رواية فصلية الضابط الفصل الرابع والعشرون 24 بقلم زينب نور

.......... وارث شسويت البارحه شفت اكو دم بملابسك لا تكول قتلت تقي 

اباوعله بملامح خوف وريگي نشف مركزه على شفايفه بالكي يكول لا 

دار وجه عليه بعصبيه خازرني ولزمني من صدر دشداشتي سحبني علي 

وارث:- انتي شنو تردين بالضبط گلبج يوجعج على الحبيب خايفه علي مووو لعد خلي اكولج اييي موته شنو تردين تسوين هسه: 

دفعني بقوه ليوره انردمت بالتخم كعدت وخليت اديه فوك راسي ودموعي ينزلن سكته بدون صوت: 

رفعت راسي بعده واكف ويباوع عليه وموبايله يرن ابد ما سكت شاله وركعه بلكاع فلشه ضليت مصدومه شبي هذا توقعت راح يضربني بس عافني وطلع اخذ سويج سيارته وطلع ضليت بس اني ولحجيه بغرفته بالبيت انهاريت بالبجي 

يعني تقي مات وحسام شلون بي اكيد هم راح يموته ميخلي عايش بعدني بمكاني وطلعت الحجيه شافتني استغربت سئلتني 

الحجيه :- شبيج ولج شصاير وارث وينه بي شي 

وتتلفت تريد تشوف وارث 

:- لا بيبي وارث زين مابي شي هسه طلع ما اعرف وين 

الحجيه:- جا شبيج تبجين عليمن 

:- اذكرت اهلي مشتاقه الامي اريد اشوفها 

هزت ايدها وكالت

:- والله خرعتيني عبالي صاير شي واني كعدت من منامي مخترعه من الاحلام الشفتها اخذت نص حيلي بعدين مو امس شفتي ابوج وعرفتي اخبارهم بعد شمالج

دكومي يمه سمي برحمانج وكولي يا الله 

كمت واني امسح بوجهي رحت للمغاسل واني جسمي يرجف وحس صار عندي هبوط دخت كعدت يم المغسله شويه 

صاحت الحجيه خايبه وينج وين رحتي تعالي سويلي چاي راسي يوجعني 

كوه كمت رحت للمطبخ حميت الچاي وديته الها 

ونمطلت بصفها على السرير سئلتها

:- بيبي شوكت راحت هناء ورجلها 

الحجيه :- مادري بيهم كعدت ما لكيتهم اضن من الصبح رايحين

:- وسهام ولبنات وين؟ 

:- راحت لهلها تشوفهم امها مريضه وبالمستشفى 

گلت بگلبي روحه بلا رجعه ان شاءلله 

لليل وارث ماكو ما رجع وسهام ما رجعت 

البيت هدوء سويت عشا للحجيه وكعدت وياها كوه أكل جبرت نفسي حتى لا اتمرض فدمره 

اشوف الحجيه تتصل ومحد يجاوب عليها واسمعها تدردم عليهم 

:- هسه ليش ما تردون خايبين كون ويعة امي ماكو  

لساعه-9- ونفتح الباب دخلت هناء بس مو طبيعيه وتبجي انهبطنه اني ولحجيه من شفناها سئلتها الحجيه ولج شبيج خرعتينه شصاير احجي 

كالت:- شحجي يمه رند بنت ناظم ماتت لكوها منتحره شانقه نفسها اليوم  

لطمت الحجيه على صدرها يمه ثائر ماتت كامت تبجي وتلم بنفسها تريد تروحلهم واني بس اريدلي حجه حتى ابجي 

كالت من عصر سمعت واجيتهم وبس انتن ماكو بالنسوان اجيت اشوفجن عرفتجن ماتدرن لبسنه وطلعنه وياها اخذنه سياره ورحنالهم طبينه للبيت مليان نسوان وعياط وشفت امها تكسر الخاطر املخه نفسها وشعرها مكطع واخواتها مو احسن من امهن كمت اصرخ بصوت عالي ما شفته غير شكم مره بس حبابه وهاي حبيبة حسام شلون لو عرف انتحرت كعدت بالاخير واباوع من بعيد وابجي بحركة گلب مدري على تقي المات واهله ميدرون بي ما ادري على حسام المعروف حكمه شنو لو امي الي انجلطت ملخت نفسي حته صوتي راح اشوف الكل منتبهلي ولما يعرفني منو عبالهم اختها بقينه يمهم لساعه 12 جابوها للبيت بتابوت دخلوها على امها الصوت كام يضرب براسي صوت العياط ومنضر امها واخواتها ملخن شعرهن وحته شفت طلع دم من وجه امها كدما تخرمش بي وبس تصيح ولج بعدج زغيره على الموت متي مضلومه كله بسببنه المنضر مرعب احس جسمي كزبر اصرخ بدون دموع اريد النار البگلبي تطفه بس ميفيد 

من بعيد شفت وارث واكف ويا الشباب ما يدخلون للبيت خلوها وطلعو اباوع علي بيده جكاره يدخن بقهر ويباوع على امها وابوها ويهز براسه بأسف 

                                            

              

                    

شويه ودخلو شالوها طلعوها من البيت ياخذونها للنجف راحن شكم مره وياهم من ضمن الراحن سناء وهناء واجت وصتني على جهالها قبل لا تطلع وراحت ام رند فقدت ما راحت وياهم خافو عليها واخواتها بس اسراء راحت وياها حالهم يكسر الخاطر 

امها نقلوها للمستشفى فاقده وبقت الحجيه واختها بيداء هدء صوت العياط ولنسوان رجعت لبيوتها بس الاقارب بقو شافتني اختها من بعيد اجت يمي كالتلي كلمتين هدت حيلي بيهن 

بيداء:- كله من ورا اخوج الله ينتقم منه هو العلقها بي وخلاها تحبه لهل درجه وضلمت نفسها وخلت اهلي يضلموها عساه بالموت عساه بالعدام وراحت من يمي 

ضليت واكفه الدعاوي توجع گلبي هو شسوه غير بس حباها ورادها بالحلال ما لعب عليها هو شحصل من هل حب غير الاذيه وصار مجرم 

كمت ابجي بسكته وجع راسي سطرني من كد البجي ولصريخ الوقت اتأخر اريد ارجع للبيت بس شلون ويا منو وما اكدر ابقى هنا الكل يباوعلي بحقد من ام امير الى ام ضرغام السهام واقاربهم عبالك اني الموتتها ميشوفون نار گلبي شلون موجره

جهال هناء بقو يمي بقو يبجون يردون امهم احتاريت بيهم شسويلهم ويسكتون 

رحت للحجيه 

:- بيبي اريد ارجع للبيت شلون وجهال هناء بس يبجون يردون امهم شسوي 

باوعت عليه كالتلي 

الحجيه:- وين ترحين هسه ومنو ياخذج ابقي هنا الباجر عود ترجعين 

:- انطيني موبايلج اخابر وارث بالكي يجيني 

باوعتلي وهزت ايدها 

الحجيه:- ولج انتي والله بطرانه ياوراث هو هسه بحالج وتردين تخابرينه 

:- هسه انطينيا ومعليج اني اخابره واشوفه وين حتى لو يدزلي محمد يوصلني ويرجع ما اريد ابقه هنا

طلعت موبايلها من جيبها ونطتنيا اخذته ورحت طلعت لطرمه حته اخابر وياي مرتضى وعلي يبجون يردون ابوهم وامهم 

طلعت رقم وارث اتصل علي ميجاوب اربع مرات حاولت ماكو رد ردت ادخل للبيت ورن الموبايل بأيدي باوعت اسم وارث همزين رجع اتصل فتحت خط اجاني صوته ويمه هوسه

گال:- الو الو يمه تسمعيني  

جاوبته 

:- اني ندى مو امك 

:- هلا ها صاير شي وين انتي 

:- لا مصاير شي اني ويا الحجيه اجيت البيت ناظم واريد ارجع هسه تعبت وجهال هناء وياي عافتهم يمي تكدر تجي ترجعني 

:- لا ما اكدر اجيج عندي شغل وما الحك

:- بس بعد ما اكدر افهمني الله يخليك بس دزلي احد يرجعني للبيت 

:- خلي اشوف وارجع اخابرج انتظريني 

سد الخط واني ضليت لازمه التليفون منتظرته واسكت بعلي يبجي ميسكت وجوعانين خطيه باقين بلا عشا شفت وفاء وبناتها طلعن يردن يرجعن البيتهم ونفتح باب البيت دخل من عنده أمير ضل واكف يباوع عليه وامه تسولف علي طلعن قبله لسيارت اني رجعت اريد ادخل جوا جان يصيح انتظري دقيقه ما سمعته اريد ادخل حسيته ركض يريد يلزمني حته اوكف جسمي رجف من الخوف عبالك وارث واكف كدامي وهلكد خايفه اعترض طريقي كال 

امير:- بس كلمتين اسمعيهن وروحي 

رفعت راسي وخليت عيني بعينه 

كوتله:- انت متستحي متبطل هاي سوالفك ابتعد عن طريقي كافي هاي سوالف زعاطيط عيب ميصير لا يشوفنه احد شيكول 

:- محد يشوف بس خلي اكولج هل كلمه تره وارث سبب كل المشاكل وهو سبب دمار اخوج وشي ثاني هم لازم تعرفينه اني الجنت مخلي عيني عليج قبله ونعرفج قبل لا تجين فصليه 

انصدمت شنو جاي يحجي شنو يعرفوني قبل لا اجي فصليه شبي هذا يخربط رديت علي بعصبيه 

:- كافي الله يخليك ما اريد اعرف شي ولا اريد اشوفك شنو مخلي عينك عليه واصلاً منين تعرفني قبل لا اجي 

عفته ودخلت شفت اخوات ضرغام واكفات يباوعلي من بعيد رجف گلبي منهن اريد اختفي من هل مكان جاي يضيگ عليه الهوا شويه واتصل وارث 

گال:- دزيتلج محمد اجاج بسرعه حضري نفسج واطلعي

وسد الخط 

رحت رجعت الموبايل للحجيه 

وانطيته علم اجاني محمد راح ارجع للبيت حضرت نفسي وطلعت شفت سيارة محمد رحتله صعدت ويا 

كال محمد:- شلون تبقين الوحدج بالبيت متخافين 

جاوبته:- لا ما اخاف ازقفل كل الابواب ماعندي شي مرتضى وعلاوي وياي رجعت

سئلته:- محمد فد سؤال 

گال:- اي جواب گولي 

:- شوف اني اعرف بتقي محجوز عند وارث سمعتكم ذاك اليوم بالصدفه تسولفون 

شفته يباوعلي بالمرايه الاماميه موسع عيونه وسئلني بفضول 

:- وشعرفتي بعد 

:- عرفت اليوم من وراث گالي موتت تقي

  وماسيطرت على العبره كمت ابجي 

دار وجه عليه لا يمعوده كولي يا الله شنو موته لا ماكو هيج شي مابي شي

:- كول والله يعني تقي بعده عايش ما ميت 

:- بعده وهسه بالمستشفى بكربله اليوم اخذو اهله

زدت بالبجي فرحت همزين مامات خطيه 

:- زين ليش وارث هيج گالي 

گال:- حته يقهرج لان كلش يكرهه وصدك راد يموته بس كوه منعناه منه بس كسره تكسر ودزا لهله بأسعاف 

ورجع كمل گال خالي واعرفه مايكتفي بهيج راح يلزمه هسه بورقه من الحكومه ويسجنه بس اخذ حقه منه بدون تدخل الحكومه وما استخدم رتبته ومنصبه 

زين سؤال ثاني 

گال:- اليوم ما تخلص اسئلتج لكيتيلج فرصه راح تعلسين گلبي علسس وتخليني اخرطهن كلهن 

كوتله:- لعد اسئل منو ما عندي غيرك اسئله 

:-اسئلي فضيني عاد دوختيني بأسئلتج وبواجيج لعبتي نفسي تنافرين كوه لازم نفسي ما تقيئ 

:- هاي شبيك محمد والله بعد ولا احجي وياك عبالي خوش رجال وكلت اسئلك 

محمد:- خوش رجال وغصباً عليج شو ماتعرفين تحجين انتي الفاهيه 

:- هسه تجاوبني على سؤالي لو لا 

محمد:- لا ما اجاوب ويله انزلي بسرعه الفاهيه 

نزلت بسرعه ونزلت الجهال وياي فتحت البيت ودخلت وقفلت كل الابواب ورحت بس غسلت سويت أكل لجهال والي كعدنه ناكل

وافكر الحمدالله تقي طلع بعده عايش ما مات طلع وارث يجذب عليه شكول عليك وارث خليتني اليوم فرفحت 

كمت شلت الاكل وفرشت بغرفة الحجيه اني وجهال وحته الغرفه قفلته عليه خايفه حيل بس شسوي احسن ماضاله هناك الكل حاقده عليه 

شفت الجهال نامو اني هم بسرعه نمت ما حسيت  

فزيت على صوت الباب يندك بقوه كعدت مفزوعه ما اعرف بعده ليل صار نهار اباوع الجهال بعدهم نايمين الغرفه ضالمه كمت ارجف من الخوف لبست حجابي وطلعت اشوف منو........

شكرا لزيارتكم عالم روايات سكيرهوم