رواية قصة وجدان الفصل السادس والعشرون 26 بقلم انين الليل

بعد زواج غزوان بثمن تيام بالليل اجتي عمه سعاد هي وجنتها وبسيارة ابنها وبمجرد ما وصلت تلكتها

عمه رجاء وفرح وهنه ايرحبن. وياهلن ويسهلن اني هماتين تلگيتهن وباوستها للعروس الي كان اسمها رحاب وبعدها

باوست عمتي وكتلها = مبروك عمه

والعروس اجت على بيبي وباست ايدها وبيبي باست. خدها وهي اتكلها // مبارك وان شاالله دربج اخضر ويوم الولد الصالح

ورحت وره عمه رجاء يمكن تحتاجني بشي لكن عمه گالت // ما عدنا شي راح ناخذ عصير وكرزات

واله اكلج طلعي فواكه

واجه بهاء وهو ايكول // سوون جاي

فرح ردت // بهاء شنو چاي مو هذا عصير

- - ديوان وجاي يجونه زلم شني عصير

= اني راح اسوي الجاي

ابتسم // عفيه هو احنه نريد جايج ( باوع الفرح ) وانتي حضري الاستكانات مو زغيره

خدرت الجاي وصبيته بترمز ويا الشكر والاستكانات ومن اجه طلب نخلي شكم صحن فواكه

فرح بتذمر // اووو

طلعت الصحون وصرت اخلي اللالنكي والموز والعنب اجه بهاء ولكاني مخليتهن بصينيه اخذهن وباوع الفرح وكلها

- - اعلمج على ال اووو

اخذت جاي العمه سعاد وبيبي ومن دخلنه باوعت النه

- - ها وين چنتن

فرح // بهاء كل ساع وكال سوون جاي خلن فواكه

سعاد // ياايا وتعبتن يرادلجن اثنين نسوان ايساعدنجن

عمه شربت الجاي وفرح گالت الرحاب // امشي خلي نصعد

اخذتها وصاحت الساره // ياالله شو گاعده

هاجر // چا وانا تانني اصعد وياجن

راحن بقيت اني گاعده وصافنه لمن ما اجه بهاء وهو يگول

ياالله ياالله

بيبي // فوت ما كو احد

جده غزوان يريد يجي يسلم عليج

بيبي // هلا بي خلي يجي

عدلت شالي وهو دخل وبهاء وگف بالباب دخل غزوان وسلم على بيبي

- اشلونج جده

- هله بيك صلوات مهنا مهنا يابعد عيني مبارك جده وشايف كل الخير

وباسته باوعلي وهو ايگلي // اشلونج وجدان

= اح الحمد لله

عمه سعاد // شمالج ما تعرفين اتگليلها مبروك

= مبروك

ابتسم وهو ايگلي // الله يبارك بيج

بيبي // انا وديتلك شوباشك ويه خالك

اي وصلني ما قصرتي من رخصتكم

نهاد // ما تكعد خلي انشوفك

بهاء // عدنا زلم ان شاالله غير يووم يجي البيتكم وتشوفينه

نهاد // هله بي ماكو فرق

غزوان // من رخصتكم

وصل للباب دار // يمه اتحضرن شويه ونروح

سعاد // ما عدي شي بس تنزل مرتك نمشي

- ليش وين هي ؟

- راحت ويه فروحه وسويره فووك بعد تعرف بنات يردن يسولفن براحتهن

- خوش من تنزل رمشن عليه

- اي تدلل

تقريبا ساعه او اكثر بقت عمه سعاد هي وزوجة ابنها وراحن وطلعت وياها نهاد وبناتها وفرح ورجاء واني

بالمطبخ غسلت الاستكانات ومسحت الطباخ ورتبت الصحون ورحت الغرفة بيبي الي شفتها گاعده ع الجربايه

وصلت يمها = بيبي

ها

= بيبي شفت سواري الي ضاع بفاتحة ماما لابسته عمه سعاد

بيبي باستغراب // شني

هزيت راسي = اي بيبي اني اعرفه ومتاكده منه هو واذا تردين اكولج شنو مكتوب على الفص وعلى الجوانب وشكم

زنجيل ولون الورده اني متاكده

بيبي وگفت واتقربت مني لزمتني من ذراعي بقوه وهي تحچي

- - اششش اياني واياج تفكين حلكج لو بحچايه شني ولج بس سووار امج بالدنيا

= بيبي دا اگولج اني متاكده

خلت اصبعها على حلكها // - -اسس...

سمعنا صوت بهاء وهو يحجي // ادب سزز ماكو واحد امطيح حظج

عمه رجاء // على كيفك شسوت

بهاء بعصبيه // ها خو انتي لا تحاجونها لا تجيسونها شتردون منها بس صدگي اخلي بيها عاهه

عمي عاصف :: هاي شكو

اجت فرح تبجي وهي اتكله // بابا بهاء دوبه ودوبي

بيبي وصلت الباب الغرفه // شصاير ياستار شبيكم

اني باقيه واگفه دخلت عمه رجاء // بهاء ويه فرح متواتب وياها

يا اتسودن

شمدريني

سمعت عمي عاصف وهو ايگللها :: لو عندج ام مربيتج ما تسوين السويتي

فرح // بابا انا شمسويه

  :: حماره وما تفتهميين وشيسوي بيج بهاء مو استحقاقج

بيبي طلعت // ادري غير اتفهموني

فرح وهي تبجي // هاي كله لان صعدت رحاب للحجره بهاء ايكلي مصعده رحاب وما مصعده وجدان وانا اگله البنيه

رادت اتشوف حجرتي

  بهاء// هاا وساره وهاجر هم يردن يشوفن حجرتج

  فرح // هنه صعدن انا ما صحتلهن وانشد حبوبتي

    رجاء // وشصااار بهاء شني ابنيه وصعدت هي ومرت ابن عمتها وبنات عمها كفرت

   بهاء// يمه وجدان هم بت عمها مو وحد ظاله بالمطبخ

    رجاء// ولا اجه ابالها عوود مرت الثانيه من يجينه احد ويصعدن اول التصعد وجدان

        عاصف :: بيها مجال تنصيين صوتج

    رجاء // وانا شگايله

          بهاء// هيه ابنيه ومو كل ما يجي احد امشي خلي نصعد تره الثكل مطلوب

    رجاء// خلف الله عليك عود ابني واخوها

      بهاء// يمه علميها البتج الگطع عيب

ظلت تحجي ابحدها لان بيبي دخلت يمي ورجاء تسمع متقصده // شوكاتلين روحكم ياوجدان ياطلابة وجدان

شني ابنيات ما ادري بيناتهن سالفه وما ادري تريد اتراويهن شي وما تريد احد ايشوفه شني گامت القيامه كون

بختي من بخت الحراير

بقيت متمدده ودايره وجهي وبيبي كعدت على چربايتها // لدالي صار شي طلع چيفن ما مصعداتج وياهن

ما جاوبتها ومثلت انو انا نايمه لكن بقيت افكر بالي شفته السوار هو سواري معقوله عمتي هي الي ماخذته ويه الفلوس لكن بيبي شسوت بيه وهي اتهددني بكلامها اول مره رغم كنت اخاف من بيبي ومجرد ما تخزر الواحد اني من يمي اخاف

لكن من لزمتني من ذراعي وكلامها ونبرة التهديد كلش خفت وبنفس الوقت حسيت انو بيبي مصدكتني

ثاني يوم كعدت صليت الفجر واتعمدت اكعد بعد ان كملت بيبي صلاتها رحت اتوضيت وصليت ورجعت نمت الصبح

حسيت بيها گعدت واني بقيت نايمه گعدت بالتسعه ودخلت للمطبخ شفت عمه رجاء ونهاد سلمت

= صباح الخير

اثنينهن كان ردهن ابرود وما اعرف شنو السبب لكيت القوري مغسول طلعته وخليت بي ماي وخدرت جاي وطلعت كيمر

عمه گالت // هذا البهاء وفرح

هزيت راسي طلعت بيضه وحاجيتها = وهاي خو مو الاحد واني اخذتها

ما ردن عليه خليت شويه زيت وكليتها وطلعت خبزه وصرت اكل واشرب جاي ومن كملت غسلت الكوب والصحن

وطلعت بدون ما احجي فتت على الصاله وكنستها ووبعدها فتت على غرفة بيبي هويتها ونظفتها وكنست الحوش

الوره والطارمه وجلفت المغسله وغسلت الحمام وبعدها دخلت سبحت وطلعت واني ما احجي ولا شفت احد لمن

ما كعدت فرح قريب الظهر وشافتني واني طالعه من الحمام حتى ما سلمت دخلت للغرفه الى ان صارت صلاة الظهر

واجه بهاء وهو ايگل البيبي // ياالله خلي نروح

وين

عاصف كال جيبهن وتعال

ياهنه

انتي وامي وفرح وجدان

وين

جده عازمينجن ع الغدا

خاب تمشي شني تتمسهد عليه

لا وروح جدي شني اتمسهد ياالله

  بيبي // وين عازمنه

بالبستان ياالله جده ذاك الغدا لا يفوتجن

بيبي فرت اصبعها وهي تحجي // انوب عازمنه الامر لله

رجع علينه وهو يكول // ياالله يمعودات

بيبي // اخذهن وروح انا ما بيه حييل

بهاء // وداعتج اشيلج شني خويه هي الگعده تحلى اذا مو انت هناك ياحلو

بيبي // توول

  بهاء // عادي اولي بس امشي ،

وباوعلي ابتسم وهز راسه //. استعجلن مو ساعه تبديل وگعدي علاوي

ندهت علي وكتله = بسرعه للحمام غسل وصحصح راح نروح سفره

هو فتح عيونه بنعاس =سفره ايهنايه للبستان

( ) عادي اخذ الكره

هزيت راسي = اي اخذها ،

اجت عمه رجاء وفرح الي لابسه بنطلون وقميص وهاي اول مره اشوفها هالشكل لابسه هو باوع الها وكللها

شلابسه فوتي بدلي

رجاء /# خليها بهاء عجبها هالشكل تلبس

من يمته

حالها من حال بت عمها وهي الاولى مو الچبيره

بيبي سمعتها اتدندن // هذا اول برو وشحال تاليها

حكيت خدي وابتسمت لبست بنطلون اسود وقميص اسود ولبست العبايه الاسلاميه فوكهن طلعت وصلت يمي فرح

- شعجب لابسه عبايه ؟

= اني داىما البس العبايه الاسلاميه عمو عاصف ميقبل بعدين احسن شويه عريضه مو راح نكعود بالارض ونتحرك براحتنه

هي راحت تمشي بسرعه ولبست عباتها الاسلاميه وركبنا بالسياره بيبي بالصدر هي وعلاوي واني وعمه رجاء وفرح وره

استغربت لان اخذنا المنطقه بعيده عن بيتهم اني ما شايفه هذا البستان ولا اندله صدك حلو وبي ساحه ما مزروعه

شفنه عمو عاصف كاف دشداشته ومنسف ارداناته واكف يم جمريه وريحة الشوي اتشهي وصلنه وكل شي كان موجود

فراش وترمز ماي وحتى قوري الجاي هو اتلگانه وراح مد ايده البيبي وهو ايگلها :: هلا يمه

هلا بيك شني مسويلنه سفره

بهاء// جده سبرايز

   بيبي // شني انوب هاي السبر شني

فرح // سبرايز جده مفاجآه يعني

  بيبي اتهز بايدها // وهسه انت اله تحجي انكريزي شبي حچينه كلساع وعوجت حلكك

الكل ضحك وبهاء فلت وجهه

عمي عاصف :: من زمان ماجايه لهنا وكلت شويه اتغيرين جو

  رفعت اديها // عساك سالم

باوع البهاء :: الله يسلمج ياالله افرش السفره

   رجاء// احنه كل شي ما جبنه ويانه

    بهاء // يمه كله موجود

صار بهاء يفرش السفره وعمو عاصف جاب صياني اثنين وحده شاوي بيها لحم والثانيه شاوي معلاك

وبهاء راح للبيكب نزل خبز وفواكه وببسي وطرشي وبصل وحتى الخضره

بيبي گالت صلوات على محمد وآل محمد

كلنه ردينه اللهم صل على محمد وآل محمد

عمو عاصف :: بسم الله مدو اديكم

واول شي خله البيبي بخبزه لحمه وخضره اخذتها وتكله // عساك سالم

وسوا لفه زغيره العلاوي وگله :: بعد عمك اكل حتى تصير قوي

علاوي اخذها وصار ياكل اني ابتسمت من شفت علووش مرتاح وياكل بيبي نهرتني

- - اكلي لا تفهيين ع الحجي

باوعت الكل ياكل بس من حجت بيبي باوعولي هي سالت عمو //. ذبحتلك ذبيحه

:: اي يمه بثواب موتانه

ان شاالله واصل وديت منها

:: اي انطيت لمعيلو والبيت جابروالمهدي

الله يذكرك بالخير

عمه رجاء //. بس لو مودين على مهدي وعياله

  بهاء// يمه مو نكلج مفاجأه

   رجاء// وشكو بيها الا اجو يخربون المفاجأه شني

  - يمه كل عايله والها خصوصيه

  هزت ايدها // والله ما ادري هسه صارت النه خصوصيه عن بيت مهدي

- لا يمه انتي ما تقصدين عمي مهدي تقصدين نهاد

- شوف انت شكثر ما تستحي اتسميها نهاد تستنكف اتكول خالتي

- لا تزعلين خالتي

بيبي كالت //. الحمد لله

  :: ما اكلتي يمه

- خيير بعد شااكل ( رفعت اديها للسما ) ربي زيده وخلي كواديده

اكو سطل وبي دولكه زغيره ويمه صابونه بيبي راحت وعمه رجاء كالت الفرح // روحي صبي على ايد حبوبتج

گامت فرح وصبت على ايد بيبي ومن الكل غسل عمه رجاء صبت الجاي وبعدها عمو عاصف اخذ ايد بيبي وصارو

يتمشون ودار علينه وگال

:: فرح انتي واختج اتمشن بالبستان

وطبعا ما كذبنا خبر رحنا نتمشى كان البستان كبير وكله نخل صرنا نمشي من الجهه الثانيه وكفنا يم بحيرة ماي

سالتني فرح // انتي ليش ما بقيتي بس بالبنطلون والقميص لويش لبستي العبايه الاسلاميه

= حتى اخذ راحتي بالكعده

- - ها مو انتي ابيت اهلج كله بنطلونات

= اي بس من اجيت لهنايه عرفت انو عمو ميقبل البس بدون عبايه اسلاميه

ردت بتستهزاء// هاا خوش تعرفين اتدبرين امورج طلعتي مو هينه ولا فقيره

استغربت من ردها اتشجعت وسالتها = انتي ليش تكرهيني

اتفاجات من سؤالي واشرت على. نفسها // انا

هزيت راسي = اي انتي فرح تره اني اجيت لهنايه مو بارادتي غصبا عني

  - مادام هيج چان ما اجيتي 

   انقهرت من كلامها جاوبتها بهدوء= وين ابقى وبيبي وعمو ما يقبلون ادعي الله يطلع هشام ونرجع البيتنا

دمعتي بطرف عيني لكن جاهدت ما تنزل سمعت صوت بهاء وهو ينادي علينه

— - فرح وجدان تعالن

رحنه نمشي شفنا ينزل بايسكلات تلاثه. وعمتي رجاء تگول // يايا شني هذني

احنه ما. انتظرنا يحچي ابتسمنا واخذنا كل وحده واحد وركبنا بيهن وعمه اتكله // المن جايبهن بنات ما يصير ايركبن بيهن

ليش ما يصير

بنات هذني

يمه احنه ابختج

   باوعت النه عمه رجاء // اوكفن لا تركبن بيهن

فرح // لويش يمه 

هذني للولد مو للبنات اخاف عليجن

فرح // لا تخافيين يمه ما نطلع بره البستان.

يابستان ما يصير

اجت بيبي وهي متفاجئه وعمو عاصف يبتسم رجاء //. شوفي عمه شجايبين

بيبي // شفت خليهن. يلعبن

- - مو ع اللعب اخاف عليهن

- - ما عليهن شي (باوعت النه وهي تكول ) من اتصعدن على كيفجن العبن ولا تهدكن روحجن.

هزينه راسنه وركبنا اما علاوي فركب بدون ما يسمع الاحد واتسابقنه واحنه فرحانات ونضحك

بهاء اخذ الكره وصار يلعب هو وعمو وعلوش

كان الجو حلو والطبيعه احلى وهناك صلينه ورجعنا العصر صدك كانت سفره حلوه وراها بيومين بيبي وعمو عاصف

طلعو وره الظهر ورجعو العصر ومو اول مره بيبي

تطلع ويه عمو عاصف ومرات ويه بهاء وعمه رجاء تروح وياها بس مو دائما لكن هالمره من رجعو مبين عليهم الانزعاح

عمه رجاء //. ها عمه وين رحتي انتي وعاصف

بيبي //. رحنه بواجب الصاحب عاصف

رجاء هالاكول ما تعطلتي

الناس عطلونه بس احنه ما رضينه انظل ادينه واجب واجينه

وصارت هاي حياتي وياها وياها عايشه ابيت جدي واشتغل. ويه عمه رجاء اني وفرح مره تزعل وما تحجي

ومره تجي وتسولف ويايه وبيت عمو مهدي تقريبا يوميه يجون وبدت المدارس وراح عمو ينقلني وطلبت منه اروح

ويا هو سالني :: وين ترحين

= اشوف خاله خوله ومنار واريد اشوف

برطمت اتذكرت بيتنا. هو هز راسه :: بس انا عندي شغل ما اتعطل

= عمو انت مرني عشر دقايق ما اخذ من. وقتك

:: تمام حضري روحج عود ومن نوصل اتصل بيهم ونروح الهم

ما تتصوروون فرحتي لان راح اروح البغداد واشوف خاله ومنار

  حضرت ملابسي الصبح تقريبا الساعه بالخمسه بيبي ندهتني وگالت // ياالله خلي نتوكل

اني استغربت هي گالت // اريد اروح ازور واشوف ام كريم

ابتسمت وبسرعه بدلت وندهت علووش وطلعنه وبالسياره كملت نومتي ما حسيت اله بيبي تندهني ياالله اكعدي وصلنه

فتحت عيوني الدنيا صبح اتلكونه بيت عمو كريم ودخلنه شفت بيبي ام كريم والي من كعدت يمها تباوعلي وتمسح بدموعها

بعدها سالتني عن احوالي وكالت انو هي دووم تطمن عليه من عمو عاصف من يمر عليهم ومن جابولنه الغدا سالت بيبي

على عمو عاصف جاوبتها خاله ام كرار انو هو بس اجه طلع وبعده ما راجع

واني سالتها على اخويه علووش ردت بالاستقبال يلعب ويه اولادها

اتغدينه وبيبياتي نامن واني رحت ويه خاله ام كرار وبنتها هدى الي فرحت بيه وسالتني على احوالي

واجه عمو عاصف قريب المغرب ودخل الغرفة بيبي ام كريم هو وعمو كريم واجه عمو رحيم وساله عمو گله

كملت النقل

:: بلكي باجر اليوم كله بالوزاره

ام كرار // عود ليش

:: لان من محافظه المحافظه ان شاالله تكمل باجر

:: ان شاالله ( باوع الكريم ) انت اخذ الحبايب خلي ايزورن وانا اكملها

كريم // خوش باچر نروح نزور الامام الكاظم عليه السلام الصبح

بيبي //. نعم الله عليك

كريم //. وانتي حجيه

بيبي هديه // - - لا ما بيه حييل روح انت ومرتك وعمتك واخذو وجدان وياكم

كريم // ان شاالله

بقو ايسولفون واني ساكته وبعدها طلعو راحو ايكملون السهره بره رجع علينه وگال

:: اتطلعن تتونسن شويه

بيبي ردت //. غير باجر نروح للزياره هسه من نروح وياك نتعب

كام يريد يروح للديوان باوعلي وكلي :: تعاي وجدان

=. بلي عمو

طلع من باب الصاله للبراني دار عليه وسالني :: شكو

هزيت رااسي =. شكو عمو

:: من اجيت وانتي تباعيلي

ابتسمت. = لبسك كولش حلو

:: ها عجبج

هزيت راسي =. اي عمو ماعبالي تلبس بنطلون وقميص

:: مرات من اراجع دائره لو من اسافر

=. بس كلش حلو عليك هيج لبس

:: ولا يهمج كل ما نجي البغداد البس هالشكل

لا عمو مو قصدي دا اكول ياريت تبقى تلبس هيج داىما

ما رد اكتفى بابتسامه. سالته = عمو مو كتلي اروح اشوف خاله ام احسان

:: اووو نسيت بلكي باجر من اكمل المعامله اخذج

هزيت راسي ورجعت بيبي سالتني // شراد منج

= گلي اذا تردين تطلعين امشي بس اني ما قبلت

وثاني يوم الصبح اخذنا كريم اني وبيبي وزوجته وعلاوي وابنه الزغير وصلنه وزرنا والاجواء تخبل والناس بحوائجها الي حاملتها بقلوبها وتريد قضائها واني من هاي الناس الي طلبت انو الله يفك سجن اخوي ويرجعه الي سالم غانم حتى نرجع البيتنا ونعيش سويه وننسى كل الي مر بينه

بعد ان كملنه زياره طلعنه گعدنا بالصحن وبعدها اخذنا عمو للمطعم نتغدا ومن كملنه عمو كال الزوجته

اخذي وجدان للاسواق يجوز يعجبها شي تشتري

جاوبته بخجل = لا عمو ممحتاجه اي شي لا تكلف نفسك

  كريم // عمج خله عندي فلوس گال تروح هي وعمتها تشتري اي شي يعجبها

ام كرار سالت بيبي // عمه ترحين ويانه

- لا ما بيه حييل انتن روحن ولا تتاخرن

كريم // هنه والليل

ام كرار //وين تبقون

- - گاعدين اهنا وبيناتنا التلفون

ورحنه اني وام كرار وهي تحثني اشتري صرت اباوع اخذت صدريه للمدرسه وقميص وام كرار اعترضت لان اخذتهن اسود بس اني ما قبلت اله اشتري اسود حتى الجنطه والحذاء هي حاجتني

كافي حزن خاله ما يجيب شي اشتري الوان وفكي حزنج

لا خاله ما اگدر

والى متى

اتحسرت =. اقلها من يطلع اخويه من السجن

بعدها سالتها = خاله بقت عندج فلوس

هي ابتسمت //اي حبيبيتي شتردين اشتري

   = اريد اخذ ملابس العلاوي وملابس الفرح

- شعجب تاخذين الفرح

= خاله لازم اخذ الها لا تنسين فلوس ابوها

- - بس هو خلاهن الج والاخوج

= مي خالف

- - تعرفين قياسها

= اي نتلابس اني وياها

اشترينه ورجعنا عمو اتعجب سال زوجتته // متاكده رحتن تتسوكن مو بس اتمشيتن

  - - بعد وجدان ياالله ولا نتاخر وبسرعه وعيب من عمو

رجعنا وعمو كال // خلي افركم بالسياره قبل لا نرجع واني اباوع البغداد عبالك عايفتها صار سنين مو اربع تشهر

وعمو نزلنه بحديقه وصار علاوي هو وجود ابنهم يلعبون بالحديقه واني احجي ويه نفسي

= يجوز بالليل ياخذني البيت خاله ام احسان

  = يجوز ولو دا اشك ما يريد ياخذني

رجعنا وره المغرب وبيبي سالت على عاصف وكلولها ما اجه

وهي حتى ما خابرته صلينه وجابو العشاا ما اشتهيت اكل وعمو اتاخر للساعه تسعه بذيج اللحظه حقدت علي وصرت

احچي ويه نفسي = ليش انت ما تريدني اشوف ام احسان ومنار ذوله عشت وياهم اكثر منكم

اندك الباب وابو كرار كال

- - ها اجه عاصف

طلع عمو كريم واجه يگول اتفضلو اهلا وسهلا وينجن بنات

ام كرار راحت للصاله وهي تكول // فوتي دادا زارتنا البركه

- - تعاي وجدان شوفي منو اجانه

طلعت وصارت عيني بعين ام احسان ومنار ما صدگت عيوني صارن دموعي يجرن وركضت عليها حضنتها واني

ابوسها واشهك بالبچي وحضنت منار وهي اتكلي // كافي لاتبجيين المهم انتي بخير

دخلنه الغرفة بيبي هديه وام احسان سلمت على بيبياتي وگعدت وهي اتكول

- - من امس عاصف خابر ابو احسان بس احنه ما كنه ابيتنا رحنه البيت اختي ابنها اتزوج

بيبي // مبارك وشايفين الف خير

- - الله يبارك بعمرج حجيه

ام كريم // والله ياخاله انتي فضلج ما ينسي

  ام احسان بحسره // ياا يافضل هذا خاله ما سويت شي نجاة الله يرحمها ( واهنا خاله اختنكت بعبرتها واتكسر الكلام )

كانت اكثر من اختي عشنا عمر اني وياها اكثر من الاخوات بسرعه اتفرفحت وراحت من بين ادينه

  بيبي هديه وام كرار // الله يرحمها

ام احسان // من امس لليوم الوبن شون تجي وجدان وما اشوفها عبالي رجعتو ما نحس اله عاصف مخابر ابو احسان

وكايله هسه ترحون وياي اتشوفكم وجدان واحنه ما كذبنا خبر

اثاري خطيه عمها واكف بالباب وطلع كدامنا حتى نندل

ام كرار // هلا بيكم اتشرفونه يمته ما تجون

ابتسمت رغم دموعها // وهسه اتي اشلونج

هزيت راسي = الحمد لله

منار // اتداومين السنه مو

ام كرار // اي دادا حتى ملابس اشترت

بعدها بساعه استاذنو لازم يرحون واجه عمو كريم گال // ابو احسان يريد ايسلم عليج

طلعت ويه خاله ومنار وشافني عمو الي شفته فرح من شافني وصار يدعيلي بالتوفيق وام احسان اتوصيني

ادير بالي على نفسي وعلى دراستي اما منار فنطتني رقم تلفون وگالت احفظي على گلبج بيوم يجوز تحتاجينه

وراحو واني ودعتهم ومن دخلنه گتله = شكرا عمو

هو هز راسه الصبح رجعنا شويه دا احس نفسيتي احسن وانطيت الفرح ملابسها گدام عمو عاصف وگتلها

= هذني عمو اشتراهن الج واني اشترالي ذني

هو فتح عيونه ع الاخر ابتسمت = تدرين فروحه عمو عاصف ذوقه حلو

اتقربت منه وهي اتگله // شكرا بابا مو انت انطيتني فلرس وگتلي خلي امج تاخذج شعجب اشتريتلي

  :: صارن گدام وجهي وعجبني موديلهن

ربي يخليك حبيبي

ثاني يوم اجه عمو گلي :: روحي نظفي المضيف

هزيت راسي واخذت المكناسه وخاولي ورحت كنسته وفتحت الشبابيك ومسحت الطبلات والنفاضات ومن

ردت اطلع شفت عمو جاي سالني :: كملتي تنظيف ؟

= اي عمو

هز راسه :: ليش امس گلتي انا اشتريت الملابس

= عمو احسن

:: شنو الاحسن انطيتج الفلوس الج والاخوج وانا انطيتها فلوس تروح هي وامها

= عمو ليش انتو هالشكل

:: منو احنه ؟

= انت وابويه ليش دومكم اعصاب وما تتفاهمون

خزرني وگلي :: ابد ابد لا تقارنيني ابابوج

= بس اني دا احس انت ما تحبها البنتك

باوعلي وهو يلملم بحلگه :: هذا الكلام لا تعيدينه ومره ثانيه اسمعي الكلام ولا تتصرفين من راسج

= عمو من جبت الملابس ما ردت فرح اتضوج

:: روحي للبيت

= اسفه عمو لاتزعل مني

:: روحي

رحت امشي واسال بنفسي = شبي عمو هاي فوكها

   كمل عمو نقلي وبدت المدارس وبيومها بدلنه اني وفرح ومن نزلنه عمو گال

:: اسمعن زين انتي فرح تعرفين بس وجد ما تعرف يوميه نوديجن بالرجعه اتاننه لو انا لو بهاء نجي عليجن ما تجن

ويه اي احد افتهمتن

اني هزيت راسي لان الكلام موجه الي

:: وما اريد رسوب

:: وبنات ما تعرفينهن لا تصادقيهن

:: احنه ناس معروفين ترحن بطريقجن وترجعن بطريقجن واي شكوى تره انا ما ارحم مفهوم

تستمر القصة أدناه

باوع البهاء :: اگلك شوف اذا اكو خط العلي سجله

اي اكو

:: ها

- شلقصه مو ولد جابر وياهم جهال بيت ابو طاهر

:: ها خوش شوف السايق واتفاهم ويا او وصي

-تمام

وصلنه بهاء اني وفرح وگال ارجع عليجن يثنعش ونص وقت حلتنه مثل ما كالت فرح ودخلت للمدرسه الجديده واني اشوف كل الانظار عليه صدگوني حتى مدرساتي بمجرد ما يسالوني عن اسمي او اشارك بالشرح او حل المسائل يكون السوال هو انتي بغداديه

حاولت قدر المستطاع ان اتجنب الكل لان ما اعرف الناس ولو انوخذ عليه انو اني متكبره لكن صدقا ما اعرف الناس وهماتين اخاف من اي تصرف اتصرفه يمكن ما يعجب بيبي او عمو عاصف وهذا الشي ما لگيتله جواب

يعني هل هو خوف من عمو وبيبي او احترام او يمكن حب

المهم كانت علاقتي ابنات الصف علاقة ما تتعدى انهن يكونن زميلات مو اكثر وبيومها اثناء الفرصه اجتي فرح وياها رحمه بنت عمتي سعاد والبنيه بطبيعتها هادئه وحبابه او خلي نكول متجنبتني مجرد ما سلمت هي گالت تريد تروح الصفها عرفت هي ما تحب تبقى وياي واني هماتين ما عزمت عليها بيومها راحت ويه فرح

وصرنا نروح ونرجع مره يجينه بهاء ومره عمو عاصف وعلي اجروله خط ومشت حياتي ارجع اتغدا وانام شويه وبعدها ادرس واكوم اسوي العشا واغسل المواعين وارجع اقرا واي احد يجي اني ما اطلع ولا اجامل وحجتي دراستي يعني من يجون بيت عمي مهدي اني ما اطلع لان عندي دراسه

كنت ادرس بغرفة بيبي لكن بالليل هي تنام وتريد اطفي الضوه ف اطلع اقرا بالصاله وداىما يجي بهاء يسلم عليه ويسالني اذا اكو شي ما فاهمته واكثر المرات ايفهمني مسائل الرياضيات وبعدها يصعد الغرفته والصراحه صرت داىما اطلع للصاله وانتظره يجي وهو يتعمد يتاخر حتى يجي ويشرحلي

وبيوم حلينه همه اتاخرو ما اجونه بقينه منتظرات شافنه غزوان اجه على اخته رحمه سلم هو كل مره يسلم على بهاء بالسياره يعني واحد يشيل ايده للثاني ومن ايشوف عمي عاصف ينزل ايسلم من شافنه ابحدنا نزل وسلم علينه ردينه السلام گال

شني محد اجاكم

فرح // هسه يجون

امشن اركبن اوصلجن

لا مشكور هسه على جيه

شلقصه تره انتن بنات خالي وانا ابن عمتجن

ما جاوبنه هو رد // بس ما وارده تبقن بالشارع

= هسه يجون

وانا ما اخليجن بالشارع

فرح // لا همه على جيه وهذني البنات باقيات روح انت

ركب السياره وبقينه ويه بنات ماجرات كيه واثنينهم اتاخرو لمن ما اجه ابو الكيه فرح كالت // امشي خلي يذبنا ع الشارع مال كاعنه

هزيت راسي = لا شنو عمو ميقبل

جا انظل اهنا ابحدنا

= هسه يجون

  هزت راسها // لا من اتعطلو الهسه ما يجون اكيد صار عدهم شغل امشي ياالله

= اني ما اروح اني ابقى انتظرهم

فرح // وجدان امشي انا تعبت من الوكفه ياالله امشي

= وين عايفتني ورايحه

وصلت يم الشياره // شسويلج انتي ما تجين

= مو عمو گال عسا ما نبقى لليل لا تتحركن من مكانجن

فرح بقلة صبر // اووو انتي بطرانه همه كاعدين ومرتاحين واحنه متانين وطايح حظنه

هي راحت واني بقيت واكفه اكثر من ساعه بيبني وبين نفسي گلت = هسه توصل فرح واكيد يجون ولو يرزلوني لان ما اجيت وياها لو يرزلونها لان ما انتظرت وياي وبكل الاحوال راح تزعل

صرت مره اگعد على درجات باب المدرسه الخارجي مره اوكف

طلع الحارس الي اتفاجا من شافني // ها عمي شني محد اجه عليج

= هسه عمو يجي

الحارس سالني // انتي وين بيتكم

=منايه (اشرت بايدي )

- - منين منا ؟

= منايه هيج

- - وين ؟

= ما اعرف بس احنه نجي منايه

- - شسمها منطقتكم ؟

رفعت اكتافي = ما اعرف

- - هاي شني ما تندلين بتمن انتي

سالته باستغراب = ابويه ؟

هز راسه // اي

= اني بت سعدي

ياسعدي ؟

= سعدي ابو هشام

- - هو ايجيبج ؟

= لا عمو

- - ياهو عمج ؟

= اني عمو اسمه عاصف

- - عاصف آل غازي

= اي

هسه اخابره بس كون الكه رقمه

بقيت كاعده ع الدرجات الي اباب المدرسه واباوع ومره اوكف الرجال صار يتصل يكلي / / محد يشيله

الى انا فات هواي وقت جاوبه عمو

  :: الو

السلام عليكم

:: عليكم السلام

-هاي بت اخوك ظاله متانيتكم والبنات حلن الهن فوك الساعتين نشدتها لا تندل منطقتكم

-هذا انا يمها هي واگفه اباب المدرسه

وباوعلي كالي // هسه يجون عليج

هزيت راسي =شكرا عمو

وكفت اجتي سيارة غزوان وهو الشرار طالع من عيونه // شني بعدج

هسه يجون عليها

فوتي اركبي

= اني ما اركب هسه يجي عمو

شني ولج قابل اريد اخطفج

الحارس // انت ياهو ؟

هي بت خالي

هذا ابن عمتج

= بلي بس عمو گال ما اروح ويه اي احد بس ويا

غزوان بعصبيه //امشي ولج لا اطبح حظج

رفعت اصبعي = لا تغلط افتهمت

لا ما افتهمت شتسوين

   الحارس// عمي اتكفا الشر وروح

غزوان بعصبيه // شني اخليلي بت شابه يمك

الحارس // احترم نفسك شو ما تعرف تحجي

- - انت ما عليك لا تتدخل البنيه بت خالي

— - والبنيه ما تقبل تركب وياك وعمها امني عليها

غزوان //. شني بكيفك

- - هاي شكو شبيك غزوان

دار شاف بهاء // هلا بهاء صارلها ساعتين ابحدها اخذت رحمه ورديت وهي ظاله شو هسه كتلها امشي ما تقبل تكول

ما اروح اله ويه عمو عاصف

- - اي احنه موصينها لو ويه عاصف لو وياي

- - بس انا ابن عمتها

- - مشكور وما تقصر

- - شنو هاي بهاء يعني لو اتعطل واختي ابحدها ما تشيلها بسيارتك

هز راسه // اشيلها بس كون وياي اخواتي

  - - اي انا اجيت واخذت اختي وما رضن يركبن وتالي ظليت بشك ورديت

- - شك شك شني

- - گلت خاف ما تجون خاف ناسينهن

بهاء// من شفتهن ما اجينه عليهن المفروض ييك تخابرني تخابر عاصف تخابر الحجيه ( باوعلي ) فوتي اركبي

الحارس //. هووب عمي انا خابرت عاصف

- - انا ابن عمها وعايشين بنفس البيت فوتي اركبي وين فرح

  بلعت ريكي = بالبيت

- - شني بالبيت شلون رجعت

  = رجعت ويه الطالبات

- - الكفها اله اجنزها

الطريق كله وهو ينفخ وراد يطيرها للسياره انا عطت من الخوف هو باوعلي // وانتي ليش ما اجيتي وياها

=مو عمو گال نبقى ننتظر وما نجي لو شيصير

- وهي عافتج واجت اليوم اموتها منو ايفكها مني

صارت دمعتي بطرف عيني لان اذا يضرب فرح معناتها البيت كله يصير ضوجه ويتدخل مهدي ونهاد تصير تشمر سمها

هو بس ينفخ ويتوعد لمن ما حاجيته

= بهاء

هو باوعلي بدون ما يحچي

= الله يخليك من نوصل لتحچي على فرح اصلا اني الي ما قبلت اجي وياها

  = حباب الخاطري

+

صرت ابجي فتر السياره سالني // ليش تبچيين

= مراح تضربها مو

اتحسر // امسحي دموعج

= حباب

هز راسه // امسحي دموعج ما راح اضربها بس رزاله ارزلها

= ورزلني اني هماتين لان ما اجيت وياهه

ابتسم وصلنه وهناك لگينه عاصف منتظرنه والشر طالع من عيونه دخلت وهو يحجي

:: بت الكلب عايفتها وجايه بالكيه

عرفت باان عمو ضاربها الفرح خزرني وكلي

:: شلون بقيتي الوحدج

ما عرفت شجاوبه گلي :: فوتي

دخلت ولگيت عمه رجاء بالمطبخ تحجي من شافتني // هاي هلاجت لا انباكت ولا انساكت بعد عليش كطعت البت زين ما موتتها

دخلت شفت بيبي كاعده ع الجربايه بس شافتني // ليش ما اجيتي ويه بت عمج

= بيبي خفت

منين ؟

= من عمو عاصف مو گال لا تجن ابحدجن خفت اذا خالفت كلامه يزعل

   هزت راسها // اي حكج ياالله غسلي وروحي صبيلج غدا ولا تفكيين حلكج ويه مرت عمج

سويت مثل ما گالت وفرح صارت ما تحجي وياي نروح سكته ونرجع سكته وغزوان يجي ياخذ اخته لكن بنظرته

الي تخوفني

عمه سعاد ما اشوفها تجي بس عمه امل تجينه كل اسبوعين تلاثه الصبح وترجع العصر وعمه انصاف هماتين

وصار لاعمو عاصف ولا بهاء يتاخرون علينه ونجحت بنصف السنه وعمو عاصف وبهاء باركولي وكلولي يردوني

بعد اشد حيلي اكثر وفعلا سويت مثل ما گالو ونجحت ورحت الصف الثالث وفرح نجحت راحت للخامس

ومثل يوميه هذا روتينه وبيوم طلع بهاء من الصبح واجه عمو العصر مبين علي التعب دخل وشاف بيبي متمدده

:: السلام عليكم

عليكم السلام هله يمه

:: هله بيج شلونج يمه

اليوم تعبانه سكري مرتفع

:: ها اخذج للطبيب

لا توها رجاء ضربتني ابرتي واطتني علاج

:: وهسه اشلونج

دايخه يمه دايخه كلش

:: نامي يمه

  هسه انامن اكلك شو بهاء اتعطل طلع من غبشه

  :: ايي يمه بهاء مو الاولي التهى بالاسواق بعد شيكضى

بيبي // مو انت عاصف انت الگلت خلي بهاء شيريد ايسوي وهاي تاليها عايفك والتعب كله عليك

  :: مي خالف يمه خلي براحته توه خابرني ايگلي عدي شغل رايح يشتري بضاعه من بغداد

بيبي //. بضاعتيش مو تكول يبيع حلويات

عمي ابتسم :: لا حجيه محل جبير كل شي يبيع بي حلويات ومواد كهربائيه ومواعين

بيبي //. الله يرزقه ويفتحها بوجهه

:: عود انا جاي اريد اخذج للزياره

  يمته ؟

  :: هسه ما دام الجو حلو

ما بيه حييل

:: گلت اخذ رجاء وفرح من زمان ما زايرات

لو اتاجلها الباجر بلكت اصير زينه

:: يمه ضايج اريد اروح

بيبي //. شبيك عاصف

:: حجيه تعبان وضايج واريد اروح ازور

بيبي // روح يمه وانا اتظل يمي وجدان مو جده (باوعتلي )

هزيت راسي سالني :: ها تبقيين يم حبوبتج

= اي عمو

:: عفيه بالبطله دروحي سويلي جاي وانا اخذلي حمام

رحت للمطبخ اجه وراي وگلي :: بسرعه اصعدي صيحيلي فرح وكليلها تصيح الامها وتعالن الغرفتي

خفت شيريد من فرح اكيد صاير شي وعمي ضامه علينه وصلت دگيت الباب وهي فتحته حاچيتها = عمو عاصف رايدج

  - وين هو ؟

= بغرفته يگول خلي تنزل بسرعه وصيحي الامج

- شكو

رفعت اجتافي = شمدريني گلي روحي صيحيهن بسرعه خلي ينزلن

نزلت فرح وامها شفنا واكف بالصاله حجى بصوت ناصي :: تعالن وراي

استغربنه طلبه دخل للغرفه مالته واحنه ورا سد الباب اتنفس بعمق وحجى :: اسمعني زين الي راح اگوله ما اريد امي تعرف بي

  رجاء // شكو عاصف

:: بهاء سوا حادث بس كل شي ما بي هو خابرني

صارت رجاء تلطم على وجهها هو رد وكال :: اشش ما اسمع نفس المره سكرها مرتفع تنضرب بجلطه جاي اكول

ما بي شي وهسه رايح اله اذا تردين امشي وياي

  فرح // وانا بابا

:: وانتي هم بسرعه البسن عبيجن وانزلن سابقجن ع السياره

  رجاء وهي تبچي // عاصف احلف بروح بدر ما بي شي

:: كل شي ما بي وروح بدر بره اخليج تحجيين ويا وهسه من تمرين على امي احنه رايحين للزياره ياالله بساع ماكو

اخليجن واروح

هنه راحن هو باوعلي وكال :: لاتبچيين ما بي شي (رفع اصبعه ) ديري بالج تحچيين كدام امي ما نتاخر

باجر راجعين ديري بالج على امي ما اوصييج

 

هزيت راسي رحت للصاله وهنه نزلن وعمه رجاء راحت يم بيبي وهي اتكلها // ها عمه رايحين ما نتعطل

  - - الله وياكم

  - - مع السلامه

طلعن واني مستغربه من جبروت هذا الرجال الي اشوفه مره حنين وطيب ومره صارم والكل ايخاف منه

وراحو بيت عمي واني بقيت بالصاله خايفه على بهاء واتمنيت اكون وياهم حتى اشوفه ما اعرف ليش بجييت

على بهاء خوف علي لا يكون بي شي او ...

رجعت يم بيبي وشفتها نايمه عرفت هي كلش تعبانه ومصخنه بجييت بحركه واتمنيت يرجع بيه الوقت وما اجيت لهنا

لكن التمني شي والحقيقه شي ثاني

الحقيقه. الي قصمت ظهري وخلتني بلحظه انسانه ثانيه عايشه بس جسد بدون رووح ولازم تتعايش ويه الصار كانما ما صار