رواية أعظم خيانة الفصل السادس والعشرون 26 بقلم الزهيريه

لا يتواضع إلا من كان واثقاً بنفسه 

ولا يتكبر إلا من كان عالماً بنقصه 

ريماس/ اني اسمع يگولون العافيه بالتدريج اني حمدلله المصايب ما تجيني بالتدريج اجتني كلها چفته وحده اني شگد چنت احاول ابعد الداخليه عن ام رحاب وجماعتها بس كل محاولاتي چانت هباءً منثوراً لانه الضابط گاعدلي ركبه ونص وچان يبحوش هواي ورايه ومن اجى سألني على اخواني واخواتي ما عرفت اجاوبه نهائياً 

والسبب انه من انهزمت اغتصبوا اختي هسه شيسوون بيهن اما اخواني اختفوا وين أخذوهم العلم عند الله بس المهم عندي في وقتها انه اي حچايه من عندي ما يحصلون وما طولت بالمستشفى بقيت ما يقارب 5 ايام وطلعت بس هاي المره رجعت لبيتي لان خلصان بهاي المده بس التراب والرمل هواي وعمي وزوجة عمي من شافوا البيت چانوا يريدون ياخذوني وياهم بس ما قبلت وام زهراء من اجيت واخذت مفتاح البيت چانت ما موجوده بس من واني وعمي وزوجته واگفين دى نحچي لكون يريدون يأخذوني وياهم واني واقبل 

نفتحت الباب وندگت بنفس الوقت شلون ما اعرف المهم دخلت ام زهراء اجتي حضنتني وتبوس بيه وتتحمد آلي بالسلامه ومن شافتني رفضت اروح ويه بيت عمي گالت هي لعمي 

ام زهراء/ عيني ترى ريماس يشهد الله مثل بنتي الله يرحمه سلام من چابها هنا وسكن بهذا البيت چانت بعدها لحمه حمره وكله چان يذبها عندي هسه اني وريماس وافزع نسوان جوارينه ونظف البيت وكم شغله من فراش شوف شنو تحتاج أجيبهن من عندي لما الله يفرجها عليها وتگعد بيتها شكو عليها ريماس طول عمرها سباعيه 

ريماس/ وعمي هم ما گال شي بس گال بعدين امرلچ عندي موضوع وياچ وعافني هو ومرته وطلع وام زهراء واهم تغم بيهم بيدها اثنينهم طلعوا ورجعت يمي وهي تگلي 

ام زهراء/ گبر لهيچ عم اقلها بقي زوجتك يمها گول البنيه مريضه ونعوفها وحدها شلون عبالك ما صدگوا طلعوا يركضون 

ريماس/ خاله اني طول عمري معتمده على الله وعلى نفسي لهذا وجوده مثل عدمه بالنسبه الي 

ام زهراء/ ولچ انتي تعجبت من اجى سال عليچ وگال اني عمها گلت الحمدلله الاخيضر طلعوله عمام تالي كل شي ماكو حمد لله والشكر يمعوده عوفچ منهم خلي نشكل الصونده ونغسل البيت وهذا وحدنه ما نگدر هسه خلي أفزع الجوارين ويانه 

ريماس/ راحت ام زهراء وبعد نص ساعه رجعت وياها اكثر من وحده من جوارينه وبدينه بالبيت نغسل ونظف وهو فارغ تنظيفه صار سهل لا أكو غراض نشيل ونرجع غسلنا من السطح للباب الخارجي هلكنه 

وراحت ام زهراء جابت فراش من عدها وحتى جابت الي ملابس من بنتها ومسويه بنتها عشه جابت اني اخذت الملابس ودخلت للحمام بس شطفت جسمي وبدلت وطلعت ولگيتها فارشتلي الفراش ومخليه الاكل وتنتظرني كعدت اكلت وياها چنت جوعانه كلش وبعدها 

ام زهراء/ عيني ريماس يشهد الله ابو زهراء كل فلس نذب على البيت سجله هاي أمانه وبقت بعد فلوس تحاسبي ويه ابو زهراء واحسبي شگد الفلوس الي نصرفت واحسبي الباقيات حتى يكمل المبلغ الي دفعتي لابو زهراء 

ريماس/ تحچين صدگ خاله يا فلوس تحچين بيها اني احسب وره ابو زهراء ابد والله كل حساب ما احسب انسى وگفاتكم ويايه انتوا اهلي يشهد الله ما معتبرتكم جيران 

وبقيت احچي لام زهراء على الصار كله 

ام زهراء/ ما اگدر اگلچ الله خلصچ منهم لانه ما تعرفين شنو راح يسوون وياچ وخطيه ذني اخياتچ راحن برجلين ما اريد احچي بس صفيه الله يرحمها عدها عقل من ذبتچ بيچ مصيبه تذكرين مره من چنتي واگفه ويه ام رحاب سولفين وياها بشارع من نصحتچ منها هو هذا شغل ام رحاب والناس كلها هنا تدري بس ما يحچون 

ريماس/ صفيه الله لا يرحمها هي ورطتنه بام رحاب 

ام زهراء/ بس زين ما گلتي شي لشرطه عليهم خاف يرجعون يقتلوچ

ريماس/ والله خاله اني ما هامتني نفسي هامني بس اخواتي المسكينات وحق الله لو ميته ولا هذا القلق الي عايشه بي سكتت عسى احد منهم يتواصل ويايه ويگلولي شنو طلباتهم حتى يرجعوهن الي والله چنت أنظف بالبيت وياچ وبالي يمهن قبل عاشن طفولتهن بالفگر واللگمه حسره عليهن سويت البيت ما لحگن حتى يشوفنه هذني حظهن مثل حظي ما شفنه يوم حلو بحياتنه 

ام زهراء/ خطيه ذني راح بالرجلين بعد وينتلگيهن الله اليعلم الله ينتقم منهم قادر يا كريم وجهچ مشوه من الورم عندي كريم طبي هسه اجيبه واخلي لوجهچ 

ريماس/ راحت ام زهراء لبيتها وجابت الكريم وتخلي لوجهي واني جنت نعسانه بحيث بس خليت راسي على المخده نمت وخطيه أم زهراء چانت سولف بعد ما ادري شوكت راحت ثاني يوم گعدت على دگ على الباب كلش قوي اول شي اني ما عندي موبايل وبسبب أعمال البناء بالبيت وفارغ كل ساعه ما بيگمت بس ما آعرف الساعه بيش بس هو فجر لانه بعده طالع النهار گمت واني ادعي لأبو زهراء لانه مسويلي باب إغلاقه محكم الله يرحم بابنه القديم يا هو اجى دفعه ودخل 

وصلت قريب على الباب وصحت منو اجاني صوت رجال گال اني 

جاوبته / اني اعرف انت منو گول اسمك 

جاوب / اني بيان افتحي الباب لا افلشه على راسچ 

ريماس/ تعجبت هذا شكو جاي شيريد فتحت الباب گبل دفعه ودخل ولزمني من رگبتي قوي بأيد وحده وايده الثانيه سد بيها الباب ويگلي 

بيان / البنيه الي چانت وياچ وينها 

ريماس/ دفعت ايده قوي وهو بعد ايده عني وعفته واني امشي دى ادخل للبيت جاوبته / يا بنيه انت مخبل وثانياً أنت شلون تدخل للبيت واني وحدي وشجابك لبيتي 

واني وصلت الباب الصاله اريد أدخل واقفل الباب لهذا چنت مسرعه بمشيتي بس هو چان اسرع من دى اسد الباب دفعه ودخل 

بيان / شوفي لچ وكلام الله ادفنچ هنا وماكو احد يدري بيچ والما سووا وياچ جماعة ام رحاب اسوي اني وياچ لا تخلين خبالي يطلع عليچ من الفجر البنيه الي چانت وياچ بالبيت الي احرگتي بي وينها 

ريماس / البيت چنت بي وحدي وما اعرف انت على شنو دى تحچي يله هسه روح قبل ما أشوفك الناس شيگولون عليه 

راح گعد على الفراش الي چنت نايمه عليه وهو يگلي 

بيان / طالما ما تحچين بعيني شعندي كل شي ما عندي راح اگابلچ واگعد هنا وخلي اي وحده تدخل عليچ وشوفني تعرف اخلاقچ شنو 

ريماس/ وحق الله إذا ما طلعت هسه اعيط وألم الناس عليك واروح هم اشتكي عليك بالمركز تريد تغتصب بيتي 

بيان / لا والله اخاف اجتچ الحاله وتريدين اغتصبچ انتي لا حبابه اني ما اباوع على وحده مثلچ ما ظلت بنفس واحد ياهو اليجي يركبها 

ريماس/ شوف إلى هسه گوه لازمه اعصابي من ناحيتك تفضل اطلع لا افرج الناس كلها عليك واگللهم حرامي وراح اعتبر نفسي ما سمعت كلامك

بيان / عادي شتردين سوين سوي لاتقصرين شنو يجي بيدچ سوي بس نسيت اگلچ البيت لا تشترين اي اثاث لأنها ما راح سكنين بي 

ريماس/ ليش عيني راح تبيعه واني ساكنه بي لو شنو راح سوي 

بيان / نسيت اگلچ انتي راح تجين تسكنين ويايه راح اصبح وامسي بخلقتچ الزفره 

ريماس/ شنو اسكن وياك انت خبل 

بيان / شوفي إذا تغلطين عليه مره ثانيه اشگ حلگچ اعرفي انتي ويامن دى تحچين فهمتي لما مضبرين راسچ بشاش چان گمت فلشته الچ بالحايط ليش انتي ما تدرين او ما بلغچ عمچ انه اني عقدت عليچ يعني انتي هسه زوجتي لهذا حضري نفسچ تردين تجين هسه ويايه لو لما خريطة الوطن العربي الي بوجهچ تروح يله تجين لأنه إذا اخذچ هيچ تخرعين بيبي وابويه 

ريماس/ ظليت صافنه بوجهه شنو انتي زوجتي بحيث من صدمتي بكلامه بقيت صافنه لا ابث ولا استلم 

بيان / اكو ناس من واحد يحچي وياهم ما يفهمون الحچي ومن يصير موقف يله تجيهم الاشاره يله يصرفون يعني احنه بالبيت يمكن اشهر نحچي بزواج عمي وسام وعمه سهاد زوجة عمي مهند لميس وعمه لقاء ما يفهمن بالحچي ومن رحت ويه عمي وسام على بيت عمي مهند الله يرحمه واتفق ويه عمه سهاد على الزواج وچان مقرر الزواج بعد 3 اسابيع بس حمد لله حچي الليل يمحي النهار 

لانه ثاني يوم اني بالدوام اتصل بيه عمي وسام وطلع مقرب الزواج وصاير بعد اسبوع وعليه تم الاتفاق العقد يصير بالمزرعه يمنه 

وبعد اتصال عمي وسام اتصلت بفرقد وبعد اتصالات عديده ما رد عليه وقريب الظهر اتصل فرقد ومن جاوبته گال 

فرقد / بيان من تتصل عليه مره وما ارد عليك لا تتصل عليه بعد اني من افرغ اتصل بيك ترى انت مو مرتي ودگ لاطش بالاتصال 

بيان / العفو سيدي بس اريد احچي وياك 

فرقد / اني بعدني ما متغدي تعال بالمطعم ..... نتغده ونسولف خلي نطلع شويه من الشغل والتحقيق اعصابنه تعبت راح اطلع هسه وتعال انت 

بيان / حاضر سيدي 

وغلقت الخط ويا واني هم استأذنت من مديري وطلعت وصلت للمطعم وصلت بقيت گاعد انتظره حدود ربع ساعه واجى فرقد سلم وگعد وبعد الغده نزلنه نرگيله وگهوه وبديت حديثي ويا / سيدي احنه هسه كل شي ما حصلنه لأنه ريماس نكّرت اكيد ام رحاب راح تطلع 

فرقد / ظهور ريماس مو معناها انه القضيه خلصت وهي الغبيه إذا ظنت انه إذا نكرت صلتها بام رحاب آمنت شرهم هاي تخوط بصف الاستكان يعني إذا ظهرت ريماس بقوا أخواته ورجعت الدعوه جددت ضد ام رحاب بسبب اختفاء اخوة ريماس 

بيان / سيدي هي ماكو دليل ضدها بس اكو ثغره احب اگلك بيها 

فرقد/ وهي 

بيان / سيدي لكون انت ضابط التحقيق بهاي القضيه اريد من حضرتك البيت الي چانت مستأجرته ريماس هي وأخوانها من چانت تعمر بيتها نرفع تسجيل الكاميرات قبل يوم وبعد يوم والبيت الي احترگت بي ريماس هم نرفع تسجيل الكاميرات هنا راح يصير موضوع التحقيق اسهل من انه ننتظر ريماس تعترف ومليون بالميه هي ما تعترف 

فرقد / عفيه عليك التقينه بنقطة احنه اثنينه نفكر بيها هسه اجيب امر قاضي ونرفع الكاميرات وانت شنو سويت بموضوع البنيه 

بيان / والله سيدي اريد احچي ويه عم ريماس بموضوع الزواج بس بصراحه مستصعب الموضوع حتى اكون صريح وياك يعني البنيه تعرف انت شنو شغلها والله نفسيتي ما دى تتقبلها 

فرقد/ عيني گنالك اخذها شهر عسل دى اگلك خلي نفسك بالسليم واذكر كلامي إذا ما بدت المفاوضات وياك حتى تكون بمأمن 

بيان / سيدي شنو رأيك إذا ازوجها ساعه واطلگها وخلاص مجرد تكون عندي ورقة طلاگ حتى إذا ينشرون اني اطلع ورقة الطلاگ واسكتهم 

فرقد/ بابا انت ما تفهم إذا طلگها راح ينشرون الفديو واحنه كضباط العالم تريد تلزم زله علينه وحتى إذا كانت زوجتك وطلگتها راح يطلع عليك مجلس تحقيقي ويفصلوك من وظيفتك لانه ساعتها كلها راح صير شريفه براسك لهذا نصيحتي بقيها زوجتك حتى تضمن اصلاً ما راح ينشروا لأنه إذا نشروا والبنيه زوجتك تگدر تگول زوجتي مصوره ونسرق موبايله ولو اني متاكد من يعرفون هي زوجتك ما راح ينشرون لانه ما راح يستفادن شي فهمت سد عليهم الطريق من البدايه تغده بيهم قبل ما يتعشون بيك 

بيان / تمام سيدي اليوم احچي ويا وأمري لله وبقينه سوالف عاديه وبعدها طلعنه من المطعم وكل واحد لبيته ولليل رحت على ريماس بالمستشفى ومن دى ادخل عليها للردهه صار بوجهي عمها لهذا ما دخلت للردهه وطلعنه اني وعمها من المستشفى وحچيت ويا بموضوع زواجي من ريماس 

احمد / والله اني اشرف بيك وانطيها الك واني مغمض عيوني 

بيان / شوف احمد اني الكذب بصراحه ما احبه وما اتعامل بي اني لو بغير ظروف مستحيل بيوم أفكر ازوج ريماس لانه انت تعرف الوضع وأني مجبر أزوجها لانه هي اعترفت وبلسانها انه عدهم تصوير عليه لهذا من هسه اگلك البنيه وره ما تخلص القضيه اني اطلگها حتى تكون عندك علم بكل شي 

احمد / والله ما اعرف شنو اگلك بس حالياً إذا تزوجها تكون تبعدها عنهم وبحمايتك لما نشوف الآمور شلون صير لانه يمي ما اگدر اجيبها اني عندي عائله واطفال وذوله عصابه لهذا أخاف على عائلتي منهم 

بيان / خلاص متفقين شوكت عندك مجال حتى نعقد 

احمد / إذا الله خلانه طيبين باچر بس خلي اجيب مستمسكاتها من جيرانهم واتصل بيك 

بيان / تشكرت منه ورجعت للبيت واول ما دخلت لگيت لميس بالمطبخ واول ما شافتني گالت 

لميس / بيان صحيح ابويه راح يزوج سهاد 

بيان / هاي اني امشي ولميس تمشي ورايه وتحچي صعدت فوگ لغرفتي وهي ورايه وتعيد بنفس السؤال جاوبتها / البعيده غبيه لو تستغبي هسه وصلت الاشاره الچ غير صار اشهر عمي وسام آذن وهو يصيح راح ازوج سهاد شنو بعد تسأليني ومسويه روحچ متفاجئه بالموضوع 

لميس / شوف بيان إذا تزوج ابويه من سهاد على امي ما ابقى يمك اني 

بيان / الله عليچ استعجلي من هسه واطلعي من يمي واني ما اعرف انتي الزمال يدگ تحيه الچ على عقلچ شنو يزوجها على امي هي امچ غير مطلگه وكل شي منتهي بس انتي وامچ مسوين عمليه الچن وشايلين منچن الكرامه بابا اني لو بمكان امچ واحد يگلي ما اريدك العمر كله ما اشوف وجهه وليش تهدديني ما تبقين يمي روحي هددي ابوچ 

لميس / وشوكت راح يزوج 

بيان / والله انتي بطرانه عيني ذاك ابوچ ورحي اسألي اني شعليه 

وهي هم عافتني وراحت ومر ذاك اليوم عادي وعلي ثاني يوم خابرني احمد عم ريماس گال جبت مستمسكات ريماس من جيرانهم العصر ان شاء الله يتم العقد وبالفعل للعصر تواعدنه يم مكتب زواج ودخلنه لسيد وانطينه المستمسكات مالتنه وعمها هم انطى جنسيته بكونه عمها وصي عليها وتم العقد ولكون هي ما موجوده بالعقد گال السيد انه بتصديق العقد بالمحكمه لازم هي تكون موجوده وانطانه نسختين وحده لعمها وحده اليه 

ومرت الايام واجى يوم الخميس الي هو يوم عقدزواج عمي وسام اني چنت بالدوام من اتصل بيه عمي وسام وگال اليوم المغرب العقد وانه عمه سهاد كل شي ما تريد بس عقد السيد وخلاص اني خلص دوامي ورجعت للبيت ودخلت سبحت وحضرت روحي وما يقارب الساعه 6 العصر اجى عمي وسام وتقريباً بعده بنص ساعه اجتي عمه سهاد وأطفالها وبقينه ننتظر السيد يوصل لانه صديق عمي وسام هو راح يجيبه وشفت لميس تحوس تجي تدخل لصاله وتطلع 

بس اني ما اهتميت إلها وصلني من رقم فرقد ملف مال فيديو اريد انزله بعده يحمل يعني يطول لما ينزل 

وما مر وقت هواي حتى وصل صديق عمي وسام ويا السيد وبده العقد واني وصديق عمو وسام شهود على عقد الزواج وخلص العقد وصديق عمو وسام اخذ السيد يوصله وبده علينه هجوم مو طبيعي كله بطابوگ الجام مال البيت تفلش 

ودخلت عمه لقاء وبناتها وياهن لميس هجمن على عمه سهاد واطفالها موقف اكذب إذا اگول ما ضحكت لأنه موقف ما يخطر على بال احد وعمي وسام وگع دگ لعمه لقاء وبناتها واطفال عمه سهاد كل واحد احتمى بينه اني وابويه اني جريت لميس هي من حامل وبيها حيل تضرب وأنتهت الملحمه مال گلگامش بانتصار عمي وسام وطرد عمه لقاء ولميس اختارت تروح ويه امها وما فضت السالفه كلها غير الساعه تقريباً 9 ونص 

وأخيرها عمي وسام اخذ عمه سهاد وأطفالها وراح واني لكيت الملف مال التسجيل الكاميرات البيت الچانت بي ريماس نازل 

ظليت اتفرج عليه بشكل مسرع ومن ضمن التسجيل شفت ريماس قبل يوم من ما تعوف البيت وتنهزم منه وياه بنيه وصدمتي الكبرى البنيه چانت أغاريد اختي 

يتبع / 

ملاحظة/ طبعاً الف مره اعيد واسقل حبيباتي الي ما عدها صبر تنتظر نزول البارت خليها تكمل القصه وبعدين اقريها ما متوازيه هسه تقريها وهاي مال البارت قصير اني اكتب الي اگدر عليه اني عندي دوام كتابة القصص ما معيشتني ولا كتابة القصص تنطيني راتب خلينه نكون صريحين كتابة القصص عندي هوايه لا اكثر لهذا لادوخن روحچن بتعليق البارت قصير شگد ما اكتب انزل واما تنزيل البارت اني ملتزمه بي 

الفصل السابع والعشرون من هنا 

شكرا لزيارتكم عالم روايات سكيرهوم