رواية فصلية الضابط الفصل السابع والعشرون بقلم زينب نور
.. وهل يحق لي ان احلم كما اريد واتمنى
.......... دخلنه بمنطقه مبينه راقيه من البنايات ومجمعات وشوارع نظيفه
اباوع وكف السيارة كدام مبنى جبير وطلع موبايله يتصل بأحد من اصدقائه اشوفه ويوصف المكان اله ولطرف الثاني يحجي ويا ما افهم شدايصير بقينه واكفين فتره طويله هو اشوفه متوتر يهز برجله بحركه سريعه وكل اشويه يلتفت ايباوعلي خطف
وبأصابيعه يضرب بالاستيرن مال قلق
طكت حوصلتي وسئلته
ندى :- ممكن اعرف وين جايبني وارث وليش احس صاير شي كولي فهمني ترا القلق ولتفكير تلف اعصابي
باوعلي ودار وجه بنضره سريعه احسه ميخلي عينه بعيني وگالي
وارث :- ماكو شي بس راح نبقى هنا شكم يوم ومنتظر صديقي يجي ينطيني المفتاح مال الشقه عنده
ندى :- وليش جايبني لشقه وعفنه البيت والله گلبي ما مطمئن اكيد صاير شي وشي جبير همين
سكتت لما
اذكرت على اساس امس جان موعد محكمة حسام وتقي طار عقلي شلون نسيت اني
ندى :- وارث امس محكمة حسام وتقي صح
ساكت ميجاوبني داير وجه للجهه الثانيه ميريد ايجاوبني
ندى :- احجي وياك باوعلي امس موعد محكمتهم واكيد تعرف شنو الحكم حاجيني رد عليه هاي اشبيك حسام انحكم اعدام موو وارث وارث
خلي اخابر ابويه انطيني موبايلك الله يخليك بس اسمع اخبارهم والله ما احجي شي ثاني واني كاعده يمك
كمت ابجي بصوت عالي
التفت عليه وعاط
وارث:- هشششش كافي ما اسمعلج صوت رحي ما متحملها ترا
ندى :- بس حاجيني كولي شصار بالمحكمه الله يخليك گلبي راح يوكف كولي سجن مؤبد لو اعدام
عافني افرفح و نزل ايخابر
ابتعد من السياره حاولت افتحه اريد انزل منها قاقفلها متنفتح
ضليت منزله راسي يم رجليه وابجي بخنگه
شويه وطبكت سيارة بصف سيارتنه باوعت شفت نزل ولد شاب بعمر وارث اتسالمو هو وارث وبقو يسولفون شويه وطلع المفاتيح ونطاهن اله
وسلم علي ورجع صعد سيارته وراح
و وارث اجه صعد مشينه مسافه ليكدام ونزل دار فتحلي الباب ونزلني لزم ايدي ويمشي دخلنه البنايه جبيره صعدنه لطابق الثالث وكفنه كدام باب شقه فتح الباب ودخلني گالي
وارث :- هسه راجعلج انتظريني
وسد الباب ونزل واني بقيت الوحدي اباوع الشقه اشوفها امرتبه يعني عايش بيها احد كلشي نظيف ومرتب مالي خلك اكوم اشوفها زين ضليت گاعده و افكر شصار امس بالمحكمه اكيد امس ابويه وعمامي جاين البغداد حاضرين محكمتهم ماعندي غير البجي ولدموع
انتظر وارث يجي ما بيه اكوم ضليت بكعدتي مرتجيه على التخم وصافنه مره ابجي ومره اصفن
تأخر يله صعد وارث شافني بعدني بعبايتي وكاعده ابجي
رفعت راسي اله شفته واكف ويباوعلي كمت رحت يمه بدون كلشي خليت راسي على صدره ولزمت قميصه بثنين اديه جنت محتاجه حضن حتى اذا ايجاملني المهم احس اكو بشر ايواسيني ايطبطب على ضهري ايطمني احس نفسي ابد مو بخير وجع بگلبي وروحي وشعو الخوف محتلني غمضت اعيوني
وحضنته حيل ونفجرت ابجي بعبره ولشهكه تطلع من نص گلبي
هو هم لف ادي على ضهري وعصرني علي ويطبطب على ضهري بحنيه ويبوس ابراسي
وارث:- هششش ماكو شي لا تخافين رفعي راسج باوعيلي
رفع راسي يأديه يمسح بدموعي رفعت اعيوني اباوع بعيونه ودموعي تنزل
ندى :- لاا اكو شي لا تضم عليه وارث بس كولي حسام شنو حكمه اني اعرف شنو بس اريد اتأكد
وارث:- احمم شو تعالي بألاول اكعدي هنا واشربي مي وبعدين راح اكولج وتعرفين كلشي :
اخذاني كعدني على القنفه وراح جابلي ماي من المطبخ شربني ورش بأيده على وجهي گمزت جان بارد شفته ابتسم لان گمزت
نشفت وجهي بعباتي ولزمت ايده بتوسل
ندى :- يله اكعد سولفلي هسه شصار امس وليش جبتني لهنا
كعد بصفي ودارني علي صار مقابيلي رفع راسه ومسح بوجه بحيره رجع باوعلي ايحاول يحجي بس ميكدر
وارث:- احمم
ندى :- دحجي عاد وارث كطعت گلبي والله انطق وفضها
وارث:- شحجي متكوليلي هو صح امس جان موعد المحكه وجابوهم بس اني ما رحت بقيت بشغلي
وعرفت باخوج حكمو بس ابن عمج بعده تأجلت محكمته بعدها الادله ما كامله
ندى :- وشنو جان حكم حسام
اباوعله اريده ينطق گلبي خلص
وارث :- شوفي ندى انتي لا تخافين اني اتنازلت عنه وراح احاول تنعاد الجلسه يعني مووشي اكيد
ندى :- يعني شنوو
وارث :- امس انحكم بجريمتين اول جريمه الي هيه قتل ضرغام انحكم اعدام
وثاني حكم لان حاول يقتلني انحكم 7 سجن سنوات
لطمت على وجهي من حرارة گلبي نزلت كعدت بالگاع الطم على صدري بحرگه
ندى :- يمه ولج يمممه الحكيلي حسام راح يعدمو
نزل يمي لزم اديه ادفع بي وصرخ
خلى ايده على حلكي يسكت بيه ولثانيه حاضني
ندى :- عوفني وخر عني انتو سبب دمار حياته ولكم ليش حاربتو بس لان حب بتكم شسوه مدكلولي حاله حال العالم حباها وراد يزوجها ما لعب عليها وعافها بس انتو خليتو صار مجرم انتو ضغطتم علي وستفزيتو برند حبيبة گلبه
هو ايحاول ايسكتني بس ادفع بايده عني
باوعتله بغضب كارهته
ندى :- انت ليش جبتني لهنا خاف ياخذوني اهلي مووو
زييين اني شنو ذنبي جبتوني فصليه و كل هل عذاب المريت بي الخاطره بس حتى تتنازلون عنه تالي ينعدم ليييش ولكم ليييش
وهو حتى من حاول يقتلك بس لان اذيتني وضربتني بدن ذنب بس اتريد اتفرغ غضبك بيه لان ابن اخوك نكس ومخلي عينه عليه لازم اني الاتعاقب
وهو من شاف حال اخته اشلونه بالمستشفى ما اتحمل انتقم من عندك وانت ما قصرت سويت عندي عجز بالقلب
شوف خلي اكولك ترا اذا انعدم حسام اموت نفسي ورا وكول ما كالت
جان يباوعلي وساكت حاير شيحجي وياي ما انطي فرصه يحجي اصلاً احجي وأرجف
وارث :- كاافي مو كتلج راح اتنازلت عنه وراح احاول اساعده الخاطرج بس اهدئي موزين على گلبج يتعب
ندى:- لا تسوي نفسك خايف عليه وخر عني
كمت من عنده دخلت للغرفه وطبگت الباب بسرعه ونزعت عباتي وفتحت حجابي كعدت افكر شلونهم اهلي هسه بعد ما انحكم حسام بقيت بمكاني لحد اليل ما طلعت بعد من الغرفه وهو ما دخل عليه سمعت صوت طبكت الباب عرفته طلع گمت اريد اطلع بس لزمتني الدوخه ولعبت نفسي ركضت للحمام بسرعه اتقيئت طلعت روحي رجعت كوه للغرفه اتمددت على السرير وبدون ما احس ابسرعه غفيت ما اعرف شكد وحسيت انشال الغطى عني اشتميت عطره لعبة نفسي سديت خشمي ودفنت راسي بالمخده حسيته نام وراي وتقرب عليه لف ايده على بطني وطبع بوسه جوا أذاني گزبر جلدي دفعته وبعدت نفسي عنه واني دايره وجهي كورة نفسي سمعته يذب حسرات ودار نام على ضهره گالي
وارث:- لا تحجين وياي ابقي بزعلج بس كومي اتعشي جبتلج عشا
ماجاوبته بس صدك حسيت نفسي جوعانه
رجع گال
وارث :- كومي ندى لا ترجعين تنامين جوعانه وحته تاخذين علاجج
سكت شويه ورجع گال مبين صوته ممزوج بين العصبيه ولحنيه
وارث :-لج مو احجي وياج كومي ابسرعه يله لا تخليني تطلع اخبالاتي بهل ليل احسلج
احس نفسي كارهته وكارها وجوده يمي وحته ريحته تلعب نفسي منها
كفيت الغطى
وگمت بدون ما احجي ويا
رحت للمطبخ شفت الاكل مخلي على الميز رحت غسلت ورجعت اكل بس كوه احس نفسي جوعانه بس ما اشتهي ما اعرف جوز من القهر
مرت الايام على هذا النمط لا احجي ويا وارث ولا هو يضغط عليه مخليني براحتي بس بليل تجمعنا غرفة النوم جابلي ملابس جديده مال بيت و مال طلعه جايبلي والوان حلوات نازكات عجبني ويسوك حته اطبخ بالبيت ومرات يجيب اكل جاهز يخلي بالمطبخ ويروح يسبح ويطلع اينام حتى ما عنده وقت يكعد وياي
احسه مشغول و تعبان
واني مليت من الحبسه حته ماكو طرمه اطلع بيها ولشباك عالشارع صاير ما اكد افتحه ميقبل ما اعرف اي شي عن العالم ولا احد يعرف اني هنا عبالك بسجن بس افتح التلفزيون اتفرج علي هو مساعدني اطلع من الملل افتح التلفاز واتفرج مسلسلات لوما هو مخلصتها مناحه وارث يطلع من الصبح ما يرجع اله تالي اليل بس اينام هنا ويطلع الصبح قبل لا اكعد
ومن يطلع يقفل الشقه عليه
واخلص اكثر وقتي بالنوم صايره اربعه وعشرين ساعه بفراشي ولكسل محتل كل جسمي ونفسي من اي شي تلعب وصايره احب اليمون ولملح كل يومين اوصي يجيبلي وكل مره يكولي
وارث:- شنو سالفتج ويا اليمون ترا كثرته موزينه يمرض معتدج كثرته اتسوي عندج قرحه
اضوج من يكولي هيج ارد علي
ندى :- وانت شعليك هذا الشي ميخصك افتهمت هي معدتي مو معدتك
واحب استقزه بحركاتي اگلب عيوني واعوفه واروح
اشوفه ايضوج ويهز ايده ويردد
وارث:- اخبال الخبلج عود انصحها عبالي ادميه المسودنه
فديوم جنت كاعده على التلفزيون اشاهد مسلسل باب الحاره متابعته كل يوم اشوفه طلعت لطفيه مرت عصام حامل وعصام فرحان بيها وأجوائهم تخبل اندمج وياهم من اتابعهم
تخيلت نفسي بيوم من الايام اصير حامل وهيج وارث يفرح واني اصير أم
بس خابت أمالي من تذكرت اني ميصير اصير حامل
انفتح الباب ودخل وارث
باوعلي وبتسم اتقرب عليه كعد بصفي كعدت عدلت نفسي كفشتي صايره شكبرها من النوم شعري مخبوص خبص كد ما احوس
وارث:- شلونها الخبله
ندى:- زينه
وارث:- مبين زينه من وجهج صاير كوم لحم هلكده
ويأشر بأيده عود جبير
باوعت علي عاقجه وجهي وعيبت علي عاوجه حلكي اقلد علي هلكده
ضحك وكل جسمه يهتز من الضحك وجه صار احمر
وارث:- بله عيديها بروح اهلج شلون شلون احجي اني
ندى :- والله الك خلك اني وين وانت وين وبعدين على شنو تعيب عليه انت شايف وجهك بالمرايه اصلاً تشبه ابو جودت الي بمسلسل باب الحاره
وهو عبالك احجي نكته اله يضحك من كل گلبه كام يكح اختنك
ابتسمت على ضحكته وشكله شكد حلو وهو يضحك
عفته يضحك وكمت اريد اروح للحمام سحبني من ايدي وكعني بحضنه وخلى راسه برگبتي يشم بيها بهيام مغمض اعيونه كزبر جلدي من الجكجكه مال لحيته دفعته
رفع راسه باوعلي خلى ايده ورا راسي لازمه مثبته وقرب راسه باسني بقوه وبلهفه طول بالبوسه لعبت نفسي كلما احاول ابعد عنه يثبتني اكثر طلعت روحي دفعته بكل قوتي وطفرت ركضت للحمام سديت الباب عليه احس معدتي طلعت عيوني نطت ويجرن دموع من كد الضغط اسمعه صوته وهو يدك على باب الحمام
وارث :- هسه ليش قفلتي الباب دفتحي خلي اشوفج شبيج افتحي عاااد
نشفت وجهي وفتحت الباب طلعت باوعلي حضن وجهي بأثنين اديه
وارث :- شجاج بويه وجهج اصفر خاف حسدتج لان سمنانه وصايره حلوه
باوعت علي صفح ومشيت وهو يمشي وراي وعطره ترس خشمي التفتت علي
ندى :- الله يخليك وارث خليك بعيد عني ما احب ريحتك تلعب نفسي من عندك
اشوفه وسع اعيونه بصدمه ورجع خزرني
وارث :- تلعب نفسج من عندي يعني تقيئتي من قربي الج
اتقرب اكثر عليه يحجي بعصبيه
وارث :- تلعب نفسج من عندي يعني تقيئتي من قربي الج
اتقرب اكثر عليه يحجي بعصبيه
رجعت ليوره خفت من ردة فعله
ندى:- لا لا شبيك موهيج قصدي
بس اني لعبت نفسي من عطرك
ما اعرف ليش
خزرني وابتعد من عندي مزعوج
شفته اخذ اجهزته ومفتاح السياره وطلع
ما هتميت اله المهم ابتعد عني صايره ما اتقبل ريحته ابد
فكرت عود اني ليش هيج صاير وياي اني الي جنت احب ريحته وعطره هسه كلشي عكس ما اعرف ليش
احس باوجاع عندي اعراض للدوره الشهريه بس ماكو
كعدت احسب الموعدها واتذكر اشوكت اخر مره
اتفاجئت صار شهر وعشرة ايام ومنازله
يعنيييي معقوله حامل
اتذكرت زهور من صارت حامل نفس الاعراض صارت عدها هم اتاخرت شهريتها وجانت تشتهي اشيا حامضه مثلي وتدمن عليهن
حسيت بشعور حلو نسمة فرح مرت عليه
بس نفس الحضه خفت شلون حامل واني موزين عليه
بس حابه اجرب شعور الامومه ويكون عندي طفل من وارث ويكون يشبهه
قررت ما اكول الوارث اعرف ميبقي اذا عرف بيه حامل
بس اشلون اتأكد من نفسي
اسبوع اني عايشه بأمل كلش حلو
مافكرت بصحتي اشرب علاجي طبيعي كل يوم وصارلي واهس أكل حتى خاف صدك اني حامل يتغذى طفلي
وصارلي واهس الكلشي ارتب نفسي وكل يوم اوكف كدام المرايه اتأمل ابطني وانفخها واقوس ضهري ليوره ابرز بطني ليكدام واخلي ايدي على ضهري وايد الثانيه على بطني واشوف بطني جبيره واضحك بواهس اكول يجي يوم وهيج تكبر بطني
حسيت بصوت المفتاح الباب انفتح ودخل واىث بسرعه عدلت نفسي اكول ابداخلي شعجب اليوم راجع من وقت مو من عوايده
دخل شايل مسواك شفته ورحت يمه اخذ من ايده المسواك بس بعدها الابتسامه على وجهي
هو لاحظ هالشي سلم عليه وانطاني العلاليك اخذتهم من ايده ورحت للمطبخ كدامه وهو يمشي وراي
يكولي
وارث:- يا الله اليوم مبين الخبالات رايحات من بيتنه
عرفته شيقصد ابتسمت ورديت علي
ندى:- اي ضيفتهن چاي وكعك ورجعن لهلهن ههههههه
درت وجهي اباوعله شو هذا ذايب فدمره مايل راسه مبتسم وعاض شفته ايباوعلي بتأمل وجان قريب من عندي كلش احس نفسي مشتاقتله صار اسبوع شايل خشمه وميحجي وياي
بادرت اني وتقربت من عنده رفعت نفسي وبسته بخده
وهو عبالك انطيته اشاره
ماصدك اخذا الواحس يحضن ويبوس بيه بلهفه عبالك جنت ما اعرف وين
وارث:- خوب گوليلي اريد حضن وبوس وتعرفين بيه ما اقصر ادللج وداعتج
دفعته من عندي ضجت من ريحته خاف ارجع اتقيئ
حس عليه ابتعد من عندي يضحك گالي
:-راح اسبح وارجعلج
عاض شفته ذايب ويغمزلي
اضحك على تفكيره المنحرف
طلع من الحمام دخل واكف كدام المرايه ايمشط بشعره راد ايرش عطر بس باوعلي واشرلي
:-اخلي من هذا العطر لو هم ميعجب حضرتج
كوتله:- لا لتخلي ما احب اي عطر بيك.
رن موبايله شافه سوا صامت ورجعه على الميز
رجع ايرن مره ومرتين اخر مره فتح خط وحجه بانزعاج ويا الطرف الثاني
اباوعله بسرعه اتغيرت نبرة صوته وملامح وجه تدل على فدشي صاير نضرات اتشتت ايباوعلي ويباوع للفراغ
اتعمدت اتقرب اكثر حتى اسمع اخذاني الفضول
بس هو حس بيه واشرلي اجيبله ماي يشرب
كمت من يمه ضايجه اريد اعرف
رحت عالسريع جبت كوب ماي ورجعت
بعدني اباب الغرفه وسمعته يحجي بصوت خافت واكف قريب الشباك
يكول:- شوكت يعني يا يوم اعدامه
وابن عمه تقي انحكم لو بعده
احس مثل السجينه النغرزت بگلبي
وكع من ايدي الكوب وتطشر بالكاع الكزاز
كل جسمي رجف حس عليه باوعلي سد الموبايل واجاني بلهفه
اني تخبلت يعني انعدم حسام ولك كولي وارث انعدم حسام جذب عليه وكولي لاااا كمت الطم على وجهي واصرخ بهستيريا
فرفحت روحي
احس بوجع بگلبي قاتل ورجليه ميشيلني بعد كعدت بالكاع ارفس فتحت حلكي اسحب بالهوى اريد اشبع منه ماكو شفت وراث كعد يمي مخبوص يصيح
:-لج خلي نفتهم شنو السالفه راح اتموتين ندى ندى احجي وياج
بديت افصل عن الواقع وصوته صار بعيد عني وقبل لا اغمض اعيوني شفته رفعني من الكاع وفصلت عن واقعي المرير
وجنت اتمنى بعد ما افتح اعيوني
بس مثل كل اصحى
فتحت اعيوني شفت وارث وهناء واكفين ايسولفون
انييت بوجع حسو عليه واجوني
رجعت غمضت اعيوني بثگل وباوعتله
اشوفه فرحان فتحت اعيوني
ايبوس بوجهي ولازم ايدي يعصر بيها
وهناء واكفه بالجهه الثانيه اتحمدتلي على السلامه ما اكدر احجي احس بتعب
اذكرت اخر شي قبل لا افقد رجعت اذكرت حسام انعدم لو بعده
ندى:- يعني ماات لو بعده كولي
اشوفه ايباوعلي ويذب حسرات حاير شنو ايكولي بس يتأفأف
وارث:- ندى اهدئي خلي افهمج واخوج بعده عايش
ندى:- وارث ترا سمعتك لا تضم عليه شي كولي حسام مااات موو.
ابعد بالتنفس وهو يرجعه على خشمي
ندى:- كولي وارث بس كولي حسام مات لو بعده عدل حاجييييني
وارث:- بعده والله بعده عايش بس اهدئي
ندى :- احلف بعد كول ولعباس حسام ما ميت احلف يله
وارث:- لج الله بعظمته احلفلج بي متصدكين تردين احلفلج بالعباس دخيل ابو فاضل يابه وابوفاضل اخوج بعده عايش حياً يرزق بعد شتردين صدكتي هسه لو لا
هدئت نوعاً ما من گالي هيج
بس اشوفه بعده قلق ويفتر يم راسي ايروح ويرجع ويمسح بوجه اشوفه عركان وهناء تستغفر الله
وتسولف عليه علمود اهدء وصحتي تصير احسن واني حامل موزين عليه هيج
ما اسمعها
ندى:- تاخذني اشوفه اريد اشوف حسام
باوعلي بحيره ويفتح بازرار قميصه مثل المختنك
ندى:- والله اذا ما خليتني اشوفه اله اموت نفسي
هناء:- كولي يا الله ندى بعده صحتج موزينه گلبج ما مستقر وين تردين اطلعين هسه
ندى:- اوللحد خليني اموت واخلص مواحسن ماكل يوم اموت الف موته
باوعت الوارث اشوف ردة فعله اشوفه يباوعلي بتركيز ولام شفته ليجوه عاضها
:- تاخذني مو
بجيت بعبره واحس ادموعي نزلن الصدري
:- عاد بس بس اشوفه هلمره قبل لا يعدمو شنو هل ضلم
خليت اديا على وجهي ابجي بصوت
حسيته قرب الكرسي وكعد يمي لزم ايدي بحنيه يمسح عليها
وارث:- اخذج بس بالأول صيري زينه شدي حيلج شلون يعني بهاي حالتج اخذج بأسعاف مثلاً
مسحت اعيوني ووجهي وكتله
ندى :- صرت زينه شوفني مابيه شي عادي مثل كل مره اتخربط واصير زينه بس خليني اشوفه مشتاقتله والله
وارث:- ماشي بس خلي اشوف الدكتور شيكول ويجي يجيك حالتج وشوكت اطلعج
:- يله كوم شوفه هسه
هز راسه وكام طلع
باوعت الى هناء شفته تباوعلي ومبين عليها مقهوره عليه نضرات استعطاف اشوف بعيونها
سئلته
ندى:- هناء صارلي اشكد بالمشتشفى ومن اشوكت انتي اجيتي جهالج وين عايفتهم
اتقربت كعدت على الكرسي وكالت
هناء:- البارحه اجيت خابرني وارث وكالي ماادري بيج وما جان يقبل يكول وين مخليج
عاد البارحه مو عنده خفاره طلب من عندي اجيج ابات يمج
سوده عليه شصاير بي حيل متغير
مبين حيل تعبان تعبتي نديوا تعبتي اخيي
ندى:- ليش اني ما تعبانه متشوفين وضعي شلونه المهم عوفينه من هل موضوع سولفيلي
شخباركم وسهام شنو قضيتها هم رجعت للبيت لو لا
هنا:- دشوف بيا وضع انتي وتردين تعرفين اخبار اسهيمه ليش ما تدرين بيها غير طلكها هل خاينه الحقيره شلون بعد ايباوع الخلقتها
ندى:- ها اي ادري بيها بس عبالي هم رجعوها اهلها
هناء:- لا شيرجعون منها قبل شكم يوم سمعت باخوها كاسر ايدها وحالتها يكولون ماتسر لاعدو ولا صديج
ندى:- هيه الجابتها النفسها تستاهل حفرتلي الحفره وتالي هي الوكعت بيها خليها تتحمل عواقبها بسببها اني هذا وضعي كل يوم اشوف الموت
زين الحجيه ولبنات شلونهم منو يمهم هلفتره باقي
شفتها هزت ايدها وكالت
هناء:- زينات زينات مابيهن شي انتي تدرين بيت ثائر رجعو للبيت
وسعت عيوني من الصدمه
ندى:- شنو شرجعهم وشعجب رجعو و وارث قبل يرجعون
هناء:- يمعوده صارت هوايه احداث بعدين اسولفلج من تطلعين سولفيلي انتي وارث وين جان دافنج كوليلي
زين انتي تدرين بنفسج حامل لو لا
ندى:- جنت شاكه بنفسي حامل بس ما متأكده
هناء:- طلعتي حامل وانتي موزين عليج الحمل گلبج ضعيف متتحملين
بعدنا انسولف اندك الباب ودخل وارث ورا الدكتور يسولفون بخصوص حالتي
اتحمدالي على السلامه وبده يفحص بيه شاف وضعي كال تمام يسولف عليه نفس الكليشه الي كل مره اسمعها من الدكاتره انو لازم ادير بالي على صحتي وكذا
وشلون اتصير حامل ميصير وجان لازم تنتبهون وتاخذون احتياطاتكم جنت بس اباوعله واباوع الوارث
اخير شي باوع الوارث وكال
:-شوفولكم دكتوره شاطره تنزل الجنين اذا تردون حياة الامايه لازم تستعجلون اكثر لان كلما يكبر الجنين اكثر كلما الخطوره تزيد وانتو بعد بكيفكم
سجلي علاجات ومقويات فوك كل هذا طلع عندي فقر دم حاد گلت بگلبي
:- اويلي عليج ندى شنو بعد ما صار بيج
اسمعه يكول الوارث قبل لايطلع
:- وضعها حالياً مستقر انتظر لليل اذا تريد وطلعو
راح الدكتور بعد ما هبط كل معنوياتي جان اكو شي بداخلي متمسك بطفل ما اريد انزله كلش حابه يصير عندي طفل حته اذا اموت هو يعيش ويكولون هذا ابن قطرالندى اني اول وتالي ميته المهم الطفل يعيش
رجع وارث بس احسه يريد ينفجر
منتبها الحركاته يكعد ويرجع يكوم يفتر ويطلع يشرب جگاره ويرجع حته هناء انتبهت علي كالتله
هناء:- شجاك خويه حته احنه دوختنه كول يا الله ماكوشي ماكو شي مستحيل وكلشي بأيد ربك ماتعرف الله شكاتبلنه مثل ما تكول امي منا للكوسر فرج شو تعال اكعد هل اجانه اسعد روح ويا للبيت نام وارتاح وتعال بليل اني باقيه يمها لا يضل بالك عليها
اشوفه بس يهز براسه وساكت شويه وكال
وارث:- هناء شوفيلنه دكتوره مضبوطه
حته تاخذين ندى توكع الطفل
باوعلي احسه يريد يشوف شنو ردة فعلي
باوعتله وكتله
ندى:- لا ما انزل طفلي لو شيصير حته لو اموت ميخالف
وارث:- مو بكيفج عزيزتي اني ابو واني الي اقرر يبقى لو ينزل هذا الشي راجعلي
ندى:- من كل عقلك تحجي شنو مو بكيفي لا بكيفي طفلي هذا اني قابله اموت انت شعليك
اشوفه يستغفر الله ودار وجه الهناء
وارث:- مثل ما وصيتج هناء باجر كون ينزل الجنين ميبقى
من سمعته وعرفت مصر ينزله تخبلت
ندى:- وارث لا تكولها ما اروح ولا انزله وشتريد اتسوي سوي طفلي ما انززززله
هناء:- كولو يا الله موهيج اتفاهمو بدون عياط
باوعتلي ورجعت گالت
هناء:- شبيج ندى انتي سمعتي الدكتور شنو گال واراث من خوفه عليج هيج يريد والى ليش ينزل ابنه الصار شكم سنه يتمنى يصير عنده طفل
نزلت راسي وكمت ابجي خليت اديه على وجهي اسمعه يذب حسرات و يكول
وارث:- لاحول الله هسه والله احتاريت
يمعوده مومال اعناد ولا مال ازماط هل شي خطر على حياتج وبس خلي اسويلج العمليه وتطيبين مستعد احبلج بفريق كامل
رفعت راسي موسعه عيوني علي يحجي هيج كدام هناء اباوع الهناء صايره حمره من الضحك على سوالفه
وهو هم يضحك شافني بوضع الصدمه
كالي:- اي والله قابل مجذب عليكم قبل
ويغمزلي
ندى:- شكد متستحي
وارث:- اويلي يابه فديت اليخجل اني
• يحجي وهو عاض شفته وعيونه ذبلانه
ندى:- هاي شبيك تخبلت شهل حركات عيب اشرتله على هناء
هناء:- احمم شجاك خويه جنك استخفيت زايد خلي عندك حيى حضوري شو بايع ومخلص رجعت مراهق شنو ذايب عليمن
• تهز بيدها وتضحك
سمعنه الباب اندك باوعلي وارث اعدل حجابي زين وراح فتح الباب دخلو اسعد ومحمد سلمو عليه وكعدو جايبين وياهم غدا اجت بخشمي ريحة الدجاج لعبة نفسي من الريحه حسيت نفسي اريد اتقيئ استحيت من عدهم
أشرت الوارث اجاني
:- ها بويه شاورته اطلعو بره ما اتحمل الريحه راح اتقيئ واستحي منهم
هز راسه
راح يمهم يله ترا ميت جوع خلي نطلع نتغدا بره دفع محمد يطلع بي ومحمد يدردم ماعاجبه يطلع باوعلي كالي
محمد:- لازم غثيناج ام اعطوب ماتتحملين اشوفينه موو
ضحكت ورجعت جهاز التنفس على خشمي طلعو كلهم بقيت الوحدي بالغرفه اباوع البطني امسح بيها ومبتسمه اكول بگلبي
معقوله اني حامل واكو طفل داخل احشائي ما مصدكه حمدة الله وشكرته على كل حال صار اليل بس ما طلعني بس هناء رجعت ويا زوجها ومحمد وارث كال باجر الصبح فدمره نطلع واعرف قصده يريد ياخذني الدكتوره حته اتسويلي اجهاض فدمره
بقيت ذيج اليله كل شويه افز افكر اكول بعد ساعات
اروح الحسام اشوف قبل لا يعدمو
وراح انزل شي جنت اتمنا يصير
ليش هيج ماعندي حظ صعبات ثنينهن صعبات عليه ما اتحمل هلكد والله
صار الصبح
وكعدت عندي نشاط اريد اروح اشوف الغالي گلبي موجر على شوفته
اجو المضمدين انطوني العلاج وشالو الاجهزه عني وكلشي تمام
غيرت ملابسي ولبست عبايتي اجاني وارث لزم ايدي ونزلني صعدت السياره
باوعتله
ندى:- وين راح نروح هسه
وارث:- للبيت غير لعد وين
ندى:- شنو للبيت لا انت شوعدتني البارحه مو كلت تاخذني الحسام اشوفه
وارث:- اي بعدني عند وعدي بس غير منتظرهم يقبلون اتشوفينه لو لا
ندى:- وارث انت تضحك عليه شنو يقبلون لو لا
وارث:- عزيزتي تفهميني لو لا هذا الشي مو بكيفي ولا بأيد المحامي راح يرتب كلشي ويخليج تشوفينه
ندى:- وترا خلي يكون بعلمك ما انزل طفلي لو شيصير ترا اشرد والله وخليني حته لو اموت ويا ميخالف
باوعلي ودار وجه يسوق
وصلنه للبنايه نزلنه باوعلي سئلني
:- ها تكدرين لو اشيلج احسن
:- لا ششيلني يمعود منا عالم تباوع عيب
:- طز بالعالم واذا باوعت علينه شنو يعني مرتي وبكيفي اشيلها ابوسها مالهم دخل بيه
ابتسمت:- لا اني اصعد على كيفي واصلا مابيه شي
صدت لازمني من ايدي ويمشي على ممشاي دخلنه لشقه عبالك جنت مسافره ورجعتلها حبيتها هاي الشقه احس انتمي الها اكثر من ذاك البيت
رحت سبحت وجنت جوعانه رحت سويت چاي وسويت لفة جبن اكل بيها مرتاحه من تقييد المسشتفى وريحتها
دخل وارث
:- عاد كولي خلي اصب چاي الهذا المگرود الحاير بيج وحته النوم ماشايفه
رحت صبيتله وانطيته اله سحبني كعدني بحضنه على رجله ويشرب چاي
واني اكل بالفه وهو يشربني ويا چاي بنفس الكوب ويباوعلي مبتسم احسه مرتاح
شكد حلو هيج شعور
فتح وياي موضوع اجهاض الجنين
كبل سديته
نداى:- الله يخليك لا تفتح هل موضوع والله گلبي يكوم يوجعني اكثر عوفني براحتي اترجاك
اشوفه ما مقتنع بس ساكت لان خايف لا ترجع تنتكس حالتي
ورا ثلاث ايام يله خابر المحامي كال الوارث تكدرون ترحون تشوفو
ما صدكت من الفرحه ابجي راح اشوفه
بس كالي باجر الصبح انروح
اجاني نشاط مو طبيعي بحيث لصبح ما نمت كاعده احسب الساعات لما صار الصبح خلصت روحي
من الساعه ـ 6 ـ كمت سبحت وجهزت نفسي ولريوك جهزته وملابس وارث حضرتها اله كعدته كوه فاتح عيونه شاف الساعه كال
:- بعد وقت يمعوده
:- لا شنو بعد وقت ترا الساعه صارت بـ ـ7 ـ
كوم يله الخاطري ترا مانايمه الهسه والله الانتظار موتني
فتح عيونه موسعها شنو مانايمه وليش باقيه انتي شبيج راح تخبليني موزين عليج يا امة الاسلام موزيييين شاحجي شوصي اعتني بنفسج الخاطر الله
:- منا وهيج بس كوم يله خلصني
كوه كام يدردم عليه ويغلط
عادي ميخالف المهم كعدت وتاخذني
بالف يا علي طلعنه وصلنه للسجن من شافو وارث بملابسه العسكريه ورتبته واكو بيهم يعرفو اجو يسلمون علي ويشكرو على اشيا مسويها الهم يمدحون بي اني واكفه بس بالي يم حسام وشلون احضنه وابوسه اويلي يمه شكد مشتاقتله الانتظار موتني مليت بس اخازر بوارث وهو يرجعلي الخزره بغلط وتحلف ويأشر اغطي وجهي
لمن دخلنه بغرفة المواجه خلصت روحي
كعدت بس عيوني ادور علي و وارث ابتعد وكف بعيد عني مورث چكارته ويباوعلي
درت وجهي واشوفه من بعيد مكلبجين اديه ويا ثنين يمشون ويا منا ومنا نزلت دموعي رجف گلبي جسمي كزبر من شفت اخيي هذا الجان صديقي موبس اخويه الجان يعاملني مثل بنته ما انسه ذيج الضحكه وسوالفنه وعلاليك الحلويات يعاملني مثل الطفله شافني تفاجئ وبتسم شفت دموعه على وجه وصلني بس ما كدر يحضني بيني وبينه حاجز بس ابوس بأصابع ايده وهو يبوس بأصابع ايدي
قربت وجهي حاولت ابوسه بشفايفه بدون ما ننطق ولا حرف عيونه ودموعنه تسولف وتشرح حالنه اشوف شفايفه ترجف امسح بعيوني ما اريد ابجي اريد اشبع من عنده شوف بس دموعي حقيرات يمنعني اشوف بوضوح ضعفان حييل واكو اثار تعذيب بادي وبوجه مزينين شعره الحلو الجان يهتم بي خله اصبعه على حلكي كالي بصوته اليرجف ولعبره خانگته
حسام:- هششش اروح فدوه لدموعج لا تبجين تقهريني بيهن لا تخليني اشوفهن.......
شكرا لزيارتكم عالم روايات سكيرهوم
