رواية فصلية الضابط الفصل الخامس والعشرون 25 بقلم زينب نور

.......... كمت فتحت الباب لكيت صاير الصبح النعاس بعيوني ولخوفه بيه الدگ على الباب مستمر طلعت اصيح منوو منووو اجاني صوته 

وارث:- دفتحي الخاطر الله 

فتحته صعد سيارته ودخلها للگراج بس وجه ينگط شر عيونه تتجادح نار نزل يرعد 

:- ادري نايمه لو فاقده المنطقه كلها كعدت وانتي مثل المطي ميحس

دفعني من متني ودخل جوه 

اني مسطوره واكفه بس اباوع علي دخلت ورا اريد ارجع للغرفه انام بس اريد اوصل للفراش 

صاح:- انتي هييي وين راجعه تنامين شنو 

بسرعه حضريلي الحمام وملابسي وسويلي چاي ثخين 

ردت ابجي ما حجيت ابد بس اهز براسي شكد كرهته حرمني من نومتي اباوع لساعه ب-6- الصبح

رحت مبرطمه للمغاسل اغسل بوجهي وحاصرتني البجيه 

رجعت لكيته بالحمام حضرتله المنشفه ورجعت سويتله چاي مثل ماراد ثخين 

وحضرتله ملابسه الطلبهم

طلع بس احسه يريدله شي ينفجر بي لبس ملابسه واجه للمطبخ يشرب بجگاره كعد عالكرسي صبيتله الچاي ونطيته اله ميباوع بوجهي 

ردت اطلع صاح وراي 

:- الج عشر دقائق تحضرين نفسج وكعدي الجهال حته اوصلكم البيت ناظم 

بعدني اريد اكوله ما اريد اروح صاح بصوت كمزني 

:- لج احجي وياج كوردي بسرعه 

:- بس الجهال خطيه نايمين اجينه البارحه متأخرين خلي نبقه للعصر 

گال 

:- اي مو مزاجيات هيه 

باوع الساعته ورجع عاط لج يله تأخرت 

رحت ادردم اكعد بالجهال كوه كعدو اخذتهم اغسل بوجوهم انطيتهم حليب يشربون يم وارث كاعدين واني صعدت بسرعه سبحت وبدلت ملابسي واسمعه يصيح من جوا 

لججججج يله أخرتينيييي

نزلت اركض ولحجاب اعدل بي وعباتي بأيدي ولدمعه بطرف عيني لكيتهم طالعين صاعدين السياره 

قفلت الباب وصعدت بسرعه 

طول الطريق بس ينافخ ولجگاره متفارك حلكه وصلنه للباب ومشه 

دخلت لكيت البيت مليان نسوان ولدفانه راجعين وامها شبه الفاقده بس روح كاعده وسط النسوان واخواتها يكسرن الخاطر رحت ادور على هناء لكيتها بالغرفه نايمه راحولها جهالها فزت وحضنتهم تبوس بيهم واني سلمت عليها وطلعت اساعد البنات بالمطبخ انوزع چاي وماي للنسوان 

لمن لليل انهد حيلي بعد مابيه كاعده بالمطبخ ويا استبرق وبنات سناء ثنين وبنات خالة رند هم ثنين دخلت بنيه تباوع عليه من ورا خشمها تعرفني بس اني ما اعرفها شايفتها مرتين بأربعين ضرغام ومن تصوب وارث هم اجت بس ما عندي فضول اعرف هاي منو 

اشوفها واكفه هي ونورس واخوات ضرغام يباوعن عليه ويبسبسن نضراتهن مو راحه احسهن جاي يحوكن فدشي سئلت استبرق عليها 

قطرالندى:- هاي منو ام شال لماعي 

استبرق:- بنت عم رجلج وخطيبته سابقاً اسمها زينه بنت رضوان اخو جدو جابر بس من غير أم 

                                            

              

                    

قطرالندى:- اهااا اشوفها تباوع عليه بحقد متشيل عينها من عندي يا ولحظ خايبه ذيج سهام وروحيلها راجعه عليه لييش عايزه اني واهز بأيدي 

ضربتني استبرق على ايدي 

:- نزليها فضحتينه ولعباس جاي يتفقن على كتلتج وكولي ما كلت شوفي جمعتهن جمعت شياطين 

قطرالندى:- لا عليج الله خلي اطلع مابيه ضربه اموت جوا اديهن وحدتهن جنه فاندام يمردني بديهن 

ضحكت استبرق وغطت وجها بايدها دايره وجها ورا ضهري واني هم ابتسمت على ضحكتها شافني مبتسمه وهن تخبلن

اجت نورس وزينه صاحن بصوت عالي شو متستحين تضحكين بنص الفاتحه عاد احترمي اهل الميت لو حته تربيه ماكو 

ماباوعت عليهن ردت اكوم مجاهلتهن 

جان تدفعني زينه وكعت على استبرق عدلت نفسي وصحت بيها

:- انتي هيييي منو انتي وتمدين ايدج عليه من حرگت گلبي دفعتها بقوا ليوره انضربت بالكاونتر 

وهي تخبلت على الصوت دخلت النسوان ومن ضمنهن وفاء وسهام وام ضرغام وهناء دخلت تسئل شكو شصاير:- ولجن منا النسوان غريبه شهل رعونه بعدها ترزل بينه وزينه هجمت عليه وتحجي وتشتم بيه تريد تلوحني من ورا هناء واستبرق وبنات سناء حاجوزات ونورس تصفط جذب عليهن وهن تخبلن يردن ياكلني دخلت الحجيه ترزل بينه وتحجي وام زينه طلعتني بحجيها من القجر وبنت شارع وما استحي: اسمعها وفرفح گلبي اريد اطلع اختنكت ردت اطلع من الباب قريب عليه وما احس الكمشه من حجابي انجريت ليوره شفت بيداء حجابي صار بأيدها واني وكعت على الطباخ علي كيتلي چاي يفور انگلب على ايدي وخاصرتي فرفحت روحي كمت اكمز من حلاة روحي شكيت الدشداشه مصلوخ الجلد صلخ وكعت بالكاع ارفس وهن مشمتات بيه و بأذيتي 

وهناء تخبلت عليهن غلط ورزايل اجت من يمي سهام سوت روحها متدري مردت اصابع رجلي برجلها ومشت كمت اغلط ما ادري شنو يطلع من حلكي وهناء تتصل على وارث واسعد بالكي واحد منهم يجي ياخذني للمستشفى بعدني بمكاني بس مثل الطير المذبوح ارفس من الوجع سمعت هوسه برا المطبخ ودخلو الرياجيل ومن ضمنهم شفت وارث اجاني بسرعه كنبص يمي واسعد طلع البقيه برا المطبخ وطلع وياهم 

وارث شاف شكلي وتخبل صاح هاي شنو منو حركها ولجن عصابات هنا لو شنو فهمني يغطي بيه هو وهناء يردون يكوموني جسمي من الوجع يرجف رجليه وحده تطخ بالثانيه حته افشار اسمعه يفشر عليهن وهن سكته محد دخلت للمطبخ ولا ردت علي اتحلف الهن راجعلجن ما انساها 

لبستني عباتي هناء وطلعتني لسياره صدت يمي وهو يسوق بكل سرعته بس احس طلعت روحي كمت ارفس بالكشن مال السياره وهو يستغفرالله ويصيح على هناء بس كوليلي منو الحركتها والله احرك الحركتها بس خلي اعرفها ويضرب على الاسترين واشوف سيارة اسعد اويا محمد ورانه يمشون وصلنه للمستشفى دخلوني و وارث خبص الدكاتره دخل وياي هو غطاني بالعبايه مالتي وطلع بس الجزء المحروق اني لازمه ايده بحيث احس اضافري دخلن بلحم ايده اصرخ احس نفسي راح افقد بعد ما اتحمل الوجع بده الهوى يضيگ عليه مغمضه عيوني وأجر النفس كوه واحس بوارث انخبص يصيح جيبولها التنفس بسرعه راح تموت ويضرب على خدودي خفيف ويصيح بأسمي ندى لج ندى خليج وياي افتحي اعيونج بده الصوت يصير بعيد عليه ولوجع ما احس بي مثل الغرگان اريد اطلع من وضعي حسيت خلو التنفس على خشمي وفاتحه حلكي اسحب بالهوى كمت افتح عيوني واغمضها وبعدين احس نفسي خدرت ونمت  

ما اعرف شكد مر وقت فتحت عيوني على كيف شفت نفسي بغرفة المستشفى وهم صوت الاجهزه الي تسوي عندي حاله من اسمعها بس ما اكدر اتحرك لافين جسمي بشاش ابيض وريحة المعقمات بخشمي اباوع ماكو احد يمي احاول اصيح بس ميطلع صوتي شلت ايدي وخرت التنفس وصحت مرتين بس بصوت خافت عطشانه اريد ماي كمت ابجي احس نفسي عاجزه عن الحركه كلشي يوجعني شويه ونفتح الباب دخلت ممرضه شافتني واعيه اجتني بهمه ها حبيبتي الحمدالله على سلامتج 

:- بس انطيني ماي الله يخليج 

هسه حبيبتي بس خلي اصيح لدكتور يشوفج ويجيك وضعج وطلعت 

دخل وارث لابس مثل ملابس الممرضين وكمامه وكفوف وقبعه على راسه اجاني يمشي بلهفه 

دنگ عليه يبوس بوجهي ويمسح بعيوني ويشم بشعري الطالع من الحجاب ويذب حسرات 

وارث:- لج شسويتي بيه اخذتي كل حيلي 

:- وارث 

:- عيونه 

:- اريد ماي 

:- انطيج ماي عيوني بس صيري زينه والله بعد ما اسمح الاحد يأذيج ولا حته اني بس كومي على حيلج لج دمرتيني بهاي نومتج 

دخل الدكتور ويا ممرضين اجه فحصني وجيك وضعي كال تمام التمام عفيه ندى قويه الحمدالله على سلامتج 

بس هزيتله راسي وهمست 

:- اريد ماي الله يخليكم 

باوع للمضمد گاله انطيها ماي اجه وارث اخذ بطل الماي من ايد الممرض وشربني شويه 

كتبلي علاجات واوقاته وكال لازم تتعقم الحروق ويتبدل الشاش ينطي تعليمات للممرضين الويا وطلع اتقرب عليه وارث:- شلونج هسه شيوجعج 

ما رديت علي درت وجهي احس نفسي كارهته هو سبب كلشي صار بيه ما اريد اشوفه مغمضه عيوني وابجي 

حسيته دار على الجهه الثانيه وكعد على الكرسي وتقرب عليه لازم ايدي ويحجي وياي بهدوء بصوت خافت 

:- ندى باوعيلي بس شوفيني لا تحجين وياي بس طمنيني عليج كوليلي زينه انتي لو لا 

كمت اشهك ابجي بقهر 

خله ايده على حلكي يضرب خفيف 

:- هششش لا تبجين موزين على گلبج لا يوكف بس خلي اسويلج العمليه وبعدين ابجي ابراحتج هسه ممنوع البجي افتحي اعيونج باوعيلي شوفي وارث شصار بي من بعدج لج كمت ما اعرف نفسي لج الهوى ضايگ بصدري انتي النفس اليصعد وينزل 

فتحت عيوني اشوفه ومديت ايدي نزلت الكمامه من وجه وباوعت بعيونه وكتله 

:- اكرهك انتَ سبب كل اذيتي اكرهك 

:- ميخالف اكرهيني شكد متردين يكفيني تصيرين زينه وما اريد من عندج شي 

:- انتَ جذاب تريد اصير زينه حته تعذبني ما عندك احد ثاني غيري تفرغ قهرك بي 

يهز براسه مبتسم تك خد ومغمض عيونه 

وارث:- اااه لو تعرفين شنو البگلبي ما جان حجيتي هيج بس اعذرج متدرين

انفتح الباب ودخلو الممرضات وشايلات وياهن المعقمات باوعت علي بخوف ولزمت ايده  

طبطب على ايدي لا تخافين ما يوجعج شي بس تعقيم 

:- اباوعله بعيون مدمعه لا تروح ابقى يمي اخاف ولازمه معصم ايده بقوه

            

............ اباوعله بعيون مدمعه ولخوف مسيطر عليه كوتله 

:- لا تروح اخاف 

لازمه معصم ايده بخوف

باوعلي بحنيه وشد قبضة ايده على ايدي

وارث:- لا بابا ما اعوفج باقي يمج شلون اروح بس انتي صيري قويه لا تخافين ماكو شي مجرد تعقيم لا اكثر 

بقه واكف يمي بالجهه الثانيه ولازم ايدي بأيد ولثانيه لازم راسي حتى لا ادير وجهي واشوف المنضر 

اباوع علي تعابير وجه شي وهو يشوف الحروق البجسمي وسوالفه وياي شي ثاني يريد يلهيني حته ما اركز بالوجع ولخوف يسيطر عليه 

بدو الممرضات يعقمون بالحروق وينظفون بيه واني اتلوه من الوجع ايدي زينه بس اكثر شي بخاصرتي الوجع صار ما ينطاق 

كمت ابجي واصرخ بصوت 

:- كاافي ولكم كااافي ما اريد عوفوني وخرو عني ولج اااخ يمه راح اموت الحكيني 

وارث:- هانت هانت يروحي مابقه شي شدي حيلج سباعيه انتي 

هااا طفله شنو اتحملي بابا شويه 

اريد افلت ايدي وادفعهن عني بس هو مسيطر على حركتي حته راسي ما اكدر احركه بس ابجي وارفس برجليه

لمن خلصن روحي طلعت ورا ما طلعن بشويه احس الالم خف عليه وارث ابد ما عافني وبليل اجن البنات ايشوفني هناء وتقى همين جايه علمود فاتحة رند الله يرحمها واستبرق وياهن شافني بقو ساعه يمي ورجعن 

بقيت الثاني يوم طلعوني الصبح للبيت بس حيلي خلصان كوه امشي دخلني وارث ايمشي بيه لاكتني الحجيه 

الحجيه:- الحمدالله على سلامتج يمه ندوه الله لا يرضى عليهن حوبتج ما تتعداهن ان شاءالله

رفعت راسي شفت سهام وكافه من بعيد تباوعلي 

وتقى بعدها موجوده اجت سلمت عليه باوستني ودخلوني الغرفة وارث 

تفاجئت منزلين غرفة نومي وناقلين كل اغراضي بيها باوعت على وارث ابتسم وطبطب على ضهري وصلني للسرير 

رفع اعيونه ايباوعلي بنضرة استعطاف ويذب حسرات 

وارث :- ارتاحي بويه لا تعبين نفسج وعلاجج ابد لا تنسينه ضروري تلتزمين بالوقت ابين ما تصيرين زينه حتى اسويلج عمليه 

تقى:- عملية يا مال شنو ياستار 

وارث :- ليش انتي متعرفين عدها عجز بالقلب وتحتاج عملية 

تقى:- اي اعرف بس باعده انو تسويلها عمليه ولاعرفه خطره وهم خارج العراق اتصير مو صح

وارث:- خايبه هو انتي شتعرفين بس اسكتي واكرمينا بسكوتج وروحي سويلنه چاي نشربه مسطورين من المستشفى 

من سمعت بموضوع العملية صار يتخيلي اموت واني ماشايفه اهلي ياربي صار اشهر ڪمت ابجي سڪته 

دار وجه عليه وارث شافني ابجي 

                                            

              

                    

وارث:- صدك جذب تره كاعدين نحجي على السمج البلهور يمعوده 

باوع التقى معصب 

:-ها تقيوى ارتاحيتي هسه من خوفتيها وعوج حلكه يعيب على سوالفها 

الاعرفه خطره اوهمداج يلعوبه 

باوعتلي تقى ولحجيه يحجن عليه عالبو ماكو شي وحتى اطيب وارجع احسن من قبل 

رادت اتلطف الجو تقى گالت 

:- خايبه هسه واذا متي شنو مثلاً شنو تردين تعيشين عمر النبي شعيب

 وتضحك وتهز بأيدها 

وارث شال السبحه وضربها بيها 

:- يا يابه يابويه لو بيه حيل هسه اكوم انفش اعطوبج اطلعي ابسرعه راح اكوملج تقيوى جزعتيني ترى

طلعت تقى تضحك علينه وتعيب بوجها

الحجيه:- يمه تشاقه وياج تريدج تضحكين ترى

 ابتسمت من بين ادموعي الها

:-اعرف بيها بيبي تعلميني بتقى احب سوالفها 

گام وارث طلع يريد يسبح واسمعه يصيح على ابتسام 

وارث:- جهزيلي ملابسي بجنطه صغيره مال يومين وارجع ان شاءلله

 بعد ساعتين واطلع 

من سمعت بي الحجيه طلعت ورا 

بالي ضل يمه افكر وين يريد يروح يومين شيسوي واني شلون بيه منو الي 

دخلت تقى جابتلي ريوك وكعدت توكل بيه وتسولف عليه شلون وارث راجع عليهن وخابصهن وضارب بيداء لان هي سبب بالصارلي ولكل زعلان علي ويحجون وطالعه النسوان وحتى بنت عمه زينه لاعب بيها جوله من استبرق مسولفتله الصار التهينه بالسوالف لما دخل وارث سبحان ولابس ملابسه العسكريه باوعلي ابتسم وأشر التقى تكوم 

وارث :- كومي احمي الچاي ام اعطوب

 برد اكيد ورجع عاط كمزها بصوته لج يلللله 

گمزت 

تقى :- هاي شبيك يمعود غير عندك كومه نسوان اني شعليه تتأمر عليه سوي وجيبي ما اخلص اني من الچاي وين ما اروح اهناك احمد وهنا انتَ خرب حظي 

وارث :- هسه غير تفضها وتطلع 

طلعت تدردم علي

وهو يضحك عليها اتقرب عليه سئلني 

وارث :- شلونج هسه تحسين نفسج احسن مو 

جاوبته 

:- اي احسن ماعندي اوجاع احس مسكن الألم 

الحمدالله بس انت وين راح تروح وتبقى يومين ؟؟

اتقرب باس راسي وبتعد شويه

وارث :- عندي شغل ضروري يومين وارجع انشاءلله وهم احاول ما اتأخر 

 يله بويه ديري بالج على نفسج ولا تنسين علاجج اخذي بأوقاته ماشي علمود صحتج واني هم راح اسوي منبه بجهاز امي حته لا تنسون: 

هزيتله راسي ضجت 

فتح الكنتور طلع عطر اخذا وراد يطلع لوح بأيده بيباي ودزالي بوسه بالهوى وطلع سد الباب 

            

              

                    

ما اتحملت گمت ابجي بسكته واسمعه بالمطبخ يشرب چاي ويبوس ابناته ويسولف وياهن 

ويوصي بتقى ولحجيه على مواعيد علاجي وتعقيم الحروق ولمراهم يدهنون الي بكل وقت ورا اشويه سمعت صوت الباب انفتح ولسياره طلعت غطيت وجهي وسويت نفسي نايمه ما اريد ابقى كاعده 

مرت اليومين واجه وارث بس مبين علي تعبان وماله خلك احد 

احس اكو شي صاير شي بس ميسولف ايخابر هوايه ويطلع هوايه ومن اسئله يكول ماكو شي ويسد الموضوع بسرعه

 ورا اسبوعين صرت زينه وگمت اڪدر اطلع واشتغل شي الخفيف نشفت الحروق بس تشوه صار بأيدي وخاصرتي ويجيبلي عصارات زينه حتى يختفي الاثر بمرور الوقت بالكي يخف 

وبيوم كاعده بالحديقه و وارث بالاستقبال كاعد يمه صديقه واسعد رن جهاز وارث شفته طلع خارج الاستقبال ميشوفني ضليت اتسمع اله يحجي ويا المتصل بانفعال يكوله:- اني شوصيتكم ليش متسمعون الكلمه وتخالفوني 

المتصل طول يحجي ويا .... رد علي وارث

 :- اني اخذت حقي وزياده ولباقي ويا الحكومه ومعروف شنو حكمهم انتو ابتعدو اي اي مثل ما كلت الك هلفتره ابتعدو عن العيون حتى محد يشك بيكم.... 

سد الخط مسح وجه ورجع للاستقبال دخل  

عرفته جان يحجي عن حسام وتقي بس اكيد مسوي فدشي اكو شي والا ليش يحذر بيهم خاف ينكشفون

دخلت جوا شفت زهراء بيدها موبايل امها تلعب بي اجتني الفكره 

ضليت اباوعلها شلون تفتح الموبايل عرفت الرقم السري لجهاز حفظته شفتها خلته على الميز وطلعت تركض للحمام باوعت هيج وهيج شفت ماكو احد شلت الجهاز وضميته بصدري ورحت الغرفتي بسرعه طلعته وسويته صامت وقفلت الجهاز وضميته بحذاء وارث بالكنتور وطلعت يم الحجيه سويت نفسي طبيعيه اسولف وياها والعب لعبه بجهازها الصرصور لعبة الثعبان 

بس بالي مشغول وخايفه حتى ما اركز زين بالعبه كل اشويه اخسر ورا شويه دخل وارث يم الحجيه ايباوعلي ويسولف وياها وجگارته بأيده نام على رجلها تلعب بشعره اباوعلهم بس بالي مو يمهم

 گالي وارث 

سويلي چاي رحت اسويله شفت سهام تدور على فدشي عرفته على الموبايل وتسئل بزهراء

:- ولج وين مخليته انتي شنو صار عنده اجناحات وطار منو ماخذه خلي يرجعه بسرعه

 وتباوع عليه سويت نفسي ما مهتمه اخذت كوب الچاي وطلعت الوارث وهي ما اعرف شتحجي وراي گالت الحجيه

:- شصاير يمه شبيها سهام صوتها طالع 

جاوبتها

:- اتكول موبايلها مضيعته زهراء وتدور علي وتعيط عليها

اسولق الها بس ما اباوع بعيون احد بيهم عبالك يعرفون بيه اكذب عليهم 

راح افضح نفسي بهل تصرفات 

شويه ودخلت سهام گالت 

سهام :- وارث موبايلي ضايع وبلاحرى انباك ماكو فص ملح وذاب بالبيت 

جاوبها:- وين يعني يروح تلكينه مخليته بفد مڪان وناسيته ارجعي دوري زين وراح تلگينه

            

              

                    

سهام:- اكولك دورت زين شنو مثلاً اجذب عليك اني متأكده موبايلي مبيوك وتباوع عليه 

سويت نفسي مويم الموضوع ولا اباوع النضراتها الي مليانه شك وتأكد الموبايل عندي

گالتلي:- اكيد عندج بسرعه طلعي يله 

باوعتلها ورجعت العب بموبايل الحجيه واتضاهرت البرود عكس الخوف الداخلي 

باوعولي وارث ولحجيه ساكتين 

باوعتلهم

:- ترى موعندي وشأسوي بي مثلا صار اشهر كدام عيني ما اخذته هسه عود اخذه شصخم بي 

سهام:- مستعده احلف عندج 

صاح بيها وارث 

:- هششش كافي يله سئلتيها وجاوبتج اطلعي يله 

سهام:- اي هيه هاي الفالح بيها انت َبس اسكتي واطلعي ما تشوفها تفتشها والله متأكده عدها وما اطلع لمن افتشها وافتش حته غرفتها 

طفر بوجها وارث

:- انتي تسمعيني لووووو لاااا داكولج اطلعييي يلللله 

باوعتلي تسويلي بسيطه بأيدها وتأشرلي ابراسها

وطلعت تفور من القهر 

اباوع الوارث مغمض عيونه ولحجيه تكوله 

:- هسه تلكا جوز زوزه ذابته بالحديقه بالترك 

ضليت كاعده ما مرتاحه كمت طلعت الغرفتي شفتها بالغرفه واكفه ودور بالكنتور 

تعمدت اصيح بصوت حته اسمع وارث صحت 

:- هاي شنو شداسوين هاي اغراض وارث ميقبل احد يفتحها 

وبعدين ليش متصدكين موعندييييي 

كالتلي

سهام :- والله متأكده عندج انتي الاخذتي واعرف شنو تردين تسوين بي 

ابتسمتلها تك خد 

ودخل وارث:- شنو هاييي انتي ليش متسمعين الكلام 

ضربها على وجها ودفعها من ضهرها بره الغرفه وهي تهدد بيه وتتوعد واجت زها وكفت بينها وبين ابوها وزوزه تبجي خايفه 

ولحجيه تهدي بيهم 

طلع وارث للكراج وهي بعدها تتوعد اليه وصعدت الغرفتها ترفس بالكاع من القهر

اني رجعت للغرفه تأكدت من مكانه ورتبت الغرفه بس الخوف مبين على وجهي اعرف وارث شكاك اكيد انزرع الشك بداخله اتجاهي

اخذت ملابسي ورحت للحمام اريد اسبح حته بالكي يخف التوتر 

سبحت وطلعت دخلت للغرفه شفت وارث ممطول على الجربايه ومخلي ايده على عيونه عبالي نايم ضليت ساكته نشفت شعري وسويته ضفيره واجيت يمه اريد انام جان يفز باوعلي گمزت خليت ايدي على گلبي 

:- شبيك والله كمزتني 

وارث :- اذا عندج صدك طلعي لا تخليني ارجع اشك بيج من جديد ما اريد استخدم غير شي قبل كلشي احذرج ما اريد ارجع أذيج 

بلعت ريگ واحاول اكون طبيعيه 

:- شبيك وارث شسوي بي الموبايل واصلاً ماعندي اي رقم من اهلي حته اخابرهم بي 

زفر نفس وهز راسه بس اشوف بعيونه الشك بعده رجع المكانه ورجع ايده على عيونه اني هم درت وجهي وتغطيت سويت نفسي نايمه 

اشوفه يتگلب ميكدر ينام كام طلع للحديقه شويه ورجع فتح الضوء وبده يدور بالكنتور بالميز بكل مكان ملابسي دورها اني اباوع علي وجامده ممكن بأي لحضه يلكا ويموتني حته الاحذيه شمرهن بالغرفه هنا وكف گلبي اله شويه كلت هاي النهايه بس الحمدالله من كد ما ادعي بداخلي حته الموبايل ضل ثابت ماطفر من الحذاء لان جان ابسطال الجيش مخليته لافته بجواريب رفع رسه باوعلي ورجع طلع كمت سديت الباب وشلت البسطال تاكدت منه ورجعته المكانه ورتبت الغرفه ولهوسه السواها ورجعت لفراشي ما اكدر انام ومثلت دور الزعلانه لان شك بيه تغطيت بغطى الوحدي ودرت وجهي انتظرته ما اجه تأخر يله دخل نام حسيته دار وجه عليه وتقرب تغطى بالغطى مالتي وشال راسي خلا على ايده وحضني من ورا اطمأنيت وسويت نفسي نايمه وتصرفت طبيعي

ورا يومين نضرات الشك وتهديدات سهام الي مستمره ومتأكده الموبايل عندي 

خليتها على نار هادئه 

و وارث طبيعي وياي بس احسه بعد عنده شك 

وبيوم خفارة وارث من صارت الساعه بـ ـ12ـ 

طلعت تأكدت من الكل نايم رجعت قفلت الغرفه ورحت طلعت الموبايل فتحته المكالمات الفائته كومه ورسائل رحت طلعت رقم ابويه جنت ضامته بترواكة وارث ومسفطتها ابين الملابس دخلت الرقم واتصلت على ابويه مرتين وبالثلاثه يله جاوب دخلت بالكنتور وسديته عليه واحجي على كيف

قطرالندى:- الووو 

:- الوو منو 

:- يابه اني ندى 

:- بويه هلا بصوتج هاي انتي نداوي شلونج يبعد ابوج 

:- زينه اني زينه يابه انت اشلونك امي زينه وينها اريد احجي وياها 

:- زينين بويه كلنه زينين نسئل عليج 

هاج هاي امج وياج 

حسيت الموبايل رجاج على اذاني باوعت لشاشه شفت اسم وارث يتصل من الخوف دست على القفل وقفلته عام وضليت افتر التوتر راح يموتني 

شويه ورجعت فتحته وخابرت مرة ثانيه على ابويه 

بس كال الو بسرعه حجيت ويا 

:- يابه اني زينه ومابيه شي بس ردت اسمع اخباركم واريد اعرف تقي مسجون لو لا وشوكت المحكمه مالت حسام 

گالي 

:- بويه تقي مسجون صار اسبوعين عرفو هو الجان ويا حسام وبعد اسبوع المحكمتهم وما نعرف شراح ينحكمون ثنينهم 

:- انطيني امي اذا يمك ابسرعه

اسم صوته يكولها هاج هاي ندى ابسرعه احجي وياها

:- ها يمه ندى شلونج يبعدامج ولج مشتاقتلج عبالي اموت واني ما سامعه صوتج 

ما سيطرت على دموعي من سمعت صوتها گمت ابجي ما اكدر اجاوبها واني اسمعها وصوتها مبين تعبان كوه تحجي وافهمها

من الشهكه تطلع من عندي احرف متقطعه كوه 

سئلتها على وسام وجهاله وضحى وتبارك شلونهم 

:- زينين زينين يمه مابيهم شي بس انتي وحسيم شالعين گلبي خاف اموت واني ما شايفتكم يمه

كوه اجر النفس من البجي ولمناشغ  

سمعت صوت سيارة وارث باد حيلي سديت التليفون بسرعه 

اسمع انفتح باب الگراج رڪضت طفيت الضوء ورجعت الموبايل المڪانه وفتحت القفل الباب ورحت ابسرعه المكاني غطيت نفسي عالساس نايمه انفتح باب الغرفه ودخل وارث جمدت ما اكدر ارمش من الخوف فتح الضوء واجاني سحب الغطى من عندي 

گالي 

وارث :- ترى اعرف بيج كاعده هستوج طفيتي ضوء الغرفه كوميييي بسرعه ندى

فتحت اعيوني اباوعله اريد ارسم ابتسامه جذابيه على وجهي بس ما اكدر من الخوف صاح بصوت عالي

:- ابسرعه ااااكعديييي 

كعدت بسرعه

دار وجه يمسح بي يريد يهدئ نفسه رجع باوعلي صفن بوجهي ومضيق اعيونه گالي 

وارث :- وينه انطينيا المنو خابرتي كوليلي 

بلعت ريگ وگتله 

:-موعندي وما مخابره احد 

يحجي من بين اسنونه كاز عليهن ابقوه 

وارث :- شوفي اعرف عندج ومتأكد فـ لا تجبريني اضربج انتي مريضه ومتتحملين انطينيا بسهوله احسن الج

ضليت صافنه بوجه ما اكدر ارد علي 

:- لججج وينه بسرعه انطينيا 

ضربني على وجهي بأيده وراح للكنتور طشر كل الاغراض البي ويدفر بيهن ويغلط ويفشر عليه ضرب الاحذيه برجله جان يطفر الموبايل شافه ورجع باوعلي بأسف شالا من الارض فتحه وبقى ايباوع بي 

اني اهنا الدم نشف بعروگي ريگي نشف وگلبي احسه ايدك ابلعومي

گلت ابگلبي اليوم اكيد هاي نهايتي بس اتفاجئت من باوعلي وبدون ميحاجيني طلع واخذ الموبايل ويا وقفل باب الغرفه عليه وراح رحت اباوع من الشباك طلع السيارته صعدها وراح.......

الفصل السادس والعشرون من هنا 

شكرا لزيارتكم عالم روايات سكيرهوم