رواية أعظم خيانة الفصل الثاني والعشرون 22 بقلم الزهيريه

عندما تتحمل شيء فوق طاقتك 

من الطبيعي ان تتغير شخصيتك 

ونفسيتك دون ان تشعر 

ريماس/ احنه نمر بعلاقات تخلي أثر ابد ما ينسي لانه الشخص يكون اله مكانه خاصه ما تنسي ابد ومن تنتهي العلاقه لو تمر سنين ما تنسى شخص حبيته بس تتنسى حتى تعيش حياتك واني بيان اول حب بحياتي ومن نهيت علاقتي بي إذا نسيته اكذب ساكن بعقلي وبگلبي ليل ونهار بس اشغل روحي حتى أتناسى واني يوميه بالليل اروح اجيب حلويات لأخواتي ومن گلي ابو الاسواق على بيان ويريد يجي يخطبني 

بصراحه نسطر راسي اني چنت مصوره إذا انكسر السيم كارت راح يتركني بس بيان ثبت العكس وانه الخلاص منه مو سهل اخذت الحلويات ورجعت للبيت واني عقلي يدور حول بيان شلون لازم اي تواصل بيني وبين بيان ماكو بس شلون وهو يعرف اني وين ساكنه 

وبقيت ذاك الليل حسبه توديني وحسبه جيبني وللفجر استقر بيه الحال انتقل لغير بيت حتى اگطع كل الطرق على بيان ونمت وجه الصبح وما گعدت غير العصر 

وبس أكلت وسبحت وبدلت ورحت على ام رحاب لانه اريد اشوف رحاب ومن وصلت ودخلت ام رحاب نايمه دخلت لغرفة رحاب چانت گاعده وصافنه بسگف الغرفه وصلت يمها وبستها من خدها يله انتبهت عليه گعدت وخلت المخده وره ظهرها واني گعدت قريب على رجلها گتلها . هااا ويگولون رحاب مريضه هاي وينچ مثل الحصان رحاب ما تتمرض تقتلها الفئه الباغيه 

ضحكت وجاوبتني 

رحاب / عزه بعينچ صار 3 ايام ما ضاحكه وهسه انتي ضحكتيني 

ريماس/ اضحكي يا معوده باچر عگبه ميتين كل شي ما ناخذ منها بس الوصله البيضه هاي مقولة المفكره البروفيسوره صفيه مشعوله الصفحه منين اخذت هاي المقوله ما اعرف ويا ريت التزمت بيها إلا ضيعتنه اني وجهالها 

وهاي رحاب ما تت من الضحك 

رحاب / ولچ كافي انتي ما يخلص منچ لا الحي ولا الميت اگلچ ريماس ما اعرف ليش احس روحي راح اموت 

صدگ فزيت من گالت هيچ اتقربت عليها وحضنتها قوي وگتلها / الله عليچ رحاب لا تحچين هيچ والله گلبي خلصان انتوا اثنين اخاف لا افارگكم انتي وام زهراء ما عندي بس الله وانتن ليش تگولين هيچ شنو گال الدكتور

رحاب/ بعد الكشف الأولي يشك الدكتو انه بيه سرطان بالعظام وحتى نتأكد سوينه تحليل يگول يومين يله يطلع بس والله حاسه نفسي راح اموت قبل اسبوع حلمت امي بالسوگ واني امشي وراها وهي تگلي يله ولچ أغاريد بسرعه لحگيني ما بقى شي وتوصلين الي لهذا اگلچ راح اموت 

ريماس/ لا تگولين هيچ والله گلبي ينشلع من مكانه تفألي بالخير ما بيچ شي رحاب انتي قويه 

رحاب / شوفي ريماس اني ما أخاف من الموت بس اخاف لكون وحدي آني متاكده ام رحاب بس تعرف بيه سرطان راح تگلي اطلعي بيت وحدچ لانه بعد ما أنفعهم اريد تبقين ويايه لحظاتي الاخيره ومن اموت ما اريد ام رحاب وعصابتها يدفنوني مثل ما دفنوا امي وحدها دفنوها بين ناس غربه الله يخليچ اريد انطيچ عنوان مزرعه من اموت لا تگولين لاحد گبل روحي على المزرعه هناك أهلي بلغيهم خلي همه يدفنوني 

 ريماس/ لا تحچين هيچ انتي كل شي ما بيچ وذكرتيني بعنوان مثل أبويه الله يرحمه انطاني عنوان اهله رحت لگيتهم منتقلين لغير مكان وما اعرف همه وين ان شالله ما بيچ غير العافيه 

ونفتحت الباب ودخلت ام رحاب وتفرك بعيونها وكفشتها تخرع وهي تگلي 

ام رحاب / همزين هزيتي طولچ واجيتي صخونه جبتلچ سيم كارت وأرقام اصدقائچ تتواصلين وياهم وابو شوارب يگول ذوله الاثنين خلي تستدرجهم النه 

ريماس/ ومن صدرها طلعت الموبايل مالتها وطلعت صور اثنين الاول هذا تعرفت عليه قبل شهر والصدمه الثانيه چانت صورة بيان 

تخبلت شنو تريد اسحبلها بيان بس ما حچيت شي 

بعدين گتلها / اريد انتقل من بيتنه اريد ارممه راح منتهي وأجره 

ام رحاب / حبيبتي ترميم اني وياچ بس تنتقلين منه لا لانه بيتكم امان إذا رحتي بغير منطقه والناس شوفچ وحدچ وياچ بنات صغار ثاني يوم تذبحن هنا الناس تعرفچن بنات يتيمات وينقهرون عليچن وما الهم شغل بيچن استچني واگعدي وإذا تردين تعالن اگعدن يمي لما يخلص بيتكم 

ريماس/ وآني اعرف خطة ام رحاب تريد اگعد يمها مثل رحاب لهذا جاوبتها / لا هسه اشوف بيت إيجار بالمنطقه لما يكمل بيتنه 

وهي ما حچت شي وطلعت من يمهم واني ميته قهر على رحاب ومن وصلت لفرعنه دخلت يم ابو الأسواق بحجة دى اشتري منه

 گتله /راح انتقل منا وآني متعلمه على حلوياتك 

هو وظل متعجب ويگلي وين راح تروحين وانتي بعدچ صغيره 

جاوبته/ راح اروح لعمامي 

واني گتله هيچ حتى أخاف يجي بيان يسأل عليه يگله انتقلت منا ورجعت لبيتنه وعلى ثاني يوم اتفقت ويه ام زهراء حتى ابو زهراء يشوف واحد يفهم بامور البناء ويرمم بيتنه وبالفعل للعصر جاب واحد اتفق ويا ابو زهراء على كل شي صبغ تغير كاشي البيت وتبديل الابواب والشبابيك والصحيات واهم شي اكدت عليهم على الباب الخارجي والأبواب الداخليه أريدهن قويات كل شي يصير 

واخذت منه مهله يومين حتى أفرغ البيت وأسلمه للخلفه واني وام زهراء شكو شي قديم ذبينا والباقيات اشياء قليله وطلعت الفلوس الدفنتهن بالحديقه وسلمت المبلغ المطلوب لأبو زهراء هو يتابع شغل البناء اني ما افهم بي شي 

وأجرت بيت صغير بداية المنطقه وگعدت اني وأخواتي وهاي الايام كلها چنت ما اروح على ام رحاب لهذا كل شي ما اعرف ومن شويه استقريت بالبيت رحت على ام رحاب 

وكلام رحاب كله صحيح طلع بيها سرطان بالعظام وأنتهت خدماتها لهذا اجى امر انه رحاب تطلع من يم ام رحاب وبعد ما يحتاجوها 

دخلت يم رحاب خطيه وجهه اصفر شافتني گامت تبچي صدگ گامت تبچي بوقتها ما تحملت صحت على ام رحاب گتلها / يعني انتوا أخذتوا زهرة شبابها وتمرضت بسببكم وهسه تردون ذبوها بالشارع وين تروح 

جاوبت ام رحاب بقباحه مو جديده عليها لانه شايفه هيچ قباحه منها قبل 

ام رحاب / عيني رحاب ما چانت تشتغل مجاناً چانت تكرف فلوس مثلج كل شاب سلمنه تاخذن عليه ملايين لهذا كل وحده تخلي نعال بحلگها وتسكت وشنو تبقى يمي اني روحي ما متحملتها انوب اخدمها 

ريماس/ حبيبتي ترى احنه ما نريد ملايين مالتكم نريد نعوفكم ما تقبلون وتجبرونه على شغل وياكم تاخذون الكليه مالتنه ونتعرض لأنوع التهديد ومن نتمرض تشمرونه بشارع ترى ماكو هيج شي 

ام رحاب / احسن الچ ضمي لسانچ لا شوفين شي ما يعجبچ وهاي سماح الچ ما راح انقل كلامچ 

ريماس/ عافتنه وراحت ام رحاب وهي انطتني ظهرها ظليت اغم بيها بيدي اثنينهن ورحاب ماتت ضحك گتلها / رحاب تعالي يمي اني ما عندي احد بس اخواتي وانتي يشهد الله اعتبرچ اختي الچبيره 

رحاب / خاف اثقل عليچ ريماس وما اريد اكون ثقيله على احد 

ريماس/ لا والله ما عندي بالعكس عد ونس ويانه 

وبالفعل اني وطالعه اخذت رحاب ويايه وطلعت 

ومرت الايام وبيتنه الشغل بي واني نفس وضعي بس الشاب الاول الي طلبوا مني اسلمه الهم بعدني انسق ويا بس بيان ما اتواصلت ويا ابد وگلت شوف شنو اطلع حجه الهم في سبيل ما اتواصل ويا 

ورحاب حدد الدكتور الها جلسات كيماوي وكتبتلي عنوان المزرعه مال اهلها وگالت أبويه اسمه سامي وأخويه اسمه بيان هو ضابط 

بيان / كل الناس الله يبليهم بمصيبه وحده إلا بيان الله بلا بمصيبتين وهي لميس وامها ورب العالمين عبالك خله لميس تحبل حتى تبقى مسلطه عليه طول عمري بوقت عمه لقاء چانت تتعارك ويه ابويه وبيبي شو هاي عافت عمي وسام ومچلبه بيه وكل شويه تگول انت تحرض وسام عليه آخرها بلغتها انه اني راح ازوج على بنتها لو تخبلت 

لقاء / انت رجال سويها إذا ما اشتكيت عليك وسلحلتك گول لقاء گالت ما كافي تحرض وسام عليه 

بيان / شوفي تحچين عدل لو هسه اسحلچ بالمزرعه كلها فهمتي ومن اريد ازوج لا خايف منچ ولا من بنتچ اما عمي وسام مو طفل حتى أحرضه شوفي مال تردين ذبين السالفه براسي بطلاگچ من عمي وسام انتي چذابه الظاهر مصايبچ هواي وهو مسامحچ هواي وطفح كيل عنده لهذا شمرچ الظاهر طاگه حوصلته منچ وهسه يله منا بعد لا تجين انتي مره مطلگه وأبويه رجال ارمل وعنده جفاف عاطفي واحنه ما نقرب البانزين يم النار 

وشگد ظلت تلغي بس اني ما اهتميت الها وبعدها راحت عمه لقاء وابويه اتصل بعمي وسام وطلب منه يجي وما مر ساعتين واجى عمي وسام وكلنه گاعدين بالصاله من أبويه سال عمي وسام على موضوع انه يريد يزوج زوجة عمي مهند الله يرحمه وصحيح هذا الكلام لو هو دى يكذب على لقاء 

وسام/ لا شنو اكذب عليها هي قندرتيش اصلاً مو في بالي هي ولا اريد أرجعها وصحيح انتظر سنة مهند الله يرحمه تعبر واطلبها للزواج البنيه بعدها صغيره وحلوه وعشرين الف واحد يطمع بيها لكون عدها بيت وراتب مهند وما اريد ابن مهند الله يرحمه يعيش نفس مأساة بيان عد اني عمهم واربيهم على ايدي وانت تدري اني ولد ما عندي بيان وابن مهند همه ولدي وما نخلي ابنه وبناتنه يعيشون ويه رجال غريب ما كافي أغاريد بنتك لليوم ما نعرف امها وين اخذتها ولت هاي الغلطه بعد ما نعيدها سامي 

سامي / هو قرار صحيح بس لقاء وبناتك شلون 

وسام / سامي اني ما طلگت لقاء على مود زوجة مهند اني مطلگ لقاء قبل ما يتوفى مهند الله يرحمه وبناتي الچبيره مزوجه وإثنين مخطوبات مسألة وقت وياخذوهن والصغيره بالإعدادية وهم مصيرها تزوج واني شنو اگابل حياطين 

بيان / قرارك صحيح وآني بظهرك وشتريد اني حاضر وأشجعك انه ما ترجع لقاء ابد وما تفيد 

وسام / قراري واحد ما ارجع لقاء ابد وخلي لميس توصل كلامي الها لانه اني حاظرها وحاظر اخوها هم وما عبالكم هي ميته عليه تريد ترجع لا بس شبعت مذله يم اخوها ومرته وجهاله وين يم وسام عايشه بخير ونعيم وتتبطر هسه خليتها مثل الي يگول تريد تعرف خيري روح جرب غيري 

بيان / وعلى كلام عمي وسام احنه منتظرين تعبر السنه مال عمي مهند حتى نطلب زوجة عمي مهند لعمي وسام 

اما ريماس اختفت الرقم مغلق لهذا خطر على بالي فكره انه اروح قريب على بيتهم واسال عليها بحجة اريد أخطبها وأكيد راح يوصل خبر الها وترجع تتواصل ويايه ورحت على ابو أسواق يمهم وسألت عليها بحجة اريد أخطبها وابو الأسواق ظل ساعه يمدح بريماس وبعد بقيت انتظر انه ترجع تتواصل ويايه بس خيبت ظني مر اسبوع وريماس ابد ما أتواصلت ويايه 

شاطت روحي للخالق ورجعت رحت على ابو الأسواق وسألته على ريماس بس خبلني من گال / ريماس انتقلت منا وراحت لغير منطقه وبعد ما ترجع وانه هو بنفس اليوم الي اجيت سالت بي عليها هو مبلغها 

تخبلت صورت دى يكذب عليه بس ابو الأسواق اشرلي على بيتهم وانه حتى بيتهم مفلش رحت على البيت صحيح خرابه صاير 

يعني ريماس خلاص بعد ما اشوفها رجعت اتصلت بمقدم فرقد وهذا موبايله كله مغلق ادري كل واحد يعرس ما يتواصل ويه احد چان هسه الناس التزوج ما تطلع من بيوتها وقررت على ثاني يوم اروح عليه للمركز ومن رجعت للبيت لگيت لميس تبچي من وجع بطنها 

وبعدني بنفس ملابسي خليتها تبدل واخذتها للدكتوره وبقيت انتظر بعدها طلعت السكرتيره مال الدكتوره صاحت بأسمي رحت يمها انطتني وصفه طبيه اخذتها منها وطلعت جبت العلاج من الصيدليه ورجعت انطيته للسكرتيره وبقيت انتظر 

وسبحان الله لميس جبتها تبچي وطلعت تبچي سالتها شبيچ شنو بعد عندچ وجع في بطنچ لعد العلاج شسوين بي الجبته هسه وانطيته لسكرتيره 

لميس / لا بطني ما توجعني الدكتوره ضربتني ابره وراح التقلص بس اخذتلي سونار وتگول بيچ توم بنات 

بيان / وشنو يعني نعمه خير من الله اهم شي يجن بصحه وسلامه على شنو تبچين احمدي الله واشكري 

لميس / اني اريد ولد خاف اني مثل امي ما اخلف بس بنات 

بيان / ولد او بنيه حمدلله والشكر على هاي النعمه 

ورجعتها للبيت وهي بعدها تبچي وبذاك اليوم صار عزه عد لميس شلون بيها بنات تؤام 

واني على ثاني يوم رحت لدوام وقبل الظهر رحت على فرقد وچان موجود بالمركز ومن عرف اني جاي عليه قبل ادخل يمه وبعد دگ التحيه والسلام گعدت وحچيتله على موضوع ريماس كله واخر شي اختفت 

فرقد/ شوف من اختفت وما تريدك تعرف هي وين هنه شغلتين الشغله الاولى عرفت انت منو وضابط وخافت منك وهذا شي استبعده 

والشغله الثانيه وهاي أكيد فرغت الساحه لغيرها حتى يظهر گدامك الي همه جماعتها شيريدون منك الله اعلم 

بيان / يعني قصدك الشغله ما انتهت سيدي باختفاء ريماس 

فرقد/ ليش انت مصور البنيه گاعده تعد النجوم وتبچي بفراگك إذا مصور هيچ الله يعينك على عقلك ما انتهت ذوله شغلهم معروف دعاره وتجارة اعضاء مستحيل يعوفوك وانت شاب بعز شبابك غير يبيعوك تفصيخ مثل عمك واكيد قطع الغيار مالتك بلادي 

بيان / سيدي المشكله اختفت ما اعرف هي وين ورقمها نغلق ما اعرف شلون اوصل الها 

فرقد/ اني لو بمكانك أتغدى بيهم قبل لا يتعشون بيه 

بيان / اني لو اعرف مكانها غير اطلع بروحها 

فرقد / واذا طلعت روحها ما راح يصير شي بس انت گلت البنيه ما عدها احد وهذا شي مستحيل اكيد عدها اقارب ومن خلال أقاربها راح تعرف هي وين ونصيحه هاي ثاني مره انصحك بيها روح أخطبها في حالة بعدين طلع تصوير الك وياها انت خطيبها 

بيان / سيدي انت ليش متاكد عدهم تصوير عليه 

فرقد/ لعد همه شلون يسحبون الشباب بهاي الطريقه تعرف اسمها الثلاثي 

بيان / لا سيدي ما اعرفه 

فرقد/ روح لمنطقتهم واعرف اسمها الثلاثي وانطيني الاسم واني اطلع جدها السابع عشر وحتى تعرف أقاربها وين حتى تروح تخطبها 

الفصل الثالث والعشرون من هنا 

شكرا لزيارتكم عالم روايات سكيرهوم