رواية قصة وجدان الفصل التاسع والعشرون 29 بقلم انين الليل

من گعدت للصلاة الفجر رجعت نمت گعدت على طراطيش كلام كان الصوت مو مميز فتحت عيوني وباوعت

محد موجود بغرفة بيبي اتقربت على مصدر الصوت الي كان بره بالبستان سمعت عمو مهدي وهو ايگول

- - اي يمه گتلج انا مو وحد مثل ما بهاء اشتريتوله محل شكبره وشگده تشترولي مثله اذا مو احسن منه

بقيت. واگفه بصف الشباك بحيث اشوفهم وهمه ما يشوفوني بيبي ردت // مهدي من حجيت. وياي ذاك اليوم ما رديت عليك

تانييت عاصف انوب صارت حادثة بهاء وبعدها عاصف التهى وانوب راح البغداد. هسه انا حچيت ويا وهل

وديت عليك حتى يصير الحجي مكابل

اشرت بايدها // هذا اخوك وشتريد. تحچي گول

مهدي // انا حاچيتج يمه ليش بس بهاء اشتريتوله اسواق ليش مو حاله من حالي انا ازيد منه عدي مره وجهال

ومسووليه تكسر الظهر

بيبي // انت. عتبت عليه وكلت ليش ما احجي هسه انا حجييت وهذا اخوك يسمعك وانا وياك اكثر شي. وياك

عمو عاصف سال مهدي بكل برود وهو ينفخ الدخان من الجكاره :: مهدي انت تريد اسواق مثل بهاء ؟

هز راسه // اي عاصف

:: اشتري حبيبي محد لازمك

- - اي اشتري بس غير تطيني فلوس

نفخ الدخان من حلكه :: انطيك فلوس ماليش ؟

- - مثل ما. اطيت بهاء

:: غلطان حبيبي مهدي انا ما انطيت بهاء لو فلس احمر داينته تلث ملايين اي بس اطيته لا متوهم والكالك چذاب

— ها جا منين جاب فلوس المحلات

:: من شغله من ريع الكاع خمس سنين ضام الفلوس ما. صرف منهن فلس وكمل عليهن واشترا الاسواق انت هم

طلع ريع كاعك واشتري الي. تريده محد لازمك

مهدي اتلعثم وعدل كعدته // ها شني انوب ريع الكاع

:: اي ريع گاعك مال عشر سنين او اكثر وينه ؟

- - هذا شلون حجي اتجيب بهاء الي بهاء الخالي. مختلي وياي انا ابو العايله

هز راسه عاصف :: لا مهدي لهنا وحدك انت ما صارف ع العايله فلس احمر ( باوع البيبي ) ها حجيه

لو انا غلطان

بيبي // لا يمه ما غلطان مهدي. انت ما الك غرض لا بااكل فروخك ولا بطبيبهم ولا بلبسهم انت يجيك الريع صافي

     تخلي بجيبك ما تصرف منه دينار

مهدي بتوتر // ها هيج صار الحجي

بيبي // اي الحك حك يابني كله على عاصف بتك من تريدلها. جكليته توديها على عاصف يطيها ربع لو چذب

حتى من تردون ترحون للزياره تمر بعاصف وتاخذ مصرف زايد مو ناقص

عاصف اتثاوب :: لذلك حبيبي ابو محمد طلع فلوسك وركبتي سداده اجملك وانا ادري الفلوس العدك تكفي وتزيد

بيبي باوعتله وكانما تستفسر عاصف استردف كلامه :: اي يمه مثل ما سمعتي مهدي ايحمل بالبيكب وانطي كروه

ومن يوگف ويه العمال ما. يسوي شي بس واگف يباوع الهم اطي كروه يعني اذا ما يطلع من كراوي السياره.

بالشهر مليون مليون وربع

بيبي // صلاوات ما ادري

:: مو. كل شي اكوله يمه مهدي اخوي او وصية ابوي من مات الحجي.لهذا اليوم انا ما خليته يصرف دينار

بيبي // مهدي يمه هذا. اخوك وهذا حچيه وانت بكيفك

مهدي // حجيه دومج اتدافعيله ولا چني ابنج

- انت ابني وعاصف ابني وبهاء ابن ابني وما ادافع الاحد انت ردتني اوصله وانا ما وصلتله خليت الحجي مكابل

مهدي بعصبيه // وانا اريد اسواق حالي من حال بهاء. مثل ما بهاء يشتغل انا هم اشتغل

عاصف :: هذا شتحاچي مهدي خصم الحجي حالك من حال بهاء. اداينك بس الخاطر امي اداينك خمس ملايين وهذا العدي

مهدي // خمسه شتسوي ؟

عاصف :: ياخي طلع فلوسك

- - ما عدي

:: شني. ما عدك فلوسك وين ؟

- - ما عدي تسمي الشجم دينار فلوس وانت تلعب بالفلوس لعب روحات بغداد والمسجون والبيوت والقصور.

وانا عبالك مجدي يمك

عاصف رافع حواجبه :: شلك بهالحچي

- -اي هو هذا الحجي

:: يعني قصدك انا بايكك ؟

- - انا ما كلت هيج.

رد ابروده المعتاد :: وحتى لو گلت ما عليه بيك تريد محلات بيت سياره اشتري محد لازمك بس من فلوسك وتعبك

مهدي // وانا. ما عدي

:: بكيفك واذا ملزم على الاسواق بيع كاعك

بيبي //. عاصف

وكف وكح والجكاره بايده :: حجيه هذا العدي ابنج سنته كلها ربع دينار ما يصرف لا على بيت ولا على مسواك

اللحم انا اذبح من حلالي والسمج من البحيره مالتي والدجاج من الدواجن والمخضر من البستان اروح للولايه العلاكه الي

اجيبها البيتي اجيبها مضاعفه المهدي ومن النسوان يردن يرحن يشترن ملابس اول ما فلوس النهاد وبناتها

ذيج السنه گلي يرادلي بيكب اشتغل بيها اشتريها الي وانا اسددك وهاي صار خمس سنوات من اشتريتها فلس ما سداني

لو انا مچذب

كل هذا الشي ويكول ما عدي ويريدني اشتريله محلات اسمعني مهدي تريد تشتري اشتري انا افرح الك طلع

فلوسك واشتري ما امنعك بالعكس افرح الك لان انت ما تشتغل بالگاع حدك تاخذ المحصول تبيعه

باوع البيبي الي كانت مستغربه :: يمه انا ما امنع احد العده فلوس خلي يطلعهن يشتري وغير هذا الكلام ما عدي

عمو عاصف. طلع من الباب الثاني وبيبي باوعت المهدي واجت نهاد ورجاء الظاهر كانن واكفات ويتصنطن مثلي

بيبي باوعت الهن // ها چنتن تتسمعن

نهاد // عمه خفنا خاف يتعاركون

بيبي // انجبي نهاد شجوه راسج من خبر

نهاد تاشر على روحها // انا عمه ؟

هزت راسها // اي انتي بيش غالبينكم رجلج ابنج مشتغل بگد ما مشتغل عاصف وبهاء

نهاد // انتي دومج اتدافعين العاصف وبهاء وتنحازين الهم

بيبي // مو انتي چلبه ما يبين بيج بيش منحازه ولج هذا مهدي يسمعني انت يمه هم بعيد ذاكرني خال بايدي الف دينار

بيوم جايبلي علاج لو گاصلي دشداشه لو طبيب لو زياره شو صلوات ملتهي بيج ويوم وثاني يوم عاصف ناوشني

هسه تكولين انحاز العاصف اي انحاز وانحاز عاصف هلك نفسه ونساها الخاطيرنه ما نكر الربى ورجلج شايف

روحه نافخ نفسه ع الخالي بلاش كايدته عبالك طلي روح منا وتعال منا وبس اطوني ما عدي اريد خلولي

تستمر القصة أدناه

مهدي // يمه

بيبي بعصبيه // وغمه التغمك (باوعت النهاد ) شوفي ولج نهوده ترديلج اسواق سوي مثل ما سوه بهاء طلعي

ريع الكاع مال العام واول العام والسنه

ولمو فلوسكم العد اخوتج وتالي من ايعوز نجمله بس مال الفلوس ما ندري بيها وتردينه نشتريله اسواق نشتريله

انهيمه بكلبج وبكلبه

نهاد //. ها مهدي شكتلك

بيبي بابتسامه // ها ثاري انتي الكايلتله چا اسمعيني ولج خلي عاصف ساتر عليكم ما طولني عدله خلو يتسوك ويطي

مصرف لا تفلسون من كل شي رجلج مسحا ما يعرف ايكضله

هذوله الفلاليح العد عاصف يشتغلون بكاعه وبكاعكم فلاليح من الريع اشترو سيارات وقطع طابو وانتم كل شي ماكو

معتمدين على البنك العدكم يطيكم شتردون بعد ليش تلمون وتجمعون

نهاد // ما طول هيج سووله شغله خلي يستفاد منها

بيبي تهز براسها // اي يسويله اطو عاصف كاعه ويطيكم فلوس وشتسوون بيهن سوو بس تردون كاع

وفلوس ومحلات بعيده عنج تدرون كلش زين هذا الحلال حلال عاصف والتعب تعب عاصف والبيوت وكل شي

لو ما عاصف كل شي ما الكم

ترديلج شغله روحي جيبو فلوسكم من قاسم ورحمن وبعدين احجي

نهاد // يا عمه انوب رديتي على اخواني

بيبي // جا شلدالج ما ادري ماخذين الفلوس دين هاي صار سنين وابني مصخم وملطم ما يطالب بدينه جاي بحومته

على عاصف عبالك ماكل ورث ابو اسمعي انتي وانت مهدي حجايه خلوها ترجيه باذنكم

عاصف كل هذا الخير اله وكلنه ناكل من جوه ايده العاجبه عاجبه والما عاجبه يمشي وين ما يريد وتدرون

اليطلع بعد ما يرد

وكف مهدي وگال النهاد // ياالله امشي

هو طلع وهي ورا واتقربت رجاء على بيبي وهي اتكلها

- - عمه هواي قسيتي على مهدي ونهاد

بيبي بعصبيه // رجاء اسكتي تره ادري طابختها ويه اختج

- - عمه خطيه مهدي

بيبي // خوش ما دامه كاسر خاطرج ودي على اخوتج يردوله فلوسه

- - - جا عمه ما ماكلينهن اداينوهن

بيبي // اي اشترو بيهن تريلات هاي سنين ما ردوهن هسه لو كل سنه اشواي ايسدون هم جان خلصن

رجاء تحرك بيدها // شو ما ادري بس من يمي ويم اختي مسدوده للناس تحجيين وتطالبين

بيبي // يا ناس رجاء احجي لا تظلين اتبسمرين ياناس هذوله

- - كلهم بس مهدي من حچى وطالب كلتي وزته مرته

- - اي هو هذا الصدك وهذا حچيج بفلس ما اشتري ولو عدج شي احجي

رجاء // لا عليمن اسكت اكرملي

بيبي // لا احچي ليش اتسكتين تره اختج مباويه ابنج برزقه

رجاء// لا عمه مو هيج هي اتگول مثل ما بهاء اشتراله ملك مهدي هم عده عايله ويرادله شي اله ولفروخه

بيبي // بهاء من اتعيبه محد اطا هو وعاصف شتاهم كله بره لابسين جزمات ويسكون بالزرع وينامون بره

ومهدي نايم ودافي والصوبه عد راسه يريدله شغل خلي ايطلع تعبه ويشتري بي الي يريده

رجاء// عمه تره مهدي ابنج ومن يطلب يطلب حكه

بيبي // ابني وشاك كلبي وطالع بس ابني ما يعرف يتصرف وشتكول نهوده ايگلها صار وآميين

- - عمه نهوده المن تريده البيتها وجهالها عدها ولد باجر يردون عرس وعدها بنات

- - - اي الي تريده البيتها وجهالها تلزم حلال رجلها مو تودي لاخوانها

- - عمه دين

بيبي // وهسه اجه وكت يسدونه فهمي اختج تره عاصف ساكت الخاطري وخاطر الحجي بگبره اسمعي ولج رجاء

عاصف كلنه لو نشعله اصابعنه العشره شمع ما نوفي وانتي تدرين كلش زين فااختج خلي تلزم حدها احسن الها لاتعم

على روحها ورجلها ويصير الفلس حسره عليها

رجاء// عمه هي اختي من اول ما كعد حظها عود من اخذت مهدي يكعد حظها

بيبي باستهزاء// چا اذا نهاد ما گاعد حظها (تهز بايدها ) والله ما ادري خليها ما گاعد حظها كافي انتي

كعد حظج مرتين

رجاء ما ردت ودخلت للبيت وبيبي ردت // زعلت الخانم زعلت الراحو ولا ردو

بقت بيبي گاعده وتسبح واني اتمددت ع جربايتي واعض بشفتي من جوه مستغربه من الي سمعته وعرفت انو بيت جدي

عدهم هواي املاك وكلها العاصف بعد ان منطي كل واحد حقه زين اني ما سمعت ان ابويه منطينه من ورث حدي

رفعت اكتافي =. منو يگول ما منطينه هو بابا راح وامي ما تعرف شنو عنده وشنو ما عنده

نهضت واني اسمع كحة عمو وهو يحجي. . :: وينج رجاء

طلعت من المطبخ // هاي انا

:: روحي. يم سميره اغسلي السمچات زين واشويهن واريد خبز حار

عدنا خطار ؟

  : : لا شويت اثنين من تكملين تاخذين وحده البيت مهدي والثانيه النه اگلج شني بتج الهسه معلكه

- - اي نايمه

عمو عاصف وعمه رجاء من اجيت وهمه ولا يبينون زوجين عبالك اغراب وحتى فرح ما تجمع بيناتهم

اتذكرت ابويه وشلون كان يتصرف ويه امي بكره خد الجنون وعاصف هماتين لكن الفرق عاصف عايفها العمه

رجاء وما يضربها وبهاي العايله بس مهدي يحب زوجته ومداريها ولذلك عاصف وبهاء وحتى بيبي اسمعهم

دائما يرددون مسويته طلي وگايدته

ابتسمت لان اتخايلت شلون نهاد مسيطره على مهدي

راحت عمتي رجاء واجت بيبي تحاچي بعاصف // ها اهنا كعدت

  :: اي وين اولي

لاتقهر روحك مهدي فقير

:: كله من الحيه مرته

اكلك رجاء. وين

:: راحت يم سميره تشوي السمچات

اليوم غدانه سمج

:: اي حجيه وحده النه والبيت مهدي وحده وحتى جابر هم گتله اشويلك سمچه

عساك سالم والله يكثر خيرك

:: يمه مهدي حكه من يريدله ملك بس صدكيني. بسنه ايضيعه

- - ادري يمه ساتره علي الكاع وانت شايل كل شي

  :: وهو وين محصوله اطاهن. القاسم ورحمن وكعد

بيبي //. تدري عاصف عبالي البيكب الراكب بيها مالته مشتريها من فلوسه ما ادري بيك انت مشتريها اله

:: شنو يمه بس البيكب مهدي يصرف اكثر من عدي وكله ياخذه مني

ليش تطي يمه هلتعلم عليك

:: حجيه وصية ابوي من كلي ادير بالي علي

الله يرحمه ويحفظك ما قصرت

تستمر القصة أدناه

طلعت من الغرفه گلت = صباح الخير

ردو عليه ابرود اليوم حتى بيبي ما الها. خلكي رحت غسلت ورجعت للمطبخ حميت الجاي وطلعت جبنه كيري

بدون خبز اكلتها

سمعت صوت عمي عاصف :: جيبي.چاي

غسلت الكوب وصبيتله الچاي خليته ع الطبله وهو يخابر

  :: ها بهاء تجي تتغدا شوينه سمج

:: تعال قابل طايره الاسواق

:: اي تعال اتغدا وارجع

سمعت صوته :: تعاي وجدان

وصلت. يمه = بلي عمو

  ::بدلي الجاي برد

اخذت الكوب وبدلته للجاي. جبته وخليته كدامه وسالت بيبي = اجيبلج جاي

لا حبوبه ما اريد.

شرب الچاي وبيبي اتكله // اتعلمت على الكوابه شيبقى بيك.

:: شني يمه ؟

چاي وجكاير

:: شسوي اتعلمت

گبل تشربلك استكان ذ

  :: يمه دوخني ابنج ابو الاسواق

شتسويله يابني هذا حد عرفه

   :: لو ما وصية ابوي جان علمته بس وصاني بي

بيبي اتحسرت // ااخ يايمه شكثر حامل ضيم

   :: الله كريم حجيه الها يوم وتخلص

مرات احس كلامهم الغاز ما اعرف منه شي ومرات لا كلامهم مفهوم بس الي. عرفته انو عمو عاصف حمله ثكيل

رغم اشوفه هو المسيطر وبيده كل شي

رتبت. المطبخ وجبت خاولي زغير نظيف وبديت امسح بخشب للقنفات وبيبي اتباوع احسها معجبه بشغلي وصار الظهر.

وراحت بيبي اتصلي وعمو عاصف دخل غرفته واني هماتين اتوضييت وبديت اصلي ومن كملنه طلعت رحت للمطبخ

سويت لبن وحضرت ماي وطلعت تمر صحنين كلهن خليتهن على صفحه ع الطاوله لمن. ما سمعت بهاء وهو ايگول

وينكم نايمين

دخل للمطبخ شافني // ها انتي اهنا.

  = اي

وين جدتي

= بغرفتها

مد ايده على جيبه // هااج

جايبلي ككو باونتي بجوز الهند اخذته وكتله =شكرا

لاتاكلينه هسه اتشبعين ويفوتج السمج

هزيت راسي ورحت قبله للغرفه شافتني بيبي // اجه بهاء

=اي اجه

فتحت الثلاجه وخليت بيها الككو سمعت. صوته وهو ايكول // ياالله ياالله جده

فووت تعال هلا بيك

اشلونج جده

الله يسلمك

اتفرب // فكي ايدج جبتلج ذني

من يطوول عمرك چا تكضيهن اتجيب بيهن غير اتضم فلوس شغلك

بهاء // ما يغلى عليج شي

رفعت ايدها بالدعاء// عساك سالم شلونه الشغل

الحمد لله لا تنسيين تونه فكينا بعده ما معروف

هو شني تبيع بي بس حلويات

كل شي جده مواد غذائيه ومنزليه والعاب اطفال وملابس وكل شي

الله يرزقك بس مووش تنسى گاعك

لا حجيه شلون انسى كاعي بس هالوكت ما داام ماكو هلكد شغل

كعد علي ومن شاف بهاء ابتسم وهو ايكله // اششش لونك بهاااء

هلا علاوي البطل انت شلونك

زين

علاوي بعد ما اريد هلگد تنام اكعد يا اخي من وكت

ما رد علي وراح ايغسل دخل عاصف :: هاا اجيت

اي عمي

:: خاتل يم حبوبتك

هي الخير والبركه

::اشلونه الشغل

الحمد لله زين

:: اهم شي عمالك امينيين

ان شاالله

  :: والجرد شي مهم

اي صدك لاگاني حجي شريف.

:: چان يمي اتفقنا على حمل باجر ان. شاالله

شبيك عاصف شو مو على بعضك

:: لا ماكو شي

بهاء باوع البيبي واجت عمه رجاء وهي اتكول // ياالله صبيت الغدا

گامت بيبي وعمي عاصف وبهاء واني وراهم لكينه فرح بالمطبخ وبهاء ايكللها // شنو توج كاعده

اي وين اروح

اتحضري اسبوع الجاي. اخذج انتي وجدان

بيبي // وين تاخذهن

يتسوگن بس مو ابلاش

فرح // بطلنه عبالنه ابلاش

هههههه جا غير تراوفني تشترن مني توني امبسط

گعدنا ع السفره بالارض وصرنا ناكل وعاصف هو وبهاء يسولفون بالشغل والبيع والشرا لكن ما يمنع انو بهاء يختلس

النظر اليه بين فتره وفتره اني. كملت كلت = الحمد لله

وكفت رحت غسلت وطلعت القوري رجاء حاجتني // شتردين. اتسوين

= اخدر جاي

مخدره ع الحطب شويه واجيبه

بقيت كاعده. ع الكرسي لمن ما بدو ايكملون اكل وكامو ايغسلون واني. بلشت الم بالصحون بيبي كالت

فرح اتلمهن انتي. جيبي الاستكانات وتعاي

جابت عمه. القوري وصرت اصب بالچاي من انطيت البهاء گلي.

صبيلي بكوب

رحت اجيب كوب غسلته وصبيتله جاي انطيته اله هو لزم ايدي حسيت برجفه. بكل جسمي وبنفس الوقت خوف

ومن شرب الجاي. وگف وگال // راح ارتاح ساعه وانزل بدلي العلاوي خلي يروح وياي

باوعت. العمي عاصف ما عقب وعلي كلش فرح لان كلش متعلق ابهاء

و صار علووش داىما يروح ويه بهاء ويرجع فرحان ومرتاح

وبدت المدارس وداومنه اني وفرح بنفس المدرسه ويانه هاجر بت عمو مهدي الي نجحت للاول متوسط

وصرنا اذا نداوم الصبح بهاء ياخذنه وعمو عاصف ايرجعنه واذا دوامنه الظهر عمو عاصف ياخذنه ويرجعنه

وصار روتين حياتي ادرس وواكضي شغلي العليه وما اتدخل بااي شي اعتبرت نفسي ضيفه لفترة وقت الى ان

يطلع اخويه من السجن ونرجع البيتنا ابغداد وهذا الشي ( عدم تدخلي ) خلاني اتعامل مع الكل بمساحه وحده

بس طبعا مو بيبي وعمو عاصف لان ذوله اعتبرهم مسوولين عني بالوقت الحاضر

بيبي هي وعمو عاصف يحفزوني ع الدراسه ودائما اتكلي //ادرسي جده محد ايفيدج ادرسي

بيبي اتحفزني ع الدراسه اكثر من فرح الي ولا مره سمعتها اتگللها ادرسي وفسرت هذا الشي لان اني يتيمه

وفرح عدها امها وابوها واخوها

وبهاء مو داىما. اشوفه ومن اشوفه يقتصر كلامه سلام وسوال عن الدراسه

ونجحت بنصف السنه ودرجاتي زينات بين الثمانين والسبعين وعمو عاصف گلي شدي حيلج اكثر اما بهاء كال

المهم انريد هاي الدرجات بالسادس وداومنا النصف الثاني والفتره قصيره ولازم نكمل المواد والامتحانات على اوجها

وبيوم اني كنت اقرا بغرفة بيبي واجه مهدي ويا نهاد وبناته واولاده شاف بيبي كاعده بالصاله

ها يمه انتي اهنا

اي هلا بيك

تعالو بابا سلمو على جدتكم هم نعمة الله لگيناها بالهول لو بالحجره جان وكفتو بالسيطره

بيبي // مهدي هاي انت كل ما تجي تحجي يا ولدي يا حجرتج شبيك يمه شتريد

     مهدي بعصبيه // شني شريد هيه گراوه انا وفروخي ندش ونطلع بكيفنه وما نتاني فلانه تطلع لو تضم روحها

بيبي نفخت // استغفر الله شسويلك يمه ما تكبر حچايه تاخذك وحجايه تجيبك

- - ها گولي مرتك قاريه براسك

     - - شلك بهالحجي ولك انت ابن حجي غازي الزلمه اللوه الدنيا من لوته وغلبها ابنه ما تگوده مره

اجه عاصف :: ها يمه خير شصاير

ما صاير شي

:: صياحكم واصل للبزل وتگليلي ما بينه شي

بيبي لمت حلگها - - اي يمه ما بينه شي

عاصف صاحني :: تعاي وجدان

   طلعت من الغرفه = ها عمو

:: عمو يوميه تلمين جدولج وجدول اخوج وتدرسين بحجرتي لان عمج مهدي يحب من يجي هو ومرته وفروخه 

يكعد بحجرة حبوبتج هو متعلم ما يرتاح اله يگعد بحجرتها افتهمتي

هزيت راسي =. بلي عمو

:: ياالله فوتي

نهاد // عاد تكليله طال عمرك اشكرك بس ها عمو وبلي عمو

مهدي باستهزاء //. خليها نهوده شتعرف

كلام مهدي نرفزني لذلك اتقربت على عمو عاصف وبسته بخده وكتله = شكرا عمو الله يخليك اليه يااحن گلب بالدنيا

  هو گلي :: روحي بوسي عمج مهدي هذا گلبه ذهب صافي

باوعت العاصف هزلي راسه وابتسم اني سويت مثل ما گلي بست مهدي والي هو ما بين اي ردة فعل اتجاهي 

وبيبي تكلي // الله يرضى عليج وينجحج

رحت للغرفه واسمعه حجى ويه ساره :: وانتي بابا ساره هذا بيتج شتردين تسوين بي سوي انتي وخالتج وامج اتطبخيين

تسوين كيك جاي سوي الثلاجه متروسه والكاونتر غاص خير من الله

بيبي //. الله يطول عمرك ويخليك

اخذت كتبي ورحت دخلت الغرفة عمو حسيت انو عمي نصرني وانو خايف على مستقبلي حسيت بحب بيبي اليه

يمكن حتى ما تحب كل احفادها بكد ما تحبني (طبعا مو بكد ما تحب بهاء )

اول مره اتفحصها للغرفه كنت مرات من ادخل اطلع بسرعه لان عمو موجود بيها قبل لاندخل بيها كان اكو باب

مثل الكليدور وبي بابين باب للغرفه وباب للحمام كانت غرفه كبيره بكد غرفة بيبي وبيها كنتور وجربايه وميز

وحوالي كراسي اثنين وقنفتين كانت مرتبه ونظيفه ومعطره مع العلم ولامره شفت عمه رجاء او فرح نظفتها

كعدت اقرا بدون ما اسمع صوت العمو مهدي وعاىلته بعدها بساعتين طلعت وما شفت احد بالصاله الظاهر راحو

اجيت ادخل للغرفه سمعت بيبي اتكله // يمه زين اتسوي خلي البنيه تقرا بحجرتك

:: اي حجيه وين تروح

- - الله يطول عمرك ويخليك خيمه فوك راسها

:: الي معجبني مهدي شبي وياها

- - مو منه يمه

:: يبقى عربانه وين ما تدفعه نهاد يمشي

بيبي // مو بس نهاد هسه ساره ومحمد كل واحد ماخذ بي راك هاي العجيز لعبت باحواله كلمن وقسمته

حمحمت ودخلت بيبي كالت // ها قريتي

= اي بيبي

- - خوش حضرتي هدومج مال المدرسه

هزيت راسي بيبي //. ليش واگفه

  باوعت العمو عاصف = عمو اني بس من يجون بيت (مه ) عمو مهدي ادخل غرفتك

  

نفخ الدخان :: وليش ؟

= عمو ما يصير خصوصيتك انت من حقك ترتاح بيها هنوب اجي اني

اخذ نفس من الجگاره وحجى :: اني على كولتج ارتاح من انتي اتدرسين مو هيج يمه

بيبي هزت راسها // اي جده ادرسي

  = اني دا ادرس اهنايه بس عمو مبصير اني ابقى بغرفتك انت خطيه تجي تعبان ما...

   ابتسم رفع ايده :: انا خطيه خوش انا قابل اقري بالمكان الي يعجبج

هزيت راسي رجع سالني :: يمته تذبين حزنج

فتحت عيوني هو هز راسه :: مو كافي اسود ؟

دنكت وجاوبته = لا عمو مو كافي

بيبي // انتي بعدج حديثه والاسود مو زين عليج

بقيت ساكته هو جاوب :: خليها براحتها يمه من تريد اتفك حزنها اتكلج وانا اخذها للولايه تشتري هدوم على ذوقها

وگف وكال :: ياالله تصبحون على خير

راح عمو وبيبي حاچتني // جده مو كل ما يحاچيج عمج لا ولا طيعي شويه

استغربت = بيبي اني شنو كايله اني ما اريد انزع الاسود هي امي منو بقى يتذكرها هو بس اني

بيبي // خايبه الاسود ما يجيب شي والحزن ما يخلف بس المرض والتعب شوفيني انا من ياسنين لابسه وشحصلت

كل شي ماكو

= شكد صارلج بيبي ؟

هزت ايدها // اوو من زمان

= يعني اكثر مني

اتحسرت // اي جده كبل لا تصيرين وكبل

جاوبتها بفضول = حيييل كل هذا العمر لابسه اسود

برطمت // وشحصلت كل شي ماكو

اتمددت واني اسمع ترانيم بيبي الشجيه

نمت وكعدت الفجر صليت ورجعت نمت كان دوامنا صباحي كعدت غسلت ورحت للمطبخ شفت عمه رجاء سلمت

= صباح الخير

صباح النور

اخذت كوب وصبيت جاي ونزل بهاء // صباح الخير

=صباح النور

باوعلي وگال العمه // يمه سويلي بيض

اي هسه

- - هاي الخاتون بعدهي ما گاعده مو عدها دوام

- - هي تكعد تغسل وتبدل ما تدري بيها ما تاكل اله الضحى

اتقربت عليه رجاء وسالتني //. اگلج البنات هالوكت ما يتريكن اله الظهر ومرات هو غدا هو ريوك جا انتي

شعجب تتريكين الصبح

= بابا الله يرحمه علمنه لازم نتريك لذلك اتعودت

بهاء //. يمه نظام العسكر

- - ايي مو هالاگول

كملت وگمت گلت = الحمد لله

غسلت الكوب وطلعت فرشت اسناني ورحت كعدت علي الي بالگوه يگعد راح غسل وما قبل يتريك بدلتله واني اوصي بي

= انتبه زين للمعلمه واسمع شتگول مو تخلصها بس لعب

= من تجي اشوف جدولك تتغدى وتنام ساعتين وبعدين ندرس سمعت علووش ندرس مو نخلصها لعب

ويه ابراهيم واولاد عمو جابر

ما جاوبني اني بدلت ع السريع واخذت جدولي وبيبي تنطيني مصرف واني ما اخذه بس هي اتصر عليه اخذه وارجعه

الها. من ارجع للبيت لان ما يعجبني اشتري شي

طلعنه اريد اصعد بالسياره شفت بهاء واكف كانو منتظرني من شافني مشى بصفي وگلي // بعد ممنوع تبوسين احد ايا كان

استغربت كلامه ركبت بدون ما احچي وبذهني سوال = منو يقصد ؟

اتذكرت البارحه لمن بست عمو بس هو ما كان موجود لعد هو يقصد منو

نزلنه بدون ما اجاوبه والظهر كان يجينه عمو عاصف

ابعض المرات او هنه مرتين اجانه عمو مهدي لان كان عمو عاصف عنده شغل فما گدر ايمر ياخذنه

وبااول مره اجانه بيها مهدي ركبت بنته بالصدر واني وفرح وره والطريق كله يسولف ويه هاجر وفرح

واني ولاكانه موجوده ما اهتمييت لان ادري بمهدي ما يحبني وما يريدني اساسا موجوده

المره الثانيه تقريبا وره اسبوعين لمن ما اجانه وركبنه بعد ان سلمنه وصار يسال ابنته // شلونج بالمدرسه

- - خو محد ماذيج اذا وحده من صفج طگتج لو تعاركت وياج طگيها مو تعبرينها

واذا اكبر منج روحي الفرح وهي تعرف شغلها وياها مو تسكتين وينوكل حكج

اني حجيت بلا قصد = لا عمو خليها تشتكي عد المدرسه او المديره

ما صارت عليه كلمه ظل ايعيط // هاي ابغداد انتي مدنيه وترحين تشتكين احنه ناس عرب ناخذ حگنا بيدنا

عود من تجيج لا تشكينها

رفعت اكتافي = مدا اقصود عمو كول ...

قاطعني بعصبيه // - - ولج لا تعوجين حلكج لا اشكه انتي المثلج تبطليين وتبقيين بالبيت بس هذا عاصف وامي همه

الطلعو عينج لو تردلي ابطلج وما اخليج تعتبين الباب

استغربت من كلامه واتذكرت وصية عاصف من كلي

:: لاتعوفين حقج

جاوبته. = عمو اني محجييت شي بعدين محد يكدر ايبطلني لان اني مو كسلانه ولا غلطت حتى ابطل

اشو هذا نزل وفتح باب السياره وكمشني من صدريتي نزلني وضربني راشدي

- - بت الكلب لا تراددين مره ثانيه اخليج جوه ويل السياره

- - انا اعلمج ياطايحة الحظ

ما اتحملت صرت ابجي حييل هو ركب وگلي // اصعدي ومن اوصل انا اعلمج

هزيت راسي بلا يعني ما اركب وصرت امشي هو ساق السياره وصل يمي // اركبي لا ادعمج واحسب الله ما خلقج

بصراحه خفت وانا اشوف بعيون مهدي كم من الكره ضامه بگلبه

ركبت يم فرح الي اشوفها ساكته ومتفاجىه وهو يحچي

- - مسجلها حضرة عاصف بالمدرسه ومتكبره وشايفه روحها شوفه ما ادري عليمن

ما جاوبته وگف السياره يم بيته ونزلنه فرح دخلت واني بقيت گاعده بره ما دخلت لان شفت سيارة عمو ما موجوده

بقيت كاعده لمن ما طلعت عمه رجاء سالتني // ليش گاعده اهنا

= منتظره عمو

- - ليش يا ستار

= رايدته

- - اي فوتي بدلي وتاني بالبيت

= لا ايهنا انتظره يجي

- - شصاير ؟

اتنفست بعمق = مصاير شي اريد عمو

- - فوتي بدلي هدومج وهسه نصب غدا واتغدي وتاني

هزيت راسي = لا ابقى منتظرته

- - يتعطل عده شغل

:: لو يبقى الباچر هماتين ما ادخل اله يجي

راحت عمه رجاء وطلعت بيبي وهي تسالني //. جده ليش گاعده اهنا

= مي خالف

ياهو وياج

بجييت = محد

- - چا الا محد ليش ما تطبين وليش تبچيين

= منتظره عمو رايدته

- - شتردين منه

= رايدته

- - فوتي اتغدي ومن يجي احچي ويا

هزيت راسي = ما ادخل

- - ولج شصاير ؟

= اريده العمو

بيبي حجت ويه فرح الي واگفه ولامه حلكها // فريحه شصاير

- - ما صاير شي

- - ها الفرخه مخنوگه وگاعده بالجول وانتي تگولين ما صاير شي

فرح // جده عمي مهدي حچى عليها

- - ها مهيدي شيريد منها ؟

رجاء //. عمه ما تعرفينه مهدي يتشاقى

بيبي بعصبيه // اگلج رجاء تره مهدي ابني لا تحشميله

رجاء // يا فووك ما اريد تصير مشكله

- - هاا چا بتج گايلتلج وانتي وياها مدستراتها

فرح // انا شعليه جده مالي غرض ( راحت تمشي ) ههههي هاي لو انا محد بحالي

بيبي // وبيش غالبتج ( مدت ايدها ) گومي وياي

هزيت راسي = وروح ماما. ما اخش للبيت اله يجي عمو عاصف

- - گليلي وانا اروح المهدي العب بي طوبه

بقيت مدنگه وهي اتكلي //هسه ما تقدريني وتگومين وياي

نزلت دموعي حركن خدودي وانا مدنكه وبيبي حسيت بيها زعلت لكن اما اهتمييت لان دا احس انو روحي فارغه

خاويه اريد بس متنفس ارتاح بقيت گاعده وحسيت ابرد وجوع لكن قهرة گلبي كانت اكبر من هذا الشي الي دا احسه

اجه مهدي شافني گاعده //. ها ولج ليش ما تدشين للبيت

= منتظره عمو

وعمه العماج فوتي دشي لا اموتج

= ما ادخل اله يجي عمو

نهاد //. شني تردين تشتكيله على مهدي

رغم خايفه من مهدي بس عندي احساس انو همه خايفين لا عاصف يعرف بلسوا مهدي وياي

مهدي //. فوتي ادخلي ولا تفكيين حلگج بكلمه

اهنا طلع ظني بمكانه وگفت وحاجيته = يجي عمو لو ايبطلني لو ايرجعني البيتنه

هو عض اصبعه بعصبيه ونهاد لزمته // تعال مهدي خليها تولي بلكي عاصف ايوديها البغداد ونفتك

—. اي على مود تستهتر بالزايد بس سهله انا الج اعلمج اتهددني بعاصف بت ال...ره

ما هانت عليه نفسي صارن دموعي يجرن امسح بيهن ويرجعن ينزلن حتى خدي احس بي صار يحركني

تقريبا بالاربعه اجه عمو عاصف شافني كاعده وجهه انعقج بس شفته وكفت وصل يمي وگال بدون ما يسالني

:: فوتي ادخلي

دخلت وعمه رجاء واگفه دخلنه الوسط الصاله عاط بصوته :: فرح فرح

رجاء // اظنها نايمه

رد بعصبيه :: فوتي اندهيها بساع لا اصعد اجيبها سح ع البايات

اني بس ابچي بسكته واسحب بخشمي طلعت بيبي // ها يمه اجيت الله يساعدك

::هلا يمه

نزلت فرح بعدهي بالبايه ما قبل الاخيره حاجاها بعصبيه وهو يحرك بايده

:: بسرعه بدون لازياده ولا نقصان اتگليلي شبيها بت عمج

بلعت ريگها // بابا انا ما عليه ويه عمي مهدي

:: شبي وياها

- - بابا جاي ايحاجي ابته وهي حشرت روحها ابياتهم

رد عليها باستهزاء :: هاا. (باوعلي ) شلون حشرت روحها

فرح بلعت ريگها // بابا كال الهاجر اذا وحده من البنات تضوجج طگيها واذا اكبر منج تعاي البت عمج

( اشرت على نفسها ) وهي تعرف شغلها وياهن

:: ايي وجدان شدخلها

- - هي گالتله لا عمو كللها خلي تشتكي عد المديره وهو ما قبل گام ايصيح عليها وهي اترادده اووو

فر ايده :: اوو شني ؟

فرح بخوف // نزل وفك الباب وطگاها وسب ابوها

رفع حواجبه :: هاا

هزت راسها // اي وگال عاصف جابها وفرضها علينه وانتي ما متربيه واله اطيح حظج وركب عمي وهي ما رضت

تركب تالي كللها اذا ما تركبين ادعمج مووت

دار عليه وهو عاض شفته :: فوتي غسلي وبدلي

جاوبته واني اشهك = عمو بعد ما ارووح للمدرسه اب....

قاطعني :: شگلت روحي غسلي وتعاي رجاء صبيلنه غدا

= عمو حتى قبل شويه اجه هو ومرته وصار يت...

قاطعني :: اغسلي وجهج وتعاي

بيبي // توسلنه ردنا ولج دشي تعاي تغدي ما تقبل

:: ولج فرح

— ها بويه

:: من شفتي بت عمج انطگت ونزلت من السياره ليش ما تزلتي وياها

رجاء باستغراب // ياا عاصف

وجه كلامه الفرح هز راسه ::اي تنزلين وياها لان انتن عايشات سوا

اجيت من المغسله وردت ادخل الغرفة بيبي هو گال :: تعاي اكلي وتالي بدلي ويصير خير

راح قبلي للمطبخ ورجاء گالت وهي صاكه اسنونها // فلشج من وراج هسه الاخوان يتعاركون

ما جاوبتها ودخلت للمطبخ كعدت ع الكرسي مقابيله واجت بيبي سالها :: تاكلين

- - لا اتغديت

رجاء // وين عمه من الهبطه حتى ما اكلتي

رد وهو يشرب اللبن وكأن ما صار شي :: عاديه بس اريد اعرف مهدي شنو ويتهدد عليها وهي متانيتني

بيبي //. شوف منو گاله

رجاء // عمه ياهو الكاله مو شفتينه بالبيت وكلساع نجهب عليها

صرت اكل وانا عيني بالصحن خفت منه ان يخلي اللوم عليه گال :: فرح فرح

اجت // ها بابا

::متغديه

— اي بابا اكلت

:: بعد اذا ما اجي عليجن تجن مشي

رفعت راسي وفرح مستغربه هو رد :: اي تجن مشي شو درب وسالك

فرح بامتعاض // بابا بعيد كلش شيمشينه

:: بعيد قريب تمشن على راك الشارع ما عليچن شي

    بيبي // بس يمه ما ترهم يجن مشي

:: انا. كايل يوميه يمشن لو بس اليوم الي يصير عدي شغل

رجاء // چا ومهدي

:: مهدي ياخذ بته ماعلي لا. بوجدان ولا بفرح

بيبي // هو هذا شلون. حچي

:: هذا الحجي سمعتي فرح

هزت راسها // اي بابا

بيبي //. مو هيج الحجي

:: ياحجي يمه ؟

بيبي // يجن مشي

:: حجيه مو يوميه

- - هذا هو تشوفلهن خط يوصلهن حتى لا انت ولا بهاء مشلوع كلبك بيهن

هز ايده :: هو انا لاكي خط وما ماجره ( غمض كانما اتذكر ) هم زين ذكرتيني باجر اشوف ابو الخط الاجت ويا فرح

واتفاهم ويا

فرح // بابا ما كو مكان.

:: مو يوميه انشكلن وياهن بس باليوم الما اجيجن بي عسا ما توكفن تجن ويا وتنزلن على دربنا

رجاء بقلة صبر // هي شني عاصف عمها. وزهك عليها

وكف وكال :: الحمد لله (باوعلي ) روحي بدلي  

وصل يم رجاء :: تره ادري انتي الخابرتي اختج واجت هي ومهدي

رجاء ما ردت بكلمه غسلت ورجعت الغرفة بيبي غيرت ملابسي واتمددت غفيت كعدت شفت الدنيا ظلمه

ما اعرف بيش الساعه كل الي سويته مديت ايدي فوك للجربايه حتى اتاكد علاوي نايم من اتاكدت رجعت اتغطيت ونمت

ما كعدت اله الصبح صليت ورجعت اتمددت يمكن الساعه بالسبعه او اكثر بيبي ندهتني

شني جده بس نوم ما وراج دراسه

فتحت عيوني = صباح الخير

صباح النور اكعدي تريكي وادرسي وحضري هدومج

كعدت على حيلي بيبي تكلي // تدرين شكد نمتي حتى علاوي ريكته وبدل وراح للمدرسه وانتي عبالك طايحه من جبل

رحت اغسل ودخلت للمطبخ محد موجود

اجت بيبي وگعدت ع الكرسي وحاجتني // كومي صبيلج ريوك

هزيت راسي فتحت الطاوه الي فوكها صينيه سالتها = هذا البيض المن

- - للياكل طلعي واكلي

خليته بصحن اكلت شويه وشربت جاي

كملت غسلت الصحن والكوب وطلعت رحت الغرفة بيبي فتحت الشبابيك وطلعت كتبي ورحت للصاله حتى اقرا

لان دوامي الظهر انهمكت بالقراءه. كعدت بالارض وصرت اكتب حسيت واحد واكف رفعت. راسي شفته

بهاء وهو مبتسم

— - - خوش اتعلمتي اتكعدين بالكاع وتقرين

ما. جاوبته اكتفيت ابتسمت

البارحه اجيت وما شفتج

= نايمه

- - اي انتي تنامين وانا مشتعل

بقيت مدنكه ع الكتاب حاجاني // ليش ساكته ما تردين.

اتنفس بعمق //زين انا مكتوب عليه يمي وبنفس البيت وما اشوفج

كعد. ع القنفه وكلي وهو يتلفت // احبج انتي ما تعرفين شني احبج كليلي احبك حتى اطمن

بقيت مدنكه ما. جاوبته صار ينفخ وگلي

- - لو بس اعرف شبيج منين خايفه

بقيت. ساكته بدون جواب وعيني بالكتاب لمن ما اجت عمه رجاء

- - ها يمه. كعدت

- - اي توني وما لكيتج

— - طلعت للبستان شعجب اليوم ما طالع من وكت

   - - گعدت الصبح ورديت نمت تعبان شويه

    - - اذا تعبان لاتروح

    - - لا من نمت كعدت شويه مرتاح

        — تتريك ؟

- - اي

راحت للمطبخ ورجعت سالتني // انا مسويه بيض انتي اكلتي

هزيت راسي هو جاوب //يمه بالعافيه

—- اي. بالعافيه هسه شسويلك

- - - اي شي انا اول وتالي اتريك ويه العمال

راح للمطبخ وسال امه // يمه ليش ضايجه ؟

رجاء // ما شفت عاصف شسوى بمهدي

- - يمه مهدي يستاهل كل جفصه ماكو اختها

- - يايا انت هم ؟

- - يمه انتي اتدافعيله على مود اختج

- - حگك ما شفته من راح المهدي غاسل مجاديفه

بهاء // يستاهل ولو ما رايح عاصف انا اروح على اي اساس يطكها ويريد يدعمها

جاوبت بعصبيه // تره ما سب العنب وبعدين فرح تكول هي مدت السانها شطوله

بهاء باستهزاء// ياهي السانها شطوله وجدان

- 0 اي لاتشوفها خوينسه كل البلى من جوه راسها

- -حتى لو ما اله حق يطكها راشدي

- -عمها

- - ندري عمها جا عمها ايطكها

- - اوو انت مثل عاصف ما تتحاجون هاك اتريك وروح الشغلك مو ظليت تلح اريد اسواق اريد ملك ياالله اتريك

ولا تتاخر على شغلك

بهاء // رايح بس انت لا تضوج ياحلو

طلع وباوعلي وهو يحرك شفايفه احبج وياشر على كلبه

ما اكلكم ما اهتميت الكلامه بس كان اهم شي عدي انجح ومن يومها عاصف ما اتاخر علينه ومهدي صار يجي وما يحجي

وياي لان اساسا اني ما اطلع من يجون كله اقرا بغرفة عاصف واقري علاوي ومن اكمل دراستي ارتبها للغرفه الي

هي بالاساس مرتبه ونظيفه واطلع منها

امتحنا نصف السنه ونجحت انا وفرح هم نجحت وبالعطله مالت البكلوريا كله اقرا واتجنب ما اشوف اي احد والي اقصده

مهدي حتى ما اسمع منه كلمه وبهاء ابتعد عني ومن يجي ويصادفني مجرد بس سلام وكلام وحث ع الدراسه

اما هشام فتقريبا كل شهر يخابرني من نقال عمو الساعه بالوحده بعد نص الليل وبس يسلم عليه. ويسالني على مدرستي

وعلى علاوي ويوصيني ادير بالي

وامتحنت وانتظرت نتيجتي ومن طلعت النتايج اجه عمي عاصف وكلي انو اني نجحت ما اوصف فرحتي وانا حاضنه عمو

  ومره ابچي ومره اضحك ورحت البيبي وحضنتها وكانما اگللها لو ما انتي وعمو اني ما نجحت

وثاني يوم عاصف وره الظهر كال :: ياالله انتي وامي وفرح خلي نروح للزياره

بهاء // وانا وياكم

= عمو خلي ناخذ علي

  :: اي وعلاوي هم

بيبي سالت رجاء//وانتي عمه ؟

   ردت بدون اهتمام //. لا ما اروح

  بيبي // بكيفج

  فرح // بس بابا ما محضرين نفسنا

  :: بشنو بس ملابسجن والعبايه

لبست علي ع السريع ولبست تراك اسود وعباية راس وما نسيت علاج بيبي ورحنه بسرعه صارت سفرتنا

وصلنه تقريبا الساعه ثمانيه وعمو وبهاء مشو حتى يشوفولنه فندق الى ان اجو واخذونه الفندق انا وبيبي وفرح

بغرفه بيها تلث اسره

كعدنا ورحنه غسلنه واندك الباب طلعت فرح // هذا بابا

فووت يمه

:: ها شلونكم

الحمد لله

:: راح ازور مني تروح وياي

تستمر القصة أدناه

بيبي // لايمه شو ما بيه حييل اخذ البنات

   :: شلون اخذهن وتظلين بوحدج

  فرح // بابا اريداروح ازور

   :: هاا

   جاوبت = عمو اني ابقى يم بيبي انتو روحو

   هز راسه :: خوش عود گلت كلنه نروح نزور ونتعشى بمطعم

  بيبي // روحو يمه وانا ما عليه شي حتى وجدان اخذوها وياكم

   هزيت راسي = لا بيبي ما اعوفج

:: خوش من ارجع اجيب عشا وياي ( باوعلي ) وادا جوعانات فلوس عد جدتج انزلي اشتري من المحل الجوه

اي شي على ما نرجع

بيبي // لا يمه منين جوعانه شو دربنا كله واحنه ناكل

فرح // ياالله بابا اتاخرنا

:: ياالله

راحو واني بقيت ويه بيبي هي گالت // لو رايحه وياهم ياجده

ابتسمت = لا شلون اخليج ابحدج الصبح ان شاالله نروح

ان شاالله

= رايده شي اجيبلج

لا جده اذا تردين انتي شي انزلي واشتري هاج هذا الجيزدان

رجعت ايدها. = لا ما اريد

بقينه متمددات كلمن على جربايتها اندك الباب خليت شالي على شعري = منوو

انا بهاء

فتحت الباب // شني نايمات

= لا

ويا علي دخلو // ها جده شلونج

هله بيك زرت

اي رحنه انا وعلاوي زرنا اجيت ما لگيت عاصف

اي مو راح هو وفرح يزورون

باوعلي وسالني // وانتي

= بيبي تعبانه بقيت يمها

ها وما اتعشيتن مو

= عمو يجي ويجيب ويا

لا انا نازل

بيبي // وين نازل ؟

جوه يمهم واحد يسوي كباب راح اجيب لفات واجي

= مو عمو كال يجيب النه ويا

مو مشكله راح ادزله رساله اكله انا جبت عشا تنزلين وياي

هزيت راسي بالنفي هونزل وغاب ربع ساعه واجه جايب لفات وعصير وببسي

— ها تصبيره على ما يجي عاصف

= لا تصبيرتيش هسه ناكل ونام

ها يعني ادزله مسج ما يجيب ويا شي

هزيت راسي وبيبي كالت // اي

صرنا ناكل احنه الاربعه ومن كمل سال بيبي // تردين اجيبلج جاي

اي والله راسي حييل يوجعني

بعد راسي جده وانتي

هزيت راسي هو سالني // يعني تردين ؟

= بلي

بالخدمه

= شكرا

راح وصل للباب ورجع سال بيبي // عود ليش بت ابنج تتماوع من تحجي

بيبي بابتسامه مخفيه // تروح روح ياالله گبل لا يعزلون

ما يعزلون يبقون للصبح

راح واني وعلاوي بقينه گاعدين سالته = علووش خو ما تعبان

لا () ما تتعبان

= حبيبي

بهاء دك الباب وعلي فتحله جايب تلث اكوابه جاي انطى واحد البيبي واني اخذت واحد وهو واحد لان علاوي ما راد

دخن جگاره بيبي حجت // هاي انت هم خذيت درب عمك چاي وجگاير

—- چا وانتي على اساس ما تدخنين

   —- خايب غير اخاف عليك

  - - - شسوي جده من ضيمي

——. اسم الله عليك من الضيم ياضيم هذا التحچي علي

اتنفس بعمق // عدي ضيم محد داري بي حامله اهنا ( اشر على كلبه ) وساكت

بيبي // ما دامك سالم وعاصف فوك راسك وانا عدله ما يجيسك ضيم

اتقرب منها وباسها براسها // تردين اتعرفين شبيه

بصراحه خفت لا بهاء يحچي البيبي صرت اباوعله بترجي هي ردت

اي گلي شبيك

صار يباوعلي ويحجي // والله ياحجيه فرحه ياطيبه يابت الطيبه لو بس اتطلعيلي العدج ارتاح

  بيبي دفعته // خايب شعدي هسه اليسمعك شيگول ها

شيكول واحد يم حبوبته الي يحبها ويمووت عليها

عرفت الكلام موجه الي بعدها بيبي گالت // كافي شو صاير اخفيف وياالله اطلع نريد انام

  - - افه جده طردتيني هسه وجدان تتشمت بيه

   - - عليمن تتشمت هي هم تعبانه وتريد اتنام

ما رديت عليها وهو طلع وگال // تصبحون على خير واتمددت بيبي بعد ان كالت // طفي الگلوب

طفيت الگلوب وما اعرف شكد مر من الوقت سمعت دك ع الباب اجت فرح وياها عمو سالني :: شنو نايمات ؟

جاوبته بنعاس = اي عمو

:: اتعيشتي مو

= اي بهاء جاب لفات

هز راسه :: تصبحين على خير

اتاوبنت = وانت من اهله

نمنا وكعدت الفجر صليت اني وبيبي الي گالت // خلي نروح نزور

= لعد وفرح انخليها ابحدها

شوفيها اذا تريد تجي ويانه

= فرح فرح

جاوبتني وهي مغمضه امم

= اكعدي ترحين ويانه تزورين

  فتحت عيونها // لا ما بيه حيل اريد انام

  باوعت البيبي = وهسه ؟

  - - دكي الباب على عمج خلي يجي يمها لو هو لو بهاء

رحت دگيت الباب عمو راسا فتح الباب =. صباح الخير

   :: صباح النور ها

= عمو مو اني وبيبي دا نروح انزور وفرح بقت نايمه

:: روحي زوري بس لاتتاخرن وارجعي اهنا

  = اي عمو

بهاء اجه وحچى ويه عمو // خو ما يرحن ابحدهن انا اروح وياهن نتلاكه يم ام جاسم

  :: اي رووح مو تتعطلون والزم حبوبتك زين

رحنا اني وبيبي ويانه بهاء نتمشى هوا الصبح منعش واني لازمه ابيبي وبهاء يمشي بالجهه الثانيه ويباوعلي ويبتسم

وصلنه للامام وزرنا ومثل كل مره دموعي سابقتني ومن دخلنه نزور بهاء كلي // ادعيلي

وراح يم بيبي باس ايدها وكللها // جده ادعيلي الله يحقق امنيتي

رفعت ايدها // ان شاالله يفرحك رب العالمين بجاه محمد وآل محمد

  كملنه زياره وطلعنه وصار يمشي قبلنه الى ان وصلنه يم مريه تبيع كيمر شفت فرح وعلاوي كاعدين على صفحه واجت بيبي صبحت المره بالخير وهي كامت باوستها عبالك تعرفها وهي اتكلها //. هلا بالحجيه اشلون صحتج

زينه يابعد روحي اشلون عويلج

الحمد لله بخير بصاية الله وابو الحسن علي

والنعم خير من ندبتي واتوكلتي

راحت بيبي وگعدت وبهاء جاب كيمر وصمون حار وجاي اكلنه وفعلا الكيمر كان طيب كلش حاسبها عاصف وهي تدعي

اله بطول العمر والرزق وسلمت على بيبي وهي تدعيلها بالعمر والصحه

بعدها وصلنه للكراج الي بي سيارتنه وركبنا رحنا للمقبره صارت بيبي تنعى وتبجي واحنه نبجي وياها صوتها الشجي او ونتها الحزينه تبجي اكبر واحد وكلامها كله عتب ولوم نزلنه اني لزمت علي من ايده وصلت القبر امي بجيت حييل

واهنا فصلت عن الكل

حضنت القبر واني اگلها = ماما مشتاقتلج

= ماما صباح الخير اكعدي احنه اجيناج

= وطلعت النتيجه اني نجحت من الثالث واوعدج دووم انجح

من وصلنه للمقبره اتفرقنا بيبي يم جدو وعمو بدر وبهاء يم جدو وابو وعلي اخويه كاعد يم رامي ويبجي ويكله // مشتاقلك رامي

عاصف بيده دبات المي ويغسل وبهاء هماتين غسل قبر جدي وقبر ابو وعاصف غسل قبر امي ورامي وابوي

واني بس ابجي واجت بيبي كعدت يمي وصارت تنعى واووف لو تسمعون صوتها وكلامها

وهي تعاتب باامي //. شسويتي يانجوى ليش هيجي

وكلام هوااي بحيث تحس انو الكل جاي يسمعها ويبجي وياها

  مسحت دموعها وهي تگول //. الخلف باالله

   باوعتلي // كافي جده عمج عاصف تعبان

باوعت شفته كاعد ومدنك وعيونه مليانات دموع

بهاء اجه // ها شبعتن بواجي خو جدتي ما خلت بعيونه دموع اذا شبعتن بواچي خلي نروح

    حاچيته = خلي ابقى بعد شويه

اتقرب عاصف وعيونه حمر وهو يگلي :: خلي نروح علي لا ينتكس

باوعت العلي گاعد يم قبر رامي ويحجي ويا بصوت ناصي ما عرفت شنو يكله هزيت راسي ورحت يم علي

  = گوم خلي نروح

() بعد ووكت

  = لا علووش هم ياالله بس قبلها خلي نروح نقرا الفاتحه الجدو وعمو بدر ياالله حبيبي

اخذته وگفنا يم جدو وعمو وقرينه الفاتحه وبعدها ركبنا بالسياره وطلعنه الكربلاء زرنا الامام الحسين واخيه

ابا الفضل العباس عليهما السلام وصلينه ورحنه اتغدينه بمطعم والحلو بيهم انو عاصف وبهاء متفقين على كل شي

واهنا بيبي طلبت انو تكعد بالساحه ما بين الحرمين بذيج الاجواء الحلوه والجو اليخبل عاصف كال

:: راح احجز فندق تعبان كلش

بيبي كالت // انا هم يمه اخذني وياك

بقيت اباوع عمو عاصف گلي :: تردين تبقيين

هزيت راسي = بس بيبي

:: ابقي انا يمها

  = ات تعبان عمو

:: مي خالف ابقى يمها على ما تجون

   اتقربت منه وسالته = عمو شبيك ؟

اتنفس بعمق وكلي :: راسي يوجعني

=لعد اني حجي وياكم

:: وين تجين

  = ابقى يم بيبي لان انت مبين كلش تعبان

   اتحسر :: تعاي فرح

  - - ها بابا

   :: هاج هاي فلوس خلي بهاء ياخذج انتي وعلاوي اشتري اي شي ايعجبج

اجه بهاء وعمو گله :: اشتري العلاوي ملابس زينات واي شي يريده اشتري اله

صار

  :: ياالله خلي نمشي

وصيت بهاء يدير باله عى علووش رحنه للفندق وعمو قبل لا ادخل للغرفه حجى وياي

     :: اي شي تحتاجينه لو امي تريده خابريني من تلفون جدتج

هزيت راسي ودخلنه ابدي اسبح بس ما جايبه وياي ملابس دخلت للحمام وغسلت هوااي بالماي بس ما سبحت

وبقيت بالغرفه كاعده واكو شباك مطل ع الشارع فتحته وبقيت اباوع للناس لمن ما صار دنيا مغرب اتوضييت وندهت بيبي للصلاه

اتوضت وهي تدعيلي بالتوفيق صليت وكملت وتقريبا وره ساعه من الصلاة اجوي بهاء وفرح وعلي وبمجرد ما اجو دك الباب عمو عاصف وگلي :: البسي عباتج وتعالي

= وين عمو

:: نزور

  = عمو خليها للصبح مو ات تعبان

  :: بسرعه البسي العبايه

   = بس حتى علاوي ما شفته

  :: هسه يجي بهاء اهنا يبقى ومن نرجع اتشوفينه

راح قبلي واني لبست جواريبي وعباتي وطلعت ورا شفت بهاء وعلاوي طلعو من الغرفه سالني بهاء // رايحه تتسوگين

= لا نزور

- - ادعيلي

= انت مو زرت كان دعيت النفسك

  - - منو كالج ما دعيت

   رفعت اديه = يارب يستجيب الك

  - - ان شاالله دعيت. نصير البعض بااسرع وقت 

اتقرب اكثر وكلي ( احبج )

  - - ابقي ساكته اشلعي بكلبي

نزلت الدرج شفت عمو واكف بصالة الفندق وفعلا رحنا نمشي وهو ساكت وزرت مره ثانيه وكعدت ابين الحرمين

وبعدها كلي خلي نطلع نتمشى وسالني اذا يعجبني اتعشى بس اني ما قبلت لان شبعانه فهو گلي :: لفه ناكل

  = عمو شبعانه هوااي. بس اذا انت يعجبك تاكول اكل

دخل الكفتريا ووطلب لفة كص وطلبلي صحن فواكه بارده وكلي

:: اكلي فواكه اذا ما تحبين تتعشين

  اكلنه وبالطريق اشترالي مكسرات واشترالي حب واخذني على محل ملابس هو مو محل واحد بنايه بيها عدة محلات

ومبينات من الراقي وهنا وكف وباوعلي. والجكاره بايده

:: شوفي انتي نجحتي وهاي فرحه مو بس الج لا الج والي والنه كلنه وحتى الامج. كافي حزن وهسه تدخلين تختارين

ملابس شنو ايعجبج وشكد ما تردين.

اتفاجأت بكلامه هزيت راسي = لا عمو ما اكدر

:: هو شني ما تكدرين الحزن بالكلب.

= عمو اخويه بالسجن شلون يجيلي نفس البس الوان

   :: اخوج شعلي وجد. لا تخليني ازعل منج هالمره الخاطري

بقيت ساكته وبنفس الوقت ما اگدر اكسر كلامه استحي منه دخلت وهو وياي اشتريت. لبستين وتراكين بعد خجلت

اشتري اكثر هو كلي :: بس هذني ؟

= اي عمو كافي

      هز ايده :: كافييش ما تگليلي

     = مي خالف عمو عود من احتاج اشتري

    نفخ الدخان من حلكه :: اوف منج شكد عنوديه

دخل المحل ثاني وثالث واشترالي قطعتين واخذلي عبايه اسلاميه وحذاء شفته ابتسمت هو كلي :: ها شنو ما عجبج

  = لا عجبني بس اني كوله البس ترانشوز

    :: مي خالف هذا من اتطلعين

   = شكرا عمو والصراحه ذوقك يخبل

        طلع فلوس من جيبه :: هاج

    = شنو ذني

   :: خليهن عندج. يجوز ايعجبج تشترين شي

     اخذتهن = شكرا عمو

رجعنه وهو اخذ حلويات وكرزات واني وكفت على ابو بسطيه اخذت جزدانات تلاثه العمه رجاء ونهاد وسميره

ورجعنا تقر يبا الساعه اهدعش ونص وثاني يوم بيبي كالت

- - اهنا تنزعين هدومج اهنا

  هزيت راسي = لا بيبي من نرجع

  - - لا شو اهنا جده انزعي وان شاالله ما تلبسينه على حبيب

سمعت كلامها نزعت الملابس ولبست فستان من الي اشتريتهن فرح كلتلي //. مبروك طلعتي كلش حلوه

    =. عيونج حبيبيتي

بيبي باوعتلي ورفعت راسها كانها تدعيلي ومن طلعت بهاء شافني // صلوات ما شاء الله ما عرفتج

ورجعنا للبيت واني احس بنفسيتي. كلش اتبدلت نحو الاحسن

وهيج اتعايشت ويه حياتي الي لابد منها رغم الخوف الي بداخلي والي ما يقبل يفارقني

وبيوم اجتي ساره هي وهاجر العصر گعدنا بغرفة بيبي وهاجر سالتني

- - انتي تكملين دراسه لو تبطلين

  = لويش ابطل اكمل طبعا

- - ها يعني اتحبين الدراسه

=. ليش الكذب اني ما احب هواي ادرس بس اني بنفس الوقت عندي هدف اريد احققه وما يتحقق اذا ما اكمل واخذ الشهاده

   فرح //. وشنو هذا الهدف ؟

= اريد انجح وانتظر اخويه هشام يطلع حتى نرجع البيتنا البغداد

ساره //. يابيت وجدان ؟

=. بيتنا بيتنا البغداد

هاجر //. شنو انتي ما تدرين لو اسوين روحج ما تدرين

=. شكو ؟

   هاجر // البيت مو بيتكم اصلا انتي واخوانج ما تملكون بي شبر البيت بيت عمي عاصف

ساره باوعت الفرح وهي ترفع بحواجبها وتبتسم //. يعني البيت بعد عمر طويل يصير بيتج

هاجر // اي وانتي تكعدين بي وتصيرين تحجيين كله اني وهياته وبلي ودا

ضحكن واني باوعت البيبي الي ماعقبت اكتفت گالت //. تفوتن اطلعن مو اتبغددتن

ساره // يا جده شبيج نسيتي مو انتي صرتي تحجيين بيوم ما اجتج ام وجدان واخوها سويتي عمل وصرتي تحچيين

بيبي //. اي بس اگول شذكرج بيها

ساره بابتسامه وتمد بالكلام //. مو وجدان كل ما تحجي اخذ الشهاده وارجع اني واخواني البغداد خطيه ليش انخليها

تتامل ع الفاضي عاد انا كلتلها

بيبي //. مو انتي الگلتي هاجر

ساره باابتسامه // اي جده كلنه ندري

بيبي بلا مبالاة // خوش گومن روحن فووك كملن سوالفچن وضحكجن

الفصل الثلاثون من هنا 

شكرا لزيارتكم عالم روايات سكيرهوم