رواية فصلية الضابط الفصل الثالث والعشرون 23 بقلم زينب نور

وارث :- شوفي خلي اكولج اذا طلع السمعتي لو احد عرف بي بهذني اديه اموتج سمعتييي لو لااااااا

ضليت اباوع علي وخايفه من ردة فعله خزرني وعافني وطلع ضليت بمكاني واكفه وافكر يعني يريد يموته معقوله ومحد يعرف بي لا لا شلون اسكت لازم اخابر احد من اهلي بس شلون ومنين احصل ارقامهم كمت افتر بالغرفه وأكل باضافيري من يجي ابويه واشوفه اكوله بدون محد يعرف بس خاف بعد. ميخليني اشوفه لان عرفت بتقي عنده لا لا يقبل اكيد باوعت لساعه تأخرت خلي اسبح وانزل للضهر اسمعه يخابر بخصوص الكعده وعرفت من خلال كلامه ويا المتصل انو راح تجي هوايه شيوخ ومشيع جبيره ومتكفي الاستقبال لازم ينصبون جادر ويجيبون كراسي واسمعه يخابر بعمامه وشيوخ لازم يجون على وقت اجو اخوانه ولد عمامه من وقت قبل الكل وكملو الجادر نصبو وجهزو 

للعصر اني محضره كلشي كيتليات چاي وترامز اكبار ثلج وماي ومتحمسه اشوف ابويه وهم شراح يسون بخصوص قضية حسام بالكي يتنازلون ولو متأكده ميتنازلون بس بالكي يقنعوهم وتفض السالفه بفصل احسن من السجن ولحكم كاعده بالمطبخ ولافكار تدور براسي دخل وارث للمطبخ جان لابس دشداشه لونها بني وكاف اردانها و لازم جكاره بيده ويسحب بيها ويباوع عليه مسويه نفسي زعلانه دايره وجهي شفته راد يطلع ركضت لزمت ايده اندار عليه يباوعلي باوعت علي بتمسكن 

:- وارث 

:- ها 

:- تخليني اشوف ابويه موو

:- واذا لعبتي بذيلج وحجيتي اله شي 

لا لا شلون حجي غير انت وصيتني ما اكول الاحد بس خلي نتفق اني وياك من هسه باوعلي ورفع تك حاجب كال 

:- وبشنو تردين نتفق بله 

:- خلي نسولف بالغرفه الوحدنه احسن خمس دقائق مو هوايه 

:- امشي كدامي بله خلي اسايرج هلمره حتى لا اندم بعدين اريد اشوف تاليتج شلون 

مشيت كدامه وهو وراي شفت سهام واكفه وتريد تعرف شنسولف رفعت حاجبي وفتت من يمها دخلنه للغرفه بعدنه هستونه سدينه الباب وصاحو علي وينك وارث يردونك تعال صاح جاي جاي خمس دقايق وجايكم انتظروني واردف بصوت ناصي خلي انشوف البلوه العندي شتريد 

درت وجهي علي متخوصرت والله محد جابرك على البلوه اهلها راح يجون ورجعها وياهم واذا تريد اخذ بمكانها افلوس تفيدك اكثر اني كلت هيج شو هذا طفر عليه لزمني من فكي قوي ويحجي بعصبيه 

:- انتي كلششش طولان السانج ويرادله كص ادب سز متخوصرتلي وتحجين معلك وياي منو انتي وهيج تحجين وياي وبهل طريقه مره ثانيه اكص السانج اذا سمعتج عايدتها فهمتي 

تفاجئت بردة فعله ما توقعت هيج يعيط بيه رجع كالي وهو مستعجل يريد يطلع 

:- كولي التردين تكولينه وهاااا لا تهديد ولا شروط من هسه اكولج 

يأشر على راسه بمعنى افتهمتي 

كوتله :- تتنازل عن حسام ؟

:- لا ما اتنازل وليش أصلاً اتنازل خلي ياخذ جزائه 

:- يعني ياخذ جزائه من الحكومه ومن العشيره 

:- اي هو البده بيها خلي يتحمل تاليها ويشوف نتائج افعاله 

:- واني شنو اذا حسام انحكم اعدام تتوقع ابقه يمك لو اهلي يخلوني بعد يمك 

:- انتي موضوعج غير انتي اجيتي بفصل ضرغام وهذا فصل ثاني شمدخلج بي لا اهلج ولا غيرهم يكدرون ياخذوج على ذمتي انتي مرتي وبكيفي 

                                            

              

                    

:- زين سؤال 

:- اتأخرت كولي بسرعه 

:- انتَ وحسام تعرفون بعضكم قبل سالفة ضرغام لو لا جاوبني بصراحه 

اشوفه بهتت ملامح وجه ورجع عكد حواجبه وكالي بعصبيه

:- لا ما اعرفه ولا شايفه قبل من سالفة ضرغام عرفته 

باوعتله: متأكد 

:- شو وخري عني 

:- انتظرني كولي اشوف ابويه اذا اجه لو لا 

:- بشرط اخليج اتشوفينه 

:- وشنو شرطك بله كول 

:- انتي عرفتي بتقي محجوز يمي ومحد يعرف غير اسعد ومحمد وانتي واذاا اذااا عرف احد غيركم بهذا الموضوع حتى لو مو انتي الگايله راح اگول انتي الگلتي سمعتي وخاف مره من المرات سويت عندج عجز بالقلب هلمره اكول سكته قلبيه وكلشي ينتهي 

:- باوعتله وبجيت يعني عادي تموتني وگلبك ينطيك مو كوتلي صرتي جزء من روحي لو تجذب بس حجي السان 

:- انجبي لا تكولين تجذب اني ما اجذب بمشاعري وبعدين كولتلج اذا اذاا حجيتي وكولتي واني اعرفج متكولين مووو 

:- ما اكول بس شتريد تسوي بي ما تموته موو خطيه والله وخلي اكولك فد شغله ترا من اجوني بالمستشفى تفاجئت بيهم وسئلتهم شجابكم كالولي عالساس اني مراسلته التقي وكايلتله تعال اشوفك وحتى شوفني المحادثه وصفحه مال المراسله على الفيس 

باوعلي بشك 

:-يعني تردين تقنعيني مو انتي المخابرته 

:- اي والله مو اني لا مخابرته ولا مراسلته واله اثبتلك هلشي لو اخر يوم بعمري: 

باوعلي وفتح الباب وطلع تفاجئنه بسهام واكفه ورا الباب تتسمع علينه خزرها وكمل طريقه واني رسمت ابتسامه على وجهي وطلعت حتى اقهرها 

شويه وسمعنه السيارات ولهوسه ودخلت هناء علينه هي وجهالها سلمت علينه وكالت:- ماقبلو ينطوني اجازه لان كثرانات اجايزي بهذا الشهر وما كدرت اجيكم من وقت 

كولتلها :- هلا بيج حبيبه وشعدنه قابل اني حضرت كلشي من الصبح ماعندي شي واباوع السهام تباوع عليه بحقد تريد تغثني كالت:- شلون عالم متستحي ولا تعرف تربي يعرفون ينطونهم خبز بس مينطونهم تربيه كل يوم مسوين مصيبه وجاين يتوسلون ويبوسون بالادين حته نتنازل 

جاوبتها :- وانتي شكو شمدخلج ادور تحجين بجمع نتنازل انتي وين وجهج حاشرتها وبعدين متربين احسن من تربية بعض عالم ماعدهم كرامه 

الحجيه صاحت بينه وترزل 

:- دهر الدهرجن وشتت شملجن ولجن انتن ما تعرفن تسكتن اذا ما تسونها ساحة حرب لو تعودتن على الرزايل ولضرب من وارث 

كالتلها سهام:- شوفيها شلون تدافع عن اهلها وهم كل يوم جاطلين واحد من زلمنه ودور ما تقبل واحد يحجي على اخوها المتربي مرتين مو مره شو عصابجي ومجرم ويتمعشك ابنات العالم منيله التربيه هل دايح 

صاحت هناء:- كافي لغوه يمعودات معليجن انتن اكو زلم تحجي وتعرف شتصرف كافي هل الخريط الماله داعي كلمن ياخذ جزاته بالقانون. وباوعتلي 

عفتهن ورحت لصاله افتر بيها رحت اتسمع من باب الصاله بالكي اسمع فدشي ماكو بس الهوسه وباب الگراج مفتوح مليان شباب من اقاربهم مبينه المشيه جبيره بالكي يأثرون عليهم ضليت بس ادعي واقرا سورة الفاتحه واهديها الام البنين كاعده على نار انتظر النتيجه شنو 

مرت الساعات على اعصابي كاعده لحد ما اجاني محمد كال وينج قطرالندى ابوج منتظرج بالاستقبال بسرعه يردون يرجعون هزيتله راسي وطلعت ورا شفت وارث واكف بالباب مال الكراج يحجي ويا الي يمه وعينه علي يأشرلي براسه وعيونه بسرعه رحت ركض دخلت على ابويه حس عليه التفتلي واني بقيت بمكاني ما كدرت اسلم خنكتني العبره اجاني حضني حضنته مثل الضايعه ولكت اهلها مشتاقه الريحته الصوته الحنيته والاسمي بحلكه من يكول نداوي عزيزة گلبي اكتفيت بالبجي وابوس بوجه وهو هم شفته يبجي كالي:- شلونج بويه كوه جاوبته من الشهكه البصدري اني زينه بس انتو اشلونكم مشتاقتلكم 

رفع راسي يبوس بعيوني ويكولي 

:- اخرب بيتي يابويه شمسوين بيج متغيره حيل بويه نداوي عزيزة گلبي 

            

.......... اخربيتي يا بويه شمسوين بيج متغيره حيل بويه نداوي عزيزة گلبي 

انفجرت بالبجي بصوت وهو يسكت بيه ويسئلني على صحتي كوه ارد علي اعيوني ميقبلن يسكتن من الدموع اريد اسولفله على كل الصار بيه وبشنو مريت واريد اكوله عزيزتك صار عدها عجز بالقلب بس ماكدرت اخاف علي ادري بي ميتحمل ولا اريد ازيد ضيمه كافي علي مصيبة حسام اباوعله حيل ضعفان ابويه ولشيب تارس شعره سئلته على أمي و وسام وجهاله واخواتي وصلت اريد اسئل على حسام واحس الحسره طلعت من نص گلبي سئلته علي 

:- يابه سولفلي بسالفة حسام وشلونه هسه هم تروحله تشوفه 

نزل راسه يهز بي ااااخ يا حسام شسوه بيه ورجع كال 

:- والله يابويه ميخلونه انشوفه بس المحامي يروح ويرجع علي وينطينه اخباره يكول زين بس زينيش يابويه وهوا يدكون علي يردونه يعترف على الجان ويا بس مايقبل يحجي هل طايح الحظ: 

 تأكدت حتى ابويه ميعرف بتقي هو الجان ويا حسام محد يعرف بس وارث شلون عرف تقي جان ويا 

:- زين يابه هسه بهاي جيتكم شصار بالكعده قبل يتنازل وارث لو لا 

 :- لا ميقبل يتنازل واخوانه بعد اضرب منه ميقبلون تنفض بيناتنه عشاير وتخلص يردون القانون ياخذ مجراه واني يابويه حاير شأسوي لو حسيم انحكم اعدام علي ثنين دعاوي للعم وابن اخو شلون يطلع منها ما ادري هد حيلي بمصايبه كل يوم مصيبه شكل 

دك موبايله رد سمعته يكول اي اي جايكم ما اطول انتضروني وسدا باوعلي وسحبني علي يبوس براسي ويطبطب على ضهري شلت ايده وابوس بيها راح يروح احس گلبي فرفخ اريد اروح ويا ارجع البيتنه 

:- يابه بس سولفلي امي شلونها من عرفت بمصيبة حسام شكالت ادري بي عزيزها هذا 

:- والله يابويه ما ادري شكولج بس امج صحتها موزينه ضربتها جلطه وسكرها مينزل كل يوم بالمستشفى: 

لطمت على وجهي يمه سوده بوجهي يمه ما تتحمل امي لعد شلون لو انحكم شيصير بيها باوعت الابويه عيونه ملاينه حزن ولهم مبين بوجه

كال:- يله بويه الجماعه منتظريني لازم اروح ومد ايده بجيبه طلع افلوس خلاهن بأيدي هاج بويه جبتهن الج هذني خاف تحتاجين شي واعذريني بويه نداوي 

ما قبلت اخذهن منه ادري بي مابقي عنده شي كل العنده ينطي للمحامي علمود حسام ماقبل ارجعهن اخذتهن من عنده ردت اكوله على تقي بس ترددت خفت من وارث بس كلت اخذ رقمه كلشي يصير اخابره

:- يابه انطيني رقمك خاف احتاجك حتى اخابرك 

كال:- اي بويه خابريني انتي عندج موبايل؟ 

:- لا ما عندي بس اشوفلي موبايل واحجي بيه وياك كال ما عندي ورقه وقلم شلون رجع كال راح اروح للسياره بيها قلم اكتب رقمي وادزه الج بيد واحد من الجهال: 

حضني واني حضنته حيل ما اريد اعوفه كوه خليته طلع ضليت واكفه اباوع علي من راح وطلع لشارع كعدت بالكاع ابجي انتظرته يدزلي الرقم ماكو كلت بگلبي جوز نسه طلعت من الاستقبال واجه ابن هناء يركض اجاني وبيده ورقه وكال هاي من رجال جبير كالي انطيها الج هزيتله راسي واخذتها من عنده رفعت راسي شفت وارث واكف بعده بالباب ويباوعلي حس اكو شي عفته ودخلت للبيت فكرت گلت هسه اكيد يجي يسئلني شنو الانطانيا ابن هناء ومن ابويه رحت الغرفته طلعت قلم ونقلت الرقم من الورقه على ايدي كتبته بالمعصم ونزلت اردان دشداشتي حتى لا يبين خاف وارث يشوف الورقه هذا يبقه عندي وانقله الورقه ومثل ما توقعت انفتح الباب ودخل وارث وعيونه تتفحصني تقرب عليه.

                                            

              

                    

كال:- گلتي الابوج على تقي مووو 

هزيت راسي لا لا والله ما كوتله ولا ابد خزرني ومركز بوجهي  

:- متأكده ما حجيتي شي 

:- اي والله وداعتك ما سولفتله 

:- شنو دزالج بيد ابن هناء من صعد بالسياره 

بلعت ريك وكتله دزالي فلوس يكول خاف تحتاجين شي 

وطلعتهن اله شافهن شوف 

باوعتله اشوفه ما مصدك عيونه بيها شك اخذ الفلوس شافهن ورجهن اليه وبحركه سريحه دخل ايده بصدري عبالك يعرف مكان الورقه طلعه شاف الرقم وباوعلي بخزره لزمني من رگبتي ودفعني على الحايط ورفع ايده بوجهي بيها الورقه وهاي شنو هااااااي شنو اعرفج متكعدين راحه غشيم اني واصدكج حجي كولييي سولفتلي لابوج موووو مو صوجج صوجي اني خليتج تشوفينه عبالي ادميه: 

جنت اباوعله ولخوف مسيطر على ملامح وجهي بحيث مغمضه عيوني حيل خاف يضربني 

:- لج احجييي لا تخليني اسوي شي بعدين اندم علي 

:- والله ما كوتله والله وداعتك ما حجيت ولا حرف بس هو انطاني رقمه كال خاف تحتاجين شي خابريني: 

عافاني ودفر الميز برجله احسه كوه مسيطر على اعصابه ميريد يضربني يعرفني ما اتحمل بعد شي طلع وركع الباب بقوه ورا 

:- امنت من شفته طلع جريت نفس وكعدت بالكاع الحمدالله نقلت الرقم رفعت اكمام الدشداشه اتأكد باوع علي وما حسيت غير الباب انفتح بسرعه نزلته 

دخلت هناء تسئل 

:- ها شكو ولج شبيكم شبي وارث طلع مستعجل ومبين عصبي صاير شي كولي خوفنه ميقبل يرد علينه من نصيح ورا: 

:- لا ماكو شي بس لان شفت ابويه ماقبل وعصب عليه بس هيج 

باوعتلي بشك كالت :- ان شاءلله خير وماكو شي زين انتي شبيج ليش كاعده هنا وجهج مخطوف لونه ضربج شنو 

:- لا مابيه بس خفت من عصبيته شفته كلش معصب وبسلامته گلبي بعد ميساعد بسرعه اخاف ويكوم يوجعني 

ؤانطتني ايدها كومتني وطلعت وياها بس خايفه وين راح وارث شيسوي طلع معصب 

شويه وصعدت الغرفتي نقلت الرقم من ايدي بورقه وضميتها ابين ملابسي ونزلت صار اليل وهناء بقت يمنه واسعد وارث ماكو ما رجعو للبيت تتصل عليهم هناء ميجاوبون صارت الساعه-12- وهم ماكو حيل قلقنه عليهم شويه ورجع اتصل اسعد بهناء كالها طالعين بشغله اني اوارث نرجع متأخرين لا تنتظرين نامي عود من اجي اخابرج وسدا 

باوعت عليه هناء گالت 

شصاير شعدهم وارث واسعد من شغل اكيد صاير شي وميردون يكولون: 

اني ضليت اصفن ولافكار براسي گلت اكيد راح التقي وخاف يموته ضليت اتحركن صعدت الغرفتي بقيت كاعده ما نمت لحد الاذان كمت اريد اصلي وسمعت صوت سيارته ولباب انفتح رحت لشباك اباوع منه شفتهم نزلو بس ملابسهم مخربطه ومبين عليهم تعبانين وكفو يسولفون ويدخنون وانتبهت اكو قطرات دم على ملابس وارث قميصه ابيض الدم واضح بيهن وسعت عيوني من داهمت راسي الافكار السلبيه ماكو غير موت تقي الفكره سيطرت على عقلي خفت كلش كمت اعض باصابعي من التوتر شلون اعرف شسوه ياربي 

طلعت توضيت ورجعت اصلي ادعي وابجي وحتى كلمات الدعاء تيهته من الخوف مايستاهل تقي خطيه من وراي يموت خلصت صلاه ورحت لشباك اباوع مالكيتهم داخلين للبيت رجعت لفراشي نمت بسرعه من كد التعب البيه جسدياً وفكرياً ما حسيت غير ضربات خفيفه على وجهي فزيت مرعوبه اباوع جان اشوفه مخلي وجه بوجهي وعلامات الخوف واضحه بوجه عباله فاقده بس شافني صحيت صاح بوجهي لج انتي نايمه لو فاقده وكفتي گلبي نوم المطايه مونوم بشر هذا كومي بسرعه واباوع علي شبي معقوله هلكد اني نومي ثكيل ماحسيت بي واشفه دار وجه وتخوصر يهز براسه مقهور من عندي وخايف عليه وسط كل هذا احس گلبي يرفرف مثل الفراشات من شفت خوفه عليه ولهفته ياربي شكد احبه هذا البشر لو يموتني هم ارجع اعشقه مو بيدي اباوع علي ومبتسمه فرحانه عكس ماجنت قبل لا انام جان الهم ولتفكير مدمراتني بهذا الموقف انتعش گلبي 

دار وجه عليه لكاني بعدني بنومتي واباوعله مبتسمه رخت ملامح وجه واجه اتقرب عليه يباوعلي وعيونه تتنقل بملامح وجهي انحنى عليه وباسني وهمس يم اذاني 

:- لج وگفتي گلبي ليش هيج عبالي رجعتي تفقدين وحرك لحيته بوجهي يعرف تكش نفسي من هل حركه انزعجت ودفعته مني وكعدت 

كعد يمي

:- كال لو العشيره كلها تخلص ما ارجعج لهلج خلي يكون عندج علم سمعتي ويباوع بعيوني 

باوعتله وكوتله 

:- انت شبيك كل فتره تكولي هيج ليش احسك متأكد راح ارجع الاهلي صاير شي واني ما ادري كول 

دار وجه وكال

:- ماكو شي بس علمود يصير عندج علم خاف يصير شي لا اكثر 

يريد يغير الموضوع كالي 

:- كومي سويلي لكمه اكلها ماكو احد بالبيت غير امي وجوعان 

:- مطيت نفسي وكوتله بيش الساعه 

باوعلي معقج وجه وكال 

:- والله يالاميره الناعسه الساعه هسه بالعشره الصبح كومي يله 

اتفاجئت معقوله مخليتني سهام نايمه الهيج وقت بس اذكرت كال محد موجود بالبيت غير الحجيه ماحبيت اسئله وين البقيه غلست كام سحبني وطلعني ويا نزلني جوا حتى ما غيرت ملابسي عدل وكبل للمطبخ بس غسلت جهي وسويت ريوك النه بس انتبهت الموبايل مالته ماسكت من الاتصالات ويحجي بلغز ميبين شي واشوف مبين علي متوتر ويفتر بالصاله اباوعله من المطبخ اكيد صاير شي اذكرت البارحه شفت دم بملابسه وليوم يكولي لو تخلص العشيره ما اخليج ترجعين رجف گلبي من الخوف رحت علي وكفت يمه باوعلي بدون تركيز ودار وجه احسه يتهرب مني سئلته بخوف 

:- وارث انت شسويت البارحه شفت اكو دم بملابسك لا تكول قتلت تقي 

 اباوعله بملامح خوف وريگي نشف ومركزه على شفايفه بالكي يكول لا

الفصل الرابع والعشرون من هنا 

شكرا لزيارتكم عالم روايات سكيرهوم