رواية كريات الدم السوداء الفصل الواحد والعشرون بقلم زحل
_عفته ومشيت
لكيت سليمه تنتضرني والفرقه
طالعين قبلنه سولفت الها
سليمه :وفعلا هاي الناس تحقق احلامها
واحنه نبقه نتمنى
_ رجعنا للبيت ،،وهيج ضل الباشا
يتردد علينا واكثر من مرة يجي بدون ام طيبه
وسليمه مكيفه .
سليمه:يمكن حبج
بس ديري بالج انتي تحبينه.
_وصاحبه
هم حبني تدرين اتعجب عليج
انتي نفسج الي حذرتيني منهم.
_وهذا الحديث الي بعد كل سهرة
كم يوم واحنه بقلق عله محابس الي غازي صار يفتر عليه ليل نهار وصلنه خبر دافع علينا جماعه حته الحكومه تكبسنا بوقت مايكون عدنا سهرة .
2 ت
سليمه:هاي سببها امج
مو جنا خلصانين وانشمر بالسجن .
_اجه الباشا ورغم رفضنا بس مااهتم
الباشا:احسن زين يسوي بيكم
هذا الي اسمه غازي.
سليمه:يااا ليشش.
الباشا:حته محد يسهر يمكم غيري.
9 ت
_التفتت عليه ورجعت موجهه كلامها اله.
سليمه:لا يكون تحبنا وتغار علينا.
الباشا:وليش لا .
_خفت من كلامه ونضراته لحد
ماطلع يله تنفست وهيج خلصها ويانه هو وصاحبه
الي يجي ويكول لاتنطون خبر للباشا ماعرف شنو الي بينهم ،،محابس الي بس يحصل فرصه يجفت علينا .
_يحجي ويااشر عله سليمه.
هيه وانه نفس المدرسه الي ماحفظنا
من المدرسين،، الصعده علمتنا اضعاف.
دار وجهه الها ماعرف شنو اللغز بينهم.
سليمه،:كتلك بس تغني ،،بس
لشوكت ضال انته و غازي مثل
الفارة والبزون.
محابس:لحد ما احطيحه .
سليمه:وربعه يسكتون عنك ؟
ترى هو ماعايل لاتنسه بضاعته الي محد طاح بيها
وانته ماعايز عداوه ،،ليش ماتنهي السالفه وكلمن يكعد بمكانه خو نجيه واخوها الي لازم تنعل والديهم .
5 ت
_كعد ونضراته عليه
رغم كلامهم جان واضح بس هم
اكو شي ماجاي افهمه .
1 ت
محابس:واحتمال جذاب
وماضاع منه شي .
سليمه:ياحق غير هو دك الناقصه بيهم
لا تورطنا انته احمي نفسك وغازي اول وتالي يلزم
ترى خلي ابالك اذا ضليت تضايقه راح يلزمك بسونه.
5 ت
محابس:اعدمه.
4 ت
_خذولهم مشوار سوالف
كام وهو موجه كلامه الها .
محابس:يله اروح وياريت تخلين طلعتج بس ويه الفرقه وربع ام طيبه مامرتاحلهم سلوم لاتوازيني
عله اذيتج.
سليمه:الي يجينا افضل مانروحله
هنا محد يكدر يفك حلكه بس بمكانهم
همه مسيطرين علينا وترى محد بحالها
جيتهم الي ولبنات نوشه وام طيبه.
_هز ايده ماقابل طلع
وانه بالي بي الف حسبه ومدري
احساسي بي حب لو شنو ارتاح من اشوفه
وبنفس الوقت مامتقبله وضعه .
سليمه:شوفي صارلها اسنين ويا
ومامقصر يصرف عليها وحاطه ابالها
يجي يوم ويعقد عليها .
_هزيت ايدي
من كل عقلها هو اسمه ماناطي الها
ولا تعرف عنه شي ههههه .
سليمه:الحب اعمه.
_وهيه فوك عماها مغمضه عيونها
ماتريد تشوف الحقيقه.
سليمه:ولج ام اعطوب
صرت اخاف منج .
5
_لازم تخافين
حجيتها وكمت للعرفه.
سليمه:اكبر راس بالصعده ماخوفني .
_مارديت عليها وهيج خلصتها وياي مرة تلين ومرة تعصب،،
ايامي تشبه بعضها اشتاق لامي وجعيفر وضلت حسرة بكلبي انجمع وياها بيت ،،حضرت الصاله ودخلت ابدل ملابسي اجه الباشا وام طيبه ويا طول الكعده هو يسرق النضرات بعد ماطلع روحي بطلباته للاغاني
كمت من يمهم اشرت لسليمه لحكتني للغرفه جريت صايتي ونقالي بيدي دخلت تباوع مستغربه.
7 ت
سليمه:وين رايحه .
_بالي يم مديحه مااتاخر
شويه واجي.
سليمه:خوش من يروحن اخابرج .
_طلعت التفت عليه هز راسه بمعنى وين
ماجني اشوفه طلعت وانه احجي بكلبي
دروح مسوي روحك تحب وانته حاضن ام طيبه وعينك مني وصلت تلكتني مديحه .
10
_بالي يم محابس .
مديحه:لو غازي يصفي لو هو يصفي غازي
ولا تلومين روحج ترى شغلهم وهمه عداوه
ملعيج انتي.
_يله اروح تاخر الوقت.
مديحه:عود هم تعاي.
_بوستها وطلعت راجعه للبيت ومااحس اله انجفتت اثنين شباب بعمر كفه كلت انتهى امري دكيت روحي بالكاع دنك واحد منهم يريد يشيلني صرخت صفكني عله حلكي مالحك يرفعني من الكاع من شاف اجن النصافت يركضن ،،شمرني والتفت اشر لصاحبه طفرو يتراكضون من خوفي ضليت اصرخ جرنتني حربا انخبص الشارع ناس تصوفر وناس تصيح.
4
حربا:مناااا ركضو صوب الكراج.
_دنكن عليه حربا ومديحه شالني وصلني لبابنا
طلعت سليمه مخترعه سولفو الها دخلت حيلي مهدود .
سليمه:غازي اكيد .
_كامت تريد تطلع صحت وراها
وين رايحه لاتخليني وحدي.
سليمه:تعاي وياي مديحه.
بس خل اطيهم خبر
لا يوصلونها لمحابس .
_شكد ماجنت اكول ياريت يكتلني غازي واخلص
بس صدك لو كالو الروح عزيزه اجت سليمه .
سليمه:هذا انذار لو رايد يسوي شي
جان دز عليج واحد يطكج بسجينه
ويخلص عليج بنفس الساعه.
_يعني شنو .
سليمه:يعني رساله لمحابس
جاي يكله ابعد من دربي .
سليمه:مو عبالج بهاي السهوله
احنه هنا محميين والدليل شفتي فزعت الشارع والنصافات شلون لو بغير مكان جان محد تقرب لو يشوفونج تموتين الناس تخاف .بالنسبه لام طيبه بيتها يعني لا مريود منها اجار ولا شي وهم ماعدها عداوة.
_نبقه هيج كل عمرنا
شوكت نخلص من هل عيشه.
سليمه:هاي تبقه انتي وحظج
وبلكي مثل عماتج ويجيج واحد بي خير.
_صفنت بكلامها
بس عماتي جانن حلوات كلش
وبالاخص سلطانه .
سليمه:وانتي شما تكبرين
جاي تشبهيهن.وبلكي ها الفترة
نلم فلوس ونكدر نضمن عيشنا اذا طلعنه منا.
_بقه كلامها براسي
تعدت فترةعله الصار وماحبس مابين وكل مااسالها عنه
الباشا:ام الحب بله شوفي
تلفونج كم مكالمه حضرتج
ليش متجاوبين.
سليمه:دشوف وجهي وانته تعرف
ترى توني كعدت .
الباشا:غير اليل كله تفترين
بالحفلات وين ام اعطوب.
_التفتت عله المرايه
اباوع لشكلي بسرعه بللت اديه وسفطت اعطوبي دخلت عليهم رفع راسه باوعلي دنكت شلونك باشا ؟
الباشا:اسمر واخبل.
_مدري ليش
اتعثرت كوى عبرت من يمه للغرفه
احس نضراته كصتني كص
ضليت واكفه يم الشباك كامت سليمه وهيه تحجي .
الباشا:ام الحب يرادلج جرة اذن.
سليمه:ليش عيوني .
الباشا:تلعبين بذيلج هل الايام.
سليمه:العب ويا الدنيا كلها اله وياك .
باشا انته تدري ام طيبه صديقتي ومااكدر ازعلها ،،
الباشا:خو كولي اخاف
منها ولزماتها عليج هواي .
_خلت الكهوى عله الطبله الي يمه وكعدت
وجهه ضل ينطي الوان .
سليمه:لا مو هيج بس هيه تغار عليك واذا عله جيتك يمي اخليك عله راسي بس بشرط هيه تجي وياك .
_كام متوجه عليها دنكت بخوف
جرها موكفها كباله وحجه بعصبيه .
_طلعت بوجهي للطارمه قفلت بابنا ورديت
يمها شلت الكهوى وسويت غيرها وحضرت اكل
حطيت الصينيه كبالها وكعدت باوعت عليه مستغربه تصرفي ،،اشرتلها يله انزلي اكليلج لكمه وبعدين نشوف شنو نسوي .
سليمه:شنو سوي وهو كال ساعه.
_واحنه مو بكيفه ولا مشترينا.
ضلت صافنه خلصنا اكل نضفت وحضرت الصاله
دك نقالها.
سليمه:وهذا الغضب الثاني
هسه شسوي .
_سحبته منها تفاجئت مانطيتها مجال
بسرعه فتحت خط ورديت نعم.
!!هاي منو الي ترد سونه لعد باجيتج وين.
_مريضه اسم الله عليك
كول رايد شي.
!!اي عله اساس نسهر يمكم اليوم.
_اي بس احنه نريد نروح للطبيب
فد ساعتين وتعالو،، غلقت وهيه تخبلت.
وقبل ماتحجي كلت الها خليج وراي وشوفي
شلون راح اخلصج منهم سكتت ،،لليل اجه الباشا
بعده ماكاعد اندك الباب دخل صاحبه ضلو واحد
يباوع بوجه الثاني حجيت مسمعتهم اكو شي معين تردون اغيلكم .
1
الباشا:ننتضر ام طيبه.
_حجاها ولزم نقال خابرها
شويه واجت بدت سهرتهم وطول الوقت الباشا
يحاول يلفت انتباهي بتصرفاته ويه ام طيبه
نقذني صوت نقالي كمت متحججه بي بس وصلت الغرفه سكت استغربت مديحه شكد متصله رجعت اتصلت بيها ماردت شبيها وليش هلكد مخابرة اكيد محابس يمها ضليت لازمه النقال انتضرها بلكي
تخابر شويه وصلتني رسالة مضمونها محابس
يتنضرج يم بابهم ،،صفنت هو ولا مرة دخلني
لبيتهم وحته هو مايتواجد بي ومن زمان مقفول
لان اول مكان تدخله الحكومه هو بيته لبست
صايتي محتارة شلون راح اطلع بعدني واكفه
ودخلت عليه سليمه تباوع بوجهي
1
سليمه:ها وين .
_مديحه مخابرة عليه هواي وهسه
اتصلت بيها ماترد،،
سليمه:شو بله خابريها.
_ماترد
تقربت اخذت النقال
مني كلبت بي.
_طلعت ونضرات الباشا تتبعني
بسرعه ركضت بتجاهه بيت محابس
كفه واكف هو وكم واحد التفتو عليه مسغربين
ماطيتهم مجال يسالون مشيت مطيتهم ضهري
وصلت الباب شو ضلمه ماكو احد اكيد هاي سوالفه
دفعت الباب ودخلت وانه احجي ،،وينك ادري مواعدني بالضلمه شكو خاف عايزة هو انه حياتي سوده ،،دك كلبي حسيت بخطر ،،رجعت بخطوات بطيئه اتلفت بعدني مادرت وجهي انجفتت ،،صرخه مال خوف حته مابيها صوت بسرعه ايد اتخلت عله حلكي سحلني اريد جسمي يعيني عبالك تبنجت كل مايمشي بيه خطه للداخل يزيد خوفي عرفته كمين بثواني قيد اديه وجرني من شعري موكفني ضلمه ماشوف شي منه
بس من خلال لمساته عرفت شخص ضخم حجه بصوت خشن .
!!ديري بالج اطلعين صوت لان مايلحكون
اخلص عليج قبل لا يعبرون الباب مارايد ااذيج
ترى لو ابالي اكدر اذبحج وانتي بفراشج.
_هزيت راسي بمعنى
وخر ايده دنكت اخذ نفس
رفعت راسي ضلمه بحيث انفاسه قريبه
بس ماشوف ملامحه عرفت هذا غازي.
!!اي اميلت محابس
وينه الي دك صدرة وعلن انتي تابعتله.
_عرفت من نبرته مو غايته انه
بلعت ريكي
رديت عليه ترى مااعرف شي
ولا اندل البضاعه ولا جنت ادري
بجويسم ماخلاني اكمل .
غازي:وتتوقعين مااعرف
شوفي لو شاك مجرد شك عدج
علم جان سويتج عبرة لمن اعتبر .
1
_كلامه زرع امل انو هو مراح ياذيني
رديت جا المن تفتر عليه .
!!لان انتي طعم محابس .
_وهو ماله شغل ولو ادري
اله ايد جا اشتكيت عليه.
_مافهمت يعني هو يعرف
منو القشمر جويسم يسوي وياك هيج.
!!لا بس يريد يجذب جذبه ويصدكها.
_يعني يعرف.
!!لا بس شاك بالشخص
الي عرف مكان البضاعه
ونقلها لغير صفحه.
_كلامه مال واحد يريد يوصلي
معلومه صفنت منو لحضات وصوت
طلقه ثارت نفرعت جرني يريد يمشي بي صرخت
صفكني عله وجهي مااهتميت للالم ضليت اصرخ وهو مستمر يكفخ بيه ثارت طلقه ثانيه
والشارع انخبص صوت ركاضهم ،،دفعني حيل وركض
عرفت ابتعد اريد اندل اتجاه الباب حته اتحرك كلشي مااشوف صار صوتهم قريب عرفت ولد المنطقه راح يدخلون ماتحركت بعد لحد ما صارت اضويه نقالاتهم بوجهي دنك عليه كفه فتح اديه .
_مارديت عليه بس عبرت
الباب اجت سليمه تركضه
لزمتني تكلب بيه بخوف.
سليمه:خو ماسوالج شي .
_هزيت راسي لا
_لا بس شوفي مديحه اكيد ماخذينها
ولج الرساله اجت من تلفونها الحكي .
سليمه:لا تخافين مابيها شي بساعتهاوديت النصافات عليها
لكنها مربطه بالطارمه مالتهم
خطيه ثاري جافتينها وماخذين نقالها دزولج الرساله وخلوها مربطه .
_خو مامسويلها شي.
سليمه:لا بس مارادت امها تعرف تكول يوكف كلبها ،،خليت كم واحد من الولدقريب عله بابهم.
_ احس روحي راح اطيح.
انتجيت عليها متوجهين لبيتنا والولد
ضلو يدورون اباوع الشارع كله نسوان وزلم
كل واحد يركض بصفحه والي لازم سجينه
والي بيده حديده وبس سمعو سيارة الشرطه
احتفو بثواني وكفت سليمه وهيه تحجي.
5 ت
سليمه:اذا سالوج منو الي رمه كولي غازي
شنو جابج هنا كولي رايحه لجيرانه
وسحلني من الشارع.
_حجيت الي كالته
مااقتنع الضابط بكلامي.
الضابط:٠جيبوها للمركز.
_حجاها وصعد سيارته
اخذني الشرطي يمشي ويسب بيه
لحد ماوصلنه استلموني سوال وجواب .
الضابط:يعني متعرفي.
_ غازي بس مااكدر اسجل دعوى اخاف .
الضابط:تمام وانه ما راح اجيب اسمج بس الي اريده اي شي تعرفي تبلغينه هذا رقمي وبس تحسين
دخل الشارع انطينه خبر.
_هزيت راسي بمعنى اي
وقعت عله اقوالي وطلعت لكيته كاعده.
سليمه:ها بشري خو ما كلتي اعرفه.
مشينا وبالطريق سالتها شلون عرفتو .
سليمه:بعد ماطلعتي بشويه
الباشا كال خابريها لان راح نبقه للصبح ورادج تغنين اتصلت طلع تلفونج بالغرفه رديت خابرت مديحه مغلق من كتله بسرعه كام
وجرني وهو يصيح وين بيت صاحبتها مالحكت ارد عليه اندك الباب ركضت لكيت كفه كال شايفج عابرة لبيت محابس مااشوف اله الباشا طلع يركض وهو يجر كفه حته يدلي طلعت وراهم لكيت الولد كلها تتراكض
،وهجمو عله بيت محابس.
_سالتها منو الي رمه
وكل ضني محابس .
سليمه:الباشا .
_محابس وين .
سليمه:انه كتلهم لا يوصلوله خبر
لان راح يجي وهذا الي يريده غازي
واذا هل مرة فلتي مرة ثانيه مايعوفج
اله محابس يصير بيده .
_دخلنه للبيت
شمرت روحي عله القنفه حايرة
بدنياي شسوي وين اروح يعني حته لو طلعنه
من الصعده غازي مايعوفني ،،و محابس
مو ضهر وانتجي عليه .
سليمه:لازم اطي خبر لابوج.
_وعله اساس ابوي
راح يجي يضمني بحظنه
شوفي لازم هاي الفترة نلم مبلغ زين.ماردت عليه خابرت ابوي وكالتله
ماعرف شنو رد عليها اسمعها تغلط
_يومين انه من الصار جسمي كله
يوجعني و مالي خلك دزيت عله مديحه اجت والخوف واضح بعيونها ،،شوفي بعد مااكدر اجيج لان احتمال حته انتي تنجرين وياي ..
مديحه:ترى مريضه ومااجيتج
وهم ماردت لا امي ولا محابس يعرفون.
_كمت طلعت فلوس
خليتهن بيدها استغربت اشرتلها لا تسمعنا سليمه
اشتري نقال وخلي بس النه محد يعرف رقمج غيري .
مديحه:خوش فكرة.
_بعد سوالف وكعده طويله وياها
وشكد حاولت تعرف الدار بيني وبين غازي
ماحجيت الها راحت ايام ورجعت اطلع حفلات
والباشا متضايق ويحاول انو يخليني بس اله .
_وانه ماعدي شي اخاف منه بس
مو ابالي الباشا ولا غيرة
سليمه:اي عفيه .
_ومنا غازي شن حرب عله
الشارع صار يدفع علينه الحكومه
لو يدز جماعته يعاركون ولد الصعده الي يوكفون بالتقاطع منهم الي يجدي والي يبيع كلنس لو يمسح جام سيارات ويوميه صايرة هوسه كاعده ونضرات الباشا عليه لان صاحبه يسولف وياي وعرفت يحاول ايغيضه وهيج يخلص سهرته يمنا طلعو وانه صافنه.
سليمه:لاتصفنين
_لازم نصفن.
سليمه :يعني شنو .
_فرصه نخلي نستغلهم يدفعون اكثر
سليمه:مانصحج .
_ماتفيد النصيحه بعد
سليمه:محابس ماراح يعوفج.
_وانه مااطلع من وكر العهر
وادخل زاغور الممنوعات
نكمل المبلغ الي نكدر نشتري بي حته لو حواسم
ونطلع منا بدون محد يعرف بينا نشري ثلاجه ومجمده ونترسهن مسواك مال سنه كون مانحتاج سوك وهيج محد يعرف مكانه ،، اسولف وهيه صافنه عليه كامت لغرفتها ورجعت نقالها بيدها خلته كدامي استغربت جا ماتردين انه شكو .
سليمه:انهيها ويا .
_اخذته ورديت بملل نعم .
محابس :ولج يصير كل
هذا وماتحجين.
_وكل هذا بسببك
كفني شرك ومال تريد اطيح غازي
ومسوي روحك زين وهامك جويسم
هاي بعد ماتمشي وانه اكلك معليك
اخوي الله ياخذ حقه،،وشغلك ويه غازي
خلصه بعيد عني ،،شمرت النقال وكمت
ضلت هيه تحجي ويا وحته ماسالتها
شنو كال ،، لليل طلعنه حفله
رجعت ميته تعب بعدها بفترة الباشا وصاحبه
يمنا واندك الباب طلعت لكيته كاعد بالدجه .
محابس:عشكتي .
_لو عندي قلب اعشك بي
غير صوتي ماتحصل الزلم .
2 ت
محابس:وانه اريد اسمع حالي حالهم.
_احس زرف كلبي بكلامه بلعت غصتي
ورديت عليه،،تمام خابر سليمه واحجزني
اطلعلك وين تريد ،،كام وهو يهز راسه تمام
انطاني ضهرة ومشه بخطوات ماموزونه عرفته سكران دخلت اشرلي صاحب الباشا تعاي يمي بعدني ماواصله
كام الباشا جرني كعدني يم سليمه وصاح
الباشا:بس تعالو.
_يجرها جر صوته حلو رغم خشونته
عرفت البينهم اعناد وهاي فرصتي
سحب الترمز مال الثلج خلاه كباله ويدك عليه .
الباشا:والله لو احجيللكم
_من اول احجاااااايه
تهل دموعكم بس تعااااالو
والله جيتو العزييييز بعمر
اطشنه فدى لعيونكم.
2
الباشا:منو الي تفدين العزيز لعيونه.
_بعد ماعندي عزيز.
ام طيبه: ومحابس .
_ابن شارعنا
وانتي مو غريبه عله علاقتنا كل ولد الصعده
انحبهم ومو بس انه وسليمه من النصافات لحد
صوله بالنسبه لمحابس وكفه يعتبرنهم ولدهن.
سليمه:صح .
_التفتت عليها ام طيبه خزرتها
ومااعرف شنو سر الخوف ليش هيج
سليمه حذرة منها وهيه ماواحد يكدر
يهددها ،،ضل الباشا ينضرلهن بشك التفت عليه .
_ صح وابوي طلب منه شغلات
من ينفذها نتمم خطوبتنا،غير الموضوع صاحبه
وبس طلعو هجم علينه محابس .
سليمه:المن اجيت ولك
تريد غازي يفلش علينا الشارع
كتلك اطيني مجال احل السالفه.
_واخذولهم مشوار عرك وهوسه.
محابس:لحد ماتنحل ممنوع
ام طيبه وربعها يدخلون.
_ضحكت مستهزءة
ههههههههه الغيرة
ماتلوكلك ،،صفكني راشدي.
لزمته سليمه وهو يتهدد
_دخلت لغرفتي وصحت
يعني حفلات المزارع مابيها زلم.
ولك مصدك روحك تغار تقرب للباب
حجه بصوت عالي.
محابس:اذا سلمت روحي
تصبرين عليه لحد مااطلع
لان انحكم سنوات طويله .
_انتفضت سليمه
بخوف .
سليمه:يصفونك جوى
ولك تخبلت تضيع تعب هاي السنين عمتك الي شبعت ضيم ومانطتك تالي تخليهم يطيحونك كتلك اصبر اصبر.
_طلعو وهو يهدد بيه
وهيج خلصها محابس من يشوف الباشا عدنا
يضل لازم الباب واكيد هاي فرصه لغازي تعبت كلش وهيه متخبله شلون اذا الزم لو سلم نفسه.
سليمه:الي يحب بشر يحمي
ولج يهون عليج يروح برجليه للموت ينحكم اقل شي مؤبد اذا ماصفو جوه السجن.
_شسوي كليلي
تعبت لا قابل يعوفني ولا يرضى
يبعد عن غازي ترى مليت ،،وانتي تخافين من الباشا
لاتكدرين اطردينه يعني انه شو بيدي يله حليها.
سليمه:وهذا الغضب اتصل.
_شمرت عليه النقال
بس سمع صوتي صاح.
الباشا:بعد ممنوع منعا باتا تغنين
يم اي شخص و.
_ليش مشتريني .
الباشا:نشتريج ليش لا.
_سديته بوجهه
والتفتت لسليمه هااا.
سليمه:ماراح نخلص منهم
_هسه انه اخلصج
وماكو غير حل .
سليمه:اطربينا .
_اكولهم محابس خطبني وبطلت اغني.
سليمه:انعل ابوج لابو محابس
تردين تورطينه بت الصخل غير
يدفعون عليه الحكومه .
_مشكلتهم
وبعدين الي يردني مهنم
خو يتزوجني.
سليمه:ههههههههاي كل عقلج
خاف صدكتي نفسج.
سليمه:معناها الحظ كعد وفرصه ماتتفوت.
_وثاني يوم اجه الباشا
طلعت كعدت كباله وبدون مقدمات حجيت باشا انه بعد مااغني بطلت .
الباشا:ليش علنتي التوبه.
_هيج شي
لان تقدملي شخص واريد اتزوج
وشرط عليه ابطل.
الباشا:محابس وتشتغلين ويا بالممنوع.
_لا شخص مو منا .
الباشا:وكيفج تصرفين منو كال انه اقبل.
_اذا اتريدني اخطبني.
الباشا:هههههههههاي.
_التفت لسليمه الي دنكت تخفي ضحكتها
كمت متوجه للغرفه بسرعه طفر جرني .
الباشا:النضر للشيء العالي والبعيد متعب.
_نتعب مادام
يوصلنه للي نريده
_وانه مو اقل منك
واذا مو عاجبك غيرك قبل .
الباشا:تمام الله يوفقج.
2 ت
_طلع مزعوج .
وراها كام يجيب ام طيبه
ويجي وكل عقله يغيضني
واستعملت نفس الاسلوب ويا
اتقربت لصديقه ،،وهذا كيف وجان يعرف
جاي احاول اغث الباشا ،،وبيوم خابر عله سليمه طالب منها اطلع ويا رفضت تفاجت.فتحت الصوت وخلت النقال عله الطبله كبالها واشرتلي اسكت .
سليمه:تعذرني مااكدر اطلعها.
!!ليش؟
_لان الباشا
كال رايدها .
!شوكت .
_قبل ساعه.
!!خوش من ترجعين .
5 ت
سليمه:لا بعد مااتغني لشخص بس اله
وهو راح يخليلها مكان خاص بيها
واتفق ويانا .
_ضليت واكفه استمع وهو
صفن شويه وكال.
!!يتزوجها يعني.
سليمه:هيج شي .
_سده بدون مايعلق عله كلامها .
التفتت عليه .
سليمه:لاتصفنين هيج يله
نكدر نخلص منهم .
_غير اعرف شراح تصخمين.
بعدين غير همه اخوان مدري كرايب
اكيد راح يساله وراح يدري تجذبين .
.
سليمه:مايسال
وحته لو هم مراح يصدك
لان بينهم عداوه وهيج راح نضمن
غازي مايوصلنا ،،ومحابس يضطر يصالح ويا
وهيج نضمن سلامته وسلامتنا .
_قطع حديثنا نقالها دك
فتحت خط تقربت يمها اسمع .
سليمه:ها عيني.
!!ترى يجذب وحته لو عقد عليها
فترة ويعوفها لان هو يحب ام طيبه
واعناد بيه سوى هيج،، لان يعرف انه رايدها.
شوفي مستعد اعقد عليها وانطيج المهر التردي.
سليمه :اذا رايدها ليش لا .
!!تمام تمام بس لا تحجين شي
حاولي تتعذرين منه لحد مانكمل
امورنا ونفاجئه.
!!اي بس قبل كل شي
احنه لهسه اسمك مانعرفه
!!علاء اسمي علاء.
سليمه:تمام خل اقنعها وانطي خبر لابوها وامها بين ماترتب امورك .
!!اوك وانه شوي واتصل بيج
نتفق عله كل شيء..
_نهت مكالمتها ويا .
وكامت صحت وراها شنو سويتي وبله صدك راد يعقد عليه .
سليمه:الحياة فرص
شوفي مو هين عليه اكسر كلب محابس بس صدكي لا هو يرتاح ولا انتي هاي اذا ماانقتل
ولا انتي بجمالي لو احله من البنات الي بيت نوشه
وشوفت عينج صار سنين لا كدرن يلمن ولا وحده تزوجت برا الصعده خيرتهن انه اخذت ابوج
واحسبي حساب الفرصه تجي مرة بالعمر اذا بيج خير استغليها اشرطي مهر وكون يحطلج مكان وهيج تكدرين اطلعين منا ولمي امج واخوج .
_شبيج مجذبه الجذبه ومصدكتها
ترى انتي تعرفين غايته بس يغث صاحبه يعني اول وتالي يشمرني.
سليمه:وهم انتي الربحانه
فرصه تاخذين من فلوس شكد ماتكدرين.
_وبعدين.
سليمه:اذا حبج
كملي حياتج ويا واذا هو غايته الباشااحنه غايتنه نوهم غازي ونامن عله محابس ونكدر نطول فترة خطوبه لحد مانحل امورنا وبلكي نطلع منا.
_ايام وليالي هيه تحجي
دزت عله مديحه وسولفتلها.
مديحه:بس محابس راح
يسكت مو خاف يسويلنا مشكله.
سليمه:ماريد حرف يطلع لحد مانكمل مديحه:انه من راي سليمه.
_التفتت عليها متفاجئة
عافتني وطلعت ثاني يوم كعدت عله صوت امي عرفت هيه دزت عليها .
وهم اخذت الها مشوار مرة تغلط ومرة تبجي .
_يمه يجذب
سولتلها عله امل تكلي يولي.
نجيه:عمتج قنعت شيخ الناس
تحسبله الف احساب
وهذيج هيه خلفت وجننت.
بلكي الله يهدي الج ويستر عليج صدك.
_احس بروحي مثل الدوامه
من كثر كلامهن وجملها ابوي الي اجه يتلبد وهم يومين هو يزن براسي
اخر شي كتلهم اي بس ماكو زواج لحد ما يخليلي مكان نكعد بي انه وامي .
سليمه:خوش حل.
_خابرته سليمه والمصيبه
قبل بكل شروطنا اتفقنا عله كل شي.
سليمه:هاي هيه بعد ماكو شي
عكب باجر يجيب الشيخ تعقدون وبعدها انتي وشطارتج وانه ماراح اعوفج .
كامت امي طلعت وياها وصلتها
للشارع ورجعت متوجهه لمديحه كلت خلي اذب همومي يمها ماعندي غيرها امشي واحجي بكلي
هاي هيه يمكن احسن من غيري عاد حته لو طلكني اسمي مطلكه عاد اهون لان اكثر بنات الصعده فقدن
نفسهن بطريقه حقيرة لو بحفله ويسغلوهن لو ينباعن
اسولف ويه روحي وحسيت بخطوات وراي ماخفت لان من وصلت امي للشارع النصافات واكفات
ضليت واكفه جرني ماقاومته بس من توجه بيه للكراج
تخبلت ولك وخر وخر مافوت هنا لو تذبحني .
محابس:الولد مأمنين المكان تعاي بس احجي وياج.
_دخلني يسحل بيه
بجيت ماريد ادخل ولك روحي مااطاوعني هنا
جان جويسم يشاقيني ونسولف .
محابس:احسن اله ارتاح .
_دخلت اتلفت شايلين الغراض الي جانن بالغرفه وكفت امسح بدموعي
شتريد يوميه جارني .
محابس:تخططين وكل عقلج يطير
بالصعده وانه ماعندي علم بي.
_حاولت اغشم روحي
رديت عليه وشنو الفايده .
اتقرب جر الشال شمرة دفعته صفكني عل حايط
جرني من شعري وهو يحجي .
محابس:غلطان الي يكول تشبهين
سلطانه انتي نسخه من سليمه .
ولجججج ليييش،مو كتلج اصبري
ولا تكولين جبروني جذابه عشكتي .
_شمرني طحت اريد اكوم كرفص
كبالي هزيت راسي لا سولفتله كل شي عوفني اذا تحبني بلكي اخلص من الصعده وضيمها ادعيلي انستر .
محابس :سنين وانه اخطط
شلون احميج وعاديت سليمه لخاطرج.
_ماالنا نصيب،،وانه كتلك من قبل اذا ماتبطل شغلك
وتعوف الصعده مستحيل اقبل بيك
محابس؛وقبلتي بي.
_نفذ شرروطي
يعني مشتريني .
محابس:اكتله واكتل روحي مو انه الي يتوخذ تعبه خاوه.
_يعني شنو توكف بنصيبي
مارد عليه طلع نقاله من جيبه
مدري عليمن اتصل وكل ضني سليمه.
محابس:سدو باب الكراج وانطو خبر للنصافات لا تغفل عيونهن .
_ركضت لمني من صايتي
التفتت عليه ولك عوفني شبيك تخبلت
شتريد شتريد .
محابس:ليلتي.
_هزيت راسي يعني شنو.
محابس:اسنين وانه اخطط لهاي اليله ويجي هو
عله الحاضر ياخذج تردين ترحين لحظنه .
_هزيت أيدي
رغم الخوف بس حاولت احجي برود
مثل انه موافقه حته انته تخطط.
سالتني كتلي .
محابس:اي هسه اسالج اختاري
تردينها بالحلال لوو؟
هاي تكمله البارت السابق
،،،اتمنالكم قراءة ممتعه
الي يسالون او يعلقون ليش مدا اذكرين قدر
عيوني كل شخصيه والها وقتها بتاريخ
حياتهم واحداثهم كل بطل او بطل واحداثه الي جرت
بوقت يختلف عن الثاني .
شكرا لزيارتكم عالم روايات سكيرهوم
