رواية فصلية الضابط الفصل الثلاثون 30 بقلم زينب نور

........... وكع التليفون من ايدي احس هل خبر مثل الصاعقه وكعت على راسي صرخت صرخه احسها طلعت من نص گلبي 

وتتبعها صرخات ألم فقدان عزيز 

گاعده احس شي بداخلي يتگطع گلبي بي جمره

ما مستوعبه حسام مات يعني بعد ماكو أمل لا لا اريد اموت وياك حسسام

الطم على وجهي واملخ بشعري 

دخل وارث يركض ما مفتهم شبيه كعد يمي لازم اديا ويصرخ بوجهي و يهز بيه بقوه

:-لج شبيج فهميني يوجعج شي شصار 

احتار شيسويلي مخبوص يلزم باديا ويهدئ بيه 

انتبه للموبايل يدك واكع بالكاع بعدها الاتصالات مستمره 

دنگ رفع الموبايل يباوع بي ويباوعلي افتهم شبيه وليش الطم 

عافني وطلع ايخابر يفتهم زين 

فرفحت روحي لزمت دشداشتي شگيتها عليه

:- ولج يممممه ولج حسااام ماااات مااات يمه مات عزيز گلبج تدرين بي لو بعدج يمممممه 

احس گلبي يريد يوكف شكد ما احجي ما اعبر او اوصف كمية الحزن ولألم البداخلي بس اكيد الي مار بهيج وجع وفاقد اخ يحس بيه ويفهم شداحس

كمت اضرب على صدري الهوى ضاگ اريد اتنفس 

دخل وارث يباوعلي مخبوص يلبس بملابسه واجهزته ما سكتن من الاتصالات ميجاوب حاير بيني وبين يلبس ملابسه انخبص يكعد يمي يلزم اديا ويرجع ايكوم يلبس بقميصه 

كل هذا الصار بدقايق قليله بس بالنسبه الي الدقيقه عليه صارت بسنه 

كعد يمي يضرب بوجهي ويصيح 

:- كاافي كاافي لج راح تموتين اخذي نفس خلي نفهم نتأكد 

رافع راسي بأيده حتى اتنفس ويفرك بمكان گلبي 

واني اضرب بي بثنين اديا على صدره ومن حلاة روحي خرمشت رگبته وصدره بأضافري الحد ما طلع الدم منه

بده الصوت يصير بعييييد عني اشوفه مثل الخيال صار يمي بدت حركتي اتقل اشويه اشويه احسه گام من عندي ورجع شالني وفصلت عن الواقع وجنت اتمنى ما اصحى بعد واموت ويا حسام 

بس مكتوبلي اعيش بعد عذاب بهل دنيا 

ونفس كل مره اصحى بغرفة المستشفى ونفس المشاهد الي كل مره اشوفها اسمع صوت وارث يمي والممرضين ولدكتور يوصي ويحذر بوارث بس حالتي هالمره متأزمه اسمعه يكول الوارث

:- العمليه ضروريه ما اضمن حياتها المره الجايه من تجيها هل حاله ممكن متتحمل بعد گلبها ضعيف 

وطلعو برا الغرفه يكملون حديثهم 

فتحت اعيوني زين شفت الممرضه يمي تنطيني علاج بالمغذي لزمت ايدها

باوعتلي وكالتلي:- ها حبيبتي الحمدلله على سلامتج شلونج شدتحسين هسه 

رفعت جهاز التنفس وحاولت احجي بكلمات متقطعه وكوه تفهمني 

كلتلها:- ساعديني الله يخليج 

نزلت راسها قريب عليه اتريد تفتهم شنو اريد گالتلي:- كولي حبيبتي شرايده 

ندى:- ساعديني

                                            

              

                    

الممرضه :- اساعدج بشنو حبي كوليلي 

ندى :- اريد اطلع منا بدون علم الرجال الجابني لهنا. 

اشوفها تباوعلي بفضول وتساؤل 

الممرضه:- ليش؟ بعدين انتي موزوجته هو كال هاي زوجتي 

عززززه بس لا خاطفج 

من كدما اريد بس اطلع واوصل اهلي وما اكدر ابقى عنده بعد اجت ابالي اكذب عليها 

ندى:- اي خاطفني صار اشهر ميخليني اطلع وهو سبب هاي حالتي وماعندي غير هل فرصه اكدر اشرد من عنده 

باوعتلها بعيون مدمعه بتوسل 

ندى:- الله يخليج ساعديني اشرد من عنده 

اشوفها خافت وحايره شدكولي 

الممرضه:- ليش ما تخبرين علي اشتكي علي هسه خلي اصيحلج الدكتور تكوليله وضعج هو يكدر يساعدج ويلزمو 

ندى :- لا لا اصلاً هو ضابط شأخبر علي يكدر يسوي اي شي حتى يطلعني كذابه  

المنو اشتكي ما راح يصدكون اكيد راح يقنعهم بأنو اني زوجته 

بس اريد من عندج تنطيني افلوس كروه اوصل بيهن لهلي بغير محافظه وتنطيني عبايه

الممرضه:- الصراحه اخاف على وضيفتي اذا عرف بيه اني الساعدتج وانتي تكولين الرجال الخاطفج ضابط يعني يكدر بسهوله يعرف بيه ويكدر يفصلني او يقتلني 

كمت ابجي بقلة حيله رجعت التنفس على خشمي بعده نفسي ما مستقر زين 

شفتها واكفه تباوعلي بأستعطاف وحايره تطكطك باصابعها 

كالتلي:- شوفي راح اساعدج بس اذا لزمج مجيبين اسمي ابداً اوك 

فرحت هزيتلها راسي :- اي اي والله لو اموت ما اكول عنج واگطع رزقج 

الممرضه:- تمام راح احاول اساعدج بلي أگدر علي راح اروح هسه وبليل ارجع عليج اشوف اشلون ادبرلج الطلبتيهم 

طلعت من عندي غمضت عيوني بقهر ابجي ما اصدك حسام مات وبعد هاي هي ما اشوفه ودموعي تنزل بحراره 

حسيت الباب انفتح ما فتحت عيوني عرفته هو رجع يطمن عليه 

عرفني واعيه اتقرب يمسح ادموعي فتحت اعيوني اباوعله وشلت ايدي بعدت ايده من وجهي  

كتله ولتنفس على خشمي 

:- لا تتقربلي وخر عني ما اريد اشوفك افرح حسام بعد مات عدمو اذا تريد تتشمت بموته اتشمت بيه

دارلي ضهره يمسح بوجه ومايريد يحجي وياي شي خاف انغث وتسوء حالتي اكثر 

اخذت قرار بيني وبين نفسي انتقم من عنده اشرد واخلي مثل المخبل يدور عليه لان عرفت يحبني ومتعلق بيه 

بس مثل ما حرم حسام ورند من بعض اني بأيدي اعاقبه بنفسي حته لو على حساب گلبي وحبي اله ادوسه الخاطر حسام احسه مات مضلوم هم الي جبرو يصير مجرم ويقتل ضرغام ويتعاقب بالموت 

شفته يخابر ويفتر بالغرفه يفرك براسه ويعصر راسه بأديه عرفته يوجعه

وگصته عرگانه ويحجي بصوت شبه الهمس ما رفع عينه من عندي 

اني دايره وجهي عنه اشوفه بانعكاس الشباك ايباوعلي ومتوجع 

            

              

                    

شويه ودخلت تقى هي وهناء عليه اجني بلهفه يسلمن عليه وبوسني من راسي احس بيهن مكسور خاطرهن عليه 

حتى ماعندي طاقه اكدر احجي صوتي كوه ينسمع بلاعيمي متجرحه من العياط بس اباوع عليهم يسئلن بوارث على صحتي وشنو كال الدكتور عن حالتي 

وهو كوه يجاوبهن بس لفت نضري من گال الهن 

:- الخميس اخذها الاربيل اسويلها عملية للقلب  

هن عرفنه موجوع من راسه كالتله هناء 

:-وارث انت مبين عليك تعبان روح للبيت ارتاح واني ابقى يمها من البارحه واكف على تك رجل 

كالها :- ماشي راح اروح ساعتين وارجع بس اسبح واغير ملابسي وارجعلكم 

كالت تقى:- لعد ارجع وياك اني جهالي بقو يبجون يم امي وباجر انشاءلله هم ارجع اشوفج نداوي 

اتقربت عليه بوستني 

و وارث يباوع عليه من بعيد و يوصي بهناء تدير بالها عليه ابين ما يرجع 

وطلع وتقى لحكته تمشي ورا 

اطمأنيت من راح حتى اكدر اطلع ابراحتي 

اتقربت هناء يمي لزمت ايدي عصرتها وتطبطب عليها بخفه

بجيت بشهكه 

طلعت من نص گلبي الموجوع 

هي انخبصت تصيح عليه

:- هششش ندى لا تبجين الله يخليج موزين عليج 

تمسح بدموعي وتبجي على بجيي 

سكتت

بس بالي حيل مشغول و الفكره مال شوكت اطلع وشلون أكلت راسي 

سئلتها:- بيش الساعه هناء 

طلعت موبايلها شافت الساعه كالتلي 

:- الساعه هسه بـالـ -5- ونص 

كلتلها انطيني ماي انطتني شربت واحاول اتصرف طبيعي الرجفه الي بجسمي ما تركتني و بداخلي خوف موطبيعي وشنو راح تكون ردة فعله لو عرف بيه كدرت اشردت من عنده 

احوس ما اكدر ابقى نايمه كعدت اجتني هناء تسئل بيه خايفه عليه

:- ها ندى شبيج ليش كعدتي محتاجه شي 

:- اي اريد اكوم اغير ملابسي جبتيلي ملابس وياج 

هزتلي راسها:-اي جبتلج وارث كالي اجيبلج  

:- ولعبايه مالتي وين شلون جابني هنا وملابسي المشكشكه لو مغيرلي ملابسي

هناء :- لا اشلون يجيبج هيج اكيد لافج بعباتج وجايبج هيه مال يغيرلج ملابسج غير ميته بأيده شلون يلحك اصلاً

لحك عليج أخر انفاسج

وصلتي هنا كاتبلج عمر اتعيشين: 

هزيتلها راسي ورفعت ايدي فلتت المغذي من ايدي 

اشوفها متفاجئه بيه وتسئلني 

هناء :- شبيج ندى ليش شلتي خلي يكمل علاجج ما ادري ليش احسج موطبيعيه 

ندى:- بس انطيني ملابسي اغير هاي الملابس لعبت نفسي منه ومن ريحتي وريحت المستشفى 

شالت الجنطه واجت ساعدتني نزعتني العليه ولبستني اتراكسود بس ما مقتنعه حاسه اكو شي موطبيعي مبين الارتباك بوجهي 

لفيت حجابي عدل شفت عباتي معلكه ورا الباب 

سويت نفسي طبيعيه رجعت اتمددت ومغمضه عيوني حتى اطمنها انو ماكو شي

سمعتها كالتلي:- رايحه للحمام دقيقه وراجعه الج نداوي 

            

              

                    

ما صدكت طلعت بسرعه گمت لبست عبايتي ردت اطلع انفتح الباب جمدت بمكاني 

طلعت الممرضه نفسها الگالتلي تجيني اتساعدني 

زفرت نفس بخوف 

:- هاي انتي همزين الحمدالله مو غيرج 

الممرضه:- اي اني جبتلج الطلبتيهن ملابس وفلوس بس انتبهت عليه مغيره ملابسي ڰالت 

:-اي خوش لعداخذي هاي الفلوس -50الف وهاي الحذاء البسيها وترا بارده بره وداتمطر خفيف وين ترحين بهل ليل ليش ما تبقين الباجر الصبح واطلعي 

ندى:- لا لا ما اكدر فدشويه يرجع عليه هاي فرصتي الوحيده 

اخذت الفلوس من ايدها وتشكرتها ولبست الحذاء 

شفتها تنزع بالترواكه مالتها 

انطتنياها البسيها

:- هاج اخذي البسيها بارده عليج 

اخذتها من عدها لبستها بسرعه اتشكر منها 

وفتحتلي الباب وطلعت كدامي اتجيكلي الوضع واني امشي وراها لافه وجهي بالعبايه 

واتلفت يمين ويسار خايفه 

دلتني على الطريق ومنين اطلع وراحت وكفت اتباوعلي من بعيد اتأشرلي اكمل طريقي 

نزلت بالمصعد للطابق الارضي 

وطلعت امشي شبه الركض الجاو ليل وبارد ثلج اكو هوى عالي اشويه وتمطر خفيف ماكو عالم اهوايه بالشارع بس سيارات 

عبرت الشارع أشر على تكسي واحس وارث ايباوعلي ويتخايلي اشوفه بوجوه السواق 

طبكت يمي تكسي بيها رجال جبير عمره يطلع بالاربعين هيج شي 

بسرعه صعدت ويا وكتله:- عمو حرك بسرعه 

بقيت اتلفت كل شويه الرجال حس عليه متوتره وخايفه من شي 

ايباوعلي بالمرايه الاماميه سئلني 

شبيج عمو وين اهلج وين تردين توصلين؟ 

من كالي هيج نزلت راسي يم رجليه واديا على وجهي ابجي 

انخبص الرجال يريد يعرف شصاير وياي 

كتله:- عمو اني اهلي بعيدين بغير محافظه وماعندي احد هنا غير خالتي وبيتها ما اندله بالضبط بس اذكر اسم المنطقه اسمهاـ.........» 

كالي 

عمو تبعد منا ساعه هاي المنطقه الكلتيها 

وانتي ما ضابطه العنوان زين شلون بهل ليل ويامن جايه انتي هنا 

سكتت ما حجيت شافني ما اريد احجي سكت 

هسه عمو كولي وين اوصلج بالضبط تردين 

بجيت بحيره وكتله 

:- عمو وصلني للگراج عود مناك اصعد لهلي 

كالي:- صدك تحجين عمو وين اكو سيارات هسه تطلع بهل وقت وميصير تبقين الوحدج بعدج صغيره ينخاف عليج ترا مو امان هلمره اني صادفتج وشلتج وياي مرة ثانيه جوز توكعين بيد ولد حرام عمو هل وكت ميتأمن ترا الدنيا صايره مثل الغابه ولبشر مثل الذئاب ناس تنهش بلحم ناس واني ضميري ميسمحلي اخليج وحدج بهل وقت بنص الشارع تايها هم عندي بنات بعمرج وما اقبلها على روحي 

تعالي وياي اخليج هسه يم اهلي تبقين عاد بس اليله ولصباح رباح باجر وروحي لهلج ها شدكولين بنتي؟ 

سكتت ما اكدر اكول اي ولا حتى اكدر اكول لا اخذني ويا البيتهم بس الف فكره ابالي خاف يطلع موزين ويخطفني لو يطلع يعرف وارث ويرجعني عقلي گام الوحده أيألف و يرهم من كيفه من كد الخوف وأفكر اذا حسيت بحركه مو طبيعيه اشلون اشرد واخلص نفسي منه 

            

              

                    

گالي يله عمو انزلي وصلنه هذا بيتي ابنيتي لا تخافين جوز اني اكدر اساعدج واوصلج لهلج بأيدي 

نزلت رجل اقدمها ورجل أءخرها فتح باب البيت وصاح على اهله وينج ام احمد تعالي وياي ضيف

طلعت ام احمد سلمت علي وباوعتلي أشرلها تجيني ادخلني جنت واكفه بالباب استحي ادخل 

اجتني اترحب وتهلي بيه:- اهلاً وسهلاً بنيتي اتفضلي كل الهله بضيف ابو حمودي. 

خلت ايدها ورا ضهري ودخلتني للبيت 

جنت ساكته بس منزله راسي خجلانه ومرتبكه كعدتني بغرفة للضيوف وطلعت 

اسمعها تسئل باابو احمد 

اسمعها اتكوله

:- منو هاي البنيه مبين عليها فقيره حتى متحجي 

وهو سولفلها اسمع صوتهم خفيف لان البيت هدوء ودافي اذكرت بيت اهلي نزلت ادموعي تحرك بعيوني 

يالله ليش هيج دايصير بيه وشوكت اوصل الهم اووف يا نارك يا حسام شيطفيها بگلبي 

كاعده وابجي بس ادموع بدون صوت 

دخلت عليه ام احمد كالتلي كومي ماما غسلي ورتاحي وعوفيها على الله هو ارحم الراحمين وان شاءالله كلشي ينحل باجر هسه گومي اتوضي وصلي واكو رب رحيم ايحلها الج 

اتشكرت منها وگمت وياها اغسل واتوضى شفت اثنين بنات بالمطبخ يحضرن بالعشا اعمارهن تقريباً بعمري ونفس الشكل اعتقد توأم

وجهال ثنين صغار يلعبون بالصاله 

و ابو احمد متوجه للقبله رافع اديه أيكبر بده ايصلي احس كاعده اشوف ابويا كلشي أيذكرني بأهلي 

ام احمد واكفه يمي دخلت غسلت وتوضيت وطلعت 

رجعتني النفس الغرفه صليت وما ونشفت دمعتي ولا لحضه بس اردد بأدعيه حافظتهم من جنت اصغيره اسمعهم من أمي اترددزبيهم على طول 

واحاول اكون طبيعيه 

شويه ودخلن البنات سلمن عليه وفرشن السفره وينقلن بالأكل

وام احمد عرفتني عليهن 

:- هذني بناتي تاشرلي عليهن هاي 

هدى وهاي سرى توأم: 

نفس الخلقه سبحان الله ما اميز بينهن 

اشوفهن يسولفن ويضحكن ابيناتهن 

سلمن عليه من بعيد وطلعن 

صاحتني ام احمد انزل اتعشا اتعذرتها ما اكدر أكل يا نفس تهوا الأكل بهاي حالتي وشلون أكدر واني ميتلي عزيز النار بگلبي ما تطفى 

لو الخوف من وارث اتوقع بكل لحضه يدخل عليه ويسحبني من شعري 

بقت تسولف وياي وتريد تسحب من عندي حجي ومعلومات عن اهلي 

كوه ارد عليها 

اجتها بنيه صغيره صاحتها بيبي جدو يصيحج كامت وياها شويه ورجعت دخلت كالت ابو احمد ايريد يدخل يسولف وياج عادي بنيتي 

ارتبكت وهزيتلها راسي بأي 

دخل ابو احمد سلم وكعد منزل راسه ويحاول يلطف الجو ويا احفاده يضحك وياهم 

دخلن بناتهم هدى وسرى كعدن يم ابوهن وكل العيون مركزه عليه يردون يعرفون شنو قصتي بالضبط

بدا ايسولف وياي وسئلني على اسمي واهلي وشنو سالفتي

:- حتى اكدر اساعدج عمو اخذي راحتج احسبي هذا البيت بيتج احنا الضيوف وانتي أم البيت 

اترددت اسولف بالبدايه 

بس اشوفهم خوش ناس وماعندي غير حل لازم احجيلهم سالفتي بالكي ايساعدوني ايوصلوني لهلي. 

بديت اسولفلهم وهم متفاجئين بقصتي 

وتعاطفو وياي من عرفو اخويه قبل يومين معدوم كلش اتأثرو وحتى ام احمد گامت تبجي وياي 

وابو احمد انفعل ويلوم بأهلي شلون قبلو ينطوني فصليه

:- ولكم وين بعد اكو فصليات بهل زمن شمالها العالم تخبلت ترجع الزمن الجاهليه

عاملوني بحنيه وتعاطفو وياي بشكل مو طبيعي عبالك ضيف عزيز عليهم جاي

بقيت ذاك اليل كاعده ما اكدر انام ابجي ولخوف متملكني واتگلب لما صار الصبح وكعدو واني بعدني صاحيه عبالهم جنت نايمه ميدرون ما حسيت بطعم النوم شلونه 

ڪعدو ابو احمد وام احمد طلعت يمهم شفتهم يتريڪون جبروني أڪل وياهم لفة جبن وچاي 

وكالي ابو احمد يله بابا حضري نفسج حتى اوصلج لهلج وارجع على وقت 

كمت كتله:- ماعندي شي جاهزه يله خلي نطلع 

كالت ام احمد اني اروح وياكم اوصلج وارجع 

كامت لبست بسرعه واجت طلعنه صعدنه السياره حركت مشينه الجو بارد وصوت القرأن مشتغل بصوت القارئ عبدالباسط مركزه بالكلمات واحس بشعور الاطمأنان واني اسمع سورة البقره صافنه اباوع على البيوت صار على الجامه ضباب ما اعرف بخار من النفس كمت اكتب عليها بأصبعي 

مره اكتب اسم الله 

مره اسم حسام  

ومره اسم وارث 

اكتب وامسح ويرجع ايصير بخار عليها واكتب من جديد وهستوها بدت تطلع الشمس اني كاعده ليوره وام احمد كاعده يم ابو احمد ليكدام 

وصلنه اطراف بغداد واشوف ابو احمد خفف سرعت السياره والتفت الام احمد ما اعرف شيحجي وياها بصوت خافت باوعت شفت سيطره ويمها هوسه وضباط يوكفون بالسيارات نشف دمي گلت بگلبي هاي هي يا ندى هاي نهايتج اكيد هذا وارث راح يلزمني كالي ابو احمد ...........

الفصل الواحد والثلاثون من هنا 

شكرا لزيارتكم عالم روايات سكيرهوم