رواية أعظم خيانة الفصل الخامس والعشرون بقلم الزهيريه
كما تدين تدان
بالخير والشر ومهما
فعلت سترده لك الحياة يوماً
ريماس/ حياتنه نعيشها بحلوها وبمرها بس تجي لحظه تضيع عليك حياتك كلها ما تعرف سميها لحظة غباء لو لحظة تمرد حتى تتخلص من واقعك المرير اني مو چبيرة عمر بس المصايب خلتني اكبر من عمري بيوم الي طلعت بي اجيب علاج لرحاب شهاده لله رحاب هواي حاولت تمنعني انه ما اروح بس اني اصريت وطلعت والصار الي صار ومن صحيت بالمستشفى صرت اسمع أشياء غريبه عليه
مثل الحريق واختفاء رحاب واخواتي اني بس معجبني شغله وحده وهي من اخذوا رحاب شيسوون بيها وهي شبه منتهيه وأيامها معدوده
ومن الغرائب الصارت انه چنت مغمضه وعيوني احس بيهن بثقل وبنفس الوقت ابچي على أخواتي ورحاب سمعت صوت يگول / شلونچ ريماس
فتحت عيوني شفت اثنين گدامي واحد ابيض وضخم وبشرته بيضه وگالب شعره ليوره وشعره اسود وشواربه ثخان وعلى كتفه نسر والثاني غني عن التعريف وهو بيان بس هاي المره لابس ملابس مال شرطه وعلى كتفه نجمتين
وهذا الي على كتفه نسر گال / اني مقدم فرقد من مكافحة الإجرام شسمچ
ريماس/ ريماس سلام
فرقد / شوفي انتي هنا بآمان وبحمايتنه گليلي منو سوه بيچ هيچ
ريماس/ ما اعرف
فرقد/ شلون ما تعرفين انتي عمچ قدم شكوى ضد ام رحاب وجماعتها باختطافچ
ريماس/ شر البليه ما يضحك وهذا عمي وين چان شنو چان نايم هسه گعد خلي يروح يكمل نومته احسن اني ما عندي عمام وما اعرف وحده اسمها ام رحاب
فرقد / بابا لا تخافين من احد احنه موجودين اما مال ما تعرفين ام رحاب شلون واحنه سحبنه تسجيل كاميرات قريبه على بيتچ ماكو احد يتردد عليچ غير ام رحاب
ريماس/ ما اعرف انتوا على شنو دى تحچون گلت ما اعرف ام رحاب شنو هي گوه
فرقد/ انتي شنو تشتغلين
ريماس/ ما اشتغل گاعدة ربة بيت
وفرقد يغمزني بعينه ويگلي
فرقد / لعد منين فلوس وصرفين وشلون گاعده تجددين أعمار بيتچ منين هاي الفلوس
ريماس/ أصادق شباب وخليهم يصرفون عليه شنو الداخليه عدها اعتراض
فرقد / انتي شگد صلفه اول مره اشوف بحياتي گحبه وتفتخر بنفسها يعني انتي صادقين الشباب وسلميهم لام رحاب وجماعتها صح حلو لعبتي بملعبي إذا تحبين صرف تعالي اني عندي شقه وهم اصرف عليچ حالي حالهم
ريماس/ انت تريد تقولني شي ما حچيته اني گلت أصادق شباب يصرفون عليه ما گلت أسلمهم لاحد وأكثر من مره گتلك ما اعرف وحده اسمها ام رحاب وبعد انت بكيفك تريد صدگ تريد لا صدگ
فرقد / شيسوون بيچ تستاهلين اكثر يله بيان رفعوا عنها الحراسه
ريماس/ ابتعد فرقد بس بيان ظل يباوع عليه بعدها هو عافني وراح اجتي الممرضه خلت بطل مغذي وضربت بي ابره وراحت واني اعتقد انه هاي ابره مال منوم لانه نمت رحت بسابع نومه ومن گعدت اتقربت عليه وحده وبحجة دى شوف الكانونه گالتلي / كل شي لا تحچين هذا احسن الچ ومن سالتها انتي منو عافتني وراحت واجتي ممرضه جايبه وياها علاگه وهي تگلي / اجاچ الخير
سآلتها/ منو جاب هاي العلاگه
الممرضه/ الضابط الي اجى اليوم من تحقق وياچ
ريماس/ منو منهم همه اثنين
الممرضه/ مو هذا ابو النسر الثاني ابو النجمات
ريماس/ عرفته هذا بيان بس ليش وشريد مني فتحت العلاگه جايب هواي حلويات وعصاير وحتى ملابس وغسول وسألتني الممرضه إذا اگدر اروح وياها للحمام حتى اغسل
وافقتها على كلامها واجتي ساعدتني وجسمي إذا اگول مكسر قليل هاي الكلمه احس جسمي مربط بي صخور كبار وقيدتني من الحركه وراسي ثگيل وگوه مشتني الممرضه لما وصلت للحمام وساعدتني الممرضه ونزعتني ملابسي وذبت عليه مي وغسلتلي وهي تگلي / الضابط الجاب الغراض الچ هواي وصاني عليچ وانطاني اكراميه بلكت باچر هم يجي
ريماس/ ما جاوبتها وبعد ما كملت تبديل الي واكو چانت مرايه مغوشه بالحايط انتبهت على وجهي صدگ اخترعت من وجهي لانه مورم كلش اضافةً عيوني سواد حولها قاتم وحتى السواد نازل على خدودي وصاعد على گصتي وجهي مرعب والممرضه من انتبهت عليه اباوع بالمرايه گالت
الممرضه / لا تهتمين هذا كله ب 10 ايام يروح المهم الله طلعچ سلامات
ورجعتني على سريري وطلعت الي عصير وبسكت وانطتني واني گاعده اكل دخل رجال ويا مره وسألوا من ريماس
رفعت ايدي لانه ما بيه حيل احچي اجوي عليه وگال الرجال / اني عمچ احمد
ريماس/ اي وين چنت من چان اخوك عايش وين چنت عايش من ضاعوا اخواني واخواتي روح توكل بالله جيتك هسه الي بعد ما ترد ميت
احمد / إذا نريد نگلب بدفاتر قديمه احنه ما چان بينه صوچ الذنب كله ذنب ابوچ يعني من چان طاير وره بثينه وصفيه مثلاً شتتوقعين يطلعون أطفاله بس هسه الحچي بعد ما يفيد احنه ولد اليوم
ريماس/ صدگني عمو وجودك يمي بهذا الوقت بعد ما يفيد
احمد / بابا ماكو شي ما يفيد ساعدي نفسچ حتى احنه نگدر نساعدچ
ريماس/ انتوا منو
احمد / الضابط فرقد نار على علم واجى حقق وياچ غير اي شي تعرفي تگولي حتى يساعدچ بعدين اني عرفت بعد عندچ اخوات وأخوان وينهم شو ماكو وياچ
ريماس/ ما اعرف همه وين
احمد / خلاص راح اشتكي على ام رحاب اكيد هي خطفتهم
ريماس/ دخيل الله ودخيلك عوفوا ام رحاب والله بعد ما بيه حيل
احمد / شنو نعوفها بابا اطفال بيدها الله اليعلم وين يودوهم وشنو يسوون بيهم
ريماس/ بقت يمي زوجة عمي احمد وهو راح وبقت زوجة عمي احمد تسأل وتستفسر عن كل أموري وچانت اهم شي عدها من اطلع من المستشفى وين راح اروح لهذا طمنتها انه موجود بيت ابويه واعيش بي وهي اطمأنت وعلى ثاني يوم رجع اجى الضابط فرقد وبيان
فرقد/ طبعاً اني بالنسبه عني ما اريد اشوف خلقتچ بس الواجب يجبرني انه اجي واشوفچ وانتي من طلعتي من البيت كاميرات المراقبة مال جوارينكم مسجله وياچ اخواتچ وأحنه من خلال وكيل الحصه التموينية الوكيل يگول سلام عنده خمسة اطفال 3 بنات وولدين انتي هاي وحدچ الباقين وينهم
والبارحه عمچ احمد قدم شكوى على ام رحاب بخصوص الاطفال انه مخطوفين واكيد ام رحاب الها ايد او انتي قتلتيهم والا اربع اطفال وين يروحون
ريماس/ ما ادري بيهم چانوا ويايه بالبيت من احترگ احتمال احترگوا بعد ما ادري
واكو قريب عليه مثل الميز مخلين عليه طبلة الدخول مالتي مال المستشفى وفرقد ضربها بيده قوي بحيث صدگ فزيت و گال بعصبيه
فرقد / انتي شنو اني گدامچ جاهل شنو احترگوا حتى إذا ماتوا بحريق تبقى جثثهم اضافةً الحريق ماچان قوي بديل انتي ما احترگتي والإضافة الثالثه انتي بالتصوير اكو بس بنات 2 الولدين وينهم ماكو
ريماس/ ما اعرف وينهم تريد اسجني اني قتلتهم
فرقد / بابا انتي جاي تغطين عليهم وهاي بحد ذاتها جريمه يعاقب عليها القانون
ريماس/ جوابي واحد ما اعرف همه وين
وهو شاف كل نتيجه ماكو راح
بيان / ريماس انتي شنو السبب تغطين عليهم ترى ماكو احد راح يوگع غير بس انتي
ريماس/ اخيراً حچيت لانه كله صديقك يسأل أغطي عليمن ما عندي شي اخسره عجيبه طلعت ضابط يعني مو دكتور إني متاكده الصار كله بسببك وانت رحت جبت عمي وخليته يشتكي بس ريح گلبي وگلي ليش
بيان / يعني اريد اقتنع إنتي بريئة بس سبحان الله كل براءة ما بيچ اني راح اسالچ سؤال واحد واتمنى جاوبيني عليه وعلى اجابتچ راح احدد موقفي وياچ قبل فتره صارت بينه علاقه +18 بالموبايل هاي صورتيها
ريماس/ هااااا هنا السبب لهذا ادور چنت عليه يعني من گتله لأبو الاسواق اريد أخطبها يعني مو حب هذا يعني انت مرتين نصبت عليه مره بسالفة الحب ومره انت ضابط وتگلي دكتور
بيان / وانتي شنو يضرچ إذا حبيتچ او لا انتي اعترفتي بالسانچ انه صادقين شباب حتى يصرفون عليچ اعتبريني شاب صادقتي في سبيل يصرف عليچ جاوبي صورتي
ريماس/ طالما انت تريد اعتبرك حالك حال الشباب الي عرفتهم احب اگلك اي صورتك والتصوير تحت ايد أمينه وخاف بنيتك اسوي شي ساعتها اتلگى نتيجة اعمالك
بيان / كل ما اگول لازمت راس الخيط تتخربظ عليه البكره كلها ولا الزم راس خيط ولا اندل رأسه اصلاً
وبيوم اتصل عليه فرقد وطلب مني انه اروح اشوف البنيه الي لگوها في بيت محروگ رحت وشفتها بس ما اتعرفت عليها لأنه شكلها مشوه وتلاميحها ما مبينه الوجه مورم السواد حول العيون مطعون ما گدرت احدد في ما إذا چانت هاي ريماس لو لا وهذا چان جوابي لفرقد من اتصلت بي وهو جوابه چان مقلق بالنسبه الي
فرقد / بيان اي بنيه ينادون بيها روح شوفها صدگني هسه يتخلصون منها لانه براءة ام رحاب عليها وإضافةً ريماس صارت كارت محروگ واذا حضر الماء بطل التيمم بس اني متاكد خلال الأيام الجايه لو تظهر ريماس لو جثتها وبالفعل بخلال اسبوع أجتي اخباريه من المستشفى انه الي رحت شفتها وما تعرفت عليها اسمها ريماس لانه صحت وصارت تحچي لهذا بعد الدوام رحنه عليها
وبغض النظر عن تشوه وجهها أتأكدت هاي ريماس من صوتها عرفتها بس هنا ظهرت على حقيقتها بأثناء التحقيق ويه فرقد أخلاقها سز بس نكرت كل صله بإم رحاب بعدها عفناها وطلعنه واحنه بعدنه نمشي بممر المستشفى گال
فرقد/ اكلت مخ راسي ريماس جمالها فضاح منين بالحرام تلعب النفس امنيتي آعرف المرحوم عمك شلون باوع عليها والي يضحك ويبچي بنفس الوقت خسر حياته على مودها اني لو بمكانه كفيلك الله قندرتي حرمات أضيعها على مودها
بيان / سيدي ترى اني ما مكذب عليك البنيه بالفعل حلوه كلش بس البنيه مضروبه على راسها وصاير عدها فطر بالدماغ اعتيادي بس ورم وجهه ضاعت ملامحها بس صير زينه يرجع جمالها
فرقد / والله لو عمك مضروب على راسه مثل ضربتها چان صحى على زمانه على العموم ارجع واكرر البنيه منتميه لعصابة ام رحاب وهي تحاول بكل جهدها تبعدنه عنهم وانت حالياً نكشفت الهم هسه راح تبدي المساومه وياك بكونك ضابط وارجع اكرر اطلع كل شي ما أفتهم إذا ما يطلع عدهم تصوير عليك وما تخفيه الليالي تظهره الأيام
بيان / سيدي انت دائماً كلامك يقلقني بشنو تنصحني سيدي
فرقد/ انصحك تزوج البنيه حتى لو بعقد سيد حتى إذا ساوموك ورفضت انت من يطلعون التصوير تگدر تگول زوجتي هاي وهي مصوره ولكوني طلگتها طلعت التصوير حتى انفصل من الداخليه بهيچ حاله تكون ضربت اكثر من عصفور بحجر واحد
بيان /سيدي دخيل بختك ازوج وحده
فرقد/ كمل الحچايه گحبه صدگ مرات الگحبه تطلع شريفه قياساً لوحده گاعده بالبيت ولاعبه شاطي شباطي عد اقلها هاي گحبه مبينه مفضوحه بس اجيب وحده بنت بيت وشريفه وبألاخير تطلع لاعبه عليه چقه شبر انت دى تخلص نفسك لهذا ما ينحسب عليك زواج سوي مثل ما گتلك وخصوصاً عمها موجود وهو ولي امرها هسه راح اروح للبيت احس راسي راح ينفجر واذا تحترگ الدنيا لا تتصل عليه اريد انام
بيان / فرقد اخذ سيارته وراح واني هم اخذت سيارتي ورجعت للبيت لگيتها عالگه جايه عمه لقاء لانه اول ما نزلت من سيارتي سمعت صوتها دخلت من شفتها گتلها / لا هله ولا مرحبه همزين الله ساترنه وگاعدين بمزرعه والا لو گاعدين بمنطقه سكنيه چان اشتهرنه واختزينه شكو خير يا طير شو صايره يوميه تي وعينك عليه
لقاء / انت عندك ذمه وضمير بنيه حامل وتعبانه حابسها بالبيت وانت تنام بغرفه وهي بغرفه شيسموها هسه اني هجمت بيتي يطبني مرض هاي شنو ذنبها
بيان / يا طلابة بيتچ الما تخلص غير انتي يوميه تجين بقوانه جديده وبعدين خطيه شلون انتي محرومه من الرجال بنتچ مثلچ لهذا تحسين بيها
بابا ترى زوجة عمي مهند الله يرحمه رفضت عمي وسام يعني ذاك عمي وسام وروحي اله اكو احد مچلب بذيالچ اما بنتچ سبحان الله مثلچ الكرامه معدومه شسويلها
لقاء / شلون عياره زوجة مهند ما تريد وسام وهي مفلفله على الرجال هسه اطلع مو لقاء إذا ما تزوجته
بيان /والله انتي أدرى بهاي الكلاوات لهذا عرفتي بزوجة عمي مهند اما بنتچ ترى گتلچن راح ازوج واجيب زوجتي هنا تريد تبقى بعد بكيفها تريد تروح الله وياها والگلب يدعيلها ولا ظلين يوميه تنطين النه هنا ذاك وسام وروحي عليه
وما ادري عفتها شنو تلغي وصعدت فوگ سبحت ودخلت نمت ولليل يله گعدت نزلت لگيت عمي وسام موجود وهو شافني گال
وسام / كل ما أضيعك والگاك لازم تكون نايم
بيان / والله عمي اجيت من الدوام تعبان وراسي يوجعني اجيت لگيت طليقتك هنا وتلغي لهذا نسطرت رحت نمت
وسام / هو اني اجيت اريد آخذك ويايه
بيان / وين على خير يا طير
وسام / لبيت عمك مهند
بيان / اي واني شنو ماخذني وياك محرم
وسام / المره أرمله واني أحل عليها ما اگدر ادخل بيتها وحدي تعال ويايه وانت تكون شاهد على كلامي وياها
بيان / خلي اكل جوعان وأبدل واجي وياك ورحت للمطبخ طلعت جبن وحميت الچاي اكلت وشربت چاي وصعدت بدلت ونزلت ورحت ويه عمي وسام على بيت عمي مهند وزوجة عمي مهند من فتحت الباب وشافتني گالت تفضل بس شافت عمي وسام انگلب شكلها بس قبل ما تحجي گتله تفضل عمي هذا بيت اخوك وانت مو غريب
لهذا اضطرت تسكت ودخلنه وراحت هي جابت چاي واجتي وچانوا بناتها وابنها يمنه وگال لزوجة عمي مهند وهي اسمها سهاد
وسام / اني جاي اريد احچي وياچ سهاد بس بعيد عن الاطفال وهذا بيان شاهد على كلامي
بيان / وعمه سهاد خلت الاطفال يرحون للغرفه وهي شلون عبالك متحامله على عمي وسام لان بس راحوا الأطفال لغرفتهم هي بدت الكلام
سهاد / شوف ابو لميس اني اعتبرك مثل اخويه الچبير عمتي الي هي امك فتحت الموضوع ويايه وگتلها ما اريد ازوج ليش تجاهل قراري وتروح على اخواني شيسموها
وسام/ شوفي سهاد الزواج مو عيب ولا حرام انتي عندگ اطفال وحدچ على تربيتهم ما تگدرين وعندچ ولد وتربيه الولد صعبه شوفي بيان لما اخذنا من امه وتربى ويايه ويه مهند الله يرحمه چان الله اليعلم هسه شنو مصيره وهذا بيان ربي يشهد وحلفي لبيان بعافيته آخر لحظاته وهو يوصي على اطفاله وهو الله يرحمه يعرف انتي گد المسؤولية بس دى اگلچ اطفالچ يحتاجون اب يحتويهم
سهاد / إذا وافقت على الزواج منك عندي شروط إذا توافق عليها اني موافقه أزوجك
وسام / وشنو شروطك خلي اشوف إذا اگدر عليهن لو لا
سهاد / ان شاءالله تگدر عليهن اول شرط ابقى عايشه بهذا بيتي يعني ما اروح اعيش وياك في بيتك
بيان / حرامات روحي ويا عيشي في بيته حتى تجي يوميه عمه لقاء تعرس عليچ ليش يوميه جاي معرسه عليه
سهاد / لا عيني اني ابقى في بيتي والشرط الثاني العقد مالتنه يكون عقد سيد يعني حتى تصديق بالمحكمه ما اريد والثالث وهذا اهم شرط اني وياك ما يجمعنه فراش واحد ولا غرفه وحده يعني معاشرة أزواج بينه ماكو إذا وافقت على شروطي اني موافقه
وسام / مثل ما تردين ما يصير شي إذا مو بموافقتچ وهذا وعد رجال
بيان / واتفقوا عمه سهاد وعمي وسام زواجهم بعد 3 أسابيع
شكرا لزيارتكم عالم روايات سكيرهوم
