رواية أعظم خيانة الفصل الثامن والعشرون 28 بقلم الزهيريه

لا يموت الظالم حتى يري الله 

المظلوم حقه يشفي قلبه 

ريماس/ كل انسان يكون يخاف من المجهول لانه ما يعرف شنو راح يصادفه واني بيوم الي اتفقت بي ويه عمي احمد ت انه اروح اسكن في بيت بيان چانت هواي اسئله تدور براسي والسؤال المهم الي أريد اجابه عليه وهو انه بيان من چان يحچي گال عمي الله يرحمه شنو مهند مات واذا مات شلون مات وليش يگول بيان بسببچ اضافةً انه هو ماخذني على بيت اهله همه اهله نفسهم يعرفون اني منو وشنو وضعي لو بيان ما گال الهم ظليت متردده 

ومن راح عمي بقينه اني 

وام زهراء گالت / خاله الفلوس مال تعمير بيت ربي يشهد ما اخذنه فلس منهن انتي يتيمه انوب ناخذ منچ الفلوس البقن يمي خليتهن بالجنطه الي عفتيها يمي بس انطيت لعمچ المستمسكات وهسه اروح اجيب الجنطه 

ريماس/ راحت ام زهراء جابت الجنطه فتحتها لگيت مستمسكات أخواني واخواتي وصفيه وابويه وحتى شهادات الوفاة مال صفيّه وابويه هم لگيتهن بقاع الجنطه لگيت سيماكارت الي انطى الي كاران طلعته وفكرت أتواصل ويه كاران لهذا طلبت من صفيه 

گتلها / خاله ولو اسوي زحمه عليچ اريد موبايل واذا ما اسوي زحمه عليچ أريده هسه لانه ما اگدر اطلع بسبب تشوه وجهي 

ام زهراء/ هسه اجيبلچ بس شسوين بي خاله المن تخابرين 

ريماس/ والله خاله اريده لانه من انهزمت اتعرفت على شخص كردي وچانت متفقه ويا إنه يطلعني خارج العراق اريد أتواصل ويا اشوف شنو سوى لانه گالي انتظري مني خبر 

وخطيه ام زهراء ما گالت باطل انطيتها من الفلوس البقن من تعمير البيت وراحت جابتلي موبايل وخليت بي السيم كارت واتصلت بكاران وهو رد عليه وبعد السلام بينّه سألته إذا يگدر يطلعني جاوبني 

كاران / بس گلي انت وين يروح تدري انت شگد اتصل عليك وانت ما يجاوب هاي الفتره الماضيه مرتين اني حصلت الك طلعه وانت ماكو موبايل مغلق 

ريماس/ هواي صارت ويايه احداث وحچيتله كل الصار ويايه 

كاران / اني گلت الك ترى انت باقي وياهم على المصلحه من يخلص دورك يخلصون عليك انت ما يفهم كلامي گتلك اني يزوجك وفي حال ما ردت يبقى ويايه أنت اطلگك واسفرك خارج عراق 

ريماس/ وكت الحچي فات بعد شوكت تگدر بعد تأمنلي طلعه خارج العراق 

راكان / انتظر مني خبر بس إترك موبايلك مفتوح حتى أتواصل وياك بس هاي الفتره مستحيل بعد شهر او اكثر أمنلك طلعه 

ريماس/ وبعد اتفاقي ويه راكان طلعت السيم كارت وخليته بالجنطه وانطيت الجنطه لام زهراء لانه البيت فارغ ما بي اي اثاث وين اخليها اضافةً انه راح اروح يم بيان خاف ياخذ الموبايل مني وكل تواصل ويه راكان ينگطع 

ام زهراء/ إذا الطلعه خارج العراق زينه الچ اطلعي لانه هذا المزوجچ فتره ويطلگچ هنا انتي المن باقيه يا خاله ومو أمان وتعالي اگلچ انتي ملابس ما عندچ اشتري الچ كم هدمه شلون هناك تبدلين 

ريماس/ والله خاله ما الي خلگ نفسي روحي انتي جيبيلي من السوگ اريد ملابس داخليه ومال بيت 

ام زهراء/ ملابس مال طلعه اني اجيبلچ من بنتي كومة ملابس عدها قابل بس خسارة فلوس 

ريماس/ عفت كل شي بيد ام زهراء هي العصر راحت جابت الي ملابس داخليه ومال بيت وجابت من الصيدليه عصارات لوجهي وهي خطيه جيب وتدهن بوجهي وجابت الي فستان من بنتها وحذاء وشال والملابس الي جابتهن الي خلتهن بجنطه من عدهم وثاني يوم اجى عمي احمد ما يقارب الساعه 8 الصبح بدلت واخذت جنطتي وحضنت ام زهراء وصدگ بچيت بحضنها لانه وحدي بهاي الدنيا وطلبت منها تگول لأبو زهراء خلي يأجر البيت والفلوس يخلوها عدهم شوكت ما اجي آخذهن منها 

وطلعت ويه عمي احمد وهو عمي اصلاً عنده سياره صعدت ويا ومشت بينه السياره وما اعرف شگد مر وقت لما وصلنه لمنطقه كلها زرع وصار گدامنه باب چبير كلش بس مفتوح عبره عمي احمد وظل يمشي لما وصلنه يم بيت والي عرفته انه هذا هو بيت بيان ظليت اتلفت ماكو بيوت بس هذا البيت 

گلت بگلبي إذا بيان هنا يكتلني ويدفني ماكو احد يدري المهم دگينه الباب مال البيت وتقريباً 10 دقايق ندگ ماكو احد طلع اخيرها اجى واحد من ورانه يطلع عمره تقريباً أربعينات فززني من گال المن تردون جاوبه عمي 

احمد / نريد بيان 

ريماس/ وهو رجع جاوب عمي انه بيان ما موجود عنده دوام بس ام سامي وابو بيان موجودين لهذا دگ الباب كلش قوي عبالك راح يفلشه وسمعنه صوت يگول اصبر ابو حارث 

وبعدها طلع رجال تقريباً نهاية الستينات شعره ابيض وهو ضعيف وظل يباوع عليه وحچى 

ابو حارث / عمي ذوله الجماعه يريدون بيان 

ريماس/ گال هيچ ابو حارث وراح وابو بيان گال تفضلوا 

دخلنه البيت چبير كلش وحلو حتى أثاثه هم حلوه ودخلنه ابو بيان لصاله وبيها وحده عجوز گعدنه 

وراح ابو بيان جاب مي وعلب عصير وخلاهن گدامنه وگعد وعمي بده الكلام 

احمد/ جبت زوجة بيان چنت راح اجيبها العصر بس والله عندي دوام منا راح اطلع من عدكم لدوامي مباشرةً 

سامي / اعذرني من الكلام الي راح اگوله وهذا مو انتقاص من قدركم لا والله بس يعني مو شغله واگفه البنيه أنت جايبها بيدك واحنه ما نعرفكم ولا اجينه خطبنه منكم والبنيه وجهه حدث ولا حرج ممكن تفهمني شلون صار الزواج 

احمد / احنه من انطينه بنتنه لبيان اشترينه رجال أما البنيه متعرضه لحادث وهيچ وجهه 

ريماس/ وبعد حديث وتعارف ما اله آي لازمه افتهمت انه بيان كل شي ما حاچي وأخيرها عمي ودعنه وراح واني بقيت گاعده بمكاني لانه ما اعرف وين اروح والحجيه گاعده وعينها عليه اخيرها من راح عمي سألتني شسمچ گتلها ريماس 

ام سامي / شني حبوبه انتي بنيه شلون يسمچ ياس 

ريماس/لا خاله اسمي ريماس مو ياس 

ام سامي / حبوبه اسمچ ثگيل گومي حبوبه عاونيني بالغده راح يأذن المومن واحنه جدرنه مو على النار گطعت بيه لميس 

ريماس/ گمت وياها واخذت جنطتي ويايه آخذتني للمطبخ وهي گعدت على الكرسي وتگلي 

ام سامي / حبوبه ابو حارث ذبح الدجاجه وام حارث نظفتها وگطعتها اني هنا منگعتها بالمي انطيها الي 

ريماس/ بگلبي گتلها إذا عائلة ابو حارث كل شي مسوين چان طبخوها وجابوها احسن هو شبقى بعد المهم انطيتها الدجاجه وظلت كل شويه روحي وتعالي وبهارات وملح ونگعي تمن وخلي الدجاجه بالفرن بگلبي گتلها گولي اطبخي بعد شنو 

ام سامي / روحي حبوبه بدلي هدومچ حتى نكمل الغده 

ريماس/ دلتني على الحمام رحت سبحت خوش سبحه لانه في بيتي ماكو لا شامبو ولا ليفه وبدلت 

ومشطت شعري وطلعت ولكوني جديده لبست شال رجعت للمطبخ بعدها الحجيه تنظف بالخضره وما كملنه غده غير ساعه 4 العصر اني هلكت جوع صبينه الغده وگعدنه ناكل اني والحجيه وابو بيان صدگ الاكل طيب والعجبني اكثر اللبن والحجيه مو شوفني اكل تمر وكل شويه اشرب لبن تگلي 

ام سامي/ هذا اللبن من الهوش مالتنه 

ريماس/ اني ما افهم شنو هوش بس المهم اللبن طيب وگد ما مخليه راسي بدولكة اللبن سمعت واحد يگول السلام عليكم بس رفعت عيني صارت عيني بعين بيان صدگ اختنگت باللبن والحجيه تگلي اسم الله شبيچ حبوبه ترى هواي لبن موجود 

نزلت الدولكه مال اللبن وبيان ما اهتم راح ذب حذائه وغسل واجى گعد ياكل ويگول لبيبيه ميت جوع على ريوگ الصبح 

اني بقيت گاعده لا ابث ولا استلم والحجيه تگلي اكلي حبوبه شبيچ كشت ايدچ ماكو احد غريب هذا رجلچ اجى 

اكلت شويه شفت ابو بيان گام اني گمت ورا ومن دى يغسل گال / بنتي شوفي الچاي كمل جيبي بعدني ما مغسله ايدي صاحت الحجيه تعالي ياس آخذي المواعين غسلت ايدي ورحت كملت نگل المواعين ورجعت جبت الجاي ودى اصب گال 

سامي / بيان اني الى هسه ما فهمت البنيه جابها عمها شنو البنيه شارده من اهلها 

بيان/ يابه شنو السالفه هي ابوها وامها متوفين وهذا عمها اخو ابوها وهو جابها بعد منين تشرد 

سامي / ما اعرف گلبي لاعب بيان إذا اكو شي گول من هسه لانه سالفت زواجك عجيبه 

بيان / يابه ترى تزوجت على سنة الله ورسوله ما نهبت كل شي ماكو 

ريماس/ عفتهم يسولفون گمت رحت للمطبخ وغسلت المواعين وظليت گاعده بالمطبخ واكو گدامي شباك يطل على الزرع گمت وگفت بالشباك وصافنه وما حسيت غير الصينيه تخلت قوي على السنك التفتت هذا بيان گال راح اصعد فوگ تعالي ورايه وعافني وراح

بيان / مرات تصير بموقف بحيث تكون مثل بلاع الموس لا تگدر تبلعه يجرحك ولا تگدر طلعه يفضحك وهذا چان وضعي من شفت تسجيل الكاميرات شفت أغاريد صح هي هواي ضعفانه بس متاكد مليون بالميه هي ولكون اني وفرقد نشتغل بنفس القضيه لازم اگله على أغاريد قبل ما ينكشف المضموم وچان خوفي من فرقد لا يعمم صورة أغاريد ومن اسم الاب والجد راح يعرف هاي اختي 

لهذا من اتصلت بي وما رد رجع هو اتصل بيه ومن بقيت استفسر منه على ام رحاب وجاوبني بعدها سألني 

فرقد / اگلك انت ليش اتصلت بيه 

بيان / بصراحه سيدي اتصلت بيك على هاي البنيه الي ظهرت بالفديو ويه ابو شوارب وأخوات ريماس 

فرقد / اي شبيها 

بيان / بصراحه سيدي احچيلك مختصر مفيد حتى ما اطول عليك وحچيتله الوضع بأختصار وانه هي اختي الي اخذتها امي وراحت 

فرقد/ تحچي صدگ انت هاي أختك وين چنتوا ما دورتوا عليها 

بيان / والله سيدي إذا اگلك شگد دورنه وما لگيناها حتى لنفوس مالتنه رحنه في حالة أغاريد إذا اجتي أجدد جنسيتها يبلغونه بس اختفت وكل اثر ما الها 

فرقد / طالما هذا الوضع مالتها يعني هاي تمشي بجنسيه مزوره بس الله يكون بعونك يعني أختك من صفحة وعمك الله يرحمه من صفحه بس اني ما اوافق رايك انه ما تعمم صورها غلطان انت بيان تعمم صورها حتى تعرف هي وين وشنو وضعها 

بيان / هذا هو سيدي انت إذا هذا رايك خلاص عمم صورها 

وانتهى الاتصال بيني وبين فرقد وچنت تعبان بحيث نمت وما حسيت غير على تنبيه الموبايل گمت سبحت وبدلت ونزلت لگيت بيبي وابويه گاعدين ودى يتريگون كعدت وياهم تريگت وكملت وقبل ما اطلع لدوامي بلغت أبويه وبيبي انه زوجتي الجديده راح يجيبها عمها وأنه يدخلوها مو يخلوها تروح 

وابويه طمني انه من يجيبها عمها يدخلها ولما اجي اني واشوفها وطلعت لدوامي ومر دوامي عادي وحدود الساعه 11 الصبح أجاني اتصال الرقم دولي رديت وچان صوت رجال مجهول گال / أنت الضابط بيان 

بيان / اي نعم اني تفضل 

المجهول / شوف احنه مبقيك تفتر وتحفر لنفسك 

بيان / يعني شنو ما فهمت وضح اكثر حتى افهم 

وبسرعه دخلت على الاعدادت وفتحت تسجيل المكالمات 

المجهول / شوف احنه عدنه بضاعه نريد نوصلها لاربيل نريد منك تصريح حتى نعبر سيطرات بغداد وبس نطلع من بغداد خلاص بعد ما النه علاقه بيك وحصتك توصلك 

بيان / غير اعرف انت منو وشنو بضاعتك يجوز ممنوعات وتريد تكربسها براسي 

المجهول / شوف تسوي الي گتلك عليه لو اخلي فديو الك ينشر وانت تعرف الفديو إذا نشر شيصير بيك الك مهله يومين إذا ما وافقت تلگى الفديو مالتك على كل المواقع 

بيان / بعدني اريد اجاوبه بس غلقه بوجهي وظليت ادگ عليه بس ماكو نغلق الخط اتصلت بفرقد ماكو كل جواب منه ما حصلت لانه موبايله يدگ وما يجاوب رحت عليه للمركز ماكو يگولون اصلاً ما اجى اليوم 

ورجعت للبيت بس شنو دمي يفور لگيت ريماس جايبها عمها ومن خلصت غده وچاي طلبت منها تجي ورايه صعدت فوگ بدلت وگعدت انتظرها سمعت باب الغرفه الي چانت بيها لميس يندگ طلعت صحت عليها انه تدخل يمي وهي اجتي دخلت واني چنت گاعد على الكرسي الي قريب على ميز التواليت وبقت بس ساكته وتباوع عليه 

گتلها/ اول شي اهلي كل شي ما گتلهم عنچ واصور انتي عرفتي لانه شفتي أبويه شنو سال گدامچ وسبق ان گتلچ وضعچ ويايه مؤقت لانه بس تخلص المشكله اطلگچ ولكون اني مستعجل اريد تخلص المشكله بسرعه تعالي اسمعي التسجيل 

اتقربت يمي وفتحت التسجيل الي سجلته لهذا الي چان يهددني بمقطع الفديو بعدين گتلها / من حچيت وياچ في بيتچ گلتي اكو تصوير الك من سويت وياچ علاقه بالموبايل گلتي في مكان امين التسجيل عد منو هذا التصوير 

ريماس/ من سمعت التهديد ظليت ساكته لانه ما اعرف شنو احچي 

بيان / اني ما اعرف انتي ليش ساكته وتغطين عليهم إذا كل ظنچ انه تغطين عليهم حتى تحمين اخواتچ فأنتي متوهمه هو انتي روحچ ما گادره تحميها انوب تحمين اخواتچ وهاااا نسيت اگلچ ترى ام رحاب صفوها البارحه لگوها بالسجن مقتوله وأكيد الدور الجاي عليچ وراح يستعجلون لانه الداخليه تحركت على ابو شوارب 

ريماس/ انصدمت من گال ام رحاب ماتت 

گتله / احلف انه ام رحاب ماتت 

بيان / اني ما احلف بس اگدر اخذچ باچر لطب العدلي وشوفيها حتى يصير عندچ يقين انه ما أكذب عليچ 

ريماس/ ظليت بس اباوع عليه وهو فاجئني من خله ايده على رگبتي ودفعني ويه الحايط وظل يخنگ بيه 

بيان / شوفي لچ روحي بالگوه متحملها مو انوب اتحملچ التصوير عند منو 

ريماس/ وگوه دفعت ايده ومن بعد ايده ظليت اگح وهو ظل يباوع عليه بعدها جاوبته / إذا اگلك ما اعرف احد منهم ما صدگني اني اعرف بس ام رحاب وربي يشهد عليه اني دخلت يمهم مجبوره واني ما چنت اعرف برامجي مفتوحه يمهم إلا بعد ما زوجتك اتصلت بيه ونهيت علاقتي بيك يله عرفت برامجي مفتوحه يمهم يم منو مفتوحه ما اعرف بس گالولي انه كل مكالمات الفديو الي چنت افتح بيها كاميرا مسجله لهذا گتلك اكو تصوير الك بسّ والقرآن يم منو ما اعرف 

بيان / هسه هذا الموضوع انتهينه منه البنيه الي چانت وياچ شنو تعرفين عليها 

ريماس/ قصدك رحاب 

بيان / ليش هي اسمها رحاب يعني بنت هاي المره الي نقتلت بالسجن عدنه 

ريماس/ لا مو بنتها 

بيان / لعد بنت منو 

ريماس/ مو أخاف احچي وتضربني 

بيان / احچي ما اضربچ إذا جاوبين على أسئلتي 

ريماس/ هي گالت اسمها أغاريد 

اريد اكمل الكلام بس سكتت 

وهو هجم عليه ويخنگ بيه ويگلي 

بيان / لا سكتين احچي كملي 

ريماس/ دفعت ايده اريد بس أتنفس وبعدها جاوبته 

والله هي گالت اسمي أغاريد وامها متوفيه وهي تشتغل قبلي ويه ام رحاب وهي كلش مريضه صاير عدها سرطان بالعظام ودى تاخذ جرعات كيمياوي وبيوم الي ضربني ابو شوارب على راسي چنت طالعه اجيب الها علاج ومن حرگوا بيه البيت اخذوها ويه اخواتي وبعد ما اعرف عنها شي واليوم من عمي جابني هنا للمزرعه يمكم اذكرت قبل ما اصير هاي الأحداث كلها لكون ام رحاب طلبت منها تطلع من يمها لكون بعد ما يريدوها واني اخذتها يمي هي وصتني وگالت / ريماس اخاف اموت اريدچ تروحين على عنوان وهي مزرعه بيها اخويه وابويه وتبلغيهم اني متت خلي همه يدفنوني 

واليوم من اجيت اذكرت من عرفت اسم ابوك سامي وانت اعرف اسمك بيان وهي ذكرت اسمائكم اثنينكم گالت / اخويه بيان وابويه سامي 

شكرا لزيارتكم عالم روايات سكيرهوم