رواية أعظم خيانة الفصل الثالث والعشرون بقلم الزهيريه
ما تخفيه قلوب الناس في سنوات
تكشفه المواقف في لحظات
ريماس / هاي الدنيا عجيبه من نكون بصحتنه وعافيتنه نكون ما نعرف شنو المرض وما حاسين بنعمة الصحه ونتكبر على الناس ومن نتمرض الدنيا كلها تصغر بعيونه ونشوف الدنيا ما تسوي ورقة شجر ورحاب اول ما عرفتها چانت مغروره هواي
وتستنكف مني وبعدها صرنه اعز صديقات ومن تمرضت تغيرت كلش صارت تحب العزله ودائماً صلي وتقرأ قرآن وتبچي ومن اسألها ليش تبچين رحاب گولي يا الله
رحاب / اني ما خايفه من الموت خايفه من حساب رب العالمين على السويته بحياتي
ريماس/ رب العالمين يدري احنه مجبورات
رحاب / بس احنه نتحمل ذنب كل شاب وگع بيدهم
ريماس/ اني بالنسبه عني ربي يشهد مجبوره وشفتي من انهزمت منهم اخذوا كليتي واغتصبوا اختي
رحاب /بعد العلم يم رب العالمين يعتبرنه مذنبات لو لا
ريماس اريد انطيچ عنوان المزرعه مال اهلي من اموت روحي مباشرتاً عليهم وبلغيهم عني أبويه اسمه سامي واخويه اسمه بيان
ريماس/ تعجبت من ذكرت اسم اخوها لهذا سالتها/ اخوچ بيان دكتور
رحاب / لا ضابط بالشرطه
ريماس/ مزوج ومرته حامل
رحاب / لا آخر شي سمعته عنه ازوج ومرته ما تخلف ليش تسألين
ريماس/ لانه قبل فتره تعرفت على ولد شاب اسمه بيان بمرضت صفيه الله لا يرحمها ولا تورد على جنه والولد دكتور واسمه بيان فسألتچ
رحاب / لا اخويه ضابط شرطه مو دكتور
ريماس/ وبقت يمي رحاب واني اروح وياها للدكتور وحتى من تاخذ جلسات كيمياوي اني وياها وما احچي على القهر الي بگلبي على رحاب شگد چانت حلوه ذبلت وحالها صار ما يسر لا عدو ولا حبيب وحتى شعرها گام يوگع خصله بخصلتها ومر تقريباً 3 أسابيع وبيوم بالليل اندگت الباب بقوه وچانت حدود الساعه 12 ونص واخواتي نايمات
ورحاب چانت نايمه وبس اني سهرانه على الموبايل
وشلون فزيت فزه بحيث فتحت الشباك وصحت منو اجاني صوت يگول اني من طرف ام رحاب افتحي الباب بسرعه
وعرفته من صوته القبيح هذا صوت ابو شوارب طلعت اله وفتحت الباب وهو بسرعه دفع بقوه الباب ودخل حتى من قوة دفعت الباب نضربت بالحايط
وهو يگلي على السريع بدلي وجيبي اخواتچ ورحاب وتعالوا ويايه
گتله / خير على وين بهل الليل شنو ماخذينه شنو السبب
ابو شوارب/ كافي لغوه ام رحاب اخذتها الشرطه قبل ساعه واجتي اخباريه الي من المركز انه الداخليه دى يدورون عليچ
ريماس/ اني گلي الشرطه دى دور عليچ لو حيلي كله راح حتى رجلي گامن يرجفن
وجاوبته/ بس اني ما مسويه شي ليش الشرطه تدور عليه
ابو شوارب / هسه بدال هاي اللغوه صار ساعه يله بسرعه بدلوا وتعالوا آني بالسياره أنتظركم
ريماس/ دخلت للبيت گوه رجلي يعينني وگعدت رحاب وبلغتها تبدل وگتلها على كلام ابو شوارب
وگعدت اخواتي وبدلن ملابسهن وهنه ما فاهمات شي وستندت عليه رحاب من دى نطلع لانه حركتها صارت بطيئه وحتى بالتبديل ساعدتها وطلعنه وصعدنه ويه ابو شوارب وهو طلب موبايلي وانطيته اله اخذه وطلع السيم كارت وكسره ورجع الي الموبايل وطلب مني بعد ما ارجع للمنطقه ولا اتواصل ويه اي احد بالمنطقه وتحركت السياره بينه وصلنه يم راس الفرع وفاتت من يمنه سيارات اثنين مال شرطه وابو شوارب شويه خفف بمشي السياره وشفناهم وگفوا يم البيت الي قبل شويه طلعنه منه
واخذنه ابو شوارب للبيت الي قبل چنه نستدرج بي الشباب دخلنه للبيت وطلب من عدنه ما نطلع من البيت وخصوصاً اني ومن اريد شي من المحل اختي تروح اني ما اطلع من البيت ابد وهو راح واخواتي نعسانات فرشت الهن جوه ودخلن نامن واني ورحاب بقينه نسولف
رحاب / اگلچ ليش الشرطه أدور عليچ
ريماس/ والله ما ادري كل شي ما مسويه واني گدامچ ليل ونهار بس تدرين بلكت الله يسجنون ام رحاب ونخلص منها قادر يا كريم
رحاب / لا تخافين عليها حبيبتي هسه يطلعوها وربچ ما يخلوها ام رحاب هواي سلمهم شغل لهذا ما يتنازلون عنها
ريماس/ اي عفيه حظ الفاين گاعد من يصير عليها شي اكو من يدافع عنها مو مثل حظنه إذا نموت ماكو احد يدري بينه
وبقينه ذيچ الليله گاعدين ننتظر خبر عن ام رحاب بس ماكو وعبر 3 ايام وماكو احد اجانه وبلغنه شنو الوضع وقربت جلسة الكيمياوي مال رحاب شلون بهذا الوضع رحاب منو يروح وياها لهذا اخذت موبايل رحاب واتصلت على ام رحاب بسّ موبايلها مغلق
وبقينه ننتظر مر اسبوع كامل وبعدها اجى ابو شوارب ودخل گعد بالصاله وسالته/ وين ام رحاب
ابو شوارب/ بعدها بالتوقيف علينه حمله من الداخليه يقودها ضابط كافر شگد حاولنه نطلع ام رحاب بس منين ما نجي يلگه دليل ويبقي ام رحاب بالتوقيف نريد نطلعها كفاله ما گدرنه
رحاب / وشنو السبب ليش اخذوها
ابو شوارب / الاسباب وحده منها انه خاطفتچ ام رحاب
ريماس/ اگدر آروح للشرطه واگللهم انه ما خاطفتني
ابو شوارب/ انتي غبيه اگعدي وأسكتي معليچ احنه نحلها لا تطلعين منا ابد وراح اجيبلچ جنسيه مزوره خاف يصير شي عندچ هاي الجنسيه
ريماس/ وشنو راح اظل محبوسه هنا ورحاب عدها جلسه كيمياوي واريد اروح وياها
وبحركه مفاجئه گبل طفر عليه ولزم وجهي قوي ويعصر بي ويگلي / من اگول لا تتحركين وطلعين منا تگولين حاضر وتنچبين وتگعدين انتي غبيه دى اگلچ علينه حمله من الداخليه وام رحاب عدهم إذا سمعت بيچ عابره باب البيت اكسر راسچ
ريماس / اني من زمان اخاف منه ظليت اگله ما اطلع ابد بعد عني ورجع گعد بمكانه بس موبايله دگ بذيچ اللحظه وهو طلعه وشافه وفتح خط وما اعرف ويه منو يحچي اسمعه يگول صار استاذ اي تآمر بي انفذه
وطلع للگراج اني أخذني الفضول طلعت اسمع شنو يگول وسمعته يگول لهذا الي دى يحجي ويا بالموبايل/ أستاذ الوضع مخربط إذا اقتضى الأمر نتخلص منها حتى كل شي يموت وياها
واني سمعته هيچ يحچي گبل انهزمت ودخلت جوه بس شنو ارجف هذا أكيد يقصدني وبقيت بالغرفه يم رحاب واخواتي وما طلعت وين يله طلعت وما لگيته ماكو وطلعت اخواتي من يمي وگلت لرحاب على كل السمعته من ابو شوارب يحچي بالموبايل
رحاب / هذا الكلام مو عليچ أني متاكده هذا الكلام يخص ام رحاب
ريماس/ شلون عرفتي
رحاب / لانه احنه ما نعرف همه منو احنه ابو شوارب نفسه ما نعرف اسمه اني قبلچ صار سنين اشتغل وياهم ما اعرفهم بس ام رحاب تعرفهم ومن وگعت بيد الداخليه يعني عليها ادله لهذا يخافون لا تعترف عليهم ويروحون تسعه بأسود هسه تذكرين كلامي بعدين ام رحاب راح يصفوها حتى إذا طلعت من السجن راح يصفوها
ريماس/ ليش حتى إذا تطلع من السجن يصفوها
رحاب / صارت عليها علامة اكس عند الداخليه بعد ما تفيدهم وأعذريني ما اريد اخوفچ احتمال انتي هم يصفوچ
ريماس/ يا يمه ليش اني كل شي ما مسويه
رحاب / طالما الداخليه تحركت عليچ معناها عدهم اولياتج وتدرين ليش يگلچ لا طلعين يعني احتمال إذا مو أكيد معممين صورچ على السيطرات وين ما يشوفوچ تاخذچ الشرطه
ريماس/ صدگ هنا انهاريت ظليت ادگ والطم وادگ على وجهي واگللها لرحاب / بس اريد اعرف الداخليه ليش يدورن عليه ومنو مشتكي عليه
رحاب / بابا أنتي انتبهتي شنو گال ابو شوارب گال متهمين ام رحاب انه خاطفتچ زين همه منو الي تاهمها يعني ظهر واحد من اهلچ وهو مشتكي على ام رحاب
بيان /ايد وحده ما صفگ واني چان اختاري انه لازم يكون ويايه احد افضل حتى إذا فاتني تفصيل من القضيه اكو شخص ينبهني وفرقد ومن گالوا عليه اكفأ ضباط الداخليه صحيح هذا الشي لمسته بتعاملي ويا وبيوم الچنت يمه طلب مني اسم ريماس الثلاثي بصراحه اني ما اعرفه واستغربت لهذا سالته ليش شيسوي بالاسم جاوبني
فرقد/ شوف بيان احنه البنيه إذا تريد تخطبها لازم تعرف آهلها لانه قاصر
بيان / بس اني من تعرفت عليها گالت ما اعرف اهل ابويه وين واهل امي ما يريدوني
فرقد / بيان اني اريد اوصل لاي شخص من اهل ابوها تدري ليش هسه اني اگلك البنيه قاصر يعني ما تگدر تزوجها إلا اكو وصي عليها هذا شي اما الشي الثاني البنيه اختفت لأسباب احنه مانعرفها شنو راح يصير باختفائها وشنو الترتيب الي راح يصير ما نعرفه احنه هسه نريد ندور على البنيه شلون ندور عليها بصفتنه شنو واحنه كل صله ما عدنه بيها لهذا من اوصل لاهل ابوها بعدين اگلك شنو راح اسوي
بيان / بعد حديث طويل ويه فرقد وهو كل العاده من يخطط ما ينطيني الخطه كامله وهذا اكثر شي يخبلني بي وبعدها استأذنت منه وطلعت وبالفعل بوجهي رحت على المنطقه الساكنه چانت بيها ريماس وسالت ابو الأسواق على اسم ريماس كامل وكتبته ورسلته لفرقد ولليل والرساله مالتي ما شايفها فرقد
دخلت على الصفحه مال ريماس الي چنه نحچي من خلالها وظليت اگلب بصورها ريماس كلش حلوه بس حرامات جمالها تستخدمه بغير شي وظليت استذكر كلامها وصوتها لسه بأذني
وحسيت على نفسي ليش اتأمل صورها معقوله لا مستحيل اني افكر بوحده مثلها وظلت هاي الافكار تراودني لما نمت ومر يومين كل جديد ماكو بيوم الثالث اتصل بيه فرقد وهاي لازم أسجلها بتاريخ لانه هو اصلاً لا يتصل ونادراً ما يرد عليه
فرقد / بيان اريدك اليوم وره الدوام تجيني للمركز ضروري
بيان / وبعدني اريد اسال ليش هو نهى الاتصال انوب خلاني على نار اريد بس يخلص الوقت ولما خلص الدوام ساعه 2 الظهر اني طالعه روحي بوجهي گبل رحت عليه وهو چان بمكتبه ودخلني الشرطي يمه گعدت
وهو چان يحچي بالموبايل ويه منو ما اعرف وبعدها غلق موبايله ودگ جرس چان يمه دخل الشرطي
فرقد / الشخص الي اسمه احمد خلي يدخل
بيان / اني گاعد كل كلمه ما وجهه الي بعدها دخل شخص يطلع تقريباً عمره بنهاية الأربعينات من شافنه دگ تحيه وسلم علينه جاوبنه على سلامه وفرقد طلب يگعد وهو گعد على كرسي مقابيلي
فرقد / الله بالخير
بيان / اني وهذا احمد الگاعد گبالي جاوبنا الله بالخير واحمد القلق ظاهر عليه والارتباك أخيرها
گال لفرقد
احمد / سيدي ولو اسوي زحمه عليك اني متهم بشي ليش جايبيني للمركز
فرقد / يعني انت إذا متهم تصور نستدعيك باتصال هاتفي لو تجي قوه تقبض عليك
احمد / إذا متهم تجي قوه تقبض عليه
فرقد / خلاص انت منتسب وتعرف بهاي الامور طالما استدعيناك باتصال هاتفي اذن مو متهم
احمد / تفضل سيدي اي شي تأمرني
فرقد/ اني مقدم فرقد وغني عن التعريف الداخليه كلها تشهدلي وهنا ملازم اول بيان جبناك بموضوع هو حساس بس لازم يكون عندك علم انت عندك اخ اسمه سلام
احمد / اي سيدي اخويه الچبير وصار سنين ما نعرف عنه شي هو مسوي شي
فرقد/ اخوك سلام توفى صار سنين واكيد انت تعرف هو عنده اطفال
احمد / اول طفل عنده بنيه من زوجته الاولى اما من زوجته الثانيه ما اعرف
فرقد/ يعني البنيه الاولى تعرفها وهذا اهم شي هاي البنيه صارت شابه والموضوع الحساس الي ذكرته الك هو بنت اخوك تشتغل بعصابه
احمد / سيدي گول يا الله البنيه إذا احسب عمرها 17 سنه ما مكمله يا عصابه تنتمي الها
فرقد / اني گايل يا الله من 5 الفجر ما احتاج تجي انت هسه تگلي گول يالله البنيه ويه عصابه تتعرف على شباب وتسلمهم للعصابه ياخذون اعضائهم گتلك الموضوع حساس
احمد / استغفر الله يا ربي صدگ الي يخلف ما يموت ابوها هم چانت مصايبه ما تخلص وابويه مات من قهره من عنده وهسه بنته تعيد امجاده
فرقد/ شوف على ساعه تنكشف العصابه وربك هي يخلوها تتحمل القضيه وحدها البنيه مصادقه چانت عم الضابط بيان وسلمته للعصابه واخذوا اعضائه واكيد اكو غير وهي عدها تصوير ضد الضابط بيان +18 وأكيد راح يبتزوا لهذا احنه نريد البنيه وهي اختفت وين راحت الله اليعلم
احمد / سيدي شنو المطلوب مني
فرقد / البنيه تشتغل ويه مره بالمنطقه احنه ما نگدر نروح على المره ونگللها وين البنيه لانه ما النه اي صله بالبنيه بس انت تگدر تروح لكونك عمها وتسال على البنيه وينها وانه هي تردد على البنيه دائماً بالبيت وفي حالة نكرت وجود البنيه عدها النه تصرف ثاني وياها
احمد / تمام سيدي هسه انطوني العنوان واني اروح اسال
بيان / وفرقد انطى عنوان ام رحاب وانطى رقمه اي شي يصير ويا يبلغه وطلع احمد وبقيت ويه فرقد وبقينه نسولف وگتله / سيدي إذا نكرت معرفتها بريماس شلون
فرقد / شنو إذا نكرت اكيد راح تنكر وراح توگع بالفخ الي نصبته الها اكبر غبي الي يلعب ويه فرقد بابا اني اعرف النغل منو ابو ما أسبق الامور بس راح شوف بعينك
بيان / طبعاً اي شخص يشوف فرقد بالبدايه تحسه مسالم بس هو ماكر بشكل وينصب الشبكه ويبقى ينتظر إلى ما يسد الشبكه بحكام على فريسته
وطلعت من يمه وبقى الموضوع كله بيد فرقد وعلى ثاني الصبح عرفت من فرقد انه احمد رايح على منطقة الساكنه بيها ريماس ولاگي البيت مفلش واكو بي أعمال بناء وعارف من جيرانهم انه ريماس يم ام رحاب وحتى هي مخليه ابنها يوصل احمد لبيت ام رحاب
ومن داگ الباب وطالعه ام رحاب وعرفت انه احمد عم ريماس ناكره كل صله بريماس وانه ما الها علاقه بيها وما تعرف هي وين
وگدام انكار ام رحاب احمد رايح على فرقد مبلغه بكلام ام رحاب وهنا ظهر مكر فرقد وذكائه وطلب من احمد انه يقدم شكوى ضد ام رحاب تتهمها بأختطاف ريماس هنا فرقد لعبها صح سواها قضيه رسميه وتحت إشراف الداخليه وحتى نتحرك قانونياً
واحمد قدم الشكوى على ام رحاب وفرقد ما چان يريد استدعاء لام رحاب لانه تگدر تطلع بكفاله لهذا ارسل ضابط ويا شكوى احمد ضد ام رحاب حتى القاضي يصدر آمر إلقاء القبض بحق ام رحاب هنا بعد ما تگدر تطلع كفاله إلى حين ظهور ريماس
وبعدها حصل فرقد إلقاء القبض على ام رحاب بأمر قاضي وهو ارسل الها دوريه جابتها واجتي وبالفعل كلام فرقد صحيح من گال ورها ظهر قوي وچانوا بنفس اليوم يريدون يطلعون ام رحاب كفاله بس فرقد رفض لانه امر إلقاء القبض من قاضي لهذا القاضي هو وحده يحدد تطلع مكفله لو لا
وهذا الجزء الاول من خطة فرقد وبده فرقد يحقق ويه امر رحاب وسألها عن ريماس وهي نكرت كل صله الها بريماس وفرقد گاللها انه اكو شهود يشهدون انه انتي چنتي تزوريها بشكل يومي في بيتها والبنيه انتي مشغلتها وياچ وهي اصرت على الإنكار وأنه اصلاً ما واصله بيت ريماس ولا داخله يمها وفرقد ما كذب خبر رجع جاب امر قاضي برفع كاميرات القريبه على بيت ريماس وعن طريق الكاميرات ثبت انه ام رحاب دائماً وبإستمرار تزور ريماس لهذا قضية اختفاء ريماس تركبت براس ام رحاب والقاضي رفض اي كفاله لام رحاب لهذا بقت بالسجن وهي المتهمه الوحيده باختطاف ريماس
شكرا لزيارتكم عالم روايات سكيرهوم
