رواية كوميديا سوداء الفصل العشرون بقلم ليل ادم
نائب الوزير: أنا عمري ما شوفت إجراء زاي كده
الوزير: قولي يا اسلام انت حاسس ان في ضغط على معدتك من تحت
المريض: لا بس حاسس ان في شد في الجرح
احمد : مش معقول
الدكتور علي: في اي
احمد : جميله قالتلي الصبح مفيش استجابه بعد اذنك كده يا دكتور خالد هات الصورة اللي معاك
الدكتور خالد: اتفضل
الوزير: بعد اذنك يا دكتور احمد ممكن أتابع الفحص بنفسي
احمد: طبعاً يا فندم
الوزير: (بدأ يقارن بين الطرف قبل البتر و حالته الآن وجد أن فعلاً في استجابه بشكل بسيط)
في فعلاً استجابه بشكل بسيط بس دا مؤشر حلو جدا جدا
المريض: يعني ايدي هترجع
احمد : أن شاء الله هتكون كويس انت بس اعمل اللي قولتلك عليه وسيب الباقي على ربنا
الدكتور علي: الاوعيه الدمويه في الطرف تبدو أنها بدأت تستقبل المعالجه
الوزير: فعلاً وضع الطرف قبل البتر كان في حالة حرجة جدا جدا الوقتي بدأ ينشط يمكن لو كان المريض وصل والطرف على نسبه الاستجابة اللي عليها الوقتي
احمد : مكنش حصل بتر
الوزير: بجد برافو برافو برافو عليك الإجراء ده لازم نستعين بي كتير انت مدرك في كام حاله بتر حصلت وكان ممكن يتدخل فيها إجراء من النوع ده ويرجع المريض ل سابق عصره
نائب الوزير: بس الإجراء ده حلو لو البتر على مستوى الزراع مش في القدم
الوزير: معاك بس في حل ومع الوقت اكيد هيكون في حل ل مشكله القدم
احمد : ومع الوقت ليه انا عندي حل ل إجراء القدم بس لو مش قدم سكري
الوزير: ازاي هتزرع الرجل فين
احمد : شوف حضرتك لو عملنا زراعة الرجل على مستوى الفخد في الرجل الشمال وخدنا من شريان الحياة اللي بيوصل من القدم الي القلب وعملنا شبكه دخ دم من الشريان الي القلب و اوعيه دم القدم نقدر بكل سهوله ننفذ الإجراء
الوزير: بس شريان الحياة ميقدرش يضغط دم يكفي حاجه القلب و معالجه القدم مع بعض كده ممكن يحدث تجلط في القلب
احمد : علشان كده قولت نعمل شبكه دخ دم
الوزير: والشبكه دي هتكون منين
احمد : من المثانه في الراجل ومن الجدار الخلفي للرحم لو ست
الوزير: شوف هو أنا عارف انت هتعمل ده ازاي بس أنا مستمتع احكي
احمد : اكتر شبكه معقدة في جسم الراجل بتكون في المثانه اكتر من ٢٣ شريان دقيق مجمع في المكان ده سهل جدا ب تدخل جراحي تعمل شبكه دخ دم ولا أجدعها شبكه كهرباء تقوم السد العالي
الدكتور علي: احم احم أحمد اي اي ما انت ماشي كويس
الوزير: لا سيبه أنا حبيت طريقته هو أصلا من نوعية الدكاترة اللي أنا برتاح معاهم اللي هو يحسس المريض أن مفيش حاجه كل حاجه ليها حل بأمر الله (وبيضحك)
الدكتور علي: الدكتور أحمد عنده مميزات كتير جدا منها قبوله عند الناس غير موهبته اللي مفيش فيها شك
احمد : (بص ل الدكتور علي و مستغرب )
نائب الوزير: تفتكر أنا قولتلك اي المره اللي فاتت لما كنت هنا
احمد: طبعاً يا فندم قولتلي هكون دكتور كبير ووصيت عليا جدا
المحافظ: فعلاً ماشاء الله عليك والله الواحد بيفرح لما يشوف النماذج دي في شبابنا
الوزير: رغم أني مستاء جدا من كلامك في المؤتمر امبارح إلا أني فاهم نيتك من الحديث بس بعد كده بلاش تفتح في الكلام مع الصحافه يا دكتور احمد عايز اقولك أن في ناس خبيثة تاخد الجزء الضار من كلامك وتنشره وتسيب الجزء النافع ممكن يكون ده محصلشي معاك امبارح علشان كم التعاطف اللي كنت محاط بي بس بعد كده لازم تحافظ على التوازن في حديثك
الدكتور خالد: بالظبط يا فندم هو ده اللي أتكلمنا مع احمد عليه امبارح
احمد : منا مقدرش يا جماعه
استاذه ريهام: اي اي اهدا كده مالك
الوزير: تعالي يا احمد ( وخد احمد وراح بعيد عن الجميع)
الوزير: متقدرش على اي
احمد : أنا غلطان ومتأكد اني غلطان بس أنا مقدرش اشوف مريض في ايدي حل ليه وأسكت أنا عملت مشكله في حاله علي وربنا كرمني والولد رجع ل اهله سليم وبرضه في حاله اسلام الدكتور خالد كان رافض فكره زراعه الطرف من تاني أنا عارف أنه خايف يحصل تلوث ويموت مننا بس كنت هنام ازاي وانا متاكد أن في حاجه لو حصلت اسلام يرجع شغله ويصرف على بيته اتفضل حضرتك دي زوجه اسلام و دي بنته تقدر تقولى لو كنت اخدت منه أيده كان اي مصير العائلة دي
الوزير: (مبتسم وطبطب على كتف احمد) لساني مش مطاوعني اقولك اسمع كلام الأساتذة بتاعتك خصوصاً كل نتائجك مبهرة أستمر وطول ما أنا على كرسي الوزارة مكتبي مفتوح ليك في اي وقت
احمد : ربنا يبارك فيك يا فندم
في الوقت ده كان المحافظ خرج من غرفه المريض
المحافظ: أنا مش عارف اقولك اي اول مره سياده الوزير يدخل المحافظه ويكون مبسوط بالشكل ده
الوزير: كفايه اني أتعرفت على احمد
المحافظ: عايز أعملك مكافأة تصدق
احمد : ده بجد
المحافظ: بجد
احمد : يعني اطلب اي طلب
المحافظ: جرب كده (وبيضحك)
احمد : لحظه واحده كده معلش يا فندم ( وخد زوجه اسلام مريض بتر الزراع)
الزوجه : خير يا دكتور اسلام في حاجه
احمد : لالالا جوزك كويس انتي عايشه فين
الزوجه: هنا على اول الشارع
احمد : ايوه شقتك بتاعتكم
الزوجه: لا عقد مؤقت
احمد : سياده المحافظ أنا عرفت المكافأة بتاعتي اي
المحافظ: وأنا كمان عرفت و الوزير نفسه عرف بكره تيجي تستلمي شقتكم والف مبروك
الزوجه: استلم اي أنا مش فاهمه حاجه
احمد : خشي بس طلعي الناس اللي جوه دي و اقعدي جمب جوزك وأنا جايلك
الوزير: مبسوط كده يادكتور احمد
احمد : أنا عمري ما فرحت كده إلا بعد ما شوفت علي بخير
الوزير: وأنا مبسوط جدا جدا اني عرفتك النهارده أنا همشي بس هتابع اخبارك كلها وكمان هبعتلك مندوب من الوزارة يناقش معاك إجراء زراعة الطرف و اجراء عمليه الطفل علي
احمد : تحت امرك يا فندم
الوزير: ياله في رعاية الله
احمد : عليه الصلاة والسلام اي اللي أنا بقوله ده الفرحه عوجت لساني ولا اي
الدكتور خالد: اوعى تكون ضيعت الدنيا
احمد : بس بس بس (ونزل وهو باين عليه أنه مبسوط على الآخر)
في جانب آخر
جميله: اي خلصت بره مش كده كنت حاسه
احمد : لميتي العده بتاعتك
جميله: و بتاعتك
احمد : أنا مالي هو أنا اللي أطردت
جميله: ينهار اسود هو أنا شيلت الليله
احمد : عيب عليكي
جميله: عيب عليك انت ولا عيب عليك ليه منك لله يا بعيد روح
احمد : في حاجه يا حاجه انتي مركزه ليه كده
المريضه: بشوف آخره المحن الناشف ده اي
احمد : محن و ناشف وش كده تعالي يا حاجه مالك
جميله: احمد يعني امشي
احمد : انتي لسه هنا ياله الوزير قالب المستشفى عليكي
جميله: ينهار اسود بجد
احمد : بتشتكي من اي يا حاجه
المريضه: دايخه
احمد: تعالي نقيس الضغط
المريضه: اجي فين ما تجيب الجهاز هنا
احمد : ما تيجي على السرير يا حاجه هو أنا هكشف عليكي وانتي على الباب كده ادخلي انتي مش غريبه يا امي
الدكتور علي: ( دخل لقي جميله منهاره و احمد بيكشف على المريضه )
الدكتور علي: خلاص بقا يا جميله الحمد لله لحد كده ونتعلم من اللي فات
جميله: نتعلم هيا لسه فيها علام ما خلاص اللي راح راح
الدكتور علي: اي يابنتي مكبره الموضوع ليه كده
جميله: (بتتشحتف وهيا بتتكلم و احمد بيضحك ضحك هستيري) بس شمتان فيا اذاي
الدكتور علي: دا هو اللي طلعك منها
احمد : قولها والنبي يا دكتور علي
الدكتور علي: خلاص بقا كفايه عياط وشوفي بتعملي اي
جميله: ما خلاص لميت كل حاجه
الدكتور علي: أشمعنا هتغيري المكتب ولا اي
جميله: مكتب اي بقا منا خلاص أطردت من المستشفى
احمد: لالالا انتي زاي البومب يا حاجه شويه ضغط عالي ومفيش حاجه متقلقيش
الدكتور علي: وطي صوتك يا تحفه انت
جميله: هتوحشوني
الدكتور علي: هو في اي
احمد : مفيش اي حاجه تقدري تمشي ياست الكل
جميله: ست الكل تسلم يا دكتور احمد
المريضه: أنا ولا هيا
احمد : (غمز ل المريضه فيما معناه انتي )
جميله: سلام
الدكتور علي: خدي هنا في اي
جميله: أنا عرفت من أحمد كل حاجه خلاص يا دكتور علي
الدكتور علي: طب المفروض تفرحي مش تعيطي
احمد : تفرح هههأءو هو خراب البيوت سهل عندكم اوي كده يا استاذ بعد اذنك يا بيه أنا مش هشترك معاكم في التمثيليه السخيفه دي ( وخرج من المكتب جري)
الدكتور علي: دا مجنون ده ولا اي هو قالك اي
جميله: اني أطردت و معالي الوزير قالب المستشفى عليا
الدكتور علي: (مقدرش يمسك نفسه من الضحك) وانتي مصدقه يا عبيطه دا بيضحك عليكي
جميله: بيضحك عليا يعني اي
الدكتور علي: المريض في حاله كويسه والطرف في حالة استجابة وكل حاجه تمام التمام
جميله: ياللي معندكش دم (ورجعت تعيط تاني بحرقه )
الدكتور علي: لا دا انتي بومه بقا مع نفسك
في جانب آخر
استاذه ريهام: اتفضل
احمد : اي
ريهام: عايز اي يا أحمد لسه بدري
أنا قولت عشاء مش غداء صح
احمد : منا بتعشا بدري أنا مالي بيكم
باب المكتب بيخبط
ريهام: اتفضل
جميله: انت هنا ياللي معندكش دم (ورجعت تعيط)
ريهام: اي ده مالك في اي
جميله: أنا جايه اشتكي الإنسان ده
احمد : هيا بتتكلم كده ليه انتي عايزه دكتور تخاطب على فكره
ريهام: اطلع بره هتجلطها
احمد : أنا غلطان اني نصحتك والله صحيح أخيراً تعمل شرا تلقا بعد اذنك
وخرج من المكتب
جميله: ينفع يعني يدخل عليا الطوارئ يقولي الوزير قالب المستشفى عليكي اجري بسرعه انتي أتطردتي
ريهام: (بتضحك) اهدي بس
جميله: هو أنا كل ما أكلم حد يضحك عليا تمام ماشي (وقامت تخرج من المكتب)
ريهام: خدي بس معلش حقك عليا اقعدي أنا مش هسيبه هطلع عينه
في جانب آخر
اسلام: ادخل
احمد: طمني عليك عامل اي
الزوجه: أنا عايزه افهم اي اللي حصل مع المحافظ ده
احمد : ولا اي حاجه الراجل لما شاف اسلام وشاف العمليه حب يعمله حاجه تسهل عليه الدنيا شويه ف ربنا كرمكم بالشقه ياستي
اسلام: والله العظيم
احمد : اه والله ياعم مالك
اسلام: ياما انت كريم يارب يعني امبارح كنت بتكلم معاه الفجر وبشكيله من حالي يعني مش عارف ادفع ايجاري و بأكل عيالي بالعافيه وعمري ما مديت ايدي في لقمه حرام والآخر دراعي يتقطع تيجي انت النهارده تقولي أن دراعي هيرجع تاني مكانه والمحافظ يجي واخد شقه لا اله الا الله
احمد : و اكتر من كده والله يا اسلام انت عارف ( وشد كرسي وقعد جمبه) انت ممكن تكون عملت الحادثه دي علشان ربنا أراد انك يتغير حالك في كل حاجه يعني ربنا كرمك في الشقه و كمان التعويض اللي طالع ليك أنا رفضت اكتب في الإقرار انك اصابه خفيفه لأن كده كده مفيش بتر أنا كتبت بتر زراع علشان يكون ليك تعويض تقدر تفتح منه مكان تعيش على مكسبه
الزوجه: اي ده هو في تعويض كمان غير الشقه
احمد : بالظبط كده ٢٥٠ ألف جنيه
اسلام: (من الفرحة بكا بكاء شديد)
احمد : خلاص بقا ياعم هعيط كده أنا كمان
الزوجه: انت طيب اوي والله يا دكتور ربنا يبارك في عمرك وتبقا اكبر دكتور في مصر
باب الغرفه اتفتح
الدكتور خالد: كنت عارف اني هلاقيك هنا
احمد : مينفعش تفتح الباب كده يا دكتور خالد افرد المدام كانت قاعده براحتها المفروض تخبط على الباب
الدكتور خالد: ( بصوت عالي) هو حضرتك جاي تعلمني الادب
المستشفى كلها أتلمت على الصوت
احمد : بس بس خلينا بره علشان الناس عيب كده
الدكتور علي: في اي يا خالد صوتك جايب اخر المستشفى
الدكتور خالد: اتفضل شوف الدكتور بتاعك
ريهام: (شدت الورق من ايد الدكتور علي) من فضلكم مش عايزه أسمع صوت ورايا على مكتبي
بعد دخول الجميع الي مكتب استاذه ريهام
الدكتور علي: ممكن افهم في اي
الدكتور خالد: بالصدفه وأنا بمضي على أوراق حالات مصابين الحادث علشان قيمه التعويض بتكون حسب الاصابه لقيت البني ادم ده كاتب حاله المصاب بتر زراع ورفع قيمه التعويض من ٥٠ ألف جنيه الي ٢٥٠ ألف جنيه يعني علشان يكرم المريض خلا شغلنا وتعبنا كله في الأرض من إجراء أول مره يتم في مصر وشهره لينا و للمستشفى وحاجة نفتخر بيها ضيع كل ده في جره قلم
احمد : هو انت تعبت في حاجه أنا اللي ربنا وفقني في الإجراء وأنا اللي بقول اني مش عايز من وراه اي حاجه حقي أنا حر اضيعه ألمعه أنا حر
ريهام: يا احمد ما المستشفى ليها حق انك ترجع ليها برضوه أستشير حد يا اخي
احمد : استاذه ريهام المريض ده الفلوس دي تفرق في حياته اكتر ما اسم واحد فينا ينزل في جرنال الفلوس مع الناس دي مش رفاهية الناس دي حتا مش لقين الحياه الكريمه انت بتفكر في اي يا دكتور خالد
الدكتور علي: أنا شايف أن احمد لم يخطأ ما لو كان الزراعة فشلت كان المريض هيكون عنده اصابه بتر التعويض وقتها كان ممكن يتغير اكيد لا يبقا وقتها ضاع على المريض التعويض ومن جهه اخرى المريض لسه تحت الملاحظه يعني لسه في خطر وممكن يخسر الطرف كان احمد المفروض يرجع ل مين
خالد : يرجع لينا يا دكتور علي
ريهام: احمد فعلاً رجعلي بس متاخر كان الورق عندك
احمد : دكتور خالد بعد اذنك حافظ على احترامك ليا في كلامك عيب تدخل قصاد المريض بتاعي تعمل كده
ريهام: احمد لو سمحت الكلام ده معايا أنا اتفضل يا دكتور خالد ع مكتبك وهطلب حضرتك تاني
الدكتور خالد: تمام
بعد خروج الدكتور خالد
احمد : أنا آسف قبل ما حد منكم يتكلم بس والله الناس دي الفلوس عندها اهم مليون مره من اسم واحد فينا ينزل في جرنال
ريهام: كنت قولي يا احمد تخليني وقفه كده مش عارفه الدكاترة عندي بتتصرف اذاي مش ممكن كده بجد يا أحمد كده كتير علينا والله
الدكتور علي: الله انتي مش بتقولي أنه قالك
ريهام: كنت بخبي عليه انت مش شايف خالد كان غضبان اذاي
الدكتور علي: كان كفايه الشقه يا احمد انت لازم تخلي عندك بعد نظر برضوه دي عمليه كبيرة جدا في المستشفى وفي طريقك المهني
احمد : عارف والله حقكم عليا أنا غلطان بس كل تفكيري وقتها اني جتلي فرصه أساعد الناس دي مش اكتر
ريهام: وانت لما عملت العمليه مكنتش ساعدت المريض لما المحافظ بنفسه قالك اطلب و أتمنا وانت طلبت شقه ل المريض دي مش مساعده روح على مكتبك يا احمد روح
احمد : طب خلاص والله بعد كده هرجع لكم في اي حاجه قبل ما اتصرف
الدكتور علي: خلاص يا ريهام حقك عليا انا
احمد : معلش بقا ولا انتي بتهربي من العزومه
ريهام: امشي يا مستفذ هتصل بيك وأنا ماشيه
احمد : بلاش تأخير اكتر من كده نرجع نلاقي الحمام طار ولا حاجه
ريهام: (بتضحك ومخبيه وشها) أطلع بره
احمد : خلاص بالراحه في اي
وفتح الباب وخرج
الدكتور علي: والله ما عارف اقوله اي
ريهام: المشكله أنه بيتصرف ب عفوية وبيعمل حاجات محدش يقدر يلومه فيها بس أنا خايفه يجي في مره يضيع كل حاجه بسبب غلطه بسيطة
الدكتور علي: الشخصيات اللي زاي احمد دي يا ريهام ربنا بيسترها عليها لانه مش عايز حاجه من حد هو عايز يساعد يساعد وبس علشان كده متقلقيش من تصرفات أحمد خافي بس لو خالد حب يوقع أحمد في كارثه كبيرة
