يعني بس انت مو صغيرة

علي

-عمرياً اجتماعياً مادياً من أي ناحية 

-لاتزعلين اذا اگول كلهن

-لا ماازعل بس هو شايف

-هو شايفج هوايه علي

يگول تستاهل الاحسن

-لا حاشى مدام يستاهل الأحسن

يعني هو عرف استحقاقه واختارني

وان شاء الله اكون بعينج انت كذلك كافية

ابتسمت بأكراه وگامت

-اذا هيج عالخير

احس معدتي مغصتني ودگات گلبي

أرتفعت زعل بعد ما تركتني و

راحت كعدت بصف ام فقار وبقو

يسولفون شويه  وگامو

سلمو وترخصو طالعين وسومة و غِنى

وصلوهم للباب قمر بقت يمنه

وفرغت الصالة وقمر على اتصال بأسد

-خالة خالو أسد يگول عادي ادخل

-اي حبيبتي بس بلغي البنات

شوية واندگت الباب ودخل بعد

ماالبنات طلعن وعم الهدوء بالصالة

دخل بترتيبه واناقته بس هالمرة

لابس الكوت مالته عالقاط لأن الكعدة بره

والجو برد دنيا شارفت الغروب

تمشالي أمسك كفوف ايدي خلاهن على

صدره

-واثقة بيه

-تمام الثقة

-اي شي شفتي وسمعتي

خلي تحت اقدامج وحسبي درجة ترتفعين

بيها حتى توصلين لأعماقي آني

منزل راسه يباوعلي ضحك وهو يمسح على خدي

-او درجة تصعديها حتى تصيرين بمستوايا

واگدر ………

-شنو

بدون ميرد ترجم كلامه لفعل وهو يسحبني

لصدرة محاوط خصري بذراعه القوي

ويهمس

-أگدر ابوسج

ارتفعت شواربه بضحكة واني مصدومة

ميل راسي بكف أيده وخطفني بثواني

بقبلة ناااعمة مثل حلوى القطن

اكتشفت بيها اني مذعنة تماماً ومستسلمة

تحت أيده وهالشي خلاها زادت عمق

وكفوفه أخذت طريقها تتلاعب بشعري

وصوت أنفاسه أرتفع بوتيرة

مثيرة خلتني أرتجف تحت تأثيره

ابتعد بعد دقايق طويلة عني واصابعة

ترتب خصل شعري المتبعثرة

-لذيذة وحلوووة من كل الزوايا

گالها وفرني حوالين نفسي واطراف الفستان

التول تتطاير حوالية بخفة فراشة

توقفت وحضني اطراف ايديه باردة 

والفستان خفيف

باوعلي وهو يفتح الكوت مالته خلا حواليه

بحضنه حاضن اكتافي ساند

راسة على كتفي

-مبروووك حبيبتي 

ضحكت وابتعدت خجل متلحفة دفيانة 

تقدم للميز ثبت التلفون عالميز ورجع حضني

التقط التلفون الصورة فرني صرنا وجه بوجه

باس جبيني وباوعلي

-وهيج صرتي حرم الأستاذ المحامي

أسد الله غالب واخيراً نورت عتمة

حياتي