رواية قصة وجدان الفصل الخامس والعشرون 25 بقلم انين الليل

دخلت فرح بكلوريا وصرت ما اشوفها هلگد واني اساعد بالبيت انظف وارتب واغسل مواعين ونفس الروتين

بيبي تكعد الصبح وتسوي العمو عاصف الريوك ويكعدون يتريگون وبعد ان ايكمل عاصف ريوگه اني افوت اتريك

مرات اتصادف ويه عمه رجاء ومرات بهاء يطلب مني اصبله ريوك

دووم اتذكر بيت خاله ام احسان واتمنى اعرف اخبارهم لكن ما اتجرأاسال عنهم ومنتظره وعد عمو ياخذني واشوفهم

بيبي هديه الي مرات تخابر بيبي وتطلب تحجي وياي وبمجرد ما تسمع صوتي

تتكسر العبره بصدرها واني من يمي ابجي

بيت عمي مهدي يجون يوميه بالليل واكثر من مره گال البيبي //يمه ولدي يردون يجون ويكعدون يمج شني عود شتتسمى هاي

يبقون بالمضيف وانتي ترحين يمهم وبيبي ترد علي خليهم يجون اهنا

تباوعلي //گومي جده ادخلي الحجرتي اولاد عمج يردون يسلمون عليه

اتذكر مره اجت عمتي انصاف وعمتي امل باتن عدنا واني كلش احب جيتهن وسوالفهن ويه بيبي واشوفهن وحده ترتب

ملابسها والثانيه تعدل نضيدتها ويغسلن الشراشف وغيرن وجوه المخاد واني اتعلمت منهن اغير وجوه مخدتي ومخدة علووش

واغسل شراشف الفراش وكانن موجودات وبيومها اجه عمي مهدي وسلم عليهن وكعد ايسولف وبعدها گال

هي هم صايره هالشكل

انصاف // خير مهدي شكو

— شو اتگللي شكو يعني هم صايره الولد من يردون يسلمون لو ايگعدون ويه حبوبتهم امي هي التروح الهم

بالمضيف لو همه يجون دقيقتين ايسلمون ويطلعون

امل // وليش كل هذا

- - شني اجذب انا

- - لا سالتك ليش

- - غير على مود ( وياشر عليه ) ما يگدرون يجون

نهاد //. حتى همه الولد ايسالوني يمه لويش ما نروح وندخل البيت جدنا مثل كبل نريد نكعد ويه حبوبتنا ونسولف ونشاقيها

امل //. هم صدك ما دام الولد يردون جدتهم ولا يهمج ام محمد شو هذا بيتكم شمرة عصا امي تروح اسبوع اكثر يمج

وحتى احنه نجي ونلتم عدكم

(دارت على بيبي ) شني يمه ما ترحين البيت مهدي هو وحد گاعده اهنا شو بس يردونج تجينهم وحتى الويلاد

يكعدون ويسولفون ويتشاقون وياج واذا على وجدان تبقى يم رجاء وفرح شعليها

نهاد بضحكه مصطنعه // علوا عمتي تجي يمنه انشديها شجم مره نجي انا ومهدي نتوسل بيها اتكول ما اعوف

حجرتي وهسه صارت عدها حجه جديده وجدان الوحدها

مهدي // ها واحنه الخاطير وجدان انوب ننمنع ما ندخل بيت ابونه

طلعت كعدت بالصاله وبيبي ردت // شلك بيها مهدي يابيت هذا اذا على بيت ابوك فبيتك هو بيت ابوك

مهدي يهز بايده // والله ما ادري شني هالحب النزل عليج يمه السعدي وبزره مو حتى چنه من نروح. البغداد تمنعونه

ما نوصل بيت سعدي

بيبي بعصبيه // وبعد شعدك مهدي گول يمه لاتضم بگلبك

مهدي // شني خايف انا واضم بكلبي بس متعجب

بيبي // اي انا وابني مو على حال وحتى چان ويه ابوك بس هاي التحجي عليها بت اخوك عرضك وين تريدنه

انوديها انذبها رايك

نهاد // عمه مهدي مو هيج قصده يكول هي مدنيه مو مال اتضم روحها

بيبي // صدك ما تعرفون تحجون چا لمدنيه مخليه روحها سبيل

نهاد // يا انوب عمتي ردت عليه سوتني ما اعرف احچي

انصاف // شني حبوبه وانتي مو مدنيه ذاك اليوم بخطبة غزوان اليشوفج ويشوف بناتج ورجاء وبتها يكول

انتن المدنيات وبس

نهاد //. وانتي وبناتج. هم

انصاف // انا رحت بدشداشتي السوده ولو ما رجلي كلي روحي للخطبه انا. ما رحت ولا وصلت

نهاد // وانا شگلت گبيتن عليه

بيبي // بس مو وكت مناكرجن وانتي نهاد. شوفي من اريد اجي البيت مهدي محد يمنعني اروح وبعوچيتي ادفع الباب

وادش غصبا عليكم بس انا متعلمه اهنا وهم مهدي وانتي اتعلمتو تبقون ابحدكم واذا ع الولد بيها وبلاياها يجون 

ايحاببوني ويكعدون شويه ويطلعون ومو بس وجدان بالبيت فرح هم

نهاد // جا مو هالبهاء وياكم بالبيت

بيبي // اي ويانه هو وينه تره يطلع من فجر الله ما يرد اله نص الليل وهذا بيته

مهدي // شني يمه شو بيت الكل بس مو بيتي

بيبي // اي مو بيتك انت ذاك بيتك وانت ومرتك والكل اهنا يعرفون هذا البيت المن

گام مهدي من مكانه // چا گولي بعد لاتجون (باوع النهاد) گومي وبعد اذا اجيتي لهنا اكسر رجلج

انصاف // شبيك مهدي امي ما كالت شي

- - بعد شتگول ها شتگول هي ما تريدنا نجي

- - لا خويه امي تريد اتگول ...

اجه صوت عمي عاصف وهو يحجي :: شبيكم حسكم واصل البيت جابر

كامن عماتي سلمن علي وهو يباوع الهن بعينه يستفسر :: ها شنو شصاير

انصاف // ماكو شي

:: مهدي شكو

- - خلي امي اتكلك ياالله امشي

راحو بيت مهدي عاصف كال :: اوكف مهدي خلي افتهم

نهاد بعتب // عمتي كل ما تشوفنه تگول هذا مو بيتكم

:: وشو مناسبة هذا الكلام

محد جاوب رد :: شو سكتو شصاير

امل //خويه الولد

:: ياولد ؟

مهدي // ولدي عاصف يردون يجون ايسلمون على حبوبتهم ايكعدون ويتشاقون وياها

اتثاوب :: اي خلي يجون محد لازمهم

مهدي // شني محد لازمهم كل ما يردون يجون امي تمنعهم هي تطلع الهم بالمضيف والله شنو بت سعدي بالبيت.

نهاد // ما حجى مهدي كال اتمنعونه من بيت ابونه اله ...

بيبي // شو سكتي كملي. شگلت

عاصف نفخ الدخان من حلكه :: يمه لا تضوجين ولا تنقهرين وانت مهدي خلي. ولدك يجون ويكعدون شكد ما يعجبهم

واذا. على وجدان تكعد بالحجره

مهدي // ليش عاصف اولادي مو مثل بهاء مو هو هاليدخل ويكعد وياكل ويسولف

دار علي :: شبيك مهدي بهاء بيته هذا امه واخته اهنا

مهدي // وانا ما كلت شي گلت هذا بيتهم

بيبي رادت تحجي عمي رفع ايده وهز راسه ::اي بيتهم ويمته ما يردون يجون هله بيهم. واذا ع البنات وجدان وفرح

يجن ايسلمن على اخوانهن ويروحن الغرفهن ما بيها شي

ربت على كتف مهدي :: ابو محمد هذا البيت للكل والجميع. بس الاحترام مطلوب مو

امل // كلامك ذهب خويه.

مهدي // خو انتي بس كلام عاصف وامي وانا كلامي ... ره

:: هسه انت هاي شلك بيها مهدي تعاي بابا وجدان

وكفت ورا =. ها عمو

:: ها انتي گاعده اهنا ولا شفتج روحي جيبيلي چاي بكوب وشوفي عمج مهدي اذا يريد چاي جيبيله

- ما اريد

رحت للمطبخ وانا اتساءل عن سبب كمية الكره الي عمامي ايكنونه الابويه وحتى ماكو احترام المشاعري يحجون

بصوت عالي مهدي ونهاد ما يردوني

وصارو اولاد عمي مهدي يجون واني مرات اذا يصدف موجوده بالصاله او بالمطبخ اجي اسلم.

واذا بغرفة بيبي ف ابقى وما اطلع

عمو عاصف يكون موجود من همه يجون وبهاء يجي ويسلم ويصعد بغرفته لان ايكللهم تعبان من الشغل وعلووش اكثر

وقته ويه بهاء ومرات يلعب ويه جهال جابر وسميره وينام يمنه بالغرفه مالت بيبي

امتحنت فرح وزاري وبيوم الي كملت الامتحان كان حسب الجدول بعد اسبوع او خمس تيام امتحان البكلوريا للسادس

واهنا اتذكرت اخويه هشام طلعت للبستان وكعدت جوه نخله وصرت ابجي بحركه واعاتبه

:: ليش سويت هالشكل هشام ليش ضيعت مستقبلك وشبابك وضيعتني ليش محد فكر بيه ليش هشام كان المفروض

تكونلي سند وتساعدني على ضيم الدنيا تالي الكل عافني واني تايهه ما اعرف شسوي

شفت ظل واكف ونفس قوي رفعت راسي بخوف شفته بهاء والدمعه بطرف عينه وهو ايگلي

- - افه عليج واحنه وين رحنه هسه تمر الايام وما تشوفين هشام اله طلع امسحي دموعج

مسحت دموعي وگلي // لا تهمين بسند وانا موجود اي شي تردينه اطلبي مني لا تخلينه بگلبج

= اشكرك بهاء

- - احجي وياج صدك شتردين گليلي تره مو عبالج ما ادري بيج دووم تجين اهنا وتبجين

فتحت عيوني هو ابتسم //. اي يابت عمي دووم اشوفج تبجيين انقهر عليج بس هالمره انتي مقهوره حيل

= مو حقي الي صار بيه مو شويه

- - الي صار بيج اذانه كلنه واعيد واكول شنو تردين گولي

= انتو ما مقصرين خصوصا عمو عاصف

- - ياالله كل شي صار ذبي وراج وفكري شلون تدرسين وتنجحين

= تتصور بعد الي صار اگدر ؟

هز راسه // اي اذا عندج الاراده تكدرين شوفيني انا عشت يتيم صحيح عمي عاصف وجدتي ما حسسوني باليتم يمكن

داروني اكثر من امي لكن الواحد مرات يحتاج الاب بس انا عشت الامر الواقع اتعلمت للشغل ودرست ونجحت ودخلت كليه واتخرجت

اتفاجأت من كلامه = انت تحجي صدوك

جاوبني باستغراب //شني ؟

= انت داخل كليه

- - اي شبيج ما تدرين ؟

هزيت راسي بالنفي جاوبني //. عجيب صارلج شهرين ونص ويانه وما تدرين انا مكمل كليه

= لان ما احب اسال واتدخل باشياء ما اعرفها

- - وليش ما تحبين تسالين

= ما اريد احرج الواحد هسه حساالك ات صدوك مكمل دراسه

بابتسامته جاوبني // انا خريج اداره واقتصاد ليش متفاجئه

= يعني لان انت ايهنا

- - ههههههاي وشبيه ايهنا على گولتج بابا تشوفين هاي الگاع والخير البيها خلانه انصير لورديه بعدين لاتنسين انا ابوي

ضابط وابوج الي هو عمي ضابط وكلهم اتربو ايهنا

= بس اكولك ولاتزعل ولا مبين عليك

ابتسم // ادري ما مبين عليه لان انا اردت ادخل ضباط احب اصير مثل ابوي بس حبوبتي ما قبلت وانا بنفس الوكت احب التجاره لذلك عمي عاصف اقترح ان اذخل اداره واقتصاد واتخرجت ولزمت اكثر الشغل

= دا اشوف شغلك متعب

- شمدريج ؟

= لان من تجي تعبان ومدا اشوفك تاخذ استراحه

- - حبوبتي اتكول اتعب ما طولك شاب حتى من تكبر ترتاح

= بس عمو مهدي مدا يشتغل مثلك ومثل عمو عاصف

- - عمج مهدي اصلا ما يشتغل لان عايش ع المثل الي يگول (عيشني اليوم وموتني باجر ) ياالله تمشين للبحيره

هزيت راسي بالنفي = لا بيبي متقبل

- - وليش ؟

=. دا تكول لا تطلعين ابحدج لو هي ويايه لو عاصف

- - اي زين تسوي چا گومي ادخلي

= لا حباب خليني ايهنا

- - مو ادري بيج تبچيين

= لا لا بعد ما ابچي

- - تبجيين وجد لان من تبقيين ابحدج تجيج الذكريات فما اتصور تبقيين ساكته وما يكون لج ردة فعل گومي

هزيت راسي وگمت دخلنه للبيت شفت بيبي گاعده بالصاله من شافتنا // ها وين جنتو

بهاء //. هاي جيتي من الگاع وشفتها جوه النخله گاعده وتبجي

بيبي // وشلون بيج ياحبوبه خايبه يعمن عيونج وهذا المكرود اخوج ياهو اله

نزلن دموعي بيبي كالت // كافي گومي اغسلي وجهج

كان عمي عاصف دائما يسافر البغداد يغيب يوم ومرات اكثر وبسفرته عمتي رجاء تكون عصبيه وما تتحاجى

خصوصا اذا سافر ابحده

يعني بهاء ما يكون ويا اشوفها ضايجه حييل ولمن تسمع بي رايح يزور هشام تكول

- - بعد لگاها حجه يارايح للسجن ياراد من السجن

بيبي ترد عليها // اي يدور حجج عاصف لان يخاف منج

رجاء // اذا انتي مشجعته بعد ليش احچي

- - لا تحجيين خلي براحته شتردين منه وبكيفه يروح للسجن يروح يتونس ماعليج بي

رجاء// اي تشجعينه يروح يزور ابن الملعون ومناك يكضيها ونسه

بيبي // دا كافي واذا تگدرين انتي امنعي مو كل ما يروح الولد تكلبين خلقتج وتظلين تعاركين ذبان وجهج خلي ساتر علينه

استغربت من بيبي الي ما ابدت اي رد فعل اتجاه مسبة رجاء الابويه اتمنيت بوقتها اعيط واروح البيبي وعمه رجاء

واكللهن لويش هذا الكره الابويه هو شنو مسوي لكن سكتت لان عرفت راح اتصير مشكله وقررت احجي ويه عمو

عاصف من يجي

وثاني يوم بالليل اجه عمو وهو ينزل علاليك وصل يم بيبي باسها براسها وهو ايگلها :: اشلونج يمه

هلا بيك الحمد لله على السلامه

كعد يمها وبعد ما يسلم على احد تجي فرح تسلم علي واني هماتين

بيبي گالت //. صبن العشا

:: ما اشتهي يمه اليوم ثگلت بالغدا

طولت عبالي ترد بيومك

:: لا صار عدي شغله

مكضيه ان شاالله

هز راسه :: ان شاالله

اتعودت من يجي عمي عاصف اطلع اگعد بالصاله لان اعرف عنده ويه بيبي كلام ما ارجع اله بيبي اتصيحني او يجي احد ويدخل للغرفه سمعت صوت بيبي // تعاي جده

= هاا بببي

- - تعاي طلعي العمج ماعون فواكه من ثلاجتي

:: ما اشتهي

- - هو شني ما تشتهي اكلك. شويه بس جكاير وجاي خلص گلبك

اتنفس بعمق صرت اسال بنفسي = ياترى عمي شبي دووم حزين وحتى من يسولف او يضحك الحزن ايبين على وجهه

جبتله الفواكه هو اخذ موزه. وكلي :: تعالي اكلي

= ما اشتهي

بيبي // انوب هاي الثانيه كل ما احد ايكلها تعاي اكلي اتكول ما اشتهي

بقيت ساكته ما جاوبتها هي كالت // طلعيلي رمان

هزيت راسي وجبت كاسه زغيره وخليت بيها حب. الرمان ويا خاشوكه هو باوع :: ها مني مسويلج الرمان

  - وجدان

باوعلي وابتسم :: خليلي بصحن

هزيت راسي وصار ياكل بيبي كلتله. // ما ادري بيك اتحب الرمان

:: احبه بس اضوج اكله لان محد يفلسه الي

= اني عمو اسوي واجيبه الك

:: لا ما اريد اتعبج

= هههه منين من تفريط الرمان تدلل عمو كل ما تجيب رمان افرطه الك واخلي بثلاجتك

هو. ابتسم وصار يسولف ويه بيبي على اشياء ما اعرفها طلع گال :: اروح ارتاح

بيبي // اي يمه روح مبين عليك التعب غسل وارتاح

طلع من الغرفه واني شلت الصحون اخذتهن للمطبخ ورجعت گعدت بالصاله لان ابالي اسال عمو على هشام

ابالي انتظر شويه واروح ادك الباب لكن عمو شفته اجه من الباب الخارجي وهوبايده علاكه دخل على بيبي انطاهه الها

شافني بالصاله اجه يمي :: ليش كاعده اهنا

= عبالي انت بغرفتك

فتح عيونه باستغراب اني جاوبته = اجيت اسالك على هشام

هو غمض عيونه واتنفس بعمق :: زين ويسلم عليج

= صدوك عمو

:: اي صدك

= عمو ليش ما اخذتني وياك

اتغيرت نبرة صوته وحسيته عصبي ::ما اخذج اخوج تكمل مدة حبسه ويطلع وتشبعين منه شوف

بقيت ساكته ::انا رايح انام رايده شي

هزيت راسي مشى للغرفه واني ما اتمالكت نفسي بچيت رغم حاولت ما اطلع صوت نزلن دموعي بحركه

وشفايفي ايرجفن ما يعرفون اني شكد محتاجته الاخويه اخويه الي ظلم نفسه وظلمني ويا

بقيت كاعده بالصاله والذكريات ما تقبل تبتعد عني خاله ايدي على خدي وابچي حسيت بعمو رجع عليه ويحچي وياي

:: كومي بابا ادخلي للغرفه

ما جاوبته ولا كمت رد حاجاني :: وجد كومي ادخلي نامي

بقيت ساكته واحچي ويه نفسي = ناقص بس الهوى تحسبه عليه

رد بعصبيه :: شنو ما تسمعيني مو جاي احچي وياج گومي للحجره

رفعت اكتافي = ما اريد اروح للغرفه

:: ليش ؟

= اريد ابقى ايهنا

:: ما يصير روحي الحجرتج

وكفت وباوعتله واحچي ودمعتي نازله = حاضر رايحه بس هاي الي تكول عليها حجرتج مو حجرتي اني ما الي اي

مكان بهذا البيت

هز راسه وعض على شفايفه بدون ما يرد رحت للغرفه لگيت بيبي نايمه على فراشها وعلاوي بعده بالديوان اتمددت

على چربايتي ودرت وجهي وبعد ساعه تقريبا اجه علي ونام بجربايته بقيت گاعده وافكر واگول

= ايهنا الكل يكره ابويه وامي ومخليني عدهم شفقه عليه دا احس محد يحبني اي محد يحبني

= وبيبي وبهاء وعمو

= لا منوو يگول ايحبوني يحوز هالشكل يبينون حتى ابقى 

= اي تبقيين لعد وين ترحين

صرت مره انام مره افز الى ان سمعت بيبي وهي اتصلي كعدت اتوضييت واجيت صليت وصرت ادعي وابچي وبعد ان كملت اني ادري ابيبي گاعده لكن غلست بعدها غفيت وگعدت تقريبا بالتسعه رحت غسلت ودخلت للمطبخ شفت عمه رجاء كاعده گلت

= صباح الخير

ردت عليه //. هلا صباح النور

وطلعت ما اعرف وين راحت فتحت القوري لكيت بي جاي فتحت الثلاجه وطلعت جبن ولكيت خبز بالحافظه

صرت اكل لمن ما اجه بهاء

صباح الخير

= صباح النور

اجت ورا رجاء //. ها يمه هسه اسويلك

- لا راح اكل جبن وچاي

- مو توك اتكول مشتهي طماطه تگلا

هز راسه // مي خالف هاي نعمه

- عوف لا تاكل هسه اگليلك طماطه

بقيت اباوع العمه رجاء شلون سريعه يعني خلت الطاوه تحمى وغسلت طماطيات اثنين وخلت الزيت ونصت النار

وخلت راس بصل بايدها وصارت تثرم بي والنار هادئه قطعت الطماطه وخلته بالطاوه وصارت تحركها وانا فاهيه 

وهي اتحمي بالجاي وتغسل

الكوب خلت صينيه زغيره وجابت الطاوه كان منظرها ايشهي وصبتله كوب چاي // ها اها هل كملت اتريك بالعافيه

- - الله يعافيج ( باوعلي ) اكلي وياي ايفوتج هذا الريوك

رجاء /. عوفها ما تحب تاكل هيج

لملمت حلگي وهزيت راسي = صدوك كلام عمه بس ما يهم خلي اجرب

هو يضحك ويكول //. شايفتها ويه البصل

باوعتله باستغراب //. ريوك ؟

- - اي ريوك اتجربيها

هزيت راسي = لا خلي اجرب الطماطه ويه الجاي

صرت اكل وهو هماتين ياكل سالته = ليش متاكل بصل

- - بعدين

= يمته ؟

ما جاوب اجه عمو عاصف شافه :: ها انت اهنا

- - اي اهنا جاي اتريك تعال اكل ويانه

:: بالعافيه تدري انا اكل ويه امي

- - هي جده شتاكل وانت تاكل وياها

::افك ريكي

- - اي ادري حتى تحرك جگاير

جاوب بابتسامه :: اي اشرب جكاير

بهاء // هههههههه صدك تشرب جكاير عبالك تشرب ماي

باوع الرجاء :: استكان جاي

جابتله واني صرت اكل ومغنتبه وما اباوع

عاصف :: زين اتعلمت تاكل بالتاوه

بهاء // اي انا عزمتها بس اويلي لو لاچعه وياها بصل

رجاء //. هسه كون لاجعه مو انت ردت تاكل جبن

بقيت اكل بدون ما ارفع راسي بهاء // اكلك عاصف احجي ويه ابو سيف

:: حچييت ومتاني يردلي جواب

- - صدك ؟

:: شنو اچذب عليك وداعتك انت ردته تاخذه

- - مشكور وما تقصر

:: بس حبوبتك ما راضيه

- - انت اقنعها المكان عجبني

:: تدلل ولا يهمك من تحجي كلها بكيف عمي شيكول صار

- - اي هو انا خطيت هاي الخطوه اله بعد ان گتلك

:: هسه يردلي خبر ونشتري وتدلل

- - الله يطول عمرك

رجاء// شو تحجون وتداسرون شكو

هو وكف وكال :: خلي ابنج ايكلج

طلع من المطبخ ورجاء تسال // شني بهاء ما تحجي

باوعتلي وهي اتاشر بعيونها // ها خوش تالي اتسولفلي

من سمعت كلامها وكفت اطلع لان عرفت ما يريد يحچي گدامي سمعته ايحاچيها

- - شبيج يمه هيج تحجين گدام البنيه

- - مو انت ساكت

- - غير على ما تكمل الشغله ونسولف

لحد اهنا سمعت رحت للصاله ولزمت المكناسه وصرت اكنس بيها طلع عمي من غرفته بقيت اكنس اصلا ما باوعتله

طلع صار يمشي وكف بمحاذاة غرفة بيبي وكال

:: اخذي المكناسه وروحي للمضيف اكنسي بسرعه راح يجوني خطار

الصاله نظيفه ما بيها شي بسرعه كملتها ورحت للمضيف خلي اكلكم شي اني احب اروح للمضيف ومن ادخله حييل شكبره

بي كعده عربيه والركن الثاني قنفات وبالوسط زوالي وبلاخير المنقله الي بيها الدله الي يصبون منها الگهوه

بعد ما اعرف يسوون بيها كهوه لو مخلينها منظر

كل ما ادخل للمضيف اشوف صورة جدي وصورة عمي بدر الي يشبه ابويه

صرت اكنسها وبالخاولي الناشف اضرب المساند وفتحت الشبابيك ومن كملت رجعت للصورتين وصرت امسحهن 

واتاملهن واحچي

= اووف ياجدي ياريتك كنت موجود هسه يمكن لو كنت موجود ماصار الي صار بينه ولا عاصف يتحكم بالكل

سمعت صوته جمدني بمكاني :: تتصورين ؟

طبعا ما اسولف الكم مقدار الخوف لن اني كنت اتكلم ويه جدي واجاني صوت صدك خفت وصرت ارجف باوعت شفته

عمو عاصف ظليت واكفه بمكاني اتقرب عليه وگلي بهدوء ولا عبالك چنه جني حاجاني

:: تتصورين. اذا ابوي موجود انا ما اتحكم

بقيت ساكته ما جاوبت هو رد عليه :: انا من اتحكم بالكل اتحكم المصلحتهم شوفي هاي البيوت والبساتين وامور

ما تعرفينها كله من كد هاي

(وآشر على ذراعه )

:: انتي بعدج زغيره وما تفتهمين وهذا اليمج الي متحكم بالكل صدگي اي شي ما محصل

كان ابالي ارد علي لكن ما جاوبته لان خجلت من كلامه خصوصا جملته الاخيره

طلعت وانا ساكته قبل لا اوصل للباب حاچاني :: اوكفي وجد

وگفت بدون ما اباوعله وصل يمي وهو يتنفس بقوه وحاجاني

:: من اليوم تنتقلين انتي واخوج بحجرتي

فتحت عيوني هز راسه :: مو انتي ما عندج حجره بهذا البيت اخذي حجرتي بس بشرط تقفليها عليج من تدخلين بيها

وما تخلين اي. احد بس امي هي التدخل افتهمتي

بلعت ريگي وسالته = وانت. عمو وين اتنام

:: اهنا انام اهنا ما عندي شي

هزيت راسي = لا عمو لا يمكن انت. شدا تحجي اني مدا اقصد

:: لا تقصدين وتقصدين وهم حقج. بس انا ما قصرت گعدتج ويه بيبيتج وخليت الي يجيها يكعد بالصاله وما يدخل يمج

= اعرف عمو بس اني

:: انتي شنو

انملت عيوني دموع = عمو ليش من اسالك على هشام تصير عصبي عمو هشام اخويه واني مشتاقتله

دخن جكاره ونفخ الدخان وكلي :: انا كل مواجهه. اروحله وما اخذج وياي ولو ما علي مريض جان هو اخذته

بس الطبيب منعني

= ليش عمو ما تخليني اروح اشوفه

:: لان عيب

=ليش عيب اني شمسويه

:: عيب عليه بابا انتي ما شايفه السجن الله يكافينه شره وما يلوك. البت سعدي تروحله افتهمتي

= يعني بي اشياء مو زينه ؟

هز راسه :: اي بي مصايب ودواهي

= وهشام

:: هشام اخلي ايخابرج كل ما يحصل فرصه بعد شتردين

= احلف عمو

:: وداعتج

= احلف بروح جدو وداعة. بيبي

:: وروح جدج وداعة بيبيتج بااقرب وقت يخابرج بعد

حضنته وبسته واني اكله = الله يخليك اليه يااحلى عم بالدنيا

:: روحي بابا

= عمو راح ابقى ويه بيبي بالغرفه بس هذا علي كلش على البلي بس يلعب

:: ماعليج بي انا اخلي يلعب وانوب يمل ويعوفه

ابتسمت وطلعت من الباب هو كلي :: وجد

درت = ها عمو

:: بعد من اتكنسين الهول كون محد من عدنا موجود ومن اتدنكيين خلي ايدج. على صدرج

هزيت راسي رغم ما عرفت مغزى كلامه رجعت الغرفة بيبي الي لگيتها گاعده على الجربايه سالتني // كملتي الديوان

= اي بيبي

فتحت الشباك مال غرفتها الي كانت نظيفه وبقيت نفس ما انا يم بيبي اشتغل بالبيت ومن يجي مهدي احاول اتجنبه هو ومرته

واشغل نفسي بالمطبخ او اگعد بالغرفه

بعد ايام بالليل اجه عمو وهو مستعجل وكلي

:: هاج احجي ويه اخوج بس لا تطولينها

اخذت التلفون وارجف سمعت صوته // الو وجد

= هلو هشام حبيبي اشلونك

- اني زين انتي شلونج

= الحمد لله صدوك ات زين

- اي وجد لا تفكرين بيه عمو عاصف ما مخليني احتاج اي شي المهم انتي ديري بالج على نفسج واني كل

ما تصحلي فرصه اخابرج

= اي حبيبي انت هم دير بالك على نفسك وان شاالله تطلع بااقرب وقت

-انتي بس ادعيلي

= طبعا ادعيلك بس اني اريد اشوفك مشتاقه الك

- لا وجد اني كل ما يصير عندي مجال اخابرج انتي لا تجيين

صرت ابجي هو رد // لا تبجيين. وجد اني ما بيه شي وصرت اصلي واقرا قرآن وادعيلج الله يوفقج ياالله مع السلامه

وديري بالج على علاوي وخلي ايحبني تره الي سويته غصبا عليه

سمعته يبجي وسد الخط. صرت امسح بخشمي وبيبي تبجي وتگلي // وينج او وين الضيم يلحبوبه يمه

عمي عاصف ::يمه

بيبي // هلسكتت ما تشوفها دموعها شط

ابتسم بوجهي :: ها سمعتي

هزيت راسي = شكرا عمو الله يطول عمرك

ابتسم ودار على بيبي :: هاي احسن دعوه

بيبي بابتسامه حزين // هي خوش ابنيه. بس لو تبدل حچيها

:: اتبدله يمه توها بسم الله

من سمعت كلام هشام صار عندي امل بالحياة واني لازم اكمل دراسه وادير بالي على اخويه علي واسمع كلام بيبي

وعمو عاصف

ومن يومها حسيت بتغيير صار عمو ايطلعني اني. وعلي وفرح واخذنه شكم مره للولايه الي هي تشبه منطقتنا يعني

بيها اسواق حلوه

وينطينه فلوس نشتري وكنت اشوف الاستغراب والسعاده بعيون فرح وكنت اضوج من اروح ويه عمو عاصف

من يلبس العكال يبين حييل كبير وكنا من نشتري يشترط علينه ما نكول هذا بيش يعني عجبنه. خلص اخذي وهو يدفع

ولازم ما نضحك ولانسولف بصوت عالي ومنننزل يباوع الحجاباتنا

اكثر من مره اخذنه للمتنزه الي بالولايه واشترالنه كل شي حتى الاشياء الي ما نريدها وبعدها جابلنه عشا وهو يكول. 

:: ها اتونستن ؟

فرح // اي بابا الله يخليك

باوعلي ابتسمت = عمو مره لخ خلي. تجي بيبي ويانه

فرح // اي بابا وحتى امي

:: ان شاالله اسويلچن سفره واكري منشاه

فرح // ليش بابا

:: لان بس امج تجي تلز وياها نهاد وفروخها وحتى مهدي ويجوز نهاد على جاهه تعزم سميره وجابر وفروخهم

وتودي على سعاد ورحمن

عرفنا ضاج سكتنا

وصرت اگعد من وكت ومرات اتريك ويه بيبي سياح وبيض مسلوك وعلمتني اشلون اسوي بس اني كنت اخاف

اتقرب من الجمر

سالتها = بيبي يصير اسوي على الطباخ

-اي يصير بس بيش اتسوينه

= بالطاوه

- اي يصير بس كون تحمينها ولا تدوخين. روحج انا كل ما تشتهين اسويلج

وبيوم اجتي عمتي سعاد الضحى ورغم اني اتلكيتها وسلمت عليها وباوستها وكان ردها ابرود اني ما اهتميت لانو اعرف

هي ما تحبني واني هماتين ما احبها وكان عمو عاصف هو وبهاء ما موجودين وسالت عليهم بيبي جاوبتها /. عدهم شغل

سعاد // ها خوش انتانيهم ع الغدا لو انتغدا

بيبيي // هسه يجون 

  وفعلا اجوي وعمه اتلكتهم سلمت على عاصف. وياوست بهاء ورحنه صبينه الغدا واخذنا للصاله والكل كعد بالارض

واني رحت للمطبخ لمن ما عمو عاصف گال

:: وجد وجد

= بلي عمو

:: تعاي اتغدي اهنا

وقبل ما اجاوب سعاد جاوبت // خليها عاصف ما تعرف تگعد بالگاع

  :: شني ما تعرف تتعلم

وما كسرت كلمته رحت واتغديت واني اشوف بهاء يختلس النظر الي بعدها گال عمو عاصف // ظاله مو

  - - اي على جية ابو حسين

:: خوش انام لي شويه تعبان

بيبي سالته // ما تشرب جاي

:: لا يمه اكعد واشرب تعبان كلش

باوع البهاء //. بهاء انت هم اصعد نام ورانا شغل

هز راسه وگف وصعد وعموحاچى سعاد //. مو ترحين اناملي شويه واجي اشوفج

سعاد // نوم العوافي

اخذت الاستكانات للمطبخ واجت وراي عمه سعاد وشافت فرح ورجاء يغسلن بالمواعين وجهت كلامها الي

- - شني ما تحطيين ايدج وياهن شني زغيره لو ما تعرفين

ما جاوبتها وجهي على عمه رجاء الي كالت // هي عليها مواعين الليل وتنظيف المطبخ

رديت عليها = وتنظيف البيت الصبح

رجاء // اي مثل ما كالت تنظيف البيت الصبح

سعاد // انتم شعدكم من كثر جهالكم عشتو

رجعت للغرفه شفت بيبي كاعده ع جربايتها سالتها اذا محتاجه شي هي ردت

لا حبوبه شحتاج

اتمددت على جربايتي وبيبي سالتني // وين اخوج

= بيبي راح للديوان يلعب بلي

- هو شكبره وهيج روحه ذايهه ع اللعب

= شيسوي وين يروح

- هم صدك

اجت سعاد // ها يمه كاعده لدالي نمتي

- اي گاعده

اگلج يمه انا جايه اكلج عرس غزوان الاسبوع اليجي

صلوات الله يمهله بشبابه

ايمه جايه حتى ترحين وياي

وين

البيتي كدام الناس

لا يابتي انا ما اطلع الفرح

شني يمه كافي الحزن شني شحصلتي

بيبي // انتي ليش تحجين وتعبين روحج انا ما اروح وانتي تدرين

سعاد // ما ترحين چيفن ابني

لا ما اروح الكل مكان ويني او وين الفرح.

هاا هسه بهاء اذا يعرس ما ترحين العرسه

بهاء اروح واخطبله واهلهله واطش چكليت

وصارت تنعى وتبجي وهي اتكول // يامحروم ياالعريس يالولد ياابني

بجيت على نواعيها لان اتذكرت اخويه هشام وحتى سعاد صارت تبجي وياها وهي تباوعلي وتگول. 

  حگج يمه

بيبي // شووف الوكت شسوى بيه 

سعاد ترد عليها // اي يمه بت العدو وتتبطر عليه

بيبي اتحسرت ومسحت دموعها وهي. اتگلي // جيبيلي ماي

فتحت الثلاجه وانطيتها شربت شويه وجهت كلامها السعاد // بس لو شويه معطلته

- - ليش يمه كل شي كملت اشتريت الغرفه والفراش وبالعداد اشترت ذهب وهدوم بعد ما عدنا شي

بيبي // غير اخوج سنه ما صارله وانوب مرته وابنه

جرت خشمها وگالت. // روحي جده جيبيلي استكان جاي

من طلعت من الباب سمعت سعاد اتكول //. الله لا يرحمه ولا يرحم مرته العاهر حل وعساهم كلهم ايكبون ويموتون

جايبينها هي واخوها شلكم بيها تذيهوها هو شعبان شيذكر من رمضان

بيبي // يمه البنيه شلها غرض

- - يمه بتهم اتعرفين شني بتهم مو ابوي مات وهو ما راضي وبس يدعي عليهم علمود ظليمتي

بيبي // شني ظليمتج محد ظلمج ابوج مات ما راضي على سعدي تعاركو ابيناتهم مو على مودج

- - بس تبقى بتهم والفرخ ابنهم تره وابوي بكبره ما راضي عليج چيفن مدنيه فروخ سعدي

بيبي // استغفر الله اسكتي سعده هو شظل عده لابيت ولا ولد هذا مريض وذاك بالسجن

عرفت انو كل الي بالبيت ما يردوني ولا يردون اخوي بس الي ما عرفته ما دام هلگد ايكرهوني ليش مبقيني عدهم

   جاوبت نفسي = مو همه الي مبقيني عمو. عاصف

جبت الها الجاي واتمددت وهي تسال ابيبي // هاي دووم ممطوله

لا البنيه هبت ريح تخلص شغلها. وتجي ترتاح

اي عاد اتحلل لگمتها

اهووو. هسه سعده شيكض السانها.

- - ما كلت شي يمه المثل يگول ليله ويصير من العيله

سويت روحي نايمه وبيبي كالت العمه // ناميلج شويه

- - لا يمه اروح على بيت مهدي اعزمهم

- - دروحي وطفي الگلوب وسدي الباب

وره اسبوع صار عرس ابن عمتي غزوان رجاء وفرح ونهاد وبناتهم راحو قبل يوم

وبهاء وعاصف راحو الصبح من غبشه وياهم مهدي واولاده وبيبي كعدتني حتى ابدل العلاوي يروح وياهم

واستغربت بس ندهته وكتله تروح للعرس هو كعد رغم اني خايفه من عمه سعاد لان اعرف شكد هي تكرهنه

لكن اني ما حجييت اجه بهاء وكال حتى جابر اخذ. خروف. 

بيبي. // شني جابر شعده

بعد جده شكله يزعل

عاصف // ياالله خلوهن بالبيكب مالت. مهدي

بهاء وهو يضحك // هسه مهدي من يوصل يدندح نزلو الخرفان ياالله بويه

عاصف. خزره باابتسامه وبيبي كالتله // لاتخزره ما مجذب

طلعو واني باوعت من شباك الصاله شفت اربع خرفان بالسياره عمو عاصف شافني اباوع رجع دخل للبيت وصل يمي

  :: ترحيين ويانه

هزيت راسي = لا عمو ابقى يم بيبي

:: بكيفج اذا يعجبج ترحين بدلي وامشي

ردت اكله المن اروح السعاد الي تكرهني وتكره امي وابويه جاوبته = لا ما اريد اروح بس ردت اشوف الخروفات

شلون تركبوهن بالسياره

:: ههههه خروفات اسمهن خرفان وبعد اذا بس احنه باوعي من الشباك بس اذا عدنا خطار ديري بالح ترفعين البرده

هزيت راسي وهو طلع وركب بالصدر يم بهاء وعمو جابر وابنه مصطفى وعلووش وره ومهدي واولاده بالبيكب

بيبي طلعت للمضيف واني بس كملت شغلي رحت وراها شفتها كاعده وتسبح ومبين الحزن على وجهها وصار وقت

الظهر صلينه واني ما اتجرا اسالها شنؤ الغدا

الى ان سمعت سياره وكفت يم الباب ردت اطلع ما قبلت كالت // ياهو هذا

انا جده محمد

هلا حمودي فووت

عدلت شالي وگفت هو اجه وهو شايل صينيه سلم وخلاها گبالها

هااچ جده

صلوات على محمد وآل محمد

هذا ودا عمي عاصف

عسا سالم شلونه العرس

جده عمي عاصف هو الشايله يستقبل الناس ويوجه الطباخ وتدرين بي نار وشرار ما يريد نقص

ادري بي

وهم ابوي وبهاء وحتى جابر وگفو يستقبلون الناس

الله يحفظهم ويستر عليهم ابن اختهم مو غريب

انا رايح. محتاجات شي

لا جده روحو ديرو بالكم

هز راسه وطلع وبيبي. گالت // جيبي صينيه

صفنت على طلبها بيبي حاجتني

شبيج ما سمعتي جيبي صينيه اكبر. من هاي لو تفرشين سفره

ابتسمت وهزيت راسي وجبت سفره فرشتها بغرفتها وفتحت الصينيه الي كانت مغلقه كان بيها خبز من. شالته بيبي طلع تمن وحشو فوكه فخذ لحم والعلاگه بيها خضره وروبه. والجدريه مرك باميا وجدريه ازغر بيها سوب

بيبي گالت // اخذي. السوب حمي وجيبيلي صحن. حتى اسويلي تشريب

اخذت الجدريه رغم المرك حار بس يجوز بيبي اتحبه يكون. يفور وجبت الها صحن وهي صارت تقطع خبزه وصبت

فوكها السوب وباوعتلي // اكعدي اكلي

رحت. للمطبخ جبت دولكة اللبن وگلاص وصحن وخاشوكه خليته يمها وصبيتلي. شويه تمن وحشو وبيبي تباوعلي

شبيج جده كون هسه المثلج هاي الصينيه تخلصها كلها شبيج حلگج فاهي

وشالت لحمه كبيره وخلتها بالصحن مالتي وحاجتني //. اكلي لحمه وضبي كلبج

گعدت ع جربايتي. وصرت اكل ومن كملت بيبي حمدت الله وشكرته وقرت الفاتحه وهي تدعي بالستر وكفيان الشر وكالت.

من تكملين سويلي استكان چاي ولا تخليلي هواي شكر اشوااي واخذي الصينيه ضميها تتعشين بيها

= بيبي منو يتعشى

  انتي جا ياهو

  = لا هواي اكليت بعد ما اكل بالعشا

اخذت الصينيه ع الكاونتر رجعت عليها = بيبي وين اخلي الاكل

- - حطي. بجدر وضمي بالثلاجه وحتى مركة الباميا ما تدرين باجر الحبايب يجن لا

خليت التمن واللحم بالجدر رغم ايدي صارت كلها دهن وضميتها بالثلاجه وضميت المرك وخدرت البيبي

جاي صبيته. الها وخليت شكر قليل اخذته الها واني صبيتلي بكوب هي شربته وباوعتلي انا اريد. اناملي شويه

وانتي ظلي يمي لا تطلعين

هزيت راسي واتمددت على فراشي وبيبي غطت وجهه بشيلتها وصار العصر شايفتني متمدده. سالتني // كاعده

= بيبي ما نمت

جيبيلي ماي

فتحت الثلاجه وطلعت بطل انطيته الها فتحته وشربت وحاچتني

جده خافنج جوعانه اخذيلج تفاحه موزه

= لابيبي مدا اشتهي

جده شويه اتعلمي حجينه شني اني ومدا احچي مثلنه

ما عقبت بيني وبين نفسي = هو شبي كلامي احسن من حچيكم الي نصه ما افهمه

صار مغرب وراحت تتوضى بعد ما فتحت الضوى بكل البيت ما اعرف ليش حسيت بخوف يمكن لان بقينه ابحدنا

رحت صليت وياها ومن كملنه بقيت گاعده يمها بالغرفه سالتني // كومي سويلج عشا

= ما اشتهي

- - سويلي كوب حليب وجيبي الي

هزيت راسي وبقيت گاعده

— ياا شبيج

= اگولج ومتضحكين عليه

كولي

= بيبي اخاف

—- هههه منين اتخافين

= البيت وحشه وكبير وبس اني واتي واخاف يجي حرامي او شي

بيبي تهز بايدها // شكلج لاتخافين هاي گاعنا وشحده اليمر بيها ومو عبالج ابحدنا بيت هلال وبيت سالم

وعبداالله الحارس لاتخافيين وكومي سويلج عشا

= كومي ويايه

- تظلي ما بلزوم

= لعد وانتي

—هسه يجينه احد ويسويلي الحليبه

اتقربت منها وحضنتها = حبابه بيبي لتزعلين صدوك اخاف

- - سمي بالرحمن ظلي يمي گلبج ايدك

= والحليب

- - خلي بعدني ما مشتهيه

= بيبي ليش ماعدنا باب انقفله علينه

ردت // شلون ما عدنا چا وذاك النطلع منه للمضيف

= بيبي بعيد وداىما مفتوح

- - چيفن بكاعنه

ما افتهمت قصدها بقت هي اتسبح واني يمها على جربايتها لمن سمعنه صوت سياره اني اتقربت اكثر على

بيبي وبعدها سمعنا صوت عمي عاصف وهويكول :: يمه يمه

- - اهنا يابعد امك تعال

دخل وسلم :: السلام عليكم

بيبي // عليكم السلام

دنك باس راس بيبي :: شلونج يمه

الله يسلمك ويساعدك

:: ايساعد بختج

سالني :: اشلونج بابا

= الحمد لله

باوع وبعيونه تساول وبيبي حچت // ابشرك اتخاف وهلازكه بيه

:: اه صدك

اي وداعتك

بلعت ريگي = هسه ما صرت اخاف

  بيبي // ها ما صرتي اتخافيين جا ياهي الما تقبل تكوم من يمي

= اجه عمو بعد ما اخاف من اكبر واحد وراح اسويلج الحليب

حميلي ربع خبزه كسبيها

= تمام

وانتي سويلج عشا

= وانت عمو

:: بس چاي

رحت للمطبخ وبسرعه خليت بالقوري ماي وفورت حليب البيبي وكسبت الخبزه بالاوفن وطلعت بسكت وصبيت البيبي كوب حليب واني خلطت حليب بجاي وصبيت العمو كوب جاي وجبتهن بصينيه واسمع بيبي

هاي كلها الناس جايه

هو ايخوط بالكوب :: اكلجاتعجبت

عاد بس كون الغدا كفا

:: اي يمه الغدا والعشا هم

ما تاكل

::شبعان

ادري بيك ما ماكل

= عمو احميلك الاكل

::لا جيبيلي بسكت

بيبي تباوعله ورافعه حواجبها // صرت تاكل بسكت

:: اي اخف

ايكلي حمودي انت واكف

:: چاشلون حجيه وكفنا انا ومهدي وبهاء وجابر وحجي غني واولاد عبد العال كلنه معازيب

رفعت ايدها بالدعاء// الله يديمكم اكلك عاصف

:: ها يمه

بروح ابوك انت هم سعده اداينت هي رجلها منك فلوس

:: المن

العرس ابنها

:: لا حجيه عبالي اداينت منج

لا ما اداينت

بيبي // عجيب مو تكولون العرس فخم وهواي خسرو

:: اي يمه فخم فخم

تجي وانشدها

وبقى يدخن ويسولف ويه بيبي وانا اخذت الصينيه وغسلت الكوابه ومسحت الطباخ ورجعت گعدت بالصاله لان گلت

ايجوز عدهم كلام ما يردون احد ايسمعه ومن طلع عمو سالني :: ليش گاعده اهنا

= هيج

:: ياالله ادخلي يم حبوبتج

دخلت اتمددت على فراشي ونمنا وثاني يوم العصر اجت عمه رجاء وفرح وبهاء وبيت عمو مهدي

ورجاء وفرح ونهاد فرحانات ومتعجبات بالعرس والعروس الي كانت كلش حلوه وبالبدله الماجرتها والذهب الي

لبسته وفستان الصباحيه الي يخبل حسب كلامهن ونهاد كل شويه وكالت البيبي

- - النسوان كل التجي تنشد عليج وانكللهم تعبانه مابيها حيل الهوسه

الى ان بيبي ردت عليها بعصبيه // والله يانهاد التنشد عليه ما تستحي لن السلف كله يدري بيه انا من اهد حزني على ابني

وانا لارحت العرس ولا حضرت فرح بعد اريد اعرف ياهي هاي الحچت حتى من اشوفها اعرف شحاچيها

نهاد سكتت وفلت وجهها

وتقريبا وره ثمن تيام من العرس اجتي عمه سعاد وياها زوجة ابنها ومن رادو يرحون طلب غزوان يدخل ايسلم على بيبيته

اني عدلت شالي وهو دخل راح على بيبي واجه وسلم

اشلونج جده

هله بيك صلوات مهنا مهنا يابعد عيني مبارك جده وشايف كل الخير

وباسته باوعلي وهو ايگلي // اشلونج وجدان

= اح الحمد لله

عمه سعاد // شمالج ما تعرفين اتگليلها مبروك

=مبروك

ابتسم وهو ايگلي //الله يبارك بيج

  بيبي // انا وديتلك شوباشك ويه خالك

هز راسه // اي وصلني ما قصرتي من رخصتكم

//////////////////

اتقربت من بيبي وحاجيتها = بيبي

ها

= بيبي السوار الي لابسته عمه سعاد بايدها

شبي

= سواري الي جابه بابا الامي وهي انطتني ايا والي بيوم ما اتوفت امي هو ماكو ويه الفلوس

   الفصل السادس والعشرون من هنا 

شكرا لزيارتكم عالم روايات سكيرهوم