رواية بيوت الصفيح الفصل الثالث والعشرون بقلم زهراء السراي
أقف في المنتصف لا أعرف من أنت
لا أنت صديقي المقرب
ولا من أُحب ولا نحن غرباء
لكن عينيك عينيك عزيزة علي
مُنى
____________________
ما أدفأ القلب حين يسكنه الحنان
حين لا يقول كلمة أحبك فقط
بل يُظهرها في كلّ لفتة
وكلّ نظرة وكلّ صمتٍ مُطمئن
گاعدين آني وقمر بالغرفة
هي ترسملي احياء واني
اكتبلها انكليزي احس صابني
صداع من گد القراية واريد
بس اخذ استراحة
-تعبت ايديه ودماااغي احسه
ورم من گد القراية تعببببت
-نطلع
-شگد تحبين التخامة لا مااريد اطلع
-نشتري حبشكلات
-باوعي عندي خدووود ضايجة
منهن واريد بس اخلص
-يمتى تستوعبين ان خدودج مو سمن
وجهج مدووور حتى لو تضعفين هن مقاومات
شمرت نفسي بالگاع اتمدد واندگت
الباب ردت قمر
-منو
-اني خالو
فزيت وجبت حجابي لبسته
وصاحت قمر
-تفضل خالو
دخل باوعلي وباوع للگاع دفاتر
وكتب هوووسة اشرلي
-منفجرة عبوة
ضحكت
-لا دماااااغي انفجر
-ارتاحو اخذو راحة عيونكم ممرودة
مرد هو رابع سنة عادية مو مصيرية
-مااااگدر
-طبعا متگدرين سجاجة
-لتحسدني
بيده مساحة شمرها عليه
-گومن اوديجن لموقع عمل جاي
اشتغل بي
-لا عفييية الجو بده يصير حررر ومااتحمل
-انجبي وگومي انت وياهل
وگفت نزلت تشيرتي على رجليه
ابتسم وهز راسه
تركتهم وطلعت لصبى جوة بالمطبخ
تسوي عصير لأسد
-صباوي عمو حمزة راح يفرنا شووويه
تعبنا من القراية
باوعتلي الحجية وهي تگصگص
البرتقال
-شعدجن طالعات بهالظهرية
-هو عمو گال مو احنه
-مترحين مُنى گليله غير وقت
رجعت للغرفة جاي اصعد وصرنه وجه
بوجه
-صِبى والحجية ميقبلن
-صعدي بدلي انت وقمر ومالج علاقة
-مووو ………
-لا تمعمعين صعدي
صعدت گلت لقمر لعبتلي حواجبها
-فدييييته خالي لخاطر هالخدود راح يروح
يقنعهم
شوية واتصل بقمر
-يلا خالو منتظر
لبسنا لبس بسيط وركضنا للسيارة
لاگتني الحجية رفعت نظرها ناحيتي
ونزلته ماعرفت هل هي عصبية لو مقابلة
هي هادئة وطبعها مالها علاقة ولا تعلق
ولا تأذي المقابل بكلمة بس من تشوف
حمزة حواليه تضوج احسها رغم تصرفي
العادي ويا
2
فتح باب السيارة وصعدت قمر واني وره
تحرك بالسيارة الهوا حلو نص الشهر الثالث
مقبلين على صيف بس اكو نسمة هوا
باردة
مشغل اغاني فيروز ويدندن توقف
يم اسواق نزل اشترى حلويات ورجع
مشى مسافة طويلة شويه وتوقف
متنزه عام ومسقفات ومظلات
ومقاعد خشبية والگاع ستوهم
كاسينها بالحشيش وصايرة مساحة
خضرة تجنن
ابتسمت واحنة نازلين
-يجننن
التفتلي وحجة بغرور
-اني مااسوي شي مو حلو
رفعتله حاجبي وبسرعة فهم عليه
وتذكر الرسالة
-يمتى تنسين
-ماانسى
مشيت ويا وقمر مثل النعجة تقفز حوالينا
اشرلي
-ترحين تقفزين شويه
-لا تعبانة غير وقت
ضحك وهو يأشرلي عالكراسي الخشب
گعدنا فتح العلاگة وطلع عصير البلنگو بالكرز
وجبس ليز بالملح خلاهن گدامي
اباوع ابد مينسى شي احبه
ولا شي اكرهه محاوطني بحنية من
بعيد وهالشي خلاني ارجع طبيعية ويا
بعيداً عن مشاعر الحب الصغيرة اللي احسها
لكن كبحت جماح هالمشاعر احب اتواجد
حوالي نحجي نتناقش بس بعدنا احياناً
تبدي مشاحناتنا وتضمحل بسرعة
مد ايده فتح العصير
-شربي وروحي تمشي ويه قمر
-لا خليني گاعدة بهالهدوء
دگ تلفونه بنفس الثانية باوعتله وضحكت
-ترد لو نشمر التلفون بالنافورة
اشر عالتلفون وگام يرد
رجعت عالكرسي انسندت والشمس أشعتها
تتخلل المضلة الخشبية وتدفي ثنايا وجهي
ابتسمت على ذكرى أول يوم دخلت بي
لبيت أهل حمزة
جنت قبلها بوقت وحسب
كلام صِبى مجمعة أغراضي بجنط وحاجاتي
بصندوگين حلوات دفاتر مذكرات العاب
دفاتر تلوين بهاليوم سومة نومتني بحضنها
وبجت لحد منامت
ثاني يوم اخذتني
غِنى هي وأيمن بعد طن توصيات
ونصائح من سومة انتبهي للبسج
حجابج مهم
الناس متفهم طبعج البشوش
كوني حيادية وراحت جابتلي حجابات
الأميرة تگول اسهل من الشال والشيلة
باللبس اذا بالبيت
وهيج دخلت بيت
أهل حمزة ومثل مگال صار نهايتج تجين
يمي بعد ماراحت غِنى صِبى صعدت
لغرفتها وصعدتنا وياها هي راحت
يم أسد واحنه رحنه ندخل جاي نفتح
الباب واجانه صوت حمزة لاهث عبالك
جان يركض عالدرج
-دقييييقة وين
ردت قمر
-ندخل خاااااالو متحمسة اشوف الغرفة
لمُنى
-انتظرو
دفع الباب على كيف ودخل دقايق وطلع
فتح الباب وأشرلنا
دخلنا وقمر قفزت تضحك
-هاااااااي شنوووو خالووووو يمتى سويتهن
دخلت على صوتها وهو يباوع لوجهي
منتظر ردة فعلي وجهي لااراديا تحول لكتلة
فرح وبانت ابتسامتي واني أشوف
لوحة بطة صفرة جبيرة معلگة عالسرير
وعلى سرير قمر لوحة على شكل قمر مضوي
الغرفة لونها بنفسجي فاتح وتدرجاته
حجيت بهدوء
-تجنن الغرفة البنفسجي لوني المفضل
التفتت على صوته
-عجبتج
-هووووايه
-خالوووو حمزة عاد تصميمها لخاطرج
كح هو متوتر وهي حاولت تلطش الشغلة
-يعني لخاطرنا جانت مو حلوة
باوعتله
-شكرا هوووايه حلوة وذوقه يجنن
-تتهنون قمر من يمج طفي الاضوية
طفت قمر الاضوية وصار ظلام بسيط
صفگ بأيدع واشتغلت اللوحات بضوة يجنن
البطوطة خدودها وتضوي ضوة وردي خافت
ولوحة القمر القمر ينطي ضوة هادئ اصفر
شغل الاضوية واشرلنا
-غرفتكم والكم مطلق الحرية اذا تحبون تغيرون
شي مُنى حابة تغيرين شي
-لا كلش حلوة
طلعت قمر على صوت بيبيتها اللي صاحتها
وهو وگف بباب الغرفة يحاجيني
-وين شرطي
-ياشرط
-اللي اتفقنا علي من عزمتي مُنى
قبل فترة واخذتيها من باب المدرسة
1
صفنت بوجهه وتذكرت
-صح وهسه شنو المطلوب
-بما ان انت وصرتي هنا يمنا ماكو
داعي للبلوك بعد شيلي الحظر
-تمام
باوعلي بتوجس
-هيج وافقتي بدون متعنفصين وتنطحين
-انت مو غريب عادي هسه
ارفع الحظر
-تمام شيلي الحظر
گدامي
-تتدلل
فتحت التلفون رفعت الحظر غيرت اللقب
لعمو حمزة
وانطيته التلفون ضغط التلفون بين
ايدي راد يكسره
قبض ايده وعضها حيل
ورجع يهدي بنفسه
-هاااااج
التفت يطلع صحتله وهالمرة صدگ
احجي مو خباثة
-شكرا هوايه لأن بقى ببالك كلامي عن غرفة احلامي
ولوني المفضل وشكرا لأن تعبت بيها
اشر على عيونه يعني يقصد من عيوني
وطلع بره الغرفة
گعدت عالسرير احساس غربة طفيف
اجتاحني بس اليصبرني وجود قمر
و صِبى العصرية نزلنا اني وياهل
للحديقة جانت بت اختهم
اللي اسمها نسرين موجودة وحمزة هم گاعد
بره باوعتلي
صفح وسحبت قمر تشاورها
قمر طبگت حواجبها معجبها اللي گالته
وحجت بصوت واضح
-خالو حمزة المن سويت الغرفة
مو اليه ولمُنى
-اي خالو ليش
-لا مو نسرين تگول مسويها للخطار
اذا يجون
التفت لنسرين ورجع باوعلي
-الخطار اله البيت بطوله وعرضه
هاي الغرفة خاصة بيكم انت وياها
شنو رأيج نسرين
-مجنت اعرف
گامت ضايجة واحنة گعدنا
بيدنا الكتب طلعت العاملة بيدها
اكواب جاي ولفات جبن خلتها گبالنا
-اكلي انت وياها خل ادرسكم رياضيات
قمر اكلت واني احس ايدي
متاخذ على شي استحي اكل
شربت شويه جاي وشالت العاملة
الصينية بدة يشرحلنا بعد مكملنا
دخلت للغرفة وتحججت بالنوم
رغم صِبى اجتني حتى اتعشى
گلتلها اكلت العصر ونمت تحت
اللحاف بدت دموعي تتسرب بهدوء
رفعت راسي قمر نايمة فتحت الشباك
أباوع للحديقة والمسبح اللي
ورة البيت وهدوء الليل باوعت
للسما
-تسمعيني يمه والله مشتاقتلج
تتذكرين ذاك بيت التنك شگد
جان واگع بس أحس جان لامنه
وأحس منتمية لمكان شو هسه
بيوت مرتبة وقصر وحدايق
واحس مختنگة أحس كل مااتعلق
بشخص يغيب وآخر شي سومة
سديت الشباك وطلعت بالممر بين الغرف
هدوء باب السطح گبالي
تذكرت الگعدة هناك فتحته
وطلعت الجلسة الخارجية مفروشة
ومرتبة گعدت بيدي تلفوني
شغلت قصيدة صِبى المفضلة
اللي ملازمتها بكل مواقفها وحتى
مخليتها نغمة تلفونها بده باسم
الكربلائي يقرأ بصوته الشجي
-رايح حبيبي وبعد ماتشوفك عيوني
وشلون أشوفك إذا منك يحرموني
يانجمة سهيل مكانك بالسما خالي
من ينكَضي الليل أدفنك بيدي يالغالي
الحبيب انت الحبيب العايش بدمي
كثر ما ألهج بإسمك نسيت أسمي
من گد مبجت عليها صِبى ارتبطت
هالقصيدة بذاكرتي وكأنها تخص فرقد
وگفت اباوع للحديقة من السياج
والقصيدة تصدح بهدوء
رددت وياها
-يانجمة سهيل مكانك بالسما خالي
من ينگضي الليل أدفنك بيدي ياالغالي
بجيت وگعدت ياربي على شعور الغربة
أتمنى أعيش يم سومة تعودت عليها
وتعودت عليه مليت من عدم الاستقرار
وگلبي مكسور أحس الحياة تحتاج أحد
جبير ينصحج ويوجهج صح اخواتي
ممقصرات بس احياناً هفواتي
وغلطاتي يرادلها احد اكبر يقومها
لذلك مااحجيلهم مااعرف أسباب
سكوتي بس شعور بشع ومو حلو
اني مرات اكذب عليهم
رجعت لمكاني اسمتع للقصيدة
وعيوني الحزينة مااستقرت الا
بعد ماالبرد صاب أضلاعي فتحت
الباب طالعة سديته وتوجهت للغرفة
صار حمزة گبالي طالع من غرفته
اللي مقابل غرفتنا باوعلي
-وين جنتي
-بالسطح
-شعندج
-شميت هوا
-ممنوع تطلعين بالسطح وحدج
-تمام آسفة
گلتها وصوت البجي واضح بصوتي
-باجية مو
-لا بس من البرد يمكن
-مو قصدي مااريدج تصعدين بالسطح
بس لتصعدين وحدج بالليل هاي هيه
-لا والله فهمتك مزعلانة
-نزلي سوي شي دافي شربي علمود صوتج
-لا لا هسه اصير زينة
-مُنى لتستحين هذا بيتج بعد
-لا شكرا ماااريد والله تصبح على خير
دخلت للغرفة وعيني رفضت النوم
شويه ودگ الباب فتحته حمزة بيده كوب
جاي وحليب
-شربي يرجع صوتج
-شكرا ليش تعبت نفسك
-تعبج راحة تصبحين على خير
شربت شويع وتمددت خليت
راسي وبديت اغمض شفت صِبى
دخلت فتحت عيوني
باوعتلي بقلق
-عرفتج متنامين
شبيج حبيبتي
حضنتها ساكتة
-ضايجة من البيت
-لا لا الحمد لله
-تصرفي بطبعج الحلو لتستحين وتبقين
ومنطوية وخايفة
-أن شاء الله
-شو وخري انام يمج اليوم
-لا والله مابيه شي روحي
عيب من عمو أسد
- مُنى بعد يوصلج حمزة ويا زحمة يجي
الخط هنا يوصلج وانت وقمر رايحات لنفس
المدرسة
-تمام
باستني وطلعت نمت وعالساعة سبعة
دگ تلفوني حمزة
-صباح الخير اگعدو لا نتأخر
-صباح النور تمام
گعدت قمر وبدينا نجهز نفسنا خلصت
وبقيت گاعدة عالسرير باوعتلي قمر
-يلا ولج هسة الريوگ جاهز
-ها لا اكلت بالليل
-دمشي حبابة امشي شبيج مستحية
نزلنا لگيت العاملة والحجية بالمطبخ
محضرين صحون ريوگ شربت الجاي
ويادوب مديت ايدي للفة صغيرة وبقى
نصها بالصينية وگفت وقمر مصرة تاكل
صاح حمزة
-يلا يابه تأخرنا
مشيت خطوات واجاني صوت ستيفاني
-اوگف ماما
التفتت بيدها لفة جبن لافتها بكلينكس
-اكل انت
-شكرا ستيفاني
شكرتها وطلعت راكضة واني
اخلي اللفة بالجنطة بالسيارة
هدوء وصلنا وبقى واگف يباوع
لمكان وگفة خط حيدر
دخلنا مسرعين أمتحانات وركضة
بوقت الطلعة ودگ تلفون قمر
-ها خالو
سكتت شوية وكملت
-تمام
سدت الخط
-شكوووو
-أياد جاي ياخذنا ويا ماما يردون
يتغدون يمنه
سكتت لأن مأمنين وياه امها
وگف السيارة فارغة باوعتلي
قمر رجعت اتصلت بخالها
-ها خالو اجه عمو اياد احم بس
ماما وين ها فهمت فهمت لا اكيد نروح
ويا
-شكووووو
سدت الخط
-ماما نازلة يم بيبي وگايلتله روح جيب
البنات شلوووون
-نروح ويا مدام الكل يعرف بي جاي ياخذنه
دگ هورن وصعدنا اثنينه ليوره
مشى على كيف هادئ بس طلع
حدود المنطقة عاطت قمر
-ويييييين مودينا
التفت يضحك بسخرية
-للبيت قابل لجهنم
گالها وداس بانزيييين بكل سرعته
يمشي سريع ناحية السيارات خلانا
نعيط بينا وبين السيارة شعرة
يلا يتوقف تكررت الحالة اكثر من
مرة بحيث ردت افقد وعيي من الخوف
التفتلي
-لحد يحط راسه براسي تمام بوووووووويه
سكتت وقمر حاضنتني صرخت
-رجعنا للبيت كاااااافي كافي
مشى عادي ورجع لطريق البيت
وصلنا ونزلنا وهو نزل ويانه
نزلت گوة امشي جسمي كله
يرجف حتى مشفت اللي گدامي
دخلنا اني وقمر للغرفة بدون
منحجي اي شي نمت بملابسي
مال المدرسة اكتشفت اني فعلا
مثل مگال حمزة مراهقة صغيرة
ماخذة الدنيا بدفع صدر واحط
راسي براس الصغير والجبير
هالغلطة كلفتني هوايه حب بوقت
غلط تصرفاتي الغير مدروسة
شگد سببتلي مشاكل واخفاء
الأسرار عن اخواتي من اكبر اخطائي
نمت بخوف ماحسيت الا على ايد صِبى
تصحيني
-شبيج حبيبتي ليش بملابسج نايمة
اباوعلها هي وقمر گاعدات گبالي
-لا بس تعبانة
-گومي قمر جابت الغدة هنا تغدي
ورجعي نامي
گمت غسلت وغيرت ملابسي
وتغديت وگعدت صافنة ليوين
نبقى ساكتين عن هذا اقترحت
على قمر أن نحجي لصبى يمكن
تگدر تلگه حل انهارت قمر وصارت
تبجي تگول احس بالخزي والعار
شلون اخلي خوالي يعرفون شجان
يسوي بيه
شگد حاولت افهمها أنها ضحية
وهو العار نهائياً متقبلت كلامي
ولا سمعتلي
اليوم الثاني طلعنا للدوام
ساكتين قررت اكسر الصمت واحجي
-عمو حمزة
التفتلي
-گولي
-اذا متگدر تلتزم ويانه وعندك شغل
مرات خلينه نروح وية الخط القديم مالتي
أحسن
وگف بنص الشارع
-ولييييش الا بالخط
قررت احجي بهدوء ومااسوي مشكلة
-مو شرط نفس الخط اي خط ثاني
ملتزم
-اكوووو شي شنو صِبى مقبلت لأن
جابكم أياد
باوعتله حرت شگول
-خفت اني لأن يمشي سريع
وردنا نسوي حادث
باوعلي وهز راسه معتذر
-لذلك گضيتيها نوم وبدون اكل البارحة
جنتي خايفة هاي هي وعد راح التزم ومااخلي
اي احد ثاني ياخذكم تمام
-تمام
تحرك ماشي نزلنا وهو راح
انشغلنا بدروسنا وبالفعل هو رجع أخذنا
هيج استمرت الأيام نداوم يقرينا مرات
وستيفاني العاملة استمرت كل يوم تخلي
لفة بجنطتي واني طالعة لأن تشوفني
مااكل لحد ما بمرة طلعت وهي ناسيتها
رجعت اني اجيب بطل مي من الثلاجة
دخلت شفت الحجية تحجي وياها
-ركضي وديلها اللفة مااكلت شي
راح تتحرك السيارة
وگفت وصارت عيني بعينها مااعرف
شبية ركضت اخذت اللفة منها بستهة بخدها
وطلعت راكضة من هاليوم صارت هي
تنطيني اللفة وهي ساكتة
تقريبا تعودت عليهم حمزة ابد متجاوز حدوده
وياية واني ماالح ولا اعاند ولا اخبث
احس فقدت رعونة الطفولة هنا
لأن بالنهاية يبقى هذا مو بيتي
سومة كل اسبوع نروحلها من الصبح لليل
ونرجع وبعدها مثل ماهي الأم والاخت والصديقة
فزيت على صوته وطلعت من ذكرياتي وهو يگعد يمي
وويا قمر
-صافنة بطة
-لا بس صفنت عالمكان يجنن
بقينا نسولف ومتونسين عالخضار والمكان الحلو
ساعة ورجعنا للبيت
بالليل دگ تلفوني برسالة منه
جانت قمر نايمة وهاي اول مرة يدزلي
شي من وقت اللي فتحت الحظر
-كاعدة بطة
-گاعدة
-طلعي للسطح الجو حلو
-راح اگعد قمر
-على شنو ترة مااكلج بس كلمتين ورجعي
لبست حجابي وطلعت هدوء
وگاعد عالجلسة بالسطح اشرلي
على كرسي مسافة منه
گعدت ماحجه اي شي بس خله التلفون
بيدي وهو فاتح محادثة لفقار
قبل لا اقرأ حاجاني
- قبل لتقرين أقسم بالله كل حرف گلته جان
سببه الكلام اللي بالمحادثة مو اكثر تمام
هزيت راسي وبديا اقرأ
-خالي ترى بيبي لحتتتت بالموضوع
وكل يوووم نفس النغمة تدفعني عليك
شوف خالك شعنده ويه اخت الموظفة
وشوف خالك شبي يتراجف من يسمع طاريها
ويركضلها ركض
-فقار يعني أعلمك شبيك أنت كذب
لو هم مااتعرف گلها مجرد صدف مو اكثر لقائهم كله صدفة
-هالشغلة ماتعبر على بيبي خالي ترة زرفت
اذاني هااااي گاعدة يمي
-سجلها بالله اسمع
اكو رسالة صوتية فتحتها الحجية تحجي
وية فقار
-فقااااار لتسوي نفسك ماتدري
اني بلا شي حاسة خالك اسد عينه من الجبيرة
شنو يمه انطيهم حاصل فاصل الهن
لا نعرفهن لا نعرف منين وهاي اختك تحلف
تگول صِبى جانت عاملة وخلاها اسد سكرتيرة
-لأن شغلها مرتب بيبي ماخلاها على طمع
-اذا هو ممخليها على طمع هي دگت رجلها
بالشركة وتجي هنا تخلص الشغل على طمع
هي هاي ومامقتنعة بيها مو ادور الصغيرة
الزعطوطة
انتهت الرسالة الصوتية وشفت الرسالة اللي
غلط اول مرة راجع دازها لفقار
كاتبله فقار خالي كتابة متفيد دزها
صوتية حتى بيبي تسمع
سوي نفسك مجاوبني اني راح اسألك شوف
-اگلك خالي ماگلتلي يعني انت صدگ مفكر
بأخت صِبى الصغيرة
دازله حمزة نفس الكلام بصوتية
من مخلص كاتبله
-سد الموضوع ويه امي جفصت وراحت
الرسالة لمُنى
سديت المحادثة وباوعتله عيونه تتوسل ان
افتهم السبب
-ردت اصرف نظر امي عنج لحد متكبرين
واني اكون رتبت امور حياتي واگدر اخطفج
لگلبي بلا عوائق
-جنت تگدر تصيغ كلامك بطريقة مابيها
قلة تقدير واحترام اليه وحتى لأختي
1
-غلطت اعترف بطريقة كلامي غلطت
بس حتى ماتنحرجين اذا مابيوم اجيتي
هنا
-بس الكلام جارح رغم سببه وليش گلته
-الغاية تبرر الوسيلة
صفن بوجهي
-اعتذر عن كل حرف جرح گلبج
ابتسمت
-شكرا لأن اعتذرت
-وهسه مُنى عرفتي أسبابي
وتعرفين بگلبي دگ الج ماقررتي تگطعين
الجفة والزعل بينا
-من زمان تركت الزعل
-يعني افهم انج رجعتي تحبيني
وگفت وقررت اعيش سني الحقيقي
-لا قررت اعيش عمري وسني
بدون مشاعر مستعجلة ولا عواطف
تزلزل أستقراري منا لمن انضج واعرف
اتصرف ويا مشاعري وتوجهه
باوعلي مبتسم وايده على گلبه
-واني لذاك الوقت منتظرج
التفت ماشيه صاح
-منتظرج طول العمر
وهيج خليت حدود
لنفسي والة وعرفت ان في
العجلة الندامة بعد ورايه
عمر كامل يستحق اعيشه
بين طفولة ومراهقة
ولاحگة على طور الشباب
وتقلبات المشاعر وقصص الحب
.
.
غِنى
__________________
الحياة بعد الزواج تشبه كتاب جديد
فصوله ما تنكتب عالورق فقط
بل تتسطر بالتفاهم والمشاركة
وأحياناً بالصبر أكثر من الحب
عيني عالمطبخ والانفجار اللي
مسوي بي أيمن وحمادة قبل طلعتهم
للدوام گالي نامي احنه نتريگ
گشور البيض بكل مكان علب الملح
والشكر مفتوحة الجاي مگلوب عالميز
فتات الصمون بالگاع صورت المطبخ
ودزيتله الصورة شوية ورد عليه
-ها حبيبتي بسيطة بسيطة شويه
تلميع من اديج الحلوة كل شي يضبط
1
-ولكم لو مسوية ريوگ لجيش هم
مااوصخ هالگد صحون
-لخاطر حمادة وابو حمادة
-عيوني الكم بس توووووبة بعد
اگعد اسويلكم ريوگ واحفظ كرامتي
من السحسلة والتنظيف
-غنوة كتبيلي شمحتاجه لأن اللسته الدزيتيها
البارحة راحت من حذف المحادثات
-جوووز من طبع الحذف لوووو عندك اسرار
ماادري بيها
-اي اني اللي اغتاليت أوباما احذف لأن يثگل الجهاز
وكافي لغوة لج دزيها
سكرنت اللسته من المحادثة ودزيتها
ثواني واتصل فيديو فتحت الخط
-ها اشتاقيتلي حب
-اشتاقتلج سليمة بت عاااااامر مسميتني
الشاررررررع بالتلفون
صفنت وهو خزرني
-الصفنة مو الج
-هااااااا مو شسمه
-اي شسمة بالله
طگيتها بوجهه
-انت ليش مسميني البييييت بتلفونك
-اااااااااخ يابه بت ال………
لج شكم مرة گتلج هذا تلفون الشغل مررررات
حتى الشباب بالمكتب ياخذو يتصلون علمود الشغل
لازم اسوي تموووويه بتلفوني الشخصي
مو مسميج المعلاگ
باوعتله صفح
-وهو هذا هم أسم
سميني الحب حياتي بنيتي أميرتي
-لجججج المعلاگ اله خصوصية اكبر
غيري اسمي لا اجي اسحلج
-راح اسميك الطحال
-غنيييييوة
-حبيبي
طگيتها ضحكة
-راح اسميك الكبد قابل اني شعندي
غيرك
-يلا حبيبتي كملي شغلج
هااااا ونسيت اگلج الحمام هم صار هوسة
-من عيوني انظفه
-هااااا ونسيت غرفة حمادة هم والصالة
-اشتعلووووووووو
شمرلي بوسة وسد التلفون
بلشت شغل بالبيت من مكان لمكان اتنقل
الى أن خلصت كل الغرف گعدت
على گروب مجموعتي اطلع المحاضرات
اكتب اللي اريده واحفظ اللي أريده
كملت كل شي ودزو صورتنا الجماعية
بالتخرج
سحبتها واخذني الواهس طلعت
صور التخرج واسترجعت ذكرياتي الحلوة
بوقتها
جانت حفلة رائعة بوجود اخواتي وأيمن
اخذ دور الاب والاخ والحبيب وكل شي
جان ويايه بكل لحظات تخرجي لحظة
بلحظة
طلعتلي صور العرس وگعدت اصمم فيديوات
وفيكات لحد مرجعو هو من الشغل يتغده ويرجع
بعدين وحمادة من دوامه
گاعدين متقابلين عالميز اخلي گدامهم
الغدة يأشر لحمادة يگعد عاقل
وهو مؤدب
-تاكلون واللي يووووگع قطرة عالميز
ينظفها تمام
-خوش
جعصت خدود حمادة وبسته
ماخذ لهجة ابو كلها
كملو حمادة ينام ساعة واكعده اقري
وأيمن يشلع گلبي يلا يگعد نومت
حمادة بغرفته ورحت تمددت يمه
سحبني لحضنه يسولفلي
-رحت لمدرسة حمادة
وسألتهم بما ان امتحاناته بس شفهي
گلتلهم بنفس اليوم امتحنو
حتى ناخذه ويانة ونروح لأمتحاناتج
-بس هوايه وقت يبقى
-لا مو نسيت اگلج شي
-شنوووو
-رهام راح تجي واريد اطلعكم شاليه
لسليمانية تتونسون حتى حمادة ماعنده
التزام وانت تفك اعصابج النااااار قبل امتحانج
وراها من يجي امتحانج نروح براحتنا
-هوووو اني ليش حبيتك
-طمعانة بأموالي أكيد
-لو حافي منتف هم أحبك
-أگلج غنيوة
-گول عيوني
-ماكو شي بالطريق
-اي اكو سيارات
-اني هم صوجي واسألج
-گول ياالله ماصار ثلث أشهر
-بس اررررريد
-واني هم
-حلفي
-وعيونك شو تخرج وراح اتخرج
ووظيفة اكيد فد سنة سنتين يلا
اتوظف خل نجيبلنا طفل نلعب بي
-حبيبتي فاهمة الامومة غلط
ضحكت واني اشوفه عيونه تلمع فرح
-يعني صدگ لهالدرجة حاب يصير طفل
-اكييييد اني ماتهنيت بطفولة حمادة
لأن مريض والطفل الثاني الحمد لله
ربنا اختارة شهيد قبل لينولد
-ان شاء الله ربنا يرزقنا ويفرحك
-اميييين يارب
ونام وهو يهذي بهالموضوع
واليوم جر يوم وشهر وامتحنا
حمادة ويه رجوع رهام
وطلعنا مصيف جو رهيييب
وخضار وطبيعة خلابة
شالية بين الأشجار وهدوء
اسبوعين من العمر جانو
رجعنا بعدها للبيت واجتمعن أخوات
أيمن يمنا اني من يجتمعن الاثنين اللي
بأربيل الزم گلبي بأيدي
لأن أذية وحجي وبسامير رغم سكوتي
ميحلالهن الأتصال برشا الا من يجن
1
گاعدين مسوين لمه بالحديقة
وأيمن بعده مراجع من شغله
گمت اجيب كرزات ورجعت بعدني بباب
المطبخ و رهام
ترزل بيهن وتحجي بصوت ناصي
-زحممممة وعيب هالتصرفات هسه
لخاطر أيمن عالأقل
-واحنة شمسوين نخابر اقاربنا وبعدين
ذوله خوال حمادة
-خلني ساكتة حمااادة الخليته يمجن
يومين ورجعت ماكل راشدي منج طابع
بخده لحد الان ميدري أيمن والا وروح امي
ميدخلج حتى بيته وادور دايرات على مرته
-كاااافي رهام صايرة سيف دفاع لغنيوة
-شبيها غِنى شو مدللة أيمن دلال وحمادة
يلمع والبيت كذلك والاكل والشرب المرتب
ومستقبلتجن رغم ذاك الحجي
-انت تعرفين أيمن وسوالفه ماتلمه
غير رشا ذيج تكانه وجبيرة
-وشبيهة سوالفه ووينها
هية شغلتين وراحن لحالهن وجان
عزابي وهم رجال دوم بعازة المرة
ورشا بخبثها ضيعت أيمن وانتن
لتفتحن دفاتر عتگ
-هههههههه اليسمعج يصدگ مو
جولان مدري جيلان بعدها موجودة تشتغل
ويا بالباصات السياحية والاورااااق تشهد
لوما لزمتي العقد بيدج من جابته هي
-كااااافي فضنها
وسدن المووووضوع سااااالفة وراحت
ومن حب البنية نهى كل شي من حياته
-خليني ساكتة رهام
تقارنين هاي السنجابة الشگدوتها
بجيلان الجنها دنگة طول بعرض اني اشوفهن
هي ورشا راهمات ويا
-بررربج التبيع روحها للمتعة هاي تنحط
ببيت
وگع صحن الكرزات من ايدي
وانحنيت أجيبه أباوع على رهام
والبنات واگفات وجهن ينطي ألوان
ابتسمت
-شو دخت يمكن راح تصيرن عمات
عن قريب
تغيرت وجوهن من الخوف للضحك بمجاملة
وطلعت وياهن
-شبيج غنوة
-ماادري رهام شو لازمتني الدوخه
-ولج خاف صدگ حامل
-اتشاقه وياجن لا ماكو حمل بس
هالأيام أسهر
ابد منطيت مجال للكلام
وسديت باب الموضوع وسويت نفسي
مو فاهمة شي باتن البنات وراح
يبقن يومين لحد متسافر رهام
بعد يومين
بالليل من رجع أيمن گعدنا وياهم
سوالف وضحك وعشه والكل
راح لفراشه
دخلت للغرفة بلا كلام سحبت فراش
من الكنتور باوعلي
-ها غنيوة اليوم بالگاع ننام
-لا بس اني
گلتها وفرشت فراشي بالگاع
مشالي بسرعة سحب الفراش من ايدي
-شبيج لج
-اشششش لتعلي صوتك منا خطار
-ممعلي صوتي امشي اريد انام نعسان
-نام بفراشك رووح
-غِننننننننى
گالها ودفعني للسرير
-ماااااريد انام خليني مرتاحة بالگاع
شمرني حيل عالسرير بحيث حسيت طگطگت عضامي
شمر نفسه بصفي وهو عصبي
-زعلانة سامعة شي مريضة تعبانة
مييييييتة تنامييين هنا وبحضني
سحبني حضني حيل وسحب ايديه
يحاوط بيهه خصره
رخت ايديه ونزلتهن عاد
الحركة واني ماابديت أي رد فعل
دفع أيديه وباوعلي
-شبيييييج
-مابيه
درت وجهي وانطيته ظهري
وغمضت حضن ظهري لصدره
وايده حاوطت خصري حيل
ودفن راسه بشعري
-حتى من نمووووت نموت هيج
وانتِ بين ايديه
وگعت دمووعي وعلت أنفاسي
وآني أحاول انظمها حتى ميحس
فرني علي بسرعة صرت بين ادي
-تبجييين
ماحجيت دفنت راسي بصدره
وكتمت شهگاتي منهزمة منه
الة واشكي منه لنفسه
-هاي اني هيج مبجيج
سكتت ورجعت أبتعدت عنه
اليومين البعدها جانو هدوء
تركني براحتي حتى ميصير
خلافنا گدام اخواته بس وقت النوم
ياخذني لحضنه بلا كلام وكل يوم
يشغلي رياض أحمد اغنية من تزعل يتحرش بيه
الى أن ودعنا رهام وصلها هو
واخواته للمطار
ووداهن لبيتهن مناك وياهن حمادة رجع بنفس
الساعات اول مدخل من الباب لگاني
بالمطبخ رفعني بحضنه دفعته
نزلني ودفر الميز
مر هاليوم ولازال السكون محاوطنا وبس رياض احمد بينا
اليوم الورا طگت روحه واجاني للغرفة
ارتب بالفراش وهو يحوم حواليه
-بيمن مزعلج
-مزعلانة بس اريد ارجع يم اخواتي
-احجيييي ترجعين شنووو شصار
زعلنج اخواتي
-لا
-غِنننننننننننننى
-متزوج جنت
صفن بوجهي مستفسر
-دااااايخة شنوو موووو تدرين بيه جنت متزوج
شنو حمادة
جبته من باب الجامع
-مووووو أعراف غييييرها أيمنننن رد على
أسئلتي بصراحة
لتلف وتدووووور اني اعرف كل شي
بس اريدك تحجيلي
تعصب وگام يدور بمكانه
-لج بابا زوووواجيش
-تمام احنه من اول متزوجنا انت بنفسك
قررت الماضي والحاضر والمستقبل
منخفي شي واحد عن الثاني
-وشخفيت عنج
-أيممممممممممن
-صوتج لا اطيح حظج
-جيلان
سكت شوية وباوعلي
-موظفففففة هايه يا زواج
-تمام
فتحت الكنتور طلعت جنطة
صغيرة
اجيب واخلي بيها ملابس
سحب الملابس من ايدي
-شجاااااااي تسوين
-اروح لأخووووواتي
-متولين لأي مكان
-اوووووولي ماااااريد اشووووفك مااريد
سحب وجهي بين ايدي وأصابعه
انغرست بخدودي
-تبقين هنا وتشوفيني
ماكو مكاااااااان ثاااااااني يلمج غير حضني
سحبها بقووووة من بين اديه
بحيت جرحت اصبعي
-تمام ابقى بس اقسم بالله
أي فرصة الگاها انهزم واترررركك هنا
بباصاتك السياحية ونسووووووانك
دفعني عصبي وگعت عالسرير
وجاب تلفونه وهو يدگ على رهام
اول مفتحت خط حجه
-شمغبرات اخواتج
-شكو أيمن
-احجي انت شحااااجيات ويه غِنى
-حجن بسوالف قديمة واني رديتهن
سد الخط
-احجيلي انتِ
-انت احجي انت من طرحت سؤالك عليه
عن مراهقتي مو رديت عليك
-لتعيييييدين الكلام اكرررررره ذاك الشخص
-تمام
ترك الغرفة وطلع منها ماحجه كلمة
ساعتين اختفى طلعت للهول لگيته
متمدد گبال باب الغرفة وعينه عليها
محاجيته تركته سويتله اكل
خليتة عالطبلة يمه بس درت وجهي تطايرت
الصحون بالهول محدثة صوت عالي
اباوع المرگة لاطشة بالحايط يم الدرج
والتمن مطشر بالگاع الزلاطة كل شي كل شي
بالگاع استغفرت ربي
-أستغفر الله راح تزوووووول النعمة من جهرتنا
بسبب هالسوالف
وگف يمي ورجله ترجف من العصبية
-اني مو كلب تخليلي الاكل وتديرين وجهج
وتمشين
مارديت لميت الگزاز والاكل وگعدت امسح وانظف
ساعة خلصت وطلعت للغرفة گاعد هو هناك
وبيده صندوگ كارتون مطشر اوراقه عالسرير
-گعدددددددي هنا
گعدت مسافة عنه وبعصبية شمر الأوراق
علية وگعن بصفي
-دوووووري هنا وشوفي اللي تردين تشوفي
رفعت الاوراق رجعتهن گدامه للصندوگ
-تعرف الشغلة مدام قبل لتحبني فمااگدر
احكم هذا ماضيك انت واحترم هالشي
بس اليقهر انت مقررت تحجي الا لمن اني
كشفت الموضوع
هدأ وخله عينه بعيني
-ماكو شي انتِ ليش ازمتي الموضوع
-زواج لو مو زواج
-مؤقت مؤقت لحاجات جسدية مو اكثر
احسن مااوگع بالحرام
-ليش هوووو الزواج المؤقت محسوووب زواج
زنا متغطييييي بغطاء شرعي
المرأة اللي تبيع جسدها مقابل فلوس نسميها
عاااااهرة مو زوووووووجة
-غِنننننننننننى
-ليش مستك الحجاية لأن بعدك مخليها
تشتغل يمك
-لج بابا موظفة قديمة واللي صار وخلص
ماخله بينا فد مشاعر لو شي حتى اخاف
منها
-شگدددددد المدة
-٦ أشهر جانت مو اكثر
-يمتى
-قبل لااحبببببج وهاي موجود حتى العقد
گعد يطلع الأوراق
-مااااااريد اشوف شي انت گلت قبل لتحبني
معناها قبل لتحبني اني ممكذبتك
وگفت عدلت ملابسي وطلعت من الغرفة
لغرفة حمادة قفلتها واتصلت برهام
اول مفتحت خط سألتها
-كم مرة عقد عليها لجيلان
-مرة فدووووة والله ماضي وانتهى
-ليش اجتج
-رادت يسوي الزواج رسمي لأن ماعدها
احد اهلها كلهم بالخارج وهي انفصلت
-يمتى اخر عقد
-والله مااعرف هي البنية اجت هنا وكذبت گالت عقد جديد وينه گالت ماعندي ورقة عند اخوج
غِنى والله أيمن صريح سألي يجاوبج
سديت الخط واندگ الباب
-شجاي تسوين
-معلييييييك بيه
-شجاج غِنى مو حجينا طلعي نسولف
بباقي الموضوع والله اشرحلج كل شي
-مااااااريد
دفر الباب دقايق وسمعت صوته
-خليج هنا واني انتهي من هالحياة المابيها
بس التعب
سمعت صوت اقسام المسدس مالته
وفتحت الباب مخلي على بطنه
باوعتله صفح ومشيت
-قبل خطوبتنا آخر عقد
مو
نزل من ايده المسدس وباوعلي
-والله العقد نفسه ماااااكو غييييره
هي مرة ومن سنيييييين بس كلام
گالته لرهام ان اني جددت العقد انطي مجال
افهمج
-لا ماافهمك تعرف ليش
لأن انطيتك فرصة تحجيلي وكذبت
وثاني شي شلون تحبني وتتزوج هيج
قذارة شلووووون تحبني وتروح تخطب
رشا هاي شفهم منها افهم انك بكل
خلاف مراح تسمعلي وبكل فرصة
وزعل وعدم تفاهم تركض لحضن غييييييري
-يااااااااااابه وروح اهلي مرة وحدة ٦ اشهر
مو اكثر
-فهمتتتتتتتتتت ليش مخليها بالدوام
-شبيييييج يامخليها غير اربع باصات مالاتها
وهي مرشدة بيهن واني شريك وياها
-تمام خليها
مشيت للكنتور طلعت الجنطة
نفسها
-وديني لأخواتي
-تطلعين منا امووووتج واموت نفسي
سحب الأقسام وخلة المسدس ببطني
مديت ايدي لأيده بسرعة
ودست زناد المسدس
فتح عيونه بوجهي ووگعت ايده
والمسدس اصدر صوت وهو يوگع على ارضية الغرفة ووجهه شحب گعد
على طرف السرير همس بخوف
-لو بي عتاد
اباوع لوجهه تحول لأصفر شاحب
مشيت بسرعة حاوطت وجهه بكفوفي
-شبيييك أيمن
حضني حيل ورفض يتركني
رغم اللي سمعته حاوطت راسه واكتافه
لدقايق ساكتين بعدت راسه أباوعله
-وجهك شاحب گووووم
ردد نفس الكلمة
-لووووو بي عتاد
وهنا عرفت مدى خوفه وتأثير اللي صار
علي
بعدت ايدي وگعدت بحضنه
خليت عيني بعينه
-واثقة منك متسويها ولا تخلي شي بهالمسدس
وبعدين هالمسدس من عرفتك لليوم مامشتريله طلقة مخلي بس منظرررررر خرخاشة موووو مسدس
كفخني وحضني مرة ثانية مشاعر معوقة شلون ماادري
-سمعيني لآخر مرة
والله وروح اهلي عقد مؤقت لمدة وره
٦ اشهر من معرفتي بيج مو اكثر
-تمام
-تمام صدگتي لو تمام وتسوين بنفسج شي
مثل هسه
-شدعووووة قابل يوزرسيف وانتحر علمودك
-لا ياااااااابه آني أسمر يااسمراني
سحبني بسرعة وگلبني لحضنه وعينه بعيني
-أنعلج أبو الباصات لابو جيلان
ضربته بأطراف اصابعي على شفافه
-لتجيب اسمها على لسانك
شوف ايمن اني مو قطاعة ارزاق بسسس
هالمرة مااگدر لتشتغل وياها
رفع راسة وشعره المنثور وجيبنه
المتعرق زايداااته سحر
رفعت راسي واني مبتسمة
-تشتريلي لامبرغيني
-تمام بسسس شويه
دفع اديه وتسوفل لحد مقاطعته
-اسمعني
-راااااااح اطيح حظج
سحبت نفسي واني اعدل ملابسي وشعري والفوضى اللي سببها أيمن
سحبته گعد گبالي
-شوووف أيمن الماضي ماضي بسس
شاركني عادي هسه مووو حجيتلي على
علاقاتك وسوالفك عالنت گتلك شي
-لأن بعدها تشتغل وياي وقسم بالله بس
شغل وللعلم ها مااشوفها الا لمن نحسب
الوارد ونتقاسم المبلغ وماااااعدها اي شي
وياي
-ايييييي عوزك يكون عندك شي
شوف ايمن لتشوفني ضحوكية ولتشوفني
أحبك كررررامتي حتى فوگ نفسي
وانتتتتت نفسي لتختبرني بفقدانك
لأن اتركك بس والله بعدها امووت من حزني
اني مو تافهة بس لتشتغل وياها اذا تحبني
-انت شتشوفين
-اشوفك تحبني غصبا عليك طبعا
-احبج غصباً عليه انت عرمة وتاكليلج بلد
بس اگلج مااحبج تشنقيني بس صراحة
ارتاااااحيت خمس ايام بدووون لغوووة لو زعلانة فد عشر ايام
-انجبي ووخري اديج
دفع أدية وغاص بحضني
لوقت غير معلوم هدوء
وبس أنفاسنا بالغرفة
همسلي بأبيات القصيدة اللي كل مرة
يراضي زعلي بيها
-زعلان بس يا زعل
لمن ترد للصدگ
قبل المنادى اجي
وشلون جيه اجي
اركض ركض محترگ
يا للذتك بريتي
وين الكَه مثلك هوى
لولاك والله اختنگ
هيه شراكة نفس
لو سكت گلبك سكت گلبي
ويدگ لووو يدگ
وبهيج قفلت باب الزعل
ومنها قررت مااسكت لأي احد
ومعاركي اخوضها للأخير
العتب المبتور يجيب كتمان
واني شفت سنين الكتمان
شسوت بحياتنا بعدها بأيام
قليلة تجهزنا وانطلقنا ناحية
بغداد علمود أمتحن جنت متوقعة
هدوء وراحة لكن كان العكس
ورغم العكس جان مرض قووووي
بس الفرحة
دگت بابي من جديد معلنة
أن النحس بحياتي انقطع
وبديت بمرحلة السعادة للأبد
.
.
.
صِبى
______________________
روحي حيث أنت
الصفحة ٢٠١
حبيبي فرقد هالايام هووواي مشتاقتلك اكثر واكبر من أشتياقي المعتاد
مااعرف سر هالاشتياق الغامر يمكن گلبي المكسور محتاجك تجبره ياحبيبي من تركتني اخذت وياك حتى أنفاسي
وتركت صوتك معلگ بثنايا روحي
كل يوم أفتح الشباك لعل الريح تمر
بية جايبه شويه من ملاحمك وحنيتك
كل يوم قبل لا أنام وبسبب حزني احاجيك
ارجع فرقد ولو على هيئة حلم
او نبضة اشتياق عابرة فلا زلت بحاجتك
حتى بعد سنين
___________________________
سديت الدفتر على صوته المتعب وهو يحاجيني
ستوه گاعد من النوم
-جاي تشكيني لأخوج
مشيت ناحيته وبيدي مخدات اثنين
اسنده بيهم
-صباح الخير
-صباح النور
سحبته لحضني ساندته خليت المخدات
ورا صوت شهگة نفسه وهو يستنشق
شعري اللي وگع علي هيج حزني
استعدلت واني ارتب گعدته
-شتحس اليوم
-بأن گلبي المتعب مايگدر على
فراقج
-شلون يافراق واني يمك بكل
ساعة وثانية
-جسدج يمي بس روحج لا
عدلت شعره بأصابعي امتدت ايده
لأيدي لمسها
-ليش هالشكل ضعفانة
-أن شاء الله يلا هسه عوف السوالف
نتريگ
-مااكل تدرين بيه اريد گهوة
-ممنوع منبهات أسد
-مااشرب عصير مستحيل صِبى
غثيان يصيبني
-عصير صحيييي
-خضروووات صِبى عصير بي كرررفس
ويين اكو واحد يشرب كرفس
-اني وياك نشربه شوفني شلون
تعبانة يرادلي طاقة
باس جبيني وهو يرتب شعري
-لعيونج أشرب
نزلت جوه للبيت الحجية لگيتها مجهزة
شغلات العصير كيوي وكرفس وخيار وليمونة
صبحت عليها وجاوبتني بكلمتها المعتادة
-صباح الخير يوم الله يرضى عليج
-ليش تعبانة وگاعدة من الصبح
-گلت شويه اعينج على الشغل
-ماعندي شي والله سهلة
-ياسهلة واني أشوفج مثل النحلة بين
البيت وأسد والشغل اللي گايمة بي
انتِ وفقار من البيت
-واجبي هذا
طبطبت على كتفي وراحت تطلع ريوگ
للبنات اشوفها كل يوم تسوي اللفة
تخليها بيد مُنى مااعرف هل هو حرص
ولا شفقة المهم مُنى تحب هالحركة
وتنتظرها كل يوم بترقب
كملت ريوگة وصعدتله
خليته عالميز سحبت الكرسي
سندته وحركت رجلي وهي يعين نفسه
بأيدي گعد عالكرسي ومشيت بي
للحمام ثبته عالمقعد لحد مخلص صاحلي
ساعدته ورتبته خليته مقابيل المغسلة
فتحت المي وهو لازم فرشة أسنانه يغسل
نشفت وجهه ابتسم
-طفل حضانة مو رجال تالي هالدلال
يفسدني
-تدلل شبيك فرصة واجت يمك
-وانتِ منو يدللج
-الدلال وطول عمري ماجان من ضمن
مقومات حياتي لذلك مااعرف طعمه
سحبت الكرسي وطلعنا هو بكرسيه واني
مقابيله صبيت العصير بگلاصين وخليته
گدامه
-يلا سمي بأسم الله
-ليش تشربي حتى تقنعيني
ضحكت
-لا احبه
واضح على ملامحج الحلوة شلون تغيرت
من شربتي
شلت صمونة اسويله لفة جبن
خليتها بيده
-صِبى ايديه تشتغل اني اكل تريگي
انتِ
-اعصابك ضعيفة ليش تجهدها
خلي جهدك للتمرين والباقي عليه
-شتشوفين صِبى
-اصابع رجلك جاي تتحرك متحس بيها
-احس بس منملة رجلي خدر واصل لنهاية فخذي
-كله يروووح شلون ايديك بأسبوعين
تحسنت
تريگنا وخلص دگ تلفونه أياد
فتحت سبيكر
-ها النسيب
-ها ابو قسور المؤسسة عدهة طلعة
لحي التنك لأن جاي موسم صيف ملابس اطفال
تشارك ويانه
-اي اكيييد
-بيك حيل نطلع
باوعلي هزيت راسي
-اي كل الحيل
-خاف تتعب
-لا قوي حديد
ضحك أياد وقبل ليودعه انطاه الموعد على يوم
الجمعة
باوعتله
-اسد صدگ مابيك حيل انطيهم التبرع
همة يوزعون
-لا حيلي مووووجود هنا يمي
لزم ايدي باسها
-انت وياي انت قوتي وحيلي
نروح نشوف الفرحة بعيون الاطفال
-نروح تمام هسه گلي شنو جدولنا اليوم
-اليوم الجدول على حمزة هو يسويلي التمارين
-واني
-انت تطلعين وترتاحين روحي
لسمية او طلعي ويه امي والبنات
لو خابري ام فقار تاخذج
-وانت
-اني ماعليه شي
حمزة موجود صارلج شهرين محبوسة
هنا لخاطري
-لا مااطلع ابقى كل شي يصير
-اذا نامي السهر ذبل عيونج
طفى الأضوية ومشى بالكرسي لازم كفوفي
-اني رايح بغرفة حمزة تمام
-شتحتاج تعالي واذا تعبت نام
اني بس اخذلي استراحة ساعة
واگعد
-ناااامي لتبقين تفكرين صِبى
تمددت طلع بالكرسي على كيف
يمشي
وسد الباب ورا هدوووء غمضت عيني
عسى أن تغمض براحة حركت نفسي
واتگلب مگدرت انام
رجعت بذكرياتي لقبل شهرين
بعد اللي صار أجبرته على السفرة
علمود العملية الطريق جان هدوء
آني ويا وحمزة الحجية التزمت البيت
والبنات طول الطريق افكاري تعصف بيه
رايحين للعملية بأحتمالية عشرين بالمية
ان يموت
وصلنا حجزنا بفندق على أمل أن ثاني
يوم نشوف الدكتور
دخلنا الغرفة رتبت ملابسنا بالكنتور
اخذتلي ملابس دخلت الحمام
سبحت وطلعت خليتله ملابس عاالسرير
كل هذا وهو گاعد ساكن عينه مني
وگف شايل ملابسه گاعدة امشط
لزم ايدي
-صِبى اسمعيني
-تفضل
-يمكن اللي سويته جان بشكل غلط
او يمكن تعاملت وياج بعنف
-يمكن غلط؟
-غلط من ناحية استعجالي بس صح
لأن هذا اللي لازم يصير
-لتعامليني ببرود
-شتريد أسوي انشعل نار وانطفي حتى
تحس بيه
-صِببببببى
-كافي أسد خلي نفسك هادئ وراك عملية
-آني ارتاح واهدأ من انتِ ترتاحين
احم صِبى انت زينة اذيتج يعني اقصد ……
من جنه سوه البارحة
وگفت عيني بعينه
-السؤال اجة متأخر واحنا ماجنه سوه
جنت انت لوحدك اخذت اللي محتاجه بقوة مفرطة
واسلوب جاف وشهواني لتقحمني وياك
باللي صار
تركته ومشيت للسرير باوعلي بعصبية
وتحرك للحمام
اخذتني الغفوة من التعب لوقت متأخر
صحيت على صوته
-صِبى گعدي نتغده
-ماااريد اكلو انتو بالعافية
-گعديييي جااي اگلج
گعدت مابيه حتى حيل لبست
وطلعنا لمطعم تغدينا يسولفون
واني بالي بغير عالم رجعنا للفندق ارتاحينه
والعصر متأخر طلعنا للدكتور
بسبب مراسلات الدكتور هذا ويه دكتور أسد
ببغداد گاله بالليل تجي للمستشفى فحوصات وتحاليل
لمدة يوم كامل
رجعنا للفندق جمعنا أغراضنا خليت الجنط بالباب
التفتت منتظرته شفته گاعد عالسرير منزل راسه
وباله سارح
-أسد الله
-حبيبتي
-شو باوع فكررر بهالعملية كأنها بداية
لحياة جديدة بدون نوبات ولا قلق
ضغط كف ايدي ونطقها
-خايف صِبى
سند راسه على كتفي حضنته
-تخاف ورب العالمين وياك
تخاف واحنه كلنا حواليك
-وانتِ
-للأخير وياك يلا لنتأخر
سحبته من ايده وطلعنا للمستشفى
طول اليوم مشفنا اني وحمزة منتظرين
بالغرفة اللي محجوزة بأسمه المغرب جاي
اصلي ودخل هو وحمزة كملت صلاتي وگمت
-ها عيوني
-تقبل الله
-منا ومنكم يارب كملت
-اي كملت كل شي الصبح بالسبعة ادخل
-شباب اني رايح ارتاح بالفندق تلگوني بالستة هنا تمام
ودعنا حمزة وراح
-تاكل شي اطلبلك
-جوعان بس احس شي قافل معدتي
-اطلبلك شوربة خفيفة
-نطلع صِبى
-يقبلون
-اكيد
بس عدلت حجابي وطلعنا تمشينا
ودخلنا مطعم بسيط طلب شوربة
وشغلات ثانية گعدنة ناكل بهدوء
ساعة ورجعنا نتمشى
-اخذ تكسي مو زين عليك التعب
-خل نمشي مختنگ صِبى حيل
مختنگ
لزمت كفة ومشيت وياه
-فكر انك من راح تصحى راح يصير گدامك
عالم من الاحتمالات السفرات اللي مأجلها
والامنيات اللي شوفتيناها ركوب الخيل اللي
طالما كان امنيتك والتسلق والسفرات اللي
مخططلها بأيام شبابك وبالجامعة
-كلها مااريدها أريد من افتح عيني
الگاج اول وحدة منتظرتني
ضغطت كفه ورديت بهدوء
-وحتى بعد متفتح عينك وبعدها وبعدها
-اكيد
-اكيييد
اخذنا تكسي راجعين للمستشفى
الغرفة بيها سريرين واحد منهم للمريض
والثاني للمرافق تمدد وعينه تفتر عليه واني
أشتغل وارتب اغراضه وجهه تعبان
وعيونه حمرة من التفكير نطقها بهدوء
وبصوت يائس
-صِبى تعاي يمي
اباوع للغرفة هديت الاضوية وصار شبه ظلام
ليل وهدوء وشباك الغرفة مفتوح
ضوة القمر داخل من الشباك منطيها سكون
بعد ماقللت الاضوية وطفيتها
الغرفة ساكنة وصوت نفسه العالي واضح
تركت كل شي من ايدي ومشيتله
ببطئ يفتح إيدي بدون كلام
و ما يلح بالطلب بدون استعجال گال بهمس
-ما أريد شي بس حضنيني
حضنته رفع نفسه أستقر على صدري
غمض عيونه وصوت نبضه ووواضح
- أسد الله ماكو شي يخوف أنا يمك
وكل شي راح يعدي إنتَ بأمان
امك تدعيلك واني وكل شخص وگفت ويا
فد يوم وساعدته
ايده امتدت لظهري بهدوء بدون ضغط
كأنما يحضن فراشة بخفة
ايدي امتدت لشعره تتلاعب بي
سكنت انفاسه وهدأ
جان حضن بلا شهوة ولا اي شي جسدي
حضن اطمئنان من خوف هو من عمليته
واني من فراقه
ثگلت أنفاسه وهو يشد بيده عليه
وكأن الحزن تعاظم بروحه
-وعديني الگاج گدامي من اگعد
-وعد
دفن راسه بنحري وهدأ لوقت غير معلوم
حسيت بأنفاسه ثگلت
متحركت من مكاني أستمريت بأرق
من خوفي من حزني من كل شي مر عليه
بهالشهر صوت الساعة المنتظم أعلن بعد
ساعات عن دخولنا الساعة خمسة
ونص سحبت نفسي منه توضيت وصليت
سلمت بالصلاة والتفتت هو گاعد
-صباح الخيير عيوني
-بعدني عيونج حتى بعد اللي صار
-گووم صلي واذكر الله
گام توضى وهو يصلي اندگت الباب
دخل حمزة
-هاااااا اخي الكبير شلونها المعنويات
-عااالية معنوياته قابل هو اي واحد
هذا اسد الله غالب المحامي واله من اسمه
نصيب
زأر حمزة وهو يتشاقه ويا واجه گعد بصفه
كلامه جان يلمس الگلب
-شوف أبو قسور أنت گدها وگدود بس
اطلب منك بروح ابوي ترجع لأن تعرفني ماشي
بهالدنيا بحسك أنتَ تمام وحتى تنفذلي وعدددك
مو وعدتني بذاك الحلم اللي گتلك بعيد المنال
گتلي خلي يمي
هاياني خليته يمك تطلع بالسلامة وتحققه
حضنه وهو يمازحه
-ومن تطلع من البنج مو تفشلنا وتصيح حبببي صِبى
وتطير الهيبة
ابتسمله وهو يباوعلي
-حتى بدون البنج راح اگولها
سكتت والتفتت بنفس اللحظة
على صوت الباب
مشاله حمزة ودخلت ممرضة
-صباح الخير صاحب العملية يلبس
هالملابس ويتجهز ربع ساعة
نرافقه لغرفة العمليات
اخذتهن منها وهي طلعت رحت يمه
-تلبس عيوني
-تمام
اخذهن ودخل الحمام وطلع
وره شويه معدل شعره
گعد عالسرير گعدت بصفه حمزة طلع
برة يستحي
-أسد الله
-حبيبتي
-اطلعلي وراح تلگاني هناااااا
حضنته وأستقر راسي على
صدره لدقايق رجعت اندگت الباب
عرفتها الممرضة بسرعة
رفع راسي باسني بخوف وهمس
-احببج صِبى
وگف وهو يعدل ملابسه
فتحت الباب دخلت الممرضة مبتسمة
-يالله أستاذ
مشيت ويا اني وحمزة كفي يرتجف بخوف
داخل كفه وصلنا ويا لحد ممر الانتظار
ووگفتنا الممرضة
-هنا ارتاحو بعد
اشرتله ودخل وياها من الباب
وغاب طوله داخل القاعة
التفتت لحمزة نفس وضعي القلق
باوعلي يمازحني
-ها الخوووافة
-ها الخواف
هز راسه ووجهه انترس حزن
-اخوووي الوحيد صِبى صدگ خايف
ست ساعات وعملية دقيقة حقي اخاف
-ادعي يارب يطلع بخير
-يارب
وبدينا رحلة الخوف كل اللي اگدر
اسوي هو الانتظار وقراءة القرآن والدعاء
ومرت الساعات ببطئ مرعب جان المفروض يطلع
بالوحدة بس مطلع
عينه عالباب لحد الساعة ثلاثة بدينا
ننهار حمزة عصبي ومحد طلعلنا من غرفة
العمليات وگف يريد يروح يهجم
وانفتحت الباب اجت الممرضة
-واحد منكم يدخل للأفاقة
باوعلي حمزة وهز راسه موافقني اني
ادخل
انطتني اشياء خاصة لبستها
للتعقيم ودخلت المكان باااااارد بشكل
مشيت وراها جان شعره محلوق بالكامل
ومكان العملية مضمد وملفوف
وصوندة بين شفافه وممرض واگف
يسحبها وهو يفتح بعينه ويسدها
سحبو الصوندة والمخدر اجه على كيف
يضرب على خده ويحجي ويا ينطي
اوامر مثل افتح عينك انطق
تعبان بس يأشر بعينه اشرلهم المخدر
-طلعو وامشو على كيفكم
طلعت ويا امشي والممرضين اربعة
وجههم الدكتور شلون يشيلو
من نوصل الغرفة بالعناية المركزة لازم
يبقى يومين
مشى ويانه حمزة دخلو الغرفة
وشالو حسب الأوامر ثبتو راسه
وطلعو وبقت ممرضة ثبتت العلاجات
بأيدي وراحت بعد مادخل الدكتور يحجي
بلهجتة العربية المكسرة الحلوة
-جان شجاع وبطل الورم انشال بالكامل
اي مضاعفات تصير مؤقتة لتخافون
النوبات راح تختفي أن شاء الله بس
اريد همتكم ويانه بالتأهيل شي
بسيط ويرجع كل شي بخير
تركنا وطلع اني وحمزة گابلنا هادئ
ساكن يفتح عيونه ويسدها
بس هالكلمة نطقها وهدأ
لساعات هو يغفى ويگعد لليل فتح
ووضعه مستقر ونطق الحمد لله
-الحمد لله على سلامتك أبو قسور
بصوت رايح من التعب
-حبيبي
-اسد الله
على كيف دار عيونه ناحيتي
-حبيبتي
-شتحس
-ألم
-هذا جهاز خاص يضخ المسكن
حركته وهو ساكن دخلو الممرضين
واحد خفف ضغط الضماد
والثاني بيده مثل الكاسترد خفيف
-وكلو هالصحن وممنوع تحركو
رفع وضعية السرير شويه
وبديت اوكله كم خاشوگة وبطل
رجعنا السرير لوضعه
وهيج استمر ثالث يوم الحمدلله طلعنا لغرفتة على كرسي متحرك
وبدت تبين مضاعفات العملية
شوية نظره مشوش رجلي ميحركها ولا ايده
خلوله كيس أدرار خوفاً علي
بالغرفة الاعتيادية
صرت اهتم بي اكثر وحمزة يروح
يرتاح بالفندق
لحد مشالو الكيس حتى يتأكدون من
مثانته يگدر يفرغها بأرادته
خلينا بالكرسي وانطيناه سوائل حسب التعليمات
نص ساعة وطلب الحمام وهيج تأكدنا
ان الامور ماشية بنسق صحيح
الصبح صرت كل يوم افتح الشباك واخذه
بالكرسي اگعدة نباوع على منظر المدينة وجمالها
للأسف جان لا ايده ولا رجله تتحرك
والخوف مالي وجهه لحيته عالية ورافض
يشيلها وضايج ونفسيته صفر
لمست كفة فز
-شبيك عيوني
-حسيت بنهاية اصابعي حسيت بلمسة ايدج
لزمت ايدة افركها اله هي ورجله
يرفض وميقبل بس مستحيل يقاوم
تحت اصراري وهيج استمرينا لعشر ايام
استعاد حركة كفوفه بس ميگدر
يشيل ايده اعلى من المرفق
وأخيراً الدكتور سمحلنا بالسفر
رتبنا وضع السيارة واخذنا مخدات تسنده
وصعدت اني ويا جنة كل ساعة نتوقف
نفتح السيارة نخلي يشم هوا ندلك رجلي
ونرجع نمشي لحد موصلنا بغداد الحمد
لله الكل جان بأستقباله الذبايح اللي انذبحت
تحت رجلي بقينا أول يومين جوه الى أن توقفت
الناس اللي تجي تزوره طلب نصعده
تعاونو حمزة وفقار وصعدو للغرفة اللى
جهزتها تجهيز كامل اله
كل شي جان تحت ايدي حتى
اكون جاهزة من يحتاج شي
السرير حاوطته بمخدات خفيفة
تسنده الكرسي دائماً قريب منه
باليوم الثاني جبنا خبير العلاج
الطبيعي وگعدنا اني وحمزة تابعنا
علمنا كل شي وخلال خمس ايام من
رجوعنا ادي الحمد لله تحسنت
بس اكتئاب وهالشي جنت متوقعته
نظره مشوش ويشوف الاشياء ابعد
من مكانها الحقيقي فگمت شسوي
حتى يتونس اگعد اقراله بكتاب من
كتبه لو اگعد اناقشه بمرافعاته اللي محتفظ بيها
بالمكتب
وبعد ثلث أسابيع أستعاد بصره
بشكل مفاجئ مثل مگال الدكتورة
جنت گاعدة يمه ادلك رجله مد ايده
لطرف شعري ولمسة بشكل مباشر
باوعتله ضحك
-وانت بعيدة قمر ومن تقربتي صرتي قمرين
اشرت بيدي گدام عينه
-بالله المس ايدي
مد ايده لمسها بسرعة
-الحمد لله
نطقتها براحة وكملت وهو يباوعلي
-صِبى
-ها عيوني
-اريد أزين واترتب احس نفسي صاير غوريلا
-سهلة من عيني
گمت وخليته عالكرسي ودخلنا الحمام
طلعت عدة الحلاقة رغيت الفرشة ومررتها على لحيته
گعدت بمستوى وصرت امرر ماكنة الحلاقة
على لحيته بهدوء طرح سؤاله بتوتر
-تحبيني
ابتسمت واني اكمل
-شگد مثلاً
-فوگ متتخيل
-ليش متنامين بحضني
-اريدك ترتاح وراسك اخاف علي من اي
حركة غلط
-ارتاح من تكونين يمي صِبى
-اني يمك
-اقرب
گالها وسحبني طخيت بصدره
سحب الفرشة ودمر طرف خشمي
ضحك على منظري واني اغسل
-نعيييماً
نزلت المراية باوع
-عاشت ايدج
طلعته وگعدنا بالغرفة صعدت الحجية
فتحت الباب وصلت عالنبي من شافته
-صلوووات يوم بت خالك وامها جايات
عليك تعرف جانو مسافرين وهسه
يلا رجعو
باوعلي حاير شيرد
اني رديت عليها
-أهلا وسهلا بيهم حجية
-بنت اصول راح اخلي ستيفاني
تجيب الضيافة يوم بس خلي
كراسي هنا اخذي من الصالة حتى
يگعدون
دخلت كراسي من الصالة وشويه
ودخلت ستيفاني وهم وراها
مرت خاله شايفتها مرة جبيرة
محترمة سلمت علي وگعدت
عيني من صفا وهو عينه مني
جانت عيونها حمرة سلمت
صافحته وباست راسه
-الحمد لله على سلامتك أسد
-الله يسلمكم تفضلي
سلمت عليه وسحبت كرسيها تقربت يمه
وگعدت
-شلونك هسه
-الحمد لله
-والله ياخالة محد حجة
منا لمن رجعنا حتى ام فقوري
تخابر وابد مجابت طاري
گلتلها
-ليش نقلقكم
ردت صفا
-أسد مو اي واحد يستاهل القلق
امها نطت ترد
-اي والله أسد اخوها تعتبره اخوها الجبير
سكتت صفا وشويه ورجعت تحجي وهي
مبتسمة
-رجعت بدون لحية مو جنة نگلك هيج احلى
رد عليها
-لا هاي مؤقت لأن صِبى تگول تطلع مو انت
بلا لحيتك
باوعتلي مبتسمة بسخرية واضحة
-صدگ صِبى حتى بهاي متدخلة
ابتسمتلها
-شسوي مجبرة اتدخل بعد بموجب عقد الزواج هو ولحيته ملكي لذلك مااقبل يزينها
ضغط أسد على كفي
وهي انكبست نص ساعة اخذو
ضيافتهم وطلعو
دخلت اني سبحت وطلعت
هو بالسرير وتلفونه بيده يحجي
وية فقار عن قضية خلص وره
نص ساعة اني نعسانة
خليت مخدتي عالقنفة وتوجهت ناحيته
-تعاي نامي هنا
-لا ارتاح انت
-اني اروح يم حمزة وانت ارتاحي
نومة القنفة كسرتج
-لا وووووين رايح
ابتسملي ووجهه مليان أسى
-صِبى حتى حركة مااگدر اتحرك نامي بفراشج
وارتاحي
اخذت مخدتي ورحت تمددت بصفه بعد ماعدلت
نومته شمرت ضفيرتي بصفي عالمخدة
امتدت ايده ماخذ طرفها بين اصابعه
يمشطها
انطلق يسولف بهمس يحجيلي
مشاعر ممناقشني بيها سابقاً
مرر أصابعه بين خصلات الضفيرة
يسحب نفس طويل ويكمل بصوت خافت دافي
-تعرفين شنو جان يجذبني بيج اكثر شي
نظرتج أول ما أحد يحجي وياج
جدية وراها حيا وورة الحياء تسحر
-وكل هذا عرفته من نظرة
جنت أخاف اتغزل بعيونج أگول هاي مبينة
أعصاب والدنيا طالعة من عينها
ضحكت وهو سحب باقي الضفيرة فتحها
يتلاعب بخصلاتها
-بس عيوني جانت تتواقح غصب عني
حرك شعري وبان نحري
من وره خصل شعري طبع بوسة خفيفة عليها
من حبيتج شفتج كل شي
شفت بيج بيتي وأماني شفت كل صفات النساء
اللي تمنيتها بيج
همست بعتب
-لو ترجع لذيج اللحظة
تشوفني متلثمة وغامضة بلا متشوف باقي ملامحي
راح تحبني من جديد
-كل مرة أشوفج
أحبج كأني أول مرة أشوفج
بس إنت هل ياترى بعدج تحبيني
غمضت عيوني وهمستله ابعدد مخاوفه
-بعدني ولازلت وراح أبقى أحبك
نزل راسه يحتضن شعري
وغط بنوم عميق واني وياه
الأيام البعدها جانت متعبة يتعصب
بسبب رجلي لحد الآن ميحس بيهن
واكثر الوقت يتألم من الاجهاد العضلي
گمت اسويله حمام دافي رغم الجو اللي صار حار
اگعد ويا ادلك رجلي بهدوء لساعة لو اكثر
لحد مااني اتعب يلا اطلعه بعد مااصدم
جسمه بمي بارد
كل يوم هيج بين التمارين والاجهزة
والتدليك هذا جهدي ويه
أسد وبين مراجعتي للبنات للأمتحانات
ومساعدتي للحجية بالبيت
والشغل اللي يجيبه فقار واساعده بي
حسب توجيهات أسد منا لمن يجي
الليل احس افقد حتى قدرتي
عالنطق لكن ميخالف هوايه أشياء
تهون للي جاي افكر بي واخططله
وبعد شهر ونص من العملية
بيوم أسد نايم فزيت على صوته يهمهم
فتحت الأضوية وجهه متعرق ويحرك
بأيدي بعصبيه هزيته حتى يگعد فز
وگعت عينه بعيني بسرعة
سحبني وحضني
-الحمممممد لله
-شبيك أسددددد
-مابيه مااااابيه الحمدلله حلم
يحجي وياي واني گعدت اعدل الجرجف الخفيف على
رجلي طخ الجرجف أصابعه تحركت
فزيت مصدوووومة
-اسد حسسسسيت
-حسيييت بأصابعي هسه
رجعت يم رجله ادغدغها على كيف
ابتسم
-احس بحركة ضعييييفة بس احسسسس
بيهن
-شوووف يعني المساج والتمارين
والحمام الدافي والعلاج كلهم جابو نتيجة
-لا
صفنت بوجهه
-انت جبتي نتيجة
شفتج جاي تغرگين بالحلم وشمرت نفسي
وراج كأنما قفزت من الكرسي وبالمي تحركت ايديه
ورجليه
گعدت يمه
-هاي باللاوعي جنت تحاول تلگه سبب تتحرك
علموده
-لهالدرجة هايم بيج حتى باللاوعي احبج
ومن هاليوم بلشنا علاج مكثف لرجله
وگام يحس بيهم بشكل طفيف بس خدر
محاوطهم لحد هاليوم
فزيت من هالذكرى على صوت التلفون
گمت لأن مافاد وقت الراحة كضيته ذكريات
رجع دگ هاية نغمة تلفون أسد
شلته اودي اله وانبثقت رسالة ثانية
بأسم صفا وبعاطفة حزينة وغيرة
حبيبة مجروحة فتحت الرسالة اللي واضح انها
رد على رسالة منه
-لازلت كما أنت بگلبي حبينا وافترقنا
وتزوجت اني وانفصلت لعدم نسياني
الك وزواجك لازلت أنت حب طفولتي
وعشق مراهقتي
وكسرة گلب شبابي
الرسالة الاخيرة
-الف مرررررة لو الف مرة تتزوج
ابقى أريدك
عيني عالشاشة أحاول أستوعب
اللي أشوفة وبعقلي أرسم
كل السناريوهات الممكنة لرسالته
وسبب ردها بهالشكل فتحت الكيبورد
وتجهزت للرد الناري كتبت حرفين
وحذفتهم لأني أستوعبت
ان شخصيتي راح تنهز
واني أقاتل في سبيل
رجل لازال يحمل بداخله بقايا
ماضي قديم
فقررت أن كل شيء
يهووون أمام كسرة
گلبي وأن كل شخص
يتضائل وجوده ويصغر
حجمه بجانب كرامتي
حتى لو كان
عزيز العين
.
