رواية فصلية الضابط الفصل التاسع والعشرون بقلم زينب نور
••••••• فتحت الباب وطلعت امشي سريع نزلت الدرج طلعت من البنايه غطيت وجهي بالعبايه وامشي سريع اتلفت يمين ويسار اشوف اكو عالم بالشارع اتباوع عليه عبالك راح يلزموني من خوفي
گمت امشي شبه الاركض واسمع صوت الاذان من بعيد واشوف الاضويه ولنشرات عرفت اليلة رأس السنه ولناس مخبوصه تحضر للاحتفال اخير ساعات من سنة /2011/ ابتعدت عن البنايه عبرت شارعين
احس اكو احد يمشي وراي اردد اريد اقنع نفسي اكيد من الخوف
اي اي من الخوف ماكو احد وارث مو هنا شفته طلع بسيارته يعني بعيد
كل شويه التفت بخوف عثرت وكعت على وجهي اسمع صوت رجال جبير بالعمر وراي يصيح اسم الله بويه على كيفج ردت اكوم شفت رجلين واكفه يمي جمدت هاي حذاته عرفته اخاف ارفع راسي واشوفه مدالي ايده رفعت راسي اباوعله الدمعه وكفت بعيني ريگي نشف گلبي مثل الطبل يدك ابلعمومي
اشوفه يتصرف طبيعي باوعت للجهه الثانيه
شفت الرجال الكالي اسم الله وشكم واحد واكفين يباوعلنه تمنيت بهل لحظه اختفي من الوجود
كومني مخلي ايده ورا ضهري يمشي بيه بس رجليه ميساعدني امشي واكفه يحجي من بين اسنانه كاز عليهن بقوه ويباوع بعيوني وهو يمثل الابتسامه ولهدوء
بس اني الوحيده الي اشوف البركان البداخله الهدوء ماقبل العاصفه
سئله الرجال:- بويه انت تقربلها تعرفها
جاوبه بكل ثقه
وارث:- حجي اني لوما اعرفها اتقربلها
هاي زوجتي
الحجي:- لعد ليش اشوفها خايفه من عندك ومتقبل تمشي وياك
رجع باوعلي الحجي وتقرب عليه كالي
الحجي :- بابا صحيح الي يكوله انتي زوجته ؟
لا تخافين ابويه كولي الصدك
اباوعله وساكته ما اكدر احجي شي
باوعت الوارث يريد ياكلني بعيونه وضاغط على ايدي احس اصابعي راح يتكسرن بأيده
باوعت للحجي وكتله بتلعثم
:- اي اي صحيح اليكوله
اشوف الحجي ما مصدك ولولد الورا تقربو عليه يباوعولنه يسولفون بصوت خافت
وارث ما اهتم الهم عافهم وسحبني امشي ورا وتعثر صعدني بسياره وسد الباب ودار صعد يسوق مغمضه عيوني اتوقعه راح يضربني فتحت اعيوني اشوفه ساكت ومركز يريد يعبر الشارع بس احس حركاته وجه وكل تعابيره تتحلفلي
نزلني اباب البنايه سد الباب راد يفلشه وسحبتي من ايدي شبه اليركض على الدرج مخليه ايدي الثانيه على گلبي راح يوكف اول ما فتح الباب سحبني من ايدي قوي ودفعني وكعت على وجهي طبك الباب واجه العبايه التفت على رجليه
احاول اريد ارجع اوكف ما اكدر كمت ازحف ليوره ارجع للحايط
اتقرب عليه اعيونه حمر من العصبيه كنبص مقابيلي ولزمني بأثنين اديه من زنودي احسه دخل اصابعه بالحم ويباوع عليه بغضب عاوج رگبيته مثل الي يريد ياكلني هزاني وطرش اذاني بصوته
وارث:- تردين تشرديييين موو
لج غبييييه حيوانه
تردين اتشردين من عندي
هههههه عبالج وارث غبي وتكدرين تفلتين منه بهل سهوله
لا بابا لا بعدج ما تعرفيني شنو
وخلي انطيجياها من الاخير اهلج انسيهم
• كررها وهو يضغط على الاحرف ومركز بعيوني
:-ااااهللج انسيييهم تحلمين اخليج ترجعين الهم
وخاف عبالج اني غبي مثلج من عفت الباب مفتوح
•سكت ثواني ورجع كمل وهو يأشر على الشباك
وترا شفتج من باوعتيلي منا شفتيني طلعت بسيارتي اطمئنيتي مووو
كلتي بگلبج هذا شكد غبي مو بله
ندى:- انت شتريد من عندي خليني اروح لهلي حسام وراح ونحكم اعدام وما قبلتو تتنازلون خليني ارجع لهلي ماكافي السويته بيه
وارث:- اتحلميييين لج من كل عقلج ارجعج
ندى:- اي من كل عقلي وارجع ومو بكيفك اذا مو اليوم كدرت اشرد منك باجر
واهلي ميعوفوني يمك لو تمووووت
رفع ايده راد يضربني غمضت اعيوني بقوه بس ما ضربني فتحت اعيوني شفته نزلها وقابض ايده بقوه بحيث صايره حمره
بحركه سريعه رفعها وضرب الحايط وراي من الخوف رفعت ايدي على وجهي وصرخت عافاني وراح للاغراض يكسر بيها يشيل ويركع ويدفر بالقنفات حته الحايط شفته يدفر بي
اباوع علي احس بعد باد حيلي كعدت بالكاع ابجي وايدي على حلگي عاضتها
وارث:- اموتج بهاي ايدي وما اخليج ترحين لهلجججج
لا تحاولين ترا افقد واموتج واااني ما اريد أذيج كاعد احاول ماااا ائذيج تجبريني على اذيتج لييييش ولج لييش
عفته وگمت ركض دخلت للغرفه وقفلتها عليه ونهاريت بالبجي
:- يارب اخذ امانتك وخلصني كافي عذاب والامام علي بعد ما اتحمل خلصت طاقتي
سمعت الباب انركع ونقفل عرفته طلع گمت شمرت نفسي على السرير ولميت نفسي اريد انام بس مايجيني نوم العصر نايمه هوايه الافكار خبلتني كمت فتحت الباب وطلعت شفت الصاله عبالك مضروبه صاروخ كفيت ارداني وگمت انظف بيها هلكت ولوقت اتأخر اباوع لساعه صارت بـ ـ12ـ بس مارجع
سويت لفة طماطه اكلتها ودخلت سبحت وذبيت نفسي نمت ما كعدت اله ثاني يوم الصبح طلعت بعده ما راجع
انتظرته لليل وهمين ما رجع
بديت اخاف الوحدي اكل بأضافري وطكطك باصابعي وعيني على الباب هسه يرجع وماكوو ثالث يوم وماكو الباب مقفول عليه بس اباوع من الشباك مليت الوقت احسه ميمشي گمت ادور بالبيت بالكي الكا فدشي نسخه من المفتاح او كتاب اقراء بي اسلي نفسي بس ما لكيت شي القلق هلكني حته الاكل نسيته بس علمود علاجي اكل شي قليل لليل حاولت انام ما كدرت الهدوء ولوحده راح اتخبلني كمت اسولف ويا نفسي مثل المخبله لما لساعه بـ ـ2ـ بليل انفتح الباب
كمزت من السرير طلعت اركض فتحت باب الغرفه صار بوجهي بعده واكف يسد بالباب التفت عليه بقى صافن بوجهي واني همين صافنه بوجه
فززني من كح
درت وجهي ورجعت للغرفه سديت الباب ورجعت السريري بس اطمأنيت وحسيت بألامان
من رجع بقيت بفراشي امثل النوم بس مانايمه اتگلب بفراشي لما حسيت انفتح الباب ودخل شال الغطى ونام بصفي تقرب عليه احس بأيده يمشيها على كيف بشعري وباس اطرافه بدون ميحسسني عباله نايمه احس يسحب نفس من رگبتي ويرفع راسه ليفوك يزفره كررها ثلاث مرات اني جامده باقيه ما عندي اي شعور
خلى راسه على شعري وايده على خصري من ورا ونام لمن حسيته غفه يله غفيت
كعدت ثاني يوم ما لكيته وماكو اثر انو جاي وراجع عبالك جنت بحلم ضليت اشكك بنفسي خاف جان يتخايلي
بس من دخلت للحمام وشفت ملابسه نازعهم من سابح يله تأكدت
وهم ما رجع التالي اليل
وكام كل يوم هيج يجي تالي اليل ويطلع من الصبح قبل لا اني اكعد
اسبوع على هل وضع واني التفكير اكلني من داخلي اكول حسام عدمو لو بعده لان أخير مره سمعت مأجلين تنفيذ الحكم بس ما اعرف شكد
لما بيوم رجع وارث الضهر على وقت دخل وشفت هناء دخلت ورا رحتلها ركض اسلم عليها كعدنه بالصاله وارث دخل للغرفه
فتحت موضوع الاجهاض
ولازم انزل الطفل
سولفت هوايه وياي اني جنت بس استمعلها
وساكته
قبلت اروح وياها بس عندي شرط بالاول يتنفذ يله اروح اجهض الجنين
سئلتني شنو اهوا شرطي
ندى:- بالاول اسئلي اخوج كوليه حسام انعدم لو بعده اريد اعرف
هناء صاحته يجي يمنه
طلع من الغرفه نازع ملابسه العسكريه ويريد يروح للحمام يسبح
سئلته كدامي
هناء:- وارث اخو ندى تنفذ الحكم بي لو بعده
جنت اباوعله مركزه بي متلهفه اريد اعرف
باوعلي ورجع باوع الهناء
وارث:- لا بعده تأجل حكمه البعد شهر
ما فرحت بس مثل الصار عندي أمل حسام يبقى ماينعدم نزلت راسي
بجيت بدون صوت
رجعت هناء كالتله
هناء :- ندى قبلت تنزل الطفل بس عدها شرط تريد يتنفذ قبل لا تجهض
باوعلي بتساؤل
وارث:- اي اسمع شنو هذا الشرط
ندى:- تاخذني الام ضرغام اريد احجي وياها
وتخليني احجي ويا اهلي بالموبايل
عكد حواجبه من سمع اروح الام ضرغام
وارث:- وشعندج يم ام ضرغام
ندى:- هذا الشي ميخصك اني اريد اروحلها
مثل الفهمني شأريد منها وكال
وارث:- بس هذني شرطين مو واحد.
ندى:- ما عليه اريد احجي ويا اهلي اسمع اخبارهم
شفته هز راسه كال ميخالف يصير خير وراح للحمام.
التفتت الهناء كلتلها.
شبي اخوج لا كال اي ولا كال لا
كالتلي هناء:- دكومي جهزي نفسج حته على وقت نرجع الدكتوره انطتنه موعد كون بـ ـ2ـ يمها تنتظرنا
ندى:- ما اروح قبل مينفذ الاكوله وشيريد خلي يسوي يسوي
كامت وسحبتني كومتني ادفع بيه للغرفه حته اجهز نفسي
وتحجي عليه عالبو علمودج راح يضحي بابنه ولخاطر صحتج ولما يحبج ما متمسك بيج
:- ميهمني كل هذا الحجي هناء اني اريد لو ابني لو حسام
اريد احجي ويا ام ضرغام حتى تتنازل عنه حتى لو سجن مدى الحياة هم ميخالف
غيرت ملابسي وهي بعدها واكفه اسولف وياها واخذت الاحتاجه هناك بجنطه
دخل وارث سابح ومبدل وكف يمشط بشعره ويباوعلي
اني دايره وجهي عنه بس بالي كله يمه كل حركاته منتبهتلها
كال يله بويه بعد شعدكم نطلع لو لا
جاوبته هناء:- يله ماعدنه شي جاهزين
طلعنه كدامه نمشي وهو قفل الباب ونزل ورانه
نزلت ابجي احس بالذنب راح اموت ابني اموت امنيتي وفرحتي بي
وصلت يم السياره بس ما صعدت بقيت واكفه
هناء صعدت وهو صعد ومنتظريني اصعد
صاح عليه يستعجلني
كوتله:- ما اصعد لمن توعدني تنفذ الطلبته
صاح عليه
:- ديله عاااد اصعدي نسولف بالسياره عود تأخرنا يمعوده بسرعه
دكيت رجل ما اصعد
نزل دار اجاني عتاني من ايدي
وارث:- فضيها واصعدي اني قابل انفذ التطلبي بس اصعدي وخلصيني
صعدت وهو سد الباب بقوه گمزني
صعد يسوق بسرعه وهناء:- تكوله شبيك راح تكلبنه على كيفك
كوتله:- قبل لا اروح للعياده خلي اشوف ام ضرغام
ما قبل
كال وعد من تنزلين الطفل اخذج تحجين وياها
ندى:- لعد انطيني الموبايل احجي ويا اهلي
انطانيا ما صدكت بهل سهوله ينطينيا
اخذته بسرعه دكيت رقم ابويه جنت حافظته على گلبي
اتصلت مره ومرتين يطلع خارج نطاق الخدمه
تخبلت گمت ابجي واكرر الاتصال نفس الشي خارج نطاق الخدمه
اريد اذكر رقم واحد ثاني منهم بس عقلي ميساعدني ادك رقم وسام بس الرقمين الاخيرات ناسيتهم
رجعته اله واني ابجي وادعي على نفسي كون اموت قبل الطفل
وصلنه للعياده نزلنه دخلت امشي كدامي هناء و وارث ورايه يمشي
لان حاجزين دخلنه بدون انتظار وارث بقى بصالة الانتظار واني وهناء دخلنه على الدكتوره
فحصتني وسوتلي سونار كلشي طبيعي
حته سمعتني صوت نبضات گلبه الصغيرون
مخليه اديا على حلكي وابجي بقهر ما اريد انزله
سئلتني ليش اريد انزله
هناء جاوبتها وشرحتلها حالتي
سجلتلي أبره اضربها وشرحتلي من يصير عندي وجع ونزيف اجي للمستشفى انطتنه اسمها اهليه وكالت انتظركم بليل خفارتي اليله وطلعنه من يمها بس اني مثل الجثه امشي بلا روح
انطيته الورقه هناء راح اشترا العلاج ورجع اخذت الابره ورحنه للممرضه ضربتنياها وطلعنه صعدنه بالسياره راد يرجعني للشقه بس هناء مقبلت گالتله خليها يمي تجي وياي البيتي ميصير تبقى الوحدها واني ما اكدر ابقى يمها جهالي بالبيت ينتظروني ابوهم طالع وباقين الوحدهم
ماكال شي سكت يعني قبل وطول الطريق يباوعلي بالمرايه الاماميه اني ما اباوعله دايره وجهي لجامه اباوع ودموعي ينزلن بدون صوت طبك السياره يم مطعم نزل جايب غدا وصعد كمل طريقنه
وصلنه البيت هناء دخلنه وهو رجع كال الهناء رايح للبيت الحجيه مخابرته
دخلت ضايك النفس بصدري كارها كلشي
راحت هناء تجهز الاكل صاحتني اجي يمها بدو ياكلون هي وجهالها وتلح عليه اكل ما اكدر نفسي مسدوده سوتلي لفه وجبرتني اكلها علمود علاجي
اكلتها وبدت تسولفلي على الاحداث الصايره بالبيت وشلون بيت ثائر راجعين وماخذين الطابق الارضي ولوارث الطابق الثاني لان طالب من وارث لو فلوس الورث لو نص البيت وارث ماعنده افلوس يدفعله موافق ولان امير مسافر عابر ويا المهاجرين بدون ميدرون بي اهله وعبالهم ميت بعدين يله عرفو طالع عابر الاستراليا غجق ويا اصدقائه بالبحر و وفاء كلش متأذيه علي
وسامر همين ايريد يسافر يكمل دراسته بأيران ياخذ شهادة الماجستير
ومحمد خاطب استبرق وبعد شكم يوم عقدهم ونورس لاكين عدها موبايل وتخابر بولد من المنطقه وابوها ضاربها وحته داخله مستشفى ومعاقبها مبطلها من دراستها
وسهام مرتين جايه للبيت تتوسل بالحجيه حته ترجع الوارث ولبناتها بس وارث قافل عليها وميخليها حته تشوف البنات ولا تخابرهن
اخذتنه السوالف صار الجو مغرب واني بده الوجع يروح ويرجع عندي لويات بدت تقوه گمت ابجي من الوجع وهناء اشوفها انخبصت خطيه تحير شسويلي اني گمت اعض بحجابي واصرخ من الوجع گطعني
وحسيت بحراره على رجليه رحت للحمام باوعت شفت الدم واني احس صار عندي هبوط طلعت من الحمام الزم بالحايط واريد بس اوصل الهناء اشوفها اجتني تركض وتصيح عليه بعد ما سيطرت وكعت بالگاع مغمي عليه
طلعت من الحمام الزم بالحايط اريد اوصل هناء اشوفها اجتني تركض وتصيح عليه ما سيطرت وكعت مغمي عليه...
فتحت عيوني بتثاقل بعدني بمكاني وملابسي نكعانه دم وهناء يمي تضرب بخدودي تصحي بيه وموبايلها على اذانها تخابر اسمعها
تكوله:- بسرررعه يمعود لا تموت خاف من گلبها لا تتأخر يله
سدته وانتبهتلي كعدت كامت تشكر من الله
ساعدتني سحبتني للحمام سبحتني وجابتلي ملابس غيرت ملابسي
بعدني ما طالعه من الحمام واسمع صوت وارث بالبيت اجاني بلهفه لزم وجهي بين ادي يبوس بخدودي ويمشي بيه للصاله يستعجل
بهناء حته نروح للمستشفى
وهناء راحت غيرت ملابسها وجهزت جهالها تنزلهم يم الحجيه
اني الوجع يگطع بيه ورجليه يرجفن ما اسيطر اوكف شافني وارث هيج صاح بهناء
:- لج هنااااء يله معوده
~وشالني وطلع لسياره صعدني طلعت هناء تركض وجهالها كدامها صعدو وساق السياره بسرعه جنونيه نسيت الوجع ضليت مركزه بالطريق عبالك يلعب سباق انتهيت من الخوف
وهناء تحجي علي
:- وارث شجاك راح تموتنه ويا ابنك اليوم يزتونه لنجف سوه بسلامتك
يمعووود وارث وكفت گلبي اخاف من السرعه
هو ولا مهتم
دقايق وصلنه كدام البيت نزلت هناء دخلت جهالها للبيت
بقيت اباوع للبيت انعادت كل ذكرياتي بي ما احبه ماشفت الراحه بي
طلعت سناء ومحمد من البيت شافوني سناء سلمت على وارث من بعيد ومحمد اتقرب سلم عليه
يسئل بوارث
محمد:- ها خالو شبيها ندى رجعت انتكست حالتها من جديد
وارث:- لا مابيها شي بسيط
رجع صاح
وين راحت هنااااء روح يمعود صيحها
شفتها طلعت اجت تركض صعدت حرك السياره
وكفنه كدام المستشفى نزل وارث دار عليه نزلني دخلني للمستشفى وهناء اخذتني من عنده دخلتني الصالة الولاده و هو رجع بقى بصالة الانتظار..
دخلت الصالة الولاده اشوف النسوان شلون يصرخون صوتهم يقشعر البدن عبالك تتنازع الموت
اجت الدكتوره نفسها الي سجلتلي الابره
وياها ممرضه كالت ها ندى شخبارج حبيبتي
ما اجاوبها من الوجع الوج ما اكدر اسيطر على الرجفه الي بجسمي
شافتني خايفه
كالتلي بابتسامه اطمئنان
:-لا تخافين حبيبتي صيري قويه
وتعالي يله افحصج خلي اتأكد
اجهضتي الجنين لو بعدج
لزمت ايد هناء اخاف
من الفحص ومستحيه منها تكشف عليه
هناء:- كولي يا الله ندى صيري سباعيه شمالج سايحه روحج لعد اذا طلوك ومجيب شلون
لا ودور تريد تبقي الطفل وهوا هذا حالها
لا تخافين انتي اجهضتي بالبيت يعني خلص الصعب بعد بس تنظفج
رحت وراها دخلتني اول شي سوتلي سونار تاكدت من الجنيين
وبعدين سوتلي كورداش
علما خلصت روحي طلعت
طلعت اسحل بنفسي وكايدتني هناء ولممرضه ارتاحيت تقريباً ساعه على الامغذيات ولابر سكن الوجع غافيه ما ادري بنفسي
لما فزيت على حركه بأيدي فتحت عيوني شفت الممرضه تشيل بالمغذي
وهناء واكفه يم راسي
گالت ها ندى شلون صرتي بعد عندج وجع هزيتلها راسي لا
ساعدتني اكوم البس بالعبايه
ودخلت الدكتوره شافتني وسجلتلي علاج وطلعنه الوارث جان بعده منتظرنه بالسياره اول ما شافني طلعت نزل من السياره واجاني بلهفه اخذ ايدي من هناء وصلني لسياره صعدني وهو يكولي
:- الحمدالله على سلامتج كلشي يتعوض اهم شي صحتج زينه ولباقي سهل
مارديت علي
وصل هناء البيتها طلع زوجها للباب هو وجهالها جايبهم من الحجيه
كالت هناء:- وارث خلي ندى يمي هل شكم يوم ابين متصير زينه اني اداريها
اشوفه ماقبل رد عليها
:- لا اني موجود يمها هل يومين شتحتاج مثلاً اني زوجها اقرب شخص الها مو هيج ندى
ما رديت علي مكتفيه بالسكوت ومرجعه راسي ليوره غمضة اعيوني من شفته يباوعلي
هناء خلت ايدها على متني وصتني اعتني بنفسي واصير قويه والله يعوضني بالاحسن بوستني ونزلت
اتقرب اسعد رافع ايده يسلم على وارث
نزل راسه يباوعلي من الجامه مال السياره أشرلي بأيده بعلامه السلام
رديت علي تحمدلي على السلامه
رجعني لشقه
شافني ما اكدر امشي ولوقت متأخر اكو قليل عالم بالشارع ماهتم اجه شالني وصعدني طابقين كال
:- لج تعبتيني صايره ثكيله
نزلني وكايدني من ايدي صعدنه لطابق الثالث فتح الشقه ودخلنه
بس نزعت العبايه بوجهي للحمام سبحت احس نفسي ارتاحيت ولوجع مسكن
طلعت للغرفه بس لبست ملابس بدون ما اسرح شعري بس لفيته انتبهت وارث ما ماوموجود راجع طالع ما هتميت ذبيت نفسي على السرير بسرعه غفيت
حسيته يكعد بيه بس ما قبلت اكعد
اسمعه يكول بس اشربي علاجج وارجعي
كعدت واني مغمضه عيوني شربني العلاج ورجعت نمت
الثاني يوم كعدت شبعانه نوم وبطني زينه متوجعني
التفتت شفته نايم بصفي
ضليت اباوعله احس نفسي مشتاقتله
اباوع التفاصيل وجه
اسولف بداخلي
اكول شيصير لو ملتقيه بيك بغير هاي الضروف شيصير لو حسام ما مسجون بسببك ليش گلبك عكس حلاة وجهك
احس نفسي بمعركه ما بين عقلي وگلبي
عقلي ميسمحلي حته اباوعله واتأمل بي
وگلبي يجبرني اشبع عيوني من ملامح وجه
تحركت درت وجهي للجهه الثانيه حسيته فز يتحرك ويمط بجسمه
رفع راسه يريد يتأكد بعدني نايمه غمضت
عيوني مثلت النوم
تقرب عليه اكثر لزك جسمه على جسمي بقيت جامده.
رفع راسي ونيمي على ايده وعبر رجليه على رجليه
وايده على خصري
وراسه فوك راسي
يبوس بخدي
سويت نفسي عالساس جنت نايمه و فزيت دفعته ميتحرك قفل اديه ورجلي وشعري جوا راسه تكطع ما اعرف ليش كرهت قربه الي هلكد صرخت اختنكت وخررر عني ضاك نفسي ما اريدك
حسيته رخه فتحت اديه وكعدت اجمع بشعري مفتوح شفته كعد وحضني من ورا يشم بشعري
:- انت شبيك متفهم ماااا اريييدك اكرهك واكره قربك مني شكد لزكه الخاطرالله
رجع ليوره مزعوج من تصرفاتي ويا
كمت طلعت للحمام وهو طلع جاب ريوك وسوا چاي
اول ما كالي كومي تريكي كمت ويا ما عاندت لان جنت جوعانه
احبه من يهتم بيه احب اشوفه خايف عليه اباوعله بالختله ما اخلي يشوفني
بقى يومين يمي ما طلع ابد بس مجرد يجيب خبز ولنواقص وهو اصلاً يعرف يطبخ يسوي مخالم ومقالي
ثالث يوم العصر اني بالصاله مجطوله على القنفه ومركزه بالساعه ماعندي شي التهي بي
وهو بالغرفه اسمعه ايخابر بصديقه ويا من الشغل شويه
طلع اجه يمي كعد مقابيلي على القنفه اشوفه يباوعلي مضيگ عيونه ويمسح بشواربه
لفت انتباهي عالساس مركزه بالساعه احسب بالثواني
بس عيوني غصب يرحن علي
عشر دقايق على هل وضعيه
لما ما صبرت من اجت عيني بعينه
تلقائياً ضحكت على نضرته الي
وهو هم كام يضحك على ضحكتي
غطيت وجهي بأديا الوم بنفسي تخبلت شجاني اضحك على شنو ولضحكه شاكه حلكي
حسيته تقرب عليه وخرت اديا شفته مكنبص يمي مايل راسه ومبتسم يتأمل بوجهي خجلت من نضراته الي رفعت اديا غطيت وجهي سحبهن نزلهن
وارث :- خايبه لا تحرميني منج والله احبج
باوعتله بجديه وگلبي احسه كام ايدك بالدقيه الفف اختفت ابتسامتي
وارث :- اي اي احبج اعترف ما اريد اخسرج
حاولت ابعد نفسي عنج وارجعج لهلج بس ما اكدر هذا يموت من تبتعدين عنه
يأشر على گلبه
بلعت ريك ما اريد اضعف كدامه
نزلت راسي اشتت نضري
مد اديه على وجهي يمسح بخفه على وجناتي باصابعه الابهام
وارث :- ندى انتي رجعتيني مراهق الايام اصباي تدرين
سكت ثواني ورجت كمل وهو مركز بعيوني
تعرفين شي راح اعترف الج اني بس وياج جربت معنى الحب وعرفت شنو طعمه وهذا الشي مو اختياري لا اجباري گلبي هاويج لا تكسرينه
ضاع من عندي الكلام خجلت من كلامه وأول مره يكولي هيج خلف عندي تناقض بداخلي تهت بي
ندى:- وجوز هذا عقاب الك من الله لان كسرت گلوب ثنين وانت تعرف بيهم يحبون بعض
بعد اديه من وجهي ودار ضهره الي كعد مرتجي على التخم وطلع من جيبه باكيت الجگاير ولجداحه ورثله وحده يسحب بيها
وارث:- جوز ما ادري بس اذا عقاب فـ عقابه صعب مميت سبحان الله كلشي صار عكس بعد ما جنتي انتي الي اتحبيني واني عندي كلشي عادي صار هسه العكسس وياي
ندى :- انت تتخيل نفسيتي تتقبل بعد واحد جان سبب بأجرام اخوي واعدامه وباذيتي وحرمتني ان أكون بيوم أم خنكتني العبره بس قاومت
سكتت وهو ساكت بس يشفط بهل جڰاره
كتله
ندى :- سبحان الله شكد جنت اتمنى اشوف هذا الحب وهذا الاهتمام من عندك بس
اجه بوقت كارهتك وما اريد غير اكون بعيده عنك
تعرف جنت متمسكه بحملي لان اريد علاقة دم يربطني بيك ويكون اسمي واسمك بجنسية طفلنا
حته لو على حساب حياتي ميخالف
بس من عرفت الحقيقه من حسام كرهت كلشي يربطني بيك حته الطفل الجنت اتمنى فرطت بي:
كمت ابجي رفعت الغطى على وجهي
سمعته يتنهد ويذب حسرات
وگال:- يا حقيقه هاي العرفتيها بله وشكالج اخوج حتى
خلاج هلكد تكرهيني ومتطيقين تشوفين وجهي
سكتت بس اشهك من العبره البصدري
:وارث - احجي وياج سولفيلي شگال الج اخوج
ندى :- ڰالي انت سبب بكلشي صار بي انت حاربته على رند لان حباها ودخلت ضرغام الحياتهم ضدانية بحسام
انت الخليت ضرغام يروح الكربلاء يستفز حسام الحد ما خبلتو وخليتو صار مجرم قاتل وتاليها ينحكم اعدام بسبب منووو حاجيني مووبسببك
التفتلي
وارث:- اييي صحيح بس هوو السببب بالصار اله هوو بقى يستفزني الحد ما جبرني اضلم حتى بنت اخويه
اذا يحبها صدك ليش جان يستفزني ويعايرني بيها هااااا ليشش
ما ندمان على السويته ولا راح اندم بيوم اخووووج گو....... اد حقير استغل بنت اخويه بس حتى يقهرني كبرت عقلي ويا اول مره وحذرته يبتعد منها بس ما ابتعد وخلاها تحبه وتتعلق بي وتوكف بوجهي اني وابوها واخوها وتكول بكل صلافه لا ما اقبل بغير حسام وما بطل منها جنت اكدر اخلي طلقه براسه وكلشي ينتهي بس كالت خلي استخدم ويا غير اسلوب اخوفه حته يجزع ويتركها
بس طلع حيوووان ارعن وقتل ضرغام
ندى :- الصار صار ونحلت السالفه عشائرياً ليش ما تنازلتو عنه مو اخذتوني فصليه بمكان دم ضرغام
ليش مو من البدايه ما رفضتو الفصل وبقيتو على القانون
يعني اني اتدمرت حياتي خسرت صحتي وخسرت ان اكون أم بيوم من الأيام
وتالي ينعدم حسام
لااا وتريدني ابقى يمك من كل عقلك على يامال وشلون نفسيتي تتقبلك قاتل اخوي وترا أيدك املطخه بدم ضرغام ورند وحسام
انت سبب بموتهم كلهم
انت شيطان بهيأت انسان
انتفض يباوعلي بعيون يطلع منها شرار وجه محتقن
:- اني الشيطان انيي بس لان ردت احمي بنت اخوي من انتقام وحيونة اخوج اصير شيطان بعينج هي هاي نضرتج الي
ليش مو اخوج الشيطان ومجرم بسببه ماتو ضرغام ورند عبالج سهللله هينه عليه يموتون بسبب واحد طايش بلا تربيه كل الي يسوي تحت شي اسمه حب هو هذا تبرريره الجريمته باسم الحب يقتل
ويجرم
دفر الطبله كدامه فلشها وشال جڰايره وموبايله وكام وهو يغلط ويفشر على حسام وطلع ما اعرف وين
ما رجع غير تالي اليل
ومن هذا اليوم وارث بعد ما حاول يتقربلي ورجع الطبيعته يطلع الصبح ما يرجع اله -12- بليل واني ابقى انتظره كل يوم اسوي نفسي ما مهتمه بس جذب مهتمه
شكد جان ايحاول يقسى وياي بس ميكدر بعده اهتمامه الي
انطاني موبايل بدون شريحه وبي رقم سري ما اعرف افتحه بس مفعل المنبه يدك باوقات علاجي حته ما انساه وكاتب ( اخذي علاجج) من اقر هاي الجمله ابتسم وتصير رفرفه بگلبي
اسبوعين نفس الروتين ملل واكتئاب يقبضض الگلب الحد ما جابلي شاشه ابلازما جديده وركبها وبديت اتابع مسلسلة اسمها (اسميتها فريحه) الهي نفسي بيها حته اتهرب من واقعي والتفكير الممل
بيوم جنت كاعده اتفرج على المسلسل ودخل وارث انتبهتله بقى واكف يباوعلي سويت نفسي ما منتبه اله لما حسيته دخل للغرفه اخذ ملابسه ودخل للحمام
كمت دخلت للغرفه اباوع الملابسه اشتاقيت اشم عطره رحت رفعت قميصه قربته على خشمي اسحب بريحته ممزوجه بعطره احسها تدخل للرئه منزكد ما اتنفسها اريد اشبع منه انتبهت على موبايله مخلي على الميز يشتغل ويطفى رجاج رحت شفته بدون ما ارفعه باوعت للاسم مكتوب اسعد يتصل ويدز مسجات ما سكت الجهاز اكلني الفضول اشصاير وهلكد ايلح خفت ابداخلي كلت جوز صاير شي على اهله رفعت الموبايل و فتحته لان قبل فتره عرفت الرمز وحفظته جان تاريخ عيد ميلاد زهراء بنته
قريت أول مسج مكتوب
(وينك وارث جاوبني بسرعه اهل ندى اجو يدورون عليها )
فتحت المسج الثاني مكتوب
( رد يمعود ترا دكو بيتكم لان ابنهم انعدم وبتهم يمك )
اختل توازني وكع الموبايل من ايدي........
شكرا لزيارتكم عالم روايات سكيرهوم
