رواية أعظم خيانة الفصل السابع والعشرون 27 بقلم الزهيريه

لسنا جاهلين بما يدور حولنا

ولكن الأمر لا يستحق منا الالتفات 

ريماس/ الغلط هو يبقى غلط واي شي يترتب على الغلط أكيد ما بي نتيجه اني اعرف شغلي غلط مليون بالميه بس هذا الوضع ما چان باختياري هذا وضع نفرض عليه واني مأيسه من حياتي بيوم تتعدل لأنه حمدلله اطلع من نگره وادخل بنگره ثانيه يعني اني بعدني ما خلصانه من ابو شوارب وگعت ببيان ويوم آجى الفجر هو چان يسالني على رحاب شنو المغزى ما اعرف وشيريد منها وشلون عرف هي چانت ويايه معقوله ام رحاب اعترفت علينه هاي الافكار كلها مرت بمخيلتي واني احچي ويا وبعدين گلت ويا نفسي خاف يريد يبوگ لساني بس فاجئني من گال انتي زوجتي بصراحه نسطرت بس ما صدگته جاوبته / عجيبه ساعه اني مو زينه وساعه اني زوجتك هاي الحچي ما مترابط ابد

بيان / وانتي مصوره مزوجچ على سواد عيونچ لا حبابه انتي واهمه تخلص المشكله واطلگچ 

ريماس/ بس گلي شتريد مني شسويتلك 

بيان / انتي مصوره من شفتچ وبالمستشفى وتعرفت عليچ چان صدفه لا حبيبتي انتي واهمه اني أصلاً چنت أدور عليچ وچنت معمم صورچ وين ما يشوفوچ يبلغوني لهذا لقائي بيچ بالمستشفى لانه امن المستشفى بلغوني انه انتي چنتي دائماً تراجعين ويه مريضه بالمستشفى لهذا اجيت وتعرفت عليچ 

ريماس/ظليت شلون واحد وضربني على راسي 

گتله/ يعني انت حتى تعارفك بيه چنت مخططله بس گلي ليش وشلون عرفتني ودورت عليه 

وهو چان گاعد على فراشي گام واجى قريب عليه وظل يباوع بوجهي مباشرةً وگال 

بيان / انتي شلون ما اعرفچ غير حافظ وجهچ عن ظهر قلب شلون انسى الي چانت نايمه بحضن عمي وبعدهاندفن عمي بالنجف بسببها 

ريماس/ عمك منو اني ما اعرف كل احد من طرفك 

بيان / خطيه اني ما مقهور غير بس على عمي مات وما عرف انتي شنو من مزبله مات وما عرف الي حبها وچان يريد يزوجها الشباب برصيد تركبها مثل الراوتر كل الشباب تكنك عليها ومات ما يعرف اسمچ الحقيقي 

ريماس/ صارلك ساعه تحچي واني ما اعرف انت على شنو تحچي 

وبيان طلع موبايله من جيبه وظل يگلب وبعدها شوفني صوره لو ضاربني على عيوني وصايره عميه ولا مشوفني الصوره رجعتني تقريباً 9 اشهر صوره اني ومهند من چنت ويا بالسياره واني منطيه ظهري لمهند بحيث ظهري على صدر مهند وهو چان ايد لازم بيها الموبايل ويصور وايده الثانيه مخليها على صدري 

بحيث بقيت ساكته ما اعرف اجاوبه وهو گال 

بيان / اصور عرفتي هذا واحد من ضحاياچ والله اليعلم كم ضحيه راح من وره وحده ساقطه مثلچ هسه عرفتي ليش چنت ادور عليچ شوفي شگد تردين تنكرين معرفتچ بام رحاب صدگيني ما راح تضرين بس نفسچ ابقي غطي عليها لما الله يگلچ بس احنه باقين ننبش وراكم وهااااا للامانه هذا الي نص وجهه شوارب رصدته الكاميرات واخذنه صورة شكله الزفر وراح نعمم صوره على السيطرات وشوفي شلون راح نجيبه وخلي يدخل يم مكافحة الإجرام وربچ إذا ما خلوا يعترف بدقيقتين گولي گال بيان الي يدخل يم مكافحة الإجرام ما يطلع صاحي واكيد راح يجيب اسمج وساعتها خلي نشوف شنو راح سوين خلي في بالچ ماكو جريمه كامله بس من انتي تعترفين هذا راح يخليچ ضحيه بس إذا هو اعترف عليچ راح صيرين شريكه وياهم 

ريماس/هو اني نسطرت من شفت صورتي ويه مهند لهذا بقيت ساكته ما اعرف شنو اجاوبه على كلامه وهو هم عافني وطلع بقيت اضرب أخماس بأسداس ظليت الوب اروح للمطبخ وارجع للحمام واغسل بوجهي وادعي عسى يكون هذا حلم 

وما اعرف اشگد مر وقت واجتي ام زهراء وشافتني گاعده وصافنه صبحت عليه وبيده صينيه بيها كوبين چاي وخبز وجبن وبيض خلتهن بالگاع وهي تگلي 

ام زهراء/ الصفنه مو الچ للزمال شبيچ صافنه على الحايط الظاهر اللون ما عجبچ 

ريماس/ نسوي أشياء ما نعرف شنو نهايتها يعني بيان اليوم صدمني چنت متوقعه علاقتي بأي شخص ما تنكشف بس بيان اليوم جاب صورة واحد اني چنت ويا علاقه شلون جاب الصوره ما اعرف 

ام زهراء/ منو بيان وشنو يشتغل 

ريماس / بيان ضابط 

ام زهراء/ والله انتي على نيتچ آكيد يگدر كل شي يجيب طالما ضابط مو بس صوره اكو شي يخفى على الحكومه 

ريماس/ المشكله مو هنا المشكله يگول اني خطبتچ من عمچ وعقدت عليچ واني ما ادري 

ام زهراء/ شلون انتي ما تدرين شلون تم العقد 

ريماس/ والله ما ادري 

وبعدني احچي ويه ام زهراء اندگت الباب ولكون ام زهراء عافتها مفتوحه للباب ندفعت الباب ودخل عمي احمد وهو يصيح وينكم يا اهل البيت 

وطلعت ام زهراء تهلي وترحب بي وهو دخل سلم وبس جاوبت سلامه وظل واگف لان ماكو شي يگعد عليه لهذا راحت ام زهراء جابت كرسي من بيتهم وگلاص چاي وگعدت وبده عمي الكلام 

احمد / شوفي ريماس انتي وضعچ خطر حالياً لانه ما نعرف شنو راح يصير وحتى تكونين بآمان أتبرع الضابط بيان انه يزوجچ فتره إلى ما يخلص الظرف الي انتي بي بعدها يطلگچ 

ريماس/ وانت منو گلك اني وضعي مو زين واحتاج حماية ما اريد احد يحميني اني وضعي زين وگاعده في بيتي 

احمد / شلون وضعچ زين انتي هسه معروفه للشرطه لهذا ما يبقوچ عايشه ابد توقعي على اي لحظه يدخلون للبيت ويصفوچ عد يم الضابط بيان امان وهو الولد لازم ياخذچ يمه لانه انتي تعرفين ليش على التصوير الي يمكم اله 

ريماس/ هااااا يعني هو مو متبرع يحميني هو يخاف لا يطلع التصوير يعني خايف على نفسه 

احمد / لعد تريدي يخاف عليچ هو شنو دخله بيچ والف رحمه على والديه من عقد عليچ والا اني وين اوديچ بيتي اني صاحب عائله شنو اعرض عائلتي للخطر والقتل على مود انتي چنتي تشتغلين وياهم يعني احنه ما خلصنه من سلام انوب بنته يا ربي شنو هذا الانتقام 

ام زهراء/ شوف اخويه هي طفله ماكو احد رباها ترى البنيه يمي ساكنه من هي وصغيره وهذا كله هي بي غصبن عليها لا أنتوا والزمن عليها 

احمد / اختي احنه نريد نساعدها بس هي ما ساعد نفسها شنسويلها هسه هاي اني گدامچ ما ألومها على الماضي ونگول احنه ولد اليوم بس لا تقبل تعترف عليهم ولا تنطي لزمه عليهم وربچ لما الضابط بيان وفرقد ولد اوادم ولد عشاير وما يريدون يدخلوها بالموضوع وربچ يحاولون بكل جهدهم يبعدوها عن التهمه يگولون خطيه بنيه وزحمه تدخل السجن ومستقبلها يضيع والا چان هسه هي بالسجن 

وانتي ما تعرفين السجون شنو صير بيها 

ام زهراء/ يمه ريماس كلام عمچ صح ابو المثل يگول خلي نطاطي حتى تعبر الريح سوي الي يگلچ عليه عمچ عسى الفرج قريب 

ريماس/ واخواتي شلون يبقن هيچ كل شي ما اعرف عنهن ابقى گاعده هنا عسى يجون عليه او يجيبون اخواتي إذا غيرت عنواني وين يلگوني بعد 

احمد / بنتي انتي غبيه الموضوع ما دى تستوعبي اخواتچ راحن بعد ما شوفيهن اعتبريهن ماتن شفتي بيوم الميت يرجع الله يسامحك سلام كل شي ما اگول يعني من ازوجت وحده مثل صفيه شنو چان يتوقع ومرات الله ينتقم من البشر واني هسه آمنت انه رب العالمين يطلع حوبة الميت وسلام الله انتقم من سلام بصفيه هاي حوبة امچ انوار المسكينه الي نفضحت بسببه وحتى حياتها خسرتها بسببه وما رحم عمرها وصغر سنها وهي طفله يشهد ربي انوار چانت اشرف من الشرف هاي طلعت حوبتها ورجع رب العالمين انتقم 

من صفيه شلون شمرتچ بنص عصابه وشوفي ربچ شگد عادل شلون قدمتچ ضحيه الله خله اطفالها يلاگون المصير الي رادتچ انتي تلاگينه بعد لا تلتفتين وراچ فكري بنفسچ وفكري شلون طلعين من المصيبه الي انتي بيها 

ريماس/ حاضر عمي راح انتقل واعيش ويه بيان في بيته 

بيان / مرات تكون انت دى تدور على شي ويطلعلك شي مو في بالك اصلاً وبيوم عقد عمي وسام وعمه سهاد وصارت ملحمه ما ينعرف حماها من رجلها انتهت بانسحاب عمه لقاء وعصابتها الي هنه بناتها 

وراحت وياها لميس بوقتها ما انتبهت انه لميس رايحه ويه امها وبعد ما الكل نسحبت من ارض المعركه الي هي بيتنه انتبهت على عدم وجود لميس تخبلت اتصلت بيها بس ردت گتلها / انتي وين 

لميس / طلعت من يمك البيت الي ما يحترم امي ما ابقى بي تريدني تعال طلعني اني وامي بيت وحدنه 

بيان / واني شنو مزوج امچ حتى احير بيها خطيه مسويه جو لروحچ حبابه سويتي فضل عليه من السما للگاع من طلعتي من البيت لانه إني اليوم خطبت وكلها ايام واجيت زوجتي بس سبحان الله الايام دول دنيا شلون افترت عليچ وصار بيچ الي سويتي بميقات هم زوجتيني من طلعت ميقات من صار زعل بيني وبين ميقات وهاي زوجتي الجديده هم انتي بعدچ على ذمتي وراح ازوجها شوفي اياچ وبالچ ترجعين والله اخليچ تندمين على عمرچ 

ورادت تحچي بس ما انطيتها مجال غلقت الخط بوجهه وگعدت اباوع على التسجيل مال الكاميرات الي دزه الي فرقد واكبر صدمه چانت الي من شفت أغاريد اختي صح ضعفانه هواي بس متاكد هاي أغاريد اني ما غلطان گد ما چنت أتفرج على التسجيلات ما انتبهت غير صار الفجر بس شنو ارجف معقوله ومره اگول هاي مستحيل تكون هاي أغاريد وإحساسي يأكدلي هاي أغاريد 

وبس سبحت وبدلت وطلعت گلت ماكو غير ريماس اسألها لانه چانت وياها يعني تعرفها لهذا رحت للمستشفى عبالي ريماس بالمستشفى بسّ تفاجأت انه طالعه رجعت رحت على بيتها بس ماكو نتيجه ما اعترفت وخلاص الصبح چان طلع لهذا بوجهي رحت لدوامي واثناء ما أني بالدوام اتصل بيه فرقد وصعقني بخبر من گال 

فرقد / كل العالم يكون صباحها عادي إلا حظي الأغبر اليوم أتصلوا عليه آلفجر گالوا لاگين ام رحاب زالگه بحمام السجن وراسها مضروب بالحايط وميته 

وهسه انقلت للطب العدلي نشوف زالگه ولو جايه عليها صابونه ومزحلگتها 

بيان / لا ما زالگه هاي همه صفوها 

فرقد / اكيد كل الي نكشفوا للشرطه راح يصفون هسه ام رحاب وقبلها چانوا يريدون يصفون ريماس 

اني البارحه من دزيتلك التسجيلات الكاميرات اكو لقطات لواحد شواربه ثخينه وهو چان ينقل بريماس من مكان لمكان هو صورته ظهرت بوضوح واكو بنيه ضعيفه هم وجهه چان واضح والبنات الصغار اخوات ريماس هم كذلك وجوهن چانت واضحه للكاميرات اني حالياً راح اعمم صورهم على السيطرات والمستشفيات وكل دوائر الدوله بس اذكر كلامي عدل كل الأشخاص الي ظهروا بالكاميرات راح يصفون ونمسح ايدنه بالحايط وهسه شوف بابا هاي عصابات دوليه منظمه ما ينطون اي دليل عليهم 

بيان / ادري احنه شنو دى نحفر بالصخر 

فرقد / همه لو اغبياء چان ما بقوا يصولون ويجولون بالعراق هسه شوف ما تخبئه الليالي تظهره الايام 

بيان / تهسترت يعني شنو ما راح نوصل لشي يا ربي عبالك ندور بدائره فارغه لانه احس كل شي ما راح نوصل 

كملت دوامي عادي ومر تقريباً يومين وبلغني احمد انه شوكت اريد يجيب ريماس يمي ووين يجيبها 

جاوبته / والله اني ساكن في مزرعه بأطراف بغداد راح ادزلك العنوان برساله وجيبها انت واني اوصي ابويه وبيبي عليها خاف من جيبها اني ما موجود 

احمد / إذا الله خلانه من اهل باچر ان شاء الله باچر الصبح اجيبها 

بيان / ان شاء الله 

وغلقت الخط ويا ونزلت جوه وابويه وبيبي گاعدين بالصاله يتفرجون على التلفزيون وما اعرف همه شگد يتفرجون على الاخبار وبعدها يتفرجون على مسلسل باب الحاره شگد يعيدون بي المهم گعدت وظليت احوس اريد مقدمه لبقه حتى اطرح الموضوع عليهم بس شلون ما اعرف اخيرها طلع معتز في باب الحاره دى يزوج على مرته وبيبي في حين متفرجه على المسلسل 100 مره وكل مره تعترض على زواج معتز وماكو فايده إني استغليتها فرصه وطرحت الموضوع 

گتله لابويه / يابه باچر راح يجي واحد يجيب ويه بنيه هاي البنيه زوجتي وهذا الي وياها عمها 

بيبي / عزه بعينك بيان شلون تزوج على بنت عمك وهي حبله منك 

سامي / بيان انت صاير عندك الزواج من بنات الناس لعبه وهاي وين لگيتها وتزوجتها شو لا حچت ولا گلت حتى نروح نخطبها الك نتعرف على آهلها منين 

بيان / يابه زواجي صار فجاءه ما مخططله 

بيبي / هاي شنو تزوج هيچ وتاخذ واحد من زوجته إلا گحبه 

بيان / هو اني تزوجت گحبه حمدلله الشريفات الي زوجتهن كل وحده سوي بيه دگه اكبر گحبه ما سويها 

سامي / يعني آفتهم من كلامك بيان انه انت مزوج وحده طالعه من الطريق 

بيان / يابه رحمه على اهلك شنو طالعه من الطريق كل ما هنالك اني زوجتها سكته حتى لميس لا تعرف وتروح تخربها عليه مثل يوم زواج عمي وسام وعمه سهاد شفت لقاء وبناتها شسون 

سامي / اوف يا بيان اريد اشوف شنو المصيبه من زواجك هذا 

بيبي / اني ما اريدها تدخل بيتي فهمت 

بيان / يعني شنو ما تريدين اعيش وياكم اطردوني 

بيبي / اني گلت زوجتك ما گلت انت مستحيل تجي زوجتك هنا وتحرگ گلب لميس 

بيان / والله اني بنت ابنچ ما أريدها وانتوا تعرفون هذا الشي وتعرفون شلون تخطط هي امها وبكل الاحوال لميس باقيه على ذمتي ما باقيه اني مزوج وبعيني بيبي هسه اگوم اجمع ملابسي وتدللين بعد ما شوفوني ابد 

ومن گمت ودى اطلع من باب الصاله وبيبي اصلاً بيها طبيعه دائماً تگعد على القنفه الي قريب على باب الصاله لهذا چلبت بالتشيرت مالتي وهي تگلي 

بيبي / ولك وتگدر تعوف حبوبتك وانت من صغير يمها وربيت على ايدها وشلون من اموت منو يشيل تابوتي 

بيان / دنگت على أيدها وبستها وبست راسها 

وگتلها / بيبي من عمري على عمرچ انتي مو بيبتي انتي امي بس انتي ما تردين شوفين زوجتي شسوي اطلع من يمچ حتى لايظل على خاطرچ مني 

بيبي / ولك هو البيت يحله من غيرك انت الروح خلي تجي مريتك وخليها بعيوني هي حلوه 

بيان / هي حلوه والله بس صار وياها حادث وجهه مورم ان شالله يروح الورم وشوفيها شلون حلوه 

بيبي / بعد حبوبتك إذا انت قانع بيها هاي هيه القاضي راضي المفتي شعليه 

بيان / بست ايدها وگتلها / الله يبارك بيچ 

وعفتهم وصعدت فوگ واني اگول بگلبي يا ترى شنو موقفكم من تعرفون هاي البنيه هي چانت السبب الرئيسي بوفاة عمي مهند 

دخلت غرفتي واتصلت بفرقد وهو كل عاده ما رد عفته وما يقارب الساعه 12 بالليل اتصل بيه 

فرقد / اگلك بيان ليش ما تجي تعيش ويايه لانه حتى إذا ماكو شي تتصل 

بيان / بصراحه سيدي عندي موضوع أريد افتحه وياك بس ما اعرف منين ابدي 

فرقد/ بس لا راح صارحني بحبك اليه ترى اني مرتبط 

بيان / لا سيدي يا حب احنه على المصايب إلي نشوفها مو زين من عدنه ما نتخبل 

فرقد/ بيان إذا الموضوع يخص الشغله الي احنه دى نشتغل بيها احچي إذا ما يخصها أنصحك روح بول ونام احسلك 

بيان / بصراحه يخصها بس عندي سؤال سيدي التقرير الأولي لام رحاب شنو جان 

فرقد/ والله هو مو تقرير لانه بعدهم احنه اليوم سلمناهم الجثه بس ابن خالتي وهو من ضمن الي موجودين بالطب العدلي يگول هاي مضروبه اكثر من ضربه بشي صلب يعني مثل ما گلت راح يصفوهم واكيد الدور راح يرجع على ريماس 

شكرا لزيارتكم عالم روايات سكيرهوم