رواية أعظم خيانة الفصل الرابع والعشرون بقلم الزهيريه
في وقت الشدائد سوف
تعرف من هم أحبابك
ومن هم أسوء اختيارتك
ريماس/ مرات صير مواقف بحياتك تكون بيها مسجون بزاويه وما تعرف تطلع من هذا الموقف لانه ما فاهمه اني بالوقت الي چان ابو شوارب يهزمني بي من مكان لمكان ما فاهمه همه ليش هيچ دى يسوون وما عندي محلل سياسي غير بس رحاب ومن خوفي لازگه بيها الله لا يكذبني كل دقيقه اسألها سؤال ما اعرف من اظل احچي احسن روحي نوعاً ما تهدى لهذا اني كل شويه اسال رحاب ليش الداخليه تدور عليه
رحاب / حبيبتي سمعتي من گال ابو شوارب انه مشتكين على ام رحاب انه خاطفتچ هاي معناها اهلچ مشتكين
ريماس/ والله انتي تحچين 10 بالشهر منين عندي اهل هو اني لو عندي اهل مضبوطين چان بقيت يم صفيه بس خاف ام زهراء مشتكيه على ام رحاب انه خاطفتني
رحاب / ليش هي ام زهراء ما تدري انتي وين
ريماس/ تعرف وچنت يوميه اتصل بيها واسألها على البيت شوكت يخلص لانه ابو زهراء هو يراقب العمال
رحاب / لعد شنو هذا الغباء شلون تشتكي وهي يوميه تحچي وياچ وثانياً الي يشتكي لازم قريب من الدرجه الاولى وام زهراء تشتكي بصفتها شنو
ريماس/ ولچ راح اتخبل ليش يدورن الداخليه عليه ومنو مشتكي
رحاب / اليوم الخبر بفلوس باچر يصير بلاش ليش مستعجله
ريماس/ اني احس بركان بداخلي وخايفه والخوف موتني ما اعرف شنو راح يصير وللمغرب اجى ابو شوارب وطلب من عدنه انه نبدل ونروح ويا خفت خاف يريد يقتلني بس غصبن عليه انچب واسكت لهذا بدلنه وطلعنه ويا اخذنه على بيت ثاني وطلب من عدنه ما نطلع إلا لشي الضروري ومر تقريباً 5 ايام وموعد جلسة الكيماوي مال رحاب عبرت حتى العلاج خلص
وهي خطيه ما تحجي گتلها / اني اروح اجيبه للعلاج لا تهتمين شنو إذا الشرطه اخذت ام رحاب انموت احنه عساها بالگبر وشگد حاولت ويايه رحاب انه ما اطلع بس اني اصريت اخذت وصفة الدكتور وطلعت ولكوني مو المنطقه ما اعرف الصيدليه وين بس اكو محل قريب علينه من نحتاج شي اختي تطلع تجيبه وتجي وصلت تقريباً لرأس الفرع شفت أسواق مكتوب عليها أسواق ميدو دخلت سلمت عليه وسألته إذا چان اكو صيدليه هنا وصفلي مكان الصيدليه بعد أربع أفرع
وظليت امشي لما وگعن رجلي وكل ما اسال احد يمر من يمي على صيدليه يگلي ليگدام اني طالعه 4 ربع العصر وأذن المغرب اني بعدني امشي واخير الله نفخ بصورتي وصلت للصيدليه واشتريت العلاج وطلعت
وكل شويه يفوت من يمي ابو تكسي يگلي اوصلچ واني المشكله العندي تيهت ما اعرف البيت وين وخصوصاً احنه صار 5 ايام من اجينه للمنطقه وامشي اريد اذكر البيت وين ما اعرف وصارت الساعه 8 بالليل والخوف موتني أخيرها گلت خلي اخذ تكسي بس بعدين گلت ادري غير اكون اندل البيت شلون أبو التكسي يظل يفتر بيه وبعدها اذكرت من دخلت يم أسواق واسمه ميدو من سألته على صيدليه هاي على مسافه من البيت الي گعدنه بي
اخيرها وگفت تكسي وگتله يم أسواق ميدو چان يگلي ما تحتاجين تكسي بهذا الفرع الگدامچ ما صدگت گمت أمشي بسرعه وصلت يم ابو الأسواق صحيح البيت مو بعيد على الاسواق وگمت أهرول مو امشي شلون واحد عبالك مضيع البيت صار سنه دخلت للبيت ويا ريتني ما داخله صار گدامي ابو شوارب وهذا صار 5 ايام ما يجي هسه على حظي من طلعت اجى اباوع عليه وجه يريد ينفجر وسألني
ابو شوارب/ وين چنتي اني مو گتلچ لا طلعين مو گتلچ الداخليه دور عليچ
ريماس/ طلعت اجيب علاج لرحاب وتهيت البيت وبصعوبه يله اندليت ورجعت
واني گتله هيچ طلع ورجع بيده صونده وضربني بصونده شاغت روحي للخالق بحيث اريد انهزم منه يدفعني قوي على الحايط ويرجع يضربني وخلال الضرب مو اعيط اسمع اخواتي ورحاب يعيطن طلع حابسهن بالغرفه اخرها گدرت اركض من حلاة روحي رحت للمطبخ ركض اريد مكان ابتعد بي عنه وهو چان ورايه ما حسيت غير على ضربه على راسي وبعدها كل شي ما حسيت
وبين النايمه وبين الگاعده اشوف ناس لابسين ابيض ما اعرف اني وين واسمع يمي صوت يگلي شسمچ اريد اجاوب بس احس لساني ثگيل وارجع انام
وبعدها احس صوت وحده يم اذني تكلي اي شي يسالونچ لا جيبين سيرة ابو شوارب ترى اخواتچ يمه وانتي تعرفين شيصير بيهن
هذا كله اسمعه بس كأنه بعيد عني وارجع انام وبيوم فتحت عيوني احس عندي قوه وبكامل وعي
رفعت راسي اكو بعد أسره بالغرفه الي اني بيها وهم اكو بعد ناس نايمين عليها وعلى خشمهم مال تنفس مثلي بالضبط واكو أصوات أجهزه
وهذا صوت المنتظم هو يحدد المريض ميت لو بعده عايش رجعت راسي لانه حسيت بي بوجع وضليت صافنه بسگف بي أضويه هواي والإضاءة قويه وبعدها انفتح الباب ودخلت وحده لابسه بالطو ابيض تاخذ فره على الباقين وما انتبهت اني رجعت لوعي إلا من صحت عليها وهي اتقربت يمي وهي تگلي
الممرضه/ حمد على سلامتچ لا تتحركين هسه اصيح لدكتور واجي
ريماس/ راحت طلعت وبعد شويه رجعت وياها دكتور واجي يقيس بنبضات القلب وهو يسألني
الدكتور / شسمچ الكامل وشگد عمرچ
ريماس/ اسمي ريماس وانطيته اسمي الكامل وعمري 17
وطلب من الممرضه دخل اسمي بطبله مالتي مال المستشفى لانه ما يعرفون منو اني وطلب الدكتور من الممرضه انه تبلغ الشرطه انه صحيت وطلب ينقلوني للردهة والدكتور رفع الكانونه من ايدي
والدكتور والممرضه راحوا وبعدها انفتح الباب مره ثانيه وچانت الممرضه وياها اثنين هم لابسين ابيض وياهم سديه واحد وگف على يميني واحد على يساري وحولوني أثنينهم على السديه وطلعوني ويدفعون بالسديه وصلوني للردهه وحولوني على سرير وأكو نسوان يم كل سرير مرافقه للمريض
واجني يسألني منو مسوي بيچ هيچ بس اني ما جاوبت ما اعرف شگد مر وقت لانه چنت أغفى وارجع اگعد اجتي
ممرضه وهي تگلي / حمد الله على سلامتچ يمعوده الله كتبلچ عمر جديد وشوف شنو مسويه بحياتچ لهذا الله نجاچ من الموت الدكاتره كلها اجمعت على انه انتي ميته
ريماس/ منو جابني هنا
الممرضه / انتي الشرطه جابتچ هنا اجتي إخباريه من الجوارين لدوريه مرابطه بالشارع انه البيت الي يمهم بي حريق وجايه الدفاع المدني والنار بعدها ما منتشره بالبيت طلعوچ مغمى عليچ وبنفس الوقت ملابسچ من ناحية ظهرچ مليانه دم اضافةً آثار التعذيب تارسه جسمچ والرئه عندچ مستنشقه دخان والرئات كلش تعبانات
ريماس/ وماكو احد ويايه
الممرضه/ لا ماكو احد وياچ وهاي صار اسبوع انتي فاقده وبالعنايه المركزه وماكو احد سأل عليج انتي شنو ساكنه وحدچ
ريماس/ دوختني بسالفة انتي وحدچ وطلعوچ ليش رحاب واخواتي وين رجعت سالتها من طلعوني من الحريق وحدي
الممرضه/ وحدچ لو اكو چان احد وياچ چان جابوا
ريماس / خاف احترگن وماكو احد طلعهن
الممرضه/ حبيبتي چنتي وحدچ بالبيت المحروگ لانه لو چان احد وياچ حتى لو يحترگ هم يطلعون جثته
ريماس/ بقيت مسطوره من كلام الممرضه وتذكرت رحاب المسكينه هاي مريضه واخواتي هسه شسووا بيهن غمضت عيوني ودموعي صب وفزيت من سمعت صوت يگول شلونچ ريماس
فتحت عيوني نصدمت وصار گدامي بيان ويا واحد ما اعرفه على كتفه نسر وصدمتي اكثر چانت بيان لانه لابس ملابس شرطه وعلى كتفه نجمتين
بيان / أمور تخطط الها وشگد تريدها تجي مثل ما خطط الها ما تجي إلا الي رب العالمين كاتبه النه تخطيط فرقد چان محكم من جاب ام رحاب وشگد حاولوا ويا في سبيل يطلعوها بس فرقد ضيق عليهم كلش والتحقيق ويه ام رحاب چان عقيم لانه نكرت كل صله الها بريماس وفرقد جاب امر قاضي برفع تصوير الكاميرات القريبه على بيت ريماس وأكثر وحده تردد على بيت ريماس هي ام رحاب
وبوقتها طلبت من فرقد انه من يحقق ويه ام رحاب اكون موجود وهو ما رفض وهو بي طبيعه من يحقق التحقيق الأولي يعوف المتهم ويحاربه حرب نفسيه
وبعد التحقيق الأولي ويه ام رحاب عافها أسبوع كامل والمحامي مالتها دائماً يطالب فرقد بموعد التحقيق الثاني بس فرقد ما ينطي جواب آخرها بعد اسبوع اتصل عليه فرقد وعلى ثاني يوم التحقيق ساعه ب 6 المغرب لانه چان عنده خفاره وچان يريد يگظي خفارته براس ام رحاب واني هم ما گلت باطل من بيتنه وطلعت ورحت على فرقد ودخلت لمكتبه وگعدت وبعدها دخل المحامي مال ام رحاب بعدها الشرطيه جابت ام رحاب
وهاي اول مره اشوف ام رحاب وفرقد بي طبيعه انتبهت عليه بهيچ مواقف يقلل من شأن المقابيله لهذا بقى ام رحاب واگفه وحتى المحامي مالتها هم واگف بعدها بده الكلام
فرقد / انتي اسمچ يسرى والكنيه كالتچ ام رحاب اني ما ادلعچ اصيحلچ بسمچ اي يسرى شنو علاقتچ بريماس والبنيه وين وديتيها
ام رحاب / ما عندي كل صله بيها وما اعرفها معرفه قويه
فرقد / قبل يوم من ما تطلع البنيه من بيتها انتي چنتي يمها والفرع كله يشهد عليچ
ام رحاب / اني ما آروح عليها هي من تحتاج مني مساعده أساعدها لوجه الله يعني اسوي خير لآخرتي شنو حرام بهذا الوضع بعد كل خير ما نسوي
بيان / وفرقد انطاني فيشه شكلتها على التلفزيون وشغلته وفرقد طلع أكثر من لقطه وام رحاب تردد على بيت ريماس وبكل قباحه جاوبت فرقد
ام رحاب / سيدي ترى گتلك اسوي خير شگد الله يمكني إلم مساعدات الها من أصحاب الخير انطيها واكو حديث لرسول محمد (ص)يگول من تنطي لازم تنطي بيدك اليمين وتضم ايدك اليسرى وره ظهرك حتى ما تعلم ايدك الشمال ما انطيت انت بيدك اليمين لهذا اگلك ما اعرفها هاي چنت اروح انطيها هل قاسمه الله خطيه اللگمه ما لاگيه
بيان / فرقد مات من ضحك وگام وگف على حيله وطفى شاشة التلفاز ورجع گعد بمكانه وجاوبها
فرقد / بابا انتي تعرفين ويه منو دى تحچين هسه اني اگلچ إنتي تحچين ويه اكبر نغل بالداخليه يعني انتي ساعدين البنيه لانه ما عدها تاكل بس عجيبه البنيه الي توها داخله 17 سنه نطت مبلغ كلش چبير لجارها في سبيل يجيب عمال ترمم بيتهم عجيبه من أين لك هذا البنيه من جيب هاي الفلوس وهي ماكو احد يتردد عليها غيرچ هنا راح نخلي الف علامة ? عليچ وعلى شغلها
ام رحاب / سيدي اني ما اعرف منين جابت الفلوس مال بناء البيت بس يمكن طلع الها ورث من بيت اهل ابوها
فرقد/ منين جيبين هاي الأفلام اهل ابوها چانوا گاعدين بمدرسه تابعه لدوله شتورث إلا في حالة وحده تورث المدير او معلمين تبيعهم وتاخذوا فلوس بيهم
ام رحاب / سيدي ترى البنيه اني شمعرفني هي منين جيب فلوس وهي من طلعت حتى تعمر بيتها ترى ما راحت بعيد في بداية المنطقه گاعده
بيان / وفي وقتها أنطت عنوان بيت بنفس المنطقه وفرقد امر دوريه انه يطلعون على هذا العنوان واي شخص يلگوا بهذا العنوان يجيبوا
بس الدوريه مثل ما راحت مثل ما رجعت وگالوا انه ما موجود احد بهذا البيت بس البيت يدل على انه چان ساكن بي طالع قبل ما تجي الدوريه بدقايق لانه عايفين القوري على النار يعني مال واحد مستعجل
ورجعوا ام رحاب للتوقفيف واني وفرقد بقينه وحدنه
فرقد/ مخلين الها محامي مو عبالك يدافع عنها لا بس حتى يعرفون شنو راح تگول وينطيهم خبر شفته شلون واگف مثل شمعة الفگر
بيان / المشكله سيدي ما اخذنه منها كلمه وحده تفيدنه
فرقد / اني اكثر من مره گتلك حماس الشباب للضباط الجدد يخلي ما يعرف يشتغل ليش انت چنت مصور ام رحاب راح تعترف من البدايه لا ما تعترف ولكوني اني مو ضابط جديد لهذا العب على عامل الوقت مهم كلش بس اخاف لا يصير شي يخرب كل مخططاتنه
بيان / مثل شنو سيدي
فرقد / العصابات من عدهم شخص من ينفضح امره عند الشرطة يصفوا خايف لا يصفون ريماس ونلگاها جثه ساعتها ام رحاب تطلع براءة ونطلع يا ابو زيد چنك ما غزيت
بيان / تصور سيدي يصير هذا الشي
فرقد/ احنه عممنه صورة البنيه على كل السيطرات وأكيد همه عدهم علم بهيچ شي لهذا هسه همه دى يلعبون ويانه لعبة الفارّ والبزون راح يبقون يخفون بالبنيه بس ما يگدرون يضموها هواي لهذا التخلص منها افضل حل بالنسبه الهم
وبيومها رجعت للبيت واني راسي احسه راح ينفجر
من التعب لگيت زوجة عمي مهند جايه يمنه هي واطفالها بيومها بيبي حچت وياها على انه تريد تخطبها لعمي وسام وزوجة عمي مهند تخبلت على ألسنه مال مهند ما عبرت وتريدون تزوجوني وسام وانتوا ما تستحون وعافتنه وراحت وحلفت بعد حتى الجهال ما جيبهم ونشوفهم
وبعدها مرت ايام وام رحاب مصره على الإنكار وما اعرف شگد مرت ايام وبيوم بالليل حدود ساعه 11 بالليل اتصل عليه فرقد حتى اتعجبت من اتصاله بالليل جاوبته / اهلا سيدي بس شعجب متصل عليه وبالليل
فرقد/ والله زوجتي زعلانه گلت خلي اتصل بيك واتغزل يعني شعندي متصل بيك غير عندي شغل وياك
بيان / العفو سيدي تآمر
فرقد / قبل نص ساعه نادوا بالسيطرات بوجود بنيه لگوها في بيت محروگ انت شايف ريماس اريدك تروح تشوف هاي البنيه نفسها ريماس لو لا ويا ريت تروح هسه
بيان / صار سيدي هسه راح أروح وانطاني اسم المستشفى بدلت ملابسي واخذت هويتي وطلعت
ومن وصلت للمستشفى قدمت هويتي بصفتي ضابط وطلبت اشوف البنيه الي جابوها اليوم من بيت محروگ
اني عبالي البنيه محروگه وميته ويه نفسي اگول ادري إذا محروگه اني شلون راح أعرفها ريماس لو لا بس تفاجأت انه ما اخذوني لا على ثلاجة الموتى ولا على قسم الحروق دخلوني على العنايه المركزه بعد ما عقموني بديتول ولبست كفوف بيدي ودخلت
العنايه المركزه مثل المقبره كلهم سكون وصمت فضيع ماكو شي يدل على أنهم احياء غير بس صوت الأجهزه وصلوني يم سرير نايمه عليه بنيه ومشكلين الها مغذي ومخلين الها جهاز تنفس البنيه وجهه كله مورم ومطعون ازرگ صاير وحول عيونها سواد والي عرفته انه البنيه مضروبه على راسها وصاير عدها فطر بالجمجمه والبيت محروگ بيها ومستنشقه هواي دخان وعلى جسمها آثار ضرب بوحشيه والدكاتره اجزموا انه مستحيل تعيش وما گدرت أتعرف عليها إذا چانت ريماس او لا
شكرا لزيارتكم عالم روايات سكيرهوم
